\id 1JN  - Maka NT [mca] -Paraguay (web version -2013 bd) 
\h 1 JUAN
\toc1 1 JUAN
\toc2 1 Juan
\toc3 1Jn 
\mt1 1 JUAN
\c 1
\s Jesús qa ƚii iye Wiꞌtlijei.
\p 
\v 1 Hakhaꞌ yojoo in naꞌl, hikhaꞌ hepiꞌyeꞌeƚ qa yijaaꞌija iye in hiꞌweniꞌƚ qa hejeƚiꞌƚijupkiiha iye kaꞌ ƚunyeꞌj in qi in ƚeꞌwis qa heꞌyekuumiꞌƚetskiiha iye. Hik hakhaꞌ haꞌ ƚii Wiꞌtlijei qa jiyeƚisij paꞌ witiƚaꞌx.\x * \xo 1:1 \xt 1Jn 2:13-14; Sal 119:25; Jn 1:1,4; 5:24; Fil 2:16\x*
\m
\v 2 Hakhaꞌ witiƚaꞌx hats weꞌnethinkii qa hiꞌweniꞌƚ. Qa yekheweliꞌƚ qaꞌ henfeliꞌƚ in yijaaꞌija. Qaꞌ henfeliꞌƚ eꞌm haꞌ witiƚaꞌx in niteꞌ ham. Hikhaꞌ hayiits iꞌnijup paꞌaj paꞌ Intata qa haneꞌej qa hats weꞌnethinkii.\x * \xo 1:2 \xt Jn 1:31; 21:1,14; Col 3:4; 1P 5:4; 1Jn 2:28; 3:5,8; 5:20\x*
\m
\v 3 Hakhaꞌ hiꞌweniꞌƚ qa hepiꞌyeꞌeƚ iye, hikhaꞌ quꞌ henfeliꞌƚ eꞌm haneꞌej hatsꞌinha qaꞌ ewiꞌƚ jinaꞌnijiꞌ iye qa hik ejunyejeyiꞌiƚ akaꞌ yijunyejeyiꞌƚ in ewiꞌƚ haꞌniꞌƚiꞌ paꞌ Intata qa haꞌ Ƚaꞌs Jesucristo.\x * \xo 1:3 \xt Fil 3:10; Mt 11:27\x*
\m
\v 4 Ekeweꞌen hikaꞌaƚ eꞌm hatsꞌinha qa jeꞌweekeꞌ quꞌ qi quꞌ jeꞌƚeꞌsitsiꞌimkii.\x * \xo 1:4 \xt 2Co 2:3; Fil 1:4,25; 2:18\x*
\s Paꞌ Intata ƚakhaꞌ naꞌlkii.
\p 
\v 5 Ekeweꞌen hik ekeweꞌ hepiꞌyeꞌeƚ ƚeꞌlijei haꞌ Jesucristo qa hik ekeweꞌ iye quꞌ kꞌefeliꞌƚiꞌm in yitꞌij: —Paꞌ Intata ƚakhaꞌ naꞌlkii. Hamiꞌm paꞌ nookii.—\x * \xo 1:5 \xt Sal 27:1; 36:9; Jn 12:46; 1Ti 6:16; 1Jn 2:5\x*
\m
\v 6 Quꞌ jintittaxijets quꞌ hats ewiꞌƚ jinaꞌniꞌƚiꞌ hakhaꞌan qa jitajalkiꞌsƚejiꞌkii paꞌ nookii qa jiwotkꞌonijkii naꞌaj jititꞌij qa naꞌaj jitaqsiꞌjijkii iye.\x * \xo 1:6 \xt 2Co 8:4; 11:10; Pr 2:13; Is 9:2; 50:10; Jn 8:12; 12:35; 14:6; 1Jn 2:11; 3Jn 3\x*
\m
\v 7 Qa quꞌ jinaaꞌniꞌha paꞌ naꞌlkii paꞌ hik ƚunyeꞌj paꞌ iꞌniꞌ paꞌ Intata, maꞌ qa pekhewep hats yijayaanija haꞌ Jesús qa ewiꞌƚ jinaaꞌniꞌƚiꞌha qa peꞌ ƚꞌathits haꞌ Jesucristo Ƚaꞌs paꞌ Intata qa jiyilijijjuꞌ week peꞌ inwuƚꞌets.\x * \xo 1:7 \xt Ef 5:8-14; Fil 2:15; Col 1:12-14; 1Ts 5:5; He 10:19; 12:24; 1P 1:2,19; Ap 1:5\x*
\m
\v 8 Quꞌ jintittaxijets quꞌ hameꞌ initjiꞌ paꞌ uƚꞌax, maꞌ qa hats inakhaꞌƚe inteꞌm in jiwanawitjiƚe qe hamjiꞌ paꞌ intaweꞌj keꞌ ƚeꞌlijei.\x * \xo 1:8 \xt Pr 20:9; Jer 2:35; Ro 3:9-23; Stg 3:2\x*
\m
\v 9 Jiwenikfelitetsha paꞌ Intata in yaqsiijkii yijatꞌij paꞌquꞌ hats nitꞌij qa niteꞌ yafꞌaliꞌƚiꞌij iye paꞌquꞌ naqsiijkii. Qa quꞌ jintefeeliꞌmha peꞌ inwuƚꞌets, maꞌ qaꞌ nenliꞌjjuꞌ week peꞌ inwuƚꞌets qa niwuꞌm iꞌnkꞌui iye.\x * \xo 1:9 \xt Sal 103:3; Jer 31:34; Mt 9:6; 26:28; Col 1:14; Stg 5:15\x*
\m
\v 10 Quꞌ jintittaxijets quꞌ ham inwuƚꞌaxeꞌ, maꞌ qa hats hik ƚunyeꞌj quꞌ jinteꞌwejtitsinen paꞌ Intata, qe hamjiꞌ paꞌ intaweꞌj keꞌ ƚeꞌlijei.\x * \xo 1:10 \xt Lc 8:21; He 4:12\x*
\c 2
\s Paꞌ Jesús hikpaꞌ jiyaqsijiꞌƚ wetjuꞌƚ.
\p
\v 1 Yilits, haqsiꞌjiꞌƚ eꞌmijkii eneꞌ wiꞌtlijei qaꞌnteꞌ aqsiꞌjiꞌiƚijkii paꞌ uƚꞌax. Qa paꞌquꞌ naqsiijkii paꞌ uƚꞌax, naꞌlƚek haꞌ jiyaqsijiꞌƚ wetjuꞌƚ paꞌ Intata (abogado), hakhaꞌan ƚii, Jesucristo, ƚakhaꞌ yatsatheenija.\x * \xo 2:1 \xt Jn 14:26\x*
\m
\v 2 Hik hakhaaꞌija Jesús in talanhetii qa ƚajaꞌaj paꞌ ƚajanyeꞌj peꞌ inwuƚꞌets, niteꞌ iꞌnujaꞌxƚe, qe week peꞌ iꞌnipjiꞌ haꞌne seheꞌ.\x * \xo 2:2 \xt Ro 1:8; 3:25; He 2:17; 1Jn 4:10; Mt 26:13; 28:19-20; Mr 14:9\x*
\m
\v 3 In jitekꞌeenetsha kekheweꞌ yitꞌij inwets paꞌ Intata maꞌ qa jinikfeꞌljeetsekha in yatsatꞌetsꞌinij paꞌ Intata.\x * \xo 2:3 \xt 1Jn 2:5; 3:19,24; 4:2,6,13; 5:2; Jn 13:35; 14:15; 15:10\x*
\m
\v 4 Qa paꞌquꞌ ewiꞌƚeꞌ quꞌ nittaxijets: pakhaꞌan yakhaꞌ tsikfeꞌlets, qa niteꞌƚe tekꞌenets keꞌ ƚeꞌlijei, pakhaꞌan ejtitsax qe hamjiꞌ paꞌ ƚataweꞌj keꞌ ƚeꞌlijei.
