\id PHP
\h FILIPENSES
\toc1 FILIPENSES
\mt1 FILIPENSES
\mt2 Yɨ Necy Huɨdibɨ San Pablo Yajniguejx Je Mɨbɨjcpɨdɨjc Jɨm Filipos
\c 1
\p
\v 1 Ɨɨch Pablo mɨɨd Timoteo tumbɨch ma Jesucristo ytung. Jada necy ɨɨch ajcxy nguejxpy ma tügꞌócɨy huɨdibɨ mɨbɨjcp Dios jɨm Filipos huɨdibɨ yajpaatp ma Jesucristo. Nañ jaduꞌn jada necy nyajniguexyɨch yɨꞌ ajcxy mɨjtungmɨɨdpɨ etz mutztungmɨɨdpɨ ma Dios ytung.
\v 2 Huen ɨɨch ajt nDios Teedy etz ajt nHuindzɨn Jesucristo mayꞌajt etz oyꞌajt tunɨpy mɨɨd miich ajcxy ycɨxpɨ etz xyajjotcugɨ́ɨygɨxɨpy.
\s Pablo mɨbɨjctzoy Dios mɨɨd je mɨbɨjcpɨdɨjc ycɨxpɨ
\p
\v 3 Naagꞌoc naagꞌoc njäymechɨch miich ajcxy njatytimyajnajxpyɨch jäygɨdaacɨn ma Dios mɨɨd miich ajcxy ycɨxpɨ.
\v 4 Njatytimjotcujcꞌajtpɨch ooy naagꞌoc naagꞌoc Dios nmɨbɨjctzooyɨch mɨɨd miich ajcxy ycɨxpɨ.
\v 5 Jotcujcꞌajtpɨch com miich ajcxy tɨ xypubéjtcɨxyɨch co ngapxhuäcxɨch Jesucristo yꞌayuc ytɨyꞌajt. Jaduꞌn tɨ xypubéjtcɨxyɨch maabɨ nyajtzondägyɨch ngapxhuäcxyɨch Jesucristo yꞌayuc ixtɨ chambaad.
\v 6 Nejhuɨɨybɨch tɨydudägy co Dios tɨ yajtzondägy yɨ oybɨ ytung ma miich ajcxy mjot mhuinmaꞌñ, etz jactunaamnɨ ma miich ajcxy mjot mhuinmaꞌñ ixtɨ mabaad Jesucristo anajty ymiiñ jadügꞌoc ya naaxhuiñ mɨɨd yꞌaneꞌmɨn etz ymɨcꞌajt.
\v 7 Ooy ytudägyɨty co jaduꞌn jotcujcꞌajtpɨch mɨɨd miich ajcxy ycɨxpɨ, com ooy ndzocy njɨhuɨ̈yɨch miich ajcxy. Dios mayꞌajt oyꞌajt tɨ tuñ co tɨ xyajnïbɨcyɨch jada tung, etz miich ajcxy myajpaady quipxy mɨɨd ɨɨch ma Dios ytung, mɨɨd co miich ajcxy xyjäymechɨch etz nañ xypubetyɨch ajcxy, huenmaꞌamy ɨɨch nyajpaady, oy ixyipy pujxtɨgoty, oy ixyipy ma tungmɨɨdpɨ yhuinduu co nnïgapxpetyɨch Dios yꞌayuc ytɨyꞌajt etz nañ nnïgapxpetyɨch co yjanchɨty.
\v 8 Dios ñejhuɨɨyb jaduꞌn nej mɨjcajee ooy ndzocy njɨhuɨ̈yɨch miich ajcxy mɨɨd je tzojcɨn jɨhuɨɨyɨn huɨdibɨ Jesucristo tɨ xymöyɨch.
\v 9 Nmɨbɨjctzooybɨch Dios mɨɨd miich ajcxy ycɨxpɨ co xypubedɨpy ajcxy jɨgɨx jëbɨ nïgɨ mdzogɨpy mjɨhuɨ̈huɨpy mɨgügtɨjc, etz jɨgɨx ajcxy nïgɨ mꞌixpɨgɨpy je tɨyꞌajt tudägypɨ, etz nañ nïgɨ mhuinjɨhuɨ̈huɨpy tügꞌócɨy nej Dios tzocy co nduunɨm.
\v 10 Nañ nmɨbɨjctzooybɨch Dios mɨɨd miich ajcxy ycɨxpɨ jɨgɨx jëbɨ mnejhuɨ́ɨygɨxɨpy, etz nañ jɨgɨx jëbɨ mhuinꞌíjxcɨxɨpy huɨdibɨ jacꞌoy mdúnggɨxɨpy. Co oy mdúngɨxɨpy, huinꞌit jëbɨ mdzɨnáaygɨxy mɨɨd huädz jot huädz huinmaꞌñ, e caꞌ ni ti jotmay miich anajty ajcxy mmɨɨdɨñ, co anajty je xɨɨ je tiempo paady co Jesús anajty miñ ya naaxhuiñ jadügꞌoc mɨɨd yꞌaneꞌmɨn mɨɨd ymɨcꞌajt.
\v 11 Dios nmɨbɨjctzooybɨch mɨɨd miich ajcxy ycɨxpɨ co ajcxy mbattähuɨp tügꞌócɨy oyjot oyhuinmaꞌñ, je oyjot oyhuinmaꞌñ huɨdibɨ Jesucristo tügpajc jëbɨ xymooygɨxy. E jaduꞌn jäy ajcxy capxpaadɨp Dios etz nañ huinꞌɨ́ɨgɨxɨp Dios co ajcxy ixɨpy nej tudägy mdzɨnaaygɨxy.
\s Mɨɨd ɨɨch, yɨ njugyꞌajtɨch, yɨꞌ yɨꞌ Cristo
\p
\v 12 Ndzojcpyɨch co miich ajcxy mnejhuɨ̈huɨpy co mɨɨd je tzaachypɨ ycɨxpɨ huɨdibɨ nmɨnaxyp nyajnaxypɨch ya pujxtɨgoty, nïgɨ mayjäy tɨ mɨdoy Jesús yꞌayuc ytɨyꞌajt.
