\id 2CO
\h 2 CORINTIOS
\toc1 2 CORINTIOS
\mt1 2 CORINTIOS
\mt2 Yɨ Mɨmetz Necy Huɨdibɨ San Pablo Yajniguejx Je Mɨbɨjcpɨdɨjc Jɨm Corinto
\c 1
\p
\v 1 Ɨɨch Pablo, Dios jaduꞌn tɨ tzocy, paady ycɨxpɨ Jesucristo tɨ xyajnïbɨcyɨch co ngapxhuäcxɨbɨch yɨꞌ yꞌayuc. Ɨɨch mɨɨd ajt nmɨgüg Timoteo nguejxypɨch jada necy ma je mɨbɨjcpɨdɨjc jɨm Corinto. Nañ jaduꞌn nguejxypɨch jada necy ma tügꞌócɨy je mɨbɨjcpɨdɨjc majaty je cajp huɨdibɨ yajpatp jɨm Acaya ñaaxjot.
\v 2 Huen Dios Teedy etz ɨɨch ajt nHuindzɨn Jesucristo mayꞌajt oyꞌajt tunɨpy mɨɨd miich ajcxy etz xyajjotcugɨ́ɨygɨxɨp.
\s Nej Pablo yjajty yꞌayoy
\p
\v 3 Tzoc yajnajxɨm Dioscojuyip ma Dios, je nHuindzɨn Jesucristo yTeedy, je Dios Teedy huɨdibɨ ajt xypaꞌayoohuɨm, je Dios huɨdibɨ yejcp jotcujcꞌajtɨn.
\v 4 Dios xyajjotcugɨɨyɨm co nmɨnajxɨm nyajnajxɨm tzaachypɨ ayoꞌn jɨgɨx jëbɨ nyajjotcugɨɨyɨm jacpɨnjaty huɨdibɨ mɨnajxp yajnajxp tzaachypɨ ayoꞌn. Tɨm jaduꞌn nej ɨɨch ajcxy tɨ nbaady jotcujcꞌajtɨn ma Dios, nañ tɨm jaduꞌn yɨꞌ ajcxy padaꞌñ jotcujcꞌajtɨn ma Dios huɨdibɨ mɨnajxp yajnajxp tzaachypɨ ayoꞌn.
\v 5 Com tɨm jaduꞌn nej ɨɨch ajt nmɨnajxɨm nyajnajxɨm tzaachypɨ ayoꞌn mɨɨd Cristo ycɨxpɨ, nañ tɨm jaduꞌn mɨɨd Cristo ycɨxpɨ nbaatɨm jotcujcꞌajtɨn.
\v 6 Paady ycɨxpɨ ɨɨch ajcxy nmɨnajxcɨxy nyajnajxcɨxy tzaachypɨ ayoꞌn, jaydëbɨ miich ajcxy mbaadɨp jotcujcꞌajtɨn etz nañ jaduꞌn ypaadɨp ajcxy mꞌalma ñïdzoocɨn. Dios yejcpy jotcujcꞌajtɨn ma miich ajcxy, jaydëbɨ miich ajcxy mbaadɨp jotcujcꞌajtɨn etz nañ jaduꞌn ñïdzögɨp ajcxy yɨ mꞌalma. E co ajcxy mbaadɨp jotcujcꞌajtɨn etz ajcxy mꞌalma nïdzoocɨn, chi jëbɨ miich ajcxy mmɨmadägɨp etz mmecxtugɨp tzaachypɨ ayoꞌn, tɨm jaduꞌn nej ɨɨch ajcxy nmɨmadägy etz nmecxtújccɨxɨch tzaachypɨ ayoꞌn.
\v 7 Jotcujc nayjɨhuɨ̈yiijɨch mɨɨd miich ajcxy ycɨxpɨ, com njɨjpꞌijxpɨch co mmadägɨpy ajcxy ma mmɨbɨjcɨn. Com nejhuɨɨybɨch co miich ajcxy mmɨnajxyp myajnajxypɨ tzaachypɨ, tɨm jaduꞌn nej ɨɨch ajcxy nmɨnajxcɨxy nyajnajxcɨxy tzaachypɨ. E nañ jaduꞌn Dios yejcpy jotcujcꞌajtɨn ma miich ajcxy, tɨm jaduꞌn nej yecy jotcujcꞌajtɨn ma ɨɨch ajcxy.
\p
\v 8 Mɨgügtɨjc ajcxy, ɨɨch ajcxy ndzojcypɨch co miich ajcxy mnejhuɨ̈huɨp jaduꞌn nej canaagnax tzaachypɨ ayoꞌn tɨ nmɨnaxyɨch tɨ nyajnaxyɨch jɨm Asia naaxjot. Jayin jahueenɨ tɨ ngamɨmadägaꞌñɨch. Caꞌ anajty njɨjpꞌixyɨch co nbɨdzɨmɨpyɨch juugy ma je jɨmbɨ it lugar.
\v 9 Jaduꞌn ɨɨch ajcxy nnayjɨhuɨ̈yii nej jäy ajcxy huɨdibɨ yajpatcɨxp oꞌcjɨjpꞌam. Jaduꞌn tɨ njatyɨch, jɨgɨx jëbɨ nꞌixpɨcyɨch nej ɨɨch huaad nïgɨ Dios nyajmɨjꞌatyɨch, je Dios huɨdibɨ yajjugypɨgɨp yɨ jäy ajcxy tɨɨbɨ yꞌöccɨxy. E caꞌ nan ngɨꞌm mɨcꞌajt nmɨjpɨdaacpyɨch.
\v 10-11 Tɨ ɨɨch ajcxy Dios xyñihuaꞌñ xycohuaꞌñ, e xyjacnihuaꞌnaamb xyjaccohuaꞌnaambɨch ajcxy ma yɨ jäy ajcxy huɨdibɨ xyajꞌögaambɨch ajcxy. E co miich ajcxy xypubejtyɨch, copɨcy co jacmɨbɨjctzoogɨx Dios mɨɨd ɨɨch ycɨxpɨ. Njɨjpꞌijxypɨch co Dios yɨꞌ xyjatyɨmy xyñihuaꞌnaambɨch xycohuaꞌnaambɨch. E pen mayjäy Dios mɨbɨjctzoogɨxy mɨɨd ɨɨch ycɨxpɨ, nañ jaduꞌn yajnájxcɨxyɨpy ajcxy jäygɨdaacɨn ma Dios mɨɨd je mayꞌajt oyꞌajt ycɨxpɨ huɨdibɨ Dios ytumyb mɨɨd ɨɨch ajcxy.
\s Ti Pablo co yhuäcxɨjpy, caꞌ chojc nɨcxy jɨm Corinto
\p
\v 12 Jotcujc nayjɨhuɨ̈yiijɨch mɨɨd jada ycɨxpɨ com nejhuɨɨybɨch co tɨ ndzɨnäyɨch mɨɨd tudägyꞌajtɨn etz mɨɨd oyjot oyhuinmaꞌñ mɨɨd yɨ mayjäy ajcxy canaag agajp etz jacnïgɨ ma miich ajcxy. Dios mɨɨd mayꞌajtɨn oyꞌajtɨn tɨ xypubetyɨch co tudägy tɨ ndzɨnäyɨch, e caꞌ nguyduñɨch ngɨꞌmjot ngɨꞌmhuinmaꞌñɨch ma ndzɨnáayɨnɨch.
\v 13 Ɨɨch miich ajcxy nyajnijayɨɨyb je ayuc tɨyꞌajt huɨdibɨ miich ajcxy jëbɨ mgapxcɨxy etz mhuinjɨhuɨɨygɨxy. E nañ jaduꞌn njɨjpꞌijxypɨch co miich ajcxy mhuinjɨhuɨ̈huɨpy ɨɨch nꞌayuc tügꞌócɨy.
\v 14 Jaduꞌn nej miich ajcxy cham cujc-huäcxy mhuinjɨhuɨɨygɨxy ɨɨch nꞌayuc ndɨyꞌajt. Jacjiinɨ co anajty je xɨɨ je tiempo ymiñ co ajt nHuindzɨn Jesús yꞌaneꞌmaꞌñ ya naaxhuiñ, chi miich ajcxy jotcujc mnayjɨhuɨ̈huɨɨyb mɨɨd ɨɨch ycɨxpɨ. E nañ tɨm jaduꞌn nej ɨɨch ajcxy jotcujc nayjɨhuɨ̈huɨɨyb mɨɨd miich ajcxy ycɨxpɨ.
\p
\v 15 Com nejhuɨɨybɨch co miich ajcxy xychojcpɨch xyjɨhuɨɨybɨch, paady ycɨxpɨ nhuinmaꞌñ nbɨdägyɨch co nɨcxy nꞌixaangɨxy miich ajcxy jadügꞌoc, e jaduꞌn nyajjotcugɨ̈huaangɨxɨch miich ajcxy mejtzꞌoc.
\v 16 Jaduꞌn nhuinmaꞌñ tɨ nbɨdägyɨch co nnɨcxaꞌñɨch Macedonia. Per jayɨjp nnaxaꞌñɨch ma miich ajcxy mgajp. E co anajty ndzooñɨch Macedonia, jadügꞌoc nnɨcxaꞌñɨch ma miich ajcxy. E jaduꞌn jëbɨ miich ajcxy xytüjɨjphuohuɨ̈huɨbɨch co anajty nnɨcxyɨch jɨm Judea.
\v 17 ¿Nej mdijy, co ɨɨch aametz jotmetz nduñɨch co caꞌ tɨ nnɨcxyɨch ma miich ajcxy nej anajty tɨ nmɨnaꞌñɨch? ¿Nej mdijy, nhuinmaꞌñ mɨɨdɨdyɨch jaduꞌn nej naaxhuiñyjäy huɨdibɨ mɨnamb co ñɨcxaꞌñ, e chi caꞌ ñɨcxnɨ?
\v 18 Per Dios jëbɨ tɨyꞌajt yegɨpy co je ayuc tɨɨbɨ nyajnɨmaaygɨxy, nguydunɨpyɨch yɨꞌ. Ɨɨch nꞌayuc janch yɨꞌ.
\v 19 Ɨɨch mɨɨd Silvano etz Timoteo ngapxhuäcxcɨxyɨch Cristo Jesús yꞌayuc, je Dios yꞌung. E Cristo Jesús yꞌayuc janch yɨꞌ, ycuydumyb jeꞌ yꞌayuc, tudägy jeꞌ ycapxy.
\v 20 Tügꞌócɨy je ayuc huɨdibɨ Dios yejc jecyꞌajty mɨɨd ɨɨch ajt ycɨxpɨ, hueꞌ Cristo Jesús cuydundaayb. Paady co ngapxpaatɨm nꞌojadajtɨm Dios, chi nmɨnaanɨm. “Amén, jaduꞌn jada,” com Cristo Jesús tɨ cuydundäy Dios yꞌayuc.
\v 21 Com jeꞌ jeꞌ Dios huɨdibɨ xyajmɨbɨjcɨm Cristo, e Dios huɨdibɨ xyajmɨɨdꞌijtɨm Cristo. Jaduꞌn Dios ytuñ mɨɨd ɨɨch ajcxy etz nañ jaduꞌn mɨɨd miich ajcxy. Jeꞌ jeꞌ Dios huɨdibɨ xyajnïbɨjcɨm etz xypɨdaacɨm tügjɨjp ma yɨꞌ ytung.
\v 22 Dios tɨ pɨdägy ma ajt njot nhuinmaꞌñ je tɨyꞌajt co nyajpaatɨm ma Cristo Jesús. Co Dios xyꞌadɨgɨɨyɨm xyjottɨgɨɨyɨm yɨꞌ yjɨhuɨꞌñ ymɨcꞌajt, chi tɨyꞌajt yecy co nyajpaatɨm ma Cristo Jesús.
\p
\v 23 Dios jëbɨ tɨyꞌajt yegɨpy co mɨɨd tudägy njot nhuinmaꞌñ nmɨydacyɨch co caꞌ jadügꞌoc nnɨcxyñɨch ma miich ajcxy mɨcꞌamy, jaduꞌn nej anajty nhuinmaꞌñ tɨ nbɨdägyɨch, mɨɨd co caꞌ ndzocyɨch nɨcxy nꞌojcɨxy huin jɨjp.
\v 24 Caꞌ nnɨcxaꞌñɨch mɨcꞌamy ma miich ajcxy, com caꞌ adzip nyajmɨbɨgaangɨxy miich ajcxy huɨdibɨ copɨcy ajcxy mmɨbɨgɨpy. Miich ajcxy tɨydudägy tɨ mmɨbɨjccɨxy. Jëyɨ co nbubedaangɨxy jaydëbɨ ajcxy nïgɨ jotcujcꞌajt mmɨɨdꞌadɨpy ma ajcxy mdzɨnaayɨn mjugyꞌajtɨn.
\c 2
\p
\v 1 Paady ycɨxpɨ jaduꞌn nhuinmaꞌñ tɨ nbɨdägyɨch co caꞌ nnɨcxaꞌñɨch mɨcꞌamy jadügꞌoc ma miich ajcxy, mɨɨd co miich ajcxy nyajtajɨ́py nyajmayɨ́py co ngapxhuijyɨch mɨɨd ajcxy mbocy ycɨxpɨ.
\v 2 Com pen ɨɨch miich anajty ajcxy nyajtajpy nyajmaayb, ¿pɨn jadaꞌ ɨɨch xyajjotcugɨ̈huɨbɨch? Pues miich ajcxy huɨdibɨ tajp mayb, miich ajcxy xyajjotcugɨ̈huɨbɨch. 
\v 3 Paady ycɨxpɨ tɨ nnijayɨɨygɨxy jaduꞌn co caꞌ nnɨcxaꞌñɨch mɨcꞌamy ma miich ajcxy, com caꞌ jaduꞌn ndzocyɨch co ɨɨch miich ajcxy nyajtajɨpy nyajmayɨpy. Jacꞌoy co ɨɨch miich ajcxy nyajjotcugɨ̈huɨpy. Com nejhuɨɨybɨch co ɨɨch jotcujc nayjɨhuɨ̈yiijɨch mɨɨd miich ajcxy ycɨxpɨ. Nañ jaduꞌn miich ajcxy jotcujc mnayjɨhuɨ̈huɨɨyb co mnejhuɨ̈huɨpy co tɨ njotcugɨ̈huɨbɨch mɨɨd miich ajcxy ycɨxpɨ.
\v 4 Co tɨ njayɨch je necy huɨdibɨ tɨ nguexyɨch ma miich ajcxy, ooy mɨj jotmay tɨ njɨhuɨ̈yɨch, ixtɨ nyaaxɨch. Per caꞌ nan paady ycɨxpɨ tɨ njaayɨch je necy co nyajtajaangɨxy nyajmayaangɨxy. Hueꞌ janchtɨy tɨ njaayɨch je necy jaydëbɨ mnejhuɨɨygɨxy co mɨjcajee ndzojccɨxy njɨhuɨɨygɨxy.
\s Meecxɨn ma je pɨn anajty jɨbɨcpɨ tɨ tuñ
\p
\v 5 Per pen jɨm ma miich ajcxy pɨnjaty tɨ yecy tajɨn mayɨm co tɨ ytundɨgooy, pues caꞌ nan ɨɨch tügpajc tajɨn mayɨm jɨhuɨɨybɨch. Nañ jaduꞌn miich ajcxy nidügꞌócɨy mjɨhuɨɨygɨxyp tajɨn mayɨn. Jaduꞌn nmɨnaꞌñɨch co huenjaty tajɨn mayɨn miich ajcxy mjɨhuɨɨygɨxy, jɨgɨx caꞌ anaxy ajcxy nyajtajɨ́p nyajmayɨ́p.
\v 6 Yajhuäcxɨjp je tzaachypɨ huɨdibɨ miich ajcxy mooyb je mɨgüg huɨdibɨ tɨ ytundɨgooy. Tɨ mɨɨd jaduꞌñɨ.
\v 7 Jaduꞌn tzocy cham co miich ajcxy meecx je mɨgüg jaduꞌn nej tɨ ytundɨgooy, etz nañ jaduꞌn ajcxy myajjotcugɨ̈huɨpy. Caꞌ yjecyɨty co je mɨgüg anaxy oy jɨhuɨ̈huɨp tajɨn mayɨn.
\v 8 Paady ycɨxp mayꞌajt nbɨjctzooyɨch ma miich ajcxy co myajniguëxɨ̈gɨpy ajcxy co mdzocy mjɨhuɨ̈y ajcxy je mɨgüg huɨdibɨ tɨ ytundɨgooy.
\v 9 Ɨɨch miich ajcxy tɨ nijayɨ̈y jayhuin mɨɨd je mɨgüg ycɨxpɨ huɨdibɨ tɨ ytundɨgooy, jɨgɨx jëbɨ nnejhuɨɨyɨch, pen mguydumyb miich ajcxy ɨɨch nꞌayuc, o pen caꞌ mguydungɨxy.
\v 10 Jadachambɨ co pɨnjaty tɨ ytundɨgooy ma miich ajcxy, e miich ajcxy mhuinmecxɨ yɨꞌ ypocy, nañ jaduꞌn nhuinmeecxɨp ɨɨch yɨꞌ nej ytundɨgooy. Com ɨɨch co nhuinmeecxyɨch tüg nmɨgügɨch nej tɨ ytundɨgooy, jaduꞌn nduñɨch mɨɨd miich ajcxy ycɨxpɨ, com Cristo yꞌijxyp ñejhuɨɨyb tügꞌócɨy tijaty nduunɨm.
\v 11 Jaduꞌn nhuinmeecxɨm nmɨgüg ypocy, jɨgɨx Satanás, je mujcuꞌ, caꞌ xymɨmadaacɨm. Nejhuɨɨyɨm yajxon nej Satanás mañꞌajt mɨɨdɨty.
