\id 1CO
\h 1 CORINTIOS
\toc1 1 CORINTIOS
\mt1 1 CORINTIOS
\mt2 Yɨ Mɨdügpɨ Necy Huɨdibɨ San Pablo Yajniguejx Je Mɨbɨjcpɨdɨjc Jɨm Corinto
\c 1
\p
\v 1-2 Ɨɨch Pablo, Dios jaduꞌn tzojcp co Jesucristo xyajnïbɨcyɨch co ngapxhuäcxɨbyɨch yɨꞌ yꞌayuc. Ɨɨch etz ajt nmɨgüg Sóstenes nijayɨɨybɨch miich ajcxy tügꞌócɨy huɨdibɨ jɨm Corinto huɨdibɨ mɨjpɨdacp Dios etz ñayyöymújcɨgɨxy jɨm mɨɨd Dios ycɨxpɨ. Nijayɨɨybɨch miich ajcxy huɨdibɨ Dios tɨ yajꞌahuimbijttäy tudägy mɨɨd Jesucristo co yꞌoꞌcy mɨɨd ajcxy mbocy ycɨxpɨ. Nijayɨɨybɨch miich ajcxy huɨdibɨ Dios tɨ huinꞌixy, jaydëbɨ mmɨɨdꞌidɨpy huädz jot huädz huinmaꞌñ. Nañ jaduꞌn nijayɨɨybɨch tügꞌócɨy je jäy huenymaꞌamyɨty huɨdibɨ Dios mɨbɨjctzoob ojadajtp mɨɨd ɨɨch ajt nHuindzɨn Jesucristo yxɨɨ. 
\v 3 Ndzojcypɨch co ɨɨch ajt nDios Teedy etz ajt nHuindzɨn Jesucristo oyꞌajt mayꞌajt tunɨpy mɨɨd miich ajcxy, etz xyajjotcugɨ̈huɨpy ajcxy.
\s Oyꞌajt mɨɨd Cristo ycɨxpɨ
\p
\v 4 Nyajnajxypɨch Dioscojuyip ma Dios jabom jabom mɨɨd miich ajcxy ycɨxpɨ, mɨɨd co Dios mayꞌajt oyꞌajt tɨ tuñ mɨɨd miich ajcxy ycɨxpɨ ma Jesucristo.
\v 5 Co tɨ mmɨjpɨdaaccɨxy Jesucristo, oybɨ tɨ mbaatcɨxy ma tügꞌócɨy mdzɨnaayɨn mjugyꞌajtɨn. Mayꞌamy capxy ayuc oybɨ tɨ mbaatcɨxy, etz mayꞌamy huinmaꞌñ oybɨ tɨ mbaatcɨxy.
\v 6 Ma miich ajcxy mdzɨnaayɨn mjugyꞌajtɨn etz mgapxy mꞌayuc ñiguëxɨ̈gɨpy Cristo ytɨyꞌajt etz ymɨcꞌajt.
\v 7 Dios miich ajcxy tɨ xymöy tügꞌócɨy ymɨcꞌajt. Caꞌ ti myajtɨgoyꞌijtcɨxy ma mdzɨnaayɨn mjugyꞌajtɨn huɨdibɨ Dios ñiyejcpy, ma jeꞌ mꞌahuijxcɨxy co Dios yajniguëxɨ̈gaꞌñ jadügꞌoc ya naaxhuiñ ajt nHuindzɨn Jesucristo.
\v 8 Jesucristo miich ajcxy xyhuijtzꞌijtp tudägy, ixtɨ coonɨ ycɨxɨpy tɨgoyɨpy je naaxhuiñybɨ, e co anajty yɨꞌ tɨyduñ naaxhuiñyjäy ajcxy mɨɨd ypocy ycɨxpɨ, caꞌ miich ajcxy mbocycähuɨpy.
\v 9 Dios yjatytɨmycuydunɨpy yɨꞌ yꞌayuc mɨɨd miich ajcxy, caꞌ xyꞌixmadzaangɨxy ni mɨna xɨɨ, com yɨꞌ tɨ xyhuinꞌijxcɨxy co mɨɨd mnaymɨgügꞌájtɨgɨxy yɨꞌ yꞌung, ɨɨch ajt nHuindzɨn Jesucristo.
\s Naybɨjc-huäcxɨɨ ma je mɨbɨjcpɨdɨjc
\p
\v 10 Mɨgügtɨjc, ɨɨch miich ajcxy nmɨnucxtacyp mɨɨd Jesucristo yxɨɨ co tungɨxy mayꞌajt nayꞌayuc-huinjɨhuɨ́ɨyɨgɨx, e caꞌ mnaybɨjc-huäcxɨgɨxy. Tzɨnaaygɨx xïc xon mɨɨd túꞌcɨy mjot mhuinmaꞌñ.
\v 11 Miich ajcxy mɨgügtɨjc, tɨ je Cloé yꞌamɨgügtɨjc xyajnɨmäyɨch co ooy miich ajcxy mnaychipꞌíjxɨgɨxy, e caꞌ mnayꞌayuc-huinjɨhuɨ́ɨyɨgɨxy.
\v 12 Mɨɨd jada ycɨxpɨ nmɨnaꞌñɨch co nijëjɨty miich ajcxy jaduꞌn mɨnaangɨxy: “Ɨɨch Pablo nmɨjnɨcxpejtpyɨch.” E nijëjɨty ymɨnaangɨxy: “Ɨɨch Apolos nmɨjnɨcxpejtpyɨch.” E nijëjɨty ymɨnaangɨxy: “Ɨɨch Pedro nmɨjnɨcxpejtpyɨch.” E nijëjɨty ymɨnaangɨxy: “Ɨɨch Cristo nmɨjnɨcxpejtpyɨch.”
\v 13 ¿Nej Cristo tɨ ñaybɨjc-huäcxyiijɨ? Caꞌ. ¿Nej Pablo yajcruudzpejtɨ mɨɨd miich ajcxy ycɨxpɨ? Caꞌ. ¿Nej tɨ miich ajcxy mnɨɨbejtcɨxy mɨɨd Pablo yxɨɨ? Caꞌ yjaduꞌnɨty.
\v 14 Nyajnajxypɨch Dioscojuyip ma Dios co caꞌ jac ni pɨn ɨɨch tɨ ngayajnɨɨbety. Jëdaꞌajty tɨ nyajnɨɨbetyɨch Crispo etz Gayo.
\v 15 Jaduꞌn tɨ nduñɨch jeꞌgɨxpɨ co caꞌ huaad jäy ajcxy ymɨnaangɨxy co tɨ ajcxy ñɨɨbety mɨɨd Pablo yxɨɨ. 
\v 16 Nañ jaduꞌn tɨ nyajnɨɨbetyɨch yɨ Estéfano mɨɨd yɨꞌ yjuugy ymɨgüg ajcxy. Jac ni jeꞌ caꞌ njäymechɨch pen tɨ nyajnɨɨbetyɨch. 
\v 17 Com Cristo caꞌ xyquejxyɨch jäy yajnɨɨbejtpɨ. Hueꞌ janchtɨy tɨ xyquexyɨch co ngapxhuäcxɨbɨch yɨꞌ yꞌayuc ytɨyꞌajt oybɨ. Caꞌ nyajtuñɨch ixpɨcytɨjc yꞌayuc yhuinmaꞌñ. Co ixyipy nyajtuñɨch ixpɨcytɨjc yꞌayuc yhuinmaꞌñ, naadɨgɨ̈ꞌajt ixyipy co Cristo yꞌoꞌcy ma yɨ cruudz mɨɨd ajt nbocy ycɨxpɨ. 
\s Cristo ymɨɨd Dios ymɨcꞌajt etz yɨꞌ yꞌixpɨjcɨn etz ytɨyꞌajt
\p
\v 18 Yɨ jäy ajcxy huɨdibɨ yꞌalma tɨgoyam, locɨ huinmaꞌñ yɨꞌ tijcɨxy co Cristo yꞌoꞌcy ma yɨ cruudz mɨɨd ajcxy ypocy ycɨxpɨ. Per ɨɨch ajt pɨnjaty yꞌalma nïdzögam, hueꞌ mɨnaanɨm co jada ayuc tɨyꞌajt mɨɨd Cristo ycɨxpɨ, ymɨɨd yɨꞌ Dios ymɨcꞌajt.
\v 19 Com jaybety jaduꞌn ma Dios ñecy, ma Dios jaduꞌn ymɨnaꞌñ:
\q 
Nyajtɨgoyaamybɨch yɨ ixpɨcytɨjc yꞌayuc yhuinmaꞌñ. 
\q 
Njɨbɨjcɨbɨch yɨ cohuinmaꞌñyjäydɨjc ajcxy yhuinmaꞌñ.
\m
\v 20 ¿Ti mɨcꞌajt ymɨɨd yɨ cohuinmaꞌñyjäydɨjc ajcxy? ¿Ti mɨcꞌajt ymɨɨd yɨ ixpɨcytɨjc? ¿Ti mɨcꞌajt ymɨɨd yɨ huɨdibɨ ajcxy nayꞌixquipxɨp mɨɨd ixpɨjcɨn? Caꞌ ti mɨcꞌajt mɨɨdɨty yɨꞌ ajcxy, com Dios tɨ yajꞌahuimbity yɨ naaxhuiñ yꞌixpɨjcɨn tzuu huinmaꞌñ locɨ huinmaꞌñ.
\v 21 Com Dios jaduꞌn tɨ tzocy co jäy ajcxy caꞌ padaangɨxy Dios ytɨyꞌajt ma yɨ naaxhuiñjäy ajcxy yꞌixpɨjcɨn. Dios yjäygɨdacpy co jëbɨ jäy ajcxy yꞌalma ñïdzögɨpy co ajcxy mɨbɨgɨpy je Dios yꞌayuc huɨdibɨ ngapxhuäcxypɨch. Je Dios yꞌayuc ytɨyꞌajt huɨdibɨ ɨɨch ajcxy ngapxhuäcxpy, yɨꞌ yɨ naaxhuiñyjäy ajcxy huinjɨhuɨɨygɨxyp nej tzuu huinmaꞌñ locɨ huinmaꞌñ. 
\p
\v 22 Yɨ judíojäy ajcxy ooy tzachtzojccɨxy co Dios tunɨpy ijxpejt mɨjhuinmaꞌñybɨ. Yɨ griego jäy yꞌixtaaygɨxyp ayuc huinmaꞌñ etz huenhuɨdiibɨty ixpɨjcɨn. 
\v 23 Ɨɨch ajcxy ngapxhuäcxɨch co Cristo yꞌoꞌcy ma yɨ cruudz mɨɨd jäy ajcxy ypocy ycɨxpɨ. Yɨ maybɨ judíojäy ajcxy caꞌ mɨjpɨdägaangɨxy caꞌ cöbɨgaangɨxy ɨɨch ajcxy nꞌayuc. Etz yɨ maybɨ jäy ajcxy huɨdibɨ caꞌp yjudíojäyɨty, hueꞌ tijcɨxy co tzuu huinmaꞌñ locɨ huinmaꞌñ ɨɨch ajcxy nꞌayuc. 
\v 24 Per yɨ jäy ajcxy huɨdibɨ Dios tɨ yhuinꞌíjxɨgɨxy, huen yjudíojäyɨty, o huen ycajudíojäyɨty, hueꞌ ajcxy tijcɨxy co je Cristo ymɨɨd anajty Dios ymɨcꞌajt etz ymɨɨd anajty Dios yꞌayuc ytɨyꞌajt. 
\v 25 Co ixpɨcytɨjc tijcɨxy co Dios ytung, tzuu huinmaꞌñ locɨ huinmaꞌñ jeꞌ, nïgɨ jacꞌoyhuinmaꞌñ yɨꞌ huɨdibɨ Dios tumyb, caꞌydɨ huɨdibɨ jäy ajcxy ytumyb. Co ixpɨcytɨjc ymɨnaangɨxy co Dios caꞌ ymɨcꞌajt mɨɨdɨty, nïgɨ jacmɨcꞌajt mɨɨd yɨꞌ, caꞌydɨ huɨdi jäy ajcxy ymɨɨd. 
\p
\v 26 Mɨgügtɨjc ajcxy, huinmay miich ajcxy jaduꞌn nej Dios tɨ xyhuinꞌijxcɨxy. Ni may miich ajcxy huɨdibɨ caꞌ yꞌixpɨcyɨty, tɨm nihueenɨ huɨdibɨ ixpɨcyɨp ma miich ajcxy. Ni may miich ajcxy huɨdibɨ caꞌ ti mɨcꞌajt, caꞌ ti aneꞌmɨn mɨɨdɨty. Ni hueeñ miich ajcxy huɨdibɨ mɨcꞌajt mɨɨd etz aneꞌmɨn mɨɨd. Ni may miich ajcxy huɨdibɨ oyñipɨnjäyɨty. Ni hueenɨ miich ajcxy huɨdibɨ yꞌap yteedy reyꞌajtp.
\v 27 Per Dios tɨ huinꞌixy yɨ jäy ajcxy huɨdibɨ caꞌ yꞌixpɨcyɨty co jaduꞌn yajtzoꞌydunaꞌñ yɨ ixpɨcyjäy yɨ cohuinmaꞌñjäy. Dios tɨ huinꞌixy yɨ jäy ajcxy huɨdibɨ caꞌ ti mɨcꞌajt mɨɨdɨty, mɨɨd co jaduꞌn yajtzoꞌydunaꞌñ yɨ jäy ajcxy huɨdibɨ mɨcꞌajt mɨɨd, aneꞌmɨn mɨɨd. 
\v 28 Dios tɨ huinꞌixy huɨdibɨ jäy ajcxy caꞌ mɨjꞌijx mɨjpɨdaaccɨxy, huɨdibɨ jäy ajcxy ytijpy co caꞌ yꞌoyɨty. Dios jaduꞌn tuuñ co yajcödɨgoyaꞌñ yɨ huɨdibɨ jäy ajcxy mɨjꞌijxp mɨjpɨdacp, je huɨdibɨ jäy ajcxy ytijpy co yꞌoyɨty. 
\v 29 Jaduꞌn Dios ytuñ co caꞌ tzocy co ni pɨnjäy caꞌ ñaygömayɨɨyb cɨꞌm ma yɨꞌ yhuinduu.
\v 30 Per Dios cɨꞌm yajꞌoyɨɨy nej jëbɨ miich ajcxy myajpatcɨxy mɨɨd Cristo Jesús. Dios cɨꞌm yajꞌoyɨɨy nej jëbɨ ajt nbaatɨm ixpɨjcɨn ma Cristo. Nañ jaduꞌn yajꞌoyɨɨy nej jëbɨ Cristo xyajꞌahuimbijtɨm tudägy, jaydëbɨ Dios xycöbɨjcɨm nej tudägy jäy. Nañ jaduꞌn Dios yajꞌoyɨɨy nej jëbɨ huaad nbaatɨm ajt nhuädzjot nhuädzhuinmaꞌñ ma Cristo. Nañ jaduꞌn Dios yajꞌoyɨɨy nej jëbɨ Cristo xyñihuaanɨm ajt nꞌalma etz njugyꞌajtɨn.
\v 31 Paady ycɨxpɨ jaybety ymiñ ma Dios ñecy, ma jaduꞌn ymɨnaꞌñ: “Pɨnjaty naygömayaanɨp cɨꞌm, huen naygömayii mɨɨd co mɨbɨcy ajt nHuindzɨn Dios.”
\c 2
\s Je yꞌayuc ytɨyꞌajt, je Cristo huɨdibɨ cruudzpejt
\p
\v 1 Per co nꞌoyɨch ma miich ajcxy jayhuin, ngapxhuäcxyɨch anajty Dios yꞌayuc ytɨyꞌajt, oyꞌamy nyajꞌixpɨjcyɨch, caꞌ nyajtuñɨch ixpɨcyjäy ajcxy yꞌayuc, etz nañ jaduꞌn caꞌ nyajtuñɨch tzipjatypɨ ayuc.
\v 2 Co jɨm nꞌijtyɨch ma miich ajcxy jayhuin, chi nhuinmaꞌñybɨdacyɨch co caꞌ jac ti ayuc ti huinmaꞌñ nyajmɨɨdmɨydägaangɨxy, jëꞌyɨ janchtɨy nyajmɨɨdmɨydägaangɨxy Jesucristo etz jaduꞌn nej jeꞌ yajcruudzpejtɨ mɨɨd jäy ajcxy ypocy ycɨxpɨ.
\v 3 Co jɨm ɨɨch anajty nyajpaadyɨch ma miich ajcxy, chi ooy yung naxy naybɨdaacɨch, ooy ndzɨgɨɨy njɨhuɨɨyɨch.
\v 4 E co nmɨɨdmɨydaacyɨch miich ajcxy, co ngapxhuäcxyɨch Dios ytɨyꞌajt ma miich ajcxy, caꞌpɨ ɨɨch miich ajcxy nyajmɨbɨcy mɨɨd ixpɨcytɨjc yꞌayuc mɨɨd tzipjatypɨ ayuc. Je Espíritu Santo xypubejtpɨch anajty co ajcxy nyajꞌijxy Dios ymɨcꞌajt, e paady ycɨxpɨ tɨ ajcxy mmɨbɨjccɨxy Dios yꞌayuc. 
\v 5 Jaduꞌn je Espíritu Santo xypubetyɨch anajty, jɨgɨx miich ajcxy mɨjpɨdägɨpy Dios, caꞌ nmɨnaanɨm mɨɨd co tɨ mmɨdoogɨxy oyjatypɨ ayuc huɨdibɨ jäy ajcxy tɨ cojy tɨ macxy. Tɨ mmɨjpɨdaaccɨxy Dios com tɨ mꞌijxcɨxy tɨ mjɨhuɨɨygɨxy Dios ymɨcꞌajt. 
\s Dios xyajnejhuɨɨyɨm yɨꞌ ytɨyꞌajt mɨɨd yꞌEspíritu Santo
\p
\v 6 Oy co tɨ nyajmɨbɨcyɨch miich ajcxy mɨɨd ayuc huɨdibɨ caꞌ chipjatyɨty, per nañ jaduꞌn nyajꞌixpɨcyɨch  oyjatypɨ ayuc tzipjatypɨ ayuc yɨ mɨbɨjcpɨdɨjc ajcxy tɨɨbɨ yhuinmaꞌñ ymiinnɨ ymejchnɨ. Tɨgachjaty ɨɨch nꞌayuc ndɨyꞌajt e caꞌ ñaybadyii mɨɨd naaxhuiñyjäy ajcxy yꞌayuc ytɨyꞌajt huɨdibɨ caꞌ mɨbɨjccɨxy huɨdibɨ tzɨnaayb jugyꞌajtp jadachambɨ xɨɨ jadachambɨ tiempo. Ɨɨch nꞌayuc ndɨyꞌajt caꞌ ñaybadyii mɨɨd je jäy ajcxy yꞌayuc ytɨyꞌajt huɨdibɨ aneꞌmb ya naaxhuiñ, yɨ jaduꞌmbɨ jäy yɨꞌ ajcxy yjugyꞌajtɨn cɨxamb tɨgoyamb tüccɨ́ꞌyɨ. 
\v 7 Ɨɨch ajcxy nyajꞌixpɨjcpy Dios yꞌayuc ytɨyꞌajt huɨdibɨ caꞌ ni pɨn jecyꞌajty nejhuɨy huinjɨhuɨy, je ayuc tɨyꞌajt huɨdibɨ Dios ymɨɨd coyüch, je ayuc tɨyꞌajt huɨdibɨ Dios tɨ cojy tɨ macxy jecyꞌajty caꞌnɨ anajty naaxhuiñybɨ chondacy. Dios ycoj ymacx jada ayuc, jaydëbɨ ajt nꞌalma ñïdzoocɨm huinɨxɨɨ huinɨtiempo. 
\v 8 Ni tüg mɨjꞌaneꞌmbɨ huɨdibɨ tzɨnaayb jadachambɨ xɨɨ jadachambɨ tiempo, caꞌ huinjɨhuɨ̈y jada ayuc. Co ixyipy ajcxy huinjɨhuɨ̈y, caꞌ ajcxy cayajcruudzpejty je Huindzɨn  Dios yꞌung, je huɨdibɨ mɨɨd Dios yꞌoyꞌajtɨn ymɨjꞌajtɨn.
\v 9 Com caꞌ ajcxy huinjɨhuɨ̈y Dios yꞌayuc, paady ycɨxpɨ jaybety ymiñ ma Dios ñecy, ma jaduꞌn ymɨnaꞌñ:
\q Ni tüg jäy caꞌ ixy, ni tüg jäy caꞌ mɨdoy, ni tüg jäy caꞌ yhuinmaꞌñybaady jaduꞌn nej Dios niꞌixɨ̈y mɨɨdɨty mɨɨd je jäy ajcxy ycɨxpɨ huɨdibɨ yɨꞌ mɨjpɨdaacɨp yajmɨjꞌajtɨp.
\m 
\v 10 Mɨɨd co nmɨjpɨdaacɨm Dios, paady ycɨxpɨ Dios yajꞌoyɨɨy nej jëbɨ je Espíritu Santo xyajnejhuɨɨyɨm yɨꞌ ytɨyꞌajt. E je Espíritu Santo yhuinjɨhuɨydaayb ñejjɨhuɨydaayb tügꞌócɨy, ixtɨ yhuinjɨhuɨydaayb nej Dios yhuinmaꞌñ tɨ pɨdägy co tunaꞌñ, je huɨdibɨ caꞌ pɨn nejhuɨ̈y.
\p
\v 11 Caꞌ pɨnjäy jëbɨ huinjɨhuɨ̈y nej jadügpɨ jäy yjot yhuinmaꞌñ mɨɨdɨty. Je jäy ycɨꞌmhuinmaꞌñ jëbɨ huinjɨhuɨ̈y nej jeꞌ ycɨꞌmjot ycɨꞌmhuinmaꞌñ mɨɨdɨty, caꞌ jac pɨn. Nañ jaduꞌn caꞌ jac pɨn jëbɨ huinjɨhuɨ̈y nej Dios yjot yhuinmaꞌñ mɨɨdɨty. Dios ycɨꞌmjɨhuɨꞌñ huinjɨhuɨɨyb nej Dios yjot yhuinmaꞌñ mɨɨdɨty.
\v 12 Dios caꞌ xyajꞌadɨgɨɨyɨm xyajjottɨgɨɨyɨm huingjäy yjɨhuɨꞌñ ymɨcꞌajt. Hueꞌ Dios xyajꞌadɨgɨɨyɨm xyajjottɨgɨɨyɨm yɨꞌ ycɨꞌmjɨhuɨꞌñ ycɨꞌmmɨcꞌajt, paady ycɨxp jëbɨ nhuinjɨhuɨɨyɨm tügꞌócɨy huɨdibɨ tɨ xymooyɨm. 
\v 13 Ɨɨch ajcxy nyajmɨɨdmɨydacpy miich ajcxy je ayuc tɨyꞌajt huɨdibɨ je Espíritu Santo xyajꞌixpɨ́jccɨxyɨch. E caꞌ nyajmɨɨdmɨydaaccɨxy je tɨyꞌajt huɨdibɨ tɨ nꞌixpɨcyɨch ya naaxhuiñ huɨdibɨ jäy ajcxy tɨ cojy tɨ macxy. Nyajꞌixpɨjccɨxy Dios yꞌayuc ytɨyꞌajt huɨdibɨ je Espíritu Santo xyajnejhuɨɨyɨch. Ɨɨch tɨ nyajꞌixpɨcyɨch yɨꞌ ajcxy huɨdibɨ mɨɨd Dios yjɨhuɨꞌñ ymɨcꞌajt ma yꞌaa yjot.
\p
\v 14 Pɨnjaty caꞌ mɨɨdɨty Dios yjɨhuɨꞌñ ymɨcꞌajt, caꞌ yɨꞌ cöbɨgaꞌñ je tɨyꞌajt huɨdibɨ je Espíritu Santo xyajnejhuɨɨyɨm. Com yɨꞌ ajcxy ytijp co jada tɨyꞌajt tzuu huinmaꞌñ locɨ huinmaꞌñ yɨꞌ. Nañ ni caꞌ ajcxy Dios ytɨyꞌajt huinjɨhuɨɨyɨ, com caꞌ ajcxy mɨɨdɨty Dios yjɨhuɨꞌñ ymɨcꞌajt huɨɨdibɨ yajnejhuɨɨyb Dios ytɨyꞌajt.
\v 15 Je jäy huɨdibɨ ymɨɨdꞌajtɨpy Dios yjɨhuɨꞌñ ymɨcꞌajt, yɨꞌ jëbɨ yajcɨ̈yöy yajtecyyöy tügꞌócɨy pɨnjaty yjot yhuinmaꞌñ. Per caꞌ yɨꞌ huaad pɨnjaty yajcɨ̈yöyii yajtecyyöyii yjot yhuinmaꞌñ. 
\v 16 Com jaduꞌn Dios ymɨnaꞌñ ma ñecy: “¿Pɨn jäy huinjɨhuɨɨyb nej Dios yhuinmaꞌñymɨɨdɨty? Caꞌ ni pɨn. ¿Pɨn jäy huaad Dios yajꞌixpɨcy? Caꞌ ni pɨn.” Oy caꞌ pɨn huinjɨhuɨ̈y jecyꞌajty nej Dios yhuinmaꞌñymɨɨdɨty, jadachambɨ ɨɨch ajt nhuinjɨhuɨɨyɨm nej Cristo yhuinmaꞌñymɨɨdɨty.
\c 3
\s Je huɨdibɨ ajcxy mɨbɨjcp ytungɨxy ma Dios
\p
\v 1 Mɨgügtɨjc ajcxy, co tɨ nꞌoyɨch ma miich ajcxy, chi nmɨɨdmɨydaaccɨxy jaduꞌn nej jɨhuɨ̈y miich ajcxy mhuinmaꞌñymɨɨdɨty nej naaxhuiñyjäy ajcxy yhuinmaꞌñymɨɨdɨty huɨdibɨ caꞌ ymɨbɨjccɨxy. E caꞌ anajty miich ajcxy mɨɨdɨty je mhuinmaꞌñ huɨdibɨ je Espíritu Santo yejcpy. Miich ajcxy mmɨbɨjcɨn ma Cristo jaduꞌn yɨꞌ nipaady nej maꞌxungdɨjc ymɨbɨjcɨn. 
