\id EPH
\h EFESIOS
\toc1 EFESIOS
\mt1 EFESIOS
\mt2 Yɨ Necy Huɨdibɨ San Pablo Yajniguejx Je Mɨbɨjcpɨdɨjc Jɨm Efeso
\c 1
\p
\v 1 Ɨɨch Pablo, Dios jaduꞌn tzojcp co Jesucristo tɨ xyajnïbɨcyɨch co nꞌapóstolꞌadɨpyɨch. Jada necy cham nguejxypɨch jɨm Efeso ma yɨ jäy ajcxy huɨdibɨ Dios yjäyꞌajtɨp, yɨꞌ ajcxy huɨdibɨ mɨbɨjcp tudägy Cristo Jesús etz huɨdibɨ ajcxy yajpatp ma yɨꞌ.
\v 2 Huen ajt nDios Teedy etz ajt nHuindzɨn Jesucristo mayꞌajt oyꞌajt tunɨpy mɨɨd miich ajcxy etz xyajjotcugɨ̈huɨp ajcxy.
\s Nej je Espíritu Santo conucxy Cristo yjäy
\p
\v 3 Tzoc ɨɨbaatɨm capxpaatɨm Dios ɨɨch ajt nHuindzɨn Jesucristo yTeedy. Mɨɨd co nyajpaatɨm ma Cristo, paady Dios tɨ xyconuucxɨm mɨɨd tügꞌócɨy huidɨjaty tzomb tzajpjoty.
\v 4 Dios ajt xyhuinꞌijxɨm jecyꞌajty, caꞌnɨ anajty cojy macxy je naaxhuiñybɨ. Jeꞌ xyhuinꞌijxɨm jɨgɨx jëbɨ nyajpaatɨm ma Cristo, etz jɨgɨx jëbɨ nyajpaatɨm ma Dios yhuinduu huädz oy njot nhuinmaꞌñ, caꞌ ti bocy nmɨɨdꞌajtɨm.
\v 5 Mɨɨd co Dios ooy xychojcɨm xyjɨhuɨɨyɨm, paady ycɨxp yɨꞌ capxcödujcy jecyꞌajty, caꞌnɨ anajty naaxhuiñybɨ yajcojy yajꞌoyɨ̈y, co xycöbɨgaanɨm nejjɨhuɨ̈y ycɨꞌm yꞌung. Co Dios jaduꞌn quejxy je Cristo ya naaxhuingɨ́xy, chi yɨꞌ yajꞌoyɨɨy nej jëbɨ xycöbɨjcɨm nej ycɨꞌm yꞌung, e jaduꞌn xymɨɨdꞌadaanɨm tzajpjoty. Dios jaduꞌn ytuñ jaduꞌn nej yɨꞌ anajty tzocyɨn.
\v 6 Tzoc ɨɨbaatɨm capxpaatɨm Dios ooy mɨɨd co mɨjmayꞌajt mɨjꞌoyꞌajt tuuñ mɨɨd ɨɨch ajt ycɨxpɨ, co quejxy yꞌung ya naaxhuiñ mɨɨd ɨɨch ajt nbocy ycɨxpɨ, jɨgɨx jëbɨ nyajpaatɨm ma yɨꞌ yꞌung, jeꞌ yꞌung huɨdibɨ ooy tzocy jɨhuɨ̈y.
\v 7 Mɨɨd co Dios ooy xychojcɨm xyjɨhuɨɨyɨm paady ycɨxpɨ yɨꞌ yꞌung ñɨꞌpy teemy yojcy co yꞌoꞌcy mɨɨd ajt nbocy ycɨxpɨ, tɨ ajt nꞌalma xyajnïdzoocɨm etz nbocy ajt tɨ xyhuinmeecxɨm. Co jaduꞌn ytuuñ, chi Dios mɨjmayꞌajt mɨjꞌoyꞌajt tuuñ mɨɨd ɨɨch ajt ycɨxpɨ.
\v 8 Co Dios jaduꞌn mɨjmayꞌajt mɨjꞌoyꞌajt tuñ mɨɨd ɨɨch ajt ycɨxpɨ, tɨ xyajhuinjɨhuɨɨyɨm tɨ xyajnejhuɨɨyɨm yɨ ytɨyꞌajt yɨ yhuinmaꞌñ.
\v 9 Dios yjäygɨdacpy jaduꞌn co tɨ xyajnejhuɨɨyɨm nej anajty mɨɨdɨty capxcöducy huɨdibɨ caꞌ pɨn jecyꞌajty huinjɨhuɨy. Nañ jaduꞌn Dios tɨ xyajnejhuɨɨyɨm nej tɨ yhuinmaꞌñypɨdacy jecyꞌajty nej ytunaꞌñ anajty mɨɨd Cristo.
\v 10 Je huɨdibɨ Dios jecyꞌajty tɨ yajnihuinmayɨɨy co tunaꞌñ anajty, ytunamyb yɨꞌ mɨna anajty je tiempo tɨ yhuaadꞌajtnɨ. Dios tɨ yajnihuinmayɨ̈y anajty co pɨdägaꞌñ tügꞌócɨy huɨdi yajpatp tzajpjoty etz tügꞌócɨy huɨdibɨ yajpatp ya naaxhuiñ ma tüg aneꞌmɨn, e je Cristo jeꞌ aneꞌmamb nigohuajcꞌadamb tügꞌócɨy.
\p
\v 11 Tügꞌócɨy tijaty tunɨ yjajtɨ jiiby tzajpjoty etz ya naaxhuiñ Dios jayɨjp capxcödujc. Ɨɨch ajt huɨdibɨ nyajpaatɨm ma Cristo, Dios tɨ xyhuinꞌijxɨm jecyꞌajty co ogaꞌn je naaxhuiñybɨ chondacy jɨgɨx jëbɨ nbaatɨm tügꞌócɨy huɨdibɨ Dios xymöhuaanɨm. E tügꞌócɨy jada nɨcxy yjaty tɨm jaduꞌn nej Dios jayɨjp capxcödujcy, e Dios ytumyb jaduꞌn nej yɨꞌ tzocy etz nej jäygɨdägy.
\v 12 Jaduꞌn Dios cuydumyb mɨɨd ɨɨch ajt ycɨxpɨ, huɨdibɨ jayɨjp tɨ nmɨbɨjcɨm tɨ nmɨjpɨdaacɨm Cristo, jɨgɨx jëbɨ nguydunɨm ma ajt ndzɨnaayɨn Dios ytɨyꞌajt, e jaduꞌn mayjäy capxpaadɨp etz ojadadɨp Dios mɨɨd yɨꞌ ymɨjꞌajtɨn etz yɨꞌ yꞌoyꞌajtɨn ycɨxpɨ.
\v 13 Nañ jaduꞌn miich ajcxy co mmɨdooy je ayuc tɨyꞌajt nej jëbɨ mꞌalma ñïdzögɨpy ajcxy, e tɨ mmɨbɨjccɨxy Cristo, huinꞌit ajcxy myajpaatcɨxy ma yɨꞌ, e je Dios yjɨhuɨꞌñ ymɨcꞌajt huɨdibɨ miich ajcxy mɨɨd ma mjot mhuinmaꞌñ, jeꞌ nidɨyꞌajtꞌajtp co myajpaatcɨxy ma Dios. Jada jeꞌ je Espíritu Santo huɨdibɨ Dios yꞌahuanɨɨy jecyꞌajty co xymöhuaanɨm.
\v 14 Jada Dios yjɨhuɨꞌñ ymɨcꞌajt jada jeꞌ nidɨyꞌajtꞌajtp co nbadaanɨm it lugar ma Dios yꞌit. Dios xymöhuaanɨm it lugar ma yɨꞌ yꞌit co anajty xɨɨ tiempo yhuaadꞌajtnɨ huinꞌit Dios nihuaꞌnaꞌñ yajnïdzögaꞌñ pɨnjaty yjäyꞌajtɨp ajcxy. Jaduꞌn Dios tunaꞌñ, jɨgɨx jëbɨ ɨɨch ajt nꞌɨɨbaatɨm ngapxpaatɨm Dios mɨɨd yꞌoyꞌajtɨn ycɨxpɨ.
\s Pablo mɨbɨjctzoy Dios co huen ajcxy yajmoy huijyꞌajt cujcꞌajt
\p
\v 15-16 Com tɨ nnejhuɨ̈yɨch jaduꞌn nej tɨydudägy miich ajcxy tɨ mmɨbɨjccɨxy ɨɨch ajt nHuindzɨn Jesús, e nañ jaduꞌn tɨ nnejhuɨ̈yɨch jaduꞌn nej mdzojccɨxy mjɨhuɨɨygɨxy tügꞌócɨy huɨdibɨ mɨbɨjccɨxp Jesucristo. Paady ycɨxp jabom jabom co Dios nmɨbɨjctzooyɨch, nyajnajxpɨch jäygɨdaacɨn ma Dios mɨɨd miich ajcxy ycɨxpɨ.
\v 17 Mɨbɨjctzooybɨch Dios, nHuindzɨn Jesucristo yTeedy, je mɨjpɨ Dios Teedy, co yɨꞌ xymöhuɨp ajcxy je huinmaꞌñ je ixpɨjcɨn huɨdibɨ je Espíritu Santo yejcpy, etz nañ jaduꞌn xyajnejhuɨ̈huɨpy xyajhuinjɨhuɨ̈huɨpy ajcxy jacꞌoy yɨꞌ yꞌayuc, e tügꞌócɨy nej yɨꞌ tɨ ytuuñ.
