\id MAT
\h SAN MATEO
\toc1 SAN MATEO
\mt1 SAN MATEO
\mt2 Jaayhuɨꞌmy Jaduꞌn Nej Jesucristo Ytun Yjajtɨ
\c 1
\s Je Jesucristo ymɨjꞌap ymɨjteedy
\p
\v 1 Cham ngapxaꞌñ nmɨydägaꞌñɨch pɨn Jesucristo yꞌapꞌajt yteedyꞌajt jaduꞌn nej yhuɨꞌmy jaybety. Jesucristo jeꞌ oy apꞌadyii teedyꞌadyii David etz Abraham.
\p
\v 2 Abraham oy ungꞌadyii Isaac. Isaac oy ungꞌadyii Jacob. Jacob oy ungꞌadyii Judá etz yꞌajchytɨjc yꞌuchytɨjc.
\v 3 Judá etz Tamar oy ungꞌadyii Fares etz Zara. Fares oy ungꞌadyii Esrom. Esrom oy ungꞌadyii Aram.
\v 4 Aram oy ungꞌadyii Aminadab. Aminadab oy ungꞌadyii Naasón. Naasón oy ungꞌadyii Salmón.
\v 5 Salmón etz Rahab oy ungꞌadyii Booz. Booz etz Rut oy ungꞌadyii Obed. Obed oy ungꞌadyii Isaí.
\v 6 Isaí oy ungꞌadyii rey David. Je rey David jeꞌ oy ytöxyɨjcꞌadyii huɨdɨ anajty Urías ytöxyɨjcꞌajtpy. E jeꞌ ajcxy yꞌungꞌajtɨ Salomón.
\p
\v 7 Salomón oy ungꞌadyii Roboam. Roboam oy ungꞌadyii Abías. Abías oy ungꞌadyii Asa.
\v 8 Asa oy ungꞌadyii Josafat. Josafat oy ungꞌadyii Joram. Joram oy ungꞌadyii Uzías. 
\v 9 Uzías oy ungꞌadyii Jotam. Jotam oy ungꞌadyii Acaz. Acaz oy ungꞌadyii Ezequías.
\v 10 Ezequías oy ungꞌadyii Manasés. Manasés oy ungꞌadyii Amón. Amón oy ungꞌadyii Josías.
\v 11 Josías oy ungꞌadyii Jeconías mɨɨd yꞌajchytɨjc yꞌuchytɨjc. Huinꞌit Babilonia jäy oy mach je israelitas jäy. Chi mɨnɨcxy jɨm Babilonia yꞌit.
\p
\v 12 Jɨm ma je Babilonia yꞌit, jɨm Jeconías oy ungꞌadyii Salatiel. Salatiel oy ungꞌadyii Zorobabel.
\v 13 Zorobabel oy ungꞌadyii Abiud. Abiud oy ungꞌadyii Eliaquim. Eliaquim oy ungꞌadyii Azor.
\v 14 Azor oy ungꞌadyii Sadoc. Sadoc oy ungꞌadyii Aquim. Aquim oy ungꞌadyii Eliud.
\v 15 Eliud oy ungꞌadyii Eleazar. Eleazar oy ungꞌadyii Matán. Matán oy ungꞌadyii Jacob.
\v 16 Jacob oy ungꞌadyii José huɨdi oy ñäyꞌadyii María. E je María oy ungꞌadyii Jesús huɨdi yxɨɨ Cristo.
\p
\v 17 Jaduꞌn oy ñɨcxy majmactz najtzquëxɨꞌ Abraham ixtɨ David. Ma je David jamajmactz najtzquëxɨꞌ chi je israelitas jäy yajtzɨmy yajmajch ma Babilonia yꞌit, e nañ jamajmactz najtzquëxɨꞌ chiinɨ oy ymiñ yjaꞌty je Cristo.
\s Jesucristo ymaꞌxungꞌajtɨn
\p
\v 18 Jadayab capxy ayuc jaduꞌn nej ymiñ yjaꞌty je Jesucristo. Jesús ytaj, huɨdi anajty yxɨɨ María, yɨꞌ tɨ anajty ycapxytungɨxy co ypɨgaangɨxy mɨɨd José; e ma anajty caꞌnɨ ñaybudɨgɨ́ɨyɨgɨxy, chi María oy yꞌungdzɨmɨ̈gy mɨɨd yɨ Dios yjɨhuɨꞌñ ymɨcꞌajt.
\v 19 José, yɨꞌ ñäy, hueꞌ anajty yɨꞌ yajpaty janch tudägy. Caꞌ anajty xɨ̈huaꞌñ María mayjäyjoty. Hueꞌ janchtɨy yhuinmaꞌñybaty co ixmadzaꞌñ ayüch ameech caꞌ pɨn yajnejhuɨ̈huaꞌñ.
\v 20 Huinꞌit ma jaduꞌn anajty nihuinmayɨ̈y, chi Huindzɨn Dios tüg yꞌángel ñayquëxɨ̈cɨ cumäyjoty ma José, chi ñɨmaayɨ:
\p ― José, David yꞌap yꞌoc, caꞌ mɨjcajee mdzachhuinmay nej mꞌoctöxyɨjcꞌadɨɨyb María, com yɨꞌ yꞌung huɨdibɨ yajmaꞌxungꞌadamy hueꞌ mɨɨd Dios yjɨhuɨꞌñ ymɨcꞌajt ycɨxpɨ.
\v 21 Yɨꞌ ypadamy tüg yꞌung e mxɨɨmöhuɨpy Jesús. Jaduꞌn yɨꞌ xɨɨꞌadɨɨyb com jëgɨ́x co yɨꞌ yajpocyñïhuädzam ñaax ycajp.
\p
\v 22 Tügꞌócɨy jada ytundaayɨ yjajtaayɨ ycɨjxy ycaꞌpxy jaduꞌn nej je Dios anajty tɨ nɨmäy je profeta, je jäy huɨdi Dios yꞌayuc najtzcapxɨɨyɨp ma anajty jaduꞌn yjaybetyɨty:
\q 
\v 23 Je töxyjäy huɨdibɨ caꞌ yëydɨjc mɨɨddzɨnäy hueꞌ jeꞌ ung tzɨmɨ̈cɨp. Chi ypadamyb tüg je yꞌung hueꞌ jeꞌ yxɨɨꞌadaanɨp Emanuel.
\m Emanuel hueꞌ yhuimbɨdzɨmy Dios mɨɨd ɨɨch ajt.
\p
\v 24 Co José ymäyhuijy, chi cuyduñ jaduꞌn nej anajty Dios yꞌángel tɨ nɨmäyii, chi huoy María jaduꞌn nej jɨhuɨɨy töxyɨjcꞌadyii.
\v 25 Per ni caꞌ ajcxy jaduꞌn chɨnaay jaduꞌn nej jäy ypɨcy chɨnäy ixtɨ coonɨ oy María yꞌung yajmaꞌxungꞌaty. Chi yxɨɨmoy Jesús.
\c 2
\s Madzaꞌ niꞌixpɨgɨɨyb oy coꞌɨxɨɨygɨxy piꞌcꞌung
\p
\v 1 Jesús ymaꞌxungꞌajty ma tüg cajp huɨdi yxɨɨ Belén, jɨm ma Judea ñaaxjot, huinꞌit co anajty Herodes yreyꞌaty ma yɨ jɨmbɨ naaxjot. Chi huinꞌit yjaꞌty ma Jerusalén cajp nijëjɨty yëydɨjctɨjc huidibɨ anajty tɨ choñ ma xɨɨ ypɨdzɨmy, yɨ huɨdibɨ anajty ajcxy xɨɨ madzaꞌ tɨ niꞌixpɨgɨɨygɨxy.
\v 2 Chi ajcxy yajtɨy:
\p ― ¿Ma je judíojäy yrey tɨɨbɨ ymaꞌxungꞌaty? Tɨ ɨɨch ajcxy nꞌijxɨ yɨꞌ ymadzaꞌ jɨm ma xɨɨ ypɨdzɨmy, e yɨꞌ ɨɨch ajcxy ya miñ nhuindzɨgɨ̈huaangɨxy.
\p
\v 3 Co je rey Herodes jaduꞌn mɨdooy, chi ooy ytɨgɨɨy tajpɨ maybɨ mɨɨd tügꞌócɨy cajpjäy jɨm Jerusalén.
\v 4 Huinꞌit je rey huomujctay tügꞌócɨy teedytɨjc huindzɨndɨjc huɨdibɨ anajty yajꞌixpɨjcp yɨ Dios yley, chi yajtɨy ma anajty ymaꞌxungꞌadaꞌñ yɨ Cristo.
\v 5 Chi ajcxy yꞌadzooy:
\p ― Jɨm Belén ma Judea ñaaxjot, com Dios yꞌayucnajtzcapxɨɨybɨ jaduꞌn jeꞌ cojaay:
\q 
\v 6 E miich Belén, mabɨ Judea ñaaxjot, mɨjꞌajtp mgɨxꞌajtp caꞌydɨ jac huɨdi naax jac huɨdi cajp, com ma miich chonaꞌñ tüg Huindzɨn huɨdi aneꞌ mam yɨ israeljäy.
\p
\v 7 Huinꞌit Herodes oy yajhuoyii ameech huɨdibɨ anajty tɨ íjxcɨxy yɨ madzaꞌ. Chi tɨybɨjcy yajxon mɨna anajty ogaꞌn tɨ ijxcɨxy je madzaꞌ.
\v 8 E huinꞌit ajcxy quejxy jɨm Belén. Chi jaduꞌn nɨmay:
\p ― Nɨ́cxcɨx jɨm e ocnidɨu ocyajtɨugɨxy je piꞌcꞌanäg; e co anajty tɨ mbatcɨxy, miñ miich ajcxy xyajnɨmáaygɨxyɨch jaydëbɨ ɨɨch nɨcxy nañ jaduꞌn nhuindzɨgɨ̈yɨch.
\p
\v 9 Co jaduꞌn rey najtzcapxɨyday, chi ajcxy choñ. E je madzaꞌ tɨɨbɨ anajty íjxcɨxy ma xɨɨ ypɨdzɨmy, chi ajcxy ijxy jayɨjp jeꞌ anajty ñɨcxy ma jeꞌ ajcxy, ixtɨ conɨ oy je madzaꞌ yhuäcxɨpy ma anajty je piꞌcꞌanäg yajpaady.
\v 10 Co je rey ixpɨcytɨjc jaduꞌn ijxy yɨ madzaꞌ, chi ajcxy oy janch jotcujc ñayjɨhuɨ̈yii.
\v 11 Co ajcxy ytɨjctɨgɨɨy, chi ajcxy ijxy je piꞌcꞌanäg mɨɨd ytaj je María. Chi jadaꞌ ajcxy ñaygojxtɨnaydaacɨ huindzɨgɨɨy ojadajty ajcxy je piꞌcꞌanäg. Chi ajcxy yajꞌahuach yxuumy aguejtucy abɨjctucy, chi ajcxy yajpɨdzɨmy oorɨ, poom, etz tüg tzoy huɨdi yxɨɨ mirra. Chi ajcxy moy je piꞌcꞌanäg.
\v 12 Chi cumäyjoty ajcxy nɨmaayɨ co caꞌ huaad yhuimbijtcɨxy ma Herodes, chi ajcxy ñɨcxnɨ ma ycajp, jüyöyñaxy ajcxy je Herodes, huingbɨ tüꞌaa ajcxy ycuyñɨcx.
\s Co José etz María yqueegyñɨcxcɨxy Egipto
\p
\v 13 Co je rey ixpɨcytɨjc ajcxy yhuimbijttaayñɨ, chi cumäjoty José ijxy tüg Dios yꞌángel, chi ñɨmaayɨ:
\p ― Pɨdɨ̈g, nɨcx jɨm Egipto ñaaxjot mɨɨd yɨ piꞌcꞌanäg etz mɨɨd yɨꞌ ytaj, e jɨm mhuɨꞌmɨpy ixtɨ coonɨ ɨɨch miich nɨmähuɨpy. Com yɨ Herodes yꞌixtähuamy yɨꞌ yɨ piꞌcꞌanäg e yajꞌögaꞌñ yɨꞌ.
\p
\v 14 Chi huinꞌit José ypɨdɨ̈gy mɨɨd tzooñ coodz je piꞌcꞌanäg mɨɨd ytaj, chi ajcxy ñɨcxy jɨm Egipto.
\v 15 Jɨm ajcxy yꞌijty ixtɨ coonɨ oy yꞌögy je Herodes. Jada jeꞌ jaduꞌn yajcuydun jaduꞌn nej Dios anajty tɨ ymɨnañ ma yɨꞌ yꞌayucnajtzcapxɨɨybɨ: “Jɨm Egipto ɨɨch nꞌung tɨ nhuoy.”
\s Herodes pɨdacy yꞌaneꞌmɨn co huen piꞌcꞌanäg yajꞌöctäyii ajcxy
\p
\v 16 Co Herodes oy huinmaꞌñ yajyöy co tɨ anajty ooy yhuinꞌɨɨñyii je rey ixpɨcytɨjc ajcxy co caꞌ anajty tɨ ñihuimbidyii, chi ooy yjotꞌambɨjcy, chi niꞌaneꞌmdɨɨy co huen nɨcxy jɨm Belén etz majaty cajp mɨhuingon Belén, yajꞌöctaaygɨxy tügꞌócɨy yɨ piꞌcꞌanäg huɨdibɨ mejtz jɨmɨjt etz huɨdibɨ caꞌnɨ nigooty mejtz jɨmɨjt.
\v 17 E jaduꞌn jada yajcuyduñ jaduꞌn nej anajty Dios yꞌayucnajtzcapxɨɨybɨ, je Jeremías, anajty tɨ cojaay:
\q 
\v 18 Jɨm Ramá yajmɨdoy co anajty chachjɨɨy chachyäxy jäy ajcxy; yɨ Raquel tzachjɨɨyb tzachyaaxp mɨɨd yꞌung ajcxy ycɨxpɨ, caꞌ ajcxy anajty yjotcujcꞌaty mɨɨd co anajty yꞌung tɨ yꞌöctäy.
\p
\v 19 Co oy yꞌöcnɨ Herodes huinꞌit jɨm Egipto, Dios tüg yꞌángel ñayguëxɨ̈cɨ cumäyjoty ma José. Chi ñɨmayɨ:
\p
\v 20 ― Pɨdɨ̈g, mɨɨdnɨcx yɨ piꞌcꞌanäg etz yɨꞌ ytaj jɨm ma yɨ Israel ñaaxjot jadügtecy com tɨ yꞌöctaayñɨ yɨ huɨdibɨ anajty yajꞌögam yɨ piꞌcꞌanäg.
\p
\v 21 Huinꞌit José ypɨdɨ̈gy, mɨɨd nɨcxy yɨ piꞌcꞌanäg etz yɨꞌ ytaj jɨm ma Israel ñaaxjot.
\v 22 Per co José nejhuɨɨy co je Arquelao yɨꞌ anajty jɨm aneꞌmb jaduꞌn nej anajty je yteedy Herodes, ooy chɨgɨɨy nej ñɨcxɨp jɨm. E co jaduꞌn anajty tɨ ycumäy co caꞌ jɨm ñɨcxɨp, chi ajcxy ñɨcxy jɨm Galilea ñaaxjot.
\v 23 Co jɨm yjäty, chi jɨm chɨnaydacpɨjcy ma je cajp huɨdi yxɨɨ Nazaret. Jadayaabɨ jeꞌ jaduꞌn tun jajtɨ jaduꞌn nej anajty ycojaayɨty ma Dios yꞌayucnajtzcapxɨɨybɨ ñecy co Jesús xɨɨꞌadɨɨyb Nazareno.
\c 3
\s Juan el Bautista yꞌayuc capxhuäcxy ma tɨ̈dz naax it
\p
\v 1 Huinꞌit tiempo nañ jaduꞌn Juan je Bautista (huɨdibɨ jäy yajnɨɨbejtpɨ) ymiñ tüg tɨgɨ̈dum ma Judea ñaaxjot capxhuäcx Dios yꞌayuc, 
\v 2 ymɨnañ:
\p ―Jothuimbíjtcɨx ma Dios com yɨ Dios yꞌaneꞌmɨn huingonɨñ yɨꞌ.
\p
\v 3 Jada Juan yɨꞌ jeꞌ huɨdibɨ je profeta Isaías nigapxy ymɨnañ:
\q Jɨm mɨjtɨgɨ̈dum yajmɨdoy tüg ayuc mɨnaꞌñ: “Niꞌixɨɨygɨxy yɨ mHuindzɨn ytüꞌaa, niꞌixɨɨygɨxy tüg tüꞌaa tɨɨybɨ.”
\p
\v 4 Je Juan hueꞌ anajty yhuitꞌajtpy ɨyujc nïbɨjc (huɨdibɨ jäy ytijpy camello) e hueꞌ anajty yhuɨɨnɨp ɨyujc ac, e yɨꞌ anajty yjɨcxyꞌajtpy muꞌ etz tijaty ɨyujc päg jɨm tüg tɨgɨ̈duum.
\v 5 Chi chooñ jɨm Jerusalén jäy etz tügꞌócɨy huɨdijaty tzɨnaayb ma Judea ñaaxjot, nañ jaduꞌn huɨdijaty tzɨnaayb ma Jordán mɨjnɨɨbaꞌ, ñɨcx ajcxy ma Juan amɨdoꞌíjtɨy yɨꞌ yꞌayuc.
\v 6 Co anajty ajcxy nigapxtaaygɨxy yɨ ypocy huɨdi anajty tɨ tundɨgooygɨxy, huinꞌit anajty ajcxy Juan yajnɨɨbedyii ma Jordán mɨj nɨɨ.
\p
\v 7 Per yɨ Juan yꞌix co may fariseo jäy etz saduceo jäy miñ anajty ajcxy nɨɨbejtcɨxy, chi ajcxy nɨmay:
\p ―¡Miich ajcxy, mꞌajuugy mꞌamɨgüg ahuaꞌn ɨyujc! ¿Pɨn tɨ xyajniꞌixɨɨygɨxy nej jëbɨ huaad mgögueeccɨxy yɨ ayoꞌn huɨdibɨ huingomb?
\v 8 Yajxon jäyꞌajtcɨx tɨydudägy huen niguëxɨ̈gy co tɨ mjothuimbijtcɨxy.
\v 9 Caꞌ jaduꞌn mdzachmɨnaangɨxy co Abraham xyꞌapꞌadyii xyꞌocꞌadyii. Ɨɨch miich ajcxy yam ndɨmnɨmaayb co Dios ixtɨ jëbɨ yɨꞌ yajꞌapꞌadyii yajꞌocꞌadyii Abraham jada tzaajot caꞌydɨ miich ajcxy.
\v 10 Yɨ jach niꞌixɨ̈ yɨꞌ yꞌijtnɨ ma quipy yꞌɨjx, tügꞌócɨy quipy huɨdi caꞌ oy ytɨmꞌaty yajpujxp yɨꞌ, e chi jadaꞌ yajnögy jɨɨnjoty.
\v 11 Ɨɨch, janch yajnɨɨbejtpɨch mɨɨd nɨɨ, yɨꞌ yɨꞌ jaduꞌn nej tüg ixpejt co tɨ mjothuimbijtcɨxy; per jacminamb tzojc huɨdi ajcxy xyajnɨɨbedɨpy mɨɨd Dios yjɨhuɨꞌñ etz mɨɨd jɨɨn. Jeꞌ ymɨɨd mɨcꞌajtɨn etz cötujcɨn, nïgɨ caꞌydɨ ɨɨch, ni xycapaadyɨch nɨcxy ycɨ̈g nyajtecyjendügyɨch. 
\v 12 Ymɨɨd mɨcꞌajtɨn pɨjc-huäcxamy yɨ jäy jaduꞌn nej jäy huimbojy moc, abɨcy pɨdägaꞌñ actz, abɨcy moc pajc. Yujcpɨgaꞌñ moc pajc ma tzeꞌx ninögɨ̈huaꞌñ yɨ moc actz moc jaam jɨɨnjoty ma je jɨɨn huɨdibɨ nicamɨnaaxɨɨ ycapïch.
\s Co Jesús ñɨɨbejty
\p
\v 13 Huinꞌit Jesús chooñ ma Galilea ñaaxjot, chi ñɨcxy ma Jordán mɨj nɨɨ ma anajty Juan yjäyyajnɨɨbety, nɨɨbedam anajty yɨꞌ nañ jaduꞌn.
\v 14 Juan caꞌjadɨmꞌaꞌɨxɨ̈y, chi nɨmay Jesús:
\p ― Ɨɨch miich ixyipy xyajnɨɨbejtpɨch, ¿e miich mimb ma ɨɨchɨ?
\p
\v 15 Chi Jesús yꞌadzooy:
\p ― Jadachambɨ ocꞌaꞌɨxɨ̈ jaduꞌn, com ooy yɨꞌ ycopɨtyɨty co nguydundayɨm tügꞌócɨy tɨɨbɨ Dios xyajꞌaneꞌmɨm.
\p Huinꞌit Juan aꞌɨxɨɨy chi yajnɨɨbejty Jesús.
\v 16 Co Jesús ñɨɨbejttay, chi Jesús ijxy Dios yjɨhuɨꞌñ ñigɨdägyii jaduꞌn nej tüg piꞌcmuuxy.
\v 17 E huinꞌit yajmɨdoy tzajpcɨ́xy tüg ayuc ymɨnaꞌñ: 
\p ― Jada jeꞌ ɨɨch nꞌungꞌajtypɨch huɨdibɨ ooy ndzocyɨch huɨdibɨ ooy mɨɨd jotcujc nayjɨhuɨ̈yiijɨch. 
\c 4
\s Je mujcuꞌ tuñ ijxtaꞌnɨ Jesús
\p
\v 1 Chi Dios yjɨhuɨꞌñ yajnɨcxy Jesús mɨjtɨgɨ̈duum jaydëbɨ je caꞌoybɨ yjotꞌixɨɨyb yhuinmaꞌñꞌixɨɨyb.
\v 2 Jɨm yꞌijty jaygay huixchɨguiꞌpx xɨɨ huixchɨguiꞌpx tzuum, e huinꞌitnɨ ooy yɨböccodyii.
\v 3 Chi je caꞌoybɨ nimɨjhuägy Jesús ocjotꞌixaꞌñ oc-huinmaꞌñꞌixaꞌñ, chi nɨmay:
\p
\v 4 ―Pen Dios miich xyꞌungꞌajtp, nɨmaꞌ jada tzaa huen naygojyii tzajcaagy.
\p Chi Jesús yꞌadzooy:
\p ―Jaybety jaduꞌn ymiñ ma Dios ñecy: “Caꞌp jäy tzajcaagytɨꞌajty nitzɨnähuɨpy, nañ jaduꞌn nitzɨnähuɨpy tügꞌócɨy yɨ ayuc huɨdibɨ Dios ycapxp.”
\p 
\v 5 Chi je caꞌoybɨ mɨɨdnɨcxy Jesús jɨm Jerusalén, chi ymɨɨdpejty tzajptɨjc cöduum.
\v 6 Chi nɨmay:
\p ―Pen janch co miich Dios xyꞌungꞌadyii, cödɨjpnax jiiby naaxcɨ́xy, caꞌ yɨꞌ nej mjadɨpy com jaybety jaduꞌn ymiñ co jaduꞌn ymɨnaꞌñ:
\q Dios yquexyp yɨꞌ yꞌángeles jɨgɨx xycuendꞌadɨpy xyhuidzɨpy mɨɨd ycɨꞌ, caꞌydɨ ninej mgönepy ma tzaagop.
\p
\v 7 Chi Jesús yꞌadzooy:
\p ―Nañ jaduꞌn ymiñ jaybety: “Caꞌ mjotꞌixɨpy mhuinmaꞌñꞌixɨpy yɨ mhuindzɨn Dios.”
\p
\v 8 Jadügꞌoc je caꞌoybɨ ymɨɨdꞌajty Jesús ma tüg copnïcx janch cɨjxpɨ, e jɨm yajniꞌixɨɨyday tügꞌócɨy naax cajp co ooy mɨɨdɨty oyꞌajtɨn etz mɨcꞌajt.
\v 9 E chi nɨmay:
\p 
―Ɨɨch jada miich nmoydähuɨpy tügꞌócɨy, pen miich cojxtɨnaꞌ xyhuindzɨgɨ̈yɨch xyꞌojadatyɨch.
\p
\v 10 Huinꞌit Jesús yꞌadzooy:
\p 
―Huinhuäctutcɨch miich mujcuꞌ, com jaduꞌn yjaybetyɨty: “Tügpajc yɨ mHuindzɨn Dios yɨꞌ mhuindzɨgɨ̈huɨpy mꞌojadadɨpy.”
\p
\v 11 Huinꞌit je caꞌoybɨ huinhuäctucy Jesús, chi Jesús ñimiinɨ ángeles ycuendꞌajtɨ.
\s Jesús ytung yajtzondacy jɨm Galilea
\p
\v 12 Co Jesús nejhuɨɨy co Juan tɨ anajty yajpɨdägy pujxtɨgoty, chi yhuimbijtnɨ jadügꞌoc jɨm Galilea.
\v 13 E ni caꞌ yhuɨꞌmɨɨy jɨm Nazaret, chi ñɨcxy jɨm Capernaum, jɨm ma Zabulón etz Neftalí yꞌit. 
\v 14 Jada jeꞌ jaduꞌn tunɨ jajtɨ jaduꞌn nej Dios yꞌayucnajtzcapxɨɨybɨ Isaías anajty tɨ cojaay:
\q 
\v 15 Zabulón etz Neftalí ñaaxjot. Je tüꞌaa huɨdibɨ mejypaꞌ huɨdibɨ aꞌoyꞌamy ma Jordán mɨj nɨɨ. Jɨm Galileajäy chɨnäy huɨdibɨ caꞌ yjudiojäyɨty.
\q 
\v 16 Yɨ jäy ajcxy huɨdibɨ jɨm tzɨnaayb agootztuuby ijxpaty ajcxy tüg tɨɨcxɨn jajɨn. Je huɨdijaty anajty ajcxy tzɨnaayb ma je jɨbɨcpɨ yꞌanicɨ̈y, chi ajcxy ycodɨcxɨɨy tügɨ tɨɨcxɨn jajɨn.
\p
\v 17 Ixtɨ huinꞌit Jesús ytɨgɨɨy ayuccapxhuäcxp ymɨnañ:
\p ―Jothuimbijtcɨx, yajmingɨx yajmejtzcɨx mjot mhuinmaꞌñ ma Dios, com yɨ Dios yꞌaneꞌmɨn huingonɨp yɨꞌ.
\s Jesús nɨmay nimɨdaax je acxmajtzpɨ: “Pajamgɨch”
\p
\v 18 Jesús tüyöyb anajty ma Galilea mejypaꞌ, co ijxpaty metz yëydɨjc ac tüg quëxpɨ, hueꞌ anajty yɨꞌ jeꞌ je Simón, huɨdibɨ nañ jaduꞌn yxɨɨ Pedro, e je jadügpɨ hueꞌ jeꞌ anajty Andrés. Acxmadzɨɨ anajty ajcxy yɨꞌ ytungꞌajty e jɨm anajty ajcxy yɨꞌ tzachnɨɨgöhuich yꞌacxmadzɨꞌñ.
\v 19 Chi Jesús nɨmay ajcxy:
\p ―Pajamgɨch, ɨɨch miich ajcxy nyajniꞌixɨ̈huɨpy nej jäy myajꞌixpɨgɨpy je Dios ytɨyꞌajt.
\p
\v 20 Huinꞌit jeꞌ ajcxy ixmajtztay tügꞌócɨy yɨ yꞌacxtzaay, chi ajcxy panɨcxy Jesús.
\p
\v 21 Hueenɨ jacꞌamɨjcɨꞌm Jesús ijxy janimetz Zebedeo ajcxy ymang, je Jacobo etz Juan. Jɨm anajty yɨꞌ ajcxy ma tüg barco mɨɨd yteedy, yɨꞌ anajty ajcxy yɨꞌ jɨm chachꞌadagɨɨyb yɨ huɨdibɨ mɨꞌacxmajtzcɨxy. Chi ajcxy Jesús yhuoohuɨ.
\v 22 E huinꞌit ajcxy ixmajtztay je barco etz yɨꞌ yteedy, chi ajcxy panɨcxy Jesús.
\s Jesús yajꞌixpɨcy mayjäy
\p
\v 23 Huɨdijttay Jesús ma tügꞌócɨy Galilea ñaaxjot, yajꞌixpɨcy jäy majaty je naymujctac cajp cajp. Capxhuäcxy yɨ Dios ytɨyꞌajt etz nañ jaduꞌn paꞌmjäy yajtzocy huen ytɨmyhuɨdipáꞌmɨty anajty ajcxy ymɨɨd.
\v 24 Chi Jesús oy yajnejhuɨɨyñɨ ma tügꞌócɨy yɨ Siria ñaaxjot, e chi ajcxy mɨɨdmiñ ma Jesús tügꞌócɨy huɨdijaty anajty ajcxy caꞌoybɨ mɨɨd, etz huɨdijaty anajty ajcxy cɨ̈xuxy tecyxuxy, chi Jesús yajtzoocy.
\v 25 Huinꞌit Jesús ypanɨcxɨ mayjäy huɨdijaty anajty ajcxy tzɨnaayb ma Galilea ñaaxjot etz yɨ Decapolis jäy, nañ jaduꞌn Jerusalén jäy etz huɨdijaty tzɨnaayb ma Judea ñaaxjot, nañ jaduꞌn huɨdijaty anajty ajcxy tzɨnaayb aꞌoyꞌamy ma Jordán mɨj nɨɨ.
\c 5
\s Je tɨyꞌajt huɨdibɨ Jesús ycapx ma tüg cögop
\p
\v 1 Co Jesús ijxy tügꞌócɨy je mayjäy, chi nɨcxy ma tüg copnïcx, e chi jɨm yꞌixtacy. E huinꞌit jeꞌ yꞌixpɨjcpɨdɨjc ajcxy yjübigɨɨy.
\v 2 Chi Jesús ytɨgɨɨy yajꞌixpɨjcp ymɨnañ jaduꞌn:
\s Je pɨnjaty ajcxy jotcújcɨp
\p
\v 3 ―Janch jotcujc je jäy ajcxy huɨdibɨ nejhuɨɨyb co yajmayjajtpy Dios yꞌoyꞌajt, yɨꞌ ajcxy paatɨp Dios yꞌaneꞌmɨn.
\p
\v 4 Janch jotcujc je jäy ajcxy huɨdi yajpatp taj may, yɨꞌ ajcxy yajmöhuam jotcujcꞌajtɨn.
\p
\v 5 Janch jotcujc je jäy ajcxy huɨdibɨ yung naxpy jäyꞌajtp, yɨꞌ ajcxy padaamb tügꞌócɨy je huɨdi Dios tɨ yajꞌahuanɨ̈yii.
\p
\v 6 Janch jotcujc je jäy ajcxy huɨdibɨ cuydunamb huɨdibɨ Dios chojcpy, Dios yɨꞌ ajcxy pubedɨɨb.
\p
\v 7 Janch jotcujc je jäy ajcxy huɨdibɨ paꞌayoob huenytimpɨnjäyɨty, Dios nañ jaduꞌn ajcxy paꞌayohuɨɨb.
\p
\v 8 Janch jotcujc je jäy ajcxy huɨdibɨ huädz yjot yhuinmaꞌñ, yɨꞌ ajcxy yꞌixɨpy yɨ Dios.
\p
\v 9 Janch jotcujc je jäy ajcxy huɨdibɨ caꞌ ti tzip tzojccɨxy, com yɨꞌ ajcxy Dios ungꞌadɨɨb.
\p
\v 10 Janch jotcujc je jäy ajcxy huɨdibɨ yajnixiicp yajnigapxp mɨɨd je Dios ytɨyꞌajt ycɨxpɨ. Yɨꞌ ajcxy idamb ma Dios yꞌaneꞌmɨn.
\p
\v 11 Janch jotcujc miich ajcxy co jäy jɨbɨc xytungɨxy co nɨgoob xyñïhuambejtcɨxy etz capxcɨxy huɨdijaty caꞌ ytɨyꞌajtɨty mɨɨd ɨɨch ycɨxpɨ.
\v 12 Xondaaccɨx jotcujꞌajtcɨx co mbadaangɨxy tüg oyꞌajtɨn jiiby tzajpjoty. Nañ jaduꞌn ajcxy ixhuɨdijty pahuɨdijty je Dios yꞌayucnajtzcapxɨɨybɨ jecyꞌajty.
\s Miich ajcxy je tudägyjäy ya naaxhuiñ
\p
\v 13 Jaduꞌn nej caan caꞌ yajpüch je tzüch jɨɨcxy tɨm jaduꞌn miich ajcxy myajpaady ya naaxhuiñ. Pen je caan caꞌ mɨɨd ti xücxꞌajtɨn, ¿nej jëbɨ nyajtuunɨm? Caꞌ yꞌocꞌoyyajtunɨty, chi yajnajtzxɨdɨɨyñɨ, chi yhuaanɨ tembejt huaꞌcpejt.
\p
\v 14 Ocꞌix tüg je cajp jɨm copcɨx, caꞌ jëbɨ mhuijtzyüdzɨm mgoyüdzɨm.
\v 15 Co tüg jɨɨn nyajtoyɨ̈cɨm, caꞌ huaad tuꞌtz ngöjujpɨm. Hue janchtɨy co nyajtɨɨcxɨm cɨx, huinꞌit jëbɨ xycodɨcxtaayɨm jaduꞌn nej ajt nyajpaatɨm ma tɨjc.
\v 16 Nañ jaduꞌn miich ajcxy mdzɨnaaygɨxy tudägy ma ajcxy je mayjäy jaydëbɨ ajcxy ixipy je oybɨ huidi miich ajcxy mdumyb. Huinꞌit ajcxy ojadadɨpy je mDios teedy huɨdibɨ jiiby tzajpjoty.
\s Jesús yajꞌixpɨcy nej yɨꞌ yɨ Dios ycötujcɨn
\p
\v 17 Caꞌ mhuinmay co ɨɨch tɨ nmiñɨch ya co nbɨgaanɨch je Dios yꞌayuc jeꞌ huɨdibɨ anajty tɨ jaay Moisés etz je profetɨtɨjc. Caꞌ ɨɨch nyajmɨjaagɨxaꞌñ je cötujcɨn, ɨɨch tɨ nmiñɨch co nguydunaꞌñɨch jaduꞌn nej ymiñ jaaybety.
\v 18 Janch tɨyꞌajt jaduꞌn nej nɨmaaygɨxy, je huɨdibɨ mimb jaaybety jaduꞌn tundähuam jajtähuam. Ni tüg letra oy mabaad ymúdzɨty nɨcxy ycayajcuyduñ.
\v 19 Je jäy huɨdibɨ caꞌ nimɨdooy je Dios ytɨyꞌajt oy yjadɨm mutzjaty etz yajꞌixpɨcy jäy jaduꞌn, jeꞌ ajcxy padamb je mutzpɨ tɨgɨydac ma Dios yꞌaneꞌmɨn. Paady je jäy huɨdibɨ yajꞌixpɨjcp jaduꞌn nej tɨyꞌajt ymɨnaꞌñ, e paduñ jaduꞌn nej yajꞌixpɨcy, jeꞌ ajcxy padamb tüg je mɨjpɨ tɨgɨydac ma Dios yꞌaneꞌmɨn.
\v 20 Ɨɨch miich ajcxy nɨmaayb, pen caꞌ miich ajcxy jacꞌoy mdúngɨxy caꞌydɨ fariseos etz escribas ajcxy, caꞌ nimɨna mdɨgɨ̈huɨpy ma Dios yꞌaneꞌmɨn.
\s Jesús yajꞌixpɨcy co caꞌp huaad pɨn yjotmädy
\p
\v 21 Miich ajcxy mnejhuɨɨygɨxy jaduꞌn nej yɨ mꞌap mdeedy ajcxy ayuc yajhuɨꞌmy: “Caꞌ jäy myajꞌögɨp; e pɨn anajty jäy yajꞌöcp ypaadɨp je tzaachypɨ.”
\v 22 Ɨɨch miich ajcxy jaduꞌn nɨmaayb pɨnjaty ymɨgügtɨjc mɨjotmaꞌtp, jeꞌ Dios tɨydunaanɨpy; e pɨn ymɨgüg xɨɨdijp tzuudijp, yajtɨydunɨpy jeꞌ ma Dios tɨydundac; e pɨn ymɨgüg tzuudijp locɨdijp ayoꞌndumb, jeꞌ yꞌity co ñɨcxɨp ayoodactuuby.
\p
\v 23 Pen myajnɨcxpy miich mhuindzɨgɨꞌñ ma Dios ytɨjc, e pen jɨm jäymetzgodyii co mmɨgüg tɨ xyhuinꞌɨɨnnaxy tɨ xyhuincapxynaxy yinjaty hueenjaty, 
\v 24 jɨm myajhuɨꞌm je huindzɨgɨꞌñ ma je altar yhuinduu, e nɨcx jayɨjp nayyajꞌoyɨ̈huɨɨ mɨɨd je mɨgüg, huinꞌit mhuimbedɨp e chɨmgɨ̈yecy je mhuindzɨgɨꞌñ.
\p
\v 25 Tzojc naygapxjotcɨdägɨɨ mɨɨd je mɨdzip, pen yam mɨɨd tüyöy nɨɨꞌam tüꞌam, caꞌ jecyɨty co je mɨdzip xycɨ̈yegɨp ma juez, e je juez xycɨ̈yegɨp ma je policia, e jeꞌ nɨcxy xypɨdägy pujxtɨgoty.
\v 26 Janch tɨyꞌajt ɨɨch miich nɨmäy co caꞌ jiiby mbɨdzɨmɨpy ixtɨ coonɨ mgüejtähuɨpy je meeñ.
\s Jesús yajꞌixpɨcy co caꞌp ndundɨgóoyɨmɨpy mɨɨd huingbɨ töxyjäy
\p
\v 27 Miich ajcxy mnejhuɨɨyb co jecyɨp tɨyꞌajt ymɨnaꞌñ: “Caꞌ mmɨdundɨgoyɨpy huingbɨ töxyjäy.”
\v 28 Ɨɨch miich ajcxy nɨmaayb, pen ji pɨn huindɨcxy tüg töxyjäy, e jotꞌadɨɨyb nejjaty, tɨ jeꞌ anajty ñitundɨgooyñɨ ma yjot yhuinmaꞌñ.
\p
\v 29 Pen yɨ mhuin aꞌoyꞌamybɨ xyajtundɨgoyamb tɨm yajpɨdzɨmb; jacꞌoy co tügꞌɨduꞌmbɨ mhuin ytɨgoyɨpy caꞌydɨ co cɨxycaꞌpx mnɨcxɨpy jɨɨnjoty.
\v 30 E pen yɨ mgɨꞌ aꞌoyꞌamybɨ xyajtundɨgoyamb tɨm ixpux etz najtzjibibɨꞌ jɨguem; jacꞌoy co tüg mgɨꞌ ytɨgoyɨpy caꞌydɨ co mmɨnɨcxɨpy metz mgɨꞌ jɨɨnjoty.
\s Jesús yajꞌixpɨcy co jäy caꞌp huaad ytöxyɨjc ixmach mañꞌajtɨngɨ́xy
\p
\v 31 Nañ jaduꞌn ymiñ jaaybety: “Pɨn ixmajtzp ytöxyɨjc, huen möhuɨpy tüg necy ti ycɨxpɨ co ñayꞌixmájtzɨgɨxy.”
\v 32 Ɨɨch miich ajcxy nɨmaayb, pen ji pɨn ixmach ytöxyɨjc, e caꞌ anajty tɨ ytundɨgooy mɨɨd huingbɨ yëydɨjc, je yëydɨjc anajty nigɨydeyɨɨyb ytöxyɨjc co anajty ytundɨgooy mɨɨd huingbɨ yëydɨjc; pɨn yëydɨjc pɨjcp mɨɨd je töxyjäy huɨdibɨ anajty tɨ yajꞌixmach, pocytumyb jeꞌ anajty.
\s Jesús yajꞌixpɨcy nej nguyduunɨm tɨɨbɨ nꞌahuanɨɨyɨm ma Dios yhuinduu
\p
\v 33 Miich ajcxy mnejhuɨɨyb nej jecyꞌajty mꞌaptɨjc mdeedytɨjc ajcxy yajnɨmay: “Caꞌ nɨgo ti mꞌahuanɨ̈huɨpy, mguydunɨpy jaduꞌn nej anajty tɨ mmɨnaꞌñ.”
\v 34-36 Per ɨɨch miich ajcxy nɨmaayb: ni mgaꞌɨɨbaadɨp ni mgacapxpaadɨp; ni mgamɨnaꞌnɨp; “yꞌijxpy tzajpjotypɨ,” com yɨꞌ Dios chɨnaydac. E ni mgamɨnaꞌnɨp, “yꞌijxpy naaxhuiñybɨ,” com Dios yajpatp oy ytɨmymaajɨty. E ni mgamɨnaꞌnɨp; “yꞌijxpy Jerusalén,” com jɨm jeꞌ Dios chajptɨjc; ni mgaꞌɨɨbaadɨp ni mgacapxpaadɨp mgohuajc, com caꞌ mjaty myajꞌahuimbity poob o tzixy tüg cöhuay.
\v 37 Hueꞌ janchtɨy, tɨydudägy mɨnaangɨxy: “oy” o “caꞌ.” E pen miich ajcxy anaxy jaccapxp jaduꞌn mujcuꞌ yꞌayuc jeꞌ anajty ajcxy mgapxpy. 
\s Jesús yajꞌixpɨcy co caꞌp huaad jɨbɨc nyajhuimbijtɨm
\p
\v 38 Miich ajcxy mnejhuɨɨyb co jecyꞌajty yajmɨnañ: “Pen ji jäy mhuiin xyajpɨdzɨmɨ, nañ tɨm jaduꞌn yhuiin myajpɨdzɨmɨpy; pen ji mɨgüg mdɨɨtz xyajpɨdzɨmɨ, nañ jaduꞌn myajꞌahuimbidɨpy.”
\v 39 Per ɨɨch miich ajcxy nɨmaayb: Caꞌ myajꞌahuimbidɨpy jɨbɨcpɨ ma mɨgügtɨjc; pen ji pɨn xycoxy ma mhuiñyjɨjp tüg aduꞌmbɨ, jac tɨm moꞌ jadüg aduꞌmꞌamybɨ.
\v 40 Pen ji pɨn xyxɨ̈y e xypɨgaanɨ yɨ mnïjen, najtzꞌixɨꞌ, huen xyajnɨcxɨ nañ jaduꞌn mjocx huit.
\v 41 Pen ji pɨn adzip tzɨmy xyajmɨnɨcxaꞌñ tüg kilómetro jɨguemɨty, yajnɨcx jac tɨm jadüg kilómetro.
\v 42 Pen tijaty xypɨjctzoohuɨ, moꞌ. E pen ji pɨn xymɨnuucxaꞌñ, yajnuucx.
\s Co ndzojcɨm nmɨdzip
\p
\v 43 Jaduꞌn ymiñ jaaybety nej jecyɨp Moisés yjay: “Mɨgügꞌadɨɨ yɨꞌ huɨdibɨ xymɨgügꞌajtp, e mɨdzipꞌadɨɨ yɨꞌ huɨdibɨ xymɨdzipꞌajtp.”
\v 44 Ɨɨch miich ajcxy nɨmaayb: Tzoc yɨꞌ huɨdibɨ ajcxy xymɨdzipꞌajtp, etz mɨbɨjctzoohuɨ ma Dios huen yꞌoyꞌajtɨn paady yɨ huɨdibɨ xyñigapx xyniꞌojɨɨyb, e nañ mɨꞌoyjäyꞌat yɨ huɨdibɨ xycaꞌixamb.
\v 45 Huinꞌit miich ajcxy xyꞌungꞌadɨɨby yɨ Dios tzajpjotypɨ huɨdibɨ yxɨɨ yajtɨɨcxp yajjajp ma oyjäydɨjc etz ma jɨbɨcjäydɨjc, nañ jaduꞌn yajtüy ma jɨbɨcjäydɨjc etz ma oyjäydɨjc.
\v 46 Pen miich ajcxy mdzojcpy je huɨdibɨ xychojcp, ¿ti jäygɨdaacɨn yɨꞌ mꞌocpadamyb? Nañ jaduꞌn yɨꞌ ajcxy yjaꞌɨdɨɨtzp yɨ pocyjäydɨjc etz yɨ yajcogüejtpɨdɨjc.
\v 47 Pen miich ajcxy mgapxpocxyp yɨ mjugymɨgüg, ¿ti oybɨ yɨꞌ? Nañ jaduꞌn ajcxy yɨꞌ yjaꞌɨdɨɨtzp yɨ huɨdibɨ ajcxy caꞌ Dios nejhuɨɨygɨxy.
\v 48 Jäyꞌajtcɨx tudägy jaduꞌn nej ajcxy yɨ mdeedy tzajpjotypɨ ytudägy.
\c 6
\s Jesús yajꞌixpɨcy co nduunɨm oy yjäyꞌajtɨn
\p
\v 1 Caꞌ mdungɨxy je oybɨ ma jäy yꞌixy yhuindɨcxy mɨɨd co mdzachyajhuindɨcxaangɨxy co mdungɨxy oybɨ. Pen jaduꞌn mꞌɨdɨɨtzcɨxy mDios Teedy huɨdi jiiby tzajpjoty tzɨnaayb, caꞌ ajcxy xymöhuaꞌñ je oyꞌajtɨn.
\v 2 Paady co mbubedɨpy mmɨgüg, je ayoobɨ jäy huɨdi yajmayjajtpy tijaty, caꞌ huaad mnigapxy mnimɨydägy o mnaygömayii co anajty tɨ mmöy tijaty. Yɨꞌ jaduꞌn ɨdɨɨtzp je jäy huɨdi mɨj cɨx nayjɨhuɨɨyɨp huɨdi anɨdaacp co huen jäy yꞌixyii mɨjpɨdägyii co anajty jaduꞌn yꞌɨdɨ̈ch. Janch ɨɨch miich ajcxy jaduꞌn nɨmaaygɨx co yɨꞌ tɨ patcɨxy je oyꞌajtɨn.
\v 3 Co miich mmöhuɨpy mmɨgüg tijaty yajmayjajtpy, hueꞌ janchtɨy mdunɨpy caꞌ myajnejhuɨ̈huɨpy huɨdi mɨɨd mnaymɨgügꞌadyii.
\v 4 E co miich amoñ mꞌidɨpy, mDios Teedy huɨdi ijxp co amoñ tijaty mduñ, jeꞌ xymöhuamb tüg oyꞌajtɨn mayjäyduum.
\s Jesús yajꞌixpɨcy nej Dios nmɨbɨjctzoohuɨm 
\p
\v 5 Co miich ajcxy Dios mmɨbɨjctzoy, caꞌ jaduꞌn mꞌɨdɨɨtzcɨxy jaduꞌn nej je jäy huɨdibɨ capxtacp ma Dios huin aguy ahuac aguy. Yɨꞌ ajcxy capxtacp ma Dios huäctɨnaꞌ jiiby tzajptɨgoty jaydëbɨ jäy yꞌixɨɨyb etz ymɨjpɨdägɨɨyb. Ɨɨch jëyɨ jaduꞌn nɨmaayb, co jaduꞌn oyꞌajtɨnꞌadɨɨby.