\v 2 Tɨ nyajꞌixpɨjccɨxy Dios yꞌayuc huɨdibɨ caꞌ jëbɨ tzip mhuinjɨhuɨɨygɨxy. Jaduꞌn nipaady nej jäy ajcxy yajꞌügy leche yɨ maꞌxungdɨjc, mɨɨd co cacöbɨgaꞌñ caayɨn uucɨn huɨdibɨ jemxy cɨdacp ma yjot. Caꞌ miich ajcxy anajty tɨ mnayñiꞌixɨ́ɨyɨgɨxy ma mjot mhuinmaꞌñ nej jëbɨ mhuinjɨhuɨɨygɨxy Dios yꞌayuc yɨ tzipjatypɨ. Chambaadnɨ caꞌ mnayñiꞌixɨ̈yiinɨ ajcxy ma mjot mhuinmaꞌñ nej jëbɨ mhuinjɨhuɨɨygɨxy yɨ tzipjatypɨ ayuc.
\v 3 Chambaadnɨ miich ajcxy myajtuñ mjot mhuinmaꞌñ jaduꞌn nej naaxhuiñjäy ajcxy mɨɨdɨty huinmaꞌñ caꞌpɨ ymɨbɨjccɨxy, chambaad mmɨꞌijxtɨnaaygɨx yɨ mɨgügtɨjc, chambaad mnaychipꞌíjxɨgɨx naybɨjc-huäcxɨgɨx. Jaduꞌn mꞌɨdɨɨtzcɨxy nej jacjadyii jäy ajcxy yꞌɨdɨɨtzcɨxy huɨdibɨ caꞌ ymɨbɨjccɨxy.
\v 4 Com nijëjɨty miich ajcxy mɨnaangɨxy: “Ɨɨch naygomajtzɨp ma Pablo.”  Etz nijëjɨty mɨnaangɨxy: “Ɨɨch naygomajtzɨp ma Apolos.”  Jada je tɨyꞌajt co caꞌ mnayꞌayuc-huinjɨhuɨ́ɨyɨgɨxy tɨm jaduꞌn nej jäy ajcxy caꞌ nayꞌayuc-huinjɨhuɨ́ɨyɨgɨxy huɨdibɨ caꞌ mɨɨdɨty Dios yjɨhuɨꞌñ ymɨcꞌajt.
\p
\v 5 ¿Pɨn jeꞌ je Apolos? ¿Pɨn jeꞌ je Pablo? Ɨɨch Pablo etz Apolos nimetz ajcxy nduñ ma Dios ytung, e ɨɨch miich ajcxy nyajmɨbɨjccɨxy Cristo. Ɨɨch ajcxy nduñ nidüg nidüg je tung huɨdibɨ Dios xymooyɨch.
\v 6 Ɨɨch jayɨjpꞌaty miich ajcxy tɨ nyajꞌixpɨcyɨch, e Apolos jacꞌaxam. Jaduꞌn miich ajcxy nipaady nej tüg moc cam huɨdibɨ ɨɨch tɨ nnïpy, e Apolos jacꞌaxam tɨ pɨdägy nɨɨ.  Per Dios tɨ yajyeegy je moc.
\v 7 Caꞌ ytimyñejɨty pɨn tɨ yñïpy, e pɨn tɨ pɨdägy je nɨɨ. Dios yɨꞌ tügpajc copɨcyɨp. Com yɨꞌ yajyeecp je moc. 
\v 8 Yɨꞌ huɨdibɨ niip etz yɨꞌ huɨdibɨ nɨɨ pɨdacp, quipxyjaty ajcxy. Dios yegamb je oyꞌajt ma nidüg nidüg jaduꞌn nej anajty tɨ ytungɨxy.
\v 9 Com ɨɨch etz Apolos naymɨgügꞌájtɨbɨch ajcxy ma Dios ytung. Jaduꞌn miich ajcxy nipaady nej Dios ycam huɨdibɨ Apolos tɨ tuñ etz huɨdibɨ ɨɨch tɨ nduñ.
\p
Nañ jaduꞌn miich ajcxy nipaady nej tüg tɨjc huɨdibɨ Dios ycojpy.
\v 10 Dios tɨ xyajnïbɨcyɨch yɨꞌ ytung ndunɨpyɨch. Tɨ nyajꞌixpɨcyɨch miich ajcxy Dios yꞌayuc ytɨyꞌajt. Jaduꞌn ɨɨch nipaady nej tüg pojtzpɨ oybɨ huɨdibɨ tɨ yajtzondägy je tzaadɨjc poch. Chi huingjäy xyjacyajꞌixpɨjccɨxy. Jaduꞌn yɨꞌ nipaady nej huingbɨ pojtzpɨ huɨdibɨ je tzaadɨjc poch jacjɨjppodzɨɨyb. Copɨcy co nidüg nidüg huɨdibɨ yajꞌixpɨjcp Dios ytɨyꞌajt yajxon yajꞌixpɨ́jccɨxɨpy.
\v 11 Dios tɨ pɨdägy Jesucristo tügpajc huɨdibɨ huaad nmɨbɨjcɨm, e caꞌ huaad pɨdacy huingbɨ. Jaduꞌn Jesucristo nipaady nej tüg tɨjcpoch chondägy.
\v 12 Co pɨnjaty yajꞌixpɨcy Dios yꞌayuc ytɨyꞌajt tɨydudägy, chi jaduꞌn nipaady nej jɨhuɨ̈y pɨnjaty tɨjcpojtzp mɨɨd orɨ, mɨɨd plata etz mɨɨd tzaa oyjatypɨ. Pɨnjaty caꞌ yajꞌixpɨcy yajxon Dios ytɨyꞌajt, jaduꞌn nipaady nej jɨhuɨ̈y pɨnjaty tɨjcpojtzp mɨɨd quipy, mɨɨd mɨy, etz mɨɨd mocꞌaay.
\v 13 Jiinɨ co anajty xɨɨ tiempo paady mɨna Cristo tɨydunaꞌñ yɨꞌ yjäy huinꞌit ñiguëxɨ̈gɨpy nej Dios ytumbɨ ajcxy tɨ ytungɨxy co tɨ yajꞌixpɨjccɨxy. Niguëxɨ̈gɨp pen oy tɨ yajꞌixpɨjccɨxy Dios ytɨyꞌajt, o pen caꞌ oy tɨ yajꞌixpɨjccɨxy. Jaduꞌn nipaady nej Dios jɨɨn pɨdägy ma je tɨjc, e je quipy, je mɨy, etz je mocꞌaay tɨgoydähuɨpy ma je jɨɨn. Etz je orɨ, plata etz tzaa oyjatypɨ caꞌ ytɨgoydähuɨpy mɨɨd je jɨɨn.
\v 14 Penɨ oy yajxon pɨnjaty tɨ yajꞌixpɨcy Dios ytɨyꞌajt, chi Cristo premio möhuaꞌñ jada jäy co ooy yajxon tɨ yajꞌixpɨcy. E jaduꞌn yɨꞌ ytung nipaadɨp nej je orɨ, plata, etz tzaaꞌoyjatypɨ huɨdibɨ caꞌ ytɨgooy ma je jɨɨn.
\v 15 Pen je Dios ytumbɨ caꞌ oy yajxon tɨ yajꞌixpɨcy Dios yꞌayuc ytɨyꞌajt, chi caꞌ premio padaꞌñ. Jaduꞌn yɨꞌ ytung nipaadɨp nej je quipy, je mɨy, etz je mocꞌaay huɨdibɨ tɨ  ytɨgoy ma je jɨɨn. Jaduꞌn nipaadɨp mɨɨd jada jäy nej jɨhuɨ̈y tɨ ñaxy jɨɨnjoty, e tɨ ytɨgoydäy ma je jɨɨn tijaty ymɨɨd, jeꞌyɨ yjugyꞌajtɨn tɨ yajtzögy.
\p
\v 16 ¿Nej caꞌ mnejhuɨɨygɨxy? Pen Dios yjɨhuɨꞌñ ymɨcꞌajt yajpat ma miich ajcxy, jaduꞌn nipaady nej jɨhuɨ̈y Dios cɨꞌm tɨ chɨnaydacpɨcy ma miich ajcxy, nej jɨhuɨ̈y miich ajcxy Dios xytɨjcꞌadyii.
\v 17 Pen ji pɨnjaty huɨdibɨ yajhuindɨgoy Dios chɨnaydac, huinꞌit Dios yajtɨgoyaꞌñ jada jäy. Yɨ Dios chɨnaydac huädzꞌit amayꞌit yɨꞌ, com Dios tɨ chɨnaydacpɨcy ma miich ajcxy huɨdibɨ mɨbɨjccɨxp.
\p
\v 18 Ix mnayhuinꞌɨ́ɨnɨgɨx cɨꞌm. Pen nidügtɨ miich ajcxy mnaydijyii co oy ixpɨcyɨty ma naaxhuiñyjäy yꞌixpɨjcɨn, copɨcy jäydɨgoyɨpy yɨꞌ yꞌixpɨjcɨn, jɨgɨx ixpɨgɨpy Dios ytɨyꞌajt.
\v 19 Yɨ naaxhuiñyjäy yꞌixpɨjcɨn jaduꞌn nipaady mɨɨd Dios nej tzuu huinmaꞌñ locɨ huinmaꞌñ. Paady jaduꞌn yjaybetyɨty ma Dios ñecy ma jaduꞌn ymɨnaꞌñ: “Dios yajpocycähuɨp yɨ ixpɨcytɨjc mɨɨd ycɨꞌmꞌayuc mɨɨd co chachnaygömayii.”
\v 20 E jaduꞌn yjaybetyɨty jadügꞌit ma Dios ñecy ma jaduꞌn ymɨnaꞌñ: “Je Huindzɨn Dios ñejhuɨɨyb co yɨ ixpɨcytɨjc yꞌayuc yhuinmaꞌñ caꞌ choobaady.”
\v 21 Ni pɨn caꞌ huaad amɨj agɨx ñayjɨhuɨ̈yii, mɨɨd co mɨjnɨcxpety oyñipɨn yꞌayuc. Miich ajcxy mɨɨdꞌajttaayb tügꞌócɨy tijaty.
\v 22 Miich ajcxy mɨɨdꞌajtpy Pablo, Apolos etz Pedro. Nañ jaduꞌn miich ajcxy mɨɨdꞌajtpy je naaxhuiñybɨ, je tzajp, je jugyꞌajtɨn, je oꞌcɨn, je xɨɨ je tiempo huɨdibɨ ji yajpatp, etz huɨdibɨ mim cɨdaacp.
\v 23 Je Cristo mɨɨdꞌajtpy miich jeꞌ ajcxy cɨ̈ꞌam etz Dios ymɨɨdꞌajtpy Cristo cɨ̈ꞌam.
\c 4
\s Je apóstoles ajcxy ytung
\p
\v 1 Jëbɨ jaduꞌn co ɨɨch etz Apolos, ɨɨch miich ajcxy xytijcɨxy Cristo ytumbɨ huɨdibɨ Dios tɨ xyajnïbɨ́jccɨxyɨch, nyajꞌixpɨ́jccɨxyɨch etz nguendꞌájtcɨxyɨch yɨꞌ yꞌayuc ytɨyꞌajt huɨdibɨ jecyꞌajty caꞌ pɨn nejhuɨy huinjɨhuɨy.
\v 2 Pɨnjaty cuendꞌajtp huingjäy yjeꞌ, copɨcy tɨydudägy ytunɨpy, jaydëbɨ yɨꞌ yhuindzɨn yjäygɨdägɨɨyb yɨꞌ ytung.
\v 3 Per caꞌ ooy nduñɨch cuendɨ co miich ajcxy xyajcɨ̈yöy xyajtecyyöyɨ ɨɨch nbocy. Nañ jaduꞌn caꞌ ooy nduñɨch cuendɨ co ixyipy tüg juez yajcɨ̈yöy yajtecyyöyɨ ɨɨch nbocy. Nañ jaduꞌn caꞌ nyajcɨ̈yöyɨch nyajtecyöyɨch ngɨꞌmbocyɨch.
\v 4 Caꞌ nayjɨhuɨ̈yiijɨch co nmɨdundɨgooyɨch miich ajcxy. Caꞌ jaduꞌn nmɨnaꞌñɨch co caꞌ ma ndundɨgooyɨch. Hueꞌ ajt nHuindzɨn Jesucristo yɨꞌ jeꞌ xyajcɨ̈yöyɨp xyajtecyyöyɨp ɨɨch nbocy, caꞌ jac pɨnjaty.
\v 5 Paady ycɨxpɨ ixmajtzcɨx jaduꞌn nej miich ajcxy xypocyꞌijxcɨxy jayɨjpnɨ ma caꞌnɨ Jesucristo ymiñ jadügꞌoc ya naaxhuiñ. Ahuijxcɨx co Jesucristo yajniguëxɨ̈gaanɨ je jäy ajcxy ypocy huɨdibɨ cham caꞌ ñiguëxɨ̈gy, huɨdibɨ jaduꞌn nipaady nej jɨhuɨ̈y yüch yꞌity agootztuuby. Jesucristo co anajty ymiñ jadügꞌoc, chi yajniguëxɨ̈gɨpy nej jäy ajcxy yjot yhuinmaꞌñ mɨɨdɨty. E Dios nidüg nidüg jäy cömayaꞌñ pen oy tɨ ytuñ, e caꞌ cömayaꞌñ pen caꞌ oy tɨ ytuñ. 
\p
\v 6 Mɨgügtɨjc ajcxy, cɨꞌm tɨ naybɨdägyiiyjɨch mɨɨd Apolos jaduꞌn nej tüg ijxpejt ma jada tɨyꞌajt huɨdibɨ cham tɨ nyajnijayɨɨygɨxp. Jaduꞌn tɨ nduñɨch mɨɨd miich ajcxy mꞌoyꞌajtɨn ycɨxpɨ, jɨgɨx jëbɨ miich ajcxy mꞌixpɨjccɨxy jaduꞌn nej jëbɨ mguydundaygɨxy Dios ytɨyꞌajt, e caꞌ mjactungɨxy huɨdibɨ Dios ycapxcödujc ma ñecy. Nañ jaduꞌn ɨɨch tɨ nduñɨch mɨɨd Apolos nej tüg ijxpejt, jɨgɨx miich ajcxy caꞌ mnaygömayɨɨyb cɨꞌm, e caꞌ mmɨnaangɨxy co mnaygomájtzɨgɨxy ma tüg Dios ytumbɨ, e jadüg mꞌixtijcɨxy.
\v 7 ¿Pɨn tɨ xyajnajxcɨxy jaduꞌn nej jɨhuɨ̈y ajcxy ooy mgömayɨty? Caꞌ ni pɨn. ¿Ti miich ajcxy mɨɨdɨty, huɨdibɨ Dios caꞌ tɨ xymooygɨxy? Caꞌ ni ti. E pen Dios tɨ xymooygɨxy tijaty ajcxy mmɨɨdɨty, ¿naꞌamy co mnaygömáyɨgɨxy cɨꞌm, jaduꞌn nej jɨhuɨ̈y cɨꞌm tɨ mganarꞌajtcɨxy tijaty ajcxy mmɨɨdɨty?
\p
\v 8 Jaduꞌn miich ajcxy mnaybɨdáacɨgɨxy nej jɨhuɨ̈y tɨ mgüxɨgɨxy, nej jɨhuɨ̈y tɨ mgomeeñygojcɨxy, nej jɨhuɨ̈y mreyꞌajtcɨxy, e caꞌ mdzojccɨxy co nyajꞌixpɨgɨpyɨch.
\v 9 Miich xytíjcɨxyɨch nej jɨhuɨ̈y ɨɨch ajcxy apóstoltɨjc Dios tɨ xypɨdaaccɨxɨch nej huɨdibɨ caꞌ ytɨmcapxpaadyɨty, nej huɨdibɨ ypocy coꞌögɨɨyb, co ángeles ajcxy etz jäy ajcxy xyñixíiccɨxyɨch xyñiyáaxcɨxyɨch.
\v 10 Miich ajcxy xytíjcɨxyɨch co ɨɨch ajcxy apóstoltɨjc jaduꞌn nej jäy tzuu locɨp co ndúngɨxyɨch mɨɨd Cristo ycɨxpɨ. E miich mnaybɨdáacɨgɨxy coꞌayuc cohuinmaꞌñ co tɨ mmɨbɨjccɨxy Cristo. Miich ajcxy xytíjcɨxyɨch co caꞌ ti mɨcꞌajt ajcxy mɨɨdɨdyɨch, e miich ajcxy mnaybɨdaacɨp nej jɨhuɨ̈y ooy tɨ mmɨcpɨjccɨxy, nej jɨhuɨ̈y ooy mgömayɨty, e ɨɨch ajcxy caꞌ nyajꞌixaangɨxyɨch.
\v 11 Chambaad ɨɨch ajcxy nyuubögyiijɨch etz ndɨdzɨ̈yiijɨch. Mɨnaajɨty nꞌíjtcɨxyɨch caꞌ ɨɨch ajcxy nhuit. Jäy ajcxy xyñiꞌojɨɨygɨxɨch etz xyhuingojxy xyjɨjpcójxcɨxɨch, ni ndɨjc ɨɨch ajcxy ycacaꞌtcɨxy. 
\v 12 Ndúngɨxyɨch xuuyɨɨ mɨɨd ngɨꞌm ngɨ̈jɨch. Co pɨnjaty xyñiꞌojɨɨygɨxyɨch, chi nꞌadzóogɨxyɨch mɨɨd oy ayuc. Co ɨɨch ajcxy xyꞌixhuɨdityɨch xypahuɨdityɨch, ooy nmecxtújccɨxyɨch yɨ tzaachypɨ.
\v 13 Co pɨnjaty jɨbɨc xyñigápxcɨxyɨch, chi huinmaꞌñ ixtáaygɨxyɨch oyꞌamy mɨɨd mecxtujcɨn nꞌɨɨhuíjcɨxyɨch ngapxhuíjcɨxyɨch nej jëbɨ yꞌayuc-huinjɨhuɨɨygɨxy. Caꞌ naaxhuiñyjäy ajcxy xychójccɨxyɨch. Ixtɨ chambaad jaduꞌn ajcxy xyꞌíjxcɨxyɨch nej püx, jaduꞌn ɨɨch ajcxy nipaady nej jɨbɨcpɨ huɨdibɨ caꞌ jäy ajcxy tzocy.
\p
\v 14 Caꞌ ɨɨch miich ajcxy nyajnijayɨ̈y jada ayuc co nyajtzöydunaangɨxy. Hueꞌ janchtɨy jada ayuc nyajnijayɨɨyb ajcxy co ngapxhuijáangɨxy. Jaduꞌn ndzojccɨxy njɨhuɨɨygɨxy nej ndzocyɨch njɨhuɨ̈yɨch ngɨꞌmꞌung.
\v 15 Oy ixyipy yjanchɨty co miich ajcxy mɨɨd majc mil huindzɨndɨjc huɨdibɨ xyajꞌixpɨjccɨxy Cristo ytɨyꞌajt. Per tügpajcpɨ je mhuindzɨn huɨdibɨ ogaꞌn xyajmɨbɨjcy ajcxy Cristo, caꞌ nan canaag. Ɨɨch jaduꞌn ogaꞌn tɨ nyajꞌixpɨcyɨch miich ajcxy Jesucristo ytɨyꞌajt nej jëbɨ ajcxy mꞌalma ñïdzögɨpy. Paady ycɨxpɨ jaduꞌn ɨɨch nipaady nej miich ajcxy mdeedy ma mmɨbɨjcɨn.
\v 16 Ɨɨch miich ajcxy nɨmaayb mɨctägy, com tɨ nyajmɨbɨjccɨxy Cristo ogaꞌn, paady cuydungɨx ajcxy Dios ytɨyꞌajt, jaduꞌn nej ɨɨch nguyduñɨch.
\p
\v 17 Paady ycɨxp nguexyɨch Timoteo ma miich ajcxy. Yɨ Timoteo ooy ndzocyɨch ooy njɨhuɨ̈yɨch. Tɨ ɨɨch Timoteo nyajmɨbɨcyɨch Cristo, e ooy xycapxymɨdooyɨch yajxon, jaduꞌn yɨꞌ nipaady nej ngɨꞌmꞌungɨch. Yɨ Timoteo xyajjäymedzɨp miich ajcxy je ayuc je tɨyꞌajt jaduꞌn nej nyajꞌixpɨcyɨch ma tügꞌócɨy cajp ma yɨ jäy ñaymújcɨgɨxy huɨdibɨ mɨjpɨdaaccɨxp Jesucristo.
\v 18 Cham nijeꞌ nijeꞌ miich ajcxy amɨj agɨx mnayjɨhuɨ̈yii co jaduꞌn mɨnaangɨxy co caꞌ nɨcxy nꞌixaꞌñɨch miich ajcxy jadügꞌoc.
\v 19 Per caꞌ jaduꞌn mmɨnaangɨxy co caꞌ nnɨcxaꞌñɨch ma miich ajcxy. Tzojc nɨ́cxɨbɨch ma miich ajcxy, pen Dios jaduꞌn tzojcp. Co anajty jɨm nmechɨch, huinꞌit caꞌ nꞌamɨdooꞌidaꞌñɨch yɨꞌ ajcxy yꞌayuc huɨdibɨ amɨj agɨx nayjɨhuɨɨyɨp. Hueꞌ janchtɨy nejhuɨ̈huaꞌñɨch pen ymɨɨd yɨꞌ ajcxy Dios ymɨcꞌajt chögꞌajt.
\v 20 Pɨnjaty mɨɨd Dios ymɨcꞌajt Dios chögꞌajt, jeꞌ yajniguëxɨ̈cp Dios yꞌaneꞌmɨn. Pɨnjaty mɨɨd oyñiti ayuc, caꞌ jeꞌ yajniguëxɨ̈gɨp Dios yꞌaneꞌmɨn. 
\v 21 Co nnɨ́cxɨbɨch jɨm ma miich ajcxy, ¿ti ajcxy mdzojccɨxyp ndunɨpyɨch? ¿Nej oy nmɨnɨ́cxɨbɨch ma miich ajcxy tüg matz jɨgɨx ajcxy nhuójpcɨxɨpy? o ¿Mdzojccɨxyp co nnɨ́cxɨbyɨch ma miich ajcxy mɨɨd yungnaxy njot nhuinmaꞌñɨch, etz oyꞌamy ajcxy nmɨgapxɨpy, jaduꞌn nej jɨhuɨ̈y ooy ndzojccɨxy njɨhuɨɨygɨxy?
\c 5
\s Moy ajcxy castigo tüg jäy huɨdibɨ anajty tɨ ytundɨgooy
\p
\v 1 Mayjäy nejhuɨ̈y co ma miich ajcxy jɨm tüg yëydɨjc huɨdibɨ tundɨgooyb mɨɨd tüg töxyjäy. Nïgɨ yɨꞌ ytundɨgooy caꞌydɨ huɨdi ajcxy caꞌ Dios yꞌayuc mɨjpɨdacɨ. Tɨ nnejhuɨ̈yɨch co jɨm tüg yëydɨjc huɨdibɨ mɨɨddzɨnaayb ycooꞌuu.
\v 2 Jɨm miich ajcxy mɨɨdɨty je mɨjpocytumbɨ, e miich ajcxy amɨj agɨxy mnayjɨhuɨ́ɨyɨgɨxy co ajcxy mdzachꞌixpɨcyɨty ma Dios ytɨyꞌajt. Jacꞌoy co ixyipy mdajcɨxy mmaygɨxy. Yajpɨdzɨmgɨx ma miich ajcxy yɨ jäy huɨdibɨ jaduꞌn tundɨgooyb.
\v 3 Caꞌ ytɨmyñejɨty co caꞌ nyajpaadyɨch jɨm ma miich ajcxy. Jaduꞌn nipaady nej jɨhuɨ̈y ɨɨch njɨmɨty, mɨɨd co ooy njɨhuɨ̈yɨch nej miich ajcxy mjajtcɨxy mꞌayoogɨxy. Paady ycɨxpɨ tɨ nyajpocycäyɨch mɨɨd Jesucristo yꞌaneꞌmɨn yɨ jäy huɨdibɨ jɨm ooy mɨj ytundɨgooy, tɨm jaduꞌn nej ixyipy jɨm nyajpaadyɨch ma miich ajcxy.
\v 4 Huomujctaaygɨx yɨ mɨbɨjcpɨdɨjc, e jaduꞌn nipaadɨpy nej jɨhuɨ̈y ɨɨch njɨmɨty quipxyɨ mɨɨd miich ajcxy. Huinꞌit miich ajcxy mɨɨdꞌájtcɨxɨpy ajcxy ajt nHuindzɨn Jesucristo yꞌaneꞌmɨn ymɨcꞌajt.
\v 5 Mɨɨd je aneꞌmɨn mɨcꞌajt huɨdibɨ Jesucristo tɨ xymöyɨch, myajpɨdzɨmɨpy je pocytumbɨ ma miich ajcxy. Jaduꞌn mɨjhuin nipaadɨpy nej jɨhuɨ̈y myajcɨ̈dɨgɨɨygɨxy je mujcuꞌ, jaydëbɨ yɨꞌ ñinïcx ytɨgoyɨpy, per jeꞌ yꞌalma nïdzögɨp mɨna anajty ɨɨch ajt nHuindzɨn Jesús yhuimbity ya naaxhuiñ jaydëbɨ tɨydunɨpy jäy ajcxy mɨɨd ypocy ycɨxpɨ.
\p
\v 6 Caꞌ mnaygömáayɨgɨxy cɨꞌm mɨɨd huɨdibɨ mdungɨxyp. ¿Nej caꞌ mnejhuɨɨygɨxy nej jäy mɨnaꞌñ co levadura huɨdibɨ caꞌ yꞌoyɨty yajhuindɨgooyb tügꞌócɨy yɨ harina jɨch?
\v 7 Jaduꞌn je pocytunɨɨ nipaady nej levadura huɨdibɨ caꞌ yꞌóyɨty, paady ycɨxpɨ yajtɨgooygɨx je pocytunɨɨ nej anajty mdundɨgóoygɨxy taabɨ anajty ajcxy caꞌnɨ mmɨbɨjccɨxy. Jaduꞌn mdúngɨxɨpy, jɨgɨx jëbɨ mꞌijtcɨxyp huädz caꞌ ma pocy. Co jaduꞌn mdúngɨxɨpy, jaduꞌn nipaadɨp miich ajcxy nej tzajcaagy oyjatypɨ. Nejhuɨɨybɨch co miich ajcxy tɨ mbocyñïhuaatzcɨxy, com Cristo nayyejcɨ huen yajꞌögyii mɨɨd ajt nbocy ycɨxpɨ. Jesucristo jaduꞌn nipaady nej ajt ngöbixy mang huɨdibɨ mɨɨd nhuindzɨgɨɨyɨm Dios mɨɨd ajt nbocy ycɨxpɨ.