\m
\v 5 Qa paꞌquꞌ naqsiijkii peꞌ yitꞌij paꞌ Intata, pakhaꞌan yijatꞌij yisuꞌunija paꞌ Intata. Qa hik taꞌƚijupiꞌ inekhewel in jitaqsiijkii peꞌ yitꞌij paꞌ Intata maꞌ qa jinikfeeꞌletsha in yatsatꞌetsꞌinij paꞌ Intata.\x * \xo 2:5 \xt Jn 6:56; 14:20,23; 15:1-7; Ro 8:1; 2Co 5:17; Fil 1:1; 2:10\x*
\m
\v 6 Paꞌquꞌ nitꞌij ƚetets in hats ewiiꞌƚija iꞌniꞌƚiꞌ hakhaꞌan qaꞌ les ƚeꞌwis quꞌ hik ƚunyeꞌjeꞌ hakhaꞌan in qi in teikꞌunei.\x * \xo 2:6 \xt Jn 15:4-7; 1Jn 2:24,27-28; 3:6,24; 4:13,15-16\x*
\m
\v 7 Yejefets, haꞌne hikaꞌaƚ eꞌm wenitꞌij wiꞌtlijei quꞌ aqsiiƚijkii niteꞌ inkꞌayik. Hik akaꞌ hayiits ƚenikfeꞌliꞌƚets. Akaꞌ wiꞌtlijei hik akaꞌ iye hayiits ƚꞌimpiꞌyeꞌeƚij.\x * \xo 2:7 \xt Mr 7:8; Jn 1:1; 13:34; 2Jn 5; Lc 6:47\x*
\m
\v 8 Qa haneꞌej kakhap ƚunyeꞌjkii, akaꞌ quꞌ hikaꞌaƚ eꞌm taꞌƚets kekheweꞌ hayiits wiꞌtlijei qa hikƚe ƚunyeꞌj quꞌ inkꞌayikꞌe wiꞌtlijei qe haꞌ Cristo teꞌwenhetiꞌyijha in yaqsiijkii qa ekheweliꞌƚ iye hats ƚaqsiiƚijkii iye kakhaꞌan qa akaꞌan in ƚunyeꞌj taꞌƚets in hats hamiyuꞌ paꞌ nookii qa hats nekphaꞌm paꞌ naꞌlkii maꞌ qaꞌ nanaꞌlkiiha.\x * \xo 2:8 \xt Ro 13:12; 1Co 7:31; 1Jn 2:17; Jn 1:5,9; 3:19-21; 8:12; 12:35-36,46; Ap 22:5\x*
\m
\v 9 Paꞌquꞌ nittaxijets quꞌ hats naꞌn jiꞌtejeꞌm paꞌ naꞌlkii qa napjaxƚiꞌim paꞌquꞌ hats nijayan haꞌ Jesús, pakhaꞌan mexe iꞌnjiꞌtejeꞌm paꞌ nookii.\x * \xo 2:9 \xt 1Jn 2:11; 3:15; 4:20\x*
\m
\v 10 Pakhaꞌ quꞌ jukheweꞌ quꞌ nisuꞌun paꞌquꞌ hats nijayan haꞌ Jesús, pakhaꞌan yijaaꞌija in iꞌnjiꞌtejeꞌm paꞌ naꞌlkii qa ham paꞌquꞌ nilanifi pekheweꞌ quꞌ neneqjeyuꞌujets paꞌ yaqsiijkii.\x * \xo 2:10 \xt Ro 12:10; 1Ts 4:9; He 13:1; 1P 1:22; 1Jn 3:10,14-17; 4:20-21\x*
\m
\v 11 Qa pakhaꞌƚe quꞌ naꞌnapjaxiꞌm paꞌ hats yijayan haꞌ Jesús, pakhaꞌan iꞌnjiꞌtejeꞌm paꞌ nookii qa yijalkiꞌsjiꞌkii qa niteꞌ nikfeꞌlets paꞌquꞌ nakjiꞌ qe niteꞌ yiꞌwenjiꞌkii paꞌ nookii.\x * \xo 2:11 \xt Lv 19:17; 1Jn 1:6; 3:15; 4:20; Jn 14:6\x*
\m
\v 12 Yilits, hikaꞌaƚ eꞌm ekeweꞌen qe peꞌ ewuƚꞌetsiꞌƚ hats tewuꞌmhitiyiꞌƚ ekꞌui qe taꞌƚets kaꞌ ƚii haꞌ Cristo.\x * \xo 2:12 \xt Sal 25:11; Lc 24:47; Hch 2:38; 10:43\x*
\m
\v 13 Hikaꞌaƚ eꞌm ekeweꞌen pekheweꞌ hats taltsai qe ekheweliꞌƚ hats ƚijayaniꞌƚ haꞌ Cristo in hikhaꞌ yojo in naꞌl paꞌaj. Hikaꞌaƚ eꞌm ekeweꞌen jutjanhets qe ekheweliꞌƚ hats ƚꞌaniꞌƚiꞌpjiꞌ paꞌ inwoꞌmet (Satanás). Hikaꞌaƚ eꞌm ekeweꞌen witlits menteꞌ qits qe ekheweliꞌƚ hats ƚenikfeꞌliꞌƚets paꞌ Intata.\x * \xo 2:13 \xt Jn 16:33; 17:15; Ef 6:10; 1Jn 1:1; 2:14; 4:4; 5:4-5; Ap 2:7\x*
\m
\v 14 Hikaꞌaƚ eꞌm ekeweꞌen nekheweꞌ hats taltsai qe ekheweliꞌƚ hats ƚijayaniꞌƚ haꞌ Cristo in hikhaꞌ yojo in naꞌl paꞌaj. Hikaꞌaƚ eꞌm ekeweꞌen jutjanhets qe ekheweliꞌƚ etꞌunitsiꞌƚij qa ƚenikfeꞌliꞌƚets keꞌ Intata ƚeꞌlijei maꞌ qa hats ƚꞌaniꞌƚiꞌpjiꞌ paꞌ inwoꞌmet (Satanás).\x * \xo 2:14 \xt 1Jn 1:10\x*
\m
\v 15 Hasuꞌuj isuꞌuniꞌƚ haꞌne seheꞌ qa hasuꞌuj iye isuꞌuniꞌƚ peꞌ wekwek iꞌnipjiꞌ haꞌne seheꞌ. Paꞌquꞌ jukheweꞌ iꞌnƚiꞌi efu quꞌ nisuꞌun haꞌne seheꞌ ikjiꞌ niteꞌ yisuꞌun paꞌ Intata.\x * \xo 2:15 \xt Jn 15:19; 17:16; Ro 12:2; Stg 1:27; 4:4\x*
\m
\v 16 Qe pekheweꞌ wekwek iꞌnipjiꞌ haꞌne seheꞌ pekheweꞌen, paꞌ yisuꞌun eneꞌ iꞌnesenits qa paꞌ yisuꞌun eneꞌ intoi qa paꞌ witiwqiyeꞌjjiꞌ. Ekeweꞌen niteꞌ taꞌƚets paꞌ Intata. Ekeweꞌen taꞌƚƚe inwets.\x * \xo 2:16 \xt Ro 13:14; Ef 2:3; 1P 4:2; 2P 2:18; Gn 3:6; Pr 27:20; Stg 4:16\x*
\m
\v 17 Haꞌne seheꞌ qa week ekeweꞌ uƚꞌets hamits hatseꞌ qa pakhaꞌƚe quꞌ naqsiijkii paꞌ yisuꞌun paꞌ Intata qaꞌ pakhaayiꞌij quꞌ nanaꞌl.\x * \xo 2:17 \xt 1Jn 2:8; Mr 3:35; Ef 6:6; 1Ts 4:3; 1P 1:25; 2:15; Jn 8:35; 12:34; 2Co 9:9\x*
\s Paꞌ Cristo ƚꞌejuihife.