\v 13 Jaduꞌn tɨ yhuimbɨdzɨmy co tügꞌócɨy soldadtɨjc etz jacjadyii jäy ya ma je gobierno ymɨjtɨjc tɨ nejhuɨɨydäy ajcxy co nbujxtɨjcꞌɨñayɨch mɨɨd co nduuñɨch ma Jesucristo ytung.
\v 14 Nañ jaduꞌn mɨɨd co nbujxtɨjcꞌɨñäyɨch, paady ycɨxpɨ yɨ jacjadyii mɨbɨjcpɨdɨjc tɨ yjotmɨcpɨjccɨxy ma ajt nHuindzɨn Jesucristo tung, etz ycapxhuäcxyꞌadɨɨchpy ajcxy Dios yꞌayuc ytɨyꞌajt, caꞌ ma tzɨgɨꞌñ jɨhuɨꞌñ.
\p
\v 15 Janch tɨyꞌajt jada co nijëjɨty jäy capxhuäcxy je Cristo yꞌayuc ytɨyꞌajt mɨɨd co caꞌ xyajmɨdzojccɨxy, etz nañ mɨɨd co xyajmɨdzipꞌajtcɨxy. Nañ tɨyꞌajt jada co jacjadyii mɨgügtɨjc xychojcp xyjɨhuɨɨyb ajcxy, e capxhuäcxy ajcxy je Cristo yꞌayuc ytɨyꞌajt mɨɨd oyjot oyhuinmaꞌñ.
\v 16 Janch tɨyꞌajt co nijëjɨty mɨgügtɨjc capxhuäcxcɨxy Jesucristo yꞌayuc mɨɨd co ñaygömayaꞌñyii cɨꞌm, caꞌ nmɨnaanɨm ycapxhuäcxp ajcxy cɨxyjot huinɨjot. Yɨꞌ ajcxy yꞌixtaayb nej xyajtajɨ́py xyajmayɨ́pyɨch, jaduꞌn nej ɨɨch pujxtɨgoty nꞌityɨch.
\v 17 Yɨꞌ ajcxy huɨdibɨ xychojcpɨch xyjɨhuɨɨybɨch ycapxhuäcxpy ajcxy Cristo yꞌayuc com ñejhuɨɨyb ajcxy co ɨɨch yam nꞌityɨch pujxtɨgoty, mɨɨd co tɨ nhuinmaꞌñ nbɨdägyɨch co nnïgapxpedaꞌñɨch Jesucristo yꞌayuc ytɨyꞌajt.
\v 18 Pen jäy ajcxy capxhuäcxp Cristo yꞌayuc mɨɨd co ñaygömayáanɨgɨxy cɨꞌm, o pen ycapxhuäcxyp mɨɨd oyjot oyhuinmaꞌñ, caꞌ ñejɨty, jotcujcꞌajtpɨch co capxhuäcxy ajcxy Jesucristo yꞌayuc.
\p
\v 19 Com nnejhuɨɨybɨch co miich ajcxy mmɨbɨjctzoogɨxy Dios mɨɨd ɨɨch ycɨxpɨ, e nañ nnejhuɨɨybɨch co Jesucristo yjɨhuɨꞌñ ymɨcꞌajt xypubetyɨch, paady nïgɨ njotcugɨ̈yɨch, e nañ njɨjpꞌijxypɨch co nbɨdzɨmaꞌñɨch pujxtɨgoty.
\v 20 Ndzojcpyɨch etz nañ njɨjpꞌijxpyɨch co nmɨmadactähuaꞌñɨch tügꞌócɨy ma ɨɨch mdzɨnaayɨn, e caꞌ ti tzöyduꞌn nbáadɨbɨch ma Dios yhuinduu. Ndzojcpyɨch nañ njɨjpꞌijxpyɨch co njaccapxhuäcxɨbɨch Jesucristo yꞌayuc huinmɨc jotmɨc, jɨgɨx Jesucristo ycömayꞌidɨpy. Caꞌ ñejɨty pen jactzɨnaayb, o pen nꞌoꞌcpɨch.
\v 21 Ɨɨch ndzɨnaayɨn njuugyꞌajtɨn Cristo yɨꞌ ycɨxpɨ, e penɨ nꞌoꞌcpɨch, tɨ ɨɨch anajty mɨj nmadägy.
\v 22 Pen njactzɨnaaybɨch, mayjäy oybɨ padaꞌñ mɨɨd ɨɨch ndung ycɨxpɨ. Caꞌ nnejhuɨ̈yɨch huɨdibɨ jacꞌoy nhuinꞌixɨpyɨch co tzojc nꞌögɨbɨch, o co njactzɨnähuɨbɨch.
\v 23 Ooy chachchipɨty nnejhuɨ̈huɨbyɨch huɨdibɨ jacꞌoy nhuinꞌixɨpyɨch, co nꞌögɨbyɨch, o co njactzɨnähuɨbyɨch. Ɨɨch cɨꞌm nayjɨhuɨ̈yiijɨch nïgɨ jotcujc co ixyipy tzojc nꞌögyɨch, jɨgɨx ixyipy mɨcꞌamy nɨcxy nꞌityɨch jiiby tzajpjoty ma Cristo yajpaady.
\v 24 Per jaccopɨty mɨɨd miich ajcxy mꞌoyꞌajtɨn ycɨxpɨ, co njactzɨnähuɨbɨch.
\v 25 Com nnejhuɨɨybɨch co copɨcy njacpubedaꞌñɨch miich ajcxy, paady nnejhuɨɨybɨch co njactzɨnähuɨbɨch, e jɨgɨx jëbɨ nbubejtcɨxy ma Dios ytung etz ma yɨ mmɨbɨjcɨn. E jaduꞌn miich ajcxy nïgɨ mjotcujcꞌadɨpy ma mmɨbɨjcɨn.
\v 26 Miich ajcxy huɨdibɨ yajpaatp ma Jesucristo, nïgɨ jotcujc mꞌidɨpy co nɨcxy nꞌidaꞌñɨch jadügꞌoc ma miich ajcxy.