\v 6 E co miich Dios mmɨbɨjtzoy, nɨcx tɨgoty etz mꞌagɨ̈huɨpy je mdɨjc aguu. Huinꞌit Dios mɨbɨjctzou. E je Dios yꞌijxpy ymɨdooyb co jaduꞌn mmɨbɨjctzoy, e jeꞌ je mꞌoyꞌajtɨn xymöhuɨipy mayjäyduum.
\p
\v 7 Com Dios mmɨbɨjctzoy, caꞌ mꞌagapxɨyoꞌcɨp je huɨdi anajty tɨ mꞌoccapxpɨ, jaduꞌn nej ajcxy yꞌɨdɨɨtzcɨxy huɨdi caꞌ nejhuɨɨygɨxy Dios ytɨyꞌajt. Yɨꞌ ajcxy huinmaꞌñypɨdägy co mɨɨd ajcxy ymayꞌayuc huinꞌit ajcxy ymɨdoohuɨɨyb.
\v 8 Caꞌ jaduꞌn mꞌɨdɨɨtzcɨxy jaduꞌn nej jeꞌ ajcxy; mDios ñejhuɨɨyb ti miich ajcxy myajmayjajtpy ma anajty caꞌnɨ mbɨjctzooyñɨ.
\v 9 E jaduꞌn miich ajcxy Dios mɨbɨjctzohuɨpy, jaduꞌn mɨnaꞌnɨp: 
\q Dios Teedy, miich huɨdibɨ tzajpjoty tzɨnaayb; huindzɨgɨ̈y miich mxɨɨ yꞌity.
\q 
\v 10 Huen miñ ya miich yɨ mꞌaneꞌmɨn. Huen mdzojcɨn yajcuyduñ ma je jäy yjot yhuinmaꞌñ jaduꞌn nej yajcuyduñ jiiby tzajpjoty.
\q 
\v 11 Mooygɨch ajcxy ngaayɨn nꞌuucɨn jabom jabom.
\q 
\v 12 Méecxɨbɨch ajcxy nbocy ngaydey huɨdibɨ ɨɨch ajcxy ndundɨgooyb, jaduꞌn nej ɨɨch ajcxy meecxyɨch huɨdibɨ ajcxy xymɨdundɨgooybɨch.
\q 
\v 13 Caꞌ mꞌaꞌɨxɨ̈y co ɨɨch ajcxy nhuinmaꞌñ tɨgoyɨpɨch. Yajnïhuaatzcɨch ajcxy ma yɨ jɨbɨcpɨ. Co miich yɨꞌ mjeꞌ je cötujcɨn, je mɨcꞌajtɨn etz je oyꞌajtɨn huinɨxɨɨ huinɨtiempo. Amén.
\p
\v 14 Pen miich ajcxy mhuinmeecxyp je huɨdibɨ xymɨdundɨgooygɨxp, je mDios Teedy huɨdibɨ tzajpjoty jeꞌ nañ jaduꞌn xyhuinmeecxɨp miich ajcxy mbocy.
\v 15 E pen miich ajcxy caꞌ pɨn jäy mhuinmeecxy nej xymɨdundɨgooygɨxy, nañ jaduꞌn mDios caꞌ xyhuinmeecxɨp ajcxy ma tɨ mdundɨgooygɨxy.
\s Jesús yajꞌixpɨcy nej huaad nꞌijtɨm jaygaay
\p
\v 16 Com ajcxy mꞌidaꞌnɨp jaygaay jayꞌügy (mɨna Dios mmɨbɨjctzoogɨxy), caꞌ mnaybɨdáaccɨgɨxy tajy may, jaduꞌn nej ajcxy ɨdɨɨtzcɨxy yɨꞌ huɨdibɨ ajcxy mɨnamb co Dios mɨbɨjccɨxy e caꞌ yjanchɨty. Yɨꞌ ajcxy yajtɨgajchpy yhuiñyjɨjp jɨgɨx jäy ajcxy ocꞌixɨɨyb co jaygaay jayꞌügy yꞌijtcɨxy; jëyɨ jaduꞌn oyꞌajtꞌadɨɨyb.
\v 17 Miich ajcxy co mꞌidɨpy jaygaay jayꞌügy jotcujc naybɨdägɨɨ, caax mgohuajc etz puj mhuin mjɨjp, 
\v 18 caꞌydɨ myajniguëxɨ̈gy mayjäyjoty co mꞌity jaygaay jayꞌügy, hueꞌ janchtɨy myajniguëxɨ̈g ma je mDeedy huɨdibɨ caꞌ yajꞌijxy; e je mDeedy huɨdibɨ ijxp huɨdibɨ miich ajcxy caꞌ mduñ ijxnaꞌ quëxnaꞌ yɨꞌ xymöhuɨpy oyꞌajtɨn mayjäyduum.
\s Je jugyꞌajtɨn tzajpjotypɨ
\p
\v 19 Caꞌ nïgɨ mꞌadzocy huɨdibɨ ya naaxhuiñ, jeꞌ co ya huindɨgooyb oy ytimtijɨty huɨdibɨ yɨ huech yajhuindɨgooyb, huɨdibɨ tougaayɨp etz ma je meetzpɨ ajcxy meetzcɨxy pɨgɨ̈ccɨxy tijaty.
\v 20 Jeꞌ miich nijotꞌajtcɨxy jeꞌ oyꞌajt huɨdibɨ miich ajcxy Dios xymöhuamb jiiby tzajpjoty ma caꞌ huech yajhuindɨgooy ni ti, e nañ ni ycatougaayii ni ti, etz ma je meetzpɨ caꞌ ajcxy meetzcɨxy pɨgɨ̈ccɨxy tijaty.
\v 21 Ma miich ajcxy mɨɨdɨty je oyꞌajt nañ jiiby ajcxy mjot mhuinmaꞌñ pɨdäg.
\s Yɨ mhuin jaduꞌn yɨꞌ nej tüg tɨɨcxɨn
\p
\v 22 Yɨ mhuiɨn yɨꞌ yɨꞌ jaduꞌnɨp nej tüg tɨɨcxɨn jajɨn ma mnïnïcx, e paady pen caꞌ miich yɨ mhuiin xyajtundɨgoy, tügꞌócɨy mjot mhuinmaꞌñ huädz yɨꞌ.
\v 23 Pen miich mhuiin xyajtundɨgoyb nañ jaduꞌn mjot mhuinmaꞌñ huɨdi miich mɨɨd caꞌ yꞌoyɨty, jaduꞌn yɨꞌ nej coodzpɨ ¡jac tɨm nïgɨ caꞌ yꞌoyɨty caꞌydɨ je coodzpɨ!
\s Dios etz je comeeñꞌajtɨn 
\p
\v 24 Ni tüg pɨn caꞌ huaad mɨɨd tuñ metz huindzɨn com mɨjotmaꞌtɨ tüg jeꞌ, e jadügpɨ chogɨpy; o ixtijɨpy tüg e jadüg ymɨgügꞌadɨɨyb. Nañ jaduꞌn caꞌ huaad miich ajcxy metz mꞌojadajtcɨxy, Dios etz je meeñ.
\s Dios ycuendꞌajtpy yɨꞌ yjäy
\p
\v 25 Paady ɨɨch miich ajcxy nɨmaaygɨxy: Caꞌ mdzachhuinmaaygɨxy ti ajcxy mnitzɨnähuɨpy, ti ajcxy mgayɨpy mꞌügɨpy o ti ajcxy mhuitꞌadɨɨyb mducxyꞌadɨɨyb. MDios yɨꞌ tɨ xymooygɨxy je mjugyꞌajtɨn, e paady ycɨxpɨ yɨꞌ nejhuɨɨyb ti ajcxy myajmayjajtpy.
\v 26 Ocꞌix miich ajcxy yɨ joon huɨdi queec-huɨdijtp. Yɨꞌ ajcxy ycaniipcɨxy ycatungɨxy, nañ ni caꞌ yɨꞌ ajcxy yujcpɨjccɨxy ma tzeꞌx. Miich ajcxy mDios Teedy huɨdi tzajpjoty tzɨnaayb, jeꞌ moydaayb huɨdi ajcxy yɨꞌ yjɨɨcxyp. E miich ajcxy mjactzoobatp caꞌydɨ yɨ joon.
\v 27 ¿Pɨn ji ma miich ajcxy, ooy mɨj jahuinmay, jëbɨ tüg nuux yjacyeegyɨ?
\p
\v 28 ¿E naꞌamy co miich ajcxy mdzachnidajy mdzachnimay mɨɨd je mhuit mducxy ycɨxpɨ? Ocꞌix miich ajcxy nej yoñ tüg je pɨjy huɨdi yajpatp tun nïgap. Ni yɨꞌ ycatuñ ni piidy.
\v 29 Per janch tɨyꞌajt jaduꞌn nej nɨmaaygɨxy, ni je comeeñyjäy huɨdi yxɨɨ rey Solomón, ni ycaquipxɨ̈y jeꞌ yxojxɨn mɨɨd je pɨjy.
\v 30 E pen mDios xojxpy jaduꞌn je aay ujtz cham etz tzojcy ytɨɨtztäy ñicxtäy, jac nïgɨ miich ajcxy Dios xymöhuaꞌñ huɨdibɨ myajmayjajtpy, miich ajcxy huɨdibɨ hueenɨ mmɨbɨjcɨn.
\v 31 Paady caꞌ nɨgoobɨ mdzachhuinmaaygɨxy ma ajcxy mbaadɨp ti mgayɨpy mꞌügɨpy o ti mhuitꞌadɨɨyb mducxyꞌadɨɨyb.
\v 32 Yɨ jäy ajcxy huɨdibɨ caꞌ mɨbɨcy yɨ Dios oy tzach nijotꞌajtcɨxy jadayaabɨ, per miich mDeedy huɨdibɨ tzajpjoty jeꞌ ñejhuɨɨyb ti miich ajcxy myajmayjajtpy.
\v 33 E pen miich ajcxy mbɨdacpy Dios jayɨjp ma mjot mhuinmaꞌñ etz mguydun ajcxy yɨꞌ yꞌaneꞌmɨn, huinꞌit miich ajcxy Dios xymöhuɨpy tijaty myajmayjajtpy. 
\v 34 Paady caꞌ mhuinmaaygɨxy cham mɨɨd je jabom cɨxpɨ, jeꞌ co je jabombɨ ymɨmiñ je tajɨn mayɨn. Tzoc mɨjotcujcꞌajtɨm je tajɨn mayɨn huɨdi cham nmɨnajx nyajnajxɨm.
\c 7
\s Caꞌ mbocy ixy yɨ mmɨgüg
\p
\v 1 Caꞌ mꞌixꞌijxpy mbaꞌijxpy ti mmɨgügtɨjc ytundɨgooyb, jɨgɨx caꞌ Dios xytɨydunɨpy chaachytunɨpy.
\v 2 Pen miich mꞌixꞌijxpy mbaꞌijxpy mmɨgügtɨjc ti ytundɨgooyb, nañ jaduꞌn miich Dios xytɨydunɨpy xychaachytunɨpy, e yɨ quipxɨꞌñ huɨdibɨ miich mhuamyb quipxɨꞌñ, nañ yɨꞌ Dios yajtunamyb ma miich.
\v 3 ¿Nej co miich mꞌixy huɨdibɨ mmɨgüg ytumyb e hueenɨ ytundɨgooyb, e caꞌ mnayꞌixyii huɨdibɨ miich jac mɨj mdundɨgooybɨ?
\v 4 ¿Nej jëbɨ mmɨgüg mꞌocnɨmäy: “Nbubedamybɨch miich caꞌydɨ mjacpocytuñ”, e miich yam mꞌocmɨɨdpɨ jac mɨj pocy?
\v 5 Miich cɨꞌm mnayhuinꞌɨɨñyii. Nɨcx jayɨjp mbocy mgaydey ocyajhuädz, huinꞌit jëbɨ mbubety je mmɨgüg.
\p
\v 6 Caꞌ mmöy yɨ jɨbɨcjäydɨjc huɨdibɨ Dios yjëꞌajty co nɨcx camɨjꞌijx camɨjpɨdaaccɨxy; ni mgayegɨpy Dios yꞌayuc ytɨyꞌajt ma yɨ jäy ajcxy huɨdibɨ caꞌ tzojccɨxy Dios yꞌayuc ytɨyꞌajt.
\s Nbɨjctzoohuɨm nꞌamɨdoohuɨm Dios
\p
\v 7 Mɨbɨjctzougɨx yɨ Dios e yɨꞌ xymöhuɨpy ajcxy; ixtaaygɨx, huinꞌit mbáatcɨxɨpy; cogapxɨɨygɨx e ahuädzɨp ajcxy mdɨjc aguu.
\v 8 Com pɨn tijaty pɨjctzoob ypaatyp yɨꞌ; e pɨn tijaty ixtaayb ypaatyp yɨꞌ; e pɨn cogapxɨɨyb ma tɨjc aguu, yajꞌahuaatzɨp ytɨjc aguu.
\p
\v 9 ¿Nej ji jadaꞌ miich ajcxy nidügtɨ co mꞌung pɨjtzoohuɨpy tzajcaagy nej mmöhuɨpy tüg tzaajɨ?
\v 10 ¿O pen ypɨjctzooby tüg acx nej mmöhuɨpy tüg tzaꞌñɨ?
\v 11 Miich ajcxy oy mjɨbɨcjäyɨty e mjajtpy ajcxy nej mꞌung mꞌanäg mmöhuɨpy je oybɨ. ¡Nïgɨ Dios Teedy tzajpjotypɨ möhuaꞌñ je oybɨ pɨnjaty pɨjctzoob!
\p
\v 12 Tzɨnaaygɨx tɨydudägy mɨɨd je mmɨgügtɨjc, pen miich ajcxy mdzojcpy co je mmɨgügtɨjc chɨnähuɨpy tudägy mɨɨd miich ajcxy; com jaduꞌn yꞌaneꞌmy Moisés yley etz yɨ Dios yꞌayuc najtzcapxɨɨyb ajcxy ñecy.
\s Je xützpɨ tüꞌaa
\p
\v 13 Tɨgɨɨygɨx ma yɨ tɨgɨyɨɨydac xützpɨ: yɨ tɨgɨyɨɨydac etz yɨ tüꞌaa huɨdibɨ jaꞌtp caꞌoydactuuby mɨj huin yɨꞌ, e may jäy ajcxy oy ji ytɨgɨyɨɨygɨxy.
\v 14 E janch je tɨgɨyɨydac etz yɨ tüꞌaa huɨdibɨ jaꞌtp ma je jugyꞌajtɨn huinɨxɨɨbɨ, xüdz jeꞌ etz tzip naxɨɨyñɨ; janch tɨm hueenɨ jäy huɨdibɨ ji nɨcxɨɨyb.
\s Yɨ jäy yhuinmaꞌñ mɨɨd ñiguëxɨ̈gy pen oyjäy o pen caꞌ
\p
\v 15 Nayguendꞌájtɨgɨx mɨɨd yɨ jäy anɨɨjatypɨ huɨdibɨ ajcxy mɨnamb co Dios ytɨyꞌajt yajꞌixpɨjcp, huɨdibɨ ajcxy huɨdijtp janch yung janch naxy ñaybɨdaaccɨxy nejɨhuɨ̈y ooy oy huinmaꞌñ mɨɨdɨty; nɨgoobɨ ajcxy jaduꞌn ñaybɨdägyii, ymɨɨd ajcxy jɨbɨc-huinmaꞌñ.
\v 16 Miich ajcxy jëbɨ mꞌijxcapy nejjaty ajcxy mɨɨdɨty chɨnaayɨn yjugyꞌajtɨn; caꞌ pɨn caamuxy chaꞌm tucy ma apy quipy, e nañ jaduꞌn caꞌ pɨn higo tɨɨm tucy ma jaamꞌapy quipy.
\v 17 Je quipy huɨdibɨ ooy yꞌoyɨty, oy yɨꞌ ytɨɨmꞌaty. Je quipy huɨdibɨ caꞌ yꞌoyɨty, caꞌ yɨꞌ oy ytɨɨmꞌaty.
\v 18 E je oybɨ quipy caꞌ huaad ytɨɨmꞌaty jɨbɨc. E je quipy huɨdibɨ caꞌ yꞌoyɨty caꞌ ytɨɨmꞌaty oy.
\v 19 Tügꞌócɨy je quipy huɨdi caꞌ oy ytɨɨmꞌaty, cɨxy yajpujxp jeꞌ. Chi jadaꞌ yajnögy.
\v 20 Nañ jaduꞌn miich ajcxy jëbɨ mnejhuɨ̈y jaduꞌn nej jäy yjäyꞌaty co mꞌixɨpy nej chɨnäy.
\s Caꞌ nidügꞌócɨy jäy ajcxy ytɨgɨ̈huɨpy ma Dios
\p
\v 21 Caꞌ nmɨnaanɨm nidügꞌócɨy jäy ajcxy ytɨgɨ̈huɨpy jiiby tzajpjoty huɨdibɨ xyñɨmaaybɨch: “Huindzɨn, Huindzɨn”, jëdaꞌajty ajcxy tɨgɨ̈huamb huɨdibɨ ycapxymɨdooyb je Dios chojcɨn yꞌaneꞌmɨn.
\v 22 Mayjäy oy mɨnaꞌnaꞌñ huinꞌit xɨɨ huinꞌit tiempo: “Huindzɨn, Huindzɨn”, tɨ ɨɨch ajcxy ngapxhuäcxy miich mꞌayuc, e mɨɨd miich mxɨɨ tɨ ɨɨch ajcxy nyajpɨdzɨmy je caꞌoybɨ; etz mɨɨd miich mxɨɨ tɨ nduñ ɨɨch ajcxy mɨj huinmaꞌñ.
\v 23 Huinꞌit nɨmähuɨpy: “Camɨnaabɨ miich ajcxy tɨ ngaꞌixyꞌadyii; huinhuäctutcɨch miich jɨbɨc tumbɨdɨjc ajcxy.”
\s Je mejtznajxpɨ je tɨyꞌajt cop 
\p
\v 24 Nidügꞌócɨy pɨnjäy huɨdibɨ xymɨbɨjcpɨch etz mɨdooyb jaduꞌn nej ɨɨch nꞌaneꞌmyɨch yɨꞌ ajcxy quipxyjaty mɨɨd je jäy huɨdibɨ cohuinmaꞌñ huɨdibɨ ytɨjc ycojp ma yhuingɨ́xɨty.
\v 25 Co ymɨcpojtüy etz ycomy je mɨj nɨɨ, caꞌ ypadyii nɨɨgom je tɨjc, jeꞌ co anajty cɨxy jeꞌ ycojyɨty.
\v 26 Per yɨꞌ ajcxy huɨdibɨ mɨdoob e caꞌ cuyduñ huɨdibɨ ngapxpɨch, jeꞌ jaduꞌnɨp nej tüg jäy huɨdi janch locɨ huɨdi ytɨjccoj ma puꞌ jot.
\v 27 Co ymiñ je mɨc poj tuu, chi ycomy je mɨj nɨɨ. Chi ycɨday je ytɨjc; mɨj ayoꞌn oy yjajtɨ.
\p
\v 28 Co Jesús ycapxtay ymɨydactay, chi je jäy ooy huinmay jaduꞌn nej anajty tɨ yajꞌixpɨcy.
\v 29 Com jeꞌ co Jesús anajty yajꞌixpɨcy nej tüg huɨdibɨ cötujcɨn mɨɨd, caꞌ yjaduꞌnɨty nej je escribas ajcxy.
\c 8
\s Jesús yajtzögy tüg jɨbɨc nïbützpaꞌmmɨɨdpɨ
\p
\v 1 Co Jesús oy choonɨ ma je cögop, chi ypagɨdacɨ mayjäy.
\v 2 Huinꞌit ñimiinɨ tüg jäy jɨbɨc pützpaꞌmmɨɨdpɨ. Chi ycojxtɨnayꞌahuɨɨy ma Jesús yhuinduu. Chi minañ: 
\p 
―Huindzɨn, pen mꞌaꞌixɨɨyb jëbɨ xyajtzögyɨch.
\p
\v 3 Huinꞌit Jesús nïdooñ je jäy. Chi nɨmay:
\p 
―Ndzojcpyɨch, jëbɨ mdzögy.
\p 
Co Jesús jaduꞌn nɨmay je paꞌmjäy huinꞌítɨy je ypützpaꞌm oy ytɨgooy.
\v 4 Chi Jesús nɨmay:
\p 
―Caꞌ pɨn myajnɨmäy; nɨcx janchtɨy ma je teedy. Mɨnɨcx tüg huindzɨgɨꞌñ huɨdi Moisés yꞌaneꞌmy. Huinꞌit jëbɨ yɨ jäy ajcxy ixɨpy co tɨ mꞌagɨdägy.
\s Jesús yajtzögy tüg capitán romano ymang
\p
\v 5 Co Jesús yjaꞌty jɨm Capernaum huinꞌit tüg capitán ñimiinɨ e ycohuanɨɨy.
\v 6 Chi ñɨmaayɨ:
\p 
―Huindzɨn, jɨm ɨɨch tüg ndumbɨ ma ɨɨch ndɨjc huɨdi tɨm cöcnaayñɨp, caꞌ yꞌocyücxnɨ. 
\p
\v 7 Chi Jesús mɨnañ:
\p 
―Ɨɨch nɨcxy nyajtzögy.
\p
\v 8 Chi je capitán yꞌadzooy:
\p 
―Huindzɨn, caꞌp ɨɨch nꞌoyjäyɨty, caꞌ yhuaadɨty mdɨgɨ̈huɨpy ma ɨɨch ndɨjc, jëyɨ miich nɨgoo capxy e tɨ anajty ɨɨch ndumbɨ chögy.
\v 9 Ɨɨch nañ jaduꞌn aneꞌmy nꞌityɨch, e nañ nmɨɨdɨch soldadtɨjc cɨ̈ꞌam. Co ɨɨch nɨmäy: “Nɨcx”, nɨcxp; e co ɨɨch nɨmäy: “Min”, mimb; e co nꞌaneꞌmyɨch je nbödumbɨch huen tijaty tun, ytumyb.
\p
\v 10 Co Jesús jaduꞌn mɨdooy, chi nɨgoobɨ ycɨjxy ycuejty. Chi ajcxy nɨmay huɨdi pahuidijtɨp: 
\p 
―Janch tɨyꞌajt jaduꞌn nej nɨmaaygɨxy, ma Israeljäy ymiñ, caꞌ jaduꞌn tɨ nbaadyɨch huɨdi oy mɨbɨcy jaduꞌn nej jadayaabɨ yëydɨjc.
\v 11 Ɨɨch jaduꞌn nɨmaayb co mayjäy oy miinaangɨxy xɨɨpɨdzɨmyꞌamy xɨɨcɨdägyꞌamy, chi ixtägaꞌñ quipxyɨ mɨɨd Abraham, Isaac etz Jacob jiiby ma Dios yꞌaneꞌmɨn.
\v 12 Je judíojäy huɨdibɨ ixyipy ajcxy jëbɨ yjatzɨnäy jiiby tzajpjoty, jeꞌ ajcxy nɨcxamb agootztuuby, jiiby ajcxy yjɨ̈huɨpy yäxɨpy etz y tɨɨtzmúcxɨpy ytɨɨtzqueedɨpy.
\p
\v 13 Huinꞌit Jesús nɨmay je capitán:
\p 
―Nɨcx ma mdɨjc. Jaduꞌn nej miich xymɨbɨcyɨch, tɨ ɨɨch yam nguyduñ.
\p 
Chi je tumbɨ oy chögy tɨm huinꞌit hora.
\s Jesús yajtzögy Pedro ymɨ̈d töxyjäybɨ
\p
\v 14 Chi Jesús ñɨcxy ma Pedro ytɨjc. Chi ijxy je Pedro ymɨ̈d co jɨm cɨjxꞌam ycöcnäy mɨɨd je toybaꞌm.
\v 15 Co Jesús cɨ̈nïxajy huinꞌit je toybaꞌm ñajxy. Chi pɨdɨ̈gy. Chi mɨcꞌamy niꞌixɨɨy je caayɨn uucɨn.
\s Jesús yajtzögy maybaꞌmjäy
\p
\v 16 Co oy chuꞌɨɨyñɨ ycoodzɨɨyñɨ huinꞌit yajmɨmiñ ma Jesús may je huɨdi caꞌoybɨ mɨɨd. E mɨɨd yɨꞌ yꞌayuc yjëdaꞌajty ypɨdzɨmday je caꞌoybɨ, e huinꞌit tügꞌócɨy je paꞌmjäy chooctay.
\v 17 Jadayaabɨ jeꞌ ytunɨ yjajtɨ jɨgɨx yajcuyduñ jaduꞌn nej je profeta Isaías mɨnañ: “Yɨꞌ cɨꞌm ajt nyuu nbaꞌm tɨ xyajtzoctaayɨm etz yɨ pɨjcɨn ixɨn tɨ yajnɨcxtäy.”
\s Je pɨnjaty anajty panɨcxam Jesús
\p
\v 18 Co Jesús ijxy janch mayjäy anajty tɨ yjübigɨ̈yii, chi nɨmay co huen nájxcɨxy jɨmꞌamy mejy nïnaxy.
\v 19 Huinꞌit ñimiinɨ tüg escriba. Chi nɨmay:
\p 
―Huindzɨn, nbanɨcxamybɨch miich oy janch tɨm maꞌamy ma anajty mnɨcxy.
\p
\v 20 Chi Jesús yꞌadzooy:
\p 
―Je huaax ymɨɨd jeꞌ ajcxy yjut, e je joon ymɨɨd jeꞌ ajcxy ypeꞌñ. Per ɨɨch, je jäy huɨdibɨ tzoon jiiby tzajpjoty, caꞌ nmɨ́ɨdɨdyɨch ma nmähuɨbɨch ma nbócxɨbɨch.
\p
\v 21 E jadügpɨ ydiscípulo ymɨnañ:
\p 
―Huindzɨn, nɨcx jayɨjp ndeedyɨch nꞌocyajnaaxtɨgɨ̈yɨch huinꞌit nbanɨcxɨp.
\p
\v 22 Huinꞌit Jesús yꞌadzooy:
\p 
―Pamiingɨch, ixmajtzcɨx yɨ öcpɨ huen ymɨɨꞌöcpɨ yajnaaxtɨgɨ̈yii.
\s Jesús jɨjpcogapxɨ̈y je mɨcpoj etz je mejy co anajty ooy ypɨdɨ̈gy
\p
\v 23 Huinꞌit Jesús oy ybarcotɨgɨɨyñɨ. Chi ypadzoonɨ je ydiscípulos ajcxy.
\v 24 E jɨm anajty ytüyöy mejyhuingɨ́xy, huinꞌit mɨc poj ñaymɨbɨdzɨmɨ. Janch mɨc yꞌocpɨdɨ̈cnɨ je mejy jɨgo jɨgo je barco cayajnïdɨgoy, pero Jesús anajty chachmaab.
\v 25 Huinꞌit oy ymɨgapxyii yajmäybɨdɨ̈gyii jeꞌ ydiscípulos ajcxy. Chi ñɨmaayɨ:
\p 
―¡Huindzɨn, ocyajtzoogɨch ajcxy! ¡Cheeby ɨɨch ajt nꞌocquiinɨm!
\p
\v 26 Huinꞌit Jesús yꞌadzooy:
\p 
―¿Naꞌamy co mdzachtzɨgɨ́ɨygɨxnɨ? ¡Miich ajcxy hueenɨ mɨɨdɨty mɨbɨjcɨn!
\p 
Huinꞌit Jesús ypɨdɨ̈gy. Chi mɨgapxy je poj etz je mejy. Huinꞌit je mejy etz je poj yhuaꞌcxɨjptay.
\v 27 E jeꞌ ydiscípulos ajcxy nɨgoobɨ yꞌoccɨ́x yꞌoccuejtnɨ chachmɨnaangɨxy:
\p 
―¿Pɨn yëydɨjc jada jadaꞌ, co je mejy je poj tɨ ycapxymɨdoyii?
\s Je Gadara jäy ajcxy huɨdibɨ anajty caꞌoybɨ mɨɨd 
\p
\v 28 Co Jesús yjaꞌty ma yɨ nɨɨbaꞌ ma yɨ Gadara ñaax ycajp, chi metz yëydɨjc, huɨdi anajty caꞌoybɨ mɨɨd oy yjɨjpcoyöyɨ̈yii anajty ajcxy, tɨ chooñ ma je öcpɨ jut. Yɨ jäy ajcxy ooy janch ahuaꞌn, e caꞌ anajty huaad jɨm ni pɨn ñaxy ma je tüꞌaa.
\v 29 E co anajty Jesús jɨm ñaxy huinꞌit janch ahuaꞌn ymɨgapxqueecɨ:
\p 
―¿Ti miich mdunamyb mɨɨd ɨɨch ajcxy, Jesús, miich Dios yꞌung? ¿Nej tɨ mmiñ jayɨjp co xychaachytúngɨxɨch ma caꞌnɨ xɨɨ tiempo paady?
\p
\v 30 Jɨguem ma anajty ajcxy jeꞌ yajpaady jɨm anajty mayꞌɨdzɨm yꞌojccɨxy.
\v 31 Chi je caꞌoybɨ ymɨnañ:
\p 
―Pen miich xyajpɨdzɨm ɨɨch ajcxy, xyajꞌadɨgɨɨygɨxy xyajjottɨgɨɨygɨxy yɨ mayꞌɨdzɨm.
\p
\v 32 Chi Jesús ñɨmay yɨꞌ ajcxy:
\p 
―Nɨcxcɨx.
\p 
Huinꞌit ñïhuaatzɨ je yëydɨjc je caꞌoybɨ. Chi oy ytɨgɨɨygɨxy je caꞌoybɨ ma je ɨdzɨm. Huinꞌit je ɨdzɨm oy ñɨɨgöboyɨ̈ctäy. Jiiby ajcxy yjïcxtäy.
\p
\v 33 E je jäy ajcxy huɨdibɨ anajty ɨdzɨm ycuendꞌajtp, huinꞌit ajcxy yqueegy mɨɨd je tzɨgɨꞌñ. Chi co ajcxy yjaꞌty cajpjoty, huinꞌit ajcxy ytɨgɨɨy mɨydaacpɨ jaduꞌn nej anajty tɨ ytuñyii tɨ yjadyii.
\v 34 E huinꞌit chonday je mayjäy ma je cajp. Chi ajcxy ninɨcxy je Jesús. E co ajcxy ijxpaty, huinꞌit ajcxy cohuanɨɨy co huen pɨdzɨmnɨ ma je naax je cajp.
\c 9
\s Jesús yajtzögy tüg jäy cɨ̈mätpɨ tecymätpɨ
\p
\v 1 Chi Jesús ybarcɨtɨgɨɨy. Chi ñɨcxy jɨmꞌamy mejyñaxy. Chi oyjäty ma ycɨꞌmgajp.
\v 2 E jɨm yajmɨmiñ tüg yëydɨjc huɨdibɨ anajty cɨ̈mät tecymät. Yajcɨɨy ymiñ maꞌndzaayjoty. E co Jesús ijxy co ymɨɨd je mɨbɨjcɨn, chi nɨmay je paꞌmjäy: 
\p 
―Jotcugɨꞌ miich, tɨ je mbocy nhuinmeecxyɨch.
\p
\v 3 Huinꞌit nijëjɨty je escribas ajcxy, je ley yhuindzɨn, jotꞌajtɨ: “Jadayaabɨ yëydɨjc capxtɨgooyb yɨꞌ ma Dios co jaduꞌn ymɨnaꞌñ.”
\v 4 Com Jesús ñejhuɨɨy jaduꞌn nej anajty ajcxy je jäy tzachjotꞌájtɨgɨxy, chi ajcxy nɨmay:
\p 
―¿Nej co ajcxy jɨbɨc mdzachjotꞌájtɨgɨxy jotjoty huinmaꞌñyjoty?
\v 5 ¿Huɨdibɨ caꞌ chipɨty, co nmɨnáꞌñɨbɨch: “Tɨ yɨ mbocy nhuinmeecxɨch”, o co nmɨnáꞌnɨbɨch: “Pɨdɨ̈g etz tüyöy”?
\v 6 Ɨɨch ndzojcpyɨch co miich ajcxy mhuinjɨhuɨ̈huɨp co ɨɨch tɨ ndzooñɨch tzajpjoty e paady nmɨɨdɨch je cötujcɨn ya naaxhuiñ e jëbɨ nhuinméecxɨbɨch pocyjäy ajcxy.
\p 
Huinꞌit Jesús nɨmay je cɨ̈mätpɨ tecymätpɨ: 
\p 
―Pɨdɨ̈g, huijtzɨ̈g yɨ mdögy etz nɨcxnɨ ma mdɨjc.
\p
\v 7 Chi je cɨ̈mätpɨ tecymätpɨ ypɨdɨ̈gy. Chi ñɨcxy ma ytɨjc.
\v 8 E co je mayjäy jaduꞌn ijxy, huinꞌit ajcxy ooy jɨhuɨɨy huinmay. Chi ajcxy ooy ojadaty yɨ Dios co anajty tɨ yecy je mɨcꞌajtɨn ma mayjäy.
\s Jesús nɨmay Mateo: “Pajamgɨch”
\p
\v 9 Co Jesús oy choonɨ jɨm, huinꞌit ijxy tüg yëydɨjc, yxɨɨ Mateo, huɨdibɨ anajty ɨñaayb ma yajcogüejttac. Chi nɨmay:
\p 
―Pajamgɨch.
\p 
Huinꞌit Mateo ytɨnayɨ̈gy. Chi panɨcxy Jesús.
\p
\v 10 Jaduꞌn ytunɨ yjajtɨ co Jesús jɨm ycay ma Mateo ytɨjc, e may nañ jaduꞌn ymiñ yajcogüejtpɨdɨjc etz pocyjäydɨjc. Chi ajcxy jɨm túꞌcɨy yꞌixtactay mɨɨd Jesús etz mɨɨd yɨꞌ ydiscípulos.
\v 11 Co je fariseos jaduꞌn ijxy ajcxy, chi nɨmay ajcxy jeꞌ ydiscípulos:
\p 
―¿Naꞌamy co yɨ mHuindzɨn ycaymucy mɨɨd je yajcogüejtpɨdɨjc je pocyjäydɨjc?
\p
\v 12 Co Jesús jaduꞌn mɨdooy huinꞌit nɨmay ajcxy:
\p 
―Caꞌ yajmayjaty tzoydumbɨ huɨdi caꞌ ajcxy ypɨgyii, jëyɨ huɨdi ajcxy pɨjcɨp.
\v 13 Nɨcx ixpɨjccɨxy nej ymiñ jaaybety ma Dios ñecy: “Ɨɨch ndzojcpyɨch co miich ajcxy mɨɨdꞌadɨpy je paꞌayoꞌn, caꞌydɨ co myajhuindzɨgɨ̈y tijaty ɨyujc.” Caꞌ ɨɨch tɨ nmiiñɨch ma je jäy ajcxy huɨdibɨ caꞌ pocy mɨɨdɨty. Ɨɨch tɨ nmiiñɨch mɨɨd yɨ pocyjäy ycɨxpɨ co huen jothuimbijttaaygɨxy ma Dios.
\s Amɨdoogɨxy Jesús mɨɨd jeꞌ ycɨxpɨ co jaygay yꞌijtcɨxy
\p
\v 14 Huinꞌit ajcxy ymiñ Juan ydiscípulos ma Jesús. Chi je ajcxy nɨmay Jesús:
\p 
―¿Naꞌamy co ɨɨch ajcxy etz fariseo ajcxy ayuuꞌijtcɨxy, e yɨꞌ ajcxy huɨdibɨ xymɨɨdhuɨdijtp caꞌ ajcxy ayuuꞌíjtcɨxy?
\p
\v 15 Huinꞌit Jesús yꞌadzooy:
\p 
―¿Nej jëbɨ yajꞌayuuꞌaty jäy ajcxy huɨdi yajpaatpɨ ma je pɨjcpɨ yajnixɨɨduñyɨ, pen quipxyɨ yam yajpaady mɨɨd je huɨdibɨ pɨjcp? Minamb je xɨɨ je tiempo mɨna je pɨjcpɨ yajtzonɨɨyb, huinꞌit janchtɨy ajcxy jëbɨ yꞌayuuꞌajtcɨxy.
\p
\v 16 Ni pɨn tuc huit caꞌ agɨyɨɨy mɨɨd tüg pedas jemyhuit, com nïgɨ je tuc huit ñajtzcɨɨdzɨ̈y, chi nïgɨ oꞌctɨy yjajtnɨ.
\v 17 Caꞌ pɨn pɨdägy vino nɨɨ ma tucpɨ cochac, ycɨɨdzɨp jeꞌ, e tügꞌócɨy anajty tɨ yꞌayoodäy je vino nɨɨ mɨɨd ñigochac. Pɨdägɨpy ajcxy jemy vino ma jemy cochac, chi jaduꞌn caꞌ ayoohuɨpy je vino, ni huindɨgoyɨpy je cochac.
\s Je Jairo ñɨɨx, etz je töxyjäy huɨdibɨ Jesús yhuit nïdonɨ
\p
\v 18 Ma anajty Jesús jɨm ycapxy ymɨydägy huinꞌit ymiñ tüg mɨjjäy. Chi ñaygojxtɨnayꞌahuɨy ma Jesús yhuinduu. Chi ymɨnañ:
\p 
―Nnɨɨxɨch tɨ yꞌögy. Nɨcx ma ɨɨch ndɨjc etz mgɨ̈nïxajɨpy, jugypɨgɨpy ya.
\p
\v 19 Huinꞌit Jesús ypɨdɨ̈gy. Chi ñɨcxy mɨɨd je ydiscípulos ajcxy. 
\v 20 Ma anajty ajcxy jɨm ytüyöy huinꞌit ymiñ jɨxcɨꞌpyꞌamy tüg töxyjäy huɨdi yxɨɨ yboꞌ tɨ mɨꞌijtɨɨyñɨ majmetz jɨmɨjt. Chi nïdonɨ Jesús yhuitpaꞌ. Huinꞌit ñajxy jeꞌ ypaꞌm. 
\v 21-22 Jaduꞌn anajty tɨ yjotꞌadyii: “Oy Jesús jëdaꞌajty yhuitpaꞌ nnïdónɨbɨch, tɨ ɨɨch anajty nꞌagɨdäygɨch.” Huinꞌit Jesús yhuäc-huimbijty. Chi huindɨcxpejty je töxyjäy. Chi nɨmay:
\p 
―Jotcujcꞌat miich, tɨ mꞌagɨdägy jɨgɨx co xymɨbɨcyɨch.
\p 
E tɨm huinꞌit hora oychögy je paꞌmjäy.
\v 23 Chi Jesús oy yjäty ma je mɨjjäy ytɨjc. Chi ijxy je xuuxpɨdɨjc mɨɨd je ymɨgügtɨjc ajcxy huɨdi chachyaaxcɨxy co anajty tɨ yꞌögy je töxyꞌanäg.
\v 24 Huinꞌit Jesús nɨmay ajcxy:
\p 
―Queccɨx ya, yɨ piꞌctöxyꞌanäg caꞌ yɨꞌ tɨ yꞌögy. Hueꞌ yɨꞌ maab.
\p 
Huinꞌit ajcxy nɨgo nɨxiicy yajxiicy Jesús.
\v 25 Co anajty je jäy tɨ ixquejxtäy, chi Jesús ytɨjctɨgɨɨy ma anajty je töxyꞌanäg huijtznäy. Chi majch ma ycɨꞌ. Chi ypɨdɨ̈gy. 
\v 26 Chi je jäy oy yajnejhuɨɨydaayñɨ ma je jɨmbɨ naax cajp nej anajty tɨ ytuñyii tɨ yjadyii.
\s Jesús yajtzögy metz jäy huintzpɨ
\p
\v 27 Ma anajty jɨm tɨ choñ huinꞌit metz jäy huintzpɨ ypamiinɨ. Chachñɨmäyii jaduꞌn:
\p 
―¡Paꞌayoogɨch ajcxy, miich David yꞌap yꞌoc!
\p
\v 28 Chi Jesús yajpajäty ma anajty tɨ yjättägy. Co ytɨgɨɨy tɨgoty, chi Jesús yajtɨɨy:
\p 
―¿Nej mmɨbɨjcpy miich ajcxy co jëbɨ nyajhuindɨcxɨ̈ccɨxy?
\p 
Huinꞌit jeꞌ ajcxy yꞌadzooy:
\p 
―Mɨbɨjcy ɨɨch ajcxy, Huindzɨn.
\p
\v 29 Huinꞌit Jesús nïdoñ je jäy ajcxy huintzpɨ ma yhuiin. Chi nɨmay ajcxy:
\p ―Jaduꞌn nej miich ajcxy mmɨbɨcy, jaduꞌn ytunɨɨb yjadɨɨb.
\p
\v 30 Chi jeꞌ ajcxy yꞌijxɨ̈gy. Huinꞌit Jesús yꞌaneꞌmɨn pɨdacy:
\p 
―Caꞌ huaad pɨn myajnejhuɨɨygɨxy.
\p
\v 31 Co jeꞌ ajcxy ñɨcxnɨ, chi ajcxy ooy nigapxy nimɨydacy co Jesús anajty tɨ yajꞌijxɨ̈cɨgɨxy.
\s Jesús yajtzögy tüg jäy uumbɨ
\p
\v 32 Co anajty jeꞌ jɨm tɨ chongɨxy, huinꞌit ajcxy mɨmiñ ma Jesús tüg yëydɨjc huɨdibɨ uum huɨdibɨ anajty caꞌoybɨ mɨɨd.
\v 33 E co Jesús yajpɨdzɨmy je caꞌoybɨ, chi je mayjäy ooy ycɨjxy ycuejty ajcxy. Chi ajcxy mɨnaangɨxy:
\p 
―Ni camɨna jaduꞌn ycayajꞌixy ya ma jada Israel naax cajp.
\p
\v 34 Per je fariseos jaduꞌn ymɨnaangɨxy co Jesús jeꞌ mɨɨd je caꞌoybɨ ymɨcꞌajt yajpɨdzɨmy caꞌoybɨ ma jäy.
\s Jesús ymɨɨd paꞌayoꞌn ma mayjäy
\p
\v 35 Jesús jaduꞌn yhuɨdijty cajp cajp yajꞌixpɨjcy majaty tzajptɨjc. Yajhuingapxɨ̈y je jäy Dios yꞌayuc. Etz nañ jaduꞌn yajꞌagɨdacy huen ytɨm huɨdi yuu huen ytɨm huɨdi paꞌmɨty.
\v 36 Co Jesús jaduꞌn ijxy je mayjäy, chi oy paꞌayoonɨ co yɨꞌ ajcxy caꞌ mɨɨdɨty ni pɨn huɨdibɨ jëbɨ ñajtzcapxɨ̈y Dios yꞌaneꞌmɨn. Yɨꞌ ajcxy jaduꞌn yajpatp nej cöbixy huɨdi ca mɨɨdɨty cuendꞌajtpɨ. Caꞌ nejhuɨɨygɨxy pɨn yꞌaneꞌmɨp e pɨn ypanɨcxɨp.
\v 37 Huinꞌit Jesús nɨmay yɨꞌ ydiscípulos ajcxy: 
\p 
―Tɨyꞌajt yɨꞌ, janch mɨj je tung e hueenɨ je tumbɨdɨjc.
\v 38 Paady pɨjctzou miich ajcxy ma Dios co huen quexy tumbɨdɨjc ma yɨꞌ ytung.
\c 10
\s Jesús huinꞌixy je majmetz ydiscípulos
\p
\v 1 Huinꞌit Jesús huoy je nimajmetz discípulos. Chi moy ajcxy cötujcɨn jëbɨ huaad yajnïhuäch je huɨdi caꞌoybɨ mɨɨd. Etz nañ jaduꞌn yajꞌagɨdägɨp huen ytɨm huɨdi yuu huen ytɨm huɨdi paꞌmɨty.
\p
\v 2 Jada jeꞌ je nimajmetzp yxɨɨ: Simón, huɨdi nañ jaduꞌn yajtijp Pedro, etz ymɨguëx Andrés; Jacobo etz yꞌuch Juan, Zebedeo ymang;
\v 3 Felipe, Bartolomé, Tomás, Mateo, je yajcogüejtpɨ; Jacobo, Alfeo ymang; Lebeo, huɨdi nañ jaduꞌn yajtijp Tadeo;
\v 4 Simón, je cananista; e Judas Iscariote, je huɨdi ycɨ̈yejc Jesús agojɨx.
\s Jesús quejxy jeꞌ ydiscípulos ajcxy ayuccapxhuäcxpɨ
\p
\v 5 Chi Jesús quejxy yɨ nimajmetzpɨ, e jaduꞌn najtzcapxɨɨy ajcxy:
\p
―Caꞌ ajcxy mnɨcxɨpy ma je naax cajp ma ajcxy je jäy chɨnäy huɨdibɨ caꞌ ajcxy Israeljäyɨty. Ni mgatɨgɨ̈huɨpy ajcxy ma Samaria naax cajp.
\v 6 Nïgɨ jacꞌoy co ajcxy mnɨcxɨpy ma je Israeljäy huɨdibɨ caꞌ nejhuɨ̈y huɨdibɨ caꞌ paduñ Dios ytɨyꞌájtɨn.
\v 7 Nɨcx miich ajcxy capxhuäcx Dios yꞌayuc co tɨ yhuingonɨ Dios yꞌaneꞌmɨn.
\v 8 Yajꞌagɨdaaccɨxy yuujäy paꞌmjäy huɨdijaty pützpaꞌm ymɨɨd. Myajjugypɨjccɨxy tɨɨbɨ ögy. Myajnïhuädzɨp huɨdi caꞌoybɨ ymɨɨd. Ninɨgoobɨ miich jada cötujcɨn tɨ myajmooygɨxy, nañ ninɨgoobɨ yejccɨxy.
\p
\v 9 Caꞌ ni ti meeñ mmɨnɨcxcɨxy.
\v 10 Caꞌ mbijty mmɨnɨcxcɨxy tüꞌamgɨxpɨ. Mmɨnɨcxcɨxy jëdaꞌajty yɨ mhuit huɨdi mɨɨd ma mnïnïcx. Ni mgamɨnɨcxɨp huingbɨ mgɨ̈g etz mdajc; com ycopɨcɨty co je cajpjäy xyajcáaygɨxɨpy xyajꞌúuccɨxɨpy miich ajcxy.
\p
\v 11 Co anajty mjäty miich ajcxy ma tüg cajp nidɨu yajtɨu pɨnjäy jɨm tudäcyɨp. Jɨm ajcxy mhuɨꞌmɨpy ma jeꞌ ytɨjc ixtɨ coonɨ ajcxy mdzoonɨp.
