\id 2TH  - Maka NT [mca] -Paraguay (web version -2013 bd) 
\h 2 TESALONICENSES
\toc1 2 TESALONICENSES
\toc2 2 Tesalonicenses
\toc3 2Ts
\mt1 2 TESALONICENSES
\c 1
\s Yojo in mexe wetfel paꞌ Pablo.
\p 
\v 1 Yakhaꞌ Pablo qa naꞌ Silvano qa naꞌ Timoteo hikaꞌaƚ haꞌne witfaakanek tꞌejuyii hekheweꞌ hats yijayan haꞌ Cristo iꞌniꞌ haꞌ witset Tesalónica, ewiꞌƚ iꞌnijiꞌ in yijayan paꞌ Intata qa haꞌ Yatsatꞌaxꞌinij Jesucristo.\x * \xo 1:1 \xt Hch 15:22; 16:1; 17:1; 2Co 1:19; 1Ts 1:1; 1P 5:12; 1Ti 1:2\x*
\m
\v 2 Naꞌlƚek paꞌ Intata qa haꞌ Yatsatꞌaxꞌinij Jesucristo quꞌ netꞌiftitsꞌiƚ ewets qaꞌ neƚisiꞌƚij iye paꞌ witꞌikesimeyaꞌx.
\s Paꞌ Intata yitanithen hatseꞌ pekheweꞌ yaqsiijkii paꞌ uƚꞌax.
\p 
\v 3 Yekheweliꞌƚ niteꞌ hiliꞌiƚij in hitjiiƚijetsphaꞌm paꞌ Intata ƚeꞌwisij qe taꞌƚiꞌƚ ewets week ekheweliꞌƚ, yejefets. Hats wejuꞌƚij in week neƚuts tꞌijaifikꞌi paꞌ niteꞌ eqekuyejeyiꞌƚij haꞌ Yatsatꞌaxꞌinij, qa hats wejuꞌƚij iye in week neƚuts les qi in ƚewetsuꞌuniꞌƚ.\x * \xo 1:3 \xt 1Co 13:1; 1Jn 4:16; Fil 2:2; 1Ts 4:10\x*
\m
\v 4 Yekheweliꞌƚ henfeljiiƚiꞌm hekheweꞌ hats yijayan haꞌ Cristo week heꞌ witsetits kaꞌ ejunyejeyiꞌƚ in niteꞌ ƚanqamiꞌƚij paꞌnteꞌ eqekuyejeyiꞌƚij haꞌ Yatsatꞌaxꞌinij yemjeetax in qi in ƚꞌawitjaxtiitaxiꞌƚ qa qi iye in ƚawtshenhetitaxiꞌƚkii iye.\x * \xo 1:4 \xt 2Co 12:5\x*
\m
\v 5 Akaꞌan in enifenyejyiꞌƚkii qa inqꞌethinij in niteꞌ yijanikꞌi paꞌ Intata quꞌ nitanithen pekheweꞌen qa ekhewelƚiꞌiƚ qaꞌ uyiꞌƚetsjiꞌ hatseꞌ paꞌ tenekꞌenheꞌyiꞌ paꞌ Intata, hikpaꞌ taꞌƚets in qi in ƚawtshenhetiꞌyiꞌƚkii.\x * \xo 1:5 \xt 1Jn 1:9; Mt 12:41; Jn 5:22,27,30; 8:16; 16:11; He 9:27; Stg 2:13; 2P 3:7; Ap 14:7; 16:7; 19:2; Fil 1:29\x*
\m
\v 6 Paꞌ Intata yatsathenikꞌi quꞌ nawtsheten hatseꞌ pekheweꞌ nawitjitaxiꞌƚ. 
