\id TIT  - Maka NT [mca] -Paraguay (web version -2013 bd) 
\h TITO
\toc1 TITO
\toc2 Tito
\toc3 Tit
\mt1 TITO
\c 1
\s Pablo mexe wetfel.
\p 
\v 1 Yakhaꞌ Pablo, ƚeqejkunenek paꞌ Intata qa apóstol\f + \fr 1:1\fr* \ft Apóstol ikjiꞌ witꞌukinekꞌij quꞌ nenfel keꞌ ƚeꞌlijei paꞌ Intata.\f* iye qe tꞌekuꞌmyiijiꞌ haꞌ Jesucristo. Heinekumhiꞌyiijiꞌ qe qaꞌ henfeliꞌm pekheweꞌ hayiits tꞌekuꞌmiijiꞌ pakhaꞌaj paꞌ Intata quꞌ ƚelitsiꞌij. Maꞌ qaꞌ nanaꞌliꞌm pakhaꞌ niteꞌ witqekuyeꞌj qaꞌ nenikfeꞌlets iye paꞌ yijaaꞌija in taꞌƚets paꞌ Intata.\x * \xo 1:1 \xt Hch 13:9; 16:17; Ro 1:1; 8:33; Ef 6:6; Stg 1:1; 1P 2:16; Ap 1:1; Mt 22:14; 24:22; Lc 18:7; Col 3:12; 1Co 1:27-28; 1Ts 1:4; Stg 2:5; 1Ti 2:4; 6:3; 2Ti 3:7\x*
\m
\v 2 Pakhaꞌ jiwetjumtiꞌets pakhaꞌan witiƚaꞌx niteꞌ yiliꞌij, hikpaꞌ hayiits paꞌaj in mexe ham haꞌne week in yiwjutsiqen paꞌaj paꞌ Intata. Paꞌ Intata niteꞌ ƚekeꞌ quꞌ nafꞌaliƚiꞌij paꞌquꞌ hats nitꞌij.\x * \xo 1:2 \xt 1Co 15:19; Tit 3:7; He 6:18; 9:15; Nm 23:19; Ro 1:2; 2Ti 1:9\x*
\m
\v 3 Qa haneꞌej, paꞌ ƚeqjeyumtshenek in hats yamets paꞌaj, maꞌ qa hats naꞌl akaꞌ hats yiwjutsiqen paꞌaj maꞌ qa tsꞌukin qa henfel keꞌ ƚeꞌlijei hakhaꞌ Dios Yatsatꞌaxꞌinij Eqiƚinaꞌx.\x * \xo 1:3 \xt Jn 1:1; 2:22; 21:1; 2Co 4:11; 1P 5:4; 1Jn 1:2; 2Ti 1:12,14; 2:15; He 4:12; 1Ti 1:1,11; 2:3; 6:20; Tit 2:10; 3:4; Jud 25\x*
\m
\v 4 Haꞌne witfaakanek tꞌejuyii haꞌ Tito. Hik hakhaꞌ yijaaꞌija in hik ƚunyeꞌj quꞌ yaꞌseꞌ qe taꞌƚets in yijaaꞌija in heikꞌeniꞌƚets haꞌ Jesús. Naꞌlƚek paꞌ Intata Dios qa haꞌ Yatsatꞌaxꞌinij Jesucristo eqiƚinaꞌx quꞌ netꞌiftits ewets qaꞌ neƚisij iye paꞌ witꞌikesimeyaꞌx.\x * \xo 1:4 \xt 2Co 2:13; 7:6,13-14; 8:6,16,23; 12:18; Ga 2:1,3; 2Ti 4:10; 1Ti 1:2; Ro 1:7; 1Co 1:3\x*
\s Paꞌn ƚunyeꞌj paꞌquꞌ jukheweꞌ quꞌ ƚekeꞌyeꞌ quꞌ netnekumhiꞌyiꞌ qa netnekꞌenheꞌyij peꞌ witlijtsitjii.
