\id 1TH \h 1 TESALONICENSES \toc1 1 TESALONICENSES \mt1 1 TESALONICENSES \mt2 Yɨ Jayɨjp Necy Huɨdi San Pablo Yajniguejx Je Mɨbɨjcpɨdɨjc Jɨm Tesalónica \c 1 \p \v 1 Ɨɨch Pablo mɨɨd Silvano etz Timoteo cham nguexyɨch jada necy ma miich ajcxy jɨm Tesalónica huɨdibɨ yajpaatp ma Dios etz ma ajt nHuindzɨn Jesucristo. Huen ɨɨch ajt nDios Teedy etz ajt nHuindzɨn Jesucristo mayꞌajt oyꞌajt tunɨpy mɨɨd miich ajcxy etz xyajjotcugɨ́ɨygɨxɨp. \s Je mɨbɨjcɨn huɨdibɨ anajty yejcpy ijxpejt \p \v 2 Jabom jabom ɨɨch ajcxy nyajnaxyɨch jäygɨdaacɨn ma Dios mɨɨd tügꞌócɨy miich ajcxy ycɨxpɨ. Jabom jabom ɨɨch ajcxy Dios nmɨbɨjctzooyɨch mɨɨd miich ajcxy ycɨxpɨ nidügꞌócɨy. \v 3 Co Dios Teedy nmɨbɨjctzóoygɨxyɨch, chi njäymechɨch jaduꞌn nej miich ajcxy tɨ mmɨbɨjccɨxy Jesucristo, etz jaduꞌn nej oy mdungɨxy ma yɨꞌ ytung. Nañ njäymejchɨch jaduꞌn nej oyjäyꞌajtɨn mdungɨxy etz jaduꞌn nej mdzojccɨxy mjɨhuɨɨygɨxy mmɨgügtɨjc. Nañ jäymejtzpɨch jaduꞌn nej miich ajcxy mjɨjpꞌixy jabom jabom co ɨɨch ajt nHuindzɨn Jesucristo xymöhuaangɨxy it lugar jiiby tzajpjoty, e caꞌ mjotmetzcɨɨygɨxy. \v 4 Mɨgügtɨjc ajcxy, ɨɨch ajcxy nejhuɨɨyb co Dios xychojccɨxy xyjɨhuɨɨygɨxy, e nañ ɨɨch ajcxy nejhuɨɨyb co Dios tɨ xyhuinꞌijxcɨxy. \v 5 Co ɨɨch ajcxy jayhuin ngapxhuäcxy Jesucristo yꞌ ayuc ytɨyꞌajt ma miich ajcxy, chi caꞌ jëyɨ Dios yꞌayuc ngapxhuäcxɨch, nañ nduunɨch mɨjhuinmaꞌñ mɨɨd Dios yjɨhuɨꞌñ ymɨcꞌajt. Jotcujc nduuñɨch ma miich ajcxy. Miich ajcxy mnejhuɨɨyb co tudägy nduuñɨch jɨgɨx jëbɨ mmɨjpɨdáaccɨxɨpy Jesús yꞌayuc ytɨyꞌajt. \p \v 6 Oy anajty ooy mjayajꞌixhuɨdijtcɨxy mjayajpahuɨdijtcɨxy co Dios yꞌayuc ytɨyꞌajt jemybɨ ajcxy tɨ mgöbɨjccɨxy, e chi ajcxy tɨ mbadüdɨgɨɨygɨxy ɨɨch je nꞌijxpejt, e nañ jaduꞌn ajt nHuindzɨn Jesús yꞌijxpejt. \v 7 Co tzaachypɨ tɨ mmɨnajxcɨxy tɨ myajnajxcɨxy mɨɨd Jesucristo ycɨxpɨ, chi tɨyꞌajt tɨ myejccɨxy ma tügꞌócɨy mɨbɨjcpɨdɨjc jɨm Macedonia naaxjot etz jɨm Acaya naaxjot jaduꞌn nej jëbɨ ajcxy nañ jaduꞌn mɨjpɨdaaccɨxy Jesucristo yꞌayuc ytɨyꞌajt. \v 8 E jaduꞌn miich ajcxy tɨ myejccɨxy je ijxpejt mɨɨd Jesús yꞌayuc ytɨyꞌajt, canan jëyɨ jɨm Macedonia etz Acaya, nañ tɨ myejccɨxy ijxpejt ma canaagꞌit naax cajp. Je mayjäy tɨ nejhuɨydäy jaduꞌn nej miich ajcxy tɨ mmɨbɨjccɨxy Jesús yꞌayuc ytɨyꞌajt, paady ycɨxpɨ caꞌ ycopɨcyɨty nɨcxy ɨɨch ajcxy njacyajnɨmäy je mayjäy jaduꞌn nej miich ajcxy tɨ mmɨbɨjccɨxy. \v 9 Je mayjäy ma canaagꞌit naaxcajp ooy ñaymɨɨdmɨydáacɨgɨxy jaduꞌn nej ɨɨch oy ngogapxɨ̈yɨch miich ajcxy, etz nañ jaduꞌn nej ɨɨch miich tɨ xycöbɨ́jccɨxyɨch e nañ je