\m
\v 7 Qa ekheweliꞌƚ in qi in ƚꞌawitjaxtiꞌyiꞌƚ qa qi quꞌ mawapiyiꞌƚ hatseꞌ qa yekheweliꞌƚ qaꞌ haꞌniꞌƚ etjiꞌtejeꞌm iye. Akaꞌan ƚunyeꞌjkii hatseꞌ quꞌ neꞌtwenhetiitaxjiphaꞌm naꞌ waꞌs haꞌ Yatsatꞌaxꞌinij Jesús qa peꞌ tꞌunits angelits qa paꞌ qi feꞌt iye,
\m
\v 8 maꞌ qaꞌ netisij pakhaꞌ wejuꞌƚij pekheweꞌ niteꞌ nikfeꞌlets paꞌ Dios qa niteꞌ tekꞌenikꞌi iye keꞌ ƚeꞌlijei haꞌ Yatsatꞌaxꞌinij Jesucristo.\x * \xo 1:8 \xt 1Co 3:13; He 10:27; 12:29; 2P 3:7; Ap 14:10; Sal 79:6; Is 66:15; Jer 10:25; 1P 4:17\x*
\m
\v 9 Pekheweꞌen niteꞌ yiliꞌij quꞌ qi quꞌ naatsꞌeꞌ pakhaꞌ wejuꞌƚij quꞌ namii, qi quꞌ toxiꞌ imiiha haꞌ Yatsatꞌaxꞌinij qaꞌ niteꞌ niꞌweneꞌ iye paꞌ qi ƚeꞌwis tujjiꞌ taꞌƚets paꞌ ƚetꞌunhaꞌx.\x * \xo 1:9 \xt 1Ti 6:9; Gn 4:14; Is 2:10,19,21\x*
\m
\v 10 Haꞌ Yatsatꞌaxꞌinij quꞌ netpiltaxjuꞌ hatseꞌ hatsꞌinha inekhewel in jitajayan qaꞌ qi quꞌ jintiwqinhetjiꞌ qaꞌ qiyiꞌija iye quꞌ jinteqenij hatseꞌ. Ekheweliꞌƚ ƚaꞌniꞌƚ jiꞌtejeꞌm hatseꞌ pekheweꞌen qe niteꞌ ƚeqekuꞌuƚikꞌi kekheweꞌ henfeliꞌƚ.\x * \xo 1:10 \xt Mr 8:38; Jn 17:10; Ro 8:17; Ef 5:3; 6:18\x*
\m
\v 11 Qa hik taꞌƚijupiꞌ in niteꞌ hiliꞌiƚij in kꞌiyiniꞌƚ epjiꞌkii week ƚahatsiyij hatsꞌinha in hats tꞌekuꞌmiꞌƚ eijiꞌkii paꞌ Intata qaꞌnteꞌ aqsiꞌjiꞌiƚijkii paꞌ uƚꞌax. Hatsꞌinha iye qaꞌ neƚisiꞌƚij paꞌquꞌ etꞌunhaxitsiꞌiƚijup quꞌ aqsiꞌjiꞌƚijkii paꞌ yisuꞌun, qe ekheweliꞌƚ ƚꞌekꞌeniꞌƚets.\x * \xo 1:11 \xt Ef 4:1; Col 3:15; Ga 2:16; 1Ts 1:3\x*
\m
\v 12 Maꞌ qaꞌ olots peꞌquꞌ niwqinhetjiꞌ kaꞌ ƚii haꞌ Yatsatꞌaxꞌinij Jesucristo qe taꞌƚiꞌƚ ewets qa ekheweliꞌƚ qaꞌ newqinhetiꞌƚjiꞌ iye qe taꞌƚets in ƚijayaniꞌƚ haꞌ Yatsatꞌaxꞌinij. Ekeweꞌen week quꞌ nataꞌƚets paꞌ ƚeqiꞌfenkeyeꞌj inij paꞌ Intata qa haꞌ Yatsatꞌaxꞌinij Jesucristo.\x * \xo 1:12 \xt Jn 13:31; 14:13; Hch 3:16; 15:14; Fil 2:10; Is 24:15; 49:3; 66:5; Mal 1:11; 2Co 8:23\x*
\c 2
\s Quꞌ netpiltaxjuꞌ paꞌ Yatsatꞌaxꞌinij.
