\id ROM
\h ROMANOS 
\toc1 ROMANOS 
\mt1 ROMANOS 
\mt2 Yɨ Necy Huɨdi San Pablo Yajniguejx Je Mɨbɨjcpɨdɨjc Jɨm Roma
\c 1
\p
\v 1 Ɨɨch Pablo tumbɨch ma Jesucristo ytung. Jesucristo tɨ xyajnïbɨcyɨch co ndunaꞌñɨch ma yɨꞌ ytung quipxy mɨɨd yɨꞌ yꞌapóstol ajcxy. Tɨ xypɨdägyɨch ma jada tung tügjɨjp co ngapxhuäcxɨbɨch Dios yꞌayuc ytɨyꞌajt oybɨ.
\p
\v 2 Dios jecyꞌajty yꞌayuc yajhuɨꞌmy cojay ma yɨꞌ yꞌayucnajtzcapxɨɨybɨ ñecy co quexaꞌñ anajty je Cristo ya naaxhuiñ.
\v 3 Ngapxhuäcxyɨch jada ayuc jaduꞌn nej ajt nHuindzɨn Jesucristo, je Dios yꞌung, ymaꞌxungꞌajty ya naaxhuiñ. Hueꞌ yɨꞌ ñinïcx paty ma ytaj. E yɨꞌ ytaj je rey David jeꞌ ymɨjꞌapꞌajtɨ ymɨjteedyꞌajtɨ.
\v 4 Per Jesucristo tɨ paady ma Dios yɨꞌ yjɨhuɨꞌñ ymɨcꞌajt. Co Dios yajjugypɨjcy yꞌung ma anajty tɨ yꞌögy mɨɨd yjɨhuɨꞌñ ymɨcꞌajt, chi tɨ yajnejhuɨ̈y anajty je naaxhuiñyjäy co Jesucristo hueꞌ jeꞌ Dios yꞌung, huɨdibɨ mɨɨd huädz yjot huädz yhuinmaꞌñ, etz nañ ymɨɨd Dios yjɨhuɨꞌñ ymɨcꞌajt.
\v 5 Co Dios yajjugypɨjcy Jesucristo ma anajty tɨ yꞌögy, chi mɨjmayꞌajt tuñ mɨɨd ɨɨch ajt ycɨxpɨ. E nañ mɨɨd Jesucristo ycɨxpɨ Dios tɨ xyajnïbɨcyɨch co ngapxhuäcxɨbɨch yɨꞌ yꞌayuc ytɨyꞌajt ma yɨ mayjäy ajcxy ma tügꞌócɨy naax cajp, jɨgɨx jëbɨ mayjäy mɨbɨjccɨxy e nañ capxymɨdoogɨxy Jesucristo.
\v 6 E miich ajcxy huɨdibɨ tzɨnaayb jɨm ma yɨ cajp huɨdibɨ xɨɨjɨp Roma, nañ jaduꞌn Dios miich ajcxy tɨ xyhuinꞌijxcɨxy jëbɨ ajcxy Jesucristo xyjäyꞌadyii.
\p
\v 7 Jada necy nguejxypɨch ma miich ajcxy nidügꞌócɨy huɨdibɨ jɨm yajpatcɨxp ma yɨ cajp huɨdibɨ xɨ́ɨjɨp Roma. Dios miich xychojccɨxp xyjɨhuɨɨygɨxp, e nañ Dios tɨ xyhuinꞌijxcɨxy jaydëbɨ yɨꞌ xyjäyꞌadyii, etz nañ jaydëbɨ mdzɨnaaygɨxy mɨɨd huädz mjot huädz mhuinmaꞌñ. Huen ɨɨch ajt nDios Teedy etz ajt nHuindzɨn Jesucristo mayꞌajt oyꞌajt tunɨpy mɨɨd miich ajcxy etz nañ xyajjotcugɨ̈huɨp ajcxy.
\s Pablo nɨcxy mɨbɨjcpɨdɨjc cogapxɨ̈huaꞌñ jɨm Roma
\p
\v 8 Tɨm jayɨjp nyajnajxpɨch jäygɨdaacɨn ma Dios, mɨɨd Jesucristo yxɨɨ, co miich ajcxy tɨ mmɨbɨjccɨxy Jesucristo. Mayjäy ma nidügꞌócɨy naax cajp tɨ nejhuɨɨygɨxy jaduꞌn nej miich ajcxy tɨ mmɨjpɨdaaccɨxy Jesucristo.
\v 9 Ɨɨch tumbɨch cɨxyjot huinɨjot ma Dios ytung, co ngapxhuäcxyɨch Dios yꞌayuc ytɨyꞌajt mɨɨd Jesucristo ycɨxpɨ. Dios yɨꞌ tɨyꞌajt yegɨp jaduꞌn nej jabom jabom Dios nmɨbɨjctzooyɨch mɨɨd miich ajcxy ycɨxpɨ.
\v 10 Dios nmɨbɨjctzooybɨch pen yɨꞌ jaduꞌn tzojcp co jëbɨ nnɨcxyɨch cham tiempo jɨm ma miich ajcxy myajpaady. Canaagꞌoc ɨɨch miich ajcxy nɨcxy njaꞌixaangɨxy, e caꞌ yꞌoyɨ̈y nej nɨ́cxɨbɨch.
\v 11 Ooy njanijotꞌatyɨch co ɨɨch miich ajcxy nɨcxy nꞌixaangɨxy, jaydëbɨ ngapxhuäcxɨbɨch Dios yꞌayuc ma miich ajcxy mɨɨd Dios yjɨhuɨꞌñ ymɨcꞌajt, e nañ ngapxhuäcxɨbɨch Dios yꞌayuc ma miich ajcxy jaydëbɨ tɨydudägy mmɨbɨgɨpy ajcxy Jesucristo.
\v 12 Pen oyɨɨyb nej nɨ́cxɨbɨch ma miich ajcxy myajpaady, chi jëbɨ njotcugɨ̈huɨbyɨch co anajty nꞌixyɨch nej miich ajcxy mɨbɨjccɨxy Jesucristo, e nañ jaydëbɨ mjotcugɨ̈huɨpy miich ajcxy co anajty mꞌijxcɨxy nej ɨɨch nmɨbɨcyɨch Jesucristo, e jaduꞌn nayyajjotcugɨɨyɨm miñ xyɨpy.
\p
\v 13 Ndzojcypɨch co miich ajcxy mnejhuɨ̈huɨpy co canaagꞌoc tɨ njapɨdägyɨch nhuinmaꞌñɨch co anajty nnɨcxaꞌñɨch ma miich ajcxy myajpaady, e caꞌ yꞌoyɨ̈y nej nɨ́cxɨbyɨch. Njɨjpꞌijxypɨch co oyɨ̈huɨp jadachambɨ tiempo jaduꞌn nej jëbɨ nnɨ́cxɨbyɨch jɨm ma miich ajcxy. Com njacyajꞌixpɨgaamybɨch miich ajcxy, e nañ njacyajmɨbɨgaamybɨch ajcxy Dios yꞌayuc. Tɨm jaduꞌn nej nduñɨch canaag agajp ma chɨnaaygɨxy yɨ jacjadyii jäy huɨdibɨ ajcxy caꞌ yjudíojäyɨty.
\v 14 Dios jaduꞌn xyajnïbɨjcɨch jada tung, paady copɨcy co ngapxhuäcxɨbɨch yɨꞌ yꞌayuc ma tügꞌócɨy jäy, etz majaty naax cajp. Ngapxhuäcxamybɨch Dios yꞌayuc ma yɨ jäy ajcxy huɨdibɨ griego ayuc cápxcɨxp, etz ñan ma yɨ jäy ajcxy huɨdibɨ caꞌ griego yꞌayuc capxcɨxy. Ngapxhuäcxamybɨch Dios yꞌayuc ma yɨ ixpɨcy jäy ajcxy, etz nañ ma yɨ jäy ajcxy huɨdibɨ caꞌ yꞌixpɨcyɨty.
\v 15 Paady ycɨxpɨ ooy ndzachcapxhuäcxaꞌñɨch Dios yꞌayuc ma miich ajcxy huɨdibɨ yajpatp jɨm Roma nañ jaduꞌn.
\s Je ayuc tɨyꞌajt oybɨ
\p
\v 16 Caꞌ nmɨdzoꞌydunyiijɨch Cristo yꞌayuc ytɨyꞌajt. Com jeꞌ jada je oybɨ ayuc huɨdibɨ tzoon ma Dios, ymɨɨd yɨꞌ Dios ymɨcꞌajt jɨgɨx jëbɨ tügꞌócɨy jäy ajcxy paadɨpy pocy huinmeecxɨn, pɨnjaty cöbɨgaamb Cristo yꞌayuc. Tɨm jayɨjp tɨ ngapxhuäcxy Jesucristo yꞌayuc ytɨyꞌajt ma yɨ judíojäy ajcxy, e jacꞌaxam ma yɨ huɨdibɨ ajcxy caꞌ yjudíojäyɨty.
\v 17 Jesucristo ytɨyꞌajt xyajnejhuɨɨyɨm co nmɨbɨjcɨm co Cristo tɨ jöch ajt nbocy etz nxɨ̈huɨn, chi Dios xycöbɨgaanɨm jaduꞌn nejjɨhuɨ̈y tudägyjäy. Caꞌ ji jadüg huinmaꞌñ nej Dios jëbɨ xycöbɨ́jcɨm jaduꞌn nej jɨhuɨ̈y tudägyjäy. Com jaduꞌn jaybety yꞌity ma Dios ñecy ma jaduꞌn ymɨnañ: “Pɨnjaty tudägyꞌajtɨn tɨ paady mɨɨd co tɨ mɨjpɨdägy Dios yꞌayuc, hueꞌ jeꞌ tzɨnähuɨp, caꞌ yjugyꞌajtɨn ycɨxɨpy ytɨgoyɨpy.”
\s Je naaxhuiñyjäy ajcxy ypocy
\p
\v 18 Copɨcy nbaatɨm tudägyꞌajtɨn ma Dios, com je Dios huɨdibɨ tzɨnaayb tzajpjoty tɨ xyajnejhuɨ́ɨyɨm co yɨꞌ tzaachytunaꞌñ mɨctägy tügꞌócɨy jäy ajcxy huɨdibɨ mɨdundɨgooyb yɨꞌ ytɨyꞌajt, tügꞌócɨy huɨdijaty jɨbɨc huinmaꞌñ ymɨɨd, tügꞌócɨy yɨꞌ ajcxy huɨdibɨ yajtɨgooyb Dios ytɨyꞌajt mɨɨd je jɨbɨcpɨ huɨdibɨ ajcxy ytumyb.                                                                                                                                                                          \v 19 Com yɨ jäy ajcxy huɨdibɨ jɨbɨcjot jɨbɨc-huinmaꞌñ mɨɨd, yꞌijxpy ñejhuɨɨyb ajcxy Dios ytɨyꞌajt, com Dios tɨ pɨdägy yɨꞌ ytɨyꞌajt ma yɨꞌ ajcxy yjot yhuinmaꞌñ.
\v 20 Ñejhuɨɨyb jäy ajcxy Dios ytɨyꞌajt, com mabaad ogaꞌn Dios yajcojy naaxhuiñybɨ ixtɨ chambaad, quëxɨ̈cp ya naaxhuiñ Dios ymɨcꞌajt yꞌijxpejt, oy caꞌ pɨn Dios ixy, huɨdibɨ Dios tɨ cojy tɨ macxy yejcpy ijxpejt co Dios yjiijɨty, etz Dios ymɨcꞌajt huinɨxɨɨ huinɨtiempo ijtp yɨꞌ, caꞌ ycɨxɨpy ytɨgoyɨpy nimɨna. Co anajty Dios tzaachytunaꞌñ yɨ pocyjäy ajcxy, caꞌ ajcxy ni ti ayuc mɨɨd huaad adzohuimbidɨp Dios mɨɨd ajcxy ypocy ycɨxpɨ.
\v 21 Com ñejhuɨɨyb ajcxy co ji Dios yajpaady, e caꞌ ajcxy ojadajtcɨxy caꞌ ajcxy huindzɨgɨɨygɨxy Dios. E nañ ni caꞌ ajcxy yajnaxy Dioscojuyip ma Dios. E nañ jaduꞌn ajcxy ñaybɨdáacɨgɨxy amɨj agɨx, yhuinmaꞌñ ixtaaygɨxy huɨdibɨ caꞌ ytɨyꞌajtɨty. Yajtɨgooyɨ ajcxy Dios ytɨyꞌajt ma ajcxy yjot yhuinmaꞌñ, e nañ mɨɨdꞌajtcɨxy tzuuhuinmaꞌñ.
\v 22 Yɨ jaduꞌmbɨ jäy ajcxy hueꞌ yhuinmaꞌñ pɨdaaccɨxy co ajcxy ooy ycohuinmaꞌñɨty, co ajcxy ooy yꞌixpɨcyɨty, e caꞌ yjanchɨty, tzuu huinmaꞌñ ajcxy ymɨɨd.
\v 23 Ma yjapadyii ojadájtcɨxɨpy huindzɨgɨ́ɨygɨxɨpy Dios huɨdibɨ ymɨcꞌajtɨn yꞌoyꞌajtɨn caꞌ ycɨxɨpy ytɨgoyɨpy nimɨna. Chi ajcxy yajtɨgach yjot yhuinmaꞌñ, e huindzɨgɨɨygɨxy jäy yꞌahuɨnax e jäy ajcxy yjugyꞌajtɨn etz yꞌoyꞌajtɨn cɨxaamb tɨgoyaamb. Ixtɨ mɨjpɨdaaccɨxy nañ jaduꞌn joon yꞌahuɨnax, ɨyujc yꞌahuɨnax etz tzaꞌñ yꞌahuɨnax.
\p
\v 24 Co jäy ajcxy jaduꞌn ytundɨgoy, paady Dios ñajtzꞌixɨɨyɨn ajcxy, huen tundɨgooygɨxy nej anajty cɨꞌm jɨbɨchuinmaꞌñ nijotꞌajtcɨxy. Ñaymɨdundɨgóoyɨgɨxy ñinïcx miñ xyɨpy huɨdibɨ janch oy mɨdzoꞌyduunɨ.
\v 25 Ma yjapadyii ixyipy mɨjpɨdaaccɨxy je tɨyꞌajt tɨydudägypɨ nej Dios tɨ yecy, huinꞌit ajcxy mɨjpɨdaaccɨxy anɨɨ huɨdijaty jäy tɨ cojy tɨ macxy. Ma yjapadyii ixyipy huindzɨgɨɨygɨxy Dios, huɨdibɨ cɨꞌm tɨ yajcojtäy tügꞌócɨy tijaty ji yajpaatp, huinꞌit ajcxy huindzɨgɨɨygɨxy jäy yꞌahuɨnax joon yꞌahuɨnax, etz ɨyujc yꞌahuɨnax huɨdijaty caꞌ ti mɨcꞌajt mɨɨdɨty. Copɨcy nꞌojadajtɨm ngömaayɨm Dios huinɨxɨɨ huinɨtiempo. Amén.
\p
\v 26 Mɨɨd co jäy ajcxy tzachhuindzɨgɨɨygɨxy jäy yꞌahuɨnax etz jactijaty ahuɨnax, paady ycɨxpɨ Dios ajcxy ñajtzꞌixɨ̈yii, chi ajcxy tungɨxy yɨ jɨbɨc-huinmaꞌñ huɨdibɨ cɨꞌm ñijotꞌajtcɨxyp huɨdibɨ oy ymɨdzoꞌyduunɨ. Töxyjäy ajcxy ma yjapadyii chɨnáaygɨxɨpy tudägy mɨɨd ñäy, chi ajcxy ñaymɨɨdtzɨnáayɨgɨxy e ñaymɨɨdtundɨgóoyɨgɨxy actöxyjäydɨjc.
\v 27 Yëydɨjctɨjc ajcxy nañ jaduꞌn ñaymɨɨdtundɨgóoyɨgɨxy miñ xyɨpy. Ñaymɨɨddzɨnáayɨgɨxy ma yjapadyii iyxipy chɨnaaygɨxy mɨɨd töxyjäy ajcxy, huinꞌit ytundɨgooygɨxy ma Dios ytɨyꞌajt. Cɨꞌm nijotꞌajtcɨxy jɨbɨc-huinmaꞌñ huɨdibɨ oymɨdzoꞌyduunɨ, ypátcɨxɨpy ma ajcxy ñinïcx je tzaachypɨ huɨdibɨ Dios ypɨdacpy mɨɨd yɨꞌ ajcxy ypocy ycɨxpɨ.
\p
\v 28 Co yɨ jäy ajcxy jaduꞌn cɨꞌm yhuinmaꞌñ tɨ pɨdaaccɨxy co caꞌ yajmɨjꞌadaꞌñ Dios, paady ycɨxpɨ Dios ñajtzꞌixɨ̈yii ajcxy. Huen tɨm tungɨxy huɨdibɨ ajcxy cɨꞌm ñijotꞌajtpy, huɨdibɨ Dios caꞌ jäygɨdägy.
\v 29 Jäy ajcxy ooy mɨj jɨbɨc-huinmaꞌñ canaagnax nijotꞌajtcɨxy; yëydɨjctɨjc ooy ajcxy jɨbɨc-huinmaꞌñ tungɨxy; ooy ajcxy mɨgapxtɨgoy töxyjäy ajcxy; ooy ajcxy adzojccɨxy comeeñꞌajtɨn; ooy mɨꞌijxtɨnaaygɨxy ymɨgügtɨjc; caꞌ ajcxy ymɨgüg ixaangɨxy; ooy ajcxy yjäyyajꞌöccɨxy; ooy ajcxy chiptunaangɨxy; caꞌ ajcxy ycapxymɨdohuaangɨxy; ooy ajcxy ymɨgüg huinꞌɨɨngɨxy; ooy ajcxy ypiitzcapxcɨxy; caꞌp ajcxy ymɨgüg ixaangɨxy.
\v 30 Jäy ajcxy ooy nigapxy niꞌojɨ̈y ymɨgügtɨjc; caꞌ ajcxy ixaangɨxy Dios; caꞌ ti jäygɨdaaccɨxy; ooy ajcxy amɨj agɨx ñayjɨhuɨ́ɨyɨgɨxy; ooy ajcxy cɨꞌm ñaygömáayɨgɨxy; ooy ajcxy cojy macxy jɨbɨc-huinmaꞌñ, caꞌ ajcxy capxymɨdoogɨxy ytaj yteedy.
\v 31 Jäy ajcxy caꞌ yꞌayuc-huinjɨhuɨɨygɨxy; caꞌ ajcxy cuydungɨxy ycɨꞌmꞌayuc; caꞌ ajcxy ni pɨn tzojccɨxy jɨhuɨɨygɨxy; caꞌ ajcxy ni pɨn paꞌayoogɨxy.
\v 32 Jadayaabɨ jäy ajcxy ñejhuɨɨyb co Dios tɨ cojy tɨ macxy ycötujcɨn co pɨnjaty tundɨgooyb jaduꞌn mɨɨd Dios ytɨyꞌajt, tɨgooyɨp ajcxy yjugyꞌajtɨn. Oy iyxipy yɨ jäy ajcxy janejhuɨɨygɨxy co padaangɨxy yꞌoꞌcɨn, huinꞌit ajcxy jactɨmtungɨxy jɨbɨc-huinmaꞌñ, e nañ jaduꞌn jotcujc ajcxy co jac pɨnjaty jɨbɨc-huinmaꞌñ tungɨxy.
\c 2
\s Dios tɨydumb jaduꞌn nej yɨꞌ tzocy
\p
\v 1 Paady co miich mɨgüg mꞌixꞌixy mbaꞌixy ti ytumyb, ti mɨgüg ycapxyp tɨ anajty pocy mnaymöyii, oy iyxipy ypɨnjäy ñejpyjäyɨty. Miich ooy ti pocy mꞌixy ma huing jäy, e nañ jaduꞌn miich ooy mɨj mdundɨgoy, tɨm jaduꞌn nej yɨꞌ ajcxy ytundɨgooygɨxy.
\v 2 Nejhuɨɨyɨm co Dios tudägy ytuñ co tzaachytuñ tügꞌócɨy pɨnjaty tundɨgooyb.
\v 3 E miich co mɨgüg mꞌixꞌixy mbaꞌixy ti ytumyb ti mɨgüg ycapxyp, nañ jaduꞌn miich Dios xychaachytunaꞌñ. ¿Nej mdijy mdzögɨp co anajty Dios xytɨydunaꞌñ?
\v 4 ¿Nej caꞌ mjäygɨdägy nej Dios mɨj ooy mayꞌajt oyꞌajt tɨ tuñ mɨɨd miich, nej ooy mɨj tɨ xypaꞌayoy, mɨj tɨ xymɨmecxtucy? ¿Nej caꞌ mnejhuɨ̈y co Dios mɨj ooy xypaꞌayoy xymɨmecxtucy, jɨgɨx mjothuimbidɨpy nej mdundɨgoy ma Dios ytɨyꞌajt?
\v 5 Mɨɨd co ooy mjotjuuñɨty mgöjuuñɨty, caꞌ ajcxy mjothuimbidaꞌñ, caꞌ ajcxy mꞌixmadzaꞌñ nej ajcxy mdundɨgooygɨxy. Paady ycɨxpɨ Dios huɨdibɨ tudägy tumb nïgɨ miich yɨꞌ ooy mɨj xychaachytunaꞌñ co anajty xɨɨ tiempo ycɨxy ytɨgoy, e Dios chaachytunamyb jäy ajcxy mɨɨd ypocy ycɨxpɨ.
\v 6 Co anajty Dios tɨyduñ yɨ naaxhuiñ jäy, chi yajnigɨdagɨ̈huaꞌñ nidüg nidüg nej anajty tɨ chɨnäy.
\v 7 Nijëjɨty jäy ajcxy oyjot oyhuinmaꞌñ tungɨxy jabom jabom, yjɨjpꞌijxpy ajcxy co Dios oybɨ ymöhuaanɨgɨxy, nañ yjɨjpꞌijxpy ajcxy co Dios ycömayɨɨyb, yjɨjpꞌijxyp ajcxy yjugyꞌajtɨn huɨdibɨ caꞌ ycɨxɨpy ytɨgoyɨpy nimɨna. Yɨ jaduꞌmbɨ jäy Dios ymöhuamyb jugyꞌajtɨn huɨdibɨ caꞌ ycɨxɨpy ytɨgoyɨpy nimɨna.
\v 8 Per Dios chaachytunamyb mɨjcajee yɨ jäy ajcxy huɨdibɨ caꞌ ycapxymɨdohuaangɨxy, huɨdibɨ caꞌ cuydungɨxy Dios ytɨyꞌajt, huɨdibɨ ajcxy tumb jɨbɨc-huinmaꞌñ.
\v 9 Ayoꞌn tzaachypɨ ypadamyb tügꞌócɨy jäy ajcxy huɨdibɨ jɨbɨc-huinmaꞌñ tɨ tuñ. Nañ jaduꞌn miich judíojäy ajcxy tɨm jayɨjp mbadaangɨxy tzaachypɨ, pen mdundɨgooygɨxp, e chiinɨ yɨ jacjadyii jäy padaangɨxy tzaachypɨ, pen tundɨgooygɨxp.
\v 10 Tügꞌócɨy pɨnjaty oyjot oyhuinmaꞌñ tungɨxp, Dios ymöhuamyb yɨꞌ ajcxy oyꞌajtɨn, nañ cömayaanɨp yɨꞌ ajcxy Dios, etz nañ yajjotcugɨ̈huɨɨb ajcxy. Tɨm jayɨjp yɨ judíojäy padaꞌñ ajcxy oybɨ, etz jacꞌaxam yɨ jacjadyii jäy ajcxy.
\p
\v 11 Dios caꞌ tɨydunaꞌñ jäy ajcxy huinꞌijxpety, quipxyjaty tɨydunaꞌñ nidügꞌócɨy jäy ajcxy.
\v 12 Nidügꞌócɨy jäy ajcxy huɨdibɨ tundɨgooygɨxp, Dios yajtɨgoyaanɨp ajcxy yjugyꞌajtɨn. Yɨ jäy ajcxy huɨdibɨ caꞌ mɨɨdɨty Dios ycötujcɨn huɨdibɨ cojaayɨp, Dios yajpocycähuaanɨp ajcxy, com ymɨɨd ajcxy Dios ytɨyꞌajt ma yjot yhuinmaꞌñ. Yɨ jäy ajcxy huɨdibɨ mɨɨd Dios ycötujcɨn cojay, Dios yajpocycähuaanɨp ajcxy mɨɨd yɨꞌ ycötujcɨn huɨdibɨ cojaayɨp.
\v 13 Yɨ jäy ajcxy huɨdibɨ nɨgoob amɨdoꞌijtp co yajcapxy Dios ycötujcɨn, e caꞌ ycapxymɨdoogɨxy, caꞌ ycöbɨgaꞌñyii Dios jaduꞌn nej jɨhuɨ̈y ytudägyjäyɨty. Yɨ jäy ajcxy huɨdibɨ capxymɨdoob Dios ycötújcɨn, Dios cöbɨgaanɨp co ajcxy ytudägyjäyɨty. 
\v 14 Yɨ jäy ajcxy huɨdibɨ caꞌ mɨɨdɨty Dios ycötujcɨn huɨdibɨ cojayɨp, co ajcxy nijotꞌajtcɨxy oyjot oyhuinmaꞌñ jaduꞌn nej Dios tzocy, jaduꞌn nipaady nej jɨhuɨ̈y ajcxy mɨɨdɨty Dios ycötujcɨn.
\v 15 Co je jäy ajcxy oyjot oyhuinmaꞌñ tungɨxy, huinꞌit yajniguëxɨ̈ccɨxy co ajcxy ymɨɨd Dios ycötujcɨn ma ajcxy yjot yhuinmaꞌñ. E co paatcɨxy jɨbɨc jot jɨbɨc-huinmaꞌñ, huinꞌit jɨbɨc ñayjɨhuɨɨyɨgɨxy. E co patcɨxy oyjot oyhuinmaꞌñ, huinꞌit ooy oy ñayjɨhuɨ́ɨyɨgɨxy.
\v 16 Jada jeꞌduꞌn je jemybɨ oybɨ ayuc huɨdibɨ ngapxhuäcxypɨch co miinɨp je xɨɨ je tiempo co Jesucristo, mɨɨd Dios ycötujcɨn, tɨydunɨp tügꞌócɨy jäy ajcxy nej anajty yjot yhuinmaꞌñ ajcxy mɨɨdɨty, tügꞌócɨy pɨnjaty tɨ tuñ ayüch ameech tijaty.
\s Je Dios ycötujcɨn huɨdibɨ Moisés yjay jecyꞌajty
\p
\v 17 Miich ajcxy huɨdibɨ mɨnamb co mjudíojäyɨty, miich ajcxy mmɨjpɨdaaccɨxyp Dios ycötujcɨn, je jecyɨp huɨdibɨ jaybetyɨp. Miich ajcxy mnaygömáayɨgɨxy co miich ajcxy Dios xyjäyꞌadyii.