\p 
\v 5 Haꞌ ƚꞌisƚawetꞌii seheꞌ ƚii Creta hikhaꞌ kꞌejetiꞌ qe qaꞌ anqhatꞌaxij kakhaꞌ mexe hamtaxikꞌui kakhaꞌan quꞌ jeƚiijiꞌ peꞌquꞌ netnekꞌenheꞌyij hekheweꞌ yijayan haꞌ Jesús in ujaꞌxek heꞌ witsetits iꞌniꞌ haꞌ seheꞌ Creta. Hik akaꞌ kꞌayajiꞌijets.\x * \xo 1:5 \xt Hch 27:7,12-13; 1Ti 3:1-7; 5:17\x*
\m
\v 6 Pakhaꞌ quꞌ nejeƚets peꞌ hats yijayan haꞌ Cristo qa akaꞌan quꞌ ƚunyeꞌjeꞌ maꞌ qaꞌ netnekumhiꞌyiꞌ, nowoꞌoi quꞌ hasuꞌuj nenitꞌijets quꞌ uƚꞌaxeꞌ, qaꞌ ewiꞌƚeꞌƚiꞌi iye peꞌquꞌ ƚewheꞌyeꞌyeꞌ, peꞌquꞌ ƚelitseꞌ nijayan haꞌ Jesucristo, qa hasuꞌuj quꞌ netniiheꞌyij quꞌ niteꞌ netkꞌeneꞌets peꞌquꞌ ƚꞌalheyeꞌ iꞌnƚiꞌi quꞌnteꞌ nimpiꞌyeleꞌ.\x * \xo 1:6-8 \xt 1Ti 3:2-4; Col 1:22\x*
\m
\v 7 Qe paꞌquꞌ nejeƚets peꞌ hats yijayan haꞌ Cristo nowoꞌoi quꞌ hasuꞌuj nenitꞌijets quꞌ uƚꞌaxeꞌ qe ƚakhaꞌ ƚeqejkunenek paꞌ Intata. Qa hasuꞌuj quꞌ numti quꞌ week natꞌanipjiꞌ, qa quꞌ peteyiꞌikꞌuyii peꞌyeꞌ qaꞌ hasuꞌuj ajeꞌeƚ naꞌnayuꞌkii, hasuꞌuj nekꞌuwet, hasuꞌuj nisuꞌun quꞌ netqekꞌuyij ƚokoi, hasuꞌuj iye nisuꞌun ƚꞌastai.\x * \xo 1:7 \xt Hch 20:28; Fil 1:1; 1P 2:25\x*
\m
\v 8 Akaꞌ quꞌ ƚunyeꞌjeꞌ yijatꞌij, netisij ƚewhiꞌwetꞌeꞌ peꞌquꞌ niꞌwenikꞌui, nisuꞌun week paꞌ ƚeꞌwis, qaꞌ nejeeƚꞌekuꞌukꞌuiha paꞌquꞌ naqsiijkii, qaꞌ natsathen iye, qaꞌ nisuꞌuunija iye paꞌquꞌ nisuꞌun paꞌ Intata, qaꞌ hasuꞌuj iye neqenijanij in niteꞌ yaqsiijkii paꞌquꞌ uƚꞌaxeꞌ.
\m
\v 9 Nijayaanija paꞌ yitꞌij kekheweꞌ hats tꞌijatshenhetiꞌyij Intata ƚeꞌlijei hatsꞌinha qaꞌ nenikfeꞌljeetsek paꞌn ƚunyeꞌj quꞌ ninqꞌijatshenij paꞌ yijaaꞌija in yitꞌij keꞌ Intata ƚeꞌlijei. Qaꞌ nenikfeꞌlets iye paꞌn ƚunyeꞌj quꞌ netweyijuꞌƚ pekheweꞌ yumtitax quꞌ yijaaliꞌija peꞌ nifeltax qa tꞌejuiƚiꞌijuꞌƚ keꞌ Intata ƚeꞌlijei.\x * \xo 1:9 \xt Hch 2:42; 1Ti 1:10; 6:3; 2Ti 1:13; Tit 2:1\x*
\m
\v 10 Qe olots peꞌ ham nekꞌenheyuyeꞌets, qa peꞌ iyetƚe ham wejuꞌƚiꞌij paꞌ nifeltax qa iwotkꞌonhetsits iye. Qa akaꞌan les hitꞌijets pekheweꞌ judiol qe hik akaꞌ ƚunyejei.