\v 18 Dios nmɨbɨjctzooybɨch mɨɨd miich ajcxy ycɨxpɨ, co xyajꞌanɨɨyɨp ajcxy mjot mhuinmaꞌñ mɨɨd yɨꞌ ytɨyꞌajt, jɨgɨx jëbɨ mnejhuɨ́ɨygɨxɨpy tijaty huɨdibɨ ajcxy mꞌahuijxyp ma Dios, nidügꞌócɨy miich ajcxy huɨdibɨ Dios tɨ huinꞌixy. Nañ jaduꞌn jɨgɨx jëbɨ mnejhuɨɨygɨxy nej ymɨjɨty yjanchɨty je pɨdägy huɨdibɨ Dios yegamyb mɨɨd tügꞌócɨy ajcxy huɨdibɨ Dios yjäyꞌajtɨp.
\v 19-20 Dios nmɨbɨjctzooybɨch jɨgɨx jëbɨ ajcxy mnejhuɨ̈huɨpy jaduꞌn nej Dios ymɨcꞌajt mɨɨdɨty. Jeꞌ ymɨcꞌajt caꞌ ycɨxɨpy ytɨgoyɨpy, e ni pɨn ca quipxɨpy. Etz yɨꞌ ymɨcꞌajt tumb ma ɨɨch ajt njot nhuinmaꞌñ nidüg nidüg co ajt nmɨbɨjcɨm. Dios tɨ xyajnejhuɨɨyɨm yɨꞌ ymɨcꞌajt huɨdibɨ ymɨɨd mayꞌamy co yajjugypɨjcy jadügꞌoc Cristo co yꞌoꞌcy, etz nañ jaduꞌn tɨ pɨdägy Jesucristo mɨjꞌaneꞌmbɨ jiiby tzajpjoty. Yɨꞌ ɨñaayb aꞌoyꞌamy ma Dios ymɨjc, etz aneꞌmdäy tügꞌócɨy naaxhuiñ etz tzajp quipxyɨ mɨɨd Dios.
\v 21 Cristo jac mɨjꞌaneꞌmɨn ymɨɨd, jac mɨcꞌajt mɨɨd, caꞌydɨ jacpɨnjaty huɨdibɨ jayajpatp tzajpjoty, etz huɨdibɨ jayajpatp ya naaxhuiñ, huɨdibɨ cham tzɨnaayb etz huɨdibɨ jacjiinɨ tzɨnähuaamnɨ. Jesucristo cömay yꞌity nïgɨ, caꞌydɨ jac pɨn huɨdibɨ cham tzɨnaayb, etz huɨdibɨ jacjiinɨ tzɨnähuaamnɨ.
\v 22 Dios tɨ pɨdägy tügꞌócɨy aneꞌmɨn ma Cristo jëbɨ aneꞌmdäy. Jaduꞌn nipaady nej jɨhuɨ̈y Cristo nïhuäcpejttäy tügꞌócɨy aneꞌmɨn. E nañ jaduꞌn Dios tɨ pɨdägy Cristo jɨgɨx jëbɨ nigohuajcꞌadɨpy tügꞌócɨy mɨbɨjcpɨdɨjc.
\v 23 Je mɨbɨjcpɨdɨjc jaduꞌn nipaady nej Cristo ñinïcx, paady ycɨxpɨ yɨꞌ ajcxy yajcɨxy yajcaꞌpxy je Cristo yꞌoyꞌajtɨn ymɨjꞌajtɨn. E je Cristo yajcɨjxtaayb yajcaꞌpxtaayb tügꞌócɨy tijaty ji ajtp.
\c 2
\s Dios chojcpy yjɨhuɨɨyb jäy ajcxy, paady ñïdzooccɨxy yꞌalma
\p
\v 1 Caꞌnɨ miich anajty ajcxy mmɨbɨjccɨxy Cristo, ooy anajty mdundɨgooygɨxy mɨɨd Dios ytɨyꞌajt, ooy anajty ajcxy mbocymɨɨdɨty, e jaduꞌn nipaady nej jɨhuɨ̈y tɨ mꞌoꞌccɨxy mɨɨd mbocy ajcxy ycɨxpɨ etz Dios xyajjugypɨjccɨxy huinjemy mɨɨd jemybɨ jugyꞌajtɨn.
\v 2 Co caꞌnɨ anajty miich ajcxy mgöbɨjccɨxy mmɨjpɨdaaccɨxy Cristo, ooy anajty mguydungɨxy naaxhuiñyjäy ajcxy ytɨyꞌajt, etz nañ mgapxymɨdoogɨxy anajty ajcxy je caꞌoybɨ huɨdibɨ aneꞌmb je poj naaxhuiñ, je caꞌoybɨ huɨdibɨ tumb ma yɨ jäy ajcxy yjot yhuinmaꞌñ huɨdibɨ caꞌ capxymɨdoogɨxy Dios.
\v 3 Ma je tiempo tɨɨbɨ ñaxy, nañ jaduꞌn anajty ndzɨnaayɨm jaduꞌn nej yɨ jacjadyii naaxhuiñyjäy ajcxy huɨdibɨ capxymɨdoob yɨ caꞌoybɨ. Ngapxymɨdoohuɨm anajty nninïcx chojcɨn. Ndundɨgooyɨm anajty mɨɨd ngɨꞌmjot ngɨꞌmhuinmaꞌñ. Nguipxyɨɨyɨm anajty mɨɨd yɨ jacjadyii naaxhuiñyjäy ajcxy huɨdibɨ Dios tzaachytunaanɨp mɨɨd ypocy ycɨxpɨ, etz nañ jaduꞌn nmɨhuaadꞌajtɨm co Dios xychaachytuunɨm mɨɨd ajt nbocy ycɨxpɨ.
\v 4-5 Oy ixyipy ɨɨch ajt mɨhuaadɨty tzaachypɨ mɨɨd ajt nbocy ycɨxpɨ, per Dios mɨj ooy tɨ xypaꞌayoohuɨm, e mɨj ooy tɨ xychojcɨm tɨ xyjɨhuɨɨyɨm, paady ycɨxp tuuñ may ꞌajt mɨɨd ɨɨch ajt ycɨxpɨ co yajjugypɨjcy je Cristo. E jaduꞌn quipxyɨ mɨɨd Jesucristo ɨɨch ajt nbaatɨm jemybɨ jugyꞌajtɨn huɨdibɨ caꞌ ycɨxɨpy ytɨgoyɨpy ni mɨna. Jaduꞌn Dios mayꞌajt tuuñ mɨɨd ɨɨch ajt ycɨxpɨ co anajty nbadaanɨm oꞌcɨn mɨɨd ajt nbocy ycɨxpɨ. Mɨɨd co Dios mayꞌajt oyꞌajt tuuñ mɨɨd miich ajcxy ycɨxpɨ, paady miich ajcxy tɨ mbatcɨxy jemybɨ jugyꞌajtɨn huɨdibɨ caꞌ ycɨxɨpy ytɨgoyɨpy ni mɨna.
\v 6 Com jaduꞌn nipaady nej Dios xyajjugypɨjcɨm quipxy mɨɨd Jesucristo, paady ycɨxp Dios xymöhuaanɨm it lugar jiiby tzajpjoty quipxy mɨɨd Jesucristo.
\v 7 Jaduꞌn nej xɨɨ tiempo mimb cɨdacp Dios jaduꞌn oy tuñ jɨgɨx jëbɨ tɨyꞌajt nmɨɨdꞌajtɨm jaduꞌn nej Dios xychojcɨm xyjɨhuɨɨyɨm etz xypaꞌayoohuɨm mɨjcajee, etz mɨjmayꞌajt mɨjꞌoyꞌajt tuun mɨɨd ɨɨch ajt ycɨxpɨ co nyajpaatɨm ma Cristo.
\v 8 Mɨɨd co Dios miich ajcxy tɨ xychojccɨxy tɨ xyjɨhuɨɨygɨxy, paady ycɨxp yɨ mꞌalma ajcxy tɨ patcɨxy nïdzoocɨn co tɨ mmɨbɨjccɨxy Jesucristo. Caꞌ nmɨnaanɨm co tijaty tɨ mdungɨxy, paady ycɨxp yɨ mꞌalma ajcxy tɨ patcɨxy nïdzoocɨn. Hueꞌ janchtɨy Dios tɨ xymooygɨxy ninɨgoob ajcxy mꞌalma ñïdzoocɨn.
\v 9 Caꞌ nmɨnaanɨm huinꞌit jäy ajcxy yꞌalma nïdzoocɨn paadɨp co oybɨ tungɨxy. Hueꞌjanchtɨy Dios jaduꞌn cɨꞌm tɨ yajꞌoyɨ̈y ninɨgoob nej jäy ajcxy jëbɨ patcɨxy yꞌalma ñïdzoocɨn, jɨgɨx caꞌ pɨn jëbɨ huaad amɨj agɨx ñayjɨhuɨ̈yii.
\v 10 Com Dios cɨꞌm tɨ oyduñ ɨɨch ajt njemybɨ tzɨnaayɨn jugyꞌajtɨn mɨɨd je mayꞌajt huɨdibɨ Cristo ytuun co yꞌoꞌcy mɨɨd ajt nbocy ycɨxpɨ. Jaduꞌn Dios tuuñ mɨɨd ɨɨch ajt ycɨxpɨ, jɨgɨx jëbɨ nduunɨm oyjäyꞌajtɨn ma ajt ndzɨnaayɨn. Dios, jecyꞌajty caꞌnɨ naaxhuiñybɨ anajty chondacy, cojy macxy je tɨyꞌajt jaduꞌn nej yɨꞌ tzocy co nduunɨm oyjäyꞌajtɨn.