\v 12 Co anajty miich ajcxy mdɨgɨ̈y tɨgoty huinꞌit mgapxpócxcɨxɨpy je codɨjc jaduꞌn nej tzocy.
\v 13 E pen je codɨjc ymɨhuaadꞌajtpy, yejccɨxy jɨm ɨɨbocxɨn capxpoocxɨn. E pen je jäy caꞌ ytudägyɨty, ñaadɨgɨ̈ꞌadɨp huɨdi anajty tɨ mgapxcɨxy.
\v 14 E pen caꞌ pɨn xycöbɨgaangɨxy, e ni pɨn xycamɨdohuaanɨ ajcxy mꞌayuc, pɨdzɨmgɨx jɨm ma je tɨjc o ma je cajp. Chi ajcxy mdecy huinnebɨpy, jeꞌ jeꞌ je tɨyꞌajt co caꞌ miich ajcxy ti pocy mɨɨdɨty.
\v 15 Janch tɨyꞌajt jaduꞌn nej nɨmaaygɨxy co anajty je xɨɨ tiempo paady ma anajty yajtɨydunaꞌñ je naaxhuiñyjäy, jac nïgɨ yajtzaachytunaꞌñ yɨꞌ ajcxy caꞌydɨ yɨ jäy ajcxy huɨdibɨ tzɨnaayb ma Sodoma cajp etz ma Gomorra cajp.
\s Ixhuɨdijtɨn pahuɨdijtɨn
\p
\v 16 ¡Ocmɨdoogɨx! Ɨɨch yam miich ajcxy nguejxyp majaty yɨ jäy huɨdi jɨbɨc-huinmaꞌñ mɨɨd. Jaduꞌn nipaady nej ɨɨch nguexyɨch cöbixy ma je lobɨ. Huijy cujc ajcxy mnaypɨdägɨɨb jaduꞌn nej tzaꞌñ, per yung naxy jaduꞌn nej muuxy.
\v 17 Mnayguendꞌadɨɨb ajcxy jeꞌ co yɨ jäy ajcxy xycɨ̈yegaangɨxy ma ajcxy mɨjtungmɨɨdpɨ etz myajhuobaangɨxy ma je judíojäy ajcxy ñaymujctac, 
\v 18 ixtɨ xyajnɨcxaangɨxy ajcxy ma je gobernador etz je reydɨjc ajcxy mɨɨd ɨɨch ycɨxpɨ; e jɨm ɨɨch miich ajcxy xyñigapxɨpy ma je jäy ajcxy yhuinduu, e nañ jaduꞌn majaty anajty je jäy ajcxy huɨdibɨ caꞌ yjudiojäyɨty.
\v 19 Co anajty ajcxy xyajcɨ̈dɨgɨ̈y je mɨjtungmɨɨdpɨ, caꞌ ajcxy oy mhuinmaayɨpy nej mꞌocnɨmähuɨpy. Co anajty paady je tiempo, huinꞌit ɨɨch miich ajcxy myajnɨmähuɨpy nej ajcxy mgapxɨpy.
\v 20 E je ayuc huɨdibɨ miich anajty ajcxy mgapxpy, caꞌ miich anajty jeꞌ ajcxy mꞌayucꞌájtɨgɨxy, je Dios Teedy anajty yjɨhuɨꞌñ, je Espíritu Santo, xyajcapxp miich ajcxy. 
\p
\v 21 Huinꞌit yɨ jäy ajcxy ñaygɨ̈yegáanɨgɨxy miñ xyipy tüg quëxtɨjc co huen yajꞌögyii. E je ungdeedy cɨ̈yegaꞌñ yꞌung; je ungꞌanäg mɨbɨdɨ̈gaꞌñ je ytaj yteedy etz yajꞌöcɨp ajcxy.
\v 22 Tügꞌócɨy je jäy ajcxy caꞌ ajcxy xyꞌixꞌanɨpy xychogaꞌ nɨpy mɨɨd ɨɨch nxɨɨ ycɨxpɨ. E pɨn xymɨbɨjcpɨch amumdügjot ixtɨ mabaad yꞌögy, yɨꞌ ajcxy yꞌalma tzögɨpy.
\v 23 E co anajty miich ajcxy jäy xyꞌixhuɨdity xypahuɨdity ma tüg cajp, nɨcxcɨx ma huingbɨ cajp. Janch tɨyꞌajt jaduꞌn nej nɨmaaygɨxy co caꞌnɨ anajty mgapxhuäcxtäy ayuc tɨyꞌajt ma tügꞌócɨy je Israelcajp co nhuimbidɨpyɨch, ɨɨch, je jäy huɨdibɨ tzoon tzajpjoty.
\p
\v 24 Tüg yajꞌixpɨjcpɨ jac nïgɨ mɨjꞌajtɨn mɨɨdɨty caꞌydɨ je huɨdi ixpɨjcp, e tüg huindzɨn jac nïgɨ mɨjꞌajtɨn mɨɨdɨty caꞌydɨ jeꞌ ytumbɨ.
\v 25 Jëb jotcujc idɨpy je discípulo co jaduꞌn yajpaadɨpy jaduꞌn nej yhuindzɨn, e je tumbɨ jotcujc idɨpy nej yhuindzɨn. Pen jäy mɨnamb co ɨɨch nmɨɨdɨch caꞌoybɨ, jac nïgɨ ymɨnaꞌnaꞌñ co miich ajcxy mɨɨdɨty.
\s Pɨn jëbɨ yajtzɨgɨ̈y
\p
\v 26 Caꞌ ajcxy mdzɨgɨ̈y yɨ jäy ajcxy. Caꞌ ji ni ti yüch ity nɨcx ycaniguëxɨ̈gy; nañ ni ti ji ycayajtuñ ayüch ameech nɨcx ycayajnejhuɨ̈y.
\v 27 Huɨdi ɨɨch miich ajcxy ayüch nyajnɨmaayb, capxpɨdzɨmgɨx miich yɨꞌ mayjäyjoty, e huɨdi ajcxy mɨdooyb ameech, capxpɨdzɨmgɨx miich yɨꞌ mɨc ma tüg cögop.
\v 28 Caꞌ ajcxy mdzɨgɨ̈huɨp je jäy huɨdib ninïcx yajꞌöcp etz caꞌ huaad yɨꞌ ajcxy yajꞌögy je alma. Yɨꞌ miich ajcxy mdzɨgɨɨygɨxy je Dios huɨdib pɨdacp je alma etz je ninïcx mɨjjɨɨnjoty.
\p
\v 29 ¿Nej caꞌ jäy ajcxy toogy metz piꞌcjoon mɨɨd tügpɨ piꞌcmeeñɨ? Per caꞌ ni tüg huaad ycäy naaxhuiñ, pen caꞌ tzocy je mDios Teedy huɨdi jiiby tzajpjoty.
\v 30 Miich ajcxy mgöhuay ac mɨchoy yɨꞌ.
\v 31 Paady miich ajcxy caꞌ mdzɨgɨ̈huɨpy, jac nïgɨ miich ajcxy mdzoubaady caꞌydɨ je joon.
\s Pɨnjaty caꞌp mɨdzöyduꞌñ Jesucristo mayjäyjoty
\p
\v 32 Yɨ jäy ajcxy huɨdi xymɨbɨjcpɨch etz xyñidɨyꞌajtyɨch ma jäy yhuinduu, nañ jaduꞌn ɨɨch yɨꞌ nidɨyꞌajtyɨch ma ɨɨch nDeedy huɨdibɨ jiiby tzajpjoty.
\v 33 Per je jäy ajcxy huɨdi ɨɨch xycoyützpɨch ma mayjäy ajcxy yhuinduu, nañ jaduꞌn yɨꞌ ngoyützɨp ma ɨɨch nDeedy yhuinduu huɨdibɨ jiiby tzajpjoty.
\s Mɨɨd Jesús ycɨxpɨ yjiijɨty naymɨdzipꞌadɨɨ
\p
\v 34 Caꞌ miich ajcxy mhuinmay co ɨɨch ya tɨ nmiñɨch mɨɨd co nmöhuaangɨxy jotcujcꞌajtɨn ya naaxhuiñ.
\v 35 Ɨɨch tɨ nmiiñɨch co nyajtziptunɨpyɨch jäy mɨɨd yteedy; töxyjäy mɨɨd ytaj etz xecy mɨɨd yxecy.
\v 36 E jaduꞌn miich ajcxy mdzipꞌadɨɨyb mgɨꞌmjuugy mgɨꞌmmɨgüg.
\p
\v 37 Yɨ jäy ajcxy huɨdibɨ tzojcp ytaj yteedy jac nïgɨ caꞌydɨ ɨɨch, caꞌ yɨꞌ ypaadyii co njäyꞌadɨɨybɨch; e pɨn ymang o ñɨɨx tzojcp nïgɨ caꞌydɨ ɨɨch, caꞌ ypadyii co njäyꞌadɨɨybɨch;
\v 38 e pɨn caꞌ ycɨꞌmdzojcɨn yꞌijxmajtztäy etz caꞌ ñaybɨdägyii ycɨxjot huinɨjot ma ɨɨch, caꞌ mɨhuaadɨty nɨcx njäyꞌadɨɨybɨch.
\v 39 Pɨn yjugyꞌajtɨn najtztzogɨɨyb, yajtɨgoyɨpy yɨꞌ; e pɨn yjugyꞌajtɨn tɨgooyb mɨɨd ɨɨch ycɨxpɨ, ypaadɨpy jugyꞌajtɨn huinɨxɨɨ tzajpjoty.
\s Premio nganarꞌajtɨm
\p
\v 40 Pɨn miich ajcxy xycöbɨjcp, ɨɨch yɨꞌ anajty xycöbɨjcp; e pɨn ɨɨch anajty xycöbɨjcp, nañ ycöbɨjcpy anajty je huɨdibɨ ɨɨch tɨ xyquejxyɨch ya naaxhuiñ.
\v 41 Je huɨdibɨ cöbɨjcp je jäy huɨdibɨ Dios yꞌayuc capxhuacxɨp, jeꞌ co yɨꞌ ymiñ mɨɨd Dios ycɨxpɨ, yɨꞌ jaduꞌmbɨ je oyꞌajtɨn ypaadɨpy. Nañ jaduꞌn je huɨdi cöbɨjcp je oybɨ jäy mɨɨd co oy yjäyɨty, yɨꞌ jaduꞌmbɨ oyꞌajtɨn ypaadɨpy.
\v 42 Je huɨdi yajꞌucp tüg vaso nɨɨ ma huenytɨmpɨnjäy mɨɨd co xymɨbɨcyɨch, janch ɨɨch miich nɨmaaygɨxy, ypaadɨpy oyꞌajtɨn.
\c 11
\s Juan je Bautista yquexyöybɨ
\p
\v 1 E co Jesús anajty tɨ najtzcapxɨydäy je tɨyyꞌajt ma je nimajmetzpɨ ydiscípulos ajcxy, chi Jesús ñɨcxy yajꞌixpɨjcp etz ayuccapxhuäcxp majaty cajp huinduy agonbɨ.
\p
\v 2 E Juan je Bautista hueꞌ jeꞌ anajty yajpaady pujxtɨgoty. E co nejhuɨy tijaty mɨjhuinmaꞌñ anajty Jesús ytumyb, chi quejxy metz jeꞌ ydiscípulos ajcxy ma Jesús yajpaady.
\v 3 Chi Juan ydiscípulos ajcxy yꞌamɨdooy Jesús:
\p
―¿Nej miich jeꞌ je Cristo huɨdibɨ anajty minamb o jëbɨ ɨɨch ajcxy huingbɨ nꞌahuijxcɨxy?
\p
\v 4 Chi Jesús yꞌadzooy:
\p
―Nɨcxcɨx miich ajcxy nɨmaaygɨx yɨ Juan, je Bautista, tijaty miich ajcxy mꞌijxpy mmɨdooyb co ndumybɨch.
\v 5 Miich ajcxy yajmɨɨdmɨydäg je Juan, jaduꞌn nej je huintzpɨ nyajhuindɨcxɨ̈gyɨch; je cɨ̈mät tecymät nyajtzoocypɨch; je huɨdibɨ jɨbɨc nïbützpaꞌm ymɨɨd nyajtzoocpyɨch; jeꞌ ajcxy huɨdibɨ cönat nyajmɨdohuɨ̈cpyɨch; je öcpɨ ajcxy nyajjugypɨjcpyɨch; etz je ayoobtɨjc, je huɨdibɨ yung naxy yjothuinmaꞌñ nyajmɨɨdmɨydacypɨch Dios yꞌayuc.
\v 6 Jotcujc yɨꞌ ajcxy pɨnjaty xymɨbɨjcpɨch amumdügjot etz caꞌ ni nej yjotmetzcɨꞌ mɨɨd ɨɨch.
\p
\v 7 Co Juan je Bautista ydiscípulos ajcxy ñɨcxnɨ, chi Jesús ytɨgɨɨy nimɨydaccoty Juan je Bautista ytung ma je mayjäy, chi ymɨnañ:
\p
―¿Ti miich ajcxy oy mꞌixy jɨm mɨjtɨgɨ̈duum? ¿Tüg nähuaax huɨdibɨ poj xɨjpɨ?
\v 8 ¿Ti ajcxy oy mꞌixy? ¿Ti oy mꞌixy, tüg jäy huɨdibɨ ooy yꞌoyxöxyɨty?
\v 9 ¿Ti miich ajcxy oy mꞌixy? ¿Nej tɨ mꞌixy tüg Dios yꞌayucnajtzcapxɨɨybɨ? Janch co tɨ mꞌíjxcɨxy tüg jäy jac mɨj caꞌydɨ tüg Dios yꞌayucnajtzcapxɨɨybɨ.
\v 10 Jeꞌ jada je jäy huɨdibɨ Dios nigapxy ma ñecy co Dios jaduꞌn ymɨnañ:
\q Cham nguexyɨch ɨɨch nguexyöyp jayɨjp ma miich. Jeꞌ yajꞌoyɨ̈huɨp je jäy yjot yhuinmaꞌñ mɨɨd ɨɨch ycɨxpɨ, tɨm jaduꞌn nipaady nej jɨhuɨ̈y jäy tüꞌaa yajꞌoyɨ̈y co rey ymiinaꞌñ.
\m 
\v 11 Co yɨ jäy ajcxy huɨdibɨ tɨ chɨnaaygɨxy ixtɨ chambaad ni pɨn tɨ caꞌ yajpaady mɨj jaduꞌn nej Juan je Bautista; per pɨnjaty ɨɨch xymɨbɨjcp, yɨꞌ jac mɨj naxam ma Dios yꞌaneꞌmy caꞌydɨ Juan.
\p
\v 12 Maabɨ Juan je Bautista ytundɨgɨ̈y, ixtɨ chamnɨ janch mayjäy amumdügjot ñejhuɨ̈huaꞌñ Dios yꞌayuc, jeꞌ co ajcxy ytɨgɨ̈huaꞌñ ma Dios yꞌaneꞌmy.
\v 13 Tügꞌócɨy ajcxy je Dios yꞌayucnajtzcapxɨɨybɨ etz Moisés ycötujcɨn ñigapxy ajcxy je anéꞌmɨn ixtɨ coonɨ Juan oy ymiñ.
\v 14 Pen miich ajcxy mɨbɨjcpy Moisés ycötujcɨn etz Dios yꞌayucnajtzcapxɨɨybɨ ajcxy, Juan je Bautista jeꞌ jeꞌ je Elías huɨdibɨ anajty miinamb.
\v 15 Pɨnjaty mɨdoꞌn mɨɨd huen mɨdoꞌmbɨgɨpy ɨɨch nꞌayuc.
\p
\v 16 Jesús yjacmɨnañ:
\p
―¿Pɨn mɨɨd nꞌocyajtügɨ̈huɨbyɨch yɨ jäy huɨdi ajcxy cham tzɨnaayb? Tɨm jaduꞌn yɨꞌ ajcxy nej piꞌctɨjc huɨdibɨ ajcxy ɨyɨɨyb ma mayjäy yjuygɨxy ytooccɨxy, mɨyaaxcɨxy mɨdɨnaaygɨxy ymɨgügtɨjc:
\v 17 “Tɨ njayajxüxyɨch flauta e ni caꞌ tɨ mꞌejtzcɨxy; tɨ ɨɨch ajcxy öcpɨ njahuinyäxɨch, e miich ajcxy caꞌ tɨ myäxy.”
\v 18 Chi Juan, je Bautista, anajty miiñ, e jeꞌ caꞌ ycay yꞌügy. E miich ajcxy mɨnaangɨxy co Juan caꞌoybɨ ymɨɨdɨty. Jada piꞌcꞌanäctɨjc nipaady nej miich ajcxy.
\v 19 Chi ɨɨch jeꞌ je jäy huɨdibɨ tzoon tzajpjoty nmiiñɨch, e caaybɨch uucpɨch, e miich ajcxy mɨnaangɨxy: “Ijxcɨx, cha tüg yëydɨjc, janch cax janch vinoꞌucp huɨdibɨ mɨgügꞌajtpy yajcuejtpɨdɨjc etz pocyjäydɨjc.” Je Dios tɨyꞌajt ji jeꞌ ñiguëxɨ̈gy.
\s Je cajp huɨdibɨ caꞌ ycapxymɨdoogɨxy
\p
\v 20 Chi Jesús ojcoty je maygajpjäy ma anajty may mɨjhuinmaꞌñ tɨ tuñ, com je mayjäy caꞌ anajty yjothuimbidaangɨxy ma Dios. Chi Jesús ymɨnañ:
\p
\v 21 ―¡Ay miich ayoob ajcxy huɨdibɨ tzɨnaayb jɨm Corazín! ¡Ay miich ayoob ajcxy huɨdibɨ tzɨnaayb jɨm Betsaida! Co ixyipy ɨɨch tɨ nduñɨch jecyꞌajty je mɨjhuinmaꞌñ mɨjtzögꞌajtɨn ma je Tiro etz Sidón cajp, jaduꞌn nej ɨɨch tɨ nduñɨch ma miich ajcxy, tɨ ixyipy je Tiro jäy etz Sidón jäy nijothuimbijtcɨxy etz ɨñaaygɨxy saco nïjen nïcuyjam ixcuyjam, jeꞌ je tɨyꞌajt co ooy ytajcɨxy ymaygɨxy mɨɨd ypocy ycɨxpɨ.
\v 22 Paady miich ajcxy yam nɨmaaygɨxy. Co anajty Dios tɨydunaꞌñ je naaxhuiñybɨ jäy, huinꞌit miich ajcxy Dios xychaachytunaꞌñ jac nïgɨ, caꞌydɨ je jäy ajcxy huɨdibɨ jecyꞌajty tzɨnay jɨm Tiro etz Sidón.
\p
\v 23 Miich ajcxy, Capernaum jäy, mnaybɨdáacɨgɨxy jaduꞌn nej jɨhuɨ̈y mdɨgɨ̈huaangɨxy jiiby tzajpjoty. Per caꞌ yjaduꞌnɨty. Mdɨgɨ̈huam miich ajcxy ayoodactuuby. Ayoꞌn tzaachypɨ mbadaangɨxy. Co ixyipy ɨɨch tɨ nduñɨch jecyꞌajty je mɨjhuinmaꞌñ mɨj tzögꞌajtɨn ma Sodoma cajp, jaduꞌn nej tɨ nduñɨch ma miich ajcxy mgajp, chambaad ixyipy ity yɨ jaduꞌmbɨ cajp, caꞌ ixyipy Dios cayajtɨgooy.
\v 24 Paady ɨɨch miich yam nɨmaaygɨxy. Co anajty Dios tɨydunaꞌñ je naaxhuiñyjäy, huinꞌit miich ajcxy myajtzaachytunaꞌñ jac nïgɨ, caꞌydɨ je jäy huɨdibɨ jecyꞌajty tzɨnay ma Sodoma ñaaxjot.
\s Mingɨxy ma ɨɨch e mbóocxcɨxɨpy
\p
\v 25 Chi Jesús ytɨgɨɨy Dios mɨbɨjctzooyb, ymɨnañ: 
\p
―Dios Teedy, ɨɨch miich nꞌɨɨbaatpɨch ngapxpaatpɨch. Miich mɨɨd je mɨj cötujcɨn jiiby tzajpjoty etz ya naaxhuiñ. Com miich tɨ mnajtzcapxɨy yɨ mꞌixpɨjcɨn ma je ayoobtɨjc huɨdibɨ tzɨnaayb jotxeemy, e tɨ myüch yɨ mꞌixpɨjcɨn ma yɨ ixpɨcytɨjc cohuinmaꞌñydɨjc.
\v 26 Jaduꞌn, Tat, tɨ mduñ, com jaduꞌn miich tɨ mdzocy tɨ mjäygɨdägy.
\p
\v 27 Jesús yjacmɨnañ:
\p
―Ɨɨch nDeedy tɨ xyajcɨ̈dɨgɨydäyɨch tügꞌócɨy mɨcꞌajt oyꞌajt. Ni pɨn caꞌ ijxcapy pɨn jeꞌ yꞌung, jëyɨ nDeedyɨch tügpajc. Ni pɨn caꞌ ijxcapy pɨn jeꞌ nDeedyꞌájtpyɨch, jëyɨ ɨɨch, je Dios yꞌung tügpajc, etz jacjadyii huɨdibɨ ɨɨch, je Dios yꞌung, nyajniguëxɨ̈gamyɨch.
\v 28 Min ma ɨɨch nidügꞌócɨy miich ajcxy huɨdijaty taj mayb myajpatp ma mjot mhuinmaꞌñ, ɨɨch miich ajcxy nmöhuamyb jotcujcꞌajtɨn.
\v 29 Cöbɨc miich ajcxy ɨɨch nꞌaneꞌmɨn ɨɨch ngötujcɨn, jaduꞌn nej huaj yuub ajcxy cöbɨcy ycögɨꞌ. Ijxpɨc ajcxy ɨɨch ndɨyꞌajt etz cuydun ɨɨch nꞌayuc, com ɨɨch nmɨɨdɨch mecxtujcɨn etz caꞌ ɨɨch amɨj agɨx nayjɨhuɨ̈yiijɨch.
\v 30 Caꞌ ɨɨch nꞌaneꞌmɨn ymɨcɨty, e ɨɨch ndung caꞌ nimɨjaajɨty.
\c 12
\s Je discípulos ajcxy moc cojc yajmujcp pocxxɨɨduum
\p
\v 1 Chi tüg xɨɨ Jesús yhuɨdity mɨɨd ymɨgügtɨjc ma tüg camjot. E hueꞌ anajty sábado xɨɨ, je poocxɨn xɨɨ. Chi Jesús ydiscípulos ajcxy oy anajty yubögyii. Chi ajcxy ytɨgɨɨy trigo tɨɨm nïxajtztutp etz yjɨɨcxy ajcxy je ypajc.
\v 2 E co je fariseos ajcxy ijxy nej Jesús ydiscípulos ajcxy yꞌɨdɨɨtzcɨxy, chi ajcxy nɨmay Jesús: 
\p
―Ocꞌix nej miich mdiscípulos ajcxy yꞌɨdɨ̈ch. Hueꞌ ajcxy tumyb huɨdibɨ caꞌ huaad ma sábado xɨɨ yajtuñ.
\p
\v 3 Per Jesús mɨnañ:
\p
―¿Nej caꞌ miich ajcxy mgapxyñɨ ma Dios ñecy, jaduꞌn nej David etz ymɨgügtɨjc ajcxy ɨdɨ̈ch jecyꞌajty co yuböccotɨ?
\v 4 Pues yɨꞌ ajcxy tɨgɨɨy ma Dios ytɨjc. Chi cay ajcxy je tzajcaagy huɨdibɨ anajty jäy ajcxy tɨ yajhuindzɨgɨ̈y Dios. Jeꞌ je tzajcaagy huɨdibɨ teedy ajcxy anajty paatɨp cayɨpy.
\v 5 ¿Nej caꞌ miich ajcxy tɨ mgapxyñɨ Moisés ycötujcɨn necy co je teedy ajcxy jëbɨ ytuñ ma Dios ytɨjc sábado xɨɨ, e caꞌ nan tundɨgooyb jeꞌ ajcxy?
\p
\v 6 Ɨɨch miich ajcxy nɨmaaygɨxyp, jac nïgɨ mɨj cötújcɨn nmɨ́ɨdɨdyɨch, caꞌydɨ je cötujcɨn huɨdibɨ je teedy ajcxy yajtuñ ma Dios ytɨjc.
\v 7 Pen miich ajcxy tɨ mhuinjɨhuɨ̈y nej yhuimbɨdzɨmy jada Dios yꞌayuc, co Dios jaduꞌn ymɨnañ: “Ɨɨch ndzojcpy co miich ajcxy mɨɨdꞌidɨpy paꞌayoꞌn caꞌydɨ co ajcxy myegɨpy huindzɨgɨꞌñ.” Pen miich ajcxy tɨ mhuinjɨhuɨ̈y jada ayuc, caꞌ ixyipy mbocyꞌixy ma ɨɨch nmɨgügtɨjc huɨdibɨ caꞌ ma tɨ ytundɨgooy.
\v 8 Ɨɨch, je jäy huɨdibɨ tzoon tzajpjoty, nmɨɨdɨch aneꞌmɨn, jaydëbɨ nɨmäyɨch je jäy ajcxy ti jëbɨ tungɨxy sábado xɨɨ.
\s Je yëydɨjc huɨdiibɨ anajty ycɨ̈tɨ̈dzɨp
\p
\v 9 Chi Jesús choñ jɨm, ñɨcxy ma je judíojäy ñaymujctac.
\v 10 E jiiby ma je naymujctac anajty tüg yëydɨjc huɨdibɨ ycɨ̈tɨ̈tz. Je fariseo ajcxy xɨ̈huamyb Jesús, paady ajcxy yꞌamɨdooy, ymɨnañ:
\p
―¿Nej jëbɨ tüg paꞌmjäy chögy sábado xɨɨjɨ?
\p
\v 11 Chi Jesús yꞌadzooy:
\p
―Pen ya ma miich ajcxy ji tüg jäy huɨdibɨ cöbixy yjutcögäy sábado xɨɨ, ¿nej caꞌ jeꞌ nɨcxy yajpɨdzɨmy mɨcꞌamy?
\v 12 Nïgɨ tzobaatp tüg yëydɨjc caꞌydɨ tüg cöbixy, paady Moisés ycötujcɨn caꞌ capxꞌaducy co tüg oyꞌajtɨn nduunɨm sábado xɨɨ, je poocxɨn xɨɨ.
\p
\v 13 Chi Jesús nɨmay je yëydɨjc:
\p
―Xajtɨu yɨ mgɨꞌ.
\p
\v 14 Co xajtɨɨy ycɨꞌ, chi choocy, e huɨꞌmy quipxyjaty mɨɨd je ycɨꞌ oybɨ. Chi je fariseos ajcxy yjotmätcoty, yhuinmaꞌñ ixtaaygɨxy ajcxy nej huaad Jesús ocyajꞌoꞌccɨxy.
\s Tüg ayucnajtzcapxɨɨyɨn mɨɨd Jesús ycɨxpɨ
\p
\v 15 E co Jesús nejhuɨɨy nej yɨꞌ ajcxy yhuinmaꞌñ mɨɨdɨty, chi jɨm choñ. E ooy mayjäy ypanɨcxɨ Jesús, Jesús yajtzoocpy anajty tügꞌócɨy pɨnjaty paꞌm mɨɨd.
\v 16 Jesús aneꞌmy je paꞌmjäy ajcxy co caꞌ huaad nigapxy nimɨydägy co yɨꞌ jeꞌ je Cristo.
\v 17 Jaduꞌn Jesús aneꞌmy je paꞌmjäy jɨgɨx ycɨxɨpy ycáꞌpxɨpy je ayuc huɨdibɨ je profeta Isaías yjaay jecyꞌajty, co Dios jaduꞌn ymɨnañ:
\q 
\v 18 Jada jeꞌ ɨɨch ndumbɨ huɨdɨ tɨ nhuinꞌixyɨch. Yɨꞌ ɨɨch ooy ndzocyɨch njɨhuɨ̈yɨch etz ooy njotcujcɨch mɨɨd yɨꞌ. Ɨɨch yɨꞌ nmöhuamybɨch ɨɨch njɨhuɨꞌñ mɨcꞌajt. Yɨꞌ capxhuäcxɨp ɨɨch nꞌayuc jaduꞌn nej ndzaachytunaꞌñɨch naaxhuiñyjäy ajcxy mɨɨd ajcxy ypocy ycɨxpɨ.
\q 
\v 19 Yɨꞌ ni ymɨgügtɨjc caꞌ ojaꞌñ, ni ycayäxaꞌñ, ni ycatɨnähuaꞌñ, ni pɨn caꞌ mɨdoohuɨpy ma cajp cujc.
\q 
\v 20 Caꞌ yɨꞌ tzaachytunaꞌñ ayoobɨtɨjc etz huɨdibɨ ayoꞌndumb ijtp. Etz nañ ni caꞌ yajtɨgoyaꞌñ huɨdibɨ ayoobɨtɨjc ycoꞌögyꞌungdɨjc yjɨjpꞌijxpy. Jaduꞌn nej jäy cayajhuindɨgoy tzajcapy huɨdi huiidyɨp etz ni cayajpïch je mecha huɨdibɨ uuxy uuxy tɨɨcxp. Ixtɨ mabaad anajty yajcopɨcy yꞌaneꞌmɨn tudägypɨ.
\q 
\v 21 E yɨꞌ mayjäy ooy yjɨjpꞌixaꞌñyii.
\s Xɨ̈gɨxy Jesús co mɨɨdɨty mujcuꞌ ymɨcꞌajt
\p
\v 22 Chi mɨɨd miiñ ajcxy ma Jesús tüg jäy huɨdibɨ huintzɨp etz uum. Jeꞌ anajty mɨɨd caꞌoybɨ. Chi Jesús yajtzoogy, e chi yꞌijxɨ̈gy etz ycapxɨ̈gy.
\v 23 Co Jesús jaduꞌn tuñ, chi je mayjäy ytɨgɨɨy huinmayꞌahuɨdijt, chi ajcxy ymɨnañ:
\p
―¿Nej jada jeꞌ, je David yꞌap yꞌoc huɨdibɨ reyꞌadam?
\p
\v 24 Per co je fariseos ajcxy nejhuɨy nej je jäy huinmay, chi ajcxy ymɨnañ:
\p
―Jadaabɨ yëydɨjc yajpɨdzɨmy caꞌoybɨ mɨɨd je mujcuꞌ huindzɨn ymɨcꞌajt (caꞌ yɨꞌ yjëjɨty je Cristo).
\p
\v 25 Per Jesús ñejhuɨɨyb anajty ti je fariseos ajcxy yhuinmaayb, chi ymɨnañ:
\p
―Pen tügpɨcy tungmɨɨdpɨ ixyipy ñaybɨjc-huäcxɨgɨxy, etz ñaymɨdziptzóonɨgɨxy ixyipy ac jëyɨ, pues cɨxɨpy yɨꞌ ajcxy yꞌaneꞌmɨn. Pen tüg cajp o tügpɨcy jugymɨgüg ixyipy ñaybɨjc-huäcxɨgɨxy, pues caꞌ ajcxy yꞌidaangɨxy tügmucy.
\v 26 Pen Satanás, je caꞌoybɨ huindzɨn, yajpɨdzɨmy ixyipy caꞌoybɨ ma je jäy ajcxy, chi cɨꞌm ixyipy je caꞌoybɨ tɨ ñaybɨjc-huäcxɨgɨxy, e je Satanás ymɨcꞌajt caꞌ yꞌidaꞌñ.
\v 27 Miich ajcxy mɨnamb co ɨɨch nyajpɨdzɨmyɨch caꞌoybɨ mɨɨd je caꞌoybɨ huindzɨn, je Beelzebú ymɨcꞌajt. Pen tɨyꞌajt jaduꞌn nej miich ajcxy mɨnaꞌñ, je jäy ajcxy huɨdibɨ xymɨjnɨcxpejt miich ajcxy, ¿nej yɨꞌ ajcxy paady mɨcꞌajt ma je mujcuꞌ co ajcxy yajpɨdzɨmy caꞌoybɨ ma je paꞌm jäy? Pues caꞌ, paady yɨꞌ ajcxy tɨyꞌajt yejcp co miich ajcxy tɨ mgapxtɨgoy co ymɨnaangɨxy co ɨɨch nyajpɨdzɨmyɨch caꞌoybɨ mɨɨd Satanás ymɨcꞌajt.
\v 28 Per ɨɨch nyajpɨdzɨmyɨch caꞌoybɨ ma paꞌmjäy mɨɨd Dios yjɨhuɨꞌñ ymɨcꞌajt. Paady miich ajcxy nejhuɨɨyb co tɨ ymiiñ yjäty je Dios yꞌaneꞌmɨn ma miich ajcxy.
\p
\v 29 (Dios ycötujcɨn jac mɨc caꞌydɨ je caꞌoybɨ ycötujcɨn, paady jëbɨ nyajpɨdzɨmyɨch caꞌoybɨ.) ¿Nej jëbɨ tüg jäy ytɨgɨɨy ma tüg mɨcpɨ jäy ytɨjc etz pɨgaanɨ tijaty yɨꞌ ymɨɨd, pen caꞌ jayɨjp ycɨꞌ ytecy xojtzɨty? Pues caꞌ. Coonɨ jayɨjp ycɨꞌ ytecy xojtzɨty, huinꞌit jëb pɨjcɨp tɨjaty ymɨɨd.
\v 30 Pɨnjaty caꞌ xymɨjnɨcxpetyɨch, xymɨdzipɨch yɨꞌ. Pɨnjaty caꞌ tuñ mɨɨd ɨɨch co jäy nyajꞌixpɨcyɨch, hueꞌ jeꞌ ajcxy jäy yajhuinmaꞌñydɨgooyb.
\p
\v 31 Janch ɨɨch miich ajcxy nɨmäy co Dios jëbɨ huinmecxɨp tügꞌócɨy pocy huɨdibɨ jäy ytungɨxp etz tügꞌócɨy jɨbɨcpɨ huɨdibɨ jäy ycapxcɨxp. Jëyɨ janchtɨy co pɨnjaty capxtɨgooyb mɨɨd je Espíritu Santo, je Dios yjɨhuɨꞌñ ymɨcꞌajt, caꞌ Dios huinmecxɨp nimɨna.
\v 32 Pɨnjaty jɨbɨc xyñigapxpɨch xyñimɨydacpɨch, jeꞌ huinmecxam. Per je huɨdibɨ jɨbɨc ñigapxpy je Espíritu Santo, jeꞌ caꞌ huinmecxaꞌñ ni jadachambɨ tiempo, etz ni camɨna xɨɨ.
\s Yɨ quipy yɨꞌ ytɨɨm yɨꞌ mɨɨd yajꞌijxcapy
\p
\v 33 Pen miich ajcxy mnejhuɨ̈huamy je quipy pen oy quipy, o pen caꞌ, jëbɨ mnejhuɨ̈huɨpy co je quipy nɨcxy ytɨɨmꞌaty. Pen oy je ytɨɨm, miich mɨnaꞌnɨp co oy je quipy. E pen caꞌ oy ytɨɨmꞌaty, huinꞌit miich ajcxy mɨnaꞌnɨp co caꞌ yꞌoyɨty je quipy.
\v 34 Jɨbɨc jäy miich ajcxy, jaduꞌn nipaady nej jɨhuɨ̈y ahuaꞌn ɨyujc xyꞌungꞌajtp. Pen miich ajcxy jɨbɨc jäyꞌajtp, ¿nej jëbɨ miich ajcxy oybɨ ayuc mgapxɨpy? Jaduꞌn nej jäy ajcxy yjot yhuinmaꞌñ mɨɨdɨty, ac tɨm jaduꞌn ajcxy ycapxy.
\v 35 Je jäy huɨdibɨ oy ayuc ycapxpy, ymɨɨd oyjot oyhuinmaꞌñ paady oy ayuc capxy. Je jäy huɨdibɨ jɨbɨc ayuc capxp, ymɨɨd jɨbɨc jot jɨbɨc huinmaꞌñ, paady jɨbɨc ayuc capxy.
\v 36 Ɨɨch miich ajcxy nɨmay co anajty paady je xɨɨ je tiempo mɨna Dios tɨydunaꞌñ je naaxhuiñyjäy, huinꞌit ajcxy yꞌadzohuɨpy mɨɨd huen tɨm huɨdibɨ ayuc huɨdibɨ anajty ajcxy tɨ mgapxy.
\v 37 Com nejjaty miich anajty ajcxy tɨ mgapxy je mꞌayuc jaduꞌn miich ajcxy Dios xytɨydunɨp. Com mɨɨd yɨ mgɨꞌm ayuc yɨꞌ mɨɨd mꞌoybɨdzɨmɨpy mhuätzpɨdzɨmɨpy. E nañ jaduꞌn mɨɨd yɨ mgɨꞌm ayuc yɨꞌ mɨɨd mbocycähuɨpy.
\s Jɨbɨcjäydɨjc ajcxy pɨjctzoogɨxy tüg ijxpejt mɨjhuinmaꞌñybɨ
\p
\v 38 Chi nijëjɨty fariseos ajcxy etz escribas ajcxy Jesús nɨmayɨ:
\p
―Huindzɨn, nꞌixamy ɨɨch ajcxy miich tüg mꞌijxpejt.
\p
\v 39 Chi Jesús yꞌadzooy:
\p
―Yɨ jɨbɨc jäydɨjc ajcxy etz ajcxy huɨdibɨ caꞌ mɨbɨgaꞌñ Dios ypɨjctzooyb tüg ijxpejt huɨdibɨ tzomb tzajpjoty. Per Dios caꞌ yegaꞌñ jadüg ijxpejt. Tɨ Dios yecy tüg ijxpejt ma Jonás.
\v 40 Com jaduꞌn nej Jonás jecyꞌajty ijxpejt yejcy co yꞌijty tugɨɨg xɨɨ tugɨɨg tzuum mejyjoty ma acx ymoxac, nañ tɨm jaduꞌn ɨɨch, je jäy huɨdibɨ tzoon tzajpjoty, nyegamy ijxpejt jadachambɨ tiempo co nꞌidɨpyɨch tugɨɨg xɨɨm etz tugɨɨg tzuum  naaxjoty.
\v 41 Je mayjäy huɨdibɨ anajty tzɨnaayb ma Nínive cajp, tɨ jothuimbijtcɨxy etz tɨ ixmach ajcxy huɨdijaty jɨbɨcpɨ ajcxy ytumyb co Jonás capxhuäcxy Dios yꞌayuc ma yɨꞌ ajcxy. Cha ɨɨch ngapxhuäcxyɨch Dios yꞌayuc ma miich ajcxy, etz jac nïgɨ cötujcɨn nmɨɨdɨdyɨch, caꞌydɨ Jonás; e caꞌ miich ajcxy mjothuimbity. Paady co anajty Dios tɨydunaꞌñ je naaxhuiñyjäy, je Nínive jäy miich ajcxy xyajpocycähuam.
\v 42 Nañ jaduꞌn je töxyjäy reina huɨdibɨ tzɨnay jecyꞌajty ma madzaꞌcruudz ypɨdzɨmy, yɨꞌ jeꞌ xɨ̈dähuam je jäy ajcxy huɨdibɨ tzɨnaayb jadachambɨ tiempo, etz yajpocycähuɨɨb ajcxy. Je reina tzoon jɨguëgy nɨcxy co amɨdoꞌidaꞌñ je rey Salomón ma capxhuäcxɨ Dios yꞌayuc. Ji naaxhuiñ jadachambɨ tüg Dios ytɨyꞌajtmɨɨdpɨ jac nïgɨ ymɨjɨty, caꞌydɨ Salomón anajty, e caꞌ je jäy ajcxy mɨjpɨdägaꞌñ.
\s Je jɨbɨc espíritu co jadügꞌoc yhuimbity
\p
\v 43-44 Yɨ jäy ajcxy huɨdibɨ cham tzɨnaayb, quipxyjaty ajcxy mɨɨd je caꞌoybɨ. Co je caꞌoybɨ ypɨdzɨmy ma je jäy, chi jeꞌ ñɨcxy jɨm mɨjtɨgɨ̈duum yꞌijxtacy. Co caꞌ paty ypocxtac, huinꞌit ymɨnaꞌñ: “Huimbidaambɨch ma je jäy yjot yhuinmaꞌñ ma ɨɨch tɨ nꞌoctzombɨ.” Co je caꞌoybɨ yjäty ma anajty tɨ chɨnäy, chi paty je jäy yjot yhuinmaꞌñ ooy yhuätzɨty etz yajxon ypedɨ̈gɨty oy oyduñ.
\v 45 Chi je caꞌoybɨ ñɨcxy oy yajtzooñ jahuɨxtujc caꞌoybɨ jac jɨbɨcpɨ caꞌydɨ jeꞌ. Chi ajcxy ytɨgɨɨy ma je jäy yjot yhuinmaꞌñ, e chɨnay ajcxy jiiby. Huinꞌit je jäy jacꞌöctɨy oy yjajtnɨ, caꞌydɨ jaduꞌn nej anajty jayɨjpꞌaty.
\s Jesús ytaj etz yꞌuch mɨguëx ajcxy
\p
\v 46 Jesús yajꞌixpɨjcpy anajty je mayjäy, co oy yjaꞌty jeꞌ ytaj etz yꞌuch mɨguëx ajcxy. Hueꞌ ajcxy yhuɨꞌmy tɨbaꞌy. Jeꞌ ajcxy anajty ymɨgapxamy Jesús.
\v 47 Chi jäy yajnɨmay Jesús:
\p
―Yɨ mdaj etz mꞌuch mɨguëx ajcxy, chiiby ajcxy tɨbaꞌy, miich xyjamɨgapxamb.
\p
\v 48 Jesús yꞌadzooy, nɨmay je jäy huɨdibɨ ytaj yꞌayuc yajnajxɨ ma yɨꞌ:
\p
―¿Pɨn jäy miich ajcxy mdijy co ɨɨch ndajꞌadyii etz ɨɨch nꞌuchꞌadyii nmɨgügꞌadyii?
\p
\v 49 Huinꞌit Jesús nitziihuɨɨy jeꞌ ydiscípulos ajcxy e ymɨnañ:
\p
―Jada ɨɨch ndiscípulos ajcxy jaduꞌn nipaady nej ɨɨch ndaj etz ɨɨch nꞌuch nmɨguëx.
\v 50 Huen ytɨmpɨnɨty huɨdibɨ ytumyb ɨɨch nDeedy chojcɨn, huɨdibɨ jiiby tzajpjoty, pues jaduꞌn yɨꞌ ajcxy nipaady nej ɨɨch ndaj etz ɨɨch nꞌuch mɨguëx.
\c 13
\s Je ayuccapxhuäcxpɨ yꞌijxpejt (niipɨ ijxpejt)
\p
\v 1 Je huinꞌit xɨɨ Jesús choñ ma je tɨjc. Chi ñɨcxy ma je mejypaꞌ jɨm oy yꞌɨñayꞌɨhuɨ̈y.
\v 2 E co mayjäy ooy ñaymujcɨ jɨm ma anajty Jesús ɨñay, chi Jesús ytɨgɨy barcojoty. Per tügꞌócɨy je mayjäy yhuɨꞌmday ma mejypaꞌ.
\v 3 Jesús ytɨgɨɨy jäy yajꞌixpɨjcp mɨɨd jɨhuimbit ayuc, ymɨnañ:
\p
―Tüg jäy chooñ trigotɨɨm huɨjp.
\v 4 E ma anajty jɨm ytɨɨmhuɨjy, huinꞌit je ytɨɨm oy naagɨty ycäy ma tüꞌaa. Chi jadaꞌ je joon ajcxy oy ymiiñ etz ypiihuɨ̈gy je tɨɨm.
\v 5 Nijëjɨty ytɨɨm ycäy ma tzaanïcx ma anajty hueenɨ naax. Jada tɨɨm tzojc ymujxy.
\v 6 Com hueenɨ anajty je naax ma je tzaanïcx, chi co oy xɨɨꞌan ypadyii, chi ytɨɨtztay, com caꞌ anajty je ytictz yeegɨty.
\v 7 Nijëjɨty tɨɨm oy ycäy ma ujtzꞌaayjot ma apyjot, e ujtzꞌöctay je trigo mang.
\v 8 Per je tɨɨm huɨdibɨ caꞌu ma oy ñaax, jeꞌ yon yajxon e tɨɨmꞌajt mayꞌamy; tüg ypiꞌcpajc iipxmajc oy ycoꞌity, jadüg piꞌcpajc tugɨꞌpx oy ycoꞌity, jadüg piꞌcpajc mɨgoꞌpx oy ycoꞌity.
\v 9 Pinjaty mɨdoꞌn mɨɨd huen mɨdoꞌmbɨcy jada ayuc.
\s Ti ycɨxpɨ je ijxpejt
\p
\v 10 Chi jeꞌ ydiscípulos ajcxy nimɨjhuaꞌcy Jesús, chi ajcxy yajtɨɨy:
\p
―¿Naꞌamy co myajtuñ jɨhuimbit ayuc co myajꞌixpɨcy je mayjäy?
\p
\v 11 Chi Jesús yꞌadzooy, ymɨnañ:
\p
―Miich ajcxy jaydëb mnejhuɨ̈huɨpy huɨdibɨ Dios ñigapxyp ñimɨydacpy coyüchꞌamy ma yꞌaneꞌmɨn. Jacjadyii jäy caꞌ ajcxy huinjɨhuɨ̈huɨpy.
\v 12 Pɨnjaty ymɨɨd yajmöhuɨp nïgɨ, pɨnjaty hueen mɨɨd yajpɨgɨpy nïgɨ, oy ixyipy hueen jadɨm mɨɨdɨty.
\v 13 Paady jɨhuimbitꞌamy nyajnɨmaayɨch; jaydëbɨ pɨnjaty ijxcɨxy, ñipatpy nejɨhuɨ̈y caꞌ tɨ ijxcɨxy; etz co ajcxy mɨdoogɨxy, caꞌ ajcxy huinjɨhuɨ̈y, ñipatpy nejɨhuɨ̈y caꞌ tɨ mɨdoogɨxy.
\v 14 Jadayaabɨ ytunyii yjadyii jaduꞌn nej je profeta Isaías jaaybejty yajhuɨꞌmy ma jaduꞌn ymɨnañ:
\q Miich ajcxy mɨdohuamy, per caꞌ mhuinjɨhuɨ̈huangɨxy. Miich ajcxy mꞌixamy, nañ caꞌ mhuinjɨhuɨ̈huaangɨxy huɨdibɨ tɨ mꞌijxcɨxy.
\q 
\v 15 Com jadayaabɨ jäy ooy ajcxy yjot yhuinmaꞌñ tɨ yꞌahuimbity juuñ. Nej ajcxy yjamɨdoy, caꞌ ajcxy ymɨdohuɨꞌmgɨxy. Nej ajcxy jaꞌixy, caꞌ yꞌijxhuɨꞌmgɨxy. Nej ajcxy yjahuinjɨhuɨɨygɨxy, per caꞌ yhuinjɨhuɨ̈y ma yjot yhuinmaꞌñ. Yɨꞌ ajcxy caꞌ yjothuimbidaangɨxy ma ɨɨch, jaydëb nyajnïdzögɨbɨch ajcxy.