\m
\v 11 Eneweꞌen hasuꞌuj iwejiniꞌƚiꞌm quꞌ nenithiyutax qe yiwuƚꞌenhet paꞌquꞌ jukheweꞌ qa week peꞌ ƚewheꞌyeꞌ qa peꞌ ƚelits iye qe yijatshenij pakhaꞌ niteꞌ ƚeꞌwis. Pekheweꞌen in yaqsiijkii akaꞌan yisuꞌunƚe quꞌ nanaxij ƚꞌastai hik akaꞌ niteꞌ ƚeꞌwistax. 
\m
\v 12 Hekheweꞌ Creta ƚeiƚets paꞌ ewiꞌƚ yitꞌij ƚetets quꞌ profetayeꞌ, yitꞌij paꞌaj: —Eneꞌ week Creta ƚeiƚets eneweꞌen ejtitsits, hik ƚunyejei neꞌej iftsits inqaꞌmetets, ekunhets qa walxalits iye niteꞌ nithayiyuꞌ.—
\m
\v 13 Qa yasiinikꞌiha kaꞌ yitꞌij qa hik taꞌƚijupiꞌ aqꞌayiniꞌƚij pekheweꞌ ƚunyejei akaꞌan hatsꞌinha qaꞌ nijayaanija haꞌ Yatsatꞌaxꞌinij.\x * \xo 1:13 \xt Jn 8:14; 2Co 13:10\x*
\m
\v 14 Qa hasuꞌuj eneqjunuꞌuƚij pekheweꞌ nifeljiikꞌi peꞌ judiol (cuentos) qa hasuꞌuj iye eneqjunuꞌuƚij pekheweꞌ tꞌejuyijuꞌƚ keꞌ Intata ƚeꞌlijei taꞌƚets eneꞌ jukhewƚe in teꞌsuꞌunhetii quꞌ natjayanhetii.\x * \xo 1:14 \xt 1Ti 1:4; 4:7; 2P 1:16; 2Ti 4:4\x*
\m
\v 15 Week ekeꞌ jiteꞌwen wekwek ƚesitsiꞌm peꞌquꞌ hats hamitseꞌjiꞌ peꞌ ƚatawjets peꞌ ƚewuƚꞌets. Qa pekheweꞌƚe yeqekuꞌ haꞌ Cristo naꞌljiꞌ peꞌ ƚatawjets peꞌ ƚewuƚꞌets qa week uƚꞌetsiꞌm ekeweꞌen, qe peꞌ ƚaqjamtikineyejeikii qa peꞌ ƚatawjets iye yaqamaxjiꞌ paꞌ uƚꞌax.\x * \xo 1:15 \xt He 13:18\x*
\m
\v 16 Eneweꞌen yitꞌijets in nikfeꞌlets paꞌ Intata qa pakhaꞌƚe ƚunyejei qa hikpaꞌ jutsiqaxij in niteꞌ nikfeꞌlets paꞌ Intata. Eneweꞌen uƚꞌeetsija, ham nekꞌenheyuyeꞌets qa niteꞌ wejuꞌƚij quꞌ naqsiꞌjtaxijkii paꞌquꞌ ƚeꞌwiseꞌ.\x * \xo 1:16 \xt Jn 7:28; Mr 14:6; Ga 3:10; Stg 2:14-26; 2Co 9:8\x*
\c 2
\s Meꞌnqꞌijatshenij paꞌ hats yitꞌij keꞌ Intata ƚeꞌlijei.
