\id 2TI
\h 2 TIMOTEO
\toc1 2 TIMOTEO
\mt1 2 TIMOTEO
\mt2 Yɨ Mɨmetzpɨ Necy Huɨdibɨ San Pablo Yajniguejx Timoteo
\c 1
\p
\v 1 Ɨɨch Pablo, Dios tɨ xyajnïbɨcyɨch huen Cristo Jesús xyꞌapóstolꞌadyiijɨch. Yɨꞌ tɨ xyquexyɨch co yɨꞌ yꞌayuc ngapxhuäcxɨbɨch. Dios tɨ yajhuinhuanɨɨygɨxy yɨ jäy co pɨn mɨjpɨdägɨpy Cristo Jesús yajjugypɨgɨpy co anajty tɨ yꞌögy. 
\v 2 Ooy ɨɨch miich ndzocy njɨhuɨ̈y nej ngɨꞌmꞌungꞌadyii. Dios Teedy etz ɨɨch ajt nHuindzɨn Cristo Jesús huen tuñ oyꞌajt mayꞌajt mɨɨd miich, huen xypaꞌayooy, huen xyyajjotcugɨ̈y.
\s Pablo jotcujc co Timoteo tɨ mɨjpɨdägy Dios yꞌayuc
\p
\v 3 Nyajnajxypɨch Dioscojuyip ma Dios co miich tɨ mmɨjpɨdäg yɨꞌ yꞌayuc. Nmɨbɨjctzooybɨch Dios mɨɨd miich ycɨxpɨ jabom jabom xɨɨm tzuum. Janch cɨxyjot huinɨjot nyajmɨjꞌatyɨch Dios, paady ooy oy nayjɨhuɨ̈yiijɨch. Nañ jaduꞌn nꞌap ndeedy jecyꞌajty janch cɨxyjot janch huinɨjot yajmɨjꞌajty Dios.
\v 4 Ooy miich nɨcxy njacoꞌixɨ̈huaꞌñ jɨgɨx njotcugɨ̈huɨbɨch. Ooy njajäymejtzcoodyiijɨch nej miich mjɨɨy myaax mɨɨd ɨɨch ycɨxpɨ je taabɨ jɨm ndzooñɨch.
\v 5 Njäymejtzpɨch jaduꞌn nej miich mmɨjpɨdägy yɨ Dios janch cɨxyjot huinɨjot co xymɨɨdꞌityɨch. Nañ njäymejtzpɨch co jayɨjp mnambiid Loida etz yɨ mdaj Eunice mɨjpɨdacy Dios janch cɨxyjot huinɨjot. Mɨnambɨch co chambaad miich mmɨjpɨdägy Dios janch cɨxyjot huinɨjot.
\p
\v 6 Jada nyajjäymejtzcootpy: Nijotꞌat yɨ mɨcꞌajtɨn huɨdibɨ Dios tɨ xymöy, je taab anajty Dios ytung mnïmadzaanɨ co ngɨꞌnïxajy, jɨgɨx Dios ytung jacyajxon mduunɨpy.
\v 7 Dios caꞌ xyajhuindzɨ̈gyꞌaty, hueꞌ xyajjotmɨcꞌajtp. Mɨɨd Dios ymɨcꞌajt jëb mnaychójcɨgɨxy mnayjɨhuɨ́ɨyɨgɨxy, jëb oyjot oyhuinmaꞌñ myajtuungɨxy.
\v 8 Paady caꞌ mmɨdzöydunɨɨyb ɨɨch ajt nHuindzɨn Cristo Jesús ytɨyꞌajt. E nañ caꞌ xymɨdzöydunɨɨybɨch co tɨ nbujxtɨjc ɨñäyɨch mɨɨd ɨɨch ajt nHuindzɨn Cristo Jesús ytɨyꞌajt ycɨxpɨ. Mecxtuc yɨ ayoꞌn yɨ tzaachypɨ huɨdibɨ myajnajxpy co mgapxhuäcxy yɨ Cristo Jesús ytɨyꞌajt. Dios xyajjotmɨcpɨgɨpy.
\v 9 Canan paady tɨ xyajnïdzoocɨm nꞌalma co ajt ndzachꞌoyjäyɨty. Com Dios jaduꞌn tɨ yajnihuinmayɨ̈y tunaꞌñ oyꞌajtɨn mɨɨd ɨɨch ajt ycɨxpɨ co quejxy Cristo Jesús ya naaxhuiñ. Dios jayɨjp tɨ huinmay co quexaꞌñ je Cristo Jesús caꞌnɨ anajty pɨn ya naaxhuiñ.
