\id COL
\h COLOSENSES
\toc1 COLOSENSES
\mt1 COLOSENSES
\mt2  Yɨ Necy Huɨdi San Pablo Yajniguejx Je Mɨbɨjcpɨdɨjc Jɨm Colosas
\c 1
\p 
\v 1 Ɨɨch Pablo, Dios jaduꞌn tzojcp, paady Jesucristo tɨ xyajnïbɨcyɨch jëbɨ ngapxhuäcxyɨch yɨ ꞌyꞌayuc.  
\v 2 Ɨɨch mɨɨd ajt nmɨgüg Timoteo cham nguexyɨch jada necy ma miich ajcxy huɨdibɨ tzɨnaayb jɨm Colosas. Hueꞌ nguexyɨch jada necy ma miich ajcxy huɨdibɨ Dios yjäyꞌajtɨp e mmɨbɨjccɨxy yɨ Cristo. Huen ɨɨch ajt nDios Teedy etz ajt nHuindzɨn Jesucristo mayꞌajt oyꞌajt tunɨpy mɨɨd miich ajcxy etz xyajjotcugɨ́ɨygɨxɨp. 
\s  Pablo mɨbɨjctzoy Dios mɨɨd mɨbɨjcpɨdɨjc ycɨxpɨ
\p 
\v 3 Jabom jabom co ɨɨch ajcxy Dios nmɨbɨjctzoy, chi nyajnaxɨch jäygɨdaacɨn ma Dios, nHuindzɨn Jesucristo ajt yTeedy, mɨɨd miich ajcxy ycɨxpɨ.
\v 4-5 Tɨ nnejhuɨ̈yɨch jaduꞌn nej miich ajcxy tɨ mmɨbɨjccɨxy Cristo Jesús, e nañ jaduꞌn nej mdzojccɨxy mjɨhuɨɨygɨxy tügꞌócɨy mɨgügtɨjc. Mɨɨd co miich ajcxy mjɨjpꞌixy co Dios mɨɨdɨty tijaty yujcpɨcy tzajpjoty huɨdibɨ miich ajcxy mbadamyb, paady ycɨxpɨ ajcxy mmɨbɨjccɨxy Cristo Jesús, e paady ycɨxpɨ mdzojccɨxy mjɨhuɨɨygɨxy mɨgügtɨjc. Co jayhuin mɨgügtɨjc capxhuäcxy Jesucristo yꞌayuc ytɨyꞌajt ma miich ajcxy, huinꞌit tɨ mnejhuɨɨygɨxy co Dios mɨɨdɨty tzajpjoty huɨdi njɨjpꞌijxyp mbadaangɨxp.
\v 6 Jadayaabɨ tɨyꞌajt huɨdibɨ mɨgügtɨjc tɨ capxhuäcxy ma miich ajcxy, nañ yajcapxhuäcxꞌadɨɨtznɨ ma tügꞌócɨy naax cajp etz mayjäy mɨjpɨdaaccɨxy. Miich ajcxy tɨ mmɨbɨjccɨxy jaduꞌn nej ogaꞌn yajnimɨydacy e chambaadnɨ co Dios mayꞌajt tɨ tuñ mɨɨd jäy ajcxy ycɨxpɨ, e nañ miich ajcxy mnejhuɨɨyb tɨydudägy Dios ytɨyꞌajt.
\v 7 Jada tɨyꞌajt tɨ xyajnejhuɨɨygɨxy je Epafras, ɨɨch ajt nmɨgüg huɨdibɨ ooy ndzocy njɨhuɨ̈yɨch, huɨdibɨ tudägy tumb ma Dios yꞌayuc quipxyɨ mɨɨd ɨɨch. Epafras tɨ xycodɨnäyɨch ma miich ajcxy, e tɨydudägy miich ajcxy xyajꞌijxpɨjcy Cristo ytɨyꞌajt.
\v 8 Epafras tɨ xyajnejhuɨ̈yɨch tɨyꞌajt jaduꞌn nej miich ajcxy myajpatcɨxy, etz jaduꞌn nej je Espíritu Santo ymɨcꞌajt xymooygɨxy, jɨgɨx ajcxy mdzogɨpy mjɨhuɨ̈huɨpy tügꞌócɨy mɨgügtɨjc.
\p 
\v 9 Mɨɨd jada ycɨxpɨ ɨɨch ajcxy jabom jabom Dios nmɨbɨjctzooyɨch mɨɨd miich ajcxy ycɨxpɨ, jaduꞌn nduuñɨch chondacy co ogaꞌn nnejhuɨɨyɨch co miich ajcxy tɨ mmɨjpɨdaaccɨxy Jesucristo, ixtɨ chambaadnɨ. Dios nmɨbɨjctzooybɨch co ajcxy mhuinjɨhuɨ̈huɨpy mnejhuɨ̈huɨpy tügꞌócɨy Dios chojcɨn. Dios nmɨbɨjctzooybɨch co yɨꞌ Espíritu Santo miich ajcxy xyajꞌijxpɨgɨpy xyajnejhuɨ̈huɨpy ajcxy tügꞌócɨy yɨꞌ ytɨyꞌajt etz yɨꞌ chojcɨn.
\v 10 Dios nmɨbɨjctzooybɨch jaydëbɨ mguyduunɨp ajcxy Dios ytɨyꞌajt jaduꞌn nej huaad mɨbɨjcpɨdɨjc chɨnaaygɨxy huɨdibɨ yajpaatp ma ajt nHuindzɨn Jesús, mabaad Dios jäygɨdägy yajxon ajcxy mdzɨnaayɨn mjugyꞌajtɨn. E nañ jaydëbɨ ajcxy mdunɨpy oyjäyꞌajtɨn. E nañ jaydëbɨ jabom jabom yjacyujcpejtcɨxy yɨ mꞌixpɨjcɨn ma Dios.
\v 11 Dios nmɨbɨjctzooybɨch jɨgɨx yɨꞌ xymöhuɨpy ajcxy mɨcꞌajt jaduꞌn nej yɨꞌ mɨɨdɨty ymɨcꞌajt mɨjpɨ, jɨgɨx jëbɨ miich ajcxy jotcujc myajnaxɨpy etz mecxtujctähuɨp tügꞌócɨy tzaachypɨ etz ayoꞌn.