\s Pablo caꞌp anajty yjotcujcꞌaty jɨm Troas
\p
\v 12 Co njaꞌtyɨch ma je cajp huɨdibɨ xɨɨjɨp Troas, chi ngapxhuäcxaꞌñɨch anajty Cristo yꞌayuc ytɨyꞌajt, etz mɨj ooy tɨgɨydac nbatyɨch, nej jëbɨ nduñɨch ma ajt nHuindzɨn Jesucristo ytung.
\v 13 Per caꞌ anajty jotcujc nayjɨhuɨ̈yiijɨch. Com caꞌ nmɨnaybatɨch je ɨɨch ajt nmɨgüg Tito jɨm Troas. Paady ycɨxp ngapxycɨjxyɨch mɨɨd je mɨbɨjcpɨdɨjc ajcxy jɨm Troas, e nnɨcxyɨch jɨm Macedonia ñaaxjot. 
\s Madaacɨm ma Cristo
\p
\v 14 Nyajnajxypɨch jäygɨdaacɨn ma Dios co mɨɨd Jesucristo ymɨcꞌajt jatytimy nmɨmadacypɨch jabom jabom tügꞌócɨy huɨdibɨ xymɨdzipꞌajtpɨch ma tügꞌócɨy naax cajp. Nañ jaduꞌn Jesucristo tɨ xymöyɨch yɨꞌ yꞌayuc huɨdibɨ ngapxhuäcxypɨch ma tügꞌócɨy naax cajp. Je mayjäy ma canaag cajp ooy jäygɨdaaccɨxy Cristo yꞌayuc. Co ngapxhuäcxɨch Jesucristo yꞌayuc xɨ ya, jaduꞌn nipaady nej tüg xuucɨn huɨdibɨ ooy oy xuugy, e yꞌabojɨ̈y xɨ ya.
\v 15 Co ngapxhuäcxyɨch Cristo yꞌayuc ma yɨ mayjäy huɨdibɨ padamb ajcxy yꞌalma ñïdzoocɨn ooy Dios jäygɨdägy. E ñañ jaduꞌn Dios ooy jäygɨdägy co ngapxhuäcxyɨch Cristo yꞌayuc ma yɨ jäy ajcxy huɨdibɨ ajcxy yꞌalma tɨgoyaamb. Jaduꞌn ɨɨch ajcxy ndung nipaady nej jɨhuɨ̈y nboomjójcɨxɨch jabom jabom ma Dios yhuinduu mɨɨd Cristo ycɨxpɨ.
\v 16 Pɨnjaty mɨjpɨdacp Cristo yꞌayuc huɨdibɨ ngapxhuäcxypɨch, hueꞌ jeꞌ yꞌalma nïdzögamb. E pɨnjaty caꞌ mɨjpɨdägy Cristo yꞌayuc, hueꞌ jeꞌ yꞌalma tɨgoyaamb. Ooy chachchipɨty chachmɨjhuinmaꞌñɨty ɨɨch ajcxy ndung.
\v 17 Caꞌ ɨɨch ajcxy nduñ jaduꞌn nej jacnaagɨty ajcxy huɨdibɨ Dios yꞌayuc mɨhuɨdijtɨp meeñgɨ́xy. Cɨxyjot huinɨjot ɨɨch jäy nyajꞌixpɨjccɨxy Dios yꞌayuc ytɨyꞌajt. Com Dios tɨ xyajnïbɨcyɨch co yɨꞌ yꞌayuc ngapxhuäcxɨch. Mɨɨd co nyajpaatɨm ma Cristo, paady ycɨxp nduunɨm jaduꞌn nej jɨhuɨ̈y nyajpaatɨm jabom jabom ma Dios yhuinduu.
\c 3
\s Je jemybɨ ayuc tɨyꞌajt huɨdibɨ Dios xymooyɨm
\p
\v 1 Co jaduꞌn nmɨnaꞌñɨch ¿nej mꞌijxcɨxy nej jɨhuɨ̈y huinjemy nyajtzondägaꞌñɨch ayuc co ndzachnaymayáanɨgɨxyɨch cɨꞌm? ¿Nej mdzojccɨx co ajcxy nyajꞌixɨpy tüg tɨyꞌajt necy co nduñɨch ma Dios ytung? o ¿Nbɨjctzohuɨpɨch tüg tɨyꞌajt necy ma miich ajcxy, jaduꞌn nej nijëjɨty jäy ytungɨxy?
\v 2 Caꞌ ɨɨch ajcxy ndɨyꞌajt necy ycopɨcyɨty. Com jëbɨ yɨ mayjäy ajcxy tɨyꞌajt pɨgɨpy ma miich ajcxy mdzɨnaayɨn mjugyꞌajtɨn co tudägy tɨ nyajꞌixpɨcyɨch miich ajcxy Dios ytɨyꞌajt. Jaduꞌn miich ajcxy nipaady nej ɨɨch ajcxy ndɨyꞌajt necy yjaayɨty ma ɨɨch ajcxy njot nhuinmaꞌñ. E jaduꞌn jäy ajcxy ijxcabɨpy etz huinjɨhuɨ̈huɨpy.
\v 3 Cristo cɨꞌm tɨ pɨdägy yɨꞌ ytɨyꞌajt ma miich ajcxy mjot mhuinmaꞌñ mɨɨd je ayuc huɨdibɨ tɨ ngapxhuäcxyɨch ma miich ajcxy. Jaduꞌn miich ajcxy nipaady nej tüg tɨyꞌajt necy huɨdibɨ Cristo tɨ jaay. E huɨdibɨ ɨɨch miich ajcxy tɨ nyajꞌijxcɨxy tɨ nyajnɨmaaygɨxy. Miich ajcxy caꞌ jaduꞌn ocpaatnɨ nej tüg tɨyꞌajt necy huɨdibɨ jäy tɨ jay mɨɨd tinta. Nañ jaduꞌn ni caꞌ yjëjɨty je tɨyꞌajt huɨdibɨ cojayɨp ma tüg tzaadzech. Hueꞌ miich ajcxy janch nipaady nej tɨyꞌajt necy huɨdibɨ je Dios jugypɨ yjɨhuɨꞌñ ymɨcꞌajt tɨ jaay ma jäy ajcxy yjot yhuinmaꞌñ.
\p
\v 4 Nejhuɨɨybɨch tɨydudägy co janch tɨyꞌajt nej nmɨnaꞌñɨch co Cristo tɨ xyajnïbɨcyɨch jada tung mɨɨd Dios ycɨxpɨ.
\v 5 Caꞌp ɨɨch ajcxy jëbɨ cɨꞌm madägy ma Dios ytung. Tügꞌócɨy mɨcꞌajt etz tɨyꞌajt jiiby nbáatcɨxyɨch ma Dios, huɨdibɨ mɨɨd jëbɨ ndúungɨxɨch yɨꞌ ytung.
\v 6 Dios tɨ xymóoygɨxyɨch mɨcꞌajt co ndunɨpyɨch ajcxy ma yɨꞌ ytung. Dios tɨ pɨdägy ma ɨɨch ajt jemybɨ ayuc tɨyꞌajt, huɨdibɨ mɨɨd xyꞌaneꞌmɨm. Jada jemybɨ ayuc tɨyꞌajt je Espíritu Santo pɨdaacp ma ajt njot nhuinmaꞌñ. E caꞌ jeꞌ yjaduꞌnɨty nej je ayuc tɨyꞌajt huɨdibɨ Moisés yjayhuɨꞌm jecyꞌajty. Mɨɨd je Moisés yꞌayuc huɨdibɨ jaybety ijtp, Dios xymooyɨm je oꞌcɨn. Mɨɨd je jemybɨ ayuc tɨyꞌajt huɨdibɨ je Espíritu Santo yejcpy, Dios xymooyɨm jugyꞌajtɨn huɨdibɨ caꞌ ycɨxɨpy ytɨgoyɨpy ni mɨna.
\p
\v 7-8 Je Dios ycötujcɨn huɨdibɨ Moisés yjayhuɨꞌm hueꞌ jaybejty ogaꞌn ma tüg tzaa. E je huinꞌit tiempo ooy Moisés anajty yhuiñyjɨjp mɨc yꞌadɨcxy mɨɨd Dios yꞌoyꞌajtɨn. E je Israel jäy ajcxy ni caꞌp jeꞌ anajty huaad yꞌijxcɨxy Moisés yhuiñyjɨjp, co anajty ooy mɨc chachꞌadɨɨcxy. E jada Dios yꞌoyꞌajtɨn huɨdibɨ Moisés ymɨɨd, caꞌ jecy yꞌijty. Hueꞌ jeꞌ tɨgooyñɨp anajty oñydägyꞌamy. Per pen Dios yajꞌijxɨp anajty yɨꞌ yꞌoyꞌajtɨn co Moisés moy je jäy ajcxy je Dios ycötujcɨn huɨdibɨ aneꞌm yɨ oꞌcɨn, nïgɨ mɨꞌidɨpy Dios yꞌoyꞌajtɨn je jemybɨ ayuc tɨyꞌajt huɨdibɨ je Espíritu Santo xymooyɨm. 
\v 9 Pen mɨj anajty oyꞌajtɨn mɨɨdɨty je cötujcɨn huɨdibɨ tuuñ co yꞌaneꞌmy ma ɨɨch ajt nbocy nꞌoꞌcɨn. Nïgɨ mɨjꞌoyꞌajtɨn mɨɨdɨty Dios yꞌayuc ytɨyꞌajt je jemybɨ huɨdibɨ mɨnaamb co Dios jëbɨ xyajꞌahuimbijtɨm tudägy.
\v 10 Jëbɨ nmɨnaanɨm co je jécyɨp cötujcɨn yꞌoyꞌajtɨn caꞌ yɨꞌ ytimytiijɨty co nyajquipxyɨ̈huaanɨm mɨɨd je jacꞌoybɨ oyꞌajtɨn huɨdibɨ Dios yꞌayuc ytɨyꞌajt jemybɨ ymɨɨd.
\v 11 Com pen ymɨɨd oyꞌajtɨn je cötujcɨn huɨdibɨ ymɨcꞌajt caꞌ yꞌidaꞌñ huinɨxɨɨ huinɨtiempo, nïgɨ oyꞌajtɨn mɨɨdɨty Dios yꞌayuc ytɨyꞌajt jemybɨ huɨdibɨ caꞌ ycɨxɨpy ytɨgoyɨpy nimɨna.
\p
\v 12 Mɨɨd co njɨjpꞌijxɨm je oyꞌajtɨn huɨdibɨ Dios xymöhuaanɨm mɨɨd je jemybɨ yꞌayuc, paady ycɨxp ngapxhuäcxɨm Dios yꞌayuc huinmɨc jotmɨc.
\v 13 Caꞌ jaduꞌn nduunɨm nej Moisés ɨdɨɨch jecyꞌajty co anajty mɨɨdɨty yhuiñyjɨjp huingobeꞌnɨ̈y, jɨgɨx caꞌydɨ Israel jäy ajcxy ixy nej jeꞌ anajty ytɨgoy je Dios yꞌoyꞌajtɨn huɨdibɨ anajty quëxɨ̈cp ma jeꞌ yhuiñyjɨjpɨn.
\v 14 Per yɨ Israel jäy jecyꞌajty caꞌ ajcxy yajxon huinjɨhuɨɨy ti anajty Dios ytumyb mɨɨd Moisés, ixtɨ chambaadnɨ yɨ Israel jäy ajcxy caꞌ yajxon huinjɨhuɨɨygɨxy co ajcxy capxcɨxy je ayuc huɨdibɨ Moisés yjayhuɨꞌm. Jaduꞌn nipaady nejjɨhuɨ̈y Moisés chambaadnɨ yꞌityñɨ huingobeꞌnɨ̈y. Co ajcxy mɨbɨgɨpy je Cristo, huinꞌit ajcxy huinjɨhuɨ̈huɨpy, e jaduꞌn jeꞌ paadɨpy nej jɨhuɨ̈y Moisés tɨ ñayhuingobeꞌndüdyii. Co yɨ Israel jäy ajcxy mɨbɨ́jccɨxɨpy Cristo, e ijxɨp ajcxy Dios yꞌoyꞌajtɨn, huinꞌitnɨ ajcxy huinjɨhuɨ̈huɨpy Dios yꞌayuc ytɨyꞌajt je jécyɨp.
\v 15 Ixtɨ chambaadnɨ co yɨ Israel jäy ajcxy capxcɨxy je mɨgooxpɨ libro huɨdibɨ Moisés yjayhuɨꞌm, caꞌ ajcxy huinjɨhuɨɨyɨ yajxon Dios yꞌayuc, jaduꞌn nipaady nej ajcxy yhuinmaꞌñ ymädɨty.
\v 16 Pɨnjaty jothuimbijtp, e mɨbɨcy ɨɨch ajt nHuindzɨn Jesucristo, oyɨɨyñɨp yɨꞌ yhuinmaꞌñ, e yhuinjɨhuɨ̈huɨpy Dios ytɨyꞌajt.
\v 17 Je Huindzɨn Jesucristo, yɨꞌ jeꞌ Dios yjɨhuɨꞌñ ymɨcꞌajt ymɨɨd. E ma Dios yjɨhuɨꞌñ ymɨcꞌajt yajpaady, Dios yɨꞌ yɨ jaduꞌmbɨ jäy ajcxy yajnihuätzɨ̈ctutp ma yɨ Dios ycötujcɨn je jécyɨp.
\v 18 Paady ycɨxp tügꞌócɨy ɨɨch ajt jaduꞌn nipaady nej tüg ijx ma nniꞌijxɨm ajt nHuindzɨn Jesucristo yꞌoyꞌajtɨn. Com caꞌ jaduꞌn patnɨ nej jɨhuɨ̈y nꞌijtɨm huingobeꞌnɨ̈y. E nañ jaduꞌn ɨɨch ajt njacyujcpejtɨm nꞌoyꞌajtɨn, jaydëbɨ nguipxyjatytɨɨyɨm mɨɨd Cristo. Com jabom jabom ɨɨch ajt nïgɨ nbaatɨm nꞌoyꞌajtɨn ma Cristo. Jada jeꞌ huɨdibɨ je Dios yjɨhuɨꞌñ ymɨcꞌajt ytumyb ma ajt njot nhuinmaꞌñ. E ɨɨch ajt nHuindzɨn Jesucristo tɨ pɨdägy Dios yjɨhuɨꞌñ ymɨcꞌajt ma ajt njot nhuinmaꞌñ.
\c 4
\p
\v 1 Com Dios tɨ xypaꞌayooyɨch, e tɨ xyajnïbɨcyɨch co ngapxhuäcxɨbɨch yɨꞌ yꞌayuc ytɨyꞌajt jemybɨ, paady ycɨxp caꞌ njotmetzcɨ̈yɨch.
\v 2 Per ooy tɨ njɨjpcodijɨ́ɨygɨxyɨch tɨ njɨjpcogapxɨ́ɨygɨxyɨch yɨ jäy ajcxy yꞌayuc huɨdibɨ ajcxy ytungɨxyp etz ycapxcɨxpy ayüch ameech, etz huɨdibɨ oymɨdzöyduunɨ. Caꞌ ɨɨch ajcxy ti nduñɨch mɨɨd jɨbɨc-huinmaꞌñ. Nañ jaduꞌn ni caꞌ nyajtɨgájtzcɨxɨch Dios yꞌayuc. Hueꞌ janchtɨy ngapxpɨch ajcxy huɨdibɨ janchɨp. Jaduꞌn nyajꞌixpɨ́jccɨxyɨch yɨ jäy ajcxy, jaydëbɨ ajcxy jotcujc ñayjɨhuɨ́ɨyɨgɨxy ma Dios yhuinduu.
\v 3 Yɨ jäy ajcxy huɨdibɨ nɨcxy yꞌalma ytɨgoyaangɨxy caꞌoydactuuby, caꞌ ajcxy huinjɨhuɨ̈y Dios yꞌayuc oybɨ nej jëbɨ ajcxy yꞌalma nïdzögɨpy. Jada jeꞌ je ayuc huɨdibɨ ngapxhuäcxcɨxpɨch. Pɨnjaty ajcxy yꞌalma nïdzögɨp yhuinjɨhuɨɨyb ajcxy jada ayuc.
\v 4 Yɨꞌ ajcxy huɨdibɨ yꞌalma tɨgoyaanɨp caꞌ mɨbɨjccɨxy Dios yꞌayuc, com Satanás huɨdibɨ aneꞌmb ya naaxhuiñ tɨ yajmädyii ajcxy yhuinmaꞌñ. Caꞌ jeꞌ ajcxy huinjɨhuɨ̈y Cristo yꞌayuc oybɨ. Cristo túꞌcɨy yajꞌixy, túꞌcɨy mɨcꞌajt mɨɨdɨty, nej Dios yajꞌixy nej Dios mɨcꞌajt mɨɨdɨty. E Cristo yꞌayuc jaduꞌn nipaady nej tüg mɨjtɨcxɨn huɨdibɨ Satanás tɨ ahuijtztucy caꞌydɨ ytɨcxy ma jeꞌ ajcxy.
\v 5 Co ɨɨch ajcxy ayuc ngapxhuäcxyɨch, caꞌ ɨɨch ajcxy ngapxhuäcxy ngɨꞌmꞌayuc ngɨꞌmdɨyꞌajt. Hueꞌ ɨɨch ajcxy ngapxhuäcxyp Jesucristo yꞌayuc ytɨyꞌajt. Ngapxhuäcxyɨch ajcxy co Jesucristo ñihuindzɨnꞌajttaayb tügꞌócɨy. E nañ jaduꞌn ngapxhuäcxyɨch ajcxy je tɨyꞌajt co ɨɨch ajcxy jaduꞌn naydijɨɨygɨxyɨch nej jɨhuɨ̈y miich ajcxy xytumbɨꞌadyii mɨɨd Cristo ycɨxpɨ.