\p
\v 16 Per jotcujc miich ajcxy, co miich ajcxy ijxhuɨꞌmy mɨɨd mhuiin huɨdibɨ ndumybɨch, e mmɨdoꞌmbɨcy ajcxy ɨɨch nꞌayuc.
\v 17 Janch tɨyꞌajt jaduꞌn nej ɨɨch miich nɨmaaygɨxy. Janch tɨyꞌajt co may profetas ajcxy etz tudägy jäy ajcxy huɨdibɨ tzɨnaayb jecyꞌajty, ooy ajcxy jaꞌixañ huɨdibɨ miich ajcxy mꞌijxyp cham, per caꞌ ajcxy ixy. E ooy ajcxy jamɨdohuañ je ayuc huɨdibɨ miich ajcxy mɨdooyb cham, per caꞌ ajcxy mɨdoy.
\s Jesús najtzcapxɨ̈y je ijxpejt ma je niipɨ
\p
\v 18 Amɨdoꞌit miich ajcxy, jaduꞌn nej yhuimbɨdzɨmy jada jɨhuimbit ayuc maabɨ je tɨɨm huɨjpɨ.
\v 19 Je jäy ajcxy huɨdibɨ amɨdoꞌijtp Dios yꞌayuc, e mɨcꞌamy je caꞌoybɨ yajpɨdzɨmy Dios yꞌayuc ma ajcxy yjot yhuinmaꞌñ, jaduꞌn ajcxy nipaady nej trigo tɨɨm huɨdibɨ cäb tügujc, e je joon ajcxy mɨcꞌamy ypiimujctay.
\v 20-21 Je jäy ajcxy huɨdibɨ amɨdoꞌijtp Dios yꞌayuc janch jotcujc, per co agapxɨɨyb paady, co tzaachypɨ mɨnaxy yajnaxy mɨɨd Dios yꞌayuc ycɨxpɨ, chi mɨcꞌamy ajcxy ixmajtznɨ Dios yꞌayuc, jaduꞌn ajcxy nej je trigotɨɨm huɨdibɨ tɨ ycäy ma tzaanïcx, huɨdibɨ caꞌ oy ytictz mɨɨdɨty.
\v 22 Je jäy ajcxy huɨdibɨ amɨdoꞌijtp Dios yꞌayuc, e co ñɨcxnɨ, chi jäydɨgooyñɨ Dios yꞌayuc mɨɨd jotcujcꞌajtɨn tzɨnaayɨn, comeeñꞌajtɨn etz adzojcɨn. Jaduꞌn ajcxy nipaady nej trigotɨɨm huɨdibɨ tɨ ycäy ujtzjoty, e caꞌ ytɨɨmꞌaty mɨɨd co oy yꞌujtzꞌögy.
\v 23 Je jäy ajcxy huɨdibɨ amɨdoꞌijtp etz cöbɨjcp yajxon Dios yꞌayuc amumdügjot etz Dios yꞌayuc ytumyb ma ajcxy yjot yhuinmaꞌñ, jaduꞌn ajcxy nipaady nej je tɨɨm huɨdibɨ tɨ ycäy ma oy ñaax etz tɨ ytɨɨmꞌaty mayꞌamy. Tüg piꞌcpajc iipx majc oy ycoꞌity, etz jadüg piꞌcpajc tugɨꞌpx oy ycoꞌity, etz jadüg piꞌcpajc mɨgoꞌpx oy ycoꞌity.
\s Je ijxpejt co je jɨbɨc ujtz ymuxy ma je trigo cam
\p
\v 24 Chi Jesús yajꞌixpɨjcy jadüg jɨhuimbit ayuc, ymɨnañ:
\p
―Je Dios yꞌaneꞌmɨn jaduꞌn nipaady nej tüg yëydɨjc huɨdibɨ trigo tɨɨm huɨjp ma jeꞌ ycam.
\v 25 Per co ajcxy ymaꞌöctay nidügꞌócɨy je cogam, chi ytɨgɨɨy tüg ymɨdzip ma je ycamjot. Chi je mɨdzip jɨbɨc ujtz tɨɨm oy huɨjy ma je trigo cam. Chi ñɨcxñɨ.
\v 26 E co je trigo oy yooñ, chi ypɨjy. Nañ jaduꞌn je jɨbɨc ujtz oy yooñ.
\v 27 Chi je ytumbɨdɨjc oy yhuindzɨn yajnɨmay: “Huindzɨn, ¿nej caꞌ tɨ mnïpy ac trigotɨɨm? ¿Nej co jɨm nañ jaduꞌn jɨbɨc ujtz yajpaady?” 
\v 28 Chi je cogam ymɨnañ: “Huen jadaꞌ nmɨdzipɨch jaduꞌn tɨ yꞌɨdɨ̈ch.” Chi je tumbɨdɨjc yꞌamɨdoohuɨ: “¿Nej mdzojcpy co ɨɨch ajcxy nhuijxɨ̈gɨbɨch je jɨbɨc ujtzɨ?”
\v 29 Chi je cogam ymɨnañ: “Caꞌ. Pen miich ajcxy mhuijxɨ̈cpy je jɨbɨc ujtz, caꞌ jecyɨty co mꞌahuijxmugɨpy nañ jaduꞌn je trigo.
\v 30 Ixmatz, huen je jɨbɨc ujtz yeegy tügmucy mɨɨd je trigo, ixtɨ coonɨ anajty ypɨdɨ̈gy je cosecha. Co cosecha paty, huinꞌit nguexaꞌñɨch je ndumbɨdɨjc co huen jayɨjp pujxɨ̈gy je jɨbɨc ujtz etz axotzɨpy etz nögɨpy. E co yajpɨdɨ̈ctay je jɨbɨc ujtz, chi yajpɨdɨ̈gɨpy je trigo e pɨdägɨpy ma je tzeꞌx.”
\s Je ijxpejt ma je mostazapajc 
\p
\v 31-32 Nañ jaduꞌn Jesús yajꞌixpɨjcy jadüg jɨhuimbit ayuc, ymɨnañ: 
\p
―Je Dios yꞌaneꞌmɨn jaduꞌn nipaady nej tüg mostazapajc huɨdibɨ tüg jäy ñiip ma jeꞌ ycam. E je mostaza ytɨɨm jeꞌ jac tɨm mutz caꞌydɨ ni huɨdibɨ ujtz tɨɨm. Per co je mostaza ytɨɨm ymujx etz yoñ, chi yꞌahuimbijty jac mɨj caꞌydɨ jacjadyii ujtz. E hueꞌ nɨcxy yjaty janch mɨj, ixtɨ joon ajcxy oy yqueec miiñ yqueec xɨjpy jɨm, pɨdägy je ypeꞌñ ma je mostaza yꞌaacx.
\s Je ijxpejt ma je levadura huɨdibɨ caꞌ yꞌoyɨty 
\p
\v 33 Nañ jaduꞌn Jesús yajꞌixpɨjc jadüg jɨhuimbit ayuc, ymɨnañ:
\p
―Je Dios yꞌaneꞌmɨn jaduꞌn nipaady nej levadura huɨdibɨ tüg töxyjäy ypɨdacpy mɨɨd je harina, jɨgɨx je harina oy ypɨdɨ̈gy.
\s Nej anajty Jesús yajtuñ je ijxpejt
\p
\v 34 Tügꞌócɨy Jesús yajꞌixpɨjc je mayjäy, jɨhuimbitꞌamy yajꞌixpɨjc, e ni ti caꞌ jäy yajꞌixpɨjcy cayajnɨmäy jɨhuimbit ayuc.
\v 35 Jaduꞌn Jesús ytuuñ, jɨgɨx yajcuyduñ je ayuc huɨdibɨ je profeta Isaías yjaayhuɨꞌm jecyꞌajty, co jaduꞌn ymɨnañ:
\q Ɨɨch ngapxamyɨch ac tɨm jɨhuimbit ayuc. Ɨɨch nigapxamybɨch tijaty huɨdibɨ caꞌ pɨn nejhuɨ̈y, mabaad Dios ogaꞌn yajcojy je naaxhuiñybɨ.
\s Jesús capxtɨcxnɨ nej yhuimbɨdzɨmy je jɨbɨc ujtz ma je trigo cam
\p
\v 36 Chi Jesús capxycɨjxy mɨɨd je mayjäy, chi ñɨcxy ma tüg tɨjc. Chi ytɨgɨy tɨgoty mɨɨd jeꞌ ydiscípulos ajcxy. Chi Jesús ydiscípulos ajcxy nimɨjhuaꞌcy Jesús, ymɨnañ ajcxy:
\p
―Tun mayꞌajt ɨɨch ajcxy xyajhuinjɨhuɨɨyg je jɨhuimbit ayuc co tɨ mnigapxy je jɨbɨc ujtz ma je trigo cam.
\p
\v 37 Chi Jesús yajnɨmay:
\p
―Ɨɨch, je jäy huɨdibɨ tzoon tzajpjoty, jaduꞌn ɨɨch nipaady nej je jäy huɨdibɨ niip je oybɨ tɨɨm ma je ycam.
\v 38 Je cam jaduꞌn nipaady nej tügꞌócɨy naaxhuiñyjäy. Je oybɨ tɨɨm jaduꞌn nipaady nej je jäy ajcxy huɨdibɨ cöbɨjcp Dios yꞌaneꞌmɨn. Je jɨbɨc ujtz jaduꞌn nipaady nej je jäy ajcxy huɨdibɨ cöbɨjcy ajcxy je mujcuꞌ yꞌaneꞌmɨn.
\v 39 Je jäy huɨdibɨ niipy je jɨbɨc ujtz, jaduꞌn yɨꞌ nipaady nej je caꞌoybɨ. Je jɨbɨc ujtz cosecha, jaduꞌn nipaady nej je tiempo co anajty je naaxhuiñ ycɨxy ytɨgoy. Je ajcxy huɨdibɨ yajpɨdɨ̈c je cosecha, nipaady nej je ángeles ajcxy.
\v 40 Jaduꞌn nej je jɨbɨc ujtz oy yajpujxɨ̈gy etz yajpɨdacy jɨɨnjoty, nañ tɨm jaduꞌn nɨcxy yjaty mɨɨd je jäy ajcxy huɨdibɨ cöbɨjcp je mujcuꞌ yꞌaneꞌmɨn co anajty je naaxhuiñ cɨxy ytɨgoy.
\v 41 Co anajty je naaxhuiñ ycɨxy ytɨgoy, chi ɨɨch, je jäy huɨdibɨ tzoon tzajpjoty, nguexamyɨch nꞌángeles huen yajmujctäy je jäy huɨdibɨ je ymɨgüg yajtundɨgooyb, etz yɨ huɨdibɨ ajcxy jɨbɨc-huinmaꞌñ tumb. 
\v 42 Co yajmujctähuɨpy je jɨbɨcjäydɨjc, chi ajcxy yajpɨdägɨpy mɨjjɨɨnjoty, jiiby ajcxy yäxaꞌñ etz ytɨɨtzmucxy ytɨɨtzqueecy mɨɨd je ayoꞌn ycɨxpɨ.
\v 43 Per je jäy ajcxy huɨdibɨ cuydumb Dios chojcɨn, idam ajcxy mɨɨd Dios Teedy jiiby tzajpjoty. Ymɨɨꞌidamy ajcxy tüg oyꞌajtɨ, jaduꞌn nipaadɨp nej je xɨɨ ytɨɨcxɨn yjajɨn. Pen miich ajcxy mɨdoꞌn mɨɨd, mɨdoꞌmbɨjc ajcxy ɨɨch nꞌayuc.
\s Je yꞌijxpejt je meeñ huɨdii yüchɨp
\p
\v 44 Je Dios yꞌaneꞌmɨn jaduꞌn nipaady nej meeñ huɨdibɨ yüch ijtp ma tüg cam. Per co tüg jäy paady je meeñ, chi mɨcꞌamy jadügꞌoc yüdz tɨgach. Chi ooy yxondägy. Chi ñɨcxy etz tooctäy tügꞌócɨy huɨdibɨ ymɨɨd etz juy je naax.
\s Je yꞌijxpejt je perla huɨdibɨ tzoohuɨp
\p
\v 45 Nañ jaduꞌn Dios yꞌaneꞌmɨn jaduꞌn nipaady nej tüg ajuuyb adoocpɨ huɨdibɨ ijxtaayb tüg oybɨ perla huɨdibɨ tzoobatp.
\v 46 E co anajty paady tüg perla huɨdibɨ janch tzou, chi ñɨcxy tooctɨgoydäy tügꞌócɨy huɨdibɨ ymɨɨd etz juy je perla.
\s Je acxmadzɨꞌñ yꞌijxpejt
\p
\v 47 E nañ jaduꞌn Dios yꞌanéꞌmɨn jaduꞌn nipaady nej tüg acxmadzɨꞌñ huɨdibɨ jäy mɨɨd ycojɨbɨɨby mejyjoty. Chi jiiby ytɨgɨy huen ytɨm huɨdibɨ acxɨty.
\v 48 E co anajty je acxmadzɨꞌñ yꞌuch mɨɨd je acx, chi je jäy ajcxy yajpɨdzɨmy ma mejypaꞌáy. Chi ɨñay ajcxy jɨm mejypaꞌáy etz huinꞌijxy ajcxy je oyjatypɨ acx etz pɨdaaccɨxy ma ycach. Je acx huɨdijaty caꞌ yꞌoyɨty, jeꞌ ajcxy yꞌixjɨbijp.
\v 49 Tɨm jaduꞌn nej tɨ yjaty mɨɨd je acx, nañ jaduꞌn jadaꞌñ, co anajty ycɨxy ytɨgoy je naaxhuiñ. Huinꞌit je ángeles ajcxy ñɨcxaꞌñ huinduꞌmy naaxhuiñ huinꞌixaꞌñ je jɨbɨc jäydɨjc e pɨdägaꞌñ ajcxy abɨcy, nañ jaduꞌn huinꞌixaꞌñ je oy jäydɨjc, e pɨdägaꞌñ ajcxy nañ jaduꞌn abɨcy.
\v 50 Chi je ángeles ajcxy pɨdägaꞌñ je jɨbɨcjäydɨjc mɨj jɨɨnjoty. Jiiby jɨɨnjoty ajcxy yäxaꞌñ ytɨnähuaꞌñ etz ytɨɨtzmucxaangɨxy ytɨɨtzqueedaangɨxy mɨɨd je ayoꞌn mɨɨd je tzaachypɨ ycɨxpɨ.
\s Je jäy huɨdibɨ jajtp nej oybɨ etz nej jɨbɨcpɨ yajpɨdzɨmɨty
\p
\v 51 Chi Jesús yꞌamɨdooy ajcxy:
\p
―¿Nej mhuinjɨhuɨɨyb miich ajcxy tügꞌócɨy huɨdibɨ ɨɨch tɨ ngapxɨch?
\p
Chi ajcxy yꞌadzooy:
\p
―Huindzɨn, tɨ nhuinjɨhuɨ̈y ɨɨch ajcxy.
\p
\v 52 Chi Jesús ajcxy nɨmay:
\p
―Nidüg nidüg escriba co tɨ ixpɨcytäy tügꞌócɨy Dios ytɨyꞌajt yꞌaneꞌmɨn huɨdibɨ tzajpjoty tzoon, hueꞌ jaduꞌn nipaady nej tüg codɨjc comeeñybɨ huɨdijaty ymɨɨd yjajty nej yajpɨdzɨmɨpy jemybɨ etz tucpɨ.
\s Jesús yajpaady jɨm Nazaret
\p
\v 53 Co Jesús yajꞌixpɨjctay jada jɨhuimbit ayuc, chi chooñ jɨm. 
\v 54 Co Jesús chooñ jɨm, chi ñɨcxy ma ycɨꞌmnaax ycɨꞌmgajp. Chi Jesús ytɨgɨɨy ma je judio ñaymujctac, e ytɨgɨɨy yajꞌixpɨjcp. Chi je mayjäy jiiby ooy jɨhuɨy huinmay nej yɨꞌ yajꞌixpɨcy, ymɨnañ ajcxy:
\p
―¿Ma jadaꞌ jada yëydɨjc tɨ paady jada ixpɨjcɨn? ¿Ma mɨcꞌajt paady co ooy mɨjhuinmaꞌñ tzachtuñ?
\v 55 Jadayaabɨ yëydɨjc hueꞌ yteedyꞌajtpy je tzejtzpɨ, etz ytajꞌajtpy María. E ɨɨch ajcxy nꞌixꞌajtpyɨch je yꞌuch ajcxy; Jacobo, José, Simón, etz Judas.
\v 56 Nañ jaduꞌn ya chɨnay ma ɨɨch ajt jeꞌ yꞌuch ajcxy töxyjäy. ¿Ma oy tɨ paady jada ixpɨjcɨn jada mɨcꞌajtɨn?
\p
\v 57 Paady je maycogajpɨ ajcxy caꞌ ytunɨcuend. Paady Jesús ajcxy nɨmay:
\p
―Huen maꞌamyɨty tügꞌócɨy je mayjäy ajcxy ooy yajmɨjꞌaty yɨ jäy ajcxy huɨdibɨ najtzcapxɨɨyb Dios yꞌayuc, caꞌydɨ huɨdibɨ yꞌayucnajtzcapxɨɨyb ma ycɨꞌmnaax ycɨꞌmgajp ycɨꞌmjɨɨn ycɨꞌmdɨjc.
\p
\v 58 Ma ycɨꞌmnaax ycɨꞌmgajp Jesús caꞌ jaty nej mɨjhuinmaꞌñ tunɨp anajty, mɨɨd co je jäy ajcxy caꞌ mɨjpɨdägyii.
\c 14
\s Juan el Bautista co yꞌögy
\p
\v 1 Je huinꞌit tiempo Herodes huɨdibɨ anajty aneꞌmb jɨm Galilea tɨyꞌajt paty nej Jesús ytuñ.
\v 2 E yɨꞌ nɨmay je ymɨdungmɨɨdpɨdɨjc:
\p
―Yɨjiibɨ jäy huɨdibɨ tzachtumb mɨjhuinmaꞌñ, yɨꞌ jeꞌ je Juan, je Bautista. Juan tɨ jugypɨcy jadügꞌoc ma anajty tɨ yꞌögy, paady mɨcꞌajt mɨɨd jaydëb mɨjhuinmaꞌñ tuñ.
\p
\v 3 Herodes tɨ anajty niꞌaneꞌmdɨ̈y co Juan huen yajmach, e yajpɨdägɨpy pujxtɨgoty. Jaduꞌn Herodes tuñ mɨɨd Herodías ycɨxpɨ. Je Herodías jeꞌ anajty mɨɨd jayɨjpꞌaty tɨ ypɨcy Felipe, je Herodes yꞌajch, chi tɨ ixmajch Felipe, chi ypɨjcy mɨɨd Herodes.
\v 4 Juan tɨ anajty nɨmäy Herodes co tɨ ytundɨgooy co tɨ pɨcy mɨɨd Herodías.
\p
\v 5 Je rey Herodes ooy anajty jayajꞌögaꞌñ yɨ Juan, per tzɨgɨɨyb anajty mɨɨd je mayjäy. Com je mayjäy tɨ anajty mɨbɨcy ajcxy co Juan hueꞌ anajty tügɨ Dios tɨyꞌajt mɨɨdpɨ, tüg profeta.
\v 6 Co Herodes yjɨmɨjtpejty, chi anajty ñayñixɨɨduñyii, e chi Herodías ñɨɨx ñɨcxy ejtzp ma Herodes yhuinduu. Je rey ooy jäygɨdacy nej anajty Herodías ñɨɨx yꞌejch. Paady Herodes Herodías ñɨɨx nɨmay:
\p
\v 7 ―Dios ɨɨch yam ngapxpatpy co nmöhuamyb ti mdɨmypɨjctzooyb.
\p
\v 8 Chi Herodías nɨmay jeꞌ ñɨɨx co huen pɨjctzoohuɨ je Juan, je Bautista, ycohuajc ma tüg texy. Chi Herodías ñɨɨx je rey nɨmay:
\p
―Ndzojcypɨch co miich xymöhuɨp Juan, je Bautista, ycohuajc ma tüg texy.
\p
\v 9-10 Co jaduꞌn mɨdooy je rey, chi ytɨgɨɨy tajp maybɨ mɨj cajee. Per co tɨ anajty Dios capxpaatnɨ, ymɨnaanɨ mayjäy yhuinduu co ymöhuamyb tijaty ypɨjctzooyb. Paady aneꞌmy tüg soldado co huen nɨcxy yajtzoñyii Juan ycohuajc, e möhuɨpy Herodías ñɨɨx.
\v 11 Huinꞌit je soldado oy je Juan ycohuajc yajmɨnajcɨ jiiby pujxtɨgoty. Chi moy je töxyꞌanäg, e je töxyꞌanäg yejcnajxnɨ ma ytaj.
\p
\v 12 Huinꞌit xɨɨ je Juan ydiscípulos ajcxy yjaꞌty. Chi ajcxy oy yajnaaxtɨgɨ̈y je Juan ñinïcx. Chi ajcxy oy Jesús yajnɨmäy.
\s Jesús yajcay mɨgoox mil jäy
\p
\v 13 Co Jesús nejhuɨɨy ti anajty tɨ ytuñyii tɨ yjadyii mɨɨd Juan, chi ytɨgɨɨy ma tüg barco naydüg, e nɨcxnɨ ma tüg it ma caꞌ pɨn chɨnäy. Co je mayjäy nejhuɨy co Jesús tɨ ñɨcxy, chi ajcxy chonday canaag agajp, nɨcxy ajcxy ma Jesús yajpaady, hueꞌ tecygɨꞌm ajcxy nɨcxy.
\v 14 Co Jesús ypɨdzɨmy barcojoty, chi ijxy mayjäy. Jesús ooy paꞌayoy je mayjäy, e yajtzoocy je paꞌmjäy huɨdibɨ anajty ajcxy jɨm ymɨɨd miiñ.
\v 15 Com tɨ anajty chuuꞌɨɨñɨ, paady jeꞌ ydiscípulos ajcxy nimɨjhuaꞌcy Jesús, e nɨmay ajcxy:
\p
―Tɨ chuuꞌɨɨñ, e caꞌ ya pɨn chɨnaꞌy, paady capxcɨ́xy mɨɨd jada mayjäy ajcxy, jaydëb ajcxy nɨcxy ixtäy ycaayɨn yꞌuucɨn ma yɨ mutz cajp ajcxy huingonbɨ.
\p
\v 16 Chi Jesús ymɨnañ:
\p
―Caꞌ ycopɨcyɨty co ajcxy nɨcxy jɨcxy ixtäy. Miich ajcxy möhuɨp caayɨn uucɨn.
\p
\v 17 Chi jeꞌ ajcxy ymɨnañ:
\p
―Per ɨɨch ajcxy jëyɨ yeeby nmɨɨdɨty mɨgoox tzajcaagy etz metz acx.
\p
\v 18 Chi Jesús ymɨnañ:
\p
―Mɨmiingɨx yamꞌamy.
\p
\v 19 Chi Jesús nɨmay je mayjäy co huen ɨñayꞌɨhuɨydaaygɨxy ma piꞌcmɨɨyꞌung nïcx. Huinꞌit Jesús je mɨgooxpɨ tzajcaagy conɨ̈gy etz je metzpɨ acx. Chi ypaꞌtꞌijxy jiiby tzajpcɨ́xy, e yajnajxy Dioscojuyipy. Chi tujc-huäcxy je tzajcaagy etz moy jeꞌ ydiscípulos ajcxy, co huen yajhuäcxycɨxy ma je mayjäy.
\v 20 Nidügꞌócɨy je mayjäy ajcxy ycay cüxyɨ. Co je mayjäy ycayday, chi je discípulos ajcxy yajmujcy je cayduc jɨcxtuc, e yajꞌujch ajcxy majmetz cach.
\v 21 Mɨgoox mil anajty ajcxy je yëydɨjctɨjc huɨdibɨ cay uuc. E caꞌ ajcxy mɨchoy je töxyjäydɨjc ajcxy etz je yꞌung yꞌanäg ajcxy.
\s Jesús yöy nɨɨhuingɨ́xy
\p
\v 22 Chi Jesús aneꞌmy yɨꞌ ydiscípulos ajcxy co huen barco tɨgɨɨygɨxy mɨcꞌamy, jɨgɨx ñɨcxɨpy ajcxy jɨm mejy nïnaxy. Namɨ yɨꞌ ydiscípulos ajcxy choñ barcojoty, Jesús ycapxycɨ́jxy mɨɨd je mayjäy huen nɨ́cxcɨxnɨ.
\v 23 Co anajty Jesús tɨ ycapxycɨ́xy mɨɨd je mayjäy, chi ñɨcxy naydüg ma tüg cögop Dios mɨbɨjctzoobɨ. Co ycoodzɨɨñ Jesús naydüg anajty yajpaady.
\v 24 Co ycoodzɨɨñ, mejy cujc anajty je barco cujc nɨcxy. E je nɨɨ ooy anajty ymɨjjëtzpety ma je barco, jeꞌ co ooy anajty mɨc yjanchpojy.
\v 25 E co oy ymoñɨ̈y, huinꞌit Jesús ymɨjhuaꞌcy ma jeꞌ ydiscípulos ajcxy, ñɨcxy adüyöyb mejyhuingɨ́xy.
\v 26 E co je discípulos ajcxy ijxy co Jesús anajty ymiiñ mejyhuingɨ́xy, chi ajcxy ooy ñayꞌadzɨgɨɨyɨ. Ooy ajcxy yaaxqueecy ymɨnañ ajcxy:
\p
―Hueꞌ ɨɨch ajt ijxmanɨɨyɨm.
\p
\v 27 Chi Jesús mɨcꞌamy ymɨgapxy ajcxy etz nɨmay:
\p
―Huinmɨc jotmɨc naybɨdáacɨgɨxy, ɨɨch yɨꞌ. Caꞌ mdzɨgɨɨygɨxy.
\p
\v 28 Chi oy Pedro Jesús ymɨgapxyii, nɨmaayɨ:
\p
―Huindzɨn, pen janch miichɨty, aneꞌmgɨch co huen ɨɨch miich ninɨcxɨp adüyöyɨp mejyhuingɨ́xy.
\p
\v 29 Chi Jesús Pedro nɨmay:
\p
―Min.
\p
Huinꞌit Pedro ymɨnajcy ma je barco etz ñɨcx ma Jesús adüyöyɨp mejyhuingɨ́xy.
\v 30 Per co Pedro jɨhuɨꞌñybɨjcy jaduꞌn nej anajty ooy mɨc yjanchpojy, chi ooy chɨgɨy, chi oy ogaꞌn ytɨgɨɨyñɨ quimbɨ, chi yaaxqueecy, ymɨnañ:
\p
―¡Huindzɨn, ɨɨch yajtzóocɨgɨch!
\p
\v 31 Huinꞌit Jesús oy ycɨꞌ mɨmajtzɨ, chi nɨmay:
\p
―Miich, janch hueenɨ mmɨbɨjcɨn. ¿Nej co caꞌ yajxon xymɨbɨcyɨch?
\p
\v 32 Co Pedro etz Jesús ytɨgɨɨy barcojoty, huinꞌit je mɨc poj ñajxy.
\v 33 Huinꞌit jeꞌ ajcxy jiiby barcojoty ycojxtɨnayꞌɨhuɨydaay ma Jesús yhuinduu. Chi ymɨnañ ajcxy:
\p
―Janch tɨyꞌajt co miich Dios xyꞌungꞌadyii.
\s Jesús yajtzooctay je paꞌmjäy ajcxy jɨm Genesaret
\p
\v 34 Co ajcxy ymejyñajxtay, chi ajcxy oy jaꞌty ma je Genesaret naaxjot.
\v 35 E co je jäy ajcxy nejhuɨɨy co Jesús tɨ yjäty ma yɨꞌ ajcxy naaxjot, chi ajcxy tɨyꞌajt quejxy ma tügꞌócɨy cajp etz rancho huinduy agonbɨ co Jesús yjɨmɨty. Chi je mayjäy mɨɨd miiñ tügꞌócɨy je paꞌmjäy ma Jesús.
\v 36 Chi ajcxy cohuanɨɨy Jesús, pen jëb je paꞌmjäy ñïdoñyii je yhuit. E tügꞌócɨy je huɨdijaty ñïdonɨp jeꞌ yhuit, jeꞌ ajcxy chooctay yꞌagɨdactay.
\c 15
\s Huɨdi jäy yajꞌahuimbijty janch jɨbɨc
\p
\v 1 Chi ymiiñ ma Jesús nijëjɨty fariseo jäy ajcxy, je huindzɨndɨjc huɨdibɨ tzachpadumb judío ycostumbre. Nañ jaduꞌn miiñ nijëjɨty escribas, je huindzɨndɨjc huɨdibɨ ajcxy nïjaydutp anajty Dios ñecy. Je fariseos etz escribas ajcxy tɨ choongɨxy anajty jɨm Jerusalén, chi ajcxy yꞌamɨdooy Jesús:
\p
\v 2 ―¿Naꞌamy co miich mdiscípulos ajcxy caꞌ cuydungɨxy judío ñiꞌap costumbre? Yɨꞌ ajcxy ycaaygɨxy yꞌuuccɨxy, e caꞌ jayɨjp ycɨ̈bujcɨxy, caꞌ ixpujcɨxy ixjëtzcɨxy ypocy.
\p
\v 3 Chi Jesús yꞌadzooy, yajtɨɨy:
\p
―¿Naꞌamy co miich ajcxy mgapxycömɨdodägy Dios? Mdzachcuydungɨxy mgɨꞌmgostumbre ma yjapadyii mguydungɨxy ixyipy Dios ycötújcɨn.
\v 4 Com Dios tɨ yꞌaneꞌmy ma ycötujcɨn: “Yajmɨjꞌat mdaj mdeedy, e pɨnjaty jɨbɨc nigapxy niꞌojɨɨyb ytaj yteedy, ögɨpy yɨꞌ.”
\v 5 Per miich ajcxy mɨnamb co tüg je yëydɨjc jëbɨ nɨmäy ytaj yteedy: “Caꞌ ɨɨch miich ajcxy nbubedaꞌñ, com tɨ nꞌahuanɨ̈yɨch ma Dios tügꞌócɨy tijaty nmɨɨdɨch.”
\v 6 Chi huen ytɨmpɨnɨty jaduꞌn mɨnamb, caꞌ ocpubedaanɨp ytaj yteedy, e jaduꞌn miich ajcxy myajtɨgoy Dios yꞌaneꞌmɨn com tzachtunaangɨxy mgɨꞌmgostumbre.
\v 7 Miich ajcxy naybɨdaacɨp jaduꞌn nej jɨhuɨ̈y tudägy jäy, e caꞌ yjanchɨty. Janch tɨyꞌajt jaduꞌn nej jecyɨp Isaías jaaybejty yajhuɨꞌmy co Dios jaduꞌn ymɨnañ:
\q 
\v 8 Jadayaabɨ jäy xyajmɨjꞌajtpɨch ahuac aguy, per caꞌ ajcxy xyajmɨjꞌatyɨch cɨxyjot huinɨjot.
\q 
\v 9 Naadɨgɨꞌ co ajcxy xyhuinꞌɨ́ɨygɨxyɨch xyhuinyáaxcɨxyɨch. Mnayyajꞌixpɨ́jcɨgɨxy ayuc tɨyꞌajt huɨdibɨ jäy ajcxy tɨ cojy tɨ maacxy.
\p
\v 10 Huinꞌit Jesús huomujctay je mayjäy, ymɨnañ:
\p
―Amɨdooꞌijtcɨxy ɨɨch nꞌayuc etz mhuinjɨhuɨ́ɨygɨxɨp.
\v 11 Caꞌ ji ni ti jɨɨcxy huɨdi jäy ypɨdacpy ma yꞌahuac nɨcxy yajpocycäyii. Yɨꞌ janchtɨy je jɨbɨc ayuc huɨdibɨ pɨdzɨm ma jäy ajcxy yꞌahuac, yɨꞌ ajcxy yajpocycähuɨɨb.
\p
\v 12 Chi ymiiñ ma Jesús jeꞌ ydiscípulos ajcxy, chi ajcxy ñɨmaayɨ:
\p
―¿Nej miich mnejhuɨɨyb co je fariseos ajcxy ñijotmaꞌtpy co ajcxy mɨdoy je ayuc jaduꞌn nej miich mɨnañ?
\p
\v 13 Chi Jesús yꞌadzooy, ymɨnañ:
\p
―Huen tɨm huɨdibɨ aneꞌmɨn huɨdibɨ caꞌ Dios tɨ pɨdägy, Dios yajtɨgoyam, tɨm jaduꞌn nej jäy ajcxy huijxɨ̈gy ujtz huɨdibɨ caꞌ yꞌoyꞌujtzɨty.
\v 14 Ixmajtzcɨx yɨ fariseos etz escribas ajcxy. Caꞌ ajcxy huinjɨhuɨ̈y Dios ytɨyꞌajt. Jaduꞌn ajcxy nipaady nej jäy huintzpɨ, e co tüg huintzpɨ huijtzhuɨdity jadüg huintzpɨ, chi nimetz nɨcxy yjutcögägɨxy.
\p
\v 15 Huinꞌit Pedro nɨmay Jesús:
\p
―Yajhuinjɨhuɨɨyg ɨɨch ajcxy jada jɨhuimbit ayuc.
\p
\v 16 Chi Jesús ymɨnañ:
\p
―¿Nej miich ajcxy nañ jaduꞌn caꞌ mhuinjihuɨ̈y jada jɨhuimbit ayuc?
\v 17 ¿Nej caꞌ miich ajcxy mnejhuɨ̈y co tügꞌócɨy huɨdibɨ tɨgɨɨyb ma miich ajcxy mꞌahuac, jeꞌ nɨcxp ma miich ajcxy mjot etz ypɨdzɨmy ma ajcxy mninïcx?
\v 18 Per je jäy huɨdibɨ jɨbɨc capxp, capxp jeꞌ je jɨbɨc ayuc huɨdibɨ ymɨɨd ma yjot yhuinmaꞌñ. Jada jɨbɨc ayuc yajpocychɨmɨ̈cp je jäy.
\v 19 Yɨ jɨbɨcpɨ huɨdibɨ tzomb ma jäy ajcxy yjot yhuinmaꞌñ, yɨꞌ jeꞌ jäyyajꞌögɨɨ huinmaꞌñ, je töxyjäy mɨgapxtɨgoyɨɨ huinmaꞌñ, meedzɨɨ huinmaꞌñ, je ɨndägɨɨ huinmaꞌñ, je piitz capx huinmaꞌñ.
\v 20 Yɨjaduꞌmbɨ jɨbɨc-huinmaꞌñ yajpocycäb jäy ajcxy ma Dios. Per co jäy ajcxy ycaay yꞌügy, ma caꞌnɨ ajcxy pocy ixpujcɨxy jayɨjp, caꞌ jeꞌ ypocycäy ajcxy ma Dios.
\s Tüg töxyjäy huɨdibɨ caꞌ judíojäy mɨbɨjc Jesús
\p
\v 21 Chi Jesús jɨm chooñ, nɨcxy ma je Tiro etz Sidón naaxjot.
\v 22 Jɨm anajty tüg töxyjäy chɨnäy. Jada töxyjäy hueꞌ anajty cananeajäy, canan  judíojäy. Chi yɨꞌ nimiiñ Jesús, chi nɨmay:
\p
―Huindzɨn, David yꞌap yꞌoc, paꞌayoogɨch. Ɨɨch nmɨɨdɨch tüg nɨɨx huɨdibɨ ymɨɨd caꞌoybɨ etz oy tzaachypɨ paady.
\p
\v 23 Per caꞌ ni nej Jesús yꞌadzoohuɨ. Huinꞌit jeꞌ ydiscípulos ajcxy miiñ ma Jesús, e ycohuanɨɨy, mɨnañ ajcxy:
\p
―Capxycɨ́x mɨɨd jada töxyjäy, com nɨgo xypayaax xypadɨnaayɨm.
\p
\v 24 Chi Jesús ymɨnañ:
\p
―Dios ɨɨch tɨ xyquexyɨch jëdaꞌajty ma je israelitasjäy huɨdibɨ yꞌalma tɨgoyam.
\p
\v 25 Chi je töxyjäy ymɨjhuaꞌcɨ ma Jesús, e ycojxtɨnayꞌɨhuɨy ma je yhuinduu, chi ymɨnañ:
\p
―Huindzɨn, tun mayꞌajt pubejtcɨch.
\p
\v 26 Chi Jesús ymɨnañ:
\p
―Caꞌ jaduꞌn yꞌoyɨty co nꞌixmadzipɨch je israelitasjäy (Dios yjäy), e nbubedɨpɨch miich ajcxy. Co jaduꞌn ndunɨpɨch, jaduꞌn nipaadɨp nej jäy ajcxy yꞌɨdɨ̈ch co ajcxy pɨjcɨ je ajcxy yꞌung ycaagy, e möy je uc.
\p
\v 27 Huinꞌit je töxyjäy yꞌadzooy:
\p
―Janch tɨyꞌajt jaduꞌn nej miich mɨnaꞌñ, per ixtɨ ycaayb je uc je tzajcaagy yꞌabuꞌx huɨdibɨ cäb ma yhuindzɨn mesa.
\p
\v 28 Chi Jesús je töxyjäy nɨmay:
\p
―Janch mɨj mmɨbɨjcɨn. Ɨɨch ndunaamybɨch jaduꞌn nej miich mdzocy. 
\p 
Huinꞌit horɨ je töxyjäy ñɨɨx choocy.
\s Jesús yajtzögy maybaꞌmjäy
\p
\v 29 Chi Jesús jɨm chooñ. Chi ñajxy ma Galilea mejypaꞌ. Chi ypejty ma tüg cögop, jɨm ɨñayꞌɨhuɨɨy.
\v 30 E huinꞌit oy mayjäy mɨɨdmiiñ paꞌmjäy huɨdibɨ huintz, uum, cɨ̈mucy tecymucy, etz huen tɨm huɨdibɨ paꞌmjäy. Pɨdacy ajcxy je paꞌmjäy ma Jesús yhuinduu, e yɨꞌ yajtzooctay.
\v 31 E je mayjäy ooy tzachjɨhuɨɨy tzachhuinmaay ajcxy co anajty je uumbɨ tɨ capxɨ̈gy, je huintzpɨ tɨ yꞌijxɨ̈gy, je cɨ̈mucpy tecymucpyɨ tɨ yöyɨ̈gy. Chi je mayjäy ytɨgɨɨy ɨɨbaady capxpaady Dios, je Dios huɨdibɨ je Israel jäy ymɨjpɨdacpy.
\s Jesús yajcay mɨdaax mil jäy 
\p
\v 32 Chi Jesús mɨjhuoy jeꞌ ydiscípulos ajcxy, nɨmay:
\p
―Ooy nbaꞌayooyɨch jadayaab jäy ajcxy. Com cujc mɨdugɨɨg xɨɨ ijtcɨxy ya mɨɨd ɨɨch etz caꞌ ajcxy mɨɨdɨty ti ycaayɨpy. Caꞌ nguexhuimbidaꞌñɨch ajcxy ayuu ma ytɨjc, caꞌ yjetyɨty yajpaꞌmgojɨp ajcxy tüꞌam.
\p
\v 33 Chi jeꞌ ydiscípulos ajcxy mɨnañ:
\p
―¿Per ma nꞌocpatɨm ti jada jäy ajcxy ycaayɨpy yjɨɨcxɨpy ya ma jada abac it ma caꞌ pɨn chɨnäy? Co ooy mayjäyɨty.
\p
\v 34 Chi Jesús yajtɨɨy:
\p
―¿Naag jiiby tzajcaagy miich ajcxy mjacmɨɨdɨty?
\p
Chi ajcxy yꞌadzooy:
\p
―Jëyɨ huɨxtujc tzajcaagy etz hueen acx.
\p
\v 35 Chi Jesús nɨmay je mayjäy co huen ɨñayꞌɨhuɨydaaygɨxy naaxcɨ́xy.
\v 36 Chi Jesús conɨ̈gy je huɨxtujcpɨ tzajcaagy etz je hueenɨp acx, e yajnajx Dioscojuyɨp ma Dios. Chi tujc-huaꞌcx etz moy jeꞌ ydiscípulos ajcxy. E yɨꞌ ajcxy yajhuaꞌcx je jɨcxy pɨcy ma je mayjäy.
\v 37 Chi je mayjäy nidügꞌócɨy ycay cüxɨ. Jesús ydiscípulos ajcxy yajpɨdɨ̈gy huɨxtujc cach cayduc uuctuc tɨɨbɨ anajty yconaxy.
\v 38 E je huɨdibɨ ajcxy cay hueꞌ anajty naybáatɨgɨxy nimɨdaax mil, abɨcy je töxyjäydɨjc etz piꞌctɨjc ajcxy.
\v 39 Chi Jesús ycapxycɨ́xy mɨɨd je mayjäy huen ajcxy nɨ́cxcɨxyñɨ ma ytɨjc. Chi Jesús ytɨgɨɨy barcojoty etz ñɨcxnɨ ma Magdala naax jot.
\c 16
\s Je fariseos etz je saduceos ajcxy pɨjctzoogɨxy tüg ijxpejt mɨjhuinmaꞌñybɨ
\p
\v 1 Chi je fariseos etz saduceos yꞌoy ajcxy ixy Jesús. Yɨꞌ ajcxy ijxtaꞌn octunaangɨxy mɨɨd Jesús, paady ajcxy pɨjctzoy co Jesús huen yajꞌixyii ajcxy tüg ijxpejt huɨdibɨ tzomb tzajpjoty.
\v 2 Chi Jesús yꞌadzooy jeꞌ ajcxy:
\p
―Co miich ajcxy mꞌixy tzuu yɨ tzajp tzaptz, chi miich ajcxy mɨnaꞌñ com jabom oy tiempo yajpadaꞌñ.
\v 3 Per co miich ajcxy mꞌixy jopy je tzajp tzaptz etz huimbɨcy, chi ajcxy mɨnaꞌñ co caꞌ yꞌoyɨty yɨ tiempo. Miich ajcxy ooy mnaybɨdägyii nejɨhuɨ̈y ooy mꞌixpɨcyɨty ma Dios ytɨyꞌajt, e caꞌ yjanchɨty. Miich ajcxy jëbɨ yɨ tzajp myajcapxy, per caꞌ mnejhuɨɨygɨxy nej yhuimbɨdzɨmy yɨ mɨjhuinmaꞌñ ijxpejt huɨdibɨ Dios ytumyb ma jadachambɨ xɨɨ tiempo. 
\v 4 Yɨ jäy ajcxy huɨdibɨ cham tzɨnaayb, ooy yjɨbɨcjäyɨty ajcxy, caꞌ
 ajcxy capxymɨdoy Dios. Yɨꞌ ajcxy chojcpy co nyajꞌixɨpyɨch tüg ijxpejt mɨjhuinmaꞌñ huɨdibɨ tzomb tzajpjoty. Caꞌ Dios yajꞌixaꞌñ ajcxy jadüg mɨjhuinmaꞌñ, com mɨɨd miich ajcxy jaybetyɨty je mɨjhuinmaꞌñ ijxpejt huɨdibɨ Dios ytuun mɨɨd Jonás jecyꞌajty.
\p
Chi Jesús ixmajch je fariseos etz saduceos ajcxy, chi ñɨcxnɨ.
\s Fariseos jäy ajcxy yꞌixpɨjcɨn
\p
\v 5 Co Jesús etz ydiscípulos ajcxy yjaꞌty ma jadüg nɨɨbaꞌ, chi jeꞌ ajcxy yjäydɨgoy je tzajcaagy.
\v 6 Chi Jesús ymɨnañ:
\p
―Naygüendꞌájtɨgɨx mɨɨd yɨ fariseos etz saduceos ajcxy, caꞌ mɨjpɨdaacɨ yɨꞌ ajcxy yꞌayuc ytɨyꞌajt, com jaduꞌn yɨꞌ nipaady nej levadura.
\p
\v 7 Chi Jesús ydiscípulos ñayñɨmáayɨgɨxy miñ xyɨpy:
\p
―Paady jaduꞌn ymɨnañ, jeꞌ co tɨ ɨɨch ajt je tzajcaagy njäydɨgooyɨm.
\p
\v 8 Jesús nejhuɨy nej ajcxy nayñɨmáayɨgɨxy miñ xyɨpy, chi nɨmay ajcxy:
\p
―¿Naꞌamy co miich ajcxy mɨnaangɨxy co caꞌ ajcxy tzajcaagy mɨɨdɨty? Janch hueenɨ miich ajcxy mmɨbɨjcɨn.
\v 9 ¿Nej caꞌnɨ miich ajcxy mhuinjɨhuɨ̈yɨ? ¿Nej caꞌ mjäymechyii co ɨɨch mɨgoox tzajcaayg nyajhuäcxy etz ni mɨgoox mil je yëydɨjctɨjc anajty huɨdibɨ ajcxy cay? ¿E ni mgaꞌajɨhuɨ̈yii ajcxy naag cach cayduc uuctuc tɨ myajpɨdɨ̈gy?
\v 10 ¿E ni mgaꞌajɨhuɨ̈yii ajcxy co huɨxtujc tzajcaagy nyajhuäcxyɨch ma nimɨdaax mil yëydɨjc ajcxy huɨdibɨ caay etz naag cach cayduc uuctuc myajpɨdɨ̈gy ajcxy?
\v 11 ¿Nej co caꞌ miich ajcxy mhuinjɨhuɨ̈y, co caꞌ ɨɨch yam nigapxy yɨ tzajcaagy huɨdibɨ miich ajcxy tɨ mjäydɨgoy, co tɨ nyajnɨmaaygɨxy je levadura huɨdibɨ je fariseos etz saduceos ajcxy ymɨɨd?
\p
\v 12 Huinꞌit Jesús ydiscípulos ajcxy huinjɨhuɨy co Jesús caꞌ anajty jeꞌ tɨ yajnɨmäyii ajcxy co huen naygüendꞌájtɨgɨxy mɨɨd tzajcaagy levadura. Hueꞌ janchtɨy Jesús yajnɨmay ajcxy co huen naygüendꞌájtɨgɨxy mɨɨd je fariseos etz saduceos ajcxy yꞌixpɨjcɨn.
\s Pedro nidɨyꞌaty co Jesús yɨꞌ jeꞌ je Cristo
\p
\v 13 Co Jesús yjaꞌty ma Cesarea Filipo naaxjot, chi Jesús yꞌamɨdooy jeꞌ ydiscípulos ajcxy:
\p
―¿Nej jäy ajcxy ymɨnaꞌñ, pɨ́nɨc ɨɨch?
\p
\v 14 Chi ajcxy ymɨnaꞌñ:
\p
―Nijëjɨty jäy ymɨnaꞌñ co miich jeꞌ Juan je Bautista. Nijëjɨty jäy ymɨnaꞌñ co miich jeꞌ Elías, e nijëjɨty ymɨnaꞌñ co miich jeꞌ Jeremías o jadüg profeta (huɨdibɨ tzɨnay jecyꞌajty).