\v 12 Dios nmɨbɨjctzooybɨch co miich ajcxy agujc jotcujc myajnaxɨpy Dioscojuyip ma Dios Teedy, com Dios Teedy ajt xyajpocyñïhuaatzɨm, e jaduꞌn tɨ xyñiꞌixɨɨyɨm jëbɨ nbaatɨm tüg it lugar tzajpjoty quipxyɨ mɨɨd tügꞌócɨy mɨbɨjcpɨdɨjc huɨdibɨ tɨydudägy tzɨnaaygɨxp mɨɨd Dios ytɨyꞌajt, jaduꞌn nipaady nejɨhuɨ̈y nej miich ajcxy mdzɨnäy ma je tɨɨcxɨn.
\v 13 Tɨ Dios xyajnïhuädzɨ̈ctuutɨm ma yɨ jɨbɨc-huinmaꞌñ ma je mujcuꞌ xyꞌaneꞌmɨm, jaduꞌn nipaady nejjɨhuɨ̈y tɨ xyajpɨdzɨmɨm agootztuum. Tɨ Dios xypɨdaacɨm ma yꞌung yꞌaneꞌmy, jeꞌ yꞌung huɨdibɨ yɨꞌ ooy tzocy ooy jɨhuɨ̈y.
\v 14 Dios yꞌung tɨ xyajnïhuädzɨ̈ctuutɨm ma yɨ jɨbɨc-huinmaꞌñ co ñɨꞌpy temy yojcy ma yɨ cruudz mɨɨd ajt nbocy ycɨxpɨ, e tɨ xypocyhuinmeecxɨm.
\s  Co Cristo yꞌoꞌcy mɨɨd ajt nbocy ycɨxpɨ, chi jotcujc nꞌijtɨm mɨɨd Dios
\p 
\v 15 Caꞌ pɨn tɨ ixy Dios. Pɨnjaty tɨ ixy Dios yꞌung, jaduꞌn nipaady nej tɨ ixy Dios. Dios yꞌung yɨꞌ jeꞌ anajty tɨm jayɨjp ma anajty Dios caꞌ ti yajꞌoyɨɨyñɨ.
\v 16 Dios yꞌung tɨ cojtay tügꞌócɨy tijaty yajpaatp jiiby tzajpjoty etz ya naaxhuiñgɨ́xy.  Dios yꞌung cojtay tügꞌócɨy huɨdibɨ jëbɨ huaad nꞌijxɨm etz nañ cojtay huɨdibɨ caꞌ huaad pɨn ixy. Dios yꞌung pɨdaactay tügꞌócɨy yꞌaneꞌmɨn tügꞌócɨy mɨcꞌajt ya naaxhuiñ, etz nañ jaduꞌn pɨdactay aneꞌmɨn mɨɨd yɨ tzajpjoty tzɨnaaybɨ. Dios yꞌung tɨ yajcojtäy tɨ yajꞌabadɨɨydäy tijaty mɨɨd yɨ̈gɨxp.
\v 17 Je Cristo jayɨjp yꞌaneꞌmꞌajt ymɨcꞌajt tɨ paady, caꞌ jac ni pɨn. Je Cristo yajꞌijtpy tügꞌócɨy huɨdijaty ya yajpatp huijtzꞌijttaayb.
\v 18 Je Cristo ñihuindzɨnꞌajttaayb ñigohuajcꞌajttaayb, etz yꞌaneꞌmdaayb tügꞌócɨy jäy huɨdibɨ mɨbɨjcɨp mɨjpɨdaacɨp. Je Cristo yajtzɨnaayb yajjugyꞌajtpy tügꞌócɨy mɨbɨjcpɨdɨjc, com yɨꞌ jeꞌ huɨdibɨ jayɨjp tɨ yjugypɨcy co yꞌoꞌcy. Paady ycɨxp yɨꞌ cötujcɨn mɨjpɨ mɨɨdɨty.
\v 19 Dios hueꞌ tzojcy co tügꞌócɨy yɨꞌ ymɨcꞌajt etz ymɨjꞌajt yajpaadɨp ma yɨꞌ yꞌung.
\v 20 Je naaxhuiñyjäy etz je tzajpjoty tzɨnaayb ajcxy caꞌoyꞌijtcɨxy mɨɨd Dios mɨɨd je mɨjpocy ycɨxpɨ. Dios oy jäygɨdägy ooy jotcujc nayjɨhuɨɨyɨ co yꞌung yꞌoꞌcy cruudzcɨ́xy mɨɨd je mɨjpocy ycɨxpɨ e jaduꞌn oyɨɨy nej jëbɨ je naaxhuiñyjäy etz je tzajpjoty tzɨnaaybɨ ajcxy oyꞌijtcɨxy mɨɨd Dios.
\p 
\v 21-22 Miich ajcxy co anajty caꞌ mmɨbɨjccɨxy je Cristo, caꞌ anajty oy mꞌijtcɨxy mɨɨd Dios. E jaduꞌn anajty mꞌijtcɨxy nej tüg mɨdzip ma Dios, mɨɨd co jɨbɨcpɨ anajty mdungɨxy, etz mɨɨdɨty ajcxy jɨbɨc ma mjot mhuinmaꞌñ. Per jadachambɨ je Cristo tɨ capxꞌoyɨ̈y miich ajcxy je mdzip mꞌejcɨn huɨdibɨ ajcxy mɨɨd Dios, co tɨ chɨnäy ya naaxhuiñ mɨɨd ñinïcx, e nañ co tɨ yꞌögy mɨɨd miich ajcxy mbocy ycɨxpɨ. Mɨɨd co Cristo yꞌoꞌcy mɨɨd miich ajcxy mbocy ycɨxpɨ, jaydëbɨ myajpáatcɨxɨpy ma Dios yhuinduu janch oyjäy, janch huätzjäy, caꞌ ti pocy mmɨɨdɨty, caꞌ ti xɨ̈huɨn yjac-huɨꞌmy ma Dios mɨɨd miich ajcxy ycɨxpɨ.