\p
\v 1 Qa akhaꞌ Tito, meꞌnqꞌijatshenij pakhaꞌ hats yitꞌij ekeweꞌ Intata ƚeꞌlijei.\x * \xo 2:1 \xt Tit 1:9\x*
\m
\v 2 Ijatshenij pekheweꞌ hats ƚawaꞌmhits quꞌ hasuꞌuj nekꞌuwet, ƚeꞌwis paꞌquꞌ ƚunyejeyeꞌ hatsꞌinha quꞌ qi quꞌ niwqinhetjiꞌ pekhewepeꞌ. Qa newetjeeƚƚotokꞌoiha iye, tꞌunitsiꞌijha paꞌnteꞌ ƚeqekuyejeyij haꞌ Cristo, qaꞌ tꞌunitsiꞌijha iye paꞌ ƚeqsuꞌunkaꞌxij eneꞌ week, qaꞌ tꞌunitsiꞌijha iye in niteꞌ yoꞌqmositij.\x * \xo 2:2 \xt 1Ti 5:1; 1Co 13:1; 1Jn 4:16\x*
\m
\v 3 Qa hik ƚunyejeyeꞌ iye pekheweꞌ hats ƚawaꞌmhii efuts quꞌ nijayaanija haꞌ Cristo qaꞌ naqsiijijkiiha paꞌ hats yitꞌij, hasuꞌuj nowotkꞌonƚiꞌijkii paꞌquꞌ nenfelkii, hasuꞌuj newetƚisij quꞌ nekꞌuwet, ninqꞌijatshenij yijatꞌij paꞌ ƚeꞌwis,\x * \xo 2:3 \xt 1Ti 5:2\x*
\m
\v 4 qaꞌ nijatshenij iye pekheweꞌ efuts qa peꞌ mexe inanyii iye quꞌ nisuꞌun paꞌquꞌ ƚewheꞌyeꞌyeꞌ qa peꞌquꞌ ƚelitseꞌ iye
\m
\v 5 qaꞌ newetjeeƚƚetokꞌoiha iye, hamitseꞌjiꞌha peꞌ ƚatawjets peꞌ uƚꞌets, nejeƚets qaꞌ naqsiꞌj iye peꞌ ƚetsetitits, ƚeꞌwiisija paꞌquꞌ ƚunyejeyeꞌ, netkꞌenets qaꞌ niwqinhet iye paꞌquꞌ ƚewheꞌyeꞌyeꞌ, hatsꞌinha qaꞌnteꞌ nenitꞌiꞌijets quꞌ uƚꞌetseꞌ ekeꞌ Intata ƚeꞌlijei.\x * \xo 2:5 \xt Lc 8:21; 10:17; Ef 5:22; 2Ti 2:15; He 4:12\x*
\m
\v 6 Qaꞌ hik eqfenyejeyiꞌij iye quꞌ akakƚinij peꞌ jutjanhets quꞌ newetjeƚƚotokꞌoiha.\x * \xo 2:6 \xt 1Ti 5:1; 1P 5:5; 1Jn 2:13-14\x*
\m
\v 7 Meꞌnethinijkiiha week ekeweꞌ ƚeꞌsits hatsꞌinha qaꞌ neneqjeyuꞌuj ewets pekhewepeꞌ. Kekheweꞌ yitꞌij keꞌ Intata ƚeꞌlijei quꞌ meꞌnqꞌijatshenij akhaꞌ iye quꞌ aqsiijkii qaꞌ ekꞌenets iye. Qaꞌ yijaayiꞌija iye quꞌ meꞌnqꞌijatshenij hatsꞌinha pekheweꞌen qaꞌ qi quꞌ niwqinhetjiꞌ ekeꞌ wiꞌtlijei.
\m
\v 8 Neqetꞌeetsikꞌiha iye peꞌquꞌ meꞌnqꞌijatshenij hatsꞌinha qaꞌ ham paꞌquꞌ nitꞌijets quꞌ uƚꞌetseꞌ peꞌ ƚiꞌnqꞌijatshenij. Maꞌ qaꞌ newepinkii pakhaꞌ quꞌ ƚꞌanyejetax akaꞌan qe ham paꞌquꞌ jinifeltaxijkii quꞌ uƚꞌaxeꞌ.\x * \xo 2:8 \xt 1Ti 2:2\x*
\m
