\id JUD  - Maka NT [mca] -Paraguay (web version -2013 bd) 
\h JUDAS
\toc1 JUDAS
\toc2 Judas
\toc3 Jud
\mt1 JUDAS
\c 1
\s Judas mexe wetfel.
\p
\v 1 Yakhaꞌ Judas, ƚeqejkunenek haꞌ Jesucristo, qa ƚekꞌinij haꞌ Jacobo (Santiago). Heꞌnqꞌikaꞌaƚ ei ekheweliꞌƚ pekheweꞌ tayaꞌyiijiꞌ paꞌ Intata Dios qa yisuꞌun iye qa yejeƚets iye qe taꞌƚets haꞌ Jesucristo.\x * \xo 1 \xt Mt 13:55; Mr 6:3; Ro 1:7; 1Co 1:24; 1Ts 1:4; 5:23; 2Ts 2:13; Jn 17:11,15; 1P 1:5\x*
\m
\v 2 Naꞌlƚek paꞌ Intata quꞌ qi quꞌ nenqꞌeletiꞌƚ ej iye qa quꞌ les neƚisiꞌƚij iye paꞌ witꞌikesimeyaꞌx qa quꞌ qi quꞌ nesuꞌuniꞌƚ iye.\x * \xo 2 \xt 1P 1:2; 2P 1:2\x*
\s Jeƚiꞌƚijuꞌƚ peꞌ iꞌnqꞌijatshentaxij qa niteꞌƚe yijayan.
\p
\v 3 Yejefets, yojo in qi in hisuꞌuntaxija quꞌ heꞌnqꞌikaꞌaƚij ei in tꞌejuyets paꞌ iniƚijii niteꞌ yiliꞌij hikpaꞌ jeꞌweektaxij, qa humtiƚe quꞌ les ƚeꞌwiseꞌ quꞌ heꞌnqꞌikaꞌaƚij ei quꞌ kꞌakakƚiniꞌƚij quꞌ mawatlaniƚipjiꞌ paꞌ niteꞌ inqekuyejeyij, hikpaꞌ hats tisij paꞌ Intata week peꞌ hats yijayan qa niteꞌ ƚekeꞌ quꞌ inkꞌayikꞌe.\x * \xo 3 \xt Tit 1:4; 1Ti 6:12; 2Ti 4:7; 2P 2:21\x*
\m
\v 4 Qe naꞌl peꞌ ujaꞌx jukhew iꞌniꞌƚ etjiꞌtejeꞌm niteꞌ watanalittax ƚeteꞌm, hik pekheweꞌ hayiits weꞌnikaꞌajjiꞌ paꞌaj quꞌ nattanithenhetii. Pekheweꞌen jukhew niteꞌ yijayan paꞌ Intata, yisuꞌun quꞌ nayaxkitipjiꞌ paꞌ ƚeqꞌiftitsheneyeꞌj paꞌ Intata hatsꞌinha quꞌ nitꞌijets quꞌ niteꞌ uƚꞌaxeꞌ quꞌ jinanawitjiƚiꞌij haꞌne iꞌneseꞌn, qa niteꞌ yisuꞌun iye quꞌ netꞌekuꞌmijuꞌƚ haꞌ ewiꞌƚƚe in Tenekꞌenhei inipjiꞌ qa Yatsatꞌetsꞌinij iye Jesucristo.\x * \xo 4 \xt 1P 2:8; Ga 2:4; 2Ti 3:6; Mr 7:22; Ro 5:6; Tit 1:16; 2P 2:1; 1Jn 2:22\x*
\m