\v 23 Pen myajcopɨjccɨxyp tɨydudägy je Cristo yꞌayuc ytɨyꞌajt huɨdibɨ tɨ mmɨdoogɨxy, jaduꞌn nej mjɨjpꞌijxcɨxy co je Cristo xyajnïdzögaanɨ ajcxy yɨ mꞌalma. Je ayuc huɨdibɨ miich ajcxy tɨ mmɨdooy, jeꞌ jeꞌ huɨdibɨ mɨgügtɨjc tɨ capxhuäcxy etz ycapxhuäcxꞌadɨɨchñɨ ma tugꞌócɨy naax cajp, jaduꞌn nej jëbɨ jäy ajcxy yꞌalma yajnïdzögɨpy. Nañ jaduꞌn ɨɨch, Pablo ngapxhuäcxypɨch jada ayuc quipxy mɨɨd nmɨgügtɨjcɨch.
\s  Pablo cötujcmoy co ytunɨpy ma mɨbɨjcpɨdɨjc ajcxy
\p 
\v 24 Jotcujc nnayjɨhuɨ̈yiijɨch co tzaachypɨ nmɨnaxy nyajnaxyɨch mɨɨd nninïcxɨch mɨɨd miich ajcxy ycɨxpɨ e jaduꞌn njacyajcɨxy njacyajcaꞌpxɨch je tzaachypɨ huɨdibɨ Cristo yajtzondac co yɨꞌ tzaachypɨ mɨnaxy yajnaxy mɨɨd je mɨbɨjcpɨdɨjc ycɨxpɨ e je mɨbɨjcpɨdɨjc ni paady nej Cristo ñinïcx.
\v 25 Dios tɨ xyyajnïbɨcyɨch co ndunɨpyɨch mɨɨd yɨ jäy ajcxy huɨdibɨ mɨjpɨdaacɨp. Dios tɨ xypɨdägyɨch ma jada tung, jɨgɨx ngapxhuäcxɨbɨch tügꞌócɨy Dios yꞌayuc ytɨyꞌajt ma tügꞌócɨy jäy ajcxy.
\v 26 Jecyꞌajty canaag jɨmɨjt tɨ ñaxy co Dios caꞌnɨ anajty yajniguëxɨ̈gy yɨꞌ ytɨyꞌajt. Cham Dios tɨ yajniguëxɨ̈gy yɨꞌ ytɨyꞌajt ma yɨ jäy ajcxy huɨdibɨ yɨꞌ yjäyꞌajtɨpy.
\v 27 Dios oy nihuinmayɨɨy co anajty yajnejhuɨ̈huaꞌñ yɨ jäy ajcxy nidügꞌócɨy je oybɨ ayuc tɨyꞌajt huɨdibɨ jecyꞌajty caꞌ pɨn nejhuɨɨy. Yɨꞌ jeꞌ je tɨyꞌajt co Cristo yajpaady ma miich ajcxy mjot mhuinmaꞌñ, paady ycɨxpɨ jëbɨ miich ajcxy mbaadɨp oyꞌajtɨn jiiby tzajpjoty.
\p 
\v 28 Ɨɨch ajcxy ngapxhuäcxypɨch Cristo yꞌayuc, nꞌɨɨhuijpyɨch ngapxhuijpyɨch, nyajꞌixpɨjcpyɨch yajxon yɨ Cristo ytɨyꞌajt ma tügꞌócɨy jäy ajcxy, jaydëbɨ nyajquëxɨ̈gɨbɨch ma Cristo yhuinduu nidüg nidüg mɨbɨjcpɨdɨjc caꞌpxy yhuinmaꞌñ.
\v 29 Mɨɨd jada ycɨxpɨ nduñɨch mɨctägy mɨɨd tügꞌócɨy je nmɨcꞌajtɨch huɨdibɨ Cristo xymooybɨch jabom jabom.
\c 2
\p 
\v 1 Ndzojcpyɨch co miich ajcxy mnejhuɨ̈huɨpy jaduꞌn nej mɨctägy nduuñɨch mɨɨd tajɨn mayɨn mɨɨd miich ajcxy ycɨxpɨ, etz mɨɨd yɨ mɨbɨjcpɨdɨjc huɨdi jɨm Laodicea ycɨxpɨ, etz nañ tügꞌócɨy mɨbɨjcpɨdɨjc ycɨxpɨ huɨdibɨ tɨ xyꞌixyɨch ahuin ajɨjp.
\v 2 Mɨctägy nduuñɨch jaydëbɨ yɨ mɨbɨjcpɨdɨjc paadɨpy jotcujcꞌajtɨn ma yꞌay yjot, etz jaydëbɨ ajcxy ñaychójcɨgɨxɨpy ñayjɨhuɨ́ɨyɨgɨxɨpy mabaad jëbɨ mɨꞌijtcɨxy yjot yhuinmaꞌñ túꞌcɨy. Mɨctägy nduuñɨch jaydëbɨ je mɨbɨjcpɨdɨjc mɨꞌijtcɨxy mɨj jotcujcꞌajtɨn co ajcxy huinjɨhuɨydähuɨɨb Dios ytɨyꞌajt, je tɨyꞌajt huɨdibɨ jecyꞌajty anajty caꞌ pɨn nejhuɨ̈y, je Dios ytɨyꞌajt maabɨ Cristo Jesús.
\v 3 Ma je Cristo jɨm tügꞌócɨy tɨyꞌajt janchypɨ etz ixpɨjcɨn janchypɨ yajpaady. Jaduꞌn yɨꞌ ytɨyꞌajt etz yꞌixpɨjcɨn nej tüg jugyꞌajtɨn.
\v 4 Jaduꞌn nɨmaaygɨxy jɨgɨx caꞌ pɨn oy cohuinꞌɨɨnɨ e mɨdɨgɨ̈huɨpy oy ayuc ma miich ajcxy ooy ymɨbɨjcnɨ, e caꞌyjanchɨty.