\s Jotcujc cham nꞌijtɨm mɨɨd Dios, com Cristo xyajpocyhuaatzɨm
\p
\v 11 Jaduꞌn miich ajcxy ocjäymejtzcodɨɨ nej miich ajcxy anajty myajpatcɨxy co anajty caꞌnɨ mmɨbɨjccɨxy Jesucristo. Caꞌ miich anajty ajcxy mjudíojäyɨty, e ni caꞌ miich anajty ajcxy myajtɨyꞌajttɨɨygɨxy nej huaad mnaydíjɨgɨxy Dios yjäy. Paady ycɨxp yɨ judíojäy ajcxy ymɨnaꞌñ co Dios jeꞌ yjäy ajcxy, e miich ajcxy caꞌ, mɨɨd yɨꞌdaꞌajty co miich ajcxy caꞌ myajtɨyꞌajttɨɨygɨxy.
\v 12 Co caꞌnɨ anajty mmɨbɨjccɨxy Cristo, je huinꞌit tiempo, caꞌ anajty ajcxy myajpatcɨxy ma Cristo, etz ni caꞌ anajty judíojäy xycöbɨjccɨxy, etz ni caꞌ anajty mbadaangɨxy huɨdibɨ Dios yꞌahuanɨɨy ma yɨ judíojäy ajcxy, etz ni caꞌ anajty ti mjɨjpꞌijxcɨxy ma Dios, etz ni caꞌ miich anajty ajcxy myajpatcɨxy ma Dios.
\v 13 Jadachambɨ, miich ajcxy huɨdibɨ jecyꞌajty anajty caꞌ myajpatcɨxy ma Dios, jadachambɨ ajcxy myajpaady ma Jesucristo mɨɨd co yɨꞌ ñɨꞌpy teemy yojcy mɨɨd miich ajcxy mbocy ycɨxpɨ.
\v 14 Jesucristo cɨꞌm yajꞌoyɨɨy je tzip je capxy nej anajty ɨɨch ajcxy judíojäy etz miich ajcxy huɨdibɨ caꞌ yjudíojäyɨty naymɨdzipꞌajtɨm, e cham jotcujc nꞌijtɨm. Jesucristo cɨꞌm yajtɨgoy je judíojäy ycötujcɨn huɨdibɨ anajty tzipcojp capxycojp ma ɨɨch ajcxy etz ma miich ajcxy. Jesucristo yajtügmujc judíojäy, etz huɨdi caꞌ yjudíojäyɨty.
\v 15 Jesús mɨɨd ycɨꞌm ninïcx yajtɨgoy je jecyꞌajtypɨ cötujcɨn co oy yajꞌögyii cruudzcɨ́xy. Co Jesús yꞌoꞌcy, huinꞌit yajtügmujcy judíojäy etz huɨdibɨ caꞌ yjudíojäyɨty. Huinꞌit oy yajꞌahuimbity tügpɨcy jäy jemybɨ huɨdibɨ Dios yjäyꞌajtɨp. E jaduꞌn ajcxy yajcɨjxy yajmay je tzip capxy.
\v 16 Co Cristo oy yajꞌögyii cruudzcɨ́xy, huinꞌit yajcɨjxy yajnajxy je tzip capxy jaduꞌn nej yɨ judíojäy anajty mɨdzipꞌadyii yɨꞌ ajcxy huɨdibɨ caꞌ yjudíojäyɨty. Etz nañ huinꞌit Cristo yajtügmujcy yɨ judíojäy mɨɨd huɨdibɨ caꞌ yjudíojäyɨty. Paady ycɨxp Dios ycöbɨgaꞌñyii judíojäy ajcxy etz huɨdibɨ ajcxy caꞌ yjudíojäyɨty agujc jotcujc.
\p
\v 17 Je Cristo miin anajty ya naaxhuiñ etz capxhuäcxy oybɨ tɨyꞌajt jaduꞌn nej jëbɨ ajt nbaatɨm jotcujcꞌajtɨn ma Dios. Ycapxhuäcxyp anajty ma miich ajcxy huɨdibɨ caꞌ yjudíojäyɨty, huɨdibɨ caꞌ anajty mɨɨdɨty Dios ytɨyꞌajt. Etz nañ jaduꞌn ycapxhuäcxp Dios ytɨyꞌajt anajty ma ɨɨch ajcxy judíojäy huɨdibɨ jamɨɨd anajty Dios ytɨyꞌajt.
\v 18 Mɨɨd co Cristo mayꞌajt tɨ tuuñ co xyꞌadɨgɨɨyɨm xyjottɨgɨɨyɨm Dios yjɨhuɨꞌñ ymɨcꞌajt, paady ycɨxp nidügꞌócɨy ɨɨch ajt nyajpaatɨm ma Dios jaduꞌn nej tügpɨcy jäy, tanto judíojäy etz nañ jaduꞌn huɨdibɨ caꞌ yjudíojäyɨty.
\v 19 Paady ycɨxp miich ajcxy jadachambɨ myajpaady ma Dios. Jaduꞌn miich ajcxy myajpaady ma Dios tɨm jaduꞌn nej je jäy ajcxy huɨdibɨ tzɨnaayb ma ycɨꞌmgajp, caꞌ yjaduꞌnɨty nej adzɨnaaybɨ ajcxy. Paady ycɨxp túꞌcɨy miich ajcxy mnaygomájtzɨgɨxy ma Dios mɨɨd judíojäy ajcxy. Jaduꞌn miich ajcxy etz judíojäy ajcxy nipaady cham nej jɨhuɨ̈y ajcxy mdügjuugy mdügmɨgüg.
\v 20 Miich ajcxy tɨ mmɨjpɨdaaccɨxy je tɨyꞌajt huɨdibɨ Jesús yꞌapóstol ajcxy tɨ capxhuäcxy etz je tɨyꞌajt huɨdibɨ Dios yꞌayucnajtzcapxɨɨybɨ tɨ capxhuäcxcɨxy. E yɨꞌ ajcxy ytɨyꞌajt jaduꞌn nipaady nej pochꞌɨjx ma chondägy. E Jesucristo yɨꞌ jëduꞌn yajpatp nej tüg tzaa huɨdibɨ jaccopɨcyɨp ma je pochꞌɨjx chondägy.
\v 21 Dios jadachambɨ tiempo ycojyp ymacxyp jadügpɨcy jäy huɨdibɨ yjäyꞌadaanɨp huɨdibɨ tügjɨjp mɨjpɨdaaccɨxy Cristo, huɨdibɨ túꞌcɨy ijtcɨxyp mɨɨd Cristo. Jaduꞌn jadayaabɨ tügpɨcy jäy nipatcɨxy nej tüg tɨjc ma jäy ajcxy Dios ojadajtcɨxy.
\v 22 Miich ajcxy myajpatp ma Cristo quipxyɨ mɨɨd nidügꞌócɨy yɨ mayjay ajcxy huɨdibɨ mɨjpɨdacp Dios etz huɨdijaty mɨɨꞌijtp je Espíritu Santo ma ajcxy yjot yhuinmaꞌñ, jaduꞌn miich ajcxy mjugyꞌajtɨn nipaady nej Dios chɨnaydac.
\c 3
\s Pablo yɨꞌ jeꞌ mɨɨd cötujcɨn co capxhuäcxy Dios yꞌayuc ma pɨn caꞌ yjudíojäyɨty
\p
\v 1 Ɨɨch Pablo, nyajpatpɨch pujxtɨgoty mɨɨd co nduuñɨch ma Jesucristo ytung ma miich ajcxy huɨdibɨ caꞌ yjudíojäyɨty. Paady ycɨxp nmɨbɨjctzooybɨch Dios mɨɨd miich ajcxy mꞌoyꞌajtɨn ycɨxpɨ. 
\v 2 Mnejhuɨɨyb ajcxy com Dios mɨjmayꞌajt tɨ tuuñ mɨɨd miich ajcxy ycɨxpɨ, paady yɨꞌ tɨ xyajnïbɨcyɨch ngapxhuäcxɨbɨch ma miich ajcxy yɨ yꞌayuc ytɨyꞌajt.
\v 3 Dios tɨ xyajnejhuɨ̈yɨch yɨꞌ ytɨyꞌajt huɨdibɨ jecyꞌajty yüch yꞌijt. Jada tɨyꞌajt yinjaty hueeñjaty ɨɨch miich ajcxy tɨ nnijayɨɨygɨxy jayɨjpꞌaty.
\v 4 Co miich je necy mgapxɨp, huinꞌit ajcxy mnejhuɨ̈huɨpy co ɨɨch nnejhuɨ̈yɨch je Cristo ytɨyꞌajt huɨdibɨ ijtp yüch.
\v 5 Jada tɨyꞌajt maabɨ Jesucristo, Dios caꞌ ni pɨn yajnejhuɨɨy jecyꞌajty. Jadachambɨ xɨɨ tiempo Dios mɨɨd je Espíritu Santo yajnejhuɨ̈y Jesucristo ytɨyꞌajt je Jesús yꞌapóstoles ajcxy etz je Dios yꞌayuc najtzcapxɨɨybɨ ajcxy.
\v 6 Jada jeꞌ je tɨyꞌajt huɨdibɨ jecyꞌajty yüch anajty ijtp, co yɨ jäy ajcxy huɨdibɨ caꞌ yjudíojäyɨty ypadamyb ajcxy Dios yꞌoyꞌajtɨn quipxyɨ mɨɨd yɨ judíojäy ajcxy, etz nañ jaduꞌn yɨꞌ ajcxy yajpaady ma Dios túꞌcɨy mɨɨd yɨ judíojäy ajcxy, etz nañ jaduꞌn yɨꞌ ajcxy padaangɨxy oybɨ huɨdibɨ Dios jecyꞌajty yajnɨmay yɨ judíojäy co möhuaangɨxy pɨnjaty mɨbɨjccɨxp Jesucristo. 
\p
\v 7 Dios mɨjmayꞌajt tɨ tuñ mɨɨd ɨɨch ninɨgoob co tɨ xyajnïbɨcyɨch jada tung, e xymöyɨch mɨcꞌajt co ngapxhuäcxɨbɨch Jesucristo yꞌayuc ytɨyꞌajt oybɨ ma yɨ jäy ajcxy huɨdibɨ caꞌ yjudíojäyɨty.
