\id 2JN  - Maka NT [mca] -Paraguay (web version -2013 bd) 
\h 2 JUAN
\toc1 2 JUAN
\toc2 2 Juan
\toc3 2Jn
\mt1 2 JUAN
\c 1
\s Mexe wetfel.
\p
\v 1 Yakhaꞌ witlijtsitjii tenekꞌenheꞌyij. Qa keꞌ efu\f + \fr 1\fr* \ft Paꞌ Juan wenqꞌikaꞌai peꞌ efu. Akaꞌan naꞌl peꞌ yumti quꞌ nenqꞌikaꞌai peꞌquꞌ ƚelijtsitjiye qa naꞌl iye peꞌ yumti quꞌ nenqꞌikaꞌai neꞌej efuꞌija.\f* tꞌekuꞌmiijiꞌ paꞌ Intata qa week heꞌ ƚelits, hikheꞌ heꞌnqꞌikaꞌ ai. Hik hekheweꞌ iye qi in hisuꞌun. Niteꞌ yeƚꞌewiꞌƚƚe quꞌ hisuꞌun, qe week iye hekheweꞌ hats nikfeꞌlets paꞌ yijaaꞌija, yisuꞌun iye hekheweꞌen\x * \xo 1 \xt Ro 16:13; 1P 5:13; 2Jn 13; Jn 8:32; 14:6; 1Ti 2:4\x*
\m
\v 2 qe taꞌƚets keꞌ Intata ƚeꞌlijei in yijaalija, qa ekeweꞌen qa niteꞌ ƚꞌanuuyiꞌi quꞌ jinaqamij.\x * \xo 2 \xt 1Jn 1:8\x*
\m
\v 3 Kꞌiyinijets paꞌ Intata qa haꞌ Ƚaꞌs Yatsatꞌaxꞌinij Jesucristo quꞌ netꞌiftits inwets qa quꞌ nenqꞌeletꞌinij iye qaꞌ jineƚisij iye paꞌ witꞌikesimeyaꞌx hatsꞌinha qaꞌnteꞌ jinteliyiꞌij quꞌ jintajayaanija qaꞌ qiyeꞌ iye quꞌ jinewet-suꞌunij in hats jitajayan.\x * \xo 3 \xt 1Ti 1:2; 2Ti 1:2; He 1:2; 1Jn 4:12\x*
\s Paꞌ ewiꞌƚ wiꞌtlijei tꞌejuyets paꞌ witeqsuꞌunkaꞌx.
\p
\v 4 Qi in yeꞌƚeꞌwisiꞌmkii in hewetweniꞌƚ heꞌ ujaꞌx hekheweꞌ elits qa hiꞌwen in yijaaꞌija in yijayan ekeweꞌ ƚeꞌlijei paꞌ Intata.\x * \xo 4 \xt 3Jn 3-4\x*
\m
\v 5 Qa haneꞌej qa kꞌiyinij ewets efu quꞌ aqsiijijkiiha kakhaꞌ wiꞌtlijei in yitꞌij quꞌ jinewet-suꞌun inekhewel in hats jitajayan haꞌ Cristo. Akaꞌ wiꞌtlijei in hikaꞌ niteꞌ inkꞌayik hik akaꞌ hayiits naꞌl ineꞌm in iꞌnkꞌaa jitajayan haꞌ Cristo.\x * \xo 5 \xt 1Jn 3:11\x*
\m
\v 6 In jitesuꞌuunija paꞌ Intata maꞌ qa jitaqsiijkii paꞌ yisuꞌun. Qa akaꞌ wiꞌtlijei in yitꞌij inwets quꞌ jintesuꞌun pekhewepeꞌ, hik akaꞌ yisuꞌun paꞌ Intata quꞌ jintaqsiijkii. Akaꞌan hayiits ƚꞌimpiꞌyeꞌeƚij.\x * \xo 6 \xt 1Jn 2:5; 5:3; Sal 103:18; Mr 7:8; Jn 14:15,21,23; 15:10\x*
\s Paꞌ yijaaꞌija in niteꞌ witqekuyeꞌjij paꞌ Cristo.