\p 
\v 1 Yejefets, haneꞌej quꞌ kꞌefeliꞌƚiꞌm paꞌ ƚunyeꞌj quꞌ netpiltaxjuꞌ haꞌ Yatsatꞌaxꞌinij Jesucristo qa paꞌ ƚunyeꞌj iye quꞌ ewiꞌƚ jiꞌnentaxiꞌ, kꞌiyiniꞌƚij ewets\x * \xo 2:1 \xt 1Ts 1:10; 1Jn 2:28; Ap 11:8\x*
\m
\v 2 quꞌ hasuꞌuj quꞌ ajeꞌeƚ enƚꞌilaxiꞌƚ quꞌ impiꞌyeꞌeƚij quꞌ hats netpiljuꞌ paꞌaj haꞌ Yatsatꞌaxꞌinij quꞌ nataꞌƚets espirituyeꞌ in ƚꞌimpiꞌyeꞌeƚij iꞌnƚiꞌi quꞌ nataꞌƚets peꞌquꞌ wiꞌtlijeyeꞌ qa iꞌnƚiꞌi quꞌ nataꞌƚets paꞌquꞌ witfaakanekꞌe quꞌ netitijitiyijets quꞌ nataꞌƚiꞌƚ yiwets.\x * \xo 2:2 \xt 1Jn 2:28; 4:1; Mt 25:13; Hch 2:20; Fil 1:6; 2Ti 2:18\x*
\m
\v 3 Hasuꞌuj quꞌ nawitjiꞌiƚij peꞌyeꞌ akaꞌan, qe yojo quꞌ olootseꞌ peꞌquꞌ niliꞌij haꞌ Yatsatꞌaxꞌinij qa quꞌ neꞌtwenhetii paꞌ jukhew uƚꞌax ƚeiƚeꞌ, hikpaꞌ hats jutsiqax quꞌ nattanithenhetii hatseꞌ. Maꞌ qa hats netpiljuꞌ haꞌ Yatsatꞌaxꞌinij. 
\m
\v 4 Maꞌ qaꞌ inkꞌayeꞌƚe paꞌ jukhew uƚꞌax ƚeiƚeꞌ qaꞌ naqsiijkii quꞌ qi quꞌ netnekꞌenhei qaꞌ netꞌejuyijuꞌƚ week pekheweꞌ wenitꞌijets quꞌ diositseꞌ qa paꞌ Intata iye, qaꞌ ƚꞌejuihifetsiꞌij iye week peꞌ wekwek yejutshenets peꞌquꞌ ƚoqodiositseꞌ qa peꞌ tꞌejuyets iye paꞌ Intata. Maꞌ qaꞌ nuyifi peꞌ qi witlijtsitjii tꞌejuyets paꞌ Intata qaꞌ naꞌnipjiꞌ paꞌ wittsꞌojiꞌlaꞌx. Qaꞌ nitꞌij ƚetets quꞌ ƚakhaꞌyeꞌ paꞌ Dioosija.\x * \xo 2:4 \xt 1Co 8:5; Is 14:12-15; Ez 28:2; Hch 17:23\x*
\m
\v 5 ¿Me niteꞌ ƚantapiꞌiƚikꞌi akaꞌan in hayiits kꞌefeliꞌƚiꞌm in mexe haꞌniꞌƚ etjiꞌtejeꞌm? 
\m
\v 6 Ekheweliꞌƚ hats ƚenikfeꞌliꞌƚets paꞌ mexe niyejinikꞌui ipƚuꞌui quꞌ namets paꞌ ƚahatsꞌij quꞌ netestiꞌyij maꞌ qaꞌ neꞌtwenhetii paꞌ jukhew uƚꞌax ƚeiƚeꞌ.\x * \xo 2:6 \xt Lc 21:8\x*
\m
\v 7 Qe paꞌ ham nikfeꞌleꞌets uƚꞌax quꞌ ƚunyeꞌjeꞌkii hatseꞌ, hats iꞌnjuꞌ haneꞌej hats ewiꞌƚƚe in hamikꞌui quꞌ netenifteꞌjiꞌ paꞌ mexe yothetijuꞌƚ.\x * \xo 2:7 \xt Mt 13:41\x*
\m
\v 8 Maꞌ qaꞌ hayitseꞌ qaꞌ neꞌtwenhetii paꞌ jukhew uƚꞌax ƚeiƚeꞌ. Qa haꞌ Yatsatꞌaxꞌinij Jesús qaꞌ nifuyuꞌets qaꞌ uƚꞌaxeꞌjuꞌ paꞌ uƚꞌax ƚeiƚeꞌ qa paꞌ qi koojo taꞌƚets quꞌ nenteꞌnilitjuꞌ haꞌ Jesús qaꞌ niwuƚꞌenhetjuꞌ iye paꞌ uƚꞌax ƚeiƚeꞌ.\x * \xo 2:8 \xt Is 11:4; 30:28\x*
\m
\v 9 Haꞌne jukhew uƚꞌax ƚeiƚeꞌ ƚeqꞌithayinenek paꞌ Satanás qi quꞌ netꞌun quꞌ netnekꞌenhei qa naqsiijkii iye peꞌ ham ƚunyejeyijuꞌƚ qa niteꞌƚe yijaalija yisuꞌunƚe quꞌ nawitji eneꞌ seheꞌ epjiꞌ qa qi quꞌ nitjuƚaxiƚijphaꞌmkii.\x * \xo 2:9 \xt Mt 24:24; Mr 13:22; Ap 13:13\x*
\m
\v 10 Qi quꞌ nawitjiꞌijiꞌ peꞌ wekwek pekheweꞌ hats jutsiqets quꞌ namii paꞌ feꞌt qe eneweꞌen niteꞌ yisuꞌun paꞌ yijaataxija qekha iƚiyeꞌtax.\x * \xo 2:10 \xt Hch 16:30; Ef 2:8\x*
\m
\v 11 Qa hik taꞌƚijupiꞌ paꞌ Intata quꞌ niwejinij quꞌ nawitji paꞌ qi witwejtitsiꞌ pekheweꞌen, qa qi quꞌ numti quꞌ yijaayiꞌija.