\v 9 Qaꞌ hik eqfenyejeyiꞌij iye quꞌ akakƚinij iye pekheweꞌ mexe witƚinhei (esclavos) quꞌ netkꞌenets qaꞌ naqsiijkii iye paꞌquꞌ nitꞌijets paꞌquꞌ ƚaqa patuneꞌ. Nowoꞌoi quꞌ ƚeꞌwisiꞌimkii paꞌquꞌ ƚaqa patuneꞌ. Hasuꞌuj notꞌoqoweꞌyijuꞌƚ paꞌquꞌ natyajaxtiꞌyijets quꞌ naqsiijkii.\x * \xo 2:9 \xt Ef 6:5-9; Col 3:22; 1Ti 6:1; 1P 2:18; Jud 4; He 13:21\x*
\m
\v 10 Hasuꞌuj netꞌejtenkii, niꞌnqꞌethinij yijatꞌij in niteꞌ iyowkꞌelets hatsꞌinha qaꞌ nethinkii in ƚeꞌwiisija paꞌ jiyijatshenij ekeꞌ ƚeꞌlijei hakhaꞌ Dios hikhaꞌ Eqiƚinaꞌx.\x * \xo 2:10 \xt 1Ti 1:1,3; 2:3; 3:4; Jud 25\x*
\m
\v 11 Qe hakhaꞌ ƚeqiꞌfenkeyeꞌj paꞌ Intata hats weꞌnethinkii qe qaꞌ netisij peꞌquꞌ ƚiƚaxitseꞌ eneꞌ week jukhew qa efuts pekheweꞌ quꞌ nisuꞌun.\x * \xo 2:11 \xt Hch 1:8; Ro 10:14; 2Co 5:18-21; 1Ti 2:4; 4:10; 2P 3:9\x*
\m
\v 12 Qa jiyijatshen iye, maꞌ qa jiteliꞌij in jiyintaxii pekhewep qa jiteliꞌij iye paꞌ witeqsuꞌunkaꞌxijjiꞌ paꞌ uƚꞌax haꞌne week seheꞌ ipjiꞌ. Maꞌ qaꞌ jinewetjeƚ intokꞌoiha in mexe juꞌunipjiꞌ haꞌne seheꞌ qaꞌ jintatsathen iye qaꞌ jintekꞌeenetsha iye paꞌ Intata.\x * \xo 2:12 \xt Jud 18; 2Ti 3:12; 4:10; 2P 1:4; 2:10; Lc 23:41; 1Co 15:34; 1Ts 2:10; 1P 2:24\x*
\m
\v 13 Haneꞌej niteꞌ jiteliꞌij in jitaqsiꞌj paꞌ ƚeꞌwis inwetjumtikineyejeyikꞌui, pakhaꞌan quꞌ neꞌtwenhetiitax paꞌ qijiꞌ ƚamijiijuꞌ haꞌ qijiꞌ in Dios hikhaꞌ Eqiƚinaꞌx Jesucristo.\x * \xo 2:13 \xt Hch 23:6; 1Ts 1:3; Lc 9:32; Jn 17:1,24; 2Co 3:18; 2P 3:18\x*
\m
\v 14 Ƚakhaꞌ wetƚisƚiꞌij paꞌaj in waꞌm infi qe qaꞌ jinilithinikꞌui in jitaqsiꞌjtaajkii paꞌ uƚꞌax qa jiyiliꞌjjuꞌ qa jiyatsatꞌetsij in inejefeeꞌija hakhaꞌan qa jiyeqethenjuꞌ. Eneweꞌ yeqeꞌthenjuꞌ ewiꞌƚƚe in yisuꞌun quꞌ naqsiijkii paꞌ ƚeꞌwis.\x * \xo 2:14 \xt Mt 20:28; Mr 10:45; Ro 8:32; Ga 1:4; 2:20; Ef 5:2,25; 1Ti 2:6; Ex 19:5; Lc 1:68\x*
\m
\v 15 Meꞌneniha in ƚꞌenekꞌenheyij peꞌ witlijtsitjii quꞌ iyetij week ekeweꞌen, qaꞌ meꞌnqꞌijatshenij iye qaꞌ aqꞌayinij iye pekheweꞌ quꞌ ninqꞌijatshentaxij paꞌquꞌ pakhaꞌ ƚunyeꞌjeꞌ. Qa hasuꞌuj paꞌquꞌ nuten.
\c 3
\s Paꞌquꞌ ƚunyeꞌjeꞌ paꞌquꞌ hats nijayan paꞌ Intata.