\v 6 Je Dios huɨdibɨ jecyꞌajty aneꞌm co huen tɨɨcxɨn jiꞌaty huɨdibɨ codɨɨcxɨp ma ycoodzɨty, yɨꞌ tɨ xymooyɨm yꞌayuc ytɨyꞌajt. Yɨꞌ yꞌayuc tɨm jaduꞌn nipaady nej tüg tɨɨcxɨn nmɨɨdꞌajtɨm ma ajt njot nhuinmaꞌñ, jɨgɨx jëbɨ nꞌijxɨm je Dios yꞌoyꞌajtɨn huɨdibɨ quëxɨ̈cp ma Jesucristo yhuiñyjɨjp.
\s Je jugyꞌajtɨn co nmɨbɨjcɨm
\p
\v 7 Je Dios yꞌoyꞌajtɨn oybɨ nmɨɨdꞌajtɨm ma ajt njot nhuinmaꞌñ, ɨɨch ajt caꞌ ni ti mɨcꞌajt nmɨɨdꞌajtɨm ma ajt ngɨꞌmjot ngɨꞌmhuinmaꞌñ. Jaduꞌn Dios pɨdägyñɨ yɨꞌ yꞌoyꞌajtɨn ma ɨɨch ajt, tɨm jaduꞌn nej jäy ajcxy pɨdaaccɨxy piꞌcmeeñ ma piꞌcꞌɨdzɨmboch.
\v 8 Oy ɨɨch ajcxy nmɨnaxyɨch nyajnaxyɨch may ayoꞌn, per caꞌ ndajy nmayɨch ajcxy anaxy. Ooy nhuinmayꞌahuɨdíjtcɨxyɨch mɨɨd je tzaachypɨ ayoꞌn ycɨxpɨ, per caꞌ nhuinmaꞌñydɨgóoygɨxyɨch.
\v 9 Oy ɨɨch ooy nmɨdzip xyꞌixhuɨdityɨch xypahuɨdityɨch, per Dios caꞌ xyꞌixmachɨch. Canaagꞌoc ɨɨch nmɨdzip tɨ xycujy tɨ xyjɨbipyɨch. Per caꞌ ɨɨch njugyꞌajtɨn tɨ ytɨgooy.
\v 10 Hueñymaꞌamyɨty nhuɨdityɨch ajcxy nmɨɨdɨch je tzaachɨ̈ꞌau ma nninïcxɨch, ma jäy ajcxy tɨ xychaachytúungɨxɨch. Jeꞌ jeꞌ je ijxpejt co nhuɨdityɨch oꞌcɨn jɨjpꞌam, tɨm jaduꞌn nej Jesús anajty huɨdity oꞌcɨn jɨjpꞌam. Ngöbɨjcypɨch jada tzaachypɨ, jɨgɨx tügꞌócɨy jäy ajcxy nejhuɨ̈huɨp co Jesús xypubejtpɨch xypudɨgɨɨybɨch.
\v 11 Namɨ jacjugyꞌajtnɨch ajcxy, oꞌcjɨjpꞌam ɨɨch ajcxy nhuɨdijtcɨxy jabom jabom mɨɨd Jesús ycɨxpɨ, jɨgɨx jëbɨ tügꞌócɨy jäy ajcxy nejhuɨ̈huɨpy co Jesús xypubejtcɨxyp xypudɨgɨɨygɨxyp.
\v 12 Jaduꞌn ndzɨnäyɨch oꞌcjɨjpꞌam, jɨgɨx miich ajcxy mɨɨdꞌadɨp jugyꞌajtɨn huɨdibɨ caꞌ ycɨxɨpy ytɨgoyɨpy.
\p
\v 13 Jaybety ymiñ ma Dios ñecy ma jaduꞌn ymɨnaꞌñ: “Tɨ nmɨbɨcyɨch, e paady ycɨxpɨ tɨ ngapxpɨdzɨmybɨch nej tɨ nmɨbɨcyɨch.” Tɨm jaduꞌn nej Dios ñecy ymɨnaꞌñ, nañ tɨm jaduꞌn ɨɨch ajcxy ymɨnaangɨxy co nmɨbɨ́jccɨxyɨch Dios, e paady ngapxpɨdzɨ́mgɨxyɨch nej nmɨbɨ́jccɨxyɨch.
\v 14 Com nejhuɨɨyɨm jaduꞌn nej Dios yajjugypɨjcy Jesús co yꞌoꞌcy. Nañ tɨm jaduꞌn Jesús xyajjugypɨgaanɨm jadügꞌoc mɨɨd Dios ymɨcꞌajt co anajty nꞌoꞌcɨm. E quipxyɨ mɨɨd miich ajcxy xyajnɨ́cxɨmɨp ma Dios yhuinduu.
\v 15 Tügꞌócɨy tzaachypɨ huɨdibɨ nmɨnajxypɨch nyajnajxypɨch, hueꞌ nmɨnaxyɨch nyajnaxyɨch mɨɨd miich ajcxy mꞌoyꞌajtɨn ycɨxpɨ. E co anajty Dios jactuñ mayꞌajtɨn mɨɨd jacjadyii mayjäy ajcxy, nañ jaduꞌn mayjäy yajnájxcɨxɨpy jäygɨdaacɨn ma Dios, jɨgɨx jëbɨ mayjäy ɨɨbáatcɨxɨpy capxpáatcɨxɨpy Dios.
\p
\v 16 Paady ycɨxpɨ ni mɨna xɨɨ, ɨɨch ajcxy ngajotmetzcɨ̈huaangɨxy. Oy ɨɨch ajcxy nninïcx yjaccömɨnajcꞌɨdɨ̈ch jabom jabom, per ɨɨch ajcxy njot nhuinmaꞌñ nïgɨ mɨcꞌajt paady jabom jabom.
\v 17 Je tzaachypɨ je ayoꞌn huɨdibɨ nmɨnajxɨm nyajnajxɨm ya naaxhuiñ, caꞌ yɨꞌ ytimytiijɨty. Cɨxɨp naxɨp yɨꞌ. E mɨɨd co nmɨnajxɨm nyajnajxɨm tzaachypɨ ayoꞌn, huinꞌit nbaatɨm oyꞌajtɨn nïgɨ ymɨjɨty yꞌoyɨty huɨdibɨ caꞌ ycɨxɨpy ñaxɨpy ni mɨna.
\v 18 Caꞌ huaad ɨɨch ajt nhuinmaꞌñ nbɨdaacɨm ma huɨdijaty cɨxamb tɨgoyamb. Tügꞌócɨy tijaty yajꞌijxp yajhuindɨɨcxp ya naaxhuiñ, cɨxɨ́p tɨgoyɨ́p yɨꞌ. Per huɨdijaty caꞌ yajꞌixy yajhuindɨcxy, idɨ́p yɨꞌ, caꞌ ycɨxɨ́py ytɨgoyɨ́py nimɨna.
\c 5
\p
\v 1 Com nnejhuɨɨyɨm co nꞌoꞌcɨm, naaxnïcx ajt huɨdibɨ nmɨɨdꞌajtɨm ya naaxhuiñ cɨxamb tɨgoyamb yɨꞌ. Dios ymɨɨd niꞌixɨ̈ꞌ jiiby tzajpjoty huingbɨ ninïcx huɨdibɨ yɨꞌ tɨ cojy huɨdibɨ xymöhuaanɨm. Je ninïcx huɨdibɨ xymöhuaanɨm jaduꞌn nipaady ma ajt nꞌalma nej tüg tɨjc huɨdibɨ tɨnaayb huinɨxɨɨ huinɨtiempo. Tüg tɨjc huɨdibɨ Dios tɨ cojy, caꞌ nan huɨdibɨ jäy ajcxy tɨ cojcɨxy.
\v 2 Janch tɨyꞌajt co caꞌ ooy jotcujc ndzɨnaayɨm ya naaxhuiñ mɨɨd ajt nninïcx. Ooy njɨjpꞌijxɨm mɨna nbadaanɨm ajt je nninïcx huɨdibɨ nmɨɨdꞌadaanɨm jiiby tzajpjoty.
\v 3 Jeꞌ nninïcx xyüdzɨm tɨm jaduꞌn nej co tüg jemyhuit nyajtɨgɨɨyɨm, caꞌydɨ nꞌijtɨm nïhuädz.
\v 4 Namɨ njactzɨnaayɨm ya naaxhuiñ mɨɨd ajt nninïcx, caꞌ ooy jotcujc nayjɨhuɨɨyɨm. Ooy xyajtajɨm xyajmayɨm je tzaachypɨ ayoꞌn huɨdibɨ nmɨnajxɨm nyajnajxɨm. Caꞌ nan co caꞌ ndzojcɨm ajt nninïcx, o co nyajtɨgoyaanɨm ajt nninïcx. Hueꞌ ndzojcɨm co nmɨɨdꞌajtɨm jemybɨ jugyꞌajtɨn jemybɨ ninïcx jɨgɨx co ajt njugyꞌajtɨn huɨdibɨ cɨxamb tɨgoyamb, ahuimbidɨp yɨꞌ jemybɨ jugyꞌajtɨn huɨdibɨ caꞌ ycɨxɨ́py ytɨgoyɨ́py.
\v 5 Dios yɨꞌ tɨ yajꞌoyɨ̈y je jugyꞌajtɨn huɨdibɨ nmɨɨdꞌajtɨm cham, jɨgɨx jëbɨ nmɨɨdꞌajtɨm huingbɨ jugyꞌajtɨn huɨdibɨ caꞌ ycɨxɨ́py ytɨgoyɨ́py ni mɨna. Dios tɨ xymoyɨm je Espíritu Santo jeꞌ jeꞌ tɨyꞌajt ma ɨɨch ajtɨn co nbadaanɨm jemybɨ jugyꞌajt jembyɨ ninïcx.
\p
\v 6 Jabom jabom ɨɨch ajt jotcujc naybɨdaacɨm. Nejhuɨɨyɨm co namɨ nꞌjactzɨnaayɨm mɨɨd ajt nninïcx, caꞌ nmɨɨdꞌajtɨm jemybɨ ninïcx, caꞌ nyajpaatɨm ma ajt nHuindzɨn Jesús chɨnäy.
\v 7 Jeꞌ nninïcx xyüdzɨm tɨm jaduꞌn nej co tug jemyhuit nyajtɨgɨɨyɨm, caꞌydɨ nꞌijtɨm nïhuädz.
\v 8 Jotcujc etz jotmɨc nayjɨhuɨɨyɨm. Nïgɨ jotcujc ixyipy nayjɨhuɨɨyɨm, e ooy njatzojcɨm co mɨcꞌamy ixyipy nꞌijxmajtzɨm jada ninïcx, jɨgɨx nɨcxy ndzɨnaydacpɨjcɨm ma ajt nHuindzɨn Jesús chɨnäy.
\v 9 Paady ycɨxp jaduꞌn njacjugyꞌajtɨm njactzɨnaayɨm jɨgɨx jëbɨ ajt nHuindzɨn Jesús jäygɨdägɨpy ajt ndzɨnaayɨn. Caꞌ ñejɨty pen njactzɨnaayɨm ixyipy mɨɨd ajt nninïcx, o pen tzojc nꞌijxmajtzɨm ajt nninïcx ixyipy, e nɨcxɨm ma Jesús yajpaady.
\v 10 Nidügꞌócɨy ɨɨch ajt nayguëxɨ̈gaanɨm ma Cristo ytɨydundac, e jiiby nidüg nidüg paadɨp huɨdi anajty nipɨdzɨɨmɨp jaduꞌn nej anajty tɨ chɨnäy, pen oy, o caꞌ yꞌoyɨty.
\s Je ayuc tɨyꞌajt huɨdibɨ nicyꞌajt cɨdägyꞌajt mɨɨd
\p
\v 11 Com nejhuɨɨyɨm co copɨcy nhuindzɨgɨɨyɨm ajt nHuindzɨn Jesucristo, paady ycɨxpɨ mɨctägy nyajmɨbɨcyɨch yɨ mayjäy ajcxy Cristo ytɨyꞌajt. Dios ñejhuɨɨyb co tudägy ɨɨch njot nhuinmaꞌñɨch. E nañ jaduꞌn ndzocyɨch co miich ajcxy mnejhuɨ́ɨygɨxɨpy co tudägy ɨɨch njot nhuinmaꞌñɨch.
\v 12 Caꞌp ɨɨch ajcxy yam naygapxpáatɨgɨxy jadügꞌoc co ɨɨch ajcxy ooy nꞌoyjäyɨty, o co ɨɨch ajcxy ooy oy ndúngɨxyɨch. Hueꞌ janchtɨy lugar nyejcpyɨch, jaydëbɨ miich ajcxy xycapxpadɨpyɨch etz jotcujc mnayjɨhuɨ́ɨyɨgɨxɨpy mɨɨd ɨɨch ajcxy ycɨxpɨ. Jɨgɨx jëbɨ miich ajcxy mꞌadzohuɨp yɨ jäy ajcxy huɨdibɨ capxpatp pɨnjaty yhuiñyjɨjp ooy oy  yquëxɨ̈gy, e caꞌ ajcxy tuñ cuendɨ pen jeꞌ mɨɨd oyjot oyhuinmaꞌñ, o pen caꞌ.
\v 13 Pen mɨnamb jäy ajcxy co ɨɨch nlocɨty, huen xyajnájxcɨxyɨch locɨ mɨɨd Dios ycɨxpɨ. Pen jäy mɨnaangɨxp co oy huinmaꞌñ nmɨɨdɨdyɨch, jëbɨ jaduꞌn ajcxy xyajnájxcɨxyɨch jaduꞌn nej oy huinmaꞌñ nmɨɨdɨdyɨch mɨɨd miich ajcxy mꞌoyꞌajtɨn ycɨxpɨ.
\v 14 Com Cristo ooy xychojcɨm xyjɨhuɨɨyɨm, paady ycɨxp njatytimycapxymɨdoohuɨm Cristo. Com nnejhuɨɨyɨm ajt nidügꞌócɨy tɨydudägy co Cristo yꞌoꞌcy mɨɨd ajt nbocy ycɨxpɨ, e paady ycɨxpɨ jaduꞌn nipaady nej jɨhuɨ̈y nidügꞌócɨy ɨɨch ajt tɨ nꞌoꞌcɨm quipxyɨ mɨɨd Cristo.
\v 15 Cristo oꞌc mɨɨd tügꞌócɨy jäy ajcxy ycɨxpɨ, jɨgɨx co tügꞌócɨy jäy ajcxy huɨdibɨ jactzɨnaayb jacjugyꞌajtp, caꞌ ajcxy yajtúngɨxɨpy ycɨꞌmjot ycɨꞌmhuinmaꞌñ ma ajcxy chɨnaayɨn. Huen ajcxy tzɨnaaygɨxy mɨɨd Cristo ycɨxpɨ huɨdibɨ oꞌc mɨɨd yɨꞌ ajcxy ypocy ycɨxpɨ, etz yjugypɨjcy jadügꞌoc mɨɨd yɨꞌ ajcxy ycɨxpɨ.
\v 16 Mɨɨd co ndzɨnaayɨm mɨɨd Cristo ycɨxpɨ, paady ycɨxp caꞌ ndunɨm cuendɨ naaxhuiñyjäy ajcxy nej ñayñigápxɨgɨxy nayñimɨydáacɨgɨxy. Jayɨjp caꞌnɨ anajty nmɨbɨjcɨm, ooy anajty ndunɨm cuendɨ nej jäy ajcxy ñayñigápxɨgɨxy nayñimɨydáacɨgɨxy. Jadachambɨ etz yjacnɨcxnɨ xɨɨ tiempo, caꞌ ndunɨm cuendɨ nej naaxhuiñyjäy ajcxy capxcɨxy mɨydaaccɨxy.
\v 17 Com tɨgachjaty cham nhuinjɨhuɨ̈yɨch Cristo, paady ycɨxp pɨnjaty yajpatp ma Cristo, jemyjot jemyhuinmaꞌñ jeꞌ ymɨɨdꞌajtnɨp, jaduꞌn nipaady nej jɨhuɨ̈y tɨ maꞌxungꞌaty huinjemy. Je jot je huinmaꞌñ huɨdibɨ anajty ymɨɨd co anajty caꞌnɨ mɨbɨcy Cristo, tɨ jeꞌ ñajxtäy, jadachambɨ ac jemyjot ac jemyhuinmaꞌñ tɨ yꞌahuimbijttäy.
\p
\v 18 Tügꞌócɨy tijaty huɨdibɨ ya yajpatp, jiiby chooñ ma Dios, Dios yajꞌoyɨyday. Mɨɨd huɨdijaty Cristo ytuun mɨɨd ɨɨch ajt ycɨxpɨ, jotcujc nꞌijtɨm mɨɨd Dios. E Dios xyajnïbɨjcɨch co ngapxhuäcxyɨch Dios yꞌayuc jaduꞌn nej jäy ajcxy jëbɨ ajcxy jotcujc yꞌijtcɨxy mɨɨd Dios.
\v 19 Jaduꞌn nmɨnaanɨm co Dios ymɨɨdꞌijtpy Cristo. E Dios tuun quipxyɨ mɨɨd Cristo co yɨꞌ yajꞌoyɨɨy je tzip nej naaxhuiñyjäy ajcxy mɨdzipꞌaty Dios. Dios caꞌ yajcomɨdohuaꞌñ jäy ajcxy ypocy huɨdibɨ mɨbɨjccɨxp Cristo, mɨɨd co Cristo tɨ yajpocyñïhuächyii. E Dios tɨ xyajnïbɨcyɨch co ngapxhuäcxyɨch yɨꞌ yꞌayuc nej jäy ajcxy jëbɨ paadɨp pocyhuinmeecxɨn, etz nañ jaduꞌn paadɨp jotcujcꞌajtɨn ma Dios.