\v 8 Tzoc tzɨnaayɨm mɨɨd huädz njot huädz nhuinmaꞌñ, jaduꞌn nipaady nej judíojäy co ajcxy amayꞌajtcɨxy yɨ pascua xɨɨ. Tzoc yajtɨgooyɨm ma ajt ndzɨnaayɨn njugyꞌajtɨn yɨ jɨbɨc jot jɨbɨc huinmaꞌñ. Tzoc cuydunɨm Dios ytɨyꞌajt.
\p
\v 9 Tɨ nnijayɨɨygɨxy jayhuin co caꞌ huaad mɨgügꞌájtɨgɨxy pɨnjaty huɨdibɨ tundɨgooyb mɨɨd töxyjäy ajcxy.
\v 10 Caꞌ nan jaduꞌn nmɨnaꞌñɨch co tüccɨꞌyɨ mbuhuäctútcɨxɨpy yɨ naaxhuiñjäy ajcxy huɨdibɨ caꞌ ymɨbɨjccɨxy, huɨdibɨ tundɨgooygɨxp mɨɨd töxyjäydɨjc, huɨdibɨ ooy yꞌadzojccɨxy, huɨdibɨ ajcxy meetzp, huɨdibɨ ajcxy tzaadzech quipychech ojadajtcɨxp. Co ixyipy tüccɨꞌyɨ mbuhuäctútcɨxɨpy yɨ naaxhuiñyjäy ajcxy, copɨcy co ixyipy miich ajcxy mbɨdzɨmgɨx ya naaxhuiñ.
\v 11 Jayhuin tɨ nijayɨɨygɨxy co caꞌ huaad mnaymɨgügꞌájtɨgɨxy mɨɨd yɨ jäy ajcxy huɨdibɨ naydíjcɨgɨxp co ymɨbɨjccɨxy, je huɨdibɨ tundɨgooygɨxp mɨɨd töxyjäydɨjc, huɨdibɨ ajcxy ooy adzojccɨxy, huɨdibɨ ajcxy ojadajtp tzaadzech quipychech, huɨdibɨ ooy ycapxtɨgooygɨxy, huɨdibɨ ajcxy amügy jäy, etz huɨdibɨ ajcxy meetzp. Nañ ni caꞌ huaad mgaymujccɨxy mꞌuucmujccɨxy mɨɨd yɨꞌ ajcxy.
\v 12-13 Com caꞌ yhuaadɨty co ɨɨch nyajcɨ̈yöyɨpy nyajtecyyöyɨpy yɨ jäy ajcxy ypocy huɨdibɨ caꞌ mɨjpɨdaaccɨxy Jesucristo. Dios cɨꞌm yajcɨ̈yöyam yajtecyyöyam yɨꞌ ajcxy ypocy. Hueꞌ janchtɨy copɨcy co miich ajcxy myajcɨ̈yöyɨp myajtecyyöyɨp yɨ mɨbɨjcpɨdɨjc ajcxy ypocy. Yajpɨdzɨmgɨxp yɨ pocytumbɨ ma miich ajcxy.
\c 6
\s Tzip capxy ma je juez ajcxy huɨdibɨ caꞌ ymɨbɨjccɨxy
\p
\v 1 Pen xymɨdundɨgooyb tüg mɨbɨjcpɨ, ¿nej oy mnayjɨhuɨ̈yii co nɨcxy mxɨ̈y yɨ mmɨgüg ma yɨ tungmɨɨdpɨ huɨdibɨ caꞌ mɨbɨjccɨxy Dios yꞌayuc? ¿Cay jacꞌoy co myajꞌabɨgɨpy je mɨbɨjcpɨdɨjc ajcxy, e jɨm yꞌoyɨ̈huɨpy je ayuc nej anajty tɨ xymɨdundɨgoy?
\v 2 ¿Nej caꞌ mnejhuɨɨygɨxy co yɨ jäy ajcxy huɨdibɨ Dios tɨ ypocyhuinméecxɨgɨxy, yɨꞌ ajcxy yajcɨ̈yöyamyb yajtecyyöyamyb yɨ naaxhuiñyjäy ajcxy ypocy huɨdibɨ caꞌ mɨjpɨdaaccɨxy Dios? Pen miich ajcxy myajcɨ̈yöyɨp myajtecyyöyɨp yɨ naaxhuiñyjäy ajcxy ymɨjpocy, ¿nej co caꞌ mjajtcɨxy nej ajcxy myajcɨ̈yöyɨpy myajtecyyöyɨpy yɨ mɨbɨjcpɨdɨjc ajcxy ypocy huɨdibɨ caꞌ ytimymɨj ytimycajeejɨty?
\v 3 ¿Nej caꞌ mnejhuɨɨygɨxy co miich ajcxy myajcɨ̈yöyamyb myajtecyyöyamyb ixtɨ yɨ ángeles ajcxy ypocy? Pen miich ajcxy myajcɨ̈yöyamyb myajtecyyöyamyb yɨ ángeles ajcxy ypocy, nïgɨ caꞌ chipɨty co ajcxy myajcɨ̈yöyɨpy myajtecyyöyɨpy yɨ mɨbɨjcpɨdɨjc ajcxy ypocy huɨdibɨ tzɨnaayb jugyꞌajtp ma jadachambɨ xɨɨ tiempo.
\v 4 Pen miich ajcxy mnaymɨdundɨgóoyɨgɨxp, ¿nej co nɨcxy mbɨdaaccɨxy yɨ mxɨ̈huɨn ma yɨ jäy ajcxy huɨdibɨ caꞌ yajpaady ma miich ajcxy myöymujccɨxy?
\v 5 Jaduꞌn nnɨmáaygɨxyɨch miich ajcxy, jaydëbɨ mdzöyduꞌnjɨhuɨɨygɨxy mɨɨd jada ycɨxpɨ. ¿Nej caꞌ yajpaady ma miich ajcxy ni tüg yëydɨjc huijy ycujpɨ huɨdibɨ jëbɨ yajꞌoyɨ̈y je capxy je ayuc ma je mɨbɨjcpɨdɨjc ajcxy? 
\v 6 ¿Nej ooy jada ytimycopɨcyɨty co yɨ mɨbɨjcpɨdɨjc ajcxy ñayxɨ̈huɨgɨxɨpy ma je tungmɨɨdpɨ huɨdibɨ caꞌ mɨjpɨdaaccɨxy Dios?
\p
\v 7 Co miich ajcxy mnayxɨ̈huɨgɨxy ma cajp tungmɨɨdpɨ, jeꞌ je tɨyꞌajt co caꞌ ajcxy mguydúngɨxy Cristo yꞌayuc ytɨyꞌajt. ¿Nej cay jacꞌoy co mnaymɨmecxtújcɨgɨxɨpy, caꞌydɨ co mnayxɨ̈huɨgɨxy? ¿Nej cay jacꞌoy co xytɨgóoyɨgɨxɨpy tijaty, caꞌydɨ co mnayxɨ̈huɨgɨxy?
\v 8 Ma yjapadyii ixyipy mnaymɨmecxtújcɨgɨxy, chi miich ajcxy ac mɨbɨjcpɨdɨjc naymɨdundɨgóoyɨgɨxp, e nañ jaduꞌn mjanayméetzɨgɨxy ti ajcxy ymɨɨd.
\p
\v 9 ¿Nej caꞌ mnejhuɨɨygɨxy co yɨ jäy ajcxy huɨdibɨ tundɨgooyb, caꞌ ajcxy it lugar padaꞌñ ma Dios yꞌaneꞌmy? Caꞌ mnayhuinꞌɨɨngɨxy, caꞌ ajcxy it lugar padaꞌñ ma Dios yꞌaneꞌmy yɨ jäy ajcxy huɨdibɨ mɨgapxtɨgooyb töxyjäydɨjc, huɨdibɨ ajcxy ojadajtp tzaadzech quipychech, huɨdibɨ ajcxy mɨgapxtɨgooyb ymɨgüg ytöxyɨjc, huɨdibɨ ajcxy adöxyñɨꞌaa.
\v 10 Caꞌ ajcxy it lugar padaꞌñ ma Dios yꞌaneꞌmy huɨdibɨ ajcxy meetzp, huɨdibɨ ajcxy tijaty adzojcp, huɨdibɨ ajcxy amügyjäyꞌajtp, huɨdibɨ ajcxy capxtɨgooyb, etz huɨdibɨ ajcxy ayucmɨhuɨdijt capxmɨhuɨdijtp. Nidügꞌócɨy yɨ jäy ajcxy huɨdibɨ jaduꞌn tundɨgooyb, caꞌ ajcxy it lugar padaꞌñ ma Dios yꞌaneꞌmy.
\v 11 Jaduꞌn anajty nijëjɨty miich ajcxy mdundɨgooygɨxy jecyꞌajty, per co tɨ mmɨbɨjccɨxy Cristo, chi Dios tɨ xyhuinmecxy ajcxy mbocy, e tɨ yajhuäch je jɨbɨcpɨ ma ajcxy mjot mhuinmaꞌñ, etz mnayyéjcɨgɨxy amumdügjot ma Dios. Co miich ajcxy mmɨjpɨdaaccɨxy je nHuindzɨn Jesús yxɨɨ e xyꞌadɨgɨɨygɨxy xyjottɨgɨɨygɨxy Dios yjɨhuɨꞌñ ymɨcꞌajt, paady ajcxy tɨ mꞌ
ahuimbijtcɨxy tudägy ma Dios yhuinduu.
\s Je tudägyꞌajtɨn huɨdibɨ ijtp ma ajt ndzɨnaayɨn
\p
\v 12 Janch tɨyꞌajt nej jäy ymɨnaangɨxy co jëbɨ huaad tungɨxy hueñytiijɨty huɨdibɨ ñijotꞌajtcɨxyp. Per caꞌ tügꞌócɨy huɨdibɨ jäy ajcxy tuñ yꞌoyjäygɨdaacnɨty. Janch jaduꞌn jëbɨ pɨnjaty tunɨpy hueñytiijɨty, per caꞌ huaad ymɨmadägyii je huɨdibɨ ajcxy ytumyb.
\v 13 Janch tɨyꞌajt nej jäy ymɨnaangɨxy co je jɨɨcxy pɨcy ytungbaady ma je jäy yꞌaa ymöx, e je aa möx ytungbaady mɨɨd je jɨɨcxy pɨcy ycɨxpɨ. Per Dios yajcödɨgoyamyb je jɨcxy pɨcy, e nañ jaduꞌn yajcödɨgoyaꞌñ je jäy yꞌaa ymöx. Per nañ tɨyꞌajt co Dios caꞌ tɨ yajꞌoyɨy je yëydɨjc ñinïcx, co mɨdundɨgooyɨpy töxyjäydɨjc. 
\v 14 Dios tɨ yajjugypɨcy jadügꞌoc ɨɨch ajt nHuindzɨn Jesucristo co yꞌoꞌcy. Nañ jaduꞌn Dios mɨɨd ymɨcꞌajt co xyajjugypɨgaanɨm jadügꞌoc co anajty tɨ nꞌoꞌcɨm.
\p
\v 15 ¿Nej caꞌ mnejhuɨ̈y miich ajcxy co yɨ mninïcx ajcxy Cristo yɨꞌ yjeꞌ? ¿Nej cay Cristo anajty mɨdundɨgooybɨch co nnɨcxy mɨɨdmäyɨch yɨ töxyjäy huɨdibɨ jɨbɨc-huinmaꞌñ mɨɨd? ¡Caꞌ jaduꞌn yꞌóyɨty nimɨna!
\v 16 ¿Nej caꞌ mnejhuɨɨygɨxy co tüg yëydɨjc puhuägɨ̈y tüg töxyjäy huɨdibɨ jɨbɨc-huinmaꞌñ tumb, tügɨty ajcxy yꞌijtcɨxy? Com jaduꞌn yjaybetyɨty ma Dios ñecy, ma Dios jaduꞌn ymɨnaꞌñ: “Nimetz yꞌidaangɨxy jaduꞌn nej tügpɨ ninïcx.”
\v 17 Co tüg jäy mɨɨd yꞌity yɨ Huindzɨn Jesucristo, huinꞌit je jäy yjɨhuɨꞌñ ymɨcꞌajt etz Dios yjɨhuɨꞌñ ymɨcꞌajt yꞌijtcɨxy túꞌcɨy.
\p
\v 18 Ixmajtzcɨx je jɨbɨc-huinmaꞌñydunɨɨ, caꞌ mdundɨgooygɨxy mɨɨd töxyjäy ajcxy jɨbɨc-huinmaꞌñydumbɨ. Yɨ jacjadyii pocy huɨdi jäy ajcxy ytumyb, caꞌ yɨꞌ ajcxy mɨdundɨgoy ninïcx. Per co ytundɨgooygɨxy mɨɨd töxyjäy ajcxy, huinꞌit janchtɨy ycɨꞌmninïcx anajty ymɨdundɨgooygɨxyp.
\v 19 ¿Nej caꞌ mnejhuɨɨygɨxy co je Espíritu Santo huɨdibɨ Dios xymooyɨm, tɨ chɨnaydacpɨcy ma miich ajcxy mjot mhuinmaꞌñ? Paady ycɨxpɨ miich ajcxy caꞌ cɨꞌm nayꞌanéꞌmɨgɨxy.
\v 20 Tzoohuɨ Cristo tɨ cojuy miich ajcxy mbocy, paady ycɨxpɨ ooy ycopɨcyɨty co oybɨ mdúngɨxɨp mɨɨd mninïcx, jɨgɨx Dios cömay yꞌidɨpy mɨɨd co oy anajty tɨ mdungɨxy.
\c 7
\s Capxhuijɨn ma je pɨjcɨn
\p
\v 1 Cham nꞌadzohuaꞌñɨch je huɨdibɨ miich ajcxy tɨ xyajꞌamɨdoobɨch ma je necy huɨdibɨ tɨ xyajniguéjxcɨxyɨch. Oy jaduꞌn co tüg yëydɨjc caꞌ ypɨgɨpy.
\v 2 Per com may yëydɨjc huɨdibɨ ooy ytundɨgoyaꞌñ mɨɨd töxyjäydijc, paady ycɨxp jacꞌoy co nidüg nidüg yëydɨjc pɨgɨpy e mɨɨdꞌidɨpy ycɨꞌmdöxyɨjc. E nañ jaduꞌn jacꞌoy co nidüg nidüg töxyjäy ypɨgɨpy, e mɨɨd idɨpy ycɨꞌm ñäy.
\v 3 Copɨcy je yëydɨjc chɨnähuɨpy mɨɨd ytöxyɨjc nej ypadyii, nan tɨm jaduꞌn je töxyjäy chɨnähuɨpy mɨɨd ñäy nej ypadyii.
\v 4 Com je töxyjäy caꞌ aneꞌmy ycɨꞌmninïcx, hueꞌ ñayꞌanéꞌmɨgɨxy miñ xyɨpy. Nañ jaduꞌn je yëydɨjc caꞌ aneꞌmy ycɨꞌmninïcx, hueꞌ ñayꞌanéꞌmɨgɨxy ymiñ xyɨpy. 
\v 5 Caꞌ huaad je yëydɨjc nɨmay je töxyjäy co caꞌ mɨɨd mähuaꞌñ mɨɨd poocxaꞌñ. Nañ jaduꞌn je töxyjäy caꞌ huaad nɨmay je ñäy co caꞌ mɨɨd mähuaꞌñ mɨɨd poocxaꞌñ. Jëbɨ janchtɨy mɨnaajɨty ñayꞌayuc-huinjɨhuɨɨygɨxy co amayꞌadaangɨxy co Dios mɨbɨjctzohuaangɨxy ycapxtägaangɨxy. Co Dios mɨbɨjctzoohuɨn myajmáygɨxɨpy, huinꞌit jëbɨ máagɨxnɨ pócxcɨxnɨ agujc jotcujc, caꞌydɨ je mujcuꞌ mɨmadägyii ajcxy.
\p
\v 6 Jada jeꞌ tɨyꞌajt nej jëbɨ yëydɨjc mɨɨddzɨnäy ytöxyɨjc, hueꞌ jada capxhuijɨn, caꞌ jada yꞌanéꞌmɨnɨty.
\v 7 Jaduꞌn njadzocyɨch co miich ajcxy ixyipy mꞌijtcɨxy adüg jaduꞌn nej nꞌityɨch adüg. Per Dios tɨ xymooyɨm nidüg nidüg ngɨꞌmhuinmaꞌñ ngɨꞌmmɨcꞌajt. Paady ji canaagnax jäy yhuinmaꞌñ, e nidüg nidüg mɨɨd ycɨꞌmhuinmaꞌñ nej ytunaangɨxy, pen pɨgaangɨxp o caꞌ ypɨgaangɨxy.
\p
\v 8 Jada ayuc nyajnɨmaaybɨch yɨ adügtɨjc etz yɨ coꞌögytɨjc ajcxy. Jacꞌoy co ajcxy huen tzɨnaaygɨxy adüg, jaduꞌn nej ɨɨch ndzɨnäyɨch.
\v 9 Pen caꞌ ajcxy mɨmadägaꞌñ yɨ chɨnaayɨn adüg, etz nijotꞌajtcɨxy co ypɨgaangɨxy, jacꞌoy co ypɨ́jcɨxɨpy. Com jacꞌoy co ypɨ́jcɨxɨpy caꞌydɨ co cuydúngɨxɨpy ninïcx chojcɨn.
\p
\v 10 Jada ayuc nyajnɨmaaybɨch huɨdibɨ ajcxy tɨ ypɨjccɨxy. Caꞌ yꞌoyɨty co töxyjäy tüg ixmach yɨꞌ ñäy. Nañ jaduꞌn ajt nHuindzɨn Jesús xymooyɨm jada aneꞌmɨn.
\v 11 Co tüg töxyjäy ixmach ñäy, copɨcy co huen tzɨnäy adüg, e caꞌ huaad ypɨcy mɨɨd huingbɨ yëydɨjc. Jëbɨ janchtɨy jadügꞌoc pudɨgɨ̈y ñäy. Nañ jaduꞌn ni caꞌ yꞌoyɨty co tüg yëydɨjc ixmadzip ytöxyɨjc.
\p
\v 12 Ɨɨch jada ngɨꞌmꞌayuc jada huɨdibɨ nyajnɨmaaybɨch je jacjadyii mɨbɨjcpɨdɨjc. Yɨ Huindzɨn Jesús caꞌ ti aneꞌmɨn yecy mɨɨd jadayaabɨ ycɨxpɨ. Pen tüg yëydɨjc mɨbɨjcp tzɨnay mɨɨd tüg töxyjäy huɨdibɨ caꞌ mɨjpɨdägy Cristo, jacꞌoy co caꞌ ñayꞌixmájtzɨgɨxɨpy, pen je töxyjäy jaduꞌn jotcujc jacmɨɨddzɨnähuaꞌñ je yëydɨjc.
\v 13 Nañ tɨm jaduꞌn co tüg töxyjäy huɨdibɨ mɨbɨjcp tzɨnay mɨɨd tüg yëydɨjc huɨdibɨ caꞌ mɨjpɨdägy Cristo, jacꞌoy co caꞌ ñayꞌixmájtzɨgɨxɨpy pen je yëydɨjc jotcujc jacmɨɨddzɨnähuaꞌñ je töxyjäy.
\v 14 Je töxyjäy ñäy huɨdibɨ caꞌ mɨjpɨdägy Cristo, jaduꞌn yɨꞌ nipaady nej jäy huɨdibɨ ypocy tɨ yajnïhuäch mɨɨd co ytöxyɨjc tɨ mɨjpɨdägy Cristo. Nañ jaduꞌn je töxyjäy huɨdibɨ caꞌ mɨjpɨdägy Cristo, jaduꞌn yɨꞌ nipaady nej jäy huɨdibɨ ypocy tɨ yajnïhuäch mɨɨd co ñäy tɨ mɨjpɨdägy Cristo. Pen caꞌ ixyipy yjaduꞌnɨty, yɨꞌ ajcxy yꞌung yꞌanäg, hueꞌ ixyipy nipaady nej jäy ajcxy yꞌung huɨdibɨ caꞌ mɨbɨcy. Per com tɨ je yëydɨjc etz je töxyjäy yajpocyñïhuächyii, nañ jaduꞌn je yꞌung ajcxy tɨ yajpocyñïhuächyii.
\v 15 Per pen je yëydɨjc huɨdibɨ caꞌ mɨbɨcy Cristo caꞌ mɨɨddzɨnähuaꞌñ ni jaduꞌñyɨ yɨꞌ ytöxyɨjc huɨdibɨ tɨ mɨbɨcy Cristo, huinꞌit jëbɨ ñayꞌixmájtzɨgɨxy. Nañ jaduꞌn co je töxyjäy huɨdibɨ caꞌ mɨbɨcy Cristo, e caꞌ mɨɨddzɨnähuaꞌñ ni jaduꞌñyɨ yɨꞌ ñäy huɨdibɨ tɨ mɨbɨcy Cristo, huinꞌit jëbɨ ñayꞌixmajtzɨgɨxy. Com Dios jaduꞌn tzocy co jotcujc ñaymɨɨddzɨnáayɨgɨxɨpy.
\v 16 Jëbɨ ñayꞌixmájtzɨgɨxy com je töxyjäy caꞌ tɨydudägy ñejhuɨ̈y pen mɨmadacy yñäy yajmɨbɨgɨpy Cristo. Nañ jaduꞌn je yëydɨjc caꞌ tɨydudägy ñejhuïy pen jëbɨ ytöxyɨjc yajmɨbɨgɨpy Cristo.
\p
\v 17 Oy ixyipy ñejɨty jada tɨyꞌajt cuydungɨxy. Copɨcy co nidüg nidüg miich ajcxy mdzɨnähuɨpy mjugyꞌadɨpy jaduꞌn nej Dios tɨ xyajniꞌixɨɨygɨxy mdzɨnaayɨn mjugyꞌajtɨn, e jaduꞌn nej anajty myajpatcɨxy co Dios xyhuinꞌixy jëbɨ mmɨbɨgɨpy Cristo. Yɨ jaduꞌmbɨ aneꞌmɨn nyajꞌixpɨjcpyɨch yɨ mɨbɨjcpɨdɨjc ma tüg tüg cajp.
\v 18 Yɨ jäy huɨdibɨ tɨ yajtɨyꞌajttɨ̈y jayɨjp, e Dios yhuinꞌixyii jacꞌaxam, huen jaduꞌnɨty, caꞌ huaad yajtɨgoy je ijxpejt nej tɨ yajtɨyꞌajttɨ̈y. E yɨ jäy huɨdibɨ caꞌnɨ yajtɨyꞌajttɨ̈y e tɨ yhuinꞌixyii Dios, huen jaduꞌn yꞌity, caꞌ ycopɨcyɨty yajtɨyꞌajttɨ̈huɨpy.
\v 19 Caꞌ ytimyñejɨty pen miich ajcxy tɨ myajtɨyꞌajttɨ̈y, o pen caꞌnɨ myajtɨyꞌajttɨɨygɨxy. Huɨdibɨ copɨcyɨp, mguyduunɨp ajcxy Dios yꞌaneꞌmɨn ycötujcɨn.
\v 20 Nidüg nidüg mɨbɨjcpɨ huen ijtcɨxy nej anajty yajpatcɨxy co Dios ajcxy yhuinꞌijxyɨ.
\v 21 Pen miich anajty codoogɨ̈y tumb ma tüg jäy co Dios tɨ xyhuinꞌixy, caꞌ mdajy may mɨɨd yɨꞌ ycɨxpɨ, huɨꞌm mɨɨd mhuindzɨn. E pen mhuindzɨn aꞌɨxɨɨyb co mbɨdzɨmaꞌñ ahuätztuum, jëbɨ mbɨdzɨmy ma codoogɨ̈y anajty mꞌity. 
\v 22 Pɨnjaty codoogɨ̈y ijtp ma yhuindzɨn co mɨbɨcy ajt nHuindzɨn Jesucristo, chi Jesús yɨꞌ yajnïhuädzɨ̈ctüdyii ma yɨ pocy yꞌaneꞌmyii. Pɨnjaty tungɨxp ycɨꞌmdung, co mɨbɨcy ɨɨch ajt nHuindzɨn Jesucristo, chi jaduꞌn nipaady nej jɨhuɨ̈y codoogɨ̈y yꞌity ma Cristo.
\v 23 Tzoohuɨ ooy Jesucristo xycojuuyɨ miich ajcxy mbocy, paady ycɨxpɨ cuydungɨx ajt nHuindzɨn Jesucristo yꞌayuc ytɨyꞌajt. E caꞌ mguydungɨxy naaxhuiñyjäy ajcxy yꞌayuc ytɨyꞌajt huɨdibɨ ajcxy xypɨdägɨp ma pocy xyꞌaneꞌmgɨxy.
\v 24 Mɨgügtɨjc ajcxy, nidüg nidüg mɨbɨjcpɨ, huen ijtcɨxy nej anajty yajpatcɨxy co Dios yhuinꞌijxɨ ajcxy.
\p
\v 25 Jada ayuc nyajnɨmaaybɨch yɨ mɨbɨjcpɨdɨjc huɨdibɨ ajcxy adüg yajpatcɨxp. Je Huindzɨn Jesús caꞌ ti tɨyꞌajt ahuing tɨ xymöyɨch mɨɨd miich ajcxy ycɨxpɨ. Hueꞌ ajcxy nyajnɨmaayb ahuing je huinmaꞌñ huɨdibɨ nmɨɨdɨch. Com Dios tɨ xypaꞌayooyɨch, paady ycɨxpɨ jëbɨ mgöbɨgɨpy ajcxy ɨɨch nꞌayuc ɨɨch ngapxhuijɨn.
\v 26 Jaduꞌn huinmaꞌñ nmɨɨdɨdyɨch co jacꞌoy co nidüg nidüg mɨjꞌanäg huen jacꞌijtcɨxy nej yajpatcɨxy. Mɨɨd co tzaachypɨ ayoꞌn nmɨnajxɨm nyajnajxɨm jadachambɨ xɨɨ tiempo, paady ycɨxpɨ ngapxhuijyɨch jaduꞌn.
\v 27 Pen mbɨjcyp tüg töxyjäy, mɨɨddzɨnaꞌ. Pen caꞌ tɨ pɨcy tüg töxyjäy, jacꞌoy co caꞌ mbɨgɨpy.
