\id MRK
\h SAN MARCOS 
\toc1 SAN MARCOS
\mt1 SAN MARCOS 
\mt2 Jaayhuɨꞌmy Jaduꞌn Nej Jesucristo Ytun Yjajtɨ
\c 1
\p
\v 1 Jaduꞌn ogaꞌñ chondacy je oybɨ ayuc tɨyꞌajt jaduꞌn nej Jesucristo, je Dios yꞌung ytun etz yjajtɨ.
\p
\v 2 Je Dios yꞌayucnajtzcapxɨɨybɨ je Isaías jecyꞌajty jayhuɨꞌmy jaduꞌn nej Dios nɨmay je Cristo:
\q Nguexaamyɨch ɨɨch ngogapxy jayɨjp ma nidüg nidüg cajp ma miich mnɨcxaꞌñ jacꞌaxam, jɨgɨx jëb je cogapxy nɨmähuɨpy je jäy ajcxy co huen nayñiꞌixɨ́ɨyɨgɨxy ma yjot yhuinmaꞌñ mɨɨd miich ycɨxpɨ, jaduꞌn nipaady nej jɨhuɨ̈y jäy ajcxy niꞌixɨ̈y tüꞌaa co tüg rey yjädaꞌñ.
\m
\v 3 Nañ jaduꞌn jadüg it Isaías jayhuɨꞌmy jada ayuc ma jaduꞌn ymɨnañ:
\q Jɨm mɨjtɨgɨ̈duum jäy ajcxy mɨdoy co tüg jäy yꞌayuccapxhuäcxy, jaduꞌn ymɨnañ: “Nayñiꞌixɨɨyɨgɨx ma mjot mhuinmaꞌñ ajcxy jaydëb naybaatɨm mɨɨd ajt nHuindzɨn Dios. Ixmájtzcɨxy yɨ mjɨbɨcjot mjɨbic-huinmaꞌñ. Jaduꞌn nipaady nej jäy ajcxy yajtɨy tüꞌaa huɨdibɨ ooy yꞌadɨjy yꞌaꞌoch.”
\p
\v 4 Jɨm mɨjtɨgɨ̈duum anajty Juan je Bautista miñ e ytɨgɨɨy mayjäy yajnɨɨbejtpɨ. Chi Juan capxhuäcxy Dios yꞌayuc ma je mayjäy ajcxy huɨdibɨ anajty mimb nɨɨbejtp. Juan ayuc capxhuäcx co copɨcy co jäy ajcxy huen jothuimbíjtcɨxy etz ixmájtzcɨxy ajcxy je yjɨbɨchuinmaꞌñ, etz nɨɨbéjtcɨxy, jɨgɨx jëbɨ Dios yhuinmecxɨɨb ajcxy ypocy.
\v 5 Tügꞌócɨy je mayjäy ajcxy huɨdibɨ anajty tzɨnaayb jɨm Judea ñaaxjot etz jɨm Jerusalén mimb anajty ajcxy ma Juan, e yꞌamɨdooꞌijty anajty ajcxy jeꞌyꞌayuc. Co je jäy ajcxy capxpɨdzɨɨmy nej anajty ypocytúngɨxy, chi Juan yajnɨɨbejty ajcxy ma je Jordán mɨjnɨɨ.
\p
\v 6 Juan hueꞌ anajty yhuitꞌajtpy camello nïbɨjc, e nañ jëyɨm anajty mɨɨd ñayhuɨɨñyii, e hueꞌ anajty yjɨcxꞌajtpy muꞌ etz uxpäg.
\v 7 Juan ycapxhuäcxyp anajty Dios yꞌayuc ma je mayjäy, e ymɨnañ:
\p ―Ɨɨch jayɨjp tɨ nmiñɨch ngapxhuäcxy Dios yꞌayuc. Jacꞌaxam minɨpy tüg jäy huɨdibɨ jacnïgɨ mɨcꞌajt mɨɨdɨty caꞌydɨ ɨɨch, caꞌ xypaadyɨch nɨcxy nguejyɨch yɨꞌ ycɨ̈ghuin. 
\v 8 Ɨɨch tɨ nyajnɨɨbetyɨch miich ajcxy mɨɨd nɨɨ. Per je jäy huɨdibɨ yjacmɨɨd Dios ymɨcꞌajt, caꞌydɨ ɨɨch. Yɨꞌ xyajꞌadɨgɨ̈huɨp xyajjotɨgɨ̈huɨp Dios yjɨhuɨꞌñ ymɨcꞌajt, jaduꞌn nipaadɨp nej jɨhuɨ̈y xyajnɨɨbedɨp mɨɨd  Dios yjɨhuɨꞌñ ymɨcꞌajt.
\s Co Jesús ñɨɨbejty    
\p
\v 9 Je huinꞌit xɨɨ huinꞌit tiempo Jesús chooñ ma je cajp huɨdibɨ yxɨɨ Nazaret, jɨm Galilea ñaaxjot, e ymiñ ma Juan el Bautista anajty yajpaady. Huinꞌit xɨɨ Juan yajnɨɨbejty Jesús ma je Jordán mɨjnɨɨ.
\v 10 Pɨdzɨmb anajty Jesús ma je mɨjnɨɨ, e tɨm huinꞌítyɨ Jesús ijx co je tzajp anajty yꞌahuäch, e ijx je Espíritu Santo chooñ tzajpjoty, e 
ycɨdägy ma yɨꞌ. Jaduꞌn je Espíritu Santo yquëxɨ̈gy anajty nej tüg muuxy.
\v 11 Chi Jesús mɨdooy capxy ayuc choñ tzajpjoty, nɨmäyii: 
\p
―Ɨɨch miich nꞌungꞌajtpy. Ooy ɨɨch miich ndzocy njɨhuɨ̈y. Ooy jotcujc nayjɨhuɨ̈yiijɨch mɨɨd miich.
\s Je mujcuꞌ tuñ ijxtaꞌnɨ ma Jesús
\p
\v 12 Huinꞌit mɨcꞌamy je Espíritu Santo yajnɨcxy Jesús mɨjtɨgɨ̈duum.
\v 13 E hueꞌ Jesús yhuɨꞌmɨy jɨm mɨjtɨgɨ̈duum huixchɨguïpx xɨɨ ahuaꞌn ɨyujc agujc. Huinꞌit je mujcuꞌ jotꞌijxy yhuinmaꞌñꞌijxy je Jesús. Chi je ángeles ajcxy miñ ypubejty ypudɨgɨɨy je Jesús.
\s Jesús ytung yajtzondägy jɨm Galilea
\p
\v 14 Tɨ anajty Juan yajpɨdägy pujxtɨgoty, jacꞌaxam Jesús ñɨcxy jɨm Galilea. Jɨm Galilea Jesús capxhuäcxy Dios yꞌayuc etz yɨ Dios yꞌanéꞌmɨn.
\v 15 Jesús ymɨnañ:
\p 
―Tɨ je xɨɨ je tiempo yhuaadꞌajtnɨ. Tɨ nigoody je xɨɨ je tiempo mɨna Dios pɨdägaꞌñ yɨꞌ yꞌanéꞌmɨn ya naaxhuiñ. Jothuimbijtcɨx ajcxy, etz ixmajtzcɨx ajcxy mjɨbɨcjot mjɨbɨc-huinmaꞌñ. Mɨbɨjccɨx Dios yꞌayuc jaduꞌn nej jëb ajcxy mꞌalma ñïdzögɨpy.
\s Jesús huodzooñ mɨdaax jäy huɨdibɨ anajty acxmajtzp
\p
\v 16 Jesús huɨdijtp anajty ma je mejypaꞌ huɨdib yxɨɨ Galilea mejy, co oyꞌijxpaady Simón etz yꞌuch Andrés. Simón etz Andrés acxmadzɨɨ anajty ytungꞌajtpy, ytɨmpɨdacpy anajty yꞌacxmadzɨꞌñ mejyjoty co ajcxy Jesús ijxpaty.
\v 17 Chi Jesús nɨmay Simón etz  Andrés: 
\p
―Min mɨɨd ɨɨch. Ɨɨch miich ajcxy huingbɨ tung nmöhuɨpy. Jaduꞌn mdung nipaadɨp nej jɨhuɨ̈y mjäymájtzcɨxɨpy.
\p
\v 18 Mɨcꞌamy Simón etz Andrés ajcxy ixmajch yꞌacxmadzɨꞌñ, e ñɨcxy ajcxy mɨɨd Jesús.
\p
\v 19 Chi Jesús yjacyöy anajty hueen, e ijxpaty Jacobo etz yꞌuch Juan, je Zebedeo ajcxy ymang. Je Jacobo etz Juan tumb anajty barcojoty. Hueꞌ anajty ajcxy yajꞌoyɨɨyb jeꞌ yꞌacxmadzɨꞌñ.
\v 20 Chi Jesús mɨjhuooy ajcxy Jacobo etz Juan, e nɨmay co huen nɨcxy mɨɨd yɨꞌ. Mɨcꞌamy jeꞌ ajcxy ixmajch yteedy, je Zebedeo, barcojoty mɨɨd ytumbɨ, chi ajcxy ñɨcxy mɨɨd Jesús.
\s Tüg jäy huɨdibɨ anajty jɨbɨc espíritu mɨɨd
\p
\v 21 Huinꞌit Jesús mɨɨd ymɨgügtɨjc yjaꞌty jɨm Capernaum. Je huinꞌit sábado, je poocxɨn xɨɨ, Jesús ytɨgɨɨy ma je judíojäy ajcxy ñaymujctac jɨm Capernaum, chi yjäyyajꞌixpɨjctzondacy.
\v 22 Je mayjäy ooy ajcxy jɨhuɨy huinmay je ayuc huɨdibɨ Jesús anajty ajcxy yajꞌixpɨ́jcɨp. Com Jesús hueꞌ anajty yajꞌixpɨcy jaduꞌn nej jɨhuɨ̈y ycɨꞌmꞌanéꞌmɨn mɨɨdɨty. Caꞌ Jesús anajty yajꞌixpɨcy jaduꞌn nej je jäy ajcxy huɨdibɨ yajꞌixpɨjcp anajty Moisés ycötújcɨn je jécyɨp.
\v 23 E ma je naymujctac tüg yëydɨjc huɨdibɨ mɨɨd anajty caꞌoybɨ. Chi je caꞌoybɨ ooy mɨc ycapxcoody, e ymɨnañ:
\p
\v 24 ―¿Ti co xyꞌamayɨ̈y ɨɨch ajcxy, Jesús huɨdibɨ tzomb jɨm Nazaret? ¿Nej tɨ mmiñ co xyajhuindɨgoyáangɨxyɨchɨ? Ɨɨch nꞌijxcajpy miich, e nejhuɨɨybɨch co miich jeꞌ je Huätzpɨ Dios.
\p
\v 25 Chi Jesús ixꞌojy je caꞌoybɨ, e nɨmay:
\p
―Amon miich, e pɨdzɨmb ma jada yëydɨjc.
\p
\v 26 Huinꞌit je caꞌoybɨ yajyajch yajquïdy je yëydɨjc, e mɨc yaaxqueegy, e ypɨdzɨmy ma je yëydɨjc.
\v 27 Tügꞌócɨy je mayjäy jiiby ma je naymujctac ooy ajcxy ñayꞌadzɨgɨɨyɨ, e ñayñɨmaayɨ ajcxy miñ xyɨpy: 
\p
―¿Ti jadaꞌ yɨꞌ? Jada yëydɨjc ymɨɨd jemybɨ ixpɨ́jcɨn. Yɨꞌ mɨɨd mɨcꞌajt etz aneꞌmꞌajt, paady ycɨxpɨ yɨꞌ aneꞌmy yɨ caꞌoybɨ, e ycapxmɨdoohuɨp.
\p
\v 28 Mɨcꞌamy je mayjäy ajcxy huɨdijaty tzɨnaayb ma tüg tüg cajp jɨm Galilea nejhuɨy ajcxy nej Jesús ytuñ, e cömaaygɨxy Jesús.
\s Jesús yajtzögy Simón Pedro ymɨ̈d töxyjäybɨ
\p
\v 29 Tɨm huinꞌítɨy Jesús ypɨdzɨmy ma je naymujctac, chi ñɨcxy mɨɨd Jacobo etz Juan jɨm ma Simón etz Andrés ytɨjc.
\v 30 Simón ymɨ̈d töxyjäybɨ pɨ́jcɨp anajty. Cɨjxꞌam anajty yꞌity, e mɨc anajty ooy ytoyii. Tɨm huinꞌítɨyɨ Jesús ñɨmaayɨ co Simón ymɨ̈d ooy
 mɨc ypɨgyii.
\v 31 Chi Jesús nimɨjhuägy je paꞌmjäy. Chi majtzɨ ycɨꞌ, e huijtzɨ̈gy. Tɨm huinꞌítɨy yɨ toyɨɨ yꞌixmajtzɨ, e chi yajcay yajꞌuucy Jesús etz ymɨgügtɨjc.
\s Jesús yajtzögy may paꞌmjäy
\p
\v 32 Co xɨɨ oy ycɨdacnɨ, e chuuꞌɨɨyñɨ, chi je mayjäy mɨɨd miñ ajcxy ma Jesús tügꞌócɨy paꞌmjäydɨjc, etz huɨdijaty ajcxy caꞌoybɨ ymɨɨd.
\v 33 Tügꞌócɨy je mayjäy ajcxy ma je jɨmbɨ mɨj cajp nimujcy je tɨjc ma Jesús anajty tɨ yjättägy.
\v 34 Jesús yajtzooctay tügꞌócɨy je may paꞌmjäy huenytɨmytiibáꞌmɨty, etz yajpɨdzɨmy may caꞌoybɨ majaty jäy ajcxy.  Per Jesús caꞌ anajty aꞌɨxɨ̈y nɨcxy je caꞌoybɨ ñigapxyii, com yꞌixyꞌajttaayb anajty ajcxy Jesús.
\s Jesús yꞌayuc tɨyꞌajt capxhuäcxy jɨm Galilea
\p
\v 35 Tɨm mooñɨ Jesús ymaybɨdɨ̈gy, caꞌ anajty yxɨɨmɨɨyñɨ, e ypɨdzɨmy ma je cajp. Chi ñɨcxy ma tüg mɨjtɨgɨ̈duum Dios mɨbɨjctzoobɨ.
\v 36 Huinꞌit je Simón etz je ymɨgügtɨjc ooy ajcxy jaꞌijxtäy Jesús.
\v 37 Co ajcxy paty je Jesús, chi ajcxy nɨmay: 
\p
―Tügꞌócɨy je mayjäy xyjadɨmꞌixtäy. 
\p
\v 38 Chi Jesús nɨmay Simón etz je ymɨgügtɨjc ajcxy:
\p 
―Tzoc ajt jámɨm ma yɨ jacjadyii cajp huinduy agonbɨ, jaydëb   ngapxhuäcxɨbɨch Dios yꞌayuc nañ jaduꞌn ma yɨ jäy ajcxy jɨm. Paady ycɨxpɨ ndzooñɨch tzajpjoty, jɨgɨx jëbɨ ngapxhuäcxɨbɨch Dios yꞌayuc.
\p
\v 39 Jesús nɨcxp anajty ma nidüg nidüg cajp jɨm Galilea ycapxhuäcx anajty Dios yꞌayuc ma nidüg nidüg judíojäy ñaymujctac, e yajpɨdzɨmy anajty caꞌoybɨ majaty jäy.
\s Jesús yajtzögy tüg jäy nïbützpaꞌmmɨɨdpɨ
\p
\v 40 Tüg jäy huɨdibɨ ymɨɨd anajty jɨbɨc pützpaꞌm, je mɨcpɨ, chi nimɨjhuägy Jesús, e ycojxtɨnayꞌahuɨɨy ma Jesús yhuinduu, ymɨnañ: 
\p  
―Pen miich jaduꞌn tzojcpy, jëb xyajtzögɨch.
\p
\v 41 Chi Jesús paꞌayoy je paꞌmjäy, e pɨdacy ycɨꞌ ma je paꞌmjäy ñinïcx, e ymɨnañ:
\p
―Ndzojcpyɨch, cham nyajtzögy.
\p
\v 42 Co Jesús jaduꞌn ymɨnañ, chi mɨcꞌamy je jäy huɨdibɨ anajty mɨɨd je jɨbɨc püdz chögy.
\v 43-44 Mɨcꞌamy Jesús ycapxcɨ́jxy mɨɨd je jäy huɨdibɨ anajty tɨ chögy, e nɨmay:
\p
―Ix pɨn myajnɨmäy co tɨ mdzögy. Nɨcx jayɨjp jiiby ma Dios ytɨjc ma je judío teedy ajcxy, e moꞌ Dios yhuindzɨgɨꞌñ jaduꞌn nej Moisés ycötújcɨn aneꞌmy, jɨgɨx jëbɨ huädz mbɨdzɨmɨpy ma Dios ycötújcɨn. Cuydun miich huɨdibɨ Moisés ñajtzꞌaneꞌmɨɨy jecyꞌajty, jɨgɨx jëbɨ je mayjäy ajcxy nejhuɨ̈huɨp co tɨ mdzögy.
\p
\v 45 Per je yëydɨjc caꞌ capxymɨdoy Jesús. Co ñɨcxy, chi ytɨgɨɨy capxy yajyöybɨ jaduꞌn nej anajty tɨ yajtzögyii. Com je mayjäy nejhuɨɨyb huɨdibɨ anajty Jesús tɨ tuñ, paady ycɨxpɨ Jesús caꞌ anajty ocjajtnɨ nej ytɨgɨ̈huɨpy ijxnaꞌ jɨgueꞌxnaꞌ majaty cajp. Hueꞌ anajty huɨdity ma caꞌ pɨn chɨnäy. Per miñ anajty yꞌoyꞌixyii huenytɨmypɨnjäyɨty, chooñ ma nidügꞌócɨy cajp huinduy agonbɨ. 
\c 2
\s Jesús yajtzögy tüg jäy cɨ̈maꞌtpɨ tecymaꞌtpɨ
\p 
\v 1 Tɨ anajty xɨɨ tiempo ñajtznïnɨcxɨɨyñɨ co Jesús yhuimbijty jadügꞌoc jɨm Capernaum. Je mayjäy ñejhuɨɨyb anajty co Jesús yajpaady ma tüg tɨjc.
\v 2 Chi mɨcꞌamy mayjäy ñayyöymujcɨ ma anajty Jesús yajpaady, e caꞌ anajty tɨgɨydac ma je tɨjc, mɨɨd co tzach mayjäy anajty tɨ miingɨxy. Yꞌadujctaayb anajty ajcxy je tɨjcꞌaguu. E Jesús ycapxhuaꞌxyp anajty Dios yꞌayuc.
\v 3 Huinꞌit xɨɨ, mɨdaax yëydɨjc cɨymiñ cɨjxꞌam ma Jesús yajpaady tüg paꞌmjäy huɨdibɨ ycɨꞌ ytecy tɨ yxujxtäy  anajty.
\v 4  E com caꞌ anajty ni nej yꞌoyɨ̈y nej yajjädɨp ajcxy ma Jesús je paꞌmjäy, jeꞌ co anajty chach újtzɨty je tɨjc mɨɨd je mayjäy, chi ajcxy yajcöhuaach hueenɨ je tɨjcnïcx ma anajty Jesús yajpaady. Chi ajcxy cödɨyñajxy je paꞌmjäy cɨjxꞌam.
\v 5 Co Jesús ijxy je jäy ajcxy ymɨbɨ́jcɨn, chi nɨmay je paꞌmjäy:
\p
―Mɨgügɨch, yɨ mbocy tɨ yajhuinmecxtäy.
\p
\v 6 Per nijëjɨty huindzɨndɨjc huɨdibɨ ajcxy nïjaydutp anajty Dios ñecy co ajcxy mɨdoy nej Jesús ymɨnaꞌñ, chi ajcxy ymɨnaꞌñ jotjoty huinmaꞌñyjoty:
\v 7 “¿Nej co jada jäy jaduꞌn ymɨnaꞌñ co tɨ yajhuinmecxy jada paꞌmjäy ypocy? Capxtɨgooyb yɨꞌ mɨɨd Dios. Com caꞌ nipɨnjäy jëb ypocyhuinmecxy. Tügpajc Dios yɨꞌ huɨdibɨ jëb ypocyhuinmecxy.”
\v 8 Per Jesús ñejhuɨɨyb anajty nej jeꞌ ajcxy chachmɨnaꞌñ jotjoty huinmaꞌñyjoty, paady mɨcꞌamy ymɨnañ:
\p
―¿Naꞌamy co mdzachhuinmaaygɨxy?
\v 9 ¿Huɨdibɨ jada jacꞌooy co nnɨmäyɨch yɨ paꞌmjäy: “Tɨ mbocy yajhuinmecxytäyɨ.” O jacꞌooy co nnɨmähuɨbɨch: “Pɨdɨ̈g, e yajpɨdɨ̈g yɨ mdögy, e tüyöy?” Túꞌcɨy yɨꞌ.
\p
\v 10 Chi Jesús yjacmɨnañ:
\p 
―Jadachambɨ janchtɨy nyajquëxɨ̈gaꞌñɨch co ɨɨch, je jäy huɨdib tzoon tzajpjoty, e huɨdibɨ cham yajpaady ya naaxhuiñ, nmɨɨdɨch mɨcꞌajt jaydëb nhuinmecxyɨch jäy ypocy.
\p
Co Jesús jaduꞌn ymɨnañ, chi nɨmay je paꞌmjäy huɨdibɨ ycɨꞌ ytecy anajty xuxy:
\p
\v 11 ―Ɨɨch miich yam jaduꞌn nɨmäy: “Tɨnayɨ̈g, yajpɨdɨ̈g yɨ mmabejt e nɨcx ma mdɨjc.”
\p
\v 12 E mɨcꞌamy je paꞌmjäy ypɨdɨ̈gy, e yajpɨdɨ̈gy ymabejt, chi ytüyöychoñ jiiby ma je mayjäy ajcxy anajty yꞌixy yhuindɨcxy. Paady ycɨxpɨ tügꞌócɨy je mayjäy ooy jɨhuɨy huinmay etz jäymejch ojadajty ajcxy Dios, ymɨnaangɨxy:
\p
―Nimɨnaabɨ ajt jaduꞌn ngaꞌíjxɨm mɨjhuinmaꞌñ jaduꞌn nej cham tɨ nꞌíjxɨm.
\s Jesús nɨmay je Leví: “Pajamgɨch”
\p
\v 13 Chi jadügꞌoc Jesús ycajppɨdzɨmy, ñɨcxy jɨm ma mejypaꞌ. E co mayjäy ñayöymujcy jɨm ma Jesús anajty yajpaady, chi Jesús yajꞌixpɨjc je mayjäy. 
\v 14 Co Jesús yjactüyöy anajty, chi ijxpaady Leví je Alfeo ymang. E Leví ɨñaayb anajty ma je yajcogüejttac jäy yajcogüejtp anajty. Chi Jesús nɨmay Leví:                                    
\p
―Pajamgɨch.
\p
Tɨm huinꞌítɨy Leví ytɨnayɨ̈gy, ixmajch ytung, e panɨcxy Jesús.
\p
\v 15 Jaduꞌn yjajtɨ co tüg xɨɨ Jesús caayb anajty me Leví ytɨjc. Mayjäy huɨdibɨ ytungꞌajtpy anajty yajcogüedɨɨ, etz jacjadyii jäy huɨdibɨ anajty tundɨgooyb mɨɨd judío jäy ycostumbre yꞌɨñaaygɨxy ma je caydac quipxy mɨɨd Jesús etz jeꞌ ydiscípulos ajcxy. Com may jäy anajty ooy Jesús tzach mɨɨd huɨdíjtcɨxy.
\v 16 Jɨm anajty ma Leví ytɨjc nijëjɨty fariseojäy, je huindzɨndɨjc huɨdibɨ tzach padumb judíojäy ycostumbre. E co jeꞌ ajcxy ijxy co Jesús caayb uucp anajty tügmucy mɨɨd tügꞌócɨy je mayjäy ajcxy huɨdibɨ tundɨgooyb mɨɨd judíojäy ytɨyꞌajt ycötújcɨn, etz yajcogüejtpɨdɨjc, chi ajcxy mɨgapxy Jesús ydiscípulos, jeꞌ ajcxy huɨdibɨ mɨjnɨcxpejtp anajty Jesús, nɨmay ajcxy:
\p
―¿Nej co  Jesús miich ajcxy mHuindzɨn ycaymucy yꞌucmucy mɨɨd yɨ yajcogüejtpɨdɨjc ajcxy, etz jacjadyii jäy ajcxy huɨdibɨ tundɨgooyb mɨɨd judíojäy ycötújcɨn?
\p
\v 17 Co Jesús jaduꞌn mɨdoy nej je fariseo jäy nigapxyii, chi ajcxy nɨmay: 
\p
―Caꞌ tzocy tzoydumbɨ yɨ jäy ajcxy huɨdibɨ mɨcꞌajtp oyꞌajtp. Yɨꞌ janchtɨy yɨ huɨdibɨ ajcxy yuubaꞌm ymɨɨd chojcpy ajcxy tzoydumbɨ. Nañ tɨm jaduꞌn yɨ jäy ajcxy huɨdibɨ caꞌ ypocymɨɨdɨty, caꞌ ajcxy tzocy pocyhuinmeecxɨn. Ɨɨch tɨ nmiñɨch  co nyajjothuimbidɨpyɨch pocyjäydɨjc. Ɨɨch caꞌ tɨ nmiñɨch co nyajjothuimbidɨpyɨch oyjäydɨjc tudägyjäydɨjc. 
\s Jesús yajꞌamɨdoogɨxy nej co jäy yꞌity jaygay 
\p
\v 18 Jaduꞌn yjajtɨ tüg tiempo ayuuꞌijtp anajty je jäy ajcxy huɨdibɨ mɨjnɨcxpejtp anajty Juan je Bautista. Nañ jaduꞌn ayuuꞌajtp anajty je fariseojäy ajcxy. Chi nijëjɨty ajcxy ymiñ ma Jesús e amɨdoy:
\p
 ―¿Nej co yɨ jäy ajcxy huɨdibɨ mɨjnɨcxpejtp ajcxy Juan etz nañ jaduꞌn yɨ fariseojäy ajcxy ayuuꞌajtp ajcxy, e je jäy ajcxy huɨdib miich xymɨjnɨcxpejtp, caꞌ yꞌayuuꞌájtcɨxy? 
\p
\v 19 Chi Jesús yꞌadzooy:
\p
―Co ya nyajpaadyɨch ya naaxhuiñ, caꞌ ycopɨ́cɨty co ɨɨch ndiscípulos ajcxy yꞌayuuꞌadɨp. Jaduꞌn nipaady nej jäy ajcxy huɨdibɨ pɨ́jcɨn nixɨɨdumy caꞌ ajcxy yꞌayuuꞌaty ma yam yɨ pɨ́jcɨn nixɨɨduñ, e penɨ caꞌnɨ je pɨjcpɨ ymɨgügtɨjc yꞌixmajtztäyii. Namɨ je pɨjcpɨ caꞌnɨ choñ, chi caꞌ pɨn yꞌayuuꞌadaꞌñ huɨdibɨ nixɨɨdum je pɨ́jcɨn. 
\v 20 E paadɨp je xɨɨ je tiempo mɨna caꞌ nmɨɨdꞌidaꞌñɨch ya naaxhuiñ yɨꞌ huɨdibɨ ajcxy xymɨjnɨcxpejtpɨch, e huinꞌit ajcxy yꞌayuuꞌadaangɨxy.
\p
\v 21 Com jemybɨ Dios yꞌayuc nyajꞌixpɨcpyɨch, paady caꞌ ytügɨ̈y mɨɨd je jécyɨp ayuc huɨdibɨ je fariseo jäy ajcxy yajꞌixpɨjcpy. Jaduꞌn nej miich ajcxy mnejhuɨ̈y co ni pɨn caꞌ agɨyɨ̈y tuc huit mɨɨd tüg pedaas jemy huit, con jeꞌ co je jemy huit nɨɨmujcp jeꞌ, e chi nïgɨ najtzcɨɨdzɨ̈huɨp je tuc huit. 
\v 22 E nañ ni pɨn caꞌ jëb huaad pɨdägy jemy vino ma tuc cochac. Jeꞌ co je vino jemybɨ ycɨɨdzamy je tuc cochac, e chi yꞌixyojctähuɨp je vino etz je cochac ñitɨgoydähuɨp. Hueꞌ janchtɨy jëb ajcxy pɨdacy jemy vino ma jemy cochac.
\s Je discípulos ajcxy yajmújcɨxy je moc cojc sábado xɨɨ
\p 
\v 23 Tüg sábado xɨɨ Jesús mɨɨd ydiscípulos ajcxy ñaxɨɨy ma tüg trigo cam. E huinꞌítɨyɨ je ydiscípulos ajcxy ytɨgɨɨy je trigo tujcp. 
\v 24 Co je fariseo jäy ajcxy ijxy jaduꞌn nej Jesús ydiscípulos ajcxy anajty tujcmujc trigo tɨɨm, chi ajcxy nɨmay Jesús:
\p
―Ix miich. ¿Naꞌamy co miich mdiscípulos túngɨxy huɨdibɨ judío ycötújcɨn capxꞌadujcpy sábado xɨɨ?
\p
\v 25 Per Jesús ymɨnañ: 
\p
―¿Nej caꞌmiich ajcxy mguendtuñ Dios yꞌayuc co mnecycapxy, jaduꞌn nej David ytuñ tügtecy jecyꞌajty, co David etz ymɨgügtɨjc yuuꞌögaangɨxy anajty?
\v 26 Je huinꞌit tiempo jecyꞌajty co je judío teedy Abiatar mɨjtungmɨɨdpɨ anajty ma Dios ytɨjc, chi David ytɨgɨy ma Dios ytɨjc, e caay je tzajcaagy huɨdibɨ tɨ anajty yoxy ma Dios yhuinduu. Dios ycötújcɨn ymɨnañ co je teedy ajcxy ycaagyꞌajtpy jada tzajcaagy, caꞌ jacꞌooyñipɨn. Nañ jaduꞌn David moy je tzajcaagy je jäy huɨdib anajty ajcxy ymɨɨd.
\p
\v 27 Nañ jaduꞌn Jesús yjacmɨnañ: 
\p
―Ɨɨch, je jäy huɨdibɨ tzoon tzajpjoty, nmɨɨdɨch anéꞌmɨn, jaydëb nɨmäyɨch je jäy ajcxy ti jëb túngɨxy sábado xɨɨ.
\v 28 Com Dios tɨ ixmach je sábado xɨɨ, paady ycɨxpɨ, ɨɨch je jäy huɨdibɨ tzoon tzajpjoty, nmɨɨdɨch anéꞌmɨn jaydëb nɨmayɨch jäy ajcxy co jëb tijaty tuñ sábado xɨɨ.
\c 3
\s Je yëydɨjc huɨdibɨ anajty ycɨꞌ tɨ̈dzɨp
\p
\v 1 Jesús ytɨgɨy jadügꞌoc ma je judío naymujctac. Jiiby anajty tüg yëydɨjc huɨdibɨ anajty ymɨɨd tüg ycɨꞌ tɨ̈tz. 
\v 2 Je fariseojäy jiiby ma je naymujctac yꞌijxꞌijtpy anajty Jesús, co anajty nejhuɨ̈huaꞌñ pen Jesús yajtzögamy je paꞌmjäy sábado xɨɨ, jɨgɨx jëbɨ ajcxy xɨ̈huɨp Jesús co tɨ ytundɨgoy mɨɨd judíojäy ycötújcɨn. 
\v 3 Jesús nɨmay je jäy huɨdibɨ mɨɨd tüg ycɨꞌ tɨ̈tz:
\p
―Pɨdɨ̈g, min ya ma ɨɨch.
\p
\v 4 Huinꞌit Jesús yꞌamɨdoy je jäy ajcxy e nɨmay:
 \p
 ―¿Nej miich ajcxy mɨnaangɨxy: Nej jëbɨ jada nduñɨch je oybɨ o je jɨbɨcpɨ sábado xɨɨjoty? ¿Jëbɨ nyajtzögɨch jäy o jëbɨ nyajtɨgoyɨch jugyꞌájtɨn?
\p
Per je jäy amoñ ajcxy ijty, caꞌ ajcxy jeꞌ yꞌadzooy.
\v 5 Huinꞌit Jesús huindɨcxpejty je jäy ajcxy mɨɨd chip yꞌahuaꞌn, e mɨɨd jotmay, jeꞌ co ooy ajcxy jotjuuñɨty, e chi nɨmay je yëydɨjc:
\p 
―Xajtɨu yɨ mgɨꞌ.