\p
\v 15 Chi Jesús ymɨnañ:
\p
―¿E miich ajcxy nej mɨnaangɨxy, pɨn ɨɨch?
\p
\v 16 Huinꞌit Simón Pedro yꞌadzooy: 
\p
―Miich jeꞌ je Cristo, je Dios yꞌung.
\p
\v 17 Chi Jesús yꞌadzooy:
\p
―Jotcujc miich Simón, Jonás yꞌung, jeꞌ co ni pɨn xycayajnɨmäy jada tɨyꞌajt, tügpajc je Dios Teedy nDeedyɨch huɨdibɨ jiiby tzajpjoty, yɨꞌ tɨ xyajnejhuɨ̈y jada tɨyꞌajt.
\v 18 Ɨɨch miich nɨmaayb co miich mxɨɨꞌadɨɨyb Pedro, e hueꞌ yhuimbɨdzɨmy tzaa (hueꞌ jeꞌ, je tzaa tijaꞌñ je ayuc huɨdibɨ Simón ycapxy co je Cristo hueꞌ jeꞌ anajty Dios), e ma jada tzaa ji ngojaꞌñɨch ɨɨch ndzajptɨjc (hueꞌ yhuimbidzɨmy, ma ɨɨch nꞌaneꞌmɨn chondägaꞌñ), e ni caꞌ oybɨ ymɨcꞌajt ycamɨmadägɨpy.
\v 19 Ɨɨch miich nmöhuamyb je cötujcɨn jaduꞌn nipaady nej tüg ahuaast huɨdibɨ mɨɨd myajꞌahuädzɨpy Dios yꞌayuc ytɨyꞌajt. Tügꞌócɨy huɨdibɨ miich mgapxꞌadujcpy ya naaxhuiñ, Dios nañ jaduꞌn capxꞌadugɨpy jiiby tzajpjoty, e huɨdibɨ miich ya naaxhuiñ caꞌ capxꞌaducy, Dios nañ caꞌ capxꞌadugɨpy jiiby tzajpjoty.
\p
\v 20 Huinꞌit Jesús nɨmay jeꞌ ydiscípulos ajcxy, co caꞌ huaad ni pɨn nɨmäy co yɨꞌ jeꞌ je Cristo.
\s Jesús nigapxy jeꞌ yꞌöcɨn
\p
\v 21 Ixtɨ huinꞌitnɨ Jesús ytɨgɨɨy yajnɨmay jeꞌ ydiscípulos ajcxy co nɨcxamb jɨm Jerusalén etz co jɨm ooy yꞌayoohuaꞌñ. Jɨm Jerusalén je judío mɨjjäydɨjc, je teedytɨjc huɨdibɨ tungmɨɨdpɨ, etz yɨ escribas ajcxy ooy chaachytunaꞌñyii etz yajꞌögaꞌñyii. Per codugɨɨg xɨɨ huinꞌit yjugypɨgaꞌñ jadügꞌoc.
\v 22 Huinꞌit Pedro mɨɨdnɨcxy Jesús ahuingujc, e oy ojy, ymɨnañ:
\p
―Huindzɨn, caꞌ Dios tzocy nɨcx jaduꞌn mjaty. Mɨɨd miich caꞌ jëbɨ jaduꞌn mjadɨpy.
\p
\v 23 Per Jesús yhuäc-huimbijty, chi nɨmay Pedro:
\p
―Huinhuäctuutcɨch Pedro, je mujcuꞌ miich jaduꞌn xyajcapxp. Caꞌ nɨgoo xyꞌadzipyɨch. Caꞌ miich mhuinmaꞌñybɨdägy nej Dios tzocy. Yɨꞌ janchtɨy miich mhuinmaꞌñꞌajtpy nej jäy ajcxy tzocy.
\p
\v 24 Huinꞌit Jesús jeꞌ ydiscípulos ajcxy nɨmay:
\p
―Pen je pɨnjaty xypaminaꞌñɨch, huen ycɨꞌmdzojcɨn ixmajtztäy etz huen yhuinmaꞌñypɨdägy co ayoohuɨpy mɨɨd ɨɨch ycɨxpɨ, ixtɨ mabaad yꞌögy.
\v 25 Huen pɨnjäy huɨdibɨ caꞌ ayoohuaꞌñ mɨɨd ɨɨch ycɨxpɨ, hueꞌ jeꞌ yajtɨgoyamy yɨꞌ yjugyꞌajtɨn. Per pɨnjaty xypanɨcxpɨch oy nej ytɨmyjadɨpy, hueꞌ jeꞌ ypadamyb yjugyꞌajtɨn huɨdibɨ caꞌ ycɨxɨpy ytɨgoyɨpy nimɨna.
\v 26 ¿Ti jäygɨdaacɨn yɨꞌ co tüg jäy yꞌocnayyajpadɨɨyb yɨ meeñ etz mɨcꞌajtɨn huinduꞌmy ñaaxhuiñybɨ, e yjugyꞌajtɨn cɨxɨpy tɨgoyɨpy tüccɨꞌy? ¿Jaduꞌñyɨ jëbɨ jäy yꞌalma yjugyꞌajtɨn occojuyɨ? Nïgɨ choohuɨty jäy ajcxy yꞌalma yjugyꞌajtɨn, caꞌydɨ jac ni ti.
\v 27 Ɨɨch, je jäy huɨdibɨ tzoon tzajpjoty, miinaambɨch jadügꞌoc ya naaxhuiñ mɨɨd je ángeles ajcxy etz mɨɨd nDeedyɨch yꞌoyꞌajtɨn. Huinꞌit mɨcuejtähuaꞌñ tügꞌócɨy je jäy nej anajty tɨ ytuungɨxy, pen oy, o caꞌ yꞌoyɨty.
\v 28 Janch tɨyꞌajt jaduꞌn nej nɨmaaygɨxy co ji ya naagɨty huɨdibɨ caꞌ yꞌögaꞌñ ixtɨ coonɨ xyꞌixɨpyɨch jadügꞌoc co ɨɨch anajty nmiiñ aneꞌmbɨ.
\c 17
\s Co Jesús ñinïcx yajtɨgach
\p
\v 1 Codudujc xɨɨ huinꞌit Jesús mɨɨdnɨcxy Pedro, Jacobo, etz yꞌuch Juan ma tüg mɨjcop, ma tüg cop huɨdibɨ ooy ycɨxɨty.
\v 2 E jɨm copcɨ́xy Jesús ñinïcx ñaygojtɨgajtzɨ ma Pedro, Jacobo etz Juan ajcxy yhuinduu. Jesús yhuiñyjɨjp ytɨgɨɨy adɨɨcxp nej je xɨɨ ytɨɨcxɨn. E Jesús yhuit yꞌahuimbijty janch poob jaduꞌn nej tüg tɨɨcxɨn. 
\v 3 E tɨmetiinɨ oy ijxcɨxy Moisés etz Elías ycapxy mɨydägy anajty mɨɨd Jesús.
\v 4 Chi Pedro nɨmay Jesús:
\p
―Huindzɨn, oy yꞌoyɨty co ɨɨch ajt ya. Pen miich mdzojcpy jëbɨ ɨɨch ajcxy nyajꞌoyɨ̈y tugɨɨg tɨjcquemy. Tüg miich mjeꞌ, tüg Moisés yjeꞌ, etz tüg Elías yjeꞌ.
\p
\v 5 Pedro capxp anajty, tɨm huinꞌítɨy tüg joc yajnïdɨgoyday jeꞌ ajcxy huɨdibɨ ooy adɨɨcxp anajty. E ma je joc yajmɨdoy tüg ayuc huɨdibɨ ymɨnañ:
\p
―Jadayaabɨ yëydɨjc ɨɨch jeꞌ nꞌungꞌajtpy huɨdibɨ ooy ndzocy njɨhuɨ̈yɨch etz yɨꞌ ɨɨch mɨɨd njotcujcɨty. Amɨdooꞌit miich ajcxy yɨꞌ yꞌayuc.
\p
\v 6 Co Pedro, Jacobo, etz Juan jaduꞌn mɨdooy je ayuc chooñ jocjoty, chi ajcxy ooy chɨgɨɨy etz ñayñitziitzcɨdaacɨ ajcxy.
\p
\v 7 Huinꞌit ajcxy Jesús ñimiinɨ etz nïdoñ ajcxy, e ymɨnañ:
\p
―Pɨdɨ̈ccɨx, caꞌ mdzɨgɨɨygɨxy.
\p
\v 8 E co ajcxy yꞌijxɨ̈gy, caꞌ anajty jɨm Elías etz Moisés. Naydügpajc Jesús yjac-huɨꞌmy mɨɨd jeꞌ ajcxy.
\v 9 E co ajcxy ymɨnajcy ma je cop, chi ajcxy Jesús nɨmay:
\p
―Caꞌ ni pɨn miich ajcxy nyajnɨmähuɨpy jaduꞌn nej tɨ mꞌijxcɨxy cham, ixtɨ coonɨ ɨɨch anajty tɨ njugypɨcyɨch jadügꞌoc ma anajty tɨ nꞌögɨch.
\p
\v 10 Huinꞌit jeꞌ ydiscípulos ajcxy yajtɨɨy Jesús:
\p
―¿Nej co yɨ escribas, yɨꞌ ajcxy huɨdibɨ nïjaydutp etz yajnïguejp Dios yꞌayuc, ymɨnaangɨxy co Elías yɨꞌ miinaam jayɨjp etz axam je Cristo?
\p
\v 11 Chi Jesús yꞌadzooy:
\p
―Janch tɨyꞌajt co Elías ymiinaꞌñ etz yajꞌoyɨydähuamy tügꞌócɨy mɨɨd Dios ycɨxpɨ.
\v 12 Per ɨɨch miich ajcxy nɨmaayb co Elías tɨ yꞌoy. E je jäy ajcxy caꞌ nejhuɨ̈y pɨn yɨꞌ, e ooy jɨbɨc tuuñ ajcxy, nej tɨm tzojccɨxy. E nañ jaduꞌn ɨɨch, je jäy huɨdibɨ tzoon tzajpjoty ayoohuaambɨch ma yɨꞌ ajcxy.
\p
\v 13 Huinꞌit jeꞌ ydiscípulos ajcxy huinjɨhuɨɨy co Jesús hueꞌ anajty ñigapxyp je Juan, el Bautista.
\s Jesús yajtzögy tüg jäy moꞌtpaꞌmmɨɨdpɨ
\p
\v 14 Co Jesús, Pedro, Jacobo etz Juan yjäty jɨm ma je mayjäy ajcxy, chi ñimiinɨ tüg jäy. Chi je jäy ycoxtɨnayꞌɨhuɨy ma Jesús yhuinduu, chi ymɨnañ:
\p
\v 15 ―Huindzɨn, ɨɨch nmang paꞌayoohuɨc. Jeꞌ co ymɨɨd moꞌtpaꞌm etz oy yajꞌɨyooyii. Canaagꞌoc tɨ ycäy jɨɨnjoty nɨɨjoty.
\v 16 Paady ɨɨch tɨ nmɨɨdmiiñɨch ma miich mdiscípulos ajcxy, per caꞌ ajcxy ymadacy yajtzögɨpy.
\p
\v 17 Chi Jesús yꞌadzooy:
\p
―Miich ajcxy huɨdibɨ jugyꞌajtp jadachambɨ xɨɨ tiempo, caꞌ miich ajcxy mmɨbɨgaꞌñ Dios, caꞌ miich ajcxy mgapxymɨdoohuaꞌñ Dios. ¿Naag xɨɨ naag tiempo ɨɨch miich ajcxy njacmɨmecxtugɨpy? Yajmiingɨx yɨ yeegꞌanäg.
\p
\v 18 Co je yeegꞌanäg yajmɨɨdjaꞌty ma Jesús, huinꞌit Jesús aneꞌmy je caꞌoybɨ co huen pɨdzɨm ma je yeegꞌanäg. E mɨcꞌamy jeꞌ chögy.
\p
\v 19 Jac co hueeñɨ, jeꞌ ydiscípulos ajcxy mɨɨdmɨydac Jesús ahuingujc, chi ajcxy yajtɨɨy ma Jesús:
\p
―¿Nej co ɨɨch ajcxy caꞌ tɨ nmadägy nɨcx nyajpɨdzɨ́ɨmgɨxyɨch je caꞌoybɨ ma je yeegꞌanäg?
\p
\v 20 Chi Jesús ymɨnañ:
\p
―Jeꞌ co miich ajcxy hueenɨ mmɨbɨjcɨn. Janch tɨyꞌajt jaduꞌn nej nnɨmaaygɨxy, co ixyipy miich ajcxy xyꞌocmɨbɨcyɨch, ooy ixyipy jëdaꞌajty jaduꞌn nej je jac mutzpɨ ujtz tɨɨm, huinꞌit jëbɨ ixyipy mnɨmäy jadayaabɨ cop co huen jɨɨhuäcy ya etz huen nɨcxy huingduum, chi ñɨcxɨp je cop. Ni ti ji ycatzipɨty pen janch miich ajcxy mɨɨdɨty mɨbɨjcɨn.
\v 21 Jadayaabɨ pɨcy caꞌoybɨ pɨdzɨmɨpy co Dios nmɨbɨjctzoohuɨm mɨctägy etz ayuuꞌijt, caꞌ jac ti huinmaꞌñ.
\s Jesús nigapxy jadügꞌoc yꞌöcɨn
\p
\v 22-23 Co anajty ajcxy yhuɨdity tügmucy jɨm ma Galilea yꞌit, chi Jesús nɨmay jeꞌ ydiscípulos ajcxy:
\p
―Ɨɨch, je jäy huɨdibɨ tzoon tzajpjoty, yajcɨ̈yegɨpyɨch ma jäy. E yɨꞌ ajcxy xyajꞌögɨbɨch etz codugɨɨg xɨɨ njugypɨgɨpyɨch jadügꞌoc. Co jeꞌ ydiscípulos ajcxy jaduꞌn mɨdooy, chi ajcxy ooy yjotmaybaty.
\s Je cogüejtɨn ma je tzajptɨjc
\p
\v 24 Co Jesús yjaꞌty mɨɨd jeꞌ ydiscípulos ajcxy jɨm ma je Capernaum cajp, chi huɨdi anajty ajcxy meeñ yajmujcp mɨɨd tzajptɨjc ycɨxpɨ, oy ajcxy ijxcɨxy je Pedro, chi ajcxy yꞌamɨdooy:
\p
―¿Nej miich mhuindzɨn ycuejcpy meeñ mɨɨd tzajptɨjc ycɨxpɨ?
\p
\v 25 Chi Pedro yꞌadzooy:
\p
―Cuejtpy.
\p
E huinꞌit hora co anajty Pedro ytɨgɨ̈y tɨgoty, chi Jesús jayɨjp ymɨgapxy, ñɨmay:
\p
―Simón, ¿nej mmɨnaꞌñ? ¿Pɨn je rey ajcxy yajcuejcpy? ¿Yɨꞌ yjäy o huingjäyɨ?
\p
\v 26 Chi Pedro yꞌadzooy:
\p
―Ma huingjäy huɨdibɨ aneꞌmy ijtp.
\p
Chi Jesús yꞌadzooy:
\p
―Ah, caꞌtz yɨꞌ yjäy huaad ti cuejtcɨxy.
\v 27 Per caꞌ ndzocyɨch co je cogüejtpɨ nyajcapxmayɨɨyɨm, nɨcx miich ma yɨ mɨj laguun e cohuidzɨꞌ jiiby mxuꞌñ, e je acx huɨdibɨ anajty jayɨjp huoomb, jeꞌ myajpɨdzɨmɨpy, e ma yꞌahuac jiiby mbaadɨpy tüg meeñ, yajpɨdzɨm je meeñ e nɨcx cuet mɨɨd ɨɨch ycɨxpɨ etz mɨɨd miich ycɨxpɨ.
\c 18
\s ¿Pɨn jeꞌ jac nïgɨ mɨjɨp?
\p
\v 1 Je huinꞌit hora jeꞌ ydiscípulos ajcxy ymɨjhuäctay Jesús etz yajtɨy:
\p
―¿Pɨnjäy jeꞌjac nïg ymɨɨd je mɨjꞌajtɨn ma Dios yꞌaneꞌmy jiiby tzajpjoty?
\p
\v 2 Chi Jesús mɨjhuoy tüg je piꞌcꞌanäg. Chi pɨdacy je piꞌcꞌanäg cujcꞌamy ma yɨꞌ ajcxy.
\v 3 Chi Jesús ymɨnañ:
\p
―Janch tɨyꞌajt ɨɨch miich ajcxy nɨmäy, pen caꞌ miich ajcxy jothuimbijtcɨxy etz naybɨdaaccɨxy mhuinmaꞌñ jaduꞌn nej jada piꞌcꞌanäg huinmaꞌñ mɨɨd, pues caꞌ mdɨgɨ̈huɨpy ma Dios Teedy yꞌaneꞌmy jiiby tzajpjoty.
\v 4 Paady, pɨnjaty mɨɨd yhuinmaꞌñ yung nax jaduꞌn nej jadayaabɨ piꞌcꞌanäg mɨɨd yhuinmaꞌñ yung nax, jeꞌ jeꞌ je huɨdiib jac nïgɨ mɨjꞌajtɨn ymɨɨd jiiby ma Dios yꞌaneꞌmy.
\v 5 Hueñypɨnɨty huɨdibɨ mɨɨd ɨɨch ycɨxpɨ cöbɨgɨpy etz tzogɨpy tüg piꞌcꞌanäg, jaduꞌn nej jada piꞌcꞌanäg tɨ ndzocyɨch tɨ ngöbɨcyɨch, hueꞌ jaduꞌn nipaady nej jɨhuɨ̈y tɨ xycöbɨcyɨch tɨ xychocyɨch.
\s Je huɨdibɨ ooy ycojotmayɨty co nbocycähuɨm
\p
\v 6 Hueñypɨnɨty huɨdibɨ jɨbɨc-huinmaꞌñ ymɨbɨdzɨmy, e yajpocycäy yɨ jaduꞌmbɨ piꞌctɨjc huɨdibɨ ajcxy xymɨjnɨcxpejtpɨch, jacꞌoy ixyipy co yɨ jaduꞌmbɨ jäy ytimyñayyöcxodzɨ̈yii tüg paandzaa etz ñayñajtzjɨbibɨ̈huɨpy mejyjoty.
\v 7 Ooy ayoꞌñɨty ooy jɨbɨcɨty co ji naaxhuiñybɨ yajpaady tijaty huɨdibɨ yajtundɨgooby jäy ajcxy. Ni mɨna xɨɨ caꞌ tɨgoy yꞌidɨpy tijaty huɨdi yajtundɨgoy je jäy ajcxy. Per mɨj ayoꞌn padaꞌñ mɨɨd yɨ Dios pɨnjaty cojp tundɨgooyɨɨ.
\v 8 Pen miich mgɨꞌ o miich mdecy xyajtundɨgooyb, jacꞌoy ixyipy co mdɨmꞌixpuxy etz ixjɨbɨpy jɨguem. Nïgɨ oy co mdɨgɨ̈huɨpy cɨ̈duc tecytuc jiiby tzajpjoty etz caꞌydɨ co mdɨgɨ̈huɨpy mɨɨd metz mgɨꞌ etz metz mdecy mɨjjɨɨnjoty huɨdibɨ nimɨna ycapïch.
\v 9 E pen yɨ mhuiin tug xyajpocycähuamb, tɨm yajpɨdzɨm etz ixcätz jɨguem. Com jacꞌoy mdɨgɨ̈huɨpy mɨɨd tüg mhuiin ma jugyꞌájtɨn huinɨxɨɨbɨ, caꞌydɨ co mdɨgɨ̈huɨpy mɨɨd metz mhuiin ma yɨ jɨɨn huɨdibɨ camɨna xɨɨ ycapïch.
\s Je yꞌijxpejt, je cöbɨxy huɨdibɨ tɨgooy
\p
\v 10 Caꞌ mꞌixtijcɨxy ni tüg piꞌcꞌanäg huɨdibɨ xymɨbɨjcpɨch. Yɨꞌ ajcxy jeꞌ yꞌángeles tɨm ijtɨɨb jiiby tzajpjoty ma Dios Teedy, ɨɨch nDeedy yhuinduu.
\v 11 Ɨɨch je jäy huɨdibɨ tzoon tzajpjoty, tɨ nmiiñɨch ya naaxhuiñ, jeꞌ co nyajnitzögaꞌñɨch je jäy ajcxy yꞌalma huɨdibɨ tɨgoyam.
\v 12 ¿Nej miich ajcxy mɨnaꞌñ? Pen tüg jäy ymɨɨd mɨgoꞌpx cöbixy, etz pen yöydɨgooyb nidügtɨ cöbixy, ¿nej caꞌ jëbɨ ixmach je nimɨdaꞌpx majmocx mɨdaax cöbixy etz nɨcxy ixtäy je jadügpɨ huɨdibɨ yöydɨgooy?
\v 13 E pen ypatpy je tügpɨ huɨdibɨ yöydɨgooyb, chi ooy xondägy mɨɨd co anajty tɨ paady huɨdibɨ anajty tɨ ytɨgooy, caꞌ jaduꞌn yxondägy mɨɨd je nimɨdaꞌpx majmocx mɨdaax huɨdibɨ caꞌ anajty tɨ yöytɨgooygɨxy.
\v 14 Tɨm jaduꞌn nipaady mɨɨd Dios Teedy jiiby tzajpjoty, caꞌ tzocy co ni tüg jäy yꞌalma tɨgoyɨpy.
\s Nej huaad tüg mmɨgüg nhuinmeecxɨm
\p
\v 15 Pen miich mmɨgüg xytuñ jɨbɨc, mɨɨdmɨydac ahuingujc e yajhuinjɨhuɨꞌ ma tɨ ytundɨgooy, pen xyꞌayuchuinjɨhuɨɨyb tɨ anajty mmɨnaymɨgügpɨgyii je mmɨgüg.
\v 16 Pen caꞌ xyꞌayuc-huinjɨhuɨ̈y, chi huoominɨpy tüg o metz mmɨgüg huɨdibɨ jëbɨ nidɨyꞌajtꞌadɨpy miich mꞌayuc. 
\v 17 E pen nañ caꞌ jeꞌ ajcxy ayuc-huinjɨhuɨ̈huaꞌñ, mɨɨdnɨcxɨp ma mɨbɨjcpɨdɨjc yöymujctac e jɨm ajcxy myajnaxɨpy jaduꞌn nej tüg huɨdibɨ caꞌ Dios mɨbɨcy etz jaduꞌn nej tüg yajcogüejtpɨ huɨdibɨ ooy pocymɨɨdɨty.
\v 18 Janch tɨyꞌajt ɨɨch miich ajcxy nɨmäy, tügꞌócɨy huɨdibɨ miich ajcxy mgapxꞌadujcpy ya naaxhuiñ, Dios nañ jaduꞌn capxꞌadugɨpy jiiby tzajpjoty, e huɨdibɨ miich ajcxy ya naaxhuiñ caꞌ capxꞌaducy, Dios nañ caꞌ capxꞌadugɨpy jiiby tzajpjoty.
\v 19 E nañ jaduꞌn ɨɨch miich ajcxy nɨmäy, pen ya naaxhuiñ miich ajcxy nimetz mnaygápxɨgɨxy co tijaty mmɨbɨjctzohuaangɨxy ma Dios, Dios, ɨɨch nDeedy huɨdibɨ jiiby tzajpjoty, xymöhuɨpy huɨdibɨ ajcxy mbɨjctzooyb.
\v 20 Com ma miich ajcxy nimetz o nidugɨɨg naymújcɨgɨxy, jɨm ɨɨch nꞌity cujcꞌamy ma miich ajcxy.
\p
\v 21 Chi Pedro yꞌamɨdooy Jesús ymɨnañ:
\p
―Huindzɨn, ¿naagꞌoc huaad nhuinmeecxyɨch yɨꞌ ajcxy huɨdibɨ xymɨdundɨgooybɨch? ¿Nej nméecxɨbɨch ixtɨ coonɨ huɨxtujcꞌocɨ?
\p
\v 22 Chi Jesús yꞌadzooy:
\p
―Caꞌ yhuɨxtujcꞌócɨty, hueꞌ meecxɨpy mɨdaax mɨgoꞌpx jamɨdaꞌpx majmocx mɨdaaxꞌoc.
\s Je tumbɨ yꞌijxpejt huɨdibɨ caꞌp ymɨgüg huinmeecxy
\p
\v 23 Dios yꞌaneꞌmɨn jiiby tzajpjoty jaduꞌn nipaady nej tüg rey huɨdibɨ huijtzꞌoyɨɨyb mɨɨd je ytumbɨdɨjc jajaduꞌñɨ ajcxy yjacmɨnucxyꞌadyii.
\v 24 Je rey ytɨmyhuijtzꞌoyɨɨychondacyñɨ anajty cuentas, co oy yjädy tüg ytumbɨ huɨdibɨ anajty mɨnuucxyꞌajtɨp canaag millón.
\v 25 Com jeꞌ ytumbɨ caꞌ anajty mɨɨdɨty ti mɨɨd mɨgüedɨɨb jeꞌ yhuindzɨn. Huinꞌit je huindzɨn aneꞌmy co huen jeꞌ ytumbɨ yajtoocnax quipxyɨ mɨɨd yꞌungdöxyɨjc etz tügꞌócɨy tijaty ymɨɨd, jaydëb ñuucxy yꞌadujctähuɨpy.
\v 26 Huinꞌit ytumbɨ ycoxtɨnayꞌɨhuɨɨy ma yhuindzɨn yhuinduu etz nɨmay: “Huindzɨn, paꞌayoogɨch, etz ɨɨch miich nmɨgüejtähuɨpy.”
\v 27 Chi je tumbɨ yhuindzɨn yajtuñ paꞌayoꞌn, chi huinmeecxɨp je nuucxy, e yajpɨdzɨmy pujxtɨgoty.
\v 28 E mɨcꞌamy co jeꞌ ypɨdzɨmy pujxtɨgoty, chi ymɨnaybatɨ tüg ymɨgüg huɨdibɨ anajty mɨɨd quipxyɨ tɨ ytuñ. Jeꞌ anajty mɨnuucxꞌajtɨp tɨm hueenɨ, chi jeꞌ yöcmɨmadzɨy jeꞌ ymɨgüg huɨdibɨ mɨɨd ytuuñ, chi nɨmay: “Cuet huɨdibɨ mnuucxꞌajtpy ma ɨɨch.”
\v 29 Huinꞌit ymɨgüg ycojxtɨnayꞌɨhuɨɨy ma jeꞌ yhuinduu. Chi mɨnuucxtaacy nɨmay: “Paꞌayoogɨch. Ɨɨch miich nmɨgüejtähuɨpy.”
\v 30 Chi je jadügpɨ caꞌ mecxtujcɨn yajtuuñ. Chi oy ymɨgüg pɨdägy pujxtɨgoty, ixtɨ coonɨ anajty mɨcuedyii.
\v 31 Co je jacjadyii ymɨdumbɨdɨjc oy ixy jaduꞌn nej tɨ yajtuñ jeꞌ ymɨgüg, chi ooy ajcxy jɨhuɨɨy. Chi ajcxy nɨcx ma je yhuindzɨn etz yajnɨmayday tügꞌócɨy nejjaty anajty tɨ ijxcɨxy.
\v 32 Huinꞌit jeꞌ ajcxy yhuindzɨn oy yajhuoyii je huɨdibɨ mɨnuucxꞌajtɨp canaag millón. Chi nɨmay: “Miich ooy mdzachjɨbɨcjäyɨty. Tɨ ɨɨch miich nhuinmeecxɨ tügꞌócɨy je mnuucxy, mɨɨd co miich paꞌayoohuɨn mbɨjctzooy ma ɨɨch.
\v 33 E miich nañ jaduꞌn ixyipy tɨ mbaꞌayoy je mɨgüg huɨdibɨ mɨɨd mmɨduñ, huɨdibɨ xymɨnuucxyꞌajtp, jaduꞌn nej ɨɨch miich tɨ nbaꞌayooy.”
\v 34 Chi je huindzɨn ooy chachjotmaꞌty, chi pɨdacy aneꞌmɨn co huen yajtzaachytuñ jeꞌ ytumbɨ mabaad cuejttäy tügꞌócɨy huɨdibɨ ñuucxyꞌajtpy.
\v 35 Chi Jesús ycapxycɨ́jxnɨ, mɨnañ:
\p
―Tɨm jaduꞌn nej jada rey tɨ tuñ mɨɨd je ytumbɨ, nañ tɨm jaduꞌn Dios tunɨpy mɨɨd miich ajcxy, pen caꞌ nidüg nidügtɨ miich ajcxy caꞌ mhuinmeecxy je mmɨgügtɨjc amumdügjot.
\c 19
\s Jesús yajꞌixpɨcy mɨɨd co jäy ytöxyɨjc ixmach
\p
\v 1 E co Jesús capxtay jada ayuc, chi choñ Galilea, chi oy yjädy ma Judea it jɨm Jordán mɨj nɨɨ nïnaxy.
\v 2 Chi ooy mayjäy ypanɨcxɨ, e jɨm yajtzoocy huɨdijaty anajty yuu mɨɨd paꞌm mɨɨd.
\p
\v 3 Huinꞌit nijëjɨty je fariseos ajcxy nimiiñ Jesús co yajmachcähuaangɨxy anajty. Chi ajcxy yꞌamɨdooy:
\p
―¿Nej janch co Dios tɨ xymooyɨm cötujcɨn co jëbɨ tüg yëydɨjc ixmadzip ytöxyɨjc mɨɨd tɨm hueenɨ ti capxy ti ayuc?
\p
\v 4 Chi Jesús yꞌadzooy:
\p
―¿Nej caꞌnɨ miich ajcxy mꞌixy mgapxy ma ymiiñ jaybety ma Dios ñecy co je naaxhuiñybɨ chondacy, co Dios ogaꞌñ yajcojy tügꞌócɨy tijaty huɨdibɨ jiꞌajtp co “Dios yajcojy tüg yëydɨjc etz tüg töxyjäy”?
\v 5 Nañ jaduꞌn Dios ymɨnañ: “Je yëydɨjc yꞌixmadzip ytaj yteedy etz pudɨgɨ̈huɨpy jeꞌ ytöxyɨjc. E je yëydɨjc etz ytöxyɨjc túꞌcɨy idaangɨxy.”
\v 6 Paady caꞌ ñimetzɨty ajcxy, com je yëydɨjc etz ytöxyɨjc tügmucy yꞌidaangɨxy. Com Dios tɨ huijtzmucy je yëydɨjc mɨɨd je töxyjäy, paady caꞌ huaadɨty co jäy ajcxy huijtzhuäcxyp tɨɨbɨ Dios huijtzmucy. 
\p
\v 7 Huinꞌit je fariseos ajcxy yꞌamɨdooy Jesús:
\p
―¿Naꞌamy co Moisés cötujcɨn tɨ yejcy jecyꞌajty co tüg yëydɨjc jëbɨ huaad ixmach ytöxyɨjc, e möhuɨpy ñinecy ñidɨyꞌajt e jaduꞌn jëbɨ ixmach?
\p
\v 8 Chi Jesús ymɨnañ:
\p
―Moisés jada cötujcɨn tɨ xymooygɨxy co jëbɨ mꞌixmajtzcɨxy mdöxyɨjc mɨɨd co miich ajcxy mdzachcöjuuñɨty, caꞌ mgapxymɨdohuaangɨxy Dios. Per co je naaxhuiñybɨ chondacy caꞌ anajty jaduꞌnɨty.
\v 9 Janch tɨyꞌajt jaduꞌn nej ɨɨch miich ajcxy nɨmaaygɨxy co je yëydɨjc huɨdibɨ yajjayhuäcxp mɨɨd je ytöxyjäy, e je ytöxyjäy caꞌ anajty tɨ ytundɨgooyb mɨɨd huingbɨ yëydɨjc, hueꞌ jeꞌ yëydɨjc ytundɨgooy co ixmach ytöxyɨjc etz ypɨjctɨgach mɨɨd huingbɨ. Nañ tɨm jaduꞌn pen tüg yëydɨjc ypɨcy mɨɨd tüg töxyjäy huɨdibɨ ñäy tɨ yꞌixmachyii, hueꞌ tundɨgooyb anajty je yëydɨjc.
\p
\v 10 Co Jesús ydiscípulos ajcxy mɨdooy jada ayuc, chi ajcxy ymɨnañ:
\p
―Pen jaduꞌn jëduꞌn je tɨyꞌajt co je yëydɨjc caꞌ huaad ixmadzip ytoxyjäy, jacꞌoy co caꞌ nbɨjcɨm.
\p
\v 11 Chi Jesús ymɨnañ:
\p
―Caꞌ tügꞌócɨy je jäy huinjɨhuɨ̈y jadayaabɨ tɨyꞌajt. Jëyɨ ajcxy huinjɨhuɨ̈huɨp pɨn ajcxy Dios pɨdaacɨ co huinjɨhuɨ̈huɨp.
\v 12 Ji canaagnax je ayuc je huinmaꞌñ nej caꞌ yjëbɨty ypɨgɨpy je yëydɨjc. Naagɨty piꞌctɨjc ymaꞌxungꞌaty e caꞌ ycaꞌpxɨty ñinïcxy, paady caꞌ pɨcy ajcxy. E nijëjɨty je yëydɨjc caꞌ huaad ypɨcy, mɨɨd jëgɨxpɨ co anajty jeꞌ tɨ ymɨjaapɨgyii. E nijëjɨty yëydɨjc huɨꞌmy jaybɨcy mɨɨd jëgɨxp co ajcxy ytuñ ma Dios ytung, je Dios huɨdibɨ aneꞌmyb tzajpjoty. Pɨnjaty cöbɨgamy ɨɨch nꞌayuc huen cöbɨcy.
\s Jesús conucxy maybiꞌctɨjc
\p
\v 13 Chi naagɨty je jäy mɨɨdnɨcxy yꞌung yꞌanäg ma Jesús jaydëb yajcɨ̈nïxajɨpy etz Dios mɨbɨjctzoy mɨɨd yɨꞌ ajcxy ycɨxpɨ. Chi Jesús ydiscípulos ajcxy ojy je jäy ajcxy huɨdibɨ anajty mɨɨd miimb je yꞌung yꞌanäg, nɨmaaygɨxy co caꞌ jaduꞌn yꞌoyɨty.
\v 14 Per Jesús ymɨnañ:
\p
―Huen mɨɨd miiñ ajcxy piꞌcꞌanäg ma ɨɨch, caꞌ mjɨjpcogapxɨɨygɨxy. Com pɨnjaty ymɨbɨjcp ɨɨch ngapxy nꞌayuc, jaduꞌn nej jadayaabɨ piꞌcꞌanäg ajcxy ymɨbɨcy, jeꞌ ajcxy tɨgɨ̈huam ma Dios yꞌaneꞌmy jiiby tzajpjoty.
\p
\v 15 Chi Jesús cɨ̈nïxajy je piꞌcꞌanäg ajcxy. Chi ñɨcxnɨ. 
\s Tüg yeegꞌanägnɨp comeeñybɨ mɨɨdmɨydägy Jesús
\p
\v 16 Chi tüg yëydɨjc oy ixy Jesús. Chi yꞌamɨdooy:
\p
―Huindzɨn, ¿ti jadaꞌ co oy ɨɨch ndunɨpyɨch jaydëb nbaadɨbɨch jugyꞌajtɨn huɨdibɨ caꞌ ycɨxɨpy ytɨgoyɨpy?
\p
\v 17 Chi Jesús yꞌadzooy:
\p
―¿Naꞌamy co xyñɨmäyɨch co oy huindzɨn ɨɨch? Dios tügpajc oyɨp, caꞌ jac pɨn. Pen miich mdzojcpy co mbadaꞌñ jugyꞌajtɨn huɨdibɨ caꞌ ycɨxɨpy ytɨgoyɨpy nimɨna mguydunɨpy je Dios ycötujcɨn huɨdibɨ Moisés ycojaay jecyꞌajty.
\p
\v 18 Chi je yeegꞌanäg yajtɨɨhuimbijty:
\p
―¿Huɨdibɨ cötujcɨn miich mdijp?
\p
Chi Jesús ymɨnañ:
\p
―Caꞌ mɨgüg myajꞌögɨpy. Caꞌ mɨgüg ytöxyɨjc mɨgapxtɨgooyɨpy. Caꞌ mmeedzɨp. Caꞌ mmɨgüg mhuinꞌɨɨnɨp.
\v 19 Yajmɨjꞌat mdaj mdeedy. Mdzogɨpy mjɨhuɨ̈huɨp miich mmɨgügtɨjc, tɨm jaduꞌn nej miich cɨꞌm mnaychogyii.
\p
\v 20 Chi je yeegꞌanäg Jesús nɨmaayɨ:
\p
―Tɨ nguydundäyɨch jadayaabɨ cötujcɨn ajcxy maabɨ ɨɨch nbiꞌcꞌatyɨch. ¿Ti jada njacyajtɨgoyꞌijtpyɨch?
\p
\v 21 Chi Jesús jadügꞌoc yꞌadzooy:
\p
―Pen miich mꞌidam tudägy, nɨcx tooctɨgoydaꞌ huɨdijaty miich mɨɨd, etz moꞌ je meeñ je jäy ajcxy huɨdijaty ayoob. Co jaduꞌn mdunɨpy, chi mbaadɨpy oyꞌajtɨn jiiby tzajpjoty. Co jaduꞌn mdooctähuɨpy tijaty miich mɨɨd, chi miinɨp jadügꞌoc ma ɨɨch nyajpaadyɨch, e pajamgɨch.
\p
\v 22 Co je yeegꞌanäg jaduꞌn mɨdooy, chi ñɨcxnɨ taj may com ooy anajty chachcomeeñɨty.
\p
\v 23 Huinꞌit Jesús nɨmay jeꞌ ydiscípulos ajcxy:
\p
―Janch tɨyꞌajt jaduꞌn nej nɨmaaygɨxy co ooy ymɨjhuinmaꞌñɨty co tüg comeeñyjäy ytɨgɨ̈huɨpy ma Dios yꞌaneꞌmy jiiby tzajpjoty.
\v 24 Jadügꞌoc nmɨnaꞌñɨch co ooy chipɨty co tüg comeeñyjäy tɨgɨ̈huɨpy ma Dios yꞌaneꞌmy, nïgɨ caꞌ chipɨty co tüg camello ñaxɨpy ma tüg xuꞌñꞌɨjx yxutɨty.
\p
\v 25 Co Jesús ydiscípulos ajcxy jaduꞌn mɨdoy, chi ajcxy ooy jɨhuɨy huinmay. Chi ajcxy ñayꞌamɨdoohuɨ miñ xyɨpy:
\p
―¿Pɨn jëbɨ paady jeꞌ yꞌalma nïdzoocɨn?
\p
\v 26 Chi Jesús ajcxy huindɨcxpejty etz nɨmay:
\p
―Je huɨdibɨ jäy ajcxy chipjɨhuɨɨyb, mɨɨd Dios caꞌ ni ti chipɨty.
\p
\v 27 Huinꞌit Pedro ymɨnaꞌñ:
\p
―Huindzɨn, ɨɨch ajcxy tɨ nꞌixmajtztäyɨch tügꞌócɨy huɨdijaty anajty ɨɨch ajcxy nmɨɨd etz nbanɨcx ɨɨch ajcxy miich. ¿E ti jadaꞌ ɨɨch ajcxy nbaadaamybɨch?
\p
\v 28 Chi Jesús yꞌadzooy:
\p
―Janch tɨyꞌajt nmɨnaꞌñɨch co anajty je xɨɨ je tiempo paady mɨna Dios yajtɨgajtztähuɨpy je tzajp etz naaxhuiñybɨ, co anajty ɨɨch, je jäy huɨdibɨ tzoon tzajpjoty, nꞌityɨch ma ngötujctacɨch oybɨ jiiby tzajpjoty, chi miich ajcxy huɨdi tɨ xypahuɨdityɨch, miich ajcxy mbadamy majmetz cötujctac, e miich ajcxy mdɨydunɨpy je majmetz pɨcypɨ Israeljäy ajcxy.
\v 29 E tügꞌócɨy jäy ajcxy huɨdibɨ tɨ ixmajtztäy yjɨɨn ytɨjc, yꞌuch ymɨgüg, yꞌung ytöxyɨjc, yꞌung yꞌanäg, ytaj yteedy, o ycam ytuꞌ mɨɨd ɨɨch ycɨxpɨ, yɨꞌ ajcxy ypadamyb mɨgoꞌpxꞌoc, caꞌydɨ huɨdibɨ tɨ ixmach. E ypadamy je jugyꞌajtɨn huɨdibɨ caꞌ ycɨxɨpy ytɨgoyɨpy ni mɨna.
\v 30 Mayjäy ajcxy huɨdibɨ cham ymɨɨd mɨjꞌajtɨn cötujcɨn, tzajpjoty caꞌ ajcxy mɨɨdꞌadaꞌñ mɨjꞌajtɨn cötujcɨn. E mayjäy huɨdibɨ cham caꞌ mɨɨdɨty ajcxy mɨjꞌajtɨn cötujcɨn, tzajpjoty ymɨɨdꞌadamy ajcxy mɨjꞌajtɨn cötujcɨn.
\c 20
\s Je naymɨdunɨptɨjc yꞌijxpejt
\p
\v 1 Jaduꞌn Jesús ymɨnañ:
\p
―Je Dios yꞌaneꞌmɨn jiiby tzajpjoty jaduꞌn nipaady nej tüg cogambɨ huɨdibɨ ooy mɨj cam mɨɨdɨty. Chi je cogam jopyñɨ choñ ma oy nɨcxy ixtäy tumbɨdɨjc ajcxy huɨdibɨ yajpɨdɨ̈gɨpy yɨ uva cosecha.
\v 2 Chi ycapxytuñ mɨɨd nidüg nidüg ytumbɨ co mujuyaꞌñ tüg denario meeñ tüg xɨɨbɨ. Chi quejxy nidüg nidüg ytumbɨ ma je uva cam.
\v 3 Chi petyxɨɨ je cogam ñɨcxy jadügꞌoc tumbɨ ixtaayb. Chi paty cajp cujc nijëjɨty tumbɨ huɨdibɨ caꞌ ti tung mɨɨdɨty.
\v 4 Chi je cogam je tumbɨ ajcxy nɨmay: “Nɨcx miich ajcxy tuñ ma ɨɨch ngosecha. Cham nmujuyɨpy jaduꞌn nej ytɨyꞌajtɨty.” Chi ñɨcxy ajcxy mɨdumbɨ. 
\v 5 Chi je cogam ñɨcxy jadügꞌoc cujcxɨɨ tumbɨ ijxtaayb. Nañ jaduꞌn nɨcxy jadügꞌoc mɨnacyxɨɨ.
\v 6 Nañ tɨm jaduꞌn tzuu jadügꞌoc je cogam ñɨcxy tumbɨ ijxtaayb, chi paty nijëjɨty cajpcujc huɨdibɨ caꞌ ti tung mɨɨdɨty ajcxy, chi ajcxy nɨmay: “¿Naꞌamy co miich ajcxy myaajɨty? ¿Nej co caꞌ mnɨcxy mdungɨxy?”
\v 7 Chi jeꞌ ajcxy yꞌadzooy: “Jeꞌ co caꞌ ɨɨch ajcxy pɨn tɨ xycapxytuñ.” Chi je cogam ajcxy nɨmay: “Nɨcx miich ajcxy tun ma ɨɨch nnaaxjot. Cham ɨya nmujuyɨpy jaduꞌn nej ypaadyii.”
\v 8 Co oy ycodzɨɨyñɨ, chi je huindzɨn nɨmay je huɨdibɨ nigopꞌajtp je tung: “Nɨcx mɨjhuoodäy je tumbɨdɨjc etz mujuyɨpy. Mujuy jayɨjp huɨdibɨ tɨ ymiiñ axam tumbɨ etz jɨm nɨcxy myajcogɨxɨ̈y ma huɨdibɨ anajty tɨ miiñ jayɨjp tumbɨ.”
\v 9 Chi ajcxy jayɨjp yajmujuy je tumbɨ ajcxy huɨdibɨ anajty tɨ ytɨgɨɨy tumbɨ axam. Chi yajmujuy ajcxy jaduꞌn nej anajty jäy ñaymujuyii je tüg xɨɨbɨ.
\v 10 Co miiñ je tumbɨ ajcxy je huɨdibɨ ajcxy jayɨjp tɨgɨɨy tumb. Chi ajcxy jotꞌajtɨ co jacꞌanaxy yajmujuyaꞌñ. Per quipxyjaty ajcxy paty tüg meeñ nidügꞌócɨy je tumbɨdɨjc.
\v 11 E co ajcxy quipxyjaty yajmujuy, chi ajcxy ytɨgɨɨy jotmaꞌtpɨ.
\v 12 Chi ajcxy nɨmay je cam huindzɨn: “¿Naꞌamy co quipxyjaty ɨɨch ajcxy tɨ xymujuyɨch mɨɨd je huɨdibɨ tɨ miiñ axam tumbɨ? Yɨꞌ ajcxy tüg jaxɨ̈gy tɨ ytuñ, e ɨɨch ajcxy tüg xɨɨ je anbɨ tɨ ngöbɨcyɨch.”
\v 13 Chi je cam huindzɨn yꞌadzooy, nɨmay nidügtɨ jeꞌ ajcxy: “Miich, ɨɨch nmɨgüg, caꞌ ɨɨch jɨbɨc tɨ nduñɨch mɨɨd miich. ¿Nej caꞌ ɨɨch ajt ngapxytuunɨm co jaduꞌn nmujuyaꞌñ tüg denario meeñɨ?
\v 14 Con yɨ mmeeñ, e nɨcxnɨ. Jaduꞌn ndzocyɨch co quipxyjaty nmujuyaꞌñɨch miich mɨɨd huɨdibɨ tɨ ymiñ axam ma je tung.
\v 15 ¿Nej caꞌ huaad ɨɨch nduñɨch mɨɨd ɨɨch nmeeñ nej ndzócyɨchɨ? ¿O co xyajcaꞌoyꞌixyɨch, co ɨɨch ooy nꞌoyjäyɨty?”
\v 16 E huɨdibɨ ajcxy jaccogɨxɨɨyb, yɨꞌ ajcxy jayɨjpꞌadam. E huɨdibɨ ajcxy jayɨjpꞌajtp cham, yɨꞌ ajcxy yjaccogɨxɨ̈huamb. May ooy yjayajhuoomiñ e hueenɨ huidɨ huinꞌíjxɨpy.
\s Jesús capxypɨdzɨmy jadügꞌoc co yꞌögaꞌñ
\p
\v 17 E co Jesús anajty ñɨcxy ma Jerusalén tüꞌaa, chi mɨɨd nɨcxy ahuingujc je nimajmetzpɨ ydiscípulos. Chi ajcxy nɨmay:
\p
\v 18 ―Jaduꞌn nej miich ajcxy mꞌijxy mnejhuɨ̈y cham ɨɨch ajt nbaꞌttɨgɨɨyɨm jɨm Jerusalén. Jɨm Jerusalén ɨɨch, je jäy huɨdibɨ tzoon tzajpjoty, xyajcɨ̈yegaamɨch je teedy mɨjtungmɨɨdpɨ etz escribas ajcxy. Nyajtɨydunaꞌñɨch etz pɨdägaꞌñ ajcxy anéꞌmɨn co nꞌögɨbɨch.