\v 10 Dios tɨ cham jada oyꞌajtɨn yajniguëxɨ̈gy co yajꞌijxy ya naaxhuiñ ɨɨch ajt nnihuambɨ nyajnïdzoocpɨ, je Cristo Jesús, huɨdibɨ tɨ yajcödɨgoy yɨ oꞌcɨn. E tɨ yajnejhuɨ̈y yɨ jäy mɨɨd yɨꞌ ytɨyꞌajt nej jëb huaad ndzɨnaayɨm huinɨxɨɨ ma yɨ Dios yꞌit oybɨ.
\p
\v 11 Dios tɨ xyajnïbɨcyɨch co yꞌayuc ngapxhuäcxɨch, etz xyꞌapóstolꞌadyiijɨch jɨgɨx nyajꞌixpɨgɨpyɨch yɨ huɨdibɨ ajcxy caꞌ yjudíojäyɨty.
\v 12 Paady ycɨxpɨ tzaachypɨ nbaadyɨch. Per caꞌ ndzoꞌyduñɨch, com ɨɨch nejhuɨɨyb pɨn nmɨjpɨdacpyɨch, nejhuɨɨybɨch co yɨꞌ ymɨɨd cötujcɨn etz mɨcꞌajt jëb xycuendꞌadɨpyɨch, ixtɨ huinꞌit xɨɨ mɨnaa Cristo Jesús tɨydunaꞌñ yɨ naaxhuiñyjäy.
\p
\v 13 Mɨjpɨdäg je tɨyꞌajt tɨydudägypɨ huɨdibɨ tɨ nyajꞌixpɨcy, jada jeꞌ tɨyꞌajt ijxpejt nej jëb mbanɨcxy mbayöy. Yajmɨjꞌat Cristo Jesús, caꞌ mꞌixmajtzɨ yɨꞌ ytɨyꞌajt, mdunɨpy oyjäyꞌajtɨn jaduꞌn nej yɨꞌ tzocy. 
\v 14 Mɨhuindɨnaꞌ yɨ oybɨ ayuc tɨyꞌajt huɨdibɨ tɨ nyajꞌixpɨcy. Huen je Espíritu Santo huɨdibɨ miich mɨɨd jotjoty huinmaꞌñyjoty xypubedɨpy xypudɨgɨ̈huɨpy.
\p
\v 15 Tɨ jadaꞌ mnejhuɨ̈y co tügꞌócɨy yɨ mɨbɨjcpɨdɨjc jɨm Asia naaxjot tɨ ixmach je tɨyꞌajt jaduꞌn nej tɨ nyajꞌixpɨcyɨch. Yɨ Figelo etz Hermógenes etz jacjadyii jaduꞌn ajcxy tɨ yꞌadɨɨtzcɨxy.
\v 16 Yɨ Huindzɨn Jesús yɨꞌ paꞌayoohuɨpy yɨ Onesífero yjuugy ymɨgüg, com ooy ɨɨch mɨj xypaꞌayooyɨch etz xypubejtyɨch, caꞌ xymɨdzoꞌydunyiijɨch co nmachꞌɨñäyɨch.
\v 17 Co Onesífero oyjaꞌty ya Roma, chi mɨctägy xyꞌixtaayɨch coonɨ xypatyɨch.
\v 18 Huen yɨ Huindzɨn Dios ypaꞌayoohuɨɨgy Onesífero co anajty Cristo Jesús tɨydunaꞌñ naaxhuiñyjäy. Huädz miich mnejhuɨ̈y nej yɨ Onesífero xypubejtyɨch jɨm Efeso.
\c 2
\s Huen Cristo Jesús mayꞌajt tunɨpy mɨɨd  miich Timoteo
\p
\v 1 Miich Timoteo, jaduꞌn njɨhuɨ̈y nej ngɨꞌmꞌung ngɨꞌmꞌanäg. Huen Cristo Jesús mayꞌajt tunɨpy ma miich, huen xyajjotmɨcpɨgɨpy. 
\v 2 Miich tɨ mmɨdoy mayꞌayuc tɨyꞌajt huɨdibɨ tɨ nyajꞌixpɨcy. Jada ayuc mayjäy mɨdoy e jëb ajcxy nidɨyꞌajtꞌajtcɨxy. Jada tɨyꞌajt miich mgapxnaxɨpy mgapxhuäcxɨpy ma jacjadyii yëydɨjctɨjc huɨdibɨ oyhuinmaꞌñ ymɨɨd, jɨgɨx yɨꞌ ajcxy nañ jaduꞌn capxnaxɨpy ma jacjadyii jäy.