\p
\v 7 Qe olots peꞌ iwotkꞌonhetsits nekipjiꞌ haꞌne week seheꞌ. Eneweꞌen niteꞌ nifel haꞌ Jesucristo in nametsjuꞌ haꞌne seheꞌ qa hik ƚꞌeseninyejei eneꞌ seheꞌ ipjiꞌ. Qa pakhaꞌ quꞌ naqsiijkii akaꞌan pakhaꞌan iwotkꞌonhetsaxƚe qa ƚꞌejuihife iye haꞌ Cristo.\x * \xo 7 \xt Fil 3:3; 1Jn 2:18,22; 4:3\x*
\m
\v 8 Jeƚiꞌƚijuꞌƚha akaꞌan hatsꞌinha qaꞌnteꞌ anqamiꞌiƚij pekheweꞌ hats naꞌliꞌƚ eꞌm enistitsiꞌƚ hatseꞌ hatsꞌinha qaꞌ weekeꞌ wetets quꞌ namtaxets quꞌ estiꞌyiꞌƚij hatseꞌ.\x * \xo 8 \xt 2P 2:13\x*
\m
\v 9 Week pakhaꞌ quꞌ nittaxijets quꞌ hats nijayan haꞌ Cristo qa hats iꞌntaxjiꞌtejeꞌm paꞌ witꞌikheyiꞌj qa in yamets ƚahatsꞌij qa yiliꞌij iye, maꞌ qa hats yiliiꞌijha hats niteꞌ tepilets, qe niteꞌ hayiits quꞌ natsatꞌaxij paꞌ Intata. Qa paꞌquꞌ ewiꞌƚeꞌ quꞌ hats naꞌn jiꞌtejeꞌm paꞌ witꞌikheyiꞌj, qe pakhaꞌan hayiits yatsatꞌaxij paꞌaj paꞌ Intata qa haꞌ Ƚaꞌs iye.\x * \xo 9 \xt Jn 5:12; 8:31-32,41; 15:4-16; 1Jn 2:21-23,27; Mt 11:27; He 1:2\x*
\m
\v 10 Quꞌ nanaꞌl paꞌquꞌ nanamiꞌƚ ewets quꞌ nitꞌijets quꞌ nenfel ekeꞌ wiꞌtlijei qa ham ƚiꞌim keꞌ hats iꞌnqꞌijatshenij haꞌ Cristo, qa hasuꞌuj iwhiniꞌƚifi peꞌquꞌ etsiꞌyiꞌiƚ. Hasuꞌuj iye itꞌiƚijets: —¡Ƚeꞌwis in ƚanam!—\x * \xo 10 \xt Jn 1:12; 6:21; 13:20\x*
\m
\v 11 Qe pakhaꞌ quꞌ nitꞌijets: —¡Ƚeꞌwis in ƚanam!— pakhaꞌan hats hik ƚunyeꞌj quꞌ nifenij paꞌ yaqsiijkii in uƚꞌax.\x * \xo 11 \xt 1Ti 5:22; Ef 5:11; 1Ti 5:22; Jud 23\x*
\s Wetfel.
\p
\v 12 Olotstax keꞌ hisuꞌuntax quꞌ henfeliꞌƚ eꞌm qa niteꞌƚe hisuꞌun quꞌ henjiꞌ haꞌne witfaakanek. Qꞌax quꞌ ƚekeꞌyeꞌ hatseꞌ quꞌ natsamiꞌƚ ei qaꞌ jintafaakateijuꞌha, maꞌ qa qiyiꞌija quꞌ jeꞌƚeꞌsitsiꞌimkii.\x * \xo 12 \xt 3Jn 13; Jn 15:11\x*
\m
\v 13 Eneweꞌ ƚelits keꞌ ejefekiꞌ, hikkeꞌ tꞌekuꞌmiijiꞌ iye paꞌ Intata wetfel ei. Hats ujaꞌxƚe.