\id GAL
\h GÁLATAS
\toc1 GÁLATAS
\mt1 GÁLATAS
\mt2 Yɨ Necy Huɨdibɨ Pablo Yajniguejx Je Mɨbɨjcpɨdɨjc Jɨm Gálatas  
\c 1
\p
\v 1 Ɨɨch Pablo, Jesucristo xyquejxɨch co ngapxhuäcxɨbyɨch yɨꞌ yꞌayuc. Caꞌ nmɨnaanɨm jäy ajcxy xyajnïbɨjcɨch jada tung. Jesucristo etz Dios Teedy ajcxy tɨ  xyajnïbɨcyɨch jada tung. Jeꞌ jeꞌ je Dios huɨdibɨ yajjugypɨjc Jesucristo co yꞌoꞌcy. 
\v 2 Ɨɨch etz tügꞌócɨy mɨgügtɨjc ajcxy huɨdibɨ ya yajpatp ma ɨɨch nyajniguejxpɨch jada necy ma nidügꞌócɨy pɨnjaty mɨjpɨdacp Jesucristo, huɨdijaty naymujcɨp ma nidüg nidüg cajp jɨm Gálatas naaxjot.
\v 3 Nmɨbɨjctzooybɨch Dios Teedy etz ɨɨch ajt nHuindzɨn Jesucristo co huen oyꞌajt etz mayꞌajt tuñ ma miich ajcxy etz nañ jaduꞌn xyajjotcugɨ̈huɨp ajcxy.
\v 4 Ɨɨch ajt nHuindzɨn Jesucristo tɨ nayyoxyii tɨ naydogyii cɨꞌm anajty ma yɨ oꞌcɨn mɨɨd ɨɨch ajt nbocy ycɨxpɨ. E jaduꞌn tɨ xyñihuaanɨm ma je jäy ajcxy huɨdibɨ jɨbɨc huinmaꞌñ ymɨɨd huɨdibɨ tzɨnaayb ajcxy ma jadachambɨ xɨɨ tiempo. Jaduꞌn Jesucristo tuñ mɨɨd ɨɨch ajt ycɨxpɨ, com ɨɨch ajt nDios Teedy jaduꞌn tzojcp.
\v 5 ¡Ooy yꞌoyɨty co Dios Teedy huen mɨj etz cömay yꞌidɨpy huinɨxɨɨ huinɨtiempo! Jaduꞌn jada. Amén.
\s Caꞌp ji huingbɨ tɨyꞌajt huɨdibɨ jäy yꞌalma yajnïdzocp
\p
\v 6 Ooy ndzachhuinmaayɨch jaduꞌn nej tɨm tzojcy tɨ mjɨjpyöydutcɨxy je Huindzɨn Dios ytɨyꞌajt. Dios xyhuinꞌijxcɨxy jɨgɨx jëbɨ mmɨbɨjccɨxy je oyꞌajt je mayꞌajt huɨdibɨ Jesucristo ytuun mɨɨd miich ajcxy ycɨxpɨ. E miich ajcxy tɨ mhuinmaꞌñ myajtɨgajtzcɨxy, e tɨ mmɨbɨjccɨxy huingbɨ jäy ajcxy yꞌayuc, jaduꞌn nej caꞌ jëbɨ mꞌalma nïdzoocɨn padaangɨxy.
\v 7 Caꞌ nmɨnaanɨm co ji jadügnax Dios ytɨyꞌajt. Hueꞌ jeꞌnijëjɨty jäy ajcxy tɨ xyajhuinmaꞌñydɨgooygɨxy, ooy ajcxy yajtɨgadzaangɨxy je Dios yꞌayuc ytɨyꞌajt nej Jesucristo xyajnïdzögaanɨ ajcxy mꞌalma.
\v 8 Co ixyipy ɨɨch, o co ixyipy nidüg ɨɨch ndiscípulo, o co ixyipy tüg ángel huɨdibɨ tzajpjoty tzomb capxhuäcx ixyipy ma miich ajcxy ayuc tɨyꞌajt tɨgachjaty huɨdibɨ caꞌ ñaybadyii mɨɨd je tɨyꞌajt huɨdibɨ nyajꞌixpɨjc ajcxy ogaꞌnꞌaty, caꞌ mgöbɨ́jccɨxɨpy yɨjaduꞌmbɨ ayuc huɨdibɨ ajcxy xyajnɨɨdɨgoyaangɨxy xyajtüdɨgoyaangɨxy, Dios tzaachytunɨɨb yɨꞌ ajcxy yꞌalma.
\v 9 Tɨ jayɨjp nyajnɨmay, e cham jadügꞌoc nïgapxpetyɨch, pen ji pɨnjaty capxhuäcxy ma miich ajcxy tɨyꞌajt tɨgachyjatypɨ, huɨdibɨ caꞌ ñaybadyii mɨɨd je tɨyꞌajt je tɨɨbɨ miich ajcxy mꞌixpɨjccɨxy, copɨcy Dios chaachytunɨpy jada jäy mɨɨd ypocy ycɨxpɨ huɨdibɨ xychachyajnɨɨdɨgooygɨxp xychachyajtüdɨgooygɨxp.
\p
\v 10 Co jaduꞌn nmɨnaꞌñɨch, ¿nej mdijy co ndzocyɨch co jäy ajcxy xyjäygɨdägɨpy o co Dios xyjäygɨdägɨpy? ¿Nej ndzachyajjotꞌadaanɨch jäy ajcxy? Caꞌ huaad nduuñɨch huɨdibɨ jäy ajcxy chojcpy, yɨꞌ janchtɨy ndumybɨch huɨdibɨ Dios chojcpy. Co ixyipy nduuñɨch huɨdibɨ jäy ajcxy yjäygɨdacpy, caꞌ ixyipy nguyduuñɨch Cristo ytɨyꞌajt.
\s Nej Pablo oy paady je apóstolꞌat
\p
\v 11 Paady ndzocyɨch mɨgügtɨjc co mnejhuɨ̈huɨp ajcxy jada co je Dios yꞌayuc ytɨyꞌajt huɨdibɨ ngapxyhuäcxpɨch anajty ma miich ajcxy jaduꞌn nej jëbɨ ajcxy mꞌalma ñïdzögɨpy, caꞌ yɨꞌ ayucꞌadyii tɨyꞌajtꞌadyii huɨdibɨ jäy cɨꞌm tɨ cojcɨxy tɨ maacxcɨxy.
\v 12 Com je Dios yꞌayuc ytɨyꞌajt huɨdibɨ nmɨɨdɨch, caꞌ tɨ nbaadyɨch ma jäy ajcxy, nañ caꞌ nmɨnaanɨm jäy ajcxy tɨ xyajꞌixpɨcyɨch. Jesucristo cɨꞌm tɨ xyajhuinjɨhuɨ̈yɨch jada tɨyꞌajt.
\p
\v 13 Com miich ajcxy mnejhuɨɨygɨxp jaduꞌn nej jecyꞌajty ɨɨch tɨ ndzɨnäyɨch, co ɨɨch anajty nmɨjpɨdägyɨch yɨ judíojäy ajcxy ycostumbre. E mnejhuɨɨygɨxp jaduꞌn nej jecyꞌajty nꞌixhuɨdijtyɨch nbahuɨdijtyɨch mɨctägy je jäy ajcxy nidügꞌócɨy  huɨdijaty anajty mɨjpɨdaaccɨxp Dios ytɨyꞌajt.
\v 14 Nïgɨ ɨɨch anajty nꞌixpɨ́cyɨdyɨch ma yɨ judíojäy ajcxy yꞌixpɨjcɨn caꞌydɨ jac pɨnjaty judíojäy, caꞌydɨ jac pɨnjaty nmɨgügtɨjcɨch huɨdibɨ tügnax yjɨmɨjt mɨɨd ɨɨch. Com ooy anajty nïgɨ ndzachmɨjpɨdägyɨch nꞌap ndeedyɨch yꞌayuc.
\v 15 E Dios xyhuinꞌijxɨch jayɨjpnɨ caꞌnɨ anajty maꞌxungꞌatyñɨch co ndúnɨbɨch yɨꞌ ytung. Mɨɨd co Dios ooy tɨ xychocyɨch tɨ xyjɨhuɨ̈yɨch, paady xyhuooyɨch mɨɨd ytung ycɨxpɨ.
\v 16 Dios xyajnejhuɨɨyɨch yɨ yꞌung yꞌayuc ytɨyꞌajt, jɨgɨx ngapxhuäcxɨbɨch yɨꞌ yꞌayuc ma yɨ jäy ajcxy caꞌpɨ yjudíojäyɨty ajcxy. Caꞌ pɨnjaty nꞌixtaayɨch huɨdibɨ jëbɨ xyajꞌixpɨcyɨch Dios ytɨyꞌajt, hueꞌ Dios cɨꞌm xyajꞌixpɨjcyɨch yɨꞌ ytɨyꞌajt.
\v 17 Nañ jaduꞌn ni caꞌ nbättɨgɨɨyɨch jɨm Jerusalén ma yajpaady yꞌapóstoles ajcxy huɨdibɨ anajty ajcxy Dios tɨ yhuinꞌixyii. Chi tɨɨyɨ nnɨcxyɨch jɨm Arabia ñaaxjot. Co ɨɨch jɨm hueenɨ nꞌijtyɨch, chi nhuimbijtyɨch jɨm Damasco.
\p 
\v 18 Coonɨ tugɨɨg jɨmɨjt nhuäcxɨjpyɨch huinꞌitnɨ nbättɨgɨɨyɨch jɨm Jerusalén. Chi nꞌoyɨch ma Pedro anajty yajpaady, e chi jɨm nmɨɨdꞌijtyɨch jëyɨ majmocx xɨɨ.
\v 19 E caꞌ nmɨnaybaattɨch yɨ jacjadyii apóstoles. Jëyɨ ɨɨch mɨɨd naybaatɨ je Jacobo, je Huindzɨn Jesús yꞌuch.
\v 20 Je huɨdibɨ cham ɨɨch miich ajcxy niyajjayɨɨygɨxyp, tɨyꞌajt yɨꞌ. Yꞌijxyp ñejhuɨɨyb Dios co caꞌ nꞌɨɨndägyɨch.
\p
\v 21 Co ndzooñɨch Jerusalén, chi nnɨcxyɨch Siria naaxjot etz jɨm Cilicia naaxjot.