\p
\v 3 Miich mɨmadäg yɨ ayoꞌn yɨ tzaachypɨ huɨdibɨ mmɨnajxyp myajnajxyp, jaduꞌn nej tüg Cristo Jesús ysoldado huɨdibɨ oy tumb.
\v 4 Yɨ soldado huɨdibɨ soldadꞌajtp caꞌ huaad huingbɨ tung nɨcxy tuñ, jɨgɨx jeꞌ yjotcujcꞌadɨpy pɨn anajty tɨ ypɨdägyii soldado, nañ jaduꞌn miich adügjɨjp Dios ytung mdunɨpy.
\v 5 Pɨn jäy nayboyɨ̈cquipxɨp caꞌ yɨꞌ premio padaꞌñ, oy tɨ yjamadägy, pen caꞌ cuyduñ yɨ tɨyꞌajt. Nañ tzocy co miich mguydunɨpy yɨ tɨyꞌajt.
\v 6 Je jäy huɨdibɨ tumb ma ycam ytuꞌ jeꞌ jayɨjp huɨdib huen yajpɨdɨ̈gy yɨ ujtztɨɨm huɨdibɨ tɨ yꞌity. Nañ jaduꞌn miich co Dios ytung mduunɨp mbaadɨp yɨ oyꞌajtɨn.
\v 7 Yajxon mhuinmayɨpy huɨdibɨ nyajnɨmaayb, yɨ Huindzɨn Cristo Jesús xyajnejhuɨydähuɨpy tügꞌócɨy jeꞌ ytɨyꞌajt.
\p
\v 8 Jäymetz jaduꞌn nej Jesucristo, yɨ David yꞌap yꞌoc, yꞌoꞌcy, chi Dios yajjugypɨjcy jadügtecy. Jada jeꞌ je ayuc tɨyꞌajt oybɨ huɨdibɨ nnajtzcapxɨɨybɨch.
\v 9 Mɨɨd yɨꞌ ycɨxpɨ nꞌayooyɨch etz tzaachypɨ nyajnajxyɨch. Nbujxtɨjc ɨñäyɨch jaduꞌn nej jɨhuɨ̈y njɨbɨcjäyɨch. Oy njapujxtɨjc ɨñäyɨch caꞌ ñejɨty, Dios yꞌayuc caꞌ yɨꞌ mach yꞌity, yajcapxhuäcxꞌadɨɨtzp nïgɨ.
\v 10 Paady ɨɨch tügꞌócɨy jada tzaachypɨ ngöbɨjctäy nmecxtujctäy, jɨgɨx jëbɨ je jäy ajcxy huɨdibɨ Dios tɨ yhuinꞌíjxɨgɨxy chɨnähuɨpy ajcxy huinɨxɨɨ ma yɨꞌ yꞌit oybɨ, Cristo Jesús yajnïdzögɨɨb yɨꞌ ajcxy yꞌalma.
\p
\v 11 Tɨyꞌajt jada ayuc:
\q Pen tɨ ɨɨch ajt nꞌoꞌcɨm mɨɨd Cristo ycɨxpɨ, yɨꞌ mɨɨd ndzɨnaayɨm tzajpjoty.
\q 
\v 12 Pen nyajnajxɨm tzaachypɨ ayoꞌn mɨɨd Jesús ycɨxpɨ, nañ quipxyɨ mɨɨd yɨꞌ nꞌaneꞌmaanɨm. Pen caꞌ ya Jesús yꞌayuc ngöbɨjcɨm, nañ caꞌ jiib tzajpjoty xycöbɨgaanɨm.
\q 
\v 13 Oy ɨɨch ajt nyajmɨjꞌajtɨm Cristo Jesús o ngayajmɨjꞌajtɨm, Dios ycuydundaayb yɨꞌ yꞌayuc. Com caꞌ huaad ycɨꞌm ayuc yajxïgy. 