\p
Chi je yëydɨjc xajtɨy ycɨꞌ, e chi ycɨꞌ oy chögy.
\v 6 Chi je fariseojäy ypɨdzɨmday ma je naymujctac, ooy yjotmädy ajcxy, e ñɨcxy ajcxy ñaymújcɨp mɨɨd je jadügpɨcy judío huindzɨndɨjc huɨdibɨ ymɨjnɨcxpejt je rey Herodes. Huinmaꞌñ ixtaayb anajty ajcxy nej jëb ocyajꞌögɨp Jesús.
\s Mayjäy ma tüg nɨɨbaꞌ
\p
\v 7 Per Jesús chooñ mɨɨd yɨꞌ ydiscípulos ajcxy, ñɨcxy ma mejypaꞌ. E ooy mayjäy huɨdibɨ ajcxy tzomb Galilea ñaaxjot etz Judea ñaaxjot panɨcxy ajcxy Jesús.
\v 8 Nañ jaduꞌn mayjäy panɨcx ajcxy Jesús huɨdibɨ ajcxy tzomb jɨm Jerusalén, huɨdibɨ ajcxy tzomb jɨm Idumea ñaaxjot, huɨdibɨ ajcxy tzomb jɨm Jordán mɨjnɨɨ nïnaxy ma xɨɨ ypɨdzɨmyb, huɨdibɨ ajcxy tzomb jɨm Tiro etz Sidón ñaaxjot. Ñɨcxtäy je mayjäy ma Jesús yajpaady, com ñejhuɨɨyb anajty ajcxy je mɨjhuinmaꞌñ huɨdibɨ Jesús anajty ytumyb.
\v 9 Com tzach mayjäy anajty ymiingɨxy, paady Jesús niꞌaneꞌmdɨy ma yɨ ydiscípulos ajcxy tüg barco ma jëb ɨñäy, caꞌty je mayjäy ooy yꞌadijɨ̈yii yꞌagodɨ̈yii. 
\v 10 Com Jesús tɨ anajty yajtzögy may jäy, paady ycɨxpɨ tügꞌócɨy je paꞌmjäy nimujcy Jesús, adzip tzachnïdonaangɨxy. 
\v 11 Co je jäy ajcxy huɨdibɨ caꞌoybɨ ymɨɨd ijxpaty Jesús, chi ajcxy ñayhuɨjojtacɨ ma Jesús yhuinduu, e mɨc ycapxcooty, ymɨnaangɨxy:
\p
―Miich jeꞌ Dios yꞌung.
\p
\v 12 Per Jesús nɨmay mɨctägy je caꞌoybɨ ajcxy co caꞌ huaad nigapxcɨxy nimɨydaaccɨxy pɨn jeꞌ anajty.
\s Jesús huinꞌixy majmetzpɨ discípulos
\p
\v 13 Huinꞌit Jesús ypejty ma tüg cögop, e capxyñiguexy co huen miñ ma yɨꞌ je ymɨgügtɨjc huɨdibɨ yhuinꞌixamy co ytunam mɨɨd yɨꞌ. Chi ajcxy ymiñ ma Jesús.
\v 14 Chi Jesús yhuinꞌijx majmetz ajcxy huɨdibɨ ymɨɨdꞌidamy, e huɨdibɨ yquexamy yꞌayuccapxhuäcxp. 
\v 15 Jesús moy je majmetzpɨ discípulos ajcxy huɨdibɨ anajty tɨ yhuinꞌixy mɨcꞌajt jaydëb yajtzögɨp paꞌmjäy ajcxy, e ymoy ajcxy ymɨcꞌajt jaydëb caꞌoybɨ yajpɨdzɨmy ma jäy ajcxy. 
\v 16-17 Jada je nimajmetzpɨ discípulos ajcxy yxɨɨ nidüg nidüg: Simón, je huɨdibɨ Jesús yxɨɨmoy Pedro; Jacobo mɨɨd yꞌuch Juan, yɨ Zebedeo yꞌung yꞌanäg, je huɨdibɨ ajcxy Jesús yxɨɨmoy Boanerges (je ayuc Boanerges jaduꞌn yhuimbɨdzɨmy: “Enee ymang”).
\v 18 E jacjadyii huɨdib Jesús tɨ anajty huinꞌixy: Andrés; Felipe; Bartolomé; Mateo; Tomás; Jacobo je huɨdibɨ Alfeo ymangꞌajtpy; Tadeo; e je jadügpɨ Simón, je cananista.
\v 19 Nañ jaduꞌn Jesús huinꞌijxy Judas Iscariote, je huɨdibɨ agojɨɨx cɨ̈yejc Jesús ma ymɨdzip. 
\s Yajnïbɨjccɨxy Jesús co mɨɨdɨty mujcuꞌ ymɨcꞌajt
\p (Co jaduꞌn huinꞌijxtaay je majcmetzpɨ discípulos ajcxy), Jesús ytɨgɨɨy ma tügtɨjc mɨɨd yɨꞌ ajcxy.
\v 20 Huinꞌítɨy tzach mayjäy ñayyöymújcɨgɨxy ma je tɨjc ma Jesús yꞌity, ixtɨ Jesús etz ymɨgügtɨjc caꞌ yꞌoyɨ̈y nej jëb ycaaygɨxy yꞌuuccɨxy.
\v 21 Co Jesús yꞌamɨgügtɨjc jaduꞌn nejhuɨɨy, chi ajcxy nimiiñ Jesús yajnɨcxaangɨxy anajty mach, com hueꞌ anajty tíjcɨxy co Jesús ylocɨɨb.
\p
\v 22 Nijëjɨty escribas ajcxy, je huindzɨndɨjc huɨdibɨ nïjaydutp anajty Dios ñecy, miin ma Jesús co choñ ajcxy Jesusalén, ymɨnaangɨxy:
\p
―Jada Jesús ymɨɨd Beelzebú, je caꞌoybɨ yhuindzɨn, ma yꞌaa yjot. E yɨꞌ yajpɨdzɨmy je caꞌoybɨ ajcxy ma jäy ajcxy yjothuinmaꞌñ mɨɨd Beelzebú ymɨcꞌajt.
\p
\v 23 Chi Jesús huoomiñ ma yɨꞌ je escribas ajcxy, e yajmɨɨdmɨydacy ajcxy tüg jɨhuimbit ayuc. Chi Jesús ymɨnañ:
\p
―¿Nej tɨyꞌajt jada nej miich ajcxy mɨnaꞌñ co Satanás jëb cɨꞌm ñayyajpɨdzɨmyii ma jäy ajcxy yꞌaa yjot? Caꞌ tɨyꞌajt nej miich ajcxy mɨnaꞌñ.
\v 24 Pen tügpɨcy tungmɨɨdpɨ ixyipy ñaybɨjc-huáꞌcxɨgɨxy, etz ñaymɨdziptzóonɨgɨxy ixyipy ac jëyɨ. Pues cɨxɨp yɨꞌ ajcxy yꞌanéꞌmɨn.
\v 25 Nañ jaduꞌn pen tügpɨcy tüg juugy tüg mɨgüg ixyipy ñaybɨjc-huáꞌcxɨgɨxy, caꞌ ajcxy yꞌidaangɨxy tügmucy.
\v 26 Nañ jaduꞌn pen Satanás ixyipy tɨ ñaybɨjc-huäcxyii, e cɨꞌm ixyipy tɨ nayñibɨdɨ̈gyii, caꞌ ixyipy yɨꞌ ymɨcꞌajt idaꞌñ. Hueꞌ janchtɨy Satanás cɨxɨpy tɨgoyɨpy. (Paady caꞌtɨyꞌájtɨty nej miich ajcxy ymɨnañ.)
\v 27 Caꞌ ni pɨn jëb huaad ytɨgɨ̈huɨ̈p ma tüg mɨcpɨ jäy ytɨjc etz meedzɨpy tijaty ymɨɨd, pen caꞌ jayɨjp cɨ̈xoch tecyxoch je jäy mɨcpɨ. Pen tɨ cɨ̈xoch tecyxoch ixyipy je mɨcjäy, huinꞌit janchtɨy mɨmadägɨpy, e pɨ́jcɨp tijaty ymɨɨd.   
\p  
\v 28 Janch ɨɨch miich ajcxy nɨmäy co Dios jëb huinmeecxɨp tügꞌócɨy pocy huɨdibɨ jäy ytúngɨxp etz tügꞌócɨy jɨbɨcpɨ huɨdibɨ jäy ycapxp.
\v 29 Jëyɨ janchtɨy co pɨnjaty capxtɨgooyb mɨɨd je Espíritu Santo, je Dios yjɨhuɨꞌñ ymɨcꞌajt, caꞌ Dios huinmecxɨ nimɨna. Huinɨxɨɨ yꞌidaꞌñ pocymɨɨd.
\p
\v 30 Mɨɨd co jäy ajcxy chach ymɨnaangɨxy co Jesús anajty mɨɨdɨty caꞌoybɨ, paady Jesús jaduꞌn ymɨnañ.
\s Jesús ytaj etz yꞌuch mɨguëxy ajcxy
\p
\v 31 Jesús ytaj etz yꞌuch ajcxy oy yjaꞌty ma anajty Jesús yajpaady. Chi Jesús ytaj etz yꞌuch ajcxy anajty ytɨnaaygɨxy tɨbaꞌy, e chi ajcxy capxñiguejxy Jesús.
\v 32 Je mayjäy huɨdibɨ anajty ajcxy ɨñaayb jühuɨditɨ ma Jesús, ymɨnañ ajcxy:
\p
―Miich mdaj etz mꞌuch cheeby ajcxy tɨbaꞌy miich ixtaayb.
\p
\v 33 Chi Jesús ymɨnañ:
\p ―¿Pɨnjäy miich ajcxy mdijy co ɨɨch ndajꞌadyii etz ɨɨch nꞌuchꞌadyii?
\p
\v 34 Huinꞌit Jesús huindɨcxpejty je jäy ajcxy huɨdibɨ anajty ɨñaayb ajcxy jühuɨdity ma jeꞌ, e ymɨnañ:
\p ―Tügꞌócɨy jada jäy ya jaduꞌn ajcxy nipaady nej ɨɨch ndaj etz ɨɨch nꞌuch.
\v 35 Huenytimypɨ́nɨty huɨdibɨ ajcxy cuydumb yɨ Dios chójcɨn, yɨꞌ jeꞌ jaduꞌn nipaady nej ɨɨch nꞌuch, ɨɨch nꞌajch, ɨɨch ndzɨꞌ etz ɨɨch ndaj.
\c 4
\s Je niipɨ yꞌijxpejt
\p
\v 1 Jadügꞌoc Jesús ytɨgɨɨy yajꞌixpɨjcpɨ ma mejypaꞌ. E ooy mayjäy ymujcpejty ma anajty Jesús yajpaady. Mɨɨd co ooy anajty chachmayjäyɨty, paady Jesús ytɨgɨy ma tüg barco jahuengɨ mejyjoty. Jesús ɨñaayb anajty barcojoty, e je mayjäy ɨñaayb anajty ajcxy ma mejypaꞌ.
\v 2 Huinꞌit Jesús yajꞌixpɨjcy je mayjäy mɨɨd canaag jɨhuimbit ayuc. Co yajꞌixpɨcy, chi ymɨnañ:
\p
\v 3 ―Amɨdooꞌijtcɨx miich ajcxy ɨɨch jada nꞌayuc. Tüg jäy chooñ niipɨ.
\v 4 Co je niipɨ yhuɨjpy anajty trigo tɨɨm, chi je trigo tɨɨm nijëjɨty oy ycäy tɨm tügujc. Chi je joon ajcxy ymiiñ jɨcxy je trigo tɨɨm huɨdibɨ tügujc tɨ ycäy.
\v 5-6 E nijëjɨty trigo tɨɨm oycäy ma tzaanïcx, ma nihueeñ oyñaax yajpaady. E je trigo tɨɨm caꞌ tzip mujx jeꞌ, jeꞌco caꞌanajty ooy naax mápxɨty. E co je xɨɨ ypɨdzɨmy, chi noꞌcy je trigo mang, com caꞌ anajty ytictz mɨɨdɨty naaxjoty, chi ytɨɨch. 
\v 7 E nijëjɨty trigo tɨɨm oycäy ma apyjot. Co jada trigo tɨɨm ymujxy, chi yꞌujtzꞌögtäy je trigo mang, e caꞌ ytɨɨmꞌajty.
\v 8 Per jacjadyii trigo tɨɨm oycäy ma oyñaax, chi ymujxy, e ytɨɨmꞌajt mayꞌamy: tüg piꞌc pajc iipxmajc oycoꞌity, jadüg piꞌc pajc tugɨꞌpx oycoꞌity, jadüg piꞌc pajc mɨgoꞌpx oycoꞌity. 
\p
\v 9 Co Jesús je mɨydägɨɨ yajmay, chi ymɨnañ:
\p
―Pɨnjaty mɨɨd ytätzac, pɨn mɨdohuamy, huen mɨdoꞌmbɨcy jada ayuc.
\s Ti yɨꞌ ñigapxyp yɨ ijxpejt
\p
\v 10 Co je mayjäy ñɨcxnɨ, e Jesús yhuɨꞌmy naydüg, chi je nimajmetzpɨ ydiscípulos ajcxy etz jacjadyii huɨdib mɨjnɨcxpejt Jesús ñimɨjhuaꞌcy, e amɨdoy nej yhuimbɨdzɨmy je jɨhuimbit ayuc. 
\v 11 E Jesús ymɨnañ: 
\p
―Miich ajcxy jaydëb mnejhuɨ̈huɨpy huɨdibɨ Dios ñigapxpy ñimɨydacpy coyüchꞌamy ma yꞌanéꞌmɨn ycötújcɨn. Jacjadyii jäy ajcxy jɨhuimbitꞌamy nyajmɨɨdmɨydaacyɨch. 
\v 12 Jaduꞌn jɨhuimbitꞌamy nyajꞌixpɨjcpyɨch je mayjäy, jaydëb co pɨnjaty ijxp, caꞌ ajcxy ixɨpy; etz pɨnjaty mɨdoob, caꞌ ajcxy mɨdoꞌmbɨgɨpy. E jaduꞌn caꞌ ajcxy yjothuimbidip, e nañ ni ycayajmeecxɨpy ajcxy ypocy. 
\s Jesús najtzcapxɨ̈y nej yhuimbɨdzɨmy je niipɨ yꞌijxpejt
\p
\v 13 Chi Jesús yjacmɨnañ: 
\p
―¿Nej caꞌ miich ajcxy mhuinjɨhuɨ̈y jada jɨhuimbit ayuc? Pen caꞌ miich ajcxy mhuinjɨhuɨ̈y jada jɨhuimbit ayuc, caꞌ miich ajcxy mhuinjɨhuɨ̈huɨp yɨ jacjadyii jɨhuimbit ayuc.
\v 14 Je huɨdibɨ capxhuäcxp Dios yꞌayuc, jaduꞌn yɨꞌ nipaady nej je huɨdibɨ niip trigo tɨɨm.
\v 15 Je jäy ajcxy huɨdibɨ amɨdooꞌijtp Dios yꞌayuc, e mɨcꞌamy je caꞌoybɨ yajpɨdzɨmy Dios yꞌayuc ma ajcxy yjot yhuinmaꞌñ, jaduꞌn ajcxy nipaady nej trigo tɨɨm huɨdibɨ cäb tügujc, e je joon ajcxy mɨcꞌamy piimujctay.
\v 16-17 Je jäy ajcxy huɨdibɨ amɨdooꞌijtp Dios yꞌayuc janch jotcujc, e mɨbɨ́jccɨxy tzojccɨ́x, chi ajcxy ixmajtzɨ Dios yꞌayuc co agapxɨɨyb paady, e co tzaachypɨ mɨnaxy yajnaxy mɨɨd Dios yꞌayuc ycɨxpɨ. Jaduꞌn ajcxy nipaady nej je trigo tɨɨm huɨdibɨ tɨ ycäy ma tzaanïcx. 
\v 18-19 Je jäy ajcxy huɨdibɨ amɨdooꞌijtp Dios yꞌayuc, e co ñɨcxnɨ, chi jäydɨgooyñɨ Dios yꞌayuc mɨɨd jotcujcꞌájtɨn tzɨnaayɨn, etz comeeñꞌájtɨn etz adzójcɨn. Jaduꞌn ajcxy nipaady nej trigo tɨɨm huɨdibɨ tɨ ycäy ujtzjoty, e caꞌ ytɨɨmꞌaty mɨɨd co oy yꞌujtzꞌögy.
\v 20 Je jäy ajcxy huɨdibɨ amɨdooꞌijtp etz cöbɨjcp Dios yꞌayuc amumdügjot etz Dios yꞌayuc tumb ma ajcxy yjot yhuinmaꞌñ, jaduꞌn ajcxy nipaady nej je trigo tɨɨm huɨdibɨ tɨ cäb ma oyñaax etz ytɨɨmꞌaty mayꞌamy: tüg piꞌcpajc iipxmajc, etz jadüg piꞌcpajc tugɨꞌpx, etz jadüg piꞌcpajc mɨgoꞌpx.
\s Je  lámpara ñiꞌijxpejt
\p
\v 21 Chi Jesús yjacmɨnañ:
\p
―Co jäy ajcxy jɨndɨcxɨꞌñ nöctzoy, chi canan ajcxy cöjujpy mɨɨd tuꞌtz, ni caꞌ ajcxy pɨdacy cɨjxpaꞌtcɨꞌpy, hueꞌ janchtɨy pɨdaaccɨxy ma jɨndɨcxpejt jaydëb mɨj ytɨɨcxy. 
\v 22 E nañ ni caꞌ ni pɨn ni ti jëb ameech tunɨpy, e nɨcxy ycayajnejhuɨ̈y. E caꞌ ni pɨn ni ti ayüch tunɨpy, e nɨcxy ycayajnejhuɨ̈y.
\v 23 Pɨnjaty ytätzac ymɨɨd, pɨn mɨdoohuamb, huen mɨdoꞌmbɨ́jccɨxy ɨɨch nꞌayuc.
\p
\v 24 Nañ jaduꞌn Jesús ymɨnañ: 
\p
―Cuendtúngɨx jada ayuc huɨdibɨ miich ajcxy yam mmɨdooyb. Yɨ quipxɨꞌñ huɨdibɨ ajcxy myajquipxɨɨyb, nañ jaduꞌn yɨꞌ mɨɨd Dios ajcxy xyquipxyhuimbidɨpy, e ixtɨ jacyajmöhuɨp ajcxy huɨdijaty mɨdoob ɨɨch nꞌayuc.
\v 25 Pɨnjaty ymɨɨd, yajmöhuɨp nïgɨ, pɨnjaty hueen mɨɨd, yajpɨgɨpy nïgɨ (oy ixyipy hueen jadɨm mɨɨdɨty).
\s Je tɨɨm huɨdibɨ yeecp ñiꞌijxpejt
\p
\v 26 Nañ jaduꞌn Jesús ymɨnañ: 
\p
―Yɨ Dios yꞌanéꞌmɨn jaduꞌn yɨꞌ nej co tüg jäy nɨcxy ñïpy ma ycamjot.
\v 27 Chi jadaꞌ co ñiiptay ñɨcxnɨ ma ytɨjc e ymɨꞌoꞌcnɨ ymäybɨdɨ̈gnɨ com jabom,
e jaduꞌn yajnaxy canaag xɨɨ tzuu. E je moc pajc mujxp jeꞌ etz yomb. Per je cogam ni caꞌ nejhuɨ̈y nej je moc yoñ, ma mɨcꞌajt paady. 
\v 28 Jeꞌ co yɨ naax cɨꞌm  mɨcꞌajt mɨɨdɨty jaydëb yajyoñ je moc. Jayɨjp ypɨdzɨmy je moc ung, jacꞌaxam ypɨdzɨmy yɨ moc pɨjy, e chi jadaꞌ ytɨɨmꞌajtnɨ. 
\v 29 Co je moc ymajaanɨ, chi je jäy ajcxy nɨcxy moc tzijcp, com tɨ yhuindɨy je moc.
\s Ijxpejt ma je mostazɨ pajc
\p
\v 30 Nañ jaduꞌn Jesús ymɨnañ:
\p
―¿Nej mꞌocꞌaꞌɨxɨ́ɨygɨxy yɨ Dios yꞌanéꞌmɨn? ¿Ti mɨɨd nꞌocyajquipyxɨ̈huɨbɨch?
\v 31 Jaduꞌn Dios yꞌanéꞌmɨn nipaady nej mostaza pajc huɨdibɨ tüg jäy nɨcxy niipy  ma ycam. Yɨ mostaza pajc jacnïgɨ ymútzɨty caꞌydɨ jacjadyii ujtzpajc huɨdibɨ yajpatp ya naaxhuiñ.
\v 32 E co yajnïpy je mostaza pajc, chi yoñ, e chi yeegy ooy janch mɨj, caꞌydɨ jacjadyii ujtz. E janch mɨj yeegy tügꞌócɨy ycɨꞌ yꞌaacx, ixtɨ joon ajcxy peꞌmb ma je ycɨꞌyꞌaacx yꞌanicɨ̈y.
\s Nej anajty Jesús yecy je tɨyꞌajt mɨɨd je ijxpejt ycɨxpɨ
\p
\v 33 Jaduꞌn anajty Jesús yajꞌixpɨcy je mayjäy ajcxy Dios ytɨyꞌajt mɨɨd canaag jɨhuimbit ayuc, ixtɨ mɨbaad ajcxy jëb huinjɨhuɨ̈y.
\v 34 Ac jɨhuimbit ayuc Jesús yajnɨmay je mayjäy. Per mɨɨd yɨꞌydiscípulos Jesús ycapxtɨ̈cxtaayb anajty je jɨhuimbit ayuc. 
\s Jesús capxtɨ̈cx nej huimbɨdzɨmy je ijxpejt
\p
\v 35 Je huinꞌit xɨɨ co ycoodzɨɨy, chi Jesús nɨmay yɨ ydiscípulos ajcxy:
\p ―Tzoc ajt jámɨm jɨmꞌamy ahuin ma yɨ jadügpɨ mejypaꞌ.
\p
\v 36 Huinꞌit Jesús ydiscípulos ajcxy ixmajtztay je mayjäy, e mɨɨd tzooñ Jesús barcojoty. Nañ jaduꞌn jacjadyii barco ajcxy choñ quipxy mɨɨd Jesús ydiscípulos ajcxy ybarco. 
\v 37 Je huinꞌit coodz tüg poj miiñ janch mɨc. E je mejy nɨgoo anajty yꞌocpɨdɨ̈gnɨ. Janch tɨgɨɨyb anajty nɨɨ barcojoty, jagoo jagoo ycaꞌujtztay je barco mɨɨd nɨɨ.
\v 38 Jesús maab anajty ma je barco ɨjx ma tüg mabejt. Chi yajmäybɨdɨ̈gɨ,  e nɨmay ajcxy:
\p
―Huindzɨn, ¿nej caꞌmduñcuend co ɨɨch ajt yam nguinaanɨm?
\p
\v 39 Huinꞌit Jesús ymäybɨdɨ̈gy, e jɨjpcogapxɨy je poj. Etz nɨmay je mejy:
\p ―¡Amon! ¡Huäcxɨp!
\p Chi mɨcꞌamy je poj ymongɨdactay yhuäcxɨjptay jaduꞌñyɨ.
\v 40 Huinꞌit Jesús ymɨnañ:
\p ―¿Naꞌamy co mdzachtzɨgɨɨygɨxy ajcxy? ¿Nej caꞌ mmɨbɨ́jccɨxy co nmɨɨdɨch Dios ymɨcꞌajt?
\p
\v 41 Jesús ydiscípulos ajcxy ooy chɨgɨɨy, e ñayñɨmaayɨ ajcxy miñ xyɨpy:
\p ―¿Pɨn jäy jadaꞌ jada Jesús? Ooy chachmɨjhuinmaꞌñ co yɨ poj etz je mejy ycapxymɨdoyii.
\c 5
\s Je Gadarajäy huɨdibɨ anajty caꞌoybɨ mɨɨd
\p
\v 1 Chi Jesús mɨɨd ydiscípulos ajcxy oyjaꞌtcɨxy ma je mejypaꞌ ma je Gadara jäy ñaaxjot. 
\v 2 Tɨm mɨcꞌamy co Jesús ybarcobɨdzɨmy, chi nimiiñ tüg jäy huɨdibɨ caꞌoybɨ mɨɨd anajty. Hueꞌ anajty chooñ ma öcpɨ jut.
\v 3 Je yëydɨjc, caꞌoybɨmɨɨdpɨ, tzɨnaayb anajty ma öcpɨ jut. E ni pɨn anajty ycamɨmadägyii. Ni pɨn camɨmadacy nɨcx cɨ̈xoch tecyxoch jada je caꞌoybɨmɨɨdpɨ, e ni caꞌ ajcxy mɨmadacy mɨɨd cadena.
\v 4 Canaagꞌoc ajcxy jacɨ̈xojch jatecyxojch mɨɨd cadena, e ypojtaayb anajty je cadena. Ni pɨn camɨhuinmaꞌñybaady nej jëb ocmɨmadaaccɨxy je caꞌoybɨmɨɨdpɨ.
\v 5 Je caꞌoybɨmɨɨdpɨ xɨɨm tzuum anajty yhuɨdity tüg yuugjot etz ma öcpɨ it, janch mɨc anajty yäxytɨnäy. E chachnayyajtzaachɨ̈yii anajty mɨɨd tzaa.
\p
\v 6 Jɨguëgy anajty je caꞌoybɨmɨɨdpɨ ymiiñ, co ijxpaty Jesús, chi poyɨ̈gy ninɨcxy Jesús,  e ycojxtɨnayꞌahuɨy ma Jesús yhuinduu.
\v 7 Je caꞌoybɨmɨɨdpɨ mɨc mɨgapxcooty Jesús, e nɨmay:
\p ―
Jesús, je mɨjpɨ Dios yꞌung, ¿naꞌamy co xymɨdziptzooñɨch? Mayꞌajt nbɨjctzooybɨch ma Dios co caꞌ ɨɨch jëb huaad xychaachytuñɨch. 
\v 8 Je caꞌoybɨ jaduꞌn ymɨnañ, com Jesús tɨ anajty nɨmäy:
\p ―Caꞌoybɨ, pɨdzɨmb ma jada yëydɨjc.
\p
\v 9 Jesús yꞌamɨdooy je caꞌoybɨ:
\p
 ―¿Ti mxɨɨ?
\p
 Chi je caꞌoybɨ yꞌadzooy:
\p
―Ɨɨch nxɨɨ hueꞌ jeꞌ “ni may”, com ni may ɨɨch ajcxy huɨdibɨ yajpatp ma jada yëydɨjc. 
\p
\v 10 Huinꞌit je may caꞌoybɨ mayꞌajt pɨjctzoy ma Jesús co caꞌ ajcxy jëb huaad ixquexyii ma huingbɨ it lugar.
\v 11 Huingon anajty je cop ma anajty may ɨdzɨm yjɨɨcxcɨxy.
\v 12 Chi je caꞌoybɨ ajcxy mayꞌajt pɨjctzoy, e nɨmay ajcxy:
\p
 ―Najtzquexɨɨyg ma yɨ may ɨdzɨm, jɨgɨx jëbɨ nꞌadɨgɨ̈yɨch njottɨgɨ̈yɨch yɨ may ɨdzɨm.
\p
\v 13 Chi Jesús jaduꞌn aꞌɨxɨy co jëbɨ adɨgɨɨygɨxy jotɨgɨɨygɨxy je may ɨdzɨm. Chi je caꞌoybɨ ypɨdzɨmday ma je yëydɨjc, e yajtɨgɨyday je may ɨdzɨm ajcxy. Jɨm anajty yajpaady jahuengɨ mejtz mil ɨdzɨm. Chi je ɨdzɨm ylocjɨydaay, e ycögänaxtaay ajcxy ma tüg tzajɨjp, e oy ycädaaygɨxy nɨɨjoty, e chi ajcxy ñɨɨꞌögtay. 
\p
\v 14 Je ɨdzɨm cuendꞌajtp ajcxy ooy ajcxy ñayꞌadzɨgɨɨyɨ, e nɨcxtay ajcxy poyɨ̈gy ma ytɨjc. E oy nimɨydaaccɨxy cajpjoty etz majaty tundac nej anajty ajcxy yꞌɨdzɨm yꞌöctaaygɨxy. Mayjäy ajcxy choñ mɨcꞌamy oy íjxcɨxy nej anajty tɨ ytunyii tɨ yjadyii.
\v 15 Co je mayjäy ajcxy yjaꞌty ma Jesús yajpaady, chi ajcxy ijxy je yëydɨjc huɨdibɨ anajty maycaꞌoybɨ ymɨɨd. Ijxy ajcxy co ɨñäy huit mɨɨd etz huijycujc, tɨ anajty yꞌoyɨ̈y. E huinꞌit ooy ajcxy je mayjäy ñayꞌadzɨgɨɨyɨ. 
\v 16 Je jäy ajcxy huɨdibɨ anajty huindɨcxp co anajty je caꞌoybɨmɨɨdpɨ tɨ yꞌoyɨ̈y, etz íjxcɨxy nej tɨ ytunyii tɨ yjadyii mɨɨd je may ɨdzɨm, chi yajmɨydactay je maycajpjäy jaduꞌn nej anajty tɨ ijxcɨxy. 
\v 17 Huinꞌit ajcxy pɨjctzoy mayꞌajt ma je Jesús, co huen tzooñ ma ajcxy je ñaaxjot.
\p
\v 18 Co Jesús ytɨgɨɨy jadügꞌoc ma je barco, chi je yëydɨjc huɨdibɨ anajty caꞌoybɨ tɨ ñibɨdzɨmyii tɨ ycöbɨdzɨmyii, pɨjctzoy mayꞌajt ma Jesús co huen aꞌɨxɨ̈y möhuɨp co huen mɨɨdꞌidyii Jesús.
\v 19 Per Jesús caꞌ aꞌɨxɨ̈y co ymɨɨdꞌidyii, chi nɨmay:
\p ―Huimbit ma mdɨjc etz mjugymɨgüg, e yajmɨɨdmɨydäg jada mɨjpɨ tung mɨjpɨ huinmaꞌñ huɨdibɨ je Huindzɨn Dios tɨ tuñ mɨɨd miich. Mɨɨdmɨydägɨpy jaduꞌn nej je Huindzɨn Dios tɨ xypaꞌayoy. 
\p
\v 20 Chi je yëydɨjc yhuimbijtnɨ, e huɨdijtp anajty cajp cajp jɨm Decápolis ñaaxjot, e nimɨydactay tügꞌócɨy jaduꞌn nej Jesús tɨ yajtzögyii, e tügꞌócɨy je mayjäy ooy jɨhuɨy huinmay. 
\s Je Jairo ñɨɨx etz je töxyjäy huɨdibɨ Jesús yhuit nïdonɨ
\p
\v 21 Co Jesús huimbijty barcojoty ma je mejypaꞌ ma anajty tɨ chooñ, chi mayjäy ymiiñ ma Jesús yajpaady, chi Jesús yhuäcxɨjpy ma je mejypaꞌ.
\v 22 Huinꞌit Jesús ñijaꞌtɨ tüg mɨjtungmɨɨdpɨ ma yɨ judíojäy ajcxy ñaymujctac. Je yëydɨjc hueꞌ anajty xɨɨjɨty Jairo. Co Jairo ijxpaty Jesús, chi ñayhuɨjojtac ma Jesús yhuinduu. 
\v 23 Jairo mayꞌajt pɨjctzoy, ymɨnañ:
\p
―Huindzɨn, ögaanɨp ɨɨch nnɨɨx. Tun mayꞌajt nɨcxy ma ɨɨch ndɨjc, e mgɨ̈nïxájɨp ma ɨɨch nnɨɨx, jɨgɨx jëbɨ myajtzögɨp, e yjactzɨnähuɨp. 
\p
\v 24 E Jesús nɨcxp anajty mɨɨd Jairo, e mayjäy panɨcxy anajty Jesús. E je mayjäy ooy anajty tzachꞌadijɨꞌy tzachꞌagodɨꞌy Jesús.
\v 25 E ma je mayjäy ymiiñ anajty tüg töxyjäy paꞌm mɨɨd, jécyɨñ anajty ymɨjtacnɨ. Majmetz jɨmɨjt yxɨɨ yboꞌ anajty cujc payöy, caꞌ anajty yꞌoc-huäcxɨjpnɨ je nɨꞌpy.  
\v 26 Jada töxyjäy tɨ anajty yajtzoyduñ mɨɨd may tzoydumbɨ, tɨ anajty ymeeñ yajtundäy ma je tzoydumbɨ ajcxy. E jeꞌnɨ anajty ypaꞌmꞌity. Ni ti pubéjtɨn tɨ capaady, ixtɨ nïgɨ anajty ypaꞌm mɨjhuaꞌñ.