\p
\v 27 Jëyɨ janchtɨy co mdzɨnaayɨn mjugyꞌajtɨn mɨꞌijtcɨxy jaduꞌn nej Cristo yꞌayuc ytɨyꞌajt yꞌaneꞌmy. Pen nɨcxpɨch anajty cɨꞌm ma miich ajcxy, o pen caꞌ nnɨcxyɨch, per ndzojcypɨch co xypáadɨbɨch tɨyꞌajt co miich mɨc mꞌijtcɨxy ma mmɨbɨjcɨn, túꞌcɨy cɨxyjot huinɨjot mdungɨxy. Mɨc mjanchmɨdɨnaaygɨxy niꞌamugɨꞌ yɨ mmɨbɨjcɨn, jaduꞌn nej tɨ mmɨjpɨdaaccɨxy Jesucristo ytɨyꞌajt,
\v 28 e caꞌajcxy mdzɨgɨ̈huɨp co jäy ajcxy xymɨdziptzóongɨxɨpy, jada jeꞌ tɨyꞌajt co tɨgoyamb ajcxy yꞌalma, e nañ jada jeꞌ tɨyꞌajt co miich ajcxy chóocɨxɨpy yɨ mꞌalma, e nañ jaduꞌn jada tɨyꞌajtɨp co Dios yꞌity mɨɨd miich ajcxy.
\v 29 Dios mayꞌajt oyꞌajt tɨ tuñ mɨɨd miich ajcxy ycɨxpɨ co yajꞌoyɨɨy nej jëbɨ miich ajcxy mɨbɨjccɨxy Jesucristo etz nañ nej jëbɨ tzaachypɨ mmɨnajxcɨxy myajnajxcɨxy mɨɨd Jesucristo ycɨxpɨ.
\v 30 Ɨɨch etz miich ajcxy quipxyɨ tɨ nmɨnajxɨm tɨ nyajnajxɨm tung ayoꞌn mɨɨd Jesucristo ycɨxpɨ. Miich ajcxy tɨ mꞌixy tɨ mnejhuɨ̈y jaduꞌn nej ɨɨch ndung nꞌayoꞌn tɨ nmɨnaxy tɨ nyajnaxyɨch, co jɨm anajty nꞌityɨch ma miich ajcxy. E nañ miich ajcxy mnejhuɨɨyb nej ɨɨch chambaad nmɨnaxy nyajnaxyɨch ndung nꞌayoꞌnɨch mɨɨd Cristo ycɨxpɨ.
\c 2
\s Cristo yungꞌajt ñaxꞌajt etz ymɨjꞌajt
\p
\v 1 Pen Cristo miich ajcxy mjotꞌamɨjmooyb mɨɨd yjɨhuɨꞌñ mɨɨd ymɨcꞌajt, pen tɨ jotcujcꞌajtɨn mbatcɨxy mɨɨd co Cristo xychojccɨxy xyjɨhuɨɨygɨxy, pen yɨꞌ yjɨhuɨꞌñ ymɨcꞌajt ijtp ma miich ajcxy, pen mdzojccɨxyp mjɨhuɨɨygɨxyp etz nañ mbaꞌayoogɨxy mɨgügtɨjc,
\v 2 jotcujcꞌadɨpɨch mɨɨd co mdzɨnaaygɨxy ooy yajxon, xïc xon, tügyɨ mnaychójcɨgɨxy mnayjɨhuɨ́ɨyɨgɨxy miñ xyɨpy, tzɨnaaygɨxy quipxyjot quipxyhuinmaꞌñ. 
\v 3 Caꞌ ajcxy ti mdunɨpy mɨɨd mgɨꞌmdzojcɨn ycɨxpɨ. Nañ ni caꞌ amɨj agɨx naybɨdáacɨgɨxy co ti mdungɨxy. Tügꞌócɨy huɨdibɨ mdungɨxyp, mdunɨ́py ajcxy mɨɨd yung naxy mjot mhuinmaꞌñ. Nidüg nidüg myajmɨjꞌadɨpy nïgɨ mɨgügtɨjc, caꞌydɨ nej miich cɨꞌm mnayyajmɨjꞌadyii. 
\v 4 Caꞌ huaad pɨn naydügpajc ycɨꞌmꞌoyꞌajt ixtäy, nañ jaduꞌn tzocy co mɨgügtɨjc myajmɨdzogɨpy yꞌoyꞌajt. 
\p
\v 5 Pɨdaaccɨx mjot mhuinmaꞌñ túꞌcɨy jaduꞌn nej Jesucristo anajty yhuinmaꞌñ mɨɨdɨty co ya naaxhuiñ  chɨnay. 
\v 6 Oy Jesucristo yjaDiosɨty tɨ yhuinmaꞌñypɨdägy co jëbɨ ixmach yɨꞌ ymɨjꞌajtɨn huɨdibɨ anajty  yjamɨɨd.
\v 7 Jesucristo ahuingujc pɨdaactay je mɨjꞌajt huɨdibɨ anajty ymɨɨd, e chi jaduꞌn chɨnay nej tüg tumbɨ co oy jaduꞌn ypiꞌcꞌaty jaduꞌn nej jäy. 
\v 8 E co jaduꞌn ñaybɨdaacɨ nej naaxhuiñyjäy, chi yung naxy pɨdacy yjot yhuinmaꞌñ, e nañ capxymɨdoy Dios ixtɨ mɨbaad ñayyejcɨ, huen jäy yajꞌögyii. E ooy anajty choꞌyduꞌnɨty co jäy yajꞌoꞌcɨ cruudzcɨ́xy.
\v 9 Paady ycɨxp Dios tɨ cömay jacnïgɨ Jesucristo, e tɨ pɨdäcɨ yɨꞌ yxɨɨ jaccömay, caꞌydɨ jacpɨnjäy yxɨɨ.
\v 10 Jaduꞌn Dios tɨ cömay Jesús, jɨgɨx jëbɨ tügꞌócɨy tzajpjoty tzɨnaaybɨ etz tügꞌócɨy naaxhuiñyjäy, etz tügꞌócɨy jäy ajcxy huɨdibɨ tɨ ñaaxtɨgɨ̈y, co anajty ajcxy nidügꞌócɨy mɨdoogɨxy co Dios capxpaatɨp Jesús yxɨɨ, chi ycojxtɨnaayꞌɨhuɨydähuɨpy ajcxy ma yɨꞌ yhuinduu, etz yꞌojadadɨpy ajcxy Jesús nidügꞌócɨy.
\v 11 E co nidügꞌócɨy ajcxy cöbɨgɨpy etz yajmɨjꞌadɨpy Jesucristo jaduꞌn nej ajcxy yHuindzɨn, jaduꞌn Dios Teedy ycömayꞌidaꞌñ.