\p
\v 18 Yilits, hats kꞌesiyuꞌets paꞌ ƚahatsꞌij quꞌ netpil iye haꞌ Cristo. Maꞌ qaꞌ ƚunyeꞌjeꞌkii hatseꞌ kaꞌ ekheweliꞌƚ hats ƚenikfeꞌliꞌƚets in nam hatseꞌ paꞌ Cristo ƚꞌejuihife (anticristo). Haneꞌej hats olots peꞌ hik ƚunyeꞌj quꞌ ƚꞌejuihifetsiꞌij paꞌ Cristo. Akaꞌan qa jiyikfelitets in hats kꞌesets quꞌ netpil iye haꞌ Cristo.\x * \xo 2:18 \xt Jn 2:4; 1P 4:7; Mt 24:5,24; 1Jn 2:22; 4:3; 2Jn 7\x*
\m
\v 19 Pekheweꞌen in iꞌnꞌinittax jiꞌtejeꞌm qa yiliꞌijjuꞌ qe niteꞌ yijaaꞌija quꞌ netkꞌenets haꞌ Cristo. Qe qek yijaayiꞌija qek netkꞌenets haꞌ Cristo qekhanteꞌ naketax iꞌnikꞌuifikꞌikii in jitekꞌenets haꞌ Cristo. Qa ikƚe iꞌnikꞌuifikꞌikii maꞌ qa teꞌwenhetii in niteꞌ hik injunyejei in jitekꞌenets haꞌ Cristo.
\m
\v 20 Qa ekheweliꞌƚ qa naꞌliꞌƚ eꞌm paꞌ Espíritu Santo neƚisiꞌƚij haꞌ Cristo. Maꞌ qa ƚenikfeꞌliꞌƚets in yijaaꞌija.\x * \xo 2:20 \xt 2Co 1:21; Sal 89:18; Mr 1:24; Hch 10:38\x*
\m
\v 21 Niteꞌ hikaꞌaƚ eꞌm ekeweꞌen quꞌnteꞌ enikfeꞌliꞌƚets paꞌ yijaaꞌija. Hikaꞌaƚ eꞌm ekeweꞌen qe hats ƚenikfeꞌliꞌƚets paꞌ witwejtitsiꞌ in niteꞌ ƚekeꞌ quꞌ nataꞌƚets paꞌ yijaaꞌija.
\m
\v 22 ¿Ƚek pakhaꞌ ejtitsax? Pakhaꞌ ejtitsax pakhaꞌan paꞌ yeqekuꞌukꞌi haꞌ Jesús in hikhaꞌ Cristo. Pakhaꞌan hik ƚunyeꞌj quꞌ ƚꞌejuihifeyeꞌ haꞌ Cristo qe yeqekuꞌ paꞌ Intata qa haꞌ Ƚaꞌs.\x * \xo 2:22 \xt Jn 20:31; Hch 18:5; Ef 5:2; 1Jn 5:1\x*
\m
\v 23 Week pakhaꞌ quꞌ neqekuꞌ haꞌ Ƚaꞌs, pakhaꞌan hats yeqekuꞌ paꞌ Intata. Qa paꞌquꞌ weekiꞌij paꞌ ƚataweꞌj quꞌ nitꞌijets in niteꞌ yeqekuꞌ haꞌ Ƚaꞌs, pakhaꞌan yijaaꞌija in niteꞌ yeqekuꞌ paꞌ Intata.\x * \xo 2:23 \xt Jn 5:23; 8:19; 16:3; 17:3; 1Jn 4:15; 5:1; 2Jn 9\x*
\m
\v 24 Ekheweliꞌƚ matjanitheniꞌƚij pekheweꞌ hayiits ƚepiꞌyeꞌeƚikꞌi in iꞌnkꞌaa ƚꞌijatshenhetiyiꞌƚ qe quꞌ matjanitheniꞌƚij, maꞌ qaꞌnteꞌ jeek eꞌwisitsiꞌiƚijup haꞌ Ƚaꞌs qa paꞌ Intata.\x * \xo 2:24 \xt Jn 10:38; 15:4-7; 1Jn 2:6,27-28; 3:6,24; 4:13,15-16; Col 3:3; 1Ts 1:1\x*
\m
\v 25 Paꞌ yiwjutsiqen ineꞌm haꞌ Cristo, pakhaꞌan hikpaꞌ paꞌ witiƚaꞌx niteꞌ ham.\x * \xo 2:25 \xt Jn 4:14; 1Ti 4:8; 2Ti 1:1; Tit 1:2\x*
\m
\v 26 Hikaꞌaƚ eꞌm ekeweꞌen qe taꞌƚets pekheweꞌ ejtitsits yisuꞌuntax quꞌ naqꞌayiniƚij paꞌ hats ƚꞌekuꞌmiꞌƚiꞌ witꞌikheyiꞌj.
\m
\v 27 Ekheweliꞌƚ hats naꞌliꞌƚ eꞌm paꞌ Espíritu Santo neƚisiꞌƚij haꞌ Cristo, qa hikpaꞌ yojoꞌoƚ ekꞌuikii. Qa hik taꞌƚijupiꞌ in niteꞌ ƚekeꞌ paꞌquꞌ nijatshentaxiƚij pekheweꞌ ejtitsits qe hats ham hamiꞌiƚ eꞌm. Paꞌ nijatsheniꞌƚij paꞌ Espíritu Santo yijaaꞌija niteꞌ yaqanƚekii. Paꞌ Espíritu Santo nijatsheniꞌƚij week pekheweꞌ taꞌƚets paꞌ Intata. Qa hik ƚunyeꞌj iye in yijaaꞌija in nijatsheniꞌƚij quꞌ hasuꞌuj iliꞌiƚij haꞌ Cristo.\x * \xo 2:27 \xt Jn 14:26; 15:4-7; 1Jn 2:6; 3:6,24; 4:13,15-16\x*
\m
\v 28 Yilits, hasuꞌuj iliꞌiƚij haꞌ Cristo hatsꞌinha quꞌ jinteꞌwentax quꞌ netpiltaxjuꞌ maꞌ qa qi quꞌ jeꞌƚeꞌsitsiꞌimkii qaꞌ ham paꞌquꞌ jinetjumtiꞌijkii qaꞌnteꞌ jinewepiniꞌim.\x * \xo 2:28 \xt Lc 17:30; Col 3:4; 1Jn 3:2; 1Ts 2:19\x*
\m
\v 29 Quꞌ enikfeꞌliꞌƚets haꞌ Cristo in yijaaꞌija in yatsathen, maꞌ qaꞌ enikfeꞌljiiƚetsek, pakhaꞌ quꞌ naqsiijkii paꞌ yatsathen in hats nekijfikꞌi kaꞌ ƚii haꞌ Cristo.\x * \xo 2:29 \xt Gn 18:19; Dt 6:18; 1Jn 3:7,9,10; 4:7; 5:1,4,18; Jn 1:12-13; 3:3-7; 8:41\x*
\c 3
\s Peꞌ ƚelits paꞌ Intata.