\p
\v 27 Jada töxyjäy tɨ anajty ayuc mɨdoy nej Jesús anajty paꞌmjäy yajtzögy, paady nimiiñ etz nimɨjhuägy jɨɨxcɨꞌpyꞌamy, chi nïdoonɨ Jesús yhuitpaꞌ.
\v 28 Jada töxyjäy nayñɨmaayɨ jotjoty huinmaꞌñyjoty: “Co nnïdónɨbɨch Jesús yhuitpaꞌ, mɨɨd tɨm yɨꞌyɨ ndzögɨbɨch.”
\v 29 Co je töxyjäy nïdoñ Jesús yhuitpaꞌ, tɨm huinꞌítɨy mɨcꞌamy yhuäcxɨjp je nɨꞌpy. Huinꞌit je töxyjäy jɨhuɨy co anajty tɨ chögy.
\p 
\v 30 E Jesús jɨhuɨɨy co anajty tɨ yajtzögy tüg jäy mɨɨd ymɨcꞌajt, paady niꞌijxhuimbijty je mayjäy huɨdibɨ anajty pamíinɨp, yꞌamɨdooy ajcxy:
\p ―¿Pɨn ɨɨch nhuit tɨ xyñïdonɨ?
\p
\v 31 Huinꞌit Jesús ñɨmaayɨ ajcxy ydiscípulos:
\p ―Miich mꞌijxpy co yɨ mayjäy xychachꞌadijɨ̈y xychachꞌagodɨ̈y, e miich mɨnaꞌñ: “¿Pɨn tɨ xyñïdóñɨch?”
\p
\v 32 Per Jesús huindɨcxypejty je mayjäy jühuɨdity ma yɨꞌ, ocꞌixaꞌñ ocnejhuɨ̈huaꞌñ pɨn anajty tɨ ñïdonyii. 
\v 33 Huinꞌit je töxyjäy, com ñejhuɨɨyb anajty jaduꞌn nej Jesús tɨ yajtzögyii, paady nimɨjhuaꞌcy Jesús janch tzɨyuuyb mɨɨd tzɨgɨꞌñ ñayhuɨjojtacɨ ma yɨꞌ yhuinduu.
\v 34 Jesús ymɨnañ:
\p ―Töxyjäy huɨdibɨ ooy ndzócyɨch, tɨ mdzögy mɨɨd co tɨ xymɨbɨ́cyɨch. Nɨcx agujc jotcujc, tɨ mbaꞌm ñaxy. 
\p
\v 35 Capxp mɨydacp anajty Jesús mɨɨd je töxyjäy co nijëjɨty jäy ñimiinɨ, choñ ma je judío jäy ñaymujctac mɨjtungmɨɨdpɨ ytɨjc, e nɨmay je töxyꞌanäg yteedy:
\p ―Yɨ mnɨɨx tɨ je yꞌögy. Caꞌ huaad mjacꞌamayɨ̈y nïg yɨ Huindzɨn Jesús. 
\p
\v 36 Per Jesús caꞌ tuñcuend jaduꞌn nej ajcxy yjamɨnaꞌñ, chi nɨmay je naymujctac huindzɨn:
\p ―Caꞌ mdzɨgɨ̈y, mɨbɨc nɨgodaꞌajty. 
\p
\v 37 E ni caꞌ jacꞌaꞌɨxɨy nɨcxy yjacmɨɨdnɨcxyii jacpɨnjaty. Jëdaꞌajty mɨɨdnɨcxy je Pedro, Jacobo etz Juan, je Jacobo yꞌuch.
\v 38 E co Jesús ytɨjctɨgɨɨy ma yɨ naymujctac huindzɨn ytɨjc, chi ijxy jaduꞌn nej jäy jiiby chachneꞌmgɨxy chachjɨɨygɨxy chachyaaxcɨxy. 
\v 39 Co Jesús tɨjctɨgɨɨy, chi nɨmay je jäy ajcxy:
\p
―¿Nej co nɨgoo ajcxy mdzachneꞌmnɨ, e mdzachyáaxcɨxnɨ? Yɨ piꞌc töxyꞌanäg caꞌ yɨꞌ tɨ yꞌögy, maab yɨꞌ.
\p
\v 40 Per nɨgoob ajcxy Jesús nɨxiicy co jaduꞌn ymɨnaꞌñ. Huinꞌit Jesús yajpɨdzɨmday tügꞌócɨy pɨnjaty anajty jiiby tɨgoty, e mɨɨd tɨjc tɨgɨy jëdaꞌajty je ungdeedy etz ungdaj, e nañ je tugɨɨgpɨ ydiscípulos huɨdibɨ anajty tɨ mɨɨd miiñ.  Chi ajcxy ytɨgɨy jiiby ma anajty je töxyꞌanäg yajpaady. 
\v 41 Chi Jesús májtzɨy yɨ töxyꞌanäg ycɨꞌ, e chi nɨmay:
\p 
―Talita, cumni ―jadayaab ayuc hueꞌ yɨꞌ yhuimbɨdzɨmy: Töxyꞌanäg, ɨɨch miich  yam nɨmaayb, pɨdɨ̈g. 
\p
\v 42 Huinꞌítɨy je töxyꞌanäg, je huɨdibɨ anajty majmetz yjɨmijt, ypɨdɨ̈gy e ytüyöychoñ. E tügꞌócɨy yɨ mayjäy ooy ajcxy jɨhuɨy huinmay. 
\v 43 Huinꞌit Jesús najtzcapxɨɨy co caꞌ huaad pɨn yajnɨmay jaduꞌn nej je töxyꞌanäg tɨ chögy, nañ jaduꞌn niꞌaneꞌmdɨy co huen ajcxy yajcay je piꞌc töxyꞌanäg.
\c 6
\s Jesús yajpaady jɨm Nazaret
\p
\v 1 Huinꞌit Jesús chooñ ma je jɨmbɨ it lugar, e yhuimbijty ma ycɨꞌmgajp. E mɨɨd ñɨcxy yɨꞌ ydiscípulos ajcxy. 
\v 2 Sábado xɨɨjoty Jesús ytɨgɨy yajꞌixpɨjcp ma je mayjäy huɨdibɨ yöymújccɨxp ma je judío jäy ñaymujctac. E je mayjäy huɨdibɨ amɨdooꞌijtp anajty ooy jɨhuɨy huinmay ajcxy, e ñayñɨmaayɨ ajcxy miñ xyɨpy:
\p ―¿Ma jadaꞌ jadayaab jäy tɨ niꞌixpɨgɨ̈y jadayaab ixpɨ́jcɨn? ¿Ma tɨ paady jada huijyꞌajt cujcꞌajt huɨdibɨ ymɨɨd? ¿Ma jadaꞌ tɨ paady yɨ mɨcꞌajt huɨdibɨ mɨɨd mɨjhuimaꞌñ tumyb?
\v 3 Jeꞌ jada je tzejtzpɨ, yɨ María yꞌung. Yɨꞌ yꞌuch ymɨgüg, yɨ Jacobo, yɨ José, yɨ Judas, etz yɨ Simón. Nañ jaduꞌn yɨꞌ yꞌuch töxyjäybɨ cha ajcxy chɨnäy quipxy mɨɨd  ɨɨch ajt.
\p
 E je mayjäy caꞌajcxy anajty ixaꞌñ cöbɨgaꞌñ Jesús. 
\v 4 Huinꞌit Jesús nɨmay je mayjäy ajcxy:
\p
―Huenmaꞌámyɨty tügꞌócɨy je mayjäy ooy yajmɨjꞌaty je jäy ajcxy huɨdibɨ najtzcapxɨɨyb Dios yꞌayuc. Jëyɨ janchtɨy, ma ycɨꞌm naax ma ycɨꞌmgajp caꞌ je jäy ajcxy yajmɨjꞌadyii, etz nañ ytɨm jaduꞌn yɨꞌ yꞌamɨgügtɨjc etz ymɨjɨɨn ymɨdɨjc. 
\p
\v 5 Ma ycɨꞌm naax ycɨꞌm gajp Jesús caꞌ jaty nej mɨjhuinmaꞌñ tunɨpy mɨɨd co caꞌ ajcxy mɨjpɨdägyii. Jëyɨ ycɨ̈pɨdacy ma nijëjɨty paꞌmjäy etz yajtzoocy. 
\v 6 Jesús ooy jɨhuɨy huinmay nej je jäy ajcxy caꞌ ymɨjpɨdägyii ma ycɨꞌm naax ycɨꞌm gajp. Chi Jesús chooñ jɨm ñɨcxy ma jacjadyii cajp huinduy agonbɨ, e yajꞌixpɨjcy anajty je mayjäy ajcxy. 
\s Jesús quexy ydiscípulos ayuccapxhuäcxp
\p
\v 7 Huinꞌit Jesús mɨjhuoy je majmetz ydiscípulos ajcxy, e chi quejxhuäcxy nimetz nimetz ma canaag cajp. E chi mooy mɨcꞌajt, jɨgɨx jëb yajpɨdzɨmy ajcxy caꞌoybɨ ma jäy ajcxy. 
\v 8 Nañ jaduꞌn yꞌaneꞌmy Jesús jeꞌ ydiscípulos ajcxy co caꞌ huaad ti mɨnɨ́cxcɨxy tüꞌamgɨxpɨ, jëyɨ jëb mɨnɨ́cxcɨxy tüg tajc nidüg nidügtɨ. Caꞌ huaad mɨnɨ́cxcɨxy ymorral, e caꞌ huaad mɨnɨ́cxcɨxy ycaagy, e caꞌ huaad mɨnɨcxcɨxy ymeeñ.
\v 9 Jëyɨ je ycɨ̈g etz je yhuit huɨdibɨ anajty ajcxy ymɨɨd huen mɨnɨcxcɨxy.
\v 10 Chi Jesús ymɨnañ:
\p ―Co anajty ajcxy mjättaccɨxy ma tüg tɨjc, jɨm ajcxy mhuɨ́ꞌmɨpy ixtɨ coon mdzóonɨp ma yɨjɨmbɨ cajp. 
\v 11 Pen mdɨgɨɨygɨxp ma tüg cajp, e je jäy ajcxy caꞌ ajcxy xycöbɨgaꞌñ, caꞌ ajcxy amɨdoꞌidaꞌñ miich mꞌayuc, mbɨdzɨmgɨx ma je cajp, chi mhuinhuójpcɨxɨpy mgïg. Jada jeꞌ je tɨyꞌajt co caꞌ ajcxy mjotcújcɨty. Janch ɨɨch miich ajcxy nɨmäy co Dios anajty ytɨyduñ jada naaxhuiñ jäy, jacnïgɨ tzaachypɨ paadaꞌñ yɨ jäy ajcxy huɨdibɨ ajcxy anajty caꞌ xycöbɨ́jccɨxy, caꞌydɨ jeꞌ ajcxy huɨdibɨ tzɨnaay jecyꞌaty ma Sodoma etz Gomorra cajp. 
\p
\v 12 Chi je nimajmetzpɨ ajcxy chon Dios yꞌayuccapxhuäcxy co huen jäy ajcxy jothuimbíjtcɨxy, huen ixmajtztaaygɨxy yɨ pocytunɨɨ. 
\v 13 Nañ jaduꞌn ajcxy yajpɨdzɨmy caꞌoybɨ majaty jäy, e pɨdaaccɨxy aceite majaty paꞌmjäy, e yajtzóoccɨxy anajty. 
\s Co Juan je Bautista yꞌögy
\p
\v 14 Huinꞌit je rey Herodes nejhuɨɨy co Jesús canaag mɨjhuinmaꞌñ tzachytuñ anajty, com tügꞌócɨy je mayjäy anajty nimɨydaaccɨxy Jesús. Herodes ymɨnañ co Juan je Bautista tɨ yjugypɨcy jadügꞌoc ma anajty tɨ yꞌögy, paady mɨcꞌajt mɨɨdɨty jaydëb mɨjhuinmaꞌñ tuñ. 
\v 15 Nijëjɨty jäy ymɨnaangɨxy:
\p
―Jesús yɨꞌ jeꞌ Elías. 
\p
E naagɨty jäy ymɨnángɨxy:
\p
―Yɨꞌ jeꞌ tüg Dios tɨyꞌajtmɨɨdpɨ huɨdibɨ quipxyɨɨby mɨɨd je Dios ytɨyꞌajtmɨɨdpɨ huɨdibɨ tzɨnay jecyꞌajty. 
\p
\v 16 Co Herodes nejhuɨɨy nej je mayjäy nimɨydaaccɨxy Jesús, chi ymɨnañ:
\p ―Janch jada co Juan tɨ yjugypɨcy, je huɨdibɨ nniꞌaneꞌmdɨɨyɨch co huen yajmɨnagyii ycohuajc.
\p
\v 17 Mɨɨd Herodías, Herodes ytöxytɨjc ycɨxpɨ, Herodes nꞌaneꞌmdɨɨy co Juan yajmach, e pɨdägyii  pujxtɨgoty. Jada Herodías jayɨjp ypɨjcy mɨɨd je rey Herodes yꞌajch Felipe, per tɨ anajty ixmach Felipe, e ypɨjctɨgajch mɨɨd je ycapy Herodes. 
\v 18 Hueꞌ anajty Juan tɨ nɨmay Herodes:
\p ―Caꞌ jaduꞌn paadyii co yɨ mꞌajch Felipe ytöxytɨjc miich mɨɨddzɨnaayɨ. 
\p
\v 19 Paady ycɨxpɨ Herodías mɨjotmaꞌty Juan, e ytɨmy yajꞌögamy anajty. Per caꞌ mɨcꞌamy yhuinmaꞌñybaty nej ocyajꞌögɨp; 
\v 20 com je rey Herodes ñejhuɨɨyb co tudägy jäy huädz jäy anajty je Juan, e tzɨgɨɨyb anajty mɨɨd Juan. Paady ycɨxpɨ  anajty je rey Herodes Juan mɨɨdɨty  cuendꞌaty pujxtɨgoty. Naagꞌoc naagꞌoc anajty Herodes nɨcxy amɨdoꞌity Juan yꞌayuc, ooy anajty huinmay nej yhuimbɨdzɨmy, per jotcujc anajty amɨdoꞌijty.
\p 
\v 21 Huinꞌit Herodías ypat huinmaꞌñ nej jëb yajꞌögy Juan je huinꞌit xɨɨ co je rey Herodes anajty ñayñixɨɨduñyii. Hueꞌ yajcay yajꞌuucy je gobierno ytumbɨ ajcxy, je soldado huindzɨn ajcxy, etz tügꞌócɨy yɨ mɨc jäydɨjc huɨdibɨ ajcxy tzɨnaayb naag naag cajp jɨm Galilea. 
\v 22 Xɨɨduñyjoty anajty co Herodías ñɨɨx oy yꞌech ma je rey anajty yajpaady mɨɨd je may jäy huɨdibɨ anajty yajcaayb yajꞌuucpy. E jaduꞌn nej je Herodías ñɨɨx yꞌejch, ooy je rey jaduꞌn jäygɨdacy, etz tügꞌócɨy je jäy je huɨdijaty anajty mɨɨd ajcxy ycaaygɨxy yꞌuuccɨxy. Chi je rey nɨmay je töxyꞌanäg:
\p ―Pɨjctzóohuɨgɨch ti mdɨmdzojcpy, ɨɨch miich nmöhuɨpy. 
\p
\v 23 Je rey nïgɨ capxcödujcy janch cɨxyjot huinɨjot co möhuaꞌñ ti ytimy ypɨjctzooyb, ixtɨ jëb jamöy cujhuäcxy yɨꞌ yꞌanéꞌmɨn, mɨbaad anajty aneꞌmy je naaxjot. 
\v 24 Chi je töxyꞌanäg ñɨcxy ma ytaj oy amɨdoy, nɨmay:
\p
 ―¿Ti nbɨjctzohuɨ́pɨch?
\p Chi jeꞌ ytaj yꞌadzooy:
\p ―Pɨjctzoohuɨ yɨ Juan je Bautista ycohuajc.
\p
\v 25 Mɨcꞌamy je Herodías ñɨɨx nihuimbity je rey e ymɨnañ:
\p
―Ndzojcypɨch co xymöhuɨbɨch mɨcꞌamy je Juan je Bautista ycohuajc ma tüg texy. 
\p
\v 26 Co jaduꞌn mɨdoy je rey, chi ytɨgɨɨy tajp mayb janch mɨjcajee. Per ti yꞌoctunɨpy. Com tɨ anajty jaduꞌn capxcöducy, tɨ anajty mayjäy mɨdoy ti anajty tɨ yajꞌahuanɨ̈y je töxyꞌanäg, caꞌ yꞌayuc yajxiicy. 
\v 27 Paady ycɨxpɨ je rey mɨcꞌamy aneꞌmy tüg soldado, co huen nɨcxy yajtzonɨ Juan ycohuajc.
\v 28 Chi je soldado ñɨcxy ma pujxtɨjc, e yöcpujxtuuty Juan. Chi je soldado mɨmiiñ Juan ycohuajc ma tüg texy, e yajcɨ̈dɨgɨy je töxyꞌanäg, e je töxyꞌanäg yajcɨ̈dɨgɨy ytaj.
\p
\v 29 Co je jäy ajcxy huɨdibɨ anajty mɨjnɨcxpejtp Juan ñejhuɨɨy ajcxy co je rey tɨ yajꞌögy Juan, chi ajcxy yꞌoy e yajpɨdɨ̈cɨ Juan ñinïcx, e yajnaaxtɨgɨɨy ajcxy. 
\s Jesús yajcaay mɨgoox mil yëydɨjc
\p
\v 30 Co je majmetzpɨ apóstoles ajcxy yhuimbijty huɨdibɨ anajty Jesús tɨ quexy yꞌayuccapxhuäcxpɨ ma canaag cajp, chi ajcxy yajmɨɨdmɨydacy Jesús tügꞌócɨy tijaty anajty tɨ túngɨxy, etz tügꞌócɨy ayuc huɨdijaty tɨ yajꞌixpɨ́jccɨxy.  
\v 31 Huinꞌit Jesús nɨmay je nimajmetzpɨ huɨdibɨ anajty tɨ quexy yꞌayuccapxhuäcxpɨ:
\p ―Tzoc jámɨm ma tüg it ma caꞌ pɨn, jaydëb nbócxɨm tüg xɨɨ metz xɨɨ.
\p Paady ycɨxpɨ Jesús jaduꞌn ymɨnañ, com tzach mayjäy jaꞌttɨɨb tzondɨɨb ma Jesús yajpaady, e caꞌ ajcxy tiempo anajty mɨ́ɨdɨty mɨna ycáaygɨxɨpy yꞌúuccɨxɨpy mɨɨd je mayjäy ycɨxpɨ.
\v 32 E Jesús mɨɨd ydiscípulos ajcxy ñɨcxy barcojoty ma caꞌ pɨn. Ac jëyɨ ajcxy nɨcxy caꞌ jac pɨn jäy mɨɨd nɨcxy. 
\v 33 E mayjäy ijxy co Jesús ajcxy choñ, e nañ ijxcajpy pɨn anajty tzoñ barcojoty. Paady mayjäy chooñ ma canaag cajp tegyɨꞌm, ñɨ́cxcɨxy poyɨ̈gy anajty ma Jesús ñɨcxaꞌñ. Mayjäy oy yjaꞌty jayɨjp caꞌydɨ Jesús ajcxy, e jɨm ajcxy yöymujctay. 
\v 34 Co Jesús ybarcopɨdzɨmy, chi ixy janch mayjäy, e Jesús ooy paꞌayoy je mayjäy, com jaduꞌn anajty ajcxy nej maycöbixy huɨdibɨ caꞌ mɨɨdɨty ycuendꞌajtpɨ. Chi Jesús ytɨgɨy yajꞌixpɨjcp, canaag nax ixpɨ́jcɨn anajty yecy.
\v 35-36 Co anajty tɨ chuꞌɨɨyñɨ, chi Jesús ydiscípulos ajcxy ñɨmaayɨ:
\p
―Caꞌ ni pɨn chɨnäy ma jadayaabɨ it lugar, e tɨ chuꞌɨɨyñɨ. Capxycɨ́x mɨɨd jada mayjäy ajcxy, jaydëb ñɨ́cxcɨxyñɨ ma yɨ cajp huinduy agonbɨ, huen nɨcxy júygɨxɨpy ycaayɨn yꞌuucɨn. 
\p
\v 37 Huinꞌit Jesús yꞌadzooy yɨꞌ ydiscipulos ajcxy: 
\p ―Miich ajcxy móoygɨx jada mayjäy caayɨn úucɨn.
\p Chi ajcxy Jesús yꞌadzooy:
\p ―¿Huaad ɨɨch ajcxy nɨcxy njuy mejtz mɨgoꞌpx denario tzajcaagy, jɨgɨx ycayɨpy yꞌügɨpy jada mayjäy?
\p
\v 38 Chi Jesús yꞌamɨdooy ydiscípulos ajcxy:
\p ―¿Naag tzajcaagy miich ajcxy mɨɨdɨty ya? Nɨcx íjxcɨx.
\p Co ajcxy tɨyꞌajt paty, chi ajcxy Jesús nɨmay:
\p ―Ɨɨch ajcxy nmɨɨd mɨgoox tzajcaagy etz metz acx.
\p
\v 39 Chi Jesús niꞌaneꞌmdɨɨy co je mayjäy huen ixtaaccɨxy naaxcɨ́xy tügpɨcyjaty. 
\v 40 Chi je mayjäy yꞌixtactay canaagpɨcy. Canaagpɨcy mɨgoꞌpx jatypɨ, e canaagpɨcy huixchiguïpxmajcjatypɨ.
\p 
\v 41 Chi Jesús conɨ̈gy je mɨgooxpɨ tzajcaagy etz je metzpɨ acx, e ypaꞌtꞌijxy tzajpcɨ́xy, e yajnajxy Dios cojuyɨp ma Dios mɨɨd je tzajcaagy etz je acx ycɨxpɨ. Huinꞌit Jesús tujc-huäcxy je mɨgooxpɨ tzajcaagy, e yajcɨ̈dɨgɨy jeꞌ ydiscípulos ajcxy, jaydëb ajcxy yajhuäcxɨp ma je mayjäy. Nañ jaduꞌn Jesús yajcɨ̈dɨgɨɨy je metzpɨ acx jeꞌ ydiscípulos ajcxy, jaydëb yajhuäcxɨp ma je mayjäy. 
\v 42 Nidügꞌócɨy je mayjäy ajcxy ycay yꞌuucy cüxyɨ. 
\v 43 Co je mayjäy ycayday, chi je discípulos ajcxy yajmujcy je cayduc tzütztuc, e yajꞌujch ajcxy majmetz cach. 
\v 44 Mɨgoox mil anajty ajcxy je yëydɨjctɨjc huɨdibɨ cay uuc. 
\s Jesús yöy nɨɨhuingɨ́xy
\p
\v 45 Huinꞌit Jesús aneꞌmy jeꞌ ydiscípulos ajcxy co huen barcotɨgɨɨygɨxy mɨcꞌamy. Huen nɨcxɨ̈ccɨxy jayɨjp jɨm Betsaida jɨm mejy ñïnajxy. Co yɨ discípulos ajcxy ybarcotɨgɨyday, chi Jesús ycapxycɨ́jxy mɨɨd je mayjäy.
\v 46 Co anajty Jesús tɨ ycapxycɨ́xy mɨɨd je mayjäy, chi ñɨcxy ma tüg cögop Dios mɨbɨjctzoob.
\v 47 Co ycoodzɨɨyñɨ je discípulos ajcxy anajty yajpaady mejyjoty ma je barco. Jesús naydüg anajty yajpaady mejypaꞌ.
\v 48 Jesús yꞌijx co jeꞌydiscípulos ajcxy anajty tɨ yꞌanucxɨɨygɨxy mɨɨd mejycabɨɨ, jeꞌ co je barco anajty chachjɨjpcobojɨ̈y. E co oy moñɨ̈y, chi Jesús ymɨjhuägy ma je barco. Jesús yöyp anajty mejyhuingɨ́xy, e hueꞌ anajty jüyöyñaxamy je discípulos ajcxy. 
\v 49 Co ajcxy ijxpaty Jesús yöyp anajty mejyhuingɨ́xy, chi ajcxy ooy yaxqueegy, com hueꞌ anajty ajcxy tijy co nɨgo yꞌijxmañɨɨygɨxy. 
\v 50 Com tügꞌócɨy yɨ discípulos ajcxy anajty tɨ íjxcɨxy Jesús, e ooy ajcxy chɨgɨɨy,  paady mɨcꞌamy Jesús mɨgapxy jeꞌ ydiscípulos ajcxy, e nɨmay:
\p ―Jotmɨc naybɨdáacɨgɨxy, caꞌ mdzɨgɨɨygɨxy. Ɨɨch yɨꞌ.
\p
\v 51 Huinꞌit Jesús ybarcotɨgɨɨy, e mɨcꞌamy je poj yxeemy, e je discípulos ajcxy ooy jɨhuɨy huinmay.
\v 52 Ooy ajcxy jɨhuɨɨygɨxy huinmaaygɨxy, com caꞌ ajcxy huinjɨhuɨɨygɨxy anajty nej Jesús je mayjäy yajcay mɨɨd je mɨgooxpɨ tzajcaagy. Com jeꞌnɨ anajty ajcxy ooy yjotjuuñɨty ycöjuuñɨty.  
\s Jesús yajtzögy paꞌmjäy ajcxy jɨm Genesaret
\p
\v 53 Chi ajcxy ymejch ma je mejypaꞌ ma je Genesaret ñaaxjot. E coxojch ajcxy je barco ma mejypaꞌ.
\v 54 Co ajcxy ybarcopɨdzɨmy, chi mɨcꞌamy je mayjäy ajcxy jɨm ijxcajpy Jesús.
\v 55 Poyɨ̈gy je jäy ajcxy chooñ, e yajyöyñajxtay je cajp ajcxy huinduy agonbɨ, capxhuäcxcɨxy co Jesús anajty tɨ yjädy jɨm. E jäy ajcxy yajmiindzondacy may paꞌmjäy cɨjxꞌam jɨm ma anajty Jesús yajpaady.
\v 56 E hueñytɨm maꞌamyɨty anajty Jesús ñɨcxy majaty mɨj cajp, mutz cajp, o majaty jäy yꞌujtztzɨnäy, ooy anajty ajcxy pɨdáccɨxy paꞌmjäy majaty majaty yɨ mɨj tübaꞌ, e cohuanɨɨygɨxy Jesús co huen nïdoñyii yɨ yhuitpaꞌ, e tügꞌócɨy huɨdijaty anajty ajcxy nïdomb, najxp ajcxy anajty jeꞌ ypaꞌm.
\c 7
\s Huɨdi jäy yajꞌahuimbijt pocyjayɨ̈ty
\p
\v 1 Huinꞌit ymiiñ ma Jesús nijëjɨty fariseojäy ajcxy, je huindzɨndɨjc huɨdibɨ tzachpadumb judío ycostumbre. Nañ jaduꞌn mɨɨd miiñ nijëjɨty escribas, je huindzɨndɨjc huɨdibɨ ajcxy nïjaydutp anajty Dios ñecy. Hueꞌ je fariseos etz escribas ajcxy anajty tɨ choongɨxy Jerusalén. 
\v 2 Je fariseos etz escribas ajcxy ijxy co Jesús ydiscípulos ajcxy ytɨgɨɨy caaybɨ uucpɨ jaygɨ̈bujy, caꞌ anajty  cuydúngɨxy judíojäy ycostumbre.
\v 3 (Com yɨ fariseojäy etz jacjadyii judíojäy ajcxy cuydumby anajty ajcxy ñiꞌap costumbre, e ixpocypújcɨxy jayɨjp ma caꞌnɨ ytɨgɨɨygɨxy caaybɨ uucpɨ. Com yɨ judíojäy ajcxy co ajcxy ñɨcxy mayjäyjoty etz yhuimbíjtcɨxy jadügꞌoc ma ytɨjc, caꞌ ajcxy ycay ixtɨ coonɨ jayɨjp ajcxy ycɨ̈bújcɨxy canaagꞌoc. 
\v 4 Yɨ judíojäy ymɨɨd canaagnax costumbre huɨdibɨ cuydúngɨxyp jaduꞌn nej ajcxy yajhuaatzcɨxy ajcxy ytaasɨ ytexy ytütz etz ypujxtexy.)
\v 5 Chi je fariseos etz escribas ajcxy yꞌamɨdooy Jesús, nɨmaayɨ:
\p ―¿Naꞌamy co miich mdiscípulos ajcxy caꞌ cuydúngɨxy judíojäy ñiꞌap costumbre? ¿Naꞌamy co ajcxy ycaaygɨxy yꞌúccɨxy, e caꞌ jayɨjp ixpújcɨxy yɨꞌ ypocyɨ?
\p
\v 6 Chi Jesús yꞌadzooy:
\p ―Janch tɨyꞌajt jaduꞌn nej je Dios ytɨyꞌajtmɨɨdpɨ Isaías jayhuɨꞌmy jecyꞌajty mɨɨd miich ajcxy ycɨxpɨ. Miich ajcxy huɨdibɨ naybɨdaacɨp jaduꞌn nej jɨhuɨ̈y ajcxy tudägyjäy, e caꞌ yjánchɨ́ty. Com jaduꞌn Isaías jaybejty co Dios jaduꞌn ymɨnañ: 
\q 
Jada jäy jaduꞌn ajcxy ycapxcɨxy ymɨydaaccɨxy jaduꞌn nej jɨhuɨ̈y xyajmɨjꞌatyɨch. Per caꞌ ajcxy xyajmɨjꞌatyɨch cɨxyjot huinɨjot.
\q
\v 7 Naadɨgɨ̈ co ajcxy xyhuinꞌɨ́ɨgɨxɨch xyhuinyáaxcɨxɨch. Ñayyajꞌixpɨ́jcɨgɨxy ayuc tɨyꞌajt huɨdibɨ jäy ajcxy tɨ cojy tɨ macxy. 
\p
\v 8 Chi Jesús ymɨnañ: 
\p
―Miich ajcxy tɨ mꞌixmájtzcɨxy Dios ycötújcɨn, e myajmɨjꞌájtcɨxy ayuc huinmaꞌñ huɨdibɨ jäy cɨꞌm tɨ cojy tɨ macxy. 
\v 9 Miich ajcxy caꞌ mgüendtúngɨxy Dios ycötújcɨn Dios ytɨyꞌajt jɨgɨx jëbɨ cuydúngɨxy mgɨꞌm costumbre. 
\v 10 Com Moisés je cötújcɨn ypɨdac jecyꞌajty: “Yajmɨjꞌat mdaj mdeedy”, e “Pɨnjaty jɨbɨc nigapx niꞌojɨɨyb ytaj yteedy, copɨcy yꞌögɨp.” 
\v 11 E miich ajcxy mɨnañ co tüg jäy nɨmähuɨp ytaj yteedy co caꞌ pubedaꞌñ ajcxy jaduꞌn nej padyii, mɨɨd co tügꞌócɨy tijaty yɨꞌ ymɨɨd huɨdibɨ ytaj yteedy jëꞌadánɨp, hueꞌ tɨ ahuanɨ̈y nɨgoo ma Dios.
\v 12 E pen jaduꞌn mɨnañ, chi miich ajcxy mɨnaangɨxy co caꞌ copɨ́cyɨty mbubéjtcɨxɨpy mdaj mdeedy. 
\v 13 Miich ajcxy mɨdundɨgooyb Dios ycötújcɨn mɨɨd mgostumbre huɨdibɨ myajnajxyp myajtɨgɨɨyb, etz jacjadyii jɨbɨc-huinmaꞌñ myajꞌixpɨ́jccɨxy. 
\p
\v 14 Jadügꞌoc Jesús mɨjhuoy yɨ mayjäy ajcxy, e chi nɨmay:
\p ―Mɨdoꞌmbɨ́jccɨx miich ajcxy ɨɨch nꞌayuc, e mhuinjɨhuɨ̈huɨp ajcxy.
\v 15 Caꞌ yɨꞌ yajpocycähuɨɨyb huɨdibɨ jäy ajcxy ypɨdacy ma yhuin yꞌahuac. Yɨꞌ janchtɨy huɨdibɨ pɨdzɨm ma jäy ajcxy yjot yhuinmaꞌñ, yɨꞌ yɨꞌ yajpocycähuɨɨb.
\v 16 Miich ajcxy mmɨɨd mdätzac, mɨdoꞌmbɨ́jccɨx ɨɨch nꞌayuc. 