\v 18 Miich ajcxy mnejhuɨɨyb nej Dios tzocy nej huaad mjäyꞌajtcɨxy. E nañ tɨ mꞌixpɨcy Dios ycötujcɨn huɨdibɨ tɨ xyajnejhuɨɨygɨxy huɨdibɨ tɨyꞌajt jacꞌoyɨp.
\v 19 Miich ajcxy mɨnamb co janch janch co miich ajcxy Dios ytɨyꞌajt myejcɨ ma yɨ jäy ajcxy huɨdibɨ caꞌ Dios ytɨyꞌajt mɨɨdɨty, jaduꞌn nipaady nej jɨhuɨ̈y tüg huintzpɨ mhuijtzyöy, e nañ jaduꞌn nipaady nej jɨhuɨ̈y mgodɨcxy je jäy ajcxy huɨdibɨ agootztuum tzɨnaayb.
\v 20 Miich ajcxy judíojäy myajꞌixpɨjcpy yɨ jäy ajcxy huɨdibɨ ayoob, huɨdibɨ caꞌ ti tɨyꞌajt nejhuɨɨygɨxy, e mgapxhuijy yɨ jäy ajcxy huɨdibɨ caꞌ yhuinmaꞌñymejtzcɨxy. Miich ajcxy mɨnamb co mꞌayuc etz mdɨyꞌajt mbaatcɨxy ma Dios ycötujcɨn huɨdibɨ jaybetyɨp. 
\v 21 Miich ajcxy myajꞌixpɨjcpy jacjadyii jäy ajcxy Dios ytɨyꞌajt. ¿Nej co caꞌ cɨꞌm mguydungɨxy nej tɨ myajꞌixpɨjccɨxy? Myajꞌixpɨjcpy ajcxy jacjadyii jäy co caꞌ huaad ymeetzcɨxy, e miich cɨꞌm ajcxy meetzp.
\v 22 Miich ajcxy myajꞌixpɨjcpy jacjadyii jäy co caꞌ huaad mɨgapxtɨgoy töxyjäy ajcxy, e ¿miich ajcxy nej co mmɨgapxtɨgooygɨxy töxyjäy ajcxy? Miich ajcxy cɨꞌm mɨnamb co caꞌ huaad yajhuindzɨgɨ̈y tzaaboch quipychech, e miich ajcxy cɨꞌm mdzachmeech je meeñ ma je tzajptɨjc ma je quipychech yꞌity. 
\v 23 Miich ajcxy mdzachnaygömáayɨgɨxy co mguydungɨxy Dios ycötujcɨn. Miich ajcxy mꞌixtijy Dios mɨɨd co caꞌ ajcxy mguydunɨ yɨꞌ ytɨyꞌajt.
\v 24 Paady jaduꞌn jaybety miiñ ma Dios ñecy, ma jaduꞌn ymɨnaꞌñ: “Com co miich ajcxy mdundɨgooygɨxy, paady ycɨxpɨ yɨ jacjadyii jäy ajcxy nigapxy niꞌojɨ̈y Dios yxɨɨ.”
\p
\v 25 Co ajcxy mguyduunɨp Dios ycötujcɨn, huinꞌit Dios xytunɨpcuendɨ co miich ajcxy mɨɨdɨty je tɨyꞌajt ma mninïcx co Dios xyjäyꞌadyii. Co caꞌ ajcxy mguyduunɨp Dios ycötujcɨn, huinꞌit Dios caꞌ xytunɨpcuendɨ co miich mɨɨdɨty je tɨyꞌajt ma mninïcx co Dios xyjäyꞌadyii. Jaduꞌn nipaady nej jɨhuɨ̈y caꞌ mdɨyꞌajttɨ̈yɨty.
\v 26 Co yɨ jacjadyii jäy ajcxy huɨdibɨ caꞌ mɨɨdɨty tɨyꞌajt ma ñinïcx, e cuydunɨ ajcxy Dios ytɨyꞌajt, jaduꞌn nej ajcxy ytɨyꞌajttɨ̈yɨty.
\v 27 Yɨ jacjadyii jäy co ajcxy cuyduñ Dios ytɨyꞌajt, yɨꞌ ajcxy capxpaadyꞌidɨpy ma Dios. E miich ajcxy judíojäy mbocycähuɨp miich ajcxy, oy miich ajcxy mjamɨɨdɨty ixyipy Dios ycötújcɨn huɨdi cojaayɨp, pen caꞌ mguydungɨxy.
\v 28 Je ijxpejt janchypɨ co pɨnjaty Dios yjäyꞌajtyp, canan jeꞌ je ijxpejt huɨdibɨ ymɨɨd ma ninïcx. E nañ jaduꞌn canan jeꞌ je tɨyꞌajttɨ̈huɨɨ cötujcɨn huɨdibɨ jäy cuydun jecyꞌajty.
\v 29 Je ijxpejt janchypɨ co pɨnjaty Dios yjäyꞌajtyp, jeꞌ jeꞌ je ijxpejt huɨdibɨ ymɨɨd ma yjot yhuinmaꞌñ, je oyjot oyhuinmaꞌñ huɨdibɨ ymɨɨd, je ijxpejt co je Espíritu Santo tɨ yajhuächyii yjot yhuinmaꞌñ, canan jeꞌ je tɨyꞌajt co tɨ cuyduñ je jecyɨp cötujcɨn huɨdibɨ cojay ijtp. Yɨ jaduꞌmbɨ jäy ajcxy cömayꞌidɨpy ma Dios, e caꞌ ycömayꞌidaꞌñ ma jäy ajcxy.
\c 3
\p
\v 1 Pen  tɨyꞌajt jaduꞌn nej nmɨnaꞌñɨch, ¿ti jäygɨdaacɨn yɨ judíojäy ajcxy ymɨɨd ma Dios huɨdibɨ yɨ jacjadyii jäy ajcxy caꞌ mɨɨdɨty? ¿Ti jäygɨdaacɨn ajcxy ypatpy co ajcxy mɨɨdɨty tɨyꞌajt ma ñinïcx co Dios yjäyꞌadyii?
\v 2 Yɨ judíojäy ooy canaagnax oyꞌajtɨn jamɨɨdɨty. Tɨm jayɨjp Dios yajnïbɨjcɨ ajcxy yɨꞌ ycötujcɨn yɨꞌ yꞌayuc huɨdibɨ cojaayɨp.
\v 3 ¿Nej mdijy co Dios caꞌ cuydunaꞌñ yɨꞌ yꞌayuc mɨɨd yɨ judíojäy ajcxy mɨɨd co nijëjɨty judíojäy caꞌ cuyduñ yɨꞌ ycötujcɨn?
\v 4 Dios caꞌ jaduꞌn huinmaꞌñ mɨɨdɨty nej jäy ajcxy huinmaꞌñ mɨɨdɨty. Oy ixyipy nidügꞌócɨy jäy yꞌanɨɨdaaccɨxy, Dios caꞌ yꞌanɨɨdägaꞌñ nimɨna. Paady jaduꞌn jaybety miiñ ma Dios yꞌayuc co David jaduꞌn ymɨnañ:
\q Ñejhuɨ̈huɨpy jäy ajcxy co miich, Huindzɨn Dios, tudägy mguyduñ yɨ mꞌayuc. Caꞌ huaad pɨnjaty ymɨnaꞌnɨp co caꞌ miich mguyduñ yɨ mꞌayuc.
\p
\v 5 Pen Dios cömaybɨdzɨmɨpy mɨɨd ajt nbocy ycɨxpɨ, ¿nej tɨyꞌajt jaduꞌn nej jäy ymɨnaangɨxy co Dios caꞌ oy ytuñ, co xychaachytuunɨm mɨɨd ajt nbocy ycɨxpɨ?
\v 6 Caꞌ yjaduꞌnɨty. Co ixyipy yjaduꞌnɨty, Dios caꞌ yɨꞌ tɨydunɨpy naaxhuiñyjäy mɨɨd ajcxy ypocy ycɨxpɨ.
\p
\v 7 Co ixyipy ytɨyꞌajtɨty jaduꞌn nej jäy ymɨnaangɨxy co Dios ooy yjotcujcɨty co caꞌ xychaachytunɨpyɨch mɨɨd nbocyɨch ycɨxpɨ, jacꞌoy co ixyipy ndundɨgooyɨch, jɨgɨx Dios janch ycömaybɨdzɨmɨpy.
\v 8 Jacꞌoy ixyipy nmɨnaanɨm: “Tzoc tundɨgooyɨm jɨgɨx jëbɨ Dios cömay ypɨdzɨmɨpy.” Ixtɨ nijëjɨty jäy tɨ xyñïhuambetyɨch co ɨɨch jaduꞌn tɨ nmɨnaꞌñɨch. Caꞌ jaduꞌn nmɨnaꞌñɨch co Dios jäy tzaachytunɨpy ninɨgoob. Dios chaachytunɨpy pocyjäy ajcxy, com paatɨp ajcxy jaduꞌn yɨ tzaachypɨ.
\s Nidügꞌócɨy ɨɨch ajt nbocymɨɨdɨty
\p
\v 9 ¿Nej janch jaduꞌn co ɨɨch ajcxy huɨdibɨ judíojäy, jacꞌoyjäy ɨɨch ajcxy caꞌydɨ yɨ jacjadyii jäy ajcxy? Caꞌ yjaduꞌnɨty, caꞌ ɨɨch ajcxy njacꞌoyjäyɨty. Com tɨ jayɨjp nyajꞌixpɨcyɨch co tügꞌócɨy jäy ajcxy yajpaady pocymɨɨd, yɨ judíojäy, etz nañ jaduꞌn jacjadyii jäy ajcxy.
\v 10 Com jaduꞌn jaybety miiñ ma Dios ñecy ma jaduꞌn ymɨnaꞌñ:
\q Caꞌ ji ni tüg jäy tudäcpy, ni tüg.
\q
\v 11 Caꞌ ji ni pɨn huɨdibɨ huinjɨhuɨɨyb Dios ytɨyꞌajt. Ni pɨn huɨdibɨ ixtaayb Dios ytɨyꞌajt.
\q
\v 12  Nidügꞌócɨy jäy tɨ ixmajtzcɨxy Dios ytɨyꞌajt. Quipxy ycapxy ajcxy ytumyb co ytundɨgooygɨxy.
Caꞌ ji ni pɨn, pɨn huädz oy yjot oy yhuinmaꞌñ tumb, caꞌ ji ni tüg.
\q
\v 13 Yɨ jäy ajcxy ooy ycapxtɨgooygɨxy, oy ajcxy yhuinꞌɨɨñ
mɨɨd yꞌayuc. Jaduꞌn ajcxy yöcpajc nipaady nej tüg öcpɨ jut huɨdibɨ ahuädz. Ooy ajcxy yajtzachɨ̈y mɨɨd yꞌayuc jaduꞌn nej jɨhuɨ̈y tzaꞌñ chüch.
\q 
\v 14 Ooy ajcxy ycapxtɨgooygɨxy. Ooy ajcxy jɨbɨc ayuc capxcɨxy.
\q 
\v 15 Mɨɨd yinjaty huenjatypɨ ayuc, mɨcꞌamy ymɨgüg yajꞌoꞌccɨxy.
\q 
\v 16 Ma ajcxy yhuɨdity ooy mɨdundɨgooygɨxy ymɨgüg, e nañ yecy ajcxy tajɨn mayɨn.
\q 
\v 17 Caꞌ ajcxy nejhuɨɨygɨxy nej huaad chɨnaaygɨxy jotcujc, caꞌ ma ti tzip ti capxy.
\q 
\v 18 Ni cahuinmaaygɨxy nej Dios tzɨgɨ́ɨygɨxɨpy.
\p
\v 19 Tügꞌócɨy ayuc ycojaayɨty ma Dios ycötujcɨn necy, mɨcꞌajt mɨɨdpɨ mɨɨd yɨ jäy ajcxy huɨdibɨ yajmɨjꞌajtp je cötujcɨn. Dios tɨ pɨdägy yɨꞌ ycötujcɨn, jaydëbɨ pɨnjaty tundɨgooyb, huaad caꞌ ti anɨɨ tuñ ma Dios. Dios ytɨydunɨpy tügꞌócɨy jäy ajcxy mɨɨd yɨꞌ ycötujcɨn.
\v 20 Dios caꞌ capxpadaꞌñ co ytudägyɨty, mɨɨd co tɨ cuydunyii ycötujcɨn. Dios tɨ pɨdägy ycötujcɨn jaydëbɨ nejhuɨɨyɨm co ajt nbocymɨɨdɨty.
\s Yɨ alma nïdzoocɨn, hueꞌ yajpaady mɨɨd mɨbɨjcɨn
\p
\v 21 Jadachambɨ Dios xyajnejhuɨɨyɨm jemybɨ tɨyꞌajt jaduꞌn nej tudägyꞌajtɨn jëb nbaatɨm ma yɨꞌ, e jada jemybɨ tudägyꞌajtɨn tɨyꞌajt, caꞌ yɨꞌ yjaduꞌnɨty nej yɨ tɨyꞌajt huɨdibɨ yajpatp ma Dios ycötujcɨn jecyꞌajtpyɨ. Per yɨ Dios yꞌayucnajtzcapxɨɨybɨ ñecy etz Dios ycötujcɨn necy yejc tɨyꞌajt jecyꞌajty co Dios xymöhuaanɨm tudägyꞌajtɨn.
\v 22 Jaduꞌn Dios yajꞌahuimbidaangɨxy tudägy tügꞌócɨy jäy huɨdibɨ mɨbɨjcp Jesucristo, caꞌ ñejɨty pɨnjäy ajcxy, pen judíojäy o pen caꞌ judíojäy ajcxy.
\v 23 Com nidügꞌócɨy naaxhuiñyjäy tɨ ytundɨgooygɨxy. Ni tüg jäy yhuädzꞌajtɨn ycanaybadyii mɨɨd Dios yhuädzꞌajtɨn yꞌoyꞌajtɨn.
\v 24 (Mɨɨd co nidügꞌócɨy jäy ytundɨgooygɨxy), paady ycɨxpɨ Dios mɨjmayꞌajt mɨjꞌoyꞌajt tuñ ninɨgoob mɨɨd tügꞌócɨy jäy ajcxy, e Jesucristo tɨ cojuydäy tügꞌócɨy ajcxy ypocy, e jaduꞌn yajꞌahuimbity tudägy nidügꞌócɨy jäy ajcxy huɨdijaty mɨbɨjccɨxp Jesucristo.
\v 25 Dios yquejx yꞌung ya naaxhuiñ, jaydëbɨ huinmeecxɨp jäy ajcxy ypocy, mɨɨd co Jesucristo tɨ yꞌögy mɨɨd ajcxy ypocy ycɨxpɨ. Dios yhuinmeecxɨp jäy ajcxy ypocy co ajcxy mɨbɨgɨpy Jesucristo. Jayɨjp caꞌnɨ anajty Jesucristo miiñ ya naaxhuiñ, Dios ooy mɨmecxtujcy jäy ajcxy, caꞌ anajty mɨɨdɨty jotcöduuyb jäy ajcxy ypocy.
\v 26 Jadachambɨ xɨɨ tiempo Dios tɨ yajꞌoyɨ̈y jaduꞌn nej jëb huinmeecxɨpy jäy ajcxy ypocy, e jaduꞌn yajꞌahuimbidip ajcxy tudägy ma yɨꞌ yhuinduu. Jaduꞌn Dios tuñ jɨgɨx ñiguëxɨ̈gɨpy co Dios tudägy yɨꞌ, e tudägyꞌadaamnɨ yɨꞌ, co cöbɨcy jäy, yɨ pɨnjaty mɨbɨjcp Jesucristo.
\p
\v 27 ¿Ti huaad jäy ajcxy tungɨxy huɨdibɨ jëbɨ mɨɨd ñaygömayɨɨyb ma Dios? Caꞌ ni ti. ¿Naꞌamy co yjaduꞌnɨty? ¿Nej jëbɨ ajcxy ñaygömayɨɨyb mɨɨd co yajmɨjꞌajtcɨxy Dios ycötujcɨn? Caꞌ yjaduꞌnɨty. Caꞌ huaad ñaygömáyɨgɨxy cɨꞌm, com Dios tɨ yajꞌahuimbity jäy ajcxy tudägy huɨdibɨ mɨjpɨdacp Jesús.
\v 28 Paady nmɨnaꞌñɨch co jäy ajcxy yꞌahuimbity tudägy co ajcxy mɨbɨcy Jesucristo, e canan co janch ypaad jacuydungɨxy canaag cötujcɨn.
\p
\v 29 ¿Nej miich ajcxy mdijcɨxy Dios ytuñ mɨɨd ac yɨꞌyɨ judíojäy ajcxy, e caꞌ jacmɨɨd pɨnjaty? Caꞌ yjaduꞌnɨty. Dios tuumb mɨɨd janch nidügꞌócɨy jäy ajcxy.
\v 30 Ji tügpajc Dios, e yɨꞌ túꞌcɨy ytuñ mɨɨd judíojäy, etz nañ jaduꞌn jacjadyii jäy ajcxy. Dios yajꞌahuimbijtaayb tudägy nidügꞌócɨy jäy ajcxy co ajcxy mɨbɨjccɨxy Jesucristo.
\v 31 Co jaduꞌn nbaatɨm ndudägyꞌajtɨn mɨɨd co nmɨbɨjcɨm Jesucristo, caꞌ nmɨnaanɨm Dios anajty yɨꞌ ycötujcɨn je jecyɨp nyajcödɨgooyɨm. Hueꞌ janchtɨy nïgɨ anajty nmɨcꞌajtmooyɨm Dios ycötujcɨn.
\c 4
\s Je ijxpejt huɨdi Abraham yejc
\p
\v 1 ¿Nej nꞌocmɨnaanɨm? ¿Ti oybɨ tɨ paady ma Dios je Abraham ɨɨch ajt nmɨjꞌap nmɨjteedy?
\v 2 Co ixyipy Dios Abraham tudägy tɨ ixy, mɨɨd co oybɨ tɨ tuñ, jëbɨ Abraham ixyipy ñaygömayii. Per caꞌ huaad cɨꞌm ñaygömayii ma Dios.
\v 3 Jaduꞌn jaybety ymiiñ ma Dios ñecy ma jaduꞌn ymɨnaꞌñ: “Abraham ymɨjpɨdaacɨ Dios, e paady Dios jaduꞌn cöbɨjcy Abraham jaduꞌn nej tüg tudägyjäy.”
\v 4 Je jäy huɨdibɨ ymujuꞌñ patp mɨɨd ytung ycɨxpɨ, jada meeñ huɨdibɨ ymujuꞌñꞌajtpy caꞌ nɨgoo ñimöyii, hueꞌ tɨm paatɨp jaduꞌn mɨɨd ytung ycɨxpɨ.
\v 5 Yɨ jäy huɨdibɨ caꞌ jɨjpꞌixy co tudägyꞌajtɨn padaꞌñ ma Dios mɨɨd oyꞌajtɨn ycɨxpɨ huɨdibɨ ytumyb, jëyɨ ymɨbɨjcpy ymɨjpɨdacpy co Dios yajꞌahuimbidaꞌñyii tudägy. Yɨ jaduꞌmbɨ jäy tudägyꞌajtɨn ypadamy mɨɨd ymɨbɨjcɨn ycɨxpɨ.
\v 6 Jaybety ymiñ ma Dios ñecy co je David jecyꞌajty nimɨydacy tüg jäy huɨdibɨ ooy anajty jotcujc ñayjɨhuɨ̈yii mɨɨd co Dios tɨ yꞌixyii jaduꞌn nej jɨhuɨ̈y ytudägyjayɨty mɨɨd ymɨbɨjcɨn ycɨxpɨ, e caꞌ nmɨnaanɨm mɨɨd oyjäyꞌajtɨn ycɨxpɨ huɨdibɨ ytumyb.
\v 7 David jaduꞌn ymɨnañ:
\q Jotcujc je jäy ajcxy huɨdibɨ ypocy tɨ yhuinmecxyii, huɨdibɨ ypocy tɨ yajtɨgoyii.
\q
\v 8 Jotcujc je jäy huɨdibɨ Dios cöbɨjcɨp jaduꞌn nej jɨhuɨ̈y caꞌ ypocy ymɨɨdɨty.
\p
\v 9 ¿Nej janch tɨyꞌajt jaduꞌn co jada jotcujcꞌajtɨn huɨdibɨ David ñimɨydac jecyꞌajty, co ac yɨ judíojäy yɨꞌ ajcxy padaamb huɨdijaty mɨɨd tɨyꞌajt ma ñinïcx co Dios yjäyꞌadyii? Caꞌ yjaduꞌnɨty, yɨ jacjadyii jäy nañ jaduꞌn yɨꞌ ajcxy padaꞌñ jotcujcꞌajtɨn. Tɨ nmɨnáangɨxyɨch co Abraham ymɨbɨjcɨ Dios, e Dios ycöbɨjcɨ jaduꞌn nej jɨhuɨ̈y ytudägyɨty.
\v 10 ¿Nej mdijy Dios ycöbɨjcɨ Abraham jayɨjp caꞌ anajty yajtɨyꞌajttɨ̈yñɨ? o ¿tɨ anajty yajtɨyꞌajttɨ̈y? Dios ycöbɨjc Abraham jaduꞌn nej jɨhuɨ̈y ytudägyjäyɨty caꞌnɨ anajty pɨdacy tɨyꞌajt ma ñinïcx co Dios yjäyꞌadyii.
\v 11 Jayɨjp anajty Abraham tɨ mɨbɨcy Dios, e tɨ anajty Dios ycöbɨgyii. Jacꞌaxam Dios Abraham je cötujcɨn mooy co huen tɨyꞌajttɨ̈huɨpy yꞌung etz yꞌap yꞌoc. Jeꞌ jeꞌ ijxpejtꞌajtp co Dios anajty jayɨjp tɨ ycöbɨgyii jaduꞌn nej jɨhuɨ̈y ytudägyjäyɨty, caꞌnɨ anajty ymöyii cötujcɨn. Co Dios jaduꞌn ytuñ mɨɨd Abraham jaduꞌn nipaady nej jɨhuɨ̈y Abraham nmɨjteedyꞌajtɨm ɨɨch ajt nidügꞌócɨy huɨdibɨ cham mɨbɨjcp Jesús.
\v 12 Abraham nañ jaduꞌn ñimɨjteedyꞌajtyp yɨ judíojäy huɨdibɨ mɨbɨjcp mɨjpɨdacp Dios tɨm jaduꞌn nej yɨꞌ mɨbɨcy anajty Dios, jayɨjp caꞌnɨ anajty mɨɨdɨty tɨyꞌajt ma ñinïcx co Dios yjäyꞌadyii. Jaduꞌn nipaady nej jɨhuɨ̈y Abraham caꞌ nimɨjteedyꞌaty yɨ judíojäy huɨdibɨ caꞌ mɨbɨcy Dios. 
\s Je huɨdibɨ Dios tɨ xyajꞌahuanɨɨyɨm tɨ ycɨxy ycaꞌpx mɨɨd je mɨbɨjcɨn
\p
\v 13 Mɨɨd co Abraham etz yꞌap yꞌoc ymɨbɨjcpy ymɨjpɨdacpy anajty ajcxy Dios, e paady anajty Dios yajꞌahuimbidáanɨgɨxy tudägy, e paady Dios nɨmay Abraham co yɨ naaxhuiñybɨ yɨꞌ ajcxy jeꞌ adaanɨp. Canan jaduꞌn ajcxy Dios ñɨmayɨ co ymöhuáanɨgɨxy je naaxhuiñybɨ mɨɨd co anajty nidügꞌócɨy ajcxy tɨ cuydungɨxy Dios ycötujcɨn. 
\v 14 Co Abraham etz yꞌap yꞌoc padaangɨxy je naaxhuiñybɨ huɨdibɨ yajꞌahuanɨɨyɨ, mɨɨd co ajcxy tɨ cuydundaayɨ Dios ycötujcɨn, paady naadɨgɨ̈ꞌajtp ixyipy co nmɨbɨjcɨm co Dios xyajꞌahuimbidaanɨm tudägy. E nañ naadɨgɨ̈ꞌajtp ixyipy co Dios je Abraham nɨmay: “Je naaxhuiñybɨ miich jeꞌ mjeꞌadaanɨp, com tɨ xymɨbɨcyɨch.”
\v 15 Je pɨnjaty mɨjpɨdaacp Dios ycötujcɨn je jecyɨp, Dios yɨꞌ tzaachytunaanɨp, com caꞌ cuydundaaygɨxy. Pɨnjaty caꞌ mɨɨdɨty Dios ycötujcɨn huɨdibɨ jaybetyɨp, caꞌ yɨꞌ mɨdundɨgooygɨxy jadayaabɨ cötujcɨn.
\p
\v 16 Mɨɨd co Abraham anajty Dios tɨ mɨbɨcy, paady ycɨxpɨ Dios ñɨmaayɨ co je naaxhuiñybɨ yɨꞌ jeꞌadaanɨp. Jaduꞌn Dios mayꞌajt tuñ mɨɨd Abraham, jaydëbɨ tügꞌócɨy pɨnjaty mɨbɨjcp Dios, tɨm jaduꞌn nej Abraham mɨbɨjcy Dios, jëbɨ ajcxy paatcɨxy yɨ oyꞌajtɨn huɨdibɨ Dios yajnɨmay Abraham co möhuaꞌñ je oyꞌajtɨn huɨdibɨ yegamyb ninɨgoobɨ. Dios ycuydunamyb yɨꞌ yꞌayuc mɨɨd tügꞌócɨy jäy huɨdibɨ mɨbɨjcp Dios, tɨm jaduꞌn nej Abraham anajty mɨbɨcy Dios, canan yɨ́ꞌyɨ judíojäy ajcxy padam oyꞌajtɨn, com Abraham ijxpejt yejc ma tügꞌócɨy jäy ajcxy.
\v 17 Ma Dios yhuinduu jaduꞌn nipaady nej jɨhuɨ̈y Abraham ɨɨch ajt nmɨjꞌapꞌajtɨm nmɨjteedyꞌajtɨm nidügꞌócɨy huɨdibɨ mɨbɨjcp Dios, com Abraham nañ jaduꞌn ymɨbɨjcpy anajty Dios. Com jaduꞌn jaybety ymiiñ ma Dios ñecy co Dios jecyꞌajty jaduꞌn nɨmay Abraham: “Ɨɨch miich nyajnïbɨjcpy co miich mnimɨjꞌapꞌadamyb mnimɨjteedyꞌadamyb tügꞌócɨy je mayjäy huinduꞌmybɨ naax huinduꞌmybɨ cajp.” E Dios ycuydunɨpy yɨꞌ yꞌayuc com mɨcꞌajt mɨɨd, ixtɨ jaydëbɨ yajjugypɨgɨpy jadügꞌoc jäy tɨɨbɨ yꞌóꞌccɨxy. E nañ mɨcꞌajt mɨɨd jaydëbɨ aneꞌmɨn pɨdägy co huen yjiiꞌadɨpy huɨdijaty caꞌ caꞌtnɨ.