\v 22 Je huinꞌit tiempo yɨ Cristo yjäy ajcxy huɨdibɨ nayyöymujcɨp cajp cajp jɨm Judea naaxjot, caꞌ ajcxy anajty xyꞌixꞌadyiijɨch huingɨ́xy jɨjpcɨ́xy.
\v 23 Jëyɨ ajcxy nejhuɨ̈y anajty co jäy chachmɨnaangɨxy: “Yɨ jäy huɨdibɨ anajty xychachꞌixhuɨdijtɨm xychachpahuɨdijtɨm, cham yɨꞌ tzachcapxhuäcxy je Cristo ytɨyꞌajt, je tɨyꞌajt huɨdibɨ anajty ytimyyajcödɨgoyamyb.”
\v 24 Co je mɨbɨjcpɨdɨjc oy jaduꞌn tɨyꞌajt nejhuɨɨygɨxy, chi ajcxy yajnajxy Dioscojuyip ma Dios mɨɨd ɨɨch ycɨxpɨ.

\c 2
\s Jacjadyii Jesús yꞌapóstoles ajcxy cöbɨjccɨxy yɨ Pablo
\p
\v 1 Co majmactz jɨmɨjt, chi jadügꞌoc nnɨcxyɨch jɨm Jerusalén quipxyɨ mɨɨd Bernabé. Nañ jaduꞌn Tito xypanɨcxyɨch.
\v 2 Dios jaduꞌn tɨ xyajnejhuɨ̈yɨch co copɨcy nɨ́cxɨbɨch jadügꞌoc jɨm Jerusalén. Chi jɨm nyajmɨɨdmɨydacyɨch nijëjɨty jäy huɨdibɨ Jesús tɨ yhuinꞌixyii ajcxy, je huɨdibɨ ajcxy nigohuajcꞌajtp anajty je mɨbɨjcpɨdɨjc. (Ahuingujc ɨɨch ajcxy nxiicmujcy ngapxmujcy, caꞌydɨ ymayjäyꞌagujcɨty.) Nyajmɨɨdmɨydactaayɨch je Dios yꞌayuc ytɨyꞌajt huɨdibɨ ngapxhuäcxypɨch ma yɨ jäy ajcxy caꞌp yjudíojäyɨty. Jaduꞌn ngapxtɨ̈cxyɨch nꞌayucɨch ndɨyꞌajtɨch, jɨgɨx caꞌydɨ ajcxy xycapxꞌaducyɨch, e tɨ anajty jaduꞌñyɨ ñaadɨgɨ̈ꞌaty ɨɨch ndung huɨdibɨ jayɨjp tɨ nduuñɨch etz huɨdibɨ njactunaamybɨch anajty.
\v 3 Je jäy ajcxy huɨdibɨ nigohuajcꞌajtp anajty je mɨbɨjcpɨdɨjc jɨm Jerusalén yjäygɨdac ajcxy ɨɨch nꞌayuc jaduꞌn nej ngapxtɨ̈cxyɨch, e nañ ni caꞌ ajcxy ymɨnañ adzip co copɨcy yajtɨyꞌajttɨ̈huɨpy je Tito huɨdibɨ xypaꞌoyɨch jɨm, com griegojäy jeꞌ anajty, paady caꞌ yajtɨyꞌajttɨ̈y anajty.
\v 4 Caꞌ ixyipy pɨn huaam ycamɨnañ jɨm Jerusalén co Tito caꞌ yajtɨyꞌajttɨ̈y, co caꞌ nijëjɨty mɨbɨjcpɨdɨjc ycatɨgɨ̈y ayüch ameech huɨdibɨ caꞌ ymɨbɨjccɨxy cɨxyjot huinɨjot Cristo ytɨyꞌajt. Hueꞌ ajcxy amɨdoꞌijtcɨxy nꞌayucɨch nej huaad xyjɨjpcogapxɨɨygɨxyɨch. Caꞌ ajcxy yjotcujcɨty co ngapxhuäcxyɨch co nmɨbɨjcɨm Jesucristo, e caꞌ copɨcy nguydunɨm judíojäy ycostumbre. Yɨꞌ ajcxy adzip xyajnïhuidzaambɨch yɨ judíojäy ycostumbre, jaduꞌn nej jäy codoogɨ̈yɨ ajcxy adzip ytuungɨxy ma yhuindzɨn ytung.
\v 5 Ni catügjaxɨ̈gy ajcxy xycamɨmadacyɨch, e ni xycayajꞌamoñ ɨɨch ajcxy, com hueꞌ ndzocyɨch co huen Dios yꞌayuc ytɨyꞌajt oybɨ ity huädz ma miich ajcxy caꞌ ma anɨɨ.
\p
\v 6 Yɨ apóstoles ajcxy huɨdibɨ Jesús tɨ yhuinꞌíjxɨgɨxy huɨdibɨ ajcxy nigohuajcꞌajtp yɨ mɨbɨjcpɨdɨjc, caꞌ ajcxy ni ti tɨyꞌajt xyjacmöyɨch jemybɨ huɨdibɨ caꞌ jayɨjp nnejhuɨ̈yɨch. (Penɨ capxpaady ajcxy o penɨ caꞌ ycapxpaadyɨty, caꞌ nduuñɨch cuendɨ. Com Dios caꞌ huinꞌixpety jäy ajcxy tɨyduñ.)
\v 7 Co oy ajcxy nejhuɨ̈y co Dios tɨ xyquexyɨch ngapxhuäcxyɨch yɨꞌ yꞌayuc ytɨyꞌajt ma yɨ jäy ajcxy huɨdijaty caꞌ yjudíojäyɨty, tɨm jaduꞌn nej tɨ quexy Pedro co capxhuäcxɨ yɨꞌ yꞌayuc ma yɨ judíojäy ajcxy, caꞌ ɨɨch yɨꞌ ajcxy anajty nꞌayucɨch xyjɨjpcogapxɨɨyɨch, ooy ajcxy jäygɨdacy yɨ nꞌayucɨch ndɨyꞌajtɨch.
\v 8 Yɨ Dios huɨdibɨ Pedro quejx huen yɨꞌ yꞌayuc capxhuäcxy ma yɨ judíojäy ajcxy, nañ jaduꞌn ɨɨch xyquejxɨch co yɨꞌ yꞌayuc ngapxhuäcxɨbyɨch ma yɨ jäy ajcxy caꞌp yjudíojäyɨty.
\p
\v 9 Je Jacobo, je Pedro etz Juan ajcxy, je huɨdi nigohuajcꞌajtcɨxp yɨ mɨbɨjcpɨdɨjc, co ajcxy nejhuɨɨy jaduꞌn nej anajty Dios mayꞌajt oyꞌajt tɨ tuuñ mɨɨd ɨɨch, chi ajcxy xycöbɨjcyɨch agujc jotcujc Bernabé etz ɨɨch. E chi ɨɨch ajcxy mɨɨd nayꞌayuc-huinjɨhuɨɨyɨ co jëbɨ ɨɨch etz Bernabé nɨ́cxɨbɨch ma yɨ caꞌp yjudíojäyɨty ajcxy, etz jëbɨ yɨ Jacobo, Pedro etz Juan ajcxy ñɨcxcɨxy ma yɨ judíojäy ajcxy.
\v 10 Jëyɨ ajcxy mayꞌajt pɨjctzoy ma ɨɨch etz Bernabé co jaduꞌn paꞌayoꞌn ndunɨpyɨch ma yɨ judíojäy ayoobɨtɨjc. E chi ɨɨch ngoꞌadzoy co ndunamybɨch jaduꞌn agujc jotcujc.
\s Pablo ojy yɨ Pedro jɨm Antioquía
\p
\v 11 E jaduꞌn anajty mɨɨd tɨ nꞌocnayꞌayuc-huinjɨhuɨ́ɨyɨbɨch ixtɨ coon Pedro ycɨdacy jɨm Antioquía. Chi jɨm nnɨmaayɨch huinjɨjp co tɨ anajty jɨm Dios ytɨyꞌajt mɨdundɨgooyɨ co puhuäctuutnɨ je huɨdibɨ caꞌ yjudíojäyɨty, caꞌ yꞌocmɨɨdcaymujcnɨ.
\v 12 Com co caꞌnɨ anajty ymiñ jɨm Antioquía je judíojäy ajcxy huɨdibɨ anajty tzomb ma Jacobo jɨm Jerusalén, chi Pedro mɨɨdcaymujcnɨ je jäy ajcxy caꞌp judíojäyɨty. Co ajcxy ymiiñ chooñ Jerusalén, chi Pedro oy puhuäctuutnɨ je huɨdibɨ caꞌp yjudíojäyɨty, caꞌ yꞌocmɨɨdcaymugaanɨ anajty. Com Pedro tzɨgɨɨyb anajty co ñiꞌojɨ̈huɨɨyb je judíojäy huɨdibɨ mɨnamb co ooy ycopɨcyɨty yajtɨyꞌajttɨ̈huɨpy tügꞌócɨy jäy ajcxy huɨdibɨ mɨbɨjccɨxp Jesucristo.
\v 13 Co Pedro jaduꞌn oy yꞌɨdɨ̈ch, chi je jacjadyii judíojäy ajcxy huɨdi anajty jɨ́mɨp nañ tɨm jaduꞌn oy yꞌɨdɨɨtzcɨxy. Oy ajcxy janejhuɨ̈y tɨyꞌajt, e huädz cuydungɨxy. Ixtɨ Bernabé nañ jaduꞌn yꞌɨdɨɨch nej Pedro, com caꞌ anajty yjotmɨcɨty.
\v 14 E co ɨɨch jaduꞌn oy nꞌixyɨch co caꞌ ajcxy cuydungɨxy yajxon Jesucristo ytɨyꞌajt, chi ɨɨch nnɨmaayɨch Pedro mayjäyꞌagujc: “Penɨ miich judíojäy, e tɨ mꞌixmajtznɨ judíojäy ycostumbre co tɨ mɨbɨcy Jesucristo, e tɨ mꞌoccuydumyb je huinmaꞌñ huɨdibɨ judíojäy caꞌ cuydungɨxy, ¿nej tijy cham co adzip mdzachmɨnaandägy co yɨꞌ ajcxy huɨdibɨ caꞌp yjudíojäyɨty, copɨcy cuydúngɨxɨpy judíojäy ycostumbre, huɨdijaty miich tɨ mꞌixmajtznɨ?”
