\id 2TH
\h 2 TESALONICENSES
\toc1 2 TESALONICENSES
\mt1 2 TESALONICENSES
\mt2 Yɨ Mɨmetz Necy Huɨdi San Pablo Yajniguejx Je Mɨbɨjcpɨdɨjc Jɨm Tesalónica
\c 1
\p
\v 1 Ɨɨch Pablo mɨɨd Silvano etz Timoteo cham nguexyɨch jada necy ma je mɨgügtɨjc huɨdibɨ ajcxy jɨm Tesalónica yajpatp, etz yajpatcɨxy ma ɨɨch ajt nDios Teedy etz ajt nHuindzɨn Jesucristo.
\v 2 Huen ɨɨch ajt nDios Teedy etz ɨɨch ajt nHuindzɨn Jesucristo mayꞌajt oyꞌajt tunɨpy mɨɨd miich ajcxy etz xyajjotcugɨ́ɨygɨxɨp.
\s Dios tɨydunɨpy yɨ pocyjäydɨjc ajcxy co anajty Cristo ymiñ jadugꞌoc
\p
\v 3 Mɨgügtɨjc ajcxy, njatytɨmyajnajxypɨch jabom jabom jäygɨdaacɨn ma Dios mɨɨd miich ajcxy ycɨxpɨ. E jaduꞌn copɨcy nyajnaxyɨch jäygɨdaacɨn ma Dios, com miich ajcxy mɨbɨjcpy Jesucristo nïgɨ jabom jabom, etz nañ nïgɨ jabom jabom naychójcɨgɨxy nayjɨhuɨ́ɨyɨgɨxy nidüg nidüg.
\v 4 Com miich ajcxy ooy nuucxy meecxy mꞌijtcɨxy ma yɨ tzaachypɨ etz ayoꞌn huɨdibɨ ajcxy mmɨnajxyp myajnajxyp, e nañ ooy mmɨjpɨdaaccɨxy Jesucristo, paady ycɨxpɨ ngapxpaadyɨch miich ajcxy ma yɨ mɨgügtɨjc huɨdibɨ mɨjpɨdaacp Dios majaty tüg tüg cajp. 
\v 5 Miich mmɨbɨjcɨn etz mmecxtujcɨn yɨꞌ jeꞌ ijxpejtɨp co Dios ytudägyɨty mɨɨd ajcxy ytɨyduunɨn, e xycöbɨjccɨxy co jëbɨ mdɨgɨ́ɨygɨxɨpy ma yɨ yꞌaneꞌmdac mɨɨd mmɨbɨjcɨn ycɨxpɨ. Mɨɨd jada ycɨxpɨ miich ajcxy mmɨnajxcɨxy myajnajxcɨxy tzaachypɨ ayoꞌn.
\p
\v 6 Mɨɨd co Dios ytudägɨty, yɨꞌ tzaachytunamb yɨ jäy ajcxy huɨdibɨ miich ajcxy xyꞌixhuɨdijtp xypahuɨdijtp.
\v 7 E nañ yɨꞌ ajcxy xymöhuɨpy jotcujcꞌajtɨn tɨm jaduꞌn nej xymöhuáangɨxyɨch jotcujcꞌajtɨn je huinꞌit xɨɨ co anajty ajt nHuindzɨn Jesucristo ñayguexɨ̈gyii co anajty miiñ ya naaxhuiñ jadügꞌoc chooñ anajty tzajpjoty. Nañ je ángeles ajcxy mɨcꞌajt mɨɨdpɨ miinaamb quipxyɨ mɨɨd Jesucristo. Miinaamb Jesús mɨɨd aneꞌmɨn cötujcɨn e yajtɨgoydähuaꞌñ pocyjäydɨjc, tɨm jaduꞌn nej tüg mɨjjɨɨn yajhuindɨgoydäy huen ytiijɨty.
