\id 1TI
\h 1 TIMOTEO
\toc1 1 TIMOTEO
\mt1 1 TIMOTEO
\mt2 Yɨ Jayɨjpɨ Necy Huɨdibɨ San Pablo Yajniguejxy Timoteo 
\c 1
\p
\v 1 Ɨɨch Pablo, Cristo Jesús xyajꞌapóstolꞌajtpɨch. Yɨ Dios huɨdibɨ xyñihuaanɨm xyyajnïdzoocɨm ajt nꞌalma, etz Cristo Jesús huɨdibɨ xymöhuaanɨm jugyꞌajtɨn huinɨxɨɨbɨ, yɨꞌ ajcxy tɨ xyajnïbɨcyɨch co yɨꞌ yꞌayuc ngapxhuäcxɨbɨch.
\v 2 Cham ɨɨch miich nijayɨ̈y Timoteo. Jaduꞌn njɨhuɨ̈y nej ɨɨch miich ngɨꞌmꞌungꞌadyii, co miich Dios ytɨyꞌajt tɨ mbaady ma ɨɨch. Huen Dios Teedy etz Cristo Jesús ɨɨch ajt nhuindzɨn mayꞌajt tunɨpy mɨɨd miich, huen xypaꞌayoohuɨpy etz xyajjotcugɨ̈huɨpy.
\s Nijëjɨty jäy yajꞌixpɨcy huɨdibɨ caꞌ ytɨyꞌajtɨty
\p
\v 3 Huɨꞌmɨꞌ miich jɨm Efeso, jaduꞌn nej nɨmay je taabɨ anajty ndzonaꞌñɨch jɨm Efeso nnɨcxaꞌñɨch anajty Macedonia. Huɨꞌmɨꞌ jɨm, jɨgɨx mgapxꞌadugɨpy je jäy huɨdibɨ najtzcapxɨɨyb je ayuc caꞌp ytɨyꞌajtɨty.
\v 4 Mgapxꞌadugɨpy je nɨgoobɨ yꞌayucɨty. Mgapxꞌadugɨpy yɨꞌ ajcxy huɨdibɨ tzachnigapxp tzachnimɨydacpy yɨ judiojäy ajcxy yꞌayuc jaduꞌn nej huɨdibɨ ñiꞌapꞌajtpy ñideedyꞌajtpy ajcxy. Yɨ jaduꞌmbɨ ayuc nɨgoob yajhuinmaꞌñydɨgoy pɨnjaty ixpɨjcp Dios ytɨyꞌajt.
\p
\v 5 Jaduꞌn Dios tzocy co huen jäy ajcxy naychojctäyyii mɨɨd oyjot oyhuinmaꞌñ. Huen ajcxy Dios yajmɨjꞌaty janch cɨxyjot huinɨjot. Co pɨn yajmɨjꞌaty Dios janch cɨxyjot huinɨjot, ooy ajcxy oy ñayjɨhuɨ́ɨyɨgɨxy.
\v 6 Nijëjɨty jäy ajcxy tɨ ixmajtznɨ je Dios ytɨyꞌajt, tɨ ajcxy jɨjptɨgɨyɨɨyñɨ je ayuc huinmaꞌñ huɨdibɨ caꞌp choobaady. 
\v 7 Ooy yɨꞌ ajcxy jayajꞌixpɨgaꞌñ yɨ Dios ycötujcɨn, ni caꞌ huinjɨhuɨɨygɨxy huɨdibɨ ycapxcɨxyp, ni huɨdibɨ ajcxy ñïgapxpejtpy. 
\p
\v 8 Ɨɨch ajcxy nnejhuɨɨyɨm co yɨ Dios ycötujcɨn oy yɨꞌ pen nyajtunɨm nej ypadyii nej ytɨyꞌajtɨty.
\v 9 Nejhuɨɨyɨm co yɨ Dios ycötujcɨn caꞌ yɨꞌ tzaachytuñ oyjäydɨjc, jëyɨ tzaachytuñ pɨn caꞌ capxymɨdoy Dios, pɨn mɨdundɨgooyb Dios ycötujcɨn. Je Dios ycötujcɨn chaachytumyb jäy huɨdibɨ caꞌ cuydungɨxy, jäy ajcxy huɨdibɨ caꞌ ytudägyɨty, jäy huɨdibɨ caꞌ capxymɨdoogɨxy Dios, jäy huɨdibɨ pocytungɨxy, jäy huɨdibɨ caꞌ huindzɨgɨꞌñ yajtungɨxy mɨɨd Dios, jäy ajcxy huɨdibɨ capxtɨgooyb, huɨdibɨ ytaj yteedy yajꞌöccɨxy, huɨdibɨ jäy yajꞌöccɨxy.
\v 10 Je Dios ycötujcɨn chaachytumyb pɨn mɨgapxtɨgooyb töxyjäydɨjc etz yëydɨjctɨjc, huɨdibɨ mɨyëydɨjc ymähuaꞌñ. Dios nañ chaachytumyb je jäy huɨdibɨ jäy majtzp etz toognaxy, chaachytumyb ɨndaacpɨdɨjc etz nïhuambejtpɨdɨjc. Je Dios chaachytumyb jacjadyii jäy huɨdibɨ yꞌayuc caꞌ ytɨyꞌajtɨty nej Dios tɨyꞌajt mɨɨdɨty.
\v 11 Jadayaabɨ tɨyꞌajt huätzpɨ oybɨ tügɨɨyb mɨɨd Jesucristo yꞌayuc ytɨyꞌajt oybɨ huɨdibɨ ɨɨch nDios, je conuucxy yTeedy, tɨ xyyajnïbɨcyɨch co ngapxhuäcxɨbɨch.
\s Pablo yjäygɨdacpy co Dios mayꞌajt tɨ tuñ mɨɨd yɨꞌ
\p
\v 12 Ooy njäygɨdägyɨch co ɨɨch ajt nhuindzɨn Cristo Jesús tɨ xyajmɨcpɨcyɨch, yɨꞌ tɨ xyꞌijxtɨɨyɨch, yɨꞌ tɨ xyajnïbɨcyɨch Dios yꞌayuc co ngapxhuäcxpɨch.