mayjäy ñaymɨɨdmɨydáacɨgɨxy jaduꞌn nej tɨ mꞌixmajtzcɨxy yɨ tzaadzech ojadadɨɨ, e tɨ mbadüdɨgɨɨygɨxy je Dios juugypɨ janchypɨ etz tudägypɨ. \v 10 Nañ jaduꞌn je mayjäy ajcxy ñaymɨɨdmɨydáacɨgɨxy jaduꞌn nej miich ajcxy mꞌahuijxcɨxy mjɨjpꞌijxcɨxy co Jesús, Dios yꞌung, yhuimbidaꞌñ ya naaxhuiñ, chonaꞌñ tzajpjoty. Je huɨdibɨ Dios tɨ yajjugypɨjc co tɨ yꞌögy. Yɨꞌ jeꞌ je Jesús huɨdi tɨ xycohuaanɨm ma yɨ mɨjpɨ tzaachypɨ huɨdibɨ Dios yquexamyb mɨɨd co jäy ajcxy chach pocytungɨxy. \c 2 \s Pablo ytung huɨbidɨ anajty ymɨɨd jɨm Tesalónica \p \v 1 Mɨgügtɨjc ajcxy, mnejhuɨɨyb ajcxy co caꞌ ñaadɨgɨ̈ꞌaty, co ɨɨch oy ngapxhuäcxy Dios yꞌayuc ytɨyꞌajt ma miich ajcxy. \v 2 Miich ajcxy mnejhuɨɨyb co jayɨjp caꞌnɨ anajty nmechɨch ma miich ajcxy ɨɨch ajcxy ooy tzaachypɨ etz ayoꞌn tɨ nyajnajxcɨxy jɨm Filipos. Tɨ jäy xyhuinꞌojy xyjɨjpꞌojyɨch. Co nmejchɨch ma miich ajcxy, caꞌ ñejɨty co tzaachypɨ tɨ nmɨnaxyɨch tɨ nyajnaxyɨch jayɨjp, chi Dios tɨ xyajjotmɨcpɨcyɨch, jɨgɨx huinmɨc jotmɨc ngapxhuäcxɨbɨch Jesús yꞌayuc ytɨyꞌajt. Tɨ ngapxhuäcxyɨch Dios yꞌayuc ma miich ajcxy, oy ɨɨch jäy anajty xycaꞌixaꞌñ xycatzogaꞌñ. \v 3 Caꞌ ɨɨch ngapxhuäcxyɨch anɨɨ, ni jɨbɨc ayuc, e ni ngamɨydägyɨch jɨbɨc ayuc jɨbɨc huinmaꞌñ nej huaad nhuinꞌɨɨngɨxy. \v 4 Caꞌ tɨ nhuinꞌɨɨngɨxy. Dios tɨ xyajnïbɨcyɨch co ngapxhuäcxɨbɨch yɨꞌ yꞌayuc ytɨyꞌajt, e jaduꞌn nguyduuñɨch. Caꞌ nduuñɨch co huen jäy ajcxy jäygɨdägy ɨɨch ndung. Jada janchtɨy ndumybɨch jɨgɨx Dios jäygɨdägɨpy ɨɨch ndung. Com Dios yɨꞌ ñejhuɨɨyb nej jäy tügꞌócɨy yjot yhuinmaꞌñ mɨɨdɨty. \v 5 Miich ajcxy mnejhuɨɨyb co caꞌ nyajxondaaccɨxy mɨɨd ayuc oyjatypɨ huɨdi caꞌ choobaady. Nañ ni caꞌ ɨɨch ajcxy nhuinmaꞌñ ꞌijxtäy nej jëbɨ ɨɨch ajcxy nmeeñybaat. E Dios nañ ñejhuɨɨyb co yjanchɨty jada. \v 6 Nañ ni caꞌ ɨɨch ajcxy njɨjpꞌixy co jäy ajcxy xycömayɨpyɨch, ni miich ajcxy etz ni jac-huingbɨ jäy. Com je Cristo tɨ xyquexyɨch co ngapxhuäcxɨbɨch yɨꞌ yꞌayuc, paady ycɨxp jëbɨ ixyipy nꞌaneꞌmyɨch co ixyipy miich ajcxy xyajmɨjꞌatyɨch etz xypubetyɨch, per caꞌ jaduꞌn tɨ nduuñɨch. \v 7 Oygɨ́xy oyꞌamy tɨ nduuñɨch ma miich ajcxy, jaduꞌn nej tüg ungdaj mɨɨdɨty yꞌung yꞌanäg mɨɨd oyjot oyhuinmaꞌñ. \v 8 Tɨ ɨɨch miich ooy ndzojccɨxy njɨhuɨɨygɨxy, canan jëyɨ Dios yꞌayuc ytɨyꞌajt tɨ nmooygɨxy, nañ naygɨ̈yegáanɨbɨch anajty ma yɨ oꞌcɨn mɨɨd miich ajcxy ycɨxpɨ. \v 9 Co jayhuin ngapxhuäcxyɨch Dios yꞌayuc ma miich ajcxy, mjäymejchpy miich ajcxy jaduꞌn nej ɨɨch ajcxy nduuñ nꞌayooyɨch anajty xɨɨm tzuum mɨɨd ɨɨch ajcxy ngaayɨn nꞌuucɨn ycɨxpɨ. Caꞌ anajty nꞌadzibaangɨxy, paady