\s Yɨ pɨn ajcxy Cristo mɨbɨjcp, yɨꞌ yɨꞌ ajcxy jaduꞌn nej tüg tɨɨcxɨn jajɨn 
\p
\v 12 Mɨgügtɨjc ajcxy huɨdibɨ ooy ndzocy njɨhuɨ̈yɨch, com Jesucristo jaduꞌn ijxpejtɨn tɨ yecy, capxymɨdoogɨch cham co jɨguëgy nyajpaadyɨch ma miich ajcxy, tɨm jaduꞌn nej jayhuin ɨɨch miich ajcxy xycapxymɨdooy co nꞌijtyɨch ma miich ajcxy. Naymɨjottɨgóoyɨgɨx jabom jabom mguydungɨxy Jesucristo ytɨyꞌajt etz mmɨꞌijtcɨx huädz mjot huädz mhuinmaꞌñ. Tungɨx Dios ytung mɨɨd yung naxy ajcxy mjot mhuinmaꞌñ, e huindzɨgɨɨygɨx Dios.
\v 13 Com Dios yɨꞌ tumb jabom jabom ma miich ajcxy mjot mhuinmaꞌñ, jɨgɨx jëbɨ miich ajcxy mdunɨpy yɨꞌ ytung yɨꞌ chojcɨn cɨxyjot huinɨjot jaduꞌn nej Dios tzocy.
\p
\v 14 Tungɨx cɨxyjot huinɨjot Dios ytung, caꞌyꞌaametzɨty yjotmetzɨty, nañ ni caꞌ mɨɨd tzip ejcɨn.
\v 15-16 Jaduꞌn mdunɨpy ajcxy caꞌydɨ pɨnjaty yxɨ̈gɨxy co tɨ mdundɨgooygɨxy. Miich ajcxy Dios xyꞌungꞌadɨɨb, caꞌ mnïgɨxꞌadɨɨyb ajcxy ti jɨbɨcpɨ. Tzɨnaaygɨx mɨɨd oyjot oyhuinmaꞌñ ma yɨ jäy ajcxy yajpaady huɨdi jɨbɨc-huinmaꞌñ tumb huɨdibɨ tundɨgooyb ma Dios ytɨyꞌajt. Co miich ajcxy myajhuäcxy Dios yꞌayuc ytɨyꞌajt huɨdibɨ alma yjugyꞌajtɨn mooyb ma jɨbɨcjäydɨjc ajcxy, jaduꞌn nipaady nej tüg madzä ytɨɨcxy coodz. Pen jaduꞌn mdungɨxy, co anajty Cristo ymiiñ jadügꞌoc ya naaxhuiñ, jotcujcꞌadɨpɨch co anajty nnejhuɨ̈yɨch co caꞌ ɨɨch ndung etz nxɨɨ ndiempo yñadɨgɨ̈ꞌaty co nꞌíjtyɨch ma miich ajcxy.
\v 17 Co nꞌögɨbɨch mɨɨd Cristo ytung ycɨxpɨ, jaduꞌn nipaady nejjɨhuɨ̈y ɨɨch nnɨꞌpy tɨ ndem tɨ nyocyɨch mɨɨd miich ajcxy ycɨxpɨ co tɨ ngapxhuäcxɨch Dios yꞌayuc ma miich ajcxy. E co miich ajcxy tɨ mmɨjpɨdaaccɨxy ɨɨch nꞌayuc, jaduꞌn nipaady nejjɨhuɨ̈y miich ajcxy tɨ myoxy tɨ mdoogy yɨ mjugyꞌajtɨn ma Jesucristo. Jotcujcꞌajtpɨch jaduꞌn co miich ajcxy mjugyꞌajtɨn tɨ myoxy tɨ mdoogy  ma Jesucristo.
\v 18 Nañ jaduꞌn miich ajcxy mjotcujcꞌadɨpy quipxy mɨɨd ɨɨch.
\s Timoteo etz Epafrodito
\p
\v 19 Pen ɨɨch ajt nHuindzɨn Jesús tzojcpy, njɨjpꞌijxypɨch co jëbɨ nguexɨpyɨch Timoteo ma miich ajcxy, jaydëbɨ njotcujcꞌadɨpyɨch co anajty yɨꞌ xyajnimiiñɨch tɨyꞌajt nej miich ajcxy myajpaady.
\v 20 Timoteo tügpajc huɨdibɨ huinmaꞌñ túꞌcɨy mɨɨd jaduꞌn nej ɨɨch nhuinmaꞌñ nmɨ́ɨdɨdyɨch, etz nañ huɨdibɨ janch naybɨdaacɨp mɨɨd miich ajcxy mꞌoyꞌajtɨn ycɨxpɨ.
\v 21 Yɨ jacjadyii mɨgügtɨjc huɨdibɨ yajpatp ma ɨɨch, yajcopɨjcpy  ajcxy ycɨꞌmꞌoyꞌajtɨn, e caꞌ ajcxy yajcopɨcy Jesucristo ytung.
\v 22 Miich ajcxy mnejhuɨɨyb jaduꞌn nej Timoteo tudägy ytuñ mɨɨd ɨɨch co ngapxhuäcxyɨch Jesucristo yꞌayuc ma miich ajcxy, tɨm jaduꞌn nej tüg ung ytuñ mɨɨd yteedy.
\v 23 Paady ycɨxp njɨjpꞌijxypɨch co jëbɨ nguexyɨch Timoteo ma miich ajcxy mɨna anajty nnejhuɨ̈yɨch nej ycɨxɨpy ɨɨch njotmay huɨdibɨ nmɨɨdɨch ya.
\v 24 Nañ nmɨbɨjcypɨch ajt nHuindzɨn Jesucristo co yajꞌahuädzɨp ɨɨch nnɨɨꞌa ndüꞌa co jëbɨ ɨɨch cɨꞌm nɨcxy tzojc nꞌixyɨch miich ajcxy.
\p
\v 25 Nañ jaduꞌn nhuinmaayɨch co copɨcy jadügꞌoc nguexɨpyɨch ajt nmɨgüg Epafrodito ma miich ajcxy, yɨꞌ huɨdibɨ xypubejtpɨch ma ndung nꞌayoꞌnɨch ya. Yɨꞌ huɨdibɨ miich ajcxy tɨ mguexy ma ɨɨch, jëbɨ xypubetyɨch  ma tügꞌócɨy huɨdijaty nyajmayjajtypɨch. 