\v 8 Ɨɨch jactɨmmudzɨp ma yɨ maybɨ mɨbɨjcpɨdɨjc caꞌydɨ jacpɨn, per caꞌ ñejɨty. Dios mayꞌajt oyꞌajt tɨ tuuñ ma ɨɨch, e tɨ xypɨdägyɨch ma yɨꞌ ytung co ngapxhuäcxyɨch jada oybɨ tɨyꞌajt ma jacjadyii jäy ajcxy jɨgɨx jëbɨ ajcxy patcɨxy ma Cristo  Jesús mɨjꞌoyꞌajtɨn, huɨdibɨ caꞌ pɨn huinjɨhuɨ̈y jaduꞌñyɨ ymɨjɨty.
\v 9 Dios tɨ xyajnïbɨcyɨch co ngapxtɨ̈cxɨbɨch ma tügꞌócɨy jäy ajcxy je Dios yꞌayuc ytɨyꞌajt oybɨ huɨdibɨ yüch anajty ijtp. Yɨꞌ jeꞌ je ayuc huɨdibɨ Dios tɨ cojy tɨ macxy jecyꞌajty, jaduꞌn nej yɨꞌ tunaꞌñ je oybɨ mɨɨd tügꞌócɨy jäy ajcxy. Yɨꞌ jeꞌ Dios huɨdibɨ tɨ yajcojtäy tügꞌócɨy tijaty ya naaxhuiñ etz jiiby tzajpjoty yajpatp.
\v 10 Jaduꞌn Dios capxcödujcy co je tzajpjoty tzɨnaaybɨ ajcxy huɨdibɨ aneꞌmɨn etz mɨcꞌajt mɨɨd, tɨyꞌajt padaangɨxy ma yɨ mɨbɨjcpɨdɨjc jaduꞌn nej Dios mɨjhuinmaꞌñ canaagnax tuñ mɨɨd jäy ajcxy nidügꞌócɨy huɨdibɨ mɨbɨjccɨxp Cristo Jesús. 
\v 11 Jaduꞌn Dios tɨ cuyduuñ mɨɨd ajt nHuindzɨn Jesucristo jaduꞌn nej jecyꞌajty capxcödujcy. 
\v 12 Mɨɨd co nyajpaatɨm ma Jesucristo paady ycɨxp agujc jotcujc nmɨgapxɨm nmɨhuingonɨm Dios. Mɨɨd co nmɨbɨjcɨm Jesucristo paady caꞌ ndzɨgɨɨyɨm ndzoꞌyduunɨm ma Dios yhuinduu.
\v 13 Paady ycɨxp mayꞌajt nbɨjctzooyɨch mɨɨd miich ajcxy co caꞌ nïgɨ mꞌixtɨgɨ̈huäccɨxy ma ajcxy mmɨbɨjcɨn. Etz caꞌajcxy xyñidajɨ́py xyñimayɨ́pyɨch co tzaachypɨ nmɨnaxyɨch nyajnaxyɨch mɨɨd miich ajcxy ycɨxpɨ. Com mɨɨd co tɨ nyajnaxyɨch tzaachypɨ mɨɨd miich ajcxy ycɨxpɨ, paady jëbɨ miich ajcxy oyꞌajtɨn mbatcɨxy.
\s Cristo chojcpy yjɨhuɨɨyb jäy ajcxy
\p
\v 14 Com Dios mɨjmayꞌajt tɨ tuuñ mɨɨd judíojäy etz mɨɨd huɨdibɨ caꞌ yjudíojäyɨty, paady njatyhuingojxtɨnaaybɨch Dios, ɨɨch ajt nHuindzɨn Jesucristo yTeedy, e nmɨbɨjctzooybɨch Dios mɨɨd miich ajcxy ycɨxpɨ.
\v 15 Tügꞌócɨy tzajpjoty tzɨnaayb etz tügꞌócɨy naaxhuiñyjäy huɨdibɨ mɨbɨjccɨxp Dios, jëbɨ nidügꞌócɨy ymɨnaangɨxy: “Dios ɨɨch ajt nDeedy.”
\v 16 Paady nmɨbɨjctzooybɨch Dios Teedy mɨɨd miich ajcxy ycɨxpɨ, co Dios je huɨdibɨ mɨcꞌajt etz oyꞌajt ymɨɨd mɨjcajee, co xymöhuɨpy mɨcꞌajt ma ajcxy mmɨbɨjcɨn mɨɨd yɨꞌ yjɨhuɨꞌñ ymɨcꞌajt huɨdibɨ yajpatp ma ajcxy mjot mhuinmaꞌñ.
\v 17 Dios nmɨbɨjctzooybɨch mɨɨd miich ajcxy ycɨxpɨ co Cristo ymɨcꞌajt yajpaadɨp ma miich ajcxy mjot mhuinmaꞌñ mɨɨd co mmɨbɨjccɨxy Cristo. Jaduꞌn Cristo ymɨcꞌajt yajpaadɨp ma ajcxy mjot mhuinmaꞌñ, jɨgɨx jëbɨ miich ajcxy huɨdibɨ mmɨbɨjccɨxp Cristo, jëbɨ mdzójcɨxɨpy mjɨhuɨ́ɨygɨxɨpy mɨjcajee huinɨxɨɨ huinɨtiempo je mɨbɨjcpɨdɨjc etz tügꞌócɨy jacjadyii jäy.
\v 18 Nañ jaduꞌn Dios nmɨbɨjctzooybɨch mɨɨd miich ajcxy ycɨxpɨ co miich ajcxy etz tügꞌócɨy mɨbɨjcpɨdɨjc mnejhuɨ́ɨygɨxɨpy jaduꞌn nej Cristo xychojcɨm xyjɨhuɨɨyɨm mɨjcajee. E yɨꞌ chojcɨn yjɨhuɨɨyɨn jaduꞌn nipaady nej tüg tɨjc huɨdibɨ jac cɨxɨp jac mɨjɨp, jac yooñɨp jac cɨɨcyɨp caꞌydɨ ni huɨdi tɨjc.
\v 19 Nmɨbɨjctzooybɨch Dios co xyajnejhuɨ́ɨygɨxyɨp xyajhuinjɨhuɨ́ɨygɨxɨpy nej Cristo xychojcɨm xyjɨhuɨɨyɨm mɨjcajee nidügꞌócɨy ɨɨch ajt, ixtɨ caꞌ huaad nhuinjɨhuɨydaayɨm jaduꞌn nej Cristo xychachchojcɨm xychachjɨhuɨɨyɨm. Nmɨbɨjctzooybɨch Dios co xypubéjtcɨxɨp, ixtɨ mabaad mmɨɨdꞌajttaaygɨxy Dios yꞌoyꞌajtɨn.
\p
\v 20 Jadachambɨ, cömay Dios yꞌity huɨdibɨ mɨcꞌajt mɨɨd, etz huɨdi yejcp mɨjcajee jacꞌanaxy caꞌydɨ nej njapɨjctzoohuɨm etz nej njahuinmaayɨm, mɨɨd je ymɨcꞌajt ycɨxpɨ huɨdi tumb ma ɨɨch ajt. 
\v 21 Huen tügꞌócɨy mɨbɨjcpɨdɨjc ajcxy jäymejtzcɨxy ojadájtcɨxy Dios etz Cristo Jesús jabom jabom huinɨxɨɨ huinɨtiempo. Jaduꞌn jada. Amén. 
\c 4
\s Túꞌcɨy nꞌijtɨm mɨɨd Espíritu Santo ycɨxpɨ 
\p
\v 1 Nyajpatpɨch pujxtɨgoty mɨɨd ajt nHuindzɨn Jesucristo ytung ycɨxpɨ. Paady ycɨxp mayꞌajt nbɨjctzooyɨch co miich ajcxy mdzɨnáaygɨxɨpy jaduꞌn nej mɨhuaad jäy chɨnaaygɨxy huɨdibɨ Dios tɨ yhuinꞌíjxɨgɨxy, com Dios miich ajcxy tɨ xyhuinꞌijxcɨxy. 
\v 2 Pɨdaaccɨx mjot mhuinmaꞌñ yung naxy, nicy xeemy  jäyꞌajtcɨxy, naymecxtújcɨgɨx miñ xyipy, naymɨꞌoyjäyꞌájtɨgɨxy, jɨgɨx ñiguëxɨ̈gɨp co  mnaychójcɨgɨxy mnayjɨhuɨ́ɨyɨgɨxy miñ xyipy.
\v 3 Mɨɨdꞌadɨpy ajcxy mjot mhuinmaꞌñ túꞌcɨy mɨɨd je Espíritu Santo ypubejtɨn jɨgɨx jëbɨ mdzɨnaaygɨxy jotcujc caꞌ ma tzip capxy.
\v 4 Nidügꞌócɨy mɨbɨjcpɨdɨjc túꞌcɨy yajpatcɨxy ma Cristo etz tügpajc Espíritu Santo huɨdibɨ yajpaady ma ajt njot nhuinmaꞌñ. Dios tɨ xyhuinꞌijxɨm, jɨgɨx jëbɨ quipxyjaty njɨjpꞌijxtaayɨm je oybɨ huɨdibɨ nbadaanɨm jiiby tzajpjoty.
\v 5 Ji yajpaady tügpajc ajt nHuindzɨn Jesucristo, etz tügpajc je ayuc tɨyꞌajt huɨdibɨ jëbɨ nmɨjpɨdaacɨm, etz tügpajc nnɨɨbejtɨm mɨɨd Jesucristo yxɨɨ.
