\id 3JN  - Maka NT [mca] -Paraguay (web version -2013 bd) 
\h 3 JUAN
\toc1 3 JUAN
\toc2 3 Juan
\toc3 3Jn
\mt1 3 JUAN
\c 1
\s Juan wenqꞌikaꞌai paꞌ Gayo.
\p
\v 1 Yakhaꞌ witlijtsitjii tenekꞌenheꞌyij hikaꞌ eꞌm haꞌne witfaakanek akhaꞌ Gayo. Yakhaꞌ qi in kꞌesuꞌun.\x * \xo 1 \xt 2Jn 1; Jn 14:6; 1Jn 5:20\x*
\s Juan qi in yisuꞌun paꞌ Gayo.
\p
\v 2 Yejefe qi in kꞌesuꞌun, yakhaꞌ ewiꞌƚƚe in kꞌiyinijets paꞌ Intata quꞌ neꞌfenij week paꞌquꞌ ƚunyeꞌjeꞌ quꞌ aqsiijkii qa kꞌiyinijets iye quꞌ nafits in yijaaꞌija in ƚijayan paꞌ Intata quꞌ ham aatsꞌeyeꞌ.\x * \xo 2 \xt 1Ti 1:10\x*
\m
\v 3 Qi in tsiꞌsinhetiꞌmkii in namyii heꞌ ujaꞌx inejefetsipjiꞌ paꞌ Intata qa nifel yeꞌmikꞌi paꞌ ejunyeꞌj in yijaaꞌija in ƚijayaanija paꞌ Intata.\x * \xo 3 \xt Jn 15:26; Hch 26:5; 2Jn 4\x*
\m
\v 4 Les qiijiija qa ƚeꞌwisjiꞌij yeꞌmkii qa kꞌimpiyeꞌjiꞌjij hekheweꞌ yijatshenhei in niteꞌ yiliꞌij in yijayaanija keꞌ Intata ƚeꞌlijei.\x * \xo 4 \xt Jn 15:11; 1Co 4:14; Ga 4:19; Fil 2:22\x*
\m
\v 5 Yejefe qi in kꞌesuꞌun, yakhaꞌ hitꞌij ewets in qiꞌija in ƚeꞌwis kaꞌ eqfenyeꞌjij in ƚeneqjunuꞌuj qa ƚꞌiftitsꞌets iye hekheweꞌ hats yijayan haꞌ Cristo. Qa qiꞌija iye in ƚeꞌwis in ƚeneqjunujiꞌjij pekheweꞌ niteꞌ ƚenikfeltaxij hats yijayan haꞌ Cristo.
\m
\v 6 Eneweꞌen in yamjii naꞌaj witset qa nifeljiꞌijkii paꞌ eqfenyejeijiꞌjij in qiꞌija in ƚisuꞌun qa ƚeneqjunuꞌuj iye, iꞌnjiijifi peꞌ witlitsitjii qa nifeljiꞌjiꞌm peꞌ hats yijayan haꞌ Cristo. Qa kꞌiyinij ewets quꞌ iꞌfenij week paꞌquꞌ hamiꞌikꞌui quꞌ netꞌejuyets quꞌ nakkii iye quꞌ nenfel keꞌ Intata ƚeꞌlijei qe hik akaꞌ yisuꞌun paꞌ Intata hatsꞌinha qaꞌ ƚeꞌwiiseꞌƚe quꞌ nakkii iye,\x * \xo 6 \xt Mt 16:18; 1Co 10:31; 14:4; 16:6; Ap 1:4; Hch 15:3; 20:38; 21:5; Ro 15:24; 2Co 1:16; Tit 3:13; 1Ts 2:12\x*
\m
\v 7 qe ƚekhewel in ikkii taꞌƚets in tꞌithayiꞌyiꞌm haꞌ Jesucristo qa niteꞌ yisuꞌun quꞌ netꞌekuꞌmijuꞌƚ naꞌaj tistaxij pekheweꞌ niteꞌ yijayan haꞌ Cristo.\x * \xo 7 \xt Jn 10:25; Hch 15:14; Ap 14:1; 1Co 9:15-18\x*
\m
\v 8 Qa hik taꞌƚijupiꞌ inekhewel quꞌ jintaqsiijkiyek peꞌyeꞌ hatsꞌinha qaꞌ week jiꞌntꞌithayiyiꞌƚ pekheweꞌen. Maꞌ qaꞌ hik ƚunyeꞌjeꞌ quꞌ ewiꞌƚ jinaꞌnijiꞌ paꞌ iꞌnithayijkit in jitefel keꞌ Intata ƚeꞌlijei.