\v 5 Hisuꞌun quꞌ kꞌajamtikineniƚikꞌi, yemjeetax in hats week ƚenikfeꞌltaxiƚets ekeweꞌen, paꞌ Yatsatꞌaxꞌinij in yilithin peꞌ Israel, yilithinikꞌui paꞌ seheꞌ Egipto, qa iꞌnkꞌaƚe paꞌ Yatsatꞌaxꞌinij qa nilanjuꞌ peꞌ Israelꞌikꞌi peꞌ niteꞌ tekꞌenets.\x * \xo 5 \xt 1Co 10:1-11\x*
\m
\v 6 Qa hik ƚunyejei iye paꞌaj peꞌ angelits in niteꞌ yejeƚets paꞌ ƚunyejeitaxija naꞌ waꞌsjiꞌ, qe wattaliheniꞌ yijatꞌij peꞌ ƚetsetititstaxija, maꞌ qa paꞌ Intata qa yeniꞌ paꞌ qi in nookii in nopheꞌƚjuꞌ qa yaqsiꞌjijup paꞌ neƚujiꞌ quꞌ newetjeyumtshentax peꞌ uƚꞌets.\x * \xo 6 \xt Gn 6:1-4; 2P 2:4\x*
\m
\v 7 Qa hik ƚunyeꞌj iye paꞌ Sodoma qa paꞌ Gomorra qa pekhewep witsetits metitsiꞌm, in wanawitjiƚejuꞌkii qa in wapilƚe wetjuꞌƚkii iye, qa paꞌ ƚunyejeikii paꞌaj qa wetjeyumtshentaximijupiꞌ paꞌquꞌ ƚunyejeyeꞌkii hatseꞌ peꞌquꞌ namii paꞌ feꞌt niteꞌ yiliꞌij.\x * \xo 7 \xt 2P 2:6; 2Ts 1:8\x*
\m
\v 8 Qa hik ƚunyejei pekheweꞌ iꞌniꞌƚ etjiꞌtejeꞌm, in itsowoƚꞌax qa yumtiƚe peꞌyeꞌ qa yaqsiijkii, qa yitꞌesinhet paꞌ ƚꞌeseꞌn in yaqsiijkii paꞌ uƚꞌax, yuten week paꞌquꞌ ƚunyeꞌjeꞌ quꞌ netnekꞌenhei qa niteꞌ yaatseꞌetsjuꞌ in uƚꞌax ƚꞌanyejeyij paꞌquꞌƚe ƚunyeꞌjeꞌ pekheweꞌ quꞌ qitseꞌjiꞌ.\x * \xo 8 \xt 2P 2:10\x*
\m
\v 9 Paꞌ qijiꞌ ángel Miguel nijiweꞌyets iye quꞌ uƚꞌetsiꞌikꞌi peꞌquꞌ nitꞌij, paꞌ inwoꞌmet in tejitheitaajetskii quꞌ nenfeliꞌm paꞌ iꞌniꞌ peꞌ ƚenutsikꞌi paꞌ Moisesꞌikꞌi, qe yitꞌijets yijatꞌij: —¡Paꞌ yatsatꞌaxyij quꞌ naqꞌayinij!—\x * \xo 9 \xt Dn 10:13,21; 12:1; Ap 12:7; Lc 1:19; 1Ts 4:16; Mt 4:1,10; 8:4; Hch 13:10; Sal 77:20; He 3:2\x*
\m
\v 10 Qa pekheweꞌƚeꞌen peꞌ yitꞌij ƚetets in inejefetsipjiꞌ paꞌ Intata qa uƚꞌetsikꞌi ƚeꞌlijeyij paꞌ quꞌnteꞌ nenikfeꞌleꞌets, qa paꞌ nikfeꞌltaxets in niteꞌ qi, qa hik ƚunyejei neꞌej inqaꞌmetets in nekfikꞌi qa nikfeꞌlets paꞌ ƚunyejeiƚe ek. Qa ekeweꞌen qa hik ekeweꞌ quꞌ niwuƚꞌenhetjuꞌ.