\v 28 Pen tɨ mhuinmaꞌñ mbɨdägy co mbɨgaꞌñ, jëbɨ mbɨcy, caꞌ anajty mdundɨgoy co mbɨgɨpy. Nañ jaduꞌn tüg töxyjay mutzꞌanägnɨp caꞌ anajty ytundɨgoy co ypɨgɨpy. Janch tɨyꞌajt jada co yɨꞌ ajcxy huɨdibɨ pɨjccɨxp ypadamyb ajcxy jotmay ma chɨnaayɨn. Paady ycɨxp tɨ nnɨmaaygɨxy co jacꞌoy co caꞌ mbɨ́jccɨxɨpy, e caꞌydɨ ti jotmay mbáatcɨxɨpy.
\p
\v 29 Mɨgügtɨjc ajcxy, jada njacyajnɨmaaygɨxpy. Hueenɨ xɨɨ tiempo njactzɨnähuaanɨm ya naaxhuiñ. Jaduꞌn nej je xɨɨ je tiempo yjacnɨcxnɨ miich ajcxy pɨnjaty tɨ ypɨcy, tzɨnaaygɨx jaduꞌn nej ixyipy caꞌ mdöxɨjc ajcxy mɨɨdɨty.
\v 30 Miich ajcxy huɨdibɨ yaaxp etz ayoꞌn jɨhuɨɨyb, tzɨnaaygɨx jaduꞌn nej ixyipy caꞌ ti ayoꞌn mɨɨdɨty. Miich ajcxy huɨdibɨ xondacp, tzɨnaaygɨx jaduꞌn nej ixyipy caꞌ mxondaaccɨxy. Miich ajcxy huɨdibɨ ajuuyb adoocp tzɨnaaygɨx jaduꞌn nej ixyipy caꞌ ti ajcxy mɨɨdɨty.
\v 31 Miich ajcxy huɨdibɨ mɨcꞌajt comeeñꞌajtp, tzɨnaaygɨx jaduꞌn nej ixyipy ajcxy caꞌ ti mgomeeñɨty.
\p
\v 32 Hueꞌ ndzocyɨch co caꞌ ti jotmay miich ajcxy mmɨɨdꞌadɨpy ma yɨ mdzɨnaayɨn mjugyꞌajtɨn. Yɨ jäy ajcxy adügpɨ ymɨjottɨgooyb ajcxy je Huindzɨn Dios ytung, yajjäygɨdägaꞌñ ajcxy je Huindzɨn Dios.
\v 33 Je tɨɨbɨ ajcxy ypɨjccɨxy, chi ymɨjottɨgooyb ajcxy yɨꞌ ytung ya naaxhuiñ, jaduꞌn nej jëbɨ yajjotcujcꞌajtcɨxy ytöxyɨjc.
\v 34 Nañ tɨm jaduꞌn tɨgachjaty yhuinmaꞌñ mɨɨdɨty je töxyꞌanäg huɨdibɨ tɨ ypɨcy. Je töxyꞌanäg adügpɨ ymɨjottɨgooyb Dios ytung, etz yecy ñinïcx etz yjɨhuɨꞌñ ymɨcꞌajt cɨxyjot huinɨjot ma ajt nHuindzɨn Jesucristo. Per je töxyꞌanäg huɨdibɨ tɨ ypɨcy, hueꞌ jeꞌ ymɨjottɨgooyb ti ga ti ya naaxhuiñ, jaduꞌn nej huaad jäygɨdägyii ñäy.
\p
\v 35 Jada jaduꞌn tɨ nyajnɨmaaygɨxy mɨɨd miich ajcxy mꞌoyꞌajtɨn ycɨxpɨ. Caꞌ nan tzipjaty aneꞌmɨn tɨ nmooygɨxy. Jaduꞌn tɨ ngapxhuijcɨxy jaydëbɨ jotcujc mdzɨnaaygɨxy mjugyꞌajtcɨxy, etz jaydëbɨ ajcxy amumdügjot mdungɨxy ma ajt nHuindzɨn Jesucristo ytung, e caꞌ mdungɨxy ametz jotmetz.
\p
\v 36 Pen ji pɨn jotmay mɨɨdɨty mɨɨd ñɨɨx ycɨxpɨ, mɨɨd co yxɨɨ yjɨmɨjt tɨ yujc-huäcnɨ, jada jeꞌ ooy ytimycapxpaadyɨty, jëbɨ tuñ huɨdibɨ yꞌaꞌɨxɨɨyb jacꞌoyɨp, jëbɨ ypɨcy, caꞌ yɨꞌ ypocyɨty.
\v 37 Pen ji pɨnjaty ñɨɨx yhuɨꞌmaꞌñ jaybɨcy, e caꞌ pɨn ycohuanɨ̈yii, nañ ni pɨn ycaꞌadugyii co tuñ nej tzocyɨn, e ñijotꞌajtyp tudägyꞌajt janch cɨxyjot huinɨjot co yñɨɨx yhuɨꞌmaꞌñ jaybɨcy, oybɨ anajty ytumyb.
\v 38 Je jäy huɨdibɨ yñɨɨx yajpɨjcp, oybɨ anajty ytumyb, e pɨnjäy yñɨɨx cayajpɨjcp, nïgɨ anajty oybɨ tuñ caꞌydɨ co ypɨgɨpy.
\p
\v 39 Copɨcy co je töxyjäy mɨɨddzɨnähuɨpy yɨꞌ ñäy mabaad yñäy yjugyꞌaty. Co janch anajty yñäy yꞌögy, huinꞌit jëbɨ ypɨgɨpy mɨɨd huingbɨ, pen jaduꞌn anajty najtztzogɨ̈y. Hueꞌ janchtɨy copɨcy co pɨgɨpy je pɨn mɨbɨjcp je Huindzɨn Jesucristo.
\v 40 Ooy nïgɨ je töxyjäy coꞌögypɨ agujc jotcujc chɨnähuɨpy yjugyꞌadɨpy pen caꞌ ypɨjctɨgach, jaduꞌn nmɨɨdɨdyɨch nhuinmaꞌñ, e nmɨnaambɨch co naybaatɨp ɨɨch nhuinmaꞌñ mɨɨd je tɨyꞌajt huɨdibɨ je Espíritu Santo yejcp.
\c 8
\s Je tzüch huɨdibɨ ajcxy yajhuindzɨgɨɨyb quipychech
\p
\v 1 Jadüg nax, jada ayuc ajcxy nyajnijayɨɨyb ma yɨ tzüch ymiñ huɨdibɨ jäy ajcxy yajhuindzɨgɨɨyb tzaadzech quipychech. Janch tɨyꞌajt co nidügꞌócɨy ɨɨch ajt nmɨɨdꞌajtɨm ixpɨjcɨn. Per pen ooy mɨj nayjɨhuɨɨyɨm ajt nꞌixpɨcyɨty, chi amɨj agɨx nayjɨhuɨɨyɨm. Per pen naychojcɨm nayjɨhuɨɨyɨm nidüg nidüg, huinꞌit nyajyeecɨm nmɨbɨjcɨn.
\v 2 Pen ji nidüg ma miich ajcxy ñaydijyii co yꞌixpɨcyɨty, caꞌnɨ yɨꞌ jajtäy ixpɨjcɨn huɨdibɨ jaccopɨcy yjadɨpy.
\v 3 Co tüg jäy yajmɨjꞌaty Dios, Dios ñejhuɨɨyb nej jada jäy yjot yhuinmaꞌñ mɨɨdɨty.
\p
\v 4 Jaduꞌn jada je tɨyꞌajt maabɨ je tzüch huɨdibɨ jäy ajcxy tɨ yajhuindzɨgɨɨygɨxy tzaadzech quipychech ajcxy. Nejhuɨɨyɨm co yɨ tzaadzech yɨ quipychech caꞌ ti jugyꞌajtɨn mɨɨdɨty. Ji tügpajc Dios huɨdibɨ tzɨnaayb jugyꞌajtp.
\v 5 Janch tɨyꞌajt co yɨ naaxhuiñyjäy ajcxy Diosꞌájtɨgɨxy canaagnax huɨdibɨ yajpatp tzajpcɨ́x etz ya naaxhuiñ huɨdibɨ caꞌ Diosɨty. Etz nañ tɨyꞌajt co may yhuindzɨnꞌajtcɨxy huɨdibɨ caꞌ yhuindzɨnɨty.
\v 6 Per ɨɨch ajt nꞌojadajtɨm tügpajcpɨ Dios, je Dios Teedy. Je Dios Teedy coj macx tügꞌócɨy huɨdibɨ jiꞌajtp. Mɨɨd yɨꞌ ycɨxpɨ ɨɨch ajt ndzɨnaayɨm njugyꞌajtɨm. Nañ tɨm jaduꞌn nmɨɨdꞌajtɨm tügpajcpɨ ajt nHuindzɨn Jesucristo, e yɨꞌ huijtzꞌijtaayb tügꞌócɨy tijaty huɨdibɨ jiꞌajtp, e nañ yɨꞌ ajt xyhuijtzꞌijtɨm.
\p
\v 7 Janch tɨyꞌajt co yɨ tzaadzech quipychech caꞌ ti mɨcꞌajt mɨɨdɨty, per nijeꞌjɨty mɨbɨjcpɨdɨjc caꞌ huinjɨhuɨ̈y jada tɨyꞌajt. Nijëjɨty ajcxy jecyꞌajty ooy huindzɨgɨɨygɨxy tzaadzech, ixtɨ chambaadnɨ tijcɨxy co yɨ tzüch huɨdibɨ jäy mɨɨd huindzɨgɨ̈y tzaadzech, tzaadzech yɨꞌ yjeꞌ. Co ajcxy tzüdzcɨxy yɨ jaduꞌmbɨ tzüch, jɨbɨc nayjɨhuɨ́ɨyɨgɨxy, nayjɨhuɨ́ɨyɨgɨxy nejjɨhuɨ̈y tɨ ytundɨgooygɨxy. Caꞌ tɨydudägy yꞌijtcɨxy ma ymɨbɨjcɨn.
\v 8 Caꞌ Dios xycöbɨgaanɨm mɨɨd jeꞌ ycɨxpɨ co tɨ njɨɨcxɨm tɨ ndzüdzɨm tijaty tzüch, o mɨɨd co caꞌ tɨ njɨɨcxɨm caꞌ tɨ ndzüdzɨm tijaty tzüch. Nañ tɨm jaduꞌn Dios caꞌ oybɨ xymöhuaanɨm mɨɨd jeꞌ ycɨxpɨ co tɨ njɨɨcxɨm tɨ ndzüdzɨm ti tzüch, o mɨɨd co caꞌ tɨ njɨɨcxɨm caꞌ tɨ ndzüdzɨm tijaty tzüch.
\v 9 Oy Dios aꞌɨxɨ̈y co jëbɨ ndzüdzɨm huenhuɨdibɨ tzüchɨty. Per mɨɨd je mɨgügtɨjc ycɨxpɨ huɨdibɨ caꞌ tɨydudägy mɨɨdɨty ymɨbɨjcɨn, tzoc naygüendꞌajtɨm caꞌydɨ jeꞌ jɨbɨc yñayjɨhuɨ̈yii mɨɨd huɨdibɨ ɨɨch ajt ndunɨm.
\v 10-11 Tzoc ocpɨdaacɨm co miich ajcxy mnejhuɨ̈y je tɨyꞌajt, e xyꞌixɨpy tüg mɨgüg co mgay mꞌuucy ma tüg mesa jiiby tɨgoty me je tzaadzech yꞌity. Caꞌ jecyɨty co jada jäy huɨdibɨ caꞌ tɨydudägy mɨɨdɨty ymɨbɨjcɨn, etz co xyꞌixpaadɨpy jiiby, huinꞌit jeꞌ cöbɨgaꞌñ je tzüch huɨdibɨ huindzɨgɨꞌñꞌajtp. E jaduꞌn yhuimbɨdzɨmy co miich jɨbɨc ijxpejt tɨ myecy mɨɨd yɨ mꞌixpɨjcɨn ycɨxpɨ, com yɨ mmɨgüg tɨ ytundɨgoy mɨɨd huɨdibɨ miich tɨ mduñ. E Cristo tɨ yꞌögy mɨɨd yɨꞌ ypocy ycɨxpɨ nañ jaduꞌn.
\v 12 Co tüg mɨbɨjcpɨ jɨbɨc nayjɨhuɨ̈yii mɨɨd co tɨ xyꞌixy ma je caydac mdzüch je tzüch huɨdibɨ jäy ajcxy yajhuindzɨgɨɨyb tzaadzech, miich anajty tundɨgooyb mɨɨd Cristo ytɨyꞌajt, mɨɨd co yɨ mɨbɨjcpɨ jɨbɨc ñayjɨhuɨ̈yii.
\v 13 Paady ycɨxp caꞌ ndzüdzaꞌñɨch ni mɨna tzüch huɨdibɨ tzaadzech yhuindzɨgɨꞌñꞌajtɨp. Pen jaduꞌn nduñɨch, jɨbɨc ijxpejt anajty nyejcpyɨch ma nijëjɨty mɨgügtɨjc, e chi yɨꞌ ajcxy yhuinmaꞌñytɨgoyaꞌñ.
\c 9
\s Je tung huɨdibɨ Pablo paatɨp
\p
\v 1 Janch janch co jëbɨ nduñɨch huentiijɨty huɨdibɨ ndzojcpɨch. Nañ jaduꞌn janch co Jesucristo tɨ xyajnïbɨcyɨch jada apóstol tung. Etz janch co tɨ nꞌixyɨch ajt nHuindzɨn Jesucristo. Nañ jaduꞌn janch co miich ajcxy ijxpejtꞌajtp ma ɨɨch ndung, com tɨ ajcxy mmɨjpɨdaaccɨxy je nHuindzɨnꞌajtɨm Jesús yꞌayuc huɨdibɨ tɨ ngapxhuäcxyɨch ma miich ajcxy.
\v 2 Caꞌ jécyɨty co jacjadyii jäy ajcxy caꞌ xycöbɨgaꞌñɨch jaduꞌn nej Jesús xyꞌapóstolꞌadyiijɨch. Per com miich ajcxy tɨ mmɨjpɨdaaccɨxy ajt nHuindzɨn Jesucristo, etz miich ajcxy mmɨbɨjcɨn nidɨyꞌajtp co Jesús tɨ xyyajnïbɨcyɨch jada tung, paady ycɨxpɨ copɨcy co ɨɨch miich ajcxy xycöbɨgɨpyɨch jaduꞌn nej Jesús yꞌapóstol.
\p
\v 3 Jaduꞌn nꞌadzohuimbityɨch yɨꞌ ajcxy huɨdibɨ jɨbɨc xyñigapxɨp ɨɨch ndung.
\v 4 Com Jesucristo xyajnïbɨjcɨch jada tung co ngapxhuäcxyɨch yɨꞌ yꞌayuc ytɨyꞌajt, paady ycɨxpɨ xypatpɨch jaduꞌn co je mɨbɨjcpɨdɨjc xymöhuɨbɨch ngaayɨn nꞌuucɨn.
\v 5 Nañ jaduꞌn xypaatpɨch co nmɨɨdꞌadɨpyɨch tüg ndöxyɨjcɨch huɨdibɨ mɨbɨjcp, etz huɨdibɨ nmɨɨdhuɨdɨdɨpyɨch tɨm jaduꞌn nej yɨ jacjadyii apóstol ajcxy mɨɨdɨty, etz je Huindzɨn Jesús yꞌuch ajcxy mɨɨdɨty, etz Pedro.
\v 6 ¿Nej miich ajcxy mmɨnaangɨxy co ɨɨch etz Bernabé nimejtzpajc caꞌ ɨɨch ajcxy huaad ixmajtzcɨxy yɨ ndungɨch co ngapxhuäcxyɨch Cristo yꞌayuc ytɨyꞌajt?
\v 7 ¿Huɨdibɨ soldado yɨꞌ ma je ejercito cɨꞌm ygasto cojuy? ¿Pɨn ji cam nidungɨɨyb, e caꞌ jɨɨcxɨpy je huɨdibɨ tɨ yajꞌity? Pɨn ychibo cuendꞌajtp, ¿e caꞌ ügɨpy je chibo yleche?
\v 8 Caꞌ miich ajcxy mɨnaꞌnɨpy co jäy yꞌayuc jada. Nañ jaduꞌn jaybety yꞌity ma Dios ñecy tɨm jaduꞌn nej nmɨnaꞌñɨch.
\v 9 Com jaybety jaduꞌn ymiñ ma Moisés ñecy, ma Moisés jaduꞌn ymɨnaꞌñ: “Caꞌ huaad huajyuub yꞌajen mbɨdaacɨ ma yam ten moody yɨ trigo co yajpajcꞌaty.” ¿Nej jëyɨ mɨɨd huajyuub ycɨxpɨ Dios jaduꞌn ymɨnaꞌñ?
\v 10 Canan jëyɨ mɨɨd huaj yuub ycɨxpɨ Dios jaduꞌn ymɨnaꞌñ. Nañ jaduꞌn Moisés jaybejty jada tɨyꞌajt mɨɨd ɨɨch ajt ycɨxpɨ. Com yɨ jäy ajcxy huɨdibɨ naaxjɨdzijtzp, etz yɨꞌ ajcxy huɨdibɨ trigo yajpajcꞌajtp, hueꞌ ajcxy yjɨjpꞌijxyp co padaangɨxy je moc tɨɨm huɨdibɨ ajcxy tɨ nidungɨ̈y.
\v 11 Nañ jaduꞌn ɨɨch ajcxy huɨdibɨ Jesús ytung tuunɨp, tɨ ngapxhuäcxyɨch Dios yꞌayuc ma miich ajcxy, e miich ajcxy oybɨ tɨ mbaatcɨxy ma Dios. ¿Nej caꞌ jaduꞌn yꞌoyɨty co nbaadyɨch meeñ etz jɨcxy pɨcy mɨɨd ndungɨch ycɨxpɨ?
\v 12 Pen jacjadyii Dios yꞌayuccapxhuäcxpɨ tɨ paatcɨxy meeñ etz jɨcxy pɨcy ma miich ajcxy mɨɨd ytung ycɨxpɨ, ¿nej caꞌ jëbɨ nïgɨ ɨɨch nbaadyɨch meeñ etz jɨcxy pɨcy mɨɨdɨch ndung ycɨxpɨ? Oy njamɨ́ɨdɨdyɨch je mɨcꞌajt nej njaꞌaneꞌmgɨxy co xymöhuɨbyɨch ajcxy meeñ etz jɨcxy pɨcy mɨɨd ɨɨch ndung ycɨxpɨ, per caꞌ jaduꞌn tɨ nꞌaneꞌmgɨxy. Jaduꞌn ɨɨch tzaachypɨ nyajnajxɨch jɨm ma miich ajcxy, jaydëbɨ jäy ajcxy cöbɨjccɨxy Cristo agujc jotcujc caꞌ ti adzijpɨn.
\v 13 Mnejhuɨɨyb miich ajcxy co yɨꞌ huɨdibɨ ajcxy tumb ma Dios ytɨjc, paatcɨxy ninɨgoobɨ caayɨn uucɨn. Nañ jaduꞌn yɨꞌ pɨn ajcxy huɨdibɨ ɨyujc yajhuindzɨgɨɨyb Dios, paatɨp ajcxy je huindzɨgɨꞌñ tzüch.
\v 14 Nañ jaduꞌn je Huindzɨn Jesucristo aneꞌmy co huen yajcaaygɨxy yajꞌuuccɨxy etz mooygɨxy yhuit ytucx yɨꞌ ajcxy huɨdibɨ capxhuäcxcɨxp yɨꞌ yꞌayuc ytɨyꞌajt.
\v 15 Ɨɨch caꞌ tɨ nyajtuñɨch jada mɨcꞌajt jada aneꞌmɨn huɨdi nmɨɨdɨch. Nañ jaduꞌn caꞌ jada ayuc nyajnijayɨɨygɨxy, mɨɨd co ndzocy co padaꞌñɨch tijaty ma miich ajcxy. Jacjotcujc co nꞌögɨbɨch mɨɨd yuu, caꞌydɨ co nꞌanéꞌmɨbɨch caayɨn uucɨn ma miich ajcxy, e jaduꞌn tzöyduꞌn nbáadɨbyɨch jaduꞌn nej cham naygömayiijɨch, mɨɨd co cɨꞌm nnayyajcayiijɨch mɨɨd ndungɨch.
\p
\v 16 Com caꞌ huaad naygömayiijɨch co ngapxhuäcxyɨch Cristo yꞌayuc. Mɨɨd co Cristo xyyajnïbɨjcɨch jada tung, paady ycɨxpɨ copɨcy ngapxhuäcxyɨch Cristo yꞌayuc. Ayoꞌn nbadaamybɨch, pen caꞌ ngapxhuäcxɨch Cristo yꞌayuc.
\v 17 Pen ngɨꞌmdzójcɨnɨch ycɨxpɨ ngapxhuäcxɨch Cristo yꞌayuc, njɨjpꞌijxypɨch ixyipy co jäy ajcxy xymɨjuyɨpyɨch. Per caꞌ yjaduꞌnɨty. Hueꞌ janchtɨy je Huindzɨn Jesucristo xyajnïbɨjcɨch jada tung, e paady nduñɨch yɨꞌ ytung.
\v 18 ¿Ti mujuꞌñ nbáadɨbɨch mɨɨd ndungɨch ycɨxpɨ? Nbáadɨbɨch jotcujcꞌajtɨn co ngapxhuäcxɨbɨch Cristo yꞌayuc jaduꞌñyɨ, caꞌ ymeeñygɨxyɨty. Caꞌ nyajtuñɨch je aneꞌmɨn huɨdibɨ Cristo xymóyɨch mɨɨd caayɨn uucɨn ycɨxpɨ.
\p
\v 19 Caꞌ ji ni pɨn jäy mɨcꞌajt mɨɨdɨty jaydëbɨ xyꞌaneꞌmyiijɨch. Oy ixyipy ytɨmyñejɨty tɨ nnaybɨdägyiijɨch mɨɨd ɨɨch njot nhuinmaꞌñ jaduꞌn nej jɨhuɨ̈y tügꞌócɨy jäy ajcxy xyꞌaneꞌmyɨch. Jaduꞌn nduñɨch jaydëbɨ jac mayjäy ajcxy nyajmɨbɨgɨpyɨch Cristo.
\v 20 Co ngapxhuäcxyɨch Cristo yꞌayuc ma yɨ judíojäy, hueꞌ naybɨdägyiijɨch judíojäy, jaydëbɨ nyajmɨbɨcyɨch ajcxy Cristo. Co ngapxhuäcxyɨch Cristo ma yɨ judíojäy ajcxy huɨdibɨ cuydumyb yɨꞌ ajcxy ycötujcɨn etz ycostumbre, nañ jaduꞌn ɨɨch nguyduñɨch yɨꞌ ajcxy ycötujcɨn, jaydëbɨ nyajmɨbɨcyɨch ajcxy Cristo. Ooy yjanchɨty co caꞌ yɨ judío ycötujcɨn etz ycostumbre xyꞌaneꞌmyɨch.
\v 21 Co ngapxhuäcxyɨch Cristo yꞌayuc ma yɨꞌ ajcxy huɨdibɨ caꞌ yjudíojäyɨty, chi naybɨdägyiijɨch jaduꞌn nej yɨꞌ ajcxy. Caꞌ nan nmɨnaambɨch co caꞌ nguyduñɨch Dios ytɨyꞌajt. Hueꞌ njatytɨmycuydumybɨch Cristo ycötujcɨn, jaydëbɨ nyajmɨbɨcyɨch ajcxy Cristo.
\v 22 Co ngapxhuäcxyɨch Cristo yꞌayuc ma yɨꞌ ajcxy huɨdibɨ caꞌ tɨydudägy ymɨbɨjccɨxy, chi naybɨdägyiijɨch jaduꞌn nej yɨꞌ ajcxy, jaydëbɨ nyajmɨbɨcyɨch ajcxy Cristo. Ma nidügꞌócɨy jäy ajcxy ma ngapxhuäcxyɨch Cristo yꞌayuc, chi nbɨdägyɨch njot nhuinmaꞌñ nej yɨꞌ ajcxy yjot yhuinmaꞌñ mɨɨdɨty, jaydëbɨ nijëjɨty ajcxy nyajmɨbɨcyɨch Cristo yꞌayuc ytɨyꞌajt.
\v 23 Jaduꞌn nduñɨch tügꞌócɨy mɨɨd Cristo yꞌayuc ycɨxpɨ, je ayuc nej jëbɨ jäy ajcxy yꞌalma ñïdzooccɨxy. Jaduꞌn nduñɨch, jaydëbɨ nbaadyɨch je jotcujcꞌajtɨn etz oyꞌajtɨn huɨdibɨ nbaatɨm nidügꞌócɨy co nmɨjpɨdaacɨm Cristo.
\p
\v 24 Mnejhuɨɨygɨxy co jäy ajcxy ñayboyɨ̈cquípxɨgɨxy co premio padaangɨxy, huinꞌit nidügꞌócɨy ajcxy ñaymɨcꞌíjxɨgɨxy, per tügpajc huɨdi je premio patp. Nañ jaduꞌn miich ajcxy mɨjottɨgooygɨx cuydungɨx Dios yꞌayuc ytɨyꞌajt, jaydëbɨ Dios xymóoygɨxɨpy ajcxy tüg premio.
\v 25 Tügꞌócɨy pɨnjaty nayñiꞌixɨɨyɨp co ñayꞌixquipxáanɨgɨxy ma ɨyɨ̈huɨɨjɨn, ooy ñayguendꞌájtɨgɨxy mɨc, jɨgɨx jëbɨ ymadaaccɨxy co ganarꞌadaangɨxy premio huɨdibɨ caꞌ huinɨxɨɨ ajcxy mɨꞌijtcɨxy. Pero ɨɨch ajcxy Dios yꞌayuc capxhuäcxy, yɨꞌ ɨɨch ajcxy mɨjottɨgooygɨxy nganarꞌadáangɨxyɨch huɨdibɨ caꞌ nimɨna ycɨxɨpy ytɨgoyɨpy.
\v 26 E jaduꞌn ɨɨch ndung mɨjottɨgooyɨch, caꞌ yhuimbïdzɨty agoodzɨty, jaduꞌn nejɨhuɨ̈y ngoxɨch e nipɨn ca ypegyii.