\s Naybɨdägɨɨ cɨxyjot huinɨjot ma Dios ytɨyꞌajt
\p
\v 14 Yajjäymejtzcood yɨ mɨbɨjcpɨdɨjc jada tɨyꞌajt huɨdibɨ tɨ nyajnɨmäy. Nɨmaꞌ je jäy ajcxy co je Huindzɨn Dios caꞌ oyꞌixy tzip capxy ayuc huɨdibɨ caꞌ choobaady. Mɨɨd yɨ tzip capxy caꞌ ni ti oybɨ nbaatɨm, jëyɨ yajhuinmaꞌñydɨgoy huɨdibɨ amɨdooꞌijtp.
\v 15 Naybɨdägɨɨ cɨxyjot huinɨjot ma Dios yꞌayuc ytɨyꞌajt, nej jëb huaad cömay mbɨdzɨmy ma Dios, jaduꞌn nej Dios ytumbɨ huɨdibɨ caꞌ ni ti mɨdzöydunyii, huɨdibɨ Dios yꞌayuc ytɨyꞌajt yajxon yajhuinjɨhuɨydaayb ymɨgügtɨjc.
\v 16 Caꞌ mgöbɨgɨpy yɨ ayuc huɨdibɨ caꞌ ytɨyꞌajtɨty, yɨ nɨgoob ayuc huɨdibɨ yajtüyöyp mayjäy ajcxy, yɨ tɨyꞌajt huɨdibɨ caꞌ Dios ytɨyꞌajtꞌadyii.
\v 17 Yɨ huɨdibɨ ajcxy yꞌayuc caꞌ ytɨyꞌajtɨty yajhuinmaꞌñydɨgooyb ymɨgügtɨjc. Yɨꞌ ajcxy mɨɨd jɨbɨc ayuc yajhuinmaꞌñydɨgoy yɨ mayjäy ajcxy, jaduꞌn nej pützpaꞌm huɨdibɨ ninïcx jɨcxp oñydägy. Jaduꞌn nej tɨ yjaty mɨɨd Hemeneo etz Fileto co ajcxy yhuinmaꞌñydɨgooy.
\v 18 Yɨꞌ ajcxy anajty Dios yꞌayuc cuyduunɨ, chi oyhuinmaꞌñydɨgooyñɨ. Chi ajcxy ymɨnáangɨxnɨ co je tɨɨbɨ yꞌöccɨxnɨ, tɨ ajcxy jeꞌ yjugypɨcy, e jaduꞌn ajcxy yajhuinmaꞌñydɨgoy nijëjɨty jäy.
\v 19 Huɨdibɨ Dios tɨ cojy tɨ macxy, nimɨnaxɨɨ ycacɨxy ycatɨgooy, com yɨꞌ ytɨyꞌajt ijtp yɨꞌ huinɨxɨɨ. Tɨyꞌajt jada co yɨ Huindzɨn Dios yꞌijxcajpy pɨnjaty yjäyꞌajtpy. Tügꞌócɨy pɨn mɨjpɨdacp yɨ nHuindzɨn Jesucristo yꞌayuc, huen jɨjphuäctüdy yɨ jɨbɨc-huinmaꞌñ yɨ jɨbɨc-tung.
\p
\v 20 Ma tüg mɨj comeeñydɨjc jɨm oorɨ taasɨ, oorɨ texy, etz oorɨ cuchara, etz tijaty oyjatypɨ. Nañ ymɨɨd jɨm naax taasɨ, naax texy, quipy cuchara etz jactijaty caꞌp yꞌoyjatyɨty. Yajtuñ yɨ oorɨ taasɨ etz oorɨ texy ma tügɨ caayɨn uucɨn oybɨ. Yajtuñ yɨ naax taasɨ etz naax texy oyñimɨnaa.
\v 21 Jaduꞌn yɨꞌ pɨn jäy jɨbɨc-huinmaꞌñ ixmajtzp etz tuñ oyhuinmaꞌñ, jaduꞌn yɨꞌ nej oorɨ taasɨ oorɨ texy. Cömayꞌidɨp yɨꞌ ma yɨ Dios. Huädz yɨꞌ yjot yhuinmaꞌñ, jëbɨ nHuindzɨnꞌajtɨm Dios yajtunɨpy ma tügꞌócɨy oybɨ tung.
\p
\v 22 Ixmatz miich yɨ yujcyeecꞌanäg ajcxy yjɨbɨc-huinmaꞌñ. Tudägy mdzɨnähuɨpy. Yajmɨjꞌajtcɨx Dios cɨxyjot huinɨjot. Mdunɨpy oyjäyꞌajtɨn. Ixmatz yɨ tzip. Mꞌojadadɨpy yɨ Huindzɨn Dios mɨɨd oyjot oyhuinmaꞌñ.