\v 19 E yɨꞌ ajcxy xycɨ̈yegaꞌñɨch ma je huɨdibɨ caꞌ yjudiojäyɨty, jɨgɨx xyñixïgɨbɨch xyajxïgɨbɨch, xycoxɨpɨch, etz xyajcruutzpedɨpɨch ajcxy. E co nꞌögɨbɨch, chi njugypɨgɨpyɨch codugɨɨg xɨɨ.
\s Huɨdibɨ Jacobo etz Juan ytaj ypɨjctzou
\p
\v 20 Chi je Zebedeo ytöxyɨjc nimiiñ Jesús mɨɨd metz je ymang; Jacobo etz Juan. Huinꞌit je ungdaj huingojxtɨnayꞌɨhuɨɨy Jesús, pɨjctzoy mayꞌajt.
\v 21 Chi yajtɨɨy Jesús:
\p
―¿Ti mdzojcpy?
\p
Chi je ungdaj yꞌadzooy:
\p
―Tun mayꞌajt möhuɨpy ɨɨch metzpɨ yɨ nmang yɨ jacmɨjtung ma miich mꞌaneꞌmɨn, jaydëb ɨñähuɨpy ma miich mmɨjc, tüg aꞌoyꞌamy etz jadüg anajtyꞌamy.
\p
\v 22 Chi Jesús yꞌadzooy:
\p
―Miich ajcxy caꞌ mhuinjɨhuɨ̈y ti ajcxy mbɨjctzooyb. ¿Nej mmɨnaxaꞌñ myajnaxaꞌñ miich ajcxy je tzaachypɨ huɨdibɨ ɨɨch nmɨnaxamy nyajnaxamyɨch? Jaduꞌn nej jɨhuɨ̈y mꞌügaꞌñ ajcxy je taꞌm nɨɨ huɨdibɨ ɨɨch nꞌügamy e mbaadaꞌñ je nɨɨbejtɨn huɨdibɨ ɨɨch nbadamyb.
\p
Chi jeꞌ ajcxy yꞌadzooy:
\p
―Jëbɨ.
\p
\v 23 Chi Jesús ymɨnaꞌñ:
\p
―Janch tɨyꞌajt nej miich ajcxy mɨnaꞌñ co mmɨnájxcɨxɨpy myajnájxcɨxɨpy je tzaachypɨ huɨdibɨ nnaxaꞌñɨch. Per caꞌ ɨɨch cötujcɨn nmɨɨdɨdyɨch co ɨɨch miich ajcxy nbɨdägɨpy mɨjtungmɨɨd, co myajpaadɨp tüg ma ɨɨch nmɨjc aꞌoyꞌamy e jadüg anajtyꞌamy. Hueꞌ janchtɨy Dios Teedy ymɨɨd niꞌixɨꞌ pɨnjaty tɨ huinꞌixy jaydëb yajnɨcxɨp je mɨjtung ma ɨɨch nꞌaneꞌmdac.
\p
\v 24 Co je nimajcpɨ ydiscípulos ajcxy nejhuɨɨy jaduꞌn nej Jacobo etz Juan pɨjctzooy mayꞌajt ma Jesús, chi ajcxy ooy mɨjotmaꞌty Jacobo etz Juan.
\p
\v 25 Huinꞌit Jesús mɨjcapxy jeꞌ ydiscípulos ajcxy, chi nɨmay jaduꞌn:
\p
―Miich ajcxy mnejhuɨy co yɨ jäy ajcxy huɨdibɨ mɨjtungmɨɨdpɨ ma je maybɨ naax cajp, mɨc ajcxy aneꞌmy je naax cajp. Nañ jaduꞌn yɨꞌ ajcxy huɨdibɨ mɨcꞌajt mɨɨd ma je maybɨ naax cajp, mɨc ajcxy aneꞌmy je jäy ajcxy.
\v 26 Per miich ajcxy caꞌ mjaduꞌnɨty nej je mɨjtungmɨɨdpɨ ma je maybɨ naax cajp. Pɨnjaty miich ajcxy je mɨj tung yajnɨcxɨp, copɨcy ñaybɨdägɨɨyb nej tüg tumbɨ.
\v 27 Pen ji miich ajcxy nidüg nigohuajcꞌadaꞌñ, copɨcy ñaybɨdägɨɨyb nej tüg tumbɨ.
\v 28 Com ɨɨch nañ jaduꞌn, je jäy huɨdibɨ tzoon tzajpjoty, tɨ nmiiñɨch ya naaxhuiñ jaydëbɨ nbubedɨpyɨch yɨ mayjäy ajcxy. E canan yɨꞌ ajcxy xypubedɨpɨch. Ngɨ̈yegaamyɨch njugyꞌajtɨn ma yɨ oꞌcɨn mɨɨd je mayjäy ycɨxpɨ, jaydëbɨ ngohuaꞌnɨch jäy ajcxy yꞌalma huɨdibɨ tɨgoyam.
\s Jesús yajtzoocy metz jay huintzpɨ
\p
\v 29 E co Jesús etz ydiscípulos ajcxy ycajppɨdzɨmy jɨm Jericó, chi ypanɨcxɨ ajcxy mayjäy.
\v 30 E jɨm anajty ɨñaay nimetz huintzpɨ tübaꞌáy. E co ajcxy nejhuɨɨy co jɨm anajty ñaxy Jesús, chi ajcxy yaaxpɨ jojcpɨ:
\p
―Huindzɨn, David yꞌap yꞌoc, tun mayꞌajt ɨɨch paꞌayoog.
\p
\v 31 Chi je mayjäy ajcxy ojcooty je metzpɨ jäy huintzpɨ, nɨmay ajcxy co huen amoñ. Per je huintzpɨ nïgɨ mɨnanꞌɨdɨ̈ch:
\p
―Huindzɨn, David yꞌap yꞌoc, tun mayꞌajt ɨɨch paꞌayoog.
\p
\v 32 Huinꞌit Jesús ytɨnayxɨjp, e ymɨnañ:
\p
―Ocmin miich ajcxy ya.
\p
Huinꞌit yajtɨɨy:
\p
―¿Ti mdzojcpy ndunɨpyɨch mɨɨd miich?
\p
\v 33 Chi ajcxy ñɨmaayɨ:
\p
―Huindzɨn, ndzojcpyɨch co xyajhuindɨcxɨ̈gɨbɨch.
\p
\v 34 Huinꞌit Jesús paꞌayoogoty ajcxy. Chi ajcxy nïdonɨ ma jeꞌ yhuiin, e mɨcꞌamy je huintzpɨ ajcxy yꞌijxɨ̈gy. Chi Jesús ajcxy panɨcxy.
\c 21
\s Jesús ytɨgɨɨy jɨm Jerusalén
\p
\v 1 E co anajty Jesús etz je mayjäy ajcxy tɨ mɨhuingonɨ Jerusalén, chi yjaꞌty ma Betfagé cajp mɨhuingon je Olivos cögop. E jɨm Jesús quejxy nimetz ydiscípulos ajcxy.
\v 2 Chi ajcxy nɨmay:
\p
―Nɨcxcɨx ma je cajp huɨdibɨ jɨmꞌamy. E jɨm tüg burro ycoxochɨty mɨɨd yꞌung. Coguejttüdɨp ajcxy je burro e yajmiingɨx ya ma ɨɨch.
\v 3 E pen jɨm pɨn nej xyñɨmäy, nɨmaꞌ co je Huindzɨn yajtunam, e yajhuimbidaꞌñ mɨcꞌamy.
\p
\v 4 Jadayaabɨ oy jaduꞌn ytuñyii yjadyii ycɨxy ycaꞌpxy jaduꞌn nej je profeta jecyɨp jaay, co jaduꞌn ymɨnañ:
\q 
\v 5 Yajnɨmaꞌ je jäy ajcxy huɨdibɨ tzɨnaayb jɨm Sión (Jerusalén), ocꞌijxcɨx, chi miiñ ajcxy je mrey, yung nax yjot yhuinmaꞌñ mɨɨdɨty je mrey, etz burrocɨ́xy miiñ. Ma tüg burro mang huɨdibɨ ytaj tzɨmy yajyöyp.
\p
\v 6 Chi je metz ydiscípulos ajcxy cuyduñ nej anajty Jesús tɨ yꞌaneꞌmyii.
\v 7 Yajjaꞌty ajcxy je burro mɨɨd ymang. Chi Jesús ydiscípulos ajcxy jɨɨbeꞌñ je metzpɨ burro mɨɨd ajcxy yjocxhuit, chi Jesús yajꞌɨñay je burro mang.
\v 8 E je mayjäy ooy yajhuinyëbɨy ajcxy je tüꞌaa mɨɨd yhuit, chi ajcxy oy ypuxy quipy yꞌaacx. Chi ajcxy pɨdacy ma je tüꞌaa.
\v 9 E jɨm ñajxy je burro, e je mayjäy huɨdibɨ nɨcxp jayɨjp, e nañ jaduꞌn huɨdibɨ anajty mimb axam, ooy ajcxy ytɨgɨɨy huambɨ jɨhuɨɨyb, chach mɨnaangɨxy:
\p
―¡Hosana! ¡Gloria a Dios! ¡Ooy ycömayɨty Dios! Huen capxpaady idɨpy jada yëydɨjc huɨdibɨ mimb ma yɨ nHuindzɨn Dios yxɨɨ etz mɨɨd ymɨcꞌajt. ¡Gloria a Dios! 
\p
\v 10 Co Jesús ytɨgɨɨy jɨm Jerusalén, chi tügꞌócɨy je mayjäy huinmayꞌahuɨdijty, chi ñayꞌamɨdóohuɨgɨxy miñ xyɨpy:
\p
―¿Pɨn yɨꞌ yɨjiibɨ jäy?
\p
\v 11 Chi mayjäy yꞌadzooy:
\p
―Yɨꞌ jeꞌ je profeta Jesús huɨdibɨ tzoon ma Nazaret cajp ma Galilea it.
\p
\v 12 Huinꞌit Jesús ytɨgɨɨy ma Dios ytɨjc. Chi ixquejxtay tügꞌócɨy je ajuybɨ adoocpɨ huɨdibɨ anajty yajpatp jiiby. Chi tijhuimbijttay tügꞌócɨy je mesa ma anajty jäy jɨm ymeeñyhuingogongɨxy, etz nañ jaduꞌn tijhuimbijttay je muuxytoocpɨ ɨñaybejt.
\v 13 Chi jaduꞌn nɨmay ajcxy:
\p
―Jaaybety jaduꞌn ymiiñ ma Dios ñecy: “Ɨɨch ndɨjc jeꞌ yɨꞌ ma jäy ajcxy Dios mɨbɨjctzoy”, per miich ajcxy hueꞌ yɨꞌ mhuaꞌñ meetzpɨ tɨjc.
\p
\v 14 E co anajty jiiby tzajptɨgoty Jesús, chi jiiby ñimiinɨ huɨdijaty anajty huintz, huɨdijaty anajty cɨ̈maꞌty tecymaꞌty, chi Jesús yajtzooctay.
\v 15 Per je teedy ajcxy huɨdibɨ mɨjtungmɨɨd etz je escribas ajcxy ooy mɨjotmaꞌty Jesús co ajcxy ijxy nejhuɨɨy jaduꞌn nej Jesús anajty tuñ mɨjhuinmaꞌñ. Etz nañ jaduꞌn ajcxy ijxy co je piꞌcꞌanäg anajty ajcxy yhuaangɨxy yjɨhuɨɨygɨxy jiiby tzajptɨgoty, ymɨnaangɨxy: “¡Huen cömayꞌidɨpy je rey David yꞌap yꞌoc!”
\v 16 Chi je teedy etz escribas ajcxy Jesús nɨmay: 
\p
―¿Nej caꞌ miich mmɨdooy nej je piꞌcꞌanäg chach mɨnaangɨxy?
\p
Chi Jesús yꞌadzooy:
\p
―Nmɨdooybɨch. ¿Nej caꞌ miich ajcxy mgapxyñɨ Dios ñecy ma ymiiñ jaaybety co jaduꞌn ymɨnaꞌñyɨ?:
\q Tɨ myajꞌixpɨcy ɨɨy ma je piꞌctɨjc maꞌxungdɨjc jaydëbɨ ajcxy ɨɨbaadɨp capxpaadɨp Dios.
\p
\v 17 Chi Jesús ycapxycɨ́jxy mɨɨd je teedy etz escribas ajcxy etz chooñ jiiby tzajtɨgoty. Chi ñɨcxy ma Betania cajp, e jɨm yajnajxy je tzumbɨ.
\s Jesús capxpojcy je higuerɨ caꞌp anajty ytɨɨmꞌaty
\p
\v 18 E co yxɨɨmɨy ytɨɨcxɨ̈gy, chi Jesús yhuimbijty Jerusalén. E ma anajty tɨm ytüyöy, jɨm yuuböccootɨ. 
\v 19 E jɨm ijxy ma tübaꞌ tüg cop je higuerɨ quipy. Chi ninɨcxy. Chi pätꞌijxy, per caꞌ anajty ni tüg ytɨɨm, jëdaꞌajty jeꞌ yꞌaay. Chi Jesús nɨmay je higuerɨ quipy:
\p
―¡Ni ca mɨnaa xɨɨ mdɨɨmꞌadɨpy!
\p
E mɨc mɨ́cɨyɨ je higuerɨ quipy ytɨɨch.
\v 20 E co jeꞌ ydiscípulos ajcxy jaduꞌn ijxy, chi ajcxy ooy huinmay. Chi ajcxy yꞌamɨdooy Jesús:
\p
―¿Naꞌamy co yɨ higuerɨ quipy mɨcꞌamy tɨ ytɨ̈ch?
\p
\v 21 Chi Jesús yꞌadzooy:
\p
―Janch tɨyꞌajt jaduꞌn nej nnɨmaaygɨxy. Pen miich ajcxy mɨɨd je mɨbɨjcɨn, etz caꞌ ajcxy mmɨbɨcy aametz jotmetz, jëbɨ mɨjhuinmaꞌn mdungɨxy nej ɨɨch tɨ nduñɨch. E nañ jaduꞌn jëbɨ jac mɨjpɨ mɨjhuinmaꞌñ mdunɨpy ajcxy. Jëbɨ ajcxy tun cop mnɨmäy: “Quëg ya, tɨgɨꞌ mejyjoty” e xycapxymɨdohuɨpy ajcxy je tun je cop.
\v 22 E tügꞌócɨy tijaty miich ajcxy mbɨjctzooyb huen ytɨmytijyɨty, pen mmɨbɨjcp ajcxy, mbaadɨp ajcxy. 
\s Jesús ycötújcɨn
\p
\v 23 Co Jesús yjaꞌty Jerusalén, chi ytɨgɨɨy jadügꞌoc ma Dios ytɨjc. E jiiby anajty yajꞌixpɨcy je mayjäy, chi ñimiinɨ je teedy mɨjtungmɨɨdpɨ etz judío mɨjjäydɨjc ajcxy. Chi ajcxy yꞌamɨdoohuɨ:
\p
―¿Ma cötujcɨn tɨ mbaady co jaduꞌn mduñ tzajtɨgoty? ¿Pɨn jada cötujcɨn tɨ xymöy?
\p
\v 24 Chi Jesús yꞌadzooy:
\p
―Nañ jaduꞌn ɨɨch miich ajcxy nyajꞌamɨdoohuamy tüg ayuc. Pen mꞌadzooyb ajcxy jada ayuc, huinꞌit ɨɨch miich ajcxy nyajnɨmähuɨpy ti cötujcɨn ɨɨch mɨɨd nduñ huɨdijaty.
\v 25 ¿Pɨn quejxy je Juan, je Bautista, yajnɨɨbejtpɨ, Dios o jäy ajcxy?
\p
Chi ajcxy ñayñɨmáayɨgɨxy miñ xyipy:
\p
―Co ixyipy ajt nꞌadzoohuɨm co Dios Juan quejx, huinꞌit xyꞌadzoohuɨm: “¿Naꞌamy co miich ajcxy caꞌ mmɨbɨjcy Juan?”
\v 26 Per nañ jaduꞌn caꞌ huaad nmɨnaanɨm co jäy ajcxy yajnïbɨjcy Juan, com nejhuɨɨyɨm co yɨ mayjäy mɨbɨjccɨxy co jeꞌ anajty Dios tüg yꞌayucnajtzcapxɨɨybɨ.
\p
\v 27 E paady ajcxy jaduꞌn adzooy Jesús: 
\p
―Caꞌ ɨɨch ajcxy nejhuɨɨygɨxy.
\p
Huinꞌit Jesús ymɨnañ:
\p
―Nañ jaduꞌn ɨɨch caꞌ nigapxaꞌñɨch pɨn jeꞌ ycötujcɨn mɨɨd nduñɨch huɨdijaty.
\s Je metzpɨ ung ijxpejt
\p
\v 28 Chi Jesús ymɨnañ:
\p
―¿Nej mꞌocꞌixy mꞌocjaygugɨꞌ jadayaabɨ ixpejt? Tüg je yëydɨjc ymɨɨd anajty metz jeꞌ ymang. Chi nɨmay je mɨjpɨ: “Nɨcx cham mꞌoctuñ ma ɨɨch nꞌuva cam.”
\v 29 Huinꞌit jeꞌ ymang yꞌadzoohuɨ: “¡Caꞌ nnɨcxaꞌñɨch!” Chi jaccohueeñyɨ jeꞌ ymang yhuinmaydɨgajch, chi ñɨcxy tumbɨ.
\v 30 Chi je ungdeedy oy ixy je ymang mutzpɨ. Chi nañ jaduꞌn nɨmaay co huen nɨcxy tuñ. Chi jeꞌ ymang mutzpɨ yꞌadzooy: “Oy, cham nɨ́cxɨbɨch.” Per caꞌ ñɨcxy.
\v 31 ¿Huɨdi jeꞌ nidügtɨ ycuyduuñ nej anajty yteedy tzocy? 
\p
Chi ajcxy ymɨnañ:
\p
―Jeꞌ ymang mɨjpɨ huɨdibɨ jayɨjp nɨmay.
\p
Huinꞌit Jesús nɨmay ajcxy:
\p
―Janch tɨyꞌajt jaduꞌn nej nɨmaaygɨxy co je huɨdibɨ ajcxy yajcogüejtpɨ etz je töxyjäy ajcxy huɨdibɨ tundɨgooyb mɨɨd yëydɨjc, jeꞌ ajcxy tɨgɨ̈huamb jayɨjp ma Dios yꞌaneꞌmy jiiby tzajpjoty, caꞌydɨ miich ajcxy.
\v 32 Paady ycɨxpɨ oy ymiiñ je Juan huɨdibɨ jäy ajcxy yajnɨɨbejt, Juan yajniꞌixɨɨygɨxy je mayjäy nej ajcxy jëbɨ yjothuimbidɨpy ma Dios. E miich ajcxy caꞌ mɨbɨjcy jaduꞌn nej Juan ymɨnañ. Per jeꞌ ajcxy huɨdibɨ yajcogüejtp etz je töxyjäydɨjc huɨdibɨ tundɨgooyb mɨɨd yëydɨjctɨjc, ymɨbɨjc jeꞌ ajcxy Juan. Oy miich ajcxy mjaꞌijxy, per caꞌ mjothuimbidaangɨxy etz caꞌ mɨbɨgaangɨxy.
\s Je naymɨduunɨptɨjc jɨbɨcjäybɨ ajcxy yꞌijxpejt 
\p
\v 33 Chi Jesús ymɨnañ:
\p
―Ocꞌamɨdooꞌijtcɨx jadayaabɨ ijxpejt. Ji anajty tüg je huɨdibɨ nihuindzɨnꞌajtp mɨjpɨ je tundac. Chi je cogam uvas cojy ma je ytundac etz jügajy. Chi yajꞌoyɨɨy ma anajty jëbɨ je uvas ñɨɨ yajnïgɨdägaanɨ. Nañ jaduꞌn cojy tüg tzaaboch cɨxpɨ, jɨgɨx jëbɨ cuendꞌaty ycam. Co yajꞌoyɨyday, chi je cogam yejcy pɨjctzoy je ycam ma je jäy ajcxy huɨdibɨ naymɨdunaanɨp. Chi oy choonɨ je cogam nɨcxy viaje tumbɨ. 
\v 34 Je huinꞌit tiempo co yhuaadꞌajtnɨ je cosecha, chi je cogam quejxy nijëjɨty ytumbɨ jɨm ma huɨdibɨ anajty tɨ yajpɨjctzoy je ñaax co huen möyii je huɨdibɨ yɨꞌ paadaanɨp.
\v 35 Per je jäy huɨdibɨ anajty tɨ naax pɨjctzoy, chi ajcxy majch je tumbɨ. Chi ajcxy ooy huinhuojpy jɨjphuojpy tüg. Chi ajcxy huingäch jɨjpcäch jadüg. Chi ajcxy je mɨdugɨɨgpɨ yajꞌoꞌcy.
\v 36 Chi je conaax cogam huingbɨ ytumbɨdɨjc quejxy. E nañ jaduꞌn ajcxy oy tungɨxy jaduꞌn nej anajty tɨ tungɨxy je jayɨjpꞌatypɨ.
\v 37 Chi ycɨꞌmꞌung oy quejx cogɨxɨɨyñɨ. Hueꞌ jotꞌajtɨ co yajmɨjꞌadɨɨyb jeꞌ yꞌung.
\v 38 Per co ajcxy je tumbɨdɨjc ijxpaty je cogam jeꞌ yꞌung, chi ajcxy ñaygapxɨ: “Tzoc ajt yajꞌoꞌcɨm je cogam ymang, com yɨꞌ jeꞌ mɨhuɨꞌmamb jeꞌ yteedy je yjugyꞌajtɨn je ypɨdägy. E co ajt nyajꞌoꞌcɨm, chi ɨɨch ajt nmɨhuɨꞌmɨm je cam.”
\v 39 Chi ajcxy majch je cogam ymang. Chi ajcxy huijtzpɨdzɨmy ma je tundac. Chi oy yajꞌöccɨxy. 
\p
\v 40 Huinꞌit Jesús ymɨnañ: 
\p
―Co anajty tɨ miiñ je conaax je cogam, ¿ti jadaꞌ yꞌoctunɨpy mɨɨd je tumbɨdɨjc ajcxy?
\p
\v 41 Chi je teedytɨjc etz mɨjjäydɨjc yꞌadzooy:
\p
―Je cogam yajꞌögɨpy yɨjiibɨ jɨbɨcjäydɨjc, caꞌ ajcxy paꞌayoohuɨpy, etz yegɨpy je uvas cam pɨjctzoy ma je huingbɨ jäy huɨdibɨ yegɨpy je pɨdägy huɨdibɨ cogam paatɨp.
\p
\v 42 Chi Jesús ymɨnañ:
\p
―¿Nej caꞌnɨ miich ajcxy mgapxy ma miiñ jaaybety ma Dios ñecyɨ? Jaduꞌn ymɨnañ:
\q Je yëydɨjc huɨdibɨ je jäy ajcxy caꞌ anajty tzocy, Dios tɨ pɨdägy mɨjꞌaneꞌmbɨ. Tɨm jaduꞌn nipaady nej tüg tzaa oybɨ huɨdibɨ je pojtzpɨdɨjc caꞌ ajcxy yajtunaꞌñ, e jeꞌ jeꞌ oy tɨ yhuɨꞌmnɨ ma anajty yjaccopɨcyɨty. Je Huindzɨn Dios jada tung tɨ tuñ, e ooy oy nꞌijxɨm yɨꞌ ytung.
\m 
\v 43 E paady jaduꞌn ɨɨch miich ajcxy nɨmäy co miich ajcxy myajpɨgaꞌñ yɨ mꞌit mlugar jiiby tzajpjoty ma Dios yꞌaneꞌmy etz yajmöhuaꞌñ je huingbɨ jäy je huɨdibɨ amuumdügjot naygɨ̈yejcɨp ma Dios.
\v 44 Pɨnjaty caꞌ cöbɨgaꞌñ jada mɨjꞌaneꞌmbɨ, ayoꞌn ypadaamb, ytɨmnipatp nej jɨhuɨ̈y jɨm ycɨjxcɨday ma je tzaa nïcx, tɨjhuïdz yjajtähuɨpy. O pen je mɨjꞌaneꞌmbɨ mɨdziptzoñ je jäy, chi ytɨgoydähuɨpy ajcxy, tɨm jaduꞌn nej jɨhuɨ̈y je tzaa ñigɨdaagoodyii ajcxy, e janch jaam püx nɨcxy yjaty.
\p
\v 45 Co ajcxy mɨdooy, chi je teedytɨjc etz je fariseostɨjc huinjɨhuɨɨy co yɨꞌ ajcxy yajnigapxyp, 
\v 46 chi Jesús ajcxy jamadzaañ. Per tzɨgɨɨyb anajty ajcxy mɨɨd je mayjäy, jeꞌ co je mayjäy anajty mɨbɨjccɨxy co Jesús najtzcapxɨɨyb Dios ytɨyꞌajt.
\c 22
\s Je ijxpejt ma jäy anajty pɨjcpɨdɨjc nixɨɨduuñ
\p
\v 1 Chi Jesús jadügꞌoc ytɨgɨɨy capxp mɨɨd ijxpejt, ymɨnañ jaduꞌn:
\p
\v 2 ―Je Dios yꞌaneꞌmɨn jaduꞌn nipaady nej je rey ymang ocnixɨɨduñ co tɨ ypɨcy. 
\v 3 Chi je rey quejxhuäcxtay je ytumbɨ co huen nɨcxy huoomujctaaygɨxy je huɨdijaty anajty tɨ yajꞌnɨmaaygɨxy co míingɨxɨpy ma ytunaꞌñyii yjadaꞌñyii je pɨjcɨn. Per caꞌ jeꞌ ajcxy ymiinaꞌñ ma je pɨjcɨn nixɨɨduñ.
\v 4 Chi quejxnɨp huingbɨ ytumbɨ, nɨmay ajcxy: “Nɨmaaygɨx je tɨɨbɨ oy jayɨjpꞌaty mnɨmaaygɨx jaduꞌn co huen mmiingɨxy ma yam je caayɨn uucɨn niꞌixɨꞌ yꞌity. Tɨ je huaj nïcxpɨ nyajꞌögyɨch. E niꞌixɨꞌ ijttaayñɨ, huen miiñ ajcxy ma je pɨjcɨn ytunaꞌñyii yjadaꞌñyii.”
\v 5 E jeꞌ ajcxy tɨɨbɨ anajty yajꞌnɨmaaygɨxy, caꞌ ajcxy jeꞌ ytɨmy tuñ cuendɨ. Nijëjɨty ajcxy ñɨcxy ma ytundac. Nijëjɨty ajcxy ñɨcxy toocp yejcp; 
\v 6 e nijëjɨty ajcxy majch je rey yquejxyöybɨ ajcxy, chi ajcxy oy chaachytuñ, chi yajꞌoꞌcy.
\v 7 Chi je rey ooy chachjotmaꞌty. Chi je soldados ajcxy quejxy co huen nɨcxy yajꞌöctäyii je jäyyajꞌöcp ajcxy etz ytoydähuɨp je ycajp. 
\v 8 Chi je rey nɨmay je ytumbɨ ajcxy: “Niꞌixɨꞌ ijttäy ma jadayaabɨ je pɨjcɨn yajnixɨɨdunaꞌñ. Per je huɨdibɨ ajcxy tɨ yajnɨmäy caꞌ ajcxy mɨhuaadɨty co ymíingɨxɨpy.
\v 9 Nɨcx miich ajcxy majaty jäy yjɨɨn ytɨjc. Nɨmaaygɨxy tügꞌócɨy pɨnjaty ajcxy mbaty, co huen miingɨxy ma je pɨjcpɨ.”
\v 10 Chi ñɨcxy je rey ytumbɨ ajcxy. Chi ajcxy mɨɨdmiinday je mayjäy, je oyjäybɨ etz je jɨbɨcjäybɨ. Chi yꞌujtztay je rey ytɨjc mɨɨd je mayjäy.
\v 11 Huinꞌit je rey ytɨgɨɨy mayjäyjoty, ixaꞌñ anajty huɨdijaty tɨ yajhuomiñ. E jiiby tüg yëydɨjc tɨ ijxpaty huɨdibɨ caꞌ anajty tɨ ñayxoxyii, jaduꞌn nej jäy nayxójxɨgɨxy co ajcxy nɨcxy ma tüg pɨjcɨn.
\v 12 Huinꞌit je rey mɨnañ: “Mɨgüg, ¿nej ya tɨ mdɨgɨ̈y tɨgoty, e caꞌ mxojx mɨɨdɨty nej ypaadyii?” E je yëydɨjc amoñyɨ jeꞌ yhuɨꞌmy.
\v 13 Chi je rey nɨmay huɨdibɨ anajty jɨm pubejtp: “Cɨ̈xotz tecyxotz jada yëydɨjc etz pɨdäg agootztuuby. E jiiby yjɨ̈huɨpy yäxɨpy, jiiby ytɨɨtz huinqueedɨp mɨɨd jotmay.”
\v 14 Com may je jäy ajcxy huɨdibɨ tɨ yajhuooy, e hueenɨ ajcxy huɨdibɨ tɨ yajhuinꞌixy. 
\s Je cogüejtɨn ñimɨydägy 
\p
\v 15 Je huinꞌit tiempo je fariseos ajcxy tuuñ quipxycapxy co anajty xɨ̈huaangɨxy nïhuambedaangɨxy Jesús.
\v 16 E jaduꞌn ajcxy quejxy ma Jesús yajpaady naagɨty huɨdibɨ mɨnɨcxpejt je fariseos ajcxy ytɨyꞌajt etz naagɨty huɨdibɨ mɨjnɨcxpejt je Herodes ytɨyꞌajt. Chi ajcxy Jesús nɨmay:
\p
―Huindzɨn, nejhuɨɨybɨch ɨɨch ajcxy co miich mgapxy je tɨyꞌajt. Tudägy myajꞌixpɨcy jäy ajcxy jaduꞌn nej huaad ajcxy cuychɨnaaygɨxy Dios ytɨyꞌajt. E caꞌ mgüendɨtuñ nej jäy ajcxy ymɨnaangɨxy. Túꞌcɨy miich mduñ mɨɨd comeeñyjäy etz mɨɨd ayoobtɨjc, caꞌ huinꞌixpety myajꞌixpɨcy.
\v 17 Nejhuɨ̈huamy ɨɨch ajcxy nej miich mɨnaꞌñ pen tɨyꞌajt jaduꞌn: ¿Nej ndundɨgooyɨm ma Dios ycötujcɨn, co ngüejtɨm ma César, je romano mɨjꞌaneꞌmbɨ?
\p
\v 18 Per Jesús ñejhuɨɨyb anajty ajcxy yjɨbɨc-huinmaꞌñ, e chi ajcxy nɨmay:
\p
―Ooy miich ajcxy naybɨdáacɨgɨxy nej jɨhuɨ̈y ooy mdudägyɨty, e caꞌ yjanchɨty. ¿Naꞌamy co ajcxy xychachjotꞌixy xychachhuinmaꞌñꞌixyɨch?
\v 19 Yajꞌijxcɨch tüg meeñ huɨdi mɨɨd mɨgüéjtɨgɨxy César.
\p
Chi ajcxy mɨmiiñ tüg meeñ.
\v 20 Chi co Jesús yꞌijxy je meeñ, chi yajtɨɨy:
\p
―¿Pɨn yꞌahuɨnax e pɨn yxɨɨ cɨxjaay ma jada meeñ?
\p
\v 21 Chi ajcxy yꞌadzooy:
\p
―Je romano mɨjꞌaneꞌmbɨ yꞌahuɨnax etz yɨꞌ yxɨɨ.
\p
Huinꞌit Jesús jeꞌ ajcxy nɨmay:
\p
―Moꞌ je César huɨdibɨ yɨꞌ yjëꞌajtpy, etz moꞌ Dios huɨdibɨ Dios yjëꞌajtpy.
\p
\v 22 E co ajcxy jaduꞌn mɨdooy, chi ajcxy ooy jɨhuɨɨy huinmay. Chi ajcxy ixmajch Jesús, e ñɨcxnɨ ajcxy.
\s Yajꞌamɨdooy ajcxy je jugypɨjcɨn co pɨn tɨ yꞌögy
\p
\v 23 Je huinꞌit xɨɨ je saduceos ajcxy oy ixy Jesús. Yɨꞌ ajcxy ymɨnaꞌñ co caꞌ yjugypɨgaꞌñ je öcpɨ ajcxy. E jaduꞌn ajcxy huinmaꞌñ pɨdägy, e ymɨnaangɨxy: 
\p
\v 24 ―Huindzɨn, jaduꞌn miiñ ma Moisés ycötújcɨn co je yëydɨjc huɨdibɨ ypɨjcychɨnaayb mɨɨd ytöxyɨjc, e pen öcp je yëydɨjc, e caꞌ ni tüg yꞌung yajhuɨꞌmy, copɨcy co coꞌöcytöxyjäy ypɨjctɨgadzɨpy mɨɨd je yëydɨjc ymɨguëx.
\v 25 Pues jii ma ɨɨch ajcxy anajty tüg quëx je yëydɨjc nihuɨxtujc. Je unggoob ypɨjcy, e chi ixꞌögy ytöxyɨjc, e caꞌ ni tüg yꞌung yajhuɨꞌmy. Chi je mɨguëx ypɨjctɨgajch mɨɨd je töxyjäy.
\v 26 Nañ jaduꞌn je mɨmetzpɨ yëydɨjc ixꞌoꞌcy ytöxyɨjc. Nañ jaduꞌn je mɨdugɨɨgpɨ yëydɨjc ixꞌoꞌcy ytöxyɨjc. E jaduꞌn oytuñyii yjadyii mɨɨd je töxyjäy co tɨ anajty mɨɨddzɨnayꞌabɨdzɨmdäy je nihuɨxtujcpɨ yëydɨjc tüg quëxpɨ. E je nihuɨxtujcpɨ ajcxy ixꞌoꞌcy je töxyjäy, e caꞌ ni tüg yꞌung ajcxy yajhuɨꞌmy.
\v 27 Chi nañ jaduꞌn oy yꞌöcnɨ je töxyjäy.
\v 28 E co anajty xɨɨ tiempo paty, co anajty Dios yajjugypɨcy yɨ tɨɨbɨ ajcxy yꞌögy, ¿huɨdibɨ jadaꞌ ajcxy nidügtɨ je yëydɨjc töxyɨjcꞌadaanɨp je töxyjäy? Com tɨ ajcxy jaduꞌn nihuɨxtujcpɨ mɨɨddzɨnayꞌabɨdzɨmgɨxy.
\p
\v 29 Chi Jesús jeꞌ ajcxy yꞌadzooy:
\p
―Miich ajcxy caꞌ mhuinjɨhuɨ̈y je tɨyꞌajt, com caꞌ mnejhuɨɨygɨxy Dios yꞌayuc ytɨyꞌajt, e com ni caꞌ mnejhuɨɨygɨxy je mɨcꞌajt huɨdibɨ Dios ymɨɨd.
\v 30 Pues co anajty yjugypɨjccɨxy je jäy tɨɨbɨ yꞌöccɨxy, chi caꞌ ajcxy ypɨgaꞌñ, e nañ jaduꞌn ni caꞌ ajcxy ñaymöhuɨɨyb yꞌung huen pɨjccɨxy. Hueꞌ ajcxy yjugyꞌadaangɨxy chɨnähuaangɨxy jiiby tzajpjoty, tɨm jaduꞌn nej je ángeles ajcxy chɨnaaygɨxy jugyꞌajtcɨxy.
\v 31 Per je tɨyꞌajt co jäy ajcxy tɨɨbɨ yꞌöccɨxy yjucypɨgaangɨxy jadügꞌoc, jëbɨ mbaatcɨxy jada tɨyꞌajt ma Dios ñecy. Dios cɨꞌm jaduꞌn mɨnañ:
\v 32 “Ɨɨch jeꞌ je Dios huɨdibɨ Abraham, Isaac etz Jacob yDiosꞌajtpy.” Com yɨ Dios caꞌ yɨꞌ yDiosꞌaty ma yɨ öcpɨ ajcxy. Yɨ Dios Diosꞌajtp yɨꞌ ma yɨ juugypɨ ajcxy.
\p
\v 33 E co je mayjäy jaduꞌn mɨdooy, chi ajcxy ooy tzachjɨhuɨɨy tzachhuinmaay je Jesús yꞌixpɨjcɨn.
\s Je aneꞌmɨn huɨdibɨ ooy ycopɨcyɨty
\p
\v 34 E co je fariseos ajcxy nejhuɨɨy co Jesús anajty tɨ yajꞌamoñyii je saduceos ajcxy, chi ajcxy ñayyöymujctaayɨ.
\v 35 E jɨm anajty tüg leyhuindzɨn huɨdibɨ Jesús anajty jotꞌijxyp huinmaꞌñꞌijxyp, chi yꞌamɨdooy:
\p
\v 36 ―Huindzɨn, ¿ma yɨ maybɨ Dios ycötujcɨn, huɨdibɨ yɨꞌ jaccopɨcyɨp?
\p
\v 37 Chi Jesús yꞌadzooy:
\p
―Tzoc jɨhuɨꞌ etz yajmɨjꞌat nHuindzɨnꞌajtɨm Dios mɨɨd tügꞌócɨy mꞌaa mjot, etz mɨɨd tügꞌócɨy mꞌalma, etz mɨɨd tügꞌócɨy mhuinmaꞌñ.
\v 38 Jada jeꞌ jaduꞌn je Dios ycötujcɨn huɨdibɨ jaccopɨcyɨp, etz huɨdibɨ tɨm jayɨjpɨp. 
\v 39 Je mɨmetzpɨ Dios ycötujcɨn jahueengɨ túꞌcɨy ñaybadyii mɨɨd je jayɨjpɨ, yɨꞌ huɨdibɨ jaduꞌn mɨnamb: “Tzojccɨx jɨhuɨɨygɨx yɨ mmɨgügtɨjc, tɨm jaduꞌn nej mnaychogyii nayjɨhuɨ̈yii cɨꞌm.”
\v 40 Jada Dios metzpɨ ycötujcɨn jaccopɨcy jacmɨcꞌajt mɨɨd caꞌ jac huɨdibɨ cötujcɨn huɨdibɨ Moisés etz je profetas ajcxy yejc. 
\s ¿Pɨn jeꞌ yꞌung je Cristo?
\p
\v 41 E ma anajty jɨm tügmucy yjacꞌijtcɨxy je fariseos, huinꞌit Jesús yajtɨɨy:
\p
\v 42 ―¿Nej miich ajcxy huinmay mɨɨd Cristo? ¿Pɨn jeꞌ yꞌapmang?
\p
Chi ajcxy yꞌadzooy:
\p
―Je David jeꞌ yꞌapmang.
\p
\v 43 Chi Jesús ajcxy nɨmay:
\p
―¿Naꞌamy co David anajty tɨ ymɨnaꞌñ co Cristo hueꞌ jeꞌ yɨꞌ yhuindzɨn? Jaduꞌn tɨ capxy David anajty mɨɨd je Dios yjɨhuɨꞌñ ymɨcꞌajt, ymɨnañ:
\q 
\v 44 Je Huindzɨn Dios nɨmay ɨɨch nHuindzɨn: “Ɨñaꞌ ma ɨɨch nꞌaꞌoyꞌamy, ixtɨ coonɨ ɨɨch miich nyajmɨmadägɨp ma je mmɨdzip ajcxy.”
\m 
\v 45 ¿Nej jëbɨ David ymɨjꞌapꞌadyii je Cristo? Com David cɨꞌm ymɨnañ co Cristo yɨꞌ jeꞌ yhuindzɨn.
\p
\v 46 E nitügꞌaa ajcxy ycaꞌadzohuimbijty. E jaduꞌn nej je xɨɨ tiempo yjacnɨcx anajty caꞌ ni pɨn ocjacyajtɨɨyñɨ huɨdijaty ayuc. 
\c 23
\s Jesús xɨ̈y ajcxy je fariseos etz escribas
\p
\v 1 Chi Jesús nɨmay je mayjäy etz yɨꞌ ydiscípulos ajcxy:
\p
\v 2 ―Je escribas etz je fariseos ajcxy chachnaygömáayɨgɨxy co yɨꞌ ajcxy jajtp nej capxtɨꞌcxɨpy je cötujcɨn huɨdibɨ Moisés yjaay jecyꞌajty.
\v 3 Oy co ajcxy mguydunɨpy jaduꞌn nej yɨꞌ ajcxy xyajꞌixpɨjccɨxy Dios yꞌayuc, capxymɨdoogɨx nej xyñɨmaaygɨxy per caꞌ mdungɨxy huɨdibɨ yɨꞌ ajcxy ytumb, com yɨꞌ ajcxy oy ycapxcɨxy e caꞌ ajcxy cuydungɨxy.
\v 4 Yɨꞌ ajcxy nɨgo yajcojcɨxy canaag costumbre huɨdi je jäy ajcxy caꞌ mɨmadägaꞌñ, e caꞌ ajcxy paꞌayoy je jäy, tɨm jaduꞌn nipaady nej jɨhuɨ̈y tüg tzɨmy tɨ mooygɨxy jemxypɨ huɨdibɨ caꞌ je jäy ajcxy mɨmadägaꞌñ, e yɨ escribas etz fariseos ajcxy ni caꞌ ycɨ̈huäx yajpaadaangɨxy je tzɨmy.
\v 5 Tügꞌócɨy huɨdi yɨꞌ ajcxy ytumyb, jeꞌ ajcxy ytumyb co huen jäy ajcxy ixyii, jaydëbɨ yajcömay ajcxy. Yɨꞌ ajcxy yajhuimboc-huɨɨnɨ́ɨyɨgɨxy etz ñayyajcɨ̈huɨɨnɨ́ɨyɨgɨxy Dios yꞌayuc. Nayxojxcɨxy mɨɨd huit yooñjatypɨ co chachcömayaangɨxy.
\v 6 Ooy ajcxy tzocy ɨñaybejt ma jeꞌ ɨñäy je aneꞌmbɨ ma jäy ajcxy yxɨɨduñ. Ooy ajcxy tzocy yɨ cödumbɨ ɨñaybejt ma je naymujctac.
\v 7 Yɨ escribas etz fariseos ajcxy oy tzojccɨxy co ajcxy yajcapxpoocxɨp huindzɨgɨꞌñꞌamy mayjäyduum. Etz nañ jaduꞌn ajcxy tzocy co jäy ajcxy yajmɨjꞌadɨɨyb nej huindzɨndɨjc ixpɨcytɨjc.
\v 8 Miich ajcxy caꞌ jaduꞌn mꞌaꞌɨxɨ̈huɨpy co ajcxy xytijɨpy huindzɨn com nidügꞌócɨy miich ajcxy mnaymɨgügꞌájtɨgɨxy, etz tügpajc jeꞌ huɨdibɨ miich ajcxy mhuindzɨnꞌajtpy yɨꞌ jeꞌ Cristo.
\v 9 E nañ jaduꞌn miich ajcxy ya naaxhuiñ, caꞌ oy ni pɨn mdeedyꞌadɨɨyb co mɨɨd miich ajcxy tügpajc je mDeedy, huɨdibɨ jiiby tzajpjoty.
\v 10 E nañ ni mganaydijɨɨyb ajcxy mɨj aneꞌmbɨ, com yɨ Cristo jeꞌ tügpajc miich ajcxy mmɨjꞌaneꞌmbɨ.
\v 11 Je pɨn jaccapxymɨdoob ymɨgügtɨjc, jeꞌ jeꞌ mɨjꞌajtɨn mɨɨd ma miich ajcxy.
\v 12 Pɨnjaty huɨdibɨ cɨꞌm naygömayɨp, tzöyduꞌnbaadɨp jeꞌ, e pɨnjaty naybɨdaacɨp nicy xeemy, jeꞌ jeꞌ capxpaady yꞌidɨpy. 
\p
\v 13 ¡Ay miich ayoob ajcxy fariseos etz escribas ajcxy! Miich ajcxy mnaybɨdáacɨgɨxy nej jɨhuɨ̈y ooy mdudägyjäy, e caꞌ yjanchɨty. Miich ajcxy mgoyüchpy je Dios ytɨyꞌajtɨn nej huaad jäy ajcxy ytɨgɨ̈y jiiby tzajpjoty ma Dios yꞌaneꞌmy. Ni miich ajcxy mgatɨgɨɨygɨxy, e nañ ni mgaꞌaꞌɨxɨɨygɨxy co huingbɨ ytɨgɨ̈huɨp.
\p
\v 14 ¡Ay miich ayoob ajcxy fariseos etz escribas ajcxy! ¡Miich ajcxy mꞌaanɨɨdacp! Miich ajcxy myajcɨjxtaayɨ yɨ coꞌögy ytöxyjäy ypɨdägy mɨɨd ajcxy mꞌadzojcɨn, e mdungɨxy ooy jecy tzajpcapxycapxɨɨ, jɨgɨx capxpaady mbɨdzɨmɨpy. Dios nïgɨ chaachytunɨp miich ajcxy mɨɨd mbocy ycɨxpɨ, caꞌydɨ jac pɨn jäy.
\p
\v 15 ¡Ay miich ayoob ajcxy fariseos etz escribas, miich ajcxy naybɨdaacɨgɨxy tudägy, e caꞌ yjanchɨty! Mhuinyöyꞌabɨdzɨmyb miich ajcxy je naaxhuiñybɨ, co mgapxhuäcxaꞌñ je mꞌixpɨjcɨn ma je tügpɨ jäy. E co ajcxy jeꞌ myajmɨbɨcy, huinꞌit mejtz jaduꞌñyɨ je pocy anajty mɨɨdɨty je jäy, caꞌydɨ miich ajcxy.
\p
\v 16 ¡Ay miich ayoob ajcxy huɨdibɨ jaduꞌn ɨdɨɨtzp nej tügɨ huintzpɨ huinhuoy! Miich ajcxy mɨnamb co pen tüg jäy tuñ yhuandaacɨn, e ɨɨbaatɨ capxpaatɨ Dios ytɨjc, chi caꞌ cuyduñ je huandaacɨn. Per pen ɨɨbatpy capxpatpy je oorɨ huɨdibɨ jiiby ma Dios ytɨjc, huinꞌit janchtɨy cuyduñ je huandaacɨn.
\v 17 Tzuudɨjc locɨdɨjc huɨdibɨ caꞌ huinjɨhuɨ̈y je tɨyꞌajt. ¿Huɨdibɨ jaccopɨcyɨp: je oorɨ o je Dios ytɨjc ma je oorɨ yoxy ity?