\s Yɨ judíojäy ajcxy quipxyjaty mɨɨd jacpɨnjaty
\p
\v 15 Jaduꞌn njacnɨmaayɨch Pedro: “Ɨɨch etz miich judíojäy ɨɨch ajt, huɨdibɨ ndajꞌajtɨm ndeedyꞌajtɨm nañ judíojäy. E caꞌ ɨɨch ajt njaduꞌnɨty nej jäy ajcxy caꞌpɨ yjudíojäyɨty, huɨdibɨ caꞌ cuydungɨxy Dios ycötujcɨn je jecyɨp huɨdibɨ Moisés yjayhuɨꞌm.
\v 16 Miich Pedro ɨɨch ajt nnejhuɨɨyɨm co jäy ajcxy caꞌ jëbɨ Dios yajpocyñïhuächyii mɨɨd tɨm jëyɨ co ajcxy cuydungɨxy Dios ycötujcɨn je jecyɨp huɨdibɨ Moisés yjayhuɨꞌm. Co yɨ jäy ajcxy mɨbɨjccɨxy Jesucristo, huinꞌit janchtɨy Dios yajpocyñïhuätzɨɨyb ajcxy. Nañ tɨm jaduꞌn ɨɨch ajt, tɨ nmɨbɨjcɨm je Cristo jɨgɨx jëbɨ Dios xyajpocyñïhuaatzɨm. E caꞌ jëbɨ huaad Dios xyajpocyñïhuaatzɨm ajt mɨɨd tɨm jëyɨ co tɨ nguyduunɨm Dios ycötujcɨn je jecyɨp. Caꞌ ni tüg jäy huɨdijaty jëbɨ Dios yajpocynïhuächyii, mɨɨd tɨm jëyɨ co cuyduunɨ Dios ycötujcɨn je jécyɨp.”
\p
\v 17 Co ajt nhuinmaꞌñ nbɨdaacɨm co nmɨbɨjcɨm Cristo jɨgɨx Dios jëbɨ xyajpocyñïhuaatzɨm, huinꞌit je judíojäy ymɨnaangɨxy co jɨbɨc-huinmaꞌñ nyajtuunɨm co caꞌ njaccuyduunɨm yɨꞌ ajcxy ycostumbre. ¿Nej mdijy je Cristo xyajtundɨgooyɨm jaduꞌn nej judíojäy ymɨnaangɨxy? Caꞌ yjaduꞌnɨty. Caꞌ jëbɨ huaad je Cristo xyajtundɨgooyɨm.
\v 18 Co ixyipy nmɨjpɨdaacɨm jadügꞌoc Dios ycötujcɨn je jecyɨp, je huɨdibɨ tɨ nꞌixmajtzɨm, jada ixyipy ijxpejtꞌajtp co ndundɨgooyɨm ma Cristo ytɨyꞌajt.
\v 19 Jecyꞌajty co nguyduunɨch anajty Dios ycötujcɨn je jecyɨp, huinꞌit caꞌ anajty nbaadyɨch tɨyꞌajt nej jëbɨ huaad Dios xyajpocyñïhuaachɨch, e jaduꞌn nipaady nej jɨhuɨ̈y tɨ nꞌögyɨch. Paady ycɨxpɨ tɨ nꞌixmachɨch je jécyɨp cötujcɨn, e tɨ nmɨjpɨdägyɨch Jesucristo ytɨyꞌajt jɨgɨx jëbɨ njactzɨnäyɨch mɨɨd Dios ycɨxpɨ.
\v 20 Jaduꞌn nayjɨhuɨ̈yiijɨch jaduꞌn nej jɨhuɨ̈y tɨ nꞌocꞌoꞌcpɨch, jaduꞌn nej jɨhuɨ̈y tɨ ngruudzpetyɨch quipxyɨ mɨɨd Cristo. Jadachambɨ caꞌ nꞌoctzɨnaayñɨch mɨɨd ngɨꞌm jugyꞌajtɨn ycɨxpɨ. Hueꞌ jeꞌ je Cristo ymɨcꞌajt etz ytɨyꞌajt tɨ chɨnaydacpɨcy ma ɨɨch njugyꞌajtɨn. E jaduꞌn nej cham njactzɨnäyɨch mɨɨd ɨɨch nninïcx, jactzɨnaaybɨch mɨɨd Dios yꞌung ycɨxpɨ, nmɨjpɨdacypɨch Dios yꞌung. Dios yꞌung tɨ xychocyɨch tɨ xyjɨhuɨ̈yɨch, e tɨ nayyoxyii naydogyii ma yɨ oꞌcɨn mɨɨd ɨɨch nbocy ycɨxpɨ.
\v 21 Caꞌ nniyajtɨgoyaꞌñɨch je mayꞌajtɨn je oyꞌajtɨn huɨdibɨ Dios tɨ tuuñ mɨɨd ɨɨch ycɨxpɨ. Co ixyipy jëbɨ Dios xyajpocyñïhuaatzɨm mɨɨd co ajt nguydunɨm Dios ycötujcɨn jëyɨ, huinꞌit ixyipy tɨ ñaadɨgɨ̈ꞌaty je Cristo co yꞌoꞌcy mɨɨd ajt nbocy ycɨxpɨ.
\c 3
\s Je ycötucɨn huɨdibɨ Moisés yejc o je mɨbɨjcɨn
\p
\v 1 Janch locɨ miich ajcxy mɨgügtɨjc huɨdibɨ tzɨnaayb jɨm Gálatas naaxjot. Tɨ jäy ajcxy xyajhuinmaꞌñydɨgooygɨxy mɨɨd jɨbɨc-huinmaꞌñ. Paady ycɨxp mdzachꞌixmadzaangɨxy je Dios ytɨyꞌajt. Ɨɨch oy njacapxhuäcxyɨch ma miich ajcxy mhuinduu je tɨyꞌajt jaduꞌn nej Cristo yajcruudzpejtɨ mɨɨd ɨɨch ajt nbocy ycɨxpɨ.
\v 2 Yɨꞌ nyajꞌamɨdooyb: ¿Nej tɨ mbaatcɨxy Dios yjɨhuɨꞌñ ymɨcꞌajt mɨɨd co mdzachcuyduunɨ Dios ycötujcɨn je jecyɨp? o ¿Nej tɨ mbaatcɨxy Dios yjɨhuɨꞌñ ymɨcꞌajt mɨɨd co tɨ mmɨdoogɨxy Jesucristo yꞌayuc e tɨ mmɨbɨjccɨxy? Hueꞌ janchtɨy tɨ mbatcɨxy Dios yjɨhuɨꞌñ ymɨcꞌajt co tɨ mmɨbɨjccɨxy Jesucristo, caꞌ nmɨnaanɨm co tɨ mguydungɨxy Dios ycötujcɨn je jecyɨp.
\v 3 Co Dios ogaꞌn yjɨhuɨꞌñ xyꞌadɨgɨɨygɨxy xyjottɨgɨɨygɨxy, chi mguychɨnaaygɨxy Jesucristo ytɨyꞌajt nej Dios yjɨhuɨꞌñ xyhuinmaꞌñymooygɨxy. ¿Nej co cham miich ajcxy mlocɨ huinmaꞌñ mdzachtungɨxy? Jadachambɨ jadügꞌoc mdzachtunaangɨxy mgɨꞌmhuinmaꞌñ.
\v 4 ¿Nej naadɨgɨ̈gɨ́xpɨ miich ajcxy tzaachypɨ tɨ mmɨnajxcɨxy tɨ myajnajxcɨxy mɨɨd Cristo ytɨyꞌajt ycɨxpɨ? Janch naadɨgɨꞌ jaduꞌn tzaachypɨ tɨ mmɨnajcxcɨxy tɨ myajnajxcɨxy, pen janch tüccɨ̈yɨ tɨ mꞌixmájtzcɨxnɨ Cristo ytɨyꞌajt.
\v 5 Jada nyajꞌamɨdoogɨxyp: ¿Nej tɨ Dios yjɨhuɨꞌñ ymɨcꞌajt xyꞌadɨgɨɨygɨxy xyjottɨgɨɨygɨxy etz tuñ mɨjhuinmaꞌñ ma miich ajcxy mɨɨd co tɨ mguydungɨxy Dios ycötujcɨn je jecyɨp? Caꞌ yjaduꞌnɨty. Hueꞌ Dios xyꞌadɨgɨɨygɨxy xyjottɨgɨɨygɨxy etz tuñ mɨjhuinmaꞌñ mɨɨd miich ajcxy mɨɨd co tɨ mmɨdoogɨxy Jesucristo ytɨyꞌajt etz tɨ mmɨbɨjccɨxy.
\p
\v 6 Jaduꞌn ymiñ cojay ma Dios ñecy co Abraham mɨbɨjcy Dios, e co yɨꞌ mɨjpɨdacy Dios yꞌayuc jaduꞌn nipaady nej jɨhuɨ̈y Dios yhuinmecxɨ ypocy, jɨgɨx jëbɨ yꞌity tudägy ma Dios yhuinduu.
\v 7 Jaduꞌn yjajty mɨɨd Abraham. Jeꞌ ymɨbɨjc Dios, e yajpocyñïhuaatzɨ Dios, jëbɨ ñaydijyii tudägy jäy ma Dios yhuinduu.
\v 8 Dios jecyꞌajty yajnihuinmayɨɨy co yajpocyñïhuädzaꞌñ je jäy ajcxy huɨdibɨ caꞌ yjudíojäyɨty, jëbɨ ajcxy ñaydijyii tudägy jäy ma Dios yhuinduu, mɨɨd co ajcxy mɨjpɨdägɨpy je mayꞌajt huɨdibɨ Dios ytunamyb mɨɨd yɨꞌ ajcxy ycɨxpɨ. Paady ycɨxpɨ jaaybety ymiñ ma Dios ñecy co jaduꞌn Dios mɨɨdmɨydac Abraham jecyꞌajty co yɨ huɨdibɨ caꞌ yjudíojäyɨty ypaadɨpy ajcxy yꞌalma nïdzoocɨn, com jaduꞌn Dios ymɨnañ: “Miid miich tüg mꞌap mꞌoc mayꞌajt oyꞌajt ndunaꞌñɨch mɨɨd naaxhuiñyjäy ajcxy ycɨxpɨ.”