\v 13 Ɨɨch jecyꞌajty jɨbɨc anajty nigapxy niꞌojɨɨyɨch Jesús. Nꞌixhuɨdijty nbahuɨdijtyɨch Jesús yjäy. Ɨɨch yɨꞌ ajcxy nmɨdundɨgooyɨch. Tɨ yɨ Dios xypaꞌayooyɨch com ɨɨch jaduꞌn anajty tɨ nꞌadɨ̈ch mɨɨd co nganejhuɨɨyɨch je tɨyꞌajt, ngamɨbɨcyɨch Jesús ngamɨjpɨdägyɨch Jesús.  
\v 14 Paady ycɨxpɨ ɨɨch ajt nHuindzɨn Dios mayꞌajt oyꞌajt tɨ tuñ mɨjcajee mɨɨd ɨɨch, co tɨ xyajmɨbɨcyɨch Jesús. E Jesús tɨ xymöyɨch tzojcɨn jɨhuɨɨyɨn mɨɨd yɨꞌ yjäy ycɨxpɨ.
\p
\v 15 Ooy jada yjanchɨty, e nidügꞌócɨy jäy ajcxy jëbɨ mɨbɨjccɨxy co Cristo Jesús miiñ ya naaxhuiñ co yajpocynïhuädzaꞌñ pocyjäydɨjc. E ɨɨch nïgɨ pocy nmɨ́ɨdɨdyɨch caꞌydɨ ni pɨnjäy.
\v 16 Mɨɨd jada ycɨxpɨ Dios tɨ xypaꞌayooyɨch tɨ xymɨmecxtucyɨch, jɨgɨx co jäy ajcxy ijxɨp nej Dios tɨ ytuñ mɨɨd ɨɨch, huinꞌit ajcxy mɨjpɨdägɨpy yɨꞌ yꞌayuc etz ypaadɨpy jugyꞌajtɨn huinɨxɨɨbɨ ma Jesús.
\v 17 Paady chojcpy co ngömayɨm Dios, je rey huɨdibɨ aneꞌmb huinɨxɨɨ, huɨdibɨ nimɨnaa ycaꞌoꞌcy, etz nipɨn caꞌixy. Je Dios tügpajc huɨdibɨ Diosꞌajtp huen ycömayꞌidɨpy cham etz tügꞌócɨy xɨɨ tiempo huɨdibɨ mimb cɨdacp.
\p
\v 18 Timoteo, ooy ɨɨch miich ndzocy njɨhuɨ̈y. Jada ayuc ɨɨch miich nyajnɨmaydaayb. Mɨhuindɨnähuɨp Dios yꞌayuc caꞌ mhuinmaꞌñydɨgoyɨpy. Mguydunɨpy jaduꞌn nej Dios yꞌayucnajtzcapxɨɨybɨ xyꞌɨɨhuijy xycapxhuijy co mdung mnïmajch.
\v 19 Mɨhuindɨnähuɨp Dios yꞌayuc ytɨyꞌajt, huinꞌit caꞌ jɨbɨc mnayjɨhuɨ̈huɨɨyb, jaduꞌn nej ajcxy jadyii huɨdibɨ nejhuɨɨyb je tɨyꞌajt, e caꞌ cuydungɨxy, e jaduꞌñyɨ yhuinmaꞌñydɨgooygɨxy.
\v 20 Jaduꞌn nej Himeneo mɨɨd Alejandro ajcxy jaty, huɨdibɨ ɨɨch tɨ nyajcɨ̈dɨgɨɨygɨxy je mujcuꞌ, jɨgɨx ajcxy yhuinmaꞌñymedzɨpy, caꞌydɨ yajjotmaꞌtcɨxy Dios.
\c 2
\s Jaduꞌn nej jëb Dios nmɨbɨjctzoohuɨm
\p
\v 1 Yɨꞌ njatyyajnɨmaayb co ooy ycopɨcyɨty capxtaaccɨxy mɨbɨjctzoogɨxy Dios etz yajnajxcɨxy Dioscojuyip mɨɨd tügꞌócɨy jäy ajcxy ycɨxpɨ.
\v 2 Copɨcy nnibɨjctzoohuɨm ma Dios: reydɨjc, aneꞌmbɨdɨjc etz codungdɨjc, jɨgɨx jëbɨ jotcujc ndzɨnaayɨm, caꞌ ma tzip. Co jaduꞌn nduunɨm, yɨꞌ anajty ngoduunɨm Dios yꞌayuc, etz huinꞌit tɨydudägy ndzɨnaayɨm.
\v 3 Com yɨ jaduꞌmbɨ huinmaꞌñ ooy yɨꞌ yꞌoyɨty, e Dios huɨdibɨ ɨɨch ajt nꞌalma yajnïdzoocp, oy yɨꞌ jäygɨdägy. 
\v 4 Dios chojcpy co tügꞌócɨy je jäy ajcxy huen yꞌalma nïdzooccɨxy, huen ijxcɨxy nejhuɨɨygɨxy Dios yꞌayuc ytɨyꞌajt.
\v 5 Tüg jeꞌ je nHuindzɨnꞌajtɨm Dios, etz tüg jeꞌ je huingapxpɨ huɨdibɨ jëbɨ ytɨgɨ̈y ma Dios mɨɨd ɨɨch ajt ycɨxpɨ, etz huɨdibɨ jëb Dios yꞌayuc capxnajxy ma ɨɨch ajt: je huingapxpɨ, jeꞌ jeꞌ je jäy, je Cristo Jesús.
\v 6 Cristo Jesús nayyojxɨ naydoocɨ mɨɨd ɨɨch ajt nbocy ycɨxpɨ, ñaygɨ̈yejcɨ huen jäy yajꞌögyii, jɨgɨx jëb ɨɨch ajt nbɨdzɨɨmɨm ma je mujcuꞌ anajty cɨ̈ꞌam xymɨɨdꞌajtɨm. Jaduꞌn nej Dios cham jäy yajnejhuɨ̈y co je tiempo yhuaadꞌajtnɨ,
\v 7 paady Dios tɨ xyajnïbɨcyɨch ngapxhuäcxɨbɨch yꞌayuc ytɨyꞌajt, etz Jesús xyꞌapóstolꞌadyiijɨch. Je tɨyꞌajt jada ngapxpɨch, caꞌ nꞌɨndägyɨch. Tɨ xyajnïbɨcyɨch jada tung nej jëb huaad nyajꞌixpɨcyɨch, nej jëb huaad mɨbɨjccɨxy Dios, etz nyajꞌixpɨcyɨch Dios ytɨyꞌajt ma yɨ jäy ajcxy huɨdibɨ caꞌ yjudíojäyɨty.