\p
\v 18 Mɨɨd co Dios anajty tɨ ñɨmäyii co ymɨɨdꞌadamyb may yꞌap yꞌoc, paady ycɨxpɨ Abraham tɨ jɨjpꞌixy anajty co Sara anajty yꞌungꞌixaꞌñ. Canaag jɨmɨjt anajty jajɨjpꞌixy co huen yꞌung paadɨp. Tɨ anajty tiempo ñajxnɨ mɨna yꞌungꞌixɨpy. Hueꞌ Abraham ymɨbɨjc huɨdibɨ anajty Dios tɨ yajnɨmäyii co yɨꞌ mɨɨdꞌidamyb mayꞌamy yꞌap yꞌoc. Paady tɨ niꞌapꞌaty tɨ nideedyꞌaty mayꞌamy yꞌap yꞌoc.
\v 19 Abraham tɨ anajty ymɨcꞌajt ycɨjxnɨ com tɨ anajty ymɨjäyɨɨyñɨ. Ymɨɨd anajty mɨgoꞌpx jɨmɨjt, e nañ yɨꞌ ytöxyɨjc Sara ni tüg anajty tɨ ycaꞌungꞌixy, per Abraham yjacmɨbɨjcyp anajty co Dios cuydunaꞌñ yꞌayuc mɨɨd yɨꞌ.
\v 20 Abraham caꞌ anajty ixmach yɨ ymɨbɨjcɨn jaduꞌn nej anajty Dios ymɨɨdɨty ymɨcꞌajt jaydëbɨ cuydunɨp yɨꞌyꞌayuc. Chi Abraham ɨɨbaty capxpaty Dios.
\v 21 Com Abraham tɨ anajty huinmaꞌñ ypɨdägy ma Dios co yɨꞌ ymɨɨd ymɨcꞌajt jaydëbɨ ycuydunɨɨyb yɨꞌ yꞌayuc huɨdibɨ yajꞌahuanɨɨy.
\v 22 Com Abraham ymɨjpɨdaacɨp anajty Dios yꞌayuc, paady Dios anajty tɨ cöbɨcy Abraham, e jaduꞌn anajty tɨ yajnaxy nej jɨhuɨ̈y ytudägyjäyɨty.
\p
\v 23 Dios ymoy Abraham jada yꞌayuc huɨdibɨ jaybety, canan jëdaꞌajty Abraham yajmoy, nañ yajmoyday mayjäy.
\v 24 Nañ jaduꞌn jaybety miñ jada ayuc mɨɨd ɨɨch ajt ycɨxpɨ. Dios nañ xycöbɨgaanɨm jaduꞌn nej jɨhuɨ̈y ajt ndudägyjäyɨty mɨɨd co nmɨbɨjcɨm Dios huɨdibɨ tɨ yajjugypɨjcy anajty jadügꞌoc ajt nHuindzɨn Jesucristo.
\v 25 Dios ycɨ̈yejc Jesús huen yajꞌögyii mɨɨd ajt nbocy ycɨxpɨ. E nañ Dios yajjugypɨjc Jesús jadügꞌoc jaydëbɨ xyajꞌahuimbijtɨm tudägy ma Dios.
\s Je nej yhuimbɨdzɨmnɨ co Dios xycöbɨjcɨm tudägyjäy
\c 5
\p
\v 1 Mɨɨd co nmɨbɨjcɨm nmɨjpɨdaacɨm ajt nHuindzɨn Jesucristo, paady Dios tɨ xyajꞌahuimbijtɨm tudägy. E mɨɨd co Dios tɨ xyajꞌahuimbijtɨm tudägy, paady jotcujc nꞌijtɨm mɨɨd Dios.
\v 2 Co nmɨbɨjcɨm nmɨjpɨdaacɨm Cristo, chi nbaatɨm je mayꞌajt je oyꞌajt huɨdibɨ Dios ytumyb mɨɨd ɨɨch ajt, e jaduꞌn oy nꞌijtɨm mɨɨd Dios, caꞌ ma ti tzip. Nañ ooy njotcugɨɨyɨm, mɨɨd co njɨjpꞌijxɨm co nbadaanɨm Dios yꞌoyꞌajtɨn.
\v 3 Canan jëdaꞌajty nmɨjotcujcꞌajtɨm co nbadaanɨm Dios yꞌoyꞌajtɨn, nañ jaduꞌn tzoc mɨjotcujcꞌajtɨm ayoꞌn tzaachypɨ. Com nejhuɨɨyɨm co nmɨnajxɨm nyajnajxɨm tzaachypɨ, huinꞌit jëbɨ nyajtunɨm mecxtujcɨn.
\v 4 E co nyajtunɨm mecxtujcɨn, cömay najxɨm ma Dios, e co anajty cömay tɨ nnajxɨm, chi njɨjpꞌijxɨm co nbadaanɨm oyꞌajtɨn ma Dios.
\v 5 Com njɨjpꞌijxɨm co nbadaanɨm Dios yꞌoyꞌajtɨn, chi caꞌ ndajɨm nmayɨm com Dios tɨ yɨꞌ yEspíritu Santo xyꞌadɨgɨɨyɨm xyjottɨgɨɨyɨm huɨdibɨ xyajnejhuɨɨyɨm jaduꞌn nej Dios xychojcɨm xyjɨhuɨɨyɨm.
\p
\v 6 Jecyꞌajty co anajty caꞌnɨ Jesucristo ymiñ, je naaxhuiñyjäy caꞌ anajty mɨcꞌajt mɨɨdɨty nej cɨꞌm yꞌahuimbíjtcɨxɨpy tudägy. Co yhuaadꞌajtnɨ je xɨɨ je tiempo huɨdibɨ Dios tɨ yajꞌixtägy, huinꞌit Cristo yꞌoꞌcy mɨɨd ɨɨch ajt nbocy ycɨxpɨ mɨɨd co ndɨgooyɨm mɨɨd Dios ytɨyꞌajt.
\v 7 Co ixyipy nꞌijxtaayɨm pɨnjaty codɨnähuɨp tüg jäy tudägypɨ ma yɨ oꞌcɨn, caꞌ ni pɨn nbaatɨm. Co iyxipy nꞌijxtaayɨm pɨnjaty codɨnähuaamyb tüg jäy huɨdibɨ ooy ycömayɨty ma yɨ oꞌcɨn, caꞌ yjecyɨty co nbaatɨm tüg metz.
\v 8 Per Dios yajniquëxɨ̈cyp jaduꞌn nej xychojcɨm xyjɨhuɨɨyɨm mɨjcajee co quejxy Cristo huen oꞌcy mɨɨd ajt nbocy ycɨxpɨ, oy anajty ɨɨch ajt ooy njacpocytuunɨm.
\v 9 Cristo tɨ xyajꞌahuimbijtɨm tudägy co ñɨꞌpy tɨ temy tɨ yocy mɨɨd ajt nbocy ycɨxpɨ, e nañ Cristo nïgɨ mayꞌajt tunaꞌñ mɨɨd ɨɨch ajt ycɨxpɨ co anajty xyajnïdzögaanɨm ajt nꞌalma, jaduꞌn nej Dios tzaachytunaꞌñ naaxhuiñyjäy mɨɨd ajcxy ypocy ycɨxpɨ.
\v 10 Co anajty caꞌ Cristo ymiiñɨ ya naaxhuiñ, huinꞌit anajty nmɨdzipꞌajtɨm Dios. Je tzip capxy tɨ Dios yajꞌoyɨ̈y co quejxy yꞌung ya naaxhuiñ, e yꞌoꞌcy mɨɨd ajt nbocy ycɨxpɨ. Mɨɨd co Cristo xycodɨnaayɨm ma yɨ oꞌcɨn, paady nïgɨ xypubejtɨm xypudɨgɨɨyɨm cham co yajpaady juugy.
\v 11 Canan jadaꞌajty co Jesucristo xyajnïdzögaanɨm ajt nꞌalma, nañ jaduꞌn tzoc xondaacɨm mɨɨd co nꞌijtɨm mɨɨd Dios, mɨɨd je mayꞌajt huɨdibɨ ajt nHuindzɨn Jesucristo tɨ tuñ mɨɨd ɨɨch ajt ycɨxpɨ co yajꞌoyɨɨy je tzip nej anajty Dios nmɨdzipꞌajtɨm, jëbɨ jotcujc nꞌijtɨm mɨɨd Dios.
\s Adán etz Cristo
\p
\v 12 Mɨɨd jada ycɨxpɨ co yɨ pocytunɨɨ chondacy jecyꞌajty ya naaxhuiñ mɨɨd tügpɨ jäy. E co jäy ytundɨgoy ogaꞌn mɨɨd Dios, paady ycɨxpɨ je oꞌcɨn ytɨgɨɨy ya naaxhuiñ. Mɨɨd co tügꞌócɨy jäy mɨdundɨgooygɨxy Dios, paady tügꞌócɨy jäy patcɨxy yɨ oꞌcɨn.
\v 13 Janch tɨyꞌajt jaduꞌn co jäy ajcxy ytundɨgooy jecyꞌajty jayɨjp caꞌnɨ anajty Dios yecy yɨꞌ ycötujcɨn cojaaybɨ, e co caꞌ jäy anajty ajcxy cötujcɨn mɨɨdɨty jecyꞌajty, paady caꞌpɨn tɨyduñ ajcxy nej ajcxy ytundɨgooy.
\v 14 Caꞌ ñejɨty, oy ajcxy anajty caꞌ mɨɨdɨty Dios ycötujcɨn, nañ jaduꞌn yꞌoꞌctay ajcxy, chondacy mɨɨd Adán, ixtɨ yjaꞌty ma Moisés yxɨɨ ytiempo. Nañ oꞌctay jäy ajcxy huɨdibɨ tɨgachjaty tundɨgooy, caꞌ yjaduꞌnɨty nej Adán ogaꞌn ytundɨgooy. Ɨɨch ajt nninïcx ymɨɨd je jɨbɨcpɨ huɨdibɨ nbaatɨm ma Adán. Per ajt njemyjot njemyhuinmaꞌñ nbaatɨm ma Cristo.
\p
\v 15 Je pocytunɨɨ huɨdibɨ Adán yajtzondac, caꞌ naybadyii mɨɨd je tudägyꞌajtɨn huɨdibɨ Dios tɨ xyñimooyɨm. Mɨɨd je pocytunɨɨ ycɨxpɨ huɨdibɨ tüg jäy tɨ yajtzondägy, tügꞌócɨy jäy öcɨn tɨ paady. Dios mɨɨd tüg yëydɨjc, je Jesucristo, mɨjmayꞌajt tuñ mɨɨd jäy ajcxy ycɨxpɨ co yajꞌahuimbijtcɨxy tudägy, chi mayjäy tudägyꞌajtɨn tɨ paady.
\v 16 Per je tudägyꞌajtɨn huɨdibɨ Dios xyñimooyɨm, caꞌ jaduꞌn naybadyii mɨɨd huɨdibɨ Adán ytuun. Mɨɨd co Adán ytundɨgoy tügtecy mɨɨd Dios, paady ycɨxpɨ mayjäy oꞌcɨn tɨ paady mɨɨd tüg pocy ycɨxpɨ. Mɨɨd co Dios tɨ xyñimooyɨm tudägyꞌajtɨn mɨɨd Jesucristo, paady mayjäy tudägyꞌajtɨn yꞌoyꞌajtɨn tɨ patcɨxy huɨdibɨ mɨbɨjcp Cristo.
\v 17 Mɨɨd co tüg jäy capxycömɨdodacy Dios, paady tügꞌócɨy jäy tɨ patcɨxy yɨ oꞌcɨn. Mɨɨd co tüg jäy, je Jesucristo, mayꞌajt oyꞌajt tuñ co xyajꞌahuimbijtɨm tudägy, paady tügꞌócɨy jäy ajcxy huɨdibɨ mɨbɨjcp Jesucristo ypadaangɨxyp jotcujcꞌajtɨn etz nañ chɨnähuaangɨxy jiiby tzajpjoty ma Jesús yꞌaneꞌmy.
\p
\v 18 Mɨɨd co tüg jäy ytundɨgoy ogaꞌn, paady nidügꞌócɨy je mayjäy ypocycäy ajcxy, e patcɨxy yɨ oꞌcɨn. Nañ tɨm jaduꞌn mɨɨd tüg jäy huɨdibɨ tɨ chɨnäy tudägy, Dios mayjäy yajꞌahuimbijty ajcxy tudägy, e tɨ patcɨxy yjugyꞌajtɨn huɨdibɨ caꞌ ycɨxɨpy ytɨgoyɨpy nimɨna xɨɨ.
\v 19 Mɨɨd co tüg jäy capxycömɨdodacy Dios, paady tügꞌócɨy jäy tɨ patcɨxy je pocy. Nañ mɨɨd co tügpɨ jäy capxymɨdoy Dios, paady je mayjäy tudägyꞌajtɨn tɨ patcɨxy huɨdibɨ mɨbɨjcpɨ Jesucristo.
\p
\v 20 Co Dios moy jäy ajcxy yɨꞌ ycötujcɨn huɨdibɨ cojaayɨp, chi nïgɨ jäy ajcxy nejhuɨɨygɨxy co ypocytungɨxy. Je mayꞌajt oyꞌajt huɨdibɨ Dios ytumyb, nïgɨ yɨꞌ yꞌoyɨty, caꞌydɨ je mɨjpocy huɨdibɨ jäy ajcxy ytungɨxyp.
\v 21 Tɨm jaduꞌn nej co jäy ypocytungɨxy, huinꞌit ajcxy pocymɨɨd chɨnaaygɨxy, ixtɨ mabaad anajty yꞌöccɨxy mɨɨd ypocy ycɨxpɨ. Nañ tɨm jaduꞌn co Dios mayꞌajt tuuñ co yajꞌahuimbity jäy ajcxy tudägy, huinꞌit Dios aneꞌmy yɨꞌ ajcxy chɨnaayɨn mɨɨd tudägy huinmaꞌñ, etz nañ xymöhuaanɨm jugyꞌajtɨn huɨdibɨ caꞌ ycɨxɨpy ytɨgoyɨpy nimɨna, co nmɨjpɨdaacɨm ajt nHuindzɨn Jesucristo huɨdibɨ yjugyꞌajtɨn yejc mɨɨd ajt nbocy ycɨxpɨ.
\s Oꞌcy mɨɨd yɨ pocy ycɨxpɨ, jugyꞌaty mɨɨd Cristo ycɨxpɨ
\c 6
\p
\v 1 ¿Nej nꞌocmɨnaanɨm? ¿Tzoc ooy nïgɨ tundɨgooyɨm jɨgɨx Dios nïgɨ mayꞌajt tunɨpy mɨɨd ɨɨch ajt?
\v 2 Caꞌ jaduꞌn ytɨyꞌajtɨty, caꞌ huaad njacpocytuunɨm. Co nmɨbɨjcɨm Jesucristo, chi jaduꞌn nipaady nejɨhuɨ̈y tɨ nꞌoꞌcɨm, e cham caꞌ nꞌijtɨm pocymɨɨd.
\v 3 ¿Nej caꞌ mnejhuɨɨygɨxy jada tɨyꞌajt? Co nnɨɨbejtɨm mɨɨd Jesucristo yxɨɨ, chi nꞌijtɨm mɨɨd Jesucristo. Jaduꞌn nipaady nej jɨhuɨ̈y tɨ nꞌoꞌcɨm quipxy mɨɨd Cristo co yɨꞌ yꞌoꞌcy mɨɨd ajt nbocy ycɨxpɨ.
\v 4 Co ɨɨch ajt nnɨɨbejtɨm jaduꞌn nipaady nej jɨhuɨ̈y tɨ nꞌoꞌcɨm, e tɨ nnaaxtɨgɨɨyɨm quipxyɨ mɨɨd Jesucristo. Dios Teedy mɨɨd ymɨcꞌajtɨn oybɨ yajjugypɨjcy Cristo co anajty tɨ yꞌögy, chi Cristo paty jemybɨ jugyꞌajtɨn, nañ jaduꞌn ɨɨch ajt tɨ nbaatɨm jemybɨ jugyꞌajtɨn quipxy mɨɨd yɨꞌ, paady copɨcy ndzɨnaayɨm mɨɨd jemybɨ jot jemybɨ huinmaꞌñ.
\p
\v 5 Co nmɨbɨjcɨm Jesucristo, chi nꞌijtɨm mɨɨd yɨꞌ, co yɨꞌ tɨ yꞌögy, jaduꞌn nipaady nej jɨhuɨ̈y tɨ nꞌoꞌcɨm quipxy mɨɨd yɨꞌ. Co Jesucristo yjugypɨjcy mɨɨd jemybɨ yjugyꞌajtɨn, nañ jaduꞌn ɨɨch ajt nbaatɨm jemybɨ jugyꞌajtɨn quipxy mɨɨd yɨꞌ.
\v 6 Nejhuɨɨyɨm ɨɨch ajt nej anajty jɨbɨc-jot jɨbɨc-huinmaꞌñ nmɨɨdꞌajtɨm jayɨjpꞌaty caꞌnɨ anajty nmɨbɨjcɨm. Jaduꞌn nipaady nej jɨhuɨ̈y ajt njɨbɨcjot njɨbɨc-huinmaꞌñ tɨ yꞌögy quipxy mɨɨd Cristo co yɨꞌ yꞌoꞌcy cruudzcɨ́xy. Cristo tɨ yꞌögy mɨɨd ajt nbocy ycɨxpɨ, jɨgɨx jëbɨ nꞌijxmajtzɨm pocytunɨɨ huinmaꞌñ, etz jɨgɨx jëbɨ je pocytunɨɨ caꞌ xyjacꞌaneꞌmɨm ajt njot nhuinmaꞌñ.
\v 7 Com pɨnjaty tɨ yꞌögy, yɨ ypocytunɨɨ caꞌ ti mɨcꞌajt jacmɨɨdɨty ma yjot yhuinmaꞌñ.
\v 8 Pen jaduꞌn nipaady nej jɨhuɨ̈y tɨ nꞌoꞌcɨm quipxy mɨɨd Cristo, paady ndzɨnähuaanɨm njugyꞌadaanɨm quipxy mɨɨd yɨꞌ.
\v 9 Nejhuɨɨyɨm co Cristo tɨ yjugypɨjcy co yꞌoꞌcy, e caꞌ yɨꞌ yꞌögaꞌñ jadügꞌoc. Yɨ oꞌcɨn caꞌ ti mɨcꞌajt jacmɨɨdɨty ma Jesucristo.
\v 10 Co Cristo tɨ yꞌoꞌcy mɨɨd jäy ypocy ycɨxpɨ, chi yꞌögy tüg tecypajc mɨɨd nidügꞌócɨy jäy ajcxy ycɨxpɨ. Co Jesucristo yjugypɨjcy, chi tügꞌócɨy huɨdibɨ yɨꞌ ytumyb ma yɨꞌ chɨnaydac yjugyꞌajttac, yɨꞌ ytumyb mɨɨd Dios ycɨxpɨ. 
\v 11 Nañ jaduꞌn miich ajcxy mhuinmaꞌñypɨdaaccɨx jaduꞌn nej jɨhuɨ̈y tɨ mꞌöccɨxy, e yɨ ypocytunɨɨ caꞌ ti mɨcꞌajt jacmɨɨdɨty ma miich ajcxy mdzɨnaayɨn. E jadachambɨ xɨɨ tiempo tzɨnaaygɨx mɨɨd Dios ycɨxpɨ quipxy mɨɨd Jesucristo ɨɨch ajt nHuindzɨn.
\p
\v 12 Paady ycɨxpɨ caꞌ huaad xyꞌaneꞌmgɨxy je jɨbɨc-huinmaꞌñ huɨdibɨ ajcxy mninïcx yjanijotꞌajtpy.
\v 13 Caꞌ huaad mgɨ̈yejccɨxy yɨ mninïcx ma pocytunɨɨ. Naygɨ̈yéjcɨgɨx ma Dios, ixmajtzcɨx yɨ pocytunɨɨ. Jaduꞌn nipaady nej jɨhuɨ̈y tɨ mꞌöccɨxy, e tɨ mjugypɨjccɨxy jadügꞌoc. Hueꞌ janchtɨy cɨ̈yejccɨx yɨ mninïcx ma Dios, jaydëbɨ mdzɨnáaygɨxɨpy mɨɨd ajcxy tudägy mjot mhuinmaꞌñ, e cuydungɨx Dios chojcɨn.
\v 14 Jadachambɨ xɨɨ tiempo caꞌ miich ajcxy mdzɨnaaygɨxy pocymɨɨd, jaduꞌn nej jecyꞌajty ajcxy mdzɨnaaygɨxy co anajty ajcxy mguydungɨxy Dios ycötujcɨn je jecyɨp. Hueꞌ janchtɨy tzɨnaaygɨx mɨɨd Dios ycɨxpɨ, com Dios mɨj mayꞌajt tɨ tuñ mɨɨd miich ajcxy.
\s Tüg ijxpejt huɨdibɨ yajpatp ma nꞌijtɨm yajtuñ
\p
\v 15 ¿Ti huaad nduunɨm? ¿Nej jëbɨ huaad njacpocytuunɨm? Com Dios mɨjmayꞌajt tɨ tuñ co tɨ jöch ajt nbocy etz nxɨ̈huɨn, e Dios ycötujcɨn, je jecyɨp, caꞌ xyjacyajpocycähuɨm. Caꞌ huaad njacpocytuunɨm.
\v 16 ¿Mnejhuɨɨyb miich ajcxy jada tɨyꞌajt? Co ixyɨpy pɨnjaty ñaygɨ̈yegyii co ytunaꞌñ mɨɨd tüg huindzɨn huɨdibɨ mɨc yajtumb, copɨcy co je tumbɨ capxymɨdohuɨpy je yhuindzɨn. Nañ tɨm jaduꞌn nipaady mɨɨd pocytunɨɨ. Pen mnaygɨ̈yejcɨp mɨɨd pocytunɨɨ, huinꞌit anajty pocy xyꞌaneꞌmy ma mdzɨnaayɨn, ixtɨ mabaad anajty mꞌögy mɨɨd mbocy ycɨxpɨ. Co mnaygɨ̈yéjcɨgɨxɨpy ma Dios, huinꞌit ajcxy mgapxymɨdohuɨpy Dios, e mdzɨnähuɨp ajcxy tudägy.
\v 17 Jecyꞌajty miich ajcxy anajty pocy xyꞌaneꞌmgɨxy, co jɨbɨc-huinmaꞌñ mdungɨxy. Nyajnajxpyɨch jäygɨdaacɨn ma Dios co jadachambɨ tiempo tɨ mgöbɨjccɨxy cɨxyjot huinɨjot Dios ytɨyꞌajt huɨdibɨ xyajꞌixpɨjccɨxp, e mgapxymɨdoogɨxy Dios.
\v 18 Cristo tɨ xyajꞌaꞌoyɨɨyɨ ajcxy mjot mhuinmaꞌñ, caꞌydɨ mjactzɨnaaygɨxy pocymɨɨd. Tɨ mhuinmaꞌñ mbɨdaaccɨxy co mgapxymɨdohuaangɨxy Dios e mdzɨnähuaangɨxy tudägy.
\v 19 (Ngapxhuijpyɨch miich ajcxy cham mɨɨd naaxhuiñyjäy yꞌayuc ytɨyꞌajt, com caꞌ yajxon mhuinjɨhuɨɨygɨxy Dios yꞌayuc ytɨyꞌajt.) Jaduꞌn nej jecyꞌajty co caꞌ anajty mmɨbɨjccɨxy Cristo, ooy anajty mnaygɨ̈yéjcɨgɨxy xɨɨ ya ma jɨbɨc-huinmaꞌñ, e mdundɨgooygɨxy xɨɨ ya mɨɨd mninïcx. Ooy miich anajty ajcxy mɨɨdɨty jɨbɨcpɨ ma mjot mhuinmaꞌñ, ooy anajty mdundɨgooygɨxy. Jadachambɨ xɨɨ tiempo naygɨ̈yéjcɨgɨx ma Jesucristo, jɨgɨx jëbɨ huaad mdungɨxy mɨɨd tudägy jot tudägy huinmaꞌñ, etz jɨgɨx jëbɨ huaad mdzɨnaaygɨxy mɨɨd huädz jot huädz huinmaꞌñ.
\p
\v 20 Co anajty yɨ jɨbɨc jot jɨbɨc-huinmaꞌñ xyꞌaneꞌmgɨxy, chi caꞌ je oyjot oyhuinmaꞌñ anajty xyꞌocꞌanéꞌmgɨxnɨ.
\v 21 ¿Ti jotcujcꞌajtɨn miich ajcxy tɨ mbaatcɨxy co jɨbɨc jot jɨbɨc-huinmaꞌñ mdungɨxy huɨdibɨ jadachambɨ tiempo mdzöyduꞌnꞌajtɨp ajcxy? Yɨ jɨbɨc jot jɨbɨc-huinmaꞌñ xyyajnɨcxp ajcxy ma yɨ oꞌcɨn.
\v 22 Jadachambɨ xɨɨ tiempo Dios tɨ yajꞌoyɨ̈y nej jëbɨ mꞌixmájtzcɨxɨpy yɨ pocytunɨɨ, caꞌ huaad mjactzɨnaaygɨxy pocymɨɨd. Tɨ mꞌahuimbijtcɨxy Dios ytumbɨ, jadayaabɨ tzɨnaayɨn xymöhuɨp ajcxy mjotcujcꞌajtɨn. Tɨydudägy cham tzɨnaaygɨx mɨɨd Dios ycɨxpɨ, e mbaadɨp ajcxy jugyꞌajtɨn huɨdibɨ caꞌ ycɨxɨpy ytɨgoyɨpy nimɨna.
\v 23 Yɨ pocytunɨɨ ycojuꞌñ yɨꞌ jeꞌ yɨ oꞌcɨn. Per je huɨdibɨ Dios xyñimooyɨm, hueꞌ jeꞌ je jugyꞌajtɨn huɨdibɨ ni camɨnaxɨɨ ycɨxɨpy ytɨgoyɨpy co nꞌijtɨm mɨɨd ajt nHuindzɨn Jesucristo.
\c 7
\s Tüg ijxpejt huɨdibɨ yajpatp ma pɨcychɨnaayɨn
\p
\v 1 Miich ajcxy mɨgügtɨjc huɨdibɨ tɨ mꞌixpɨcy Dios ycötujcɨn huɨdibɨ Moisés yjaay, mnejhuɨɨyb miich ajcxy co yɨ naaxhuiñyjäy ycötujcɨn ymɨɨd mɨcꞌajt ma ajt ndzɨnaayɨn, ixtɨ mabaad anajty nꞌoꞌcɨm.
\v 2 Paady co tüg töxyjäy ycivilbɨcy mɨɨd tüg yëydɨjc, caꞌ huaad ixmach ñäy mabaad chɨnaꞌy yjugyꞌaty. Co janchtɨy anajty je töxyjäy ñiyëydɨjc tɨ yꞌöcnɨ, huinꞌit anajty caꞌ ocmɨɨdɨñ ñäy yꞌaneꞌmɨn.
\v 3 Ooy anajty mɨj ytundɨgoy je töxyjäy co ypɨgɨpy mɨɨd huingbɨ yëydɨjc pen jugyꞌajtnɨ je ñäy. Coonɨ janchtɨy anajty ñiyëydɨjc tɨ yꞌögy, huinꞌitnɨ janchtɨy jëbɨ ypɨcy mɨɨd huingbɨ yëydɨjc, e caꞌp jeꞌ anajty ytundɨgoy.