\v 9 Paady ycɨxpɨ jaduꞌn nej jäy ajcxy tügꞌócɨy pɨnjaty mɨbɨjcp Dios, Dios mayꞌajt tunamb mɨɨd yɨꞌ ajcxy ycɨxpɨ co mɨbɨjccɨxy, tɨm jaduꞌn nej mayꞌajt tuun mɨɨd Abraham.
\p
\v 10 Dios chaachytunamy jäy ajcxy mɨɨd ypocy ycɨxpɨ, pɨnjaty huinmaꞌñ tzachpɨdacp co yꞌalma ñïdzoocɨn padaangɨxy mɨɨd co cuydungɨxy Dios ycötujcɨn je jecyɨp. Com jaduꞌn jaybety ymiñ ma Dios ñecy: “Dios chaachytunamyb jäy ajcxy mɨɨd ypocy ycɨxpɨ, pɨnjaty caꞌ mɨjpɨdägy tügꞌócɨy Dios ycötujcɨn, etz nañ jaduꞌn pɨnjaty caꞌ cuydundäy jada cötujcɨn.”
\v 11 Jadachambɨ mɨɨd je ayuc huɨdibɨ tɨ nyajnijayɨɨygɨxy ma jada necy, jëbɨ miich ajcxy mnejhuɨ̈huɨp co caꞌ ni pɨn jäy jëbɨ Dios yajpocyñïhuächyii mɨɨd huɨdijaty tɨ tungɨxy co cuydungɨxy Dios ycötujcɨn je jecyɨp. Com jaduꞌn ymiñ jaybety ma Dios ñecy ma Dios jaduꞌn ymɨnaꞌñ: “Yɨ jäy ajcxy pɨnjaty mɨbɨgɨp ɨɨch nꞌayuc, yɨꞌ ajcxy nyajpocyñïhuädzaamybɨch jëbɨ ajcxy yꞌalma paadɨp ñïdzoocɨn.”
\v 12 Dios caꞌ jaduꞌn ymɨnaꞌñ ma yɨꞌ ycötujcɨn huɨdibɨ Moisés yjayhuɨꞌm co jëbɨ nmɨjpɨdaacɨm, e huinꞌit Dios xyajpocyñïhuaatzɨm. Hueꞌ jeꞌ ymɨnaꞌñ ma ycötujcɨn co jëbɨ xychaachytuunɨm mɨɨd ajt nbocy ycɨxpɨ. Com jaduꞌn ymiñ jaybety ma Dios ñecy: “Yɨ jäy ajcxy pɨnjaty cuydumb Dios ycötujcɨn huɨdibɨ Moisés ycojay, copɨcy cuydundähuɨp, ni ma ycatundɨgoyɨpy.”
\p
\v 13 Cristo xyñihuaanɨm xyyajtzoocɨm ma anajty Dios xychaachytunaanɨm mɨɨd co caꞌ nguydundaayɨm Dios ycötujcɨn je jecyɨp. Cristo cɨꞌm tɨ yajnɨcxy je tzaachypɨ huɨdibɨ Dios ajt xymöhuaanɨm anajty. Com jaduꞌn jaybety ymiñ ma Dios ñecy: “Pɨnjaty anajty yajmɨjxotzpejtp ma tüg cruudz, hueꞌ anajty jeꞌ ycoꞌayooyb ypocy tɨɨbɨ tuñ.”
\v 14 Cristo oꞌc jeꞌ mɨɨd ɨɨch ajt nbocy ycɨxpɨ, jɨgɨx Dios jëbɨ cuyduñ yɨꞌ yꞌayuc jaduꞌn nej yajꞌahuanɨɨy Abraham jecyꞌajty, co mayꞌajt tunaꞌñ mɨɨd yɨ jäy ajcxy ycɨxpɨ huɨdibɨ caꞌp yjudíojäyɨty, etz nañ jaduꞌn mayꞌajt tunaꞌñ mɨɨd ɨɨch ajt ycɨxpɨ, jɨgɨx jëbɨ ɨɨch ajt nbaatɨm je Dios yjɨhuɨꞌñ co nmɨbɨjcɨm je Cristo.
\s Je cötujcɨn huɨdibɨ Moisés yejc etz huɨdibɨ Dios yꞌahuanɨɨy
\p
\v 15 Mɨgügtɨjc ajcxy, ngapxtɨ̈cxaamybɨch jaduꞌn nej Dios tɨ tuñ mɨɨd tüg ijxpejt nej jäy ajcxy ytuñ. Co ixyipy tüg jäy necy yajcojy ma nigapxy jaduꞌn nej ypɨdägy yajhuɨꞌmaꞌñ, e co yajcojtäy je necy, e chi firmɨjɨ̈y, e nañ jaduꞌn je testigo ajcxy yfirmɨjɨ̈y, huinꞌit caꞌ huaad pɨnjaty nɨxïgy yajxïgy jada tɨyꞌajt, e nañ jaduꞌn ni caꞌ huaad yajꞌungɨ̈y.
\v 16 Cuendɨtungɨxy Dios yꞌayuc ytɨyꞌajt, Dios ma yɨꞌ yꞌayuc yajꞌahuanɨɨy Abraham etz tüg yɨꞌ yꞌap yꞌoc co mayꞌajt tunaꞌñ mɨɨd yɨꞌ ajcxy jëyɨ. Caꞌ nmɨnaanɨm Dios yꞌayuc ymɨnaꞌñ co Dios yajꞌahuanɨɨy Abraham co mayꞌajt tunaꞌñ mɨɨd tügꞌócɨy yɨꞌ yꞌap yꞌoc. Hueꞌ jeꞌDios yꞌayuc ymɨnaꞌñ co mayꞌajt tunaꞌñ mɨɨd tügpajc yɨꞌ yꞌap yꞌoc, jeꞌ jeꞌ je Cristo.
\v 17 Dios caꞌ yɨꞌ nɨxïgy yajxïgy ytɨyꞌajt huɨdibɨ jayɨjp ymoy Abraham co yajniguejxy ycötujcɨn yɨ Moisés. Co Abraham yꞌoꞌcy, tɨ anajty ñajtznïnɨcxɨɨyñɨ mɨdaax mɨgoꞌpx jaꞌiipxmajc jɨmɨjt, chiinɨ oy Dios möy Moisés yɨꞌ ycötujcɨn. Tɨm jaduꞌn nej caꞌ huaad yajtɨgach je jäy ñecy ma nigapxy jaduꞌn nej ypɨdägy yajhuɨꞌmaꞌñ, nañ tɨm jaduꞌn caꞌ huaad Dios yajtɨgach yꞌayuc huɨdi yajnɨmay Abraham jaduꞌn nej mayꞌajt tunaꞌñ mɨɨd naaxhuiñyjäy ajcxy ycɨxpɨ.
\v 18 Dios yꞌahuanɨɨy yɨꞌ ytɨyꞌajt ma Abraham jecyꞌajty co mayꞌajt tunaꞌñ mɨɨd yɨꞌ yꞌap yꞌoc ycɨxpɨ etz mɨɨd tügꞌocɨy naaxhuiñyjäy ajcxy ycɨxpɨ. Co ixyipy jëbɨ jäy padaangɨxy yꞌalma ñïdzoocɨn mɨɨd huɨdibɨ ajcxy ytumyb co ajcxy cuyduunɨ Dios ycötujcɨn je jecyɨp, caꞌ ixyipy mayꞌajt tɨ tuñ co tɨ quexy je Cristo ya naaxhuiñ co jäy yajnïhuädzɨp.
\p
\v 19 ¿Ti ycɨxpɨ Dios co moy Moisés je cötujcɨn huɨdibɨ ycojay? Hueꞌ jeꞌ Dios moy jada cötujcɨn jɨgɨx jëbɨ niguëxɨ̈gy co jäy ajcxy caꞌ ycapxymɨdoogɨxy. Tunamb anajty Dios ycötujcɨn huɨdibɨ Moisés ycojay mabaad tɨ quexy ya naaxhuiñ yɨꞌ yꞌung, jeꞌ jeꞌ je Cristo, je Abraham yꞌap yꞌoc huɨdibɨ yajpocyñïhuätzp jäy ajcxy. Dios ycötujcɨn hue jeꞌ yajniguejx Moisés mɨɨd ángeles ajcxy. E chi Moisés capxnajxy ma ymɨgügtɨjc ajcxy.
\v 20 Co Dios tɨ quexy yɨꞌ oybɨ yꞌayuc ya naaxhuiñ mɨɨd yꞌung, paady ycɨxpɨ Dios caꞌ tzocy co huingbɨ capxnaxɨpy yɨꞌ yꞌayuc. Dios etz Dios yꞌung túꞌcɨy yɨꞌ.
\s Tigɨxpɨ Dios je Moisés cötujcɨn yejc
\p
\v 21 ¿Nej mdijy caꞌ ñaybadyii yɨ Dios ycötujcɨn huɨdibɨ Moisés ycojay, mɨɨd je ayuc huɨdibɨ Dios yajnɨmay Abraham? Naybaatɨp ajcxy yꞌayuc. Co ixyipy cayejcy Dios cötujcɨn ma jëbɨ jäy ajcxy yꞌalma ñïdzoocɨn padaangɨxy, huinꞌit ixyipy jëbɨ nbocyñïhuaatzɨm co ixyipy nguyduunɨm yajxon jada cötujcɨn.
\v 22 Caꞌ yjanchɨty co jëbɨ Dios xyajpocyñïhuaatzɨm mɨɨd co tijaty nduunɨm. Com ma Dios yꞌayuc ymiñ cojay co nidügꞌócɨy jäy ajcxy tɨ ytundɨgooy, ac pocy ymɨɨd ajcxy. Jaduꞌn Dios yꞌayuc ymɨnaꞌñ, jɨgɨx jëbɨ Dios yajpocyñïhuäch tügꞌócɨy pɨnjaty mɨjpɨdacp Jesucristo, jaduꞌn nej yajnɨmay Abraham jecyꞌajty co jaduꞌn tunaꞌñ.