\v 5 Ooy ɨɨch ngadɨm jɨmɨty, ixnaꞌ guëxnaꞌ ma miich ajcxy myajpatcɨxy. Ɨɨch njot nhuinmaꞌñ caꞌ yɨꞌ jɨm ytɨgoyꞌity ma miich ajcxy myajpatcɨxy. Jotcujc nayjɨhuɨ̈yiijɨch co nꞌijxcɨxy yajxon myajtüyöygɨxy tügꞌócɨy etz mɨc yɨ mmɨbɨjcɨn mɨɨdɨty ajcxy ma Cristo.
\p 
\v 6 E mɨɨd jada ycɨxpɨ jaduꞌn nej miich ajcxy tɨ mgöbɨjccɨxy je Huindzɨn Jesús ogaꞌnꞌaty, jaduꞌn ajcxy jactzɨnaaygɨx jacjugyꞌajtcɨx ma yɨꞌ.
\v 7 Je tɨyꞌajt etz je mɨcꞌajt jɨm yɨꞌ mbaatcɨxy ma Cristo. Yjacyujcpedɨpy ajcxy yɨ mꞌixpɨjcɨn ma Cristo ytɨyꞌajt jabom jabom. Caꞌ mꞌixtɨgɨ̈huäccɨxy ma yɨ mmɨbɨjcɨn. Jacmɨbɨjcɨx jaduꞌn nej anajty tɨ nyajꞌixpɨjccɨxy Cristo ytɨyꞌajt. Jatytɨm myajnájxcɨxɨpy jäygɨdaacɨn ma Dios cɨxyjot huinɨjot jabom jabom.
\s  Je jemybɨ jugyꞌajtɨn huɨdibɨ Cristo xyajniꞌixɨɨyɨm
\p 
\v 8 Ooy naygüendꞌájtɨgɨx, caꞌ myajhuinꞌɨɨngɨxy, co huingjäy xyajhuinmaꞌñytɨgóoygɨxɨpy mɨɨd huingbɨ ayuc huingpɨ ixpɨjcɨn huɨdibɨ jäy cɨꞌm tɨ cojy tɨ macxy, huɨdi caꞌ choobaady, huɨdi nɨgoo xychachhuinꞌɨɨngɨxp mɨɨd canaag ayuc huinmaꞌñ jaduꞌn nej poj naaxhuiñ huinmaꞌñ. Yɨ jaduꞌmbɨ ixpɨjcɨn huɨdibɨ jäy tɨ cojy tɨ macxy caꞌ ajcxy paady ma Cristo.
\p 
\v 9 Tügꞌócɨy nej Dios yajpaady nañ jaduꞌn yajpaady ma Cristo.
\v 10 Com je Cristo ñihuindzɨnꞌajttaayb tügꞌócɨy aneꞌmɨn ya naaxhuiñ, etz nañ jaduꞌn tzajpjoty, paady ycɨxpɨ co miich ajcxy myajpaady ma Cristo, miich ajcxy mɨɨdꞌajttaayb tügꞌócɨy huɨdi Cristo ymɨɨd.
\v 11 Co anajty Cristo miich ajcxy xyjäyꞌadyii, chi yɨꞌpɨdacy ma ajcxy mjot mhuinmaꞌñ je tɨyꞌajt co myajpatcɨxy ma Dios. Hueꞌ jeꞌ yajtɨgooyb yɨ pocytunɨɨ huinmaꞌñ. Jada jeꞌ je tɨyꞌajt huɨdi Cristo Jesús ypɨdac, caꞌ miich ajcxy xyjäyꞌadyii. Caꞌ miich ajcxy mdɨyꞌajttɨ̈y ma mninïcx. Tɨgach Jesús ytuuñ mɨɨd miich ajcxy, caꞌ yjaduꞌnɨty nej judíojäy ajcxy tɨyꞌajt pɨdaaccɨxy ma ñinïcx mɨɨd tzujc.
\v 12 Co tɨ mnɨɨbejtcɨxy mɨɨd Cristo yxɨɨ, jaduꞌn nipaady nejɨhuɨ̈y tɨ mnaaxtɨgɨɨygɨxy quipxyɨ mɨɨd Cristo co yɨꞌ ñaaxtɨgɨɨy. Co tɨ mmɨjpɨdaaccɨxy Dios ymɨcꞌajt jaduꞌn nipaady nejɨhuɨ̈y quipxyɨ mɨɨd Cristo tɨ mjugypɨjccɨxy co Dios yajjugypɨjcy yꞌung co yꞌoꞌcy.
\v 13 Co caꞌ anajty miich ajcxy Dios xyjäyꞌadyii, mɨɨd miich anajty ajcxy pocytunɨɨ huinmaꞌñ jaduꞌn miich anajty mꞌijtcɨxy nej öcpɨ. E co tɨ mmɨjpɨdaaccɨxy Cristo, Dios tɨ xyhuinmeecxɨ ajcxy tügꞌócɨy mbocy, e jaduꞌn nipaady nejɨhuɨ̈y Dios tɨ xyajjugypɨjccɨxy quipxyɨ mɨɨd Cristo. 
\v 14 Co Cristo yꞌoꞌcy ma yɨ cruudz mɨɨd ajt nbocy ycɨxpɨ, jaduꞌn nipaady nejɨhuɨ̈y Dios tɨ xyjödzɨm xɨ̈huin huɨdi anajty xychaachytunaanɨm. Co Dios anajty yajtɨgooy ɨɨch ajt nxɨ̈huɨn, jaduꞌn nipaady nejɨhuɨ̈y tɨ mɨjxojtzpety je xɨ̈huɨn necy ma Jesús ycruudz. 
\v 15 Co Cristo yꞌoꞌcy cruudzcɨ́xy, chi ycödɨgooy je caꞌoybɨ ymɨcꞌajt, etz je poj naaxhuiñybɨ ymɨcꞌajt. Chi je Cristo yajtzoꞌyduñ je caꞌoybɨ etz je poj naaxhuiñybɨ co yajcɨjxy yajnaxy ma jäy yhuinduu.
\s  Tzojccɨx nijotꞌajtcɨx tügꞌócɨy huɨdijaty tzomb ma Dios tzajpjoty
\p 
\v 16 Caꞌ mdungɨxy cuentɨ co pɨnjaty ajcxy xyꞌagapxɨ̈huɨpy etz xyñɨmähuɨpy:
\p
―Amayꞌat jada jɨɨcxy pɨcy, etz amayꞌat jada xɨɨ, etz amayꞌat je jemyboꞌ, etz amayꞌat yɨ Sábado xɨɨ.