\v 26 Epafrodito ooy nijotꞌaty co jëbɨ nɨcxy yꞌixaangɨxy miich ajcxy nidügꞌócɨy. Ooy yɨꞌ ytajy ymaay co miich ajcxy tɨ mnejhuɨ̈y co ypɨgyii.
\v 27 Janch tɨyꞌajt co Epafrodito ooy tɨ ypɨgyii, jago jago tɨ ycaꞌögy. Per Dios tɨ paꞌayoy Epafrodito, e nañ jaduꞌn tɨ xypaꞌayooyɨch, jɨgɨx caꞌydɨ nïgɨ ayoꞌn jotmay nbaadyɨch.
\v 28 Paady ycɨxp nïgɨ ndzocyɨch co jëbɨ nguexɨpyɨch Epafrodito ma miich ajcxy jadügꞌoc, jɨgɨx miich ajcxy mjotcugɨ̈huɨp co mꞌixɨpy. E nañ jaduꞌn jëbɨ yquëgy ɨɨch ndajɨn mayɨn mɨɨd yɨꞌ ycɨxpɨ. 
\v 29 Cöbɨjccɨx Epafrodito jotcujc, jaduꞌn nej tüg mɨgüg huɨdibɨ yajpaatp ma ajt nHuindzɨn Jesús. Yajmɨjꞌajtcɨx  tügꞌócɨy mɨgügtɨjc huɨdibɨ yjugyꞌajtɨn yojxp toocp mɨɨd Jesucristo ytung ycɨxpɨ, jaduꞌn nej yɨꞌ tɨ ytuñ. 
\v 30 Com jago jago Epafrodito tɨ ycaꞌögy mɨɨd Cristo ytung ycɨxpɨ. Tzip tzaach yjugyꞌajtɨn tɨ mɨnaxy tɨ yajnaxy co tɨ xypubetyɨch ya. Com miich ajcxy caꞌ cɨꞌm jëbɨ xypubéjtcɨxyɨch ya, paady yɨꞌ miich ajcxy tɨ xycodɨnäy.
\c 3
\s Je tudägyꞌajt je janchypɨ 
\p
\v 1 Jadügnax, mɨgügtɨjc ajcxy, jotcujcꞌajtcɨx co myajpatcɨxy ma ajt nHuindzɨn Jesucristo. Caꞌ ti adzijpɨn njɨhuɨ̈yɨch co nnïgapxpetyɨch jada tɨyꞌajt jadügꞌoc huɨdibɨ jayhuin tɨ nyajnijayɨɨygɨxy. Jaduꞌn nduñɨch mɨɨd miich ajcxy mꞌoyꞌajtɨn ycɨxpɨ. 
\v 2 Naygüendɨꞌájtɨgɨx mɨɨd yɨꞌ ajcxy yꞌayuc huɨdibɨ ajcxy tundɨgooyb co ajcxy yajcopɨjcy yɨ tɨyꞌajt huɨdibɨ pɨdacp ma jäy ñinïcx mɨɨd tzujc. Jɨbɨc jäy yɨꞌ ajcxy, jaduꞌn ajcxy nipaady nej uc. 
\v 3 Yɨ jäy ajcxy huɨdibɨ tɨydudägy mɨbɨjcp Dios, caꞌ nmɨnaanɨm jeꞌ yɨꞌ ajcxy huɨdibɨ tɨyꞌajttɨ̈yɨp ñinïcx. Yɨ Dios yjäy ajcxy janchypɨ, yɨꞌ ajcxy cɨxyjot huinɨjot mɨbɨjcp mɨjpɨdacp Dios ytɨyꞌajt jaduꞌn nej ɨɨch ajt. Ɨɨch ajt nꞌojadajtɨm Dios mɨɨd ajt nꞌespíritu, etz mɨɨd ajt njot nhuinmaꞌñ. Jotcujcꞌajtɨm com jeꞌ co nyajpaatɨm ma Cristo Jesús, e caꞌ nyajcopɨjcɨm tijaty tɨyꞌajt huɨdibɨ jäy ajcxy ytumyb.
\v 4 Co ixyipy ytɨyꞌajtɨty yɨ jaduꞌmbɨ huinmaꞌñ, jëbɨ ixyipy naygömayiijɨch cɨꞌm, com jecyꞌajty caꞌ anajty ni pɨn huɨdibɨ nïgɨ cuyduun yɨ jaduꞌmbɨ tɨyꞌajt caꞌydɨ ɨɨch. 
\v 5 Co nductujcxɨɨjɨ̈yɨch ma anajty tɨ nmaꞌxungꞌatyɨch, chi oy nyajtɨyꞌajttɨ̈yɨch. Raza hebrea ɨɨch, Benjamín nmɨjꞌapꞌajtpyɨch nmɨjteedyꞌajtpyɨch. Nmaꞌxungꞌajtɨch hebreojäy. Ɨɨch ndaj ndeedy hebreojäy ajcxy anajty. Nañ nmɨjpɨdaacɨch fariseo yꞌixpɨjcɨn, jaduꞌn nej ajcxy yajnïguejy judíojäy ycötujcɨn.
\v 6 Ɨɨch janchmɨctägy anajty nguyduñɨch ngɨꞌmhuinmaꞌñɨch, ixtɨ mabaad anajty nꞌixhuɨdity nbahuɨdityɨch mɨctägy yɨ jäy ajcxy huɨdibɨ anajty mɨjpɨdacp Jesucristo. Tɨ nguydundäyɨch tügꞌócɨy judíojäy ycötujcɨn. Ni pɨn caꞌ huaad yxɨ̈yɨch co tɨ ndundɨgooyɨch ma yɨꞌ ajcxy ycötujcɨn.
\v 7 Tügꞌócɨy yɨ judíojäy yhuinmaꞌñ huɨdibɨ tɨ nyajcopɨcyɨch anajty, jadachambɨ caꞌ ytimychobaady mɨɨd ɨɨch, co tɨ nmɨjpɨdägyɨch Cristo ytɨyꞌajt.