\p
\v 23 Caꞌnɨ anajty Cristo ymiñ ya naaxhuiñ, huinꞌit anajty Dios ycötujcɨn ytuñ, yajpocycäy jäy ajcxy, e caꞌ Dios yajcomɨdoy jäy ajcxy ypocy. Jaduꞌn nej jɨhuɨ̈y jäy ixyipy ypujxtɨjcꞌɨñaaygɨxy e ahuijxcɨxy mɨna je juez ytɨydunáanɨgɨxy. Jaduꞌn anajty nꞌijtɨm jaduꞌn nej jɨhuɨ̈y nbujxtɨjcꞌɨñaayɨm, ixtɨ coonɨ Jesucristo ymiiñ ya naaxhuiñ yajpocyñïhuaatzp.
\v 24 Jaduꞌn anajty Dios cuendꞌaty yɨ judíojäy anajty mɨɨd ycötujcɨn huɨdibɨ Moisés ycojay. Tɨm jaduꞌn nej jäy cuendꞌaty huingjäy yꞌung. Jaduꞌn anajty Dios cuendꞌaty judío jäy ajcxy ixtɨ coonɨ Jesucristo ymiiñ ya naaxhuiñ jëbɨ yajpocyñïhuäch jäy ajcxy.
\v 25 Jadachambɨ co Jesucristo tɨ yꞌoy ya naaxhuiñ, e tɨ nmɨbɨjcɨm (tzojcɨngɨ́x) yɨꞌ ytɨyꞌajt, paady ycɨxpɨ cham caꞌ nꞌocꞌijtɨm cuendꞌaty mɨɨd Dios ycötujcɨn huɨdibɨ Moisés ycojay.
\p
\v 26 Com miich ajcxy tɨ mmɨjpɨdaaccɨxy Jesucristo ytɨyꞌajt, paady ycɨxp jëbɨ nidügꞌócɨy miich ajcxy naydíjɨgɨxy Dios yꞌung.
\v 27 Tügꞌócɨy miich ajcxy huɨdijaty tɨ mnɨɨbejtcɨxy, tɨ mnɨɨbejtcɨxy jɨgɨx jëbɨ mdügmujccɨxy mɨɨd Cristo, jadachambɨ nïducy mꞌijtcɨxy mɨɨd Cristo.
\v 28 Nidügꞌócɨy miich ajcxy tɨ mgöbɨjccɨxy Jesucristo jaduꞌn nej ajcxy mHuindzɨn. Jaduꞌn miich ajcxy judíojäy etz nañ jaduꞌn caꞌpɨ yjudíojäyɨty, nañ jaduꞌn miich ajcxy mɨdumbɨdɨjc etz miich ajcxy huɨdibɨ cɨꞌm nayꞌaneꞌmɨp, miich ajcxy yëydɨjctɨjc etz miich ajcxy töxyjäydɨjc; túꞌcɨy miich ajcxy myajpattaaygɨxy ma mHuindzɨn Jesucristo.
\v 29 Huenpɨnɨty miich ajcxy co mmɨjpɨdaaccɨxy Jesucristo, huinꞌit jëbɨ ajcxy mnaydijɨɨyb Abraham yꞌap yꞌoc, e huinꞌit jëbɨ mbáatcɨxɨpy tzɨnaydac jiiby tzajpjoty, je huɨdibɨ Dios yajꞌahuanɨɨy Abraham, Abraham yꞌung yꞌanäg etz Abraham yꞌap yꞌoc.
\c 4
\p
\v 1-2 Cha jadüg ijxpejt nyajnɨmäyɨch miich ajcxy huɨdibɨ capxtɨ̈cxp Dios ytɨyꞌajt. Tüg comeeñyjäy ymang hueꞌ anajty mutznɨ piꞌcnɨ jeꞌ anajty jëdaanɨp yteedy ypɨdägy. E chi yteedy tüg jäy yajnïbɨcy huɨdibɨ jëbɨ cuendꞌaty je pɨdägy etz je piꞌcꞌanäg mabaad paady je tiempo mɨna ycɨ̈dɨgɨ̈huɨɨgy je pɨdägy. Je comeeñyjäy yꞌung com co anajty caꞌnɨ yeegy, aneꞌmy anajty yꞌity, tɨm jaduꞌn nej aneꞌmy yꞌity je jäy huɨdibɨ mɨdumb.
\v 3 Tɨm jaduꞌn nej je comeeñyjäy yꞌung anajty yꞌity aneꞌmy, nañ tɨm jaduꞌn ɨɨch yɨ judíojäy ajcxy aneꞌmy anajty nꞌíjtcɨxyɨch co anajty caꞌ tɨydudägy naydijɨ́ɨygɨxyɨch Dios yꞌung.
\v 4-5 Co oy Dios yajhuaadꞌajtnɨ, chi oy quejxnɨ yꞌung ya naaxhuiñ. Yɨꞌ yꞌung maꞌxungꞌajt judíojäy, jɨgɨx jëbɨ codɨnäy jäy ajcxy ma Dios ycötujctac. Nañ jaduꞌn yɨꞌ maꞌxungꞌajt judíojäy jɨgɨx jëbɨ yajpocyñïhuäch yɨ jäy ajcxy huɨdibɨ tɨ yajpocycähuɨgɨxy Dios ycötujcɨn huɨdibɨ Moisés ycojay. Dios tɨ quexy yꞌung jɨgɨx jëbɨ xycodɨnaayɨm mɨɨd ajt nbocy ycɨxpɨ, e jaduꞌn Dios jëbɨ xycöbɨjcɨ jaduꞌn nej jɨhuɨ̈y xycɨꞌmꞌungꞌajtɨm.
\p
\v 6 Jadachambɨ mɨɨd co naydijɨm Dios yꞌung, paady ycɨxp Dios tɨ xyꞌadɨgɨɨyɨm tɨ xyjottɨgɨɨyɨm yɨꞌ yjɨhuɨꞌñ ymɨcꞌajt, paady ycɨxp ajt mɨnaanɨm co Dios ajt nDeedyꞌajtɨm etz nmɨnaanɨm: “¡Padre Nuestro!”
\v 7 Mɨɨd co miich ajcxy tɨ mmɨbɨjccɨxy Jesucristo, jadachambɨ caꞌ aneꞌmy mꞌocꞌíjtcɨxyñɨ ma Dios ycötujcɨn je jecyɨp, jaduꞌn nej je jäy ytumbɨdɨjc mɨɨdɨty aneꞌmy. Paady ycɨxp jëbɨ Dios xymóoygɨxɨpy jugyꞌajtɨn huɨdibɨ caꞌ ycɨxɨpy ytɨgoyɨpy, jaduꞌn nej Dios mɨɨdɨty jugyꞌajtɨn. Jadachambɨ miich ajcxy Dios xyꞌungꞌajt, etz jëbɨ mbáatcɨxɨpy pɨdägy ma Dios.
\s Pablo yjotmaybaady mɨɨd je mɨbɨjcpɨdɨjc ycɨxpɨ
\p
\v 8 Jecyꞌajty caꞌ anajty mnejhuɨɨygɨxy Dios ytɨyꞌajt tɨydudägy, ooy anajty mꞌojadajtcɨxy oyñiti huɨdibɨ caꞌ ymɨcꞌajt mɨɨdɨty. E caꞌ anajty mꞌojadajtcɨxy je Dios tzajpjotyp huɨdibɨ mɨcꞌajt mɨɨdɨty.
\v 9 Jadachambɨ tɨ mnejhuɨɨygɨxy Dios ytɨyꞌajt etz Dios tɨ xycöbɨjccɨxy. ¿Nej co jadügꞌoc mdzachnihuimbidaangɨxy yɨ judíojäy ycötujcɨn, caꞌp ti mɨcꞌajt mɨɨdɨty, huɨdibɨ tɨ mꞌijxmajtzcɨxy? E jadügꞌoc xyꞌaneꞌmygɨxy je judíojäy ycötujcɨn.
\v 10 Jadachambɨ mdzachcuydunaangɨxy judíojäy ycostumbre, jaduꞌn nej ajcxy myajmɨjꞌajtcɨxy xɨɨboꞌ xɨɨjɨmɨjt.
\v 11 Huinmaaybɨch ooy mɨɨd miich ajcxy ycɨxpɨ co naadɨgɨ̈ tɨ nyajꞌixpɨcyɨch miich ajcxy. Ninɨgoob ayoohuaꞌñ ɨɨch ndung ma miich ajcxy.
\p
\v 12 Mɨgügtɨjc ajcxy, cham mayꞌajt nbɨjctzooyɨch ma miich ajcxy. Yajtügɨɨygɨx yɨ mhuinmaꞌñ jaduꞌn nej ɨɨch nhuinmaꞌñ. Ɨɨch tɨ nyajtügɨ̈yɨch nhuinmaꞌñ mɨɨd miich ajcxy mhuinmaꞌñ co tɨ nꞌixmachɨch yɨ judíojäy ycostumbre. Je taab anajty nꞌityɨch mɨɨd miich ajcxy, caꞌ miich anajty ajcxy ɨɨch nꞌayuc xyjɨjpcogapxɨɨyɨ.
\v 13 Miich ajcxy mnejhuɨɨyb co anajty nꞌityɨch ma miich ajcxy, pumäy ɨɨch anajty nyajpaady mɨɨd yuu paꞌm ycɨxpɨ, paady ycɨxp ɨɨch jɨm jecy nhuäcxɨjpyɨch, ngapxhuäcxyɨch Jesucristo ytɨyꞌajt je jayɨjpꞌaty.
\v 14 Mɨɨd ɨɨch nbaꞌm ycɨxpɨ ooy nꞌadzijpy miich ajcxy ma mjɨɨn mdɨjc, e miich ajcxy caꞌ tɨ xyꞌixtijy e ni caꞌ miich ajcxy xymɨdzijpɨch. Jaduꞌn ɨɨch miich ajcxy xycöbɨjcy agujc jotcujc, tɨm jaduꞌn nej ixyipy tɨ mgöbɨjccɨxy Jesucristo cɨꞌm.
\v 15 Jadachambɨ ¿ti tɨ ytunyii tɨ yjadyii co caꞌ mmɨjotcujcꞌajtcɨxy ɨɨch nꞌayuc? Com nyejcɨch tɨyꞌajt co je taabɨ anajty ogaꞌn jɨm nꞌityɨch ma miich ajcxy co janch xypubedaambɨch miich ajcxy. Ixtɨ mgɨꞌm huiin anajty ajcxy mjayajpɨdzɨmaangɨxyp etz xymöhuaangɨxyɨch anajty co ɨɨch ngaaꞌaꞌɨxɨy.