\p
\v 18 Nañ jaduꞌn miich ajcxy mɨnaꞌñ: “Pen tüg jäy huandaacɨn tuñ, e capxpaady je altar ma Dios yajhuindzɨgɨ̈y, chi caꞌ cuyduñ je huandaacɨn. Per pen capxpaady je huindzɨgɨꞌñ tzüch ma je altar ma Dios yajhuindzɨgɨ̈y, chi cuyduñ yhuandaacɨn.”
\v 19 ¡Tzuudɨjc locɨdɨjc huɨdibɨ caꞌ huinjɨhuɨ̈y je tɨyꞌajt! ¿Huɨdibɨ jacmɨjꞌajtɨn ymɨɨd je huɨdibɨ tɨ yajyoxy o je altar?
\v 20 Pɨnjaty capxpatp je Dios ytɨjc ma Dios yajhuindzɨgɨ̈y yꞌagapxmuctaayb anajty huɨdijaty jiiby yajpaatp ma Dios yajhuindzɨgɨ̈y.
\v 21 Pɨnjaty capxpatp je Dios ytɨjc, caꞌ anajty jëyɨ capxpaady Dios ytɨjc, nañ ycapxpatp anajty Dios huɨdibɨ jiiby tzɨnaayb.
\v 22 Pɨnjaty capxpatp je tzajp, nañ capxpatp anajty Dios yꞌaneꞌmdac quipxyɨ mɨɨd Dios huɨdi tzɨnaayb jiiby.
\p
\v 23 ¡Ay miich ayoob ajcxy fariseos etz escribas ajcxy, huɨdi naybɨdaacɨp tudägy, e caꞌ yjanchɨty! Miich ajcxy mooyb Dios je tügpɨcy je majcpɨ huɨdibɨ jeꞌ paatɨp, ixtɨ yɨ tzajnɨmang, yɨ ruda etz je piꞌcꞌujtzꞌay ung. Per caꞌ ajcxy mduñcuentɨ je cötujcɨn huɨdibɨ jaccopɨcyɨty. Miich ajcxy caꞌ mdzɨnäy tɨydudägy mɨɨd je mɨgügtɨjc. Miich ajcxy caꞌ mmɨɨdɨty paꞌayoꞌn mɨɨd jeꞌ ajcxy huɨdibɨ ayoob jottɨgooyb, etz caꞌ mmɨbɨjccɨxy Dios. Jada ixyipy ajcxy mbaadumyb, e mooygɨxy Dios je tügpɨcy je majcpɨ. 
\v 24 ¡Tzuudɨjc locɨtɨjc! Miich ajcxy tɨ mꞌanajxyp je uux, e mgojɨɨnnaaxcɨxy je camello, je mɨjpɨ ɨyujc.
\p
\v 25 ¡Ay miich ayoob ajcxy fariseos etz escribas ajcxy, miich ajcxy naybɨdaacɨp nej tudägy jäy, e caꞌ yjanchɨty! Jiiby jotjoty huinmaꞌñyjoty miich ajcxy mɨɨdɨty jɨbɨcpɨ. Miich ajcxy mɨɨd je caꞌoyꞌixɨɨ etz je adzojcɨn. Tɨm jaduꞌn nipaady nej jɨhuɨ̈y myajhuächpy ajcxy yɨ tasɨ ninïcx yɨ texy ninïcx, e chi myajhuɨꞌmy jɨbɨcpɨ ma tasɨjot ma texyjot.
\v 26 ¡Tzuudɨjc miich ajcxy! Jayɨjp yajhuädz jiiby jotjoty texy tasɨ, huinꞌit huɨꞌm nañ jaduꞌn huädz nïgɨxꞌamy.
\p
\v 27 ¡Ay miich ayoob ajcxy fariseos etz escribas ajcxy, miich ajcxy naybɨdaacɨp nej tudägy jäy, e caꞌ yjanchɨty! Jaduꞌn miich ajcxy nipaady nej öcpɨ jut. Je öcpɨ jut nïgɨx janch oy yquëxɨ̈gy, per jiiby jutjoty ujtz jiiby mɨɨd je öcpɨ pajc etz mɨɨd jɨbɨcpɨ.
\v 28 Jaduꞌn ajcxy mguëxɨ̈gy mayjäyduum nej jɨhuɨ̈y ooy mꞌoyjäyɨty, per jiiby jotjoty mɨɨd jɨbɨc-huinmaꞌñ. 
\p
\v 29 ¡Ay miich ayoob ajcxy fariseos etz escribas ajcxy, miich ajcxy naybɨdaacɨp nej tudägy jäy, e caꞌ yjanchɨty! Miich ajcxy mgoꞌabojtzcɨxy yajxon je öcpɨ jut ma profeta ajcxy ñaaxtɨgɨɨy, etz mxoxy ajcxy mɨɨd je pɨjy ma ñaaxtɨgɨɨy je tudägy jäy ajcxy, 
\v 30 e miich ajcxy nayñɨmaayɨgɨxy miñ xyipy: “Co ixyipy anajty nꞌoctzɨnaayɨm jecyꞌajty caꞌ ngapubejtɨm co ajt nmɨjꞌap nmɨjteedy yajꞌögy je profetas ajcxy etz je tudägy jäy ajcxy.”
\v 31 Mɨɨd jada ycɨxpɨ miich ajcxy nejhuɨɨyb co miich ajcxy mꞌapꞌadyii mdeedyꞌadyii je jɨbɨcjäydɨjc ajcxy huɨdibɨ yajꞌöc je profetas.
\v 32 ¡Miich ajcxy yajcɨ́jxcɨxy je jɨbɨcpɨ huɨdibɨ ajcxy mmɨjꞌap mmɨjteedy yajtzondac!
\p
\v 33 ¡Jaduꞌn miich ajcxy nipaady nej mayxoox! Caꞌ miich ajcxy madägɨpy cöguëgɨpy je tzaachypɨ jiiby ayoodactuuby.
\v 34 E paady nguexaamybɨch ma miich ajcxy profetas etz huɨdibɨ ixpɨcyɨp ma Dios yꞌayuc, etz huɨdibɨ xyajꞌixpɨgamb ajcxy yɨ Dios ñecy. Per miich ajcxy myajꞌögamyb myajcruutzpedamyb nijëjɨty, etz nijëjɨty mgoxamyb mhuobamyb ajcxy jiiby tzajtɨgoty etz mꞌixhuɨdidaꞌñ mbahuɨdidaꞌñ ajcxy cajp cajp.
\v 35 Je mɨjpocy xyñigɨdaccodaꞌñ miich ajcxy, jaduꞌn nej je oyjäy ñɨꞌpy temy yojcy jecyꞌajty, ogaꞌñ chondacy mɨɨd je oyjäy Abel etz ycogɨxɨ̈y mɨɨd Zacarías, je Berequías yꞌung huɨdibɨ miich ajcxy mmɨjꞌap mmɨjteedy myajꞌoꞌc jiiby tzajtɨgoty ma altar.
\v 36 Janch tɨyꞌajt jaduꞌn nej nɨmaaygɨxy co je mɨjpocy ñigɨdaccodaꞌñ je jäy ajcxy huɨdibɨ tzɨnaayb jadachambɨ tiempo.
\s Jesús yäxy mɨɨd Jerusalén cajp ycɨxpɨ
\p
\v 37 ¡Miich ajcxy Jerusalén jäy! ¡Miich ajcxy Jerusalén jäy! Jerusalén jäy huɨdibɨ jecyꞌajty yajꞌögy je profetɨtɨjc etz ycögächpy ajcxy je Dios ycogapxy. Canaagꞌoc tɨ njayajtügmujctähuaꞌñɨch miich ajcxy, jaduꞌn nej tzeydaj yajtügmujctäy jeꞌ yꞌung ma yqueec pät, per miich caꞌ mꞌaꞌɨxɨɨygɨxy.
\v 38 Ocꞌix miich ajcxy nej mdɨjc abac yhuɨꞌmaangɨxy.
\v 39 Janch tɨyꞌajt jaduꞌn nej nɨmaaygɨxy co camɨna miich ajcxy xyꞌixɨpyɨch jadügꞌoc, ixtɨ coonɨ paadɨpy je xɨɨ je tiempo co jäy ajcxy ymɨnaꞌnɨpy: “Cömay yɨ huɨdibɨ miimb mɨɨd nhuindzɨn Dios yxɨɨ etz ymɨcꞌajt.”
\c 24
\s Jesús ymɨnaꞌñ co Dios ytɨjc yhuindɨgoyɨpy
\p
\v 1 Ma anajty Jesús tɨ ypɨdzɨmnɨ ma Dios ytɨjc, nɨcxp anajty, huinꞌit Jesús ydiscípulos ajcxy ñimɨjhuäcɨ. Yɨꞌ ajcxy anajty yajꞌixɨydähuamyb je Dios ytɨjc, com ooy anajty chachmɨjtɨjcɨty.
\p
\v 2 Chi Jesús ymɨnañ:
\p
―Huindɨcx miich ajcxy jada maybɨ mɨjjaty ytɨjc. Miinɨpy xɨɨ tiempo mɨna tügꞌócɨy jada tɨjc nɨcxy yhuɨꞌmy taj xit, caꞌ ma tzaamacxy. Huindɨgoydähuɨpy tügꞌócɨy. 
\s Je tɨyꞌajt ma caꞌnɨ naaxhuiñybɨ ycɨxaꞌñyɨ ytɨgoyaꞌñyɨ
\p
\v 3 Chi oy ñɨcxnɨ ajcxy ma Olivos cögop. E co anajty jɨm, Jesús yꞌɨñäy, chi ñɨmaayɨ ameech jeꞌ ydiscípulos ajcxy:
\p
―Ɨɨch ajcxy nejhuɨ̈huamyb mɨna jëduꞌn ytunaꞌñyii yjadaꞌñyii. ¿Ti jeꞌ quëxɨ̈gamb co anajty miich mhuimbidaꞌñ ya naaxhuiñ, e co anajty je naaxhuiñybɨ ytɨgoyaꞌñ?
\p
\v 4 Chi Jesús nɨmay ajcxy:
\p
―Mnaygüendꞌadɨɨb ajcxy, caꞌydɨ pɨn xyhuinꞌɨɨngɨxy.
\v 5 Ooy mayjäy ñaybɨdägáanɨgɨxy mɨɨd ɨɨch nxɨɨ, naybɨdägáanɨgɨxy co jeꞌ ajcxy je Cristo, ymɨnaꞌnaꞌñ ajcxy: “Ɨɨch jeꞌ je Cristo.”
\v 6 Co miich ajcxy ayuc mɨdohuɨpy co jäy ajcxy chachtziptungɨxy ñayñibɨdɨ̈gɨgɨxy xɨ ya, chi caꞌ ajcxy mdzɨgɨ́ɨygɨxɨp, com ooy ycopɨcyɨty co jaduꞌn jayɨjp ytunɨɨyb yjadɨɨyb. Caꞌ nan hueꞌ jeꞌ anajty tɨm cɨjxp tɨm tɨgooyb je xɨɨ je tiempo.
\v 7 Nayñibɨdɨ̈gɨɨb naax cajp mɨɨd huɨngbɨ naax huingbɨ cajp, e gobierno mɨɨd huingbɨ gobierno. E miinɨp mɨcꞌujx canaagꞌit etz mɨj yuu etz mɨj paꞌm xɨ ya. 
\v 8 Jada tzaachypɨ ayoꞌn ogaꞌnɨ anajty chondägy huɨdibɨ nmɨnaxaanɨm nyajnaxaanɨm.
\v 9 Huinꞌit xɨɨ huinꞌit tiempo miich ajcxy myajcɨ̈yegɨpy, jɨgɨx xychaachytúngɨxɨpy e xyajꞌögɨxɨpy. E tügꞌócɨy je maynaaxhuiñyjäy xycaꞌixáangɨxɨpy, mɨɨd ɨɨch nxɨɨ ycɨxpɨ.
\v 10 Je huinꞌit tiempo may je jäy ajcxy yajtɨgoyaꞌñ ymɨbɨjcɨn. E nañ jaduꞌn ñaycaꞌoyꞌixáanɨgɨxy etz ñayñigapxáanɨgɨxy ñiꞌojɨ̈huáanɨgɨxy miñ xyɨpy.
\v 11 Ooy may quëxɨ̈gaangɨxy aanɨɨdaacpɨdɨjc mɨnaꞌnaangɨxy co Dios yꞌayuc ytɨyꞌ
ajt nimɨydacɨ, e mayjäy oy huinꞌɨɨnaangɨxy.
\v 12 E jeꞌ co ajcxy xɨɨ jɨmɨjt ñajtznïnɨcxɨɨyñɨ jac tɨm nïgɨ jɨbɨcpɨ tunaangɨxy, caꞌ ajcxy yꞌocnaychójcɨnɨpy miñ xyɨpy.
\v 13 Per pɨnjaty tɨydudägy panɨcxp je mɨbɨjcɨn, jeꞌ ajcxy ypaadɨp yꞌalma nïdzoocɨn.
\v 14 Copɨcy co jayɨjp yajcapxhuäcxaꞌñ huinduꞌñybɨ naaxhuiñybɨ Dios yꞌayuc ytɨyꞌajt jemybɨ, jaydëbɨ jäy ajcxy nidügꞌocɨy nejhuɨ̈y Dios ytɨyꞌajt. Huinꞌit je naaxhuiñybɨ ycɨjxnɨ ytɨgooyñɨ.
\p
\v 15-16 Je profeta Daniel jaay jecyꞌajty jada ayuc (miich ajcxy pɨnjaty capx jada necy huinjɨhuɨɨygɨxy) ma mɨnañ: Miich ajcxy co mꞌixy pɨnjaty jɨbɨc-huinmaꞌñ tumb nej caꞌ ypadyii ma Dios ytɨjc, huɨdibɨ ooy ycodzɨgɨ̈jɨty, chi miich ajcxy huɨdibɨ tzɨnaayb jɨm Judea, co jaduꞌn mꞌijxcɨxy, chi nɨcx mgueectzóocɨxɨpy mɨcꞌamy ma tungop.
\v 17 Pɨnjaty huɨdibɨ yajpatp ma ytɨjcnïcx caꞌ nɨcxy tijaty yajpɨdzɨmy ma ytɨjc. 
\v 18 Yɨ jäy ajcxy huɨdibɨ yajpatp camjoty, caꞌ ajcxy huimbidɨpy co yajpɨdzɨmɨpy tijaty ma ytɨjc. 
\v 19 Huinꞌit tiempo ayoꞌn ypadamy je töxyjäy ajcxy huɨdibɨ anajty yꞌungdzɨmꞌijt, e nañ jaduꞌn jeꞌ ajcxy huɨdibɨ mɨɨd yꞌungmaꞌxung.
\v 20 Mayꞌajt ajcxy mbɨjctzoohuɨpy yɨ Dios co jada jaduꞌmbɨ ayoꞌn caꞌ ytunɨɨyb yjadɨɨyb ma anajty ytɨɨchtiempojɨty, etz ma anajty pocxɨnxɨɨjoty.
\v 21 Huinꞌit oy ayoꞌn jotmay ytunaꞌñyii  yjadaꞌñyii huɨdibɨ nicamɨna ycatuñyii ycajadyiinɨ mabɨ naaxhuiñybɨ chondägy e nicamɨna jaduꞌn ycajactunɨɨyb ycajacjadɨɨyb. 
\v 22 Pen caꞌ Dios capxꞌadugaꞌñ yɨjiibɨ ayoꞌn xɨɨ ayoꞌn tiempo, ni pɨn caꞌ chögɨpy. Per Dios ycapxꞌadugamy yɨjiibɨ ayoꞌn tiempo mɨɨd je mɨbɨjcpɨdɨjc ycɨxpɨ huɨdibɨ Dios tɨ huinꞌixy.
\v 23 Co yɨ jaduꞌmbɨ xɨɨ tiempo anajty ymiiñ, caꞌ mmɨbɨ́jccɨxɨpy, pen ji pɨnjaty xyñɨmaaygɨxy: “Ijxcɨx, cha yajpaady je Cristo”, o “Jɨmꞌamy yajpaady je Cristo.” Caꞌ mmɨbɨ́jccɨxɨpy.
\v 24 Pues miinɨp jäy ajcxy huɨdibɨ huinꞌɨɨnaangɨxy ymɨgügtɨjc. Cɨꞌm ñayyajnaxáanɨgɨxy jaduꞌn nej jɨhuɨ̈y jeꞌ yCrístɨty, e ymɨnáangɨxɨpy co capxhuäcxy ajcxy Dios yꞌayuc, e caꞌ yjánchɨty. Ytunɨp ajcxy mɨjhuinmaꞌñ etz mɨjpɨ ijxpejt, ixtɨ jëbɨ jahuinꞌɨ́ɨngɨxɨp je mayjäy huɨdibɨ Dios tɨ yhuinꞌixyii. Per caꞌ Dios aꞌɨxɨ̈huɨpy co yhuinꞌɨɨnɨɨyb yɨꞌ yjäy.
\v 25 Tɨ ɨɨch yɨꞌ jayɨjpnɨ nigapxɨch.
\v 26 E co pɨnjaty ajcxy xyñɨmähuɨpy: “Chɨm jeꞌ je Cristo mɨjtɨgɨ̈dumb”, caꞌ ajcxy mninɨcxɨp. O co pɨnjaty ajcxy xyñɨmähuɨpy: “Chiiby jeꞌ tɨgoty yhuingoyüch”, caꞌ ajcxy mmɨbɨgɨpy.
\v 27 Ɨɨch jeꞌ je jäy huɨdibɨ tzoon tzajpjoty, nhuimbidaambɨch ya naaxhuiñ mɨɨd je tɨɨcxɨn je jájɨn, jaduꞌn nej je huɨdzuc huɨdi tɨɨcxp xɨɨbɨdzɨmyb ixtɨ xɨɨgɨdägy.
\v 28 Ma je öcp ninïcx yajpaady jɨm ñïmujctähuaꞌñ je luud ajcxy.
\s Nej jadaꞌ jeꞌ Dios yꞌung ymiinɨpy
\p
\v 29 Co anajty tɨ ñaxy je ayoꞌn xɨɨ ayoꞌn tiempo, huinꞌit je xɨɨ ycoodzɨygɨdägaꞌñ, je poꞌ caꞌ ytɨɨcxaꞌñ, je madzaꞌ ycädähuaꞌñ etz janch mɨc je tzajp yücxaꞌñ.
\v 30 Co yɨ jaduꞌmbɨ ytunɨɨyb yjadɨɨyb, chi quëxɨ̈gaꞌñ tzajpjoty je ijxpejt co ɨɨch, je jäy huɨdibɨ tzoon tzajpjoty, nhuimbidaꞌñɨch ya naaxhuiñ. E chi tügꞌócɨy je mayjäy tájɨp máyɨp yjɨhuɨ̈huɨpy yäxɨpy, chi ajcxy ixɨpy je jäy huɨdi tzoon tzajpjoty miñ anajty jocjoty mɨɨd ymɨcꞌajt yꞌoyꞌajt.
\v 31 Chi nguexɨpyɨch ángeles ajcxy co huen mɨc yajxüxy ajcxy ytrompeta, jɨgɨx yöymujctähuɨpy tügꞌócɨy pɨnjaty huinꞌijxyp xɨ ya ma ajcxy yajpaady ya naaxhuiñ; ma xɨɨ pɨdzɨmyb, ma xɨɨ cɨdägy, ma jɨɨnboj pɨdzɨmyb, ma tɨchpoj pɨdzɨmyb.
\p
\v 32 Jɨm miich ajcxy ijxpejt mbɨgɨpy ma je higuerɨ quipy jaduꞌn nej je xɨɨ tiempo ymiiñ cɨdägy. Co je higuerɨ quipy jadügꞌoc pɨdägɨpy jeꞌ yꞌaayꞌung, huinꞌit miich ajcxy nejhuɨ̈huɨpy co yhuingonɨ mɨna ypottɨgɨɨyñɨ. 
\v 33 Tɨm jaduꞌn nej tɨyꞌajt mbɨjccɨxy ma je higuerɨ quipy co jada ajcxy jaduꞌn ixɨpy nejhuɨ̈huɨy co yhuingonɨ anajty je xɨɨ je tiempo jɨɨnꞌaguy tɨjcꞌaguy.
\v 34 Janch tɨyꞌajt jaduꞌn nej nɨmaaygɨxy co tügꞌócɨy ytunaꞌñyii yjadaꞌñyii ma caꞌnɨ anajty je jäy yꞌöctäy huɨdibɨ anajty jactzɨnaayb huinꞌit tiempo. 
\v 35 Je tzajp etz je naaxhuiñybɨ cɨxam tɨgoyam yɨꞌ, per ɨɨch nꞌayuc caꞌ ycɨxaꞌñ ytɨgoyaꞌñ nimɨna. 
\p
\v 36 Caꞌ ni pɨn nejhuɨ̈y je xɨɨ je hora mɨna nhuimbidaꞌñɨch ya naaxhuiñybɨ. Ni je ángeles ajcxy canejhuɨ̈y, ni je Dios yꞌung canejhuɨ̈y. Tügpajc je Dios Teedy nejhuɨ̈y.
\p
\v 37 Com jaduꞌn nej yjajtɨ ya naaxhuiñ jecyꞌajty, co je Noé chɨnay, nañ tɨm jaduꞌn yjadɨpy co anajty nhuimbityɨch, yɨ jäy huɨdibɨ tzoon tzajpjoty, ya naaxhuiñ.
\v 38 Jecyꞌajty co anajty caꞌnɨ je ayoꞌnduu ymiiñ ya naaxhuiñybɨ, hueꞌ jeꞌ mayjäy ajcxy chɨnay agujc jotcujc, ycaaygɨxy yꞌuuccɨxy etz yajpɨjccɨxy je yꞌung yꞌanäg, ixtɨ coonɨ paty je xɨɨ tzuu co ytɨgɨɨy Noé barcojoty.
\v 39 Je mayjäy ajcxy caꞌ ajcxy cuenttuñ co ayoꞌn miinaꞌñ anajty, ixtɨ coonɨ je ayoꞌnduu miin e öctay ajcxy je jäy nɨɨjoty. Jaduꞌn nej yjajty jecyꞌajty mɨɨd je mayjäy huɨdibɨ tzɨnaayb anajty quipxy mɨɨd Noé, nañ tɨm jaduꞌn yjadaꞌñ mɨɨd je jäy ajcxy huɨdibɨ tzɨnähuɨp jac jiinɨ co ɨɨch anajty nhuimbityɨch ya naaxhuiñ jadügꞌoc.
\v 40 Je huinꞌit tiempo co nhuimbidɨpyɨch jadügꞌoc ya naaxhuiñ, chi metz yëydɨjc yajpaadɨpy ma ytundac, tüg jeꞌ yajmɨnɨcxaꞌñ, e tüg jeꞌ yhuɨꞌmaꞌñ.
\v 41 E mejtz töxyjäy yajpaadɨp anajty yjɨch, tüg jeꞌ yajmɨnɨcxaꞌñ, e tüg jeꞌ yhuɨꞌmaꞌñ.
\p
\v 42 E paady miich ajcxy niꞌixɨ̈ íjtcɨx, xyjɨjpꞌixɨpyɨch com caꞌ mnejhuɨɨygɨxy mɨna miich ajcxy je mHuindzɨn ymiinaꞌñ. 
\v 43 Mnejhuɨɨygɨxy miich jada co ixyipy je ungdeedy nejhuɨ̈y ti hora je meetzpɨ miinaꞌñ, caꞌp jeꞌ ymähuɨpy, e caꞌp aꞌɨꞌxɨ̈huɨpy co je meetzpɨ ytɨgɨ̈huɨpy tɨgoty.
\v 44 Nañ tɨm jaduꞌn miich ajcxy niꞌixɨ̈ ijtcɨx, jeꞌ co ɨɨch, je jäy huɨdibɨ tzoon tzajpjoty, nhuimbidaꞌñɨch ma caꞌ ni pɨn anajty nejhuɨ̈y.
\s Je tumbɨ tudägypɨ etz je huɨdibɨ caꞌp ytudägyɨty
\p
\v 45 ¿Huɨdibɨ tumbɨ jeꞌ ya huɨdibɨ tumb mɨɨd yhuindzɨn janch cɨxyjot huinɨjot huɨdibɨ mɨɨd ixpɨjcɨn, huɨdibɨ jeꞌ yhuindzɨn mooyɨpy aneꞌmɨn ma ytɨjc, huɨdibɨ yajnigɨdagɨ̈huɨpy ma ymɨgügtɨjc caayɨn uucɨn mɨna ypadyii?
\v 46 Janch jotcujc je tumbɨ co yhuimbidɨpy jeꞌ yhuindzɨn, e jeꞌ cuyduñ jaduꞌn nej jeꞌ yhuindzɨn tɨ ñɨmäyii.
\v 47 Janch tɨyꞌajt jaduꞌn nej nɨmaaygɨxy co je huindzɨn ytumbɨ yajnigohuajcꞌadyii tügꞌócɨy huɨdibɨ ymɨɨd.
\v 48 Pen je tumbɨ jɨbɨcjäybɨ mɨnaꞌñ jotjoty huinmaꞌñyjoty: “Huäcxɨjpnɨ ɨɨch je nhuindzɨn.”
\v 49 E chi nïmajtztägɨp ymɨgügtɨjc, e ytɨgɨ̈huɨp caaybɨ uucpɨ mɨɨd amügyjäydɨjc; 
\v 50 chi je tumbɨ yhuindzɨn minɨpy ma ytɨjc huɨdi xɨɨ mɨna je tumbɨ caꞌ anajty aaꞌixy jɨjpꞌixy e ni je hora anajty canejhuɨ̈y.
\v 51 Chi huindzɨn tzaachytunɨp jeꞌ ytumbɨ, etz ypɨdägɨpy mɨɨd je jacjadyii jäy ajcxy yajpaady huɨdibɨ naybɨdáacɨgɨxp nej tudägyjäyɨty e caꞌ yjanchɨty. Jiiby ayoodactuuby yjɨ̈huaꞌñ yäxaꞌñ etz huinmucxaꞌñ huingueedaꞌñ ytɨɨtz mɨɨd jotmay.
\c 25
\s Je ijxpejt ma je majcpɨ töxyꞌanäg
\p
\v 1 Co anajty nhuimbityɨch jadügꞌoc ya naaxhuiñybɨ jaduꞌn nipaadɨp nej je nimajcpɨ töxyꞌanäg co ñɨcxy ajcxy ñayjɨjpcobadɨ̈huáanɨgɨxy mɨɨd je yëydɨjc huɨdi pɨgamb. Chi mɨnɨcxy ajcxy aceite lámpara co yajtɨcxaangɨxy.
\v 2-4 Nimɨgoox je töxyꞌanäg huɨdi cohuinmaꞌñɨty etz ahuing mɨnɨcxy jadüg quiig ujtz mɨɨd aceite. E nimɨgoox je töxyꞌanäg caꞌpɨ ajcxy cohuinmaꞌñɨty, e caꞌ ajcxy ahuing mɨnɨcxy jadüg quiig aceite.
\v 5 E je yëydɨjc huɨdibɨ anajty pɨgamb huäcxɨjpnɨ ooy, chi je töxyꞌanäg ajcxy ooy ytɨgɨɨyñɨ mäꞌuuybɨ.
\v 6 E mɨjcuctz ajcxy mɨdoy co tüg jäy mɨc mɨnaꞌñ: “Chi miiñ je yëydɨjc huɨdibɨ pɨgamb, nɨcx jɨjpcobadɨɨygɨxy.”
\v 7 E huinꞌit je nimajcpɨ töxyꞌanäg ajcxy ypɨdɨ̈ctay. Chi ajcxy yjɨɨn niꞌixɨɨy nidüg nidüg.
\v 8 Chi je nimɨgooxpɨ huɨdibɨ caꞌ ycohuinmaꞌñɨty nɨmay je nimɨgooxpɨ huɨdibɨ cohuinmaꞌñɨp: “Ɨɨch ajcxy hueenɨ mooygɨch yɨ mꞌaceite, co pïdzaanɨp ɨɨch ajcxy njɨɨn.”
\v 9 Chi yꞌadzooy je cohuinmaꞌñybɨ ajcxy: “Caꞌ nyegaꞌñɨch, jeꞌ co caꞌ ɨɨch ajcxy njeꞌ yhuaadɨ̈huaꞌñ. Nɨcx miich ajcxy juy jɨm ma ytoogyii.”
\v 10 E tɨ anajty ajcxy ñɨcxy aceite juuyb je huɨdibɨ ajcxy caꞌ ycohuinmaꞌñɨty, co oy yjäty je yëydɨjc huɨdibɨ pɨgaanɨp. Chi je cohuinmaꞌñybɨ ajcxy mɨɨd tɨgɨy tɨgoty je yëydɨjc huɨdibɨ pɨgaanɨp. Chi tɨjc yajꞌagɨɨy. 
\v 11 E com jecyñɨ oy yhuimbity ajcxy je huɨdibɨ caꞌ ycohuinmaꞌñɨty. Chi ajcxy ymɨnañ: “¡Huindzɨn, Huindzɨn, ocyajꞌahuädz mdɨjc!”
\v 12 Chi jeꞌ yꞌadzooy: “Caꞌ ɨɨch miich ajcxy nꞌixyꞌadyii.”
\p
\v 13 Chi Jesús ymɨnañ:
\p
―Nayñiꞌixɨ́ɨyɨgɨx, jeꞌ co caꞌ mnejhuɨɨygɨxy mɨna ɨɨch nhuimbidaꞌñɨch jadügꞌoc ya naaxhuiñ.
\s Je ijxpejt ma je meeñ
\p
\v 14 Co ɨɨch anajty nhuimbidaꞌñɨch jadügꞌoc ya naaxhuiñybɨ, jaduꞌn nipaadɨp nej jadayaabɨ ijxpejt, co anajty tüg comeeñyjäy chonaꞌñ viajetumbɨ, chi jeꞌ ytumbɨ ajcxy mooy je meeñ co huen cuendꞌajtcɨxy. 
\v 15 Je ymɨdügpɨ tumbɨ moy mɨgoox mil meeñ. Je mɨmetzpɨ moy mejtz mil. E je ymɨdugɨɨgpɨ moy tüg mil. E jaduꞌn ajcxy moy nijeꞌ nijeꞌ nej huaad cuendꞌajtcɨxy. Chi choñ je huindzɨn viajetumbɨ. 
\v 16 Je tumbɨ huɨdibɨ cɨ̈dɨgɨɨyɨ mɨgoox mil meeñ, ytɨgɨy ajuybɨ adoocpɨ. Chi jeꞌ ymeeñ yꞌungꞌajty jamɨgoox mil.
\v 17 Nañ jaduꞌn huɨdibɨ cɨ̈dɨgɨɨy mejtz mil, ytɨgɨɨy tumbɨ mɨɨd je meeñ. Chi jeꞌ ymeeñ yꞌungꞌajty ja mejtz mil. 
\v 18 Je huɨdibɨ cɨ̈dɨgɨɨy tüg mil hueꞌ oy pɨdägy je meeñ tützjoty. Chi tajɨy, e yützɨ je yhuindzɨn ymeeñ. 
\v 19 E com jecyñɨ oy yhuimbity je huindzɨn. Chi ytɨgɨɨy cuenta yajꞌoyɨɨyb mɨɨd je ytumbɨ ajcxy. 
\v 20 Chi miiñ jayɨjp je huɨdibɨ anajty tɨ cɨ̈dɨgɨ̈yii mɨgoox mil meeñ. Chi je tumbɨ yajcɨ̈dɨgɨɨy jeꞌ yhuindzɨn majc mil meeñ. Chi ymɨnañ: “Miich tɨ xymooyɨch mɨgoox mil meeñ, e ɨɨch tɨ nyajꞌungꞌatyɨch jamɨgoox mil.”
\p
\v 21 Chi jeꞌ yhuindzɨn mɨnaañ: “Janch jotcujc ɨɨch cham co jaduꞌn tɨ mduñ mɨɨd je hueenbɨ meeñ. Miich ooy mdudägy etz oy tɨ mduñ, e paady njacmöhuamyb jacmay. Tɨgɨꞌ ma ɨɨch, e xondäg mɨɨd ɨɨch.”
\v 22 Chi ymiñ je huɨdibɨ anajty tɨ cɨ̈dɨgɨ̈yii mejtz mil meeñ. Chi nɨmay je yhuindzɨn: “Miich xymooyɨch mejtz mil meeñ, e tɨ nyajꞌungꞌatyɨch jamejtz mil.”
\v 23 Huinꞌit jeꞌ yhuindzɨn ñɨmaayɨ: “Janch jotcujc ɨɨch cham, co jaduꞌn oy tɨ mduñ mɨɨd ɨɨch nmeeñ, e paady njacmöhuamy jacmay. Tɨgɨꞌ xondäg mɨɨd ɨɨch.”
\p
\v 24 E co oy yjaꞌty je huɨdibɨ cɨ̈dɨgɨɨyb tüg mil meeñ, chi nɨmay jeꞌ yhuindzɨn: “Huindzɨn, hueꞌ ndijyɨch miich myëydɨjcꞌaty janch jɨbɨc jäy. Miich cosecha myajpɨdɨ̈cpy ma caꞌ tɨ mnïpy etz miich mgosecha myajpɨdɨ̈cpy ma caꞌ ti tɨ mhuɨjy.
\v 25 Paady ooy ndzɨgɨ̈yɨch co je meeñ ngayajꞌungꞌadɨpyɨch. E co miich mhuimbidaꞌñ, mdzogamy je mmeeñ, e paady je mgɨꞌmmeeñ tɨ nyüchɨch, jeꞌ co ndzɨgɨ̈yɨch co nɨcxy nyajtɨgooyɨch miich mmeeñ. Cha je meeñ huɨdibɨ tɨ xymooyɨch.”
\p
\v 26 Chi jeꞌ yhuindzɨn ñɨmaayɨ: “Jɨbɨc tumbɨ miich, ooy mnuuxɨty. ¿Nej tɨ mnejhuɨ̈y miich co ɨɨch cosecha nyajpɨdɨ̈gyɨch ma caꞌ ti tɨ nnïbyɨch, etz cosecha nyajpɨdɨ̈gyɨch ma caꞌ ti tɨ nhuɨjyɨch?
\v 27 Oy co ixyipy miich je ɨɨch nmeeñ tɨ myejcꞌanuucxy, e jɨm ixɨpy yꞌungꞌat. E cham co tɨ nhuimbityɨch cham ixyipy je nmeeñɨch xycɨ̈dɨgɨ̈yɨch mɨɨd nimeeñꞌung.”
\p
\v 28 Chi je huindzɨn nɨmay je jacjadyii tumbɨdɨjc: “Pɨjcɨ ajcxy yɨ meeñ huɨdi ymɨɨd, e mooygɨx yɨ huɨdibɨ majc mil ymɨɨd.
\v 29 Je huɨdibɨ oy tumb jacyajmöhuamb jeꞌ anaxy, e ymɨɨdꞌadamy jeꞌ conaxpɨ. Jeꞌ huɨdibɨ hueen mɨɨd yajpɨgamb jeꞌ huɨdi ymɨɨd, jeꞌ co caꞌ oy tɨ ytuñ mɨɨd je hueenbɨ.
\v 30 Yɨ jiibɨ tumbɨ huɨdibɨ caꞌ oy ytuñ, pɨdäg ajcxy agootztuuby ma yjɨ̈huɨpy yäxɨpy, ma ytɨɨtz huinmuucx huingueedɨp mɨɨd jotmay.”
\s Co anajty naaxhuiñyjäy ajcxy yajtɨyduñ
\p
\v 31 Co ɨɨch, je jäy huɨdibɨ tzoon tzajpjoty, nhuimbity ɨɨch anajty jadügꞌoc ya naaxhuiñybɨ, huinꞌit nꞌixtägaꞌñɨch ma ɨɨch nꞌaneꞌmdac etz aneꞌmaꞌñɨch mɨɨd ɨɨch nmɨjꞌájtɨn etz nꞌoyꞌajtɨn.
\v 32 Chi tügꞌócɨy je naaxhuiñyjäy yajtügmujctähuaꞌñ ma ɨɨch. Nhuäcxamybɨch jadüg jadüg jaduꞌn nej jäy ajcxy huäcxy je cöbixy etz je chiibo ajcxy.
\v 33 Nbɨdägaamybɨch aꞌoyꞌamy je jäy ajcxy huɨdibɨ oy tɨ ytungɨxy mɨɨd ɨɨch. E yɨꞌ ajcxy jaduꞌn nipaadɨp nej cöbɨxy. Nbɨdägaamybɨch anajtyꞌamy yɨ jäy ajcxy huɨdibɨ jɨbɨc tɨ ytungɨxy mɨɨd ɨɨch. E yɨꞌ ajcxy jaduꞌn nipaadɨp nej chiibɨ.
\p
\v 34 Chi nnɨmähuɨbɨch yɨ jäy ajcxy huɨdibɨ aꞌoyꞌamy: “Miingɨx miich ajcxy huɨdibɨ Dios Teedy tɨ xyconuucxy ajcxy. Jeꞌájtɨgɨx aneꞌmdac huɨdibɨ ijtp niꞌixɨ̈ mɨɨd miich ajcxy ycɨxpɨ maabɨ naaxhuiñybɨ chondägy.
\v 35 Ma anajty ɨɨch nyuubögyii miich ajcxy tɨ xyajcaayɨch; ma anajty ɨɨch ndɨdzɨ̈yii, miich ajcxy tɨ xyajnɨɨꞌügyɨch; ma anajty ɨɨch nihuɨdɨtyɨch, miich ajcxy jättac tɨ xymöyɨch;
\v 36 ma anajty ɨɨch je nhuit tɨ nyajmayjatyɨch, miich ajcxy tɨ xymöyɨch je huit; ma anajty ɨɨch nbɨgyiijɨch, miich ajcxy tɨ xycuendꞌátyɨch; etz co anajty ɨɨch pujxtɨgoty nyajpaady, miich ajcxy tɨ xycogapxɨ̈yɨch.”
\p
\v 37 Huinꞌit ymɨnaꞌnaꞌñ je jäy ajcxy huɨdibɨ oy tɨ ytungɨxy mɨɨd ɨɨch: “Huindzɨn, ¿mɨna ɨɨch miich ajcxy tɨ nꞌixy ayuu, e tɨ nyajcay? O ¿mɨna ɨɨch miich ajcxy tɨ nꞌixy co mdɨdzɨ̈yii, e tɨ nyajnɨɨꞌügy?
\v 38 ¿Mɨna ɨɨch miich ajcxy tɨ nꞌixy co miich mnihuɨdity, e tɨ nmöy jättac? O ¿mɨna mhuit tɨ myajmayjaty, e tɨ nmöy je mhuit?
\v 39 ¿Mɨna ɨɨch miich ajcxy tɨ nꞌixy, co miich mbɨgyii, e oy tɨ ngüendꞌaty? etz ¿mɨna ɨɨch miich ajcxy tɨ nꞌixy co pujxtɨgoty myajpaady, e oy tɨ ngogapxɨ̈y?”
\v 40 Ɨɨch, je mɨjꞌaneꞌmbɨ, nꞌadzohuimbɨdɨpyɨch: “Janch tɨyꞌajt jaduꞌn nej nnɨmaaygɨxy co yɨ jäy ajcxy huɨdibɨ oy tɨ ytungɨxy mɨɨd pɨnjaty huɨdibɨ xymɨjnɨcxpejtpɨch, nañ jaduꞌn oy tɨ ytungɨxy mɨɨd ɨɨch. Caꞌ ñéjɨty co jäy ajcxy ymɨnañ co caꞌ ypɨnɨty je jäy huɨdibɨ xymɨjnɨcxpejtpɨch.”
\p
\v 41 Chi ɨɨch, je mɨjꞌaneꞌmbɨ, nɨmähuɨbɨch je jäy ajcxy huɨdibɨ yajpatp: “Huinhuäctuutcɨch miich ajcxy jɨbɨcjäydɨjc. Nɨcxy miich ajcxy mɨjjɨɨnjoty, huɨdibɨ ijtp niꞌixɨ̈ mɨɨd je mujcuꞌ ycɨxpɨ etz mɨɨd jeꞌ yꞌángeles ajcxy ycɨxpɨ.
\v 42 Ma anajty ɨɨch nyuubögyii, caꞌ miich ajcxy xyajcaayɨch; ma anajty ɨɨch ndɨdzɨ̈yii, caꞌ miich ajcxy xyajnɨɨꞌucyɨch; 
\v 43 ma anajty nnihuɨdityɨch, caꞌ miich ajcxy xyajjättägyɨch; ma anajty ɨɨch nhuit xytɨgoyꞌíjtɨgɨch, caꞌ miich ajcxy huit xymooyɨch; etz ma anajty ɨɨch nbɨgyii e nyajpaadyɨch pujxtɨgoty, caꞌ miich ajcxy xycogapxɨɨyɨch.”
\v 44 E chi jeꞌ ajcxy ymɨnaꞌnaꞌñ: “Huindzɨn, ¿mɨna ɨɨch ajcxy miich tɨ nꞌijxcɨxy co anajty miich yubögyii tɨdzɨ̈yii, o co anajty mnihuɨdity? ¿Mɨna tɨ nꞌijxcɨxy co caꞌ mhuit mɨɨdɨty, o co mbɨgyii, o co anajty pujxtɨgoty myajpaady, e caꞌ ɨɨch ajcxy miich nbubejty?”
\p 
\v 45 Chi ɨɨch, je mɨjꞌaneꞌmbɨ, nꞌadzohuaꞌñɨch: “Janch tɨyꞌajt jaduꞌn nej nnɨmaaygɨxy. Huen tɨm pɨnɨty huɨdibɨ caꞌ mɨɨdɨty paꞌayoꞌn mɨɨd jeꞌ ajcxy huɨdibɨ xymɨjnɨcxypejtpɨch, oy jäy yjamɨnaꞌñ co caꞌ ypɨnɨty, ɨɨch miich ajcxy anajty jaduꞌn tɨ xytuñɨch.”
\v 46 E jada ajcxy nɨcxɨp huinɨxɨɨ ayoodactuuby, e yɨ tudägypɨ ajcxy nɨcxɨp ma yɨ jugyꞌajtɨn huinɨxɨɨbɨ.
\c 26
\s Je huinmaꞌñ nej anajty Jesús madzaangɨxy
\p
\v 1 Co Jesús nigapxtay tügꞌócɨy jadayaabɨ ayuc, chi nɨmay yɨꞌ ydiscípulos ajcxy:
\p
\v 2 ―Miich ajcxy mnejhuɨɨyb co huɨxtɨc je amayxɨɨ, je pascua xɨɨ. Pascua xɨɨjoty ɨɨch, je jäy huɨdibɨ tzoon tzajpjoty, nyajcɨ̈yegaꞌñɨch ma nmɨdzipɨch etz xyajcruutzpedaꞌñɨch, xyajꞌögaꞌñɨch ajcxy.
\p
\v 3 Je huinꞌit xɨɨ je teedy huɨdibɨ tungmɨɨd ajcxy, je escribas, etz je mɨjjäydɨjc ajcxy ñayyöymujctayɨ ma jeꞌ ytɨbaꞌ je teedy huɨdi jacmɨjtungmɨɨd huɨdi anajty yxɨɨ Caifás.
\v 4 E jɨm ma Caifás ytɨbaꞌ jɨm ajcxy huinmaꞌñyꞌixtay nej jëbɨ yajmachycägɨxy Jesús mɨɨd anɨɨ etz yajꞌögaangɨxy.
\v 5 Chi ajcxy ñayñɨmaayɨ miñ xyɨpy:
\p
―Caꞌ yꞌoyɨty co xɨɨjoty nmajtzɨm Jesús. Caꞌ jecyɨty co je mayjäy xymɨjotmaꞌttayɨm etz ytɨgɨ̈huɨp ajcxy huambɨ jɨhuɨɨybɨ.
\s Tüg töxyjäy pɨdacy aceite ma Jesús ycohuajc
\p
\v 6 Jesús anajty yajpaady Betania ma Simón ytɨjc, je Simón huɨdibɨ anajty ymɨɨd je jɨbɨc nïbüdz paꞌm.
\v 7 E ma anajty Jesús ycay, huinꞌit ymiiñ tüg töxyjäy mɨɨd tüg quiig ujtz mɨɨd perfume huɨdibɨ ooy oy yxuugy, jada perfume ooy anajty choohuɨty. Chi je töxyjäy yajꞌahuäch je quiig, e yajcöyogɨy Jesús je perfume huɨdibɨ ooy oy yxuugy.
\v 8 Co Jesús ydiscípulos ajcxy jaduꞌn ijxy, chi ajcxy mɨjotmaꞌty je töxyjäy. Chi ajcxy ñayñɨmaayɨ miñ xyɨpy:
\p
―¿Ti co jada perfume huɨdibɨ ooy oy xuugy ayoy?
\v 9 Tzou ixyipy ooy jada yajtoocy, jaydëbɨ ixyipy mɨɨd yajpubet je ayoobɨtɨjc.
\p
\v 10 E co Jesús nejhuɨɨy nej ajcxy ymɨnañ, chi nɨmay: 
\p
―¿Naꞌamy co mꞌamayɨ̈y jadayaabɨ töxyjäy? Yɨꞌ huɨdibɨ tɨ tuñ, jeꞌ yɨꞌ tüg oybɨ.
\v 11 Je ayoobtɨjc caꞌ ytɨgoyꞌidaꞌñ ma miich ajcxy nimɨna. Huen huɨdibɨ xɨɨ huen huɨdibɨ tiempo jëbɨ miich ajcxy mbubedɨpy ayoobtɨjc. Ɨɨch caꞌ nꞌidaꞌñɨch jecy ya mɨɨd miich ajcxy.
\v 12 Jada töxyjäy tɨ pɨdägy ma ɨɨch nninïcx perfume huɨdibɨ ooy oy xuugy, jayɨjp caꞌnɨ nnaaxtɨgɨ̈yɨch. Jaduꞌn jeꞌ jɨjpꞌijxpy mɨna nnaaxtɨgɨ̈huaꞌñɨch.
\v 13 E huentɨmmaꞌamyɨty je Dios yꞌayuc anajty yajcapxhuäcxy huinduꞌmy naaxhuiñ jɨm yajnigapxaꞌñ jaduꞌn nej je töxyjäy tɨ tuñ cham mɨɨd ɨɨch, e jaduꞌn je mayjäy jäymedzɨpy jada töxyjäy.
\s Judas cɨ̈yecy yɨ Jesús ma ymɨdzip agojɨɨx
\p
\v 14 Chi nidüg jeꞌ ydiscípulos huɨdibɨ yxɨɨ Judas Iscariote oy nɨmäy je teedy mɨjtungmɨɨdpɨ, 
\v 15 nɨmay ajcxy:
\p
―¿Ti ajcxy xymöhuɨbɨch co ngɨ̈yegɨpyɨch Jesús?
\p
Chi ajcxy moy iipxmajc plata meeñ.
\v 16 Co ajcxy meeñ ymooy, chi mɨcꞌamy Judas yhuinmaꞌñꞌixtay nej jëbɨ cɨ̈yecy Jesús ma ymɨdzip.