\v 8 Jadachambɨ janchtɨy, huɨdijaty anajty nyajcopɨjcpyɨch, tɨ nnajtzꞌixɨɨydäyɨch, jɨgɨx jëbɨ nnejhuɨ̈huɨbɨch etz nguydunɨpɨch yajxon ajt nHuindzɨn Jesucristo oybɨ yꞌayuc ytɨyꞌajt. Mɨɨd co tɨ nmɨjpɨdägyɨch Jesucristo, paady nnajtzꞌixɨɨydaayɨch tügꞌócɨy huɨdibɨ anajty nyajcopɨjcpyɨch, yɨ jaduꞌmbɨ huinmaꞌñ cham caꞌ chobaady mɨɨd ɨɨch, jaduꞌn nipaady nej püx. Jaduꞌn nduuñɨch mɨɨd Jesucristo ytɨyꞌajt oyꞌajt ycɨxpɨ.
\v 9 E jaduꞌn nduuñɨch jɨgɨx jëbɨ nyajpaadyɨch ma Jesucristo. Jaduꞌn tɨ nnajtzꞌixɨɨydäyɨch je tudägyꞌajtɨn huɨdibɨ tɨ nbaadyɨch co tɨ nguyduuñɨch Moisés ycötujcɨn je jecyɨp. Nañ jaduꞌn nduñɨch jɨgɨx jëbɨ nbáadɨbɨch je tudägyꞌajtɨn huɨdibɨ Dios yejcpy co nmɨbɨjcɨm  nmɨjpɨdaacɨm Jesucristo.
\v 10 Ndzojcpyɨch co njacnejhuɨ̈huɨbɨch Cristo yꞌayuc ytɨyꞌajt. Nañ ndzojcpyɨch co njacnejhuɨ̈huɨbɨch Cristo ymɨcꞌajt, jaduꞌn nej yjugypɨjcy co yꞌoꞌcy. Nañ ndzojcpyɨch co njacmɨnaxɨpyɨch njacyajnaxɨpyɨch tzaachypɨ jaduꞌn nej Jesús mɨnaxy yajnaxy tzaachypɨ, ixtɨ mabaad jaduꞌn njatyɨch jaduꞌn nej Cristo yjajty co yꞌoꞌcy.
\v 11 E paady ycɨxpɨ njɨjpꞌijxpyɨch co nꞌögɨbɨch njugypɨgɨpyɨch jadügꞌoc co anajty Dios yajjugypɨcy yɨ jäy ajcxy tɨɨbɨ yꞌöccɨxy.
\s Naymɨcꞌijxɨm jɨgɨx nbaatɨm huɨdibɨ Dios tɨ xyajꞌahuanɨɨyɨm
\p
\v 12 Caꞌ nmɨnaanɨm jaduꞌn nmɨnaꞌñɨch co tɨ nmɨmadactäyɨch nej Cristo tɨ mɨmadactäy. Nañ ni caꞌ jaduꞌn nmɨnaꞌñɨch co ɨɨch njot nhuinmaꞌñ tɨ nyajhuätztäyɨch. Njactumnɨch, jɨgɨx jëbɨ Cristo yꞌoyꞌajtɨn nbáadɨbɨch. Com Jesucristo tɨ xyhuinꞌixyɨch jayɨjp, jaydëbɨ jada oyꞌajtɨn nbáadɨbɨch.
\v 13 Mɨgügtɨjc ajcxy, caꞌɨɨch cɨꞌm naygömayiijɨch, co tɨ nmɨmadactäyɨch Cristo yꞌoyꞌajtɨn. Jada janchtɨy ndumbyɨch, njäydɨgoydaaybɨch tügꞌócɨy huɨdibɨ tɨ ñaxy, e mɨctägy nduuñɨch jëbɨ nbáadɨbɨch je oyꞌajtɨn huɨdibɨ Dios jiiby tzajpjoty xymöhuaambɨch mɨɨd co nyajpaadyɨch ma Jesucristo.
\v 14 Mɨctägy nduuñɨch mɨɨd tügꞌócɨy nmɨcꞌajtɨch, jɨgɨx jëbɨ nbáadɨbɨch je oyꞌajtɨn huɨdibɨ Dios jiiby tzajpjoty xymöhuaambɨch. Jaduꞌn nipaady nejɨhuɨ̈y mɨɨd pɨn nayboyɨ̈cquipxyiijɨch co nbadaꞌñɨch tüg premio.  
\p
\v 15 Ɨɨch ajt tɨ nhuinmaꞌñ ycɨjxnɨ ycaꞌpxnɨ, tzoc panɨcxɨm je ixpɨjcɨn huɨdibɨ nmɨɨdꞌajtɨm. E pen nidügtɨ miich ajcxy tɨgachjaty huinmaꞌñ mɨɨdɨty, Dios xyajnejhuɨ̈huɨp ajcxy je tɨyꞌajt.
\v 16 Jada janchtɨy, je tɨyꞌajt huɨdibɨ tɨ nbaatɨm copɨcy nguydundaayɨm, caꞌ nꞌixmajtzɨm.
\p
\v 17 Mɨgügtɨjc ajcxy, panɨcxcɨx ɨɨch nꞌijxpejt jaduꞌn nej tɨ ndzɨnäyɨch ma miich ajcxy. Nañ jaduꞌn miich ajcxy ijxpejt mbɨgɨpy ma yɨꞌ ajcxy chɨnaayɨn huɨdibɨ ijxpejt tɨ patcɨxy ma ɨɨch.
\v 18 Canaagꞌoc tɨ nnɨmaaygɨxy, e nnɨmaaygɨxy jadügꞌoc mɨɨd tajɨn mayɨn co may nmɨgügtɨjc chɨnaaygɨxy jaduꞌn nej jɨhuɨ̈y mɨdzipꞌajtcɨxy je Cristo huɨdibɨ oꞌc cruudzcɨ́xy mɨɨd ajt nbocy ycɨxpɨ.
\v 19 Dios yajtɨgoyɨp jeꞌajcxy yꞌalma. Yɨꞌ ajcxy ypɨdacpy yhuinmaꞌñ ma yɨ caayɨn uucɨn jɨɨcxy ypɨcy, ma yjapadyii huen yjot yhuinmaꞌñ pɨdaaccɨxy ma Dios. Yɨꞌ ajcxy chachñaygömáayɨgɨxy cɨꞌm ma yjapadyii tzoꞌyduꞌn jɨhuɨ́ɨyɨgɨxɨpy. Hueꞌ pɨdaaccɨxy yhuinmaꞌñ ma naaxhuiñ jäy chɨnaayɨn. 