\v 6 Ji yajpaady tügpajc Dios Teedy huɨdibɨ cuendɨꞌajtp yajtzɨnaayb nidügꞌócɨy mɨbɨjcpɨdɨjc. Yɨꞌ jeꞌ huɨdibɨ nihuindzɨnꞌajttaayb. Yɨꞌ jeꞌ huɨdibɨ mayꞌajt tumb mɨɨd nidügꞌócɨy ajcxy, etz yɨꞌ ymɨcꞌajt yajpatp ma nidügꞌócɨy ajcxy yjot yhuinmaꞌñ.
\p
\v 7 Dios mayꞌajt oyꞌajt tɨ tuñ mɨɨd nidüg nidüg ɨɨch ajt co Cristo xymooyɨm mɨcꞌajt, jɨgɨx jëbɨ nidüg nidüg tuunɨpy Dios ytung nej ypadyii.
\v 8 Paady ycɨxp jaybety ymiñ ma Dios jaduꞌn ymɨnaꞌñ: 
\q
Co  Cristo ypättɨgɨɨy tzajpjoty, chi ymɨɨdpättɨgɨɨy may machjäy, e nañ jaduꞌn Cristo moy jäy ajcxy mɨcꞌajt (dones). 
\p
\v 9 ¿Nej co jaduꞌn Dios yꞌayuc ymɨnañ co je Cristo ypättɨgɨy tzajpjoty? Hueꞌ jeꞌ jaduꞌn ymɨnañ mɨɨd co je Cristo jayɨjp ycɨdacy etz ooy ayooy ya naaxhuiñgɨ́xy. 
 \v 10 Je Cristo yɨꞌ jeꞌ huɨdibɨ cɨdaac ya naaxhuiñ chooñ tzajpjoty, nañ jaduꞌn ypättɨgɨɨy jadügꞌoc tzajpjoty jactɨmꞌoꞌcꞌam. E yɨꞌ jeꞌ ymɨcꞌajt yajpatp ma tügꞌócɨy huɨdijaty jiiby tzajpjoty etz tügꞌócɨy huɨdijaty ya naaxhuiñ.  
\v 11 Je Cristo ymooygɨxyp nidüg nidüg yɨꞌ ytumbɨ mɨcꞌajt. Nijëjɨty mooygɨxy mɨcꞌajt jëbɨ nidɨyꞌajtꞌájtɨgɨxy co jeꞌ jeꞌ je Cristo. Nijëjɨty mooygɨxy mɨcꞌajt jëbɨ najtzcapxɨɨygɨxy Dios yꞌayuc. Nijëjɨty mooygɨxy mɨcꞌajt jëbɨ capxhuäcxcɨxy yɨꞌ yꞌayuc. Nijëjɨty mooygɨxy mɨcꞌajt jëbɨ capxhuijcɨxy yɨ mɨbɨjcpɨdɨjc mɨɨd Dios ytɨyꞌajt. Nijëjɨty mooygɨxy mɨcꞌajt jëbɨ yajꞌixpɨjccɨxy Dios ytɨyꞌajt.
\v 12 E jaduꞌn je Cristo mɨcꞌajt moydaaygɨxy yɨꞌ yjäy, e jaduꞌn yajniꞌixɨydaaygɨxy mɨɨd ytung ycɨxpɨ. E mɨɨd yɨꞌ ajcxy ytung yjacyujcpedɨpy yɨ mɨbɨjcpɨdɨjc yꞌixpɨjcɨn, ixtɨ mabaad jac mɨɨdꞌadɨpy ajcxy Cristo yꞌoyꞌajtɨn.
\v 13 Jaduꞌn Cristo mɨcꞌajt xymooyɨm, jɨgɨx jëbɨ nidügꞌócɨy ɨɨch ajt ytügɨɨyɨm nmɨbɨjcɨn, etz nañ jaduꞌn quipxyjaty nꞌixpɨjctaayɨm Dios yꞌung yꞌayuc ytɨyꞌajt. E jaduꞌn nmɨꞌijtɨm cɨxy caꞌpxy njot nhuinmaꞌñ, nmɨꞌijtɨm Jesucristo ytɨyꞌajt cɨxy caꞌpxy.
\v 14 Caꞌ nꞌidaanɨm mɨɨd ajt nhuinmaꞌñ nej piꞌctɨjc yhuinmaꞌñ ymɨɨdɨty. Je piꞌctɨjc ajcxy janam jadzojc yhuinmaꞌñ ytɨgajtzcɨxy. Jaduꞌn ajcxy nipaady nej je mɨy huɨdibɨ je  poj yajpojmimyb yajpojxɨjpy. Co cɨxy caꞌpxy nmɨɨdꞌajtɨm Cristo ytɨyꞌajt, caꞌ pɨnjaty xyhuinꞌɨɨnɨm mɨɨd huing ayuc oymɨbɨjcnɨp huɨdibɨ caꞌ yjanchɨty.
\v 15 Hueꞌ janchtɨy ngapxɨm je tɨyꞌajt tɨybɨ mɨɨd tzojcɨn jɨhuɨɨyɨn, jaydëbɨ njacyeecɨm ajt nmɨbɨjcɨn etz njacnejhuɨɨyɨm tügꞌócɨy Cristo ytɨyꞌajt jaduꞌn nej ytuuñ ya naaxhuiñ, je Cristo huɨdibɨ nigohuajcꞌajtp tügꞌócɨy mɨbɨjcpɨdɨjc.
\v 16 Cristo etz je mɨbɨjcpɨdɨjc nipatp nej tüg ninïcx. Cristo ñipatp nej je ninïcx cohuajc huɨdibɨ aneꞌmb etz mɨcꞌajt mooyb je ninïcx. Etz yɨ mɨbɨjcpɨdɨjc ñipatp ajcxy nej je ninïcx huɨdibɨ Cristo yꞌaneꞌmyb etz mɨcꞌajt möy. Ma Cristo tügꞌócɨy mɨbɨjcpɨdɨjc mɨcꞌajt patcɨxy huɨdibɨ yajtügɨɨyɨp ajcxy ymɨbɨjcɨn etz nañ jaduꞌn yajꞌíjtɨgɨxy tügmucy. Nidüg nidüg mɨbɨjcpɨ ymɨcꞌajt patcɨxy ma Cristo, jëbɨ tungɨxy Cristo ytung nej ypadyii. E jaduꞌn yeeccɨxy nidügꞌócɨy ma ajcxy ymɨbɨjcɨn, etz nañ jaduꞌn yajyeeccɨxy chojcɨn yjɨhuɨɨyɨn mɨɨd ymɨgügtɨjc.
\s Je jemybɨ jugyꞌajt huɨdibɨ nbaatɨm ma Cristo
\p
\v 17 Paady ycɨxp nnɨmäyɨch miich ajcxy etz nyajnïbɨjccɨxy mɨɨd ajt nhuindzɨn Jesucristo ycötujcɨn, co caꞌ huaad mdungɨxy locɨ huinmaꞌñ huɨdibɨ caꞌ choubaady ma Dios, jaduꞌn nej jacjadyii jäy ytungɨxy huɨdibɨ caꞌ mɨjpɨdaaccɨxy ajt nHuindzɨn Jesucristo.
\v 18  Caꞌ huaad mdzɨnaaygɨxy jaduꞌn nej jacjadyii jäy ajcxy chɨnäy mɨɨd locɨ huinmaꞌñ. Caꞌ ajcxy yajpaady ma Dios, je huɨdibɨ jugyꞌajtɨn yejcp huinɨxɨɨbɨ. Ooy ajcxy yjotjuuñɨty, caꞌ ajcxy ixpɨgaangɨxy Cristo ytɨyꞌajt.
\v 19 Caꞌ ajcxy ti tzoꞌyduꞌn jɨhuɨ̈y co ytundɨgooygɨxy. Ooy ajcxy mɨnɨcxnajxcɨxy yɨ jɨbɨc-huinmaꞌñ. Ooy ajcxy nijotꞌajtcɨxy mɨjcajee co túngɨxɨpy tügꞌócɨy tijaty jɨbɨc-huinmaꞌñ.
\v 20 Per miich ajcxy caꞌ tɨ mꞌixpɨjccɨxy locɨ huinmaꞌñ etz jɨbɨc-huinmaꞌñ co tɨ mꞌixpɨjccɨxy Cristo ytɨyꞌajt,
\v 21 pen janch miich ajcxy tɨ mmɨdoogɨxy yɨꞌ yꞌayuc, pen tɨ mꞌixpɨjccɨxy je tɨyꞌajt huɨdibɨ yajpatp ma Cristo. 
\v 22 Tɨ miich ajcxy mꞌixpɨcy co copɨcy mꞌixmájtzcɨxɨpy yɨ jɨbɨc-huinmaꞌñ nej anajty mnijotꞌajtcɨxy jɨbɨcpɨ jayɨjp caꞌnɨ anajty mmɨbɨjccɨxy Jesús. Jaduꞌn nej anajty cɨꞌm ajcxy mꞌalma myajdɨgoyaangɨxy mɨɨd je jɨbɨcpɨ huɨdibɨ anajty ajcxy mnijotꞌajtcɨxyp, cɨꞌm anajty mnayhuinꞌɨ́ɨnɨgɨxy.
\v 23 Ixmajtzcɨx jɨbɨcjot jɨbɨc-huinmaꞌñ.  Pɨdaaccɨx mjot mhuinmaꞌñ co mguydunaangɨxy Cristo ytɨyꞌajt jemybɨ.
\v 24 Mɨɨdꞌajtcɨx jemybɨ jot jemybɨ huinmaꞌñ com Dios tɨ yajtɨgajch huinjemy ajcxy mjot mhuinmaꞌñ mɨɨd tudägyꞌajtɨn etz huädzꞌajtɨn.
\p
\v 25 Paady ycɨxp caꞌhuaad mꞌɨɨndaaccɨxy, nidüg nidüg cápxcɨx huɨdibɨ janchɨp mɨɨd mɨgügtɨjc, mɨɨd co quipxyjaty nyajpaatɨm ma Jesucristo.