\v 23 Ixmatz yɨ nɨgoobɨꞌayucɨty yɨ locɨ huinmaꞌñ, caꞌ yɨꞌ yꞌoyɨty. Mnejhuɨɨyb co yɨ nɨgoobɨꞌayuucɨty tzipcojp capxycojp yɨꞌ.
\v 24 Yɨ Huindzɨn Dios caꞌ yɨꞌ tzocy co yɨꞌ ytumbɨdɨjc nɨcxy tzip capxy yajtzondägy. Hueꞌ janchtɨy tzocy huen jäyꞌajtcɨxy yung naxy mɨɨd tügꞌócɨy jäy etz peꞌcy yꞌidɨpy mɨɨd yajꞌixpɨjcɨn. Nañ chojcpy co mɨmecxtugɨpy ymɨgügtɨjc ajcxy.
\v 25 Miich mɨɨd yung naxy mjot mhuinmaꞌñ capxhuij je jäy huɨdibɨ mɨdzipꞌajtp je tɨyꞌajt. Ycadimjecyɨty co Dios ytɨyꞌajt nijothuimbíjtcɨxɨpy, e nejhuɨ́ɨygɨxyɨpy je tɨyꞌajt oybɨ.
\v 26 Co anajty ajcxy tɨ ymejtzcɨxy yhuinmaꞌñ, chi ajcxy ycöguëgɨɨyb je mujcuꞌ huɨdibɨ ajcxy ycapxymɨdooyb ma anajty ymɨɨdꞌajtcɨxy cɨ̈joty etz ycapxymɨdoogɨxpy yɨ Dios.
\c 3
\s Jäy jotmay mɨɨd yꞌidaangɨxy
\p
\v 1 Miich mnejhuɨɨyb ma je xɨɨ tiempo anajty ycɨxaanɨ jadaanɨp ayoꞌn, je jäy ajcxy jotmay mɨɨd yꞌidaangɨxy.
\v 2 Ji adɨpy jäy huɨdibɨ adzojcp, huɨdibɨ amɨj agɨx nayjɨhuɨɨyɨp, jäy huɨdibɨ ameeñ, jäy huɨdibɨ cɨꞌm naygömayɨɨb, huɨdibɨ oyñinej capxtɨgooyb ma Dios, jäy huɨdibɨ caꞌ capxymɨdohuaꞌñ ytaj yteedy, jäy huɨdibɨ ni ti caꞌ jäygɨdägaꞌñ, jäy huɨdibɨ caꞌ yajmayꞌaty Dios.
\v 3 Co anajty tiempo ycɨxaanɨ, ji adɨpy jäy huɨdibɨ caꞌ ymɨgüg ixaꞌñ tzogaꞌñ, jäy huɨdibɨ caꞌ paꞌayoꞌn mɨɨdɨty, jäy huɨdibɨ ymɨgüg nïhuambejtp, jäy huɨdibɨ oy ahuaꞌnɨty, jäy huɨdibɨ mɨdzipꞌajtp yɨ oybɨ.
\v 4 Ji adɨpy jäy huɨdibɨ ymɨgüg agojɨɨx mɨdundɨgooyb, jäy huɨdibɨ ytunamyb ti ytunamyb, caꞌ ajcxy tuñ cuendɨ capxhuijɨn, jäy huɨdibɨ amɨj agɨx nayjɨhuɨɨyɨp, huɨdibɨ tzachnijotꞌajtcɨxy mayñaxy xondaacɨn, e caꞌ cuydunaꞌñ Dios ytɨyꞌajt.
\v 5 Ji adɨpy jäy huɨdibɨ naybɨdáacɨgɨxp jaduꞌn nej jɨhuɨ̈y ajcxy mɨjpɨdaaccɨxp Dios ytɨyꞌajt e caꞌ yjanchɨty. Chi ma ajcxy chɨnaayɨn ma ajcxy yjugyꞌajtɨn ñiguëxɨ̈cp co caꞌ tɨyꞌajt yajtuñ. Cöguëg yɨ jaduꞌmbɨ jäy.
\v 6 Ma yɨ jaduꞌmbɨ jäy ajcxy jɨm chooñɨty huɨdibɨ coyöyɨɨb conaxɨɨb ma je töxyjäy huɨdibɨ caꞌ ytudägɨty, huɨdibɨ oy ypocyjäyɨty, huɨdibɨ jɨbɨc-huinmaꞌñ nijotꞌajtp.