\s Jesús yꞌadzuuꞌajty pascua xɨɨjoty
\p
\v 17 Je ymɨdügpɨ xɨɨ, je amayxɨɨ, je pascua xɨɨ ma anajty yajcay je tzajcaagy huɨdi caꞌ levadura mɨɨdɨty, huinꞌit jeꞌ ydiscípulos ajcxy nimiiñ Jesús. Chi ajcxy yajtɨɨy:
\p 
―¿Ma mdzocy co ɨɨch ajcxy niꞌixɨ̈huɨp huidi mgayamy je pascua xɨɨ cɨxpɨ?
\p
\v 18 Chi Jesús yꞌadzooy:
\p
―Nɨcx miich ajcxy jɨm Jerusalén ma tüg jäy ytɨjc, e mnɨmähuɨp: “Ɨɨch nHuindzɨn jaduꞌn mɨnamb co yhuingoñ jeꞌ yxɨɨ yhora, e paady ma miich mdɨjc yɨꞌ tunaꞌñ je pascua xɨɨ adzuꞌajtɨn mɨɨd ydiscípulos ajcxy.”
\p
\v 19 Huinꞌit Jesús ydiscípulos ajcxy cuyduñ jaduꞌn nej Jesús anajty tɨ ñɨmäyii. Chi niꞌixɨɨy ajcxy je pascua adzuuꞌɨ̈bɨ.
\p
\v 20 E co chuꞌɨɨy, chi Jesús yꞌixtacy ma je mesa mɨɨd je nimajmetzpɨ ydiscípulos.
\v 21 E ma anajty ycaaygɨxy, huinꞌit nɨmay je nimajmetzpɨ:
\p
―Nidügtɨ miich ajcxy huɨdibɨ xycɨ̈yegaambɨch ma nmɨdzipɨch.
\p
\v 22 Huinꞌit ajcxy yjajtay taj may. Chi ajcxy yajtɨɨy:
\p
―Huindzɨn, ¿nej ɨɨch jadaꞌjɨ?
\p
\v 23 Chi Jesús yꞌadzooy:
\p
―Yɨ huɨdi mɨɨd ndocxmucyɨch, yɨꞌ jeꞌ jaduꞌn xycɨ̈yegaambɨch ma nmɨdzipɨch.
\v 24 Janch tɨyꞌajt co ɨɨch nꞌögaꞌñɨch, jaduꞌn nej je profeta jaay jecyꞌajty. ¡Ay ayoob je yëydɨjc huɨdi xycɨ̈yegaambɨch! Jacꞌoy co caꞌ ycamaꞌxungꞌaty je huɨdibɨ xycɨ̈yegaambɨch.
\p
\v 25 Chi Judas ymɨnañ:
\p
―Huindzɨn, ¿nej ɨɨch jadaꞌjɨ?
\p
Chi Jesús yꞌadzooy:
\p
―Miich jaduꞌn mɨnamb.
\p
\v 26 E ma anajty ajcxy ycay, huinꞌit Jesús tzajcaagy conɨ̈gy. Chi yajnajxy Dioscojuyip. E chi jadaꞌ tujchuäcxy je tzajcaagy. Chi moy je nimajmetzpɨ ajcxy je tzajcaagy, e ymɨnañ:
\p
―Cay miich ajcxy jadayaabɨ tzajcaagy, yɨꞌ jeꞌ ɨɨch je nninïcxɨch.
\p
\v 27 Huinꞌit Jesús cɨyɨ̈gy je yꞌügy. Chi yajnajxy Dioscojuyip. E huinꞌit moy je ügy je nimajmetzpɨ ajcxy, e ymɨnañ:
\p
―Üc miich ajcxy jadayaabɨ ügy,
\v 28 yɨꞌ jeꞌ ɨɨch je nnɨꞌpyɨch. Yɨꞌ ñigapxy co Dios tɨ yajꞌaducy je jemybɨ ayuc. E ɨɨch nnɨꞌpy ytemaꞌñ yogaꞌñ mɨɨd je mayjäy ycɨxpɨ, jaydëbɨ ajcxy paadɨp je huinmeecxɨn mɨɨd je ypocy ycɨxpɨ.
\v 29 Janch tɨyꞌajt jaduꞌn nej nnɨmaaygɨxy, co caꞌ nꞌocꞌügaanɨch jadügꞌoc je pascua xɨɨ ügy, ixtɨ coonɨ je xɨɨ tiempo paadɨp co ɨɨch ajt nꞌuucɨm huinjemybɨ je pascua xɨɨ ügy ma ɨɨch nDeedy yꞌaneꞌmɨn.
\s Jesús nigapxy co Pedro ycoyützaꞌñyii
\p
\v 30 E co tɨ yꞌɨɨdäy, chi ajcxy chooñ ñɨcxy ma Olivos cögop.
\v 31 Chi Jesús jeꞌ ydiscípulos ajcxy nɨmay:
\p
―Nidügꞌócɨy miich ajcxy xyꞌixmajtztähuaꞌñɨch cham coodz. Jeꞌ co jaaybejty jaduꞌn miiñ ma je Dios ñecy: “Ögɨp je cuendꞌajtpɨ, huinꞌit je cöbixy yöyhuäcxtähuaꞌñ.”
\v 32 E co anajty ɨɨch njugypɨcyɨch jadügꞌoc ma anajty tɨ nꞌögyɨch, chi jayɨjpnɨ nnɨcxaꞌñɨch ma Galilea, e jɨm naybaatɨm nidügꞌócɨy.
\p
\v 33 Chi Pedro ymɨnañ: 
\p
―Oy yɨ jacjadyiibɨ mɨgügtɨjcɨch xyjadɨmꞌixmajtztäy, per ni camɨna xɨɨ ɨɨch miich nꞌixmadzɨpy.
\p
\v 34 Chi Jesús Pedro nɨmay:
\p
―Janch tɨyꞌajt jaduꞌn nɨmäyɨch, cham coodz caꞌnɨ anajty je tzey yaxɨ̈gy, miich tugɨɨgꞌoc mɨnaꞌnɨp co caꞌ xyꞌixyꞌadyiijɨch. 
\p
\v 35 Chi Pedro ymɨnañ:
\p
―Oy ɨɨch ndɨmꞌögɨp mɨɨd miich, ni camɨna ngamɨnáꞌnɨbɨch co caꞌ miich nꞌixꞌadyii.
\p
E nidügꞌócɨy jeꞌ ydiscípulos ac tɨm jaduꞌn ymɨnañ.
\s Jesús mɨbɨjctzoy Dios jɨm Getsemaní
\p
\v 36 Chi Jesús ñɨcxy mɨɨd jeꞌ ydiscípulos ajcxy, oy yjaꞌtcɨxy jɨm Getsemaní. Chi jɨm Jesús nɨmay je ydiscípulos ajcxy:
\p
―Ya miich ajcxy ocꞌɨñaꞌ, miin ɨɨch nꞌocnɨcxyɨch jɨmꞌamy Dios mɨbɨjctzoobɨ.
\p
\v 37 E chi Jesús ñɨcxy mɨɨd Pedro etz nañ jaduꞌn mɨɨd je Zebedeo ymang nimetzpɨ. E jɨm Jesús ñayjɨhuɨɨyɨ janch tajy may mɨj cajee.
\v 38 E chi jɨm yajnɨmay je nidugɨɨgpɨ discípulos:
\p
―Nayjɨhuɨɨybɨch taj may ma njot nhuinmaꞌñ, ixtɨ mabaad anajty nꞌögɨch mɨɨd tájɨn máyɨn. Huɨꞌm miich ajcxy ya mɨɨd ɨɨch etz caꞌ mmaagɨxy.
\p
\v 39 Huinꞌit Jesús ñajtzyöyɨɨy mɨjcɨꞌm jahuɨꞌ. Chi jɨm ñaygojxtɨnaydacɨ naaxcɨ́xy, e ytɨgɨɨy Dios mɨbɨjctzoobɨ, ymɨnañ:
\p
―Dios Teedy, ɨɨch nDios, pen jëbɨ jaduꞌn, mduñ mayꞌajt pɨ́jcɨgɨch jadayaabɨ tzaachypɨ ayoꞌn, per caꞌ yjaduꞌnɨty nej ɨɨch ndzojcɨn mdunɨpy, jaduꞌn mdunɨpy janchtɨy nej miich mdzojcɨn.
\p
\v 40 Huinꞌit Jesús yhuimbijty jɨm ma anajty tɨ yajhuɨꞌmy je nidugɨɨgpɨ. E oy paady ac tɨm maab anajty ajcxy. Chi nɨmay je Pedro:
\p
―¿Nej caꞌ madägaꞌñ miich ajcxy co mꞌidɨpy juugy tüg hora mɨɨd ɨɨch ycɨxpɨ?
\v 41 Huɨꞌmɨꞌ ya, juugy mꞌidɨpy etz mɨbɨjctzoo Dios, jaydëb caꞌ je caꞌoybɨ xymɨmadägɨp. Janch tɨyꞌajt co jotjoty ooy mnijotꞌajtcɨxy com tunaangɨxy yɨ oybɨ. Per yɨ mninïcx caꞌ ymadägaꞌñ nɨcxy tuñ oybɨ.
\p
\v 42 Chi mɨmetzꞌoc Jesús ñɨcxy oy Dios mɨbɨjctzoy, ymɨnañ:
\p
―Dios Teedy, pen copɨcy co ɨɨch nbaadɨbɨch je ayoꞌn, huen jaduꞌn yjadɨɨyb mɨɨd ɨɨch nej miich mdzojcɨn.
\p
\v 43 Chi jadügꞌoc Jesús huimbijty ma je nidugɨɨgpɨ discípulos, e oy pátnɨbɨ maab ajcxy, jeꞌ co caꞌ anajty ajcxy mɨmadägy mähuɨɨ.
\v 44 Chi yajhuɨꞌmy ajcxy, e mɨdugɨɨgꞌoc ñɨcxy Dios mɨbɨjctzoobɨ. E nañ tɨm jaduꞌn oy mɨnaanɨp jaduꞌn nej anajty tɨ yꞌocmɨnamb.
\v 45 Chi jadügꞌoc huimbijtnɨ jɨm ma je nidugɨɨgpɨ, chi nɨmay ajcxy: 
\p
―¿Máagɨxnɨ? Pócxcɨx jadachambɨ. Tɨ je tiempo yhuaadꞌajtnɨ mɨna ɨɨch, je jäy huɨdibɨ tzoon tzajpjoty, nyajcɨ̈yegaꞌñɨch ma yɨ jɨbɨcjäydɨjc ajcxy.
\v 46 Pɨdɨ̈ccɨx, tzoc jámɨm, chi ymiiñ je huɨdibɨ xycɨ̈yegaambɨch ma nmɨdzipɨch.
\s Tzumy mach ajcxy Jesús yajnɨcxy
\p
\v 47 Jesús capxnɨ anajty jɨm co yjäty je Judas. Judas hueꞌ jeꞌ nidügtɨ je majmetzpɨ discípulos huɨdibɨ Jesús yhuinꞌijx. E je Judas mɨɨd jaꞌty mayjäy, je huɨdibɨ anajty tɨ quexy je judío teedy mɨjtungmɨɨdpɨ etz je mɨjjäydɨjc. E je mayjäy hueꞌ anajty ajcxy mɨɨd ypujx etz quipy.
\v 48 Judas, je huɨdibɨ anajty cɨ̈yejcp Jesús, tɨ anajty jayɨjp yecy tüg ijxpejt huɨdibɨ mɨɨd jëbɨ ajcxy ijxcapy Jesús. Jaduꞌn jayɨjp Judas ycapxtuñ mɨɨd jeꞌ ajcxy, e ymɨnañ:
\p
―Je jäy huɨdibɨ anajty ndzücxypɨch, yɨꞌ jeꞌ Jesús. Májtzcɨx.
\p
\v 49 Huinꞌit Judas nimɨjhuägy Jesús co capxpocxaꞌñ, chi ymɨnañ:
\p
―¡Huindzɨn!
\p
Chi tzücxy.
\p 
\v 50 Chi Jesús ñɨmayɨ: 
\p
―Mɨgüg, ¿naꞌamy co xyñimɨjhuägyɨch?
\p
E co jaduꞌn nɨmay, chi mɨcꞌamy yɨꞌ ajcxy majch Jesús. Chi ajcxy yajnɨcxy tzumy mach. 
\p
\v 51 E huinꞌit nidüg je Jesús ymɨgüg, juudy je ypujx. Chi tatzpujxtucy je teedy mɨjtungmɨɨdpɨ ytumbɨ.
\v 52 Chi Jesús nɨmay jeꞌ ydiscípulo:
\p
―Pɨdäg yɨ mbujx ma ytɨjc. Com pɨnjaty tziptumb mɨɨd pujx, nañ jaduꞌn yꞌögɨpy mɨɨd pujx.
\v 53 ¿Nej caꞌ mnejhuɨ̈y co ɨɨch jëbɨ nbɨjctzooyɨch cham adzuꞌx may ángeles, je huɨdibɨ xyñihuáꞌnɨbɨch ma nmɨdzipɨch?
\v 54 ¿Per nej ycɨxɨpy ycaꞌpxɨpy nej miiñ jaaybety, jaduꞌn nej cham ytuñyii yjadyii mɨɨd ɨɨch ycɨxpɨ?
\p
\v 55 Chi Jesús nɨmay je mayjäy:
\p
―Miich ajcxy tɨ xyñidzonɨ̈yɨch mɨɨd je pujx mɨɨd je quiipy. ¿Nej mdijy ɨɨch meetzpɨ o jäy yajꞌöcpɨch? Ɨɨch jabom jabom anajty ɨñäyɨch nyajꞌixpɨcyɨch miich ajcxy jiiby ma Dios ytɨjc. E caꞌ miich ajcxy xymajchɨch.
\v 56 Huinjɨhuɨꞌ miich ajcxy co tügꞌócɨy yam ytuñyii yjadyii caꞌpx tɨm jaduꞌn nej je profeta ajcxy cojaay jecyꞌajty.
\p
Huinꞌit nidügꞌócɨy jeꞌ ydiscípulos ajcxy yqueectay. Chi Jesús yhuɨꞌmy naydügpajc.
\s Jesús ma naymujcpɨdɨjc yhuinduu
\p
\v 57 Jeꞌ ajcxy huɨdibɨ anajty tɨ mach Jesús, yajnɨcx ajcxy jɨm ma Caifás ytɨjc. E jɨm ma Caifás ytɨjc ma anajty tɨ ñayyöymujctáayɨgɨxy je escribas etz je mɨjjäydɨjc ajcxy.
\v 58 E je Pedro anajty axam nɨcxy jɨguëgy jɨhuɨ̈y, ixtɨ coonɨ yajjaꞌty ma Caifás ytɨbaꞌ. Chi jɨm ytɨgɨy. Chi ixtacy mɨɨd je cuendꞌajtpɨ ajcxy, jeꞌ co ocꞌixaꞌñ ocnejhuɨ̈huaꞌñ nej Jesús yjadaꞌñ.
\p
\v 59 Je teedy ajcxy mɨjtungmɨɨdpɨ etz tügꞌócɨy je judíojäy mɨjtungmɨɨdpɨ ajcxy huinmaꞌñ ixtaaygɨxy nej jëbɨ Jesús yajpocycägɨxy mɨɨd ajcxy xɨ̈huɨn, e jaduꞌn jëbɨ mooygɨxy yɨ oꞌcɨn.
\v 60 Mayjäy nïhuambejty Jesús mɨɨd anɨɨ, per ni pɨn anajty caꞌ mɨɨdɨty tɨyꞌajt co Jesús anajty tɨ ytundɨgooy mɨɨd judíojäy ajcxy ycötujcɨn. Jac com jecy miin metz testigos mɨɨd aanɨɨ.
\v 61 Jeꞌ ajcxy ymɨnañ:
\p
―Jadayaabɨ yëydɨjc mɨnañ co jëbɨ nyajhuindɨgooyɨch Dios ymɨjtzajptɨjc, e codugɨɨg xɨɨ tɨ anajty nyajꞌoyɨ̈yɨch jadügꞌoc.
\p
\v 62 Huinꞌit je teedy mɨjtungmɨɨdpɨ ytɨnayɨ̈gy, e nɨmay Jesús:
\p
―¿Nej co caꞌ mꞌadzooy? ¿Nej janch tɨyꞌajt nej jadayaabɨ metzpɨ testigo ymɨnaꞌñ?
\p
\v 63 Per Jesús caꞌ yꞌadzooy. E huinꞌit je teedy mɨjtungmɨɨdpɨ ñɨmaayɨ:
\p
―Nɨmaayg ɨɨch ajcxy Dios ycɨxpɨ, pen janch miich jeꞌ je Cristo je Dios yꞌung.
\p
\v 64 Chi Jesús ymɨnañ:
\p
―Miich jaduꞌn mɨnamb. Nañ jaduꞌn ɨɨch miich ajcxy nɨmäy, co ɨɨch je jäy huɨdibɨ tzoon tzajpjoty, miich ajcxy xyꞌixɨpyɨch tzajpjoty ma Dios ymɨjc aꞌoyꞌamy. Nañ jaduꞌn miich ajcxy xyꞌixɨpyɨch jocjoty co anajty nhuimbityɨch jadügꞌoc ya naaxhuiñ.
\p
\v 65 Chi je teedy jacmɨjtungmɨɨdpɨ oy yhuit huindzecxy huinmaꞌch, chi ymɨnañ:
\p
―Jadayaabɨ yëydɨjc tɨ capxtɨgooy Dios. ¿Ti testigo njac-huaanɨm? Miich ajcxy cɨꞌm tɨ mmɨdoogɨxy co yɨꞌ tɨ ycapxytɨgooy ma Dios, e minañ:
\v 66 ¿Nej miich ajcxy mɨnaangɨxy?
\p
Chi ajcxy ymɨnañ:
\p
―Tɨ ycapxytigooy, copɨcy co yꞌögɨpy.
\p
\v 67 Chi ajcxy huindzujy jɨjptzujy etz cojxy ajcxy. Chi jacjadyii huingojxy jɨjpcojxy.
\v 68 E chi ajcxy nɨmay:
\p
―Pen janch co miich jeꞌ je Cristo octɨygapx pɨn tɨ xycoxy.
\s Pedro ymɨnaꞌñ co caꞌp Jesús ixyꞌadyii
\p
\v 69 Je huinꞌit moñɨ Pedro anajty ɨñay tɨbägujc. Chi ñimiinɨ tüg töxyꞌanäg tumbɨ, chi ñɨmaayɨ:
\p
―Miich nañ jaduꞌn tɨ mhuɨdity mɨɨd Jesús je Galilea jäy.
\p
\v 70 Chi Pedro ymɨnañ mayjäyjoty:
\p
―Caꞌ nhuinjɨhuɨ̈yɨch ti mgapxpy.
\p
\v 71 Pedro hueꞌ anajty pɨdzɨmnɨp co ñimiinɨ huingbɨ töxyꞌanäg. Chi je töxyꞌanäg nɨmay jeꞌ ymɨgügtɨjc:
\p
―Jadayaabɨ yëydɨjc tɨ yhuɨdity nañ jaduꞌn mɨɨd Jesús je Nazaretpɨ.
\p
\v 72 Chi Pedro jadügꞌoc coyüch je Jesús cɨxyjot huinɨjot ymɨnañ:
\p
―Caꞌ nꞌixyꞌadyiijɨch yɨjiibɨ yëydɨjc.
\p
\v 73 Jac co hueenɨ, je jäy huɨdibɨ anajty ajcxy jɨmɨp ñɨmay ajcxy je Pedro:
\p
―Janch co miich nañ jaduꞌn anajty mɨɨd mhuɨdity yɨ Jesús, com yɨ mꞌayuc yɨꞌ xyajniquëxɨ̈cp.
\p
\v 74 Chi Pedro tɨgɨɨy capxpɨ janch oy ñinej mɨnañ huinɨjot:
\p
―Caꞌ nꞌixꞌadyiijɨch yɨ yëydɨjc.
\p
E tɨm huinꞌítɨy je tzey yaxɨ̈gy.
\v 75 Chi Pedro jäymejtzcoody jaduꞌn nej anajty Jesús tɨ ñimäyii: “Ma caꞌnɨ anajty tzey yaxɨ̈gy cham coodz, miich tugɨɨgꞌoc xycoyützɨbɨch.” Chi Pedro pɨdzɨmy tɨbaꞌ, e jiiby oy yäxy mɨbaad yjotcɨdägy.
\c 27
\s Chi Jesús yajcɨ̈yejcy ma Pilato
\p
\v 1 E co oy yxɨɨmɨ̈y ytɨcxɨ̈y, chi je teedy mɨjtungmɨɨdpɨ etz je mɨjjäydɨjc ajcxy quipxycapxy co yajꞌögaangɨxy Jesús.
\v 2 Chi ajcxy yajnɨcxy cɨ̈xoch oy ajcxy cɨ̈yecy ma Poncio Pilato je gobernador.
\s Judas ñayyöctɨɨyɨ
\p
\v 3 Co je Judas je huɨdibɨ anajty tɨ cɨ̈yecy Jesús, co ijxy co yajꞌögaanɨp Jesús, chi oy yjotmaybaatnɨ. Chi conhuimbijty je iipxmajcpɨ plata meeñ ma je teedy mɨjtungmɨɨdpɨ etz mɨjjäydɨjc ajcxy.
\v 4 Chi Judas nɨmay je teedy mɨjtungmɨɨdpɨ etz je mɨjjäydɨjc ajcxy:
\p
―Ɨɨch tɨ ndundɨgooyɨch co tɨ ngɨ̈yecyɨch yɨ tudägyjäy ma miich ajcxy.
\p
Chi jeꞌ ajcxy yꞌadzooy:
\p
―Ti ɨɨch ajcxy nꞌoccuent. Miich yɨꞌ mnïgɨxp tɨɨbɨ mduñ.
\p
\v 5 Huinꞌit Judas cohuɨjɨy je meeñ jiiby tzajtɨgoty. Chi ñɨcxy. Chi ñayyöctɨɨyɨ.
\p
\v 6 Huinꞌit je teedy mɨjtungmɨɨdpɨ yajpɨdɨ̈gy je meeñ. Chi ajcxy ñayñɨmaayɨ miñ xyɨpy:
\p
―Jadayaabɨ meeñ caꞌ yjëbɨty co nbɨdaacɨm ma ofrenda ñigɨdägy. Jeꞌ co yɨꞌ yjëjɨty je huɨdi nɨꞌpy tɨ tzooꞌadyii.
\p
\v 7 Huinꞌit je teedy ajcxy tuñ je quipxycapxy co juyaangɨxy mɨɨd je meeñ tüg naax huɨdibɨ jäy ytijp, tütznaax it, ma ajcxy yajnaxtɨgɨ̈huɨpy pɨnjaty caꞌ ycogajpɨty jɨm Jerusalén.
\v 8 Ixtɨ chambaad jaduꞌn xɨɨꞌadyii jejɨmbɨ it: Nɨꞌpy naax. 
\v 9 E jaduꞌn ycɨjx ycaꞌpx nej je profeta Jeremías ymɨnañ: “E jaduꞌn ajcxy jeꞌ yajpɨdɨ̈gy meeñ iipx majcpɨ plata meeñ (jeꞌ choou  nej anajty ajcxy Israeljäy tɨ yajnigödugɨ̈y),
\v 10 e mɨɨd je meeñ ajcxy juy je tütznaax it, jaduꞌn nej anajty tɨ xyꞌaneꞌmyɨch Dios.”
\s Pilato yꞌamɨdooy Jesús
\p
\v 11 Jesús yajpaady jɨm anajty ytɨnäy ma je gobernador Poncio Pilato yhuinduu, chi yꞌamɨdoohuɨ:
\p
―¿Nej miich jeꞌ judíos jäy xyreyꞌajtp?
\p
Chi Jesús yꞌadzooy:
\p
―Miich jaduꞌn mɨnamb.
\p
\v 12 Je judío teedy ajcxy huɨdibɨ mɨjtungmɨɨdpɨ etz je mɨjjäydɨjc tzachxɨ̈gɨxy Jesús ma je gobernador. Ni jaduꞌñyɨ Jesús caꞌ yꞌadzooy.
\v 13 Chi je Pilato ñɨmay Jesús:
\p
―¿Nej caꞌ mmɨdooy nej yɨꞌ ajcxy yxɨ̈yɨ?
\p
\v 14 Per Jesús ni jaduꞌñyɨ caꞌ yꞌadzooy. E paady je gobernador oy mɨj huinmay, ni caꞌ ocnejhuɨɨyñɨ ti ycapxɨpy.
\s Jesús ycödujcy yꞌoꞌcɨn
\p
\v 15 Je gobernador jaduꞌn anajty ycostumbre mɨɨdɨty co jɨmɨjt jɨmɨjt najtzmadzɨ̈y tüg machyjäy pascua xɨɨjoty, je huɨdibɨ je mayjäy tɨ ytɨmychojcpy.
\v 16 E jɨm anajty tüg je machjäy huɨdibɨ anajty ajcxy ixyꞌajttaayb, e yxɨɨjɨty Barrabás.
\v 17 E co anajty jɨm tɨ ytügmujctaaygɨxy, chi Pilato ajcxy yꞌamɨdooy:
\p
―¿Pɨn miich ajcxy mdzojcpy co ɨɨch nnajtzmadzɨ̈huɨbɨchɨ? ¿Najtzmadzɨ̈yɨch Barrabás o Jesús huɨdibɨ jäy ajcxy ytijpy  je Cristo?
\v 18 Pilato ñejhuɨɨyb anajty co mañꞌájtɨngɨ́x anajty tɨ cɨ̈yejccɨxy Jesús.
\p
\v 19 Jɨmnɨ anajty ɨñäy Pilato me je ycötujctac co je ytöxyɨjc tɨyꞌajt quejxy ma yɨꞌ, ymɨnañ: “Caꞌ huaad myajtzaachytuñ yɨ tudägyjäy. Jeꞌ co ɨɨch amygoodz tɨ ngumäyɨch janch jɨbɨc mɨɨd yɨꞌ ycɨxpɨ.”
\p
\v 20 Per je teedy ajcxy etz je mɨjjäydɨjc tɨ anajty capxyjotcɨdaaccɨxy je mayjäy co huen yajnajtzmadzɨɨy Barrabás etz huen yajꞌöccɨxy Jesús.
\v 21 Paady co jadügꞌoc je gobernador yꞌamɨdooy je mayjäy:
\p
―¿Huɨdibɨ machyjäy mdzojcpy co nnajtzmadzɨ̈huɨbɨch?
\p
Chi je mayjäy yꞌadzooy:
\p
―Najtzmadzɨꞌ Barrabás.
\p
\v 22 Chi Pilato yꞌamɨdooy je mayjäy: 
\p
―¿E nej ndunɨpyɨch yɨ Jesús, huɨdibɨ jäy ytijpy Cristo?
\p
Huinꞌit ajcxy nidügꞌócɨy yꞌadzoday:
\p
―¡Yajcruutzpet yɨ Jesús!
\p
\v 23 Chi Pilato ymɨnañ:
\p
―Pues, ¿nej tɨ ytundɨgooy?
\p
Per je mayjäy nɨgoob yꞌadzoday:
\p
―¡Yajcruutzpet! ¡Yajcruutzpet!
\p
\v 24 Pilato yjapubedaan Jesús, per co ijxy nejhuɨɨy co je mayjäy caꞌ ni nej niducy. Hueꞌ ajcxy oy ytɨgɨɨy huambɨ jɨhuɨɨybɨ, chach ñayñajtztijɨɨygɨxy mɨɨd jotꞌan. Huinꞌit Pilato capxyñiguejxy je huädz nɨɨ. Chi ytɨgɨɨy cɨ̈bujp ma je mayjäy yhuinduu, e ymɨnañ:
\p
―Caꞌ ɨɨch ngoꞌadzohuɨpyɨch jadayaabɨ tudägyyëydɨjc yꞌoꞌcɨn. Miich ajcxy yɨꞌ mgoꞌadzoohuɨpy.
\p
\v 25 Chi je mayjäy yꞌadzoday:
\p
―Ɨɨch ajcxy ngoꞌadzohuɨpyɨch yɨꞌ yꞌoꞌcɨn mɨɨd nꞌung anäg etz nꞌap nꞌoc.
\p
\v 26 Chi Pilato najtzmadzɨy je Barrabás. Per Pilato aneꞌmy co huen Jesús yajhuojp. E co yajhuojptay, chi cɨ̈yejcy, co huen yajcruutzpedyii.
\v 27 Chi Pilato ysoldados ajcxy yajnɨcxy Jesús ma agujctɨjc. E jiiby tügꞌócɨy soldadtɨjc ñayyöymujcɨ ma Jesús. 
\v 28 Chi je soldado ajcxy jeꞌ yhuit yajnïjenducy. Chi ajcxy yajnïjenɨy je tzapx huit huɨdibɨ je rey ajcxy yajtuumyb.
\v 29 Chi ajcxy tacy tüg corona mɨɨd apy. Chi ajcxy yajcöjenɨy ma Jesús. E huinꞌit ajcxy aꞌoyꞌamy yajcɨ̈gabɨɨy tüg je paxy. Chi ajcxy huingojxtɨnayꞌahuɨɨy. Chi ajcxy nɨxiicy yajxiicy, e ymɨnaangɨxy:
\p
―¡Ooy ymɨjɨty yjanchɨty, je judíos ajcxy yrey!
\p
\v 30 Chi ajcxy huindzujy jɨjptzujy. Chi ajcxy yajcɨ̈gajptucy je paxy, e yajcöhuojpɨ̈gy ajcxy.
\v 31 E co ajcxy nɨxiictay yajxiictay, chi yajnïjenducy je rey yhuit etz yajnïjenɨy je ycɨꞌm huit. Chi ajcxy yajnɨcxy ma yajcruutzpedaangɨxy.
\s Co Jesús yajcruutzpejtɨ
\p
\v 32 E jɨm ma anajty hueenɨ tɨ ytüyöy, jɨm tɨ paty tüg Cirene yëydɨjc anajty yxɨɨjɨty Simón. Chi ajcxy adzɨp nɨmay Simón co huen jaccapɨ Jesús ycruudz.
\p
\v 33 E co ajcxy yjaꞌty ma tüg je it yxɨɨjɨp Gólgota, jaduꞌn yhuimbɨdzɨm Öcpɨ Cohuajc Cögop.
\v 34 E jɨm ajcxy Jesús jayajꞌügaꞌñ vino temhuɨdity mɨɨd tzooy, jɨgɨx caꞌ jɨhuɨ̈huɨp je tzaachypɨ. Per co uucmajch, chi jɨhuɨꞌñybɨjc co caꞌ yꞌoyꞌuucnɨty.
\p
\v 35 E co anajty ajcxy yajcruutzpety Jesús, chi je soldadtɨjc suerte ijxy, pɨn jëbɨ ocjëꞌadyii Jesús yhuit, chi ycɨjxy ycaꞌpxy jaduꞌn nej je profeta cojaay jecyꞌajty: “Yajhuäcxɨpy ajcxy ɨɨch nhuit e mɨɨd ɨɨch nhuit ycɨxpɨ ixɨpy ajcxy suerte.”
\v 36 E jɨm anajty ajcxy ɨñaaygɨxy cuendꞌajtcɨxy.
\v 37 Je xɨ̈huɨn ayuc huɨdibɨ ajcxy yjaay ma Jesús ycöduu jaduꞌn ymɨnañ: “Jadayaabɨ jeꞌ Jesús, je judíos ajcxy je yrey.”
\p
\v 38 Quipxy mɨɨd Jesús ajcxy yajcruutzpejty metz meetzpɨ. Tüg aꞌoyꞌamy, e jadüg anajtyꞌamy.
\v 39 Je mayjäy huɨdibɨ ajcxy naxɨɨyb anajty ma Jesús, ooy anajty oy ycöjɨgɨñ, nɨxïgy yajxïgy ajcxy Jesús, 
\v 40 ymɨnaꞌñ ajcxy:
\p
―Bah, miich huɨdibɨ Dios ytɨjc jidaanɨp, e codugɨɨg xɨɨ huingbɨ myajpɨdɨ̈gaꞌñ. Miich cɨꞌm cham naygohuänɨɨ, e mɨnac cruudzcɨ́xy, pen janch miich Dios xyꞌungꞌadyii.
\p
\v 41 Nañ jaduꞌn je teedy ajcxy huɨdibɨ mɨjtungmɨɨdpɨ, etz je escribas, etz je fariseos ajcxy etz je mɨjjäydɨjc nɨxiicy yajxiicy ajcxy Jesús, ñayñɨmáayɨgɨxy miñ xyɨpy:
\p
\v 42 ―Huingbɨ tɨ cohuaꞌñ, e caꞌ jaty nej cɨꞌm ñaygohuaꞌnɨɨyb. Pen janch co yɨꞌ jëjɨty je Cristo je Israel jäy rey, huen mɨnacy jadachambɨ ma cruudz, huinꞌit nmɨbɨjcɨm.
\v 43 Yɨꞌ tɨ pɨdägy ymɨbɨjcɨn ma Dios; huen jadachambɨ je Dios yajnïdzögyii, pen janch Dios chogyii; yɨꞌ tɨ ymɨnaꞌñ co Dios yꞌungꞌadyii.
\p
\v 44 Nañ jaduꞌn je metzpɨ meetzpɨ ajcxy huɨdibɨ cruudzpejt quipxy mɨɨd Jesús nɨxiicy yajxiicy ajcxy ooy Jesús.
\s Jesús yꞌögy cruudzcɨ́xy
\p
\v 45 Co ycujcxɨɨjɨɨy, chi ycoodzɨyday tügꞌócɨy naaxhuiñybɨ. E jaduꞌn je naaxhuiñybɨ yꞌijty coodz, ixtɨ mɨnacy yxɨɨ.
\v 46 Huinꞌítɨy Jesús ycapxyqueecy janch mɨc ymɨnañ:
\p
―Elí, Elí, ¿lama sabactani? ―yɨ jaduꞌmbɨ ayuc hueꞌ yhuimbɨdzɨmy: Dios Teedy, Dios Teedy, ¿ti co tɨ xyꞌixmachɨch?
\p
\v 47 Nijëjɨty jäy huɨdibɨ anajty jɨm yajpatp huingon ma Jesús co jaduꞌn mɨdoogɨxy Jesús yꞌayuc, chi ajcxy ymɨnañ:
\p
―Jadayaabɨ yëydɨjc cham yaaxtaayb je profeta Elías.
\p
\v 48 Huinꞌit nidüg jäy ñɨcxy janch poyɨ̈gy etz oy yajtzooñ je pixy. Chi je pixy yajxoogy mɨɨd je xun vino. Chi pɨdacy je pixy ma je paxyjɨjp. Chi yujctijy ma Jesús yꞌahuac co huen ügy.
\v 49 Huinꞌit nijëjɨty ajcxy ymɨnañ:
\p
―Ixmatz, tzoc ajt ocꞌijxɨm, pen nimiinɨp Elías, pen janch yajnïdzögyii.
\p
\v 50 Jadügꞌoc Jesús yaaxqueegy janch mɨc. Chi oy yꞌoꞌcnɨ.
\v 51 Co Jesús yꞌoꞌcy, tɨm huinꞌítɨy jɨm ma Dios ytɨjc je mapxy yhuit ycɨɨtzhuaꞌcxy tɨnäꞌamy. E nañ jaduꞌn je naaxhuiñybɨ ooy chuyuy mɨɨd ujx mɨcpɨ etz je mɨjjatychaa oy jiitzhuaꞌcxy.
\v 52 May öcpɨ jut yꞌahuach etz yjugypɨjcy mayjäy tɨɨbɨ anajty yꞌoꞌccɨxy tɨɨbɨ anajty mɨbɨjccɨxy Dios.
\v 53 Co Jesús yjugypɨjcy, chi je mayꞌöcpɨ tɨɨbɨ anajty jugypɨjccɨxy etz tɨɨbɨ anajty pɨdzɨmgɨxy ma öcpɨ jut, chi ajcxy ytɨgɨɨy ma je Dios ycajp, je Jerusalén. E mayjäy ajcxy ijxy.
\v 54 Co je mɨc ujx oy ñaxy etz jac tijaty anajty tɨ ytuñyii tɨ yjadyii, chi je capitán etz mɨɨd jadyii ymɨgügtɨjc huɨdibɨ anajty cuendꞌajtp Jesús ooy ajcxy chɨgɨy yjɨhuɨy, e mɨnaangɨxy:
\p
―Janch tɨyꞌajt co yɨjiibɨ yëydɨjc Dios yɨꞌ anajty yꞌung.
\p
\v 55 May anajty nañ jaduꞌn töxyjäydɨjc ymɨjꞌijxcɨxy jɨguem huɨdibɨ anajty ajcxy Jesús tɨ mɨɨddzoon jɨm Galilea. Yɨꞌ anajty ajcxy Jesús ypubejtp.
\v 56 E ma jeꞌ ajcxy jɨm anajty chooñɨty, María Magdalena, María huɨdibɨ Jacobo etz José ytajꞌajtpy, etz je huɨdibɨ Zebedeo yꞌung ytajꞌajtpy.
\s Jesús yajnaaxtɨgɨɨyɨ
\p
\v 57 Co oy chuuꞌɨɨyñɨ ycoodzɨɨyñɨ, huinꞌit chooñ ma Arimatea tüg comeeñyjäy huɨdibɨ yxɨɨ José. E jeꞌ ymɨjnɨcxpejty anajty Jesús.
\v 58 Chi José ninɨcxy Pilato oy pɨjctzou Jesús ñinïcx. Huinꞌit Pilato pɨdacy yꞌaneꞌmɨn co huen möyii.
\v 59 Chi José ycɨ̈dɨgɨɨyɨ Jesús ñinïcx. Chi huinmojch mɨɨd tüg poob sábana.
\v 60 Chi yajnaaxtɨgɨy ma je ycɨꞌm jut jemybɨ huɨdibɨ anajty tɨ yajtzejtztüty tɨ yajpädüty ma tüg tzahuingueetz. Chi adɨguejctujcy je öcpɨ jut mɨɨd tüg tzaa.
\v 61 Chi José ñɨcxnɨ. E jɨm yhuɨꞌmy María Magdalena etz je jadügpɨ María, yꞌɨñäy ajcxy ymɨhuingon öcpɨ jut.
\s Je cuendꞌajtpɨ ajcxy ma Jesús ñaaxtɨgɨɨy
\p
\v 62 E com jabom ma anajty Jesús ɨxɨɨybɨ tɨ yꞌögy, ma anajty tɨ niꞌixɨydäy mɨɨd je sábado xɨɨ ycɨxpɨ, chi je teedy ajcxy huɨdibɨ tungmɨɨd etz je fariseos ajcxy ñayyöymujcɨ ma je Pilato.
\v 63 Chi ajcxy ymɨnañ:
\p
―Huindzɨn, yɨꞌ ɨɨch ajcxy njäymejchpyɨch co je anɨɨdacpɨ ymɨnañ ma anajty yjuugyɨty co codugɨɨg xɨɨ jugypɨgaꞌñ jadügꞌoc co anajty tɨ yꞌögy.
\v 64 E paady tunmayꞌajt quexɨpy soldados ajcxy ma Jesús tɨ ñaaxtɨgɨ̈y huen cuendꞌajtcɨxy ixtɨ coonɨ tugɨɨg xɨɨbɨ paadɨpy. Caꞌ yjecyɨty co ñiminɨɨb adzuum agoodz jeꞌ ajcxy huɨdibɨ mɨjnɨcxpejtɨp etz tzɨmguëgɨpy ajcxy Jesús ñinïcx. E chi nɨcxy jäy ymɨnaꞌñ: “Tɨ yjugypɨcy je öcpɨ.” Chi anajty jacꞌanaxy je anɨɨ tɨ yjajtnɨ caꞌydɨ je jayɨjpɨ.
\p
\v 65 Chi Pilato ajcxy nɨmay:
\p
―Miich ajcxy mɨɨd tüg pɨcy soldados huɨdib cuendꞌajtp ma miich ajcxy. Nɨ́cxcɨx miich ajcxy yajꞌadujccɨxy je öcpɨ jut, jaduꞌn nej mꞌaꞌɨxɨɨygɨxy.
\p 
\v 66 Chi ajcxy chonɨ ma je Pilato. Chi ajcxy quejxy je tüg pɨcypɨ soldados ma je öcpɨ jut. Chi ajcxy pɨdacy ijxhuɨꞌmɨn ma je tzaa huɨdibɨ ajcxy je jut yajꞌadɨguejctujcy.
\c 28
\s Co Jesús yjugypɨjcy
\p
\v 1 E com jabom co yxɨmɨ̈y ytɨcxɨ̈gy je domingo xɨɨ, huinꞌit ñɨcxy María Magdalena etz je jadügpɨ María ma Jesús ñaaxtɨgɨ̈y.
\v 2 Chi tüg mɨj ujx ñajxy. Huinꞌit ycɨdacy Dios tüg yꞌángel huɨdibɨ tzomb tzajpjoty. Chi jɨdɨgejcy je tzaa ma je öcpɨ jut aguu. Chi yꞌixtacy ma tzaa nïcx.
\v 3 Janch adɨɨcxp je ángel anajty yhuinjɨjp jaduꞌn nej huɨdzuc, e je yhuit janch poobꞌögy.
\v 4 E co je soldados ajcxy ijxpaty je ángel, chi ajcxy ooy chuyuygooty. Chi ajcxy yhuɨꞌmy jahuengɨ ögy.
\v 5 Huinꞌit je ángel yꞌadzooy je metz töxyjäy:
\p
―Caꞌ miich ajcxy mdzɨgɨ̈y. Ɨɨch nejhuɨɨybɨch co miich ajcxy mꞌixtäy Jesús je huɨdibɨ ajcxy yajcruudzpejty.
\v 6 Per caꞌ jeꞌ cham ya. Tɨ jeꞌ yjugypɨcy, jaduꞌn nej ymɨnañ. Min miich ajcxy ocꞌix ma ñaaxtɨgɨɨy. 
\v 7 Nɨcx miich ajcxy jottɨgooyb ma jeꞌ ydiscípulos ajcxy e nimaꞌ: “Tɨ Jesús yjugypɨcy jadügꞌoc, e yɨꞌ ñɨcxɨp jɨm Galilea e jɨm ajcxy mmɨɨdnaybadɨɨyb.” Ɨɨch miich ajcxy yam nnɨmaaygɨxy.
\p
\v 8 Huinꞌit je töxyjäy ajcxy chooñ janch poyɨ̈gy ma anajty tɨ ñaaxtɨgɨ̈y Jesús. Chi ajcxy ñɨcxy mɨɨd tzɨgɨꞌñ, per agujc jotcujc. Poyɨ̈gy ajcxy oy tɨyꞌajt yecy ma je discípulos ajcxy.
\v 9 E jɨm anajty je metzpɨ töxyjäy ytüyöy, tɨmetinɨ Jesús ñayguëxɨ̈cɨ ma jeꞌ ajcxy yhuinduu. Chi Jesús ajcxy capxpocxy. Chi jeꞌ ajcxy mɨhuingoñ Jesús etz mɨneenɨ jeꞌ ytecy. Chi ajcxy huindzɨgɨɨygɨxy.
\v 10 Jesús mɨnañ:
\p
―Caꞌ mdzɨgɨɨygɨxy. Nɨcx miich ajcxy nɨmaꞌ je nmɨgügtɨjcɨch co huen ajcxy nɨcxy jɨm Galilea, e jɨm naybadɨɨybɨch mɨɨd yɨꞌ ajcxy.
\s Huɨdibɨ ajcxy je soldadotɨjc ñigapx
\p
\v 11 E tüyöybñɨ anajty je töxyjäy nimetzpɨ co nijëjɨty je soldados ajcxy chooñ ma Jesús ñaaxtɨgɨɨy ñɨcxy jɨm Jerusalén, mɨɨdmɨydägaꞌñ je teedy huɨdibɨ tungmɨɨdpɨ nej anajty tɨ ytuñyii tɨ yjadyii ma Jesús ñaaxtɨgɨɨy.
\v 12 E huinꞌit je teedy ajcxy ñayyöymujctayɨ mɨɨd je mɨjjäydɨjc, tunaangɨxy quipxy capxy. Huinꞌit je teedy ajcxy etz je mɨjjäydɨjc moy ajcxy je soldados may meeñ.
\v 13 Chi ajcxy nɨmay:
\p
―Miich ajcxy mɨnaꞌnɨp co maab anajty miich ajcxy mɨjcoodz co ymiiñ Jesús ydiscípulos ajcxy etz tzɨmgueecɨ Jesús ñinïcx.
\v 14 Etz pen ymɨdooyb anajty yɨ gobernador, ɨɨch ajcxy ngapxjotcɨdägɨch, jɨgɨx caꞌ nej xytúngɨxɨpy.
\p
\v 15 E huinꞌit ajcxy je soldados ycɨ̈dɨgɨɨyɨ je meeñ. Chi ajcxy ñɨcxy cuyduñ jaduꞌn nej anajty ajcxy tɨ ñɨmäyii. E ixtɨ chambaad jaduꞌn judíojäy capx je ayuc.
\s Huɨdibɨ Jesús yajnïbɨjc ydiscípulos ajcxy
\p
\v 16 E jaduꞌn ajcxy ñɨcxy je nimajctügpɨ Jesús ydiscípulos ajcxy jɨm Galilea. Chi ajcxy ñɨcxy ma je cögop jaduꞌn nej anajty Jesús tɨ ñɨmáayɨgɨxy.
\v 17 E co ajcxy ijxpaty Jesús, chi ajcxy oy huindzɨgɨɨy. Per jɨm nijëjɨty huɨdibɨ caꞌ mɨbɨjcy co anajty yjëjɨty.
\v 18 Huinꞌit Jesús ymɨjhuaꞌcy ma yɨꞌ ajcxy, e nɨmay: 
\p
―Ɨɨch tɨ nyajmöyɨch je cötujcɨn jiiby tzajpjoty etz ya naaxhuiñ. Ɨɨch tɨ nyajmöyɨch je mɨj cötujcɨn, jaydëbɨ nꞌaneꞌmyɨch jiiby tzajpjoty etz ya naaxhuiñ.
\v 19 E paady nɨcx miich ajcxy huinduꞌmy naaxhuiñ capxhuäcxcɨx je ayuc, jaydëbɨ jäy ajcxy xymɨbɨgɨpyɨch. Tügꞌócɨy jäy ajcxy huɨdibɨ xymɨbɨjcpɨch myajnɨɨbedɨpy ajcxy mɨɨd Dios yxɨɨ, Dios yꞌung yxɨɨ, etz mɨɨd je Espíritu Santo yxɨɨ.
\v 20 Miich ajcxy myajꞌixpɨgɨpy je mayjäy co copɨcy cuydunɨpy ajcxy ɨɨch ngötujcɨn tügꞌócɨy jaduꞌn nej tɨ nꞌaneꞌmyɨch miich ajcxy. E miich ajcxy mnejhuɨɨyb co nmɨɨdꞌityɨch miich ajcxy huinɨxɨɨ huinɨtiempo, ixtɨ mabaad naaxhuiñybɨ anajty ycɨxpɨ ytɨgooy. Jibaad ycɨxy. Amén.