ɨɨch ajcxy nduuñ nꞌayooyɨch xɨɨm tzuum mɨɨd ɨɨch ajcxy ngaayɨn nꞌuucɨn ycɨxpɨ. \p \v 10 Miich ajcxy huɨdibɨ mɨbɨjcp mnejhuɨɨy ajcxy, e nañ ñejhuɨɨyb Dios, co ɨɨch ajcxy ndzɨnaayɨch ma miich ajcxy tudägy, huädz ɨɨch anajty ajcxy njot nhuinmaꞌñ mɨ́ɨdɨdyɨch. Caꞌ ma ndundɨgooyɨch ajcxy nej pɨn xyꞌocnïhuambedɨpyɨch ajcxy. \v 11 Mnejhuɨɨyb miich ajcxy nej nꞌɨɨhuijcɨxy ngapxhuijcɨxy etz njotmɨcmɨgapxcɨxy nidüg nidüg, tɨm jaduꞌn nej tüg ungdeedy ɨɨhuijy capxhuijy yꞌung yꞌanäg. \v 12 Tɨ ngapxhuijcɨxy co ooy chach copɨcyɨty co mdzɨnáaygɨxɨpy nej Dios jëbɨ jäygɨdägɨpy yɨ mdzɨnaayɨn. Com yɨꞌ miich ajcxy tɨ xyhuinꞌijxcɨxy jëbɨ mdɨgɨ́ɨygɨxɨpy ma yɨꞌ chɨnaaydac, ma yɨꞌ mɨɨdɨty yꞌoyꞌajtɨn ymɨjꞌajtɨn. \p \v 13 Paady ycɨxpɨ nyajnajxpɨch jäygɨdaacɨn ma Dios jabom jabom, jaduꞌn nej miich ajcxy anajty tɨ mmɨdoꞌmbɨjccɨxy etz tɨ mgöbɨjccɨxy Dios yꞌayuc ytɨyꞌajt huɨdi ngapxhuäcxɨch ma miich ajcxy. Tɨ mmɨbɨjccɨxy anajty co ɨɨch ajcxy tɨ ngapxhuäcxy Dios yꞌayuc ytɨyꞌajt. Canan jeꞌ tɨ ngapxhuäcxyɨch ayuc huɨdi jäy tɨ cojy tɨ macxy. E janch tɨyꞌajt co Dios yꞌayuc ytɨyꞌajt cham ytuñ ma miich ajcxy mjot mhuinmaꞌñ, miich ajcxy huɨdibɨ mɨbɨjcp. \v 14 Mɨgügtɨjc ajcxy, jaduꞌn tɨ mjajtcɨxy jaduꞌn nej yjajty mɨɨd je judíojäy huɨdibɨ anajty tzɨnaayb jɨm Judea co ajcxy mɨjpɨdägy Dios yꞌayuc ytɨyꞌajt, chi je ymɨgogajp ajcxy ooy yꞌixhuɨdijtɨ ypahuɨdijtɨ. \v 15 Je judíojäy ymɨdziptzoon ɨɨch ajt nHuindzɨn Jesús, e chi yajꞌoꞌcy ajcxy, tɨm jaduꞌn nej ajcxy yꞌap yteedy yajꞌoꞌcy huɨdijaty anajty Dios yꞌayuc najtzcapxɨɨyɨp jecyꞌajty. Etz nañ jaduꞌn ajcxy xyajpɨdzɨmyɨch jɨm ma ajcxy judíojäy chɨnäy. Dios caꞌ jaduꞌn jäygɨdägy jaduꞌn nej ajcxy ytundɨgooy, nañ ooy ajcxy ymɨjotmädyii tügꞌócɨy jäy. \v 16 Yɨ judíojäy ajcxy tɨ capxꞌadujccɨxy co caꞌ huaad ngapxhuäcxyɨch je Cristo ytɨyꞌajt ma yɨ jäy ajcxy huɨdibɨ caꞌ yjudíojäyɨty, nej huaad ajcxy yꞌalma ñïdzóoccɨxɨpy. Co jaduꞌn ajcxy ytundɨgooy, chi ajcxy ooy nïgɨ ypocy ñïbety ma Dios. Per Dios tɨ ooy chip yꞌejcɨn pɨdacy ma judíojäy mɨɨd ajcxy ypocy ycɨxpɨ. \s Pablo ñijotꞌajtp co nɨcxy cogapxɨ̈huaangɨxy yɨ mɨbɨjcpɨdɨjc \p \v 17 Mɨgüctɨjc ajcxy, cham hueenɨ xɨɨ tiempo tɨ ñaxy ma caꞌ nꞌocꞌíjxcɨxnɨ ajcxy, per caꞌ ɨɨch miich ajcxy njäydɨgoy. Ooy ɨɨch ajcxy njaꞌnɨcxaꞌñ ma miich ajcxy jadügꞌoc, e caꞌ yꞌoyɨ̈y nej ɨɨch ajcxy nɨcxɨɨybɨch ma miich ajcxy. \v 18 Ooy ɨɨch ajcxy njanɨcxaꞌñ anajty ma miich ajcxy. E ɨɨch, Pablo, cɨꞌm anajty njanɨcxaꞌñɨch mejtzꞌoc tugɨɨgꞌoc, e je mujcuꞌ nnɨɨꞌaa ndüꞌaa tɨ xyꞌadujcɨch. \v 19 ¿Ti mɨjꞌajt miich ajcxy