\v 16 ¿Nej ɨɨch tɨ nꞌahuimbityɨch miich ajcxy mmɨdzɨp mɨɨd co tɨ nyajnɨmaaygɨxy huɨdibɨ janchɨp?
\p
\v 17 Yɨ huindzɨndɨjc jɨm ma miich ajcxy huɨdibɨ xychachyajꞌixpɨjccɨxp huɨdibɨ caꞌ ytɨyꞌajtɨty, caꞌ ajcxy oyhuinmaꞌñ mɨɨdɨty. Hueꞌ ajcxy tzachtzocy co miich ajcxy mꞌixmájtzcɨxɨp ɨɨch nꞌayuc ndɨyꞌajt. Hueꞌ ajcxy tzachtzocy co miich ajcxy yɨꞌ mgömayɨpy.
\v 18 Ɨɨch njajotcujcɨch jaduꞌn co huingbɨ huindzɨn ajcxy jëbɨ xyajꞌixpɨjccɨxy. Nɨgoobɨ co ixyipy jëbɨ ajcxy mꞌoyꞌajtɨn mbaatcɨxy. Caꞌ oy copɨcyɨty co ɨɨch cɨꞌm miich ajcxy nmɨɨdꞌijttɨɨhuɨpy.
\v 19 Mɨgügtɨjc huɨdibɨ ooy ndzocy njɨhuɨ̈yɨch jaduꞌn nej jɨhuɨ̈y ngɨꞌmꞌungꞌájtɨgɨxy, ooy tzaachypɨ ndzachjɨhuɨ̈yɨch mɨɨd miich ajcxy ycɨxpɨ jadügꞌoc. Jaduꞌn tzaachypɨ njɨhuɨ̈yɨch jaduꞌn nej ungdaj tzaachypɨ jɨhuɨ̈y co yꞌung yajmaꞌxungꞌadaꞌñ. Njɨhuɨ̈huaamybɨch tzaachypɨ ixtɨ coonɨ miich ajcxy anajty Cristo mhuinmaꞌñ xyajꞌoyɨɨyɨ.
\v 20 Ooy ɨɨch njanayꞌijxpadaꞌñyii ma miich ajcxy cham cham. Njamɨɨdcapxaangɨxy njamɨɨdmɨydägaangɨxy, chi ixyipy tɨyꞌajt njacyajnɨmaaygɨxy jac huädz. Ooy ɨɨch ndajy nmayɨch mɨɨd miich ajcxy ycɨxpɨ, nej nꞌocjacnɨmaaygɨxyɨpy.
\s Je Agar etz Sara yꞌijxpejt
\p
\v 21 Miich ajcxy huɨdibɨ mdzachcuydunamyb Dios ycötujcɨn je jecyɨp. Nmɨmaaygɨxy ajcxy, ¿nej caꞌnɨ ajcxy mɨdoogɨxy huɨdibɨ Dios ycötujcɨn nigapxypɨ?
\v 22 Com Dios yꞌayuc huɨdibɨ jaybetyɨp jaduꞌn ymɨnaꞌñ co Abraham ymɨɨd anajty metz ymang. Tüg jeꞌanajty ytajꞌajtɨp huɨdibɨ ypödumbꞌajtpy. Je jadügpɨ ymang anajty ytajꞌajtɨp huɨdibɨ ytimytöxɨjcꞌajtpy.
\v 23 Je huɨdibɨ je pödumbɨ yꞌungꞌajtɨ, hueꞌ jeꞌ ypiꞌcꞌajty jaduꞌn nej piꞌctɨjc jadyii ymaꞌxungꞌajtcɨxy. Je huɨdibɨ Abraham ytöxyɨjc yꞌungꞌajtɨ Dios jeꞌ mɨɨd ymɨcꞌajt ypiꞌcꞌajty, Dios ycuyduun yꞌayuc huɨdibɨ yajhuinhuanɨɨy Abraham.
\v 24 Jada jɨhuimbit ayuc jaduꞌn yhuimbidzɨmyb: jada Abraham ytöxyjäy ajcxy metz ijxpejtꞌajtp jaduꞌn nej Dios tɨ ytuñ mɨɨd yɨꞌ yjäy. Je ypödumbɨ huɨdi anajty yxɨɨ Agar, yɨꞌ mɨɨd yquipxɨ̈y yɨ Dios ycötujcɨn huɨdibɨ Dios ymoy Moisés ma je cop huɨdi yxɨɨ Sinaí. E tügꞌócɨy jäy ajcxy huɨdibɨ cuyduungɨxp Dios ycötujcɨn huɨdibɨ Moisés ycojay, aneꞌmy ajcxy jeꞌ yajꞌidyii, tɨm jaduꞌn nej tüg comeeñyjäy aneꞌmy yajꞌity yɨꞌ ytumbɨ ajcxy.
\v 25 Agar yɨꞌ nïgɨxꞌajtp je cop Sinaí jɨm Arabia ñaaxjot ma Dios moy Moisés je cötujcɨn. Agar je töxyjäy huɨdibɨ anajty pödumb, jeꞌ mɨɨd yquipxɨ̈y yɨ judíojäy huɨdibɨ tzachcuyduungɨxp Moisés ycötujcɨn, etz nañ yquipxɨ̈y mɨɨd Dios yꞌit ya naaxhuiñ jɨm Jerusalén. Yɨ judíojäy etz yꞌung yꞌanäg ajcxy huɨdibɨ tzach cuyduungɨxy Moisés ycötujcɨn je jecyɨp, aneꞌmy ajcxy yꞌity ma jada cötujcɨn, tɨm jaduꞌn nej jäy ajcxy huɨdibɨ tumb ma comeeñyjäy, e yꞌaneꞌmy ajcxy yꞌijtcɨxy.
\v 26 Je Sara huɨdibɨ Abraham ytöxyɨjcꞌajtpy, yɨꞌ mɨɨd yquipxɨ̈y ɨɨch ajt huɨdibɨ cuydumb je Cristo ytɨyꞌajt, e je Cristo yɨꞌ yajpatp tzajpjoty.
\v 27 Com jaybetyɨty ymiñ ma Dios ñecy co mayjäy paadaꞌñ oybɨ ma Dios, com Dios jaduꞌn ymɨnaꞌñ:
\q Jotcugɨꞌ jadügꞌoc miich Sara huɨdibɨ caꞌ yꞌungbaady. Xïc yäx miich mɨɨd jotcujcꞌajtɨn, miich huɨdibɨ caꞌ ungmoy. Nïgɨ ymayɨ̈huaꞌñ miich mꞌap mꞌoc caꞌydɨ Hagar yꞌap yꞌoc.
\p
\v 28 Ɨɨch ajt huɨdibɨ nmɨjpɨdaacɨm Jesucristo tügɨɨyɨm mɨɨd Abraham ymang Isaac. Com jaduꞌn nej Dios cuyduuñ yꞌayuc huɨdibɨ yajhuinhuanɨɨy Abraham co Isaac ymaꞌxungꞌajty, nañ tɨm jaduꞌn Dios cuyduuñ yɨꞌ yꞌayuc mɨɨd ɨɨch ajt co je Cristo yꞌoy ya naaxhuiñ.
\v 29 Tɨm jaduꞌn nej Abraham ymang Ismael jecyꞌajty mɨdzipꞌajty Abraham ymang huɨdibɨ Dios yajhuinhuanɨɨyɨ Abraham; nañ tɨm jaduꞌn yɨ jäy ajcxy huɨdibɨ tzachcuydungɨxp Dios ycötujcɨn je jecyɨp, ooy ajcxy tzach mɨdzipꞌadyii yɨ jäy ajcxy huɨdibɨ mɨbɨjcp Jesucristo.
\v 30 Oc-huinmay miich ajcxy nej jaybetyɨty ymiñ ma Dios ñecy co jaduꞌn Dios nɨmay Abraham:
\q Yajpɨdzɨm ma mdɨjc je mbödumbɨ mɨɨd ymang. Com caꞌ jaduꞌn ytɨyꞌajtɨty co je pödumbɨ ymang paadɨpy miich mbɨdägy. Yɨꞌ jeꞌ padamb je mbɨdägy huɨdibɨ miich mdöxyɨjc ymangꞌajtpy.
\m
\v 31 Mɨgügtɨjc ajcxy, caꞌ ɨɨch ajt nꞌocjaduꞌnɨñ nej je pödumbɨ yꞌung yꞌanäg ajcxy huɨdi aneꞌmy ijtp. Jaduꞌn ɨɨch ajt nipaady nej Abraham ytöxyɨjc yꞌung yꞌanäg huɨdibɨ caꞌ yꞌaneꞌmy yꞌity.
\c 5
\s Cristo tɨ xyajnïhuaatzɨm ma je cötujcɨn huɨdibɨ Moisés yejc
\p
\v 1 Je Cristo tɨ xyajpɨdzɨmɨm ma Dios ycötujcɨn je jecyɨp ma anajty nꞌijtɨm yꞌaneꞌmy, jɨgɨx jëbɨ tzojcɨngɨ́x nguyduunɨm yɨꞌ ytɨyꞌajt. Mɨbɨjccɨxy tɨydudägy Cristo ytɨyꞌajt, caꞌ mꞌixmajtzcɨxy. Caꞌ mniꞌahuimbíjtcɨxɨpy jadügꞌoc Dios ycötujcɨn je jecyɨp ma anajty mꞌijtcɨxy tɨm jaduꞌn nej comeeñyjäy ytumbɨ ajcxy yꞌijtcɨxy aneꞌmy.
\p
\v 2-3 Amɨdooꞌijtcɨx ɨɨch nꞌayuc. Jadachambɨ ɨɨch Pablo mɨnaambɨch pen miich ajcxy mgöbɨgamyb jada ayuc co copɨcy myajtɨyꞌajtɨ̈huɨpy, huinꞌit ñaadɨgɨ̈ꞌadaꞌñ co mmɨbɨjccɨxy Jesucristo ytɨyꞌajt. Caꞌ Jesucristo mayꞌajt tunaꞌñ mɨɨd miich ajcxy pen jaduꞌn mꞌɨdɨ̈dzaꞌñ. Jadügꞌoc nmɨnaꞌñɨch co pɨnjaty jaduꞌn ycuydunamyb tüg Dios ycötujcɨn, copɨcy ycuydundähuɨpy tügꞌócɨy.