\v 20 Paady nhuɨdityɨch mɨɨd Cristo ycɨxpɨ ngapxhuäcxyɨch Cristo yꞌayuc. Jaduꞌn huimbɨdzɨmyb nej jɨhuɨ̈y miich ajcxy Dios xymɨnucxtaaccɨxy mɨɨd ɨɨch nꞌayuc jɨgɨx mmɨbɨ́jccɨxɨpy Cristo yꞌayuc. Paady ngodɨnäyɨch Cristo co nmɨnucxtacypɨch miich ajcxy. Jothuimbijtcɨx nej mdundɨgooygɨxy mɨɨd Dios ycötujcɨn e Dios xyhuinmeecxɨp ajcxy mbocy, jɨgɨx jotcujc mꞌidɨpy ajcxy ma Dios.
\v 21 Cristo caꞌ ma ytundɨgooy, per mɨɨd ajt nbocy ycɨxpɨ Dios yajnajx je Cristo jaduꞌn nej tüg pocyjäy. Jaduꞌn Dios ytuñ mɨɨd je Cristo, jɨgɨx co ɨɨch ajt nꞌijtɨm ma Cristo, nbaatɨm je tudägyꞌajtɨn huɨdibɨ Dios chojcpy nmɨɨdꞌajtɨm.
\c 6
\p
\v 1 Ɨɨch ajcxy etz miich ajcxy quipxyɨ nduunɨm ma Dios ytung. Nmɨnucxtacpyɨch miich ajcxy co mgöbɨgɨpy ajcxy je mayꞌajt je oyꞌajt huɨdibɨ Dios tɨ tuñ mɨɨd miich ajcxy ycɨxpɨ, caꞌydɨ ñaadɨgɨ̈ꞌaty Dios ytung.
\v 2 Com jaduꞌn jaybety yꞌity ma Dios ñecy ma Dios jaduꞌn ymɨnaꞌñ:
\q 
Co je xɨɨ tiempo tɨ patnɨ, tɨ ɨɨch miich mꞌayuc mɨdoohuɨ. Tɨ nbubety nbudɨgɨ̈yɨch je huinꞌit xɨɨ je huinꞌit tiempo co tɨ yhuaadꞌaty mɨna jäy ajcxy yꞌalma ñïdzögɨpy. Jadachambɨ xɨɨ tiempo tɨ yhuaadꞌajtnɨ mɨna jëbɨ Dios xyñïdzoocɨm ajt nꞌalma.
\p
\v 3 Caꞌ pɨn nꞌadzipyɨch co nduñɨch ma Dios ytung, jɨgɨx caꞌydɨ pɨnjaty ymɨnaꞌñ co caꞌ oy nduuñɨch. 
\v 4 Nañ jaduꞌn caꞌ nꞌadzibaꞌñɨch miich ajcxy. Nïgɨ ndzocyɨch co ñiguëxɨ̈gɨp tügꞌocɨy ɨɨch ndung co nduuñɨch mɨɨd Dios ycɨxpɨ. Ooy nyajtuñɨch mecxtujcɨn. Ooy nmecxtucyɨch ayoꞌn etz tzaachypɨ. Ooy nyajmayjatyɨch nhuit nducxy ngaayɨn nꞌuucɨn. Ooy ɨɨch ndzɨnaayɨn chipɨty.
\v 5 Tɨ ajcxy xycɨ̈ꞌatyɨch, tɨ ajcxy xypɨdáacɨxyɨch pujxtɨgoty. Tɨ jäy ajcxy xymɨbɨdɨ̈gyɨch, e ooy ajcxy yhuaangɨxy yjɨhuɨɨygɨxy. Tɨ tzaachypɨ nmɨnaxy nyajnaxyɨch ma ndungɨch. Mɨnaajɨty canaag xɨɨ caꞌ nmäyɨch, e mɨnaajɨty ayuu nꞌityɨch.
\v 6 Nyajniguëxɨ̈cpy ɨɨch ajcxy co ɨɨch ndúngɨxyɨch mɨɨd Dios ycɨxpɨ, mɨɨd co huädz jot huinmaꞌñ nmɨɨdɨdyɨch ajcxy. Caꞌ ma jɨbɨcpɨ nmɨɨdɨdyɨch ajcxy, mɨɨd co nꞌixpɨ́jccɨxyɨch ma Dios ytɨyꞌajt. Ooy mecxtujcɨn nmɨɨdɨdyɨch ajcxy. Ooy ɨɨch ajcxy nbaꞌayooyɨch nmɨgügtɨjcɨch. Dios yjɨhuɨꞌñ ymɨcꞌajt yajpatp ma ɨɨch ajcxy njot nhuinmaꞌñ. Ooy ɨɨch miich ajcxy ndzojccɨxy njɨhuɨɨygɨxy cɨxyjot huinɨjot.
\v 7 Nyajniguëxɨ̈gpy ɨɨch ajcxy co ndúngɨxyɨch mɨɨd Dios ycɨxpɨ, mɨɨd co ngapxhuäcxcɨxyɨch Cristo yꞌayuc ytɨyꞌajt tudägypɨ, e nañ mɨɨd co nmɨɨdɨdyɨch ajcxy Dios yjɨhuɨꞌñ ymɨcꞌajt, etz mɨɨd co nmɨɨdɨdyɨch ajcxy caꞌpxy Dios ytɨyꞌajt tudägypɨ. Mɨɨd yɨꞌ ytɨyꞌajt tudägyp nyajmɨbɨcyɨch jäy ajcxy, etz mɨɨd yɨꞌ ytɨyꞌajt naygohuaꞌñyiijɨch ma nmɨdzipɨch.
\v 8 Mɨnaajɨty jay xycapxpáadygɨxyɨch; mɨnaajɨty jäy ajcxy xyñigapxy xyñiꞌojɨ́ɨygɨxyɨch; mɨnaajɨty jäy ymɨnaangɨxy co oy nduuñɨch; mɨnaajɨty jäy ymɨnaangɨxy co jɨbɨc nduuñɨch; mɨna ngamɨna jäy xytíjcɨxyɨch co nꞌɨɨndáaccɨxyɨch; e mɨnaajɨty jäy ymɨnaangɨxy co tɨyꞌajt ngapxpɨch.
\v 9 Mɨnaajɨty jäy ymɨnaangɨxy co ajcxy caꞌ xyꞌixyꞌájtɨgɨxyɨch; e mɨnaajɨty jäy ymɨnaangɨxy co ooy oy xyꞌixyꞌájtɨgɨxyɨch; e mɨnaajɨty ayoꞌn jɨjpꞌam oꞌcɨn jɨjpꞌam nhuɨdíjtcɨxyɨch. Per jactzɨnaaybɨch ajcxy jaduꞌn. Tɨ je tungmɨɨdpɨ xychaachytúngɨxyɨch, per caꞌ ɨɨch ajcxy xyajꞌoꞌcyɨ.
\v 10 Ooy ɨɨch ajcxy njatajcɨxy njamaaygɨxy, per jabom jabom jotcujc nayjɨhuɨ́ɨygɨxyɨch. Ayoobɨ ɨɨch ajcxy caꞌ ti meeñ etz caꞌ ti pɨdägy nmɨɨdꞌájtcɨxyɨch. Per nañ jaduꞌn mayjäy oyꞌajtɨn padaꞌñ ma Dios mɨɨd ɨɨch ajcxy ndung ycɨxpɨ, jaduꞌn jada oyꞌajtɨn nipaady nej meeñ etz nej pɨdägy. Oy caꞌ meeñ etz caꞌ pɨdägy nmɨɨdɨdyɨch ajcxy, per nmɨɨdɨch ajcxy tügꞌócɨy huɨdibɨ nimɨna caꞌ ycɨxy ytɨgooy.
\p
\v 11 Mɨgügtɨjc ajcxy, huɨdibɨ yajpatp jɨm Corinto, tɨ nmɨɨdcapxcɨxy tɨ nmɨɨdmɨydaaccɨxy ma jada necy mɨɨd tügꞌócɨy tudägyꞌajt. Tɨ ngapxyɨch nmɨydägyɨch nej njot nhuinmaꞌñ nmɨɨdɨdyɨch.
\v 12 Caꞌ ɨɨch nꞌixmach nej ɨɨch miich ajcxy ndzojccɨxy njɨhuɨɨygɨxy cɨxyjot huinɨjot.
\v 13 Mayꞌajt nbɨjctzooybɨch ma miich ajcxy co xyajnɨmähuɨbɨch nej miich ajcxy mjot mhuinmaꞌñ mɨɨdɨty tɨm jaduꞌn nej tɨ nduuñɨch mɨɨd miich ajcxy. Jaduꞌn mayꞌajt nbɨjctzooyɨch ma miich ajcxy nej ungdeedytɨjc ajcxy oyꞌamy yꞌung ajcxy ɨɨhuijcɨxy capxhuijcɨxy.
\s Ɨɨch ajt jeꞌ ma Dios jugypɨ chɨnaayɨn
\p
\v 14 Miich ajcxy, caꞌ mdungmujccɨxy mꞌayoomujccɨxy mɨɨd jäy ajcxy huɨdibɨ caꞌ mɨbɨjccɨxy Cristo. Com caꞌ huaad tudägyjäy ajcxy mɨɨddzɨnaaygɨxy jäy ajcxy huɨdibɨ caꞌ tudägy huinmaꞌñ mɨɨdɨty. ¿Nej jëbɨ je huɨdibɨ tɨyꞌajtɨp ytügɨ̈y mɨɨd huɨdibɨ caꞌ ytɨyꞌajtɨty? ¿Nej jëbɨ pɨnjaty tɨyꞌajt mɨɨd mɨɨdꞌidɨpy pɨnjaty huɨdibɨ caꞌ tɨyꞌajt mɨɨdɨty? Je huɨdibɨ tɨyꞌajt mɨɨd jaduꞌn nipaady nej chɨnäy ma jɨɨn ytɨɨcxɨn. E je huɨdibɨ caꞌ tɨyꞌajt mɨɨdɨty ñipatp nej jɨhuɨ̈y chɨnäy agootztuuby.
\v 15 ¿Nej jëbɨ Cristo etz Satanás ñayꞌayuc-huinjɨhuɨ́ɨyɨgɨxy? ¿Nej jëbɨ tüg mɨbɨjcpɨ yajtügɨɨy yhuinmaꞌñ mɨɨd tüg huɨdibɨ caꞌ ymɨbɨcy?
\v 16 Caꞌ ni nej jëbɨ tzaadzech quipychech yꞌidɨpy ma Dios ytɨjc. Com yɨꞌ ajcxy huɨdibɨ tzaadzech ojadajtp caꞌ ajcxy yhuinmaꞌñ ytügɨ̈y mɨɨd Dios ytɨyꞌajt. Je Dios juugypɨ ymɨɨd chɨnaydac ma ɨɨch ajt njot nhuinmaꞌñ, paady ycɨxp jaduꞌn ɨɨch ajt nipaady nej Dios ytɨjc. Com jaybety yꞌity ma Dios jaduꞌn ymɨnaꞌñ:
\q
Ndzɨnaydac nbɨdägaamybɨch ma yɨꞌ ajcxy. Huɨdidaamybɨch ma yɨꞌ ajcxy yajpaady. Yɨꞌ ajcxy ɨɨch xyDiosꞌadaanɨp. E ɨɨch ajcxy yɨꞌ njäyꞌadaanɨp.
\m
\v 17 Paady nañ jaduꞌn ajt nHuindzɨn Dios ymɨnañ:
\q 
Copɨcy co miich ajcxy mꞌixmadzɨpy yɨ jacjadyii jäy ajcxy, e tzɨnaaygɨx abɨcy. Caꞌ ajcxy mnijotꞌadɨpy je jɨbɨcpɨ, huinꞌit ɨɨch miich ajcxy ngöbɨgɨpyɨch.
\q 
\v 18 Ɨɨch miich ajcxy xymɨɨdꞌadɨpyɨch jaduꞌn nej jɨhuɨ̈y ɨɨch miich ajcxy xyTeedyꞌadyii. E jaduꞌn miich ajcxy mꞌidɨpy nej ɨɨch nmang nꞌanäg.
\m
Jaduꞌn je mɨjpɨ Dios ymɨnaꞌñ.
\c 7
\p
\v 1 Miich ajcxy huɨdibɨ ooy ndzocy njɨhuɨ̈yɨch, com Dios jaduꞌn ymɨnaꞌñ co tzɨnaydac pɨdägaꞌñ ma ajt njot nhuinmaꞌñ, paady ycɨxp tzoc yajhuaatzɨm ajt njot nhuinmaꞌñ, etz ma ajt nꞌespíritu, e jaduꞌn Dios nhuindzɨgɨɨyɨm etz nyajmɨjꞌajtɨm cɨxyjot huinɨjot.
\s Co ajcxy jothuimbijt ma Dios huɨdibɨ ajcxy jɨm Corinto
\p
\v 2 Tungɨx mayꞌajt xycöbɨgɨpɨch miich ajcxy cɨxyjot huinɨjot. Caꞌ ɨɨch ajcxy ni pɨn tɨ nmɨdundɨgóoygɨxyɨch, nañ jaduꞌn caꞌ ni pɨn ɨɨch ajcxy tɨ nyajꞌixpɨ́jccɨxyɨch jɨbɨc-huinmaꞌñ. Nañ jaduꞌn ni caꞌ ɨɨch ajcxy pɨn tɨ nhuinꞌɨɨñɨch.
\v 3 Caꞌ jaduꞌn nmɨnaꞌñɨch mɨɨd co nyajpocycähuaꞌñɨch miich ajcxy. Com jaduꞌn jacjayɨjp tɨ mɨnaꞌñɨch co ooy ndzocy njɨhuɨ̈yɨch miich ajcxy, túꞌcɨy ajcxy ndzɨnaayɨm, e túꞌcɨy ajcxy nꞌóꞌcɨmɨpy.
\v 4 Ooy ɨɨch miich ajcxy njotꞌamɨjꞌadyiijɨch. Ooy ɨɨch miich ajcxy ngömaaygɨxy. Ooy jotcujc nayjɨhuɨ̈yiijɨch mɨɨd miich ajcxy ycɨxpɨ. Oy njayajpaadyɨch tzip agujc ayoꞌn agujc, per co njäymechɨch miich ajcxy, jotcujc nayjɨhuɨ̈yiijɨch.
\p
\v 5 Nej ɨɨch ajcxy njaꞌty ya Macedonia, caꞌ njotcujcꞌájtcɨxyɨch. Hueꞌ nyajpaadyɨch ajcxy tzip agujc capxy agujc huen maꞌámyɨty. Jäy ajcxy xymɨdzipꞌajtpɨch, etz nañ jaduꞌn tzɨgɨɨybɨch jotjoty huinmaꞌñyjoty.
\v 6 Per Dios je huɨdibɨ yajjotcugɨɨyb yajjotmɨcpɨjcp pɨnjaty tajp mayb, yɨꞌ tɨ xyajjotcugɨ̈yɨch co Tito yjaꞌty ya ma ɨɨch nyajpaady co jɨm choñ ma miich ajcxy.
\v 7 Caꞌ nan tɨ njotcugɨ̈yɨch mɨɨd tɨm jëyɨ co Tito tɨ xyñijädyɨch. Hueꞌ tɨ njotcugɨ̈yɨch co yɨꞌ tɨ xyñɨmäyɨch jaduꞌn nej yɨꞌ jotcujcꞌajtɨn tɨ paady ma miich ajcxy. Yɨꞌ tɨ xyajmɨɨdmɨydägyɨch jaduꞌn nej miich ajcxy tajɨn mayɨn mjɨhuɨɨygɨxy mɨɨd mbocy ycɨxpɨ. E nañ jaduꞌn nej mhuinmaaygɨxy nej nyajpaadyɨch. E mɨɨd jada ayuc nïgɨ tɨ njotcugɨ̈yɨch.
\p
\v 8 Ɨɨch caꞌ ndajy nmayich mɨɨd co ɨɨch miich ajcxy tɨ nyajtajcɨxy tɨ nyajmaygɨxy mɨɨd je necy huɨdibɨ ajcxy nyajniguejx. Oy anajty tɨ njajɨhuɨ̈yɨch jotmay co nnejhuɨ̈yɨch co miich ajcxy ooy mdajy may tüg xɨɨ mejtz xɨɨ mɨɨd ɨɨch nnecy ycɨxpɨ.
\v 9 Jadachambɨ ooy jotcujc nayjɨhuɨ̈yiijɨch. Caꞌ nmɨnaanɨm mɨɨd je tajɨn je mayɨn ycɨxpɨ huɨdibɨ miich ajcxy anajty mɨɨd jotcujcꞌajtpɨch, com co je tajɨn je mayɨn ajcxy tɨ xyajjothuimbijtcɨxy, Dios tɨ jäygɨdägy jaduꞌn nej miich ajcxy tɨ mmɨmadaaccɨxy je tajɨn mayɨn. E caꞌ ɨɨch tɨ ndundɨgooyɨch ma miich ajcxy co ajcxy njotmaymoy.
\v 10 Com Dios yjäygɨdacpyɨ co jäy njothuimbijtcɨxy, mɨɨd co taj may ñayjɨhuɨ́ɨyɨgɨxy mɨɨd ypocy ycɨxpɨ. E co ajcxy yjothuimbijtcɨxy, huinꞌit ajcxy je yꞌalma nïdzoocɨn paadɨpy. E caꞌ jeꞌ huaad nidajɨm nimaayɨm co ajcxy yꞌalma ñïdzögy. Co jäy ajcxy nidajcɨxy nimaaygɨxy huɨdi yajpat ya naaxhuiñ, e caꞌ yjothuimbijtcɨxy, jaduꞌñɨ nɨcxy je oꞌcɨn nipatcɨxy.