mdijy njɨjpꞌijxpɨch? ¿Ma mdijy ajcxy nbadaꞌñɨch njotcujcꞌajtɨn nꞌoyꞌajtɨn? Co anajty ajt nHuindzɨn Jesucristo yhuimbity ya naaxhuiñ, nbadaamybɨch jotcujcꞌajtɨn etz oyꞌajtɨn mɨjꞌajtɨn mɨɨd je tɨɨbɨ nduuñɨch ma miich ajcxy co tɨ mmɨjpɨdaaccɨxy Dios yꞌayuc ytɨyꞌajt. \v 20 Mɨɨd miich ajcxy ycɨxpɨ nmɨɨdɨch jotcujcꞌajtɨn etz xondaacɨn. \c 3 \p \v 1-2 Mɨɨd jada tajɨn mayɨn co ɨɨch anajty caꞌ nmɨmadägaꞌñ mɨɨd miich ajcxy ycɨxpɨ, paady ɨɨch ajcxy nhuinmaꞌñ nbɨdägy co jëbɨ nhuɨꞌmaꞌñɨch naydüg jɨm Atenas, etz jëbɨ nguexyɨch ɨɨch ajt nmɨgüg Timoteo ma miich ajcxy. Timoteo nañ jaduꞌn ytuñ ma Dios ytung quipxyɨ mɨɨd ɨɨch co ngapxhuäcxyɨch je Cristo yꞌayuc ytɨyꞌajt oybɨ. Yɨ Timoteo ñïgapxpedɨpy ɨɨch nꞌayuc etz xyjotmɨcmɨgapxɨp ajcxy, jɨgɨx jac mɨc ajcxy myajpaadɨp ma mmɨbɨjcɨn. \v 3 Jaduꞌn Timoteo ytunɨpy ma miich ajcxy jɨgɨx caꞌ mhuinmaꞌñytɨgóoygɨxɨp mɨɨd je tzaachypɨ huɨdibɨ ajcxy mmɨnajxyp myajnajxyp. Miich ajcxy mnejhuɨɨyb co copɨcy myajnaxɨpy ajcxy tzaachypɨ mɨɨd Jesucristo ycɨxpɨ. \v 4 Co ogaꞌn nꞌijtyɨch ma miich ajcxy, chi ɨɨch miich ajcxy nnɨmaayɨch co tzaachypɨ mmɨnájxcɨxɨpy myajnájxcɨxɨpy mɨɨd Jesucristo ycɨxpɨ. E miich ajcxy cham mnejhuɨɨygɨxyp co janch tɨyꞌajt jaduꞌn nej nnɨmaaygɨxy, mɨɨd co cham tzaachypɨ mmɨnajxcɨxy myajnajxcɨxy. \v 5 Com nejhuɨɨybɨch co tzaachypɨ mmɨnajxyp myajnajxyp ajcxy, paady ycɨxpɨ tajpɨch maybɨch mɨɨd miich ajcxy ycɨxpɨ. E com caꞌ nmɨmadägaꞌñɨch je tajɨn je mayɨn, paady ycɨxp tɨ nguexyɨch Timoteo ma miich ajcxy jaydëbɨ tɨyꞌajt xypáadɨbɨch pen tɨydudägy miich ajcxy mmɨbɨcy. Tzɨgɨɨybɨch anajty co ndijy je mujcuꞌ tɨ xyajhuinmaꞌñytɨgooygɨxy, etz jaduꞌn anajty ñaadɨgɨ̈ꞌadaꞌñ ɨɨch ndung ma miich ajcxy. \p \v 6 Jadachambɨ Timoteo tɨ xyñihuimbityɨch, chooñ ma miich ajcxy jɨm Tesalónica, etz tɨ xyajnejhuɨ̈yɨch jaduꞌn nej miich ajcxy mmɨɨdɨty mmɨbɨjcɨn, etz nañ tɨ xyajnejhuɨ̈yɨch jaduꞌn nej mnaychójcɨgɨxy mnayjɨhuɨ́ɨyɨgɨxy nidüg nidüg. Timoteo nañ jaduꞌn xyñɨmaaybɨch jaduꞌn nej miich ajcxy xyjäymechɨch etz xychocy xyjɨhuɨ̈yɨch, etz nañ ooy miich ajcxy xyjaꞌixáangɨxyɨch jadügꞌoc, jaduꞌn nej ɨɨch miich ajcxy nañ jaduꞌn ooy njaꞌixaangɨxy. \v 7 Mɨgügtɨjc ajcxy, ooy capxy agujc ayuc agujc nyajpaadyɨch. E co Timoteo tɨ mɨmiñ je oybɨ ayuc tɨyꞌajt jaduꞌn nej miich ajcxy mjacpanɨcxy tɨydudägy yɨ mɨbɨjcɨn, chi mɨj ooy tɨ njotcugɨ̈yɨch. \v 8 Jadachambɨ jëbɨ njactzɨnäyɨch jotcujc, com tɨ nnejhuɨ̈yɨch co miich ajcxy caꞌ mꞌixtɨgɨ̈huäccɨxy ma mmɨbɨjcɨn. \v 9 Nyajnajxpɨch jäygɨdaacɨn ma Dios yhuinduu mɨɨd miich ajcxy ycɨxpɨ, mɨɨd