\v 7 Yɨ jaduꞌmbɨ töxyjäy ajcxy panɨcxp payöyp canaagnax huinmaꞌñ, e nimɨnaa ajcxy cahuinjɨhuɨ̈huɨpy yɨ Dios ytɨyꞌajt.
\v 8 Jaduꞌn nej Janes etz Jambres mɨdziptzooñ je Moisés, yɨ jaduꞌmbɨ yëydɨjc ajcxy nañ jaduꞌn mɨdziptzoonɨp yɨ tɨyꞌajt. Jɨbɨcjot jɨbɨc-huinmaꞌñ ajcxy ymɨɨd. Ñaybɨdägɨɨb ajcxy jaduꞌn nej jɨhuɨ̈y cuydungɨxy yɨ tɨyꞌajt, e caꞌ cuydungɨxy.
\v 9 Caꞌ ajcxy mɨmadägɨpy nej huinꞌɨɨnɨpy Dios yjäy. Niguëxɨ̈gɨpy yɨꞌ ajcxy yjɨbɨc-huinmaꞌñ jaduꞌn nej Janes etz Jambres yjajty. 
\s Tügꞌócɨy Dios ñecy Dios cɨꞌm tɨ huinmaꞌñymöy je huɨdibɨ jaay
\p
\v 10 Miich tɨ mhuinjɨhuɨydäy nej ɨɨch tɨ nyajꞌixpɨcy Dios  yꞌayuc nej njäyꞌatyɨch, nej nhuinmaꞌñ nduuñɨch, nej Dios nmɨjpɨdägyɨch cɨxyjot huinɨjot, nej ɨɨch jäy nmɨmecxtucyɨch, nej oyjäyꞌajtɨn nduuñɨch, nej tɨ nmɨhuindɨnäyɨch Dios ytung.
\v 11 Miich mꞌijxyp mnejhuɨɨyb nej tɨ nyajꞌixhuɨdityɨch nej tɨ nyajpahuɨdityɨch, miich mnejhuɨɨyb je ayoꞌn je tzaachypɨ huɨdibɨ tɨ nmɨnaxyɨch tɨ nyajnaxyɨch jɨm Antioquía, jɨm Iconio, etz jɨm Listra. Jaduꞌñyɨbaad yɨ ayoꞌn tɨɨbɨ nbaadyɨch Dios tɨ xyñihuaꞌñ tɨ xycohuaꞌñɨch.
\v 12 Huen pɨn huɨdibɨ yajxon cuydumb Dios ycapxy yꞌayuc jaduꞌn nej Cristo Jesús tɨ xyyajꞌixpɨcyɨch, nañ tɨm jaduꞌn ajcxy yajꞌixhuɨdidɨpy yajpahuɨdidɨpy.
\v 13 Yɨ jɨbɨc jäydɨjc huɨdibɨ naybɨdáacɨgɨxp jaduꞌn nej jɨhuɨ̈y cuydungɨxy yɨ tɨyꞌajt, e caꞌ yjanchɨty, nïgɨ jɨbɨc yꞌɨdɨ̈dzaangɨxy. Huinꞌɨɨnaangɨxy ymɨgügtɨjc ajcxy, e ñayhuinꞌɨɨnáanɨgɨxy cɨꞌm.
\p
\v 14 Miich Timoteo, ixmatz yɨ jaduꞌmbɨ jäy ajcxy etz panɨcx yɨ tɨɨbɨ mꞌixpɨcy, yɨ tɨɨbɨ myajnïbɨcꞌaty. Mnejhuɨɨyb co ɨɨch tɨ nyajꞌixpɨcyɨch je tɨyꞌajt.
\v 15 Com miich piꞌcnɨ mutznɨ tɨ mjaty tɨ mnejhuɨ̈y yɨ Dios ñecy. Jada necy tɨ xyajnejhuɨ̈y nej huaad mɨjpɨdägy yɨ Cristo Jesús, e nïgɨ jaduꞌn jëb huaad yɨ mꞌalma nïdzoocɨn paady.