\v 11 Mɨɨd je tügpɨ jäy ypocy ycɨxpɨ tɨ mbaatcɨxy je tajɨn mayɨn. Miich ajcxy jaduꞌn tɨ mmecxtujccɨxy je tajɨn mayɨn jaduꞌn nej Dios jäygɨdägy. Tungɨx cuendɨ jadaꞌ cham nej tɨ yhuimbɨdzɨmy. Tɨydudägy janch cham tɨ mdɨydungɨxy mɨɨd je pocy ycɨxpɨ. Tɨ xyajjotmaꞌtcɨxy, e tɨ xyꞌadzɨgɨɨygɨxy, e niꞌixɨ̈y miich anajty mꞌijtcɨxy co mdzaachytunaangɨxy je huɨdi tɨ ytundɨgooy. E mɨɨd jada ycɨxpɨ tɨ miich ajcxy myajniguëxɨ̈ccɨxy, co caꞌ miich ajcxy ti pocy mmɨɨdɨty ma jadayaabɨ huinmaꞌñ.
\v 12 Co ɨɨch miich ajcxy jayhuin nijayɨy, caꞌ nmɨnaanɨm mɨɨd jeꞌ ycɨxpɨ huɨdibɨ anajty tɨ ytundɨgooy. Nañ caꞌ nmɨnaanɨm mɨɨd je huɨdibɨ anajty tɨ yajmɨdundɨgooy. Nijayɨɨyɨch miich ajcxy, jɨgɨx jëbɨ mnejhuɨɨygɨxy je tɨyꞌajt nej Dios tzocy co nduuñɨch mɨɨd miich ajcxy mꞌoyꞌajtɨn ycɨxpɨ.
\v 13 Com miich ajcxy tɨ mmɨjottɨgooyb Dios ytɨyꞌajt, paady ycɨxpɨ miich ajcxy tɨ mbaatcɨxy jotcujcꞌajt, e nañ jaduꞌn ɨɨch ajcxy tɨ nbáatcɨxyɨch jotcujcꞌajt mɨɨd miich ajcxy ycɨxpɨ. Nañ jaduꞌn ooy tɨ njotcugɨ̈yɨch ajcxy mɨɨd co Tito ooy chachjotcujcɨty. Oyꞌamy miich ajcxy tɨ mgöbɨjccɨxy Tito, paady yɨꞌ ooy tɨ yjotcugɨ̈y mɨɨd miich ajcxy ycɨxpɨ.
\p
\v 14 Co tɨ nnɨmäyɨch Tito co njotꞌamɨjꞌadyiijɨch miich ajcxy, caꞌ ti tzoꞌyduꞌn tɨ nbaadyɨch, co yɨꞌ oy tɨ xycoꞌixɨɨygɨxy. Nïgɨ oy tɨ yhuimbɨdzɨmy mɨɨd co tügꞌócɨy ayuc huɨdibɨ ɨɨch miich ajcxy tɨ nyajnɨmäy tɨ yhuimbɨdzɨmy co yjanchɨty. Nañ jaduꞌn tɨ yhuimbɨdzɨmy co yjanchɨty jaduꞌn nej tɨ nnimɨydacyɨch miich ajcxy mɨɨd Tito co njotꞌamɨjꞌadyiijɨch miich ajcxy.
\v 15 Jaduꞌn nej co Tito oy miich ajcxy xycogapxɨ̈y, yɨꞌ ooy nïgɨ xychojccɨxy xyjɨhuɨɨygɨxy co yɨꞌ nejhuɨ̈y jaduꞌn nej miich ajcxy mmɨjottɨgooygɨxy ɨɨch nꞌayuc, jaduꞌn nej mgapxymɨdoohuaangɨxy. E nañ jaduꞌn co yɨꞌ ijxy nej miich ajcxy yɨꞌ mgöbɨjcy mɨɨd tzɨgɨꞌñ jɨhuɨ̈ꞌñ.
\v 16 Ooy jotcujc nayjɨhuɨ̈yiijɨch, ooy njotꞌamɨjꞌadyiijɨch miich ajcxy.
\c 8
\s Ycüejtcɨxy mɨɨd oyjot oyhuinmaꞌñ
\p
\v 1 Jadügnax, miich ajcxy mɨgügtɨjc, nyajnejhuɨ̈huaamybɨch nyajmɨɨdmɨydägaamybɨch miich ajcxy, jaduꞌn nej Dios mayꞌajt oyꞌajt tuñ mɨɨd je mɨbɨjcpɨdɨjc ajcxy huɨdibɨ xɨɨ ya yajpatp Macedonia.
\v 2 Je mɨbɨjcpɨdɨjc huɨdibɨ ya yajpatp tɨ ooy ajcxy mɨnaxy yajnaxy tzaachypɨ etz ayoꞌn. Per caꞌ ñejɨty, ooy ajcxy jotcujc yajpatcɨxy. Nañ ayoobɨ ajcxy, per tɨ ajcxy may meeñ yajmujccɨxy, jaduꞌn nej jɨhuɨ̈y ajcxy ycomeeñɨty.
\v 3 Ɨɨch testigo co je mɨgügtɨjc mɨɨd ycɨꞌm tzojcɨn meeñ yejccɨxy, nej jëbɨ ajcxy ymadaaccɨxy mɨɨd meeñ, ixtɨ anaxy ajcxy yejccɨxy.
\v 4 Ooy xymɨnucxtägyɨch ajcxy co nꞌaꞌɨxɨ̈huɨbɨch ajcxy co jëbɨ ajcxy meeñ yajmujccɨxy huɨdibɨ mɨɨd pubedaangɨxy jacjadyii je mɨbɨjcpɨdɨjc.
\v 5 Nïgɨ anaxy ajcxy ooy meeñ yajmujcy caꞌydɨ jaduꞌn nej anajty njɨjpꞌixyɨch. Jayɨjp ajcxy ñayyejcɨ ma ajt nHuindzɨn Jesucristo, e huinꞌit ajcxy ñayyéjcɨgɨxy ma ɨɨch ajcxy jaduꞌn nej Dios tzocy.
\v 6 E chi jadaꞌ ɨɨch ajcxy ooy nmɨnucxtacy Tito co huen nɨcxy jadügꞌoc ma miich ajcxy. Huen nɨcxy yajcɨxy yajmay huɨdibɨ tɨ yajtzondägy ma miich ajcxy. Co huen je meeñ yajmujctäy huɨdibɨ cɨxyjot huinɨjot mɨɨd mbubedaangɨxy je mɨbɨjcpɨdɨjc ajcxy huɨdibɨ yajpatp jɨm Jerusalén.
\v 7 Miich ajcxy nïgɨ ooy mmadaaccɨxy, caꞌydɨ jacpɨnjaty ma tügꞌocɨy Dios ytung. Ooy mɨj mɨbɨjcɨn miich ajcxy mɨɨdɨty. Ooy myajꞌixpɨjccɨxy Dios ytɨyꞌajt. Ooy mmɨjottɨgooygɨxy mguydunaangɨxy ɨɨch nꞌayuc. E nañ jaduꞌn ooy miich ajcxy xychojccɨxy xyjɨhuɨ́ɨygɨxyɨch. Nañ ooy ndzocyɨch co miich ajcxy nïgɨ pubejtɨn myegɨpy ma je mɨbɨjcpɨdɨjc huɨdibɨ jɨm Jerusalén.
\p
\v 8 Caꞌ jaduꞌn nꞌaneꞌmyɨch co mbubéjtcɨxɨpy je mɨgügtɨjc huɨdi jɨm Jerusalén. Hueꞌ ndzocyɨch co miich ajcxy mnejhuɨ̈huɨpy jaduꞌn nej yɨ jacjadyii mɨbɨjcpɨdɨjc yhuinmaꞌñ bɨdaaccɨxyp cɨꞌm co pubedaangɨxy je ymɨgügtɨjc jɨm Jerusalén. Jaduꞌn mdunɨpy ajcxy jɨgɨx jëbɨ nnejhuɨ̈huɨbɨch pen janch tɨyꞌajt jaduꞌn co mdzojccɨxy mjɨhuɨɨygɨxy yɨ jacjadyii mɨbɨjcpɨdɨjc.
\v 9 Com miich ajcxy mnejhuɨɨygɨxyp jaduꞌn nej ajt nHuindzɨn Jesucristo mɨjmayꞌajt mɨjꞌoyꞌajt tuñ mɨɨd ɨɨch ajt ycɨxpɨ, jaduꞌn Jesús nipaady nej tüg mɨjcomeeñybɨ jiiby tzajpjoty, mɨɨd co yɨꞌ xychojccɨm xyjɨhuɨɨyɨm mɨjcajee, chi yɨꞌ ixmajtztay yɨꞌ yꞌoyꞌajtɨn jiiby tzajpjoty co ycɨdacy ya naaxhuiñ etz yꞌayooy ya. Miich ajcxy caꞌ anajty ti mɨɨdɨty jiiby tzajpjoty, per jadachambɨ mbadaangɨxyp mɨjꞌoyꞌajtɨn jiiby tzajpjoty.
\p
\v 10 Mɨɨd miich ajcxy mꞌoyꞌajtɨn ycɨxpɨ, ma jada necy nmooybɨch miich ajcxy ngapxhuijɨn jaduꞌn nej jëbɨ huaad mdungɨxy oyjäyꞌajtɨn. Jacꞌoy co miich ajcxy myajcɨxɨpy je huɨdibɨ ajcxy myajtzondac jadöjɨmɨjt. Miich ajcxy jacjayɨjp caꞌydɨ jac ni pɨnjaty tɨ myajtzondaaccɨxy meeñ yajmugɨɨ huɨdi mɨɨd mbubedaangɨxy je mɨbɨjcpɨdɨjc huɨdibɨ yajpatp jɨm Jerusalén. Nañ jaduꞌn miich ajcxy jacjayɨjp caꞌydɨ jacpɨnjaty mɨjottɨgooygɨxy co mbubedaangɨxy jacjadyii mɨbɨjcpɨdɨjc.
\v 11 Jadachambɨ tiempo jactungɨx pubejtɨn, meeñ yajmujccɨx cɨxyjot huinɨjot jaduꞌn nej tɨ myajtzondaaccɨxy ixtɨ mabaad myajmaygɨxy je meeñ yajmugɨɨ. Nidüg nidüg yejccɨx nej ajcxy ii mɨɨdɨty.
\v 12 Pɨnjaty yꞌofrenda yejcp janch cɨxyjot huinɨjot Dios ycöbɨjcɨp yɨꞌ jeꞌ yꞌofrenda, jaduꞌn nej ii mɨɨdɨty. Dios caꞌ yɨꞌ pɨjctzoy huɨdibɨ ajt caꞌ nmɨɨdɨty.
\p
\v 13 Caꞌ nmɨnaꞌñɨch co oy jaduꞌn co mbubéjtcɨxɨp jacjadyii mɨbɨjcpɨdɨjc ixtɨ mabaad mnayyajhuɨ́ꞌmɨgɨxy ayoꞌndumb.
\v 14 Hueꞌ yajmɨnaꞌñ co quipxyjaty mdzɨnaaygɨxy, ni pɨn cayajconaxɨpy e ni pɨn cayajmayjadɨ́py. Jadachambɨ tiempo miich ajcxy mmɨɨdɨty caꞌpxy je huɨdibɨ mnidzɨnaáygɨxɨp, ixtɨ miich ajcxy conajxpɨ, paady ycɨxp jëbɨ mbubéjtcɨxɨpy mɨgügtɨjc huɨdibɨ yajmayjajtp. Jadüg tiempo miich ajcxy myajmayjadɨpy, e jacjadyii mɨgügtɨjc jëbɨ xypubéjtcɨxɨpy, e jaduꞌn yhuimbɨdzɨmɨpy co mnaybubéjtɨgɨxy quipxyjaty miñ xyipy.
\v 15 Com jaduꞌn jaybety yꞌity ma Dios ñecy ma jaduꞌn ymɨnaꞌñ: “Pɨnjaty anajty mayꞌamy mɨɨd, caꞌ yajconajxy. E pɨnjaty anajty hueenɨ mɨɨd, caꞌ yajmayjajty.”
\s Tito mɨɨd ymɨgügtɨjc ajcxy
\p
\v 16 Per nyajnajxypɨch jäygɨdaacɨn ma Dios, com Dios tɨ pɨdägy ma Tito yjot yhuinmaꞌñ co mɨjottɨgooy miich ajcxy mꞌoyꞌajtɨn, tɨm jaduꞌn nej ɨɨch nmɨjottɨgooyɨch miich ajcxy mꞌoyꞌajtɨn.
\v 17 Co mayꞌajt nbɨjctzooyɨch ma Tito co nɨcxɨpy jadügꞌoc ma miich ajcxy, agujc jotcujc cöbɨcy, com tɨ anajty jayɨjp yhuinmaꞌñ pɨdägy cɨꞌm co ñɨcxaꞌñ jadügꞌoc ma miich ajcxy. Jadachambɨ Tito nɨcxɨp ma miich ajcxy mɨɨd cɨꞌmdzojcɨn.
\p
\v 18 Quipxyɨ mɨɨd Tito nguexy ɨɨch ajcxy yam tüg nmɨgüg huɨdibɨ ooy chachcapxpaadyɨty majaty mɨbɨjcpɨdɨjc, co ooy oy ytuñ capxhuäcxɨ Jesús yꞌayuc ytɨyꞌajt nej huaad jäy ajcxy yꞌalma nïdzoocɨn paady.
\v 19 Caꞌ nan jëyɨ co je mɨbɨjcpɨdɨjc yɨꞌ ycapxpadyii. Nañ jaduꞌn tɨ yhuinꞌixyii mɨbɨjcpɨdɨjc ajcxy co jëbɨ yhuɨdity mɨɨd ɨɨch ajcxy, e tunɨpy pubejtɨn mɨɨd je mayꞌajtɨn oyꞌajtɨn huɨdibɨ ɨɨch ajcxy ndumybɨch mɨɨd je mɨgügtɨjc ycɨxpɨ jɨm Jerusalén. Jaduꞌn nduuñɨch jaydëbɨ jäy ajcxy capxpaadɨp ajt nHuindzɨn Jesucristo. Etz nañ jaduꞌn jaydëbɨ ñiguëxɨ̈gy co ɨɨch ajcxy nbubedaꞌñɨch ajt nmɨgügtɨjc cɨxyjot huinɨjot.
\v 20 Ooy ngüendꞌatyɨch je meeñ huɨdibɨ je mɨbɨjcpɨdɨjc tɨ yajmujccɨxy, jɨgɨx caꞌydɨ pɨn huaad xyñigapxy xyñiꞌojɨ̈yɨch, jaduꞌn nej ɨɨch ajcxy meeñ nyajmújccɨxyɨch.
\v 21 Jaduꞌn ɨɨch ajcxy nhuinmaꞌñ nbɨdägy co tudägy ndunáangɨxyɨch caꞌ nan jëyɨ ma ajt nHuindzɨn Jesús yhuinduu, nañ jaduꞌn ma je mayjäy ajcxy yhuinduu.
\p
\v 22 Nañ jaduꞌn nguejxypɨch mɨɨd yɨꞌ ajcxy jadüg ajt nmɨgüg, je huɨdibɨ oy tɨ ytuuñ ma Dios ytung quipxyɨ mɨɨd ɨɨch ajcxy e nejhuɨɨybɨch co tudägy ytuñ cɨxyjot huinɨjot. E yɨꞌ miich ajcxy ooy xyjotꞌamɨjꞌadyii, e oy ytunaꞌñ mɨɨd miich ajcxy ma Dios ytung.
\v 23 Pen jɨm pɨnjaty nidɨy yajtɨy je Tito, nɨmaaygɨx co ɨɨch yɨꞌ nmɨgüg, e yɨꞌ mɨɨd nduuñɨch ma Dios ytung ma miich ajcxy. E nañ jaduꞌn pen jɨm pɨnjaty nejhuɨ̈huaꞌñ pɨnjäy ajcxy yɨꞌ, yɨ jacjadyiibɨ huɨdibɨ ajcxy nɨcxp mɨɨd Tito. Nɨmaaygɨx co je mɨbɨjcpɨdɨjc ajcxy ya Macedonia tɨ quexy ajcxy, ytungɨxy mɨɨd Cristo ymɨjꞌajtɨn ycɨxpɨ. 
\v 24 Paady ycɨxp miich ajcxy yɨꞌ mdzójccɨxɨpy mjɨhuɨ́ɨygɨxyɨpy je mɨgügtɨjc ajcxy huɨdibɨ mimb mɨɨd Tito, jɨgɨx jëbɨ je mɨbɨjcpɨdɨjc ma nidüg nidüg cajp ya Macedonia nejhuɨ̈huɨpy co miich ajcxy yɨꞌ mdzojccɨxy mjɨhuɨɨygɨxy je mɨbɨjcpɨdɨjc tɨydudägy. E paady ycɨxp jëbɨ ɨɨch jotcujc nayjɨhuɨ̈yiijɨch mɨɨd miich ajcxy ycɨxpɨ.
\c 9
\s Je cüejtɨn mɨɨd je mɨbɨjcpɨdɨjc ajcxy ycɨxpɨ
\p
\v 1 Nañ caꞌ yjaty ycopɨcyɨty co ɨɨch miich ajcxy njacnijayɨ́ɨygɨxɨpy co je mɨbɨjcpɨdɨjc huɨdibɨ xɨɨ ya pubejtɨn tunaangɨxyp ma Dios yjäy huɨdibɨ ajcxy jɨm Judea.