\v 17 Jecyꞌajty jäy jaduꞌn tɨ yajtuñ yɨjaduꞌmbɨ huinmaꞌñ, jayɨjpnɨ caꞌ anajty Jesucristo ymiiñɨ ya naaxhuiñ. Jadachambɨ xɨɨ tiempo Jesucristo ytɨyꞌajt tügpajc yɨꞌ jeꞌ ooy ycopɨcyɨty.
\v 18 Caꞌ huaad yɨ jäy ajcxy xypɨjcɨ je Cristo yꞌoyꞌajtɨn huɨdibɨ ajcxy mbadamyb. Yɨꞌ ajcxy huɨdi oygohuinꞌɨɨnɨɨ naybɨdaacɨp jaduꞌn nejɨhuɨ̈y ooy yung naxy ajcxy yjäyꞌajtcɨxy, e caꞌ yjanchɨty. Yɨꞌ ajcxy yɨꞌ yꞌojadajtpy ángeles. Yɨꞌ ajcxy  naygömayɨp co tɨ tɨyꞌajt patcɨxy ma cumäy, ninɨgoob ajcxy amɨj agɨx ñayjɨhuɨ́ɨyɨgɨxy mɨɨd co tzachmɨjpɨdaaccɨxy ycɨꞌmhuinmaꞌñ etz ñinïcx chojcɨn.
\v 19 Yɨ jaduꞌmbɨ jäy caꞌ ajcxy yajpatcɨxy ma Cristo, je huɨdibɨ nigohuajcꞌajtp tügꞌócɨy mɨbɨjcpɨdɨjc. Je mɨbɨjcpɨdɨjc Cristo yajyeecp ma ajcxy ymɨbɨjcɨn jaduꞌn nej Dios tzocy, e yɨꞌ ajcxy patcɨxy tügꞌócɨy mɨcꞌajt etz tɨyꞌajt ma yɨꞌ. Mɨɨd co Cristo nigohuajcꞌaty je mɨbɨjcpɨdɨjc, paady ajcxy yꞌijtcɨxy tügpɨcy, jaduꞌn ajcxy nipaady nej tüg jäy ñinïcx mɨɨd ycohuajc huɨdi aneꞌm je ñinïcx etz mɨɨd emy huɨdibɨ yajyücxtaayb je ninïcx.
\p 
\v 20-21 Co miich ajcxy tɨ mmɨbɨcy Cristo, jaduꞌn nipaady nejɨhuɨ̈y tɨ mꞌöccɨxy quipxyɨ mɨɨd Cristo, e nañ tɨ mbɨdzɨmgɨxy ma yɨ naaxhuiñyjäy yhuinmaꞌñ xyajꞌaneꞌmgɨxy. ¿Naꞌámy co chambaad mjactzɨnaaygɨxy jaduꞌn nej jɨhuɨɨy yɨ naaxhuiñyjay yhuinmaꞌñ xyꞌaneꞌmgɨxy? ¿Naꞌamy co mjaccuydungɨxy yɨ jäy ajcxy ycötujcɨn huɨdibɨ mɨnaamb co caꞌ huaad mgonɨ̈gy jada, ni caꞌ huaad mjɨɨcxy jada, ni caꞌ huaad nïdoñ yɨjɨmbɨ?  
\v 22 Tügꞌócɨy huɨdibɨ ngonɨ̈cɨm, njɨɨcxɨm, e nnïdonɨm, co ytundäy, chi ytɨgoydäy. Yɨ jaduꞌmbɨ huinmaꞌñ cɨꞌm jäy ajcxy cojcɨxy macxcɨxy, e nañ cɨꞌm jäy ajcxy yajꞌijxpɨjccɨxy huɨdibɨ caꞌ yajpaady ma Cristo.
\v 23 Yɨ jaduꞌmbɨ cötujcɨn jaduꞌn yquëxɨ̈gy nej ooy yꞌoyɨty ooy yꞌoymɨbɨjcoꞌcnɨty, e caꞌ yjanchɨty. Co jäy ajcxy cuydungɨxy ooy ajcxy ñaybɨdáacɨgɨxy tudägy, etz nañ chaachytungɨxy ñïcx ycohuajc. Yɨ jaduꞌmbɨ cötujcɨn caꞌ ti mɨcꞌajt mɨɨdɨty, com co caꞌ jaduꞌn jëb yajtɨgoy jɨbɨc-huinmaꞌñ yɨ jaduꞌmbɨ cötujcɨn.
\c 3
\p 
\v 1 Miich ajcxy huɨdibɨ tɨ mmɨbɨcy je Cristo jaduꞌn nipaady nejɨhuɨ̈y tɨ mjugypɨjccɨxy quipxyɨ mɨɨd Cristo, e jemybɨ jugyꞌajtɨn tɨ myajtzondaaccɨxy.
\v 2 Ixtaaygɨx je tɨyꞌajt huɨdibɨ tzomb tzajpjoty ma je Cristo yajpaady ma Dios ymɨjc aꞌoyꞌamybɨ, e yɨꞌ jeꞌ je mɨjꞌaneꞌmbɨ.
\v 3 Co tɨ mmɨbɨjccɨxy je Cristo jaduꞌn nipaady nejjɨhuɨ̈y co tɨ mꞌoꞌccɨxy mɨɨd yɨꞌ, etz ma je Cristo jemybɨ jugyꞌájtɨn miich ajcxy tɨ mbaady. Jadachambɨ yɨ mjugyꞌájtɨn Cristo mɨɨd cɨ̈ꞌam, e 
yɨꞌ yajpaatp ma Dios.
\v 4 Co anajty je Cristo ñayguëxɨ̈gyii jadügꞌoc ya naaxhuiñ, huinꞌit xɨɨ miich ajcxy mnaybadaꞌñyii mɨɨd yɨꞌ jiiby tzajpjoty ma yɨ oybɨ it.