\v 8 Jesucristo chaachytunamyb je mayjäy ajcxy huɨdibɨ caꞌp cöbɨcy Dios, etz huɨdibɨ caꞌ mɨjpɨdägy ajt nHuindzɨn Jesucristo yꞌayuc ytɨyꞌajt oybɨ.
\v 9 Yɨ jäy ajcxy huɨdibɨ miich ajcxy xyꞌixhuɨdijtp xypahuɨdijtp, Dios yɨꞌ tzaachytunaanɨp ajcxy yꞌalma huinɨxɨɨ huinɨtiempo. Dios ypɨdägaanɨp yɨꞌ ajcxy yꞌalma jɨguëgy ma ni camɨnaxɨɨ ajcxy ijxcɨxyp je nHuindzɨn Jesucristo etz yɨꞌ yꞌoyꞌajtɨn etz ymɨcꞌajtɨn.
\v 10 Jaduꞌn yjadɨpy je huinꞌit xɨɨ huinꞌit tiempo co anajty ajt nHuindzɨn Jesús miiñ ya naaxhuiñ, Jesús je mɨbɨjcpɨdɨjc yajmɨjꞌadaꞌñ etz huindzɨgɨ̈huaꞌñ, e nañ jaduꞌn miich ajcxy myajmɨjꞌadɨpy etz mhuindzɨgɨ̈huɨpy mɨɨd co anajty yꞌayuc ajcxy tɨ mmɨbɨjccɨ, je ayuc huɨdibɨ tɨ ngapxhuäcxyɨch ma miich ajcxy.
\p
\v 11 Paady ycɨxpɨ jabom jabom Dios     nmɨbɨjctzooyɨch mɨɨd miich ajcxy ycɨxpɨ, jaydëbɨ tudägy ajcxy mdzɨnähuɨpy, e Dios huɨdibɨ tɨ xyhuinꞌijxcɨxy yjäygɨdägɨpy yɨꞌ miich ajcxy mdzɨnaayɨn. Nañ jaduꞌn Dios nmɨbɨjctzoogɨxy mɨɨd jada ycɨxpɨ co yɨꞌ cuydunɨpy huɨdibɨ miich ajcxy mbɨjctzooyb mꞌamɨdooyb mɨɨd oyjot oyhuinmaꞌñ. E nañ ycuydunɨpy yɨꞌ huɨdibɨ miich ajcxy mdumyb mɨɨd mmɨbɨjcɨn.
\v 12 Com Dios jaduꞌn tunamb ma miich ajcxy mjot mhuinmaꞌñ, paady ycɨxpɨ ajt nHuindzɨn Jesucristo yxɨɨ capxpaady yꞌidɨpy ma miich ajcxy mdzɨnaayɨn etz nañ jaduꞌn miich ajcxy capxpaady mꞌidɨpy ma Jesucristo. Jaduꞌn yjadɨpy com ɨɨch ajt nDios etz ajt nHuindzɨn Jesucristo mayꞌajt oyꞌajt tuñ ma miich ajcxy.
\c 2
\s Je jɨbɨc jäy huɨdibɨ huinꞌɨɨmb mayjäy
\p
\v 1-2 Mɨgügtɨjc ajcxy, cham nyajmɨɨdmɨydaaccɨxy je xɨɨ je tiempo co anajty ajt nHuindzɨn Jesucristo huimbidaanɨ jadügꞌoc ya naaxhuiñ, etz naybadaanɨm mɨɨd yɨꞌ. Nmɨnucxtaacpyɨch miich ajcxy, caꞌ mhuinmaꞌñytɨgooygɨxy co pɨnjaty ymɨnaꞌñ co Jesucristo tɨ yhuimbity. Caꞌ mmɨbɨjccɨxy, caꞌ jada ayuc yjanchɨty. Caꞌ mdungɨxy cuendɨ yɨ jäy ajcxy yꞌayuc huɨdibɨ mɨnamb co tüg espíritu tɨ yajnejhuɨɨygɨxy co yjaduꞌnɨty, o co muum aꞌijxnaxy amɨdoonaxy capxy ayuc, o co muum ijxpɨdzɨmy jada ayuc ma tüg necy huɨdibɨ ajcxy ytijpy co ɨɨch nnecyꞌadyii. 