\p 
\v 1 Tito, iyeketijets iye akaꞌan quꞌ enfeliꞌm heꞌ inejefetsipjiꞌ quꞌ niwqinhetjiꞌha pekheweꞌ qitsjiꞌ witꞌalhei qa pekhewep tenekꞌenhei. Ƚeꞌwis quꞌ nimpiyel, qaꞌ natjanithenikꞌuikiiha iye paꞌquꞌ ƚunyeꞌjeꞌ paꞌ ƚeꞌwis quꞌ naqsiijkii.\x * \xo 3:1 \xt Ro 13:1-7; 1P 2:13-14\x*
\m
\v 2 Hasuꞌuj quꞌ nitaqsunijup quꞌ nenfelijkii quꞌ nitꞌijets quꞌ naqsiijkii paꞌquꞌ uƚꞌaxeꞌ pakhapeꞌ, hasuꞌuj nisuꞌun quꞌ ajeꞌeƚ netqekꞌuyij ƚokoi, nineqsuꞌun yijatꞌij, qaꞌ nethinij iye eneꞌ week in niteꞌ weniwqinhet.\x * \xo 3:2 \xt Stg 3:13\x*
\m
\v 3 Qe kekhewep ƚahatsiyij inekhewel iye jitaqsiijkii kekheweꞌ ham wejuꞌƚiꞌij, qa niteꞌ jiꞌmpiꞌyel iye, jiteqfeetsinƚiꞌiikii paꞌquꞌ inikheyiꞌjeꞌ, ƚeƚinheiꞌinij iye paꞌ witeqsunkaxijjiꞌ pekheweꞌ wekwek jinikfeꞌltaxets in uƚꞌets, qa in hik ƚunyeꞌj iye quꞌ natsatꞌetsꞌinij naꞌaj jitesuꞌun pekheweꞌ wekwek haꞌne seheꞌ epjiꞌ, jiꞌnapjaxƚeꞌetskii peꞌyeꞌ qa jitawtshetenƚe, jeꞌqemtshenetsitsij naꞌaj wekwek, jitaqsiꞌjƚiꞌijkii quꞌ jinuten eneꞌ week, inekhewel qa jitutenek eneꞌ week.\x * \xo 3:3 \xt 2P 1:4; 2:10; Stg 4:1\x*
\m
\v 4 Maꞌ qa in hats jiꞌyethinij paꞌ qi ƚeqꞌiltiyejeiꞌinij qa paꞌ qi ƚeqsuꞌunkaꞌx inij iye hakhaꞌ Dios Eqiƚinaꞌx,\x * \xo 3:4 \xt 1Ti 1:1; 2:3; Tit 1:3; 2:10; Jud 25\x*
\m
\v 5 ƚakhaꞌ qa hats jiyiƚin. Quꞌ jiꞌƚaꞌxeꞌ niteꞌ taꞌƚets paꞌquꞌ jintumtitax quꞌ ƚeꞌwiseꞌ quꞌ jintaqsiꞌjtaajkii, paꞌ ƚeqꞌiltiyejꞌinij yijatꞌij hikpaꞌ taꞌƚets quꞌ jiꞌƚaꞌxeꞌ. Maꞌ qa jiyiliijijjuꞌha peꞌ inwuƚꞌets, maꞌ qa hats hik injunyeꞌj quꞌ jinkꞌayikꞌeꞌ qe taꞌƚets paꞌ Espíritu Santo\x * \xo 3:5 \xt Ro 11:14; 12:2; 2Ti 1:9; Ef 2:4,9; 5:26; 1P 1:3; 3:21; Jn 3:5\x*
\m
\v 6 hikpaꞌ qi paꞌ yatsii iꞌnipjiꞌ paꞌ Intata qe taꞌƚets haꞌ Jesucristo hikhaꞌ Eqiƚinaꞌx,\x * \xo 3:6 \xt Jl 2:28; Hch 2:33; 10:45; Ro 5:5\x*
\m
\v 7 hatsꞌinha paꞌ ƚeqiꞌfenkeyeꞌj haꞌ Jesucristo qaꞌ jinatsathenket maꞌ qa jineƚisij paꞌ hats jinikfeꞌlets in naꞌl pakhaꞌan witiƚaꞌx niteꞌ yiliꞌij.\x * \xo 3:7 \xt Hch 13:43; 15:11; 1Co 8:1; Ga 1:6; 1P 4:10; Tit 1:2\x*
\m