\v 27 Nnaychaachytumybɨch ngɨꞌmninïcxɨch, jaydëbɨ ngɨꞌmninïcx xycapxymɨdooyɨch. Jaduꞌn nduñɨch co tɨ ngapxhuäcxyɨch Cristo ma je mayjäy ajcxy, caꞌydɨ nyajtɨgoyɨpyɨch nbremio huɨdibɨ Dios xymöhuambɨch.
\c 10
\s Capxhuijɨn ma yɨ pɨn ajcxy jac-huindzɨgɨɨyb quipychech
\p
\v 1 Com ndzojcypɨch co miich ajcxy mɨgügtɨjc mnejhuɨ́ɨygɨxɨpy co ajt nmɨjꞌap nmɨjteedy mɨɨd yhuɨdijty Moisés co Dios nidügꞌócɨy ajcxy cuendꞌajttay, huinhuoy jecyꞌajty mɨɨd tüg joc. E nañ jaduꞌn Dios yajnihuañ yajtzoocy nidügꞌócɨy ajcxy ma ymɨdzip co ajcxy yajnajxy je tzaptz mejy cujcꞌamy.
\v 2 Co nidügꞌócɨy ajcxy panɨcxy je joc, e co ñïdzooctay ajcxy nidügꞌócɨy ma je mejy, hueꞌ nidügꞌócɨy ajcxy cöbɨjcy Moisés yꞌaneꞌmɨn, e jaduꞌn nipaady nej jɨhuɨ̈y niꞌamugɨ̈ ajcxy yñɨɨbejty mɨɨd Moisés yxɨɨ.
\v 3 Nañ jaduꞌn nidügꞌócɨy ajcxy caay jɨɨcxy je maná huɨdibɨ Dios anajty yejcpy, choñ jeꞌ anajty tzajpjoty.
\v 4 Etz nañ jaduꞌn yꞌuuc ajcxy nidügꞌócɨy je nɨɨ huɨdibɨ Dios anajty yejcpy, com yꞌuuc ajcxy je nɨɨ huɨdibɨ yajpɨdzɨm ma je tzaa. E je tzaa hueꞌ jeꞌ anajty Cristo, e paady Cristo ymɨɨdꞌijtpy etz ypubejtpy ajcxy anajty nidügꞌócɨy.
\v 5 Oy ajcxy Dios ooy yjapubejtɨ, e ni may ajcxy ooy Dios yajjotmaꞌty, etz jahueen ajcxy ycaꞌöctay jɨm mɨjtɨgɨ̈duum jecyꞌajty, com caꞌ Dios jäygɨdacy jeꞌ ajcxy yhuinmaꞌñ.
\p
\v 6 Jaduꞌn nej je ayoꞌn yjajtɨ mɨɨd ajt nmɨjꞌap nmɨjteedy jecyꞌajty, jeꞌ ijxpejtɨp ma ɨɨch ajt, caꞌydɨ nꞌadzojcɨm tijaty jɨbɨcpɨ, jaduꞌn nej jeꞌ anajty ajcxy adzojccɨx jɨbɨcpɨ.
\v 7 Nañ jaduꞌn caꞌ yhuaadɨty caꞌ yꞌoyɨty co miich ajcxy mꞌojadajtcɨxy tzaadzech quipychech jaduꞌn nej nijëjɨty ajt nmɨjꞌap nmɨjteedy tuñ jecyꞌajty. Com jaduꞌn yjaybetyɨty ma Dios ñecy ma jaduꞌn ymɨnaꞌñ: “Ixtactay je jäy ajcxy caaybɨ uucpɨ, e huinꞌit ajcxy ypɨdɨ̈gy etz ytɨgɨɨygɨxy ɨyɨɨybɨ ejtzpɨ.”
\v 8 Nañ jaduꞌn caꞌ yꞌoyɨty co ndundɨgooyɨm mɨɨd töxyjäy ajcxy jaduꞌn nej nijëjɨty nmɨjꞌap nmɨjteedy tuñ jecyꞌajty, e iipx tugɨɨg mil ajcxy yꞌoꞌcy tüg xɨɨbɨ.
\v 9 Nañ ni caꞌ yꞌoyɨty co njotꞌijxɨm nhuinmaꞌñꞌijxɨm ɨɨch ajt nHuindzin Jesucristo, jaduꞌn nej ajt nmɨjꞌap nmɨjteedy ajcxy ɨdɨɨch jecyꞌajty, e may ajcxy tzaꞌñchüdzɨ, e ytɨgooy ajcxy yjugyꞌajtɨn.
\v 10 Nañ ni caꞌ yꞌoyɨty co nnigapxɨm niꞌojɨɨyɨm Dios, jaduꞌn nej nijëjɨty ajcxy ɨdɨɨch jecyꞌajty, e mɨɨd jeꞌ ycɨxpɨ Dios yꞌángel yajꞌoꞌcy mayjäy ma yɨꞌ ajcxy.
\p
\v 11 Tügꞌócɨy yɨ jaduꞌmbɨ ayoꞌn yjajtɨ mɨɨd ajt nmɨjꞌap nmɨjteedy, e jaybety yhuɨꞌmy ma Dios ñecy, jɨgɨx nꞌijxpejtꞌajtɨm, e jaduꞌn tɨyꞌajt nbaatɨm, caꞌydɨ ndundɨgooyɨm mɨɨd Dios, ɨɨch ajt pɨnjaty tzɨnaayb ma jadachambɨ xɨɨ jadachambɨ tiempo huɨdibɨ janch tɨm huingónɨp ma Dios yajcɨxaꞌñ yajtɨgoyaꞌñ jada naaxhuiñybɨ.
\v 12 Com nmɨɨdꞌajtɨm je tɨyꞌajt nej nmɨjꞌap nmɨjteedy ajcxy ytundɨgooy, paady ycɨxp pɨnjaty ycɨꞌmhuinmaꞌñ pɨdacp co ooy mɨcꞌajt mɨɨdɨty ma ymɨbɨjcɨn, huen naygüendꞌadyii, caꞌydɨ ytundɨgoy etz ypocycähuɨpy ma Dios.
\v 13 Tügꞌócɨy tzaachypɨ ayoꞌn, jotꞌijxɨn huinmaꞌñꞌijxɨn huɨdibɨ miich ajcxy mmɨnajxyp myajnajxyp, nañ jaduꞌn jacjadyii mɨbɨjcpɨdɨjc ajcxy mɨnajxcɨxy yajnajxcɨxy. Per yajmɨjꞌajtcɨx jotꞌamɨjꞌajtcɨx Dios, com Dios caꞌ aꞌɨxɨ̈huɨp co mjacmɨnájxcɨxɨpy mjacyajnájxcɨxɨpy tzaachypɨ ayoꞌn anaxy huɨdibɨ caꞌ ajcxy mmɨmadägaꞌñ. Co anajty tzaachypɨ ayoꞌn mmɨnajxcɨxy myajnajxcɨxy mɨctägy, huinꞌit Dios xymöhuɨpy ajcxy huinmaꞌñ jaduꞌn nej jëbɨ mmɨnaxtaygɨxy myajnaxtaygɨxy yɨ tzaachypɨ ayoꞌn.
\p
\v 14 Paady miich ajcxy mɨgügtɨjc, huɨdibɨ ooy ndzocy njɨhuɨ̈yɨch, ixmajtzcɨxy caꞌ mꞌojadajtcɨxy tzaadzech quipychech.
\v 15 Nyajmɨɨdcapxy nyajmɨɨdmɨydacpy ajcxy jadayaabɨ ayuc, com nejhuɨɨybɨch co miich ajcxy ooy oy huinmaꞌñ mmɨɨdɨty. E jëbɨ cɨꞌm mhuinmaaygɨxy pen tɨyꞌajt jada ɨɨch nꞌayuc, o pen caꞌ.
\v 16 Ma je “Santa Cena” co nyajnajxɨm Dioscojuyip ma Dios mɨɨd je ügy, e nꞌuucɨm. Jeꞌ jeꞌ ñidɨyꞌajtꞌajtpy co Cristo tɨ xyajtügmújcɨm ajt njot nhuinmaꞌñ co yajcruudzpejtɨ etz ñɨꞌpy yteemy yojcy mɨɨd ajt nbocy ycɨxpɨ. Nañ jaduꞌn ma je “Santa Cena” co ndujchuäcxɨm, e ngaayɨm je tzajcaagy, jeꞌ jeꞌ ñidɨyꞌajtꞌajtpy co Cristo xyajtügmujcɨm ajt njot nhuinmaꞌñ mɨɨd ñinïcx co ñaygɨ̈yejcɨ ma ymɨdzip huen yajcruudzpedyii.
\v 17 Oy ajt ooy njanimaayɨty, per nidügꞌócɨy ɨɨch ajt ngaayɨm je tügpɨ “Santa Cena” tzajcaagy. Jada tzajcaagy tüg yɨꞌ, paady ycɨxpɨ tügpɨcy jäy ɨɨch ajt, e jaduꞌn ɨɨch ajt nipaady nej tügpɨ ninïcx.
\p
\v 18 Oc-huinmaaygɨxy miich ajcxy yɨ Israel jäy ajcxy, co ajcxy tzützcɨxy je huɨdibɨ ajcxy yajhuindzɨgɨɨyb Dios, chi ajcxy naydücmújcɨgɨxy mɨɨd Dios ycɨxpɨ ma je Dios ojadajttac.
\v 19 Ɨɨch nmɨnaꞌñɨch co yɨ tzaadzech caꞌ ti mɨcꞌajt mɨɨdɨty, e nañ jaduꞌn yɨ tzüch huɨdibɨ yajhuindzɨgɨɨyb tzaadzech caꞌ jac nïgɨ oyꞌajtɨn mɨɨdɨty, caꞌydɨ jac huɨdibɨ tzüch.
\v 20 Jaduꞌn nmɨnaꞌñɨch, co yɨ jäy ajcxy huɨdibɨ caꞌ mɨjpɨdaaccɨxy Dios, co ajcxy yejccɨxy yhuindzɨgɨꞌñ, hueꞌ ajcxy yajhuindzɨgɨɨyb caꞌoybɨ, e caꞌ Dios ajcxy yajhuindzɨgɨ̈y. E caꞌ ndzocyɨch co miich ajcxy mɨgügpɨgɨpy je caꞌoybɨ. 
\v 21 Co miich ajcxy mꞌuuccɨxy je ügy ma je “Santa Cena”, caꞌ huaad mꞌuuccɨxy je ügy huɨdibɨ caꞌoybɨ ajcxy yhuindzɨgɨꞌñꞌajtɨpy. Etz co mgaaygɨxy je tzajcaagy ma je “Santa Cena”, caꞌ huaad mgaaygɨxy je tzajcaagy huɨdibɨ caꞌoybɨ yhuindzɨgɨꞌñꞌajtɨp.
\v 22 ¿Nej tzoc yajjotmaꞌtɨm yɨ Jesucristo? ¿Nej jacmɨcꞌajt mɨɨd jadaꞌ ɨɨch ajt, caꞌydɨ yɨꞌ?
\s Je tzojcɨn huɨdibɨ tüg mɨbɨjcpɨ huaad tuñ mɨɨd ymɨgüg
\p
\v 23 Janch tɨyꞌajt nej jay ymɨnaangɨxy co jëbɨ huaad nduñɨch huentiijɨty huɨdibɨ nijotꞌajtpyɨch, per caꞌ tügꞌócɨy nmɨgügtɨjcɨch jäygɨdaaccɨxy huɨdi ndumybɨch. Janch jaduꞌn jëbɨ huaad nduñɨch huentiijɨty huɨdibɨ nijotꞌajtpyɨch, per huɨdibɨ ndumybɨch caꞌ tügꞌócɨy xypubetyɨch ma ɨɨch nmɨbɨjcɨn.
\v 24 Caꞌ yꞌoyɨty nnijotꞌajtɨm ngɨꞌmꞌoyꞌajtɨn. Oy co nbubejtɨm nbudɨgɨɨyɨm nmɨgügtɨjc.
\p
\v 25 Jëbɨ ajcxy mdzüch huen ti tzüch huɨdibɨ yajtoocp ma je mercado. Caꞌ ajcxy myajtɨɨhuɨpy ma je tzüch chooñ, caꞌydɨ jɨbɨc mnayjɨhuɨ́ɨyɨgɨxy.
\v 26 Com Dios yꞌayuc jaduꞌn ymɨnaꞌñ: “Je Huindzɨn Dios yɨꞌ nihuindzɨnꞌajtp je naaxhuiñybɨ, etz ñihuindzɨnꞌajttaayb tügꞌócɨy huɨdibɨ ji yajpatp.”
\p
\v 27 Pen jɨm pɨnjaty huɨdibɨ caꞌ ymɨbɨcy, xyajnihuohuɨ̈y tüg caayɨn uucɨn ma yɨꞌ ytɨjc, e pen tɨ mhuinmaꞌñ mbɨdägy co nɨcxy mgayaꞌñ ma yɨꞌ ytɨjc, oy co mgaayɨpy mdzüdzɨp huentiijɨty huɨdibɨ ajcxy xymooyb. E caꞌ mnidɨɨhuɨpy myajtɨɨhuɨpy ma je tzüch chooñ, caꞌydɨ jac pɨnjaty jɨbɨc ñayjɨhuɨ̈yii mɨɨd huɨdibɨ tɨ mduñ.
\v 28 Per pen je jäy xyñɨmaayb: “Jada tzüch tɨ jäy yajhuindzɨgɨ̈y tzaadzech.” Pues caꞌ mdzüdzɨp je tzüch, jɨgɨx caꞌ jɨbɨc ñayjɨhuɨ̈huɨɨyb je mɨgüg huɨdibɨ tɨ xyñɨmäy co je tzüch tɨ yajhuindzɨgɨ̈y tzaadzech.
\v 29 Hueꞌ nimɨydacypɨch je mmɨgüg huɨdibɨ jɨbɨc nayjɨhuɨ̈huɨɨyb pen miich mdzuꞌchpyɨ tzüch huɨdibɨ tzaadzech yhuindzɨgɨꞌñꞌajtp. Caꞌ nnimɨydägyɨch nej miich cɨꞌm mnayjɨhuɨ̈yii. Caꞌ yjecyɨty co nijëjɨty jäy xyñɨmähuɨbɨch: “¿Naꞌamy co xycapxꞌadujcɨch tijaty nɨgoob mɨɨd co huingbɨ jäy jɨbɨc ñayjɨhuɨ̈yii mɨɨd jëgɨxpɨ?
\v 30 Pen nyajnajxypɨch Dioscojuyip mɨɨd tijaty ycɨxpɨ huɨdibɨ ngaaybɨch nꞌuucypɨch, ¿naꞌamy co xyñigapxaꞌñɨch xyñiꞌojɨ̈huaꞌñɨch co tɨ ngay tɨ nꞌügyɨch tijaty?”
\v 31 Paady ycɨxp huentiijɨty huɨdibɨ mdungɨxyp, pen mgaaygɨxyp mꞌuuccɨxyp, o jac ti ga ti mdungɨxy, tungɨx tügꞌócɨy mɨɨd Dios yꞌoyꞌajtɨn ymɨjꞌajtɨn ycɨxpɨ.
\v 32 Caꞌ mdúngɨxɨpy tijaty huɨdibɨ yɨ judíojäy ajcxy mɨɨd huing ñayjɨhuɨ̈yii. Caꞌ mdúngɨxɨpy tijaty huɨdibɨ yɨ griegojäy ajcxy mɨɨd huing nayjɨhuɨ̈yii. Etz caꞌ mdúngɨxɨpy tijaty huɨdibɨ yɨ mɨbɨjcpɨdɨjc ajcxy mɨɨd huing ñayjɨhuɨ̈yii.
\v 33 Tügꞌócɨy huɨdibɨ ndúmybɨch, hueꞌ nduñɨch jɨgɨx tügꞌócɨy jäy jäygɨdägɨpy huɨdibɨ ndumybɨch. Caꞌ ni ti nduñɨch nej jëbɨ ɨɨch cɨꞌm nayjäygɨdägyiijɨch. Hueꞌ nduñɨch mɨɨd jacjadyii jäy ajcxy yꞌoyꞌajtɨn ycɨxpɨ, jaydëbɨ ajcxy yꞌalma ñïdzögɨpy.
\c 11
\p
\v 1 Jaduꞌn ndzocyɨch co miich ajcxy mdunɨpy jaduꞌn nej nduñɨch. E ɨɨch tumbɨch jaduꞌn nej Cristo ytuuñ.
\s Nej huaad töxyjäydɨjc ajcxy yjäyꞌajtcɨxy co mɨgügtɨjc naymújcɨgɨxy
\p
\v 2 Miich ajcxy mɨgügtɨjc, ngapxpatypɨch miich ajcxy, com miich ajcxy xyjatytɨmyjäymejtzpɨch, etz nañ mguydungɨxyp je ayuc je tɨyꞌajt huɨdibɨ ɨɨch miich ajcxy tɨ nyajꞌixpɨjccɨxy.
\v 3 Per ndzojcypɨch co mhuinjɨhuɨ́ɨygɨxɨpy je tɨyꞌajt co Cristo nigohuajcꞌajtpy nidüg nidüg yɨ mɨbɨjcpɨ yëydɨjcpɨ. E nañ nidüg nidüg yëydɨjc nigohuajcꞌajty ajcxy ytöxyɨjc. E Dios nañ nigohuajcꞌajtpy je Cristo.
\v 4 Co tüg yëydɨjc cöjuuxy cöbeꞌñ ɨɨhuäcxy capxhuäcxy je tɨyꞌajt huɨdibɨ Dios tɨ ymöyii, tüg jeꞌ tzoꞌyduꞌñ anajty naymöyii.
\v 5 E co tüg töxyjäy cöjuxtüdy cöbeꞌndüdy ɨɨhuäcxy capxhuäcxy je tɨyꞌajt huɨdibɨ Dios tɨ ymöyii, tüg jeꞌ anajty tzoꞌyduꞌn ñaymöyii. Jaduꞌn jeꞌ nipaady nej jɨhuɨ̈y jeꞌ ycömeꞌpxɨty cödzaꞌm.
\v 6 Pen tüg töxyjäy caꞌ ñaygöbeꞌnaꞌñyii, jacꞌoy co huen yajcömeꞌpxy cödzaꞌm. Per pen je töxyjäy choꞌyduꞌn jɨhuɨ̈huamyb co ycöhuay ymeꞌpxɨty, o co ycömeꞌpxɨty cödzaꞌm, jac nïgɨ oy co ñaygöbeꞌnɨɨyb.
\v 7 Je yëydɨjctɨjc caꞌ yꞌoyɨty co ajcxy ycohuajc cöjuuxy cöbeꞌñ mɨꞌidɨpy ma ajcxy Dios mɨbɨjtzoogɨxy o yajꞌixpɨjccɨxy Dios yꞌayuc. Com je yëydɨjc jaduꞌn yɨꞌ nipaady nej Dios, e Dios yajcoj je yëydɨjc mɨɨd yɨꞌ yꞌoyꞌajtɨn ycɨxpɨ. Per Dios yajcoj je töxyjäy mɨɨd je yëydɨjc yꞌoyꞌajtɨn ycɨxpɨ.
\v 8 Co Dios yajcojy je jayɨjpɨ yëydɨjc, caꞌ yajtuuñ je töxyjäy ycaachypajc. Hueꞌ janchtɨy co Dios yajcojy je jayɨjpɨ töxyjäy, jeꞌ yajtuunɨ je ñiyëydɨjc tüg ycaachypajc.
\v 9 Dios yajcoj je töxyjäy mɨɨd je yëydɨjc ycɨxpɨ. E caꞌ nan yajcojy je yëydɨjc mɨɨd je töxyjäy ycɨxpɨ.
\v 10 Paady ycɨxp copɨcy co je töxyjäy ajcxy yꞌijtcɨxy cöbeꞌñ co Dios mɨbɨjctzoogɨxy o najtzcapxɨɨygɨxy Dios ytɨyꞌajt. Jeꞌ jeꞌ je tɨyꞌajt co yajpaady ajcxy aneꞌmy, nañ jaduꞌn yɨ ángeles ajcxy yajpaatcɨxy aneꞌmy.
\v 11 Per caꞌ ñejɨty, ɨɨch ajt huɨdibɨ nmɨbɨjcɨm Cristo, ma ajt ndzɨnaayɨn je yëydɨjc caꞌ jeꞌ yajpaady naydüg, etz ni caꞌ je töxyjäy yajpaady naydüg, hueꞌ ajcxy naymɨɨddzɨnáayɨgɨxyp.
\v 12 Com tɨyꞌajt jaduꞌn co Dios yajcojy je jayɨjpɨ töxyjäy mɨɨd je ñiyëydɨjc ycaachypajc. Etz tɨyꞌajt jaduꞌn co je töxyjäy ajcxy yajmaꞌxungꞌajtcɨxy je yëydɨjc ajcxy. Per Dios tɨ yajꞌoyɨydäy, e tügꞌócɨy jiiby chondäy ma Dios.
\p
\v 13 Miich ajcxy cɨꞌm ocmɨnaangɨx oc-huinmaaygɨx, pen oy jaduꞌn o pen caꞌ yꞌoyɨty jaduꞌn co tüg töxyjäy Dios mɨbɨjctzoy jaygöbeꞌñ.
\v 14 Jëbɨ tɨyꞌajt nbaatɨm huenmaꞌámyɨty ya naaxhuiñ co je yëydɨjc huɨdibɨ ymɨɨd ycöhuay yoñ ooy choꞌyduꞌn yecy.
\v 15 E je töxyjäydɨjc ajcxy ooy ycömaypɨdzɨmgɨxy co ajcxy mɨɨdɨty ycöhuay yoñ. Com yɨꞌ jeꞌ huɨdi ycöbeꞌnꞌajtɨp.
\v 16 Pen jɨm pɨnjaty caꞌ mɨjotcujcꞌaty ɨɨch nꞌayuc, copɨcy nejhuɨ̈huɨpy co ɨɨch ajcxy etz nañ jaduꞌn tügꞌócɨy jäy huɨdibɨ ajcxy mɨjpɨdaaccɨxyp Dios ma tügꞌócɨy cajp, cuydungɨxy nej tɨ nyajꞌixpɨcyɨch miich ajcxy, caꞌ pɨn jac huingbɨ costumbre mɨɨdɨty.
\s Pɨn tundɨgooyb “Santa Cenajoty”
\p
\v 17 Jada ayuc nyajnɨmähuaangɨxyp jaduꞌn nej mdungɨxy ma mnayyöymújcɨgɨxy co Dios mꞌojadajtcɨxy. Caꞌ ngapxpaadyɨch miich ajcxy, com jɨbɨc yhuimbɨdzɨmy jaduꞌn nej mdungɨxy.
\v 18 Jayɨjp nɨmähuaangɨxy co nijëjɨty mɨgügtɨjc tɨ xyñɨmäyɨch co miich ajcxy mnaybɨjc-huäcxɨgɨxy co mnayyöymújcɨgɨxy ma je nayyöymujctac. E ɨɨch nmɨbɨjcpyɨch ma ga ma co yjanchɨty nej je mɨgügtɨjc ajcxy ymɨnaꞌñ.
\v 19 Caꞌ yjecyɨty paady miich ajcxy mnaybɨjc-huäcxɨ mɨɨd ajcxy mjɨbɨc-huinmaꞌñ ycɨxpɨ, jaydëbɨ ñiguëxɨ̈gy pɨn jeꞌ janch tɨydudägy cuydumb Dios ytɨyꞌajt.
\v 20 Co miich ajcxy mnayyöymújcɨgɨxy ma je nayyöymujctac, jaduꞌn yhuimbɨdzɨmy co caꞌ mguydungɨxy nej ypadyii ɨɨch ajt nHuindzɨn Jesucristo ytɨyꞌajt co mjatungɨxy je “Huindzɨn jeꞌ ySanta Cena”.
\v 21 Com co je hora paady ma yam mdungɨxy je “Huindzɨn jeꞌ ySanta Cena” nidüg nidüg miich ajcxy mgaaygɨxy abɨcyjaty, e caꞌ mdungɨx cuendɨ yɨ jacjadyii mɨgügtɨjc, paady nijëjɨty mɨgügtɨjc ayuu yꞌijtcɨxy, e nijëjɨty anaxy ycaaygɨxy yꞌuuccɨxy, ixtɨ ymuucɨgɨxy nijëjɨty.
\v 22 ¿Nej caꞌ miich ajcxy mɨɨdɨty mjɨɨn mdɨjc ma jëbɨ mgaaygɨxy mꞌuuccɨxy? Jaduꞌn nej miich ajcxy mdungɨxy caꞌ mmɨjꞌijxcɨxy caꞌ mɨjpɨdaaccɨxy je jäy ajcxy nidügꞌócɨy huɨdibɨ mɨjpɨdacp Dios. E nañ jaduꞌn myajtzoꞌydungɨxy yɨ ayoobɨ jäy huɨdibɨ ajcxy caꞌ ti mɨɨdɨty. ¿Huam ɨɨch miich ajcxy nɨmähuɨpy? ¿Nej jëbɨ ngömaaygɨxy miich ajcxy jaduꞌn nej mdungɨxy? Caꞌ huaad ngömaaygɨxy miich ajcxy co jaduꞌn mꞌɨdɨɨtzcɨxy.
\s Jaduꞌn nej njäymejtzɨm ajt nHuindzɨn Jesús ma yɨ “Santa Cena”
\p
\v 23-24 Com ɨɨch ajt nHuɨndzin Jesucristo cɨꞌm xyajꞌixpɨjcyɨch je tɨyꞌajt huɨdibɨ tɨ nyajꞌixpɨcyɨch miich ajcxy, co je huinꞌit coodz co agojɨɨx ajcxy cɨ̈yejcy je nHuindzɨn Jesús, huinꞌit jeꞌ conɨ̈gy je tzajcaagy, e co jayɨjp yajnajxy Dioscojuyip ma Dios, chi tujc-huäcxy je tzajcaagy, e moy nidüg nidüg ydiscípulos ajcxy. E co ajcxy moyday, chi nɨmay ajcxy: “Caaygɨx jada tzajcaagy. Jaduꞌn ɨɨch jada nninïcx huɨdibɨ ngɨ̈yegaamybɨch ma yɨ oꞌcɨn mɨɨd miich ajcxy ycɨxpɨ. Jaduꞌn ɨɨch tɨ nduñɨch, jaduꞌn jada miich ajcxy mdunɨpy jäymejtzɨɨg mɨɨd ɨɨch ycɨxpɨ.”