\v 2 Com nejhuɨɨybɨch co miich ajcxy nañ jaduꞌn mbubedaangɨxy cɨxyjot huinɨjot Dios yjäy huɨdibɨ ajcxy jɨm Judea. Paady ycɨxp jotcujc ɨɨch jaduꞌn nnɨmäyɨch je mɨbɨjcpɨdɨjc ya Macedonia jaduꞌn nej miich ajcxy jɨm Acaya mhuinmaꞌñ pɨdacy jɨdöjɨmɨjt co mbubedaangɨxy je mɨbɨjcpɨdɨjc huɨdibɨ jɨm Judea. E mɨɨd co miich ajcxy jayɨjp mhuinmaꞌñ tɨ mbɨdaaccɨxy co mbubedaangɨxy je mɨbɨjcpɨdɨjc huɨdibɨ ajcxy jɨm Judea, paady ycɨxp may mɨbɨjcpɨdɨjc ya Macedonia yhuinmaꞌñ pɨdaaccɨxy co ypubedaangɨxy nañ jaduꞌn.
\v 3 Paady nguejxypɨch Tito mɨɨd jacjadyii mɨgügtɨjc ma miich ajcxy, jaydëbɨ xypubéjtcɨxɨpy ma je meeñ yajmugɨɨ, jaduꞌn nej tɨ mbɨdaaccɨxy huinmaꞌñ. E ɨɨch caꞌ ti tzoꞌyduꞌn nbáadɨbɨch mɨɨd miich ajcxy ycɨxpɨ ma jada pubejtɨn huɨdibɨ ajcxy mguexamyb jɨm Judea. Com ɨɨch tɨ nnɨmäyɨch mayjäy co miich ajcxy niꞌixɨꞌ mꞌijtcɨxy mɨɨd mbubejtɨn.
\v 4 Caꞌ yjecyɨty co nijëjɨty mɨbɨjcpɨdɨjc huɨdibɨ tzɨnaayb ya Macedonia ñɨcxaꞌnɨp ajcxy mɨɨd ɨɨch co anajty nnɨcxyɨch jɨm ma miich ajcxy. E co anajty ɨɨch ajcxy jɨm nmejtzcɨxy, e chi ajcxy nbáatcɨxɨpy caꞌ anajty ajcxy mniꞌixɨ̈jɨty. Pues chi ooy tzoꞌyduꞌn njɨhuɨ̈huɨbɨch, com tɨ anajty ooy njotꞌamɨjꞌájtɨgɨxy. Nañ jaduꞌn miich ajcxy tzoꞌyduꞌn mjɨhuɨ̈huɨp.
\v 5 Paady ycɨxp huinmaꞌñ nbɨdägyɨch co oy jaduꞌn co nijëjɨty mɨgügtɨjc nɨcxy jayɨjp xycogapxɨɨygɨxy, e huen xypubejtcɨxy ma yɨ meeñ yajmugɨɨ jaduꞌn nej jɨdöjɨmɨjt tɨ mgapxytungɨxy. E co anajty nmechɨch jɨm ma miich ajcxy, chi niꞌixɨꞌ anajty ajcxy mɨɨdɨty yɨ mꞌofrenda, e jëbɨ jäy ajcxy nejhuɨ̈huɨp co yɨ mꞌofrenda tɨ myejccɨxy cɨxyjot huinɨjot, caꞌydɨ jäy ymɨnaangɨxy co ɨɨch miich adzip ajcxy tɨ nꞌaneꞌmgɨxy co mꞌofrenda nyajmújccɨxɨpy.
\p
\v 6 Jäymetz miich ajcxy jaduꞌn nej ayuc yꞌocꞌity: Pɨnjaty huenɨ niip, nañ jaduꞌn hueenɨ ycosecha yajpɨdɨ̈gy. E pɨnjaty mɨj niip, nañ jaduꞌn mɨj ycosecha yajpɨdɨ̈gy.
\v 7 Nidüg nidüg mɨbɨjcpɨ yegɨpy yꞌofrenda jaduꞌn nej anajty cɨꞌm yhuinmaꞌñ tɨ pɨdägy co yegaꞌñ. E caꞌ yegɨpy ametz jotmetz. E nañ jaduꞌn ni ycaꞌadzip ycaꞌaꞌécɨty. Com Dios chojcpy yjɨhuɨɨyb pɨnjaty cɨxyjot huinɨjot yꞌofrenda yejcp.
\v 8 Dios jëbɨ mayꞌajt oyꞌajt tunɨpy mɨɨd miich ajcxy mɨjcajee, e miich ajcxy mbáatcɨxɨpy tügꞌócɨy tijaty conuucxɨn, e ixtɨ mmɨɨdꞌadɨpy tügꞌócɨy huɨdibɨ myajmayjajtcɨxy, e nañ jaduꞌn conaxpɨ naadɨgɨ̈bɨ nej huaad jacjadyii mɨbɨjcpɨdɨjc mbubejtcɨxy, e mdúngɨxɨpy canaagnax oyjäyꞌajtɨn.
\v 9 Jaduꞌn jaybety ymiñ ma Dios ñecy, ma jaduꞌn ymɨnaꞌñ:
\q 
Yɨ oyjäydɨjc ajcxy, yɨꞌ ajcxy nimooyb ayoobɨtɨjc huɨdibɨ ajcxy yajmayjajtpy. Yɨ oyjäydɨjc ajcxy co oyjäyꞌajtɨn tungɨxy, yejccɨxyp ijxpejt oybɨ huɨdibɨ yꞌidɨpy huinɨxɨɨ.
\m 
\v 10 Dios yejcpy je tɨɨm huɨdibɨ jäy ajcxy ñiipy, nañ jaduꞌn Dios yejcpy je jɨɨcxy pɨcy huɨdibɨ nidzɨnaayɨm nijugyꞌajtɨm. E jaduꞌn co miich ajcxy oyjäyꞌajtɨn mdungɨx mɨjcajee, je mꞌoyjäyꞌajtɨn ajcxy ñipaadɨp nej jɨhuɨ̈y mgosecha myajpɨdɨ̈ccɨxy mayꞌamy.
\v 11 E jaduꞌn miich ajcxy mɨɨdꞌadɨpy tügꞌócɨy jugyꞌajtɨn comeeñꞌajtɨn, jaydëbɨ mꞌofrenda myejccɨxy mɨjꞌamy. E mayjäy ajcxy Dioscojuyip yajnaxɨpy ma Dios mɨɨd je mꞌofrenda ycɨxpɨ, co anajty nyecyɨch miich ajcxy mꞌofrenda ma yɨꞌ ajcxy huɨdibɨ yajmayjajtp.
\v 12 Co ɨɨch ajt pubejtɨn nyejcɨm ma jacjadyii mɨgügtɨjc, canan jëyɨ co nbubejtɨm mɨɨd tijaty yajmayjajtcɨxyp. Nañ jaduꞌn yɨꞌ ajcxy jëbɨ yajnajxcɨxy Dioscojuyip canaagꞌoc.
\v 13 Yɨꞌ ajcxy capxpadamb Dios mɨɨd co je mꞌofrenda huɨdibɨ ajcxy tɨ myejccɨxy, yɨꞌ jeꞌ tɨyꞌajtɨp co miich ajcxy mgapxymɨdoogɨxy Cristo yꞌayuc ytɨyꞌajt. Paady ycɨxp may mɨbɨjcpɨdɨjc ajcxy Dios ojadájtcɨxɨpy e nañ jaduꞌn Dios ɨɨbáatcɨxɨpy capxpáatcɨxɨpy mɨɨd je pubejtɨn huɨdibɨ miich ajcxy anajty myejcpy mɨɨd yɨꞌ ajcxy ycɨxpɨ, etz nañ jaduꞌn mɨɨd jacjadyii mɨbɨjcpɨdɨjc ycɨxpɨ.
\v 14 E cɨꞌm yɨꞌ ajcxy Dios ojadadɨpy mɨbɨjctzohuɨpy mɨɨd miich ajcxy ycɨxpɨ, etz xychójccɨxɨp xyjɨhuɨ́ɨygɨxɨp ooy mɨɨd co Dios je mɨjpɨ conuucxɨn tɨ yecy ma miich ajcxy.
\v 15 Dioscojuyip yɨ Huindzɨnꞌajtɨm Dios mɨɨd yɨ ymɨjconuucxɨn huɨdibɨ tɨ yecy ma ɨɨch ajtɨn, ni pɨn canejhuɨ̈y nej jëbɨ yajnajtzcapxɨ̈y.
\c 10
\s Pablo mɨɨdɨty cötujcɨn co yꞌapóstolꞌadyii
\p
\v 1 Ɨɨch Pablo nmɨgapxypɨch miich ajcxy mɨɨd yungnaxy njot nhuinmaꞌñ, jaduꞌn nej jɨhuɨ̈y Cristo miich ajcxy xymɨɨdmɨydaaccɨxy. Com Cristo yungnaxy jot huinmaꞌñ mɨɨdɨty. Nijëjɨty miich ajcxy ymɨnaangɨx co ooy yungnaxy naybɨdägyiijɨch co nꞌityɨch mɨɨd miich ajcxy, e jadachambɨ co jɨguëgy nyajpaadyɨch, hueꞌ nꞌahuimbityɨch ahuaꞌñ, ndunaamybɨch ti ndunaamybɨch.
\v 2 Mayꞌajt nbɨjctzooybɨch co anajty ɨɨch miich ajcxy nɨcxy nꞌijxcɨxy, caꞌ jaduꞌn ndzocyɨch co copɨcy nꞌahuaꞌndägɨbɨch mɨɨd nijëjɨty miich ajcxy huɨdibɨ xyñïhuambejtpɨch, co nduñɨch etz ngapxyɨch ngɨꞌmtzojcɨn tɨm jaduꞌn nej huenpɨn naaxhuiñjäy ytungɨxy etz ycapxcɨxy mɨɨd ycɨꞌmtzojcɨn. Janch niꞌixɨꞌ nꞌityɨch, co anajty jɨm nmechɨch, chi mɨɨd nnayhuindɨnähuɨɨybɨch yɨꞌ ajcxy huɨdibɨ jaduꞌn xyñïhuambejtpɨch.
\v 3 Janch tɨyꞌajt co ndzɨnaayɨch jaduꞌn nej naaxhuiñyjäy chɨnaaygɨxy. Per caꞌ ndziptuñɨch nej jäy ajcxy chiptungɨxy.
\v 4 Caꞌ ɨɨch ajt nyajtunɨm naaxhuiñyjäy ymɨcꞌajt co nnaygohuaanɨm ma je jɨbɨcpɨ huɨdibɨ xymɨdzipꞌajtɨm. Hueꞌ nyajtunɨm Dios ymɨcꞌajt, huɨdibɨ jëbɨ mɨɨd nmɨmadaacɨm tügꞌócɨy huɨdibɨ caꞌoybɨ mɨɨd.
\v 5 Jaduꞌn ɨɨch ajcxy caꞌ nyajtzobadáangɨxyɨch je ayuc tɨyꞌajt huɨdibɨ caꞌ yjanchɨty, etz jeꞌ ayuc pɨn amɨj agɨx naybɨdaacɨp co Dios yꞌayuc ytɨyꞌajt adujcɨ. Tügꞌócɨy naaxhuiñyjäy yꞌayuc ytɨyꞌajt nbɨdáaccɨxyɨch ma Cristo, jɨgɨx tügꞌócɨy jäy ajcxy capxymɨdohuɨp Cristo.
\v 6 Co anajty miich ajcxy mhuinmaꞌñybɨdaaccɨxy co huädz mgapxymɨdohuaangɨxy tügꞌócɨy Cristo yꞌayuc ytɨyꞌajt, pɨnjaty cacapxymɨdoy, hueꞌ niꞌixɨꞌ nꞌijtcɨxɨch co yajmöhuaꞌñ castigo pɨnjaty cacapxymɨdoo. 
\p
\v 7 Miich ajcxy yɨꞌ mdzachcuendɨtungɨxy jäy ajcxy nej yjäyꞌajtcɨxy. Pen jɨm pɨnjaty ñayjɨhuɨ̈yii janch agujc jotcujc co Cristo yhuinꞌixyii mɨɨd ytung ycɨxpɨ, huen huinjɨhuɨɨygɨxy jotjoty co Cristo tɨ xyhuinꞌíjxcɨxyɨch nañ jaduꞌn mɨɨd yɨꞌ ytung ycɨxpɨ.
\v 8 Ɨɨch caꞌ ti tzoꞌyduꞌn jɨhuɨ̈yɨch mɨɨd co cɨꞌm nnaygömayiijɨch hueenɨ mɨɨd co Jesucristo xymooygɨxyɨch aneꞌmɨn cötujcɨn. Com ɨɨch ajt nHuindzɨn Jesucristo tɨ xymóoygɨxyɨch jada cötujcɨn, jɨgɨx ɨɨch miich ajcxy nyajyeecɨp mmɨbɨjcɨn, canan nyajtɨgoyɨp ajcxy mmɨbɨjcɨn.
\v 9 Caꞌ jaduꞌn ndzocyɨch co yquëxɨ̈gɨpy jaduꞌn nej jɨhuɨ̈y nꞌadzɨgɨ̈huaangɨxy mɨɨd je necy huɨdibɨ nyajniguejxypɨch miich ajcxy.
\v 10 Ymɨnaangɨxy co ɨɨch nnecy ooy tzaachyjaty chach chaach. E ymɨnaangɨxy co ma jäy ajcxy yhuinduu yung naxy njäyꞌaty, e ngapxɨn nmɨydáacɨnɨch caꞌ pɨn jäygɨdägy.
\v 11 Per yɨ jäy ajcxy huɨdibɨ jaduꞌn mɨnaangɨxp, copɨcy ajcxy nejhuɨ̈huɨpy co jaduꞌn nej ɨɨch ngapxɨn necyjoty co nijayɨɨygɨxy, co nyajpaadyɨch jɨguem, nañ tɨm jaduꞌn ngapxaꞌñɨch co anajty nꞌityɨch ma miich ajcxy.
\p
\v 12 Caꞌ huaad nꞌocnayꞌijxquipxɨm o nyajtügɨɨyɨm mɨɨd yɨꞌ ajcxy ytung huɨdibɨ tzach naygömayaanɨp cɨꞌm. Tzuu huinmaꞌñ locɨhuinmaꞌñ ajcxy ytungɨxyp, co pɨn jaduꞌn nayꞌixquipxɨp naymɨdoguipxɨp mɨɨd ycɨꞌmꞌayuc ycɨꞌmhuinmaꞌñ huɨdi ii yjajtpy ñejhuɨɨyb.
\v 13 Caꞌ ɨɨch cɨꞌm naygömayɨɨyb ma ycapadyii, huɨdibɨ ɨɨch ajcxy caꞌ xypátcɨxyɨch. Dios ɨɨch ajcxy xyajnejhuɨɨybɨch nijeꞌ nijeꞌ it lugar ma yɨꞌ tzocy ndúngɨxɨbɨch. E Dios jaduꞌn tzojc co nɨcxy ndungɨxy jɨm Corinto ma miich ajcxy myajpatcɨxy.
\v 14 Paady ycɨxpɨ ndúngɨxyɨch jëyɨ ma Dios xyquexyɨch, caꞌ jac ma. Nej ixyipy yꞌoctunyii yꞌocjadyii, pen caꞌ ixyipy ɨɨch jayɨjp tɨ nꞌityɨch ma miich ajcxy. Pues ɨɨch tɨm jayɨjp ngapxhuäcx Dios yꞌayuc ma miich ajcxy, e caꞌ jac ni pɨn.
\v 15 Pen huingbɨ jäy je Dios ytung yajtzondaacɨp ma tüg cajp, pues caꞌ ɨɨch huaad jɨm nduuñɨch, jaduꞌn nej jɨhuɨ̈y ɨɨch tɨ nyajtzondägyɨch je tung. Caꞌ jaduꞌn nduuñɨch, hueꞌ njɨjpꞌijxypɨch co miich ajcxy myajyeegɨp mmɨbɨjcɨn, huinꞌit jëbɨ njactunɨpɨch ma miich ajcxy, jaduꞌn nej Dios tzocy co ndunɨpyɨch.
\v 16 Co anajty jaduꞌn tɨ njactuñɨch ma miich ajcxy, huinꞌit xɨɨ ya nꞌɨɨhuäcxaꞌñɨch ngapxhuäcxaꞌñɨch Cristo yꞌayuc ytɨyꞌajt ma je it lugar jactɨm jɨguemjatypɨ ma miich ajcxy. Per caꞌ ndunaꞌñɨch ma huingbɨ tɨ yajtzondägy je tung.
\p
\v 17 Ooy ycopɨcyɨty ngömayɨm nyajmɨjꞌajtɨm ajt nHuindzɨn Jesucristo, e caꞌ yꞌoyɨty co naygömayɨm cɨꞌm.
\v 18 Com Dios caꞌ jäygɨdägy pɨnjaty cɨꞌm naygömayɨp. Hueꞌ Dios yjäygɨdacypɨ pɨnjaty ajt nHuindzɨn Jesucristo capxpatp.
\c 11
\s Pablo etz jeꞌ ajcxy huɨdibɨ yꞌayuccapxhuäcxp mɨɨd anɨɨ
\p
\v 1 Huaad co miich ajcxy ixyipy xyꞌocmɨmecxtujcɨch hueenɨ ɨɨch nlocɨ huinmaꞌñ huɨdibɨ ngapxaamybɨch. Oy ixyipy ñejɨty mɨmecxtuccɨch.
\v 2 Ooy ndzocy ooy njɨhuɨ̈yɨch miich ajcxy. Dios tɨ xymöyɨch je tzojcɨn jɨhuɨɨyɨn huɨdibɨ nmɨɨdɨch mɨɨd miich ajcxy ycɨxpɨ. Ndzojcypɨch co cɨxyjot huinɨjot miich ajcxy mmɨjpɨdaaccɨxy Cristo. Co miich ajcxy yajmɨjꞌadɨp Cristo cɨxyjot huinɨjot, huinꞌit jaduꞌn miich ajcxy nipaadɨpy nej tüg töxyꞌanäg piꞌcnɨp huɨdibɨ pɨjcp mɨɨd tüg yëydɨjc.