\v 4 Pen mjɨjpꞌijxyp ajcxy co Dios xyajpocyñïhuätzaangɨxy mɨɨd co mguyduungɨxy tüg Dios ycötujcɨn, jaduꞌn nipaady nej jɨhuɨ̈y tɨ mꞌixmájtzcɨxnɨ Cristo yꞌayuc ytɨyꞌajt. Pen caꞌ mmɨjpɨdaaccɨxy je mayꞌajt oyꞌajt huɨdibɨ Cristo tɨ tuñ ninɨgoob mɨɨd miich ajcxy ycɨxpɨ, huinꞌit caꞌ Dios xyajpocyñïhuáatzcɨxɨpy. 
\v 5 Njɨjpꞌijxɨm co Dios xyajpocyñïhuädzaanɨm jɨgɨx jëbɨ naydijɨm tudägy ma Dios yhuinduu mɨɨd co nmɨbɨjcɨm Cristo etz mɨɨd co je Espíritu Santo xypubejtɨm.
\v 6 Co nmɨbɨjcɨm ajt Jesucristo, Jesucristo caꞌ cuendɨtuñ pen tɨ nyajtɨyꞌajttɨɨyɨm o pen caꞌ. Jëyɨ yɨꞌ tzocy co naychojcɨm nayjɨhuɨɨyɨm nidüg nidüg, e jada jeꞌ je ijxpejt co nmɨbɨjcɨm yɨꞌ ytɨyꞌajt.
\p
\v 7 Jayɨjpꞌaty oy yajxon anajty mꞌoccuydungɨxp Jesucristo ytɨyꞌajt. ¿Pɨn tɨ xyꞌagapxɨɨygɨxy co caꞌ 
mgapxymɨdohuaangɨxy tɨyꞌajt?
\v 8 Yɨ jäy ajcxy huɨdibɨ tɨ xyꞌagapxɨɨygɨxy caꞌ ajcxy tɨyꞌajt patcɨxy ma je Dios huɨdibɨ tɨ xyhuinꞌijxɨm jɨgɨx jëbɨ nmɨbɨjcɨm Cristo.
\v 9 Miich ajcxy mnejhuɨɨyb co jäy pɨdaaccɨxy levadura ma harina jɨch je levadura yajtɨgɨyɨydaayb je jɨch. Nañ tɨm jaduꞌn jada anɨɨ huɨdibɨ jäy ajcxy tɨ pɨdaaccɨxy ma miich ajcxy yajtɨgɨydähuamyb miich ajcxy mjot mhuinmaꞌñ.
\v 10 Com ɨɨch nmɨbɨjcpɨch co ajt je nHuindzɨn Jesucristo oyhuinmaꞌñ xymöhuɨpy ajcxy, paady ycɨxp njɨjpꞌijxypɨch co miich ajcxy mmɨbɨgaamyb ɨɨch ngapxy ɨɨch nꞌayuc. Dios chaachytunɨpy je jäy ajcxy huɨdibɨ tɨ xyajhuinmaꞌñydɨgooygɨxy. Oy ooy yjamɨj yjajanchɨty ajcxy, caꞌ ytimyñéjɨty, Dios yɨꞌ ajcxy tzaachytunɨɨb.
\p
\v 11 Mɨgügtɨjc ajcxy, co ixyipy yjanchɨty co ɨɨch ngapxhuäcxyɨch co copɨcy nidügꞌócɨy jäy yajtɨyꞌajttɨ̈huɨpy, ¿nej co jeꞌnɨ chambaad judíojäy xychachꞌixhuɨdityɨch xychachpahuɨdityɨch? Pen caꞌ ixyipy xyꞌixhuɨdityɨch xypahuɨdityɨch jaduꞌn nipaady nej jɨhuɨ̈y nyajꞌixpɨcyɨch co je Cristo caꞌ yꞌoꞌcy mɨɨd ɨɨch ajt nbocy ycɨxpɨ. 
\v 12 Yɨꞌ huɨdi ajcxy xyajhuinmaꞌñydɨgooygɨxyp, ooy ixyipy yꞌoyɨty co  ixyipy ajcxy xypuhuäctuutnɨ tüccɨ̈yɨ. 
\p
\v 13 Dios miich ajcxy tɨ xymɨjhuoogɨxy ma yɨꞌ ytɨyꞌajt jemybɨ jɨgɨx jëbɨ mꞌixmájtzcɨxnɨ je Dios ycötujcɨn je jécyɨp, etz tzojcɨngɨ́x mɨjpɨdägɨpy Cristo ytɨyꞌajt. Dios tɨ ajcxy mdüꞌaa xyꞌahuaatzɨ, per caꞌ huaad mduungɨxy je jɨbɨcpɨ huɨdibɨ mjot mhuinmaꞌñ chachñijotꞌajtcɨxpy. Hueꞌ aꞌoy naymɨꞌoyjäyꞌájtɨgɨx nidüg nidüg, naybubéjtɨgɨx miñ xyipy.
\v 14 Dios yꞌayuc ymɨnaꞌñ: “Mɨꞌoyjäyꞌadɨpy mmɨjɨɨn mmɨdɨjc, tɨm jaduꞌn nej miich ajcxy mdzocy co mmɨjɨɨn mmɨdɨjc  xymɨꞌoyjäyꞌadɨpy.” Co jaduꞌn ajcxy mnaymɨꞌoyjäyꞌadɨɨyb miñ yxipy, ytimyñipatyp jaduꞌn nej jɨhuɨ̈y tɨ mguydundäy tügꞌócɨy je Dios ycötujcɨn.
\v 15 Pen miich ajcxy mnaymɨdundɨgooyɨp etz mnaymɨjotmaꞌtɨp miñ xyipy, caꞌ yjetyɨty co cɨꞌm anajty jaduꞌn mdzachnayyajhuinmaꞌñydɨgóoyɨgɨxy miñ xyipy.
\s Je jugyꞌajt huɨdibɨ yɨ Espíritu Santo yejcpy
\p
\v 16 Jada capxhuijɨn ɨɨch miich ajcxy nyajnijayɨɨyb. Cuychɨnaaygɨx je Dios ytɨyꞌajt jaduꞌn nej je Espíritu Santo xyhuinmaꞌñymooygɨxy ajcxy. Caꞌ mguyduungɨxy je jɨbɨc-huinmaꞌñ huɨdibɨ mdzachnijotꞌajtcɨxyp cɨꞌm.
\v 17 Je jɨbɨc-huinmaꞌñ huɨdibɨ mdzachnijotꞌajtcɨxyp, hueꞌymɨdzipꞌajtpy je oybɨ huinmaꞌñ huɨdibɨ je Espíritu Santo xymooygɨxp. Dios yꞌayuc obyɨ caꞌ ñaygodɨgɨ̈yii mɨɨd miich ajcxy mjɨbɨc-huinmaꞌñ. Paady ycɨxp miich ajcxy ooy mjacuydunaangɨxy Dios yꞌayuc, e caꞌ ajcxy mmɨmadägaꞌñ ñɨcxy mguydundaaygɨxy.
\v 18 Pen tzojcɨngɨ́x mguyduungɨxy je Cristo ytɨyꞌajt huɨdibɨ Dios yjɨhuɨꞌñ xymooyb ajcxy, huinꞌit caꞌ copɨcy mguydúngɨxɨpy Dios ycötujcɨn je jecyɨp.
\p
\v 19 Com nnejhuɨydaayɨm jaduꞌn nej jäy ajcxy yjot yhuinmaꞌñ tzachnijotꞌajtcɨxy jɨbɨcpɨ. Jaduꞌn nej yëydɨjctɨjc tzachmɨgapxtɨgoyaangɨxy töxyjäydɨjc; e nañ jaduꞌn nej töxyjäydɨjc ajcxy ooy yëydɨjctɨjc tzachmɨɨdꞌügangɨxy etz mɨɨdꞌedzaangɨxy etz ma yɨjiibɨ ji ajcxy yhuinmaꞌñydɨgooygɨxy.
\v 20 E nañ nnejhuɨɨyɨm jaduꞌn nej jäy ajcxy tzachꞌojadajtcɨxy tzachhuingoxtɨnaaygɨxy je huɨdibɨ jäy ajcxy cɨꞌm tɨ yajcojy, etz nej jäy ajcxy tzachꞌojadajtcɨxy tzachyajtunaangɨxy caxpojcpɨdɨjc, nej jäy ajcxy ymɨgüg tzachmɨjotmaꞌtcɨxy; nej jäy ajcxy caꞌ tzip yjotꞌambɨjccɨxy mɨɨd yinjaty huenjaty ayuc; nej jäy ajcxy tzachmɨdzipꞌajtcɨxy ymɨgügtɨjc; nej jäy ajcxy tzachyajcaꞌoyꞌijxcɨxy ymɨgüg co tijaty mɨɨdɨty; nej jäy ajcxy chachnaybɨjc-huäcxáanɨgɨxy, huɨdibɨ abɨcy tzachmɨɨdꞌadamb yjäy.
\v 21 E nañ nnejhuɨɨyɨm jaduꞌn nej jäy ajcxy abɨjctɨgɨ̈huaangɨxy tijaty ymɨgüg ymɨɨd; nej jäy ajcxy ymɨgüg yajꞌoꞌccɨxy; nej jäy ajcxy nijotꞌajtcɨxy ügɨɨ etz adzuuhuɨdidɨɨ agoodzhuɨdidɨɨ, etz yɨ jäy ajcxy huɨdibɨ tzachnijotꞌajtcɨxp yɨ jaduꞌmbɨ huinmaꞌñ. Ɨɨch miich ajcxy cham njacyajnɨmaaygɨxy jaduꞌn nej ɨɨch jayɨjpꞌaty tɨ nꞌocnigapxpɨch, co yɨ jäy ajcxy huɨdibɨ yɨ jaduꞌmbɨ jɨbɨc-huinmaꞌñ chachnijotꞌajtcɨxp jaduꞌn nej cham tɨ nijayɨɨygɨxy, caꞌ ajcxy tzɨnaydac paadaangɨxy ma Dios yꞌaneꞌmy.