\p
\v 4 Miich ajcxy nmɨgügtɨjcɨch, judíojäy huɨdibɨ mɨbɨjcp Cristo, jayɨjp co anajty caꞌnɨ mmɨbɨjccɨxy Cristo, je Dios ycötujcɨn huɨdibɨ Moisés yjaay xyꞌaneꞌmgɨxp anajty ma mdzɨnaayɨn. Jadachambɨ xɨɨ tiempo yɨ jaduꞌmbɨ cötujcɨn caꞌ yɨꞌ xyjacꞌanéꞌmgɨxnɨ. Jadachambɨ Cristo ytɨyꞌajt xyꞌaneꞌmgɨxp, je Cristo huɨdibɨ Dios yajjugypɨjc jadügꞌoc co yꞌoꞌcy. Jaduꞌn miich ajcxy nipaady nej je töxyjäy huɨdibɨ ñiyëydɨjc tɨ yꞌögy, e tɨ ypɨjctɨgach. Cristo miich ajcxy xyñigohuajcꞌajtp, jɨgɨx jëbɨ mdzɨnaaygɨxy mɨɨd Dios ycɨxpɨ.
\v 5 Jayɨjp caꞌnɨ anajty nmɨbɨjcɨm Jesucristo ooy anajty nguyduunɨm huɨdibɨ ajt nninïcx ñijotꞌajt. Je huinꞌit tiempo anajty je jɨbɨc-huinmaꞌñ xyꞌaneꞌmɨm ma ajt ndzɨnaayɨn. Jeꞌ jeꞌ je jɨbɨc-huinmaꞌñ huɨdibɨ Dios xycapxꞌadujcɨm mɨɨd ycötujcɨn. Mɨɨd co jɨbɨc-huinmaꞌñ xyꞌaneꞌmɨm anajty ajt ma ndzɨnaayɨn etz xyajnɨcxaanɨm anajty ma yɨ oꞌcɨn.
\v 6 Jadachambɨ xɨɨ tiempo Dios ycötujcɨn huɨdibɨ Moisés xymooyɨm, caꞌ ti mɨcꞌajt mɨɨdɨty ma ɨɨch ajt, tɨ nꞌixmajtzɨm. Jaduꞌn nipaady nejɨhuɨ̈y tɨ nꞌoꞌcɨm, e njugypɨjcɨm jadügꞌoc. Paady nguyduunɨm je jemybɨ tɨyꞌajt huɨdibɨ je Espíritu Santo xyajnejhuɨɨyɨm. Canan jeꞌ anajty nguyduunɨm je jecyꞌajtpy cötujcɨn.
\s Je pocy huɨdibɨ ijtp ma ɨɨch
\p
\v 7 ¿Nej nꞌocmɨnaanɨm? ¿Nej janch co je cötujcɨn huɨdibɨ Moisés xymooyɨm xyajpocytuunɨm anajty? Caꞌ yjaduꞌnɨty. Co ixyipy caꞌ anajty nmɨɨdɨdyɨch Moisés ycötujcɨn, caꞌ ixyipy ɨɨch tɨ nnejhuɨ̈yɨch co tɨ ndundɨgooyɨch ma Dios ytɨyꞌajt. Co ixyipy anajty caꞌ nꞌocnejhuɨ̈yɨch Moisés ycötujcɨn ma jaduꞌn ymɨnañ: “Caꞌ mmɨgüg ni ti mꞌadzojcɨpy.” Tɨ ixyipy ndundɨgooyɨch, e caꞌ ixyipy nejhuɨ̈yɨch ma tɨ ndundɨgooyɨch.
\v 8 Mɨɨd co ɨɨch jecyꞌajty ooy anajty nnijotꞌatyɨch pocytunɨɨ, paady ycɨxpɨ ɨɨch anajty ooy ndundɨgooyɨch. E jaduꞌn anajty nïgɨ ooy nꞌadzocyɨch, e jamɨnam anajty Dios ycötujcɨn co caꞌ mɨgüg ni ti mꞌadzojcɨpy. Co ixyipy Dios caꞌ jaduꞌn cötujcɨn tɨ pɨdägy, ni caꞌ ixyipy njɨhuɨꞌñybɨcyɨch co ndundɨgooyɨch.
\v 9 Jayɨjp co caꞌnɨ anajty nhuinjɨhuɨ̈yɨch Dios ycötujcɨn, huinꞌit tiempo caꞌ anajty njɨhuɨꞌñybɨcyɨch nbocy. E co nbatyɨch Dios ycötujcɨn, chi njɨhuɨꞌnybɨjcyɨch nbocy, e nañ tɨ nejhuɨ̈yɨch co tɨgoyaamɨch njugyꞌajtɨn.
\v 10 Dios ypɨdac ycötujcɨn jaydëbɨ nbáadɨbɨch jugyꞌajtɨn huɨdibɨ caꞌ ycɨxɨpy ytɨgoyɨpy. Per caꞌ jaduꞌn tɨ oyɨ̈y mɨɨd ɨɨch. Yɨ cötujcɨn tɨ xyajpocycäyɨch anajty, e jaduꞌn tɨgoyaambɨch anajty njugyꞌajtɨn.
\v 11 Jaduꞌn anajty huinmaꞌñ nmɨɨdɨdyɨch co nguydundähuaamybɨch Dios ycötujcɨn huɨdibɨ Moisés yjayhuɨꞌm. Pero com caꞌ njatyɨch nej nguydundähuɨbyɨch, chi nbocycäyɨch ma Dios. Je pocytunɨɨ tɨ xyhuinꞌɨɨñɨch, e mɨɨd jeꞌ ycɨxpɨ nbadaamybɨch anajty yɨ oꞌcɨn.
\p
\v 12 Tügꞌócɨy Dios yley etz Dios ycötujcɨn huɨdibɨ cojay ijtp, huädz yɨꞌ, tudägy yɨꞌ, ooy yɨꞌ.
\v 13 ¿Nej tɨgoyaambɨch anajty njugyꞌajtɨn mɨɨd co anajty nmɨꞌityɨch Dios oybɨ cötujcɨn? Caꞌ yjaduꞌnɨty. ¿Nej je Dios ycötujcɨn je oybɨ tɨ huimbɨdzɨmy jɨbɨc mɨɨd ɨɨch co xyajtɨgoyaanɨch anajty njugyꞌajtɨn? Caꞌ yjaduꞌnɨty. Nɨcxpɨch anajty ma yɨ oꞌcɨn mɨɨd nbocyɨch ycɨxpɨ. Je Dios ycötujcɨn xyajnejhuɨɨyɨch co oꞌcɨn nbadaamybɨch mɨɨd nbocyɨch ycɨxpɨ. Jaduꞌn Dios pɨdacy ycötujcɨn ya naaxhuiñ, jɨgɨx jëbɨ jäy ajcxy nejhuɨ̈huɨpy co mɨj ajcxy ooy ytundɨgooy mɨɨd Dios.
\p
\v 14 Nejhuɨɨyɨm co yɨ Dios ycötujcɨn huɨdibɨ Moisés xymooyɨm, jiiby yɨꞌ chooñ ma Dios, paady yɨꞌ ooy yꞌoyɨty. Ɨɨch nninïcx yɨꞌ jeꞌ huɨdibɨ nijotꞌajtp yɨ pocytunɨɨ, paady ndzɨnäyɨch pocymɨɨd.
\v 15 Caꞌ nhuinjɨhuɨ̈yɨch huɨdibɨ ndumybɨch. Yɨ oybɨ huɨdibɨ njatunaamybɨch, caꞌ njatyɨch nej ndunɨpyɨch. Yɨ jɨbɨcpɨ huɨdibɨ caꞌ yꞌoychojcnɨty, yɨꞌ ndumbyɨch.
\v 16 Co nduñɨch huɨdibɨ caꞌ ndzocyɨch, jaduꞌn niquëxɨ̈gy co Dios ycötujcɨn ooy oy yɨꞌ, tudägy yɨꞌ.
\v 17 Canan jotcujc ɨɨch jaduꞌn co nbocytuñɨch. Yɨ pocyꞌadzojcɨn huɨdibɨ nmɨɨdɨch ma njot nhuinmaꞌñ, yɨꞌ yɨꞌ xyajtundɨgooybɨch.
\v 18 Nejhuɨɨybɨch co caꞌ ti oybɨ yajpaady ma ɨɨch nninïcx. Ooy njatzocyɨch co oybɨ njatunaꞌñɨch, per caꞌ njatyɨch nej oybɨ ndunɨpyɨch.
\v 19 Je oybɨ huɨdibɨ njatunaamybɨch, caꞌ njaty nej ndunɨpyɨch. Je jɨbɨcpɨ huɨdibɨ caꞌ ndzocyɨch, jeꞌ ndumybɨch.
\v 20 Co yɨꞌ nduñɨch huɨdibɨ caꞌ ndzocyɨch, yɨꞌ jeꞌ je pocytunɨɨ huɨdijaty njotꞌájtɨbɨch nhuinmaꞌñꞌájtɨbɨch, yɨꞌ xyajtundɨgooybɨch.
\p
\v 21 Nbaatypɨch tüg tɨyꞌajt, co njatunaamybɨch oyhuinmaꞌñ, jiipy jɨbɨcpɨ nbaadyɨch ma njot nhuinmaꞌñɨch.
\v 22 Jotjoty huinmaꞌñyjoty ooy nmɨxondägyɨch Dios ycötujcɨn.
\v 23 E nañ mɨɨdɨch jotjoty huinmaꞌñyjoty yɨ jɨbɨcpɨ huɨdibɨ mɨꞌijxtɨnaayb je oybɨ. Yɨ tundɨgoyɨɨ yajpatp ma ɨɨch nninïcx. Yɨ nninïcxɨch yajpatp pocymɨɨd.
\p
\v 24 Paady caꞌ njotcújcɨgyɨch. ¿Pɨn jëbɨ xyñihuaꞌñɨch xyajnïdzögɨbɨch ma jadayaab nninïcxɨch huɨdibɨ xyajnɨcxpɨch ma yɨ oꞌcɨn?
\v 25 Dioscojuyip nyajnajxypɨch ma Dios co Dios, mɨɨd ajt nHuindzɨn Jesucristo, xyñihuaanɨm ma jada jɨbɨcpɨ huɨdibɨ ajt nninïcx xyñiꞌjotꞌajtɨm. Paady mɨɨd nꞌoyjot nꞌoyhuinmaꞌñ nguyduñɨch Dios ycötujcɨn. Mɨɨd nninïcxɨch nijotꞌatyɨch pocytunɨɨ.
\c 8
\s Je jugyꞌajt mɨɨd je Dios yjɨhuɨꞌñ ymɨcꞌajt ycɨxpɨ
\p
\v 1 Jadachambɨ tiempo janchtɨy Dios caꞌ tzaachytunaꞌñ yɨ jäy ajcxy huɨdijaty túꞌcɨy ijtp mɨɨd Cristo Jesús, huɨdibɨ ajcxy cuydumb Espíritu Santo chojcɨn, e caꞌ ajcxy tungɨxy nej je ninïcx nijotꞌajtcɨxy.
\v 2 Je Espíritu Santo tɨ xyyajpɨdzɨmɨm ma yɨ pocytunɨɨ etz ma yɨ oꞌcɨn huɨdibɨ yɨ jecyꞌajty cötujcɨn tɨ xymooyɨm. Je Espíritu Santo xyajtzɨnaayɨm huinɨxɨɨ, ɨɨch ajt huɨdibɨ ijtp túꞌcɨy mɨɨd Jesucristo.
\v 3 Mɨɨd co ɨɨch ajt ooy ninïcx ñijotꞌaty jɨbɨcpɨ, paady Dios xymooyɨm ycötujcɨn jecyꞌajty jaybety. Per je naaxhuiñyjäy yajtɨgoy ajcxy je cötujcɨn ymajaa, e caꞌ ymadacy nɨcxy xyajtzɨnaayɨm mɨɨd tudägy jot huinmaꞌñ. Paady Dios yquejxy ycɨꞌmꞌung huidi tɨ chɨnäy ya naaxhuiñ mɨɨd ñinïcx jaduꞌn nej ɨɨch ajt nmɨɨdɨty nninïcx, jɨgɨx jëbɨ ndzɨnaayɨm mɨɨd huädz jot huinmaꞌñ. Jaduꞌn Dios yꞌung chɨnay mɨɨd ñinïcx, per caꞌ ni ti bocy anajty mɨɨdɨty. E yɨꞌ tɨ yꞌögy mɨɨd ajt nbocy ycɨxpɨ, e jaduꞌn yajtɨgoy je pocy huɨdibɨ ajt nïgɨxꞌajtɨm.
\v 4 Jaduꞌn Dios ytuuñ jɨgɨx jëbɨ xyajtzɨnaayɨm mɨɨd tudägyjot tudägyhuinmaꞌñ jaduꞌn nej yɨꞌ ycötujcɨn yꞌaneꞌmy. Mɨɨd co nmɨɨdꞌajtɨm Dios yjɨhuɨꞌñ ymɨcꞌajt ma ajt njot nhuinmaꞌñ, paady jëbɨ huaad ndzɨnaayɨm mɨɨd tudägy-jot tudägy-huinmaꞌñ.
\p
\v 5 Yɨ jäy ajcxy huɨdibɨ caꞌ mɨɨdɨty Dios yjɨhuɨꞌñ ymɨcꞌajt ma yjot yhuinmaꞌñ, hueꞌ ajcxy ycapxymɨdooyb je jɨbɨcpɨ huɨdibɨ ajcxy ñinïcx ñijotꞌajtpy. Yɨ jäy ajcxy huɨdibɨ tzɨnaayb mɨɨd Dios yjɨhuɨꞌn ymɨcꞌajt ma yjot yhuinmaꞌñ, hueꞌ ajcxy ycapxymɨdooyb je Espíritu Santo. 
\v 6 Yɨ jäy ajcxy huɨdibɨ capxymɨdoob je jɨbɨcpɨ huɨdibɨ ajcxy ñinïcx ñijotꞌajtpy, hueꞌ ajcxy ypadaangɨxyp oꞌcɨn. Yɨ jäy ajcxy huɨdibɨ capxymɨdoob je Espíritu Santo, hueꞌ ajcxy ypadaangɨxyp jugyꞌajtɨn huɨdibɨ caꞌ ycɨxɨpy ytɨgoyɨpy, etz nañ ypadaangɨxyp jotcujcꞌajtɨn.
\v 7 Yɨ jäy ajcxy huɨdibɨ capxymɨdoob je jɨbɨcpɨ huɨdibɨ ajcxy ñinïcx ñijotꞌajtpy, hueꞌ ajcxy Dios ymɨdzipꞌajtpy, caꞌ capxymɨdohuaangɨxy Dios ycötujcɨn. Ni caꞌ jajtcɨxy nej ajcxy capxymɨdóogɨxɨpy Dios ycötujcɨn.
\v 8 Caꞌ Dios jäygɨdägy yɨꞌ ajcxy chɨnaayɨn huɨdibɨ ajcxy capxymɨdoob je jɨbɨcpɨ huɨdibɨ ajcxy ñinïcx ñijotꞌajtpy.
\p
\v 9 Per miich ajcxy caꞌ mgapxymɨdoogɨxy je jɨbɨcpɨ huɨdibɨ mninïcx nijotꞌajtpy. Com miich ajcxy mmɨɨd Dios yjɨhuɨꞌñ ymɨcꞌajt ma mjot mhuinmaꞌñ, e mguydungɨxpy je Espíritu Santo chojcɨn. Huenpɨnɨty huɨdibɨ caꞌ mɨɨdɨty Cristo yjɨhuɨꞌñ ymɨcꞌajt ma yjot yhuinmaꞌñ, caꞌ yɨꞌ yꞌity mɨɨd Cristo.
\v 10 Pen miich ajcxy ijtp mɨɨd Cristo, yɨ mjugyꞌajtɨn ajcxy caꞌ ycɨxɨpy ytɨgoyɨpy nimɨna, mɨɨd co Cristo tɨ xyajꞌahuimbijtcɨxy tudägy ma Dios yhuinduu. Yɨ mnaaxnïcx cɨxamb tɨgoyamb yɨꞌ.
\v 11 Pen ijtp ma miich ajcxy mjot mhuinmaꞌñ jeꞌ yjɨhuɨꞌñ ymɨcꞌajt je huɨdibɨ yajjugypɨjc jadügꞌoc je Cristo co yꞌoꞌcy. Nañ jaduꞌn miich ajcxy Dios xyajjugypɨgaangɨxy jadügꞌoc, co anajty tɨ mꞌöccɨxy, mɨɨd yɨꞌ yjɨhuɨꞌñ ymɨcꞌajt huidi yajpaatp ma miich ajcxy mjot mhuinmaꞌñ.
\p
\v 12 Mɨɨd co nmɨɨdꞌajtɨm Dios yjɨhuɨꞌñ ymɨcꞌajt paady ycɨxpɨ, miich ajcxy mɨgügtɨjc, copɨcy ngapxymɨdoohuɨm je Espíritu Santo, e caꞌ huaad ngapxymɨdoohuɨm je jɨbɨcpɨ huɨdibɨ ajt nninïcx ñijotꞌajtpy.
\v 13 Pen ooy ajcxy xytɨmyꞌaneꞌmgɨxy je jɨbɨcpɨ huɨdibɨ ajcxy mninïcx ñijotꞌajtyp, co mꞌöccɨxɨpy, yɨ mjugyꞌajtɨn cɨxɨp tɨgoyɨp yɨꞌ. Per pen mɨɨd Dios yjɨhuɨꞌñ ymɨcꞌajt miich ajcxy myajtɨgoy je jɨbɨcpɨ huɨdibɨ mninïcx ñijotꞌajtpy, co mꞌöccɨxɨpy, yɨ mjugyꞌajtɨn ajcxy caꞌ yɨꞌ ycɨxɨpy ytɨgoyɨpy.
\p
\v 14 Tügꞌócɨy pɨnjaty ajcxy capxymɨdoob je Espíritu Santo, Dios yɨꞌ ungꞌajtɨp ajcxy.
\v 15 Je Espíritu Santo huɨdibɨ miich ajcxy xyꞌadɨgɨɨygɨxp xyjottɨgɨɨygɨxp, caꞌ xychaachytungɨxy e nañ ni caꞌ mdzɨnähuaangɨxy mɨɨd tzɨgɨꞌñ jɨhuɨꞌñ. Caꞌ miich ajcxy jaduꞌn paady nej tumbɨdɨjc huɨdibɨ ooy tzɨgɨɨygɨxy yhuindzɨn. Co je Espíritu Santo yajpaady ma ajcxy mjot mhuinmaꞌñ, jaduꞌn nipaady nejɨhuɨ̈y miich ajcxy Dios xyꞌungꞌadyii. E com nmɨɨdꞌajtɨm Dios yjɨhuɨꞌñ ymɨcꞌajt, jeꞌ jaduꞌn xyajmɨnaanɨm: “¡Dios Teedy!”
\v 16 Je Espíritu Santo tɨyꞌajt yejcp ma ajt njot nhuinmaꞌñ, jeꞌ jaduꞌn xyajmɨnaanɨm co Dios xyꞌungꞌajtɨm.
\v 17 Pen ɨɨch ajt Dios xyꞌungꞌajtɨm, chi nbadaanɨm it lugar quipxyɨ mɨɨd Cristo jiiby tzajpjoty ma Dios yajpaady. Pen nmɨnajxɨm nyajnajxɨm tzaachypɨ jaduꞌn nej Cristo mɨnajxy yajnajxy tzaachypɨ, chi nbadaanɨm Dios yꞌoyꞌajtɨn quipxyɨ mɨɨd Cristo.
\p
\v 18 Nꞌaꞌɨxɨɨybɨch co yɨ tzaachypɨ yɨ ayoꞌn huɨdibɨ nmɨnajxɨm nyajnajxɨm ya naaxhuiñ, caꞌ yɨꞌ ytim ytiijɨty, caꞌ ninej yquipxyjatytɨ̈y je oyꞌajtɨn etz mɨjjotcujcꞌajtɨn huɨdibɨ Dios xyajꞌixaanɨm je huinꞌit xɨɨ co Cristo anajty ymiñ jadügꞌoc.
\v 19 Tügꞌócɨy tijaty ya naaxhuiñ huɨdibɨ Dios tɨ yajcojy yajꞌoyɨ̈y, yꞌaaꞌijxpy yjɨjpꞌijxpy ajcxy mɨna Dios ymöhuáanɨgɨxy yꞌoyꞌajtɨn ymɨjꞌajtɨn yɨ jäy ajcxy huɨdibɨ ajcxy Dios ungꞌajtɨp.
\v 20 Tügꞌócɨy tijaty Dios tɨ yajcojy yajꞌoyɨ̈y ya naaxhuiñ, hueꞌ jeꞌ yjugyꞌajtɨn cɨxamb tɨgoyamb, ögam tɨ̈dzam. E canan cɨꞌm jaduꞌn tzocy, hueꞌ jeꞌ Dios jaduꞌn tɨ yajnigödugɨ̈y. Per caꞌ yjugyꞌajtɨn ycɨxɨpy ytɨgoyɨpy tuꞌcɨ̈yɨ hueꞌ ajcxy yꞌaaꞌijxpy yjɨjpꞌijxpy co padaangɨxy oyꞌajtɨn jadügꞌoc.
\v 21 Co anajty Dios yajꞌoyɨ̈y nej jëbɨ ajcxy chɨnaaygɨxy, e caꞌ yꞌöccɨxɨpy, caꞌ ytɨ́ɨtzcɨxɨpy, etz caꞌ ypügɨxɨpy, chi ajcxy padaangɨxy oyꞌajtɨn etz jotcujcꞌajtɨn quipxyɨ mɨɨd je jäy ajcxy huɨdibɨ Dios ungꞌajtɨp.
\v 22 Com nejhuɨɨyɨm co ixtɨ chambaad tügꞌócɨy huɨdijaty Dios yajcojy yajꞌoyɨɨy ya naaxhuiñ yjɨhuɨɨyb tzaachypɨ, e caꞌ yjotcujcꞌajtcɨxy. Tɨm jaduꞌn nipaady nej tüg töxyjäy paady tzaachypɨ co yhuaadꞌajtnɨ mɨna yꞌung yajmaꞌxungꞌadaꞌñ.
\v 23 Canan yɨ naaxhuiñybɨ huɨdi Dios yajꞌoyɨɨy yɨꞌyɨ tzaachypɨ jɨhuɨɨyb, nañ jaduꞌn ɨɨch ajt huɨdijaty mɨɨdꞌajtp Dios yjɨhuɨꞌñ ymɨcꞌajt, huɨdibɨ Dios xymooyɨm jayɨjpꞌaty caꞌnɨ anajty nyajtɨgajtzɨm nninïcx. Nañ ɨɨch ajt tajɨm mayɨm njɨ́ɨyɨm nyaaxɨm ixtɨ coonɨ anajty Dios xyajtɨgadzaanɨm ajt nninïcx etz xycöbɨgaanɨm ma yɨꞌ yꞌit jiiby tzajpjoty, e xymɨɨdꞌidaanɨm ajt jaduꞌn nej ycɨꞌmꞌung.
\v 24 Mɨɨd co nꞌaaꞌijxɨm njɨjpꞌijxɨm co Dios xyajnïdzögaanɨm ajt nꞌalma, paady tɨ nbaatɨm jugyꞌajtɨn huɨdibɨ caꞌ ycɨxɨpy ytɨgoyɨpy. Co ixyipy tɨ nbaatɨm huɨdibɨ anajty njɨjpꞌijxɨm, caꞌ ixyipy njacjɨjpꞌijxɨm co nbadáanɨmnɨ. Com caꞌ pɨn jacjɨjpꞌijxnɨ co padaanɨp je huɨdibɨ tɨ ocpatpɨ.
\v 25 Per co njɨjpꞌíjxɨm co nbadaanɨm huɨdibɨ caꞌ nmɨɨdꞌajtɨm, huinꞌit nꞌahuijxɨm mɨɨd mecxtujcɨn coonɨ nbaatɨm.
\p
\v 26 Tɨm jaduꞌn nej jotcujcꞌajtɨn nbadaanɨm co njɨjpꞌijxɨm huɨdibɨ Dios xymöhuaanɨm, nañ tɨm jaduꞌn je Espíritu Santo xypubejtɨm xypudɨgɨɨyɨm co njotmetzcɨɨyɨm, com caꞌ njajtɨm nej jëbɨ huaad Dios nmɨbɨjctzoohuɨm nej ypadyii. Paady je Espíritu Santo xycodɨnaayɨm ma Dios, ymɨbɨjctzooyb je Dios mɨctägy mɨɨd ɨɨch ajt ycɨxpɨ mɨɨd jɨɨyɨn yaaxɨn, huɨdi caꞌ huaad yajcapxpɨdzɨmy mɨɨd mɨydacɨn.
\v 27 Dios ñejhuɨɨyb ti jot ti huinmaꞌñ jäy ajcxy ymɨɨd. E Dios nañ huinjɨhuɨɨyb tügꞌócɨy ayuc huɨdibɨ je Espíritu Santo yajnajxyp ma yɨꞌ. Je Espíritu Santo ypɨjctzooyb mayꞌajt jabom jabom ma Dios mɨɨd tügꞌócɨy je mɨbɨjcpɨdɨjc ycɨxpɨ. Nañ jaduꞌn pɨjctzoy jaduꞌn nej Dios tzocy jäygɨdägy.
\s Mɨj madaacɨn ma mɨbɨjcɨn
\p
\v 28 Yɨ jäy ajcxy huɨdibɨ mɨjpɨdacp Dios, huɨdibɨ ajcxy Dios tɨ huinꞌixy, jëbɨ chɨnaaygɨxy jaduꞌn nej Dios jäygɨdägy ajcxy chɨnaayɨn. Nejhuɨɨyɨm co huentɨmtiijɨty huɨdibɨ yɨꞌ ajcxy ymɨnajxpy yajnajxpy, pen jɨbɨcpɨ o pen oybɨ, Dios jaduꞌn tɨ aꞌɨxɨ̈y co huen mɨnajxcɨxy yajnajxcɨxy mɨɨd yɨꞌ ajcxy yꞌoyꞌajtɨn ycɨxpɨ.
\v 29 Jeꞌ yɨꞌ ajcxy huɨdibɨ Dios tɨ yhuinꞌixyii, jeꞌ yɨꞌ ajcxy huɨdibɨ Dios ñejhuɨɨy jayɨjpnɨ co ymɨbɨgaꞌñyii yꞌayuc. Dios jaduꞌn tumb ma yɨꞌ ajcxy yjot yhuinmaꞌñ jaydëbɨ yquipxyjatytɨ̈y ajcxy yjot yhuinmaꞌñ mɨɨd Dios yꞌung, jaduꞌn nej yɨꞌ yjot yhuinmaꞌñ mɨɨdɨty.