\p 
\v 1 Jeƚ qekuꞌniꞌƚ paꞌ qi ƚeqsuꞌunkaꞌx inij paꞌ Intata in yitꞌij inwets: —Eneweꞌen yilits.— Qa yijaaꞌija inek in ƚelitsꞌinij paꞌ Intata. Qa week pekheweꞌ niteꞌ yijayan haꞌ Cristo, pekheweꞌen niteꞌ nikfeꞌl inwets in ƚelitsꞌinij paꞌ Intata qe ƚekhewel niteꞌ yijayan haꞌ Cristo.
\m
\v 2 Yejefets, haneꞌej hats ƚelitsꞌinij paꞌ Intata. Qa menteꞌ yamets paꞌ injunyejeeyija hatseꞌ. Qa hatsƚe jinikfeꞌlets quꞌ netpiltaxjuꞌ haꞌ Cristo qaꞌ jinteꞌweenija, maꞌ qaꞌ hik ineseninyejeyeꞌ hakhaꞌan.\x * \xo 3:2 \xt 1P 5:4; 1Jn 2:28; Ro 8:29; 1Co 13:12; 15:49; 2Co 3:18; 4:11; Fil 3:21; 2P 1:4; He 12:14; Ap 22:4\x*
\m
\v 3 Qa week pakhaꞌ quꞌ netjumti ikꞌuiha akaꞌan qaꞌ natjiletikꞌuiha hatsꞌinha qaꞌ hik ƚunyeꞌjeꞌ hatseꞌ haꞌ Cristo in hamjiꞌ paꞌquꞌ uƚꞌaxeꞌ.\x * \xo 3:3 \xt Hch 23:6; 1Ts 1:3; Fil 4:8\x*
\m
\v 4 Week pakhaꞌ quꞌ naqsiijkii paꞌ uƚꞌax, pakhaꞌan tꞌotsipjiꞌ iye keꞌ ƚeꞌlijei haꞌ Cristo. Qa pakhaꞌ tꞌotsipjiꞌ keꞌ ƚeꞌlijei haꞌ Cristo, pakhaꞌan uƚꞌax. 
\m
\v 5 Qa ekheweliꞌƚ hats ƚenikfeꞌliꞌƚets in nam haꞌ Cristo qa yiwuꞌm peꞌ inwuƚꞌets qe ƚakhaꞌ hamjiꞌ paꞌquꞌ uƚꞌaxeꞌ.\x * \xo 3:5 \xt Jn 1:29; 1Co 15:3; 1P 2:21-24; 3:18; 2Co 5:21; He 4:15; 7:26; 10:4; 1Jn 2:29\x*
\m
\v 6 Week paꞌquꞌ naꞌnjiꞌtejeꞌmha haꞌ Cristo, pakhaꞌan niteꞌ qi quꞌ naqsiijkii paꞌ uƚꞌax. Qa pakhaꞌ qi in yaqsiijkii paꞌ uƚꞌax pakhaꞌan niteꞌ yiꞌwen qa niteꞌ nikfeꞌlets iye haꞌ Cristo qe niteꞌ yijayan.\x * \xo 3:6 \xt Jn 15:4-7; 1Jn 2:6,24,27-29; 3:24; 4:13,15-16; 5:18; Ro 6:11-12\x*
\m
\v 7 Yilits, hasuꞌuj paꞌquꞌ nawitjiꞌiƚ. Quꞌ iꞌweniꞌƚ paꞌquꞌ naqsiijkii paꞌ yatsathen qaꞌ menikfelitiꞌƚets in ƚakhaꞌ yatsathen paꞌ ƚunyeꞌj in ƚunyeꞌjek haꞌ Cristo in yatsathen.
\m
\v 8 Pakhaꞌ qi in yaqsiijkii paꞌ uƚꞌax, pakhaꞌan yatsatꞌaxij paꞌ inwoꞌmet (Satanás). Qe paꞌ inwoꞌmet hikpaꞌ yojoꞌoj paꞌaj in yaqsiijkii paꞌ uƚꞌax. Qa hik taꞌƚijupiꞌ in nam haꞌ Ƚaꞌs paꞌ Intata qe qaꞌ niwuƚꞌenhetjuꞌ peꞌ ƚꞌithayijkitits paꞌ inwoꞌmet.\x * \xo 3:8 \xt Mr 1:11; Jn 21:1; 2Co 4:11; 1P 5:4; 1Jn 5:20\x*
\m
\v 9 Week pakhaꞌ quꞌ hats nenekijfikꞌi paꞌ Intata niteꞌ qi quꞌ naqsiijkii paꞌ uƚꞌax qe hats naꞌl paꞌ yenjiꞌtejeꞌm paꞌ Intata. Qa hik taꞌƚijupiꞌ in niteꞌ qi quꞌ naqsiijkii paꞌ uƚꞌax qe hats nekijfikꞌi paꞌ Intata.\x * \xo 3:9 \xt 1Jn 2:29; 1P 1:23\x*
\m
\v 10 Maꞌ qa akaꞌan qa jutsiqetsij peꞌ ƚelits paꞌ Dios qa peꞌ ƚelits paꞌ inwoꞌmet (Satanás). Week pakhaꞌ quꞌ niteꞌ naqsiꞌjiꞌijkii paꞌ yatsathen niteꞌ yatsatꞌaxij paꞌ Intata. Qa hik ƚunyeꞌj iye pakhaꞌ quꞌnteꞌ nisuꞌuneꞌ paꞌquꞌ hats ƚejefeyeꞌtaxipjiꞌ haꞌ Cristo, niteꞌ yatsatꞌaxij iye paꞌ Intata.\x * \xo 3:10 \xt 1Jn 2:10; 3:14-17; 4:20-21\x*
\m
\v 11 Akaꞌ quꞌ hitꞌiƚij ewets wiꞌtlijei hik akaꞌ hayiits ƚꞌimpiꞌyeꞌeƚij in yitꞌij: —Qi quꞌ mewet-suꞌuniƚha ekheweliꞌƚ.— 
\m
\v 12 Hasuꞌuj injunyejeyeꞌ paꞌ ƚunyeꞌj paꞌaj paꞌ Cainꞌikꞌi in yatsatꞌaxij paꞌ inwoꞌmet (Satanás), qa yilan paꞌaj paꞌ ƚekꞌinijikꞌi. ¿Qa inhatsꞌek in yilan paꞌaj? Yilan paꞌaj qe paꞌ Caín naꞌl paꞌ uƚꞌax iꞌnjiꞌ qa pakhaꞌƚe ƚekꞌinijikꞌi qa qi in yatsathen paꞌaj.\x * \xo 3:12 \xt Gn 4:1; Jud 11; 2Ts 3:3\x*
\m