\v 3 Caꞌ myajhuinꞌɨɨngɨx janch ni nej. Jayɨjp caꞌnɨ anajty je xɨɨ je tiempo yhuaadꞌatyñɨ ma anajty Jesucristo ymiinaꞌñ jadügꞌoc ya naaxhuiñ, mayjäy ajcxy mɨdziptzonaꞌñ Dios tɨydudägy co ñayguëxɨ̈gɨɨyb tüg jɨbɨc jäy mɨc jäy huɨdibɨ Dios yajcödɨgoyamy tüccɨꞌyɨ.
\v 4 Jada jɨbɨc jäy ymɨdziptzonamyb tügꞌócɨy tijaty huɨdibɨ jäy Diosꞌajtpy, e nañ ymɨdziptzonamyb huɨdibɨ jëbɨ yajꞌojadaty. E nañ yɨꞌ naybɨdägɨɨb amɨj agɨx jaduꞌn nejhuɨ̈y yjacmɨjɨty caꞌydɨ Dios. E nañ yɨꞌ ypɨdägamb yꞌaneꞌmdac ma Dios ytɨjc, e naybɨdägaanɨp nejhuɨ̈y Diosɨty.
\p
\v 5 ¿Nej caꞌ mjäymejtzcɨxy co jaduꞌn nimɨydacyɨch tügꞌócɨy jada tɨyꞌajt jayhuin je taab anajty nꞌityɨch ma miich ajcxy?
\v 6 Jadachambɨ miich ajcxy mnejhuɨɨyb pɨn yajhuäcxɨjp jada mɨc jäy jada jɨbɨc jäy, jɨgɨx caꞌydɨ ñayguëxɨ̈gyii jayɨjpnɨ ma caꞌnɨ tiempo yhuaadꞌatyñɨ mɨna Dios aꞌɨxɨ̈huɨp co ymiinɨpy. 
\v 7 Je mɨc jäy je jɨbɨc jäy cham ñiꞌixɨɨyb ameech je jɨbɨcpɨ huɨdibɨ ytunamyb, jëyɨ ytɨgoyꞌityñɨ mɨna je tüꞌaa yꞌahuächyii, je huɨdibɨ yajhuäcxɨjpɨp.
\v 8 Co anajty je jɨbɨc jäy ytüꞌaa yꞌahuäch, chi ajt nHuindzɨn Jesús yajcödɨgoyɨpy mɨɨd tüg puxujɨn. Jesús yajcödɨgoyɨpy je jɨbɨc jäy mɨɨd yɨꞌ yꞌoyꞌajtɨn etz ymɨjꞌajtɨn co anajty yhuimbity ya naaxhuiñ.
\v 9 Je jɨbɨc jäy, yɨꞌ jeꞌ ymɨɨd je mujcuꞌ yhuinmaꞌñ etz ymɨcꞌajt, e ytunamyb mɨjhuinmaꞌñ etz ijxpejt huɨdibɨ anɨɨjɨp.
\v 10 Je jɨbɨc jäy ytunamyb tügꞌócɨy tijaty jɨbɨc-huinmaꞌñ jɨgɨx jëbɨ huinꞌɨɨnɨp yɨ jäy ajcxy huɨdibɨ yꞌalma tɨgoyɨpy, mɨɨd co caꞌ ajcxy cöbɨjccɨxy, e nañ caꞌ tzojccɨxy Dios yꞌayuc ytɨyꞌajt huɨdi mɨɨd jëbɨ yꞌalma ñïdzooccɨxy.