co janch jotcujc nayjɨhuɨ̈yiijɨch co miich ajcxy caꞌ mꞌixtɨgɨ̈huägy ma mmɨbɨjcɨn. \v 10 Xɨɨm tzuum nmɨbɨjctzooyɨch Dios mɨɨd tügꞌócɨy njot nhuinmaꞌñɨch, jɨgɨx Dios xyajꞌahuáatzɨbɨch nnɨɨꞌaa ndüꞌaajɨch, jëbɨ nnɨcxyɨch cɨꞌm ma miich ajcxy, jaydëbɨ njacyajꞌijxpɨgɨpy ajcxy Dios yꞌayuc ytɨyꞌajt, e jaduꞌn jëbɨ ajcxy mjacyajcaꞌpxy mmɨbɨjcɨn ma mjacyajtɨgoyꞌijtcɨxy. \p \v 11 Njɨjpꞌijxypɨch co Dios Teedy cɨꞌm etz ajt nHuindzɨn Jesús xyajꞌahuáatzɨbɨch nnɨɨꞌaa ndüꞌaa jɨgɨx nɨcxy nꞌijxcɨxy jadügꞌoc. \v 12 Ɨɨch ajcxy ndzojcpy co ajt nHuindzɨn Jesucristo xyjacmóoygɨxɨpy tzojcɨn jɨhuɨɨyɨn, jɨgɨx nïgɨ ajcxy mnaychogɨɨyb mnayjɨhuɨ̈huɨɨyb miñ xyɨpy, e nañ nïgɨ mdzójcɨxɨpy mjɨhuɨ́ɨygɨxɨpy tügꞌócɨy je mayjäy, tɨm jaduꞌn nej ɨɨch miich ajcxy ndzocy njɨhuɨ̈y. \v 13 Ɨɨch ajcxy ndzojcpy co Dios xyajꞌijtɨp ajcxy mjot mhuinmaꞌñ tüccɨꞌy ma Jesucristo ytɨyꞌajt, e caꞌ mꞌixtɨgɨ̈huäccɨxy, jɨgɨx co anajty ɨɨch ajt nHuindzɨn Jesús ymiiñ jadügꞌoc ya naaxhuiñ mɨɨd tügꞌócɨy je mɨbɨjcpɨdɨjc huɨdibɨ mɨɨd huädz yjot yhuinmaꞌñ, jëbɨ miich ajcxy mnayguëxɨ̈gɨɨyb ma Dios Teedy yhuinduu mɨɨd huädz mjot mhuinmaꞌñ, caꞌ ti xɨ̈huɨn ma Dios mɨɨd miich ajcxy. \c 4 \s Je tzɨnaayɨn jugyꞌajtɨn huɨdibɨ Dios yjäygɨdacyp \p \v 1 Jadüg nax, mɨgügtɨjc ajcxy, jadachambɨ mayꞌajt nbɨjctzooyɨch, e nyajnïbɨjccɨxy mɨɨd ajt nHuindzɨn Jesucristo ycɨxpɨ co ajcxy mjaccuychɨnähuɨpy Dios yꞌayuc ytɨyꞌajt, jaduꞌn nej tɨ nyajꞌixpɨcyɨch miich ajcxy, etz mjactzɨnähuɨpy ajcxy jaduꞌn nej jëbɨ Dios jäygɨdägy ajcxy mdzɨnaayɨn, jaduꞌn nej tɨ mdungɨxy. \p \v 2 Miich ajcxy mnejhuɨɨyb je cötujcɨn huɨdibɨ tɨ nyajꞌixpɨjccɨxy. Jada cötujcɨn ɨɨch ajt nHuindzɨn Jesucristo tɨ xyajnïbɨcyɨch. \v 3 Miich ajcxy mnejhuɨɨyb je cötujcɨn jaduꞌn nej Dios tzocy co huädz jot huädz huinmaꞌñ myajtúngɨxɨpy ma yɨ mdzɨnaayɨn mjugyꞌajtɨn. Caꞌ huaad mmɨgapxtɨgooygɨxy tüg töxyjäy. \v 4 Miich ajcxy mnejhuɨɨyb Jesús ycötujcɨn co copɨcy nidüg nidüg yëydɨjc pɨgɨpy tüg töxyjäy etz yajmɨjꞌadɨp ytöxyɨjc, etz nañ mɨɨddzɨnähuɨpy mɨɨd oyjot oyhuinmaꞌñ. \v 5 Caꞌ Dios jaduꞌn tzocy co je yëydɨjc nijotꞌaty töxyjäy mɨɨd jɨbɨc-huinmaꞌñ, jaduꞌn nej yɨ jäy ajcxy yꞌɨdɨ̈ch huɨdibɨ caꞌ nejhuɨ̈y Dios ytɨyꞌajt. \v 6 Caꞌ huaad ni pɨn mɨgapxtɨgooyɨ ymɨgüg ytöxyɨjc, com Dios yɨꞌ tzaachytunɨɨb mɨjcajee pɨnjaty mɨgapxtɨgooyb ymɨgüg ytöxyɨjc. Jada cötujcɨn tɨ nyajniꞌixɨɨygɨxy jayhuin. \v 7 Com Dios jaduꞌn tɨ xyhuinꞌijxɨm jɨgɨx oyjot oyhuinmaꞌñ ndunɨm, canan co ndunɨm jɨbɨc jot jɨbɨc-huinmaꞌñ. \v 8 Co tüg jäy ytundɨgooy mɨɨd huingbɨ töxyjäy huɨdibɨ caꞌ töxyɨjcꞌadyii, hueꞌ jeꞌ ñɨxiicpy yajxiicpy Dios ycötujcɨn, canan jäy ycötujcɨn ñɨxiicɨpy yajxiicɨpy, e nañ ñɨxiicpy yajxiicpy je Espíritu Santo huɨdibɨ Dios tɨ quexy ma ɨɨch ajt. \p \v 9 Miich ajcxy mnejhuɨɨyb je cötujcɨn co copɨcy mdzogɨpy mjɨhuɨ̈huɨpy ajcxy mmɨgügtɨjc huɨdibɨ tzɨnaayb jɨm Macedonia ñaaxjot. Mɨgügtɨjc ajcxy, mayꞌajt nbɨjctzooybɨch co jacnaychójcɨgɨx jacnayjɨhuɨ́ɨyɨgɨx. \v 10 Janch tɨyꞌajt jaduꞌn co miich ajcxy mdzocy mjɨhuɨ̈y tügꞌócɨy je mɨgügtɨjc huɨdi tzɨnaayb jɨm Macedonia ñaaxjot. Nmɨgügtɨjc ajcxy, mayꞌajt nbɨjctzooybɨch co jacnaychójcɨgɨxy nayjɨhuɨ́ɨyɨgɨxy etz mnayyajmɨjꞌájtɨgɨxy mɨj cajee. \v 11 Jatyɨm tzɨnaaygɨx nicy xeemy, agujc jotcujc. Pɨdäg ajcxy mjot mhuinmaꞌñ ma mgɨꞌmdzɨnaayɨn, etz nañ jatytɨm naymɨdúunɨgɨx. Jada tɨyꞌajt tɨ najtzcapxɨɨyɨ ajcxy jayhuin. \v 12 Tungɨx mgɨꞌmdung, jɨgɨx yɨ jäy ajcxy huɨdibɨ caꞌ ymɨbɨcy xyajmɨjꞌadɨp ajcxy, etz nañ jaduꞌn caꞌ myajmayjadɨpy ajcxy ni ti. \s Co anajty je Huindzɨn Jesús ymiñ ya naaxhuiñ jadügꞌoc \p \v 13 Mɨgügtɨjc ajcxy, ndzojcypɨch co miich ajcxy mhuinjɨhuɨ̈huɨp je tɨyꞌajt ma jeꞌ yajpaady yꞌalma je mɨgügtɨjc tɨɨbɨ yꞌöccɨxy, jɨgɨx caꞌ mdájcɨxɨpy mmáygɨxɨpy, jaduꞌn nej je jäy ajcxy nidajcɨxy nimaygɨxy huɨdibɨ caꞌ mɨbɨjccɨxy co Jesús yajjugypɨgaꞌñ jadügꞌoc je tɨɨbɨ ajcxy yꞌoꞌccɨxy. \v 14 Jaduꞌn nej ɨɨch ajt nmɨbɨjcɨm co Jesús yjugypɨjcy co yꞌoꞌcy, nañ jaduꞌn Dios yajjugypɨjctähuaꞌñ je öcpɨdɨjc huɨdijaty ajcxy mɨbɨjc Jesús. \p \v 15 Paady ycɨxpɨ ɨɨch miich ajcxy nnɨmaaygɨxy co ajt nHuindzɨn Jesús tɨyꞌajt tɨ yecy co ɨɨch ajt huɨdibɨ jacjugyꞌajtp co anajty Jesús yhuimbity ya naaxhuiñ, tügmucy xyajnɨcxaanɨm mɨɨd yɨ mɨbɨjcpɨdɨjc tɨɨbɨ yꞌoꞌccɨxy. Caꞌ ɨɨch ajt njayɨjpꞌadaanɨm yɨ tɨɨbɨ yꞌoꞌccɨxy, yɨꞌ ajcxy jayɨjpꞌadamb. \v 16 Ɨɨch ajt nHuindzɨn Jesús cɨꞌm yhuimbidaꞌñ ya naaxhuiñ chonaꞌñ tzajpjoty mɨɨd ycötujcɨn, mɨɨd ymɨcꞌajtɨn, e yɨꞌ mɨc capxamb aneꞌmamb. Huimbidamb Jesús quipxyɨ mɨɨd tüg ángel mɨjtungmɨɨdpɨ huɨdibɨ nañ jaduꞌn mɨc capxamb aneꞌmamb. E co anajty yhuimbity, chi Dios yajxuxaꞌñ yɨꞌ ytrompeta, e tɨm huinꞌítɨy Jesús xyajpɨdɨ̈ctähuaanɨm ya naaxhuiñ, e chi ajt naybadaanɨm mɨɨd Jesús jocjoty. \v 17 E chi ɨɨch ajt huɨdijaty anajty jactzɨnaayɨm, naybadaanɨm mɨɨd ajt nHuindzɨn Jesús jocjoty quipxyɨ mɨɨd jeꞌajcxy huɨdibɨ anajty tɨ yjugypɨcy jadügꞌoc. E jaduꞌn ndzɨnähuaanɨm huinɨxɨɨ huinɨtiempo mɨɨd ajt nHuindzɨn Jesús. \v 18 Mɨɨd jada ayuc tɨyꞌajt nayyajjotcugɨ́ɨyɨgɨx miñ xyɨpy. \c 5 \p \v 1 Mɨgügtɨjc ajcxy, caꞌ ycopɨcyɨty njacnijayɨ́ɨygɨxɨpy jaduꞌn nej je xɨɨ je