\p
\v 26 Pen miich ajcxy mmɨjotmaꞌtpy yɨ mmɨgüg, caꞌ mmɨgüg mɨgapxtɨgooygɨxy mɨdundɨgooygɨxy, mɨcꞌamy ajcxy mjäydɨgóoygɨxɨpy yɨ mjotmädɨɨ yajɨjp caꞌnɨ anajty xɨɨ ycɨdacyñɨ.
\v 27 Caꞌ mnayyéjcɨgɨxy ma je mujcuꞌ co je mujcuꞌ xymɨmadägɨpy.
\p
\v 28 Yɨ jäy ajcxy huɨdibɨ meetzcɨxp, huen ixmajtzcɨxy meedzɨɨ, etz ijxtähuɨpy ytung. Co ytunɨpy ma cɨꞌmdung jëbɨ pubedɨpy ajcxy ymɨgügtɨjc huɨdibɨ yajmayjajtcɨxp tijaty.
\p
\v 29 Caꞌ mgápxcɨxɨpy jɨbɨc ayuc. Cápxcɨx oy ayuc huɨdibɨ jëbɨ mɨgüg ajcxy jäygɨdaaccɨxy, huɨdibɨ pubejtp etz yajyeegy je mɨbɨjcɨn, huɨdibɨ yejcp oyꞌajtɨn ma pɨn ajcxy amɨdoꞌijtp.
\v 30 Caꞌ huaad mgapxcɨxy mmɨydaaccɨxy ayuc huɨdibɨ yajjotmaybɨjcp je Espíritu Santo huɨdibɨ Dios yjëꞌajtpy. Je Espíritu Santo huɨdibɨ miich ajcxy mɨɨd ma mjot mhuinmaꞌñ, yɨꞌ jeꞌ huɨdibɨ tɨyꞌajt yejcp co miich ajcxy Dios yjäyꞌájtɨgɨxy, co anajty Cristo ymiñ ya naaxhuiñ jadügꞌoc huinꞌit mbadaangɨxy jugyꞌajtɨn etz tzɨnaayɨn huɨdibɨ caꞌ ycɨxɨ́py ytɨgoyɨ́py ni mɨna.
\p
\v 31 Yajqueeccɨx yɨ jɨbɨcpɨ ma ajcxy mjot mhuinmaꞌñ, jaduꞌn nej co mjot mhuinmaꞌñ taꞌm mjɨhuɨɨygɨxy, jaduꞌn nej co tzojc mjotmaꞌtcootcɨxy, jaduꞌn nej co mnaymɨjotmáꞌtɨgɨxy, jaduꞌn nej co mnayhuinꞌójɨgɨxy nayjɨjpꞌójɨgɨxy. Caꞌ huaad mmɨgüg mnigapxcɨxy mniꞌojɨɨygɨxy. Caꞌ jɨbɨcpɨ mnijotꞌajtꞌadɨɨtzcɨxy mɨɨd ajcxy  mmɨgüg ycɨxpɨ.
\v 32 Hueꞌ janchtɨy oybɨ mhuinmáaygɨxɨpy mɨɨd mmɨgüg ajcxy ycɨxpɨ. Naybaꞌayóohuɨgɨxy nidüg nidüg. Nayméecxɨgɨx nidüg nidüg. Com nañ jaduꞌn Dios tɨ huinmecxy miich ajcxy mbocy mɨɨd co myajpatcɨxy ma Cristo.
\c 5
\s  Nej jëbɨ chɨnaaygɨxy yɨ Dios yjäy ajcxy
\p
\v 1 Com miich ajcxy ñipatpy nejjɨhuɨ̈y Dios yꞌungꞌájtɨgɨxy, e Dios ooy xychojccɨxy xyjɨhuɨɨygɨxy, paady copɨcy naychójcɨgɨxy nayjɨhuɨ́ɨyɨgɨxy miñ xyɨpy, jaduꞌn nej Dios tɨ xychojccɨxy tɨ xyjɨhuɨɨygɨxy.
\v 2 Jabom jabom ma mdzɨnaayɨn naychójcɨgɨx nayjɨhuɨ́ɨyɨgɨx nidüg nidüg, tɨm jaduꞌn nej Cristo xychojcɨm xyjɨhuɨɨyɨm, e yjugyꞌajt yejcy mɨɨd ajt nbocy ycɨxpɨ, e jaduꞌn Dios jäygɨdacy nej Cristo ytuñ. 
\p
\v 3 Mɨɨd co miich ajcxy Dios xyjäyꞌájtɨgɨxy, paady tzɨnaaygɨxy mɨɨd huädz mjot mhuinmaꞌñ. Caꞌ huaad mꞌocꞌɨɨbáatcɨxyñɨ mꞌoccapxpáatcɨxyñɨ yɨ töxyjäy mɨgapxtɨgoyɨɨ, etz yɨ jɨbɨc ayuc capxɨɨ, yɨ jɨbɨc-huinmaꞌñ nijotꞌadɨɨ etz yɨ meeñ adzogɨɨ. 
\v 4 Mɨɨd co mDios miich ajcxy xyjäyꞌajtp, paady ycɨxp caꞌ huaad mgápxcɨxɨpy ayuc huɨdibɨ tzoꞌyduꞌñ yejc, ni caꞌ huaad mgápxcɨxɨpy huɨdi caꞌ yꞌoyjäygɨdaacnɨty, etz ni caꞌ huaad mguxiiccɨxy mꞌanɨɨdaaccɨxy, com yɨ jɨbɨc ayuc caꞌ Dios jäygɨdägy. Tzoc yajnajxɨm jäygɨdaacɨn ma Dios com Dios tɨ xyajhuaatzɨm ajt njot nhuinmaꞌñ.
\v 5 Janch tɨyꞌajt jada co pɨnjaty tundɨgooyb mɨɨd huingbɨ töxyjäy, pɨnjaty jɨbɨc-huinmaꞌñ mɨɨd, caꞌ ajcxy padaangɨxy pɨdägy etz oyꞌajtɨn ma Cristo etz ma Dios yꞌaneꞌmɨn. Pɨnjaty meeñ adzojcp, Dios caꞌ tzocy, tɨm jaduꞌn nej yɨꞌ caꞌ tzocy pɨnjaty ojadajtp tzaadzech etz quipychech.
\v 6 Caꞌ mnayyéjcɨgɨxy co jäy ajcxy xyhuinꞌɨ́ɨngɨxɨpy mɨɨd ayuc huɨdibɨ caꞌ ytɨyꞌajtɨty caꞌp choubaady. Mɨɨd co jäy ajcxy capxcɨxy ayuc  huɨdibɨ caꞌ ytɨyꞌajtɨty, paady ycɨxpɨ Dios tzaachytunaꞌñ tügꞌócɨy jäy ajcxy huɨdibɨ capxycömɨdodacp yɨꞌ yꞌayuc.
\v 7 Caꞌ huaad miich ajcxy mnaymɨgügꞌájtɨgɨxy, caꞌ mɨɨd                                                mnayyöymújcɨgɨxy yɨ jaduꞌmbɨ jäy ajcxy huɨdibɨ caꞌ capxymɨdoogɨxy Dios.
\p
\v 8 Jayɨjp caꞌnɨ anajty  mmɨbɨjccɨxy Cristo, caꞌnɨ anajty Cristo ytɨyꞌajt ajcxy mnejhuɨɨy, e jaduꞌn nipaady anajty nej jɨhuɨ̈y myajpaady ajcxy agootztuum. Jadachambɨ mnejhuɨɨygɨxyp Cristo ytɨyꞌajt, e jaduꞌn nipaady nejjɨhuɨ̈y mdzɨnaaygɨxy ma tüg tɨɨcxɨn. Paady ycɨxp jatyɨm cuydungɨxyp Cristo ytɨyꞌajt ma yɨ mdzɨnaayɨn mjugyꞌajtɨn ajcxy, jaduꞌn nej jëbɨ huaad quëxɨ̈gy co  mmɨbɨjccɨxy Cristo.
\v 9 Co nmɨɨdꞌajtɨm Cristo ytɨyꞌajt, chi nduunɨm huɨdibɨ yꞌoyɨp, huɨdibɨ tudägyɨp, huɨdibɨ tɨyꞌajtɨp.
\v 10 Ixpɨjccɨx je tɨyꞌajt huɨdibɨ Dios yjäygɨdacpy.
\v 11 Caꞌ miich ajcxy mnaymɨgügꞌájtɨgɨxy mɨɨd yɨ jäy ajcxy huɨdibɨ yajpatcɨxp agootztuum, huɨdibɨ tungɨxy huɨdibɨ Dios caꞌ jäygɨdägy. Miich ajcxy capxhuijcɨx mɨɨd Dios ytɨyꞌajt yɨꞌ ajcxy huɨdibɨ agootztuum tzɨnaayb.
\v 12 Tzoꞌyduunɨm ajt co jay nigapxcɨxy nimɨydaaccɨxy je jɨbɨcpɨ huɨdibɨ ajcxy ytumyb ayüch ameech.
\v 13 Co nꞌixquipxɨm yɨ jaduꞌmbɨ jäy ajcxy ayuc mɨɨd Dios yꞌayuc, chi niguëxɨ̈gy pen janch tɨyꞌajt o pen caꞌ ytɨyꞌajtɨty, jaduꞌn nipaady nej tɨ nyajpɨdzɨmɨm je ajcxy ayuc ma yɨ agootztuum, etz nbɨdaacɨm ma yɨ tɨɨcxɨn.