\v 3 Ndzɨgɨɨybɨch co huingbɨ jäy xyajhuinmaꞌñydɨgoyaangɨxy mɨɨd ixpɨcytɨjc yꞌayuc huɨdibɨ caꞌ ytɨyꞌajtɨty. E miich ajcxy mꞌixmadzaangɨxy jaduꞌn nej cɨxyjot huinɨjot tɨ mmɨjpɨdaaccɨxy Cristo. Tɨm jaduꞌn nipadaꞌñ miich ajcxy mjadaangɨxy nej yjajty jecyꞌajty je Eva co tzaꞌñ yhuinꞌɨɨnɨ.
\v 4 Com miich ajcxy mgöbɨjccɨxy huingbɨ jäy huɨdibɨ tɨgachjaty yajꞌixpɨjcp Jesús ytɨyꞌajt, caꞌ yjaduꞌnɨty nej ɨɨch ajcxy nyajꞌixpɨcyɨch. Etz nañ jaduꞌn miich ajcxy jotcujc mgöbɨjccɨxy huingbɨ espíritu, caꞌ yjëjɨty je Espíritu Santo huɨdibɨ tɨ mgöbɨjccɨxy jayɨjpꞌaty. Etz nañ jaduꞌn mgöbɨjccɨxy tɨgachjaty ayuc tɨyꞌajt, e caꞌ yꞌocjëjɨñ huɨdibɨ ajcxy mꞌalma xyajnïdzoocɨp. Caꞌ yꞌocjëjɨñ huɨdibɨ tɨ mmɨdoogɨxy ma ɨɨch ajcxy. Mɨcꞌamy mdzachmɨjpɨdaaccɨxy huingjäy yꞌayuc.
\v 5 Caꞌ jaduꞌn ytɨyꞌajtɨty co yɨ huindzɨndɨjc ajcxy huɨdibɨ naydíjɨgɨxp Jesús yꞌapóstol huɨdi jɨm ma miich ajcxy, co jac mɨcꞌajt mɨɨd ajcxy etz yjacmɨɨd ajcxy ixpɨjcɨn ma Dios ytɨyꞌajt, caꞌydɨ ɨɨch.
\v 6 Oy ɨɨch jadaꞌ caꞌ njatyɨch nej yajxon ngápxɨbɨch, caꞌ ooy ngoꞌayúcɨgɨch. Per caꞌ ñejɨty com yajxon njatyɨch nnejhuɨɨyɨch Dios ytɨyꞌajt. E tɨ nyajꞌijxcɨxy nyajnejhuɨɨygɨxy co nꞌixpɨ́cycɨgɨch ma Dios ytɨyꞌajt mɨɨd je ayuc huɨdibɨ ngapxhuäcxɨch ma miich ajcxy etz je mɨjhuinmaꞌñ huɨdi nduunɨch co jɨm nꞌijtyɨch ma miich ajcxy. 
\p
\v 7 ¿Nej tundɨgoyɨch jadaꞌ co ngapxhuäcxyɨch Jesucristo yꞌayuc ma miich ajcxy e caꞌ nbɨjctzooyɨch meeñ mɨɨd ndungɨch ycɨxpɨ? Jaduꞌn nnayyajnajxɨch anajty nej tüg mɨdumbɨ jɨgɨx miich ajcxy jacꞌoy jacjotcujc mdzɨnähuɨp.
\v 8 Tɨ ngöbɨcyɨch meeñ huɨdibɨ jacjadyii mɨbɨjcpɨdɨjc tɨ xymöyɨch huɨdibɨ tzɨnaayb ma huingbɨ cajp. Yɨꞌ ajcxy ymeeñ nyajtuunɨch co nyajꞌixpɨjcyɨch miich ajcxy.
\v 9 Co nꞌijtyɨch mɨɨd miich ajcxy jadöjɨmɨjt jadöhuixꞌam caꞌ nbɨjtzooyɨch ma miich ajcxy huɨdibɨ nyajmayjajtpyɨch anajty. Caꞌ nꞌadzijpyɨch ni pɨn. Yɨ mɨgügtɨjc huɨdibɨ ajcxy tzoon Macedonia, yɨꞌ ajcxy xymooyɨch huɨdibɨ anajty nyajmayjajtypɨch, paady ycɨxp caꞌ anajty meeñ nbɨjctzooyɨch ma miich ajcxy, caꞌ nꞌadzijpɨch miich ajcxy. E jaduꞌn njactunaꞌñɨch jaduꞌn nej nduuñɨch mɨɨd miich ajcxy co nꞌijtyɨch jɨm jadöjɨmɨjt.
\v 10 Nejhuɨɨybɨch co yjanchɨty co nmɨ́ɨdɨdyɨch Cristo ytɨyꞌajt, nañ tɨm jaduꞌn nnejhuɨ̈yɨch co cɨꞌm nbaadyɨch huɨdibɨ mɨɨdnayꞌixyiijɨch. E caꞌ pɨn ma tügꞌócɨy je Acaya naaxjot xycapɨ́jcɨbɨch jada jotcujcꞌajtɨn.
\v 11 ¿Naꞌamy co jaduꞌn nmɨnaꞌñɨch? ¿Jeꞌ co ɨɨch miich ajcxy caꞌ ndzojccɨxy? Caꞌ yjaduꞌnɨty. Dios ñejhuɨɨyb co ndzocy njɨhuɨ̈yɨch miich ajcxy.
\p
\v 12 Per njacyajtüyöyaamybɨch je ndungɨch huɨdibɨ ndumybɨch, e caꞌ meeñ nbɨjctzohuaꞌñɨch mɨɨd ɨɨch ndung ycɨxpɨ jɨgɨx co yɨ jacjadyii huindzɨndɨjc huɨdibɨ yajꞌixpɨjccɨxp ma miich ajcxy, caꞌ jëbɨ yꞌɨɨndaaccɨxy co yɨꞌ ajcxy túꞌcɨy ytungɨxy jaduꞌn nej ɨɨch nduuñɨch.
\v 13 Yɨꞌ ajcxy ymɨnaangɨxy co Cristo tɨ yajnïbɨ́jcɨgɨxy co ajcxy yɨꞌ yꞌapóstolꞌadyii, e caꞌ yjanchɨty, nɨgoob ajcxy huinꞌɨɨngɨxy yɨ mɨbɨjcpɨdɨjc. Ñayyajnájxɨgɨxy cɨꞌm nej jɨhuɨ̈y Cristo yꞌapóstolꞌájtɨgɨxy, e caꞌ yjanchɨty.
\v 14 Nañ ni caꞌ oy nhuinmaayɨch co jaduꞌn ɨdɨɨtzcɨxy, com nañ jaduꞌn je Satanás ñayyajtɨgachyii ñayyajnaxyii nej Dios yꞌángel huɨdibɨ tɨyꞌajt mɨɨd, e caꞌ yjanchɨty.
\v 15 Paady ycɨxp nmɨbɨjcpɨch co yɨ jäy ajcxy huɨdibɨ tumb mɨɨd je mujcuꞌ nañ jaduꞌn nayyajnaxyii jaduꞌn nej jäy tudägypɨ, e caꞌ yjanchɨty. Per Dios chaachytunamyb ajcxy jaduꞌn nej ypadyii mɨɨd je jɨbɨcpɨ ycɨxpɨ huɨdibɨ ajcxy ytumyb.
\s Je tzaachypɨ je ayoꞌn huɨdibɨ Pablo yjajtyp co yꞌayuccapxhuäcxy
\p
\v 16 Jadügꞌoc ɨɨch miich ajcxy nnɨmaaygɨxy: Ni pɨn ycamɨnaꞌnɨpy co ɨɨch locɨjɨty. Per pen nijëjɨty jaduꞌn ymɨnaangɨxy, caꞌ ñejɨty. Miich ajcxy amɨdooꞌijtcɨx ɨɨch nꞌayuc, jɨgɨx jëbɨ naygömayiijɨch cɨꞌm.
\v 17 Caꞌ ɨɨch ajt nHuindzɨn Jesucristo xycötujcmöyɨch, co jaduꞌn jëbɨ ngapxyɨch jaduꞌn nej cham ngapxaꞌñɨch. Hueꞌ ngapxaꞌñɨch jaduꞌn nej tüg locɨ jäy co naygömayaꞌñyiijɨch cɨꞌm.
\v 18 Mayjäy ajcxy ooy cɨꞌm chachnaygömayáanɨgɨxyp mɨɨd huɨdibɨ tɨ tungɨxy mɨɨd ycɨꞌm mɨcꞌajt ya naaxhuiñ. Nañ jaduꞌn ɨɨch nnaygömayaꞌñyiijɨch cɨꞌm.
\v 19 Miich ajcxy mdzachcöbɨjccɨxyp locɨ jäy ajcxy yꞌayuc, jeꞌ co mdzachnayyajnaxáanɨgɨxy jaduꞌn nej jɨhuɨ̈y ajcxy ooy mdzachcohuinmaꞌñɨty.
\v 20 Mgöbɨjcpy miich ajcxy co jäy ajcxy xytumbɨꞌadɨɨyb nej tɨm tzojccɨxy, huɨdibɨ ajcxy xyhuinjɨcxp xyhuimbɨjcp xyhuimmeetzp, e huɨdibɨ ajcxy xyꞌaneꞌmgɨxp, xycamɨjꞌijxcɨxy xycamɨjpɨdaaccɨxy, ixtɨ mgöbɨjccixyp co xycojxcɨxy ma ajcxy mhuiñyjɨjp.
\v 21 Oy njatzoꞌyduꞌnjɨhuɨ̈yɨch co nmɨnaꞌñɨch co caꞌ jaduꞌn nmɨ́ɨdɨdyɨch je jotmɨcꞌajtɨn, jɨgɨx jëbɨ ɨɨch miich ajcxy nduuñɨch jɨbɨc, jaduꞌn nej yɨ jaduꞌmbɨ huindzɨndɨjc tɨ xytungɨxy.
\p
Per jaduꞌn nej yɨꞌ ajcxy ñaygapxpadyii cɨꞌm, nañ jaduꞌn naygapxpadaꞌñyiijɨch cɨꞌm. Caꞌ ñejɨty pen capxpɨch jaduꞌn nej tüg locɨ jäy.
\v 22 Pen hebreojäy yɨꞌ ajcxy, hebreojäy ɨɨch nañ jaduꞌn. ¿Conaax cogajp ajcxy Israel? Ɨɨch nañ jaduꞌn. ¿Abraham ajcxy ymɨjꞌapꞌajtpy ymɨjteedyꞌajtpy? Ɨɨch nañ jaduꞌn.
\v 23 ¿Nej tumb ajcxy mɨɨd Cristo? Nïgɨ nduñyɨch mɨɨd Cristo, caꞌydɨ yɨꞌ ajcxy. Caꞌ ñejɨty oy ngapxyɨch jaduꞌn nej tüg locɨ jäy. Jac mɨc tɨ nduuñɨch mɨɨd Cristo caꞌydɨ yɨꞌ ajcxy. Canaagꞌoc codungdɨjc xychaachytuuñɨch. Tɨ nyajcɨ̈ꞌatyɨch mɨɨd matz etz mɨɨd coochac janch canaag cɨꞌ janch ycamachoꞌnɨty. Canaagꞌoc codungdɨjc xypɨdaacyɨch pujxtɨgoty, e yɨꞌ ajcxy caꞌ. Canaagꞌoc oꞌcɨn jɨjpꞌam tɨ nyajpaadyɨch, e yɨꞌ ajcxy caꞌ.
\v 24 Mɨgooxꞌoc judíojäy ajcxy ytungmɨɨdpɨ xycɨ̈ꞌajtyɨch mɨɨd cochac iipx majmocx mɨdaax cɨꞌ.
\v 25 Tugɨɨgꞌoc xychaachytuuñɨch mɨɨd matz. Tügtecy ajcxy xychaagächɨch. Tugɨɨgꞌoc je barco yquiñ mejyꞌagujc je huɨdibɨ ɨɨch anajty nyajnɨcxɨɨyb. Co je barco yquiñ tügtecy, chi tüg tzuum etz tüg xɨɨ nꞌijtyɨch ma je mejy anajty ooy ypɨdɨ̈gy.
\v 26 Ooy viaje nduuñɨch canaagꞌoc, e oꞌcjɨjpꞌam nꞌijtyɨch ma mɨjnɨɨgom yjadyii, e nañ jaduꞌn ooy anajty may meetzpɨ yajpaady ma anajty nhuɨdityɨch. Nmɨgogajpɨch, yɨ judíojäy, xyjayajꞌögaanɨch ajcxy. Tɨ ayoꞌn nbaadyɨch ciudadjoty etz ma yuugjot etz mejyjoty. E nañ tɨ ayoꞌn nbaadyɨch mɨɨd jäy ajcxy huɨdibɨ naybɨdaacɨp ajcxy nej ɨɨch ajt nmɨgüg, e caꞌ anajty yjanchɨty.
\v 27 Mɨnaajɨty ooy mɨc njɨhuɨ̈yɨch ndung nꞌayoꞌnɨch. Canaagꞌoc tɨ ndzumnaxyɨch caꞌ nmäyɨch. Canaagꞌoc nxɨɨnaxyɨch mɨɨd yuu tɨdzɨ̈bɨ. Janam jatzojc nꞌayuꞌatyɨch. Mɨnaajɨty ooy njɨhuɨ̈yɨch je tɨɨchypɨ, etz nyajmayjatyɨch nhuit nducxyɨch.
\p
\v 28 Mɨɨd jada ycɨxpɨ etz mɨɨd jac-huɨdijaty, nañ jaduꞌn jabom jabom ooy mɨc njɨhuɨ̈yɨch jaduꞌn nej yajpaady je mɨbɨjcpɨdɨjc nidügꞌócɨy canaag pɨcy xɨ ya.
\v 29 Pen nijëjɨty mɨbɨjcpɨdɨjc yajpaady amutz ma ajcxy ymɨbɨjcɨn, nañ jaduꞌn ɨɨch nayjɨhuɨ̈yiijɨch amutz. Pen nijëjɨty mɨbɨjcpɨdɨjc ypocytungɨxy, ɨɨch ndzoꞌyduꞌn njɨhuɨɨybɨch etz jɨbɨc nayjɨhuɨ̈yiijɨch mɨɨd yɨꞌ ajcxy ypocy ycɨxpɨ.
\v 30 Pen naygömayaanɨbɨch cɨꞌm, naygömayaanɨbɨch co amutz njɨhuɨ̈yiijɨch.
\v 31 Je Dios ɨɨch ajt nHuindzɨn Jesucristo yTeedy, je huɨdibɨ huaad nꞌojadajtɨm nꞌɨɨbaatɨm ngapxpaatɨm huinɨxɨɨ huinɨtiempo, yɨꞌ ñejhuɨɨyb co tɨyꞌajt jaduꞌn nej ngapxyɨch.
\v 32 Jecyꞌajty co nꞌijtyɨch jɨm Damasco, je gobernador huɨdibɨ anajty tumb mɨɨd je rey huɨdibɨ yxɨɨ Aretas, ypɨdac soldados ajcxy ma jadyii mɨjtuꞌ ycajptɨgɨ̈y, jɨgɨx jëbɨ xyajnɨcxyɨch mach.
\v 33 Per je mɨbɨjcpɨdɨjc ajcxy xycodɨyñajxɨch naaxcɨ́xy mɨjcachjoty ma tüg ventana aguu ma je mɨjpoch huɨdibɨ je cajp mɨɨd yjübojtzꞌahuɨdityɨty. E jaduꞌn ndzoocyɨch ma je gobernador ycɨ̈ꞌam.
\c 12
\s Huɨdibɨ Pablo yhuinꞌijx etz nejhuɨɨy
\p
\v 1 Ni ti ycayajpaady ycayajganarꞌaty co cɨꞌm ndzachnaygömaayɨm ndzachnayñigapxɨm ndzachnayñimɨydaacɨm. Per caꞌ yꞌocnejɨty nimɨydägaamybɨch ti nhuinꞌijxypɨch cumäyjoty, je huɨdibɨ je Huindzɨn Jesucristo xyajhuinꞌijxpɨch xyajniꞌixɨɨybɨch.
\v 2 Nꞌixyꞌajtypɨch tüg yëydɨjc huɨdibɨ mɨbɨjcp Cristo. Cham majmactz jɨmɨjt ma Dios yajpättɨgɨ̈yii tzajpjoty ma je mɨdugɨɨgpɨ tzajp. E caꞌ nejhuɨ̈yɨch pen hueꞌ yajpättɨgɨɨyɨ mɨɨd ñinïcx o pen caꞌ. Dios tügpajc nejhuɨɨyb.
\v 3-4 Jadügꞌoc nmɨnaꞌñɨch co Dios tɨ yajpättɨgɨy je yëydɨjc ma je oybɨ it. E caꞌ nnejhuɨ̈yɨch pen janch tɨ ypättɨgɨ̈y mɨɨd ñinïcx o pen caꞌ. Dios tügpajc nejhuɨɨyb. E jiiby ma je oybɨ it mɨdoy capxy ayuc huɨdibɨ caꞌ huaad ni pɨn jäy capxy mɨydägy nimɨna.
\v 5 Ooy ɨɨch amɨj agɨx nayjɨhuɨ̈huaꞌñyiijɨch mɨɨd je jaduꞌmbɨ yëydɨjc jaduꞌn nej jëjɨn huɨdibɨ Dios yajpättɨgɨy tzajpjoty. Per caꞌ ɨɨch cɨꞌm nayñimɨydägaꞌñyiijɨch naygömayaꞌñyiijɨch. Hueꞌ janchtɨy nayñimɨydägaanɨbɨch cɨꞌm nej nduñ nꞌayooyɨch ma ɨɨch ndzɨnaayɨn.