\s Je jecy jugyꞌajt etz je jemybɨ jugyꞌajt 
\p 
\v 5 Yajtɨgooygɨx je jɨbɨc-huinmaꞌñ huɨdibɨ miich ajcxy mɨɨd, huɨdibɨ naaxhuiñyjäy ajcxy yhuinmaꞌñꞌajtɨp. Caꞌ huaad mɨɨdcapxtɨgoyɨpy töxyjäydɨjc. Caꞌ huaad jɨbɨc-huinmaꞌñ mdunɨpy. Caꞌ huaad mdungɨxy ninïcx chojcɨn, etz huɨdibɨ caꞌp yꞌoyhuinmaꞌñɨty. Caꞌ huaad mꞌadzogɨpy comeeñꞌadɨɨ, com ñipaatpy jaduꞌn nej ajcxy huɨdibɨ tzaadzech quipychech ojadajtp.
\v 6 Mɨɨd co jäy ajcxy jaduꞌn ytundɨgooygɨxy, paady ycɨxpɨ jacjiinɨ Dios tzaachytunɨp jäy ajcxy huɨdibɨ caꞌ ycapxymɨdoogɨxy yɨꞌ ycötujcɨn.
\v 7 Nañ jaduꞌn miich ajcxy jayɨjp co  caꞌnɨ anajty  mmɨjpɨdaaccɨxy je Cristo, mdzɨnaaygɨxy anajty mɨɨd 
jɨbɨc-huinmaꞌñ quipxy mɨɨd je jacjadyii naaxhuiñyjäy co anajty mguydungɨxy yɨ jäy ycötujcɨn huɨdibɨ caꞌ ytɨyꞌajtɨty. 
\v 8 Jadachambɨ ixmajtzcɨx miich ajcxy yɨ jɨbɨc-huinmaꞌñ jaduꞌn nej co mɨgüg mmɨjotmaꞌtcɨxy, jaduꞌn nej co ooy mjotꞌambɨjccɨxy, jaduꞌn nej co jɨbɨc mdungɨxy, jaduꞌn nej co mɨgüg mnigapxcɨxy niꞌojɨɨygɨxy, jaduꞌn nej co jɨbɨc ayuc mgapxcɨxy.
\v 9 Caꞌ huaad mnayhuinꞌɨ́ɨnɨgɨxy miñ xyɨpy. Co tɨ mmɨbɨjccɨxy Cristo tɨ mꞌixmajtzcɨxy je jɨbɨcjot je 
jɨbɨc-huinmaꞌñ huɨdi anajty ajcxy mɨɨd.
\v 10 Jemybɨ jot jemybɨ huinmaꞌñ tɨ mbatcɨxy e Dios yjacyejcyp jemybɨ jot jemybɨ huinmaꞌñ  jabom jabom ma miich ajcxy co mꞌixpɨjccɨxy yɨꞌ ytɨyꞌajt. Jaduꞌn Dios tzocy co mjot mhuinmaꞌñ mbɨdáaccɨxɨpy jaduꞌn nej Cristo jot huinmaꞌñ mɨɨdɨty, je Cristo huɨdibɨ tɨ yajꞌoyɨ̈y je jemybɨ jot jemybɨ yhuinmaꞌñ.
\v 11 Co jäy ajcxy mɨjpɨdägy Cristo, chi túꞌcɨy ajcxy yajpaady ma Dios, caꞌ ñejɨty co nijëjɨty ajcxy mɨɨd griegojäy yꞌixpɨjcɨn etz jacjadyii mɨɨd judíojäy yꞌixpɨjcɨn, caꞌ ñejɨty pen tɨ myajtɨyꞌajttɨ̈y o caꞌ  mdɨyꞌajttɨ̈yɨty. Ca ñejɨty co nijëjɨty ajcxy jɨguëgy chooñ, e caꞌ yꞌixpɨcyɨty, etz jacjadyii ooy adzip ahuaꞌn ñaybɨdáacɨgɨxy. Caꞌ ñejɨty co nijëjɨty ajcxy mosoꞌajtp etz jacjadyii huɨdibɨ cɨꞌm naymɨduunɨp. Nidügꞌócɨy ajcxy túꞌcɨy ñaybɨdägyii co ajcxy mɨjpɨdägy Cristo. Nidügꞌócɨy mɨbɨjcpɨdɨjc túꞌcɨy pattay ajcxy mɨcꞌajt oyꞌajt ma Cristo, e nañ Cristo yajpaady ma nidügꞌócɨy ajcxy yjot yhuinmaꞌñ.  
\p 
\v 12 Com Dios miich ajcxy tɨ xyhuinꞌixy, e tɨ xychojccɨxy tɨ xyjɨhuɨɨygɨxy, e Dios tɨ xyajhuädzɨ ajcxy mjot mhuinmaꞌñ, paady ycɨxpɨ pɨdaaccɨx mjot mhuinmaꞌñ co mbaꞌayoohuaangɨxy mɨgügtɨjc. Pidaaccɨx mjot mhuinmaꞌñ co oyjäyꞌajtɨn mdunaangɨxy etz co nicy xemy mnaybɨdägaangɨxy. Pɨdaaccɨx mjot mhuinmaꞌñ yung naxy etz mɨmecxtujccɨxy mɨgügtɨjc ajcxy.
\v 13 Naymɨmecxtújcɨgɨx nidüg nidüg. Co mmɨgüg ajcxy xymɨdundɨgooyɨpy  jëbɨ mhuinmeecxɨpy tɨm jaduꞌn nej ɨɨch ajt nHuindzɨn Jesucristo tɨ mecxy miich ajcxy mbocy. Com Cristo tɨ xyhuinmeecxcɨxy, paady copɨcy miich ajcxy meecxɨp yɨ mɨgüg huɨdibɨ ajcxy xymɨdundɨgooyb.
\v 14 Mnaychójcɨgɨx mnayjɨhuɨɨyɨgɨx nidüg nidüg. Co mnaychójcɨgɨxɨpy nayjɨhuɨɨyɨgɨxɨpy, chi jëb huaad mdzɨnaaygɨxy mɨɨd mjot mhuinmaꞌñ túꞌcɨy.