\p
\v 8 Ndzojcpyɨch co yɨ yëydɨjctɨjc huen mɨbɨjctzoogɨxy ojadajtcɨxy Dios ma tügꞌócɨy naymujctac mɨɨd oyjot oyhuinmaꞌñ, caꞌ yꞌadzip yꞌahuanꞌnɨty, caꞌ yꞌametz yjotmetzɨty.
\v 9 Nañ jaduꞌn ndzojcypɨch co yɨ töxyjäydɨjc huen yhuit yxojx yajtungɨxy nej ypadyii, huɨdibɨ quipxpaady ajcxy paatɨp. Huen yhuit yxojx pɨdaaccɨxy nej töxyjäydɨjc huɨdib tudägyɨp. Huen ycöhuay cüdɨ̈gy caaxɨ̈gy nej ypadyii, caꞌ ymɨgügtɨjc huinnaxtugɨpy mɨɨd yhuit yxojx, caꞌ nayxójxɨgɨxy mɨɨd oorɨ, mɨɨd perla, e mɨɨd tijaty ooy choohuɨty.
\v 10 Caꞌ huaad töxyjäydɨjc ñaygömáyɨgɨxy mɨɨd yhuit yxojx, huen janch yajcömaygɨxy mɨɨd yꞌoyjäyꞌajtɨn, jaduꞌn nej je jäy ajcxy tungɨxy huɨdibɨ tɨ ñaygɨ̈yéjcɨgɨxy cɨxyjot huinɨjot ma Dios.
\v 11 Co jäy ajcxy yajꞌixpɨcy Dios yꞌayuc ma je naymujctac, huen töxyjäydɨjc ajcxy amoyñɨ amɨdooꞌijtcɨxy mɨɨd yungnaxy yjot yhuinmaꞌñ.
\v 12 Yɨ töxyjäydɨjc caꞌp niducyɨch yajꞌixpɨgɨpy jäy ajcxy ma je naymujctac. E ni caꞌ ypadyii nɨcxy yëydɨjc aneꞌmy. Huen ajcxy amoñɨ yꞌity.
\v 13 Dios jayɨjp yajcojy Adán, jacꞌaxam Eva, paady ycopɨcy yɨ yëydɨjctɨjc huen aneꞌmy yɨ töxyjäydɨjc.
\v 14 Adán caꞌ yajtzuꞌijxy. Eva yajtzuꞌijx, jeꞌ caꞌ Dios capxymɨdoy.
\v 15 Paady yɨ töxyjäydɨjc caꞌ ypadyii nɨcxy nigohuajcꞌaty yɨ mɨbɨjcpɨdɨjc. Dios jotcujc ñayjɨhuɨ̈yii mɨɨd co jëyɨ yꞌungꞌijxcɨxy, etz yajmɨjꞌajtcɨxy Dios, etz tzojctaaygɨxy ymɨgügtɨjc, etz huen ajcxy cuydungɨxy Dios yꞌayuc ytɨyꞌajt, etz huen tudägy jäyꞌajtcɨxy mɨɨd oyjot oyhuinmaꞌñ.
\c 3
\s Nej jëbɨ ytungɨxy huɨdibɨ ajcxy nigohuajcꞌajtp
\p
\v 1 Tɨyꞌajt jada nej jäy ymɨnaangɨxy. Pen ji pɨn najtzogɨ̈y nigohuajcꞌadaꞌñ yɨ mɨbɨjcpɨdɨjc tüg yɨꞌ oybɨ anajty ytunamyb.
\v 2 Pɨn nigohuajcꞌajtp yɨ mɨbɨjcpɨdɨjc ooy ycopɨcyɨty jeꞌ jaduꞌn naydijɨɨb huɨdibɨ caꞌ ti tundɨgoy, huɨdibɨ tüg töxyjäy mɨɨd caꞌp ycanaagɨty, huɨdibɨ huijycujc jäyꞌajtp, huɨdibɨ mɨɨd oybɨ yhuinmaꞌñ etz tudägypɨ yhuinmaꞌñ, huɨdibɨ oyjäyꞌajtɨn tumb, huɨdibɨ jajtp nej jäy ajcxy yajꞌixpɨgɨpy.
\v 3 Pɨn nigohuajcꞌajtp chojcpy tüg jäy huɨdibɨ caꞌ yꞌamügɨty, huɨdibɨ caꞌ yhuindzipɨty, huɨdibɨ yajtumb mecxtujcɨn, huɨdibɨ caꞌ chipcapxy yꞌahuaꞌngapxy, huɨdibɨ caꞌ ti adzocy.
\v 4 Pɨn nigohuajcꞌajtp chojcpy tüg jäy huɨdibɨ tɨydudägy tzɨnaayb ma yjɨɨn ytɨjc, huɨdibɨ yꞌung yꞌanäg yajtzɨnaayb nicy yxeemy.
\v 5 Pen caꞌ jaty nej yꞌung yꞌanäg mɨgapx aneꞌmɨp ma yjɨɨn ytɨjc, ¿nej ocꞌaneꞌmaꞌñ yɨ mɨbɨjcpɨdɨjc?
\v 6 Nañ caꞌp yjëjɨty huɨdibɨ namnɨ mɨbɨcy Dios yꞌayuc ytɨyꞌajt. Ycadɨmjecyɨty nɨcxy ooy amɨj agɨx ñayjɨhuɨ̈yii, e nɨcxy camadägy je aneꞌmɨn, e yjadɨpy jaduꞌn nej Satanás yjajty co jɨbɨc tumb ñayyajhuɨꞌmɨ mɨɨd Dios.
\v 7 Chojcpy tüg jäy huɨdibɨ nidügꞌócɨy je mayjäy oy ijxɨp. Pen caꞌ yjaduꞌnɨty nɨcxy pɨn yxɨ̈yii, e chi jada anajty je mujcuꞌ tɨ ymɨmadägyii co jäy jɨbɨc ñigapxɨɨyb.
\s Yɨ mutz tungmɨɨd nañ chojcpy huɨdibɨ oyjot oyhuinmaꞌñ mɨɨd
\p
\v 8 Yɨ mutz tungmɨɨd huɨdibɨ yajpat ma mɨbɨjcpɨdɨjc chojcpy jäy tudägypɨ, huɨdibɨ nicy xeemy jäyꞌajtp, huɨdibɨ caꞌ jäyꞌaty aguejtmiñ aguejtxɨpy, huɨdibɨ caꞌ yꞌamügɨty, huɨdibɨ caꞌ yꞌadzocy caꞌ yꞌameeñɨty.