\v 13 Yejefets, hasuꞌuj eꞌnitjuƚaxiꞌƚijphaꞌm quꞌ naꞌnapjaxiꞌƚ eꞌm pekheweꞌ niteꞌ yijayan haꞌ Cristo.\x * \xo 3:13 \xt Jn 17:14\x*
\m
\v 14 Inekhewel hats juꞌukikꞌuifikꞌi paꞌ witwamhiꞌ qa hats juꞌun jiꞌtejeꞌm paꞌ witiƚaꞌx niteꞌ ham. Akaꞌan in jinikfeꞌlets qe taꞌƚets in jiwet-suꞌun in hats jitajayan haꞌ Cristo. Pakhaꞌ quꞌnteꞌ nisuꞌuneꞌ paꞌquꞌ hats ƚejefeyiꞌipjiꞌ haꞌ Cristo, pakhaꞌan menteꞌ yiliꞌij paꞌ uƚꞌax, mexe aman jiꞌtejeꞌm paꞌ witwamhiꞌ.\x * \xo 3:14 \xt Jn 8:51\x*
\m
\v 15 Week pakhaꞌ quꞌ naꞌnapjaxiꞌm peꞌyeꞌ pekheweꞌ hats ƚejefetstaxipjiꞌ paꞌ Intata, pakhaꞌan eqekꞌunaꞌx. Qa ekheweliꞌƚ hats ƚenikfeꞌliꞌƚets in ham paꞌquꞌ ƚunyeꞌjeꞌ akaꞌan pekheweꞌ naꞌliꞌm paꞌ witiƚaꞌx niteꞌ ham.\x * \xo 3:15 \xt 1Jn 2:9,11; 4:20; Jn 8:44\x*
\m
\v 16 Akaꞌ haneꞌej quꞌ jinikfelitets paꞌ yijaaꞌija witeqsuꞌunkaꞌx akaꞌan, haꞌ Jesucristo in wetƚisƚiꞌij quꞌ nawaꞌm qe taꞌƚets in jiyisuꞌun. Qa hik akaꞌ quꞌ injunyejeyeꞌ iye quꞌ jinewetƚisƚiꞌij paꞌ witwamhiꞌ qe taꞌƚets in qi quꞌ jintesuꞌun peꞌquꞌ inejefetsiꞌipjiꞌ haꞌ Cristo.\x * \xo 3:16 \xt Jn 10:11,14,17-18; 13:37-38; 15:13; Is 53:10; Mr 8:34-35; 10:45; 1Co 11:1; Fil 2:5-8\x*
\m
\v 17 Paꞌquꞌ ewiꞌƚeꞌ jukhew iꞌnƚiꞌi quꞌ efuyeꞌ quꞌ nanaꞌliꞌm peꞌquꞌ ƚewekwekitseꞌ qa niteꞌ yiꞌfen paꞌquꞌ hats ƚejefeyeꞌtaxipjiꞌ haꞌ Cristo quꞌ nowotaxiikii peꞌyeꞌ qa ¿paꞌn ƚunyeꞌj quꞌ nittaxijets quꞌ nanaꞌliꞌm paꞌ ƚeqsuꞌunkaꞌx paꞌ Intata?\x * \xo 3:17 \xt Mr 12:44; Lc 15:12; 1Jn 2:5,16; Hch 2:45; 2Co 7:15; Stg 2:15-16\x*
\m
\v 18 Yilits, hasuꞌuj iꞌnlijeeyeꞌƚe quꞌ jintitꞌijets quꞌ jintesuꞌun paꞌquꞌ inejefeyiꞌipjiꞌ haꞌ Cristo. Jitaqsiimijkii yijatꞌij peꞌyeꞌ qa weekiꞌij iye peꞌ intawjets quꞌ jintesuꞌun quꞌ jintaqsiimijkii.\x * \xo 3:18 \xt Mt 7:21; Jn 13:34-35; 15:12-17; Stg 1:22-25; 2:14-17\x*
\m
\v 19 Quꞌ jintaqsiijkii akaꞌan, qaꞌ jinenikfeꞌlets in yatsatꞌetsꞌinij paꞌ Intata qaꞌ jintoksiꞌwen iye in hats jitaqsiijkii paꞌ yisuꞌun paꞌ Intata.\x * \xo 3:19 \xt Jn 14:6; 2Co 11:10; 3Jn 3\x*
\m
\v 20 Qa paꞌ intaweꞌj quꞌ numti quꞌ niteꞌ ƚeꞌwiseꞌ paꞌ jitaqsiijkii qa paꞌ Intata in ƚakhaꞌ les qi qa tꞌanipjiꞌ paꞌ intaweꞌj. Ƚakhaꞌ hats nikfeꞌlets week paꞌ jitaqsiijkii.\x * \xo 3:20 \xt Sal 139:6; Pr 2:6; Jn 14:28\x*
\m
\v 21 Yejefets, paꞌ intaweꞌj quꞌ numti quꞌ ƚeꞌwiseꞌ paꞌ jitaqsiijkii maꞌ qa niteꞌ jiwetjeyepunets quꞌ jiꞌniyinets paꞌ Intata
\m
\v 22 qa jiyeƚisij week paꞌquꞌ jiꞌniyinijets pakhaꞌan, qe jitekꞌenets kekheweꞌ yitꞌij inwets qa jitaqsiijkii iye paꞌ yiꞌsinhetiꞌmkii.\x * \xo 3:22 \xt Mr 7:8; Jn 14:15; 1Jn 2:3; 5:2\x*
\m
\v 23 Kakhaꞌ yisuꞌun quꞌ jintaqsiijkii kakhaꞌan in yitꞌij inwets quꞌ hasuꞌuj jinteqekuꞌ kaꞌ ƚii haꞌ Ƚaꞌs Jesucristo qaꞌ jinewet-suꞌunija iye inekhewel in jitajayan.\x * \xo 3:23 \xt Sal 33:21; Is 50:10; Jn 1:12; 3:18; 1Jn 5:13\x*
\m
\v 24 Qa pakhaꞌ quꞌ naqsiijkii kakhaꞌ yitꞌij inwets paꞌ Intata, maꞌ qa paꞌ Intata qaꞌ naꞌnjiꞌtejeꞌmha pakhaꞌan qa pakhaꞌan qaꞌ naꞌnjitejeꞌmek paꞌ Intata. ¿Qa ƚekpaꞌ jiyikfelitets akaꞌan? Paꞌ Espíritu Santo hikpaꞌ jiyeƚisij paꞌaj paꞌ Intata, hikpaꞌ jiyikfelitets akaꞌan.\x * \xo 3:24 \xt Lc 11:13; Jn 6:56; 15:4-7; Hch 5:32; 15:8; Ro 8:9-16\x*
\c 4
\s Paꞌ Espíritu Santo qa paꞌ ƚeqe espíritu paꞌ anticristo.