\v 11-12 E jeꞌ ycɨxpɨ co caꞌ ajcxy cöbɨgaꞌñ Dios ytɨyꞌajt, paady Dios yꞌixmadzáanɨgɨxy huen yajhuinꞌɨɨngɨxy, huen mɨbɨjccɨxy je mujcuꞌ yꞌanɨɨ, e mɨɨd jada ycɨxpɨ jëbɨ Dios yajtɨgooyɨ yɨꞌ ajcxy yꞌalma nidügꞌócɨy huɨdibɨ caꞌ mɨbɨgaꞌñ Dios ytɨyꞌajt. Jacjotcujc ajcxy  co jɨbɨc-huinmaꞌñ tungɨxy.  
\s Je jäy ajcxy tɨɨbɨ Dios yhuinꞌixyii jɨgɨx ypocyñïhuädzɨpy 
\p
\v 13 Mɨgügtɨjc ajcxy huɨdibɨ ajt nHuindzɨn Jesucristo ooy tzocy jɨhuɨ̈y, jabom jabom nyajnaxyɨch jäygɨdaacɨn ma Dios mɨɨd miich ajcxy ycɨxpɨ, mɨɨd co Dios tɨ xyhuinꞌijxcɨxy ogaꞌnꞌaty, jɨgɨx jëbɨ mꞌalma ñïdzooccɨxy mɨɨd Dios yjɨhuɨꞌñ ymɨcꞌajt, etz nañ mɨɨd Dios yꞌayuc ytɨyꞌajt huɨdibɨ tɨ mmɨbɨjccɨxy. Je Dios yjɨhuɨꞌñ ymɨcꞌajt xyajhuaatzɨp ajcxy mjɨbɨcjot mjɨbɨc-huinmaꞌñ.
\v 14 Paady ycɨxpɨ Dios tɨ xyhuinꞌijxcɨxy, e nañ xyajmɨbɨjccɨxy mɨɨd yɨꞌ yꞌayuc ytɨyꞌajt huɨdibɨ ɨɨch ajcxy ngapxhuäcxyp, jɨgɨx jëbɨ mbáatcɨxɨpy oyꞌajtɨn ma ɨɨch ajt nHuindzɨn Jesucristo. 
\p
\v 15 Paady mɨgügtɨjc ajcxy, mɨbɨjccɨx tɨydudägy, caꞌ mꞌixtɨgɨ̈huäccɨxy, e caꞌ mjäydɨgooygɨxy je tɨyꞌajt huɨdibɨ ɨɨch ajcxy tɨ ngapxhuäcxy ma miich ajcxy, etz jaduꞌn nej tɨ nnɨmaaygɨxy necyjoty.
\v 16-17 Huen ɨɨch ajt nHuindzɨn Jesucristo cɨꞌm etz ajt nDios Teedy mayꞌajt oyꞌajt tunɨpy mɨɨd miich ajcxy, e xyajjotmɨcpɨ́jccɨxɨpy etz xyajmɨbɨ́jccɨxɨpy tɨydudägy, jɨgɨx oybɨ ayuc mgápxcɨxɨpy etz mdunɨpy ajcxy tügꞌócɨy oybɨ huinmaꞌñ. Ɨɨch ajt nDios Teedy etz ɨɨch ajt nHuindzɨn Jesucristo xychojcɨm xyjɨhuɨɨyɨm, e tɨ xymooyɨm jotcujcꞌajtɨn huinɨxɨɨbɨ, e nañ tɨ tuñ mayꞌajt oyꞌajt mɨɨd ɨɨch ajt ycɨxpɨ, jaydëbɨ njɨjpꞌijxɨm oyꞌajtɨn jiiby tzajpjoty.