\m
\v 12 Maꞌ qa iꞌnkꞌaƚe qaꞌ nitanithen week pekheweꞌ niteꞌ tekꞌenets paꞌ yijaataxija qe ƚekhewel yisuꞌunjiꞌ paꞌ uƚꞌax.\x * \xo 2:12 \xt Jn 5:22-30; 6:64\x*
\s Paꞌn ƚunyeꞌj paꞌquꞌ naqsiijkii pekheweꞌ hats yijayan paꞌ Jesús.
\p 
\v 13 Qa yekheweliꞌƚ les ƚeꞌwis quꞌ hitꞌiƚijetsphaꞌmkii ƚeꞌwisij paꞌ Intata qe taꞌƚiꞌƚ ewets. Yejefets haꞌ Yatsatꞌaxꞌinij nesuꞌuniꞌƚ qe paꞌ Intata hayiits tꞌekuꞌmiꞌƚ eijiꞌkii paꞌaj qe qaꞌ iꞌƚiyiꞌiƚ quꞌ nataꞌƚets paꞌ Espíritu Santo qa paꞌ niteꞌ eqekuyejyiꞌƚij paꞌ yijaaꞌija.\x * \xo 2:13 \xt Ro 6:19; 9:11; 11:5; Ef 1:4; 1Ts 1:4; 4:3; 1Co 1:30; 1Ti 2:15; He 12:14; 1P 1:2\x*
\m
\v 14 Akaꞌan hik akaꞌ ƚunyeeꞌjkiiha qa in yamets in tayaꞌyiꞌƚ ewets paꞌ Intata qa iꞌnijjiꞌ ekeweꞌ henfeliꞌƚ qe qaꞌ amiꞌƚets hatseꞌ paꞌ qi ƚesaꞌx haꞌ Yatsatꞌaxꞌinij Jesucristo.\x * \xo 2:14 \xt Lc 9:32; Jn 17:24; 2Co 3:18; 1P 5:1,4; 2P 3:18\x*
\m
\v 15 Qa hik taꞌƚijupiꞌ yejefets, mentꞌunhetiꞌƚ. Anqamkiteꞌeƚij kekheweꞌ hats kꞌijatsheniƚij in mexe haꞌniꞌƚ etjiꞌtejeꞌm qa kekheweꞌ hikaꞌaƚ eꞌm iye.\x * \xo 2:15 \xt Ro 14:4; 1Co 16:13; Fil 1:27; Mr 7:3; 1Ti 4:11; Jud 3\x*
\m
\v 16 Haꞌ Yatsatꞌaxꞌinij Jesucristo hik hakhaaꞌija, qa pakhaꞌ iye Intata Dios, pakhaꞌ jiyisuꞌun, pakhaꞌ jiyeƚisij in niteꞌ yiliꞌij in ikesimen peꞌ intawjets qa paꞌ inwetjumtikineyeꞌjikꞌui iye peꞌ jiyeƚisij hatseꞌ taꞌƚets paꞌ ƚeqiꞌfenkeyeꞌj,\x * \xo 2:16 \xt Jn 3:16; Ap 12:11\x*
\m
\v 17 quꞌ hik eneweꞌyeꞌ quꞌ nisimetsin qaꞌ nakakƚin iye peꞌ atawjetsiꞌƚ qaꞌ naqsiijkii iye quꞌ netꞌijaifikꞌi paꞌ ƚeꞌwis ithayijkitꞌiƚ qa ekeꞌ wiꞌtlijei ƚeꞌsits in ƚenfeliꞌƚ. 
\c 3
\s Pablo qa iyinets quꞌ netniyinheꞌyipjikii.