\v 30 Yɨ mayjäy huɨdibɨ Dios yajnigödugɨɨy caꞌnɨ anajty naaxhuiñybɨ chondacy co ytunaꞌñ mɨɨd yɨꞌ, yɨꞌ ajcxy Dios huinꞌijxɨ. Yɨ mayjäy huɨdibɨ Dios tɨ yhuinꞌíjxɨgɨxy, nañ Dios yɨꞌ ajcxy yajꞌahuimbijtɨp tudägy. E yɨ mayjäy huɨdibɨ Dios tɨ yajꞌahuimbity tudägy, nañ Dios yɨꞌ yajquipxyjatytɨ̈huaanɨp ajcxy yꞌoyꞌajtɨn mɨɨd yɨꞌ yꞌung yꞌoyꞌajtɨn.
\p
\v 31 ¿Ti jadaꞌ njacjɨjpꞌijxɨm ti jadaꞌ njactzojcɨm? Caꞌ ni ti. Pen Dios ɨɨch ajt xypubejtɨm xypudɨgɨɨyɨm, ¿pɨn ɨɨch ajt jëbɨ xymɨmadaacɨm? Janch ni ca pɨn.
\v 32 Dios ixtɨ ycɨꞌmꞌung tɨ yecy mɨɨd ɨɨch ajt ycɨxpɨ, co oy yꞌoꞌcy mɨɨd ɨɨch ajt ycɨxpɨ, co oy yꞌoꞌcy ma yɨ cruudz mɨɨd nidügꞌócɨy ajt nbocy ycɨxpɨ. Paady janch janch co Dios xymöhuaanɨm tügꞌócɨy oybɨ quipxyjaty mɨɨd yɨꞌ yꞌung, Jesucristo.
\v 33 ¿Pɨn jadaꞌ jëbɨ ocxɨ̈y je jäy ajcxy huɨdibɨ Dios tɨ huinꞌixy? Caꞌ ni pɨn. Com Dios cɨꞌm yɨꞌ tɨ yajꞌahuimbijttäy tudägy.
\v 34 ¿Pɨn yɨꞌ ajcxy jëbɨ ocyajpocycäy? Caꞌ ni pɨn. Com Cristo oꞌc jeꞌ mɨɨd ajt nbocy ycɨxpɨ, etz yjugypɨjcy jadügꞌoc, e jadachambɨ xɨɨ tiempo yajpaady aꞌoyꞌamy ma Dios ymɨjc, e yɨꞌ aneꞌmdaayb tügꞌócɨy. E Cristo ɨɨch ajt xyñibɨjctzohuɨɨyɨm, ypɨjctzooyb mayꞌajt ma Dios mɨɨd ɨɨch ajt ycɨxpɨ.
\v 35 Com Cristo ooy xychojcɨm xyjɨhuɨɨyɨm, paady ni nej caꞌ xyꞌixmadzaanɨm. Huen ti ndɨmpaatɨm caꞌ xyꞌixmadzaanɨm. Oy ixyipy tzaachypɨ ayoꞌn nmɨnajxɨm nyajnajxɨm, oy ixyipy tajɨn mayɨn nbaatɨm; oy ixyipy jäy xyꞌixhuɨdijtɨm xypahuɨdijtɨm; oy ixyipy yuu ayoꞌn nbaatɨm; oy ixyipy huit tucxy nyajmayjajtɨm; oy ixyipy tzɨgɨꞌñ nyajnajxɨm; oy ixyipy jäy xytɨmyyajꞌoꞌcɨm. Oy ti ayoꞌn ndɨmbaatɨm, Cristo caꞌ xyꞌixmadzaanɨm.
\v 36 Com jaduꞌn ymiñ jaybety ma Dios ñecy ma jaduꞌn ymɨnañ:
\q Mɨɨd miich, Huindzɨn Dios ycɨxpɨ, je nmɨdzipɨch xyjatytɨmyyajꞌögaambɨch xɨɨm tzuum. Jaduꞌn ɨɨch ajcxy nej cöbixy huɨdibɨ yajnɨcxɨp ma yajꞌöctac co yajꞌögaꞌñyii.
\m 
\v 37 Caꞌ ti ayoꞌn nbadaanɨm. Nmɨmadactähuaanɨm tügꞌócɨy ayoꞌn, mɨɨd co Cristo xychojcɨm xyjɨhuɨɨyɨm. 
\v 38-39 Janch nejhuɨɨybɨch tɨydudägy co Dios xychojcɨm xyjɨhuɨɨyɨm. Caꞌ ji ni pɨn jëbɨ huaad xypɨjc-huäcxɨm ma Dios chójcɨn, oy ixyipy njaꞌoꞌcɨm; oy ixyipy njajugyꞌajtɨm; oy ixyipy xymɨdzipꞌajtɨm ángel ajcxy etz jacjadyii huɨdibɨ mɨcꞌajt mɨɨd jiiby tzajpjoty. Caꞌ ajcxy jëbɨ huaad xypɨjc-huäcxɨm ma Dios, ni ti huɨdibɨ ji ijtp cham, ni je huɨdibɨ mimb cɨdacp, ni yɨꞌ jëbɨ xycapɨjc-huäcxɨm ma Dios chojcɨn. Ajt nHuindzɨn Jesucristo tɨ xyajnejhuɨɨyɨm jaduꞌn nej Dios xchojcɨm xyjɨhuɨɨyɨm co yꞌoꞌcy ma yɨ cruudz mɨɨd ajt nbocy ycɨxpɨ.
\c 9
\s Dios tɨ huinꞌixy yɨ Israel jäy ajcxy
\p
\v 1-2 Nmɨɨdɨch je Cristo ytɨyꞌajt, nyajnijayɨɨybɨch miich ajcxy yɨꞌ ytɨyꞌajt, caꞌ nꞌɨndägyɨch, co ooy ndajy nmayɨch mɨɨd nꞌamɨgügtɨjcɨch ycɨxpɨ je Israel jäy co ajcxy caꞌ cöbɨgaꞌñ je Cristo. Nañ Dios yjɨhuɨꞌñ, je Espíritu Santo, tɨyꞌajt yejcp ma ɨɨch njot nhuinmaꞌñ co jaduꞌn tajɨn mayɨn njɨhuɨ̈yɨch mɨɨd yɨꞌ ajcxy ycɨxpɨ.
\v 3 Com tajy may nayjɨhuɨ̈yiijɨch mɨɨd ɨɨch nꞌamɨgügtɨjc, ɨɨch nmɨgogajp, ixtɨ njaccodɨnähuaamybɨch ajcxy ma Dios mɨɨd ypocy ycɨxpɨ, ixtɨ jëbɨ ixyipy Cristo njaꞌixmachɨch mɨɨd yɨꞌ ajcxy ycɨxpɨ, ixtɨ jëbɨ ixyipy Dios xychaachytuñɨch mɨɨd yɨꞌ ajcxy ypocy ycɨxpɨ, co ixyipy jëbɨ Dios pocyhuinmecxy ajcxy.
\v 4 Com hueꞌ jeꞌ ajcxy Israel yꞌapꞌajtɨp yꞌocꞌajtɨp, Israel jäy ajcxy. Hueꞌ anajty ajcxy Dios tɨ ycöbɨgyii jaduꞌn nej jɨhuɨ̈y ycɨꞌmꞌung, Dios anajty ajcxy tɨ ñiꞌijxcɨdägyii, yꞌijx ajcxy Dios yꞌoyꞌajtɨn. Dios nɨmay ajcxy co ycuendꞌadip. Dios ajcxy jaduꞌn yajniꞌixɨɨyɨ nidügꞌócɨy tɨyꞌajt nej ajcxy jëbɨ huaad Dios huindzɨgɨ̈y, e Dios yajhuinhuanɨɨy Israel jäy ajcxy je Cristo.
\v 5 Nañ hueꞌ ajcxy ymɨjꞌapꞌajtɨp ymɨjteedyꞌajtɨp ɨɨch ajt nmɨjꞌap nmɨjteedy; je Abraham, Jacob, etz David, e ma jeꞌ ymiñ ajcxy, ji ymiñ je Cristo, e jeꞌ jeꞌ Dios ajtp, yɨꞌ tügꞌócɨy aneꞌmdaayb jiiby tzajpjoty etz ya naaxhuiñ. Je Cristo capxpaady yꞌidɨpy huinɨxɨɨ.
\p
\v 6 Co jaduꞌn mɨnaꞌñɨch co may ajcxy Israel jäy caꞌ ajcxy Dios yjäyꞌadyii  tɨydudägyɨ, caꞌ jaduꞌn mɨnaꞌnaꞌñɨch co Dios caꞌ cuyduñ yɨꞌ yꞌayuc huɨdibɨ yajhuinhuanɨɨy Abraham etz Moisés.
\v 7 Canan nidügꞌócɨy Abraham yꞌap yꞌoc padaꞌñ je oyꞌajt huɨdibɨ yajhuinhuanɨɨy Abraham, com jaduꞌn yjaybetyɨty ma Dios ñecy. Dios jaduꞌn nɨmay Abraham: “Yɨ mmang, Isaac, tɨ nhuinꞌixyɨch jëbɨ yꞌap yꞌoc paady je oyꞌajt huɨdibɨ tɨ nyajhuinhuanɨ̈y.”
\v 8 Co Dios jaduꞌn nɨmay Abraham, paady ycɨxpɨ nejhuɨɨyɨm co caꞌ nidügꞌócɨy Abraham yꞌap yꞌoc jëbɨ naydijyii Dios yꞌung. Jëyɨ Isaac yꞌap yꞌoc jëbɨ ñaydijyii Dios yꞌung com Dios yajhuinhuanɨɨy co mayꞌajt tunaꞌñ mɨɨd yɨꞌ ajcxy.
\v 9 Com jaduꞌn yjaybetyɨty ma Dios ñecy co Dios nɨmay Abraham: “Nihuimbidaamybɨch ma je tiempo huɨdibɨ tɨ nꞌagapxtucyɨch, e huinꞌit mdöxyɨjc Sara yꞌungbaadɨp.”
\p
\v 10 Ji jadüg tɨyꞌajt. Ɨɨch ajt nmɨjꞌap Isaac ytöxyɨjc Rebeca metz ymang paty.
\v 11 Dios yhuinꞌijx je jacmutzpɨ caꞌnɨ anajty ymaꞌxungꞌaty, e caꞌnɨ anajty ñiguëxɨ̈gy ti huinmaꞌñ ymɨɨd, oyhuinmaꞌñ o jɨbɨc-huinmaꞌñ. Dios ninɨgoob anajty jayɨjpnɨ tɨ huinꞌixy je jacmutzpɨ.
\v 12 Com Dios ñɨmay je Rebeca co je jacmutzpɨ yꞌaneꞌmamyb yꞌajch ma caꞌnɨ anajty Jacob ymaꞌxungꞌatyñɨ.
\v 13 Tɨm jaduꞌn nej jaybety ymiñ ma Dios ñecy, Dios jaduꞌn mɨnañ: “Jac nïgɨ tɨ ndzocyɨch Jacob, caꞌydɨ Esaú.”
\p
\v 14 ¿Nej nꞌocmɨnaanɨm? ¿Dios caꞌ tɨɨybɨ tuñyɨ? Caꞌ yjaduꞌnɨty. Dios tɨydudägy ytuñ.
\v 15 Com jaduꞌn Dios nɨmay Moisés: “Nbaꞌayohuɨpyɨch ninɨgoobɨ pɨnjaty ndzojcpyɨch.” 
\v 16 Co Dios jaduꞌn nɨmay Moisés paady nejhuɨɨyɨm co canan paady ycɨxpɨ Dios paꞌayohuaꞌñ jay mɨɨd co ajcxy chachñaymɨjaꞌíjxɨgɨxy co tunaangɨxy oyhuinmaꞌñ. Hueꞌ jeꞌ Dios paꞌayoꞌn tuñ mɨɨd jäy ajcxy ninɨgoob co jaduꞌn tzocy.
\v 17 Com jaduꞌn jaybety ymiñ ma Dios ñecy co Dios jaduꞌn nɨmay je Egipto rey:
\q Ɨɨch miich tɨ nmöy mꞌaneꞌmɨn, jɨgɨx jëbɨ jäy ajcxy ixɨpy je mɨj ayoꞌn huɨdibɨ ndunaamybɨch ma miich mnaax mgajp, huinꞌit jäy ajcxy capxpaady xyajꞌidɨpy huinduꞌñybɨ ñaaxhuiñ.
\m
\v 18 Dios ypaꞌayooyb jeꞌ pɨnjaty chojcpy, e nañ jaduꞌn yjot yajjuunɨ pɨn jaduꞌn yajmɨdzojcpy.
\p
\v 19 Huinꞌit miich ajcxy xyñɨmähuɨbɨch: “Penɨ janch yjaduꞌnɨty, ¿ti co Dios jaduꞌn jadügꞌoc pocyꞌixy jäy? ¿Pɨn jadaꞌ occapxhuimbidɨp nej yɨꞌ tzocyɨ?”
\v 20 Miich jäy, ¿mbɨn miich co tɨ myajcapxycojaꞌñ myajꞌayuccojaꞌñ mɨɨd Dios? ¿Nej jëbɨ pochytüdz nɨmäy je pɨn anajty tɨ yajcojyii? “¿Nej co jaduꞌn tɨ xyajcojyɨch?”
\v 21 Tüdzyajcojpɨ yɨꞌ yajꞌoyɨɨyb je moꞌntz nej tɨm tzocy. Pen yajcojamyb tüdz oybɨ tzoojatypɨ, yajcojpy jeꞌ. Penɨ yajcojamyb tüdz huɨdibɨ caꞌ oyjatyɨty, yajcojpy jeꞌ.
\p
\v 22-24 Tɨm jaduꞌn nej je tüdzyajcojpɨ yajꞌoyɨɨy moꞌntz nej tzocy, nañ jaduꞌn Dios tuñ mɨɨd jäy nej tzocy. Dios tɨ yajcojy jäy, e mɨɨd ymɨcꞌajt jëb tzaachytuñ mɨɨd ypocy ycɨxpɨ. E co jaduꞌn tzaachytunɨpy, chi ñiguëxɨ̈gɨpy yɨꞌ ymɨcꞌajt. Dios ooy jecy tɨ jamɨmecxtucy ajcxy huɨdibɨ paatɨp co Dios chaachytunɨɨyb ajcxy. Com Dios tɨ yajcojy jäy paady jëb nañ jaduꞌn paꞌayoohuɨpy etz mayꞌajt tunɨpy mɨɨd yɨꞌ ajcxy, jëbɨ ajcxy paadɨp yɨꞌ yꞌoyꞌajtɨn. Dios ɨɨch ajt tɨ xyhuinꞌijxɨm nijëjɨty judíojäy, etz nijëjɨty huɨdibɨ caꞌ yjudíojäyɨty, jëbɨ ajt nꞌalma nïdzoocɨn paady.
\v 25 Com jaduꞌn jaybety ymiñ ma Oseas ñecy ma Dios jaduꞌn ymɨnañ:
\q Yɨ jäy ajcxy huɨdibɨ ɨɨch caꞌ anajty njäyꞌadyii, njäyꞌadáanɨbɨch cham. Yɨ jäy huɨdibɨ caꞌ anajty ndzocyɨch, ndzogáanɨbɨch cham.
\q
\v 26  E nañ jaduꞌn jadügꞌit Oseas cojay: “E je jäy ajcxy huɨdibɨ anajty tzɨnaayb ma canaag naax cajp huɨdibɨ anajty caꞌ Dios yjäyꞌadyii, jëb ñaydijyii Dios yjäy, je Dios huɨdibɨ huinɨxɨɨ tzɨnaayb.”
\m 
\v 27 Nañ jotmay mɨɨd co Isaías jada tɨyꞌajt ycojay ma ñecy ma jaduꞌn ymɨnaꞌñ: “Oy ixyipy ajcxy tɨ yjamayɨ̈y jaduꞌn nej tzaaꞌung yajpaady ma mejy ypaꞌ, nihueeñ ajcxy yꞌalma ñïdzoocɨn padaꞌñ.
\v 28 Com Dios mɨc ooy cötujcɨn mɨɨdɨty, e caꞌ mɨmecxtugɨpy jäy ajcxy ypocytunɨɨ huinɨxɨɨ. E mɨcꞌamy tzaachypɨ möhuaꞌñ naaxhuinyjäy mɨɨd ypocy ycɨxpɨ co anajty xɨɨ tiempo paatnɨ mabaad agapxtujcy.”
\v 29 Isaías ñajtzcapxɨɨy jaduꞌn jecyꞌajty:
\q Pen caꞌ ixyipy je Huindzɨn Dios huɨdibɨ aneꞌmdaayb jiiby tzajpjoty etz ya naaxhuiñ, capubejty yɨ Israel jäy, co caꞌ ycajacyajtzoocɨ nijëjɨty ajcxy, ycacödɨgoyday yɨꞌ ajcxy, tɨm jaduꞌn nej je jäy ajcxy yjajty jɨm ma Sodomo cajp etz Gomorra cajp, cödɨgoyday ajcxy.
\s Yɨ judíojäy ajcxy etz Jesucristo yꞌayuc ytɨyꞌajt
\p
\v 30 Jaduꞌn jëbɨ mhuinjɨhuɨɨygɨxy huɨdibɨ tɨ nyajnijayɨɨygɨxy jaduꞌn nej Dios ytun mɨɨd jäy ajcxy. Yɨ jäy ajcxy huɨdibɨ caꞌ yjudíojäyɨty, huɨdibɨ caꞌ cuyduñ Dios ycötujcɨn je jecyɨp, co ajcxy mɨjpɨdägy je Cristo, chi ajcxy paady tudägyꞌajtɨn ma Dios.
\v 31 Per yɨ judíojäy ajcxy huɨdibɨ jɨjpꞌijxp co tudägyꞌajtɨn padaangɨxy mɨɨd co tzachcuydungɨxy Dios ycötujcɨn je jecyɨp, ni caꞌ ajcxy mɨmadägy cuydundähuɨpy, e caꞌ ajcxy tudägyꞌajtɨn paady ma Dios. 
\v 32 ¿Naꞌamy co caꞌ ajcxy mɨmadägy cuydundäy Dios cötujcɨn? Jeꞌ co ajcxy caꞌ mɨjpɨdägy huɨdibɨ Dios tɨ tuñ mɨɨd yɨꞌ ajcxy ycɨxpɨ. Hueꞌ ajcxy tijy co tudägyꞌajtɨn padaangɨxy ma Dios mɨɨd co tzachcuydungɨxy Dios ycötujcɨn je jecyɨp. Hueꞌ ajcxy ayoꞌn ypadamyb co caꞌ Cristo cöbɨjccɨxy, tɨm jaduꞌn nej jäy ayoꞌn paady co ycönepy ma tüg tzaa.
\v 33 Com jaduꞌn jaybety ymiñ ma Dios ñecy, ma Dios jaduꞌn ymɨnaꞌñ:
\q Nguexaamybɨch jɨm Jerusalén tüg jäy. Mayjäy caꞌ mɨjpɨdägaꞌñ je jäy, e ayoꞌn ajcxy ypadamyb ma ɨɨch. Tɨm jaduꞌn nej ixyipy tɨ nbɨdägyɨch tüg tzaa ma jäy ajcxy huaad ycönejpcɨxy, e chi ycɨday ajcxy. Tügꞌócɨy jäy pɨnjaty mɨjpɨdaacp je jäy huɨdibɨ nbɨdägaamybɨch jɨm Jerusalén, hueꞌ ajcxy yɨꞌ caꞌ ayoꞌn padaꞌñ ma ɨɨch, nbocyhuinmecxaamybɨch yɨꞌ ajcxy.
\c 10
\p
\v 1 Miich ajcxy nmɨgügtɨjcɨch, ooy ndzocyɨch cɨxyjot huinɨjot co yɨ Israel jäy nidügꞌócɨy padaꞌñ yꞌalma ñïdzoocɨn. Ooy ɨɨch nïgɨ Dios nmɨbɨjctzoy mɨɨd yɨꞌ ajcxy ycɨxpɨ.
\v 2 Jëbɨ ndɨyꞌajt yecyɨch co yɨ Israel jäy ooy ajcxy Dios jayajmɨjꞌajtcɨxy. Hueꞌ janchtɨy caꞌ ajcxy huinjɨhuɨ̈yɨ Dios ytɨyꞌajt.
\v 3 Com nejhuɨɨyb ajcxy co Dios yajpocyñïhuädzamyb jäy ajcxy, hueꞌ ajcxy caꞌ huinjɨhuɨ̈y nej Dios yhuinmaꞌñ mɨɨdɨty. Cɨꞌm anajty chachhuinmaꞌñ ixtaaygɨxy nej ajcxy jëbɨ ñayyajpocyñïhuädzɨgɨxɨpy. Caꞌ anajty ajcxy cöbɨcy Dios ytɨyꞌajt nej jëbɨ huaad ñayyajpocyñïhuädzɨɨyb.
\p
\v 4-5 Yɨ judíojäy ajcxy caꞌ huinjɨhuɨɨygɨxy co je Cristo yꞌoy ya naaxhuiñ, e chi yajtɨgooyɨ Dios ycötujcɨn ymɨcꞌajt huɨdibɨ Moisés yjay, jɨgɨx jëbɨ tügꞌócɨy jäy pɨnjaty mɨjpɨdacp Cristo ytɨyꞌajt, huinꞌit ajcxy paadɨp tudägyꞌajtɨn. Moisés yjayhuɨꞌm ma jaduꞌn ymɨnaꞌñ: “Je pɨnjaty cuydumb je Dios ytɨyꞌajt, jɨm mɨcꞌajt paadɨpy mɨɨd chɨnaayɨn ycɨxpɨ.”
\v 6-7 Per yɨ jäy ajcxy huɨdibɨ mɨjpɨdaacp Cristo etz cuydunɨ yɨꞌ ytɨyꞌajt, yɨꞌ ajcxy ymɨnañ: “Caꞌ huaad judíojäy ajcxy ymɨnaangɨxy jotjoty huinmaꞌñyjoty: ¿Pɨn ocpättɨgɨ̈huɨp tzajpjoty nɨcx je Cristo yajtzooñ? o ¿Pɨn nɨcxamb caꞌoydactuuby ma ajcxy öcpɨdɨjc yꞌity e yajjugypɨgaanɨp je Cristo?”
\v 8 ¿Nej Dios yꞌayuc ymɨnaꞌñ? Jaduꞌn Dios yꞌayuc ymɨnaꞌñ: “Tɨ mmɨdoy miich ajcxy Dios yꞌayuc ytɨyꞌajt ma mgɨꞌmꞌayuc, tɨ jäy ajcxy capxhuäcxy ma miich, tɨ mmɨdoꞌmbɨjccɨxy.” Pues jada jeꞌ je yꞌayuc tɨyꞌajt nej jëb mɨjpɨdaaccɨxy Cristo, huɨdibɨ tɨyꞌajt ɨɨch ajcxy ngapxhuäcxp.
\v 9 Pen miich mgapxypɨdzɨmyb mayjäy agujc co miich ajcxy Jesús mHuindzɨnꞌadyii, etz mmɨbɨjcpy ajcxy ma mjot mhuinmaꞌñ co Dios tɨ yajjugypɨjcy Jesús co yꞌoꞌcy, huinꞌit mꞌalma paadɨp ñïdzoocɨn ma Dios.
\v 10 Co mmɨjpɨdägɨpy Jesús cɨxyjot huinɨjot huinꞌit Dios xyajpocyñïhuädzɨpy. Co mgapxypɨdzɨmɨpy mayjäy agujc co miich mɨjpɨdägy Cristo Jesús, huinꞌit yɨ mꞌalma ñïdzoocɨn padaꞌñ.
\p
\v 11 Com jaybety jaduꞌn miiñ ma Dios ñecy, ma jaduꞌn ymɨnañ: “Nidügꞌocɨy jäy huɨdijaty mɨjpɨdacp je Cristo, caꞌ ajcxy ayoꞌn padaꞌñ ma Dios.”
\v 12 Jëbɨ nidügꞌócɨy jäy mɨjpɨdägy je Cristo Jesús com Dios túꞌcɨy yajhuinhuanɨɨy pocyñïhuaatzɨn ma yɨ judíojäy etz ma huɨdi caꞌ yjudíojäyɨty. Ji tüg Huindzɨn je Jesucristo huɨdibɨ niHuindzɨnꞌajttaayb. Jesucristo mayꞌajt oyꞌajt tunam mɨjcajee mɨɨd huentɨmpɨnjäyɨty pɨnjaty pɨjczoob pubejtɨn ma Dios mɨɨd yɨꞌ yxɨɨ.
\v 13 Com jaduꞌn jaybety ymiiñ ma Dios ñecy, ma jaduꞌn ymɨnaꞌñ: “Nidügꞌócɨy jäy pɨnjaty Dios mɨbɨjctzoob mɨɨd Huindzɨn Jesucristo yxɨɨ, yɨꞌ ajcxy yꞌalma paadɨp ñïdzoocɨn.”
\v 14 ¿Nej jëbɨ jäy ajcxy occohuanɨ̈y Jesucristo co huen yꞌalma nïdzögy, pen caꞌ anajty tɨ mɨbɨjcɨ je ytɨyꞌajt? Pues caꞌ yjaduꞌnɨty. ¿Nej jëbɨ jäy mɨbɨcy Jesucristo penɨ caꞌnɨ ajcxy amɨdoꞌijtɨ yꞌayuc? Pues caꞌ yjaduꞌnɨty. ¿Nej jëbɨ jäy ajcxy mɨdoogɨxy Jesucristo yꞌayuc, pen caꞌ pɨn capxhuäcxy ma yɨꞌ ajcxy?
\v 15 ¿Nej jëbɨ jäy ajcxy capxhuäcxy Jesucristo yꞌayuc ytɨyꞌajt, pen caꞌ pɨn yquexyii ayuccapxhuäcxpɨ? Com jaybety jaduꞌn ymiiñ ma Dios ñecy, ma jaduꞌn ymɨnañ: “Ooy oy jäy ñayjɨhuɨ̈yii co pɨnjaty mɨmimb mɨjaꞌtp oybɨ tɨyꞌajt, pɨnjaty capxhuäcxp oybɨ tɨyꞌajt ma yɨꞌ ajcxy.”
\p
\v 16 Per caꞌ nidügꞌócɨy jäy mɨbɨcy je oybɨ tɨyꞌajt, com Isaías jaduꞌn cojay ma ñecy ma jaduꞌn ymɨnañ: “Huindzɨn Dios, ¿pɨn tɨ mɨjpɨdägy ɨɨch ajcxy nꞌayuc?”
\v 17 Coonɨ jäy ajcxy capxhuäcxy Jesucristo ytɨyꞌajt ma jäy chɨnaaygɨxy, huinꞌit ajcxy ymɨbɨjccɨxy com tɨ amɨdoꞌijtcɨxy je tɨyꞌajt.
\p
\v 18 Per nꞌamɨdooybɨch miich ajcxy: ¿Nej caꞌ jadaꞌ yɨ judíojäy ajcxy mɨdoy Dios ytɨyꞌajt? Janch jaduꞌn tɨ ajcxy jamɨdoy, com jaybety jaduꞌn ymiñ ma Dios ñecy ma jaduꞌn ymɨnañ:
\q Tɨ capxhuäcxy ajcxy Dios yꞌayuc ytɨyꞌajt huinduꞌmybɨ naaxhuiñ. 
Tɨ ajcxy Dios yꞌayuc mɨdodaayɨ huinduꞌmybɨ naaxhuiñ.