tiempo ycaꞌpxaꞌñ. \v 2 Miich ajcxy mnejhuɨɨyb co ɨɨch ajt nHuindzɨn Jesucristo yhuimbidaꞌñ ya naaxhuiñ tzaachytunaꞌñ yɨ mayjäy mɨɨd ypocy ycɨxpɨ. Jesús miinaamb mɨna anajty je mayjäy caꞌ ti ocjɨjpꞌijxnɨ. Jaduꞌn ymiinaꞌñ jaduꞌn nejjɨhuɨ̈y tüg meetzpɨ ymiñ coodz co ymeedzaꞌñ. \v 3 Co anajty je mayjäy ymɨnaangɨxy: “Cham ooy jotcujc ndzɨnaayɨm, caꞌ ma tzip capxy”, chi tɨmɨtiina jotcömoñɨ Dios yajtɨgoyaꞌñ je naaxhuiñybɨ. Tɨmɨtiina ayoꞌn ñimiinɨɨyb jäy ajcxy. Tɨm jaduꞌn nipaady nej töxyjäydɨjc tɨmɨtiina ypaꞌmbety co tiempo tɨ yhuaadꞌajtnɨ co yꞌung yajmaꞌxungꞌadaꞌñ. E ni pɨn huaad cacöguëgɨpy je tzaachypɨ co Dios anajty ymiiñ ya naaxhuiñ yajtɨgoydähuaꞌñ yɨ mayjäy. \v 4 Per mɨgügtɨjc ajcxy mɨɨd miich ajcxy Dios ytɨyꞌajt, paady miich caꞌ jaduꞌn myajpáatcɨxnɨ nejjɨhuɨ̈y mdzɨnaaygɨxy agootztuuby. Caꞌ ajcxy mgɨxɨ́py mgüedɨ́py mɨna anajty Jesús miiñ jotcömoñɨ, jaduꞌn nej jäy nɨgoobɨ ycɨxy ycuecy co tɨ ymeechyii. \v 5 Com tügꞌócɨy miich ajcxy Dios yꞌayuc ytɨyꞌajt mhuinjɨhuɨɨygɨxy, jaduꞌn nipaady jaduꞌn nejhuɨ̈y tɨ mgoxɨmɨɨygɨxy tɨ mgodɨɨcxɨ̈ccɨxy. Ɨɨch ajt caꞌ njacyajpaatɨm agootztuuby. \v 6 Paady ycɨxpɨ caꞌ huaad njäydɨgooyɨm Dios ytɨyꞌajt, caꞌ huaad nmɨꞌöctɨgooyɨm jaduꞌn nej yɨ jacjaydyii jäy ajcxy huɨdibɨ caꞌ cuendɨtuñ Dios yꞌayuc ytɨyꞌajt, jaduꞌn yɨꞌ ajcxy nipaady jaduꞌn nejjɨhuɨ̈y ajcxy tɨ ymɨꞌöctɨgoy. Ijtcɨx niꞌixɨ̈ mɨɨd tügꞌócɨy Dios yꞌayuc ytɨyꞌajt. Mɨꞌijtcɨx huijy cujc mjot mhuinmaꞌñ. \v 7 Yɨ jäy ajcxy huɨdibɨ maab, coodz ajcxy ymäy. Yɨ jäy ajcxy huɨdibɨ muucɨp, coodz ajcxy ymúucɨgɨxy. \v 8 Ɨɨch ajt huɨdibɨ nnejhuɨɨyɨm Dios ytɨyꞌajt, copɨcy huijy ycujc ajt ndzɨnaayɨm, e nañ copɨcy nmɨbɨjcɨm Jesucristo e nañ naychójcɨgɨx nayjɨhuɨ́ɨyɨgɨx miñ xyɨpy, jaduꞌn nipaady nej soldadtɨjc ñaygohuáanɨgɨxy mɨɨd pujx huɨdibɨ ymɨɨd ma ycaach. E mɨɨd co njɨjpꞌijxɨm co Dios xyajnïdzögaanɨm ajt nꞌalma, jaduꞌn nipaady nejjɨhuɨ̈y soldadtɨjc ñaygohuáanɨgɨxy mɨɨd ypujxcöjup. \v 9 Com Dios xyajjugyꞌajtɨm co xychaachytunaanɨm xyajtɨgoyaanɨm, Dios xyajjugyꞌajtɨm nej nꞌalma jëbɨ paatɨm nïdzoocɨn co nmɨjpɨdaacɨm ɨɨch ajt nHuindzɨn Jesucristo. \v 10 Jesucristo tɨ yꞌögy mɨɨd ajt nbocy ycɨxpɨ, jɨgɨx jëbɨ huaad ndzɨnaayɨm jiiby tzajpjoty quipxyɨ mɨɨd yɨꞌ, caꞌ ñejɨty pen tɨ anajty nꞌoꞌcɨm o pen jiinɨ anajty njugyꞌajtɨm co anajty Jesucristo yhuimbity ya naaxhuiñ. \v 11 Paady ycɨxpɨ jacnayjotmɨcmɨgápxɨgɨx, e nañ jacnaybubéjtɨgɨx nidüg nidügtɨ, tɨm jaduꞌn nej cham mdungɨxy. \s Pablo capxhuijy yɨ mɨbɨjcpɨdɨjc ajcxy \p \v 12 Mɨgügtɨjc ajcxy, mayꞌajt nbɨjctzooybɨch co