\p 
\v 1 Yejefets, hasuꞌuj isuꞌuniꞌƚ quꞌ ajeꞌeƚ ekꞌeniꞌƚets paꞌquꞌ espirituyeꞌ. Yojo yijatꞌij quꞌ mowoꞌoƚii quꞌ enikfeꞌliꞌƚets me taꞌƚets paꞌ Intata me iꞌnƚiꞌi quꞌ niteꞌ nataꞌƚeꞌets. Qe olots peꞌ wotkꞌonijkii quꞌ profetayeꞌ haꞌne week seheꞌ ipjiꞌ.\x * \xo 4:1 \xt 1Ts 5:21\x*
\m
\v 2 ¿Qa paꞌn ƚunyeꞌj quꞌ enikfeꞌliꞌƚets paꞌquꞌ espirituyeꞌ quꞌ nataꞌƚets paꞌ Intata? Pakhaꞌan nifel in nametsjuꞌ haꞌ Jesucristo haꞌne seheꞌ qa hik ƚꞌeseninyejei eneꞌ seheꞌ ipjiꞌ.\x * \xo 4:2 \xt Jn 1:14; Fil 2:7; 3:3; 1Co 12:3\x*
\m
\v 3 Qa paꞌquꞌ espirituyeꞌ quꞌ niteꞌ nenfeleꞌ haꞌ Jesucristo in nametsjuꞌ haꞌne seheꞌ qa hik ƚꞌeseninyejei eneꞌ seheꞌ ipjiꞌ. Pakhaꞌan espíritu niteꞌ taꞌƚets paꞌ Intata, taꞌƚets paꞌ Cristo ƚꞌejuihife. Hikpaꞌ hayiits ƚꞌimpiꞌyeꞌeƚij quꞌ nanam hatseꞌ qa haneꞌej qa hats iꞌnipjiꞌ haꞌne seheꞌ.\x * \xo 4:3 \xt 1Jn 2:18,22; 2Jn 7\x*
\m
\v 4 Yilits, ekheweliꞌƚ yatsatꞌetsiꞌƚ ej paꞌ Intata. Qa hats ƚanaxiƚij pekheweꞌ ejtitsits qe niteꞌ nawitjiꞌiƚ. Qe paꞌ naꞌliꞌƚ eꞌm Espíritu Santo pakhaꞌan les tꞌun, niteꞌ hik ƚunyeꞌj paꞌ espíritu iꞌnipjiꞌ haꞌne seheꞌ.\x * \xo 4:4 \xt Ro 8:31; Col 1:27; 1Jn 3:20; Jn 12:31\x*
\m
\v 5 Pekheweꞌen yatsatꞌetsij pakhaꞌ iꞌnipjiꞌ haꞌne seheꞌ. Qa hik taꞌƚijupiꞌ in ujaꞌxƚe quꞌ niyetij peꞌ wekwek iꞌnipjiꞌ haꞌne seheꞌ qa week tekꞌenets iye peꞌ jukhew qa efuts haꞌne seheꞌ ipjiꞌ.\x * \xo 4:5 \xt Jn 17:6; 2P 2:20\x*
\m
\v 6 Inekhewel yatsatꞌetsꞌinij paꞌ Intata. Qa pekheweꞌ yatsatꞌetsij paꞌ Intata qa tekꞌen inwets. Qa pekheweꞌ niteꞌ yatsatꞌetsij paꞌ Intata qa niteꞌ tekꞌen inwets. Qa akaꞌan in ƚunyeꞌj qa jinikfeꞌlets pekheweꞌ naꞌliꞌm paꞌ yijaaꞌija in Espíritu Santo qa jinikfeꞌlets iye pekheweꞌ naꞌliꞌm paꞌ niteꞌ yijaaꞌija in espíritu.\x * \xo 4:6 \xt Jn 8:47; Mr 13:5-6; 1Co 2:12; 1Ti 4:1\x*
\s Paꞌ Intata ƚakhaꞌ witeqsuꞌunkaꞌx.
\p 
\v 7 Yejefets, jiwet-suꞌunija inekhewel in hats jitajayan haꞌ Cristo qe paꞌ witeqsuꞌunkaꞌx taꞌƚets paꞌ Intata. Week pakhaꞌ quꞌ nisuꞌun paꞌquꞌ hats ƚejefeyiꞌipjiꞌ haꞌ Cristo, pakhaꞌan in ineqsuꞌun qe hats ewiꞌƚij iye in nekfikꞌi qa nikfeꞌlets paꞌ Intata.\x * \xo 4:7 \xt 1Jn 2:29\x*
\m
\v 8 Pakhaꞌ quꞌ niteꞌ nisuꞌuneꞌ paꞌquꞌ hats ƚejefeyeꞌtaxipjiꞌ haꞌ Cristo, pakhaꞌan niteꞌ nikfeꞌlets paꞌ Intata qe paꞌ Intata ƚakhaꞌ witeqsuꞌunkaꞌx.
\m
\v 9 Paꞌ Intata jiyethiinijha in qi paꞌ ƚeqsuꞌunkaꞌx inij qa nukinjuꞌ paꞌ ewiꞌƚƚe in Ƚaaꞌsija qe qaꞌ nataꞌƚets paꞌ witiƚaꞌx niteꞌ ham.\x * \xo 4:9 \xt Mr 9:37; Jn 1:14,18; 3:16,18; 10:28\x*
\m
\v 10 ¿Paꞌn ƚunyeꞌj paꞌ yijaaꞌija in witeqsuꞌunkaꞌx? Niteꞌ pakhaꞌ naꞌl ineꞌm ineqsuꞌunkaꞌxij paꞌ Intata. Paꞌ yijaaꞌija pakhaꞌan paꞌ qi ƚeqsuꞌunkaꞌx inij paꞌ Intata qa nukinjuꞌ haꞌ Ƚaꞌs qa waꞌm infi qe qaꞌ ƚajaꞌyiꞌij peꞌ inwuƚꞌets.\x * \xo 4:10 \xt Jn 3:16; 1Jn 2:2\x*
\m
\v 11 Yejefets, paꞌ Intata akaꞌ ƚeqfenyejei inij in qi in jiyisuꞌun qa hik akaꞌ quꞌ ineqfenyejeyeꞌ jiijek quꞌ qi quꞌ jinewet-suꞌunija inekhewel in hats jitajayan haꞌ Cristo.\x * \xo 4:11 \xt Jn 13:14; 15:12; Ro 13:8; 1Ts 4:9; 1P 1:22\x*
\m
\v 12 Ham paꞌquꞌ jukheweꞌ quꞌ niꞌwen paꞌ Intata. Qa quꞌ jinewet-suꞌun inekhewel in hats jitajayan, maꞌ qaꞌ naꞌn initjiꞌtejeꞌm qa les qiyiꞌija quꞌ jinewet-suꞌun.\x * \xo 4:12 \xt Ex 33:20\x*
\m
\v 13 ¿Ƚekpaꞌ jiyikfelitets in hats juꞌun jiꞌtejeꞌm paꞌ Intata qa ƚakhaꞌ qa iꞌnꞌinit jiꞌtejeꞌmek? Paꞌ Espíritu Santo hikpaꞌ jiyeƚisij paꞌaj jiyikfelitets akaꞌan.\x * \xo 4:13 \xt Jn 15:4-7; 1Jn 2:6,24,27-28; 3:6,24; 4:15-16; Ap 3:22\x*
\m
\v 14 Yekheweliꞌƚ hiꞌweniꞌƚha qa yekheweliꞌƚ quꞌ henfeliꞌƚ in yijaaꞌija paꞌ Intata in nukinjuꞌ haꞌ Ƚaꞌs qe hakhaꞌan Eqiƚinaꞌx haꞌne seheꞌ epjiꞌ.\x * \xo 4:14 \xt Ro 1:3\x*
\m
\v 15 Week pakhaꞌ quꞌ nitꞌijets haꞌ Jesús in Ƚaꞌs paꞌ Intata qa paꞌ Intata qaꞌ naꞌn jiꞌtejeꞌm pakhaꞌan, qa pakhaꞌan qaꞌ naꞌn jiꞌij jiꞌtejeꞌmek paꞌ Intata.\x * \xo 4:15 \xt Jn 9:22; Fil 2:6\x*
\m
\v 16 Qa inekhewel hats jinikfeꞌlets qa niteꞌ jiteqekuꞌukꞌi iye paꞌ Intata in qi paꞌ ƚeqsuꞌunkaꞌx inij. Paꞌ Intata ƚakhaꞌ witeqsuꞌunkaꞌx. Qa paꞌquꞌ nanaꞌliꞌm ƚeqsuꞌunkaꞌxiꞌij paꞌ Intata qa week iye eneꞌ jukhew, pakhaꞌan qaꞌ naꞌn jiꞌtejeꞌm paꞌ Intata, paꞌ Intata qaꞌ naꞌn jiꞌtejeꞌmek pakhaꞌan.