\m 
\v 19 Jadügꞌoc nꞌamɨdoogɨxy: ¿Nej caꞌ Israel jäy jadaꞌ ajcxy nejhuɨ̈y Dios ytɨyꞌajt? Ñejhuɨɨyb ajcxy. Com jecyꞌajty Moisés ycojay ma ñecy ma Dios jaduꞌn ymɨnañ:
\q Nyajpocyñïhuaatztähuɨbyɨch yɨ jäy ajcxy huɨdibɨ caꞌ ɨɨch njäyꞌadyii, e huinꞌit miich ajcxy cohuindoyɨɨ mjɨhuɨ̈huɨpy mɨɨd yɨꞌ ajcxy ycɨxpɨ.  Ndunɨpyɨch mayꞌajt mɨɨd yɨꞌ ajcxy, e huinꞌit miich yɨꞌ ajcxy mmɨjotmädɨp.
\m 
\v 20 Jaduꞌn jadügꞌit Isaías cojay ma yɨꞌ ñecy, ma Dios jaduꞌn ymɨnañ:
\q Yɨ jäy ajcxy huɨdibɨ caꞌ xyꞌixtäyɨch, tɨ xypaadyɨch ajcxy. Tɨ nyajniguëxɨ̈gyɨch ndɨyꞌajt ma yɨ jäy huɨdibɨ caꞌ xyñidɨy xyajtɨɨyɨch.
\m 
\v 21 Com jaduꞌn jaybety ymiñ ma Dios ñecy, ma Dios jaduꞌn nigapxy yɨ Israel jäy co jaduꞌn ymɨnañ:
\q Jabom jabom tɨ njamɨmecxtucyɨch yɨ Israel jäy ajcxy.
Tɨ njayajnɨmäyɨch ɨɨch ndɨyꞌajt, e caꞌ ajcxy mɨjpɨdägy. Hueꞌ ajcxy caꞌ xycapxymɨdooyɨch, xymɨjotmɨjꞌöcpɨch ajcxy.
\c 11
\s Yɨ Israel jäy ajcxy huɨdibɨ tɨ ypocynïhuaatzcɨxy
\p
\v 1 Paady nꞌamɨdoogɨxy: ¿Nej tɨ jadaꞌ Dios ixꞌijxnɨ ixtijnɨ yɨ Israel jäy ajcxy? Pues caꞌ yjaduꞌnɨty, Dios caꞌ yɨꞌ ixmachñɨ Israel jäy ajcxy. Com nañ Israel jäy ɨɨch. Abraham nmɨjꞌapꞌájtɨbɨch nmɨjteedyꞌájtɨbɨch e nañ jɨm ngogájpɨdyɨch ma anajty Benjamín ycogajpɨty.
\v 2-3 Dios caꞌ ixmach yɨꞌ yjäy huɨdibɨ yhuinꞌijx jecyꞌajty co jäyꞌadaꞌñyii jɨgɨx jëbɨ mayꞌajt oyꞌajt tunɨpy mɨɨd yɨꞌ ajcxy. ¿Nej caꞌ ajcxy mnejhuɨ̈y nej jaybety ymiiñ ma Dios ñecy jaduꞌn nej Elías nigapxy yɨ Israel jäy ma Dios? Jaduꞌn ymɨnañ:
\q Huindzɨn Dios, tɨ yɨ Israel jäy ajcxy yajꞌöctäy huɨdibɨ anajty miich mꞌayuc xycapxhuäcxɨp.
Tɨ ajcxy yajhuindɨgoydäy je tzaa macxy ma anajty jäy xyhuindzɨgɨ̈y.
Naydügpajc ɨɨch tɨ njachuɨꞌmyɨch njaccapxhuäcxyɨch miich mꞌayuc, e nañ xyajꞌögaamɨch jäy ajcxy. 
\m
\v 4 E chi Dios yꞌadzooy nɨmay Elías:
\q Caꞌ mim naydügɨty, ji ɨɨch ahuing nmɨ́ɨdɨdyɨch yujcpɨcy jahuɨxtujc mil yëydɨjc huɨdi xyꞌojadajtpɨch xyhuindzɨgɨɨybɨch chambaad, huɨdibɨ caꞌnɨ huingoxtɨnäy yɨ Baal, yɨ dios falso, caꞌpɨ ti mɨcꞌajt mɨɨdɨty ni ti tzöcꞌajt ca mɨɨdɨty.
\m
\v 5 Tɨm jaduꞌn nej Dios mɨɨdɨty anajty huɨxtujc mil yëydɨjctɨjc jecyꞌajty co anajty Elías yjugyꞌaty, nañ tɨm jaduꞌn cham ma ɨɨch ajt nxɨɨ ndiempo Dios ymɨɨd nijëjɨty judíojäy huɨdibɨ tɨ paꞌayoy, e paady ycɨxpɨ tɨ yhuinꞌixyii jëbɨ yɨꞌ jäyꞌadyii. 
\v 6 Com co ixyipy ajcxy yajxon cuydunɨ Dios ycötujcɨn, caꞌp ni ti paꞌayoꞌn Dios jactunaanɨ mɨɨd yɨꞌ ajcxy, com co tɨ anajty jɨm Dios yꞌayuc ycuydundäyii.
\p
\v 7 ¿Ti tɨ ytunyii tɨ yjadyii mɨɨd yɨ Israel jäy ajcxy? May ajcxy caꞌ mayꞌajtɨn oyꞌajtɨn paady ma Dios jaduꞌn nej ajcxy jɨjpꞌijxcɨxy. Jëyɨ ajcxy huɨdi Dios huinꞌijxɨ tɨ ajcxy paatcɨxy oyꞌajt ma Dios. Yɨ jacjadyii Israel jäy ajcxy Dios nïg ooy yajjotmɨjꞌöccɨxy.
\v 8 Com jaduꞌn jaybety ymiiñ ma Dios ñecy jaduꞌn nej Dios yajjotmɨjꞌögy yɨ Israel jäy, ma jaduꞌn ymɨnañ:
\q Tɨm jaduꞌn ajcxy nipaady nej jäy ajcxy huɨdibɨ tɨ ymɨꞌöctɨgooyñɨ, jaduꞌn nipaady nej jäy huɨdibɨ huiintzɨp, jaduꞌn nipaady nej huɨdibɨ cönatɨp.
\m
\v 9 David nañ jaduꞌn ycojay jecyꞌajty ma ñecy, ma jaduꞌn ymɨnañ: 
\q Huindzɨn Dios, cham je jäy tzachnixondägy yɨ tzɨnaayɨn yɨ jugyꞌajtɨn, caꞌ ajcxy xyjäymech. Tɨmɨtiinɨ ajcxy ayoꞌn möhuɨpy; tɨm jaduꞌn nej ɨyujc ayoꞌn paady co yajtüxuuch o co yjut cögäy.
\q
\v 10 Yajmaꞌtɨ ajcxy yjot yhuinmaꞌñ, huen ahuimbijtcɨxy jaduꞌn nej jäy huintzpɨ. Mö ajcxy tzaachypɨ huinɨxɨɨ huinɨtiempo, tɨm jaduꞌn nej jäy ajcxy tzaachypɨ jɨhuɨ̈y huɨdibɨ jemxypɨ tzɨmɨ̈ccɨxp. 
\s Yɨ ypocyhuinmeecxɨn huɨdibɨ ajcxy caꞌp yjudiojäyɨty
\p
\v 11 Co jaduꞌn yɨ maybɨ Israel jäy caꞌ cöbɨjccɨxy Dios ytɨyꞌajt, ¿nej mdijy, tɨ Dios yꞌixmachyii ajcxy tüccɨꞌyɨ, e yajtɨgoyaꞌñ ajcxy? Pues caꞌ yjaduꞌnɨty, caꞌ Dios ixmach yɨ Israel jäy ajcxy tüccɨꞌyɨ. Co yɨ Israel jäy caꞌ cöbɨjccɨxy Dios ytɨyꞌajt nej Cristo yꞌoꞌcy mɨɨd yɨꞌ ajcxy ypocy ycɨxpɨ, paady cöbɨcy yɨ huɨdibɨ caꞌ yjudíojäyɨty, jëbɨ ajcxy yꞌalma nïdzoocɨn paady. Jaduꞌn Dios ytuñ jɨgɨx jëbɨ yɨ judíojäy ajcxy cohuindoyɨɨ jɨhuɨ̈huɨpy, e chi nañ jaduꞌn mɨjpɨdägɨpy ajcxy Jesucristo.
\v 12 Pen yɨ mayjäy ajcxy huɨdijaty caꞌ yꞌisraeljäyɨty mɨjꞌoyꞌajtɨn mɨjjotcujcꞌajtɨn tɨ paady, mɨɨd co yɨ jacmaybɨ Israel jäy caꞌ cöbɨjccɨxy Jesucristo, chi nïgɨ oyꞌajtɨn jotcujcꞌajtɨn padaꞌñ yɨ naaxhuiñyjäy ajcxy co anajty nidügꞌócɨy Israel jäy yjothuimbijttaaygɨxy etz cöbɨjctaaygɨxy je Cristo.
\p
\v 13 Cham nijayɨɨygɨxy miich ajcxy huɨdi caꞌ yjudíojäyɨty, com Dios tɨ xyquexyɨch ngapxhuäcxɨch yɨꞌ yꞌayuc ma yɨ jäy ajcxy huɨdibɨ caꞌ yjudíojäyɨty. Ooy nyajcopɨcyɨch jada ndungɨch, jɨgɨx jëbɨ judíojäy oyꞌajtɨn paady nañ jaduꞌn.
\v 14 Caꞌ jecyɨty co ɨɨch nꞌamɨgügtɨjc, yɨ judíojäy ajcxy, cohuindoyɨɨ ajcxy  jɨhuɨ̈huɨpy, co anajty mayjäy huɨdi caꞌ yjudíojäyɨty mɨjpɨdägy ɨɨch nꞌayuc. Co jaduꞌn ajcxy cohuindoyɨɨ jɨhuɨ̈huɨpy, chi ajcxy nañ jaduꞌñ mɨjpɨdägɨpy Jesucristo.
\v 15 Com pen je naaxhuiñyjäy huɨdibɨ caꞌ yjudíojäyɨty, huɨdibɨ Dios jecyꞌajty caꞌ jäygɨdacɨ ajcxy chɨnaayɨn, pen tɨ ajcxy cöbɨjcɨ Dios ytɨyꞌajt, pen tɨ ajcxy oyꞌajtɨn paady ma Dios, mɨɨd co Dios tɨ ixmach yɨ Israel jäy huɨdibɨ caꞌ cöbɨcy yɨꞌ ytɨyꞌajt, chi yɨ Israel jäy co ajcxy jadügꞌoc yjothuimbidɨpy etz cöbɨgɨpy Dios ytɨyꞌajt, nañ jaduꞌn ooy yjotcugɨ̈huɨpy ajcxy, jaduꞌn nejjɨhuɨ̈y tɨ ajcxy yꞌögy etz nej jɨhuɨ̈y ajcxy tɨ yjugypɨcy jadügꞌoc.
\v 16 Com co Abraham, Isaac etz Israel Dios anajty jäyꞌajtɨp, paady nañ jaduꞌn tügꞌócɨy Israel jäy Dios jäyꞌadyii, mɨɨd co Israel yꞌapꞌajtɨp yꞌocꞌajtɨp ajcxy. Tɨm jaduꞌn nejjɨhuɨ̈y judíojäy ajcxy tzajcaagy puuducy möy Dios, nañ jaduꞌn je ytujctuc huɨdibɨ jac-huɨꞌm nañ Dios jeꞌ yjeꞌ, e nañ tɨm jaduꞌn nej co jäy ajcxy möy Dios quipy ytictz, tügꞌócɨyɨ jeꞌ Dios jeꞌajtäyii quipy yꞌaacxy.
\p
\v 17 Hueꞌ jeꞌ nijëjɨty Israel jäy caꞌ mɨjpɨdägy Dios ytɨyꞌajt, paady ñajtzꞌixɨɨyɨ, e mayꞌajt oyꞌajt tuñ mɨɨd huingbɨ jäy huɨdi caꞌ israeljäyɨty. Tɨm jaduꞌn nej jɨhuɨ̈y tüg oyguipy huɨdi tɨɨmꞌajtp yajpubuxy yꞌaacx, e je ma tɨ yajjɨjppujxtüty, jeꞌ yjɨjp yajpɨdägy ma huingbɨ quipy yꞌaacx. Miich ajcxy huɨdi caꞌ yjudíojäyɨty huɨdibɨ tɨ mɨbɨcy je Cristo, tɨ mbaady Dios yꞌoyꞌajt tɨm jaduꞌn nej judíojäy ajcxy jecyꞌajty mɨɨdɨty Dios yꞌoyꞌajt.
\v 18 Caꞌ huaad amɨj agɨx mnayjɨhuɨɨygɨxy, e ni caꞌ huaad mꞌixtijcɨxy yɨ judíojäy huɨdibɨ caꞌ mɨjpɨdaaccɨxy je Cristo. Miich ajcxy yɨ mꞌoyꞌajt tɨ mbaady ma Dios, tɨm jaduꞌn nej je quipy yꞌaacx mɨcꞌajt paady ma yɨ quipy ytictz.
\p
\v 19 Caꞌ yjecyɨty co miich ajcxy mɨnaꞌnaangɨxy co Dios najtzꞌixɨɨy yɨ judíojäy huɨdibɨ caꞌ mɨbɨcy Cristo, jaydëbɨ miich ajcxy mnaydijyii co Dios xyjäyꞌadyii.
\v 20 Tɨyꞌajt jaduꞌn nej miich mɨnaꞌñ. Dios ñajtzꞌixɨɨy yɨ maybɨ judíojäy mɨɨd co ajcxy caꞌ mɨbɨcy Jesucristo. E Dios miich tɨ xycöbɨcy mɨɨd co tɨ mmɨbɨcy Jesucristo. Per caꞌ huaad miich amɨj agɨx mnayjɨhuɨ̈yii mɨɨd co Dios tɨ xycöbɨcy. Naygüendꞌadɨɨ yajxon ma Dios ytɨyꞌajt, tzɨgɨꞌ Dios.
\v 21 Com Dios ñajtzꞌixɨy yɨ judíojäy ajcxy mɨɨd co caꞌ ymɨjpɨdägyii yɨꞌ ytɨyꞌajt. Nañ jaduꞌn miich ajcxy yɨꞌ xyñajtzꞌixɨ̈huaꞌñ, pen caꞌ mmɨjpɨdaaccɨxy yajxon yɨꞌ ytɨyꞌajt.
\v 22 Cuentɨpɨc jaduꞌn nej Dios mayꞌajt oyꞌajt tuñ mɨɨd nijëjɨty jäy, etz mɨc tzaachytuñ nijëjɨty jäy. Dios mɨc tzaachytuñ je judíojäy huɨdibɨ caꞌ ycapxymɨdoy, etz mayꞌajt oyꞌajt tuñ mɨɨd miich ajcxy huɨdi capxymɨdoob. Jaccuydun yajxon Dios ytɨyꞌajt, e nïgɨ Dios mayꞌajt oyꞌajt xytuunɨpy, pen caꞌ mguydunɨ yɨꞌ ytɨyꞌajt, huinꞌit Dios xyñajtzꞌixɨ̈huɨpy.
\v 23 E nañ jaduꞌn yɨ judíojäy ajcxy huɨdi caꞌ mɨbɨjccɨxy Jesús, co ajcxy yhuinmaꞌñ yajtɨgadzɨpy, e mɨjpɨdägɨpy Jesús, huinꞌit Dios ycöbɨgɨɨyb jadügꞌoc, etz Dios mɨɨd ymɨcꞌajt jëbɨ mayꞌajt oyꞌajt tunɨpy mɨɨd yɨꞌ ajcxy.
\v 24 Com pen miich ajcxy huɨdi caꞌ yjudíojäyɨty huɨdibɨ jecyꞌajty anajty caꞌ Dios jäyꞌadyii, pen miich ajcxy Dios mɨcꞌamy tɨ xycöbɨcy, nañ jaduꞌn jactzojc cöbɨgaꞌñ huɨdibɨ ajcxy judíojäyɨp, pen ycöbɨjcy ajcxy.
\s Jaduꞌn nej Dios yajnïdzooccogɨxɨ̈huaꞌñ Israel jäy ajcxy
\p
\v 25 Miich ajcxy nmɨgügtɨjcɨch, nyajnijayɨɨyb ajcxy jaduꞌn nej Dios tunaꞌñ mɨɨd yɨ Israel jäy, jaydëbɨ caꞌ miich ajcxy amɨj agɨx mnayjɨhuɨ̈huɨɨyb, etz jaydëbɨ mnejhuɨ̈huɨpy jada tɨyꞌajt huɨdibɨ caꞌ pɨn nejhuɨ̈y, co yɨ Israel jäy ajcxy ooy ajcxy yꞌaamɨjɨty yjotmɨjɨty, caꞌ ajcxy capxymɨdoy Dios. E jaduꞌn ajcxy yꞌidaꞌñ mabaad anajty ycaꞌpxy je mayjäy, caꞌpɨ yꞌisraeljäyɨty je huɨdibɨ mɨjpɨdägam Jesucristo ytɨyꞌajt.
\v 26 Nejhuɨɨyɨm co Dios mayꞌajt oyꞌajt tunamb jadügꞌoc mɨɨd tügꞌócɨy Israel jäy ajcxy, com jaduꞌn jaybety ymiñ ma Dios ñecy ma Dios jaduꞌn ymɨnaꞌñ:
\q Jacjiinɨ tüg Israel jäy yminaꞌñ huɨdibɨ yajnïdzögamb ajcxy ma yɨꞌ ypocy. 
Yɨꞌ yajtɨgoyaanɨp Israel jäy ypocy.
\q 
\v 27 Jadügꞌit jaybety ymiñ ma Dios jaduꞌn ymɨnaꞌñ:
Jaduꞌn nyajhuinhuanɨɨyɨch yɨ Israel jäy co yɨꞌ ajcxy ypocy nyajtɨgooybɨch.
\p
\v 28 Co yɨ Israel jäy caꞌ mɨjpɨdaaccɨxy Jesucristo ytɨyꞌajt, chi Dios ajcxy ñajtzꞌixɨɨyɨ. E co ñajtzꞌixɨɨyɨ ajcxy, paady ycɨxpɨ miich ajcxy Dios tɨ yxcöbɨcy, co tɨ mmɨjpɨdaaccɨxy Jesucristo. Per chambaad Dios jactzojctay yɨ Israel jäy mɨɨd co Dios huinꞌijxy yɨ Abraham, Isaac etz Jacob jecyꞌajty jëbɨ yɨꞌ yjäyꞌadyii.
\v 29 Dios tɨ huinꞌixy yɨ Israel jäy ajcxy jëbɨ yɨꞌ yjäyꞌadyii, etz tügꞌócɨy huɨdi yajhuinhuanɨɨy co möhuaꞌñ, co mayꞌajt tunaꞌñ mɨɨd yɨꞌ ajcxy ycɨxpɨ. Ymöhuɨpy yɨꞌ, ytunɨpy yɨꞌ. Dios caꞌ yꞌayuc yajxïgy.
\v 30 Miich ajcxy huɨdi caꞌ yjudíojäyɨty jecyꞌajty caꞌ anajty mmɨjpɨdaaccɨxy Dios. Jadachambɨ xɨɨ tiempo Dios miich ajcxy tɨ xypaꞌayoy, mɨɨd co yɨ Israel jäy caꞌ mɨjpɨdägy Cristo ytɨyꞌajt.
\v 31 Yɨ judíojäy jadachambɨ xɨɨ tiempo caꞌ mɨjpɨdaaccɨxy Dios ytɨyꞌajt, tɨm jaduꞌn nej jecyꞌajty miich ajcxy caꞌ anajty mmɨjpɨdaaccɨxy Dios ytɨyꞌajt. Jacjiinɨ Dios paꞌayoohuɨn tunaꞌñ jadügꞌoc mɨɨd yɨ judíojäy ajcxy tɨm jaduꞌn nej ytuñ mɨɨd miich ajcxy jadachambɨ xɨɨ tiempo.
\v 32 Com Dios anajty tɨ yajpocycädäy tügꞌócɨy jäy co ajcxy ycapxycömɨdodacy, yɨ judíojäy etz nañ huɨdi caꞌ yjudíojäyɨty, paady ycɨxpɨ Dios paꞌayoꞌn tuñ mɨɨd nidügꞌócɨy jäy, judíojäy etz nañ huɨdi caꞌ yjudíojäyɨty, tügꞌócɨy pɨn mɨjpɨdacp yɨꞌ ytɨyꞌajt.
\p
\v 33 ¡Ooy ycodzɨgɨ̈jɨty Dios! Dios ooy mɨjcajee mayꞌajt oyꞌajt tuñ mɨɨd jäy ajcxy ycɨxpɨ. Dios ooy mɨjcajee mɨjhuinmaꞌñ tɨ tuñ mɨɨd jäy ajcxy ycɨxpɨ. Dios ooy mɨjcajee ycohuinmaꞌñɨty. Caꞌ ni pɨn jëbɨ huinjɨhuɨydäy je ayuc huinmaꞌñ huɨdi Dios ymɨɨd. Etz nañ caꞌ ni pɨn jëbɨ huinjɨhuɨydäy huɨdibɨ Dios ytumyb.
\v 34 Com jaybety jaduꞌn miiñ ma Dios ñecy ma jaduꞌn ymɨnaꞌñ:
\q Caꞌ ni pɨn jëbɨ huinjɨhuɨydäy nej Dios yhuinmaꞌñ mɨɨdɨty. Caꞌ ji ni pɨnjäy huɨdi tɨ capxhuijy Dios.
\q
\v 35 Caꞌ ji ni pɨnjäy huɨdi tijaty tɨ ocmooybɨ Dios.
Dios caꞌ ni ti nuucxy mɨɨdɨty mɨɨd ni pɨnjäy.
\m
\v 36 Tügꞌócɨy huɨdijaty ɨɨch ajt ya nbaatɨm, ac jiiby choondäy ma Dios. Yɨꞌ tügꞌócɨy tɨ yajꞌoyɨydäy, e yɨꞌ jeꞌajttaayɨp tügꞌócɨy. ¡Tzoc Dios capxpaatɨm ojadajtɨm huinɨxɨɨ huinɨtiempo! Jaduꞌn jaduꞌn. Amén. 
\c 12
\s Je jugyꞌajtɨn cɨxyjot ma Dios
\p
\v 1 E jaduꞌn nmɨgügtɨjcɨch, cham ɨɨch miich ajcxy nɨmaaygɨxy mɨctägy, com co Dios tɨ xypaꞌayoogɨxy, paady ycɨxpɨ nayꞌayéjcɨgɨx naygɨ̈yéjcɨgɨx amuumdügjot ma Dios. Cuychɨnayɨ yɨ ytɨyꞌajt yajxon jabom jabom. Tzɨnaaygɨx mɨɨd huädz mjot mhuinmaꞌñ, jaduꞌn nej Dios jëbɨ jäygɨdägy yɨ mdzɨnaayɨn. Jada je tɨyꞌajt nej jëbɨ Dios mꞌojadajtcɨxy tɨydudägy.
\v 2 Caꞌ ajcxy mguydungɨxy mguychɨnaaygɨxy yɨ naaxhuiñyjäy ajcxy yjɨbɨcjot yjɨbɨc-huinmaꞌñ huɨdibɨ tzɨnaaygɨxp jadachambɨ xɨɨ jadachambɨ tiempo. Com Dios tɨ xymooygɨxy jemybɨ mjot jemybɨ mhuinmaꞌñ, paady mguydunɨpy ajcxy yɨꞌ ytɨyꞌajt. Ixpɨjccɨx Dios ytɨyꞌajt, jɨgɨx ajcxy mnejhuɨ̈huɨpy huɨdibɨ tɨyꞌajt Dios chojcyp mguydunɨpy, etz jɨgɨx mhuinjɨhuɨ̈huɨpy je oyhuinmaꞌñ, je tudägypɨ huinmaꞌñ huɨdibɨ Dios yjäygɨdacpy, je huinmaꞌñ huɨdi huädzɨp caꞌpxyɨp.
\p
\v 3 Com Dios mayꞌajt oyꞌajt tɨ tuñ mɨɨd ɨɨch etz tɨ xymöyɨch jada tung co ngapxhuäcxɨch yɨꞌ yꞌayuc, paady ɨɨch miich ajcxy nɨmäy nidügꞌócɨy co caꞌ huaad amɨj agɨx mnayjɨhuɨ́ɨyɨgɨxy, caꞌ huaad nïgɨ anaxy mnaygömáayɨgɨxy cɨꞌm. Nidüg nidüg cɨꞌm huinmaaygɨxy yajxon huɨdi tung jëbɨ myajnɨcxcɨxy, jaduꞌn nej Dios huijyꞌajt cujcꞌajt tɨ xymooygɨxy.
\v 4 Jaduꞌn nej ɨɨch ajt nninïcx ymɨɨd yhuin yꞌahuac etz ycɨꞌ ytecy, je ninïcx abɨcy ytung mɨɨdɨty, je huiin abɨcy ytung mɨɨdɨty, je yꞌahuac abɨcy ytung mɨɨdɨty, etz je cɨꞌ tecy abɨcy ytung mɨɨdɨty.
\v 5 Nañ tɨm jaduꞌn ɨɨch ajt huɨdi mɨjpɨdacp Cristo, e ni may ɨɨch ajt, e tügpɨcy jäy ɨɨch ajt com túꞌcɨy nmɨbɨjcɨm. E nijeꞌ nijeꞌ Dios huijyꞌajt cujcꞌajt tɨ xymooyɨm abɨcyjaty, nej jëbɨ nijeꞌ nijeꞌ Dios ytung nyajnɨcxɨm.
\p
\v 6 Com abɨcyjaty Dios tɨ xymooyɨm huijyꞌajt cujcꞌajt, paady copɨcy nyajtuunɨm nijeꞌ nijeꞌ je huijyꞌajt cujcꞌajt huɨdi Dios tɨ xymooyɨm. Pen Dios tɨ xymooyɨm huijyꞌajt cujcꞌajt jëbɨ ngapxhuäcxɨm yɨꞌ yꞌayuc, copɨcy ngapxhuäcxɨm mɨbaad ixpɨjcɨn nmɨɨdꞌajtɨm.
\v 7 Pen Dios huijyꞌajt cujcꞌajt tɨ xymooyɨm co jëbɨ nbubejtɨm nmɨgügtɨjc, copɨcy nmɨgügtɨjc nbubejtɨm. Pen Dios huijyꞌajt cujcꞌajt tɨ xymooyɨm jëbɨ nyajꞌixpɨjcɨm nmɨgügtɨjc, copɨcy ndungꞌajtɨm yajꞌixpɨgɨɨ.