\v 25 Co ajcxy ycayday, chi Jesús nañ jaduꞌn conɨ̈gy je ügy copɨꞌam, e ymɨnañ: “Jada ügy jeꞌ jada je Dios yꞌayuc jemybɨ huɨdibɨ Dios yajhuɨꞌmy mɨɨd jäy ajcxy ycɨxpɨ, je huɨdibɨ ɨɨch nnɨꞌpy ñidɨyꞌajtꞌajtpy. Naagꞌoc naagꞌoc mꞌuuccɨxy jada ügy tungɨxy jäymejtzɨɨg mɨɨd ɨɨch ycɨxpɨ.”
\v 26 Paady naagꞌoc naagꞌoc miich ajcxy mgaaygɨxy jada tzajcaagy, etz mꞌuuccɨxy jada ügy, myegɨpy ajcxy tɨyꞌajt jaduꞌn nej Cristo yꞌoꞌcy mɨɨd ajt nbocy ycɨxpɨ, ixtɨ coonɨ anajty Jesucristo yhuimbity ya naaxhuiñ.
\s Nej huaad ngaayɨm je “Santa Cena”
\p
\v 27 Paady ycɨxp pɨnjaty mɨɨd caꞌoyjot caꞌoyhuinmaꞌñ caaygɨxy je tzajcaagy etz uuccɨxy je vinoꞌügy, huɨdibɨ ajt nHuindzɨn Jesús ñinïcxꞌajtpy etz ñɨꞌpyꞌajtpy, hueꞌ ajcxy ymɨdundɨgooygɨxy ajt nHuindzɨn Jesús ñaaxnïcx etz yɨꞌ yñɨꞌpy.
\v 28 Paady ycɨxpɨ copɨcy nidüg nidüg mɨbɨjcpɨdɨjc jayɨjp yajꞌoyɨ̈huɨpy ycɨꞌmjot ycɨꞌmhuinmaꞌñ, e huinꞌit jëbɨ cayɨpy je tzajcaagy etz ügɨpy je vino ma je “Santa Cena”.
\v 29 Com pɨnjaty caayb je tzajcaagy etz ügy je vino ma je “Santa Cena”, e caꞌ tuñ cuendɨ co jeꞌ jeꞌ ɨɨch ajt nHuindzɨn Jesús ñinïcx etz ñɨꞌpy, hueꞌ jeꞌ cɨꞌm ñaymɨdundɨgoyii, e Dios tzaachytunɨɨb mɨɨd ypocy ycɨxpɨ.
\v 30 Paady ycɨxp may miich ajcxy myuumɨɨdɨty mbaꞌmmɨɨdɨty, pumäy mnayjɨhuɨɨyɨgɨxy. May miich ajcxy yuu baꞌm xyajꞌayoogɨxy etz may ma miich ajcxy tɨ mꞌöccɨxy.
\v 31 Co tɨydudägy njot nhuinmaꞌñ nyajꞌoyɨɨyɨm cɨꞌm, caꞌ ajt nHuindzɨn Jesucristo xychaachytuunɨm.
\v 32 Co ajt nHuindzɨn Jesucristo xychaachytunɨm mɨɨd yuu baꞌm, paady ycɨxpɨ jaduꞌn xychaachytuunɨm, jɨgɨx caꞌydɨ nidɨgooyɨm ajt nꞌalma yjugyꞌajtɨn quipxyɨ mɨɨd je naaxhuiñyjäy ajcxy huɨdibɨ caꞌ ajcxy Dios tzɨgɨɨygɨxy.
\p
\v 33 Paady ycɨxpɨ miich ajcxy mɨgügtɨjc co ajcxy mgayaꞌnɨp mꞌügaꞌnɨp je “Santa Cena” nayꞌahuíjxɨgɨxy miñ xyipy, e jaduꞌn mgáaygɨxɨpy amugɨꞌ.
\v 34 Pen jɨm pɨnjaty ma miich ajcxy ooy yuubögyii, jacꞌoy co ycaayɨpy yꞌügɨpy ma ycɨꞌmdɨjc jacjayɨjp ma caꞌnɨ ymiñ ma je nayyöymujctac. Jaduꞌn mdúngɨxɨpy, caꞌydɨ Dios xychaachytuungɨxy mɨɨd co caꞌ oy mduungɨxy je “Santa Cena”. Yɨ jacjadyii ayuc huinmaꞌñ jɨm nyajꞌoyɨ̈huɨbɨch co anajty nɨcxy cɨꞌm nꞌíjxcɨxyɨch miich ajcxy.
\c 12
\s Je mɨcꞌajt huɨdibɨ Espíritu Santo yejcy ma nidüg nidüg mɨbɨjcpɨdɨjc
\p
\v 1 Mɨgügtɨjc ajcxy, ndzojcypɨch co miich ajcxy mnejhuɨ̈huɨpy jaduꞌn nej je Espíritu Santo xymooyɨm mɨcꞌajt.
\v 2 Miich ajcxy mnejhuɨɨyb co jayɨjpꞌajty co caꞌnɨ anajty mmɨbɨjccɨxy Cristo, ooy anajty je caꞌoybɨ xyajnɨɨdɨgooygɨxy xyajtüdɨgooygɨxy, co mꞌojadajtcɨxy tzaadzech quipychech huɨdibɨ caꞌ ymɨdoy caꞌ ycapxy.
\v 3 Paady ycɨxpɨ ndzojcpɨch co miich ajcxy mnejhuɨ̈huɨpy co pɨnjaty ymɨnaꞌnɨpy: “¡Caꞌ oy jäy yɨ Jesús!” je jäy huɨdibɨ jaduꞌn mɨnamb, caꞌ jeꞌ anajty yajcapxyii je Dios yꞌEspíritu. E pɨnjaty mɨnamb: “¡Jesús ɨɨch ajt nHuindzɨn!” jeꞌ anajty yajcapxɨp je Espíritu Santo.
\p
\v 4 Dios yjɨhuɨꞌñ ymɨcꞌajt yejcpy ymɨcꞌajt canaag nax, per tügpajc jëyɨ je Dios yjɨhuɨꞌñ huɨdibɨ mɨcꞌajt yejcp.
\v 5 Ji yajpaady canaagnax Dios ytung, per tügpajc ajt nHuindzɨn Jesús huɨdibɨ xyajnïbɨjcɨm nijeꞌ nijeꞌ tung.
\v 6 Ji yajpaady canaagnax huinmaꞌñ nej jëbɨ ndunɨm Dios ytung. Per tügpajc Dios huɨdibɨ xymooyɨm nidüg nidüg je nhuinmaꞌñ nej huaad ndunɨm Dios ytung.
\v 7 Dios yajniguëxɨ̈gyp ma nidüg nidüg mɨbɨjcpɨdɨjc je tɨyꞌajt co ajcxy mɨɨdɨty yɨꞌ yjɨhuɨꞌñ ymɨcꞌajt ma ajcxy yjot yhuinmaꞌñ. Jaduꞌn Dios ytuñ mɨɨd tügꞌócɨy ymɨbɨjcpɨdɨjc yꞌoyꞌajtɨn ycɨxpɨ.
\v 8 Dios mɨɨd yjɨhuɨꞌñ ymɨcꞌajt ymooyb nijëjɨty mɨbɨjcpɨdɨjc ayuc huinmaꞌñ nej jëbɨ ajcxy yajꞌixpɨcy Dios yꞌayuc. E nañ jaduꞌn Dios mɨɨd yjɨhuɨꞌñ ymɨcꞌajt möy nijëjɨty mɨbɨjcpɨdɨjc ixpɨjcɨn ma yɨꞌ ytɨyꞌajt, per tügpajc je Espíritu Santo huɨdibɨ mɨcꞌajt yejcp.
\v 9 E nañ jaduꞌn Dios mɨɨd yjɨhuɨꞌñ ymɨcꞌajt möy nijëjɨty jäy mɨbɨjcɨn, per tügpajc je Espíritu Santo huɨdibɨ mɨcꞌajt yejcpy. E nañ jaduꞌn jacnaagɨty möy mɨcꞌajt jaydëbɨ yajtzögy paꞌmjäy.
\v 10 E nañ jaduꞌn Dios mɨɨd yjɨhuɨꞌñ ymɨcꞌajt ymooyb nijëjɨty mɨbɨjcpɨdɨjc mɨcꞌajt, jaydëbɨ mɨjhuinmaꞌñytúngɨxy milagro tungɨxy. E jac nijëjɨty ymooyb mɨcꞌajt, jaydëbɨ najtzcapxɨɨygɨxy Dios ytɨyꞌajt. E jac nijëjɨty Dios ymooyb ixpɨjcɨn etz huijyꞌajtɨn, jaydëbɨ ijxcajpcɨxy je espíritu huɨdibɨ caꞌ tɨyꞌajt mɨɨdɨty, etz nañ jaduꞌn ijxcajpcɨxy je espíritu huɨdibɨ tɨyꞌajt mɨɨdɨp. E jac nijëjɨty Dios ymooyb je mɨcꞌajt, jaydëbɨ capxcɨxy huingbɨ ayuc, etz nañ jaduꞌn jac nijëjɨty ymooyb je ixpɨjcɨn jaydëbɨ yajnïguejcɨxy je huingbɨ ayuc.
\v 11 Per tügpajc je Espíritu Santo huɨdibɨ ymooyb nijeꞌ nijeꞌ mɨbɨjcpɨdɨjc mɨcꞌajt etz huinmaꞌñ. Ymooyb nidüg nidüg nej yɨꞌ tzocy.
\s Nidügꞌócɨy ajt nyajpaatɨm ma Cristo
\p
\v 12 Cristo jaduꞌn yɨꞌ nej tüg ninïcx, je ninïcx ymɨɨd canaag nax huɨdibɨ yuꞌcxp. Oy canaag jamɨɨdɨty huɨdibɨ yuꞌcxp, per tügpajc ñinïcxꞌaty.
\v 13 Co nidüg nidüg ɨɨch ajt nnɨɨbejtɨm, chi ɨɨch ajt nyajpaatɨm nej tügpɨcy jäy. Com Dios yjɨhuɨꞌñ ymɨcꞌajt tügpajc yajpaady ma nidügꞌócɨyɨ ɨɨch ajt njot nhuinmaꞌñ, caꞌ ñejɨty pen judíojäy ajt, o pen caꞌ ajt njudíojäyɨty; pen jäy xytumbɨꞌajtɨm o pen ndunɨm ngɨꞌmdung; hueꞌ nꞌijtɨm nej tügpɨcy jäy. Dios xyꞌadɨgɨɨyɨm xyjottɨgɨɨyɨm yɨꞌ yjɨhuɨꞌñ ymɨcꞌajt nidügꞌócɨy ɨɨch ajt, paady ycɨxpɨ túꞌcɨy nyajpaatɨm, com túꞌcɨy nmɨꞌijtɨm Dios yjɨhuɨꞌñ ymɨcꞌajt.
\p
\v 14 Tügpɨ jäy ñinïcx mɨɨd canaagnax huɨdibɨ yuꞌcxp, huɨdibɨ mɨdoob, huɨdibɨ ijxp.
\v 15 Co ixyipy je tecy jaduꞌn ymɨnaꞌñ: “Caꞌp ɨɨch ngɨ̈jɨty, paady caꞌ nyajpaadyɨch ma je ninïcx.” ¿Nej paady ycɨxpɨ caꞌ yajpaady ma ninïcxɨn?
\v 16 O co ixyipy je tädzac ymɨnaꞌñ: “Caꞌp nhuiinɨty, paady caꞌ nyajpaadyɨch ma je ninïcx.” ¿Nej paady ycɨxpɨ caꞌ yajpaady ma ninïcxɨn?
\v 17 Co ixyipy tügꞌócɨy je jäy ñinïcx yꞌoc-huinꞌaty, ¿ma ixyipy mɨɨdɨty huɨdi mɨdooyb? O co ixyɨpy tügꞌócɨy je jäy ñinïcx ytädzacꞌaty, ¿ma ixyipy mɨɨdɨty huɨdibɨ jëbɨ mɨɨd tijaty xuugyii?
\v 18 Dios tɨ pɨdacɨ jäy ytecy yhuin yꞌahuac etz jac tijaty ma tügpɨ ninïcx jaduꞌn nej yɨꞌ tzojcy.
\v 19 Pen huiindɨꞌajty ixyipy ninïcxꞌajtp, ¿ti ninïcx ixyipy jada?
\v 20 Dios tɨ möy nidüg nidüg jäy ycɨꞌ ytecy, yhuiin yꞌahuac, yjɨjpput etz ytädzac, per tügpajc ñinïcxꞌaty.
\p
\v 21 Caꞌ huaad je huiin ixyipy nɨmäy je cɨꞌ: “Caꞌ ɨɨch miich nyajmayjaty.” Nañ jaduꞌn caꞌ huaad ixyipy je cohuajc nɨmay je tecy: “Caꞌ ɨɨch miich nyajmayjaty.”
\v 22 Tügpɨ ninïcx copɨcy caꞌpxy tijaty mɨɨd. Huɨdijaty je ninïcx ymɨɨd oy yjaquëxɨ̈gy nej jɨhuɨ̈y caꞌ yꞌoyꞌojadajtnɨty, per copɨcy yɨꞌ.
\v 23 Jaduꞌn ɨɨch ajt njäyꞌajtɨm. Muum ma ajt nninïcx caꞌ oy nꞌijxɨm, paady nayxojxɨm, jɨgɨx jacꞌoy quëxɨ̈gɨp. Nañ jaduꞌn muum ma ajt nninïcx huɨdi yꞌoymɨdzoꞌydunɨ, paady nyüdzɨm mɨɨd huit, jaydëbɨ oy quëxɨ̈gɨty.
\v 24 Muum ma ajt nninïcx oy nꞌijxɨm paady caꞌ nyüdzɨm mɨɨd huit. Jaduꞌn Dios yajꞌoyɨɨy ajt nninïcx, jɨgɨx ma caꞌ oy yꞌijxɨty, nxojxɨm mɨɨd huit, jɨgɨx jëbɨ oy quëxɨ̈gy.
\v 25 Jaduꞌn Dios yajcojy yajꞌoyɨɨy ajt nninïcx túꞌcɨy, jɨgɨx caꞌydɨ ñaychiptúnɨgɨxy nijeꞌ nijeꞌ huɨdibɨ yücx ma ajt nninïcx. Tügꞌócɨy huɨdibɨ nmɨɨdꞌajtɨm ma ajt nninïcx naybubéjtɨgɨxp miñ xyipy.
\v 26 Pen pɨjcp muum ma je ninïcx, tügꞌócɨy je ninïcx jɨhuɨ̈y je pɨjcɨn. Pen muum ma ajt nninïcx ooy capxpaady yꞌity, chi tügꞌócɨy je ninïcx jotcujc ñayjɨhuɨ̈yii.
\p
\v 27 Miich ajcxy nidügꞌócɨy Cristo xyñinïcxꞌajtcɨxyp, e nidüg nidüg miich ajcxy myajpatcɨxy ma Cristo ñinïcx. Jaduꞌn nidüg nidüg ɨɨch ajt nipaady nej huɨdi yücxp ma tüg ninïcx.
\v 28 Dios yajnïbɨcjpy nijeꞌ nijeꞌ mɨbɨjcpɨdɨjc, jɨgɨx ajcxy yajnɨcxɨp nidüg nidüg yɨꞌ ytung. Tɨm jayɨjp yajnïbɨjcy je apóstol ajcxy huɨdibɨ je mɨjtung yajnɨcxɨp. E mɨmetz Dios yajnïbɨjcy nijëjɨty mɨbɨjcpɨdɨjc huɨdibɨ najtzcapxɨɨyb yɨꞌ yꞌayuc, je mɨdugɨɨgpɨ Dios yajnïbɨjcy nijeꞌ nijeꞌ je mɨbɨjcpɨdɨjc huɨdibɨ yajꞌixpɨjcp yɨꞌ ytɨyꞌajt. Dios yajnïbɨjcy mɨbɨjcpɨdɨjc nijëjɨty huɨdibɨ mɨj huinmaꞌñ tumb. E Dios yajnïbɨjcy mɨbɨjcpɨdɨjc nijëjɨty huɨdibɨ yajtzoocp paꞌmjäy. E Dios yhuinꞌijx huɨdibɨ pubejtp ymɨgügtɨjc. E Dios yhuinꞌijx je mɨbɨjcpɨdɨjc huɨdibɨ aneꞌmɨp je ymɨgügtɨjc. E Dios yhuinꞌijx je mɨbɨjcpɨdɨjc huɨdibɨ jadɨp nej capxɨp huingbɨ ayuc.
\v 29 Caꞌ nan nidügꞌócɨy mɨbɨjcpɨdɨjc huɨdibɨ Dios huinꞌijxyp yꞌapóstolꞌajtcɨxy. Nañ ni caꞌ nan nidügꞌócɨy ajcxy najtzcapxɨɨygɨxy Dios yꞌayuc. E nañ ni caꞌ nidügꞌócɨy yɨꞌ ajcxy mɨjhuinmaꞌñytungɨxy.
\v 30 Caꞌ nan nidügꞌócɨy mɨbɨjcpɨdɨjc huɨdibɨ Dios huinꞌijxɨp ymɨɨd ajcxy mɨcꞌajt cötujc yajtzögɨpy paꞌmjäy. Nañ jaduꞌn ni caꞌ ajcxy nidügꞌócɨy jajtcɨxy nej yajnïguéjcɨxɨpy huingbɨ ayuc.
\v 31 Pɨjctzoogɨx cɨxyjot huinɨjot ma Dios je mɨcꞌajt etz je huinmaꞌñ oybɨ. Ɨɨch miich ajcxy nyajnïxɨ̈huɨpy tüg nɨɨꞌaa tüꞌaa jacꞌoybɨ. 
\c 13
\s Je tzojcɨn je oyjäyꞌajtɨn
\p
\v 1 Co ixyipy ngapxyɨch tügꞌócɨy jäy ajcxy yꞌayuc, etz nañ jaduꞌn ngapxɨch ángeles ajcxy yꞌayuc, e caꞌ ndzocyɨch caꞌ njɨhuɨ̈yɨch nmɨgügtɨjcɨch, jaduꞌn yhuimbɨdzɨmy ɨɨch nꞌayuc jaduꞌn nej tüg tambor o tüg platillo huɨdibɨ nɨgoob ooy ñeꞌmy.
\v 2 E co ixyipy najtzcapxɨ̈yɨch Dios yꞌayuc, etz co ixyipy njatyɨch tügꞌócɨy ixpɨjcɨn huɨdibɨ pɨnjaty nejhuɨ̈y etz huɨdibɨ pɨnjaty caꞌ nejhuɨ̈y, etz co ixyipy nmɨjpɨdägyɨch Dios ymɨcꞌajt, ixtɨ jëbɨ nyajpɨdɨ̈gyɨch tüg cop, pen caꞌ ndzocyɨch njɨhuɨ̈yɨch nmɨgügtɨjcɨch, caꞌ ɨɨch ti ndzoohuɨty.
\v 3 E co ixyipy nmoydayɨch ayoobɨtɨjc tügꞌócɨy tijaty nmɨɨdɨch, e nañ co ixyipy ngɨ̈yecyɨch nninɨ̈cx ma jäy ajcxy co huen nöctɨgoydäy, e caꞌ ndzocyɨch njɨhuɨ̈yɨch nmɨgügtɨjcɨch, ni ti oybɨ caꞌ nbadaꞌñɨch.
\p
\v 4 Yɨ jäy ajcxy huɨdibɨ ooy tzocy ooy jɨhuɨ̈y ymɨgügtɨjc, hueꞌ ajcxy ooy mecxtujcɨn mɨɨdɨty, nañ ooy ajcxy yung naxy yjot yhuinmaꞌñ. Nañ caꞌ ajcxy ymɨgüg ti yajcohuindoyii, e nañ caꞌ ajcxy ñaygömayii cɨꞌm.
\v 5 Yɨ mɨbɨjcpɨdɨjc huɨdibɨ ajcxy tzojcp jɨhuɨɨyb ymɨgügtɨjc, caꞌ ajcxy oyñinej ycapxcɨxy, caꞌ ajcxy ycɨꞌm tzojcɨn adzip tungɨxy, nañ ni caꞌ ajcxy yhuindzipɨty, nañ ni caꞌ ajcxy ymɨgüg mɨjotmaꞌtcɨxy.
\v 6 Yɨ mɨbɨjcpɨdɨjc huɨdibɨ ajcxy tzojcp jɨhuɨɨyb ymɨgügtɨjc caꞌ ajcxy yjotcujcɨty co pɨnjaty ytundɨgooy. Jotcujc ajcxy co pɨnjaty tudägy yjäyꞌájtcɨxɨp.
\v 7 Co naychojcɨm nayjɨhuɨɨyɨm, huinꞌit yajtunɨm mecxtujcɨn, huinꞌit nmɨbɨjctayɨm huɨdijaty tɨyꞌajtɨp, huinꞌit nmɨbɨjctaayɨm co tügꞌócɨy tijaty oy yhuimbɨdzɨmɨpy, huinꞌit nmecxtujctayɨm tügꞌócɨy tzaachypɨ ayoꞌn.
\p
\v 8 Yɨ naychojcɨn nayjɨhuɨɨyɨn caꞌ yɨꞌ ycɨxɨpy ytɨgoyɨpy ni mɨna. Minɨp je xɨɨ tiempo ma caꞌ yꞌocyajꞌijxnɨpy yꞌocyajmɨdoonɨpy Dios ycapxy yꞌayuc huɨdi jäy ajcxy ñajtzcapxɨɨygɨxyp, nañ ni ycayajmɨdoohuɨpy pɨn huingbɨ ayuc capxp, ni ycayajtzocy anajty ti dɨyꞌajt.
\v 9 Com caꞌ ycaꞌpxɨty je ixpɨjcɨn huɨdibɨ ɨɨch ajt nmɨɨdꞌajtɨm. Nañ jaduꞌn caꞌ ycaꞌpxɨty je Dios yꞌayuc huɨdibɨ ɨɨch ajt nnajtzcapxɨɨyɨm.
\p
\v 10-11 Per co anajty nmɨɨdꞌajtɨm caꞌpxy Dios yꞌayuc ytɨyꞌajt, chi ycɨxɨpy ytɨgoyɨpy je ayuc huɨdibɨ nmɨɨdꞌajtɨm cham huɨdibɨ caꞌ ycaꞌpxɨty. Co nmutzꞌajtyɨch nbiꞌcꞌanägꞌajtyɨch, jaduꞌn anajty ngapxyɨch nmɨydägyɨch nꞌɨyɨ̈yɨch nejtyɨn piꞌcꞌanäcɨn. Per co oy nmɨjꞌanäcɨɨyñɨch, chi nꞌixmajtznɨch je piꞌcꞌanägꞌatypɨ huinmaꞌñ.
\v 12 Nañ tɨm jaduꞌn nyajnajxɨm jadachambɨ xɨɨ tiempo caꞌ nꞌijxpɨjctaayɨm, caꞌ nhuinjɨhuɨydaayɨm Dios yꞌayuc ytɨyꞌajt. Jaduꞌn nipaady nej jɨhuɨ̈y nayꞌaꞌijxnajxɨm ma tüg ijx, huɨdibɨ tɨ chijxnɨ tɨ yjɨbɨcɨɨyñɨ. Co anajty Jesús yhuimbity jadügꞌoc, huinꞌit huädz nhuinjɨhuɨydaayɨm Dios yꞌayuc ytɨyꞌajt, com naybadaanɨm mɨɨd Jesús ahuin ajɨjp. Jadachambɨ magama nhuinjɨhuɨɨyɨch. Per co nnaybadɨɨybɨch mɨɨd Jesús, huinꞌit nhuinjɨhuɨydähuɨbɨch nej Dios yꞌixpɨjcɨn mɨɨdɨty, tɨm jaduꞌn nej Dios nejhuɨydäy nej ɨɨch nꞌixpɨjcɨn nmɨɨdɨty.
\v 13 Nmɨbɨgaanɨm Cristo huinɨxɨɨ huinɨtiempo, caꞌ nꞌixmadzaanɨm nmɨbɨjcɨn ni mɨna. Nañ njɨjpꞌijxɨm co oybɨ nbadaanɨm ma Dios huinɨxɨɨ huinɨtiempo. Nañ jaduꞌn ndzojcɨm njɨhuɨɨyɨm mɨgügtɨjc huinɨxɨɨ huinɨtiempo. Hueꞌ jac nïgɨ copɨcyɨp co naychojcɨm nayjɨhuɨɨyɨm caꞌydɨ jac ti.
\c 14
\s Co huingbɨ ayuc yajcapxy
\p
\v 1 Naychójcɨgɨxy nayjɨhuɨ́ɨyɨgɨxy miñ xyipy. Mɨjottɨgooygɨxy nej mbaatcɨxy Dios yjɨhuɨꞌñ ymɨcꞌajt canaagnax. Yɨ Dios yjɨhuɨꞌñ ymɨcꞌajt huɨdibɨ jacꞌoybɨ, yɨꞌ jeꞌ yejcpy mɨcꞌajt jaydëbɨ mnajtzcapxɨɨygɨxy Dios yꞌayuc ytɨyꞌajt.
\v 2 Yɨ jäy ajcxy huɨdibɨ Dios ymɨcꞌajt mɨɨd jaydëbɨ capxy huing ayuc, hueꞌ ajcxy ymɨgapxyp Dios, e caꞌ nan jäy, com yɨ jäy ajcxy caꞌ huinjɨhuɨɨygɨxy jeꞌ ajcxy yꞌayuc huɨdibɨ capxp. Je Espíritu Santo yejcp je ayuc ma je huɨdibɨ capxp. Jaduꞌn nipaady nej jɨhuɨ̈y ameech jeꞌ ycapxy.
\v 3 Pɨnjaty najtzcapxɨɨyb Dios ytɨyꞌajt, yɨꞌ ycapxhuäcxyp Dios yꞌayuc ma yɨ jäy ajcxy, jaydëbɨ yujcpedɨpy ajcxy yꞌixpɨjcɨn ma Dios yꞌayuc, nañ jaduꞌn jaydëbɨ ajcxy yjotmɨcpɨgɨpy etz yjotcugɨ́ɨygɨxɨpy.
\v 4 Pɨnjaty capxp huing ayuc, hueꞌ cɨꞌm naybubedyii. Pɨnjaty najtzcapxɨɨyb Dios yꞌayuc ma ycɨꞌm ayuc, hueꞌ ypubejtyp tügꞌócɨy yɨ mɨbɨjcpɨdɨjc.