\s Paꞌ Diótrefes uƚꞌax paꞌ ƚunyeꞌj.
\p
\v 9 Yakhaꞌ in hikaꞌ kaꞌ hayiits witfaakanek tꞌejuitaxets hekheweꞌ hats yijayan haꞌ Cristo, qa hakhaꞌƚe Diótrefes qa niteꞌ yisuꞌun qe ƚakhaꞌ yisuꞌuntax quꞌ les qi quꞌ netnekꞌenhei qa niteꞌ tsisuꞌuntaxiꞌƚ yekheweliꞌƚ in heinekꞌenheꞌyiꞌƚij hekheweꞌ hats yijayan haꞌ Cristo.\x * \xo 9 \xt Mt 20:25-28; 23:5-12; Col 1:18; 1P 5:2-3; 2Jn 9; Hch 18:27; Ro 16:1-2; 2Co 3:1\x*
\m
\v 10 Qa hik taꞌƚijupiꞌ quꞌ ƚekeꞌyeꞌ quꞌ natsamii hatseꞌ qaꞌ week henfeljiꞌjuꞌ hekheweꞌ hats yijayan haꞌ Cristo kaꞌ ƚunyeꞌj haꞌ Diótrefes qi in uƚꞌax qa uƚꞌetsikꞌi iye peꞌ ƚeꞌlijeyiꞌƚ yiwetskii. Qa ekeweꞌen niteꞌ ujaꞌxƚe quꞌ naqsiijkii qe naꞌl iye kakhap iye yaqsiijkii kakhaꞌan, in tꞌoqoweijiijuꞌƚ hekheweꞌ inejefets in yamtaxii paꞌaj keꞌ witlijtsitjii hik hekheweꞌ ikijfikꞌi quꞌ nenfel keꞌ Intata ƚeꞌlijei. Qa peꞌ neqjunutaxij maꞌ qa yiwuꞌmikꞌuifikꞌi keꞌ ƚeꞌlijtsitjii.\x * \xo 10 \xt 1Ti 5:13\x*
\s Paꞌ Demetrio ƚeꞌwis paꞌ ƚunyeꞌj.
\p
\v 11 Yejefe qi in kꞌesuꞌun, yakhaꞌ hitꞌij ewets quꞌ hasuꞌuj eneqjeyuꞌuj quꞌ aqsiijkii paꞌ uƚꞌax. Eneqjeyuꞌuj yijatꞌij quꞌ aqsiijkii paꞌ qi ƚeꞌwis. Pakhaꞌ quꞌ naqsiijkii paꞌ ƚeꞌwis pakhaꞌan yatsatꞌaxij paꞌ Intata. Qa pakhaꞌƚe quꞌ naqsiijkii paꞌ uƚꞌax pakhaꞌan niteꞌ nikfeꞌlets paꞌ Intata.\x * \xo 11 \xt 1P 3:17; 1Jn 4:4; Ex 33:20\x*
\m
\v 12 Week yitꞌijets in ƚeꞌwis paꞌ yaqsiijkii haꞌ Demetrio. Qa week yitꞌijets iye in yijaaꞌija in yaqsiijkii paꞌ yitꞌij keꞌ Intata ƚeꞌlijei. Qa yekheweliꞌƚ iye hik akaꞌ hitꞌiƚijjuꞌ iye. Qa akhaꞌ hats ƚenikfeꞌlets week naꞌaj hitꞌiƚijjuꞌ in yijaaꞌija.\x * \xo 12 \xt 1Jn 2:20-21; Jn 21:24\x*
\s Wetfel.
\p
\v 13 Olotstax keꞌ hisuꞌuntax quꞌ henfel eꞌm qa niteꞌƚe hisuꞌun quꞌ henjiꞌ haꞌne witfaakanek.
\m
\v 14 Qꞌax quꞌ ƚekeꞌyeꞌ hatseꞌ quꞌ natsam ei qaꞌ jintafaakateijuꞌha.
\m
\v 15 Naꞌlƚek paꞌ Intata quꞌ neƚisij paꞌ witꞌikesimeyaꞌx. Eneweꞌ ejuwaikal wetfel ei. Qa akhaꞌ quꞌ enfeliꞌmek hekhewep yijuwaikaliꞌƚ in hewetfeliꞌƚii. Qa hasuꞌuj paꞌ quꞌnteꞌ enfeliꞌim.