\v 9 Huen naybɨdáacɨgɨxy cɨxyjot huinɨjot ma je tɨyꞌajt janchypɨ. Je tɨyꞌajt huɨdibɨ je mayjäy caꞌ huinjɨhuɨ̈y. Je tɨyꞌajt huɨdibɨ ɨɨch ajt nmɨbɨjcɨm. Jeꞌ chojcpy pɨnjaty huɨdibɨ caꞌ ti jɨbɨcpɨ jotꞌadyii huinmaꞌñꞌadyii.
\v 10 Pɨnjaty mutztung yajnɨcxamb, jayɨjp jotꞌix huinmaꞌñꞌix pen tudägy yhuinmaꞌñ. Huinꞌit jëbɨ mdungmöy.
\v 11 Yɨ mutz tungmɨɨdpɨ ytöxyɨjc chojcpy co huen tudägy jäyꞌaty, huɨdibɨ caꞌ ñigapx ñiꞌojɨ̈y ymɨgüg, huɨdibɨ nicy xeemy jäyꞌajtp, huɨdibɨ cuydundaayb tügꞌócɨy.
\v 12 Yɨ jäy huɨdibɨ mutztung yajnɨcxamb chojcpy tüg jäy huɨdibɨ pɨcy chɨnaayb, huɨdibɨ caꞌp mɨɨdɨty metz o tugɨɨg töxyjäy, huɨdibɨ yꞌung yꞌanäg yajtzɨnaayb nicy xeemy, huɨdibɨ tɨydudägy tzɨnaayb ma yjɨɨn ytɨjc.
\v 13 Yɨ mutz tungmɨɨdpɨ huɨdibɨ yajxon ytung cuydungɨxy, cömay yɨꞌ ajcxy idɨpy ma mɨbɨjcpɨdɨjc. Nañ nïgɨ ajcxy ixpɨjcꞌɨdɨ̈ch Cristo yꞌayuc.
\s Dios mɨjhuinmaꞌñ tuun mɨɨd ɨɨch ajt ycɨxpɨ
\p
\v 14 Jada necy ɨɨch miich nyajniguejxyp. Njɨjpꞌijxypɨch co tzojc nnɨcxaꞌñɨch jɨm ma miich.
\v 15 Pen caꞌ yꞌoyɨ̈y nej tzojc nnɨ́cxɨbɨch ma miich, tɨ yam nyajnijayɨ̈y je janchypɨ. Mɨɨd jada necy huaad jëbɨ nidüg nidüg mɨbɨjcpɨ yjäyꞌájtɨgɨxy ma yɨ mɨbɨjcpɨdɨjc huɨdibɨ mɨjpɨdacp Dios juugypɨ, je Dios huɨdibɨ huijtzꞌijttaayb etz cohuandaayb je tɨyꞌajt janchypɨ.
\v 16 Janch tɨyꞌajt jada co mɨj yɨꞌ yɨ Dios yꞌayuc ytɨyꞌajt huɨdibɨ tɨ xyajnejhuɨɨyɨm, je huɨdibɨ jecyꞌajty caꞌ pɨn nejhuɨ̈y. Je tɨyꞌajt huɨdibɨ xyajnejhuɨɨyɨm co quexy yꞌung ya naaxhuiñ.
\q Dios yꞌung hueꞌ jeꞌ yajꞌijxy mɨɨd ñinïcx. Tudägy nayguëxɨ̈cɨ mɨɨd Dios yjɨhuɨꞌñ ymɨcꞌajt. Je Dios yꞌángeles ajcxy tɨ ixyii. Tɨ yajnigapxy yajnimɨydägy Dios yꞌung ma huɨdibɨ caꞌ yjudiojäyɨty nañ tɨ jäy yajmɨjꞌajtcɨxy Dios yꞌung ya naaxhuiñybɨ. E tɨ ycöbɨgyii tzajpjoty ma yɨ oybɨ it. 
\c 4
\s Mayjäy ixmadzaꞌñ yɨ Dios ytɨyꞌajt
\p
\v 1 Yɨ Espíritu Santo mɨnaan co anajty je xɨɨ tiempo ycɨxaꞌñ, mayjäy ixmadzaangɨxy yɨ Dios yꞌayuc ytɨyꞌajt. Mɨjpɨdaaccɨxy anajty jäy ajcxy yꞌayuc huɨdibɨ yɨ huinꞌɨɨmbɨ etz caꞌoybɨ ytɨyꞌajt mɨɨd.
\v 2 Jada jäy ajcxy mɨɨd anɨɨ anajty naybɨdáacɨgɨxy nej ytudägyɨty, e caꞌ anajty yjanchɨty. Caꞌ ajcxy nej ñayjɨhuɨ̈yii co ajcxy ytɨgɨɨy anɨɨdaacpɨ. Tɨ jaduꞌn yhuinmaꞌñypɨdaaccɨxy janch mɨc.
\v 3 Yɨꞌ ajcxy ymɨnaꞌñ co caꞌ huaad jäy ypɨjccɨxy, etz caꞌ huaad caaygɨxy nijëjɨty caayɨn uucɨn. Yɨ caayɨn uucɨn Dios yɨꞌ tɨ conucxy jɨgɨx jëbɨ jäy ajcxy huɨdibɨ mɨbɨjccɨxy etz huinjɨhuɨɨygɨxy je tɨyꞌajt, jëbɨ yajnajxcɨxy Dioscojuyip ma Dios etz cöbɨgɨpy ajcxy agujc jotcujc je caayɨn uucɨn.
\v 4 Tügꞌócɨy huɨdibɨ Dios tɨ yajꞌoyɨ̈y, oy yɨꞌ. Caꞌ huaad pɨn ymɨnaꞌñ co caꞌ yꞌoyɨty. Agujc jotcujc ngöbɨjcɨm, jëyɨ nyajnajxɨm Dioscojuyip ma yɨꞌ.
\v 5 Dios ymɨnaꞌñ co huen huɨdibɨ caayɨn huɨdibɨ uucɨn ooy yꞌoy yɨꞌ. Jëyɨ co nyajnajxɨm Dioscojuyip, e huinꞌit Dios conuucxy je caayɨn uucɨn.