\p 
\v 1 Hatseꞌ, ewiꞌƚƚiꞌijha akaꞌ quꞌ hitꞌiƚij ewets iye. Yejefets, iyiniꞌƚyipjiꞌkii hatsꞌinha ekeꞌ ƚeꞌlijei haꞌ Yatsatꞌaxꞌinij qaꞌnteꞌ optoxeꞌ quꞌ week nenikfeꞌlets qaꞌ qi iye quꞌ niwqinhetjiꞌ peꞌquꞌ ujaꞌxeꞌ in ejunyejeyiꞌƚek in iꞌnkꞌaa ƚenikfeꞌliꞌƚets qa ƚiwqinhetiꞌƚjiꞌ.\x * \xo 3:1 \xt 1Ts 2:13\x*
\m
\v 2 Iyiniꞌƚyipjiꞌkii iye hatsꞌinha qaꞌ netswejinjiiƚikꞌuifikꞌi peꞌ niteꞌ yatsathen qa uƚꞌets iye jukhew qe niteꞌ week quꞌ nisuꞌun quꞌ nijayan haꞌ Jesús.\x * \xo 3:2 \xt Mt 27:43; Ro 15:31\x*
\m
\v 3 Qa haꞌ Yatsatꞌaxꞌinij niteꞌ yiꞌtƚiꞌijkii paꞌquꞌ hats nitꞌij qa yaqsiijkii. Qa hik taꞌƚijupiꞌ ƚakhaꞌ quꞌ neƚisiꞌƚij etꞌunhaxitsiꞌiƚ qaꞌ netweyijuꞌƚ iye paꞌ inwoꞌmet Satanás.\x * \xo 3:3 \xt Mt 5:37; 6:13; 13:19,38; Jn 17:15; Ef 6:16; 1Jn 2:13-14; 3:12; 5:18-19\x*
\m
\v 4 Yekheweliꞌƚ tsikfeꞌliꞌƚets haꞌ Yatsatꞌaxꞌinij quꞌ naqsiꞌjiꞌƚ eꞌmijkii akaꞌan qe qaꞌnteꞌ iliyiꞌiƚij quꞌ aqsiiƚijkii kekheweꞌ hats kꞌayajiꞌiƚijets.
\m
\v 5 Haꞌ Yatsatꞌaxꞌinij quꞌ nijatsheniꞌƚij quꞌ ineqsuꞌuniꞌƚ quꞌ hik ƚunyeꞌjeꞌ paꞌ Intata in qi in jiyisuꞌun, qaꞌ nijatsheniꞌƚij iye quꞌnteꞌ itaqsuniꞌiƚijup peꞌyeꞌ in ƚunyeꞌjek haꞌ Cristo.\x * \xo 3:5 \xt Ro 15:5; Ap 13:10\x*
\s Ƚeꞌwis quꞌ jiꞌntꞌithayii.
\p 
\v 6 Yejefets, akaꞌ ƚiijiꞌ haꞌ Yatsatꞌaxꞌinij Jesucristo kꞌayajiꞌiƚijets quꞌ meꞌnitoniꞌƚiꞌmets week paꞌquꞌ ƚunyeꞌjeꞌ pekheweꞌ niteꞌ ƚeꞌwisijupiꞌ paꞌ yaqsiijkii in hats yijayantax haꞌ Jesús qa niteꞌ iye yaqsiijkii kekheweꞌ hats kꞌijatsheniꞌƚij.\x * \xo 3:6 \xt Jn 14:13; Hch 3:16; 15:14; Fil 2:10; Mt 18:17; 1Co 5:11; 2Ti 3:5; 2Jn 10; Mr 7:3; Jud 3\x*
\m
\v 7 Ekheweliꞌƚ hats ƚenikfeꞌliꞌƚetsha in les ƚeꞌwis quꞌ ojonketiƚikꞌi akaꞌ yijunyejeyiꞌƚ. Yekheweliꞌƚ niteꞌ haqsiiƚijkii paꞌquꞌ uƚꞌaxeꞌ in mexe haꞌniꞌƚ etjiꞌtejeꞌmkii.\x * \xo 3:7 \xt 3Jn 11\x*
\m
\v 8 Yekheweliꞌƚ niteꞌ hetujƚiꞌiƚ peꞌquꞌ aqatsiꞌiƚ quꞌnteꞌ hijaniniꞌiƚ. Yekheweliꞌƚ qi in heyithayiꞌyiꞌƚ neƚuts qa najai hatsꞌinha qa ham paꞌquꞌ hipekhelinhetiꞌƚkii.