\p
\v 17 Co Jesús ixmajch je mayjäy, e ytɨjctɨgɨɨy, chi je discípulos ajcxy yajꞌamɨdoohuɨ nej yhuimbɨdzɨmy jada ayuc. 
\v 18 Chi Jesús ydiscípulos ajcxy nɨmay:
\p ―¿Nej nañ jaduꞌn miich ajcxy caꞌ mhuinjɨhuɨ̈y jada ayuc? ¿Nej caꞌ mhuinjɨhuɨɨygɨxy co huɨdibɨ tɨgɨɨy ma yɨ jäy yꞌahuac (yɨ caayɨn uucɨn), caꞌ yɨꞌ yajpocycäy yɨ jäy?
\v 19 Yɨ caayɨn uucɨn hueꞌ yɨ jäy ypɨdägy ma yꞌaa ymoox caꞌ nan ma yjot yhuinmaꞌñ, e co ñax ma yꞌaa ymox, chi ypɨdzɨmnɨ.
\p Co Jesús jaduꞌn ymɨnaꞌñ, chi nejhuɨɨyɨm co Dios caꞌ capxꞌaducy ni ti caayɨn ni ti uucɨn.
\v 20 E Jesús yjacmɨnañ:
\p ―Dios yajpocycähuɨp jäy ajcxy mɨɨd huɨdibɨ pɨdzɨmb ma ajcxy yhuinmaꞌñ.
\v 21-22 Ma yɨ jäy ajcxy yhuinmaꞌñ jiiby chooñ jɨbɨc-huinmaꞌñ; jiiby chooñ mɨgapxtɨgoyɨɨ töxyjäy yhuinmaꞌñ; jiiby chooñ je tundɨgooyɨɨ yëydɨjc mɨɨd töxyjäy etz töxyjäy mɨɨd yëydɨjc huinmaꞌñ; jiiby chooñ jäyyajꞌögɨɨ huinmaꞌñ; jiiby chooñ meedzɨɨ huinmaꞌñ; jiiby chooñ mügɨɨ huɨdidɨɨ huinmaꞌñ;  jiiby chooñ jɨbɨc-huinmaꞌñ; jiiby chooñ je huinꞌɨɨnɨɨ huinmaꞌñ; jiiby choñ naycaꞌoyꞌixɨɨ huinmaꞌñ; jiiby chooñ je piitzcapxɨɨ huinmaꞌñ; jiiby chooñ je amɨj agɨx huinmaꞌñ; jiiby chooñ je tzuu huinmaꞌñ je locɨ huinmaꞌñ.
\v 23 Yɨ jaduꞌmbɨ jɨbɨcpɨ jiiby chooñ ma jäy ajcxy yjot yhuinmaꞌñ, paady jɨbɨcpɨ jäy ajcxy túngɨxy, e ypocycäy ajcxy ma Dios. 
\s Tüg töxyjäy huɨdi caꞌ yjudiojäyɨty mɨbɨjc Jesús
\p
\v 24 Chooñ Jesús ma yɨjɨmbɨ it, e ñɨcxy jɨm ma Tiro etz Sidón ñaaxjot. Jesús ytɨgɨy ma tüg jäy ytɨjc, e caꞌ anajty tzocy co je mayjäy ñejhuɨ̈huɨɨyb ma yꞌity. Per caꞌ jajty nɨcx yhuingoyüch. 
\v 25 Mɨcꞌamy tüg töxyjäy nejhuɨɨy ma Jesús anajty yajpaady. Hueꞌ je töxyjäy ypiꞌcnɨɨx ymɨɨd anajty caꞌoybɨ. Je töxyjäy ymiiñ ma Jesús, e ycojxtɨnayꞌahuɨy ma yɨꞌ yhuinduu.
\v 26 Je töxyjäy hueꞌ anajty ycogájpɨty Sirofenicia (e hueꞌ anajty griegojäy). Yɨ töxyjäy mayꞌajt pɨjctzoy ma Jesús co huen yajpɨdzɨmy je caꞌoybɨ ma ypiꞌcnɨɨx yjot yhuinmaꞌñ.
\v 27 Chi Jesús je töxyjäy nɨmay:
\p
―Ooy ycopɨ́cyɨty co nbubedɨpyɨch jayɨjp Dios yjäy (yɨ judíojäy). Jaduꞌn nipaady nej tüg ungdeedy. Tɨm copɨcy co je ungdeedy yajcayɨpy jayɨjp ycɨꞌm ung, e caꞌ möhuɨp uc je huɨdibɨ yꞌung yajjɨcxaamy. 
\p
\v 28 Chi je töxyjäy yꞌadzooy:
\p ―Huindzɨn, tɨyꞌajt nej miich mmɨnaꞌñ, per nañ jaduꞌn yɨ uc ajcxy yjɨɨcxyp je caagy abuꞌx huɨdi cäb naaxcɨ́xy ma mesɨpaꞌt ma je jäy yꞌung ajcxy ycaay. 
\p
\v 29 Chi Jesús je töxyjäy nɨmay: 
\p
―Tɨyꞌajt jaduꞌn nej ɨɨch miich tɨ xyꞌadzooy, paady ycɨxpɨ jëb mhuimbidɨpy ma mdɨjc jotcujc, je caꞌoybɨ tɨ ypɨdzɨmy ma mnɨɨx yjot yhuinmaꞌñ.
\p
\v 30 Co je töxyjäy huimbijty ma ytɨjc, chi paty ypiꞌcnɨɨx cɨjxꞌam, tɨ anajty je caꞌoybɨ ñïbɨdzɨmyii ycöbɨdzɨmyii.
\s Jesús yajtzögy tüg jäy huɨdibɨ cönat etz ahuɨꞌmb
\p
\v 31 Chi Jesús jɨm tzojcɨ choonɨ Tiro ñaaxjot. Chi chooñ jɨm ñɨcxy anajty Galilea, e nɨcxy ma je tüꞌaa huɨdibɨ najxp Sidón etz je cajp huɨdibɨ yajpatp jɨm Decápolis ñaaxjot, chi yjaꞌty ma Galilea mɨj laguunbaꞌ.
\v 32 Jɨm ajcxy mɨɨd miiñ tüg jäy huɨdibɨ cönátɨp etz aahuɨꞌmb. Chi ajcxy mayꞌajt pɨjctzooy ma Jesús huen cɨ̈nïxajy je paꞌmjäy.\v 33 Chi Jesús mɨɨdnɨcxy je paꞌmjäy ahuingujc ma caꞌ mayjäy, e pɨdacy ycɨ̈huaꞌx ma je paꞌmjäy ytätzac. Chi chujy, e huinꞌit nïdonɨ je ytoodz. 
\v 34 Chi Jesús ypaꞌtꞌijxy tzajpcɨ́x, e ymɨcxejy, e chi ymɨnañ Aramaicoꞌamy: 
\p ―Efata ―jada ayuc hueꞌ yhuimbɨdzɨmy: Ahuädz.
\p
\v 35 E mɨcꞌamy je jäy cönatpɨ ytätzac yꞌahuaach etz ytoodz yungɨɨy etz ycapxnɨ yajxon. 
\v 36 Chi Jesús aneꞌmy je paꞌmjäy etz ymɨgügtɨjc co caꞌ huaad ni pɨn yajmɨɨdmɨydägɨpy jaduꞌn nej anajty tɨ chögy. Co Jesús jaduꞌn mɨctägy aneꞌmy co caꞌ huaad ni pɨn yajmɨɨdmɨydägɨpy je mɨjhuinmaꞌñ huɨdibɨ ytumyb, chi nïgɨ je paꞌmjäy etz ymɨgügtɨjc mɨɨdmɨydaaccɨxy hueñypɨ́nɨty. 
\v 37 Je mayjäy ooy tzachjɨhuɨy huinmay ajcxy, ñayñɨmaayɨ ajcxy miñ xyɨpy:
\p
―Jada Jesús ooy oy chachtuñ. Ymɨmadactaayb yɨꞌhuenytɨmytíijɨty, ixtɨ yajmɨdohuɨ̈cpy yɨꞌ yɨ cönatpɨ etz yajcapxɨ̈gy yɨ uumbɨ.
\c 8
\s Jesús yajcay mɨdax mil yëydɨjc
\p
\v 1 Je huinꞌit xɨɨ je huinꞌit tiempo mayjäy anajty tɨ ñaymújcɨgɨxy ma Jesús yajpaady, e caꞌ anajty je mayjäy ajcxy mɨɨdɨty ti ycáaygɨxɨpy yꞌúuccɨxɨpy. Jesús capxyñiguejxy jeꞌ ydiscípulos ajcxy, co huen miingɨxy ma yɨꞌ yajpaady. Co ajcxy ymiiñ, chi nɨmay: 
\p
\v 2 ―Ooy nbaꞌayooyɨch yɨ mayjäy. Yɨꞌ co cham mɨdugɨɨg xɨɨ maabɨ ya mɨɨd yꞌityɨch je mayjäy, e ni caꞌ ajcxy mɨ́ɨdɨty ti ycayɨpy. 
\v 3 Co ixyipy nguexhuimbityɨch ajcxy ma ytɨjc ayuu, caꞌ yjécyɨty yajpaꞌmgójɨpy ajcxy tüꞌam, com nijëjɨty ajcxy jɨguëgy tɨ choongɨxy. 
\p
\v 4 Chi je discípulos ajcxy Jesús adzooy:
\p ―¿Ma ɨɨch ajt nbaatɨm je caayɨn uucɨn huɨdibɨ jëb mɨɨd nyajcaayɨm nyajꞌúucɨm jada mayjäy? Com mɨjtɨgɨ̈duum ya nyajpaatɨm ma caꞌ pɨn chɨnäy.
\p
\v 5 Chi Jesús yꞌamɨdooy jeꞌ ydiscípulos ajcxy: 
\p ―¿Naag tzajcaagy miich ajcxy mɨɨdɨty?
\p
Chi jeꞌ ajcxy yꞌadzooy:
\p ―Huɨxtujc tzajcaagy. 
\p
\v 6 Chi Jesús aneꞌmy je mayjäy, co huen ɨñayꞌahuɨɨygɨxy naaxcɨ́xy. Huinꞌit Jesús conɨ̈gy je huɨxtujcp tzajcaagy, e yajnajxy Dioscojuyɨp ma Dios mɨɨd tzajcaagy ycɨxpɨ. Chi tujc-huäcxy je tzajcaagy, e moy jeꞌ ydiscípulos ajcxy, e jeꞌ ydiscípulos ajcxy yajhuäcxy je tzajcaagy ma je mayjäy. 
\v 7 Je Jesús ydiscípulos ajcxy  ymɨɨd anajty nijëjɨty piꞌc acx. Chi Jesús yajnajxy Dioscojuyip ma Dios mɨɨd je piꞌc acx ycɨxpɨ, e moy jeꞌ ydiscípulos ajcxy huen yajhuäcxtaygɨxy ma je mayjäy. 
\v 8 Chi je mayjäy nidügꞌócɨy ycay cüxyɨ, e co ajcxy ycayday, chi je Jesús ydiscípulos ajcxy yajpɨdɨ̈gy huɨxtujc cach cayduc jɨɨcxtuc tɨɨbɨ anajty yconaxy.  
\v 9 Jahueenɨ anajty ycamɨdaaxmilɨty je jäy huɨdibɨ ajcxy cay uuc cüxyɨ. Chi Jesús ycapxy ycɨjxy mɨɨd je mayjäy, e nɨmay ajcxy co huen nɨcxcɨxy ma ytɨjc. 
\v 10 E mɨcꞌamy Jesús ybarcotɨgɨy mɨɨd ydiscípulos ajcxy, e chi ñɨcxy ajcxy jɨm Dalmanuta ñaaxjot. 
\s Yɨ fariseos ajcxy tüg ijxpejt pɨjctzoob mɨjhuinmaꞌñybɨ
\p
\v 11 Nijëjɨty fariseos ajcxy, je huindzɨndɨjc huɨdibɨ padumb judío ycostumbre, ymiiñ ajcxy ma Jesús yajpaady, e ytɨgɨy ajcxy ijxquípxcɨxy yꞌixpɨjcɨn mɨɨd Jesús. Pɨjctzoogɨxy co Jesús huen yajꞌixyii ajcxy tüg ijxpejt huɨdibɨ tzomb tzajpjoty. Ijxtaꞌn octunaangɨxy mɨɨd Jesús. 
\v 12 Chi Jesús tajy may ñayjɨhuɨɨyɨ jotjoty huinmaꞌñyjoty, chi ymɨcxejy, e ymɨnañ:
\p ―¿Naꞌamy co jada jäy ajcxy huɨdibɨ jugyꞌajtp cham, pɨjctzoogɨxy ijxpejt huɨdibɨ tzomb tzajpjoty? Janch ɨɨch miich nɨmaaygɨxy co caꞌ nyajꞌixaangɨxy ijxpejt huɨdibɨ tzomb tzajpjoty.
\p
\v 13 E Jesús ytɨmycapxycɨ́xy mɨɨd je fariseos ajcxy, e chi puyöyduuty ajcxy. Chi Jesús ybarcotɨgɨɨy, e ñɨcxy mɨɨd ydiscípulos ajcxy ma mɨj laguun ñïnaxy. 
\s Fariseojäy ajcxy yajꞌixpɨ́jcɨn
\p
\v 14 Jeꞌ ydiscípulos ajcxy tɨ anajty jaydɨgoygɨxy je jɨɨcxy pɨcy co ajcxy ybarcotɨgɨy. Jëyɨ ajcxy mɨmiiñ tüg piꞌc tzajcaagy. 
\v 15 Chi Jesús aneꞌmyb jeꞌ ydiscípulos ajcxy, e ymɨnañ:
\p
―Caꞌ mmɨjpɨdaaccɨxy yɨ fariseojäy ajcxy yꞌayuc ytɨyꞌajt etz ni rey Herodes yꞌayuc ytɨyꞌajt, com jaduꞌn ajcxy yꞌayuc nipaady nej levadura huɨdibɨ caꞌ yꞌóyɨty. 
\p
\v 16 E je Jesús ydiscípulos ajcxy nimɨydaaccɨxy Jesús yꞌayuc ñayñɨmáayɨgɨxy ajcxy miñ xyɨpy:
\p
―Jeꞌ co caꞌ ɨɨch ajt nmɨmiinɨm caayɨn uucɨn. 
\p
\v 17 E Jesús ñejhuɨɨyb anajty nej jeꞌ ydiscípulos ajcxy ñayñɨmaayɨ miñ xyɨpy, paady ymɨnañ:
\p
―¿Naꞌamy co mdzachnimɨydaaccɨxy je caayɨn uucɨn huɨdibɨ tɨ mjäydɨgooygɨxy? ¿Nej caꞌ mhuinjɨhuɨɨygɨxy e caꞌ mguendɨtungɨxy ɨɨch nꞌayuc? ¿Nej co ajcxy mdzachcöjuuñɨty?
\v 18 Miich ajcxy mɨɨd mhuiin: ¿Nej co caꞌ mꞌijxcɨxy huɨdibɨ ndumybɨch? Miich ajcxy mɨɨd mdädzac: ¿Nej co caꞌ mmɨdoꞌmbɨ́jccɨxy ɨɨch nꞌayuc? ¿Nej co caꞌ mjäyméjtzcɨxy ti tɨ nduñɨch?
\v 19 Jayhuin co ndujc-huäcxyɨch je mɨgooxpɨ tzajcaagy e nyajcaayɨch mɨgoox mil jäy: ¿Naag cach cayduc jɨcxtuc tɨ ajcxy myajpɨdɨ̈gy?
\p
Chi ajcxy yꞌadzooy:
\p
―Hueꞌ ɨɨch ajcxy nyajpɨdɨ̈gyɨch majmetz cach cayduc jɨcxtuc.
\p
\v 20 Chi Jesús ymɨnañ:
\p
―E jayhuin co ndujc-huäcxyɨch je huixtujcpɨ tzajcaagy, e nyajcaayɨch mɨdaax mil jäy: ¿Naag cach cayduc tɨ ajcxy myajpɨdɨ̈gy?
\p
Chi ajcxy yꞌadzooy:
\p
―Hueꞌ ɨɨch ajcxy nyajpɨdɨ̈gyɨch huixtujc cach cayduc jɨcxtuc. 
\p
\v 21 Chi Jesús ymɨnañ:
\p
―¿Nej chambaad miich ajcxy caꞌ mhuinjɨhuɨɨy?
\s Jesús yajtzögy tüg jäy huintzpɨ jɨm Betsaida
\p
\v 22 Jesús etz ydiscípulos ajcxy oy yjáꞌtcɨxy jɨm Betsaida. Jɨm Betsaida nijëjɨty jäy mɨɨd miiñ ma Jesús tüg huintzpɨ, e pɨjctzoy ajcxy mayꞌajt co huen nïdoñ jɨgɨx je huintzpɨ yꞌijxɨ̈gɨpy. 
\v 23 Huinꞌit Jesús huijtztzooñ je huintzpɨ ma ycɨꞌ, chi mɨɨd cajppɨdzɨmy. E chi Jesús yajjaaxy yɨ chujyñɨɨ je huintzpɨ yhuiin, etz cɨ̈nïxajy, e chi amɨdoy pen yꞌijxpy anajty tigati yinjaty huenjaty. 
\v 24 Chi je huintzpɨ huindɨcxpejty Jesús, e nɨmay:
\p ―Nꞌijxypɨch yëydɨjctɨjc, e jaduꞌn ajcxy yquëxɨ̈gy nej quipy, per yöyp ajcxy.
\p
\v 25 E jadügꞌoc Jesús ycɨꞌ pɨdacy ma je huintzpɨ yhuiin, e chi je huintzpɨ yhuindɨcxpejtpy anajty, e chi yhuiin yꞌoyɨɨy yajxon, huinꞌit oy huädz yꞌijxy. 
\v 26 E Jesús ycapxycɨ́jxy mɨɨd jeꞌ, e quejxhuimbijty ma ytɨjc. Chi ymɨnañ:
\p ―Caꞌ mdɨgɨ̈huɨp cajpjoty, e ni pɨn jada mgayajmɨɨdmɨydägɨpy. 
\s Pedro capxypɨdzɨmy co Jesús yɨꞌ jeꞌ je Cristo
\p
\v 27 Chi Jesús ñɨcxy mɨɨd ydiscípulos ajcxy jɨm ma nijëjɨty mutz cajp mɨhuingon je mɨj cajp Cesarea Filipo. E tüꞌam Jesús amɨdoy ajcxy ydiscípulos, nɨmay: 
\p ―¿Nej jäy ymɨnaangɨxy pɨn ɨɨch?
\p
\v 28 Chi ajcxy jeꞌ ydiscípulos yꞌadzooy:
\p ―Nijëjɨty jäy ymɨnaangɨxy co miich jeꞌ je Juan, je Bautista. E nijëjɨty ymɨnaangɨxy co miich jeꞌ je Elías. E jacjadyii ymɨnaangɨxy co miich jeꞌ tüg Dios yꞌayucnajtzcapxɨɨybɨ huɨdibɨ tügɨɨyb mɨɨd nijëjɨty Dios ytɨyꞌajtmɨɨdpɨ huɨdibɨ tzɨnaay jecyꞌajty.
\p
\v 29 Jesús yꞌamɨdooy jeꞌ ydiscípulos ajcxy:
\p
―Miich ajcxy, ¿nej miich mmɨnaangɨxy pɨn ɨɨch?
\p
Chi Pedro yꞌadzooy:
\p
―Miich jeꞌ je Cristo.
\p
\v 30 Chi Jesús nɨmay jeꞌ ydiscípulos ajcxy co caꞌ huaad ni pɨn nɨmaaygɨxy, co yɨꞌ jeꞌ je Cristo.
\s Jesús capxypɨdzɨmy co yꞌögaꞌñ
\p
\v 31 Chi Jesús jacyajꞌixpɨjcy jeꞌ ydiscípulos ajcxy, e ymɨnañ:
\p ―Copɨcy co ɨɨch, je jäy huɨdi tzoon tzajpjoty, nyajnaxɨpyɨch mɨj tzaachpyɨ etz mɨj ayoꞌn. Yɨ mɨjjäydɨjc ajcxy, yɨ judío teedy mɨjtungmɨɨdpɨ, etz yɨ escribas, je huindzɨndɨjc huɨdibɨ nïjayduutcɨxyp Dios necy, caꞌ ajcxy xyꞌixaꞌñɨch, e xyajꞌögaꞌñ ajcxy, e codugɨɨg xɨɨ njugypɨgɨpyɨch jadügꞌoc co ɨɨch anajty tɨ nꞌögy. 
\v 32 Co Jesús jaduꞌn nigapxy nimɨydacy huädz huädz nej yjadaꞌñyii anajty, chi Pedro huobɨbzɨmy Jesús ahuingujc, chi ooy ojy. 
\v 33 Chi Jesús niꞌijxhuimbijty ydiscípulos ajcxy, e ojy je Pedro, ñɨmay: 
\p
―Huinhuäctuutcɨch, miich Satanás. Com miich caꞌ mhuinmaꞌñ mbɨdägy nej Dios tzocy. Yɨꞌ janchtɨy miich mhuinmaꞌñꞌajtpy nej jäy ajcxy tzocy. 
\p
\v 34 Huinꞌit Jesús huoomiñ yɨꞌ ydiscípulos ajcxy etz yɨ mayjäy, e chi nɨmay:
\p
―Pen ji pɨnjaty xypanɨcxaꞌñɨch, huen jäydɨgoydäy ycɨꞌmdzójcɨn etz huen xypanɨcxɨch jabom jabom. Oy nej ytɨmyjadɨpy ytɨmyꞌayoohuɨpy. Jaduꞌn nipaady nej jɨhuɨ̈y ajcxy anajty mgruudz mgabɨ̈ccɨxy, etz naygɨ̈yéjcɨgɨxy ma yɨ óꞌcɨn huen ytɨmyñéjɨty mɨɨd ɨɨch ycɨxpɨ. 
\v 35 Huenpɨnjäy huɨdibɨ caꞌ yegaꞌñ yɨ yjugyꞌájtɨn ma yɨ óꞌcɨn mɨɨd ɨɨch ycɨxpɨ, hueꞌ jeꞌ yajtɨgoyamy yɨꞌyjugyꞌájtɨn. E huenpɨnjäy huɨdibɨ yegamy yjugyꞌájtɨn ma yɨ óꞌcɨn mɨɨd ɨɨch ycɨxpɨ etz ɨɨch yꞌayuc oybɨ ycɨxpɨ, hueꞌ jeꞌ ypadamyb yɨ jugyꞌájtɨn huɨdibɨ caꞌ cɨxɨpy tɨgoyɨpy ni mɨnaa.
\v 36 ¿Ti oyꞌájtɨn yɨꞌ co tüg jäy yꞌocnayyajpadɨɨyb yɨ meeñ etz mɨcꞌájtɨn (huɨdi yajpaatp ya ñaaxhuiñybɨ) e yꞌalma yjugyꞌájtɨn cɨxɨpy tɨgoyɨpy tügcɨ̈y?
\v 37 ¿Jaduꞌñyɨ jëb jäy yꞌalma yjugyꞌájtɨn occojuyɨ? Nïgɨ tzoohuɨn mɨɨdɨty jäy ajcxy yꞌalma yjugyꞌájtɨn, caꞌ jac ti. 
\v 38 Huentɨmpɨ́nɨty yɨ huɨdibɨ xymɨdzoꞌydúnɨbɨch yɨ nꞌayucɨch ndɨyꞌájtɨch ma yɨ pocyjäydɨjc yhuinduu huɨdibɨ tzɨnaayb cham ma jada naaxhuiñybɨ. Pues nañ jaduꞌn ɨɨch, je jäy huɨdibɨ tzoon tzajpjoty, nmɨdzoꞌydúnɨbɨch yɨ jaduꞌmbɨ jäy co ɨɨch anajty nhuimbity ya naaxhuiñybɨ mɨɨd ɨɨch nDeedy, je Dios Teedy, ymɨcꞌajt yꞌoyꞌajt etz mɨɨd tügꞌócɨy yɨ mayꞌángeles ajcxy tudägypɨ. 
\c 9
\p 
\v 1 Jaduꞌn Jesús yjacmɨnañ:
\p
―Janch tɨyꞌajt jaduꞌn nej ɨɨch miich ajcxy cham nɨmäy, co nijëjɨty miich ajcxy huɨdibɨ cham ma ɨɨch nhuinduu, caꞌ mꞌögaangɨxy, ixtɨ coonɨ ajcxy jayɨjp mꞌixɨpy je Dios yꞌanéꞌmɨn etz ymɨcꞌajt. 
\s Co Jesús ñinïcx yajtɨgajch
\p
\v 2 Co tuctujc xɨɨ naxy, chi Jesús mɨɨd tzooñ Pedro, Santiago etz Juan, e mɨɨdpaꞌttɨgɨɨy ma tüg mɨjcop ma tüg it ooy ycɨ́xɨty. E jɨm copcɨ́xy Jesús ñinïcx naygojtɨgajtznɨ ma Pedro ajcxy yhuinduu.
\v 3 Chi Jesús yhuit oy yꞌahuimbity janch poob, e janch adɨɨcxp. E ni pɨn jaduꞌn yhuit cayajhuäch janch poob jaduꞌn nej jeꞌ anajty yhuit mɨɨdɨty. 
\v 4 E chi oy nayguëxɨ̈gyii ma ajcxy yhuindu Elías etz Moisés. Elías etz Moisés mɨydacp anajty ajcxy mɨɨd Jesús. 
\v 5 Huinꞌit Pedro nɨmay Jesús: 
\p
―Huindzɨn, janch oy jaduꞌn co ɨɨch nyáajɨty. Nꞌoccojyɨch ajcxy tugɨɨg tɨjcquemy: tüg miich mjeꞌ; tüg Moisés yjeꞌ; etz tüg Elías yjeꞌ.
\p
\v 6 Com Pedro, Jacobo etz Juan ooy anajty chɨgɨɨygɨxy, paady Pedro caꞌ anajty nejhuɨ̈y ti ycapxyp. 
\v 7 Tɨm huinꞌítɨy tüg joc yajnïdɨgoy jeꞌ ajcxy, e mɨdooy ajcxy ayuc jocjoty, e je ayuc ymɨnañ:
\p ―Jada jeꞌ ɨɨch nꞌung, huɨdibɨ ooy ndzocyɨch. Mɨdoꞌmbɨc miich ajcxy Jesús yꞌayuc. 
\p
\v 8 E tɨm huinꞌítɨy Pedro, Jacobo etz Juan ajcxy yujcꞌijxy, e yjaꞌijxhuɨdijty ajcxy, e caꞌ ni pɨn ma ocjacꞌijxnɨ, jëdaꞌajty Jesús naydügpajc. 
\p
\v 9-10 Tɨ anajty choongɨxy copcɨ́xy, e cɨdacp anajty ajcxy, co Jesús nɨmay Pedro, Jacobo etz Juan, co caꞌ huaad yajmɨɨdmɨydaaccɨxy pɨnjaty huɨdibɨ ajcxy anajty tɨ íjxcɨxy, ixtɨ coonɨ ɨɨch, je jäy huɨdibɨ tzoon tzajpjoty, nꞌögɨbɨch etz njugypɨgɨpyɨch jadügꞌoc. Pedro, Jacobo, etz Juan caꞌ yjacmɨydägy mɨɨd jacpɨnjaty huɨdibɨ anajty tɨ íjxcɨxy. Per ooy ajcxy huinmay etz naymɨɨdmɨydáacɨgɨxy miñ xyɨpy ti Jesús ytijamy co ymɨnañ: “Nꞌögɨbɨch etz njugypɨgɨpyɨch jadügꞌoc.”  
\v 11 Huinꞌit ajcxy Jesús yꞌamɨdooy:
\p
―¿Naꞌamy co yɨ escribas ymɨnaꞌñ co yɨ Elías huɨdibɨ chɨnay jecyꞌajty jayɨjp miinaꞌñ caꞌydɨ je Cristo?
\p
\v 12 Chi Jesús yꞌadzooy:
\p
―Tɨyꞌajt jaduꞌn co miñ jaybety ma Dios ñecy jecyꞌajty co Elías yhuimbidɨpy jacjayɨjp caꞌydɨ je Cristo, e yajꞌoyɨydähuɨpy huinjemybɨ tügꞌócɨy mɨɨd Dios ycɨxpɨ. E nañ tɨyꞌajt jaduꞌn co jaybety ymiiñ ma Dios ñecy co je Cristo, je jäy huɨdib tzoon tzajpjoty, yajnaxaꞌñ ayoꞌn etz tzaachypɨ etz mayjäy caꞌ yꞌixaꞌnɨɨby. 
\v 13 Ɨɨch miich ajcxy nɨmaayb co je Elías tɨ jeꞌ yhuimbity ya naaxhuiñ, e je mayjäy tɨ túngɨxy mɨɨd Elías nej anajty tɨm tzójcɨxy. E cuyduñ ajcxy nej jaybety miiñ ma Dios ñecy mɨɨd Elías ycɨ́xpɨ. 
\s Jesús yajtzögy tüg mutzꞌanäg huɨdibɨ caꞌoybɨ mɨɨd
\p
\v 14 Co Jesús, Pedro, Jacobo etz Juan yhuimbity ma je jacjadyii Jesús ydiscípulos ajcxy anajty tɨ yhuɨꞌmɨ̈y, chi ajcxy ijxy mayjäy jühuɨdity ma Jesús ydiscípulos ajcxy. Etz ijxy ajcxy nijëjɨty escribas huɨdibɨ ayuc tzachyajtzibɨɨyb mɨɨd Jesús ydiscípulos ajcxy. 
\v 15 E co je mayjäy íjxcɨxy nejhuɨɨygɨxy co Jesús tɨ yhuimbity anajty, chi mɨcꞌamy ajcxy ninɨcxy Jesús poyɨ̈gy, e capxpoocxcɨxy, e may jeꞌ ajcxy ooy jɨhuɨy huinmay. 
\v 16 Chi Jesús yꞌamɨdooy je mayjäy, nɨmay:
\p
―¿Ti ayuc miich ajcxy mdzachyajyomyb mɨɨd ɨɨch ndiscípulos ajcxy?
\p
\v 17 Chi nidüg je jäy ajcxy yꞌadzooy:
\p
―Huindzɨn, tɨ nmɨɨdmiiñ ɨɨch nmang huɨdibɨ ymɨɨd caꞌoybɨ, e je caꞌoybɨ tɨ yajꞌumɨ̈yii.
\v 18 E janam jadzojc je caꞌoybɨ yajyachyii yajquïdyii ɨɨch nmang, e oy cäy naaxcɨ́xy, e ooy yꞌaaꞌopy ypɨdzɨmy, e nañ jaduꞌn oy ytɨɨtz queety etz ñinïcx janch ögy yhuɨꞌmy. Tɨ nbɨjctzoyɨch mayꞌajt mɨɨd miich mdiscípulos ajcxy co huen yajpɨdzɨmgɨxy je caꞌoybɨ ma ɨɨch nmang, e caꞌ ajcxy ymadacy nɨcxy yajpɨdzɨmgɨxy.  
\p
\v 19 Jesús nɨmay je mayjäy:
\p
―Miich ajcxy huɨdibɨ jugyꞌajtp jadachambɨ xɨɨ tiempo huɨdibɨ caꞌ mɨjpɨdägy Dios yꞌayuc, ¿naag xɨɨ naag poꞌ ɨɨch njac-huɨꞌmmɨ̈huɨbɨch mɨɨd miich ajcxy? ¿Naag xɨɨ naag poꞌ nꞌocmɨmecxtuguipɨch miich ajcxy? Mɨɨdmiin yɨ mmang ya ma ɨɨch nhuinduu. 
\p
\v 20 Chi ajcxy mɨɨdmiñ je paꞌmjäy ma Jesús yhuinduu. E co je caꞌoybɨ ijxpaady Jesús, chi mɨcꞌamy yajyajch yajquïdy je paꞌmjäy, e chi oy cɨday naaxcɨ́xy, e ooy yajch yquïdy, yajpɨdzɨmy ooy yꞌaaꞌopy ma yꞌahuac. 
\v 21-22 Jesús yꞌamɨdooy je paꞌmjäy yteedy:
\p
―¿Mɨnaag jɨmɨjt cujc yöy maabɨ mmang ypaꞌmbety?
\p
 Chi je ungdeedy yꞌadzooy:
\p
―Maꞌxung anajty co paꞌmbedyii. Canaagꞌoc je caꞌoybɨ yajyachyii yajquïdyii ɨɨch nmang, ixtɨ tɨ oy ycogɨdahuɨ̈y jɨɨnjoty etz nɨɨjoty. Je caꞌoybɨ canaagꞌoc jayajꞌögy ɨɨch nmang. Pen miich mɨɨd tzöcꞌajt mɨcꞌajt jaydëb xypubedɨpyɨch, tun mayꞌajt paꞌayoogɨch etz pubejtcɨch. 