\m
\v 11 ¡Hiyeꞌ enewusits yijaatꞌij pekheweꞌen! Qe ƚekhewel ikikꞌi paꞌ witꞌikheyiꞌj ikikꞌi iye paꞌaj paꞌ Caín, qa in yisuꞌun quꞌ nanaxij ƚꞌastai, maꞌ qa yisuꞌunija in ikikꞌi paꞌ witꞌikheyiꞌj ikikꞌi iye paꞌaj paꞌ Balaam, nanhiyuꞌupjiꞌkii peꞌquꞌ netnekꞌenhei qaꞌ uƚꞌetseꞌjuꞌ hatseꞌ in ƚunyeꞌjek paꞌ Coreꞌikꞌi.\x * \xo 11 \xt Gn 4:1-17,24-25; He 11:4; 1Jn 3:12; Nm 16:1,32; 22:5; 2P 2:15\x*
\m
\v 12 Eneweꞌen hik ƚunyejei naꞌaj wekwek iftsaxets quꞌ jinafꞌaliꞌipjiꞌ in niteꞌ jiteꞌwen in ekufetsiꞌƚij naꞌaj ƚaqsiiƚijkii qa niteꞌ wepin wetjuꞌƚ iye, ewiꞌƚƚe in watjamtiƚiꞌijƚetets quꞌ netekjuꞌ. Eneweꞌen hik ƚunyejei iye wasil ham iweliꞌyeꞌjiꞌ qa yekaꞌxƚe naꞌaj tꞌunikꞌi, hik ƚunyejei iye neꞌej najkak quꞌ ham ƚeyeꞌ in yamtaxets quꞌ netei, maꞌ qa in tenitꞌijphaꞌm peꞌ ƚefitetsꞌij maꞌ qa hats wetsjukꞌij in waꞌm.\x * \xo 12 \xt 1Co 11:17-22; 2P 2:13; Pr 25:14\x*
\m
\v 13 Hik ƚunyejei iye neꞌej qitsikꞌi ƚeqe tꞌuyuyits naꞌaj qi iweliꞌ in nejetiꞌ naꞌaj ƚotkoyek naꞌaj ƚꞌehuf, qe in iꞌnqꞌijatshen qa nejetiꞌ paꞌ yeqwepin. Hik ƚunyejei iye neꞌej footekii in niteꞌ ikesimeniꞌ paꞌquꞌ naꞌniꞌ, paꞌ qi in nookii hats wanaqsiꞌjijup quꞌ netꞌejuyets pekheweꞌen qaꞌ pakhaayiꞌij quꞌ naꞌniꞌkii.\x * \xo 13 \xt Is 14:12-15; Ap 1:16; 8:10; 9:1; Mt 6:23; Jud 6; 2P 2:17\x*
\m
\v 14 Hik eneweꞌ iye iyetij paꞌaj paꞌ Enocꞌikꞌi, hikpaꞌ wetsjuk tatsai (7) paꞌ ƚetset peꞌ taꞌƚets paꞌ Adanꞌikꞌi. Paꞌ Enoc qa yitꞌij: —Jeƚ qekuꞌniꞌƚek, paꞌ Yatsatꞌaxꞌinij quꞌ nenekijjuꞌ peꞌ milits qa milits yamets peꞌ ƚijtsꞌeyekjuꞌ,\x * \xo 14 \xt Gn 5:18; Dt 7:10; 33:2; Mr 8:38; 1Ts 3:13; 2Ts 1:7; He 12:22\x*
\m
\v 15 qe qaꞌ nejeyumtshen eneꞌ week, qaꞌ nitanithenij iye week peꞌ yaqsiijkii pekheweꞌ uƚꞌets, qaꞌ nitanithenij iye in uƚꞌetsikꞌi ƚeꞌlijeyets pakhaꞌan.—\x * \xo 15 \xt 2P 2:5-6\x*
\m
\v 16 Pekheweꞌen niteꞌ yisuꞌun qa pekhel ƚꞌanyejeyijkii week paꞌquꞌ nanaqsiijkii, weꞌniyayittaxij qa pekhel ƚꞌanyejeyijkii week naꞌaj wanaqsiijkii, ewiꞌƚƚe in yisuꞌun quꞌ naqsiijkii paꞌquꞌ nisuꞌunƚe, in iyet wenikfelitets wekwek, qa hamƚe wejuꞌƚiꞌij peꞌ yitꞌij, yaqsiijijetskii paꞌ yisuꞌun quꞌ ƚeqfenyejeyiꞌij pekhewep qa yeqifꞌeliꞌijjuꞌ.\x * \xo 16 \xt 2P 2:10; Lv 19:15; Dt 10:17; 2Cr 19:7; Pr 28:21\x*
\m
\v 17 Qa ekheweliꞌƚ, yejefets, hasuꞌuj antapiꞌiƚikꞌi kekheweꞌ wiꞌtlijei hayiits nefeliƚiꞌm hekheweꞌ ƚeqe apóstoles haꞌ Yatsatꞌaxꞌinij Jesucristo.