\s Caꞌ ajcxy mmɨjpɨdägɨp yɨ nɨgoobɨꞌayucɨty
\p
\v 6 Pen miich ajcxy jada ayuc jada tɨyꞌajt myajnɨmaayb yɨ mɨgügtɨjc, oy anajty mduñ ma Cristo ytung. Co jaduꞌn myajꞌixpɨcy Dios yꞌayuc janch cɨxyjot huinɨjot, chi anajty myajyeegy yɨ mmɨbɨjcɨn. Caꞌ mjäydɨgoyɨpy yɨ oybɨ ayuc huɨdibɨ nyajnɨmaayb, huɨdibɨ ayuc mbanɨcxyp mbayöyp.
\v 7 Caꞌ mmɨjpɨdägy yɨ nɨgoobɨꞌayucɨty huɨdibɨ caꞌ choobaady ma Dios. Panɨcxɨꞌ payöyɨꞌ Dios ytɨyꞌajt.
\v 8 Jacꞌoy co nꞌixpɨjcɨm Dios yꞌayuc, caꞌydɨ co ninïcx ymɨcꞌajt nbaatɨm. Co yajyujctäy jäy ñinïcx, chi ñinïcx ymɨcꞌajt paady jëyɨ. Co nꞌixpɨjcɨm nguyduunɨm Dios ytɨyꞌajt, chi tɨyꞌajt nbaatɨm nej ya naaxhuiñ ndzɨnaayɨm, etz nañ jaduꞌn nbaatɨm jadüg jugyꞌajtɨn ma Jesús co anajty nꞌoꞌcɨm.
\v 9 Jada tɨyꞌajt huɨdibɨ tɨ nyajnɨmäy, janch tudägy jada, jëbɨ ngöbɨjctaayɨm, e nidüg nidüg jëbɨ mɨbɨjccɨxy.
\v 10 Paady nduunɨm nꞌayoohuɨm oy pɨn xycaꞌixaanɨm. Njɨjpꞌijxɨm co je Dios huɨdibɨ jugyꞌijtp xyajnïdzögaanɨm nꞌalma. Jëyɨ yajnïdzögɨpy ajcxy yꞌalma huɨdibɨ mɨjpɨdaacɨp Dios yꞌayuc.
\p
\v 11 Yajnɨmaꞌ yɨ mɨgügtɨjc huen cuydundaaygɨxy jada ayuc. Yajꞌixpɨc jada tɨyꞌajt.
\v 12 Huen jäy ajcxy mꞌayuc xymɨjpɨdaacɨ, oy miich mutz anäcɨnɨty. Myegɨpy ijxpejt ma mɨgügtɨjc nej jëb huaad ycapxcɨxy ymɨydaaccɨxy, nej jëb huaad ytungɨxy, jaduꞌn nej jëb huaad oyjäyꞌajtɨn tungɨxy, jaduꞌn nej jëb huaad mɨbɨjcɨn yajtungɨxy ma Dios, jaduꞌn nej jëb huaad huädz yhuinmaꞌñ mɨɨdꞌajtcɨxy. Co jaduꞌn mdunɨpy, huinꞌit ajcxy mɨjpɨdägɨpy miich mꞌayuc.
\v 13 Mabaad ɨɨch anajty nɨcxy ma miich, capx Dios ñecy ma yɨ naymujctac, capxhuäcx etz yajꞌixpɨc yɨ tɨyꞌajt. 
\v 14 Yajtun yɨ huijꞌajt cujcꞌajt huɨdibɨ Dios xymoy je taabɨ je mɨbɨjcpɨdɨjc mɨjtungmɨɨdpɨ xycɨ̈nïxajy, e xyꞌayucmoy xymɨcꞌajtmoy ajcxy mɨɨd je Espíritu Santo ymɨcꞌajt.
\p
\v 15 Naybɨdägɨɨ yajcopɨjc tügꞌócɨy huɨdibɨ tɨ nyajnɨmäy, e niguëxɨ̈gɨpy mayjäyduum co tɨ yajxon mꞌixpɨcy je tɨyꞌajt.
\v 16 Nayguendꞌadɨɨ miich ooy cɨꞌm, nañ jaduꞌn naygüendꞌadɨɨ ma yɨ Dios ytɨyꞌajt, caꞌ mꞌixmach Dios yꞌayuc. Co miich jada mdunɨpy cɨꞌm anajty nayyajnïdzögyii, nañ jaduꞌn anajty myajnïdzooccɨxy huɨdibɨ anajty ajcxy amɨdooꞌijtp miich mꞌayuc.
\c 5
\s Nej jëbɨ huaad mɨgügtɨjc mꞌɨɨhuijɨpy mgapxhuijɨpy
\p
\v 1 Caꞌp huinjɨjp mꞌojɨp mɨjꞌanäctɨjc. Oyꞌamy ɨɨhuijcɨxy capxhuijcɨxy jaduꞌn nej jɨhuɨ̈y mdeedyꞌadyii. Nañ jaduꞌn yɨ yujcyeecytɨjc ɨɨhuijcɨxy capxhuijcɨxy oyꞌamy jaduꞌn nej jɨhuɨ̈y mgɨꞌmjuugy mgɨꞌmmɨgüg.
\v 2 Yɨ mɨjꞌanäctɨjc ajcxy töxyjäybɨ nañ jaduꞌn oyꞌamy mꞌɨɨhuijcɨxy capxhuijcɨxy, jaduꞌn nej jɨhuɨ̈y yɨꞌ ajcxy mdajꞌadyii mdzïtzꞌadyii. Yɨ töxyꞌanäctɨjc ajcxy mutzꞌanäcnɨp mɨɨdꞌijtcɨxy mɨɨd tudägyɨ mjot mhuinmaꞌñ.
\p
\v 3 Huen yɨ mɨbɨjcpɨdɨjc ajcxy yajmɨjꞌadɨpy etz pubedɨpy yɨ töxyjäydɨjc ajcxy coꞌögypɨ, huɨdibɨ janch ni ypɨn ycacaꞌty.
\v 4 Pen jɨm töxyjäydɨjc coꞌögpyɨ huɨdibɨ mɨɨd yꞌung etz yꞌocꞌung, huen ajcxy jaty nej ytaj ñambiid yajmɨjꞌadɨpy, huen oybɨ yajhuimbidɨpy mɨɨd ytaj etz ñambiid. Com yɨ jaduꞌmbɨ huinmaꞌñ Dios yjäygɨdacpy.