\p
\v 23 Chi Jesús yꞌadzooy nɨmay je paꞌmjäy yteedy:
\p
―Pen miich mɨbɨjcpɨ, caꞌ ti chípɨty ma pɨn mɨbɨjcp. 
\p
\v 24 Mɨcꞌamy je paꞌmjäy yteedy mɨc ycapxy ymɨnañ:
\p
―Nmɨbɨjcyɨch, pubéjtcɨch nej huaad jacmɨj nmɨbɨcyɨch. 
\p
\v 25 E co Jesús ijxy co nïgɨ mayjäy chach ymiiñ poyɨ̈gy ma yɨꞌ, chi ixꞌojy je caꞌoybɨ, e ymɨnañ:
\p
―Miich caꞌoybɨ huɨdib tɨ yajhuɨꞌmy jada piꞌcꞌanäg uum etz nat, ɨɨch miich yam nꞌaneꞌmyb: “Pɨdzɨm ma yɨ paꞌmjäy, e caꞌ mjactɨgɨ̈huɨpy ma yɨꞌ yjot yhuinmaꞌñ jadügꞌoc.”
\p
\v 26 Jayɨjp je caꞌoybɨ yaaxqueecy janch mɨc, yajyajch yajquïdy je paꞌmjäy. Co jaduꞌn tuñ, chi ypɨdzɨmy. Je paꞌmjäy oy ñinïcx yhuɨꞌmy nej jɨhuɨ̈y tɨ yꞌoꞌcnɨ. Je mayjäy huɨdibɨ anajty ajcxy jɨm huindɨcxp ymɨnaangɨxy: 
\p
―Tɨ ayoob yꞌögy.  
\p
\v 27 Chi Jesús majtz je paꞌmjäy ycɨꞌ, e yajpɨdɨ̈gy e huinꞌit je paꞌmjäy ytɨnayɨ̈gy mɨc oy.
\p
\v 28 Co Jesús ytɨgɨɨy ma tüg tɨjc, chi jeꞌ ydiscípulos ajcxy yꞌamɨdou ameech, minañ ajcxy:
\p
―¿Naꞌamy co ɨɨch  ajcxy caꞌ tɨ nmadägyɨch nej nyajpɨdzɨmɨp ɨɨch ajcxy yɨ caꞌoybɨ?
\p
\v 29 Chi Jesús yꞌadzooy:
\p
―Yɨjiibɨ caꞌoybɨ caꞌ yɨꞌ huaad ypɨdzɨmy jaduꞌñyɨ. Hueꞌ janchtɨy copɨcy mɨbɨjctzou Dios mɨctägy, e huinꞌit ypɨdzɨmɨpy je caꞌoybɨ ma je paꞌmjäy. Caꞌ jac ni nej huaad ypɨdzɨmy yɨ jaduꞌmbɨ caꞌoybɨ, jëyɨ co Dios nmɨbɨjctzoohuɨm nꞌíjtɨm ayuu.
\s Jesús capxpɨdzɨmnɨp jadügꞌoc co yꞌögaꞌñ
\p
\v 30 Chi Jesús mɨɨd yɨꞌ ydiscípulos ajcxy choñ ma je jɨmbɨ it, e yajyöyñajxtay ajcxy Galilea naaxjot. Jesús caꞌ anajty tzocy co je mayjäy ñejhuɨ̈huɨɨyb ma yɨꞌ ñɨcxy.  
\v 31 Com Jesús hueꞌ anajty yajꞌixpɨcy yɨꞌ ydiscípulos ajcxy, co ooy ycopɨ́cyɨty co yɨ jäy huɨdibɨ tzoon tzajpjoty, yajcɨ̈yegɨpy ma yɨ ymɨdzip, etz yajꞌögɨɨyb, e co anajty tɨ yꞌögy codugɨɨg xɨɨ jadügꞌoc yjugypɨgɨpy. 
\v 32 Jesús ydiscípulos ajcxy caꞌ huinjɨhuɨ̈y anajty Jesús yꞌayuc, e nañ jaduꞌn tzɨgɨɨyb anajty ajcxy co Jesús yajꞌójɨp, paady caꞌ ajcxy amɨdoy nej huimbɨdzɨmy yɨjiibɨ ayuc. 
\s ¿Pɨn jeꞌ nïgɨ jacmɨ́jɨp?
\p
\v 33 E Jesús mɨɨd ydiscípulos ajcxy oyjäty jɨm Capernaum. Co ajcxy ytɨjctɨgɨɨy, chi Jesús yajꞌamɨdoy ydiscípulos ajcxy, nɨmay:
\p
―¿Ti ayuc miich ajcxy naymɨɨdmɨydáacɨgɨxy jɨm ma anajty mdüyöygɨxy?
\p
\v 34 Per amonday ajcxy, com jëgɨxpɨ co anajty ajcxy ooy tɨ ñaymɨɨdmɨydáacɨgɨxy tüyöyjoty co pɨn jadaꞌ ajcxy nidügtɨ ocjaccopɨ́cyɨp. 
\v 35 Huinꞌit Jesús yꞌixtacy, e chi mɨjhuoy je nimajmetzpɨ ydiscípulos ajcxy, chi ajcxy nɨmay:
\p
―Pɨn nayyajnaxaanɨp mɨj, huen ity nej jɨhuɨ̈y caꞌ ytiijɨty e huen capxmɨdoy ymɨgügtɨjc. 
\p
\v 36 Chi Jesús tzenɨ̈gy tüg piꞌcꞌanäg, e chi pɨdacy cujcꞌamy ma yɨꞌ ydiscípulos ajcxy. Chi tzenɨ̈gy jadügꞌoc, e nɨmay ajcxy:
\p
\v 37 ―Pɨn cöbɨjc tügpajc piꞌcꞌanäg jaduꞌn nej jada piꞌcꞌanäg mɨɨd ɨɨch nxɨɨ ycɨxpɨ, ɨɨch yɨꞌ anajty tɨ xycöbɨcyɨch, e pɨn ɨɨch xycöbɨjcpɨch, ca nan ɨɨch anajty naydügpajc tɨ xycöbɨjcyɨch, nañ jaduꞌn anajty tɨ cöbɨcy huɨdi tɨ xyquejxɨch. 
\s Pɨn ɨɨch ajt xycamɨdzipꞌájtɨm, ɨɨch ajt jeꞌ mɨɨd yꞌity
\p
\v 38 Juan Jesús nɨmay:
\p
―Huindzɨn, tɨ ɨɨch ajcxy nꞌijxpaady tüg jäy co caꞌoybɨ yajpɨdzɨmy mɨɨd miich mxɨɨ, e tɨ ngapxꞌaducyɨch mɨɨd co caꞌ yɨꞌ ɨɨch ajt xypahuɨdíjtɨm.
\p
\v 39 Per Jesús ymɨnañ:
\p
―Caꞌ mgapxꞌadugɨpy yɨ jaduꞌmbɨ jäy, com huenpɨ́nɨty huɨdibɨ mɨjhuinmaꞌñ tumb mɨɨd ɨɨch nxɨɨ, caꞌ yɨꞌ jɨbɨc xyñigapxɨch. 
\v 40 Com yɨ huɨdibɨ ajt caꞌ xymɨdzipꞌájtɨm, yɨꞌ yɨꞌ mɨɨd ɨɨch ajt nbɨdzɨ́mɨm.  
\v 41 Janch janch ɨɨch miich ajcxy jaduꞌn nɨmäy co huenpɨnjäy huɨdibɨ ixyipy miich ajcxy xyajnɨɨꞌuucp tüg vaso nɨɨ mɨɨd co miich ajcxy tɨ mmɨjnɨcxpety je Cristo, yɨ jaduꞌmbɨ jäy ypadamy yɨꞌ yꞌoyꞌájtɨn ma Dios. 
\s Je huɨdibɨ ooy ycojotmáyɨty co nɨcxy nbocycähuɨm
\p
\v 42 Huenpɨ́nɨty huɨdibɨ jɨbɨc-huinmaꞌñ mɨbɨdzɨmb, e yajpocycäy yɨ jaduꞌmbɨ piꞌctɨjc huɨdibɨ ajcxy xymɨjnɨcxpejtpɨch, jacꞌoy ixyipy co yɨ jaduꞌmbɨ jäy ytɨmyñayyajyöcxodzɨ̈yii tüg paandzaa etz ñayñajtzjɨbibɨ̈huɨɨyb mejyjoty. 
\v 43 Pen miich mgɨꞌ xyajtundɨgoyamb jacꞌoy co mdɨmꞌixpuxɨpy, com jacꞌoy co mdɨgɨ̈huɨpy ma yɨ jugyꞌájtɨn huinɨxɨɨbɨ cɨ̈duc, caꞌydɨ co Dios xypɨdägɨp mɨɨd metz mgɨꞌ jiiby jɨɨnjoty caꞌoydactuuby, ma yɨ jɨɨn ni camɨna ycapïch. 
\v 44 Jiiby caꞌoydactuuby yɨ ucxytɨng caꞌ yꞌögy etz ni jɨɨn ycapïch nicamɨnaaxɨɨ.
\v 45 E pen miich yɨ mdecy xyajpocycähuamb, ixpux, com jacꞌoy co mdɨgɨ̈huɨp ma yɨ jugyꞌájtɨn huinɨxɨɨbɨ tecytuc caꞌydɨ co mdɨgɨ̈huɨp mɨɨd metz mdecy jiiby caꞌoydactuuyb, ma yɨ jɨɨn ni camɨna ycapïch. 
\v 46 Jiiby caꞌoydactuuby yɨ ucxytɨng caꞌ yꞌögy etz ni jɨɨn ycapïch ni camɨnaxɨɨ. 
\v 47 E pen yɨ mhuiin tüg xyajpocycähuamb, tɨm yajpɨdzɨm, jacꞌoy yɨꞌ co mdɨgɨ̈huɨp ma yɨ Dios yꞌaneꞌmdac mɨɨd tügpajc mhuiin, caꞌydɨ co mdɨgɨ̈huɨp caꞌoydactuuby mɨɨd metz mhuiin. 
\v 48 Ma yɨ ucxytɨng ni camɨnaxɨɨ ycaꞌögy etz yɨ jɨɨn ni camɨnaxɨɨ ycapïch,
\v 49 e ma nidügꞌócɨy ñiꞌcägoodaꞌñ jɨɨn xut jɨɨn yeꞌn tɨm jaduꞌn nej jäy tzüch caan xɨducy. 
\v 50 Yɨ caan ooy yɨꞌ yꞌóyɨty, pen ymɨɨd xücxꞌájtɨn. Co je caan ytɨgoy yxücxꞌájtɨn, caꞌ ji ni ti huɨdibɨ jëb mɨɨd nyajxücxɨɨyɨm. Mɨɨdꞌájtcɨx ɨɨch nꞌayuc ma mjot mhuinmaꞌñ, jaduꞌn ɨɨch nꞌayuc nipaady nej caan, e tzɨnaꞌ miich ajcxy jotcujc mɨɨd mmɨgügtɨjc nidüg nidüg. 
\c 10
\s Jesús yajꞌixpɨcy mɨɨd co jäy ytöxyɨjc ixmach 
\p
\v 1 Chi Jesús chooñ jɨm Capernaum, nɨcxy jɨm Judea ñaaxjot ma je it lugar Jordán mɨjnɨɨ nïnaxy xɨɨ ypɨdzɨmyꞌamy. E mayjäy ooy ñayyöymujcɨ ma Jesús anajty yajpaady. E Jesús yajꞌixpɨjcy je mayjäy jaduꞌn nej anajty yajꞌixpɨcyꞌadyii. 
\v 2 Chi nijëjɨty fariseos ajcxy ñɨcxy ma Jesús anajty yajpaady. Hueꞌ ajcxy yhuinmaꞌñ pɨdaaccɨxy co anajty Jesús tzuꞌixaangɨxy. Chi ajcxy yꞌamɨdooy, pen huaad tüg yëydɨjc ixmach ytöxyɨjc. 
\v 3 Chi Jesús yꞌadzooy, ymɨnañ:
\p
―¿Nej Moisés ymɨnaꞌñ ma yɨꞌ ycötújcɨn ñecy?
\p
\v 4 Chi je fariseos ajcxy Jesús yꞌadzooy:
\p
―Moisés cötújcɨn yecy co tüg yëydɨjc jëb huaad ixmach ytöxyɨjc, e möhuɨpy ñinecy ñidɨyꞌajt co nej ñayꞌixmájtzɨgɨxy, e jaduꞌn anajty tɨ yꞌoyɨ̈y nej jëb yɨꞌ ytöxyɨjc ixmach. 
\p
\v 5 Chi Jesús ymɨnañ:
\p ―Moisés cojaay jada ycötújcɨn mɨɨd miich ajcxy ycɨxpɨ, co ooy miich ajcxy mdzachcapxycömɨdodaaccɨxy caꞌ mgapxymɨdohuaangɨxy Dios. 
\v 6 Per co je naaxhuiñybɨ chondacy, co Dios ogaꞌn yajcojy tügꞌócɨy tijaty huɨdi jiꞌajtp, chi Dios yajcojy yëydɨjc etz töxyjäy.
\v 7 E je yëydɨjc ixmadzɨpy ytaj yteedy etz pudɨgɨ̈huɨpy yɨ ytöxyɨjc. 
\v 8 E je yëydɨjc etz ytöxyɨjc túꞌcɨy idaangɨxy. Paady je yëydɨjc tügmucy yajpaady mɨɨd ytöxyɨjc. 
\v 9 Com yɨ huɨdibɨ Dios tɨ huijtzmucy, caꞌ ni pɨn huaad huijtzhuägy. 
\p
\v 10 Co Jesús mɨɨd ydiscípulos ajcxy yhuimbijt ma anajty tɨ yjättáccɨxy, chi Jesús ydiscípulos ajcxy yajtɨhuimbijtcɨxy je ayuc huɨdibɨ anajty tɨ yajꞌixpɨcy ma je pɨ́jcɨn. 
\v 11 Chi Jesús ymɨnañ:
\p ―Je yëydɨjc huɨdibɨ tɨ ixmach yɨ ytöxyɨjc, e pɨcy mɨɨd huingbɨ, hueꞌ yɨꞌ anajty ymɨdundɨgooyb yɨ ytöxyɨjc huɨdibɨ mɨɨd jayɨjp ypɨjcy. 
\v 12 Nañ tɨm jaduꞌn co tüg töxyjäy ixmach je yëydɨjc huɨdibɨ mɨɨd tɨ ypɨcy jayɨjp, e ypɨjctɨgach mɨɨd huingbɨ yëydɨjc, hueꞌ ymɨdundɨgooyb je yëydɨjc huɨdibɨ mɨɨd tɨ ypɨcy jayɨjp.  
\s Jesús conucxy piꞌctɨjc
\p
\v 13 Je huinꞌit tiempo jäy ajcxy mɨɨd miñ piꞌctɨjc ma Jesús, jaydëb cɨ̈nïxajy etz conuucxɨp. Co Jesús ydiscípulos ajcxy jaduꞌn ijxy co jäy ajcxy nimɨjhuägy Jesús mɨɨd ajcxy ypiꞌcꞌung, chi jeꞌ ydiscípulos ajcxy ixꞌojy je jäy ajcxy.    
\v 14 Co Jesús jaduꞌn ijxy nejhuɨɨy nej yɨꞌ ydiscípulos ajcxy yꞌɨdɨ̈ch, chi ojy ajcxy, ymɨnañ:
\p
―Ooy yꞌóyɨty co je piꞌctɨjc ajcxy xyñimɨjhuägyɨch, caꞌ miich ajcxy mgapxꞌaducy. Com yɨ jäy ajcxy huɨdibɨ yajpatp ma Dios yꞌanéꞌmɨn, jaduꞌn ajcxy nipaady nej piꞌctɨjc. 
\v 15 Janch ɨɨch miich ajcxy nɨmäy co pɨnjaty huɨdibɨ caꞌ cöbɨgaꞌñ Dios yꞌanéꞌmɨn,                                                                                                                                                                                                                                                                                                                                                                                                                                                                                                                                                                                                                                                                                                                                                                                                                          jaduꞌn nej piꞌctɨjc cöbɨ́jccɨxy Dios yꞌanéꞌmɨn, hueꞌ yɨ jaduꞌmbɨ jäy ajcxy caꞌ ytɨgɨ̈huaꞌñ ma yɨ Dios yꞌit lugar. 
\p
\v 16 Chi Jesús amɨnenmujctay je piꞌctɨjc ajcxy, e chi cɨ̈nïxajɨy etz conuucxcɨxy. 
\s Tüg mutzꞌanäg comeeñybɨ ymɨydägy mɨɨd Jesús 
\p
\v 17 Co Jesús chooñ jadügꞌoc, chi ñimiinɨ poyɨ̈gy tüg yëydɨjc, ycojxtɨnayꞌahuɨy ma Jesús yhuinduu, e ymɨnañ:
\p
―Miich, oybɨ Huindzɨn, ¿ti huaad ndunɨpyɨch jɨgɨx jëbɨ nbadɨpyɨch jugyꞌájtɨn huɨdibɨ caꞌ ycɨxɨpy ytɨgoyɨpy?
\p
\v 18 Chi Jesús ymɨnañ:
\p
―¿Naꞌamy co xyñɨmäyɨch co oy huindzɨn ɨɨch? Dios tügpajc óyɨp, caꞌ jac ni pɨn.
\v 19 Miich mnejhuɨɨyb Dios ycötújcɨn huɨdibɨ jaduꞌn mɨnaam: “Caꞌ mmɨgapxtɨgoyɨp töxyjäydɨjc; caꞌ mjäyyajꞌögɨpy; caꞌ mmeedzɨp; caꞌ mꞌɨɨndaacɨp; caꞌ pɨn mhuinꞌɨɨnɨp; etz myajmɨjꞌadɨp mdaj mdeedy.” 
\p
\v 20 Chi je jäy Jesús nɨmay:
\p
―Huindzɨn, tɨ nguydundäyɨch jadayaab cötújcɨn ajcxy maabɨ ɨɨch nbiꞌcꞌatyɨch. 
\p
\v 21 Chi Jesús huindɨcxpejty je yëydɨjc mɨɨd tzójcɨn jɨhuɨɨyɨn, e chi nɨmay:
\p
―Per jactɨgoyꞌijtnɨ jadügnax. Nɨcx toog tügꞌócɨy huɨdijaty miich mmɨɨd, etz moꞌ yɨ ayoobtɨjc. Co jaduꞌn mdunɨpy, chi mbaadɨpy oyꞌájtɨn jiiby tzajpjoty. Co jaduꞌn mdooctähuɨpy tijaty miich mɨɨd, chi minɨp jadügꞌoc ma nyajpaadyɨch, e xypanɨ́cxɨbɨch, e mnaybɨdägɨɨb cɨxyjot huinjot oy nej mdɨmyjadɨpy mɨɨd ɨɨch ycɨxpɨ.
\p
\v 22 Co jaduꞌn je yëydɨjc mɨdoy nej anajty Jesús tɨ ñɨmäyii, chi yhuɨꞌmy taj may e co ñɨcxnɨ, chi ooy ytajy ymay, com hueꞌ jeꞌ anajty ooy ycomeeñɨty. 
\p
\v 23 Co Jesús jaduꞌn ixy co je comeeñybɨ taj may yhuimbijtnɨ, chi huindɨcxpejty jeꞌ ydiscípulos ajcxy huɨdibɨ tɨnaayb jühuɨdity ma yɨꞌ, e ymɨnañ:
\p
―Ooy chachtzípɨty co tüg comeeñybɨ ytɨgɨ̈huɨpy ma Dios yꞌit lugar. 
\p
\v 24 Jesús ydiscípulos ajcxy ooy tzachhuinmayꞌahuɨdity mɨɨd jada ayuc nej Jesús anajty tɨ ymɨnaꞌñ. Paady Jesús yjacmɨnañ jadügꞌoc:
\p
―Miich ajcxy mɨgügtɨjc huɨdibɨ ooy ndzocyɨch, ooy chachtzípɨty co ytɨgɨ̈huɨp ma Dios yꞌaneꞌmdac tüg comeeñyjäy huɨdibɨ tzachnijotꞌajt ycomeeñꞌadɨɨ. 
\v 25 Nïgɨ chípɨty co tüg comeeñ jäy ytɨgɨ̈huɨp ma Dios yꞌaneꞌmy, caꞌydɨ co tüg camello ñaxɨpy ma tüg xuꞌñꞌɨjx yxútɨty. 
\p
\v 26 Co  jaduꞌn ajcxy mɨdoy nej Jesús ymɨnañ, chi ooy ajcxy yhuinmayꞌahuɨdijty, e nayñɨmáayɨgɨxy miñ xyɨpy: 
\p
―Pen janch tɨyꞌajt jaduꞌn, ¿pɨnjäy jadaꞌ huaad jëb yꞌalma ñïdzögɨpy?
\p
\v 27 Je huɨdibɨ jäy ajcxy caꞌ ni mɨnaxɨɨ huaad caꞌ yajꞌoyɨ̈y, Dios yɨꞌ yajꞌoyɨ̈huɨp, com mɨɨd Dios caꞌ yɨꞌ ni ti chípɨty.  
\p
\v 28 Chi Pedro ymɨnañ:
\p
―Huindzɨn, occuendtun, ɨɨch ajcxy tɨ nꞌixmajtztäyɨch tügꞌócɨy tijaty anajty nmɨɨdɨch, e ɨɨch ajcxy nbanɨcxpɨch miich. 
\p
\v 29-30 Chi Jesús yꞌadzooy, minañ:
\p
―Janch tɨyꞌajt nej ɨɨch miich ajcxy nɨmäy co huenpɨ́nɨty huɨdibɨ mɨɨd ɨɨch ycɨxpɨ tɨ ixmach ytɨjc, tɨ ixmach yꞌuch ymɨgüg ajcxy etz ytaj yteedy, etz ytöxyɨjc, etz yꞌung ajcxy, etz nañ jaduꞌn tɨ ixmach ycam ɨɨch ycɨxpɨ, etz ɨɨch nꞌayucɨch etz mɨɨd Dios ytɨyꞌajt ycɨxpɨ, yɨꞌ ypadamy nïgɨ oyꞌájtɨn ya naaxhuiñ, ixtɨ ypadamy mɨgoꞌpx jaduꞌñyɨ ytɨjc ajcxy, yꞌuch ajcxy, ytaj ajcxy, yꞌung ajcxy, etz ypadamy nïgɨ ymɨj cam, mɨɨd tzaachypɨ mɨɨd ayoꞌn mɨɨd ɨɨch nꞌayuc ycɨxpɨ. Etz nañ jaduꞌn ma je xɨɨ tiempo huɨdibɨ mimb cɨdacpɨ ypadamy jugyꞌájtɨn huɨdibɨ caꞌ ycɨxɨpy ytɨgoyɨpy. 
\v 31 Ji yajpaady ya naaxhuiñ nijëjɨty jäy huɨdibɨ cömay ijtp, e co yjäty ajcxy tzajpjoty, chi caꞌ ajcxy cömay idaꞌñ. Nañ jaduꞌn ji yajpaady ya naaxhuiñ nijëjɨty huɨdibɨ caꞌ cömay yꞌity, e co ajcxy yjädɨpy tzajpjoty, chi jiiby ajcxy cömay  yꞌidɨpy. 
\s Jadügꞌoc Jesús capxpɨdzɨ́mnɨp co yꞌögaꞌñ
\p
\v 32 Jesús mɨɨd ydiscípulos tüyöyp anajty ajcxy, hueꞌ anajty ypättɨgɨɨygɨxy jɨm Jerusalén. Jesús jayɨjp anajty ñɨcxy, e jeꞌ ydiscípulos ajcxy etz nañ jaduꞌn mayjäy panɨcxy anajty ajcxy Jesús. Je Jesús ydiscípulos ajcxy ooy chachhuinmayꞌahuɨdíjtcɨxy, e jacjadyii jäy huɨdibɨ anajty ypanɨcxy Jesús ooy ajcxy chɨgɨɨygɨxy. Chi Jesús huodzooñ abɨcy je majmetzpɨ ajcxy, e yajmɨɨdmɨydactay jeꞌ ajcxy jaduꞌn nej ytunaꞌñyii yjadaꞌñyii jɨm Jerusalén co anajty ajcxy jɨm yjaꞌtcɨxy. 
\v 33 Jesús je nimajmetzpɨ nɨmay:
\p ―Miich ajcxy mꞌijxpy mnejhuɨɨyb co nnɨ́cxɨm cham jɨm Jerusalén. E jɨm Jerusalén, ɨɨch je jäy huɨdibɨ tzoon tzajpjoty, nyajcɨ̈yegaꞌñɨch mach ma yɨ Teedy mɨjtungmɨɨdpɨ, etz ma yɨ escribas ajcxy. E chi ajcxy aneꞌmɨn pɨdägaꞌñ co huen xyajꞌöcɨxɨch. Nañ jaduꞌn xycɨ̈yegaangɨxɨch mach ma yɨꞌ ajcxy huɨdibɨ caꞌ yjudiojäyɨty.
\v 34 Yɨꞌ ajcxy xyñixïgɨpy xyajxïgɨbyɨch, xyhuobɨpyɨch ajcxy mɨɨd coochac, xyhuindzuj xyjɨjptzújɨbɨch ajcxy, e xyajꞌögɨbɨch ajcxy. Codugɨɨg xɨɨ maabɨ anajty xyajꞌöccɨxyɨch, chi njugypɨgɨpyɨch jadügꞌoc. 
\s Jacobo etz Juan pɨjctzóogɨxy tüg mayꞌajt 
\p
\v 35 Huinꞌit Jacobo etz Juan, yɨ Zebedeo ajcxy ymang, nimɨjhuägy Jesús, nɨmay:
\p
―Huindzɨn, ndzojcpyɨch ajcxy co mdunɨpy mayꞌajt jaduꞌn nej yam nɨmaaygɨxy. 
\p
\v 36 E Jesús ymɨnañ:
\p
―¿Ti mdzojcpy co ndunipɨch mɨɨd miich ajcxy ycɨxpɨ?
\p
\v 37 Chi ajcxy ymɨnañ:
\p
―Tun mayꞌajt co anajty mbaady yɨ mꞌanéꞌmɨn etz mꞌoyꞌájtɨn, xymöhuɨbɨch yɨ mɨj tung ma mꞌanéꞌmɨn jaydëb nꞌɨñähuɨbɨch ma miich mmɨjc. Nidügtɨ ɨɨch ajcxy nꞌɨñähuɨpy aꞌoyꞌamy ma miich etz jadüg anajtyꞌamy.
\p
\v 38 Chi Jesús nɨmay Jacobo etz Juan:
\p
―Caꞌ miich ajcxy mnejhuɨ̈y ti tɨ mbɨjctzoogɨxy. ¿Nej myajnaxamyb miich ajcxy je tzaachypɨ ayoꞌn huɨdibɨ nyajnaxaamybɨch, jaduꞌn nej jɨhuɨ̈y mꞌügaꞌñ ajcxy ɨɨch nꞌügy e mbaadaꞌñ ajcxy ɨɨch nnɨɨbéjtɨn?
\p
\v 39 Jacobo etz Juan yꞌadzooy:
\p
―Ɨɨch ajcxy nmɨmadägɨbɨch mɨnaxɨpyɨch nyajnaxɨpyɨch ajcxy yɨ tzaachypɨ huɨdibɨ mmɨnaxamyb myajnaxamyb. 
\p
Chi Jesús ymɨnañ:
\p
―Janch tɨyꞌajt jaduꞌn nej miich ajcxy mɨnaꞌñ co mmɨnaxaangɨxy myajnaxaangɨxy yɨ tzaachypɨ jaduꞌn nej ɨɨch nmɨnaxaamyɨch nyajnaxaamyɨch yɨ tzaachypɨ, tɨm jaduꞌn nej jɨhuɨ̈y mꞌügaangɨxy ɨɨch nꞌügy, e mbadaangɨxy ɨɨch nnɨɨbéjtɨn.             \v 40 Per caꞌ ɨɨch cötújcɨn nmɨ́ɨdɨdyɨch co ɨɨch miich ajcxy nbɨdägɨpy tungmɨɨd, co myajpaadɨp tüg ma ɨɨch nmɨjc aꞌoyꞌamy, e jadüg anajtyꞌamy. Hueꞌ janchtɨy Dios  Teedy ymɨɨd niꞌixɨꞌ pɨnjaty tɨ huinꞌixy jaydëb yajnɨ́cxɨp je mɨjtung ma ɨɨch nꞌanéꞌmɨn.
\p
\v 41 Co je jacjadyii Jesús ydiscípulos ajcxy nejhuɨɨy jaduꞌn nej Jacobo etz Juan mayꞌajt pɨjctzoy ma Jesús, chi ajcxy ooy mɨjotmäty Jacobo etz Juan.  
\v 42 Per Jesús huomiñ yɨ jacjadyii ydiscípulos ajcxy, e ymɨnañ:
\p
―Jaduꞌn nej miich ajcxy mnejhuɨɨygɨxy, yɨ jäy ajcxy huɨdibɨ mɨjtungmɨɨd ma je maybɨ naax cajp, mɨc ajcxy aneꞌmy je naax cajp. Nañ jaduꞌn yɨꞌ ajcxy huɨdibɨ mɨcꞌajt mɨɨd ma je maybɨ naax cajp, mɨc ajcxy aneꞌmy je jäy ajcxy. 
\v 43 Per miich ajcxy caꞌ mjadúꞌnɨty nej mɨjtungmɨɨdpɨ ma je maybɨ naax cajp. Pɨnjaty ma miich ajcxy mɨjtung yajnɨcxaamb, copɨcy ñaybɨdägɨɨyb nej tüg tumbɨ.
\v 44 Pɨnjaty miich ajcxy huɨdibɨ nigohuajcꞌajtp, copɨcy ñaybɨdägɨɨyb nej tüg tumbɨ. 
\v 45 Com ɨɨch nañ jaduꞌn, je jäy huɨdibɨ tzoon tzajpjoty, tɨ nmiiñɨch ya naaxhuiñ jaydëb nbubedɨpyɨch yɨ mayjäy ajcxy, e caꞌ nan yɨ mayjäy ɨɨch xypubedɨpy. Tɨ nmiiñɨch jaydëb nyegɨpyɨch njugyꞌájtɨn ma yɨ oꞌcɨn. E co jaduꞌn nyegɨpyɨch njugyꞌájtɨn ma yɨ oꞌcɨn, chi ngohuaꞌnaꞌñɨch yɨ jäy ajcxy yꞌalma. 
\s Jesús yajtzögy Bartimeo huɨdi anajty huíntzɨp
\p
\v 46 Chi oy jäty Jesús mɨɨd ydiscípulos ajcxy jɨm Jericó. E co Jesús tzooñ Jericó ytübɨjcy jadügꞌoc, chi yɨꞌ ydiscípulos ajcxy etz janch mayjäy ñɨ́cxcɨxy anajty mɨɨd Jesús. Co ajcxy ycajp pɨdzɨmy, chi tübaꞌay anajty yajpaady tüg huintzpɨ huɨdibɨ limosna anajty ypɨjctzooyb jabom jabom. Hueꞌ anajty yxɨɨ Bartimeo, e Timeo anajty xɨɨjɨty yɨꞌ yteedy. 
\v 47 Co Bartimeo nejhuɨɨy co Jesús je Nazaretpɨ najxp anajty ma je tüꞌaa, chi mɨc yaaxqueegy ymɨnañ:
\p
―Jesús, David yꞌap yꞌoc, tun mayꞌajt ɨɨch paꞌayoog. 
\p
\v 48 Chi je mayjäy ajcxy ojy je huintzpɨ, nɨmay ajcxy co huen amoñ. Per je huintzpɨ nïgɨ ymɨnanꞌɨdɨ̈ch: 
\p
―Miich, David yꞌap yꞌoc, tun mayꞌajt ɨɨch paꞌayoog. 
\p
\v 49 Chi Jesús ytɨnayxɨjpy, e ymɨnañ:
\p
―Huomiingɨx yɨ huintzpɨ. 
\p
Chi je jäy ajcxy oy yajtzoongɨxy je huintzpɨ, nɨmaaygɨxy:
\p 
―Jotcugɨꞌ, e pɨdɨ̈g, com Jesús xyaaxtzoob. 
\p
\v 50 Chi mɨcꞌamy je huintzpɨ, najtzꞌoxɨɨy je ñïbeꞌñ, chi ypɨdɨ̈gy, e ninɨcxy Jesús. 
\v 51 Chi Jesús je huintzpɨ yꞌamɨdooy:
\p
―¿Ti mdzojcpy ndunɨpyɨch mɨɨd miich ycɨxpɨ?