\m
\v 18 Hekheweꞌen in yitjiiƚij ewets: —Pekheweꞌ tekeꞌlenjuꞌ neƚuts naꞌl hatseꞌ peꞌquꞌ qi quꞌ neqekuꞌ qaꞌ nawitjiꞌiƚijiꞌ peꞌquꞌ ƚeꞌlijeyeꞌ, qa ewiꞌƚƚe in yisuꞌun quꞌ naqsiijkii paꞌquꞌ nisuꞌunƚe uƚꞌax.—\x * \xo 18 \xt 1Ti 4:1; 2Ti 3:1; 1P 1:5,20; 2P 3:3\x*
\m
\v 19 Eneweꞌen hik eneweꞌ taꞌƚets in yeqetꞌetsjuꞌkii, eneweꞌen in iƚii ewiꞌƚƚe in iƚiyijup haꞌne seheꞌ ipjiꞌ, hamitsjiꞌ paꞌ Espíritu Santo.\x * \xo 19 \xt Ro 8:9; Fil 3:3\x*
\m
\v 20 Qa ekheweliꞌƚ, yejefets, week neƚuts ijatsheniꞌƚfikꞌi paꞌ niteꞌ eqekuyejeyiꞌƚij haꞌ Cristo, iyiniꞌƚ qa paꞌ Espíritu Santo qaꞌ neꞌfeniꞌƚij quꞌ iyiniꞌƚ.\x * \xo 20 \xt Ro 8:15-16,26-27; Ef 6:18\x*
\m
\v 21 Aqsiiƚijkii akaꞌan hatsꞌinha qaꞌnteꞌ eꞌwisitsiꞌiƚjiꞌ paꞌ ƚeqsuꞌunkaꞌx paꞌ Intata in hats ƚoꞌnotkiꞌiƚikꞌui paꞌ ƚeqꞌiltaꞌx haꞌ Yatsatꞌaxꞌinij Jesucristo tꞌejuyets paꞌ witiƚaꞌx niteꞌ yiliꞌij.\x * \xo 21 \xt Jn 15:9-10; 1Jn 4:16\x*
\m
\v 22 Iftitsꞌiƚijets pekheweꞌ eseweitaxijkii.
\m
\v 23 Qa pekhewep qaꞌ aqsiꞌjiꞌƚij quꞌ ilithiniꞌƚikꞌui paꞌ feꞌt. Qa pekhewep qaꞌ enqꞌeletiꞌƚij qa enikꞌesƚeꞌeƚij, qa hasuꞌujƚe quꞌnteꞌ jeƚiꞌiƚijuꞌƚ pekheweꞌ tꞌijatshenhetiꞌyij hasuꞌuj kuꞌmijuꞌƚ hik eqjunyejeyiꞌij peꞌquꞌ ƚeqhinatayeꞌ tꞌesits niteꞌ ƚekeꞌ quꞌ anatkin.\x * \xo 23 \xt 1Co 3:15; 2Ts 1:8; Ap 11:11; Pr 6:16-19; Zac 3:3-4\x*
\m
\v 24 Qa pakhaꞌ ewiꞌƚƚe Eqiƚinaꞌx, hikpaꞌ ewiꞌƚƚe in ƚekeꞌ quꞌ netꞌunhetiꞌƚ qaꞌ niteꞌ anamiꞌiƚjuꞌkii, qa wejuꞌƚij iye quꞌ nekaꞌxiƚets paꞌ iꞌniꞌ paꞌ ƚesaꞌx qa qi quꞌ eꞌƚeꞌsitsiꞌiƚiꞌmkii qa ham iye peꞌquꞌ ewuƚꞌetsiꞌiƚ.\x * \xo 24 \xt Ro 16:25; Jn 17:12; Ef 1:4; 5:27; Fil 2:15; Col 1:22\x*
\m
\v 25 Paꞌ ewiꞌƚƚe Dios Eqiƚinaꞌx, qe taꞌƚets haꞌ Yatsatꞌaxꞌinij Jesucristo, ƚakhaꞌ neniwqinhetjiꞌha, ƚakhaꞌ wittata, niteꞌ yiliꞌij in wittata, ƚakhaꞌ tenekꞌenhei, hayiits paꞌaj in mexe ham paꞌquꞌ ƚahatsꞌiꞌij, qa haneꞌej iye, qaꞌ pakhaayiꞌij iye niteꞌ yiliꞌij. Amén.\x * \xo 25 \xt Jn 5:44; Ro 16:27\x*