\p
\v 5 Huaad co ixyipy nidügꞌócɨy miich ajcxy mgapxcɨxy huingbɨ ayuc. Per jac nïgɨ oy co miich ajcxy mnajtzcapxɨɨygɨxy Dios ytɨyꞌajt, caꞌydɨ co mgapxcɨxy huingbɨ ayuc. Pɨnjaty huɨdibɨ najtzcapxɨɨyb Dios yꞌayuc, jac nïgɨ oy tuñ, caꞌydɨ jac pɨnjaty huɨdibɨ capxy huingbɨ ayuc, pen caꞌ pɨnjaty capxtɨ̈cxɨpy je huingbɨ yꞌayuc, jɨgɨx je mɨbɨjcpɨdɨjc jotcujcꞌajtɨn pátcɨxɨp.
\v 6 Mɨgügtɨjc ajcxy, co ixyipy nnɨcxyɨch ma miich ajcxy, e ngapxyɨch ixyipy huingbɨ ayuc, ¿ti oybɨ miich ajcxy mbadamyb ma ɨɨch? Pen caꞌ anajty ti pubejtɨn nduñɨch ma miich ajcxy, pen caꞌ nyajnejhuɨɨygɨxy Dios ytɨyꞌajt jemybɨ, pen caꞌ nyajꞌixpɨjccɨxy Dios ytɨyꞌajt o pen caꞌ nnajtzcapxɨ̈yɨch Dios yꞌayuc, o pen caꞌ nyecyɨch ixpɨjcɨn.
\p
\v 7 Tzoc ocpɨdaacɨm tüg ijxpejt ma je xüxy, jaduꞌn nej je flautɨ o je arpa. Pen caꞌ nmɨdoꞌmbɨjcɨm je nota je tono nidüg nidüg, caꞌ nmɨdoꞌmbɨjcɨm ti pieza ti xüxy yajxuxp o yajcoob.
\v 8 Nañ jaduꞌn co soldados ajcxy chiptunaangɨxy, pen je trompeta caꞌ huädz yxüxy, caꞌ ni tüg soldado ñayñiꞌixɨ̈huaꞌñyii ma je tzip ytunaꞌñyii yjadaꞌñyii.
\v 9 Nañ tɨm jaduꞌn mɨɨd miich ajcxy, pen mgapxcɨxyp huingbɨ ayuc huɨdibɨ caꞌ pɨn huinjɨhuɨ̈y, ¿nej yajnejhuɨ̈huɨpy ti miich anajty mgapxyp? Jaduꞌn jeꞌ anajty yhuimbɨdzɨmnɨ nej nɨgoob mdɨmꞌixmɨydaaccɨxy.
\v 10 Janch co ji yajpaady canaagnax ayuc ya naaxhuiñ ac tɨgachjaty. Etz janch co nidüg nidüg jäy ayuc mɨɨdɨty e cɨꞌm jeꞌ ajcxy huinjɨhuɨɨygɨxy.
\v 11 Per pen caꞌ nhuinjɨhuɨ̈yɨch je ayuc huɨdibɨ jäy xyajmɨgapxpɨch jaduꞌn ɨɨch yɨꞌ nyajnaxyɨch nej agatz. O pen caꞌ, yɨꞌ xyajnajxpɨch nej agatz.
\v 12 Paady miich ajcxy co ooy mnijotꞌajtcɨxy Dios yjɨhuɨꞌñ ymɨcꞌajt canaagnax, yajtungɨx je mɨcꞌajt huɨdibɨ pubedam yɨ mɨbɨjcpɨdɨjc, jɨgɨx yujcpedɨpy ajcxy ymɨbɨjcɨn etz yꞌixpɨjcɨn ma Dios yꞌayuc.
\p
\v 13 Paady pɨnjaty jajtp nej capxɨp huingbɨ ayuc, copɨcy co Dios mɨbɨjctzohuɨpy co mɨcꞌajt ymöhuɨɨb, jaydëbɨ yajnïguejy je ayuc huɨdibɨ ycapxamyb.
\v 14 Pen nmɨbɨjctzooybɨch Dios mɨɨd huingbɨ ayuc, nmɨbɨjctzooybɨch mɨɨd ɨɨch nꞌespíritu, per ɨɨch nhuinmaꞌñ caꞌ ti jäygɨdaacɨn paady.
\v 15 ¿Ti huaad ndunɨpyɨch? Pues copɨcy nmɨbɨjctzooyɨch nꞌojadatyɨch Dios mɨɨd ɨɨch njɨhuɨꞌñɨch, e nañ jaduꞌn nmɨbɨjctzooyɨch mɨɨd ɨɨch nhuinmaꞌñɨch. Nꞌɨɨbadaamyɨch ngapxpadaamyɨch Dios mɨɨd ɨɨch njɨhuɨꞌñɨch etz mɨɨd ɨɨch nhuinmaꞌñɨch.
\v 16 Com pen miich mhuinꞌɨɨgɨxyp mhuingapxtaaccɨxyp Dios mɨɨd yɨ mjɨhuɨꞌñ, je mɨgüg huɨdibɨ amɨdooꞌijtp caꞌ jeꞌ huinjɨhuɨ̈y je huing ayuc huɨdibɨ mgapxyp, e caꞌ jëbɨ ymɨnaꞌnɨp “jaduꞌn jada, Amén.” Com caꞌ yɨꞌ huinjɨhuɨ̈y ti yɨꞌ mgapxyp.
\v 17 Caꞌ yjecyɨty co oyjaty ayuc tɨ myajtuñ co tɨ myajnaxy Dioscojuyip ma Dios, per yɨ mmɨgüg huɨdibɨ caꞌ huinjɨhuɨ̈y miich mꞌayuc caꞌ yɨꞌ ti jäygɨdaacɨn paady.
\v 18 Nyajnajxypɨch Dioscojuyip ma Dios co nïgɨ njatyɨch nej ngápxɨbyɨch huingbɨ ayuc, caꞌydɨ miich ajcxy nidügꞌócɨy.
\v 19 Per co nyajpaadyɨch ma je mɨbɨjcpɨdɨjc tɨ ñayyöymújcɨgɨxy, jacꞌoy co ngapxyɨch mɨgoox ayuc huɨdibɨ mɨbɨjcpɨdɨjc yhuinjɨhuɨɨygɨxyp, caꞌydɨ co ngápxɨbɨch majc mil huingbɨ ayuc huɨdibɨ caꞌ pɨn huinjɨhuɨ̈y.
\p
\v 20 Mɨgügtɨjc ajcxy, caꞌ ajcxy mmɨɨdꞌadɨpy mhuinmaꞌñ, jaduꞌn nej piꞌctɨjc yhuinmaꞌñ mɨɨdɨty. Ma yɨ jɨbɨcpɨ huinmaꞌñ ymiñ naybɨdägɨɨ jaduꞌn nej maꞌxungdɨjc huɨdibɨ caꞌ ti jɨbɨc huinmaꞌñ huinjɨhuɨɨygɨxy. Mɨɨdꞌadɨp miich ajcxy oyjot oyhuinmaꞌñ jaduꞌn nej mɨjꞌanäctɨjc huɨdibɨ yhuinmaꞌñ tɨ ymejtznɨ tɨ ycaꞌpxnɨ.
\v 21 Jaybety yꞌity ma Dios ycötujcɨn necy ma Dios jaduꞌn ymɨnaꞌñ: “Nmɨgapxaamybɨch je may Israel jäy mɨɨd huingbɨ ayuc, e huingbɨ jäy najtzcapxɨ̈huamb ɨɨch nꞌayuc ma yɨꞌ ajcxy, per ni jaduꞌn ajcxy xycatunaꞌñɨch cuendɨ.” Jaduꞌn je Huindzɨn Dios ymɨnaꞌñ.
\v 22 Paady jeꞌ je Dios ymɨcꞌajt huɨdibɨ yajcapxp huingbɨ ayuc, yejcp Dios ymɨcꞌajt ijxpejt ma yɨ jäy ajcxy huɨdibɨ caꞌ mɨbɨjccɨxy Dios. Per je Dios ymɨcꞌajt huɨdibɨ jäy ymɨɨd co najtzcapxɨ̈y Dios ytɨyꞌajt, yejcp ijxpejt ma yɨ mɨbɨjcpɨdɨjc, caꞌ yecy ijxpejt ma yɨꞌ ajcxy huɨdibɨ caꞌ ymɨbɨjccɨxy.
\v 23 Caꞌ yjecyɨty jaduꞌn yjadɨp, co anajty tɨ ñayyöymújcɨgɨxy je mɨbɨjcpɨdɨjc, e nidügꞌócɨy anajty ajcxy ytɨgɨɨygɨxy capxpɨ mɨɨd huingbɨ ayuc huɨdibɨ caꞌ pɨn huinjɨhuɨ̈y, chi ytɨgɨ̈huɨp ma ajcxy ñayyöymugyii nijëjɨty huɨdibɨ caꞌ ymɨbɨjccɨxy. ¿Caꞌ yɨꞌ ajcxy ymɨnáangɨxyɨpy co je mɨbɨjcpɨdɨjc anajty ajcxy tɨ yꞌahuimbijtcɨxy locɨ?
\v 24 Pen nidügꞌócɨy je mɨbɨjcpɨdɨjc ma je nayyöymujctac najtzcapxɨɨygɨxy Dios ytɨyꞌajt mɨɨd ycɨꞌm ayuc, e co ytɨgɨ̈huɨpy pɨnjaty huɨdibɨ caꞌ ymɨbɨcy, e co yɨꞌ mɨdohuɨpy Dios yꞌayuc yjɨhuɨ̈huamyb ypocy. E cɨꞌm huinmayɨp nej anajty tɨ ytundɨgooy mɨɨd Dios co mɨdohuɨpy co nidügꞌócɨy mɨbɨjcpɨdɨjc anajty najtzcapxɨɨygɨxy Dios yꞌayuc.
\v 25 E Dios yꞌayuc yajnejhuɨ̈huɨɨb nej anajty ameech tɨ ytundɨgooy jotjoty huinmaꞌñyjoty. E chi jadaꞌ ycojxtinayꞌɨhuɨ̈huɨpy, e ojadadɨpy Dios, e nañ jaduꞌn ymɨnaꞌnɨp co janch Dios miich ajcxy xymɨɨdꞌijtp.
\s Tungɨxy tügꞌócɨy mɨɨd tudägyꞌajt etz yajxon
\p
\v 26 Mɨgügtɨjc ajcxy, ¿ti huaad mdúngɨxɨpy? Co mnayyöymújcɨgɨxɨpy, nijëjɨty miich ajcxy mhuinꞌixɨpy tüg salmo, tüg ayuc huɨdibɨ yajꞌixpɨgamyb, tüg tɨyꞌajt huɨdibɨ Dios tɨ xyajnejhuɨɨygɨxy, etz capxɨp huingbɨ ayuc, etz capxtɨ̈cxɨpy nej yhuimbɨdzɨmyb je huingbɨ ayuc. Tügꞌócɨy jaduꞌn tungɨx, jaydëbɨ ajcxy jäygɨdägɨpy etz yujcpedɨpy ajcxy ymɨbɨjcɨn huɨdibɨ tɨ ñayyöymújcɨgɨxy.
\v 27 Pɨnjaty capxamb ma je naymujctac mɨɨd huingbɨ ayuc, huen capxy metz o tugɨɨg jäy jeꞌyɨ, e huindüg padüg huen capxcɨxy, caꞌ yꞌanimayɨty. E pɨnjaty capxtɨ̈cxamb jeꞌ jeꞌ yajnïguejɨp nej yhuimbɨdzɨmyb je ayuc tɨɨbɨ capxcɨxy.
\v 28 Pen caꞌ yajpaady ma je nayyöymujctac tüg jäy huɨdibɨ capxtɨ̈cxɨp je huingbɨ ayuc, jacꞌoy co caꞌ ni ti yajcapxɨpy mɨɨd huingbɨ ayuc, jacꞌoy co mɨgapxɨp Dios jotjoty huinmaꞌñyjoty, e caꞌ capxɨp mayjäyjoty.
\v 29 Nañ jaduꞌn mayjäyjoty jëbɨ metz o tugɨɨg jäy najtzcapxɨ̈huɨp Dios ytɨyꞌajt, e yɨ jacjadyii mɨbɨjcpɨdɨjc huɨdibɨ amɨdoꞌijtp, jëbɨ ajcxy huinmay pen janch Dios jeꞌ ytɨyꞌajt huɨdibɨ ajcxy tɨ najtzcapxɨ̈y, o pen caꞌ jeꞌ Dios tɨyꞌajtꞌadyii.
\v 30 Pen jɨm mayjäyjoty jadüg jäy Dios yajnejhuɨ̈yii nej ycapxɨp, nej tɨyꞌajt najtzcapxɨ̈huɨpy, huen je jäy yꞌamonɨpy huɨdibɨ anajty jayɨjp tɨ ytɨgɨ̈y najtxcapxɨɨyɨ Dios yꞌayuc ytɨyꞌajt.
\v 31 Jëbɨ miich ajcxy nidügꞌócɨy mnajtzcapxɨɨygɨxy Dios ytɨyꞌajt huindüg padüg, jaydëbɨ tügꞌócɨy je mɨbɨjcpɨdɨjc ixpɨjccɨxy Dios ytɨyꞌajt, e nañ jaduꞌn jëbɨ nidügꞌócɨy yjotmɨcpɨ́jccɨxɨpy.
\v 32 Copɨcy co yɨꞌ ajcxy huɨdibɨ najtzcapxɨɨyb Dios ytɨyꞌajt, huen ajcxy nayꞌanéꞌmɨgɨx cɨꞌm, e huen capxcɨxy mɨna yꞌahuaatzcɨ̈y.
\v 33 Dios caꞌ xyajmɨdzojcɨm nɨcx nhuinmaꞌñydɨgooyɨm, Dios chojcpy co servicio ndunɨm agujc jotcujc.
\p
\v 34 Jaduꞌn nidügꞌócɨy mɨbɨjcpɨdɨjc ma canaag cajp ymɨnaangɨxy co caꞌ huaad töxyjäydɨjc ycapxcɨxy serviciojoty, com Dios tɨ capxꞌaducy co ajcxy caꞌ ycapxɨpy serviciojoty. Copɨcy co je yëydɨjc ajcxy aneꞌmɨp je servicio, e caꞌ töxyjäydɨjc ajcxy huaad aneꞌmgɨxy je servicio, com jaduꞌn Dios ycötujcɨn ymɨnaꞌñ.
\v 35 Pen ñejhuɨ̈huamyb ajcxy töxyjäydɨjc ti ayuc ti tɨyꞌajt, jëbɨ ajcxy ñiyëydɨjc amɨdoogɨxy co anajty ajcxy yhuimbijtcɨxnɨ ma ytɨjc, com tzoꞌyduꞌn yejcp töxyjäydɨjc ajcxy co ycapxcɨxy serviciojoty.
\p
\v 36 Miich ajcxy hueꞌ mdzachnaybɨdáacɨgɨxy nej jɨhuɨ̈y miich ajcxy jayɨjp tɨm nejhuɨɨygɨxy Dios yꞌayuc, caꞌydɨ jac pɨn. Miich ajcxy mnaybɨdáacɨgɨxy jaduꞌn nej jɨhuɨ̈y jɨmyɨ jaduꞌn yajcapxhuäcxy Dios yꞌayuc, caꞌ yjacmaajɨty.
\v 37 Pen jɨm pɨnjaty ma miich ajcxy huɨdibɨ naybɨdaacɨp nejjɨhuɨ̈y Dios tɨ ymöyii mɨcꞌajt nej jëbɨ najtzcapxɨ̈huɨpy Dios ytɨyꞌajt, o tɨ yhuinmaꞌñymöyii je Espíritu Santo tijaty tɨyꞌajt, hueꞌ copɨcy nañ jaduꞌn yñejhuɨ̈huɨpy co je ayuc huɨdibɨ ɨɨch miich ajcxy nyajnijayɨɨyb, Dios jada yꞌaneꞌmɨn ycötujcɨn.
\v 38 Pɨnjaty jɨm ma miich ajcxy huɨdibɨ caꞌ mɨjpɨdägaꞌñ etz ni caꞌ cöbɨgaꞌñ je ayuc tɨyꞌajt huɨdibɨ Dios tɨ xyajꞌaneꞌmyɨch, Dios caꞌ cöbɨgaꞌñ yɨjaduꞌmbɨ jäy.
\p
\v 39 Com ɨɨch jada ayuc nyajꞌixpɨjcpɨch, paady cham nɨmaaybɨch nmɨgügtɨjcɨch, co huen najtzogɨɨygɨxy nej mnajtzcapxɨɨygɨxy Dios ytɨyꞌajt, e nañ jaduꞌn caꞌ mgapxꞌadújccɨxɨpy yɨꞌ ajcxy huɨdibɨ capxamb huingbɨ ayuc.
\v 40 Hueꞌ janchtɨy tügꞌócɨy tungɨxy yajxon, etz mɨɨd tudägyꞌajt, caꞌ oyñinej mdúngɨxɨpy.
\c 15
\s Co Cristo yjugypɨjcy jadügꞌoc co yꞌoꞌcy
\p
\v 1 Jadügnax, mɨgügtɨjc ajcxy, ndzojcypɨch co miich ajcxy mjäyméjtzcɨxɨpy je Jesucristo yꞌayuc ytɨyꞌajt huɨdibɨ tɨ ngapxhuäcxyɨch ma miich ajcxy. Jeꞌ jeꞌ je ayuc tɨyꞌajt huɨdibɨ miich ajcxy tɨ mgöbɨjccɨxy etz huɨdi ajcxy tudägy mɨbɨjccɨxyp.
\v 2 Jëbɨ ajcxy mꞌalma ñïdzögɨpy, pen mguydumyb ajcxy ɨɨch nꞌayuc huɨdibɨ ngapxhuäcxypɨch, e pen caꞌ anajty tɨ mmɨbɨjccɨxy.
\p
\v 3 Tɨ ngapxnaxyɨch ma miich ajcxy je ayuc huɨdibɨ Dios jayɨjp tɨ xymöyɨch, etz tɨ nyajnɨmaaygɨxy huɨdibɨ jaccopɨcyɨp co Cristo yꞌoꞌcy mɨɨd ajt nbocy ycɨxpɨ, jaduꞌn nej Dios yꞌayuc ymɨnaꞌñ huɨdibɨ jaybety ijtp ma yɨꞌ ñecy.
\v 4 Chi ajcxy yajnaxtɨgɨɨy Jesús, e codugɨɨg xɨɨ yɨꞌ yjugypɨjcy jadügꞌoc jaduꞌn nej Dios yꞌayuc ymɨnaꞌñ huɨdibɨ jaybety ijtp.
\v 5 E co je Cristo yjugypɨjcy, chi ñayguëxɨ̈cɨ jayɨjp ma Pedro, e jacꞌaxam ñayguëxɨ̈cɨ ma yɨ jacjadyii ni majmetzpɨ apóstol ajcxy.
\v 6 Jahueenɨ xɨɨ tiempo yjacnɨcxy co je Cristo oy ñayguëxɨ̈gyii nañ jaduꞌn ma mɨgox nimɨgoꞌpxnaxy mɨbɨjcpɨdɨjc tügpɨ tiempo. E may yɨjaduꞌmbɨ mɨbɨjcpɨdɨjc jacjugyꞌajtnɨ chambaad, etz naagɨty ajcxy tɨ yꞌóꞌccɨxnɨ.
\v 7 Jahueenɨ xɨɨ tiempo yjacnɨcxy co Cristo ñayguëxɨ̈cɨ ma Jacobo, etz nañ jaduꞌn ma nidügꞌócɨy yɨꞌ yꞌapóstol ajcxy.
\p
\v 8 Jac tɨm axam ñayguëxɨ̈cɨ je Cristo nañ jaduꞌn ma ɨɨch. Jacjayɨjp Jesús huinꞌijxy yɨ jacjadyii apóstol ajcxy, etz jacꞌaxam ɨɨch xyhuinꞌijxyɨch. Jaduꞌn ɨɨch nipaady nej tüg jäy huɨdibɨ ooy tɨ nïnajxnɨ je tiempo co tɨ ymaꞌxungꞌaty.
\v 9 Jaccapxpaady yɨ jacjadyii Jesús yꞌapóstol ajcxy caꞌydɨ ɨɨch. Nañ jaduꞌn ni caꞌ ɨɨch xypaady co jäy ajcxy xytíjɨbɨch Jesús yꞌapóstol, mɨɨd co ooy tɨ nꞌixhuɨdityɨch tɨ nbahuɨdityɨch Dios yjäy ajcxy.
\v 10 Ɨɨch njeꞌajtpɨch nej njeꞌatyɨch mɨɨd co Dios mayꞌajt mɨɨd ɨɨch tuñ. Je mɨjmayꞌajt je mɨjꞌoyꞌajt huɨdibɨ Dios tɨ tuñ mɨɨd ɨɨch, caꞌ ñaadɨgɨ̈ꞌaty, tɨ yꞌoybɨdzɨmyb. Nïgɨ mɨctägy tɨ nduñɨch ma Dios ytung, caꞌydɨ jacpɨnjaty. Caꞌ nan co ɨɨch ndzachmadägyɨch ma Dios ytung. Hueꞌ Dios oy xymɨɨdꞌityɨch, etz ooy mayꞌajt tuñ mɨɨd ɨɨch.
\v 11 Paady pen tɨ miich ajcxy mbaady Dios ytɨyꞌajt ma ɨɨch, o ma yɨ jacjadyii apóstol ajcxy, caꞌ ñejɨty. Jeꞌ jeꞌ je Cristo yꞌayuc huɨdibɨ ɨɨch ajcxy ngapxhuäcxypɨch, e nañ Cristo yɨꞌ yꞌayuc tɨɨbɨ mmɨbɨjccɨxy.
\s Co öcypɨ ajcxy yjugypɨgɨpy ajcxy jadügꞌoc
\p
\v 12 Per pen ɨɨch ajcxy ayuc ngapxhuäcxpɨch co je Cristo yjugypɨjcy jadügꞌoc co yꞌoꞌcy, ¿naꞌamy co nijëjɨty miich ajcxy mɨnaangɨxy co yɨ jäy ajcxy tɨɨbɨ yꞌoꞌccɨxy caꞌ ajcxy yjugypɨgaangɨxy jadügꞌoc?
\v 13 Pues pen janch caꞌ yjugypɨgaangɨxy tɨɨbɨ yꞌoꞌcy, nañ jaduꞌn ni Cristo caꞌ ycayjugypɨjcy jadügꞌoc.
\v 14 Co ixyipy yjanchɨty co Cristo caꞌ yjugypɨjcy, nañ tɨm jaduꞌn je ayuc huɨdibɨ ngapxhuäcxypɨch caꞌ ti mɨcꞌajt ixyipy mɨɨdɨty. E nañ jaduꞌn miich ajcxy mmɨbɨjcɨn caꞌ ixyipy chobaady.
\v 15 Pen tɨyꞌajt ixyipy co je öcpɨ caꞌ yjugypɨgaangɨxy, huinꞌit je Dios yꞌayuc huɨdibɨ ngapxhuäcxpɨch ixyipy yhuimbɨdzɨmyb anɨɨ. Com ngapxhuäcxpɨch co Dios yajjugypɨjcy Cristo co yꞌoꞌcy, paady pen tɨyꞌajt ixyipy co pɨnjaty tɨɨbɨ yꞌoꞌccɨxy caꞌ yjugypɨjcy. Nañ jaduꞌn ixyipy caꞌ ytɨyꞌajtɨty co Dios yjugypɨjcy Cristo.
\v 16 Pen je öcpɨdɨjc ajcxy caꞌ jugypɨjccɨxy etz caꞌ ajcxy yjugypɨgaangɨxy jadügꞌoc, nañ jaduꞌn ni je Cristo caꞌ ycajugypɨjcy jadügꞌoc co yꞌoꞌcy.
\v 17 Co je Cristo caꞌ ycayjugypɨjcy jadügꞌoc co yꞌoꞌcy, chi miich ajcxy mmɨbɨjcɨn ixyipy caꞌ choobaady. E caꞌ miich ixyipy ajcxy Dios mbocy xyhuinmecxɨ.
\v 18 E pen janch tɨyꞌajt ixyipy co je Cristo caꞌ ycajugypɨjcy, huinꞌit je mɨbɨjcpɨdɨjc tɨɨbɨ yꞌoꞌccɨxy tɨgoyaangɨxy yꞌalma.
\v 19 Pen janch tɨyꞌajt ixyipy co nmɨbɨjcɨm Cristo jëyɨ ma jadachambɨ tzɨnaayɨn ya naaxhuiñ, caꞌ jac ni ti ixyipy njɨjpꞌijxɨm co nꞌoꞌcɨm. Jaduꞌn ɨɨch ajt nipaady nej locɨjäy, e jäy ajcxy nïgɨ xyñɨxiicɨm xyajxiicɨm, caꞌydɨ jac ni pɨn.
\p
\v 20 Per janch co Cristo yjugypɨjcy jadügꞌoc co yꞌoꞌcy, je Cristo yɨꞌ jeꞌ je jayɨjp jäy huɨdibɨ jugypɨjc jadügꞌoc. Co je Cristo yjugypɨjcy, chi ñɨcxy jadügꞌoc ma Dios yajpaady, e nañ jaduꞌn mɨɨd yɨꞌ ycɨxpɨ mayjäy yjugypɨgaꞌñ ajcxy co anajty tɨ yꞌöccɨxy, e yñɨcxaangɨxy ma Dios yajpaady.
\v 21 Com mɨɨd tüg jäy, je Adán, chondacy yɨ oꞌcɨn ya naaxhuiñ. Nañ tɨm jaduꞌn mɨɨd tüg jäy, je Cristo, chondacy je jugypɨjcɨn co jäy yꞌoꞌccɨxy.
\v 22 Mɨɨd jada ycɨxpɨ co Adán ytundɨgooy ogaꞌn, paady nidügꞌócɨy jäy patcɨxy yɨ oꞌcɨn. Mɨɨd jada ycɨxpɨ co Cristo yjugypɨjcy jadügꞌoc co yꞌoꞌcy, paady nidügꞌócɨy jäy ajcxy yjugypɨgaangɨxy jadügꞌoc co anajty tɨ yꞌöccɨxy.