\v 6 Oy ixyipy ɨɨch cɨꞌm njanayñimɨydägaꞌñyiijɨch janch oy nej nduuñ nꞌayooyɨch, caꞌp jeꞌ anajty ngapxtɨgooyɨch, com jeꞌ anajty ngapxpɨch je janchypɨ. Per caꞌ jaduꞌn naygömayaꞌñyiijɨch, com caꞌ ndzocyɨch co jäy ajcxy nɨcxy xycömaayɨch nïgɨ anaxy. Huaad jaduꞌn co ajcxy mɨɨd mɨydacy je mɨgügtɨjc huɨdibɨ ajcxy ijxcɨxp huɨdibɨ ndumybɨch o huɨdibɨ ayuc ajcxy ymɨdoogɨxp huɨdibɨ ngapxpɨch.
\p
\v 7 Je capxy ayuc huɨdibɨ Dios xyajnejhuɨɨyɨch jiiby tzajpjoty, ooy anajty chach yꞌoyɨty. Paady ycɨxpɨ Dios pɨdacy jaduꞌn nej jɨhuɨ̈y tüg apy ma ɨɨch nninïcx, jɨgɨx caꞌydɨ amɨj agɨx nayjɨhuɨ̈yiijɨch. E je apy jaduꞌn nipaady nej mujcuꞌ xyajtzaachɨ̈yɨch.
\v 8 Tugɨɨgꞌoc Dios tɨ nmɨbɨjctzooyɨch co huen xyajpɨdzɨmɨch je huɨdibɨ xyajtzaachɨɨybɨch.
\v 9 Per je Huindzɨn Jesús xyñɨmaayɨch: “Jëbɨ jaduꞌn co mayꞌajt ndunɨpɨch mɨɨd miich ycɨxpɨ. Co pɨnjaty pumäy ñayjɨhuɨ̈yii, huinꞌit nïgɨ ñiguëxɨ̈gy ɨɨch nmɨcꞌajt.” Paady ycɨxpɨ njotcugɨ̈yɨch co pumäy nayjɨhuɨ̈yiijɨch, jɨgɨx ñiguëxɨ̈gɨpy Cristo ymɨcꞌajt ma ɨɨch ndzɨnaayɨn.
\v 10 Paady ycɨxpɨ ooy njotcújcɨdyɨch co pumäy nayjɨhuɨ̈yiijɨch, co jäy xyñigapxy xyñiꞌojɨ̈yɨch, co ti nyajmayjatyɨch, co jäy xyꞌixhuɨdityɨch xypahuɨdityɨch, co tzaachypɨ nyajnaxyɨch mɨɨd Cristo ycɨxpɨ. Co nayjɨhuɨ̈yiijɨch pumäy, chi nïgɨ mɨc nayjɨhuɨ̈yiijɨch mɨɨd Cristo ymɨcꞌajt ycɨxpɨ.
\s Pablo caꞌ yjotcujcꞌaty nej je mɨbɨjcpɨdɨjc ajcxy jɨm Corinto ytungɨxy
\p
\v 11 Co ɨɨch jaduꞌn cɨꞌm naygapxpadyiijɨch, tɨm jaduꞌn nipaady nej jɨhuɨ̈y ɨɨch tüg locɨ jäy. Adzip miich ajcxy jaduꞌn xytuuñɨch co copɨcy naygapxpadyiijɨch cɨꞌm. Hueꞌ yjapaadyii miich ixyipy ajcxy xycömaaybɨch xycapxpatpɨch. Ɨɨch caꞌp ɨɨch ti ndzoohuɨty. Oy ixyipy ɨɨch caꞌ ti mɨcꞌajt nmɨɨdɨdyɨch, per jatytimy nïgɨ mɨcꞌajt nmɨɨdɨdyɨch, caꞌydɨ yɨ huindzɨndɨjc huɨdibɨ ma miich ajcxy, huɨdibɨ ajcxy naydijɨp apóstol, e caꞌ yjanchɨty.
\v 12 Ma je tung huɨdibɨ nduuñɨch mɨɨd mecxtujcɨn ma miich ajcxy, tɨ ooy ñiguëxɨ̈gy mɨɨd canaag ijxpejt, mɨjhuinmaꞌñ etz milagros, co ɨɨch janch Cristo xyꞌapóstolꞌadyiijɨch.
\v 13 Caꞌ jaduꞌn ytɨyꞌajtɨty co mmɨnaangɨxy co nïgɨ oy tɨ nduuñɨch ma yɨ jacjadyii mɨbɨjcpɨdɨjc ma jacjadyii cajp, caꞌydɨ jaduꞌn nej tɨ nduuñɨch ma miich ajcxy. Pen tɨ ndundɨgooyɨch co caꞌ tɨ nbɨjctzooyɨch meeñ mɨɨd ɨɨch ndung ycɨxpɨ ma miich ajcxy, jaduꞌn nej jacjadyii ajcxy ytungɨxy, pues tungɨx mayꞌajt meecxcɨch ajcxy.
\p
\v 14 Jadachambɨ niꞌixɨꞌ nꞌityɨch co nnɨcxaꞌñɨch mɨdugɨɨgꞌocpɨ jɨm ma miich ajcxy. Caꞌ ti pubejtɨn nbɨjctzohuaꞌñɨch ma miich ajcxy mɨɨd ndungɨch ycɨxpɨ. Caꞌ ndzocyɨch miich ajcxy mmeeñ. Hueꞌ ndzocyɨch co miich ajcxy xymɨjnɨcxpedɨpyɨch. Jacꞌoy co ɨɨch miich ajcxy nbubedɨpy, caꞌydɨ co miich ajcxy xypubedɨpyɨch. Jaduꞌn ɨɨch nipaady mɨɨd miich ajcxy nej tüg ungdeedy. Je ungdeedy ypubejtpy yꞌung, e caꞌ nan je ung pubejtyp yteedy.
\v 15 Ɨɨch jotcujc nyajtundähuɨbɨch ma miich ajcxy tügꞌócɨy tijaty nmɨɨdɨch, ixtɨ ngɨꞌmmɨcꞌajtɨch tügꞌócɨy nyajtunaamybɨch mɨɨd miich ajcxy ycɨxpɨ, jɨgɨx jëbɨ nbubedɨpyɨch miich ajcxy. Oy janiguëxɨ̈gy co ɨɨch miich ajcxy njadzojccɨxy njajɨhuɨɨygɨxy, e miich ajcxy caꞌ xychójccɨxyɨch xyjɨhuɨɨygɨxyɨch.
\p
\v 16 Nijëjɨty miich ajcxy mmɨnaangɨxy co janch tɨyꞌajt co caꞌ ti pubejtɨn tɨ nbɨjctzooyɨch ma miich ajcxy, nijëjɨty ymɨnaangɨxy co janch nihuinmaꞌñ tɨ nyajcägɨxyɨch ma tüg trampɨ mɨɨd anɨɨ.
\v 17 ¿Nej tɨ ɨɨch miich ajcxy nhuinꞌɨɨngɨx mɨɨd je mɨgügtɨjc huɨdibɨ ajcxy nyajniguejx?
\v 18 Nbɨjctzoohuɨch mayꞌajt ma Tito co huen nɨcxy xycogapxɨɨygɨxy jadügꞌoc. E nyajpuguexɨɨyɨch jadüg ajt nmɨgüg huɨdibɨ mɨɨd ñɨcxy quipxyɨ. ¿Nej tɨ miich ajcxy Tito xyhuinꞌɨɨngɨxy? ¿Nej caꞌ yjanchɨty co ɨɨch etz Tito quipxyjaty ɨɨch ajcxy nhuinmaꞌñ nmɨɨdɨty, e túꞌcɨy ndúngɨxyɨch?
\p
\v 19 Caꞌ yjecyɨty co miich ajcxy mhuinmaꞌñybɨdáaccɨxy co ɨɨch ajcxy ndzachnayñigapxtúutɨgɨxy ma miich ajcxy. Caꞌ yjaduꞌnɨty. Ngápxcɨxpɨch nmɨydáaccɨxpɨch ma Dios yhuinduu je ayuc tɨyꞌajt huɨdibɨ Cristo xymóoygɨxɨch. E tügꞌócɨy huɨdibɨ ndúngɨxpɨch, hueꞌ ndúngɨxɨch jɨgɨx yeegɨp miich ajcxy mmɨbɨjcɨn.
\v 20 Com tzɨgɨɨybɨch co anajty nɨcxy nꞌíjxcɨxyɨch miich ajcxy, caꞌ jecyɨty co nbadaamybɨch je tɨyꞌajt co miich ajcxy caꞌ mhuinmaꞌñymɨɨdɨty jaduꞌn nej jëbɨ njäygɨdägyɨch yɨ mhuinmaꞌñ ajcxy. E miich ajcxy nañ jaduꞌn caꞌ mjäygɨdáaccɨxɨpy nej ɨɨch nhuinmaꞌñ mɨɨdɨdyɨch. Tzɨgɨɨybɨch co miich jadaꞌ ajcxy mnaychiptúnɨgɨxy, caꞌ mnayꞌixáanɨgɨxy nidüg nidüg, mnaymɨjotmáꞌtɨgɨxy; mnayñiꞌojɨ́ɨyɨgɨxy, e mbiitzcapxcɨxy; co ooy amɨj agɨx mnayjɨhuɨ́ɨyɨgɨxy, e caꞌ mnayꞌayuc-huinjɨhuɨ́ɨyɨgɨxy, caꞌ oy mꞌijtcɨxy.
\v 21 Tzɨgɨɨybɨch co jadügꞌoc nɨcxy nꞌixyɨch miich ajcxy, chi ajt nDios xyajjɨhuɨ̈huɨbɨch tzoꞌyduꞌn mɨɨd miich ajcxy ycɨxpɨ, etz njɨhuɨ̈huɨbɨch tajɨn mayɨn mɨɨd miich ajcxy mbocy ycɨxpɨ, e com caꞌnɨ mjothuimbijtcɨxy mjäydɨgooygɨxy je mjɨbɨc-huinmaꞌñ jaduꞌn nej mmɨgapxtɨgooygɨxy e mmɨdundɨgooygɨxy huingbɨ töxyjäydɨjc, etz jaduꞌn nej mmɨdundɨgooygɨxy mɨgüg ytöxyɨjc, etz jaduꞌn nej jɨbɨc-huinmaꞌñ miich ajcxy mmɨɨdɨty.
\c 13
\s Aneꞌmɨn capxhuijɨn etz capxpoocxɨn huɨdibɨ cɨjxnɨp je necy
\p
\v 1 Jada jeꞌ ymɨdugɨɨgꞌoc co ɨɨch miich ajcxy nɨcxy ngoꞌixɨ̈huaangɨxyp. Pen miich ajcxy mxɨ̈huaangɨxyp tüg mɨgüg ma ɨɨch co tɨ ytundɨgooy mɨɨd Dios ytɨyꞌajt, hueꞌ tzocy mɨɨd metz o tugɨɨg testigos.
\v 2 Co je mɨmejtzꞌocpɨ ɨɨch miich ajcxy oy ngoꞌixɨ̈y, chi nnɨmaayɨch yɨꞌ ajcxy huɨdibɨ tɨ ytundɨgooygɨxy anajty, e nañ jaduꞌn nnɨmaayɨch je huɨdibɨ jacpocytungɨxp co ɨɨch anajty jadügꞌoc nɨcxy miich ajcxy nꞌijxcɨxy, caꞌ nyajtunaꞌñɨch mecxtujcɨn ma yɨ huɨdibɨ ajcxy pocytungɨxp. E cham co nyajpaadyɨch jɨguëgy ma miich ajcxy, nnïgapxpejtpyɨch ma jada necy co jadügꞌoc nɨcxy nꞌixaꞌñɨch miich ajcxy, caꞌ nmɨmecxtugaꞌñɨch yɨꞌ ajcxy huɨdibɨ pocytungɨxp.
\v 3 E jaduꞌn miich ajcxy mmɨɨdꞌadɨpy tɨyꞌajt co ngapxnajxɨch Cristo yꞌayuc. E Cristo caꞌ jeꞌ yjaduꞌnɨty nej tüg jäy huɨdibɨ caꞌ mɨcꞌajt mɨɨdɨty. Hueꞌ jeꞌ yajniguëxɨ̈gyp ymɨcꞌajt ma miich ajcxy.
\v 4 Janch tɨyꞌajt co jaduꞌn ajcxy yajcruudzpejty Jesucristo nej jɨhuɨ̈y caꞌ anajty mɨcꞌajt mɨɨdɨty. Per jadachambɨ Jesucristo jugyꞌajtp mɨɨd Dios ymɨcꞌajt. Nañ tɨm jaduꞌn co nꞌijtɨm mɨɨd Jesús, jaduꞌn yquëxɨ̈gy nej jɨhuɨ̈y caꞌ mɨcꞌajt nmɨɨdꞌajtɨm. Per co nꞌidaꞌñɨch mɨɨd miich ajcxy, nmɨɨdꞌadaanɨbɨch Dios ymɨcꞌajt mɨɨd co nyajpaadyɨch ma Cristo.
\p
\v 5 Cɨꞌm naydɨyꞌajtpɨ́jcɨgɨx nidüg nidüg, pen janch tɨydudägy mmɨbɨjccɨxy Cristo. Cɨꞌm huinmaaygɨx ma ajcxy mgɨꞌmdzɨnaayɨn, pen janch mmɨbɨjccɨxy. ¿Nej caꞌ mdɨmjɨhuɨꞌmybɨjccɨxy, pen mɨɨd ajcxy Cristo ma mjot mhuinmaꞌñ? Pen caꞌ yjaduꞌnɨty hueꞌ anajty Cristo mmɨbɨjccɨxy nïgɨ́xy cohuajc.
\v 6 Per njɨjpꞌijxypɨch co miich ajcxy mnejhuɨ̈huɨpy co yjanchɨty co Cristo tɨ xyajnïbɨcyɨch yɨꞌ ytung, e caꞌ nꞌɨɨndägyɨch.
\v 7 Dios nmɨbɨjctzooybɨch mɨɨd miich ajcxy ycɨxpɨ, jɨgɨx caꞌ ti jɨbɨc-huinmaꞌñ mdúngɨxɨpy. Canan co ɨɨch ajcxy ndzachcömaybɨdzɨmmáangɨxyɨch, o co ɨɨch ajcxy nïgɨ nmɨɨdɨty Dios ytɨyꞌajt caꞌydɨ jac ni pɨnjaty. Jaduꞌn ndúngɨxyɨch, jɨgɨx miich ajcxy mdunɨpy oybɨ. Caꞌ ñejɨty oy jaduꞌn yquëxɨ̈gɨpy nej jɨhuɨ̈y ɨɨch ajcxy caꞌ oy mɨj nꞌixpɨ́cycɨgɨch.
\v 8 Com caꞌ huaad ni ti nej ndunɨm huɨdibɨ caꞌ yjanchɨty huɨdibɨ caꞌ ytɨyꞌajtɨty. Hueꞌ tzocy co tügꞌócɨy huɨdibɨ ndunɨm, naybadɨɨb mɨɨd Dios ytɨyꞌajt.
\v 9 Paady jotcujc ɨɨch ajcxy co nyajpáatcɨxyɨch nej jɨhuɨ̈y caꞌ ɨɨch ajcxy mɨcꞌajt nmɨɨdɨty, jɨgɨx miich ajcxy mɨcꞌajt mmɨɨdꞌadɨpy ma mmɨbɨjcɨn. Nmɨbɨjctzoohuaamybɨch ajcxy Dios mɨɨd miich ajcxy ycɨxpɨ, jɨgɨx ajcxy mmɨbɨjcɨn mɨꞌíjtcɨxɨpy caꞌpxy.
\v 10 Jada necy ɨɨch jayɨjp nguexamyb ma miich ajcxy, ma yam caꞌnɨ nɨcxy nꞌíjxcɨxyɨch miich ajcxy jadügꞌoc, jɨgɨx caꞌydɨ adzip ahuaꞌn anajty nyajtuuñ ɨɨch nꞌaneꞌmɨn ma miich ajcxy. Ɨɨch ajt nHuindzɨn Jesucristo tɨ xymöyɨch mɨcꞌajt, jɨgɨx jëbɨ ɨɨch miich ajcxy nyajyeegɨpy ma mmɨbɨjcɨn. Caꞌ nyajtɨgoyaanɨch miich ajcxy yɨ mmɨbɨjcɨn.
\p
\v 11 Mɨgügtɨjc ajcxy, capxcɨjxpɨch mɨɨd miich ajcxy, huen Dios xypubéjtcɨxɨpy xypudɨgɨ́ɨygɨxyɨpy. Mɨjottɨgooygɨx cuydunaangɨx tügꞌócɨy Dios ytɨyꞌajt ma mdzɨnaayɨn. Jotcujcꞌajtcɨx. Chɨnaaygɨx mɨɨd túꞌcɨy mjot mhuinmaꞌñ. Naymɨɨdꞌíjtɨgɨxy agujc jotcujc. Huen ajcxy Dios xymɨɨdꞌijtcɨxy. Je Dios huɨdibɨ jotcujcꞌajtɨn yejcp, e nañ jaduꞌn Dios xychojctáaygɨxɨpy xyjɨhuɨydáaygɨxɨpy.
\v 12 Naygapxpóocxɨgɨx xïc xon.
\v 13 Tügꞌócɨy Dios yjäy huɨdibɨ ya, yquejxyp ajcxy capxpóocxɨn ma miich ajcxy.
\p
\v 14 Huen ajt nHuindzɨn Jesucristo mayꞌajt oyꞌajt tunɨpy mɨɨd miich ajcxy ycɨxpɨ. Huen Dios xychojccɨxy xyjɨhuɨɨygɨxy. Huen Dios yjɨhuɨ̈ꞌñ ymɨcꞌajt ity ma nidügꞌócɨy miich ajcxy mjot mhuinmaꞌñ. Jaduꞌn ngapxycɨ́xyɨch. Amén.