\m
\v 17 Qa akaꞌan quꞌ injunyejeyeꞌ qaꞌ les qiyiꞌija quꞌ notpol inij paꞌ witeqsuꞌunkaꞌx hatsꞌinha quꞌ namtaxets paꞌ ƚahatsꞌij quꞌ nejeyumtshentax eneꞌ week qaꞌnteꞌ jineꞌnijiweyiꞌim qe ham paꞌquꞌ jinetjumtiꞌijkii. Qe in mexe juꞌunipjiꞌ haꞌne seheꞌ qaꞌ jinewet-suꞌun in ƚunyeꞌjek haꞌ Jesús in qi in ineqsuꞌun.\x * \xo 4:17 \xt Mt 10:15; 11:22,24; 12:36; 2P 2:9; 3:7; Jud 6; Jn 14:10-11; 15:9-10; 17:11,15,18\x*
\m
\v 18 Paꞌ witeqsuꞌunkaꞌx taꞌƚets quꞌnteꞌ jineꞌnijiweꞌyeꞌ. Qa paꞌquꞌ neꞌnijiwei qe hats yumti quꞌ nattanithenhetii hatseꞌ qe pakhaꞌan hamiꞌm paꞌ yijaaꞌija in witeqsuꞌunkaꞌx.\x * \xo 4:18 \xt Ro 8:15; Ef 4:11-16\x*
\m
\v 19 Inekhewel hats jitesuꞌun paꞌ Dios qe Ƚakhaꞌ yojo in jiyisuꞌun.\x * \xo 4:19 \xt 2Ts 2:13\x*
\m
\v 20 Paꞌquꞌ nitꞌij: —Yakhaꞌ hisuꞌun paꞌ Intata,— qa napjaxƚiꞌim paꞌquꞌ hats ƚejefeyeꞌtaxipjiꞌ haꞌ Cristo, pakhaꞌan ejtitsax. Qe paꞌquꞌ niteꞌ nisuꞌuneꞌ paꞌquꞌ ƚejefeyeꞌtaxipjiꞌ haꞌ Cristo in yiꞌwentax qa ¿paꞌn ƚunyeꞌj quꞌ nisuꞌun paꞌ Intata in niteꞌ yiꞌwen?\x * \xo 4:20 \xt 1Jn 1:10; 2:9-11; 3:10,14-17\x*
\m
\v 21 Qa akaꞌ wiꞌtlijei jiyeƚisij paꞌ Intata yitꞌij: —Paꞌquꞌ jukheweꞌ quꞌ nisuꞌunija paꞌ Intata les ƚeꞌwis quꞌ nisuꞌunija iye paꞌquꞌ ƚejefeyiꞌipjiꞌ.—
\c 5
\s ¿Ƚekpaꞌ taꞌƚets in jitꞌanipjiꞌ haꞌne seheꞌ epjiꞌ?
\p 
\v 1 Week pakhaꞌ quꞌnteꞌ neqekuyiꞌikꞌi haꞌ Jesús in hikhaꞌ Cristo, pakhaꞌan hats nekijfikꞌi paꞌ Intata. Qa paꞌquꞌ jukheweꞌ quꞌ nisuꞌun paꞌ Intata, pakhaꞌan qa yisuꞌun iye pakhaꞌ iꞌnkꞌa nekijfikꞌi iye paꞌ Intata.\x * \xo 5:1 \xt 1Jn 2:29\x*
\m
\v 2 In jitesuꞌuunija paꞌ Intata qa jitaqsiijkii iye paꞌ yisuꞌun maꞌ qa jinikfeꞌljeetsekha in yijaaꞌija in jitesuꞌun iye peꞌ hats ƚelitsij.
\m
\v 3 In jitaqsiijkii paꞌ yisuꞌun paꞌ Intata ikjiꞌ jitesuꞌun paꞌ Intata. Qa in jitesuꞌuunija paꞌ Intata, maꞌ qa niteꞌ jutsitax quꞌ jintaqsiijkii paꞌ yisuꞌun.\x * \xo 5:3 \xt Dt 30:11; Mt 11:30; 23:4,23\x*
\m
\v 4 Qe week pakhaꞌ quꞌ hats nenekijfikꞌi paꞌ Intata pakhaꞌan hats tꞌanipjiꞌ paꞌ ƚunyeꞌj haꞌne week seheꞌ ipjiꞌ. ¿Qa ƚekpaꞌ taꞌƚets in jitꞌanipjiꞌ paꞌ ƚunyeꞌj haꞌne week seheꞌ ipjiꞌ? Paꞌ niteꞌ inqekuyeꞌj hikpaꞌ taꞌƚets in jitꞌanipjiꞌ.