\c 3
\s Mɨbɨjctzoogɨx Dios mɨɨd ɨɨch ajcxy ycɨxpɨ
\p
\v 1 Jadügnax, mɨgügtɨjc ajcxy, tungɨx mayꞌajt mɨbɨjctzoogɨx Dios mɨɨd ɨɨch ajcxy ycɨxpɨ, jɨgɨx jëbɨ ngapxhuäcxɨbɨch huinmɨc jotmɨc Jesús yꞌayuc ytɨyꞌajt huingnaax huinggajp. E nañ mɨbɨjctzoogɨx Dios jëbɨ yɨ jäy ajcxy mɨjpɨdägɨpy Jesús yꞌayuc ytɨyꞌajt oybɨ, tɨm jaduꞌn nej miich ajcxy tɨ mmɨjpɨdaaccɨxy.
\v 2 Nañ mɨbɨjctzoogɨx Dios mɨɨd ɨɨch ajcxy ycɨxpɨ, jɨgɨx ɨɨch ajcxy Dios xyñihuaꞌnɨpy xycohuaꞌnɨpy ma yɨ jäy ajcxy huɨdibɨ jɨbɨc-huinmaꞌñ ymɨɨd, huɨdibɨ jɨbɨc ɨɨch ajcxy xytunamb, com mayjäy caꞌ mɨjpɨdägy Jesús yꞌayuc ytɨyꞌajt.
\v 3 Ɨɨch ajt nHuindzɨn Jesúcristo tudägy yɨꞌ, e xypubedɨp xypudɨgɨ̈huɨp ajcxy jɨgɨx miich ajcxy caꞌ mjotmetzcɨ̈huɨpy ma yɨ mmɨbɨjcɨn, e nañ xypubedɨp ajcxy, jɨgɨx caꞌ xymɨmadáaccɨxɨpy je jɨbɨcjäy huɨdibɨ Dios caꞌ capxymɨdoy.
\v 4 Ɨɨch ajt nHuindzɨn Jesús jotcujcꞌajtɨn tɨ xymóoygɨxyɨch mɨɨd miich ajcxy ycɨxpɨ. Nmɨbɨjcpyɨch co miich ajcxy mguydumyb je Dios yꞌayuc ytɨyꞌajt huɨdibɨ nyajꞌixpɨjccɨxy etz mjaccuydunaamyb ajcxy.
\v 5 Com caꞌ ɨɨch njaty nej njɨjpcogapxɨ̈huɨbɨch, chi nguejxyɨch cogapxy, nnejhuɨ̈huaꞌñɨch nej anajty ajcxy myajpatcɨxy ma yɨ mɨbɨjcɨn, tzɨgɨɨyb ɨɨch anajty co nɨcxy mujcuꞌ xypɨdaaccɨxy jɨbɨctuum, chi ɨɨch  anajty ajcxy ndung tɨ ñaadɨgɨ̈ꞌaty.
\s Ooy ycopɨcyɨty co nduunɨm ma ajt ndung
\p
\v 6 Mɨgügtɨjc ajcxy, mɨɨd ajt nHuindzɨn Jesús yxɨɨ etz ymɨcꞌajt jada aneꞌmɨn ajcxy nyajnïbɨjcpy, co copɨcy ajcxy mꞌixmadzɨpy yɨ mmɨgüg huɨdibɨ caꞌ ytunaꞌñ ma ycɨꞌmdung, etz huɨdibɨ caꞌ cuyduñ Dios ytɨyꞌajt jaduꞌn nej ɨɨch tɨyꞌajt tɨ nyecy.
\v 7 Miich ajcxy mnejhuɨɨyb jaduꞌn nej ɨɨch tɨ ndzɨnäyɨch tɨ njugyꞌatyɨch co tɨ nꞌityɨch ma miich ajcxy. E jëbɨ tɨyꞌajt ajcxy mbɨgɨpy ma ɨɨch ndzɨnaayɨn nej jëbɨ miich ajcxy mdzɨnaaygɨxy. Co anajty ɨɨch njɨmɨty ma miich ajcxy, caꞌ ɨɨch nꞌixmajch ngɨꞌmdung.