\v 5 Je töxyjäy coꞌögypɨ caꞌp pɨn tɨm mɨɨdɨty, yɨꞌ yjɨjpꞌijxyp co Dios ypubedɨɨyb etz Dios ymɨbɨjctzooyb yꞌojadajtpy jabom jabom xɨɨm tzuum.
\v 6 Je coꞌögy töxyjäy huɨdibɨ tzɨnaayb mɨɨd mayñax xondaacɨn, jaduꞌn Dios yajnaxyii jaduꞌn nej jɨhuɨ̈y yꞌögɨty ytɨgoyɨty.
\v 7 Yajnɨmaꞌ ajcxy huen cuydungɨxy Dios ytɨyꞌajt, jɨgɨx caꞌ jɨbɨc ajcxy yajnigapxy.
\v 8 Pen ji pɨn huɨdibɨ yajmɨjꞌajtp Dios, e caꞌ pubedaꞌñ yꞌamɨgüg, pen caꞌ yꞌung ytöxyɨjc yajxon ixy mayꞌaty, caꞌ yɨꞌ cuydunɨ Dios yꞌayuc ytɨyꞌajt. Nïgɨ anajty yjɨbɨcɨty nej tɨ yꞌɨdɨ̈ch caꞌydɨ jaduꞌn nej huɨdibɨ caꞌ ymɨbɨcy.
\p
\v 9-10 Yɨ töxyjäy coꞌögypɨ ajcxy tɨɨbɨ ytugɨꞌpx jɨmɨjtɨ̈y, jëbɨ mgojayɨɨyɨ yxɨɨ ma yɨ lista huɨdibɨ yɨ mɨbɨjcpɨdɨjc ypubedamyb. Yɨ mɨbɨjcpɨdɨjc ypubedamyb pen tüg ñäy anajty mɨɨddzɨnäy, pen oyjot oyhuinmaꞌñ ymɨɨd, pen tɨ yꞌung yajxon yajyeegy, pen tɨ mɨgügtɨjc mɨꞌoyjäyꞌaty, pen tɨ mayꞌajt tuñ mɨɨd Dios yjäy, pen tɨ paꞌayooy huɨdibɨ ayoob huɨdibɨ jottɨgooyb, pen tɨ yajtüyöy yajxon nej ytɨyꞌajtɨty.
\p
\v 11 Yɨ coꞌögy töxyjäy mutzꞌanäcnɨbɨ caꞌ mgojayɨɨyɨpy yxɨɨ ma yɨ lista huɨdibɨ yɨ mɨbɨjcpɨdɨjc ypubedamyb. Pen capxytumb co tunaꞌñ mɨɨd Cristo ycɨxpɨ tijaty tung ma naymujctac, ycajecyɨty co je oybɨ anajty yam yꞌoctumyb, chi nijotꞌajtnɨ ypɨgaanɨ, chi ytung ixmajtznɨp.
\v 12 Co yɨ mɨbɨjcpɨdɨjc ajcxy caꞌ jäygɨdaacɨ yɨꞌ ytung, chi jɨbɨc ñayjɨhuɨ̈yii co caꞌ cuyduñ yꞌayuc nej tɨ ycapxytuñ mɨɨd yɨ Cristo Jesús.
\v 13 Jadügnax caꞌ ytung yajcopɨcy, jëyɨ yhuɨdijtnɨ jayjɨɨn jaydɨjc, e caꞌ yɨꞌyɨty, nañ jaduꞌn ymɨgüg nigapxnɨ niꞌojɨɨyñɨ, capxnɨ mɨydaacnɨ huɨdibɨ caꞌ yꞌoyɨty.
\v 14 Ndzojcpyɨch co yɨ töxyjäy coꞌögy mutz anäcnɨbɨ huen pɨjccɨxy, huen tzɨnaaygɨxy jugyꞌajtcɨxy yajxon, huen ungꞌijxcɨxy anäcꞌijxcɨxy, huen yajxon cuendꞌajtcɨxy yjɨɨn ytɨjc, jɨgɨx caꞌ ajcxy nïhuambedɨɨyb niꞌojɨ̈huɨɨyb huɨdibɨ caꞌ Dios yꞌayuc ixaanɨ mɨdohuaanɨ.
\v 15 Nijëjɨty töxyjäy ajcxy coꞌögypɨ tɨ ixmajtzcɨxnɨ Dios yꞌayuc ytɨyꞌajt, e tɨ ajcxy jɨjptɨgɨyɨ́ɨygɨxnɨ yɨ mujcuꞌ yhuinmaꞌñ.
\p
\v 16 Pen ji mɨbɨjcpɨdɨjc yëydɨjcpɨ o töxyjäybɨ mɨɨdɨty yꞌajuugy yꞌamɨgüg coꞌögypɨ, yɨꞌ jeꞌ paatɨp ixɨpy mayꞌadɨpy je yꞌajuugy yꞌamɨgüg coꞌögypɨ, e caꞌ yajꞌidɨpy ma yɨ mɨbɨjcpɨdɨjc nïgɨxp. E jaduꞌn jeꞌ huaad je mɨbɨjcpɨdɨjc ajcxy pubejtcɨxy coꞌögypɨ caꞌp ti tɨm mɨɨdɨty.
\p
\v 17 Yɨꞌ ajcxy huɨdibɨ nigohuajcꞌajtp yɨ mɨbɨjcpɨdɨjc huɨdibɨ yajxon tumb capxpaady yꞌidɨpy. Nïgɨ ajcxy capxpaady yꞌidɨpy huɨdibɨ Dios yꞌayuc capxhuäcxɨp etz yajꞌixpɨcy.
\v 18 Jaduꞌn yjaybetyɨty ma Dios yꞌayuc: “Caꞌ huaad huajyuub yꞌajen nbɨdaacɨm ma yam ten moody trigo mɨɨy co yajpajcꞌadaꞌñ yɨ trigo tɨɨm.” Nañ jaduꞌn jadügꞌit yjaybetyɨty: “Yɨ huɨdibɨ tumb paatɨp yɨꞌ ymujuꞌñ.” Jaduꞌn jada ayuc yhuimbɨdzɨmy: Yɨꞌ huɨdibɨ yajꞌixpɨjcp Dios yꞌayuc paatɨp huen yajmujuy.