\v 14 Paady ycɨxpɨ Dios yꞌayuc jaduꞌn ymɨnañ:
\q Mäyhuijɨp miich ajcxy huɨdibɨ jaduꞌn nipatp nejjɨhuɨ̈y mdzachmaagɨxyp. Jugypɨjccɨx miich ajcxy huɨdibɨ jaduꞌn nipaady nejjɨhuɨ̈y tɨ mꞌöccɨxy. 
Cristo xycodɨ́ɨcxcɨxɨpy mɨɨd yɨꞌ ytɨyꞌajt.
\p
\v 15 Paady naygüendꞌájtɨgɨxy huɨdibɨ tɨyꞌajt yajtungɨxp ma yɨ chɨnaayɨn. Tzɨnaaygɨx jaduꞌn nejjɨhuɨ̈y mnejhuɨɨygɨxy Cristo ytɨyꞌajt, e caꞌ mdzɨnaaygɨxy jaduꞌn nej huɨdibɨ ajcxy caꞌ nejjɨhuɨɨygɨxy Cristo ytɨyꞌajt. 
\v 16 Niꞌixɨ̈ꞌijtcɨx jabom jabom jëbɨ mguydungɨxy Cristo ytɨyꞌajt. Jadachambɨ xɨɨ tiempo mayjäy ytundɨgooygɨxy mɨɨd Cristo ytɨyꞌajt. 
\v 17 Caꞌ locɨ huinmaꞌñ myajtungɨxy, per nejhuɨɨygɨxyp nej Dios tzocy co mdúngɨxɨpy. 
\v 18 Caꞌ huaad mꞌijtcɨxy amügy jäy, com yɨ jocnɨɨ xyajnɨ́cxcɨxɨpy ayoꞌnduum. Nïgɨ oy mɨꞌijtcɨxy Dios yjɨhuɨꞌñ ymɨcꞌajt mayꞌamy ma ajcxy mjot mhuinmaꞌñ. 
\v 19 Naymɨgápxɨgɨxy miñ xyipy mɨɨd yɨ salmo ayuc, mɨɨd yɨ himnos. Huinꞌɨɨgɨx Dios mɨɨd je ɨy huɨdibɨ je Espíritu Santo xymooygɨxyp. Huinꞌɨɨgɨx etz ojadajtcɨx Dios cɨxyjot huinɨjot.
\v 20 Jatyɨm yajnajxcɨxy jabom jabom jäygɨdaacɨn ma ajt nDios Teedy ma ajt nHuindzɨn Jesús yxɨɨ, mɨɨd tügꞌócɨy ycɨxpɨ nej ndunɨm nꞌayoohuɨm.
\s Nej huaad chɨnaaygɨxy pɨnjaty pɨcychɨnaaygɨxy 
\p
\v 21 Mɨɨd co miich ajcxy mhuindzɨgɨ̈y Dios, paady ycɨxp miich ajcxy mnayyajmɨjꞌájtɨgɨxy mnaygapxymɨdóohuɨgɨxy miñ xyɨpy.
\p
\v 22 Miich ajcxy töxyjäydɨjc yajmɨjꞌajtcɨx capxymɨdoogɨx yɨ mñäy ajcxy, tɨm jaduꞌn nej myajmɨjꞌajtcɨxy mgapxymɨdoogɨxy ajt nHuindzɨn Jesucristo.
\v 23 Com je töxyjäy ñäy nigohuajcꞌajtp ma ytöxyɨjc ymiñ, tɨm jaduꞌn nej Cristo nigohuajcꞌaty ma yɨ mɨbɨjcpɨdɨjc ymiñ. Yɨ Cristo yɨꞌjeꞌ huɨdibɨ nihuänamb yajnïdzögamb yɨ mɨbɨjcpɨdɨjc.
\v 24 Tɨm jaduꞌn nej yɨ mɨbɨjcpɨdɨjc capxymɨdoogɨxy Cristo, nañ tɨm jaduꞌn tzocy co je töxyjäy ajcxy capxymɨdóogɨxɨpy yɨ ñäy ajcxy. 
\p
\v 25 Nañ jaduꞌn tzocy co je yëydɨjc huen tzocy jɨhuɨ̈y ytöxyɨjc, tɨm jaduꞌn nej Cristo tzocy jɨhuɨ̈y yɨ mɨbɨjcpɨdɨjc, e paady ycɨxp yejc yɨꞌ yjugyꞌajtɨn mɨɨd yɨꞌ ajcxy ycɨxpɨ. 
\v 26 Cristo yejc yjugyꞌajtɨn mɨɨd je mɨbɨjcpɨdɨjc ycɨxpɨ, jɨgɨx jëbɨ huinmecxy ajcxy ypocy, yajhuaatzɨp ajcxy yjot yhuinmaꞌñ. Cristo yajhuaatzɨ yɨ mɨbɨjcpɨdɨjc ajcxy yjot yhuinmaꞌñ mɨɨd yɨꞌyꞌayuc etz co nɨɨbejt ajcxy mɨɨd nɨɨ.
\v 27 Jaduꞌn Cristo yajhuäch yɨ mɨbɨjcpɨdɨjc ajcxy yjot yhuinmaꞌñ, jɨgɨx jëbɨ ajcxy nayguëxɨ̈gɨɨyb ma yɨꞌ yhuinduu mɨɨd huädz yjot yhuinmaꞌñ. Je mɨbɨjcpɨdɨjc ajcxy nipaady nej tüg nïjen huɨdibɨ huädzɨp, caꞌ ma ytijy ymächɨty.
\v 28 Jaduꞌn tzocy co je yëydɨjc huen tzocy jɨhuɨ̈y ytöxɨjc tɨm jaduꞌn nej cɨꞌm naychogyii. Yɨ yëydɨjc huɨdibɨ tzojcp jɨhuɨɨyb ytöxyɨjc nañ jaduꞌn cɨꞌm ñaychogyii. 
\v 29 Caꞌ ji ni pɨn huɨdibɨ caꞌ ñaychogyii cɨꞌm. Hueꞌ janchtɨy ycuendꞌajtpy etz yajcüxyii yajpedyii ycɨꞌm ninïcx, tɨm jaduꞌn nej jäy ajcxy cuendꞌajtcɨxy ycɨꞌm ñinïcx nañ tɨm jaduꞌn Cristo ycuendꞌajtpy yɨ mɨbɨjcpɨdɨjc.
\v 30 Jaduꞌn Cristo cuendꞌajtpy yɨꞌ yjäy, com jaduꞌn ajcxy nipaady nej yɨꞌ ñinïcx.
\v 31 Com copɨcy je yëydɨjc tzogɨ́p jɨhuɨ̈huɨp ytöxyɨjc jaduꞌn nej Cristo tzocy jɨhuɨ̈y yɨ mɨbɨjcpɨdɨjc. Paady ycɨxp je yëydɨjc ixmadzɨpy ytaj yteedy, e ypudɨgɨ̈huɨpy ytöxyɨjc, e jaduꞌn ajcxy chɨnähuɨpy nej jɨhuɨ̈y ytügpajcɨty.
\v 32 Ooy chachmɨjhuinmaꞌñɨty jada tɨyꞌajt huɨdibɨ yüch anajty ijtp, e yɨꞌ ɨɨch jaduꞌn tijpy yɨ Cristo etz je mɨbɨjcpɨdɨjc.
\v 33 Cuendɨpɨjccɨx jada tɨyꞌajt co nidüg nidüg miich yëydɨjctɨjc ajcxy huɨdibɨ pɨjccɨxp copɨcy mdzogɨpy  mjɨhuɨ̈huɨpy ajcxy mdöxyɨjc, tɨm jaduꞌn nej cɨꞌm ajcxy mnaychogyii, e nañ jaduꞌn copɨcy co nidüg nidüg töxyjäydɨjc yajmɨjꞌadɨpy ñäy.
\c 6
\p
\v 1 Piꞌctɨjc ajcxy huɨdibɨ mɨbɨjcp Jesucristo, copɨcy mgapxymɨdoohuɨpy ajcxy mdaj mdeedy, com tɨyꞌajt jaduꞌn.
\v 2 Yɨ Dios ycötujcɨn huɨdibɨ mɨnaamb: “Yajmɨjꞌajtcɨx mdaj mdeedy”, yɨꞌ ooy ytɨmycopɨcyɨty. Nañ jaduꞌn co nguyduunɨm jada cötujcɨn, huinꞌit Dios jecy xyajtzɨnaayɨm.
\v 3 Co miich ajcxy jaduꞌn myajmɨjꞌadɨpy mdaj mdeedy, huinꞌit Dios xymöhuɨpy ajcxy jotcujcꞌajtɨn, e nañ jaduꞌn xyajtzɨnáaygɨxɨpy jecy ya naaxhuiñ.
\p
\v 4 E miich ajcxy huɨdibɨ ungdeedyꞌajtcɨxp, caꞌ nɨgoo myajjotmaꞌtcotcɨxy yɨ mꞌung ajcxy. Aneꞌmgɨx yajyeeccɨx yɨ mꞌung ajcxy mɨɨd Dios yꞌayuc ytɨyꞌajt, jaydëbɨ capxymɨdóogɨxɨpy ajcxy Dios.
\p
\v 5 Miich ajcxy huɨdibɨ tumbɨꞌajtp ya naaxhuiñ, capxymɨdoogɨx yɨ mhuindzɨn ajcxy, etz tungɨx mɨɨd tudägyꞌajtɨn, etz yajmɨjꞌajtcɨx etz tzɨgɨɨygɨx. Tɨm jaduꞌn nej jɨhuɨ̈y mgapxymɨdoogɨxy yɨ mHuindzɨn Jesucristo.
\p
\v 6 Tungɨx yajxon mɨɨd ajcxy mhuindzɨn. Caꞌ janch xypaat oy mɨc mduungɨxy co ajcxy mhuindzɨn jɨm xyhuindɨɨcxcɨxy, e chi co jeꞌ yjɨhuäcnɨ, chi nɨgoo mhuäccɨxnɨ mdɨnáaygɨxnɨ. Tungɨx jaduꞌn nej huaad jäy ytuungɨxy yɨ huɨdibɨ mɨjpɨdaaccɨxp Jesucristo. Tungɨx cɨxyjot huinɨjot jaduꞌn nej Dios tzocy mdúngɨxɨpy.