\v 20 Ɨɨch ajt hueꞌ nyajpaatɨm njäyꞌajtɨm tzajpjoty, e njɨjpꞌijxɨm co ɨɨch ajt nHuindzɨn Jesucristo miinaamb ya naaxhuiñ jadügꞌoc, chonaꞌñ tzajpjoty, je huɨdibɨ xyajnïdzögaanɨm ajt nꞌalma.
\v 21 Jesucristo xyajtɨgadzaanɨm ajt nninïcx pocymɨɨdpɨ, e xymöhuaanɨm tüg ninïcx jemybɨ oybɨ, tɨm jaduꞌn nej yɨꞌ ñinïcx mɨɨdɨty. Cristo xyajtɨgadzaanɨm ajt nninïcx mɨɨd yɨꞌ ymɨcꞌajt huɨdibɨ mɨɨd aneꞌmdäy mɨmadactäy. 
\c 4
\s Jotcujcꞌajtcɨxy ajcxy ma je mHuindzɨn Jesús
\p
\v 1 Com Jesús xyajtɨgadzaanɨm ajt nninïcx, paady ycɨxpɨ mɨgügtɨjc huɨdibɨ ooy ndzocy njɨhuɨ̈yɨch, tɨydudägy mɨbɨjccɨx ajt nHuindzɨn Jesucristo, caꞌ mꞌixtɨgɨ̈huäccɨxy ma mmɨbɨjcɨn. Mɨgügtɨjc ajcxy huɨdibɨ ooy nɨcxy njaꞌixaꞌñɨch, ooy njotcujcꞌatyɨch mɨɨd miich ajcxy ycɨxpɨ. Mɨɨd miich ajcxy ycɨxpɨ nbadaꞌñɨch nꞌoyꞌajtɨn ma Dios.
\p
\v 2 Nbɨjctzooybɨch mayꞌajt ma Evodia etz ma Síntique co huen ajcxy ixmajtzcɨxy yɨ tzip etz huen naymɨgügpɨ́jcɨgɨxy jadügꞌoc, com hueꞌajcxy yajpaady mɨbɨjcpɨ ma Cristo.
\v 3 Miich mɨgüg huɨdibɨ tɨ xypubetyɨch ma Cristo ytung, mayꞌajt nbɨjctzooybɨch ma miich co mgapxꞌoyɨ̈huɨpy je tzip ma ajcxy je metzpɨ töxyjäy. Yɨjiibɨ metzpɨ töxyjäy tumb anajty ajcxy quipxyɨ mɨɨd ɨɨch co ngapxhuäcxyɨch Jesucristo yꞌayuc ytɨyꞌajt. Yɨꞌ ajcxy xypubejtɨch quipxyɨ mɨɨd Clemente etz yɨ jacjadyii huɨdibɨ anajty tumb quipxyɨ mɨɨd ɨɨch. Jada metzpɨ töxyjäy ajcxy yxɨɨ ycojayɨ̈y ymiiñ ma Dios ñecy, je necy ma Dios mɨɨdɨty cojay je jäy ajcxy yxɨɨ huɨdibɨ padamb jugyꞌajtɨn huinɨxɨɨbɨ.
\p
\v 4 Jotcujcꞌajtcɨx huinɨxɨɨ, mɨɨd co myajpatcɨxy ma ɨɨch ajt nHuindzɨn Jesucristo. Jadügꞌoc nïgapxpetyɨch co huen jotcujcꞌajtcɨxy.
\v 5 Jaduꞌn tzɨnaaygɨx jaduꞌn nej jëbɨ jäy ajcxy nejhuɨɨygɨxy co miich ajcxy myajtungɨxy mecxtujcɨn ma mdzɨnaayɨn. Com huingon je xɨɨ je tiempo mɨna ymiinaꞌñ ɨɨch ajt nHuindzɨn Jesucristo jadügꞌoc.
\p
\v 6 Caꞌ ni ti mnidajcɨxy mnimaygɨxy. Capxpɨdzɨmdaaygɨx ma Dios tügꞌócɨy ti jotmay miich ajcxy mmɨɨd. Mɨbɨjctzoogɨx Dios, e nañ yajnajxcɨx jäygɨdaacɨn ma Dios.
\v 7 Co Dios mmɨbɨjctzóogɨxɨpy, huinꞌit ajcxy yɨꞌ xymöhuɨp jotcujcꞌajtɨn mɨjcajee, e mayñaaxhuiñyjäy ajcxy ooy yhuinmay ahuɨdidɨpy mɨɨd miich ajcxy mꞌoyꞌajtɨn ycɨxpɨ. Co myajpaady ajcxy ma Cristo Jesús, paady ycɨxpɨ Dios xyajtzɨnähuɨpy ajcxy jotcujc etz xymöhuɨp ajcxy huinmaꞌñ tudägypɨ.
\s Tzojccɨx nijotꞌajtcɨx huɨdibɨ oyɨp
\p
\v 8 Jadügnax, mɨgügtɨjc ajcxy, pɨdaaccɨx mhuinmaꞌñ ma tügꞌócɨy tɨyꞌajt huɨdibɨ janchɨp, tügꞌócɨy tɨyꞌajt huɨdibɨ jëbɨ nyajmɨjꞌajtɨm. Pɨdaaccɨx mhuinmaꞌñ ma tügꞌócɨy tɨyꞌajt huɨdibɨ tudägyɨp. Pɨdaaccɨx mhuinmaꞌñ ma tügꞌócɨy huinmaꞌñ huɨdi huädzɨp etz tügꞌócɨy huinmaꞌñ huɨdi oy jäygɨdaacnɨ. Pɨdaaccɨx mhuinmaꞌñ ma tügꞌócɨy huinmaꞌñ huɨdibɨ jëbɨ yajcapxpaady. Huinmaaygɨx tügꞌócɨy jada oybɨ huinmaꞌñ etz huɨdibɨ huaad njäygɨdaacɨm.