\p
\v 19-20 Caꞌ mɨcꞌamy mdɨydunɨpy pɨn tungmɨɨdpɨ ma yɨ mɨbɨjcpɨdɨjc pen tügpajc huɨdibɨ xɨ̈huɨp. Caꞌ mdɨydunɨpy pɨn tungmɨɨdpɨ ixtɨ coonɨ metz o tugɨɨg testigo yquëxɨ̈gɨpy pen janch tɨ ytundɨgooy. Pen ytundɨgooy yɨ huɨdibɨ nigohuajcꞌajtp, capxpɨdzɨm mayjäydumb jɨgɨx jacjadyii chɨgɨꞌñ pɨ́jccɨxɨpy.
\v 21 Jada tɨyꞌajt miich nyajnɨmaayb, Dios Cristo Jesús etz yɨꞌ yꞌángeles ajcxy huɨdibɨ Dios tɨ huinꞌijxcɨxy ñidɨyꞌajtꞌajtcɨxy co yjanchɨty jada ayuc. Co mbanɨcxɨp jada tɨyꞌajt, caꞌ huinꞌixpety mdɨydunɨp mdzaachytunɨp mɨbɨjcpɨdɨjc.
\v 22 Caꞌ mɨcꞌamy mgɨ̈nïxajɨpy co myajtungbɨgaꞌnɨp jäy huɨdibɨ caꞌ mꞌixyꞌadyii. Ycajecyɨty ypocytunɨpy, e túꞌcɨy mbocycähuaangɨxy miich mɨɨd yɨꞌ. Miich nayguendꞌadɨɨ jɨgɨx caꞌ mbocycähuɨpy.
\p
\v 23 Miich Timoteo, pen pɨjcp mjot, tzoyꞌadɨɨ hueen vino, com jacꞌoy yɨꞌ caꞌydɨ co mꞌügɨpy huädz nɨɨ.
\p
\v 24 Jadyii jäy huɨdibɨ jɨbɨc-huinmaꞌñ mɨɨd yajnejhuɨ̈huɨpy yɨꞌ ajcxy yjɨbɨc-huinmaꞌñ ma anajty caꞌnɨ yajtɨydungɨxy. Jacjadyii jäy caꞌ yajnejhuɨ̈y yjɨbɨc-huinmaꞌñ ixtɨ coonɨ yajtɨydungɨxy.
\v 25 Nañ jaduꞌn jadyii jäy yajnejhuɨ̈huɨp co oyjäyꞌajtɨn anajty tɨ tungɨxy, jacjadyii jäy caꞌ mɨcꞌamy yajnejhuɨ̈huɨpy co oyjäyꞌajtɨn tɨ tungɨxy. Yɨ oyjäyꞌajtɨn caꞌp yɨꞌ yhuɨꞌmɨpy coyüch.
\c 6
\p
\v 1 Tügꞌócɨy tumbɨdɨjc huɨdibɨ ajcxy mɨbɨjcp huɨdibɨ ajcxy ijtp cojuyɨ̈y codoogɨ̈y, huen yajxon yajmɨjꞌajtcɨxy yhuindzɨn. Pen caꞌ jaduꞌn tungɨxy, chi je huingjäydɨjc jɨbɨc nigapxaanɨ niꞌojɨ̈huaanɨ yɨ Dios etz yɨꞌ ytɨyꞌajt.
\v 2 Pen yɨ tumbɨ mɨɨd yhuindzɨn huɨdibɨ yajmɨjꞌajtp Dios, caꞌ yꞌoyɨty co nɨxïgɨpy yajxïgɨpy yhuindzɨn. Huen ajcxy nïgɨ yajxon yajmɨjꞌajtcɨxy, com hueꞌ jeꞌ Dios yjäy. Yɨ huɨdibɨ nihuindzɨnꞌajt ypadamyb je oybɨ huɨdibɨ jeꞌ ytumbɨ ytungꞌajtpy. Jada tɨyꞌajt yajꞌixpɨc etz capxhuäcx.
\s Jotcujcꞌajtɨn nbaatɨm ma Dios ytɨyꞌajt
\p
\v 3-4 Pen ji pɨn huingbɨ tɨyꞌajt yajꞌixpɨcy huɨdibɨ caꞌ ñaybadyii mɨɨd je Huindzɨn Jesucristo yꞌayuc ytɨyꞌajt, e ni ycanaybadyii mɨɨd je tɨyꞌajt huɨdibɨ ɨɨch ajt nmɨjpɨdaacɨm, hueꞌ jada nej tüg jäy huɨdibɨ amɨj agɨxɨp huɨdibɨ caꞌ ni ti nejhuɨ̈y. Chachnijotꞌaty tzip capx, e jaduꞌn yhuimbɨdzɨmy jada tzip capxy co mɨgüg caꞌ yajꞌoyꞌixy, chi ñaymɨdziptzoongɨxy nïhuambejtcɨxy etz jɨbɨc nigapxcɨxy ymɨgügtɨjc.
\v 5 Yɨ jaduꞌmbɨ jäy huɨdibɨ caꞌ mɨjpɨdägy Dios ytɨyꞌajt cojpy ymacxpy tzip capxy huɨdibɨ caꞌ ycɨxy ytɨgoy. Yhuinmaꞌñydɨgoy ajcxy, caꞌ huinjɨhuɨɨygɨxy tɨyꞌajt. Hueꞌ ajcxy yajꞌixpɨcy Dios yꞌayuc mɨɨd co ycomeeñꞌadaangɨxy. Puhuäctuut miich jaduꞌmbɨ jäy ajcxy.
\v 6 Co Dios yꞌayuc ytɨyꞌajt nguydunɨm, huinꞌit jotcujc ndzɨnaayɨm, etz nbaatɨm oyꞌajt mɨjpɨ.
\v 7 Ni ti ɨɨch ajt ya naaxhuiñ caꞌ tɨ nmɨmiinɨm co nmaꞌxungꞌajtɨm, nañ ni ti ngamɨnɨcxɨm co nꞌoꞌcɨm.
\v 8 Pen nmɨɨdꞌajtɨm caayɨn uucɨn huit tucxy, jëbɨ njotcujcꞌajtɨm mɨɨd yɨꞌyɨ.
\v 9 Jeꞌ ajcxy huɨdibɨ ooy nijotꞌaty comeeñꞌadɨɨ, hueꞌ jeꞌ ajcxy jɨbɨc tumb ajcxy ycähuaꞌñ. Jeꞌ ajcxy chachtunamyb huɨdibɨ caꞌ oyhuinmaꞌñɨty, huɨdibɨ nayjotmayduunɨp. Ayoꞌn ajcxy ypadamyb, tɨgoyamb ajcxy yꞌalma.