\p
\v 7 Tumbɨdɨjc ajcxy, tungɨx mdung cɨxyjot huinɨjot, tɨm jaduꞌn nej jɨhuɨ̈y mdungɨxy je Huindzɨn Jesucristo ytung, e caꞌ yjäydungɨty.
\v 8 Mnejhuɨɨyb miich ajcxy co ajt nHuindzɨn Jesucristo oybɨ möhuaꞌñ nidüg nidüg jaduꞌn nej tɨ ytuuñ, caꞌ ñejɨty pen ycɨꞌmdung ytumyb, o pen ytumb mɨɨd tüg huindzɨn.
\p
\v 9 Miich ajcxy huɨdibɨ nihuindzɨnꞌajtp tumbɨdɨjc, oyꞌamy aneꞌmgɨx mdumbɨ ajcxy. Caꞌmꞌadzɨgɨ́ɨygɨxɨpy caꞌ mdzaachytúngɨxɨpy. Ajɨhuɨ́ɨyɨgɨxy co miich ajcxy etz nañ jaduꞌn mdumbɨ ajcxy mɨɨd ajcxy mHuindzɨn tzajpjoty, e yɨ mHuindzɨn tzajpjotypɨ quipxyjaty tɨydunaꞌñ nidügꞌócɨy miich ajcxy.
\s Je mɨcꞌajt huɨdibɨ je mɨbɨjcpɨdɨjc ajcxy ypatcɨxyp mɨɨd Dios yjɨhuɨꞌñ
\p
\v 10 Jadügnax, mɨgügtɨjc ajcxy, yɨ mmɨcꞌajt mbaadɨp ajcxy ma ajt nHuindzɨn Jesucristo. Com Jesucristo ooy mɨcꞌajt mɨɨdɨty, paady jëbɨ miich ajcxy mbatcɨxy yɨ mmɨcꞌajtɨn ma yɨꞌ.
\v 11 Naygohuaanɨgɨxy miich ajcxy ma je mujcuꞌ mɨɨd tügꞌócɨy tɨyꞌajt huɨdibɨ Dios xymooyɨm, huɨdi mɨɨd naygohuaanɨm ma je mujcuꞌ, e jaduꞌn caꞌydɨ je mujcuꞌ xymɨmadaacɨm mɨɨd anɨɨ. Jaduꞌn Dios ytɨyꞌajt nipaady nej tujt etz pujxnïjen huɨdibɨ soldados ajcxy mɨɨd naygohuaangɨxy tzipjoty.
\v 12 Hueꞌ janchtɨy xymɨdzipꞌajtɨm poj naaxhuiñ, caꞌoybɨ, mujcuꞌdɨjc, etz tügꞌócɨy mɨcꞌajt mɨɨdpɨ huɨdibɨ mɨdzipꞌajtp Dios ya naaxhuiñ etz jiiby tzajpjoty, caꞌp ɨɨch ajt nmɨdzipꞌajtɨm naaxhuiñyjäy.
\v 13 Paady ycɨxp yajtúngɨxy tügꞌócɨy mɨcꞌajt etz tɨyꞌajt huɨdibɨ Dios tɨ xymooygɨxy, jɨgɨx jëbɨ mmɨmadaaccɨxy je caꞌoybɨ co anajty xyajtundɨgoyaangɨxy. E jaduꞌn jëbɨ mɨmadaaccɨxy je caꞌoybɨ mɨɨd ajcxy mmɨbɨjcɨn. E co anajty tɨ mmɨmadactaaygɨxy, huinꞌit mꞌíjtcɨxɨpy mɨc ma ajcxy mmɨbɨjcɨn.
\v 14 Caꞌ mꞌixtɨgɨ̈huäccɨx ma ajcxy yɨ mmɨbɨjcɨn. Nayñiꞌixɨ́ɨyɨgɨx mɨɨd Dios ytɨyꞌajt, jaduꞌn nej jäy ajcxy ñayhuɨɨndädzɨgɨxy co ytunaangɨxy. Nayñiꞌixɨ́ɨyɨgɨx tɨm jaduꞌn nej soldados ajcxy ñayñiꞌixɨɨygɨxy mɨɨd pujx nïjen ma caach co chɨptunaangɨxy.
\v 15 Nayñiꞌixɨ́ɨyɨgɨx mɨɨd Dios yꞌayuc, jɨgɨx jëbɨ ajcxy nɨcxy mgapxhuäcxɨ Dios yꞌayuc huɨdibɨ jotcujcꞌajtɨn yejcp. Co jaduꞌn mdúngɨxɨpy, jaduꞌn nibaadɨp tɨm jaduꞌn nej soldados ajcxy ñayñiꞌixɨ́ɨyɨgɨxy co yajtɨgɨɨygɨxy yzapato co ytüyöyaangɨxy.
\v 16 Yɨꞌ huɨdibɨ jac copɨcyɨp caꞌydɨ jac ni ti, mɨbɨjccɨx tɨydudägy Jesucristo. Mɨɨd ajcxy yɨ mmɨbɨjcɨn jëbɨ mnaygohuáanɨgɨxy ma je mujcuꞌ. Miich ajcxy mmɨbɨjcɨn jaduꞌn nipaady nej tüg escudo huɨdibɨ je soldados ajcxy yajtumyb co ñaygohuáanɨgɨx ma je tɨp huɨdibɨ yajnajtztɨɨbɨɨyb mɨɨdɨ jɨɨn.
\v 17 Nayñiꞌixɨ́ɨyɨgɨx mɨɨd Cristo ytɨyꞌajt huɨdibɨ mɨɨd ajcxy mꞌalma xyajnïdzoocɨp, tɨm jaduꞌn nipaady nej soldados ajcxy ñaygohuáanɨgɨxy co pɨdaaccɨxy ypujx cöjup co chiptunaangɨxy. Naygohuáanɨgɨx miich ajcxy mɨɨd Dios yꞌayuc huɨdibɨ jaduꞌn nipatp nej tüg espada huɨdibɨ je Espíritu Santo tɨ xymooygɨxy.
\v 18 Mɨbɨjctzoogɨx Dios mɨɨd tügꞌócɨy ycɨxpɨ huɨdibɨ ajcxy mdumyb. Mɨbɨjctzoogɨx etz pɨjctzoogɨx mayꞌajt ma Dios jabom jabom mɨɨd je Espíritu Santo ypubejtɨn. Huijy ycujc mꞌijtcɨxɨpy, caꞌ mjotmetzcɨ́ɨygɨxɨpy. Mɨbɨjctzoogɨx Dios mɨɨd tügꞌócɨy mɨbɨjcpɨdɨjc ajcxy ycɨxpɨ.
\v 19 Nañ jaduꞌn mɨbɨjctzoogɨx Dios mɨɨd ɨɨch ycɨxpɨ, co huen xymöyɨch ayuc etz jotcujcꞌajtɨn, jɨgɨx jëbɨ ngapxhuäcxɨbɨch huinmɨc jotmɨc yɨꞌ yꞌayuc ytɨyꞌajt huɨdibɨ caꞌ pɨn jecyꞌajty nejhuɨɨygɨxy.
\v 20 Dios tɨ xyajnïbɨcyɨch jada tung jëbɨ nyajnɨcxyɨch yɨꞌ yꞌayuc ytɨyꞌajt ma je mayjäy ajcxy. Paady ycɨxp nyajpaadyɨch pujxtɨgoty cham. Tungɨx mayꞌajt mɨbɨjctzoogɨx Dios mɨɨd ɨɨch ycɨxpɨ co xyajjotmɨcpɨgɨpyɨch jɨgɨx jëbɨ ngapxhuäcxyɨch yɨꞌ yꞌayuc huinmɨc jotmɨc.
\s Capxpoocxɨn huɨdibɨ cogɨxɨɨyñɨp
\p
\v 21 Ooy ndzocy njɨhuɨ̈yɨch je Tíquico, nañ jaduꞌn yɨꞌ ooy xypubejtyɨch ma ajt nHuindzɨn Jesucristo ytung. Yɨ Tíquico miich ajcxy xyajmɨɨdmɨydägɨpy tügꞌócɨy je tɨyꞌajt nej nyajpaadyɨch ya, etz tügꞌócɨy tung huɨdibɨ ya ndumybɨch.
\v 22 Nguexaamybɨch Tíquico ma miich ajcxy jɨgɨx jëbɨ xymɨɨdmɨydägɨpy ajcxy jaduꞌn nej nyajpaadyɨch ya, e mɨɨd jada tɨyꞌajt jëbɨ miich ajcxy mjotcugɨɨygɨxy.
\p
\v 23 Huen Dios Teedy etz ajt nHuindzɨn Jesucristo mayꞌajt tunɨpy mɨɨd miich ajcxy, jɨgɨx jëbɨ jotcujc mdzɨnaaygɨxy, etz nañ jaduꞌn jëbɨ mnaychójcɨgɨxy mnayjɨhuɨ́ɨyɨgɨxy miñ xyɨpy, etz jɨgɨx jëbɨ mjacmɨbɨjccɨxy Cristo.
\v 24 Huen Dios mayꞌajt oyꞌajt tunɨpy mɨɨd miich ajcxy huɨdibɨ yajmɨjꞌajtcɨxp ajt nHuindzɨn Jesucristo huinɨxɨɨ huinɨtiempo. E caꞌ mꞌixmájtzcɨxɨp nimɨna nej ajcxy mɨjpɨdaaccɨxy Jesucristo. Jaduꞌn jada. Amén.