\p
Chi je huintzpɨ ymɨnañ:
\p
―Huindzɨn, ndzójcpyɨch co xyajhuindɨcxɨ̈gɨbɨch. 
\p
\v 52 Chi Jesús je huintzpɨ nɨmay:
\p
―Jëb mnɨcxy ma mdɨjc. Com tɨ xymɨbɨcyɨch, paady tɨ mhuindɨcxɨ̈gy. 
\p
Tɨm huinꞌít je huintzpɨ yhuinꞌoyɨɨy, e yhuindɨcxɨ̈gy, e panɨcxy Jesús co ytübɨjcy jadügꞌoc. 
\c 11
\s Jesús ytɨgɨ̈y jɨm Jerusalén
\p
\v 1 Co Jesús etz je mayjäy oyjáꞌtcɨxy huingon ma je Jerusalén cajp ma yajpaady mejtz mutz cajp huɨdi xɨɨjɨpy Betfagé etz Betania, huingon ma je cop huɨdibɨ xɨɨjɨp Olivos, chi Jesús quejxy metz ydiscípulos huen nɨcxy jayɨjp.
\v 2 Jesús nɨmay je metzpɨ ydiscípulos:
\p ―Nɨcx miich ajcxy ma yɨjɨmbɨ cajp huingonbɨ. Co jɨm mjädɨpy, chi mɨcꞌamy mbaadɨp tüg burro ycoxóchɨty huɨdibɨ caꞌ pɨn yajꞌɨñayñɨ chambaad. Coguejtuutcɨx je burro e yajmiingɨx ya ma ɨɨch.
\v 3 Pen jɨm pɨnjaty xyꞌamɨdoogɨxy: “¿Naꞌamy co mmɨdzonaangɨxy yɨ burro?” Chi miich ajcxy mnɨmähuɨpy: “Je Huindzɨn (Jesús) yajtunamyb tzojc, e yajhuimbidamy mɨcꞌamy.”
\p
\v 4 Chi je metzpɨ ydiscípulos ñɨcxy ma je cajp huingonbɨ, e oypaatcɨxy tüg burro ycoxóchɨty huingon ma tüg tɨjcꞌaguu. Chi ajcxy coguejtuuty je burro.
\p
\v 5 Ycoguejtuutyp anajty ajcxy je burro co nijëjɨty jäy jɨm huingon ymɨnañ:
\p ―¿Ti mdungɨxyp? ¿Naꞌamy co mgoguejtuutcɨxy yɨ burro?
\p
\v 6 Chi je metzpɨ Jesús ydiscípulos je jäy ajcxy yajmɨɨdmɨydacy Jesús yꞌayuc nej anajty tɨ ñɨmäyii. Je jäy ajcxy ymɨnaangɨxy co jëb yajnɨ́cxcɨxy je burro.
\v 7 Mɨcꞌamy ajcxy mɨjaꞌty je burro ma Jesús yajpaady. Je Jesús ydiscípulos ajcxy jɨɨbeꞌñ je burro ajcxy mɨɨd yjocxhuit, chi Jesús yajꞌɨñay je burro.
\v 8 Mayjäy ajcxy ooy yëby yhuit tügujc ma Jesús anajty ñaxaꞌñ, e jacjadyii jäy pujxy ajcxy quipyꞌaacx, e pɨdaaccɨxy tügujc.
\p
\v 9 Je mayjäy huɨdibɨ anajty ajcxy nɨcxp jayɨjp etz axam ma Jesús, chi ajcxy ytɨgɨɨy capxp mɨc, ymɨnaangɨxy:
\p ―¡Hosana! ¡Gloria a Dios, ooy ycömáyɨty Dios! Huen capxpaady yꞌidɨpy jada yëydɨjc huɨdibɨ mimb mɨɨd yɨ nHuindzɨn Dios yxɨɨ etz ymɨcꞌajt.
\v 10 Huen capxpaady yꞌidɨpy je anéꞌmɨn huɨdibɨ jada Jesús yajtzondacp cham. Jada jeꞌ je anéꞌmɨn huɨdibɨ nmɨjꞌap nmɨjteedy David anajty ymɨɨd. Hosana, huen je tzajpjoty tzɨnaayb ajcxy ɨɨbaatcɨxy capxpaatcɨxy jada mɨjꞌaneꞌmbɨ.
\p
\v 11 E jaduꞌñyɨ Jesús ycajptɨgɨɨy jɨm Jerusalén, e ytɨgɨɨy tɨgoty ma Dios ytɨjc. Co huindɨcxtay tügꞌócɨy tijaty jiiby tzajtɨgoty, chi chooñ jiiby, e ñɨcxy jɨm ma je cajp huɨdibɨ yxɨɨ Betania. Chi Jesús je majmetz ydiscípulos ajcxy mɨɨdnɨcxy.
\s Jesús capxpocy je higuerɨ caꞌpɨ anajty ytɨɨm
\p
\v 12 Je com jabom co ajcxy chooñ jɨm Betania, chi Jesús yuböccootɨ.
\v 13 Chi Jesús ijxpaty jɨguëgy tüg higuerɨ ooy anajty ycoꞌaayɨty. Chi Jesús ñɨcxy ma je higuerɨ yajpaady, ixaꞌñ pen ymɨɨd ytɨɨm. Co Jesús ymech ma je higuerɨ, chi ijxy co je higuerɨ caꞌ anajty ytɨɨm mɨɨdɨty, jëyɨ mɨɨdɨty anajty yꞌaay, com caꞌ anajty ni tiempɨty mɨna higo ytɨɨmꞌaty.
\v 14 Chi Jesús mɨgapxy je higuerɨ nɨmay:
\p ―Jaduꞌn nej tiempo yjacnɨcxnɨ, ni pɨn cajacpaadɨpy higo tɨɨm ma miich.
\p Chi Jesús ydiscípulos ajcxy mɨdoy nej Jesús nɨmay je higuerɨ.
\s Jesús quejxpɨdzɨmday ajuybɨ adoocpɨ ma Dios ytɨjc
\p
\v 15 Co ajcxy oy yjädy jɨm Jerusalén, co Jesús ytɨgɨy jadügꞌoc jiiby ma Dios ytɨjc, chi Jesús yajpɨdzɨmday je ajuuybɨ adoocpɨ ajcxy jiiby tzajptɨgoty. Chi Jesús tijhuimbijtay je mesa ajcxy me je meeñ yajhuäcxpɨ ytuñ ajcxy. Nañ jaduꞌn tijhuimbijty je jäy ajcxy ɨñaybejt huɨdibɨ muuxy toocp.
\v 16 Jesús caꞌ anajty tzocy co pɨnjaty mɨdɨgɨ̈huɨpy juydoogy ma Dios ytɨjc.
\v 17 Jesús yajꞌixpɨjcpy anajty je mayjäy, e ymɨnañ:
\p ―Ma Dios yꞌayuc necy Dios jaduꞌn ymɨnañ: “Ɨɨch ndɨjc hueꞌ jeꞌ tzajpcapxcapxtac ma tügꞌócɨy jäy ajcxy chooñ ma nidügꞌócɨy naax cajp ymiingɨxy Dios ojadajtp”, per miich ajcxy hueꞌ yɨꞌ mhuaꞌñ meetzpɨtɨjc.
\p
\v 18 Co ajcxy je teedy mɨjtungmɨɨdpɨ etz je escribas nejhuɨɨy nej anajty Jesús tɨ yꞌɨdɨ̈ch jiiby ma Dios ytɨjc, chi ajcxy ooy ijxtaaygɨxy nej ajcxy jëb yajꞌögɨpy Jesús. Per caꞌ ajcxy yhuinmaꞌñybaady mɨcꞌamy nej yajꞌögɨpy, tzɨgɨɨyb ajcxy mɨɨd je mayjäy com je mayjäy ooy tzachjɨhuɨy huinmay jaduꞌn nej Jesús yajꞌixpɨ́jcɨgɨxy.
\v 19 Co oycoodzɨɨyñɨ, chi Jesús ycajppɨdzɨmy.
\s Je higuerɨ ytɨɨtznɨ
\p
\v 20 Je com jabom Jesús mɨɨd ydiscípulos ajcxy najxp anajty tɨm jopyñɨ ma je higuerɨ anajty ytɨnäy. E je higuerɨ tɨ anajty ytɨɨtztay mabaad ytictz.
\v 21 Huinꞌit Pedro jäymejtzcooty nej Jesús nɨmay je higuerɨ, chi Pedro Jesús nɨmay:
\p ―Huindzɨn, ix jada higuerɨ huɨdibɨ ɨxɨy mgapxpojc, tɨ yɨꞌ ytɨ̈ch.
\p
\v 22 Chi Jesús Pedro nɨmay:
\p ―Mɨbɨc yɨ Dios.
\v 23 Janch ɨɨch miich ajcxy nɨmäy, co ixyipy pɨn mɨgapxy jada huingonbɨ cop, e nɨmäy ixyipy: “Miich cop pɨdɨ̈g, e nɨcx cɨdäg mejyjoty”, pen caꞌ ti mɨjotmetzcɨɨy, e mɨbɨcy co jadaanɨp nej yɨꞌ tɨ aneꞌmy je cop, chi jaduꞌn ytunɨɨyb yjadɨɨyb.
\v 24 Paady ɨɨch miich ajcxy nɨmäy co tügꞌócɨy tijaty miich ajcxy mbɨjctzooyb ma Dios, chi Dios xymöhuɨpy ajcxy huɨdibɨ tɨ mbɨjctzoogɨxy. Pen janch miich ajcxy mɨbɨcy co Dios tɨ xymooygɨxy ajcxy je huɨdibɨ tɨ mbɨjctzooyb.
\v 25 Co miich ajcxy mgapxtaaccɨxy, pen caꞌ oy mꞌity ajcxy mɨɨd tüg jäy, huinmécxcɨx yɨ mmɨdzip tɨm jayɨjp, jɨgɨx jëbɨ Dios Teedy huɨdib jiiby tzajpjoty xyhuinmeecxɨp miich ajcxy ma tɨ mdundɨgooygɨxy.
\v 26 Pen caꞌ miich ajcxy mhuinmecxy yɨ mmɨdzip huɨdibɨ tɨ xymɨdundɨgooygɨxy, caꞌ miich ajcxy xyhuinmecxaꞌñ Dios Teedy huɨdibɨ yajpatp tzajpjoty.
\s Jesús jeꞌ ycötújcɨn
\p
\v 27-28 Je huinꞌit tiempo Jesús mɨɨd jeꞌ ydiscípulos ajcxy yhuimbijty jɨm Jerusalén. E co Jesús anajty yhuɨdity tzajtɨgoty, chi nijëjɨty huindzɨndɨjc huɨdibɨ nigohuajcꞌajtp anajty je teedytɨjc etz escribas ajcxy huɨdibɨ nïjayduutpɨ Dios ñecy, nimiiñ ajcxy Jesús, e ymɨnañ ajcxy:
\p ―¿Pɨn cötújcɨn tɨ xymöy huɨdibɨ tɨ mduñ ya tzajtɨgoty? ¿Ma cötújcɨn tɨ mbaady co jëb mꞌaneꞌmy ya tzajtɨgoty?
\p
\v 29-30 Chi Jesús ymɨnañ:
\p ―Ɨɨch miich ajcxy nañ jaduꞌn nyajꞌamɨdohuamyb tüg ayuc. E pen mniꞌadzooyb ajcxy, huinꞌit ajcxy nyajnɨmähuɨpy ma ɨɨch tɨ nbaady yɨ mɨcꞌajt etz yɨ cötújcɨn, co jaduꞌn nduñɨch jiiby tɨgoty ma Dios ytɨjc. ¿Pɨn yajnïbɨjc Juan, je Bautista, co huen jäy yajnɨɨbety? ¿Dios, o naaxhuiñyjäy? Adzoogɨch ajcxy.
\p
\v 31 Chi ajcxy ytɨgɨɨy huinmayꞌahuɨdijtpɨ, ñayñɨmáayɨgɨxy miñ xyɨpy:
\p ―Pen mɨnaanɨm co Dios tzajpjotypɨ tɨ yajnïbɨcy Juan, chi Jesús xyñɨmáayɨmɨpy: “¿Nej co caꞌ miich ajcxy mɨbɨjcy Juan yꞌayuc?”
\v 32 Nañ ni caꞌ jëbɨ ɨɨch ajt nmɨnaanɨm co jäy ajcxy tɨ quejxy Juan.
\p Com chɨgɨɨyb anajty jäy com ñejhuɨɨyb anajty ajcxy co Juan je Bautista Dios anajty ytɨyꞌajt ymɨɨd.
\v 33 Chi ajcxy Jesús nɨmay:
\p ―Caꞌ ɨɨch ajcxy nejhuɨy pɨn tɨ yajnïbɨcy Juan.
\p Chi Jesús ymɨnañ:
\p ―Ɨɨch nañ jaduꞌn caꞌ nnigapxaꞌñɨch pɨn tɨ xycötujcmöyɨch co jëb nduñɨch huɨdibɨ ndumybɨch.
\c 12
\s Je naymɨdúnɨptɨjc jɨbɨcjäybɨ ajcxy yꞌijxpejt
\p
\v 1 Je huinꞌit xɨɨ Jesús jacmɨgapxy je mayjäy mɨɨd jɨhuimbit ayuc, ymɨnañ:
\p
―Ji yajpaady tüg yëydɨjc huɨdibɨ camuuxy tɨ cojy ma ycam, e tɨ coꞌaguemy je camuuxy cam, e yajꞌoyɨɨy tügɨ tang ma huinmɨcxaꞌñ je camuuxy.  Nañ jaduꞌn je yëydɨjc tüg poch yajpɨdɨ̈gy ma ycamuuxy yajꞌixɨ̈huaꞌñ co cuentꞌaty. Co anajty tɨ niꞌixɨ̈däy tɨ aꞌɨxɨ̈däy, chi ycamuuxy cam yejcy ajuyducy ma nijëjɨty tumbɨdɨjc. Chi chooñ viaje tumbɨ jɨguëgy it.  
\v 2 Je huinꞌit tiempo co yhuaadꞌajtnɨ je cosechɨ, chi je cogam quejxy tüg ytumbɨ jɨm ma jeꞌ ycam yajpaady, co hueen je tumbɨdɨjc yéjccɨxy je cosechɨ, jaduꞌn nej anajty tɨ ycapxytuñ mɨɨd jeꞌ ajcxy. 
\v 3 Chi je cam tumbɨdɨjc ajcxy majch je cogam yquexyöyp, chi huinhuojpy jɨjphuojpy ajcxy. Chi ajcxy quejxhuimbijty jaduꞌñyɨ, ni ti ajcxy camoy.
\v 4 Chi je cogam quejxy jadüg ytumbɨ ma je ycam yajpaady. Chi tumbɨdɨjc ajcxy tzaagäch je mɨmetzpɨ quexyöyp etz yajtzachɨy ajcxy ma ycohuajc,  chi ajcxy ooy ojy oyñinej. 
\v 5 Chi je cogam jacquejxy jadüg ytumbɨ e ajcxy tumbɨdɨjc yajꞌoꞌcy je mɨdugɨɨgpɨ quexyöpy. Chi je cogam jac tɨm quejxy jadyii ytumbɨ. Chi je tumbɨdɨjc ajcxy je cogam ytumbɨ huinhuojpɨ jɨjphuojpɨ nijëjɨty, e nijëjɨty ajcxy yajꞌoꞌcy. 
\p
\v 6 Je cogam ymɨɨd anajty tügpajc ymang huɨdibɨ anajty ooy tzocy jɨhuɨy. Jeꞌ oy quejxcogɨxɨ̈y ma je ycam yajpaady. Je cogam huinmay jaduꞌn co je tumbɨdɨjc ajcxy yajmɨjꞌadɨɨyb jeꞌ ymang. 
\v 7 Chi je tumbɨdɨjc ajcxy ñayñɨmaayɨ miñ xyɨpy: “Jada yëydɨjc je cogam jada ymang huɨdibɨ jëꞌadaanɨp je yteedy ypɨdägy. Tzoc yajꞌóꞌcɨm, e jaduꞌn je cam njëꞌájtɨm.”
\v 8 E jaduꞌn ajcxy majch je cogam ymang yajꞌögy ajcxy. Chi ajcxy yajpɨdzɨmy camjoty, e jɨbijptacy agajjɨxcɨꞌpy. 
\p
\v 9 Co Jesús jaduꞌn mɨydactay je jɨhuimbit ayuc, chi ymɨnañ:
\p
―¿Ti ytunamyb je cogam mɨɨd je tumbɨdɨjc ajcxy? Hueꞌ min cɨꞌm ma jeꞌ ycam, e yajꞌöctähuɨpy je tumbɨdɨjc ajcxy huɨdibɨ tundɨgoy. E yegɨpy pɨjctzoy jeꞌ ycam mɨɨd huingbɨ jäy ajcxy. 
\p
\v 10 ¿Nej caꞌnɨ miich ajcxy mgapxy yɨ Dios ñecy ma jaduꞌn ymɨnañ?
\q Je yëydɨjc huɨdibɨ je jäy ajcxy caꞌ anajty tzocy, Dios tɨ pɨdägy mɨjꞌaneꞌmbɨ. Tɨm jaduꞌn nipaady nej tzaa oyjatypɨ huɨdibɨ je pojtzpɨdɨjc caꞌ ajcxy yajtunaꞌñ, e jeꞌ oy tɨ yhuɨꞌmnɨ ma anajty yjaccopɨ́cyɨty. 
\q 
\v 11 Jada tung je Huindzɨn Dios tɨ tuñ, e ooy oy nꞌíjxɨm njäygɨdaacɨm.
\p
\v 12 E huinꞌit je judíojäy ajcxy ytungmɨɨdpɨ ooy jamadzaañ anajty Jesús, com ñejhuɨɨyb anajty ajcxy co Jesús ñigapxyii yɨꞌ ajcxy. Com tzɨgɨɨyb anajty ajcxy mɨɨd je mayjäy, chi ajcxy tɨm huinyöyducy, chi ñɨ́cxcɨxnɨ. 
\s Yajnidɨɨygɨxy pen jëbɨ cogüéjtɨn yajyecy o pen caꞌ
\p
\v 13 Jacꞌaxam je judíojäy ajcxy ytungmɨɨdpɨ quejxy ajcxy ma Jesús yajpaady mejtzpɨcy ixpɨcytɨjc. Tügpɨcy anajty ñaygomájtzɨgɨxy mɨɨd yɨ fariseos ajcxy, etz jadügpɨcy ma je rey Herodes. Hueꞌ anajty ajcxy huinmaꞌñ ixtaayb nej ajcxy ocxɨ̈huɨpy Jesús. 
\v 14 Jada mejtzpɨcypɨ ixpɨcytɨjc ñɨcxy ajcxy ma Jesús, e ymɨnañ ajcxy:
\p
―Huindzɨn, ɨɨch ajcxy nejhuɨɨyb co myajꞌixpɨjcy je tɨyꞌajt, caꞌ jäy mdzɨgɨ̈y, com caꞌ huinꞌijxpety myajꞌixpɨcy. Túꞌcɨy miich mduñ mɨɨd mɨc jäy, mɨɨd comeeñyjäy, etz mɨɨd ayoob jäy. Tudägy jäy ajcxy myajꞌixpɨcy jaduꞌn nej huaad ajcxy cuychɨnaaygɨxy Dios ytɨyꞌajt. Nejhuɨ̈huaamybɨch ajcxy nej  miich yajꞌixpɨjcpy je mayjäy. ¿Nej tundɨgooyɨm mɨɨd yɨ Dios ycötújcɨn co nmɨgüéjtɨm César, je romano jäy mɨjꞌaneꞌmbɨ, o caꞌjɨ? ¿Nej jëb nmɨgüéjtɨm, o caꞌjɨ?
\p
\v 15 Per Jesús ñejhuɨɨyb anajty ajcxy yjɨbɨc-huinmaꞌñ, e chi ajcxy nɨmay:
\p
―¿Naꞌamy co miich ajcxy xyjotꞌixy xyhuinmaꞌñꞌíxyɨch? Yajmiingɨx tüg meeñ jɨgɨx nꞌocꞌixɨpyɨch. 
\p
\v 16 Chi  ajcxy mɨmiiñ tüg meeñ e co Jesús ijxy je meeñ, chi ymɨnañ:
\p
―¿Pɨn yꞌahuanax etz pɨn yxɨɨ ijtp ma jada meeñ? 
\p
Chi ajcxy yꞌadzooy:
\p
―Hueꞌ yɨꞌ César.
\p
\v 17 Chi Jesús ymɨnañ:
\p
―Moꞌ je César huɨdibɨ yɨꞌ yjëꞌajtpy, e moꞌ Dios huɨdibɨ Dios yjëꞌajtpy.
\p 
Chi ajcxy ooy jɨhuɨy huinmay jaduꞌn nej anajty Jesús tɨ yꞌadzooy.
\s Yajnidɨɨygɨxy pen je tɨɨbɨ öccɨxy jugypɨgɨpy jadügꞌoc
\p
\v 18 Je huinꞌit tiempo nijëjɨty saduceos ajcxy ymiiñ ma Jesús. Yɨ saduceos ajcxy ymɨnaangɨxy co caꞌ pɨn yjugypɨgaꞌñ tɨɨbɨ yꞌoꞌccɨxy. 
\v 19 Chi je saduceos ajcxy Jesús nɨmay:
\p
―Huindzɨn, Moisés jayhuɨꞌmy je cötújcɨn co tüg yëydɨjc yꞌögy, e coꞌögy yhuɨꞌmy je ytöxyɨjc e caꞌnɨ ytöxyɨjc ungꞌixy. Pues copɨcy je coꞌögy ytöxyjäy ypɨgɨpy mɨɨd ñaꞌy yꞌuch yëydɨjcpɨ jɨgɨx jëbɨ je töxyjäy yꞌungꞌixɨpy huɨdibɨ huɨꞌmɨ̈huɨp jaduꞌn nej codɨjc cobɨdägy ma je yteedy yꞌajch ypɨdägy.  
\v 20 Pues jɨm ma tüg cajp anajty chɨnäy huɨxtujc yëydɨjc tüg queꞌx. Je ungoob ypɨjcy, e chi ixꞌoꞌcy ytöxyɨjc, e caꞌ ni tüg yꞌung yajhuɨꞌmy. 
\v 21 Je mɨmetzpɨ yëydɨjc ypɨjcy mɨɨd je coꞌögytöxyjäy, e nañ jaduꞌn ixꞌoꞌcy ytöxyɨjc e caꞌ ni tüg ung yajhuɨꞌmy. E nañ jaduꞌn je mɨdugɨɨgpɨ mɨɨd ypɨjcy je töxyjäy, e nañ jaduꞌn ixꞌoꞌcy je ytöxyɨjc, e caꞌ ni tüg yꞌung yajhuɨꞌmy. 
\v 22 E jaduꞌn oytuñyii yjadyii mɨɨd je töxyjäy co tɨ anajty mɨɨddzɨnayꞌabɨdzɨmdäy je nihuɨxtujcpɨ yëydɨjc tüg queꞌxpɨ. E je nihuɨxtujcpɨ ixꞌoꞌcy ajcxy je töxyjäy, e caꞌ ni tüg yꞌung ajcxy yajhuɨꞌmy. E chi je töxyjäy oy yꞌöcnɨ.
\v 23 E co anajty xɨɨ tiempo paaty, co anajty Dios yajjugypɨcy yɨ tɨɨbɨ ajcxy yꞌögy,  ¿huɨdibɨ jadaꞌ ajcxy nidüctɨ je yëydɨjc töxyɨjcꞌadaanɨp je töxyjäy? Com tɨ ajcxy jaduꞌn nihuɨxtujcpɨ mɨɨd tzɨnayꞌabɨdzɨmgɨxy. 
\p
\v 24 Chi Jesús je saduceos ajcxy nɨmay:
\p
―Miich ajcxy caꞌ mhuinjɨhuɨ̈y je tɨyꞌajt, com caꞌ mhuinjɨhuɨɨygɨxy Dios yꞌayuc ytɨyꞌajt, e com ni caꞌ mnejhuɨɨygɨxy je mɨcꞌajt huɨdibɨ Dios ymɨɨd. 
\v 25 Pues co anajty yjugypɨ́jccɨxy je jäy tɨɨbɨ yꞌóꞌccɨxy, chi caꞌ ajcxy ypɨgaꞌñ, e nañ jaduꞌn ni caꞌ ajcxy ñaymöhuɨɨyb yꞌung huen pɨ́jccɨxy. Hueꞌ ajcxy yjugyꞌadaangɨxy chɨnähuaangɨxy jiiby tzajpjoty, tɨm jaduꞌn nej je ángel ajcxy chɨnaaygɨxy yjugyꞌájtcɨxy. 
\v 26 Per je tɨyꞌajt co jäy ajcxy tɨɨbɨ yꞌoꞌccɨxy yjugypɨgaangɨxy, ¿nej caꞌnɨ mgapxynɨ Moisés ytɨyꞌajt ma anajty Dios ymɨgapxyii co je aay ujtz anajty chachtoy? Chi ymɨnañ: “Ɨɨch jeꞌ je Dios huɨdib Abraham, Isaac etz Jacob yDiosꞌajtpy.”
\v 27 Com yɨ Dios caꞌ yɨꞌ yDiosꞌaty ma yɨ öcpɨ ajcxy huɨdibɨ yꞌalma tɨ ycɨxy tɨ ytɨgoy. Yɨ Dios Diosꞌajtp yɨꞌ ma yɨ juugypɨ ajcxy. Paady miich ajcxy ooy mɨj mdundɨgooygɨxy co caꞌ mhuinjɨhuɨɨygɨxy Dios ytɨyꞌajt. 
\s Je anéꞌmɨn huɨdibɨ ooy nïgɨ ycopɨ́cyɨty 
\p
\v 28 Nañ jaduꞌn je huinꞌit tiempo nimiiñ Jesús tüg escriba. E yɨꞌ anajty yꞌamɨdoꞌijtpy co Jesús adzooy je jäy huɨdibɨ caꞌ mɨbɨcy co yɨ öcpɨ yjugypɨgɨpy ajcxy jadügꞌoc. Jada escriba ñejhuɨɨyb co Jesús ooy oy tɨ yꞌadzooy je saduceos ajcxy, paady yɨꞌ Jesús amɨdooyɨ:
\p
―¿Huɨdibɨ jeꞌ Dios yꞌanéꞌmɨn jacmɨjpɨ?
\p
\v 29 Chi Jesús yꞌadzooy:
\p
―Yɨ Dios ycötújcɨn huɨdibɨ jaccopɨcyɨp, yɨꞌ jeꞌ huɨdibɨ mɨnamb: “Mɨdoogɨx Israel jäy, je Huindzɨn Dios huɨdibɨ nDiosꞌájtɨm, yɨꞌ jeꞌ ajt nHuindzɨn Dios tügpajcpɨ. 
\v 30 Tzoc jɨhuɨꞌ etz yajmɨjꞌat mHuindzɨn Dios mɨɨd tügꞌócɨy mꞌaa mjot etz mɨɨd tügꞌócɨy mꞌalma, etz mɨɨd tügꞌócɨy mhuinmaꞌñ, etz mɨɨd tügꞌócɨy mmɨcꞌajt.” Jada jeꞌ je jaccopɨ́cyɨp anéꞌmɨn. 
\v 31 Je mɨmetzpɨ Dios ycötújcɨn jahueengɨ túꞌcɨy ñaybadyii mɨɨd je jayɨjpɨ, yɨꞌ huɨdibɨ jaduꞌn mɨnamb: “Tzojccɨx jɨhuɨɨygɨx yɨ mmɨgügtɨjc tɨm jaduꞌn nej mnaychogyii mnayjɨhuɨ̈yii cɨꞌm.” Jada metz Dios ycötújcɨn jaccopɨcy jacmɨcꞌajt mɨɨd caꞌydɨ jac huɨdibɨ cötújcɨn. 
\p
\v 32 Chi je escriba ymɨnañ:
\p
―Ooy oy tɨ mꞌadzooy. Janch tɨyꞌajt jaduꞌn nej miich mɨnaꞌñ, co ji yajpaady tügpajcpɨ Dios, e caꞌ ji jadüg Dios mɨcꞌajt mɨɨdpɨ. 
\v 33 E janch tɨyꞌajt co copɨcy nmɨjpɨdaacɨm nyajmɨjꞌájtɨm Dios cɨxyjot huinɨjot mɨɨd tügꞌócɨy ajt nhuinmaꞌñ, mɨɨd tügꞌócɨy ajt nꞌalma, etz mɨɨd tügꞌócɨy ajt nmɨcꞌajt. E copɨcy ndzójcɨm njɨhuɨɨyɨm nmɨgügtɨjc tɨm jaduꞌn nej naychójcɨm nayjɨhuɨɨyɨm cɨꞌm. Jactzoobatp jada caꞌydɨ co tügꞌócɨy yɨ huindzɨgɨꞌñ huɨdibɨ anajty yajnoꞌcpɨ mɨɨd Dios ycɨxpɨ.
\p
\v 34 Co Jesús ijxy jaduꞌn nej je escriba tɨydudägy anajty tɨ yꞌadzoyii, chi ymɨnañ:
\p
―Jahuenjaty miich mmɨbɨ́jcɨn ytɨgoyꞌityñɨ jaydëb mdɨgɨ̈huɨpy ma Dios yꞌaneꞌmy. 
\p
Co Jesús anajty jaduꞌn tɨ yꞌadzooy je escriba, chi caꞌ jac pɨn ti ayuc yjacyajꞌamɨdoohuɨ.
\s ¿Pɨn jeꞌ yꞌung je Cristo?
\p
\v 35 Jesús yajꞌixpɨjcpy anajty je mayjäy jiiby ma Dios ytɨjc, e ymɨnañ:
\p
―¿Naꞌamy co yɨ escribas ajcxy ymɨnaangɨxy co Cristo hueꞌ jeꞌ David yꞌap yꞌoc?
\v 36 Com je Espíritu Santo ymoy David jada ayuc huɨdibɨ jaybety ma je Salmo necy ma jaduꞌn ymɨnañ:
\q
Yɨ Huindzɨn Dios nɨmay ɨɨch nHuindzɨn: “Ɨñaꞌ ya aꞌoyꞌamy ma ɨɨch nmɨjc, ixtɨ coonɨ anajty miich mmɨdzip tɨ nmɨmadactäyɨch, jaduꞌn nipaadɨpy nej jɨhuɨ̈y tɨ nbɨdägyɨch miich mmɨdzip jaduꞌn nej tüg tɨnaybejt.” 
\m 
\v 37 ¿Per nej co yjaduꞌnɨty co jäy ajcxy ymɨnaangɨxy co je Cristo David jeꞌ yꞌap yꞌoc? ¿E David cɨꞌm ymɨnañ co je Cristo yɨꞌ yHuindzɨnꞌajtpy?
\p
Jotcujc anajty je mayjäy amɨdooꞌijtɨ Jesús yꞌayuc. 
\s Jesús caꞌp jäygɨdacɨ leyhuindzɨn ajcxy yhuinmaꞌñ
\p
\v 38 Jesús yajꞌixpɨjcpy anajty je mayjäy, e ymɨnañ: 
\p
―Naycuendꞌájtɨgɨx mɨɨd yɨ escribas ajcxy. Com yɨ escribas ajcxy ooy jotcujc co nayxójxɨgɨxy mɨɨd yhuit oyjatypɨ yoñjatypɨ. Ooy ajcxy tzocy co yajcapxpócxcɨxɨpy huindzɨgɨꞌñꞌamy mayjäyduum. 
\v 39 Yɨ escribas ooy ajcxy tzójccɨxy yɨ cödumbɨ ɨñaybejt ma je naymujctac, etz ooy ajcxy tzójccɨxy ɨñaybejt ma yɨ cömaybɨ jäy ɨñay ma jäy ajcxy yxɨɨduñ.
\v 40 Yɨ escribas ajcxy yajcɨjxtaayɨpy yɨ coꞌögy ytöxyjäy ypɨdägy mɨɨd ajcxy yꞌadzójcɨn. Yɨꞌ ajcxy ooy túngɨxy jecy tzajpcapxycapxɨɨ jɨgɨx ajcxy capxpaady idɨpy. Dios nïgɨ tzaachytunɨpy yɨ escribas ajcxy mɨɨd ypocy ycɨxpɨ, caꞌydɨ jac ni pɨn. 
\s Je ayoobɨ töxyjäy yꞌofrendɨ
\p
\v 41 Tüg xɨɨ anajty Jesús ɨñay jiiby tɨgoty ma Dios ytɨjc. Ɨñaayb anajty ma je limosna caja huinduu. Jesús yhuindɨɨcxyp anajty je jäy ajcxy huɨdibɨ meeñ pɨdaaccɨxp ma je ofrenda caja. E maycomeeñyjäy ooy ymeeñ pɨdaaccɨxy janch may. 