\v 8 Tügꞌócɨy ɨɨch ajcxy ngaayɨn nꞌuucɨn ngojuuyɨch. Nduñ nꞌayooyɨch anajty xɨɨm tzuum, co anajty caꞌ nꞌadzɨbaꞌñɨch ni tüg.
\v 9 Dios tɨ xymöyɨch mɨcꞌajt aneꞌmɨn co ixyipy ajcxy mbubejtɨn tɨ nbɨjctzoohuɨ o tɨ nbɨjctzoohuɨ ixyipy ajcxy mgaayɨn mꞌuucɨn, per caꞌ ɨɨch ajcxy jaduꞌn tɨ ndúngɨxyɨch, jɨgɨx ijxpejt ajcxy mbɨgɨpy ma ɨɨch ajcxy.
\v 10 Com 
co anajty nꞌityɨch ma miich ajcxy jada cötujcɨn ajcxy nyajnïbɨjc co pɨnjaty caꞌ ytunaꞌñ, caꞌ  ajcxy myajcayɨpy myajꞌügɨpy.
\v 11 Jaduꞌn ɨɨch tɨ nnejhuɨ̈y co nijëjɨty miich ajcxy caꞌ mdunaangɨxy mgɨꞌmdung, jëyɨ myöygɨxy mnajxcɨxy jäyjɨɨn jäydɨjc.
\v 12 Yɨ jaduꞌmbɨ jäy ajcxy nyajnïbɨjcpyɨch mɨɨd ɨɨch ajt nHuindzɨn Jesús yxɨɨ co huen tungɨxy jabom jabom ma ycɨꞌmdung, caꞌ huaad pɨn adzijpcɨx anajxcɨx jɨgɨx jëbɨ paadɨp ajcxy ycaayɨn yꞌuucɨn.
\p
\v 13 Mɨgügtɨjc ajcxy, oybɨ jatyɨm tungɨxy jabom jabom, caꞌ mjotmetzcɨ́ɨygɨxɨpy.
\v 14 Pen nidügtɨ ma miich ajcxy caꞌ tuñ cuendɨ jada ayuc huɨdibɨ ajcxy nyajnijayɨɨyb, ijxcɨx pɨn jeꞌ, e chi caꞌ mjactúngɨxɨp cuendɨ, e ni caꞌ mɨɨd myöymujc mnaxmújcɨxɨpy, jɨgɨx chöydunɨpy.
\v 15 Caꞌ ajcxy huaad mɨdzipꞌajtcɨxy yɨ jäy ajcxy huɨdibɨ caꞌ yajxon cuyduñ Dios ytɨyꞌajt. Hueꞌ janchtɨy mgapxhuijcɨx oyꞌamy jaduꞌn nej tüg mɨbɨjcpɨ.
\s Capxpoocxɨn huɨdibɨ cɨjxnɨp je necy
\p
\v 16 Huen ɨɨch ajt nHuindzɨn Jesucristo huɨdibɨ jotcujcꞌajtɨn yejcp, cɨꞌm xyajjotcugɨ́ɨygɨxɨpy jabom jabom oytɨm mɨnaaxɨɨjɨty oytɨm ymaꞌámyɨty. Huen je Huindzɨn Dios xypubejtcɨxy xypudɨgɨɨygɨxy.
\p
\v 17 Ɨɨch, Pablo, jada capxpoocxɨn cɨꞌm njaayɨch. Jaduꞌn nfirmajɨ̈yɨch tügꞌócɨy ɨɨch nnecy, e jaduꞌn miich ajcxy mnejhuɨ̈huɨpy co ɨɨch jada necyꞌadyii.
\v 18 Huen ɨɨch ajt nHuindzɨn Jesucristo mayꞌajt oyꞌajt tunɨpy mɨɨd tügꞌócɨy miich ajcxy. Jaduꞌn jada. Amén.