\v 15 Je jotcujcꞌájtɨn huɨdibɨ Dios xymooyɨm, huen ajcxy xyꞌaneꞌmɨ mjot mhuinmaꞌñ. Dios tɨ xyajnïbɨjccɨxy, jaydëb túꞌcɨy mꞌijtcɨxy mɨɨd mjot mhuinmaꞌñ. Mjatytɨm yajnaxɨpy ajcxy jäygɨdaacɨn ma Dios jabom jabom.
\p 
\v 16 Naybɨdáacɨgɨx co je Cristo yꞌayuc ytɨyꞌajt yajtɨgɨɨydähuamyb ajcxy mjot mhuinmaꞌñ. Nayyajꞌixpɨ́jcɨgɨx etz nayꞌɨɨhuíjɨgɨx   naygapxhuíjɨgɨx mɨɨd je Cristo yꞌayuc ytɨyꞌajt, jaduꞌn nej Dios ijxpɨjcɨn yecy. Ɨɨgɨx Salmo etz ɨɨgɨx himno etz yɨ ɨy huɨdibɨ je Espíritu Santo ypɨdägɨp ma mjot mhuinmaꞌñ, e jaduꞌn jäygɨdaacɨn mɨꞌijtcɨxy ma ajcxy mjot mhuinmaꞌñ mɨɨd Dios ycɨxpɨ.
\v 17 Huen ti ayuc huɨdibɨ ajcxy mgapxyp, huen ti tung huɨdibɨ ajcxy mdumby, hueꞌ capxcɨx tungɨx mɨɨd ajt nHuindzɨn Jesús yxɨɨ. Etz jatytɨm yajnajxcɨxy Dioscojuyip ma Dios Teedy ma Jesucristo yxɨɨ.
\s  Je mɨbɨjcpɨdɨjc ajcxy chɨnaayɨn ma  ypɨjcchɨnaaygɨxy
\p 
\v 18 Miich töxyjäydɨjc ajcxy, capxymɨdoogɨx mñäy ajcxy com jaduꞌn ɨɨch ajt nHuindzɨn Jesucristo tzocy co mgapxymɨdohuɨpy ajcxy mñäy.
\v 19 Miich yëydɨjctɨjc ajcxy, tzojccɨx  jɨhuɨɨygɨx ajcxy mdöxyɨjc, caꞌ ejcɨn mmɨɨꞌidɨpy mɨɨd mdöxyɨjc.
\v 20 Miich ajcxy ung anäg,
 mgapxymɨdohuɨpy ajcxy mdaj mdeedy mɨɨd tügꞌócɨy. Jaduꞌn Dios jäygɨdägy co ung anäg ajcxy capxymɨdoy ytaj yteedy. 
\v 21 Miich ajcxy ungdeedy caꞌ oyñinej mmɨgapxcɨxy mꞌung mꞌanäg ajcxy. Co jaduꞌn oyñinej mꞌojɨpy mꞌung ajcxy, caꞌ yjecyɨty co nɨcxy ajcxy taj may chɨnaaygɨxy yjugyꞌajtcɨxy.
\v 22 Miich ajcxy tumbɨdɨjc, capxymɨdoogɨx yɨ mHuindzɨn, caꞌ janch xypaat oy mɨc mdungɨxy co mhuindzɨn jɨm xyhuindɨɨcxcɨxy, e chi co jeꞌ yjɨhuäcnɨ, chi nɨgoo mhuäccɨxnɨ mdɨnaaygɨxnɨ. Hueꞌ janchtɨy oy tungɨxy mɨɨd oyjot oyhuinmaꞌñ, com jeꞌ jeꞌ je tɨyꞌajt co Dios mhuindzɨgɨɨygɨxy.
\v 23 Je tung huɨdibɨ mdungɨxyp, tungɨx cɨxyjot huinɨjot. 
\v 24 Com miich ajcxy mnejhuɨɨyb co Cristo xymöhuaangɨxy it lugar tzajpjoty, paady ycɨxpɨ oy tunggɨx jɨgɨx Cristo jäygɨdägɨpy huɨdibɨ ajcxy mdumyb.
\v 25 Dios chaachytunɨpy pɨnjaty tundɨgooyb. Caꞌ Dios huinꞌijxpety tzaachytunɨpy jäy.
\c 4
\p 
\v 1 Miich ajcxy yajtumbɨdɨjc, yajtungɨx mdumbɨ nej ypadyii etz nej ytudägyɨty, com miich ajcxy mnejhuɨɨyb co nañ mɨɨd miich ajcxy tüg mHuindzɨn jiiby tzajpjoty.
\p 
\v 2 Jabom jabom Dios mɨbɨjctzoogɨx, caꞌ mꞌixmajtzcɨxy Dios mɨbɨjctzoohuɨn. Huijy ycujc mꞌidɨpy ajcxy etz jatytɨm yajnajxcɨxy jäygɨdaacɨn ma Dios co anajty mgapxtaaccɨxy.
\v 3 Nañ jaduꞌn miich ajcxy tun mayꞌajt mɨbɨjctzoogɨx Dios mɨɨd ɨɨch ajcxy ycɨxpɨ. Mɨbɨjctzoogɨx Dios co huen it lugar xymöhuɨbyɨch ma jëbɨ ngapxhuäcxyɨch Dios yꞌayuc ytɨyꞌajt. Ngapxhuäcxyñɨch je Cristo ytɨyꞌajt huɨdibɨ jecyꞌajty anajty caꞌ pɨn nejhuɨ̈y. Mɨɨd co ngapxhuäcxɨch Cristo ytɨyꞌajt, paady ycɨxp nyajpaadyɨch pujxtɨgoty.
\v 4 Mɨbɨjctzoogɨx Dios mɨɨd ɨɨch ycɨxpɨ, jɨgɨx jëbɨ ngapxhuäcxyɨch je Cristo ytɨyꞌajt huädz oy, nej jäy ajcxy jëb huädz huinjɨhuɨɨygɨxy, jaduꞌn nej ypadyii ngapxhuäcxɨbyɨch.