\v 16 Tügꞌócɨy Dios ñecy Dios cɨꞌm tɨ huinmaꞌñymöy je huɨdibɨ jaay. Paady jëbɨ nyajtuunɨm co jäy nyajniꞌixɨɨyɨm nyajꞌixpɨjcɨm. Jëb nyajtuunɨm co njɨjpcogapxɨɨyɨm huɨdibɨ caꞌ ytɨyꞌajtɨty, etz co nꞌɨɨhuijɨm ngapxhuijɨm. Jëb nyajtuunɨm co nyajꞌixpɨjcɨm nej jëb huaad tɨyꞌajt nbanɨcxɨm,
\v 17 jɨgɨx yɨ jäy ajcxy huɨdibɨ mɨjpɨdacp Dios ytɨyꞌajt, jëb niꞌixɨꞌ yꞌidɨpy, tunɨpy tügꞌócɨy oybɨ huinmaꞌñ oybɨ tung.
\c 4
\p
\v 1 Ooy ycopɨcyɨty mɨdoꞌmbɨc jada ayuc jaduꞌn nej cham ɨɨch miich nijayɨ̈y. Dios etz ɨɨch ajt nHuindzɨn Cristo Jesús tɨyꞌajt yejc co copɨcy jada ayuc. Cristo Jesús ytɨydunamyb yɨ jäy ajcxy juugypɨ etz yɨ jäy ajcxy tɨɨbɨ yꞌoꞌccɨxy, e chi yajjugypɨgɨpy jadügꞌoc ajcxy. Yɨꞌ yajtɨydunamb ajcxy co anajty ymiñ ya naaxhuiñ pɨdägaꞌñ yꞌaneꞌmɨn. 
\v 2 Nyajnïbɨjcpy mgapxhuäcxɨp Dios yꞌayuc ytɨyꞌajt hueñytimymɨnaajɨty, oy pɨn mɨdoohuaꞌñ o camɨdoohuaꞌñ. Copɨcy co mjɨjpcogapxɨ̈huɨpy huɨdibɨ caꞌ ytɨyꞌajtɨty, capxhuij pɨn yinjaty huenjaty camadacp, ɨɨhuij capxhuij yɨ jäy ajcxy mɨɨd Dios yꞌayuc ytɨyꞌajt. Mɨmecxtuc etz yajꞌixpɨc yɨ jäy ajcxy.
\v 3 Minɨp je xɨɨ je tiempo ma jäy ajcxy caꞌ cöbɨgaꞌnɨ oybɨ tɨyꞌajt. Nijëjɨty mɨɨd ycɨꞌmdzojcɨn mɨɨd ycɨꞌm-huinmaꞌñ ixtähuɨp ajcxy yhuindzɨn huɨdibɨ yajꞌixpɨgɨɨb nej ajcxy jäygɨdägy, oy caꞌ ytɨyꞌajtɨty.
\v 4 Chi ajcxy anajty jɨjphuäctúutcɨxnɨ camɨdoohuáangɨxnɨ je Dios yꞌayuc ytɨyꞌajt. Mɨjpɨdaacnɨ anajty ajcxy nïgɨ yɨ nɨgoobɨꞌayucɨty.
\v 5 Miich huijy ycujc mꞌidɨpy. Mecxtujctaꞌ nej jäy ajcxy xyꞌixhuɨdity xypahuɨdity. Yajnɨmaꞌ jäy ajcxy Dios ytɨyꞌajt, jëb ajcxy mɨjpɨdägɨpy etz jothuimbidɨpy ajcxy Dios. Yajꞌixpɨc Dios yꞌayuc ytɨyꞌajt nej ypadyii.
\p
\v 6 Jaduꞌn miich cham njacnɨmäy, jeꞌ co tɨ yhuaadꞌajtnɨ je tiempo mɨnaa ndzonaanɨch ya naaxhuiñ xyajꞌögaamɨch jäy, tɨ nayxoxyiijɨch naydogyiijɨch mɨɨd Cristo Jesús ycɨxpɨ.
\v 7 Tɨ ɨɨch ooy mɨc nmɨhuindɨnäy Dios yꞌayuccapxhuäcxɨɨ ma anajty ypadyii. Tɨ nyajcɨxy nyajmayɨch je tung huɨdibɨ anajty xypatpɨch. Ooy tɨ nyajmɨjꞌatyɨch Cristo Jesús, ni caꞌ tɨ nꞌixmajchɨch yɨꞌ yꞌayuc ytɨyꞌajt.
\v 8 Cham njɨjpꞌijxypɨch co Cristo Jesús je tɨydumbɨ tudägypɨ xycömayɨpyɨch jiiby tzajpjoty, mɨɨd co tɨydudägy tɨ ndzɨnäyɨch tɨ njugyꞌatyɨch.