\v 42 Tɨm huinꞌítɨy yjaꞌty tüg coꞌögy töxyjäy janch ayoob pɨdacy metz piꞌc meeñyhuäcxy, huɨdibɨ caꞌ ooy choobaady.  
\v 43 Chi Jesús huoomujcy jeꞌ ydiscípulos, e nɨmay ajcxy:
\p
―Janch tɨyꞌajt jaduꞌn nɨmaaygɨxy co jada coꞌögy ytöxyjäy ayoob jacꞌanaxy jada tɨ pɨdägy ofrenda, caꞌydɨ jac ni pɨn. 
\v 44 Tügꞌócɨy comeeñydɨjc ajcxy ypɨdacpy ma yꞌofrenda yɨ meeñ huɨdibɨ yajconajxyp. Jadayaabɨ coꞌögytöxyjäy tɨ pɨdacy tügꞌócɨy huɨdibɨ anajty ymɨɨd, je meeñ tügꞌócɨy huɨdibɨ anajty ñigayamy yɨꞌ ymooyb Dios. 
\s Jesús ymɨnaꞌñ co Dios ytɨjc yhuindɨgooyɨpy
\c 13
\p
\v 1 Co Jesús ypɨdzɨmy ma Dios ytɨjc, chi nidügtɨ ydiscípulos ñɨmayɨ:
\p
―Huindzɨn, ix jada maychaa mɨjjatypɨ etz jada maybɨ tɨjc ooy yꞌoyꞌoydúñɨty.
\p
\v 2 Per Jesús yꞌadzooy, ymɨnañ:
\p
―Huindɨcx miich ajcxy jada maybɨ mɨjjaty ytɨjc. Minɨp tiempo mɨna tügꞌócɨy jada tɨjc nɨcxy yhuɨꞌmy taj xit, caꞌ ma tzaa macxy. Huindɨgoydähuɨp tügꞌócɨy. 
\s Je tɨyꞌajt ma caꞌnɨ naaxhuiñybɨ ycɨxaꞌñɨ ytɨgoyaꞌñɨ
\p
\v 3 Jesús mɨɨd ydiscípulos ajcxy ñɨcxy ma je cop huɨdibɨ xɨɨjɨp Olivos. Jɨm ajcxy coꞌijxnaxy je Dios ytɨjc. Ɨñaayb anajty Jesús jɨm copcɨ́xy co Pedro, Jacob, Juan etz Andrés ameech mɨgapxy Jesús, ymɨnaangɨxy: 
\p
\v 4 ―Tun mayꞌajt ɨɨch ajcxy yajnɨmaayg mɨna jada ytunaꞌñyii yjadaꞌñyii co huindɨgoydähuɨp Jerusalén cajp. ¿Ti ijxpejtꞌadam co anajty jadayaabɨ jaduꞌn ytunaꞌñyii yjadaꞌñyii?
\p
\v 5 Chi Jesús yꞌadzooy ajcxy jeꞌ ydiscípulos ymɨnañ:
\p
―Ix pɨnjaty xyhuinꞌɨɨngɨxy. 
\v 6 Ooy jäy may ymiinañ mɨɨd ɨɨch nxɨɨ. Ñaydijáanɨgɨxy co jeꞌ ajcxy jeꞌ je Cristo, ymɨnaꞌnaꞌñ ajcxy: “Ɨɨch jeꞌ je Cristo.” E ooy jäy may huinꞌɨɨnaangɨxy. 
\p
\v 7 Co miich ajcxy ayuc mmɨdohuɨpy co jäy chachchiptúngɨxy xɨɨ ya, caꞌ mdzɨgɨ́ɨygɨxɨp, com ooy ycopɨ́cyɨty co jada jaduꞌn jayɨjp ytunɨɨyb yjadɨɨyb. Caꞌ nan hueꞌ jeꞌ anajty tɨm cɨjxp tɨm tɨgooyb je xɨɨ je tiempo.
\v 8  Nayñibɨdɨ̈gɨɨb tüg naax cajp mɨɨd huingbɨ naax cajp, e gobierno mɨɨd huingbɨ gobierno. E minɨpy mɨc ujx canaagꞌit etz mɨj yuu mɨjpaꞌm xɨɨ ya. E jäy ajcxy ooy yhuänɨpy yjɨhuɨ̈huɨpy ycanaymɨjotcujcꞌájtɨgɨxɨpy. Jada tzaachypɨ ayoꞌn tzondacnɨ yɨꞌ anajty. 
\p
\v 9 Chi Jesús yjacmɨnañ:
\p
―Nayguendꞌájtɨgɨx miich ajcxy, com yɨ mmɨdzip ajcxy xymájtzcɨxɨp, e xycɨ̈yéjccɨxɨp ma tungmɨɨdpɨdɨjc, e xychachytúngɨxɨp xyhuójpcɨxɨp ma yɨ judíojäy 
ñaymujctac ajcxy.  Xyajnɨ́cxcɨxɨp mach ma rey etz ma gobernador ajcxy yhuinduu mɨɨd ɨɨch ycɨxpɨ com miich ajcxy xymɨbɨcyɨch. E miich ajcxy tɨyꞌajt myegɨpy mɨɨd ɨɨch ycɨxpɨ, ixtɨ ma rey ajcxy etz ma gobernador ajcxy yhuinduu.
\v 10 Caꞌ anajty xɨɨ tiempo paady mɨna ycɨxaꞌñ naaxhuiñybɨ,  chi ajcxy capxhuäcxtähuɨpy ɨɨch nꞌayuc huinduꞌmyb ñaaxhuiñ ma tügꞌócɨy naax cajp.
\v 11 Co jäy ajcxy xyajnɨ́cxɨp mach ma codungdɨjc co xytɨydúngɨxɨpy, chi caꞌ ni nej mjotꞌadɨɨyb, ni caꞌ mhuinmayɨpy nej mꞌadzóogɨxɨpy. Mgápxcɨxɨpy je ayuc huɨdibɨ Dios xymóoygɨxɨpy, com je ayuc huɨdibɨ mgápxcɨxɨp, caꞌ nan miich jeꞌ anajty ajcxy mꞌayuc. Hueꞌ jeꞌ je Espíritu Santo xymóoygɨxɨpy capxy ayuc.
\v 12 Yëydɨjc ajcxy ycɨ̈yegamyb ma tungmɨɨdpɨ ycɨꞌm yꞌuch ajcxy co huen yajꞌögyii. E nañ jaduꞌn je ungdeedy ycɨ̈yegamy ycɨꞌm yꞌung ajcxy ma tungmɨɨdpɨ. Nañ jaduꞌn yɨꞌ yꞌung ajcxy cɨ̈yegɨpy ycɨꞌmdeedy co huen yajꞌögyii. 
\v 13 May naaxhuiñjäy caꞌ xychogɨpy xyjɨhuɨ̈huɨpy miich ajcxy mɨɨd ɨɨch ycɨxpɨ. Pen miich ajcxy mmɨctɨnaayb ma mmɨbɨ́jcɨn, ypaadɨp miich ajcxy mꞌalma nïdzoocɨn. 
\p
\v 14 Chi Jesús yjacmɨnañ:
\p
―Co anajty mꞌíjxcɨxy je huɨdibɨ Daniel ñimɨydac jecyꞌajty, co pɨnjaty jɨbɨc-huinmaꞌñ tumb ma caꞌ ypadyii ma Dios ytɨjc, huɨdibɨ ooy ycodzɨgɨ̈jɨty. Miich ajcxy huɨdibɨ tzɨnaayb jɨm Judea, co jaduꞌn mꞌíjxcɨxɨpy, chi nɨcx mgueectzooccɨx ma tungop. 
\v 15 Yɨ jäy ajcxy huɨdibɨ yajpatp ma ytɨjcnïcxy caꞌ ñɨ́cxɨty tɨgoty ma ytɨjc. E ni ti jiiby cayajpɨdzɨmɨpy. 
\v 16 Yɨ jäy ajcxy huɨdibɨ yajpatp camjoty, caꞌ ajcxy nihuimbidɨpy jeꞌ yjocxy huit huɨdibɨ ymɨɨd. 
\v 17 Huinꞌit xɨɨ huinꞌit tiempo ayoꞌn padaꞌñ je töxyjäy huɨdibɨ anajty tɨ yꞌungtzɨmɨ̈gy, e nañ jaduꞌn yɨꞌ ajcxy huɨdib mɨɨd yꞌung maꞌxung yajtzïtzp.
\v 18 Mayꞌajt ajcxy mbɨjctzoohuɨpy ma Dios, co jada jaduꞌmbɨ ayoꞌn caꞌ ytunɨɨyb yjadɨɨyb ma anajty ytɨɨch tiémpɨty. 
\v 19 Yɨ jaduꞌmbɨ xɨɨ tiempo jäy ajcxy ayoꞌn tzaachypɨ mɨnaxɨpy yajnaxɨpy. Ni camɨnaaxɨɨ jäy jaduꞌn tzaachypɨ mɨjcajee tɨ mɨnaxy tɨ yajnaxy maabɨ Dios cojy naaxhuiñybɨ ogaꞌn, ixtɨ chambaad. E camɨnaxɨɨ jadügꞌoc ycajadɨɨyb jaduꞌn.
\v 20 Pen caꞌ Dios capxꞌadugaꞌñ yɨjiibɨ ayoꞌn xɨɨ ayoꞌn tiempo, caꞌ ni pɨn chögɨpy. Per Dios ycapxꞌadugamyb yɨjiibɨ ayoꞌn tiempo mɨɨd je mɨbɨjcpɨdɨjc ycɨxpɨ huɨdibɨ Dios tɨ huinꞌixy. 
\p
\v 21 Co yɨ jaduꞌmbɨ xɨɨ tiempo anajty ymiiñ, caꞌ mmɨbɨgɨpy, pen ji pɨnjaty xyñɨmaaygɨxy: “Ijxcɨx, cha yajpaady je Cristo”, o “jɨmꞌamy yajpaady je Cristo.”
Caꞌ mmɨbɨ́jccɨxɨpy jäy yꞌayuc. 
\v 22 Minɨp jäy ajcxy huɨdibɨ ñayyajnaxáanɨgɨxy nej Cristo, e ymɨnáangɨxɨpy co capxhuäcxy ajcxy Dios yꞌayuc, e caꞌ yjánchɨty. Ytunɨpy ajcxy mɨj huinmaꞌñ etz mɨjpɨ ijxpejt, ixtɨ jahuinꞌɨɨnaꞌñ je mayjäy ajcxy huɨdibɨ Dios tɨ yhuinꞌixyii. 
\v 23 Nayquendꞌájtɨgɨx mɨɨd yɨ jaduꞌmbɨ jäy ajcxy, com jayɨjp ɨɨch miich ajcxy yɨꞌ tɨ nyajmɨɨdmɨydägy.
\s Nej jadaꞌ je Dios yꞌung yminɨpy jadügꞌoc
\p 
\v 24 Chi Jesús yjacmɨnañ:
\p
―Co anajty yɨ jaduꞌmbɨ ayoꞌn tiempo tɨ ñaxy, ycoodzɨ̈huaꞌñ etz je poꞌ caꞌ yꞌanaꞌñ.
\v 25 Maymadzaꞌ ycähuɨp, e nañ yücxɨp huɨdijaty mɨcꞌajt mɨɨd tzajpjoty. 
\v 26 Je huinꞌit xɨɨ je huinꞌit  tiempo co jaduꞌn anajty ytunyii yjadyii, huinꞌit ajcxy mꞌixɨpy, ɨɨch je jäy huɨdibɨ tzoon tzajpjoty, co ɨɨch anajty nmiiñɨch jocjoty mɨɨd tügꞌócɨy nmɨcꞌajt nꞌoyꞌajtɨch. 
\v 27 Co jaduꞌn anajty nmiiñɨch, chi mɨcꞌamy nguexɨpyɨch ɨɨch nꞌángeles ajcxy ma xɨɨ ypɨdzɨmy, ma xɨɨ ycɨdägy, ma jɨɨmboj ypɨdzɨmy etz ma tɨchpoj ypɨdzɨmy. Nꞌángeles ajcxy yajmugaꞌñ tügꞌócɨy ɨɨch njäy, huɨdibɨ tɨ nhuinꞌixyɨch, xɨm yam ma ajcxy yajpaady ya naaxhuiñ, etz jiiby tzajpjoty. 
\p
\v 28 Chi Jesús yjacmɨnañ:
\p
―Jëb miich ajcxy tɨyꞌajt mbɨgɨpy ma yɨ higuerɨ jaduꞌn nej je xɨɨ je tiempo mimb cɨdaacnɨ. Co je hɨguerɨ jadügꞌoc ñïhuamɨ̈y, chi miich ajcxy mnejhuɨ̈y co tɨ yhuingonɨ mɨna ypottɨgɨɨyñɨ. 
\v 29 Nañ tɨm jaduꞌn co mꞌixɨpy tunɨɨyb yjadɨɨyb tügꞌócɨy ijxpejt nej tɨ nnɨmaaygɨxy, chi mnejhuɨ̈huɨp co tɨ yhuingonɨ je tiempo mɨna nhuimbidɨpyɨch jadügꞌoc ya naaxhuiñybɨ. 
\v 30 Janch ɨɨch miich ajcxy nɨmäy co jada huɨdibɨ tɨ nnimɨydacyɨch tunɨɨb jadɨɨb caꞌnɨ anajty yꞌöctay je jäy ajcxy huɨdibɨ jacjugyꞌajtp jadachambɨ xɨɨ jadachambɨ tiempo. 
\v 31 Je tzajp etz je naaxhuiñybɨ cɨxɨpy tɨgoyɨpy. Ɨɨch nꞌayuc huɨdibɨ ngapxyɨch, caꞌ ycɨxɨpy ytɨgoyɨpy ni camɨnaxɨɨ.  
\v 32 Caꞌ ni pɨn nejhuɨ̈y je xɨɨ je tiempo mɨna ytunaꞌñyii yjadaꞌñyii jaduꞌn nej tɨ ɨɨch miich ajcxy nnɨmaaygɨxy. Ni je ángeles ajcxy jiiby tzajpjoty caꞌ nejhuɨɨygɨxy, nañ ni ɨɨch, Dios yꞌungꞌ, caꞌ nejhuɨ̈yɨch. Jëyɨ Dios Teedy tügpajc nejhuɨ̈y. 
\p
\v 33 Niꞌixɨꞌ ahuíjxcɨx. Mɨbɨjctzoogɨx Dios jabom jabom, com caꞌ mnejhuɨɨygɨxy mɨna anajty ytunaꞌñyii yjadaꞌñyii yɨ­ huɨdibɨ tɨ nyajnɨmaaygɨxy. 
\v 34 Yɨ xɨɨ yɨ tiempo huɨdibɨ minɨp jaduꞌn nipaady nej tüg comeeñyjäy huɨdibɨ ñɨcxaꞌñ ma tüg it lugar huɨdibɨ jɨgüegy yajpatp. Jayɨjp caꞌnɨ anajty chooñ, chi yajnïbɨjcy je ytumbɨ ajcxy nidüg nidüg jeꞌ ytung. E nɨmay jeꞌ ytumbɨ huɨdibɨ cuendꞌajtp je tɨjcꞌaguu co huen niꞌixɨꞌ yꞌidɨpy ma tɨjc aguu.
\v 35 Niꞌixɨꞌ mꞌidɨpy miich ajcxy. Com caꞌ mnejhuɨɨygɨxy mɨna je codɨjc yhuimbidaꞌñ ma ytɨjc, pen namgodzɨ̈y, o mɨj coodz, o moñɨ, o ma anajty tɨ yxɨɨmɨɨyñɨ. 
\v 36 Caꞌ jécyɨty co yjädɨpy tɨmetiinɨ, e xyajyöybéjtcɨxɨpy anajty mdzachmaagɨxy. 
\v 37 Yɨ huɨdibɨ ɨɨch miich ajcxy tɨ nyajnɨmaaygɨxy, nañ jaduꞌn nɨmäyɨch tügꞌócɨy jäy co huen ajcxy nidügꞌócɨy ahuíjxcɨxɨp niꞌixɨꞌ je xɨɨ je tiempo mɨna nhuimbidɨpɨch jadügꞌoc ya naaxhuiñ.
\c 14
\s Xicmujccɨxy capxmujccɨxy co Jesús madzaangɨxy 
\p
\v 1 Tɨgoyꞌijtnɨ anajty mejtz xɨɨ co judíojäy ajcxy nixɨɨdunaꞌñ je pascua xɨɨ, mɨna ajcxy tzajcaagy cay huɨdibɨ caꞌ levadura mɨɨdɨty. Je judío teedy ajcxy huɨdibɨ jacmɨjtungmɨɨd etz je escribas ajcxy huinmaꞌñꞌixtaaygɨxy nej jëb ameech májtzcɨxɨpy Jesús, e  yajꞌögaangɨxy, caꞌydɨ je mayjäy nejhuɨ̈y. 
\v 2 Chi ajcxy ñayñɨmayɨ miñ xyɨpy:
\p
―Caꞌ yꞌóyɨty co nmájtzɨm Jesús xɨɨjoty. Com caꞌ yjécyɨty co je mayjäy yjotmätcottähuɨpy, e ytɨgɨ̈huɨp huambɨ jɨhuɨɨyb ajcxy. 
\s Tüg töxyjäy pɨdacy aceite ma Jesús ycohuajc
\p
\v 3 E Jesús jɨm anajty yajpaady jɨm Betania. Hueꞌ Jesús anajty yajpaady ma Simón ytɨjc, je Simón huɨdibɨ anajty ymɨɨd nïbüdz paꞌm. Jesús ɨñaayb anajty ma caydac co ymiiñ tüg töxyjäy mɨɨd tüg tzaadüdz quiig ujtz mɨɨd perfume huɨdibɨ ooy oy yxuugy. Jada perfume ooy anajty chóohuɨty. Chi je töxyjäy yajꞌahuäch je quiig, e yajcöyogɨy Jesús je perfume huɨdibɨ ooy oy yxuugy.
\v 4 E nijëjɨty jäy ajcxy huɨdibɨ anajty jɨm, caꞌ anajty ajcxy yjotcújcɨty mɨɨd huɨdibɨ je töxyjäy tɨ tuñ, e ñayñɨmayɨ ajcxy miñ xyɨpy: 
\p
―¿Nej jada co ocyajꞌayoonɨ yɨ perfume huɨdibɨ ooy oy yxuugy?
\v 5 Jacꞌoy co ixyipy yajtoogy yɨ perfume tugɨɨg mɨgoꞌpx peexy, jɨgɨx yajpubedɨpy ayoobtɨjc.
\p
E caꞌ jaduꞌn ajcxy tɨm jäygɨdacy nej je töxyjäy ytuuñ mɨɨd Jesús, chi ixꞌojy ajcxy je töxyjäy ayoob. 
\p
\v 6 Chi Jesús ymɨnañ:
\p
―Ixmajtzcɨx jada töxyjäy. ¿Nej co mꞌamayɨɨygɨxy? Yɨ huɨdibɨ tɨ tuñ mɨɨd ɨɨch, ooy yɨꞌ  yꞌóyɨty. 
\v 7 Je ayoobtɨjc caꞌ ytɨgoyꞌidɨpy ma miich ajcxy nimɨna. Huen huɨdibɨ xɨɨ huen huɨdibɨ tiempo jëb mbubedɨp  ajcxy ayoobtɨjc. Per ɨɨch caꞌ nꞌidaꞌñɨch ya jecy mɨɨd miich ajcxy. 
\v 8 Jada töxyjäy tɨ tuñ mɨɨd ɨɨch jaduꞌn nej tɨ ymadägy. Yɨꞌ tɨ pɨdägy ma ɨɨch nninïcx perfume huɨdibɨ ooy oy yxuugy. Yɨꞌ jɨjpꞌijxpy mɨna naaxtɨgɨ̈huaꞌñɨch. 
\v 9 Janch ɨɨch miich ajcxy nɨmaaygɨxy co huen ymaꞌámyɨty ya naaxhuiñ ma anajty yajꞌɨɨhuäcxy yajcapxhuäcxy jada ayuc jada tɨyꞌajt huɨdibɨ nïdzoocɨn mɨɨd, yajnimɨydägɨpy huɨdi jada töxyjäy tɨ tuñ, jɨgɨx capxpaady yꞌidɨpy.   
\s Judas cɨ̈yecy yɨ Jesús ma ymɨdzɨp
\p
\v 10 Huinꞌit tiempo je Judas Iscariote, nidüg je nimajmetzpɨ huɨdibɨ Jesús anajty tɨ huinꞌixy, oy mɨɨd ñaygapxyii je teedy mɨjtungmɨɨdpɨ nej jëb cɨ̈yejcy Jesús ma yɨ teedy ajcxy. 
\v 11 Co je teedy mɨjtungmɨɨdpɨ ajcxy jaduꞌn mɨdoy, co je Judas cɨ̈yegaꞌñ Jesús ma yɨꞌ ajcxy, chi ajcxy ooy yjotcugɨɨy. Chi ajcxy Judas meeñ yajhuinhuanɨɨy. Chi Judas yhuinmaꞌñꞌixtay nej jëb occɨ̈yecy Jesús ma yɨꞌ ajcxy. 
\s Co Jesús yꞌadzuꞌajty pascua xɨɨjoty 
\p
\v 12 Chi paty je mɨj xɨɨ mɨna je xɨɨꞌajtpɨdɨjc tzajcaagy cay huɨdibɨ caꞌp levadura mɨɨdɨty, e yajꞌöccɨxy je cöbixy huɨdibɨ ajcxy yajhuindzɨgɨɨyb anajty Dios. Chi ydiscípulos ajcxy yꞌamɨdooy Jesús:
\p
―¿Maꞌamy mdzocy co niꞌixɨɨyɨm je pascua xɨɨ adzuꞌájtɨn?
\p
\v 13 Chi Jesús quejxy metz ydiscípulos ajcxy cajpjoty, chi nɨmay:
\p
―Jɨm mɨɨd mnaybadɨɨyb tüg yëydɨjc huɨdibɨ nɨɨ tzɨmnɨcxp ma tüg majt. Miich ajcxy mbanɨcxɨɨyb je yëydɨjc.
\v 14 Mbanɨ́cxɨpy ajcxy je yëydɨjc, ixtɨ coon mbajädɨpy ma ytɨjc. E miich ajcxy mnɨmähuɨpy je codɨjc: “Je Huindzɨn Jesús ñejhuɨ̈huam ma miich mɨɨdɨty tüg cuarto ma je Huindzɨn Jesús mɨɨd ydiscípulos ajcxy jëb caaygɨxy yɨ pascua xɨɨ adzuꞌájtɨn.”
\v 15 Je codɨjc cɨꞌm xyajniꞌixɨ́ɨygɨxyɨp tüg cuarto mɨjpɨ ma je mɨmetz piso huɨdibɨ tɨ yajniꞌixɨ̈y. Ma yɨjɨmbɨ cuarto miich ajcxy mniꞌixɨ̈huɨpy yɨ pascua xɨɨ adzuꞌájtɨn. 
\p
\v 16 Chi je metz Jesús ydiscípulos ajcxy tüyöychooñ. Co ajcxy yjaꞌty cajpjoty, chi ajcxy paty je cuarto, tɨm jaduꞌn nej Jesús jayɨjp ymɨnañ. E jɨm ajcxy niꞌixɨ̈y
je pascua xɨɨ adzuꞌɨ̈bɨ. 
\p
\v 17 Nam coodzɨɨyñɨ anajty co Jesús yjaꞌty ma je cuarto mɨɨd jacjadyii ydiscípulos ajcxy. 
\v 18 Co anajty jɨm ycaaygɨxy ma je caydac, chi Jesús ymɨnañ:
\p
―Janch ɨɨch miich ajcxy nɨmay co nidüg miich ajcxy huɨdibɨ cham caayb mɨɨd ɨɨch, xycɨ̈yegaambɨch ma nmɨdzípɨch. 
\p
\v 19 Co je Jesús ydiscípulos jaduꞌn mɨdooy, chi ooy ytɨgɨɨy tajpɨ maybɨ ajcxy, e ñayꞌamɨdóohuɨgɨxy miñ xyɨpy, e tüg ymɨnañ:
\p
―¿Nej ɨɨch jadaꞌjɨ?
\p
E jadüg ymɨnañ:
\p
―¿Nej ɨɨch jadaꞌjɨ? 
\p
\v 20 Chi Jesús ymɨnañ:
\p
―Yɨꞌ yɨꞌ nidügtɨ yɨ nimajmetzp huɨdibɨ tocxmujcp mɨɨd ɨɨch ma tügpɨ texy. 
\v 21 Pues janch ɨɨch jeꞌ, je jäy huɨdibɨ tzoon tzajpjoty, nbadaamybɨch tzaachypɨ ayoꞌn jaduꞌn nej yjaybétyɨty ma yɨ Dios ñecy. Per mɨj ayoꞌn padaꞌñ je jäy huɨdibɨ xycɨ̈yegaamɨch ma ɨɨch nmɨdzip. Jacꞌoy co caꞌ ycadɨmmaꞌxungꞌajty jada yëydɨjc. 
\p
\v 22 Caayb ajcxy anajty, co Jesús conɨ̈gy tüg tzajcaagy, e jayɨjp yajnajx Dioscojuyip ma Dios, e chi tujc-huäcxy je tzajcaagy, moy jeꞌ ydiscípulos ajcxy. E co Jesús jaduꞌn tuñ, chi ymɨnañ:
\p
―Caaygɨx jada tzajcaagy. Jada tzajcaagy ɨɨch jada nninïcx. 
\p
\v 23 Chi Jesús conɨ̈gy je ügy vaso, e co Dioscojuyip yajnajxy, chi moyday ajcxy je ügy, e nidügꞌócɨy ajcxy uucy je ügy. 
\v 24 Chi Jesús ymɨnañ:
\p
―Jada ügy ɨɨch nnɨꞌpyꞌajtpy huɨdibɨ temamb yogamb. Jeꞌ jada jemybɨ Dios ycötújcɨn huɨdibɨ Dios yejc mɨɨd jäy ajcxy ycɨxpɨ. 
\v 25 Janch tɨyꞌajt jaduꞌn nej ɨɨch miich ajcxy nimaaygɨxy, co caꞌ jadügꞌoc nꞌügaꞌñɨch vino nɨɨ, ixtɨ coonɨ anajty njädyɨch tzajpjoty ma yɨ Dios yꞌaneꞌmy.
\s Jesús capxpɨdzɨmy co Pedro ymɨnaꞌnaꞌñ co caꞌ yꞌixyꞌadyii
\p
\v 26 E co Jesús etz ydiscípulos ajcxy ɨɨy tüg himno, chi ñɨcxy ajcxy ma je cop huɨdibɨ xɨɨjɨp Olivos. 
\v 27 Chi Jesús ymɨnañ:
\p
―Cham coodz xycöguëgaambɨch miich ajcxy, com jaybety jaduꞌn ma Dios ñecy ma jaduꞌn ymɨnañ: “Nyajꞌögaamybɨch je cöbixy cuendꞌajtpɨ, e huinꞌit je cöbixy queeg-huäcxtähuɨp.”
\v 28 Per co ɨɨch anajty njugypɨ́cyɨch jadügꞌoc, co ɨɨch anajty tɨ nꞌögyɨch, nɨ́cxɨbɨch jɨm Galilea jacjayɨjp, caꞌydɨ miich ajcxy.
\p
\v 29 Chi Pedro Jesús nɨmaayɨ:
\p
―Oy ixyipy yɨ jacjadyii miich mdiscípulos ajcxy xycöguectäy, per ɨɨch caꞌ miich ngöguëgaꞌñ.
\p
\v 30 Per Jesús nɨmay Pedro:
\p
―Janch tɨyꞌajt jaduꞌn nej yam nɨmäy, jadachambɨ coodz ma caꞌnɨ anajty tzeyyaxɨ̈gy mejtzꞌoc miich xycoyüdzaꞌñɨch tugɨɨgꞌoc, mɨnaꞌnaꞌñ co miich caꞌ xyꞌixyꞌadyiijɨch. 
\p
\v 31 E Pedro caꞌ anajty cöbɨgaꞌñ nej Jesús ym­ɨnañ, chi mɨctägy mɨnañ:
\p
―Caꞌ ɨɨch miich ngoyüdzaꞌñ, oy ixyipy ndɨmꞌoꞌcɨch quipxy mɨɨd miich. 
\p
E nañ actɨm jaduꞌn jacjadyii Jesús ydiscípulos ajcxy ymɨnañ nej Pedro tɨ ymɨnañ.
\s Jesús mɨbɨjctzoy Dios jɨm Getsemaní
\p
\v 32 Jesús mɨɨd ydiscípulos ajcxy oyjaꞌty ma tüg it huɨdibɨ xɨ́ɨjɨp Getsemaní, chi Jesús je ydiscípulos ajcxy nɨmay:
\p
―Ɨñaꞌ miich ajcxy ya, namɨ nꞌocnɨcxyɨch jɨmꞌamy Dios mɨbɨjctzoob. 
\p
\v 33 Chi Jesús mɨɨd nɨcxy jëdaꞌajty Pedro, Jacobo etz Juan ma tüg it ahuingujc. Chi Jesús ytɨgɨɨy tajpɨ maybɨ jɨhuɨɨy jotmay.
\v 34 Chi Jesús ymɨnañ:
\p
―Njɨhuɨɨybɨch tüg jotmay nej nꞌögaꞌñɨch. Huɨ́ꞌmgɨx miich ajcxy ya etz juugy mꞌíjtcɨxɨpy, caꞌ mmáagɨxɨpy.
\p 
\v 35 Chi Jesús ñɨcxy jacꞌamɨjcɨꞌm, Dios mɨbɨjctzoy, e mayꞌajt pɨjctzoy co ixyipy caꞌ mɨnaxy yajnaxy je tzaachypɨ huɨdi anajty ypadamy je huinꞌit hora. 
\v 36 E Jesús anajty Dios mɨbɨjctzoy ymɨnaꞌñ:
\p
―Dios, mɨɨd miich caꞌ ni ti chípɨty. Pɨ́jcɨgɨch jadayaabɨ tzaachypɨ ayoꞌn, per caꞌ yjadúꞌnɨty nej ɨɨch ndzójcɨn, huen tuñyii jaduꞌn nej miich mdzójcɨn.
\p
\v 37 Co Jesús nihuimbijty Pedro, Juan, etz Jacobo, chi oy ajcxy paady tɨ anajty ymɨꞌóꞌccɨxy. Chi Jesús Pedro nɨmay:
\p
―Simón, ¿nej tɨ mmɨꞌögy? ¿Nej caꞌ mmadägaꞌñ mꞌidɨpy juugy tüg hora?
\v 38 Jugyꞌíjtcɨx, e mɨbɨjctzoogɨx Dios caꞌydɨ jɨbɨctuuyb mdɨgɨɨygɨxy. Janch tɨyꞌajt co jotjoty ooy mnijotꞌájtcɨxy mdunaangɨxy yɨ oybɨ. Per yɨ mninïcx oy amaayɨty.
\p
\v 39 Chi Jesús jadügꞌoc huinhuäctuuty jeꞌ ydiscípulos ajcxy, e jadügꞌoc ñɨcxy Dios mɨbɨjctzoob.  Mayꞌajt pɨjctzoy tɨm jaduꞌn nej je jayɨjpꞌatypɨ anajty tɨ ymɨnaꞌñ.
\v 40 Chi Jesús yhuimbijty ma anajty ajcxy ydiscípulos yajpaady, e jadügꞌoc oy pátcɨxy tɨ anajty ymɨꞌöccɨxy, com caꞌ ajcxy mɨmadägy mähuɨɨ, e ni caꞌ ajcxy jajty nej adzohuɨpy Jesús. 
\v 41 Mɨdugɨɨgꞌoc Jesús ñɨcxy ma jeꞌ ydiscípulos ajcxy, e ymɨnañ:
\p
―¿Nej ya mjacmáagɨxp mjacpoocxcɨxp? Maagɨx poocxcɨx jadachambɨ. Tɨ mɨɨd jaduꞌñyɨ. Tɨ je tiempo huaadꞌájtnɨ mɨna ɨɨch, je jäy huɨdibɨ tzoon tzajpjoty, xycɨ̈yegɨpy ajcxy ma yɨ jɨbɨc jäydɨjc. 
\v 42 Maybɨdɨ̈gcɨx, tzoc jámɨm. Chi ymiiñ je jäy huɨdibɨ xycɨ̈yegaambɨch ma nmɨdzípɨch. 