\v 8 Pen Dios huijyꞌajt cujcꞌajt tɨ xymooyɨm co jëbɨ ngapxhuijɨm nmɨgügtɨjc, co jëbɨ njotꞌamɨjmooyɨm nmɨgügtɨjc, copɨcy ngapxhuijɨm nmɨgügtɨjc, etz njotꞌamɨjmooyɨm nmɨgügtɨjc agujc jotcujc. Pen nyejcɨm tijaty ma nmɨgügtɨjc, copɨcy agujc jotcujc nyejcɨm. Je huɨdi ajcxy nigohuajcꞌajtp mɨbɨjcpɨdɨjc copɨcy yajxon yꞌanéꞌmgɨxɨpy. Pen Dios huijyꞌajt cujcꞌajt tɨ xymooyɨm co jëbɨ nbubejtɨm jäy ajcxy huɨdibɨ ayoꞌn mɨɨd jotmay mɨɨd, copɨcy agujc jotcujc nbubejtɨm pɨnjaty ayoꞌn mɨɨd jotmay mɨɨd.
\s Nej mɨbɨjcpɨdɨjc huaad jugyꞌajtcɨxy chɨnaygɨxy
\p
\v 9 Naychójcɨgɨxy nayjɨhuɨ́ɨyɨgɨxy miñ xyɨpy amuumdügjot, caꞌ yꞌametz yjotmetzɨty. Caꞌ mnijotꞌajtcɨxy jɨbɨc jot jɨbɨc-huinmaꞌñ. Nijotꞌajtcɨx nïgɨ oyjot oyhuinmaꞌñ.
\v 10 Naychójcɨgɨx nayjɨhuɨ́ɨyɨgɨx amuumdügjot, jaduꞌn nej ypadyii mnaymɨgügꞌájtɨgɨxɨpy ma Jesucristo. Nayyajmɨjꞌájtɨgɨx nïgɨ nidüg nidüg miich ajcxy.
\p
\v 11 Naymɨcꞌíjxɨgɨx cɨxyjot huinɨjot, caꞌ mnuuxꞌajtcɨx. Tungɨx amuumdügjot mɨɨd mHuindzɨn Jesucristo ycɨxpɨ.
\p
\v 12 Tzɨnaaygɨx agujc jotcujc, com mnejhuɨɨyb ajcxy co mbadaꞌñ oyꞌajtɨn ma Dios. Mecxtujccɨx yɨ tzaachypɨ ayoꞌn huɨdibɨ mmɨnajxyp myajnajxyp. Mɨbɨjctzoogɨx Dios jabom jabom.
\p
\v 13 Naybubéjtɨgɨx miñ xyɨpy, pen yajmayjajtpy mɨgüg tijaty. Nayyajjättácɨgɨx miñ xyɨpy oy yajxon.
\p
\v 14 Nibɨjctzohuɨꞌ ma Dios huɨdibɨ ajcxy xyꞌixhuɨdijtp xypahuɨdijtp. Nibɨjctzohuɨꞌ mmɨdzip huen Dios mayꞌajt oyꞌajt tuñ mɨɨd yɨꞌ ycɨxpɨ. E caꞌ mnibɨjctzohuɨ̈y co huen ayoꞌn paadɨpy.
\p
\v 15 Tzoc jotcujc nayjɨhuɨɨyɨm co ajt nmɨgügtɨjc jotcujc ñayjɨhuɨ̈yii. Tzoc mɨɨdtajɨm mɨɨdmayɨm nmɨgügtɨjc pen tajp mayb.
\p
\v 16 Ooy yajxon nayyajꞌíjtɨgɨx naygodɨgɨ́ɨyɨgɨx. Caꞌ amɨj agɨx mnayjɨhuɨ́ɨyɨgɨxy. Mɨgügꞌadɨɨyb yɨ mmɨgüg huɨdi ayoob. Yung naxy mɨɨdꞌat mjot mhuinmaꞌñ, caꞌ mnaygömáayɨgɨxy.
\p
\v 17 Co jäy xymɨdundɨgóoygɨxɨpy, caꞌ huaad jɨbɨc myajꞌahuimbijtcɨxy. Hueꞌ janchtɨy oybɨ ajcxy mdunɨpy jaduꞌn nej jäy jëbɨ jäygɨdägy.
\v 18 Oy nayyajꞌíjtɨgɨx mɨɨd nidügꞌócɨy jäy mabaad mmadägy.
\v 19 Miich ajcxy mɨgügtɨjc, co jäy jɨbɨc xymɨdundɨgóoygɨxɨpy, caꞌ nañ jaduꞌn ajcxy myajꞌahuimbidɨpy, mɨmecxtugɨpy ajcxy, com Dios yɨꞌ tzaachytunɨp yɨ jäy ajcxy huɨdi anajty xymɨdundɨgóoygɨxp. Com jaybety jaduꞌn ymiñ ma Dios ñecy jaduꞌn ymɨnañ: “Ɨɨch nyajꞌahuimbidɨpyɨch nej anajty jäy xymɨdundɨgooygɨxy.”
\v 20 Co jäy xymɨdundɨgóoygɨxɨpy myajꞌahuimbidɨpy ajcxy oybɨ, com jaybety jaduꞌn ymiiñ ma Dios ñecy, ma jaduꞌn ymɨnaꞌñ:
\q Pen yɨ mmɨdzip yuboꞌcɨp, myajcayɨpy myajꞌügɨpy, pen yɨ mmɨdzip tɨdzɨɨyɨp, myajnɨɨꞌügɨpy. Co jaduꞌn mdunɨpy mɨɨd mmɨdzip huinꞌit tzöyduꞌn jɨhuɨ̈huɨpy.
\m
\v 21 Pen myajꞌahuimbijtpy jɨbɨc co jäy xymɨdundɨgoy, tɨ anajty jɨbɨc-huinmaꞌñ xymɨmadägy. Hueꞌ janchtɨy yajtun mecxtujcɨn etz oyhuinmaꞌñ, e jaduꞌn jɨbɨcpɨ mɨmadägɨpy mɨɨd oybɨ.
\c 13
\p
\v 1 Copɨcy co nidügꞌócɨy jäy capxymɨdóogɨxɨpy yɨ cajp tungmɨɨdpɨ etz yɨ gobierno tungmɨɨdpɨ. Caꞌ ji ni tüg tungmɨɨdpɨ huɨdibɨ jëbɨ yꞌaneꞌmy pen Dios caꞌ aꞌɨxɨ̈y. Com Dios jaduꞌn cötujcɨn tɨ yajhuɨꞌmy co huen jiiꞌaty tungmɨɨdpɨdɨjc, paady ycɨxpɨ tungmɨɨdpɨdɨjc nidügꞌócɨy jɨm mɨcꞌajt paady ma Dios.
\v 2 Paady jäy ajcxy pɨnjaty caꞌ ycapxymɨdoy ma tungmɨɨdpɨdɨjc, hueꞌ tundɨgooyb ma Dios e tzaachypɨ ajcxy ypadaamyb.
\v 3 Yɨ mɨjtungmɨɨdpɨ caꞌ yɨꞌ ajcxy adzɨgɨ̈y yɨ jäy huɨdijaty oyhuinmaꞌñ mɨɨd. Hueꞌ janchtɨy yɨꞌ ajcxy chaachytunɨpy yɨ jäy huɨdi jɨbɨc-huinmaꞌñ mɨɨd. Pen mdzojcyp co caꞌ tzaachypɨ mbaadɨpy ma yɨ tungmɨɨdpɨ, hueꞌ janchtɨy oybɨ mdunɨpy, e huinꞌit mꞌidɨpy jotcujc.
\v 4 Com Dios tɨ pɨdägy jada tungmɨɨdpɨ mɨɨd miich ajcxy ycɨxpɨ, jɨgɨx jëbɨ jotcujc ajcxy mdzɨnaaygɨxy. Pen mdundɨgooyb huinꞌit je tungmɨɨdpɨ mdzɨgɨ̈huɨpy, com yɨꞌ ymɨɨd mɨcꞌajt jëbɨ tzaachytuñ jäy ajcxy huɨdibɨ tundɨgooyb. Com Dios ytung ytuunɨpy etz ycuyduunɨpy Dios ycötujcɨn jaduꞌn nej Dios xyñajtzꞌaneꞌmɨɨyɨm, copɨcy co tzaachytuñ je jäy ajcxy huɨdibɨ tundɨgooyb.
\v 5 Paady ycɨxp copɨcy mgapxymɨdohuɨpy tungmɨɨdpɨdɨjc, jɨgɨx caꞌ miich ajcxy Dios xychaachytunɨpy e nañ jotcujc mnayjɨhuɨ̈huɨɨyb co caꞌ anajty ti tɨ mdundɨgoy.
\v 6 Yɨ tungmɨɨdpɨdɨjc Dios ycɨxpɨ ajcxy ytuñ, e ymɨɨd ajcxy ycötujcɨn, paady ycɨxpɨ copɨcy mmɨgüedɨpy ajcxy.
\p
\v 7 Mgüedɨpy ma yɨ tungmɨɨdpɨdɨjc huɨdibɨ xypaatp. Co ajcxy cajp meeñ yajmucy, mɨgüedɨpy. Co je gobierno tungmɨɨdpɨ pɨdägy impuestos, mɨgüedɨpy. Jäy ajcxy huɨdijaty tungmɨɨd myajmɨjꞌadɨpy, etz huɨdi mɨjtungmɨɨd mgömayɨpy.
\v 8 Caꞌ pɨn mɨnuucxyꞌadɨɨyb. Tzoc jɨhuɨꞌ mmɨgügtɨjc, e mgüedɨpy oyꞌamy huɨdibɨ mnuucxyp. Co yɨ mmɨgügtɨjc mdzogɨpy mjɨhuɨ̈huɨpy tɨ anajty mguydundäy Dios ycötujcɨn.
\v 9 Jaduꞌn Dios ycötujcɨn jaybety ymiiñ, ma jaduꞌn ymɨnaꞌñ: “Caꞌ mmɨgapxtɨgoyɨpy huingbɨ töxyjäy.  Caꞌ mmɨgüg mmeedzɨpy. Caꞌ mjäyyajꞌögɨpy. Caꞌ mmɨgüg mꞌadzojcɨpy ti ymɨɨd.” Pen mdzojcpy mjɨhuɨɨyb mɨgüg nej miich cɨꞌm mnaychogyii tɨ anajty mguydundaayɨ Dios yꞌaneꞌmɨn ycötujcɨn.
\v 10 Je naychojcɨn je nayjɨhuɨɨyɨn caꞌp jeꞌ ti jɨbɨcpɨ ti tzaachypɨ tuñ ma je mɨgüg, co jaduꞌn jada mguydundähuɨpy tɨ anajty Dios ycötujcɨn mguydundaayɨ.
\p
\v 11 Com miich ajcxy mnejhuɨɨyb co huingon je xɨɨ je tiempo mɨna Jesucristo minaꞌñ jadügꞌoc ya naaxhuiñ, paady ycɨxpɨ jɨjpꞌijxcɨx ajt nHuindzɨn Jesucristo co tzojc yminɨpy. E jadachambɨ tɨ yjac-huingonɨ mɨna miinaꞌñ ɨɨch ajt nHuindzɨn Jesucristo, caꞌydɨ co ogaꞌn nmɨbɨjcɨm.
\v 12 Canaag jɨmɨjt jäy ajcxy ahuijxy jɨjpꞌijxpy co Dios yajnïdzögaꞌñyii ajcxy yꞌalma, jadachambɨ tɨ yhuingonɨ je xɨɨ je tiempo mɨna nꞌalma ajt nïdzoocɨn padaanɨm. Paady ycɨxp tzoc ixmajtzɨm yɨ jɨbɨc-huinmaꞌñ yɨ huɨdibɨ jäy ycuydumyb huɨdibɨ caꞌ Dios ytɨyꞌajt nejhuɨɨyɨ. Tzoc cuychɨnaayɨm cuyjugyꞌajtɨm Dios ytɨyꞌajt.
\v 13 Tzoc tzɨnaayɨm jugyꞌajtɨm tudägy. Tzoc cuyduunɨm Dios ytɨyꞌajt. Caꞌ huaad jaduꞌn ndzɨnaayɨm amügyjäy. Caꞌ huaad nꞌagootzhuɨdijtɨm xiicyaax xiictɨnaayɨm. Caꞌ huaad ndundɨgooyɨm mɨɨd huingbɨ töxyjäy. Ni caꞌ huaad ndziptuunɨm ahuaꞌnduunɨm. Ni caꞌ huaad nmɨgüg nmɨꞌijxtɨnaayɨm.
\v 14 Tzoc cuychɨnaayɨm cuyjugyꞌajtɨm Jesucristo ytɨyꞌajt. Tzoc tzɨnaayɨm tɨydudägy jaduꞌn nej Jesucristo tɨydudägy tɨ chɨnäy ya naaxhuiñ. Caꞌ nguyduunɨm ti jɨbɨcpɨ ajt nꞌaa njot yjaꞌadzojcpy.
\c 14
\s Caꞌ mɨgüg mbocyꞌixy
\p
\v 1 Miich ajcxy nmɨgügtɨjcɨch, copɨcy mgöbɨgɨpy agujc jotcujc ma miich mnayyöymújcɨgɨxy ajcxy yɨ mɨgügtɨjc huɨdibɨ mɨbɨjcp je Cristo, per caꞌ tɨydudägy huinjɨhuɨ̈y je Cristo ytɨyꞌajt. Mgöbɨgɨpy per caꞌ mhuingapxpedɨpy, caꞌ ti myajꞌayucyoonɨpy mɨɨd yɨꞌ ajcxy.
\v 2 Ti mɨgügtɨjc huɨdibɨ mɨnamb co Dios caꞌ ti jɨɨcxy capxꞌaducy, etz jëbɨ ajcxy jɨcxy huenytɨm ti jɨɨcxyɨty. Etz nañ ji mɨgügtɨjc huɨdibɨ mɨnam co Dios tɨ capxꞌaducy tzüch, paady ajcxy jɨcxyꞌadyii jeꞌjadaꞌajty aay ujtz.
\v 3 Yɨ mɨgüg huɨdibɨ tzüch tzützp caꞌ huaad ixtijy je ymɨgüg huɨdibɨ yjɨcxpy jeꞌjadaꞌajty aay ujtz. E nañ ni yɨ mɨgüg huɨdibɨ jɨcxp aay ujtz caꞌ huaad ixtijy yɨ mɨgüg huɨdibɨ tzüch tzuꞌtzp, com Dios ycöbɨjctaayb je jäy ajcxy huɨdibɨ tɨ mɨbɨcy Jesucristo.
\v 4 Caꞌ huaad miich ajcxy mnɨmähuɨpy yɨ mmɨgüg co caꞌ oytuñ, tɨm jaduꞌn nipaady nej co tüg jäy nɨmähuɨpy huingbɨ jäy ytumbɨ co caꞌ oy ytuñ. Dios cɨꞌm nɨmähuɨp huɨdi ajcxy mɨbɨjcp Jesucristo, pen oytuñ o caꞌ oytuñ. Dios ypubejtyp pɨnjaty mɨbɨjcp, paady madaacp ajcxy ma chɨnaayɨn.
\p
\v 5 Nijëjɨty ajt nmɨgügtɨjc ymɨnaꞌñ co ooy ycopɨcyɨty nꞌamayꞌajtɨm nijëjɨty xɨɨ, jacjadyii jäy ymɨnaꞌñ co caꞌ ycopɨcyɨty nꞌamayꞌajtɨm jada xɨɨ. Huen nidüg nidüg ycɨꞌmhuinmaꞌñ yajtuñ pen yꞌamayꞌadamyb, o pen caꞌ amayꞌadaꞌñ nijeꞌ nijeꞌ xɨɨ.
\v 6 Ɨɨch ajt nmɨgügtɨjc huɨdi amayꞌajtp nijëjɨty xɨɨ, hueꞌ ajcxy tijy co Dios jaduꞌn tzojcp. E nañ ɨɨch ajt nmɨgügtɨjc huɨdi tzüch tzuꞌtzp, hueꞌ ajcxy tijy co Dios jaduꞌn tzojcp, etz nañ yajnajxyp Dioscojuyip ma Dios mɨɨd yjɨɨcxy ypɨcy ycɨxpɨ. Nañ tɨm jaduꞌn ajt nmɨgügtɨjc huɨdi caꞌ tzüch tzüdzaꞌñ, hueꞌ tijy co Dios jaduꞌn tzojcp, etz nañ yajnajxyp Dioscojuyip mɨɨd yjɨɨcxy ypɨcy ycɨxpɨ.
\p
\v 7 Caꞌ ɨɨch ajt nayyajtzɨnaayɨm amɨdzoocɨꞌm, nañ jaduꞌn caꞌ ɨɨch ajt cɨꞌm ndzojcɨn co nꞌoꞌcɨm.
\v 8 Pen njactzɨnaayɨm hueꞌ anajty nguyduunɨm ajt nHuindzɨn Jesucristo chojcɨn. Pen nꞌoꞌcɨm yɨꞌ anajty jaduꞌn tɨ yajcöducy. Pen njactzɨnaayɨm, o pen nꞌoꞌcɨm, túꞌcɨy nipaady, com Jesucristo nHuindzɨnꞌajtɨm ma yɨ tzɨnaayɨn etz ma yɨ oꞌcɨn.
\v 9 Paady ycɨxp Cristo yꞌoꞌcy etz yjugypɨjcy jadügꞌoc jɨgɨx jëb nihuindzɨnꞌajttäy yɨꞌ yjäy huɨdibɨ jactzɨnaayb jacjugyꞌajtp, etz jɨgɨx jëb nihuindzɨnꞌaty yɨ tɨɨbɨ yꞌögy.
\p
\v 10 ¿Naꞌamy co mmɨgüg mdzachpocyꞌixy? o ¿Nej co mmɨgüg mdzachꞌixtijy? Caꞌ jaduꞌn yꞌoyɨty co ajcxy jaduꞌn mꞌɨdɨ̈ch. Com nidügꞌócɨy ajt njädaanɨm ma Dios ytɨydundac.
\v 11 Com jaduꞌn jaybety ymiñ ma Dios ñecy, ma jaduꞌn ymɨnaꞌñ:
\q Janch janch co ɨɨch, je tügpajcpɨ Dios, jaduꞌn nmɨnaꞌñɨch co tügꞌócɨy naaxhuiñyjäy xyhuingoxtɨnähuɨbɨch xyhuindzɨgɨ̈huɨbɨch, etz nañ tügꞌócɨy naaxhuiñyjay xycapxpaadɨbɨch co ɨɨch jeꞌ tügpajcpɨ je Dios.
\m 
\v 12 Com Dios nhuindzɨnꞌajtɨm, paady ycɨxp nidügꞌócɨy ɨɨch ajt nayguëxɨ̈ctähuaanɨm ma Dios yhuinduu, chi Dios xyꞌamɨdohuaanɨm nej tɨ ndzɨnaayɨm tɨ njugyꞌajtɨm nidüg nidüg.
\s Caꞌ mɨgüg myajhuinmaꞌñydɨgooygɨxy
\p
\v 13 Paady ycɨxpɨ caꞌ huaad naynixiic naynigapxɨm miñ xyɨpy. Hueꞌ janchtɨy miich pɨdaaccɨx mhuinmaꞌñ co caꞌ ti mdúngɨxɨpy huɨdi mmɨgügtɨjc caꞌ jäygɨdägy, huɨdi mmɨgüg yajpocycähuɨɨb.
\v 14 Nnejhuɨɨybɨch tɨydudägy co ajt nHuindzɨn Jesucristo ytɨyꞌajt xyajnejhuɨɨyɨm co jëbɨ njɨɨcxɨm huen tɨm huɨdi jɨcxy tɨm huɨdi pɨcy. Je jɨcxy je pɨcy caꞌ ma ycobocy. Per pen tüg mɨgüg yhuinmaꞌñ pɨdacp co Dios caꞌ jäygɨdägy co yɨꞌ yjɨcxpy nijëjɨty jɨcxy pɨcy, pues caꞌ yhuaadɨty co yɨ jaduꞌmbɨ jäy jɨcxy huɨdi yɨꞌ ytijpy co caꞌ huaad njɨcxɨm.
\v 15 Pen caꞌ mꞌoyꞌity mɨɨd tüg mɨgüg co tɨ mjɨcxy je jɨcx pɨcy huɨdibɨ yɨꞌ ytijpy co Dios caꞌ jaduꞌn yajꞌcöducy, chi caꞌ anajty mdzocy mjɨhuɨ̈y yɨ mmɨgüg nej ypadyii. Com nañ Cristo tɨ yꞌögy mɨɨd yɨ mmɨgüg ypocy ycɨxpɨ, paady caꞌ huaad myajtɨgoy yɨ mmɨgüg, mɨɨd co mjɨcxy huɨdi yɨꞌ caꞌ jäygɨdägy.
\v 16 Caꞌ ajcxy mꞌaꞌɨxɨ́ɨygɨxɨpy co jɨbɨc yajnigapx yajnimɨydägɨpy huɨdibɨ miich ajcxy myajnajxp co yꞌoyɨty. Oy miich mjahuinjɨhuɨ̈y Dios ytɨyꞌajt, per caꞌ huaad mdunɨpy huɨdi yɨ mmɨgüg caꞌ jäygɨdägy, e huinꞌit xyñigapxɨpy jɨbɨc.
\v 17 Canan Dios jaduꞌn ytɨyꞌajt xyñajtzꞌaneꞌmɨɨyɨm huɨdijaty huaad njɨcxɨm nꞌuucɨm, o huɨdi caꞌ huaad njɨcxɨm nꞌuucɨm. Hueꞌ janchtɨy tɨ xyñajtzꞌaneꞌmɨɨyɨm nej jëbɨ tɨydudägyɨ ndzɨnaayɨm njugyꞌajtɨm. Nej jëbɨ jotcujc nꞌijtɨm mɨɨd ajt nmɨgügtɨjc. Nej jëbɨ jotcujc nayjɨhuɨɨyɨm mɨɨd Dios ymɨcꞌajt ma njot nhuinmaꞌñ.
\v 18 Co jaduꞌn nguyduunɨm nej Cristo ytɨyꞌajt tɨ xyñajtzꞌaneꞌmɨɨyɨm, huinꞌit jäygɨdägɨpy Dios etz nañ jaduꞌn jäygɨdägɨpy jäy ajcxy nej anajty nduunɨm.
\p
\v 19 Tzoc panɨcxɨm je huinmaꞌñ jaduꞌn nej jëbɨ ndzɨnaayɨm agujc jotcujc mɨɨd ajt nmɨgügtɨjc, caꞌ ma ti tzip ti capxy nmɨɨdꞌajtɨm. Tzoc yajtuunɨm je huinmaꞌñ jaduꞌn nej jëbɨ huaad naybubejtɨm nidüg nidüg nej jëbɨ huaad nguychɨnaayɨm Dios ytɨyꞌajt.
\v 20 Caꞌ huaad nyajtɨgooyɨm Dios ytung mɨɨd tzip capxy jaduꞌn nej huɨdi jëbɨ huaad ndzüdzɨm, etz huɨdibɨ caꞌ huaad ndzüdzɨm. Janch tɨyꞌajt co Dios caꞌ ti jɨcxy ti pɨcy capxꞌaducy, per pen njɨcxɨm huɨdijaty nijëjɨty ajt nmɨgügtɨjc yajcobojcpy, e jaduꞌn nyajhuinmaꞌñydɨgooyɨm ajt nmɨgüg, chi nmɨdundɨgooyɨm Dios ytɨyꞌajt.
\v 21 Tɨyꞌajt jaduꞌn co caꞌ huaad tzüch ndzüdzɨm etz caꞌ huaad vino nꞌuucɨm, o jactijaty huɨdibɨ ajt nmɨgüg yajcobojcpy. Com co jaduꞌn ajt nꞌɨdɨɨdzɨm, hueꞌ anajty ajt nmɨgüg nyajhuinmaꞌñydɨgoyaanɨm ma ymɨbɨjcɨn.
\v 22 Miich ajcxy huɨdibɨ huinjɨhuɨɨyb Dios ytɨyꞌajt co Dios caꞌ capxꞌaducy ti jɨcxɨn ti pɨjcɨn, caꞌ mnimɨydacconaxɨpy mɨɨd jäy ajcxy. Dios ñejhuɨɨyb co miich mhuinjɨhuɨ̈y yɨꞌ ytɨyꞌajt. Jëbɨ jotcujc mdzɨnähuɨpy pen mguychɨnaayb je huinmaꞌñ huɨdibɨ miich mnejhuɨɨygɨxyp co ytudägyɨty, e huinꞌit caꞌ jɨbɨc mnayjɨhuɨ̈huɨɨyb ajcxy.
\v 23 Tundɨgooyb yɨ mɨgügtɨjc huɨdibɨ jotmetz jɨɨcxp nijëjɨty jɨcxy pɨcy, mɨɨd co tzɨgɨɨyb yɨꞌ co Dios ymɨjotmädɨɨyb co tɨ jɨcxy huɨdi ytijpy co ycobocy. Tundɨgooyb jaduꞌn com caꞌ tɨ cuydunɨ Dios ytɨyꞌajt nej cɨꞌm tɨ yajnïguejy. Pen caꞌ nguyduunɨm jaduꞌn nej nhuinjɨhuɨɨyɨm Dios ytɨyꞌajt, tundɨgooyɨm anajty.
\c 15
\s Tzojcɨx mɨgügtɨjc, caꞌ ñaydüg mnaychogyii
\p
\v 1 Ɨɨch ajt huɨdibɨ tɨydudägy nmɨbɨjcɨm etz nhuinjɨhuɨɨyɨm Dios ytɨyꞌajt, copɨcy nmɨmecxtujcɨm ajt nmɨgügtɨjc huɨdibɨ caꞌnɨ huinjɨhuɨ̈y yajxon Dios ytɨyꞌajt. Caꞌ huaad ti nduunɨm mɨɨd ngɨꞌm jäygɨdaacɨn ycɨxpɨ.
\v 2 Copɨcy nyajtuunɨm oyhuinmaꞌñ mɨɨd ajt nmɨgügtɨjc, jaduꞌn nej jëbɨ ajt nmɨgüg jäygɨdägy, etz jaduꞌn nej jëbɨ nbubejtɨm ajt nmɨgüg mɨɨd ymɨbɨjcɨn.
\v 3 Com nañ Cristo caꞌ ti ytuñ mɨɨd ycɨꞌm jäygɨdaacɨn ycɨxpɨ, com jaybety jaduꞌn miñ ma Dios ñecy, ma je Cristo nɨmay Dios Teedy: “Miich mmɨdzip ajcxy huɨdibɨ xyñigapxp xyñiꞌojɨɨyb, xyñigapxpɨch xyñiꞌojɨɨybɨch ajcxy nañ jaduꞌn.”
\v 4 Com tügꞌócɨy Dios yꞌayuc huɨdibɨ ycojay jecyꞌajty, hueꞌ cojay mɨɨd ɨɨch ajt ycɨxpɨ, jɨgɨx jëbɨ Dios ytɨyꞌajt nbaatɨm. Dios ytɨyꞌajt xyajnejhuɨɨyɨm co Dios jaduꞌn tzocy co nmɨmecxtujcɨm ajt nmɨgügtɨjc. Nañ Dios yꞌayuc xyjotꞌamɨjmooyɨm, e nañ xyajnejhuɨɨyɨm jaduꞌn jëbɨ njɨjpꞌijxɨm pubejtɨn ma Dios.