\m
\v 5 ¿Qa ƚek pakhaꞌ paꞌ tꞌanipjiꞌ paꞌ ƚunyeꞌj haꞌne week seheꞌ ipjiꞌ? Pakhaꞌ niteꞌ yeqekuꞌukꞌi haꞌ Jesús in hikhaꞌ Ƚaaꞌsija paꞌ Intata.\x * \xo 5:5 \xt 1Co 15:57; 2P 2:20; Jn 5:19; 14:1; He 1:2\x*
\m
\v 6 Hakhaꞌan in nam qa jutsiqaxij kakhaꞌ ƚunyeꞌjkii in iꞌnkꞌaa wempuliꞌjjiꞌ haꞌ iweliꞌ qa in tꞌilitfikꞌi iye keꞌ ƚꞌathits, hakhaꞌan Jesucristo. Niteꞌ ewiꞌƚƚe in wempuliꞌjjiꞌ haꞌ iweliꞌ, qe keꞌ ƚꞌathits iye in tꞌilitfikꞌi. Qa kekheweꞌ yaqsiijkii in taꞌƚets paꞌ Espíritu Santo maꞌ qa jutsiqaxij in hikhaꞌ Cristo. Paꞌ Espíritu Santo ewiꞌƚƚe in yaqsiijkii paꞌ yijaaꞌija.\x * \xo 5:6 \xt Mr 1:11; Jn 1:34; 15:26; 17:1; 1Jn 1:7; 4:10; Hch 26:5\x*
\m
\v 7 Wetshetkꞌewiꞌƚ ekeꞌ jutsiqetsij:\x * \xo 5:7 \xt Dt 19:15; Mt 18:16; Jn 8:17-18\x*
\m
\v 8 paꞌ Espíritu Santo, qa kaꞌ ƚunyeꞌjkii in iꞌnkꞌaa wempuliꞌjjiꞌ haꞌ iweliꞌ qa in tꞌilitfikꞌi iye keꞌ ƚꞌathits, eneweꞌ wetshetkꞌewiꞌƚ ewiꞌƚ paꞌ ƚꞌanyejeyij.\x * \xo 5:8 \xt Jn 1:32; 19:30,34; 20:22\x*
\m
\v 9 In jitꞌekumijuꞌƚ paꞌquꞌ nenfel peꞌyeꞌ paꞌquꞌ jukheweꞌ qa niteꞌƚe jinikfeꞌlets me yijaaꞌija, qa pakhaꞌƚe Intata paꞌ nifel qa yijaaꞌija yijatꞌij. Qa hik taꞌƚijupiꞌ in nifel in Ƚaaꞌsija haꞌ Jesús qa yijaaꞌija.\x * \xo 5:9 \xt Jn 5:36-37; 8:18\x*
\m
\v 10 Paꞌ quꞌnteꞌ neqekuꞌyeꞌ haꞌ Ƚaꞌs paꞌ Dios qa paꞌ Espíritu Santo, taꞌƚets paꞌ ƚataweꞌj in yumtiiꞌija in ewiꞌƚƚe in Ƚaaꞌsija paꞌ Dios. Qa pakhaꞌƚe quꞌ neqekuꞌ paꞌ Intata, pakhaꞌan yiwejtitsinentax paꞌ Intata qe niteꞌ tekꞌenets paꞌ Intata in nifel in Ƚaaꞌsija haꞌ Jesús.\x * \xo 5:10 \xt Gn 3:4\x*
\m
\v 11 Ekeweꞌen ƚeꞌlijei paꞌ Dios yitꞌij inwets in hats jiyeƚisij paꞌ witiƚaꞌx niteꞌ yiliꞌij, pakhaꞌ witiƚaꞌx taꞌƚets haꞌ Ƚaꞌs.
\m
\v 12 Paꞌquꞌ netkꞌenets haꞌ Ƚaꞌs paꞌ Intata, maꞌ qaꞌ hats nanaꞌliꞌm paꞌ witiƚaꞌx niteꞌ yiliꞌij. Qa paꞌ quꞌnteꞌ netkꞌeneꞌets haꞌ Ƚaꞌs paꞌ Intata, pakhaꞌan hamiꞌm paꞌ witiƚaꞌx niteꞌ yiliꞌij.\x * \xo 5:12 \xt Jn 3:15,36; 5:24; 6:40,47\x*
\m
\v 13 Hikaꞌaƚ eꞌm haneꞌen ekheweliꞌƚ in niteꞌ ƚeqekuꞌuƚ haꞌ Ƚaꞌs paꞌ Intata, maꞌ qaꞌ enikfeꞌliꞌƚetsha in hats naꞌliꞌƚ eꞌm paꞌ witiƚaꞌx niteꞌ yiliꞌij.\x * \xo 5:13 \xt 1Jn 3:23\x*
\m
\v 14 Haneꞌej hats jinikfeeꞌletsha paꞌ Intata quꞌ jiꞌniyinijets peꞌyeꞌ pekheweꞌ quꞌ ƚexkeliꞌij inwets, ƚakhaꞌ hats jiyepiyeꞌ.\x * \xo 5:14 \xt Mt 7:7,8; Jn 9:31; 11:22; 14:13; 1Jn 3:22\x*
\m
\v 15 Quꞌ jinenikfeꞌlets paꞌ Intata in jiyepiyeꞌ quꞌ jiꞌniyinijets peꞌyeꞌ qaꞌ jinenikfeꞌljeetsek in jiyeƚisij paꞌquꞌ jiꞌniyinijets.\x * \xo 5:15 \xt Stg 1:5; Jn 11:22; 16:24\x*
\m
\v 16 Quꞌ iꞌweniꞌƚ paꞌquꞌ ewiꞌƚeꞌ eneweꞌ inejefetsipjiꞌ paꞌ Intata quꞌ naqsiijkii paꞌ uƚꞌax qa niteꞌƚe yekaꞌxii paꞌ witwamhiꞌ, qaꞌ iyiniꞌƚipjiꞌkii, qa paꞌ Intata qa naqꞌayinij hatsꞌinha qaꞌ mexe netis ekuꞌnij iye paꞌquꞌ ƚiƚaꞌxeꞌ. Akaꞌan in hitꞌij ujaꞌxƚe in kꞌiyetij pekheweꞌ yaqsiijkii paꞌ uƚꞌax qa niteꞌƚe yekaꞌxii paꞌ witwamhiꞌ. Naꞌl paꞌ ewiꞌƚ witwuƚꞌax jiyamitii paꞌ witwamhiꞌ. Qa akaꞌan qa niteꞌ hitꞌiƚij ewets quꞌ iyiniꞌƚipjiꞌ pakhaꞌ quꞌ naqsiijkii.
\m
\v 17 Week pakhaꞌ niteꞌ ƚeꞌwis taꞌƚets paꞌ witwuƚꞌax. Qa naꞌlƚe paꞌ witwuƚꞌax, niteꞌ jiyekaꞌxii paꞌ witwamhiꞌ.
\m
\v 18 Jinikfeꞌlets iye week naꞌaj hats nekijfikꞌi paꞌ Intata qa hats niteꞌ yaqsiijkii paꞌ uƚꞌax qe paꞌ Intata hats yejeƚets qa paꞌ inwoꞌmet (Satanás) qa niteꞌ ƚekeꞌ quꞌ netꞌekuꞌmets.\x * \xo 5:18 \xt Jn 17:12; 1P 1:5; Jud 24; Ap 3:10\x*
\m
\v 19 Jinikfeꞌlets iye in yatsatꞌetsꞌinij paꞌ Intata. Qa week haꞌne seheꞌ ipjiꞌ pekheweꞌ niteꞌ yatsatꞌetsij paꞌ Intata pekheweꞌen yatsatꞌetsij paꞌ inwoꞌmet (Satanás).
\m
\v 20 Jinikfeꞌlets iye haꞌ Ƚaꞌs paꞌ Intata in nametsjuꞌ haꞌne seheꞌ qa jiyeƚisij paꞌ inikfeliyaxitsets maꞌ qa jinikfeꞌlets paꞌ yijaaꞌija in Dioosija. Inekhewel in hats juꞌun jiꞌtejeꞌm haꞌ yijaaꞌija. Hakhaꞌan Jesucristo, Ƚaꞌs paꞌ Intata. Hik hakhaꞌ Dioosija qa hik hakhaꞌ iye witiƚaꞌx niteꞌ yiliꞌij.\x * \xo 5:20 \xt Jn 1:14; 8:42; 10:38; 15:9; 17:21; 1Jn 1:2; 2:23-24; 3:5,8; 1Ts 1:1\x*
\m
\v 21 Yilits, jeƚiꞌƚijuꞌƚ hasuꞌuj isuꞌuniꞌƚ quꞌ iyiniꞌƚii quꞌ hik ƚunyeꞌjeꞌ quꞌ dioseꞌ ekeweꞌ wekwek. Amén.