\m
\v 9 Yijaaꞌija in ƚekeꞌtax quꞌ nekꞌiyiniꞌƚij ewets quꞌ etsiꞌfeniꞌƚij peꞌyeꞌ qa hisuꞌunƚiꞌiƚ quꞌ kꞌethiniꞌƚij peꞌyeꞌ hatsꞌinha quꞌ ojonketiƚikꞌi.\x * \xo 3:9 \xt Mr 1:22; Hch 9:14; Ro 13:1; 1Co 9:4-14; He 8:5\x*
\m
\v 10 Qe yekheweliꞌƚ in mexe haꞌniꞌƚ etjiꞌtejeꞌm qa hitꞌiƚij ewets: —Pakhaꞌ quꞌnteꞌ nenithayiyuyeꞌ qa qantejeek netekeꞌ.—\x * \xo 3:10 \xt 1Ts 4:11\x*
\m
\v 11 Qe kꞌiyeꞌeƚij ekheweliꞌƚ in naꞌl peꞌ niteꞌ ƚeꞌwisijupiꞌ paꞌ yaqsiijkii. Niteꞌ nithayiyuꞌ ham yaqsiꞌjiꞌijkii. Qa yijalkiꞌsƚekii yithayimetenƚe peꞌyeꞌ.\x * \xo 3:11 \xt 1Ti 5:13\x*
\m
\v 12 Akaꞌ ƚiijiꞌ haꞌ Yatsatꞌaxꞌinij Jesucristo yekheweliꞌƚ hitꞌiƚijets in niteꞌ hiliꞌiƚij quꞌ hakakƚiniꞌƚ pekheweꞌ niteꞌ nithayiyuꞌ, qa quꞌ netꞌithayii ƚeꞌwis quꞌ nenithayimetsinƚe hatsꞌinha quꞌ ƚaaqiꞌija paꞌquꞌ netuj.
\m
\v 13 Qa ekheweliꞌƚ, yejefets, hasuꞌuj eniwefiꞌƚjuꞌ in ƚaqsiiƚijkii paꞌ ƚeꞌwis.\x * \xo 3:13 \xt Lc 18:1; 2Co 4:1,16; Ga 6:9; Ef 3:13\x*
\m
\v 14 Quꞌ nanaꞌl paꞌquꞌ ewiꞌƚeꞌ in niteꞌ neqjunutaxij ekeweꞌ wiꞌtlijei hikaꞌaƚ eꞌm, maxtayitiƚij. Hasuꞌuj eneqjunuꞌuƚetskii hatsꞌinha qaꞌ newepinkii. 
\m
\v 15 Qa hasuꞌujƚe quꞌ hik ƚunyeꞌjeꞌ quꞌ ejuihifeyiꞌiƚij. Enfeliꞌƚiꞌm yijatꞌij quꞌ niliꞌij paꞌ uƚꞌax hik eqfenyejeyiꞌiƚij paꞌquꞌ ejefeeyiꞌiƚha.
\m
\v 16 Haꞌ Yatsatꞌaxij paꞌ witꞌikesimeyaꞌx hik hakhaaꞌija quꞌ neƚisiꞌƚij paꞌ witꞌikesimeyaꞌx week ƚahatsiyij paꞌquꞌƚe niyiꞌiƚiꞌ. Haꞌ Yatsatꞌaxꞌinij quꞌ naꞌniꞌƚ etjiꞌjuꞌ.\x * \xo 3:16 \xt 1Ts 5:23; Nm 6:26; Ef 6:23; Ro 15:33; 1Co 16:24; 2Co 13:13; Tit 3:15; He 13:25\x*
\s Wetfel paꞌ Pablo.
\p 
\v 17 Yakhaꞌ Pablo. Yakhaaꞌija in hikaꞌ haꞌne ƚꞌakaꞌtheꞌjuꞌ haꞌne witfaakanek. Akaꞌan hik akaꞌ yeqfenyeꞌj jiꞌjij week keꞌ yifaakanhei. Eneweꞌen yeqꞌikatii.\x * \xo 3:17 \xt 1Co 16:21\x*
\m
\v 18 Naꞌlƚek haꞌ Yatsatꞌaxꞌinij Jesucristo quꞌ netꞌiftitsꞌiƚ ewets week ekheweliꞌƚ. Amén.