\s Mach ajcxy Jesús yajnɨ́cxcɨxy
\p
\v 43 Capxp anajty Jesús, co Judas oyjäty ma Jesús yajpaady. Judas hueꞌ jeꞌ nidügtɨ je majmetzpɨ huɨdibɨ Jesús yhuinꞌijx. Judas mɨɨd miiñ mayjäy huɨdibɨ ajcxy mɨɨd pujx etz quipy. Je teedy mɨjtungmɨɨdpɨ, je escribas ajcxy, etz je mɨjjäydɨjc ajcxy tɨ anajty quexy je mayjäy huɨdibɨ anajty madzamb Jesús. 
\v 44 Judas, je huɨdibɨ anajty cɨ̈yegamb Jesús, hueꞌ anajty jayɨjp tɨ moy je mayjäy tüg ijxpejt huɨdibɨ mɨɨd jëb ajcxy ijxcabip Jesús. Jaduꞌn jayɨjp Judas ycapxytuñ mɨɨd yɨꞌ ajcxy, e ymɨnañ:
\p
―Je jäy huɨdibɨ anajty ndzücxypɨch, yɨꞌ jeꞌ anajty Jesús. Madzɨpy ajcxy, e myajnɨ́cxɨp miich ajcxy yajxon cuendꞌaty. 
\p
\v 45 Mɨcꞌamy co Judas oyjädy ma Jesús yajpaady, chi nimɨjhuaꞌcy, e nɨmay:
\p
―Huindzɨn, Huindzɨn.
\p
E co jaduꞌn ymɨnañ, chi Judas Jesús tzücxy. 
\v 46 Chi mɨcꞌamy je mayjäy Jesús mach, e yajnɨcxy ajcxy mach. 
\p
\v 47 Per nidügtɨ Jesús ydiscípulos juudy ypujxy ma ytɨjc, chi je teedy mɨjtungmɨɨdpɨ tüg ytumbɨ yajtzaachɨɨyɨ, quejtzpujxɨ tüg ytätzac. 
\v 48 Chi Jesús je mayjäy nɨmay:
\p
―¿Ti co miich ajcxy xyñimiiñɨch mɨɨd pujx etz quipy, jaduꞌn nej jɨhuɨ̈y ɨɨch tüg meetzpɨ?
\v 49 Jabom jabom nyajꞌixpɨjcyɨch jäy jiiby ma Dios ytɨjc ma miich ajcxy myajpaady, e ni caꞌ miich ajcxy xymajchɨch. Paady jaduꞌn ytunyii yjadyii jɨgɨx yɨꞌ yajcuydumb nej ity jaybety ma Dios ñecy. 
\p
\v 50 Chi jeꞌ ydiscípulos ajcxy yajhuɨꞌmy Jesús naydügpajc. Chi jeꞌ ajcxy yqueegy.
\s Je jäy mutzꞌanägnɨp huɨdibɨ quectzög
\p
\v 51 Per tüg yujcyeeg anäg huɨdibɨ anajty payöy Jesús nïmóchɨty anajty mɨɨd tüg sábana. Chi Jesús ymɨdzip ajcxy majch je yujcyeegpɨ.
\v 52 Chi je yujcyeegpɨ cɨ̈queegtuty je mayjäy, yajhuɨꞌmy ysábana, e yquecytzögy nïhuädz ixhuädz.
\s Jesús mɨj juntɨjoty
\p
\v 53 Chi ajcxy yajnɨcxy Jesús mach ma je teedy mɨjtungmɨɨdpɨ yajpaady. Chi mɨcꞌamy ñaymujcɨ tügꞌócɨy teedy ajcxy huɨdibɨ mɨjtungmɨɨdɨp, e tügꞌócɨy mɨjjäydɨjc, etz tügꞌócɨy escribas ajcxy. 
\v 54 Chi Pedro jɨguëgy anajty panɨcxy je mayjäy ajcxy ixtɨ oy yjaꞌty ma je teedy mɨjtungmɨɨdpɨ ytɨbaꞌ. E jɨm ixtacy quipxy mɨɨd policía ajcxy agujc, yxaamgɨxy anajty ma jɨɨnbaꞌ.
\p
\v 55 Je teedy ajcxy mɨjtungmɨɨdpɨ etz tügꞌócɨy je judíojäy ytungmɨɨdpɨ ajcxy yhuinmaꞌñꞌixtaaygɨxy nej ajcxy jëb Jesús yajpocycaꞌ mɨɨd ajcxy yxɨ̈huɨn, e jaduꞌn jëb mooygɨxy yɨ öcɨn. Per caꞌ ajcxy paady huinmaꞌñ.
\v 56 Mayjäy nïhuambejty Jesús mɨɨd anɨɨ, e caꞌ ajcxy yꞌayuc ytügɨy. 
\v 57 Nijëjɨty jäy ytɨnayɨ̈gy juntajoty, e nïhuambety ajcxy Jesús, ymɨnaangɨxy:
\p
\v 58 ―Ɨɨch ajcxy amɨdoꞌijt Jesús yꞌayuc tüg tecy, co jaduꞌn ymɨnañ: “Njidaamybɨch jada Dios ytɨjc huɨdibɨ jäy tɨ cójcɨxy, e codugɨɨg xɨɨ gojtɨgadzipɨch huingbɨ huɨdibɨ caꞌ jäy cojy.”
\p
\v 59 Per ni caꞌ ytügɨɨy ajcxy yꞌayuc nej ajcxy Jesús nïhuambejty, ac tɨgachjaty nidüg nidüg ymɨnañ ajcxy.
\p
\v 60 Chi je teedy huɨdibɨ je jacmɨjtungmɨɨd ytɨnayɨ̈gy juntajoty, chi yꞌamɨdooy Jesús e nɨmay:
\p
―Jesús, ¿caꞌ nej mꞌadzohuaꞌñyɨ? ¿Caꞌ mmɨdoy nej xychachxɨ̈gɨxy?
\p
\v 61 Per Jesús amoñ yꞌijty. Caꞌ ti ayuc adzohuimbijty. Chi je teedy jadügꞌoc mɨgapxy Jesús nɨmay:
\p
―¿Nej miich jeꞌ je Cristo, je Dios yꞌung?
\p
\v 62 Chi Jesús ymɨnañ:
\p
―Janch jaduꞌn, ɨɨch jeꞌ je Cristo, je jäy huɨdibɨ tzoon tzajpjoty, e miich ajcxy xyꞌixɨpɨch ɨñäyɨch ma je mɨjpɨ Dios ymɨjc aꞌoyꞌamy. Nañ jaduꞌn xyꞌixɨpyɨch miich ajcxy jocjoty co anajty nhuimbityɨch jadügꞌoc ya naaxhuiñ.
\p
\v 63 Chi je teedy huindzech huinhuocy ycɨꞌm yhuit, jeꞌ jeꞌ tɨyꞌájtɨp co caꞌ anajty yjotcújcɨty mɨɨd Jesús yꞌayuc, chi ymɨnañ:
\p
―¿Ti testigo njac-huaanɨm?
\v 64 Miich ajcxy cɨꞌm tɨ mmɨdoogɨxy yɨꞌ yꞌayuc, jaduꞌn nej ycapxtɨgoy mɨɨd Dios. ¿Nej miich ajcxy mɨnaangɨxy?
\p
Chi nidügꞌócɨy ajcxy ymɨnañ co janch jaduꞌn Jesús mɨj oy tɨ ycapxtɨgoy mɨɨd Dios ytɨyꞌajt, paady huaad mooygɨxy yɨ oꞌcɨn.
\p
\v 65 Chi nijëjɨty jäy yhuindzujɨ̈gy Jesús. Chi ajcxy huingoxodzɨy, cójxcɨxy, e chi ajcxy nɨmay:
\p
―Octɨygapx. ¿Pɨn tɨ xycojxy?
\p
E je policiatɨjc ajcxy cojxy Jesús ma yhuiñyjɨjp.
\s Pedro ycoyüch Jesús
\p
\v 66 Pedro tɨbäy anajty yꞌahuixy. Chi ñimɨjhuäcɨ tüg tumbɨ töxyjäybɨ huɨdibɨ anajty tumb ma je teedy ytɨjc. 
\v 67 Co je töxyjäy ijxpaty Pedro ɨñäy anajty jɨɨnbaꞌáy, yxaamb anajty. Chi huindɨcxpejty Pedro, e nɨmay:
\p
―Miich nañ mɨɨdhuɨdijtpy anajty je Jesús yɨ Nazaretpɨ.
\p
\v 68 Per Pedro caꞌ cöbɨjcy je töxyjäy yꞌayuc, e ymɨnañ:
\p
―Caꞌ nꞌixyꞌadyiijɨch jada Jesús. Ni caꞌ nhuinjɨhuɨ̈yɨch ti miich nimɨydacpy.
\p
E mɨcꞌamy Pedro ypɨdzɨmy jiiby, e tɨm huinꞌítɨy tüg tzeyñɨꞌaa oy yaaxɨ̈gy. 
\v 69 Chi jadügꞌoc je tumbɨ töxyjäybɨ huindɨcxpejty Pedro, e nɨmay je jäy ajcxy huɨdibɨ jɨm yajpatp huingon, e ymɨnañ:
\p
―Jada jeꞌ nidügtɨ huɨdi anajty mɨɨd huɨdity Jesús. 
\p
\v 70 Chi Pedro jadügꞌoc ymɨnañ co caꞌ ixꞌadyii. Co hueeñɨ, je jäy ajcxy jadügꞌoc Pedro nɨmay:
\p
―Janch co miich jeꞌ nidügtɨ ma Jesús yjäy miñ, Galileo jäy miich, com nmɨdooybɨch miich mꞌayuc nej Galileo jäy ycápxcɨxy. 
\p
\v 71 Co ajcxy jaduꞌn ymɨnañ, chi Pedro mɨctägy ñaygogapxɨ co caꞌ yɨꞌ mɨɨdhuɨdity Jesús, ymɨnañ:
\p
―Dios yꞌijxpy ñejhuɨɨyb co tɨyꞌajt ngapxyɨch, co caꞌ nꞌixyꞌadyiijɨch yɨ Jesús huɨdibɨ miich ajcxy mnigapxyp.
\p
\v 72 Co Pedro ycapxymaayɨ tɨm huinꞌitɨy tüg tzeyñɨꞌaa yaaxɨ̈gy mɨmejtzꞌocpɨ. Huinꞌit Pedro jäymetzcoody nej Jesús ñɨmäyii: “Cham coodz jayɨjp caꞌnɨ anajty tzeyñɨꞌaa yaaxɨ̈gy metzꞌoc, tɨ anajty miich mɨnaꞌñ tugɨɨgꞌoc co caꞌ xyꞌixꞌadyiijɨch.” Co Pedro jaduꞌn jäymejtzcoody Jesús yꞌayuc, chi tajy may ñayjɨhuɨɨyɨ, e ytɨgɨɨy yaaxpɨ.
\c 15
\s Jesús ma Pilato yhuinduu
\p
\v 1 Co yxɨmɨɨy, chi je teedy ajcxy huɨdibɨ mɨj tung mɨɨd, je mɨjjäydɨjc, je escribas ajcxy, etz tügꞌócɨy judíojäy huɨdibɨ mɨj tung mɨɨd yöymujctay ajcxy. Chi nidügꞌócɨy ajcxy yajnɨ́cxcɨxy Jesús cɨ̈xoch ma Pilato, je gobernador.
\v 2 Pilato Jesús yꞌamɨdooy, nɨmay:
\p
― ¿Nej miich reyꞌajtp ma yɨ judíojäy ajcxyɨ?
\p
Chi Jesús ymɨnañ:
\p
―Miich jaduꞌn mɨnamb.
\p
\v 3 Je judío teedy ajcxy huɨdibɨ mɨjtungmɨɨdpɨ mɨctägy tzachxɨ̈gɨxy Jesús mɨɨd canaagnax xɨ̈huɨn. 
\v 4 Chi Pilato jadügꞌoc Jesús yꞌamɨdooy, nɨmay:
\p
―¿Caꞌ nej mꞌadzohuaꞌñɨ? Ix nej yɨ mmɨdzip ajcxy xychachxɨ̈gɨxy.  
\p
\v 5 Chi Jesús caꞌ ni nej yꞌadzooy. E Pilato ooy chachhuinmayꞌahuɨdijty. 
\s Jesús yajmoy ysentencia co yꞌögɨpy
\p
\v 6 Com xɨɨjoty anajty, je gobernador Pilato najtzmadzɨɨy tüg machyjäy, je huɨdibɨ je mayjäy anajty ypɨjctzoogɨxyp.
\v 7 Pujxtɨjc ɨñaayb anajty jɨm Jerusalén tüg machyjäy huɨdibɨ anajty yxɨɨ Barrabás. Barrabás pujxtɨjc ɨñaayb anajty quipxy mɨɨd jacjadyii jäy huɨdibɨ anajty tɨ mɨdziptzoon je gobierno romano, e tɨ anajty yjäyyajꞌóꞌccɨxy. 
\v 8-9 Co anajty je may yxɨɨꞌajtpɨdɨjc mayꞌajt pɨjctzoogɨxy ma Pilato co najtzmadzɨ̈huɨp tüg machyjäy, chi Pilato ymɨnañ: 
\p
―¿Nej mdzojccɨxyp co nnajtzmadzɨ̈huɨbɨch je judíojäy ajcxy yrey?
\p
\v 10 Pilato ñejhuɨɨyb anajty co mañꞌajtɨngɨ́xy anajty ajcxy je teedy mɨjtungmɨɨdpɨ tɨ cɨ̈yejccɨxy Jesús. 
\v 11 Per co Pilato jaduꞌn ymɨnañ, chi je teedy ajcxy mɨjtungmɨɨdpɨ ooy ajcxy yajhuamgoty yajjɨhuɨygoty je mayjäy co huen je Pilato najtzmadzɨ̈y je Barrabás.
\v 12 Chi Pilato yꞌamɨdooy je mayjäy jadügꞌoc:
\p
―¿Nej miich ajcxy mdzocy ndunɨpyɨch mɨɨd jada yëydɨjc huɨdibɨ jäy ajcxy ytijpy co yreyꞌaty ma yɨ judíojäy ajcxy?
\p
\v 13 Chi je mayjäy mɨc ymɨnangottay:
\p
―Yajcruutzpet.
\p
\v 14 Chi Pilato ymɨnañ:
\p
―Per ¿ti yɨꞌ tɨ tundɨgoy?
\p
Huinꞌit je mayjäy nïgɨ mɨc ymɨnañ:
\p
―¡Yajcruutzpet!
\p
\v 15 Co jaduꞌn je mayjäy ajcxy mɨctägy ymɨnanday, chi Pilato anajty yajjotcujcꞌadaangɨxy je mayjäy, chi najtzmadzɨɨy je Barrabás. E co yajcɨ̈ꞌajttay yɨ Jesús, chi cɨ̈yejcnɨ co huen yajcruutzpedyii.
\p
\v 16 Chi je soldados ajcxy yajnɨcxy Jesús ma je agujctɨjc tɨbaꞌ, e jɨm ñaymujcɨ tügꞌócɨy soldados ajcxy huɨdibɨ yajpatp anajty jɨm Jerusalén.  
\v 17 Chi ajcxy yajnïjenɨɨy je Jesús tüg rey yhuit, color ucypɨ e yajcojenɨɨy ajcxy apy corona.
\v 18 Chi je soldados ajcxy ymɨnañ:
\p
―¡Viva jada judío rey!
\p
\v 19 Chi je soldados ajcxy huojpy Jesús ma ycohuajc mɨɨd paxy, e huindzuj jɨjptzujcɨxy ooy, e huingojxtɨnayꞌahuɨɨygɨxy janch ypaad nej jɨhuɨ̈y ooy huindzɨgɨɨygɨxy. 
\v 20 Co je soldados ajcxy nɨxiictay yajxiictay Jesús, chi ajcxy jeenɨ je yreyhuit color ucypɨ, e yajnïjenɨɨy ajcxy ycɨꞌm yhuit jadügꞌoc. Chi ajcxy Jesús mɨɨdcajppɨdzɨmy co anajty yajcruutzpedaangɨxy. 
\s Co Jesús yajcruutzpejtɨ
\p
\v 21 Tüꞌam ajcxy tüg jäy mɨɨdnaybatɨ, hueꞌ anajty yxɨɨ, Simón, ycogájpɨty jɨm Cirene, Alejandro etz Rufo jeꞌ anajty yteedy. Hueꞌ anajty choñ camjoty. Chi ajcxy adzip nɨmay Simón co huen jaccajpɨ Jesús ycruudz. 
\p
\v 22 Chi ajcxy yajnɨcxy Jesús ma tüg it lugar huɨdibɨ yxɨɨ Gólgota, je ayuc Gólgota jaduꞌn yhuimbɨdzɨmy oꞌcpɨ cohuajc.
\v 23 Chi ajcxy moy Jesús vino huen ügy tem huɨdity mɨɨd mirra tzoy. Per caꞌ Jesús cöbɨjcy je vino nɨɨ.
\v 24 Chi ajcxy yajcruutzpejty Jesús. E huinꞌit je soldados ajcxy suerte ijxy, co anajty ajcxy Jesús yhuit yajhuäcxaanɨ, ocꞌixaangɨxy pɨn anajty ocjëꞌájtɨp.
\p
\v 25 Petyxɨɨ anajty co ajcxy yajcruutzpejty Jesús.  
\v 26 Je ayuc huɨdibɨ ajcxy yjaay ma Jesús cruudz, jaduꞌn ymɨnañ:
\p
―Je judíojäy ajcxy yRey.
\v 27 Quipxy mɨɨd Jesús ajcxy yajcruutzpejty metz meetzpɨ. Tüg meetzpɨ ajcxy yajcruutzpejty aꞌoyꞌamy ma Jesús ymɨjc, e jadüg anajtyꞌamy. 
\v 28 Yajcuyduñ nej anajty jaybety miñ ma Dios ñecy, ma jaduꞌn ymɨnañ: “Yajꞌamɨchoomujc je Cristo mɨɨd je pocyjäy ajcxy.”
\p
\v 29-30 Je mayjäy huɨdibɨ ajcxy naxɨɨyb anajty ma Jesús yajpaady cruutzcɨ́xy, ooy anajty ajcxy ycöjɨgɨɨyñ, nɨxiicy yajxiicy ajcxy Jesús, ymɨnañ ajcxy:
\p
―Bah, miich huɨdibɨ Dios ytɨjc mjidaanɨp, e codugɨɨg xɨɨ huingbɨ myajpɨdɨ̈gaꞌñ, miich cɨꞌm cham naygohuaanɨ, e mɨnac cruutzcɨ́xy. 
\p
\v 31-32 Nañ jaduꞌn je teedy ajcxy mɨjtungmɨɨdpɨ etz je escribas ajcxy nɨxiicy yajxiicy ajcxy Jesús ñayñɨmayɨ miñ xyɨpy:
\p
―Jada Jesús tɨ cohuaꞌñ jacjadyii jäy, e caꞌ jaty nej cɨꞌm ñaygohuaꞌnɨɨyb. Pen janch, co jada Jesús yjëjɨty je Cristo huɨdibɨ reyꞌadamb ma yɨ judíojäy ajcxy, ymɨɨd ixyipy mɨcꞌajt jaydëb cɨꞌm ymɨnagɨpy cruutzcɨ́xy. Co jaduꞌn ixyipy nꞌíjxɨm co cɨꞌm tɨ ymɨnacy cruutzcɨ́xy, huinꞌit mɨbɨ́jcɨm co janch jada jëjɨty je Cristo huɨdibɨ reyꞌajtp ma yɨ Israel jäy.
\p
Nañ jaduꞌn je metz meetzpɨ ajcxy huɨdibɨ cruutzpejt quipxy mɨɨd Jesús nɨxiicy yajxiicy ajcxy je Jesús.
\s Co Jesús yꞌögy
\p
\v 33 Co ycujcxɨɨjɨɨy, chi ycoodzɨygɨday tügꞌócɨy naaxhuiñ. E jaduꞌn je naaxhuiñ yꞌijty coodz ixtɨ mɨnacyxɨɨ.
\v 34 Mɨnacyxɨɨ Jesús mɨc ymɨnañ mɨɨd aramaico ayuc:
\p
―Eloi, Eloi, ¿lama sabactani? ―yɨ jaduꞌmbɨ ayuc hueꞌ yhuimbɨdzɨmy: Tat Dios. Tat Dios. ¿Naꞌamy co tɨ xyꞌixꞌixyɨch?
\p
\v 35 Nijëjɨty jäy huɨdibɨ anajty jɨm yajpatp huingon ma Jesús, co mɨdoo jaduꞌn ajcxy Jesús yꞌayuc, chi ajcxy ymɨnañ:
\p
―Mɨdoogɨx, Elías yɨꞌ yaaxtaayb. 
\p
\v 36 Chi nidügtɨ ajcxy ninɨcxy Jesús poyɨ̈gy, tɨ anajty yajxoogy pixy mɨɨd vinonɨɨ taꞌmbɨ, e yajjɨjpxodzɨɨy je pixy ma tüg paxy, e jaduꞌn yajjaꞌty je vino nɨɨ taꞌmbɨ ma Jesús yꞌahuac, huen muucɨp je vino nɨɨ taꞌmbɨ. Co jaduꞌn tuñ, chi ymɨnañ:
\p
―Tzoc ocꞌahuíjxɨm pen mimb Elías, e miñ yajmɨnagyii ma yɨ cruudz.
\p
\v 37 Chi Jesús mɨc ycapxqueegy, chi yꞌoꞌcy. 
\v 38 Co Jesús yꞌoꞌcy, chi je mapxhuit ycɨɨtzhuaꞌcxy tɨnäꞌamy huɨdibɨ anajty mɨɨd yꞌadɨydútyɨty je Dios ycuarto ma je teedy mɨjtungmɨɨdpɨ ytɨgɨ̈y tüg tecypajc jɨmɨjt jɨmɨjt. 
\v 39 Je soldado huindzɨn huɨdibɨ anajty tɨnaayb ma Jesús yhuinduu, co jaduꞌn mɨdoy nej Jesús mɨc yaaxqueegy, e ijxy nej yꞌögy, chi ymɨnañ:
\p
―Janch co jadayaabɨ yëydɨjc anajty Dios ungꞌadyii.
\p
\v 40 Nañ jɨm anajty nijëjɨty töxyjäydɨjc ymɨjꞌíjxcɨxy jɨguëgy. Jɨm anajty yajpaady María Magdalena, etz je jadügpɨ María, Jacobo je mutzꞌanägnɨp ytaj, etz José ytaj. Nañ jɨm anajty yajpaady Salomé.
\v 41 Jadayaabɨ töxyjäy ajcxy mɨɨdhuɨdijt Jesús, e tɨ anajty pubéjtcɨxy taabɨ anajty Jesús yajpaady jɨm Galilea ñaaxjot. Nañ jaduꞌn anajty jɨm yajpaady jacnaagɨty töxyjäydɨjc ajcxy huɨdibɨ anajty tɨ ycoody jɨm Jerusalén quipxy mɨɨd Jesús.
\s Jesús yajnaaxtɨgɨ̈yii
\p
\v 42-43 Paady co chuꞌɨɨyñɨ hueꞌ anajty viernes mɨna judíojäy ñayyajpocyñïhuáatzɨgɨxy, jaydëb anajty amayꞌadaangɨxy je sábado xɨɨ je com jabom. Chi José huɨdibɨ anajty cogajp Arimatea yjotmɨctuñ, chi ytɨgɨɨy ma je gobernador Pilato, pɨjctzooy mayꞌajt co yajnaaxtɨgɨ̈huaanɨ Jesús ñinïcx. E hueꞌ jeꞌ José anajty tungmɨɨd ma yɨ judíojäy ajcxy. José yjɨjpꞌijxpy anajty mɨna Dios pɨdägaꞌñ yɨꞌ yꞌanéꞌmɨn ya naaxhuiñ. 
\v 44 Pilato ooy tzachhuinmay co Jesús tɨm mɨcꞌamy tɨ yꞌögy anajty, paady huoodzoy je soldado huindzɨn, e tɨyꞌajt pɨjctzoy pen janch co Jesús tɨ anajty yꞌögy. 
\v 45 Co je soldado huindzɨn tɨyꞌajt yejcy co Jesús tɨ anajty yꞌögy, chi nɨmay José co huen yajnaxtɨgɨ̈huɨpy Jesús. 
\v 46 Chi José juy poob huit, e co yajmɨnajcy Jesús ñinïcx, chi moꞌñ mɨɨd je poob huit, e chi pɨdacy ma tüg tzaajut huɨdibɨ anajty tɨ yajtzejtztüdy tɨ yajpadüdy ma tüg tzaahuingueetz. E chi yajꞌadujcy je öcpɨ jut mɨɨd tüg mɨj tzaa. 
\v 47 E je metzpɨ töxyjäy María Magdalena etz je jadügpɨ María huɨdibɨ José ytajꞌajtpy huindɨɨcxp anajty ajcxy co Jesús ñaaxtɨgɨɨy. 
\c 16
\s Jesús yjugypɨjcy jadügꞌoc
\p
\v 1 Com jabom jopy, domingo, chi je tugɨɨg töxyjäy ajcxy María Magdalena, María Jacobo ytaj etz Salomé juy ajcxy tzoy huɨdibɨ ooy oy xuugy, pɨdägaangɨxy anajty ma Jesús ñinïcx. 
\v 2 Je tugɨɨgpɨ töxyjäy chooñ domingo, semaan ixtɨgɨꞌ, tɨm jopyñɨ. Tɨ anajty ypɨdzɨmnɨ je xɨɨ co ajcxy oyjädy ma je öcpɨ jut. 
\v 3 Chi je tugɨɨgpɨ töxyjäy ajcxy nayñɨmaayɨ miñ xyɨpy:
\p
―¿Pɨn xyꞌocpubéjtɨm jɨgɨ̈huɨpy je mɨj tzaa huɨdibɨ mɨɨd agɨɨyɨty je öcpɨ jut?
\p
\v 4 Per co ajcxy ijxy je öcpɨ jut, chi ajcxy ijxy ahuingujc je mɨj tzaa anajty ytɨguejcnäy huɨdibɨ je öcpɨ jut anajty agɨɨydujcp.
\v 5 Chi ajcxy ytɨgɨɨy jutjoty. E chi ajcxy ijxy tüg yeegꞌanäg ɨñäy anajty aꞌoyꞌamy ma jeꞌ ajcxy. E je yeegꞌanäg poob huit anajty ymɨɨd. Co ajcxy jaduꞌn ijxy je yeegꞌanäg jiiby jutjoty, chi je töxyjäy ajcxy ooy chɨgɨɨy. 
\v 6 Chi je yeegꞌanäg nɨmay je töxyjäy ajcxy:
\p
―Caꞌ ooy mdzɨgɨɨygɨxy. Miich ajcxy jeꞌ mꞌijxtaaygɨxp je Jesús huɨdibɨ cogajp Nazaret, je huɨdibɨ jäy ajcxy yajcruutzpejt. Tɨ jeꞌ yjugypɨcy. Caꞌ jeꞌ ya. Ocꞌíjxcɨx ya ma ajcxy pɨdaaccɨ.
\v 7 Nɨ́cxcɨx, nɨmaaygɨx Pedro etz yɨ jacjadyii Jesús ydiscípulos ajcxy co Jesús nɨ́cxɨp jayɨjp jɨm Galilea, e jɨm Galilea ñaybadɨɨyb ajcxy mɨɨd Jesús, jaduꞌn nej ajcxy ñɨmaayɨ jayɨjpꞌaty.
\p
\v 8  Chi je töxyjäy ajcxy jɨm yqueegy ma je öcpɨ jut, com tɨ anajty ooy chɨgɨɨygɨxy. Ooy anajty ajcxy chɨyuy mɨɨd tzɨgɨꞌñ. E ni caꞌ ajcxy nɨmay ni pɨn nej anajty tɨ íjxcɨxy, com ooy anajty chɨgɨɨygɨxy. 
\s Jesús ñaygueꞌxɨ̈cɨ ma María Magdalena
\p
\v 9 Je domingo, semana ixtɨgɨꞌ, co Jesús yjugypɨcy, chi ñayguëxɨ̈cɨ jayɨjp ma María Magdalena, jeꞌ jeꞌ je töxyjäy huɨdibɨ anajty Jesús tɨ yajpɨdzɨmɨ huɨxtujc caꞌoybɨ ma yjot yhuinmaꞌñ.
\v 10 Chi María Magdalena ñɨcxy ma Jesús ydiscípulos ajcxy huɨdibɨ mɨɨd yhuɨdijty, e nɨmaaygɨxy nej anajty yɨꞌ tɨ ixy Jesús co tɨ yjugypɨcy jadügꞌoc. E Jesús ydiscípulos ajcxy ooy anajty  ytájycɨxy ymáygɨxy etz yaaxcɨxy. 
\v 11 E co ajcxy mɨdoohuɨ je María yꞌayuc, co anajty tɨ ixy Jesús juugy, chi caꞌ ajcxy mɨjpɨdaacɨ yꞌayuc. 
\s Jesús nayguëxɨ̈cɨ ma metz ydiscípulos
\p
\v 12 Co hueeñɨ, Jesús ñayguëxɨ̈cɨ nañ jaduꞌn ma metz jeꞌ ydiscípulos huɨdibɨ ñɨcxp anajty ajcxy camjoty.
\v 13 Chi je metzpɨ discípulos ñɨcxy ajcxy mɨcꞌamy oy nɨmaaygɨxy je jacjadyii discípulos ajcxy co tɨ íjxcɨxy Jesús. E je jacjadyii discípulos caꞌ ajcxy mɨjpɨdaacɨ je metzpɨ discípulos yꞌayuc. 
\s Huɨdi Jesús ydiscípulos yajnïbɨjc
\p
\v 14 Jac com jecy, Jesús ñayguëxɨ̈cɨ ma je majctügpɨ discípulos ajcxy ma anajty yꞌɨñaaygɨxy ma caydac. Chi Jesús ojy ajcxy co caꞌ ajcxy mɨbɨ́jccɨxy co ooy ajcxy yjot yjuuñɨty, caꞌ ajcxy mɨjpɨdägy jacjadyii pɨn anajty tɨ yꞌíjxcɨxy Jesús. 
\v 15 Jesús jeꞌ ydiscípulos ajcxy nɨmay:
\p
―Nɨ́cxcɨx miich ajcxy ma tügꞌócɨy naaxhuiñyjäy, ma tügꞌócɨy naax cajp, e capxhuäcxcɨx ajcxy je oybɨ ayuc nej jäy ajcxy jëb yꞌalmanïdzögɨpy.
\v 16 Pɨnjaty mɨbɨjc etz ñɨɨbejtcɨxy, ypaadɨp ajcxy yꞌalmanïdzoocɨn. Per, pɨnjaty caꞌ mɨjpɨdägy tɨyꞌajt hueꞌ ajcxy yꞌalma tɨgoyɨp mɨɨd ypocy ycɨxpɨ. 
\v 17 Yɨ jäy ajcxy huɨdibɨ mɨbɨjcp, ooy ajcxy ijxpejt túngɨxɨpy. Mɨɨd ɨɨch nxɨɨ ɨɨch nmɨcꞌajt yajpɨdzɨmɨpy ajcxy caꞌoybɨ ma jäy ajcxy yjot yhuinmaꞌñ. Nañ jaduꞌn ycápxgɨxɨpy huingbɨ ayuc. 
\v 18 Ymadzɨpy ajcxy tzaꞌñ, e caꞌ nej yjájtcɨxɨpy. E co ajcxy veneno ügɨp, caꞌ ajcxy ypaꞌmdunɨɨb. E co ajcxy cɨ̈nïxájɨpy paꞌmjäy, tzögɨp je paꞌmjäy.
\s Jesús ypätɨgɨɨyñɨ tzajpjoty 
\p
\v 19 E co je Huindzɨn Jesús ycapxy ycɨjxy mɨɨd jeꞌ ydiscípulos ajcxy, chi ypätɨgɨɨyñɨ tzajpjoty. Jiiby tzajpjoty Jesús yajpaady ma Dios ymɨjc aꞌoyꞌamy, mɨɨd mɨjꞌaneꞌmɨn.
\v 20 Chi Jesús ydiscípulos ajcxy chooñ ñɨ́cxcɨxy cajp cajp capxhuäcxy ajcxy Jesús yꞌayuc ma nidügꞌócɨy naax cajp. E je Huindzɨn Jesús ooy ajcxy ypubejtɨ ypudɨgɨɨyɨ, mɨcꞌajt moy jeꞌ ajcxy mɨɨd je ijxpejt je mɨjhuinmaꞌñ huɨdibɨ ajcxy tumyb. Jaduꞌñyɨ jaduꞌn. Amén.