\p
\v 22 Hueꞌ ajt jadachambɨ nejhuɨydaayɨm je oybɨ huinmaꞌñ huɨdibɨ Espíritu Santo yejcyp. Co yɨ jäy ajcxy huɨdibɨ ymɨɨd Dios yjɨhuɨꞌñ ymɨcꞌajt ma yjot yhuinmaꞌñ, hueꞌ ytungɨxyp ajcxy yɨ oyjäyꞌajtɨn mɨɨd ymɨgügtɨjc; mɨɨd ajcxy xondaacɨn etz mɨɨd ajcxy jotcujcꞌajtɨn; etz ymɨmecxtujcɨxyp ymɨgügtɨjc; etz chojccɨxyp yjɨhuɨɨygɨxyp ymɨgügtɨjc; etz ytungɨxp oybɨ; etz tudägy yjäyꞌajtcɨxyp, 
\v 23 nicy xeemy yjäyꞌajtcɨxy ma ymɨgügtɨjc; etz cɨꞌm yajxon ñayꞌanéꞌmɨgɨxy ma yɨ oybɨ. Caꞌ ji huingbɨ cötujcɨn huɨdibɨ jada oybɨ huinmaꞌñ jɨjpcogapxɨ̈huɨpy.
\v 24 Tügꞌócɨy jäy ajcxy pɨnjaty Jesucristo Huindzɨnꞌajtp, mɨmadacpy ajcxy yɨ jɨbɨc-huinmaꞌñ huɨdibɨ cɨꞌm nijotꞌajtcɨxyp mɨɨd Cristo ymɨcꞌajt.
\v 25 Mɨɨd co nmɨɨdꞌajtɨm je Espíritu Santo ymɨcꞌajt ma ajt ndzɨnaayɨn njugyꞌajtɨn, paady ycɨxp tzoc tzɨnaayɨm jaduꞌn nej xyꞌaneꞌmɨm xyhuinmaꞌñymooyɨm je Espíritu Santo.
\p
\v 26 Caꞌ huaad amɨj agɨx ndzachnayjɨhuɨɨyɨm, etz nañ jaduꞌn caꞌ huaad nmɨgügtɨjc nyajjotmaꞌtɨm; etz caꞌ huaad ni ti nyajcaꞌoyꞌijxɨm.
\c 6
\s Naybubéjtɨgɨxy miñ xyɨpy
\p
\v 1 Mɨgügtɨjc ajcxy, pen mbatpy tüg mɨgüg huɨdibɨ jɨbɨc-huinmaꞌñ tɨ ymɨmadägyii, miich ajcxy huɨdibɨ mɨmadacyp yɨ jɨbɨc-huinmaꞌñ mɨɨd Dios ymɨcꞌajt mbubéjtcɨxɨpy jada mɨgüg, e co mbubéjtcɨxɨpy jada mɨgüg, nïgɨ jotmɨc mmɨgapx mɨɨd oy gapxy oy ayuc. Naygüendꞌadɨɨ ajcxy cɨꞌm, caꞌydɨ jɨbɨc-huinmaꞌñ xymɨmadaaccɨxy.
\v 2 Naybubéjtɨgɨx nidüg nidüg pɨnjaty ayoꞌn jotmay mɨɨd. Co jaduꞌn mdúngɨxɨpy, hueꞌ anajty ajcxy mguydungɨxyp Cristo ycötujcɨn huɨdibɨ tɨ xymooyɨm  ajt.
\p
\v 3 Pen ji pɨn ñayjɨhuɨ̈yii amɨj agɨx etz chach naygömayaꞌñyii cɨꞌm co chach yꞌoyjäyɨty, caꞌ jeꞌ choobaady ma Dios yhuinduu.
\v 4 Jëbɨ nidüg nidüg jäy ñayjɨhuɨꞌñybɨgyii nej chɨnäy yjugyꞌaty, pen oy o penɨ caꞌyꞌoyɨty. Penɨ ycuychɨnaayb yajxon Dios ytɨyꞌajt oybɨ, jotcujc ñayjɨhuɨ̈huɨɨyb jeꞌ cɨꞌm e caꞌ huaad yajquipxɨ̈y chɨnaayɨn mɨɨd huingbɨ.
\v 5 Nidüg nidüg jäy cɨꞌm chɨnaayɨn jëbɨ yajnɨcxy nej Dios jäygɨdägy. Caꞌ huaad niꞌijxtüdy nej ymɨgüg jɨbɨc-huinmaꞌñ mɨɨdɨty.
\p
\v 6 Yɨ jäy ajcxy pɨnjaty tɨ ixpɨcy Dios yꞌayuc ytɨyꞌajt, copɨcy co möhuɨpy tijaty yajmayjajtpy je huindzɨn tɨɨbɨ yajꞌixpɨgyii.
\p
\v 7 Ix ajcxy cɨꞌm mnayhuinꞌɨɨngɨx com Dios caꞌ yɨꞌ ni pɨn huaad nɨxïgy yajxïgy. Com pen miich ajcxy jɨbɨc-huinmaꞌñ mdumyb, Dios xychaachytunɨp ajcxy. Pɨnjaty oybɨ tuumb, nañ ypaadɨpy oybɨ, e pɨnjaty jɨbɨcpɨ tumb, nañ jɨbɨcpɨ ypaadɨpy.
\v 8 Pɨnjaty jɨbɨc huinmaꞌñ tum jaduꞌn nej jɨbɨcpɨ tzachnijotꞌaty, co yꞌögɨpy yɨꞌ yꞌalma ñɨcxɨp ayoodactuuby. Pɨnjaty cuydumb Dios ytɨyꞌajt jaduꞌn nej je Espíritu Santo huinmaꞌñ ymöyii, co yꞌögɨpy yɨ yꞌalma huingbɨ jugyꞌajtɨn ypaadamyb huɨdibɨ nimɨna ycaacɨxy ycaatɨgooy huɨdibɨ je Espíritu Santo möhuɨɨb.
\v 9 Penɨ nduunɨm jabom jabom oy huinmaꞌñ caꞌ huaad ndzijpɨm, jëbɨ nmecxtujcɨm ixtɨ coonɨ anajty nbaatɨm oybɨ ma Dios. E caꞌ huaad njotmetzcɨɨyɨm.
\v 10 Tzoc oyjäyꞌajtɨn tuunɨm ma nidügꞌócɨy jäy ajcxy, jaduꞌn nej Dios xyhuinmaꞌñymooyɨm. Nïgɨ tzoc pubejtɨm nmɨgügtɨjc huɨdibɨ mɨbɨjcp mɨjpɨdacp Cristo.
\s Aneꞌmɨn, capxhuijɨn etz capxpoocxɨn huɨdibɨ cɨjxnɨp je necy
\p
\v 11 Ijxcɨx huindɨcxcɨx jada letra mɨjjatypɨ huɨdibɨ ɨɨch cɨꞌm njaayb, com ndzojcpyɨch co mnejhuɨ́ɨygɨxɨpy nej yam nijayɨɨygɨxy.
\v 12 Yɨ jäy ajcxy huɨdibɨ mɨbɨjcp co Cristo oꞌcy ma yɨ cruudz mɨɨd ajt nbocy ycɨxpɨ etz nañ jaduꞌn mɨjpɨdacp yɨ tɨyꞌajttɨ̈huɨɨ, hueꞌ ajcxy tzach ñaygömayaanɨgɨxy ma yɨ judíojäy ajcxy, jɨgɨx caꞌ pɨn yꞌixhuɨdidɨɨyb ypahuɨdidɨɨyb.
\v 13 Yɨ huɨdi ajcxy tzach mɨjpɨdacp tɨyꞌajttɨ̈huɨɨ, nañ ni caꞌ ajcxy cuydundäy tügꞌócɨy jada Dios ycötujcɨn je jecyɨp. Hueꞌ yɨꞌ ajcxy tzojccɨxy co miich ajcxy myajtɨyꞌajttɨ̈huɨp jɨgɨx ajcxy jëbɨ ñaygömáayɨgɨxy mɨɨd co miich ajcxy tɨ myajtɨyꞌajttɨɨygɨxy.
\v 14 Yɨ jäy ajcxy huɨdibɨ jɨm yajꞌixpɨjcp anɨɨ, cɨꞌm ajcxy chach ñaygömayáanɨgɨxy. Per ɨɨch caꞌ jaduꞌn naygömayaꞌñyiijɨch mɨɨd huɨdibɨ ndumybɨch huɨdibɨ nyajꞌixpɨjcpyɨch. Hueꞌ janchtɨy ngapxpadaamybɨch ɨɨch ajt nHuindzɨn Jesucristo ytɨyꞌajt, jaduꞌn nej yajcruudzpejtɨ mɨɨd ajt nbocy ycɨxpɨ. Co tɨ nmɨbɨcyɨch Cristo Jesús, huinꞌit tɨ nꞌixmachɨch je naaxhuiñyjäy yjɨbɨc-huinmaꞌñ. E paady cham ni ngaꞌocnijotꞌajtnɨch yɨ jɨbɨc-huinmaꞌñ.
\v 15 Co nmɨbɨjcɨm Jesucristo, oy ixyipy tɨ nyajtɨyꞌajttɨɨyɨm o oy ixyipy caꞌ tɨ nyajtɨyꞌajttɨɨyɨm, caꞌ ma choobaady. Huɨdibɨ tzoubatp yɨꞌ jeꞌ co nmɨbɨjcɨm Jesucristo, etz co nmɨɨdꞌajtɨm jemybɨ jot huinmaꞌñ.
\v 16 Huen Dios xyajjotcugɨ̈huɨpy etz xypaꞌayoohuɨpy, etz nañ jaduꞌn yajjotcugɨ̈huɨpy etz paꞌayoohuɨpy nidügꞌócɨy jäy huɨdijaty cuydumb Cristo ytɨyꞌajt, tügꞌócɨy Dios yjäy janchypɨ tɨydudägypɨ.
\p
\v 17 Jaduꞌn nej jadachambɨ, etz jaduꞌn nej xɨɨ tiempo jacmiimb jaccɨdaacp, caꞌ ɨɨch pɨn huaad xyjacꞌamayɨ̈yɨch, com nmɨɨdɨch je tɨyꞌajt ma nninïcxɨch jaduꞌn nej jäy ajcxy tɨ xyhueenduuñɨch tɨ xychaachytuuñɨch mɨɨd co tɨ nduuñɨch mɨɨd Jesucristo ycɨxpɨ.
\p
\v 18 Mɨgügtɨjc ajcxy, huen ɨɨch ajt nHuindzɨn Jesucristo tunɨpy nïgɨ mayꞌajt oyꞌajt ma miich ajcxy. Jaduꞌn jada ngapxycɨ́xyɨch. Amén.