\s Pablo pɨjctzoy mayꞌajt ma Timoteo co tzojc yminɨpy ma yɨꞌ
\p
\v 9 Tun mayꞌajt tzojc yminɨpy ma ɨɨch.
\v 10 Yɨ Demas tɨ ɨɨch yam xycögueecnɨ co yjactzojcpy yɨ mayñax xondaacɨn ya naaxhuiñ. Hueꞌ tɨ ñɨcxy jɨm Tesalónica. Crescente nañ hueꞌ tɨ ñɨcxnɨ Galacia. Yɨ Tito tɨ ñɨcxy Dalmacia.
\v 11 Jëyɨ naydügpajc Lucas yam mɨɨd ɨɨch. Co mminɨpy, mɨɨdminɨpy Marcos, com ooy tɨ xychachpubetyɨch ma Dios ytung.
\v 12 Yɨ Tíquico tɨ nguexyɨch jɨm Efeso.
\v 13 Je jocxhuit huɨdibɨ nyajhuɨꞌmɨɨyɨch jɨm Troas ma Carpo ytɨjc mɨminɨpy. Nañ jaduꞌn mɨmindähuɨpy je necy. Jeꞌ ooy ytimycopɨcyɨty yɨ pergamino necy.
\p
\v 14 Alejandro je caꞌtzpɨ tɨ yɨꞌ ooy mɨj xymɨdundɨgooyɨch. Yɨ nhuindzɨnꞌajtɨm Dios paatɨp nej yajmɨdzogyii.
\v 15 Naygüendꞌadɨɨ caꞌ miich yɨꞌ mmɨjyöybedɨpy, com ooy mɨc tɨ jɨjpcogapxɨ̈y Dios yꞌayuc huɨdibɨ ɨɨch ajcxy nyajꞌixpɨjcpy.
\p
\v 16 Co yɨꞌ ogaꞌn xyxɨ̈yɨch ma je mɨj tungmɨɨdpɨ, naydüg ayuc nmɨhuindɨnaayɨch. Nipɨn xycapubejtyɨch, nïgɨ ajcxy xycögueectaayɨch. Huen Dios ocmeecxy nej ajcxy tɨ yꞌɨdɨɨtzcɨxy.
\v 17 Caꞌ yꞌocnejɨty Dios tɨ xypubetyɨch tɨ xypudɨgɨ̈yɨch. Dios tɨ xyyajjotmɨcpɨcyɨch, jɨgɨx ngapxhuäcxtähuɨbɨch ytɨyꞌajt ma tügꞌócɨy jäy. Jëb tügꞌócɨy jäy huɨdibɨ caꞌ yjudiojäyɨty huen mɨdoꞌmbɨjctaaygɨxy Dios ytɨyꞌajt. Dios tɨ xyñihuaꞌñɨch tɨ xycohuaꞌñɨch ma yɨ oꞌcɨn.
\v 18 Yɨ Huindzɨn Dios yɨꞌ xyñihuaꞌñ xycohuáꞌñɨbɨch ma tügꞌócɨy jäy huɨdibɨ ajcxy jɨbɨc-huinmaꞌñ mɨɨd. Yɨꞌxycuendꞌadɨpɨch, caꞌ ni ti xyjadɨpyɨch, coonɨ anajty njädyɨch jiiby tzajpjoty ma yꞌaneꞌmy. ¡Huen Dios cömay idɨpy janch huinɨxɨɨ huinɨtiempo!
\s Pablo ymɨgügtɨjc capxpoocxɨn yajniguexy
\p
\v 19 Yajnax ɨɨch ngapxpoocxɨn ma yɨ Prisca etz ma Aquila etz ma Onesífero yjuugy ymɨgüg.
\v 20 Erasto tɨ jeꞌ yhuɨꞌmy jɨm Corinto. Je Trófimo com pɨjcɨp anajty, ɨɨch jeꞌ nꞌixmajch jɨm Mileto.
\v 21 Tzojc mjatyminɨpy ma caꞌnɨ tɨɨchpy ymiinɨ. Yquejxyp ajcxy capxpoocxɨn ma miich, je Eubulo, je Pudente, je Lino, je Claudia etz jacjadyii mɨgügtɨjc.
\p
\v 22 Huen je Huindzɨn Cristo Jesús xypubedɨpy xypudɨgɨ̈huɨpy. Huen Dios tuñ mayꞌajt mɨɨd miich ajcxy. Amén. Jaduꞌn ngapxcɨ́xyɨch.