\v 5 Com Dios, yɨꞌ jeꞌ huɨdi xypubejtɨm mɨɨd mecxtujcɨn, e nañ xyjotꞌamɨjmooyɨm, paady huen Dios mayꞌajt tunɨpy ma miich ajcxy mjot mhuinmaꞌñ, jɨgɨx jëbɨ mmɨɨdꞌidɨpy túꞌcɨy mjot mhuinmaꞌñ nej Jesucristo yjot yhuinmaꞌñ mɨɨdɨty, e jaduꞌn jëbɨ mnayyajꞌoyꞌíjtɨgɨxy jotcujc caꞌ ma tzip capxy.
\v 6 Dios miich ajcxy xypubedɨpy xypudɨgɨ̈huɨpy, jɨgɨx jëbɨ myajtügɨɨygɨxy mjot mhuinmaꞌñ, etz túꞌcɨy mꞌojadájtcɨxɨpy mhuindzɨgɨ́ɨygɨxɨpy Dios Teedy etz ɨɨch ajt nHuindzɨn Jesucristo.
\s Jesucristo yꞌayuc yajcapxhuäcxy ma huɨdibɨ caꞌ yjudíojäyɨty
\p
\v 7 Naygöbɨ́jcɨgɨx nidüg nidüg agujc jotcujc, tɨm jaduꞌn nej Cristo xycöbɨjccɨxy agujc jotcujc. Co mnaygöbɨ́jcɨgɨxɨpy nidüg nidüg agujc jotcujc, huinꞌit Dios capxpaady yꞌidɨpy.
\v 8 Janch tɨyꞌajt co Cristo yꞌoy ya naaxhuiñ, oy pubety judíojäy ajcxy, e jaduꞌn cuyduñ Dios ytɨyꞌajt huɨdi yajhuinhuanɨɨy Abraham, Isaac etz Jacob jecyꞌajty co jaduꞌn tunaꞌñ mɨɨd yɨꞌ ajcxy ycɨxpɨ.
\v 9 Nañ jaduꞌn Cristo ooy pubejty yɨ huɨdibɨ caꞌ yjudíojäyɨty, jaydëbɨ ajcxy capxpaadɨpy Dios, mɨɨd co tɨ ypaꞌayoyii ajcxy. Com jaybety jaduꞌn ymiñ ma Dios ñecy, ma jaduꞌn David ymɨnañ:
\q Com miich Huindzɨn Dios tɨ xycohuaꞌñɨch paady miich ngapxpaady ma yɨ jäy ajcxy huɨdibɨ caꞌ yjudíojäyɨty. Ɨɨch miich nhuinꞌɨɨhuɨpy mɨɨd himnos.
\m 
\v 10 E nañ jaybety jaduꞌn ymiñ ma Dios yñecy:
\q Jotcujcꞌajtcɨxy quipxy mɨɨd Dios yjäy miich ajcxy huɨdi caꞌ yjudiojäyɨty.
\m 
\v 11 E nañ jaybety jaduꞌn ymiñ ma Dios ñecy, ma jaduꞌn ymɨnaꞌñ:
\q Capxpaatcɨx yɨ Huindzɨn Dios miich ajcxy huɨdi caꞌ yjudíojäyɨty. Capxpaatcɨx yɨ Huindzɨn Dios miich ajcxy nidügꞌócɨy naaxhuiñyjäy.
\m 
\v 12 E Isaías ycojay nañ jaduꞌn ma yɨꞌ ñecy, ma jaduꞌn ymɨnaꞌñ:
\q Maꞌxungꞌadamb tüg Isaí yꞌap yꞌoc, e yɨꞌ aneꞌmamb yɨ jäy huɨdibɨ caꞌ yjudíojäyɨty. Co yɨ jäy ajcxy huɨdibɨ caꞌ yjudíojäyɨty mɨjpɨdägɨpy je mɨjꞌaneꞌmbɨ, hueꞌ ajcxy yjɨjpꞌijxpy co möhuaanɨp oyꞌajt.
\p
\v 13 Nmɨbɨjctzooybɨch Dios mɨɨd miich ajcxy ycɨxpɨ huɨdijaty mɨbɨjcp Jesucristo, com njɨjpꞌijxɨm co Dios xymöhuaanɨm oyꞌajtɨn. Nmɨbɨjctzooybɨch Dios mɨɨd miich ajcxy ycɨxpɨ co huen xyajjotcugɨ̈huɨp ajcxy, e nañ co huen xyajpoocxɨpy mjot mhuinmaꞌñ. Nmɨbɨjctzooybɨch Dios co huen xypubejtcɨxy xypudɨgɨɨygɨxy mɨɨd yɨꞌ yjɨhuɨꞌñ ymɨcꞌajt, jaydëbɨ mjɨjpꞌixɨpy ajcxy co mbaadɨp oyꞌajtɨn mɨjcajee ma Dios.
\p
\v 14 Miich ajcxy mɨgügtɨjc, jotcujc nayjɨhuɨ̈yiijɨch mɨɨd miich ajcxy ycɨxpɨ, com nejhuɨɨybɨch co miich ajcxy mɨɨdɨty oyjot oyhuinmaꞌñ, e nañ mhuinjɨhuɨɨyb ajcxy tügꞌócɨy Dios ytɨyꞌajt, paady jëbɨ mnayyajꞌixpɨ́jcɨgɨxy nidüg nidüg.
\v 15-16 Jotmɨcꞌamy tɨ nyajjäymejtzcoodyɨch miich ajcxy nijëjɨty Dios ytɨyꞌajt ma jada necy huɨdi nyajnijayɨɨyb ajcxy cham, com Dios mayꞌajt oyꞌajt tɨ tuñ mɨɨd ɨɨch, e tɨ xyhuinꞌixyɨch jaydëbɨ nduñɨch Jesucristo ytung ma yɨ jäy ajcxy huɨdi caꞌ yjudíojäyɨty. Jaduꞌn nduñɨch mɨɨd Dios ycɨxpɨ, co ngapxhuäcxyɨch je oybɨ tɨyꞌajt jaduꞌn nej Jesucristo yꞌoꞌcy mɨɨd jäy ajcxy ypocy ycɨxpɨ. Jaduꞌn Jesucristo ytuñ jɨgɨx jëbɨ Dios cöbɨgɨpy yɨ mayjäy caꞌpɨ yjudíojäyɨty huɨdi tɨ mɨbɨcy Jesucristo etz huɨdibɨ yɨ Espíritu Santo tɨ yajhuäch je jɨbɨcp ma ajcxy yjot yhuinmaꞌñ. 
\p
\v 17 Com Jesucristo ytɨyꞌajt yajpaatp ma ɨɨch njot nhuinmaꞌñ, paady ycɨxp ooy jotcujc nayjɨhuɨ̈yiijɨch co nduñɨch mɨɨd Dios ycɨxpɨ.
\v 18 Jada janchtɨy ɨɨch nyajmɨɨdmɨydacy miich ajcxy je mayꞌajt huɨdi Cristo tɨ tuñ co ngapxhuäcxɨch yɨꞌ yꞌayuc. Caꞌ nyajmɨɨdmɨydaaccɨxy huɨdi Cristo ytumyb mɨɨd jacpɨnjaty. Mɨɨd co ngapxhuäcxɨch Cristo yꞌayuc, e nañ mɨjhuinmaꞌñ ndumybɨch mɨɨd Cristo ymɨcꞌajt, paady mayjäy ycapxymɨdooyb Dios huɨdi caꞌp ajcxy yjudíojäyɨty.
\v 19 Tɨ ngapxhuäcxyɨch tügꞌócɨy Cristo ytɨyꞌajt nej jëbɨ ajcxy yꞌalma ñïdzoocɨn paadɨp. Jɨm nyajtzondacyɨch Jerusalén, e tɨ nhuɨdijttäyɨch canaag agajp mabaad njaꞌtyɨch jɨm Ilirico ñaaxjot. E Dios yjɨhuɨꞌñ ymɨcꞌajt xypubejtɨch xypudɨgɨɨyɨch co ɨɨch mɨjhuinmaꞌñ nduñɨch, etz Dios ytɨyꞌajt nyéjcɨbɨch.
\v 20 Ooy nijotꞌatyɨch co ngapxhuäcxɨbyɨch Jesucristo ytɨyꞌajt ma anajty caꞌ pɨn jayɨjp capxhuäcxyñɨ. Ɨɨch ogaꞌn Jesucristo yꞌayuc jɨm nmɨnɨcxɨ ma yɨ jäy ajcxy huɨdi caꞌ anajty mɨdoy Jesucristo ytɨyꞌajt. Jaduꞌn nduuñɨch, jɨgɨx caꞌydɨ njɨjptɨgɨyɨ̈yɨch ma huingbɨ anajty jayɨjp tɨ capxhuäcxɨ Jesucristo ytɨyꞌajt.
\v 21 Com jaybety jaduꞌn ymiñ ma Dios ñecy, ma Dios jaduꞌn ymɨnaꞌñ:
\q Yɨ jäy ajcxy ymɨdohuaanɨp Cristo yꞌayuc huɨdibɨ caꞌnɨ anajty mɨdoogɨxy. Yɨ jäy ajcxy yhuinjɨhuɨ̈huaamyb je Cristo ytɨyꞌajt huɨdibɨ caꞌnɨ anajty nejhuɨɨygɨxy co yjiijɨty je Cristo.
\s Pablo huinmay co ñɨcxaꞌñ jɨm Roma
\p
\v 22 Com ooy ndzachcapxhuäcxɨch Cristo ytɨyꞌajt canaag agajp, paady caꞌ nyajnibadɨ̈yɨch nɨ́cxɨbyɨch ma miich ajcxy. 
\v 23 Canaag jɨmɨjt ndzachnijotꞌatyɨch anajty nɨcxaꞌñɨch ma miich ajcxy. Ixtɨ chamnɨ tɨ nhuɨdijttäyɨch majaty anajty nhuɨdidaꞌñɨch.
\v 24 Paady njɨjpꞌijxypɨch co jëbɨ nnaxɨ̈huɨbɨch ma miich ajcxy co anajty nɨcxyɨch jɨm España ñaaxjot. Huäcxɨbaambɨch jɨm ma miich ajcxy jëbɨ hueenɨ ajcxy ngapxɨm nmɨydaacɨm. Nañ hueꞌ njɨjpꞌijxypɨch co xypubedaambɨch miich ajcxy mɨɨd nduꞌamgɨxpɨch.
\v 25 Jayɨjp nnɨcxaꞌñɨch jɨm Jerusalén, chiinɨ nnɨcxaꞌñɨch ma miich ajcxy. Nmɨnɨcxaamybɨch jɨm Jerusalén hueenɨ meeñ huɨdibɨ nyegaamybɨch ma yɨ mɨbɨjcpɨdɨjc jɨm Jerusalén mɨɨd ayoobtɨjc ycɨxpɨ.
\v 26 Com yɨ mɨbɨjcpɨdɨjc ya Macedonia etz Acaya ñaaxjot tɨ ajcxy yhuinmaꞌñ pɨdaaccɨxy co ajcxy pubedaꞌñ yɨ ayoobtɨjc jɨm Jerusalén huɨdibɨ mɨjpɨdacp Jesucristo.
\v 27 Ooy ajcxy jotcujc ñayjɨhuɨ̈yii co ymɨgügtɨjc pubedaꞌñ jɨm Jerusalén. Paatɨp co pubedɨpy ajcxy, com ma yɨ judíojäy ajcxy, jɨm ajcxy tɨ paady Dios ytɨyꞌajt, paady paatɨp ajcxy huɨdi caꞌ yjudíojäyɨty co pubedɨpy yɨ judíojäy ajcxy.
\v 28 Co anajty tɨ nyajcɨ̈dɨgɨydaaygɨxy je meeñ huɨdibɨ yɨ mɨgügtɨjc ya Macedonia etz Acaya tɨ yajmujccɨxy mɨɨd je mɨbɨjcpɨdɨjc ycɨxpɨ huɨdibɨ yajpatp jɨm Jerusalén, huinꞌit nnɨcxaꞌñɨch jɨm España ñaaxjot. Nnaxɨ̈huaambɨch ma miich ajcxy co anajty jɨm nnɨcxɨch.
\v 29 Nejhuɨɨybɨch co anajty jɨm naxɨ̈yɨch ma miich ajcxy, je Cristo xypubedɨpɨch je ymɨcꞌajt, e nyegɨpɨch Cristo ymɨcꞌajt ijxpejt etz nyajꞌixpɨgɨpyɨch miich ajcxy je Cristo ytɨyꞌajt.
\p
\v 30 Miich ajcxy nmɨgügtɨjcɨch, com miich ajcxy mɨjpɨdaaccɨxyp ɨɨch ajt nHuindzɨn Jesucristo, e com miich ajcxy mɨɨd Dios yjɨhuɨꞌñ ymɨcꞌajt ma mꞌaa mjot, e nañ xychojcpɨch xyjɨhuɨɨybɨch, paady ycɨxp nbɨjctzooyɨch mayꞌajt, yajtügɨɨygɨxy mꞌayuc mhuinmaꞌñ mɨɨd ɨɨch, jëbɨ túꞌcɨy Dios nmɨbɨjctzoohuɨm mɨctägy mɨɨd ɨɨch ycɨxpɨ.
\v 31 Mɨbɨjctzoogɨx Dios co huen xyñihuaꞌñɨch xycohuaꞌñɨch ma yɨ judíojäy ajcxy jɨm Judea naaxjot, huɨdibɨ xycaꞌixaambɨch co ajcxy caꞌ mɨjpɨdägy Jesús. Nañ mɨbɨjctzoogɨx Dios co yɨ mɨbɨjcpɨdɨjc jɨm Jerusalén cöbɨgɨpy ajcxy oy yajxon je pubejtɨn huɨdibɨ ɨɨch jɨm ngɨ̈yegaamy.
\v 32 Mɨbɨjctzoogɨx Dios co huen xypubedɨpy xypudɨgɨ̈huɨbɨch, jëbɨ nɨ́cxɨbɨch ma miich ajcxy agujc jotcujc, caꞌ ti jotmay, pen Dios jaduꞌn tzojcp, etz nañ jëbɨ nhuäcxɨbɨpɨch jɨm ma miich ajcxy agujc jotcujc, e jɨm ɨɨch nhuinmaꞌñ nyajpocxɨp.
\v 33 Mɨbɨjctzooybɨch Dios mɨɨd miich ajcxy ycɨxpɨ, je Dios huɨdibɨ jotcujcꞌajtɨn yejcp, co huen miich ajcxy xypubedɨpy xypudɨgɨ̈huɨpy. Jaduꞌn jaduꞌn. Amén.
\c 16
\s Capxpoocxɨn nidüg nidüg ma pɨnjaty yꞌixyꞌajtyp
\p
\v 1 Cham ɨɨch miich ajcxy nyajnïbɨjccɨxy, cöbɨjccɨxy je ajt nmɨgüg töxyjäy je Febe co anajty ñɨcxy ma miich ajcxy. Yɨꞌ jeꞌ nidügtɨ huɨdibɨ pubejtɨn tumb ma je mɨbɨjcpɨdɨjc jɨm Cencrea.
\v 2 Mdunɨpy mayꞌajt mgöbɨgɨpy Febe mɨɨd ajt nHuindzɨn Jesús ycɨxpɨ. Com jaduꞌn ycopɨcyɨty co jäy huɨdibɨ mɨbɨjcp Jesucristo huen naymɨgügꞌájtɨgɨxy. Mbubedɨp mbudɨgɨ̈huɨp jaduꞌn nej yɨꞌ jotmay mɨɨdɨty. Yɨ Febe tɨ ooy mayjäy pubety, e nañ tɨ xypubetyɨch.
\p
\v 3 Nguejxypyɨch capxpoocxɨn ma jada necy mɨɨd yɨ Priscila etz Aquila huɨdibɨ ɨɨch anajty mɨɨd ooy oy nduñ co ngapxhuäcxyɨch Cristo ytɨyꞌajt.
\v 4 Yɨ Priscila etz Aquila yojx ytooc ajcxy yjugyꞌajtɨn mɨɨd ɨɨch ycɨxpɨ, caꞌydɨ nꞌögyɨch. Nyajnajxypɨch jäygɨdaacɨn ma Dios mɨɨd yɨꞌ ajcxy ycɨxpɨ, co tɨ xypubetyɨch ajcxy. E nañ jaduꞌn tügꞌócɨy jäy ajcxy huɨdibɨ caꞌpɨ yjudíojäyɨty yajnajxcɨxy jäygɨdaacɨn ma Dios mɨɨd yɨꞌ ajcxy ycɨxpɨ.
\v 5 Nguejxypɨch capxpoocxɨn nañ jaduꞌn ma jada necy mɨɨd yɨ mɨbɨjcpɨdɨjc ajcxy huɨdijaty naymujccɨp ma Priscila etz Aquila ajcxy ytɨjc. Etz nañ nguejxpyɨch capxpoocxɨn ma yɨ Epeneto huɨdibɨ ooy ndzocyɨch. Yɨꞌ jeꞌ tɨm jayɨjp huɨdibɨ mɨjpɨdaac Cristo jɨm Acaya ñaaxjot.
\v 6 Etz nañ nguejxypɨch capxpoocxɨn ma María, yɨꞌ ooy tɨ ytuñ mɨɨd miich ajcxy mɨɨd Cristo ycɨxpɨ.
\v 7 Etz nañ nguejxpyɨch capxpoocxɨn ma yɨ Andrónico etz Junias. Ɨɨch nꞌamɨgüg ajcxy huɨdibɨ tɨ ypujxtɨjc ɨñäy quipxy mɨɨd ɨɨch. Capxpaady ajcxy yꞌity mɨɨd yɨ apóstoltɨjc. Jacjayɨjp ajcxy mɨjpɨdacy Jesucristo caꞌydɨ ɨɨch.
\p
\v 8 Etz nañ nguejxypɨch capxpoocxɨn ma yɨ Amplias, huɨdibɨ ooy yajxon mɨjpɨdägy ajt nHuindzɨn Jesucristo.
\v 9 Nañ nguejxypɨch capxpoocxɨn ma yɨ Urbano huɨdibɨ xymɨɨdtuñɨch co ɨɨch anajty ngapxhuäcxyɨch Jesucristo ytɨyꞌajt. Nañ jaduꞌn nguejxypɨch capxpoocxɨn ma yɨ Estaquis huɨdibɨ oy ndzocy njɨhuɨ̈yɨch.
\v 10 Nañ nguejxpyɨch capxpoocxɨn ma yɨ Apeles, huɨdibɨ ooy tɨyꞌajt tɨ yecy co yɨꞌ ymɨbɨjcpy Cristo tɨydudägy. Nañ nguejxypɨch capxpoocxɨn ma yɨ Aristóbulo etz jac pɨnjaty huɨdibɨ yajpatp ma yɨꞌ ytɨjc.
\v 11 Nañ nguejxypɨch capxpoocxɨn ma ɨɨch nꞌamɨgüg yɨ Herodión. Etz nañ nguejxypɨch capxpoocxɨn ma yɨ Narciso yjuugy ymɨgüg huɨdibɨ mɨjpɨdacp ɨɨch ajt nHuindzɨn Jesucristo.
\v 12 Nañ nguejxypɨch capxpoocxɨn ma yɨ Trifena etz Trifosa huɨdijaty tumb ma ajt nHuindzɨn Jesús ytung. Nañ nguejxypɨch capxpoocxɨn ma Pérsida, je mɨgüg huɨdi oy ndzocyɨch, etz nañ huɨdi ooy ytuñ ma ajt nHuindzɨn Jesucristo ytung.
\v 13 Nañ nguejxypɨch capxpoocxɨn ma yɨ Rufo, je huɨdibɨ yɨ mɨbɨjcpɨdɨjc ycömaayb. Nañ nguejxypɨch capxpoocxɨn ma yɨꞌ ytaj, com jaduꞌn njɨhuɨ̈yɨch jaduꞌn nej jɨhuɨ̈y yɨꞌ ndajꞌadyiijɨch.
\v 14 Nañ nguejxpyɨch capxpoocxɨn ma yɨ Asíncrito, yɨ Flegonte, yɨ Hermas, yɨ Patrobas, yɨ Hermes etz ñan tügꞌócɨy yɨ mɨbɨjcpɨdɨjc huɨdi jɨm yajpatp ma yɨꞌ ajcxy.
\v 15 Nañ nguejxpyɨch capxpoocxɨn ma yɨ Filólogo, yɨ Julia, yɨ Nereo etz yɨꞌ yꞌuch töxyjäybɨ, yɨ Olimpas, etz nañ tügꞌócɨy yɨ mɨbɨjcpɨdɨjc huɨdibɨ yajpaatp jɨm ma yɨꞌ ajcxy.
\p
\v 16 Naygapxpóocxɨgɨx xïc xon nidüg nidüg. Naygɨ̈májtzɨgɨx miñ yxipy agujc jotcujc. Tügꞌócɨy huɨdibɨ mɨbɨjcp Jesucristo ma yɨ jacjaydyii cajp, yquejxyp ajcxy capxpoocxɨn ma miich ajcxy.
\p
\v 17 Miich ajcxy mɨgügtɨjc, mayꞌajt nbɨjctzooybɨch naygüendꞌadɨꞌ ajcxy ma yɨ jäy ajcxy huɨdibɨ mɨmiimb ayuc caꞌpɨ ytɨyꞌajtɨty, huɨdibɨ nɨgoob yjäyyajtziptunaꞌñ  yjäybɨjc-huäcxaꞌñ, huɨdibɨ caꞌ ixaꞌñ yɨ Dios ytɨyꞌajt huɨdibɨ tɨ mꞌixpɨjccɨxy. Puuhuäctüd miich yɨꞌ ajcxy.
\v 18 Com yɨ jäy ajcxy huɨdibɨ ymɨgügtɨjc yajhuinmaꞌñydɨgooyb, caꞌ ajcxy tuñ Jesucristo ytung. Hueꞌ ajcxy yajꞌixpɨjcp huɨdi ycɨꞌmhuinmaꞌñ ycɨꞌmdzojcɨn. Jeꞌ ajcxy huinꞌɨ́ɨnɨgɨxp je jäy ajcxy huɨdibɨ caꞌ mɨjcajee yꞌixpɨcyɨty. Yɨ ayuc huɨdibɨ ymɨhuɨdijtyp, jaduꞌn yajmɨdoy nej jɨhuɨ̈y oy ytɨɨyɨty yjanchɨty, per caꞌ yɨꞌ yjanchɨty.
\v 19 Com mayjäy tɨ xyajmɨdooyɨch jaduꞌn nej miich ajcxy mgapxymɨdoy Jesucristo, paady jotcujc nayjɨhuɨ̈yiijɨch mɨɨd miich ajcxy ycɨxpɨ. Ndzojcypɨch co miich ajcxy mnejhuɨ̈huɨpy huɨdibɨ oyhuinmaꞌñ jaydëbɨ mdúngɨxɨpy ajcxy etz caꞌ jɨbɨc-huinmaꞌñ mdúngɨxɨpy.
\v 20 Dios oyhuinmaꞌñ etz mɨcꞌajt tɨ xymooyɨm jëbɨ ndzɨnaayɨm mɨɨd ajt nmɨgügtɨjc agujc jotcujc, caꞌ ma tzip capxy. Tɨm huingon je xɨɨ je tiempo mɨna Dios yajcödɨgoyaꞌñ yɨ mujcuꞌ ymɨcꞌajt, e yɨꞌ xypubedɨp xypudɨgɨ̈huɨp jëbɨ mmɨmadägɨpy yɨ caꞌoybɨ. Nmɨbɨjctzooybɨch Dios mɨɨd miich ajcxy ycɨxpɨ co ɨɨch ajt nHuindzɨn Jesucristo huen mayꞌajt oyꞌajt tuñ mɨɨd miich ajcxy jabom jabom.
\p
\v 21 Je Timoteo huɨdibɨ tumb mɨɨd ɨɨch co ngapxhuäcxɨch Jesucristo ytɨyꞌajt xyajniguejxp ajcxy capxpoocxɨn. Nañ jaduꞌn Lucio, Jasón etz Sosípater ɨɨch nꞌamɨgüg ajcxy, xyajniguejxp capxpoocxɨn.
\p
\v 22 Ɨɨch Tercio huɨdibɨ cojaayb Pablo yꞌayuc ma jada necy, nañ nguejxypɨch capxpoocxɨn ma miich ajcxy, com ɨɨch nañ jaduꞌn nyajpaadyɨch ma ajt nHuindzɨn Jesucristo.
\p
\v 23 Nañ jaduꞌn Gayo xyajniguejxp capxpoocxɨn, yɨꞌ xyajjättacɨch. E nañ je jäy ajcxy huɨdibɨ mɨjpɨdacp Jesucristo huɨdibɨ ajcxy nayyöymujcɨp ma Gayo ytɨjc yquejxyp ajcxy capxpoocxɨn ma miich ajcxy. Erasto je cajp ytesorero etz ajt nmɨgüg huɨdibɨ yxɨɨ Cuarto, nañ xyajniguejxp ajcxy capxpoocxɨn.
\p
\v 24 Nmɨbɨjctzooybɨch Dios mɨɨd miich ajcxy ycɨxpɨ jabom jabom co ɨɨch ajt nHuindzɨn Jesucristo huen mayꞌajt oyꞌajt tuñ ma miich ajcxy. Amén.
\s Je capxpoocxɨn ma yajꞌɨɨbaady yajcapxpaady Dios
\p
\v 25 Tzoc cömayɨm Dios, tzoc ojadajtɨm, tzoc huinꞌɨɨhuim mɨɨd himnos. Dios mɨɨd ymɨcꞌajt jëbɨ xypubedɨpy xypudɨgɨ̈huɨpy ajcxy, jaydëbɨ ajcxy tɨydudägy mmɨbɨgɨpy Jesucristo, caꞌydɨ mjotmetzcɨɨygɨxy. Tɨm jaduꞌn nej je oybɨ tɨyꞌajt huɨdibɨ ngapxhuäcxpɨch tɨm jaduꞌn nej je Jesucristo ytɨyꞌajt huɨdibɨ jacjadyii jäy ycapxhuäcxcɨxyp. Jada je tɨyꞌajt huɨdibɨ jecyꞌajty caꞌ pɨn huinjɨhuɨy huɨdibɨ Dios tɨ xyajnejhuɨɨyɨm.
\v 26 Dios tɨ xyajhuinjɨhuɨɨyɨm nej yhuimbɨdzɨmy je ayuc huɨdibɨ je profetas ajcxy ycojay jecyꞌajty. Dios huɨdibɨ tzɨnaayb huinɨxɨɨ huinɨtiempo, aneꞌmb co huen yajcapxhuäcxy jada tɨyꞌajt oybɨ ma tügꞌócɨy naaxhuiñyjäy, jɨgɨx jëbɨ mayjäy mɨjpɨdägɨp etz capxymɨdoohuɨpy Dios.
\p
\v 27 Mɨɨd co Jesucristo ooy mɨjhuinmaꞌñ tuñ mɨɨd ɨɨch ajt ycɨxpɨ, paady tzoc cömayɨm, tzoc ojadajtɨm etz tzoc huinꞌɨɨhuɨm mɨɨd himnos huinɨxɨɨ huinɨtiempo yɨ tügpajcpɨ Dios huɨdibɨ ñejhuɨydaayb tügꞌócɨy. Jaduꞌn ngapxcɨ́xyɨch. Amén.