\p 
\v 5 Tɨydudägy mdzɨnáaygɨxɨpy mɨɨd yɨ jäy ajcxy huɨdibɨ caꞌ mɨbɨjccɨxy Cristo. Yajniguëxɨ̈ccɨx miich ajcxy Dios ytung jabom jabom, caꞌ huaad xɨɨ tiempo myajꞌayoogɨxy.
\v 6 Yɨ mgapxɨn yɨ mmɨydaacɨn yajtungɨx oyꞌamy huindzɨgɨꞌñꞌamy nej jëbɨ huaad jäy ajcxy jäygɨdaaccɨxy. Copɨcy mhuinmayɨpy ajcxy jayɨjp nej jäy huaad mꞌadzoogɨxy.
\s  Je capxpoocxɨn huɨdibɨ cogɨxɨɨyñɨp je ñecy
\p 
\v 7 Tíquico co ñɨcxɨpy jɨm ma miich ajcxy, yɨꞌ xyyajmɨɨdmɨydáaccɨxɨpy tügꞌócɨy nej ytunyii yjadyii ma ɨɨch. Ooy ndzocy njɨhuɨ̈yɨch ɨɨch ajt nmɨgüg Tíquico. Yɨꞌ ooy tudägy ytuuñ quipxyɨ mɨɨd ɨɨch ajcxy ma ajt nHuindzɨn Jesucristo ytung.
\v 8 Paady yam nguexyɨch Tíquico ma miich ajcxy jɨgɨx ajcxy xyajmɨɨdmɨydägɨpy nej yam ɨɨch ajcxy nyajpaatcɨxy, etz nañ jɨgɨx xyjotmɨcmɨgápxcɨxɨpy.
\v 9 Quipxyɨ mɨɨd Tíquico yam nguexyɨch Onésimo, tüg ajt nmɨgüg huɨdibɨ ooy ndzocy njɨhuɨ̈yɨch, huɨdibɨ tudägy tɨ ytuuñ mɨɨd ɨɨch ajcxy. Onésimo miich ajcxy yɨ mmɨgogajp. Tíquico y Onésimo xyajmɨɨdmɨydägɨp ajcxy tügꞌócɨy tijaty tuunɨp jajtɨp yam ma ɨɨch ajcxy.
\p 
\v 10 Je Aristarco, huɨdibɨ pujxtɨjc ɨñaayb quipxyɨ mɨɨd ɨɨch, cham quexy capxpoocxɨn ma miich ajcxy. Marcos, je Bernabé yꞌuch, cham quexy capxpoocxɨn nañ jaduꞌn ma miich ajcxy. Tɨ ɨɨch ayuc nguexyɨch jayhuin ma miich ajcxy co ixyipy ñɨcxy Marcos ma miich ajcxy, mgöbɨgɨpy ajcxy agujc jotcujc.
\v 11 Nañ jaduꞌn je Jesús huɨdibɨ jäy ytijpy Justo, cham quexy capxpoocxɨn ma miich ajcxy. Yɨ Aristarco, Jesús etz Marcos yɨꞌ ajcxy ni tugɨɨgpajc, judíojäy huɨdibɨ tumb mɨɨd ɨɨch ma Dios ytung co ngapxhuäcxyɨch Dios yꞌaneꞌmɨn. Yɨ nidugɨɨgpɨ ɨɨch ooy tɨ xyajjotcujcꞌatyɨch.
\v 12 Je Epafras, miich ajcxy mmɨgogajp je Cristo ytumbɨ, nañ jaduꞌn cham quexy capxpoocxɨn ma miich ajcxy. Je Epafras jabom jabom Dios mɨbɨjctzoy mɨɨd miich ajcxy ycɨxpɨ. Yɨꞌ mɨbɨjctzoob Dios co miich ajcxy cuydundaꞌ tügꞌócɨy je Cristo yꞌayuc ytɨyꞌajt, etz co nayyéjcɨgɨx amumdügjot ma Dios, e jaduꞌn ajcxy mguydunɨpy nej Dios tzocy.
\v 13 Ɨɨch jëbɨ tɨyꞌajt nyecyɨch co Epafras ooy jotmay jɨhuɨ̈y mɨɨd miich ajcxy ycɨxpɨ, etz nañ ooy nidajy nimay mɨɨd yɨꞌ ajcxy ycɨxpɨ huɨdibɨ tzɨnaayb jɨm Laodicea etz jɨm Hierápolis.
\v 14 Je Lucas, je doctor, huɨdibɨ je mɨbɨjcpɨdɨjc ooy tzojccɨxy ooy jɨhuɨɨygɨxy etz Dimas nañ cham ajcxy quexy capxpoocxɨn ma miich ajcxy. 
\p 
\v 15 Yajnajxcɨx ɨɨch ngapxpoocxɨn ma yɨ mɨbɨjcpɨdɨjc jɨm Laodicea. Nañ yajnajxcɨx ɨɨch ngapxpoocxɨn ma yɨ Ninfas etz ma yɨ mɨbɨjcpɨdɨjc huɨdibɨ yöymujccɨxp ma yɨꞌ ytɨjc.
\v 16 Co anajty jada necy tɨ mgapxtaaygɨxy, tungɨx mayꞌajt quejxnajxcɨx jada necy ma yɨ mɨbɨjcpɨdɨjc ajcxy jɨm Laodicea. Huen ajcxy nañ jaduꞌn capxcɨxy jada necy, nañ jaduꞌn miich ajcxy capxcɨx je necy huɨdibɨ tɨ nquexyɨch jɨm Laodicea. 
\v 17 Tungɨx mayꞌajt mnɨmähuɨpy je Arquipo co huen cuydundäy je tung huɨdibɨ ɨɨch ajt nHuindzɨn je Cristo tɨ yajnïbedyii. 
\p 
\v 18 Ɨɨch Pablo, ɨɨch cɨꞌm njaaybɨch jada capxpoocxɨn ma miich ajcxy. Caꞌ ajcxy mjäydɨgoyɨpy co ɨɨch nbujxtɨjc ɨñäy. Huen Dios mayꞌajt oyꞌajt tunɨpy mɨɨd miich ajcxy ycɨxpɨ. Jaduꞌn ngapxcɨ́xyɨch. Amén.