\p
\v 9 Yajtungɨx je tɨyꞌajt huɨdibɨ tɨ nyajꞌixpɨjcɨxy, etz je cötujc huɨdibɨ tɨ nmooygɨxy, etz je ayuc huɨdibɨ tɨ mmɨdoogɨxy co tɨ ngapxyɨch. Etz nañ tungɨx je ijxpejt huɨdibɨ tɨ nyecyɨch. Cuydungɨx jada tɨyꞌajt, huinꞌit yɨ Dios yajpaadɨpy ma miich ajcxy etz xyajjotcujcꞌidɨpy ajcxy.
\s Filipenses ajcxy yꞌofrendɨ mɨɨd Pablo ycɨxpɨ
\p
\v 10 Ɨɨch ajt nHuindzɨn Jesucristo tɨ ooy xyajjotcugɨ̈yɨch co je tɨyꞌajt xypaadyɨch co miich ajcxy xyjäymechɨch jadügꞌoc. Caꞌ nmɨnaanɨm nmɨnaꞌñɨch co miich ajcxy tɨ xyjäydɨgoydaayñɨch. Hueꞌ anajty ycanibɨdzɨmy nej jëbɨ xypubejtcɨxyɨch.
\v 11 Caꞌ nmɨnaanɨm jaduꞌn nmɨnaꞌñɨch co ooy ti jaty nyajmayjajtnɨch. Com tɨ nhuinmaꞌñ nbɨdägyɨch co njotcujcꞌadɨpyɨch mɨɨd tijaty nmɨɨdɨch, oy tɨm mɨnaaxɨɨ tɨm mɨnaatiempo. 
\v 12 Com ɨɨch cɨꞌm nejhuɨɨybɨch nej jay ajcxy yꞌayoy yjottɨgooy, e nañ nejhuɨɨybɨch nej jäy ajcxy chɨnäy co mɨɨdꞌaty tijaty mayꞌamy. Tɨ nnejhuɨɨydäyɨch nej  jëbɨ ndzɨnäyɨch, nej jëbɨ nyajnajxɨch xɨɨ tiempo; pen cuꞌxyɨ ngaayɨch, o pen caꞌ cuꞌxyɨ ngayɨch, pen nmɨɨdɨch conax, o pen caꞌ ti nmɨ́ɨdɨdyɨch.
\v 13 Jëbɨ ndzɨnähuɨbɨch jotcujc huenti huennejɨty, com Cristo xymɨcꞌajtmooybɨch. 
\v 14 Ooy oy tɨ mdungɨxy co tɨ xypubéjtcɨxyɨch ma ɨɨch nꞌayoꞌn njotmay.
\p
\v 15 Jaduꞌn nej miich ajcxy huɨdi jɨm Filipos mnejhuɨɨyb ajcxy, je taabɨ nyajtzondacyɨch co ngapxhuäcxyɨch Jesucristo yꞌayuc ytɨyꞌajt, co ndzooñɨch jɨm Macedonia miich ajcxy tɨ xymɨyoxyɨch, e jac tigati tɨ mguejxcɨxy ma ɨɨch. E miich ajcxy jɨm Filipos huɨdibɨ mɨbɨjcp Jesús, miich ajcxy tügpajc xypubejtɨch caꞌ jac ni pɨn.
\v 16 Co nꞌijtyɨch jɨm Tesalónica miich ajcxy xyajniguejxyɨch pubejtɨn metzꞌoc tugɨɨgꞌoc, e jaduꞌn miich ajcxy xypubejtyɨch mɨɨd huɨdibɨ anajty nyajmayjajtpɨch. 
\v 17 Caꞌ nmɨnaanɨm ooy ndzachjɨjpꞌixynɨch pubejtɨn, jada janchtɨy ndzojcpyɨch co miich ajcxy nïgɨ oyꞌajtɨn mbaadɨpy co anajty mmejtzcɨxy ma Dios yhuinduu. 
\v 18 Tɨ ooy yhuaadɨ̈y yɨ mbubejtɨn ixtɨ nyajconajxpɨch. Mɨɨd je pubejtɨn huɨdibɨ tɨ myajmɨguejxcɨxy Epafrodito cham nmɨ́ɨdɨdyɨch caꞌpxy, caꞌti nꞌocyajmayjajtnɨch. Mɨɨd jada pubejtɨn huɨdibɨ miich ajcxy tɨ xymöyɨch, tɨ ooy njäygɨdägyɨch, tɨm jaduꞌn nej Dios jäygɨdacy je poomjoc huɨdibɨ yajhuindzɨgɨɨyɨ.
\v 19 Ɨɨch nDios miich ajcxy xymöhuɨp tügꞌócɨy huɨdibɨ miich ajcxy myajmayjajtpy. Mɨjcajee yɨꞌ miich ajcxy xymöhuɨp yɨ oybɨ mɨjpɨ oyꞌajtɨn huɨdibɨ yɨꞌ ymɨɨd ma yɨ Jesucristo.
\v 20 ¡Huen ɨɨch ajt nDios Teedy cömayꞌidɨpy huinɨxɨɨ huinɨtiempo! Jaduꞌn jada. Amén.
\s Capxpoocxɨn huɨdibɨ cɨjxnɨp je necy
\p
\v 21 Tungɨx mayꞌajt capxpoocxcɨx mɨɨd ɨɨch ycɨxpɨ tügꞌócɨy mɨgügtɨjc huɨdibɨ yajpatp ma ajt nHuindzɨn Jesucristo. Je mɨgügtɨjc huɨdibɨ yajpatp mɨɨd ɨɨch nañ jaduꞌn xyajniguejxcɨxy capxpoocxɨn.
\v 22 Tügꞌócɨy je mɨbɨjcpɨdɨjc huɨdibɨ yajpatp ya cajpjoty xyajniguejxp ajcxy capxpoocxɨn, yɨꞌ ooy ytimyjayɨjpɨty huɨdibɨ ajcxy yajpatp ma je mɨj aneꞌmbɨ César ycötujctac  xyajniguejxyp ajcxy capxpoocxɨn.
\p
\v 23 Huen ɨɨch ajt nHuindzɨn Jesucristo mayꞌajt oyꞌajt tunɨpy mɨɨd tügꞌócɨy miich ajcxy. Jaduꞌn ngapxycɨ́xyɨch. Amén.