yajmɨjꞌajtcɨxy ajcxy yɨ mɨgügtɨjc huɨdibɨ tumb ma miich ajcxy mɨɨd Dios yꞌayuc ycɨxpɨ. Yɨꞌ ajcxy huɨdibɨ xyajniꞌixɨɨyb Dios yꞌayuc ytɨyꞌajt, yɨꞌ ajcxy xycapxhuijɨp mɨɨd ajt nHuindzɨn Jesucristo yꞌayuc ytɨyꞌajt. \v 13 Copɨcy myajmɨjꞌájtcɨxɨpy ooy, etz nañ mdzójcɨxɨpy mɨɨd je Dios ytung ycɨxpɨ huɨdibɨ ajcxy ytumyb ma miich ajcxy. Tzɨnaaygɨx jotcujc caꞌ ma tzip capxy. \p \v 14 Nañ jaduꞌn, mɨgügtɨjc ajcxy, nyajnïbɨjcpy ajcxy co myajꞌojɨp yɨ mɨgüg ajcxy huɨdibɨ caꞌ ti dung tunaꞌñ, etz nañ mjotmɨcmɨgapxɨp huɨdibɨ ajcxy tajp maayb, etz nañ mbubedɨpy ajcxy huɨdibɨ hueenɨ mɨɨd ymɨbɨjcɨn, etz yajtungɨx mecxtujcɨn mɨɨd tügꞌócɨy mɨgügtɨjc. \p \v 15 Ɨɨch miich ajcxy nɨmaayb co caꞌ ni pɨn huaad yajꞌahuimbidɨp jɨbɨc ma ymɨgüg huɨdibɨ tɨ ymɨdundɨgoyii. Nañ jaduꞌn nɨmaaygɨxy co naymɨꞌoyjäyꞌájtɨgɨx nidüg nidügtɨ. Nañ jaduꞌn oyjäyꞌajtɨn mdunɨpy ajcxy mɨɨd tügꞌócɨy naaxhuiñyjäy. \p \v 16 Jatytɨm mɨɨdꞌajtcɨx jotcujcꞌajtɨn jabom jabom. \v 17 Capxtaaccɨx etz mɨbɨjctzoogɨx Dios jabom jabom. \v 18 Yajnajxcɨx jäygɨdaacɨn ma Dios pen ji ajcxy mjajtcɨxy ayoogɨxy nejjaty, com Dios ooy yjotcujcɨty co je mɨgügtɨjc huɨdibɨ mɨbɨjcp Cristo Jesús yajnaxy ajcxy jäygɨdaacɨn ma yɨꞌ jabom jabom mɨɨd tügꞌócɨy huɨdibɨ tuunɨp jajtɨp ma yɨꞌ ajcxy. \p \v 19 Capxymɨdoogɨx je Espíritu Santo, co ngacapxymɨdoohuɨm je Espíritu Santo huinꞌit nyajtɨgooyɨm Dios yjɨhuɨꞌñ ymɨcꞌajt huɨdibɨ yajpatp ma ɨɨch ajt. \v 20 Yajjotcujcꞌajtcɨx huenpɨnɨty pɨn Dios yꞌayucpɨdzɨmb ma miich ajcxy. \v 21 Jëyɨ janchtɨy mꞌixɨpy penɨ quipxyɨɨyb mɨɨd Dios yꞌayuc huɨdibɨ ajcxy ycapxyp. Mɨjpɨdaaccɨx je ayuc tɨɨybɨ. \v 22 Ixmajtzcɨx tügꞌócɨy jɨbɨc ayuc jɨbɨc-huinmaꞌñ. \p \v 23 Dios nmɨbɨjctzooybɨch, je Dios huɨdibɨ yejcpy jotcujcꞌajtɨn, co ajcxy xyajhuaatztaayɨp mjot mhuinmaꞌñ ma yɨ jɨbɨcpɨ. Dios nmɨbɨjctzooybɨch co yɨꞌ cɨꞌm xycuendɨꞌajtɨp huädz oy yɨ mꞌalma ajcxy, etz yɨ mjɨhuɨꞌñ, etz mnïcx mgohuajc, caꞌ ma pocy yquëxɨ̈gy, ixtɨ mabaad anajty ɨɨch ajt nHuindzɨn Jesucristo ymiiñ ya naaxhuiñ. \v 24 Je Dios huɨdibɨ tɨ xyajmɨbɨjccɨxy, tudägy yɨꞌ, e ycuydunɨpy yɨꞌ yꞌayuc mɨɨd miich ajcxy. \s Capxpoocxɨn huɨdibɨ cɨjxnɨp je necy \p \v 25 Mɨgügtɨjc ajcxy, mɨbɨjctzoogɨx Dios mɨɨd ɨɨch ajcxy ycɨxpɨ. \p \v 26 Naygapxpóocxɨgɨx xïc xon nidüg nidüg mɨɨd oyjot oyhuinmaꞌñ. \p \v 27 Nhuindzɨn Jesucristo ajt tɨ xyajnïbɨcyɨch jada tung, paady nyajnïbɨjccɨxy co jada necy mgápxcɨxɨpy niꞌabɨdzɨmy ma tügꞌócɨy mɨbɨjcpɨdɨjc. \p \v 28 Dios nmɨbɨjctzooybɨch co ɨɨch ajt nHuindzɨn Jesucristo xyconuucxɨp ajcxy. Jaduꞌn jada. Amén.