\v 10 Yɨ meeñyꞌadzojcɨn yɨꞌ jeꞌ yɨ jɨbɨc-huinmaꞌñ copꞌajtɨp. Mɨɨd yɨ meeñyꞌadzojcɨn may yɨ jäy huɨdibɨ jäydɨgoy Dios ytɨyꞌajt. Hueꞌ jeꞌ ajcxy nayjotmayduunɨp.
\s Timoteo, tɨydudägy mdzɨnähuɨpy miich
\p
\v 11 Timoteo, Dios yjäy, cöguëg yɨ jäy huɨdibɨ mɨɨd yɨ jaduꞌmbɨ jɨbɨc-huinmaꞌñ. Tɨydudägy mdzɨnähuɨpy, cuydunɨ Dios yꞌayuc ycötujcɨn, mɨjpɨdäg Dios yꞌayuc ytɨyꞌajt, tun oyjäyꞌajtɨn, mɨhuindɨnaꞌ yɨ tung, mɨɨdꞌat mjot mhuinmaꞌñ yung naxy.
\v 12 Mɨc mjot mhuinmaꞌñ pɨdäg ma Dios ytɨyꞌajt, caꞌ mjotmetzcɨ̈y. Tun jaduꞌn nej jäy huɨdibɨ nayboyɨ̈cquípxɨgɨxy naymɨcꞌíjxɨgɨxy. Nijotꞌat cɨxyjot huinɨjot yɨ jugyꞌajtɨn huɨdibɨ mꞌalma ypadamyb ma Dios. Dios xyajnïbɨcy jɨgɨx mgapxhuäcxɨp jada tɨyꞌajt. Tɨ miich mgapxypɨdzɨmy nej mmɨbɨcy mayjäyjoty.
\v 13 Dios je huɨdibɨ yajjugyꞌajttaayb tügꞌócɨy, yɨꞌ nidɨyꞌajtꞌaty co ooy ycopɨcyɨty jada ayuc jaduꞌn nej cham nyajnɨmaayb. Nañ jaduꞌn je Cristo Jesús je huɨdibɨ tɨyꞌajt capxypɨdzɨm ma Poncio Pilato ñidɨyꞌajtꞌajt co oy ycopɨcyɨty jada ayuc jaduꞌn nej cham nyajnɨmaayb.
\v 14 Copɨcy cuydun jada ayuc aneꞌmɨn. Huädz mguydundähuɨpy, huädz myajꞌixpɨgɨpy je tɨyꞌajt jɨgɨx caꞌ pɨn jɨbɨc niꞌojɨ̈huɨpy Dios ytɨyꞌajt. Jaduꞌn mdunɨpy ixtɨ coonɨ ɨɨch ajt nHuindzɨn Cristo Jesús ñayguëxɨ̈gɨɨyb ya naaxhuiñ jadügꞌoc.
\v 15 Dios yajniguëxɨ̈gamyb Cristo Jesús mɨna anajty je tiempo yhuaadꞌaty. Dios jeꞌ je mɨjꞌaneꞌmbɨ, je mɨjpɨ rey, etz je mɨjpɨ huindzɨn. Yɨꞌ jeꞌ je Huindzɨn Dios huɨdibɨ aneꞌmdaayb.
\v 16 Yɨꞌ jeꞌ tügpajc je jugyꞌajt cop ymɨɨd. Yɨꞌ ijtp ma je tɨɨcxɨn je jajɨn huɨdibɨ caꞌ pɨn huaad ninej mɨhuingoñ. Janch ni tüg jäy tɨ caꞌ ixy, e ni caꞌ ixaꞌñ. Yɨꞌ jeꞌ cömayꞌidɨpy etz yɨꞌ aneꞌmdaayb tügꞌócɨy. Amén. Jaduꞌn jada.
\p
\v 17 Yɨ comeeñydɨjc huɨdibɨ jadachambɨ tiempo tzɨnaayb jugyꞌajt, nɨmaꞌ miich yɨꞌ ajcxy co caꞌ huaad amɨj agɨx ñayjɨhuɨ́ɨyɨgɨxy, ni caꞌ nïgɨ adzojccɨxy anaxy yɨ meeñ huɨdibɨ jaduꞌñyɨ tɨgoydaayb. Huen ajcxy mɨjpɨdägy yɨ Dios huɨdibɨ xymooyɨm tügꞌócɨy mɨjmay mɨjcajee jɨgɨx njotcujcꞌajtɨm.
\v 18 Huen yɨ comeeñydɨjc oybɨ tungɨxy, jɨgɨx ajcxy cömay ypɨdzɨmɨpy co oyjäyꞌajtɨn tungɨxy. Huen ajcxy paꞌayoogɨxy ymɨgügtɨjc huɨdibɨ caꞌ ti mɨɨdɨty mɨɨd oyjot oyhuinmaꞌñ.
\v 19 Co ajcxy jaduꞌn tungɨxpy, chi padaangɨxy je oybɨ huɨdibɨ miimb gɨdaacp. Ypadamyb ajcxy je jugyꞌajtɨn huinɨxɨɨbɨ.
\s Timoteo, mɨjpɨdäg jada tɨyꞌajt
\p
\v 20 Timoteo, mɨjpɨdäg jada ixpɨjcɨn huɨdibɨ tɨ myajnïbɨcꞌaty. Caꞌ mmɨjpɨdägɨpy yɨ nɨgoobɨ yꞌayucɨty, yɨ huɨdibɨ caꞌ Dios huindzɨgɨ̈y. Caꞌ mmɨjpɨdägɨpy yɨ jäy huɨdibɨ ajcxy naybɨdaacɨp jaduꞌn nej jɨhuɨ̈y ooy ycohuinmaꞌñɨty, e caꞌ yjanchɨty, huɨdibɨ mɨdzipꞌajtp Dios ytɨyꞌajt.
\v 21 Jaduꞌn nej nijeꞌ ajcxy panɨcxcɨxy jada caꞌpɨ ytɨyꞌajtɨty, e jaduꞌñɨ ñitɨgoy.
\p 
Huen Dios je oyꞌajtɨn tuñ mɨɨd miich. Amén. Jaduꞌn jada.