\v 8 Ekeweꞌen ekeꞌ wiꞌtlijei yijaalija. Qa hik taꞌƚijupi in hisuꞌun quꞌ iwjutsiqeenija in yijaaꞌija pakhaꞌ quꞌ iyetij ekeweꞌen, hatsꞌinha pekheweꞌ hats tekꞌenets paꞌ Intata qaꞌ nisuꞌuunija quꞌ naqsiijkii paꞌ ƚeꞌwis. Akaꞌan ƚeꞌwis in tꞌejuyets eneꞌ week jukhew qa efuts qa wejuꞌƚij iye.\x * \xo 3:8 \xt 1Ti 1:15; 3:1; 4:9; 2Ti 2:11\x*
\m
\v 9 Mewetwuꞌmikꞌuiha pekheweꞌ tafaakateꞌyijjuꞌkii qa niteꞌ yeqetꞌetskii peꞌ yumti, qa peꞌ uƚꞌetsij wetjuꞌƚkii in tꞌejuyets peꞌ ƚawaꞌmhitsikꞌi, qa peꞌ wataꞌnutenij wetjuꞌƚkii peꞌ yumti maꞌ qa tekꞌeƚeyijjuꞌ qa peꞌ wataꞌnutenij wetjuꞌƚkii keꞌ yikaꞌ paꞌaj paꞌ Moisesꞌikꞌi (ley), mewetwuꞌmikꞌuiha qe ekeweꞌen ham wejuꞌƚiꞌij.\x * \xo 3:9 \xt 1Ti 1:4; 6:4; Ro 1:29; 13:13; 1Co 1:11; 3:3; 2Co 12:20; Ga 5:20; Fil 1:15\x*
\m
\v 10 Paꞌquꞌ jukheweꞌ quꞌ nataꞌƚets in yeqetꞌetsjuꞌkii, in hats wetsjukꞌij quꞌ aqꞌayintaxij in niteꞌ ƚeꞌwisjuꞌ paꞌquꞌ nenfeltax qaꞌ iwuꞌmfikꞌi.\x * \xo 3:10 \xt 1Ti 1:9; Mt 18:15; 2Ts 3:15\x*
\m
\v 11 Hats ƚenikfeꞌlets pakhaꞌan in uƚꞌax paꞌ yisuꞌun. Niteꞌ yaqsiijkii paꞌ yisuꞌun paꞌ Intata qa hats ƚakhaꞌƚe ƚeteꞌm in wetwuƚꞌenhetjuꞌ.
\s Nenijatshenij quꞌ naqsiijkii paꞌ ƚeꞌwis.
\p 
\v 12 In mexe ƚaꞌniꞌ haꞌ ƚꞌisƚawetꞌii seheꞌ ƚii Creta, quꞌ heꞌnukintax ei hatseꞌ haꞌ Artemas iꞌnƚiꞌi haꞌ Tíquico, qaꞌ mowoqekuꞌui watꞌij quꞌ ajeꞌeƚ anamyii hatseꞌ haꞌ witsetꞌii Nicópolis qe hikhaꞌ quꞌ haꞌniꞌkii hatseꞌ quꞌ lopꞌetax.\x * \xo 3:12 \xt Hch 20:4; Ef 6:21; Col 4:7,9; 2Ti 4:12; Lc 14:26\x*
\m
\v 13 Iꞌfenij week paꞌquꞌ ƚekeꞌyeꞌ quꞌ iꞌfenij haꞌ abogado Zenas qa haꞌ Apolos, hatsꞌinha qa ham paꞌquꞌ hamiꞌikꞌui quꞌ nakkii iye.\x * \xo 3:13 \xt Hch 18:24; 19:1; 1Co 1:12; 3:4-6,22; 4:6; 16:12; Stg 2:15\x*
\m
\v 14 Qa peꞌ hats inejefetsipjiꞌ qaꞌ nenijatshenij quꞌ naqsiijkii paꞌ ƚeꞌwis, niꞌfen paꞌquꞌ neƚꞌilax hatsꞌinha qaꞌnteꞌ hik ƚunyejeyeꞌ neꞌej ewiꞌƚ najkak ham ƚeyeꞌ.\x * \xo 3:14 \xt Mt 13:22; Mr 4:19; 1Co 14:14; Ga 5:22; Ef 5:11; 2P 1:8; Jud 12\x*
\m
\v 15 Week eneweꞌ iꞌnyijup wetfel ei. Hewetfeliꞌƚii week hekheweꞌ tsisuꞌuniꞌƚ inejefetsipjiꞌ. Naꞌlƚek haꞌ Yatsatꞌaxꞌinij quꞌ netꞌiftitsꞌiƚ ewets.\x * \xo 3:15 \xt Col 4:18; 2Ts 3:16\x*