\v 23 Nidüg nidüg jäy yjugypɨgaꞌñ jadügꞌoc jaduꞌn nej anajty ñigueegɨ̈yii. Cristo tɨ yjayɨjpꞌaty co yjugypɨjcy. Tügꞌócɨy yɨ jacjadyii jäy ajcxy huɨdibɨ mɨjnɨcxpejtcɨxp Cristo, yɨꞌ ajcxy jugypɨgamb jadügꞌoc co anajty Cristo yhuimbity ya naaxhuiñ.
\v 24 Co anajty je Cristo yhuimbity ya naaxhuiñ, chi ycɨxɨpy ytɨgoyɨpy je naaxhuiñybɨ. Cristo yajtɨgoyamyb tügꞌócɨy naaxhuiñyjäy yꞌaneꞌmɨn, tügꞌócɨy naaxhuiñyjäy ycötujcɨn, etz tügꞌócɨy naaxhuiñyjäy ymɨcꞌajt. Jesucristo ypɨjctähuaanɨp tügꞌócɨy naaxhuiñyjäy ajcxy yꞌaneꞌmɨn, e pɨdactähuɨpy ma Dios yꞌaneꞌmɨn, e Dios Teedy jeꞌ jeꞌajttähuɨɨb.
\v 25 E tɨm copɨcy co je Cristo yꞌaneꞌmdähuamyb tügꞌócɨy, ixtɨ coonɨ Dios anajty tɨ mɨmadactäy tügꞌócɨy Cristo ymɨdzip, e tɨ pɨdactäy anajty ma Cristo yꞌaneꞌmɨn.
\v 26 Jesús yajcɨxamyb yajtɨgoyamyb jacꞌaxam je oꞌcɨn, caꞌ ni pɨn yjacꞌöcnɨpy.
\v 27 Com Dios ymɨmadactähuɨp tügꞌócɨy je Cristo ymɨdzip, e pɨdactähuɨp ma je Cristo yꞌaneꞌmɨn. Per co Dios yꞌayuc huɨdibɨ jaybety ijtp ymɨnaꞌñ co je Cristo tɨ mɨmadactäy tügꞌócɨy, caꞌ nan hueꞌ jeꞌ yajhuinjɨhuɨ̈y co Cristo tɨ mɨmadägy Dios. Com Dios yɨꞌ jeꞌ huɨdibɨ tɨ mɨmadactäy, e tɨ pɨdactäy ma Cristo yꞌaneꞌmɨn.
\v 28 Co anajty Dios mɨmadactay tügꞌócɨy pɨnjaty etz tijaty huɨdibɨ mɨcꞌajt mɨɨd, e co anajty pɨdactay ma je Cristo yꞌaneꞌmɨn, chi je Dios yꞌung ypɨdactähuɨpy yɨꞌ yꞌaneꞌmɨn ma Dios Teedy, etz aneꞌmy yhuɨꞌmaꞌñ ma Dios Teedy, je huɨdibɨ anajty tɨ mɨmadactay. Jaduꞌn Jesucristo tunaꞌñ, jɨgɨx jëbɨ Dios mɨɨdꞌajttäy tügꞌócɨy mɨcꞌajt etz aneꞌmꞌajt.
\p
\v 29 Pen caꞌ yjaduꞌnɨty, ¿naꞌamy co mdzachnɨɨbejtcɨxy co öcpɨ tzachcodɨnaaygɨxy? Co ixyipy caꞌ pɨn yjugypɨgaꞌñ jadügꞌoc co anajty tɨ yꞌoꞌcy, ¿naꞌamy co jäy ñɨɨbejtcɨxy mɨɨd öcpɨ ycɨxpɨ?
\p
\v 30 ¿E ti ycɨxpɨ co ɨɨch ajcxy nyajpatcɨxy ayoꞌnduum jabom jabom? 
\v 31 Mɨgügtɨjc ajcxy, janch janch ɨɨch miich ajcxy nɨmaaygɨxy co ooy njäygɨdägyɨch miich ajcxy. Mɨɨd co mmɨbɨjccɨxy je nHuindzɨn Jesucristo, paady ycɨxpɨ ɨɨch miich ajcxy nɨmaaygɨxy co jabom jabom nyajpaadyɨch öcjɨjpꞌam.
\v 32 Mɨnaambɨch jaduꞌn co ooy nhuindɨnäy njɨjptɨnäyɨch nmɨdzip ya Efeso. Tɨm jaduꞌn nipaady nej jɨbɨc ɨyujc ahuaꞌn ɨyujc nhuindɨnäy njɨjptɨnäyɨch. Pen caꞌ yjanchɨty co yɨ öcpɨ ajcxy yjugypɨgɨpy jadügꞌoc, naadɨgɨ̈ꞌajtp ixyipy co ɨɨch ayoꞌn jabom jabom nhuindɨnäy njɨjptɨnäyɨch. Nïg oy co ixyipy nyajtüyöyɨm jaduꞌn nej ayuc yꞌityɨn: “Tzoc caayɨm uucɨm, agujcꞌajtɨm jotcujcꞌajtɨm, com jabom huɨxtɨc njugyꞌajtɨn ycɨxaanɨm mɨɨd yɨ oꞌcɨn.”
\p
\v 33 Caꞌ mnayyéjcɨgɨxy co pɨnjaty xyhuinꞌɨ́ɨngɨxɨpy. Jaduꞌn yjadɨpy nej yꞌayuc yꞌityɨn: “Yɨ mɨgügtɨjc ajcxy huɨdibɨ jɨbɨcjot jɨbɨc-huinmaꞌñ mɨɨd, yajtɨgooyb ajcxy je oyjot oyhuinmaꞌñ.”
\v 34 Ixmajtzcɨx jɨbɨcjot jɨbɨc-huinmaꞌñ etz tzɨnaaygɨx tudägy caꞌ mbocytungɨxy. Nijëjɨty miich ajcxy caꞌ mnejhuɨɨygɨxy Dios ytɨyꞌajt. Jaduꞌn nmɨnaꞌñɨch, jɨgɨx ajcxy mdzoꞌyduꞌn mjɨhuɨ́ɨygɨxɨpy.
\s Nej ajcxy yɨ ögypɨ yjugypɨgɨpy ajcxy jadügꞌoc
\p
\v 35 Ycadɨmjecyɨty co nijëjɨty miich ajcxy xyꞌamɨdohuɨpyɨch: “¿Ma mɨcꞌajt pátcɨxɨpy je oꞌcpɨ ajcxy co jëbɨ yjugypɨjccɨxy jadügꞌoc? ¿Huɨdibɨ ninïcx ajcxy ymɨꞌidamyb?”
\v 36 Caꞌ miich ajcxy ti mhuinjɨhuɨɨygɨxy. Caꞌ mnejhuɨɨygɨxy co je moc tɨɨm huɨdibɨ mniipcɨxyp caꞌ ymuxaꞌñ ixtɨ coonɨ anajty jayɨjp tɨ ypüch.
\v 37 Caꞌ miich ajcxy mniipcɨxy je mocquipy. Hueꞌ miich ajcxy mniipcɨxyp je tɨɨmmoc o jacjadyii huingbɨ tɨɨm.
\v 38 E co je tɨɨm ymuxy, chi Dios möy je ñinïcx, tɨm jaduꞌn nej Dios jayɨjp tɨ huinmay tɨ tzocy. E Dios nijeꞌ nijeꞌ je tɨɨm möy je ñinïcx tɨgachjaty.
\v 39 Canaagnax ninïcx yajpaady ya naaxhuiñ, caꞌ ajcxy ytügnaxɨty. Tɨgach yɨ jäy ajcxy mɨɨdɨty ñinïcx, tɨgachjaty ɨyujc ajcxy mɨɨdɨty ñinïcx, nañ tɨgachjaty joon ajcxy mɨɨdɨty ñinïcx, e nañ jaduꞌn tɨgachjaty acx ajcxy mɨɨdɨty ñinïcx.
\v 40 Yɨ tzajpjoty tzɨnaayb ajcxy tɨgachjaty mɨɨdɨty ñinïcx, nañ jaduꞌn huɨdibɨ ajcxy tzɨnaayb naaxhuiñ tɨgachjaty mɨɨdɨty ñinïcx. Yɨ tzajpjoty tzɨnaayb ajcxy ñinïcx mɨɨd tɨgachjaty yꞌoyꞌajtɨn, caꞌydɨ jaduꞌn nej yɨ naaxhuiñ tzɨnaayb ajcxy yꞌoyꞌajtɨn.
\v 41 Yɨ xɨɨ ytɨɨcxɨn yjajɨn caꞌ ñaybadyii mɨɨd poꞌ ytɨɨcxɨn yjajɨn, nañ tɨm jaduꞌn je poꞌ ytɨɨcxɨn yjajɨn caꞌ ñaybadyii mɨɨd madzaꞌ ytɨɨcxɨn yjajɨn. Etz nijeꞌ nijeꞌ madzaꞌ mɨɨdɨty ytɨɨcxɨn caꞌ ñaybadyii mɨɨd jacjadyii madzaꞌ ytɨɨcxɨn yjajɨn.
\v 42 Nañ tɨm jaduꞌn yjadaꞌñ mɨɨd yɨ jäy ajcxy tɨɨbɨ yꞌoꞌccɨxy co ajcxy yjugypɨjccɨxy jadügꞌoc. Jäy ajcxy yajnaxtɨgɨy je öcpɨ naaxnïcx huɨdibɨ yhuindɨgooyɨpy, e yjugypɨgɨpy jadügꞌoc mɨɨd tüg ñinïcx jemybɨ huɨdibɨ caꞌ yhuindɨgoyaꞌñ nimɨna.
\v 43 Je öcpɨ ñaaxnïcx co ñaaxtɨgɨ̈y, caꞌ ti oyꞌajtɨn mɨɨdɨty, e co yjugypɨjcnɨ jadügꞌoc ymɨɨd yꞌoyꞌajtɨn. Je öcpɨ ñaaxnïcx co ñaxtɨgɨ̈y, caꞌ ti mɨcꞌajt mɨɨdɨty e chi yjugypɨjcnɨp mɨcꞌajt mɨɨd.
\v 44 Co je öcpɨ ñaaxtɨgɨɨy, hueꞌ yjugypɨjcnɨ, mɨɨd jemybɨ ninïcx caꞌp yajꞌixy. Pen ji yajpaady ninïcx huɨdibɨ Dios tɨ yajcojy mɨɨd naax, nañ tɨm jaduꞌn ji yajpaady ninïcx huɨdibɨ Dios yajcojpy mɨɨd yjɨhuɨꞌñ ymɨcꞌajt caꞌp yajꞌixy.
\p
\v 45 Jaduꞌn jaybety yꞌity ma Dios ñecy ma jaduꞌn ymɨnaꞌñ: “Je jayɨjp Adán ymɨɨd anajty jugyꞌajtɨn.” Je axambɨ Adán (jeꞌ jeꞌ je Cristo) jeꞌ tüg espíritu huɨdibɨ jugyꞌajt yejcp.
\v 46 Je huɨdibɨ Dios yjɨhuɨꞌñ ymɨcꞌajt mɨɨd caꞌ jeꞌ yjayɨjpꞌajty, jeꞌ jayɨjpꞌajt huɨdi Dios yajcoj mɨɨd naax; jacꞌaxam jeꞌ huɨdibɨ Dios yjɨhuɨꞌñ ymɨcꞌajt mɨɨd, jeꞌ jeꞌ je Cristo.
\v 47 Je jayɨjpɨ jäy huɨdibɨ Dios yajꞌoyɨɨy, hueꞌ jeꞌ yajꞌoyɨy mɨɨd naax (e yajpaady ya naaxhuiñ). Je mɨmetzpɨ jäy huɨdibɨ Dios yajꞌoyɨy, ɨɨch ajt nHuindzɨn Jesucristo, hueꞌ jeꞌ chooñ tzajpjoty.
\v 48 Je jäy ajcxy huɨdibɨ tzɨnaayb ya naaxhuiñ, yɨꞌ ajcxy ñinïcx túꞌcɨy ñaybadyii mɨɨd Adán ñinïcx huɨdibɨ Dios yajꞌoyɨɨy mɨɨd naax. Yɨ jäy ajcxy huɨdibɨ tzɨnähuamb tzajpjoty, hueꞌ ajcxy ñinïcx túꞌcɨy ñaybadaꞌñyii mɨɨd je Cristo ñinïcx huɨdibɨ tzɨnaayb tzajpjoty.
\v 49 Jaduꞌn nej ɨɨch ajt, tügnax nguëxɨ̈cɨm mɨɨd Adán huɨdibɨ Dios yajꞌoyɨy mɨɨd naax. Nañ tɨm jaduꞌn tügnax nguëxɨ̈gaanɨm mɨɨd je Cristo huɨdibɨ tzɨnaayb tzajpjoty.
\p
\v 50 Mɨgügtɨjc ajcxy, hueꞌ nnɨmähuaangɨxy co je ninïcx huɨdibɨ mɨɨd yxixy etz yñɨꞌpy caꞌ yɨꞌ yꞌidaꞌñ ma Dios yꞌaneꞌmy. Je ninïcx huɨdibɨ cɨxamb tɨgoyamb caꞌ padaꞌñ it lugar ma yɨ ñinïcx ajcxy ity huɨdibɨ caꞌ ycɨxaꞌñ ytɨgoyaꞌñ.
\v 51 Tungɨx cuendɨ jada ayuc, nyajꞌixpɨgaamybɨch miich ajcxy tüg tɨyꞌajt huɨdibɨ caꞌ pɨn huinjɨhuɨ̈y. Caꞌ nan nidügꞌócɨy ɨɨch ajt nꞌögaanɨm, per nidügꞌócɨy ɨɨch ajt Dios nninïcx xyajtɨgadzaanɨm.
\v 52 Co anajty Dios yajxüxy yɨꞌ ytrompeta, je huɨdibɨ anajty cogɨxɨɨyñɨp, chi cɨxɨpy je naaxhuiñybɨ. Chi Dios xyajtɨgadzaanɨm ajt nninïcx tɨm tzojcyɨ, tɨm tüg jaxɨ̈gy tüg huinmïpxy. Dios yajxüxamyb yɨꞌ ytrompeta, e je jäy tɨɨbɨ ajcxy yꞌöccɨxy jugypɨgɨp ajcxy jadügꞌoc, e ni ca mɨna ajcxy yꞌöccɨxnɨpy. E ɨɨch ajt huɨdibɨ jacjugyꞌajtnɨ Dios ɨɨch ajt xyajtɨgadzáanɨm nninïcx.
\v 53 Com ɨɨch ajt nninïcx huɨdibɨ ögam, huɨdibɨ huen tɨgoyamb, copɨcy ytɨgadzip, e nmɨɨdꞌadaanɨm ninïcx huɨdibɨ caꞌ ögaꞌñ caꞌ yhuindɨgoyaꞌñ.
\v 54 Co anajty ytɨgajtzɨm ajt nninïcx huɨdibɨ cɨxamb huindɨgoyamb, nmɨɨdꞌajtɨm anajty jemybɨ ninïcx huɨdibɨ caꞌ ycɨxaꞌñ yhuindɨgoyaꞌñ nimɨna. Co anajty ytɨgajtzɨm ajt nninïcx huɨdibɨ ögam, e nmɨɨdꞌajtɨm jemybɨ ninïcx huɨdibɨ caꞌ yꞌögaꞌñ, huinꞌit cuydunɨpy Dios yꞌayuc huɨdibɨ jaybety ijtp huɨdibɨ jaduꞌn ymɨnamb: “Co anajty ajt nHuindzɨn Dios mɨmadägy yɨ oꞌcɨn, huinꞌit cödɨgooyñɨp je oꞌcɨn (caꞌ jacpɨn yꞌocꞌoꞌcnɨp).
\v 55 ¿Ma yɨ oꞌcɨn ocjacpadaꞌñ mɨcꞌajt co tijy xyꞌocjactzaachytunaanɨm? ¿Ma yɨ oꞌcɨn ocjacpadaꞌñ mɨcꞌajt co tijy xyꞌocmɨmadägaanɨm?”
\v 56 Mɨɨd co tɨ ndundɨgooyɨm, paady ycɨxp oꞌcɨn nbaatɨm. Mɨɨd co caꞌ tɨ nguydundaayɨm Dios ycötujcɨn, paady ycɨxp oꞌcɨn nbaatɨm.
\v 57 Per nyajnajxɨm Dioscojuyip ma Dios co mɨjmayꞌajt tɨ tuuñ mɨɨd ɨɨch ajt ycɨxpɨ, e tɨ nmɨmadaacɨm yɨ oꞌcɨn co ajt nHuindzɨn Jesucristo yꞌoꞌcy mɨɨd ajt nbocy ycɨxpɨ.
\p
\v 58 Paady ycɨxp, miich ajcxy mɨgügtɨjc huɨdibɨ ooy ndzocy njɨhuɨ̈yɨch tɨydudägy mmɨbɨjccɨx, caꞌ mꞌixtɨgɨ̈huäccɨxy ma mmɨbɨjcɨn, caꞌ mꞌixmajtzcɨxy yɨ mmɨbɨjcɨn, caꞌ ajcxy mjotmetzcɨɨygɨxy. Tungɨx jabom jabom ma Dios ytung agujc jotcujc, com mnejhuɨɨygɨxyp co caꞌ ñaadɨgɨ̈ꞌaty ajcxy mdung ma ajt nHuindzɨn Jesucristo ytung.
\c 16
\s Je cuejtɨn mɨɨd je hermano ajcxy ycɨxpɨ
\p
\v 1 Jaduꞌn nej ymiñ yɨ meeñ huɨdibɨ miich ajcxy myajmujccɨxyp mɨɨd je mɨbɨjcpɨdɨjc ycɨxpɨ huɨdibɨ jɨm Jerusalén. Cuydungɨx je tɨyꞌajt huɨdibɨ tɨ nyajꞌanéꞌmgɨxyɨch yɨ mɨbɨjcpɨdɨjc huɨdibɨ canaagpɨcy yajpatp jɨm Galacia.
\v 2 Naag naag domingo, je jayɨjpɨ xɨɨ ma je semana yꞌixtɨgɨ̈y nidüg nidüg miich ajcxy mbɨdägɨp abɨcy hueenɨ piꞌcmeeñ, jaduꞌn nej anajty ii tɨ mbaatcɨxy. Je piꞌcmeeñ huɨdibɨ anajty tɨ myajmujccɨxy mgüendꞌájtcɨxɨpy ooy, jɨgɨx co ɨɨch jɨm njädɨp ma miich ajcxy, caꞌ ycopɨcyɨty meeñ myajmújcɨxɨpy.
\v 3 E co anajty jɨm nmechɨch ma miich ajcxy, miich ajcxy myajnïbɨgɨpy nijëjɨty mɨgügtɨjc huɨdibɨ nɨcxɨp jɨm Jerusalén. E ɨɨch nguexɨpyɨch jada mɨgügtɨjc jɨm Jerusalén mɨɨd tüg necy etz mɨɨd je meeñ huɨdibɨ anajty miich ajcxy tɨ myajmujccɨxy, jaydëbɨ yajcɨ̈dɨgɨ̈huɨp je mɨbɨjcpɨdɨjc jɨm Jerusalén.
\v 4 E pen ooy ytɨmycopɨcyɨty co ɨɨch nañ jaduꞌn nnɨ́cxɨbɨch jɨm Jerusalén, jëbɨ ajcxy ñɨcxy mɨɨd ɨɨch.
\s Pablo huinmay co nɨcxaꞌñ Macedonia
\p
\v 5 Co anajty ndübɨcyɨch nnɨcxaambɨch ma miich ajcxy, jayɨjp naxɨ̈huaꞌñɨch Macedonia naaxjot, com copɨcy jɨm Macedonia naxɨ̈huaꞌñɨch.
\v 6 Caꞌ jecyɨty co nɨcxy nhuɨꞌmyɨch ma miich ajcxy jecy jecy. Caꞌ yjecyɨty co nyajnaxɨpyɨch tügꞌócɨy je tɨchypoj tiempo mɨɨd miich ajcxy. Co anajty ndzooñɨch jadügꞌoc ma miich ajcxy, nnɨ́cxyɨch anajty muumjaty, miich ajcxy xytüjɨjphuohuɨ̈huɨbɨch ma ɨɨch anajty nnɨcxaꞌñɨch.
\v 7 Caꞌ nan tzojccɨ́xy nꞌidaꞌñɨch mɨɨd miich ajcxy, hueꞌ jatytimy huäcxɨbaambɨch ma miich ajcxy jecy jecy, pen ɨɨch ajt nHuindzɨn Jesús jaduꞌn tzojcp.
\v 8 Per njac-huäcxɨbaambɨch ya Efeso ixtɨ coonɨ Pentecostés xɨɨ anajty tɨ ñajxtäy.
\v 9 Com nmɨɨdɨch it lugar ya ma jëbɨ ngapxhuäcxyɨch Cristo yꞌayuc, e mayjäy huɨdibɨ mɨjpɨdacp ɨɨch nꞌayuc, nañ jaduꞌn mayjäy ya ooy mɨdzipꞌaty Jesucristo yꞌayuc ytɨyꞌajt.
\p
\v 10 Co Timoteo anajty yjädy ma miich ajcxy, tungɨxy mayꞌajt mgöbɨ́jccɨxɨpy agujc jotcujc caꞌ ti mhuinmaaygɨxy, com Timoteo tumb ma ajt nHuindzɨn Jesucristo ytung tɨm jaduꞌn nej ɨɨch nduñɨch.
\v 11 Paady ycɨxp caꞌ huaad miich ajcxy Timoteo mgaꞌoyꞌixɨpy etz mdüjɨjphuohuɨ̈huɨpy, jaydëbɨ caꞌ ti jotmay mɨɨdꞌadɨpy etz yjactüyöyɨp agujc jotcujc, e ymedzɨpy ya Efeso ma nyajpaadyɨch. Com njɨjpꞌijxypɨch co Timoteo xyñijädɨbɨch quipxyɨ mɨɨd jacjadyii mɨbɨjcpɨdɨjc.
\p
\v 12 Jaduꞌn nej yjajtɨ mɨɨd ajt nmɨgüg Apolos. Mayꞌajt nbɨjctzoohuɨch ma Apolos co yɨꞌ mɨɨdnɨcxɨp nijëjɨty jacjadyii mɨgügtɨjc huɨdibɨ nɨcxamb ma miich ajcxy. Per caꞌ yɨꞌ yjotcujcɨty co ñɨcxɨp jadachambɨ tiempo. Hueꞌ janchtɨy jacjiinɨ yñɨcxɨpy, pen yajꞌahuätzcɨɨyb anajty.
\s Capxpocxɨn huɨdibɨ cɨjxnɨp je necy
\p
\v 13 Niꞌixɨ̈ mꞌidɨpy ajcxy ma mmɨbɨjcɨn. Naygüendꞌájtɨgɨx ma mmɨbɨjcɨn. Tɨydudägy ajcxy mmɨbɨgɨpy, caꞌ mꞌixtɨgɨ̈huäccɨxy ma mmɨbɨjcɨn. Naybɨdáacɨgɨx huinmɨc jotmɨc ma mhuinmaꞌñ. Mɨc mꞌidɨpy ajcxy ma mmɨbɨjcɨn.
\v 14 Tügꞌócɨy tijaty ajcxy mdungɨxy, tungɨxp mɨɨd tzojcɨn jɨhuɨɨyɨn etz oyjäyꞌajtɨn.
\p
\v 15 Mɨgügtɨjc ajcxy, mnejhuɨɨyb jaduꞌn nej Estéfanas mɨɨd yjugymɨgüg tɨ mɨbɨjccɨxy Jesucristo yꞌayuc. Yɨꞌ jeꞌ jayɨjp ajcxy mɨbɨjcp jɨm Acaya, e tɨ yhuinmaꞌñypɨdaaccɨxy co ypubedamyb ajcxy yɨ mɨbɨjcpɨdɨjc.
\v 16 Mayꞌajt nbɨjctzooybɨch ma miich ajcxy co myajmijꞌájtcɨxɨpy Estéfanas, etz jac pɨnjaty huɨdibɨ pubejtp je mɨbɨjcpɨdɨjc etz huɨdibɨ ajcxy tumb Dios ytung.
\v 17 Ooy njotcújcɨdyɨch co Estéfanas, Fortunato, etz Acaico tɨ ymiñ ma ɨɨch ajcxy ya Efeso. Yɨꞌ ajcxy xymɨɨdꞌijtpɨch, com caꞌ anajty yꞌoyɨ̈y nej nmɨɨdꞌidɨpyɨch miich ajcxy.
\v 18 E yɨꞌ ajcxy tɨ ooy xyajjotcugɨ̈yɨch, e nañ jaduꞌn miich ajcxy tɨ mjotcugɨɨygɨxy co yɨꞌ ajcxy ymiñ ma ɨɨch. Paady ycɨxp copɨcy co miich ajcxy myajmɨjꞌadɨp yɨꞌ ajcxy etz jacjadyii tɨm jaduꞌn nej yɨꞌ ajcxy.
\p
\v 19 Yɨ mɨbɨjcpɨdɨjc huɨdibɨ canaagpɨcy ya Asia naaxjot yquejxyp ajcxy capxpoocxɨn ma miich ajcxy. Aquila etz Priscila etz yɨ mɨbɨjcpɨdɨjc huɨdibɨ ajcxy yöymujcɨp ma Aquila ytɨjc yquejxp ajcxy capxpoocxɨn ma miich ajcxy ma ajt nHuindzin Jesucristo yxɨɨ.
\v 20 Tügꞌócɨy je mɨbɨjcpɨdɨjc huɨdibɨ ya Efeso yquejxp ajcxy capxpoocxɨn ma miich ajcxy. Naygapxpóocxɨgɨxy miich ajcxy xïc xon.
\p
\v 21 Ɨɨch, Pablo, njaaybɨch mɨɨd ngɨꞌmgɨꞌ ngɨꞌmletra jada capxpoocxɨn huɨdibɨ nguejxypɨch ma miich ajcxy.
\v 22 Pen jɨm pɨnjaty caꞌ mɨjpɨdägy ɨɨch ajt nHuindzɨn Jesucristo, huen Dios yajtɨgooyɨp ajcxy yꞌalma. ¡Maranata! Huen tzojc yminɨpy ajt nHuindzɨn Jesucristo.
\p
\v 23 Huen ajt nHuindzɨn Jesucristo oyꞌajt mayꞌajt tunɨpy mɨɨd miich ajcxy etz xyconuucxɨp ajcxy.
\v 24 Ndzojcypɨch njɨhuɨɨybɨch miich ajcxy nidügꞌócɨy huɨdibɨ yajpaady ma Jesucristo. Jaduꞌn jada. Amén.