\id TIT
\h TITO
\toc1 TITO
\mt1 TITO
\mt2 Yɨ Necy Huɨdibɨ San Pablo Yajniguejx Tito
\c 1
\p
\v 1 Ɨɨch Pablo, Dios jada mɨɨd nduuñɨch, Jesucristo xyꞌapóstolꞌajtpɨch. Yɨꞌ tɨ xyquexyɨch ma yɨ jäy ajcxy huɨdibɨ Dios tɨ yhuinꞌixyii, jɨgɨx  ajcxy mɨbɨgɨpy yɨꞌ ytɨyꞌajt. Nañ nyajnɨmähuɨbɨch nej jëb ajcxy cuyduunɨ Dios ytɨyꞌajt.
\v 2 Jaduꞌn nduuñɨch jɨgɨx co anajty yꞌoꞌccɨxy, chi jadügꞌoc yjugypɨ́jccɨxɨpy e tzɨnáaygɨxɨpy huinɨxɨɨ. Dios yajhuinhuanɨɨy je jäy ajcxy je jugyꞌajtɨn huinɨxɨɨbɨ, caꞌnɨ anajty naaxhuiñybɨ chondägy. Jada tɨyꞌajt jëb nmɨjpɨdaacɨm com Dios caꞌ yɨꞌ yꞌanɨɨdägy.
\v 3 Jada jugyꞌajtɨn huɨdibɨ ijtp huinɨxɨɨ, Dios tɨ yajnejhuɨ̈y je jäy ajcxy cham co je tiempo tɨ yhuaadꞌajtnɨ, mɨɨd yɨꞌ yꞌayuc huɨdibɨ ngapxhuäcxɨbɨch. Je Dios huɨdibɨ xyajnïdzoocɨm ɨɨch ajt nꞌalma tɨ xyajnïbɨcyɨch co yɨꞌ yꞌayuc ngapxhuäcxpyɨch.
\v 4 Miich Tito, cham nijayɨ̈y jaduꞌn nej jɨhuɨ̈y nijayɨ̈yɨch ngɨꞌmꞌung. Com túꞌcɨy nmɨjꞌijxɨm nmɨjpɨdaacɨm Dios. Huen Dios ɨɨch ajt nDeedy tzajpjotpy etz Cristo Jesús ɨɨch ajt nihuambɨ yajtzoocpɨ tuñ mayꞌajt oyꞌajt mɨɨd miich, huen xypaꞌayooy etz xyajjotcujcꞌadɨpy.
\s Myajnïbɨgɨpy yëydɨjc huɨdibɨ jëb nigohuajcꞌaty ymɨgügtɨjc
\p
\v 5 Paady ɨɨch miich jɨm Creta ñaaxjot nyajhuɨꞌmy, jɨgɨx mjacyajnïxɨ̈huɨpy je mɨgügtɨjc jaduꞌn nej ɨɨch caꞌ tɨ nyajniꞌixɨydäyɨch ajcxy. Tügpɨ cajp nidüg nidüg myajnïbɨgɨpy yëydɨjctɨjc huɨdibɨ nigopꞌadɨɨb nigohuajcꞌadɨɨb yɨ mɨbɨjcpɨdɨjc, jaduꞌn nej tɨ nyajnɨmäy.
\v 6 Yɨꞌ myajnïbɨgɨpy yɨ huɨdibɨ caꞌ ti tundɨgoy; huɨdibɨ tüg töxyjäy mɨɨd, caꞌp ycanaagɨty; huɨdibɨ yꞌung ajcxy caꞌ nijotꞌaty mayñaax tzɨnaayɨn; huɨdibɨ yꞌung ajcxy ycapxymɨdooyb.
\v 7 Copɨcy huɨdibɨ nigohuajcꞌadamb yɨ mɨbɨjcpɨdɨjc huen jäyꞌaty tɨydudägy, caꞌ huaad ti tundɨgoy; huen yajxon cuendꞌadɨpy huɨdibɨ Dios yjeꞌajtpy; jäy huɨdibɨ caꞌ ycöjuuñɨty; huɨdibɨ caꞌ yhuindzipɨty; huɨdibɨ caꞌ yꞌamügɨty; huɨdibɨ caꞌ chipꞌixtäy; huɨdibɨ caꞌ yꞌadzocy.
\v 8 Yɨꞌ jëbɨ myajnïbɨgɨpy huɨdibɨ oyjäyꞌajtɨn tuñ mɨɨd hueñytimypɨnɨty; huɨdibɨ ooy yꞌamɨgügɨty; huɨdibɨ huijycujc; huɨdibɨ tɨydudägy yhuinmaꞌñ; huɨdibɨ huindzɨgɨɨb Dios; huɨdibɨ cɨꞌm yajxon naygüendꞌajtɨp.
\v 9 Huen cɨxyjot huinɨjot naybɨdáacɨgɨxy ma je ayuc tɨyꞌajt huɨdibɨ tɨ ixpɨjccɨxy, jɨgɨx jëbɨ ajcxy jotꞌamɨjmöhuɨpy jacjadyii jäy ajcxy mɨɨd tɨyꞌajt janchypɨ, e capxjotcɨdägɨpy ajcxy je pɨn ajcxy caꞌ ixaꞌñ Dios yꞌayuc.
\p
\v 10 Com ji may judíojäy huɨdibɨ caꞌ ycapxymɨdoogɨxy, huɨdibɨ nɨgoobɨ tijaty ayuc tzachnimɨydacp; huɨdibɨ ajcxy huinꞌɨɨmb ymɨgügtɨjc, jaduꞌn nej yɨꞌ ajcxy huɨdibɨ mɨnamb co copɨcy tügꞌócɨy mɨbɨjcpɨ huen yajtɨyꞌajtɨ̈y ymang ajcxy, jaduꞌn nej judíojäy tungɨxy.
\v 11 Copɨcy co mgapxꞌadugɨpy yɨꞌ ajcxy huɨdibɨ ymɨgügtɨjc yajcoꞌinɨɨyb tüg jɨɨn tüg tɨjc; huɨdibɨ ajcxy yajꞌixpɨjcp mujuy; huɨdibɨ caꞌ tɨyꞌajt yajꞌixpɨjccɨxy.
\p
\v 12 Nidüg yɨꞌ ajcxy cohuinmaꞌñybɨ nigapxy ymɨgügtɨjc ymɨnaꞌñ co yɨ Creta jäy ooy ajcxy yꞌanɨɨjɨty, ooy ajcxy huinducɨty, ooy ajcxy ñuuxɨty, ooy ajcxy ycaaxɨty.
\v 13 Tɨyꞌajt jaduꞌn nej jada cohuinmaꞌñyjäy ymɨnaꞌñ. Yajꞌoj ajcxy mɨctägy, huen huinjɨhuɨɨygɨxy yajxon Dios yꞌayuc.
\v 14 Caꞌp ajcxy mɨjpɨdaacɨpy yɨ judíojäy ycostumbre etz ni caꞌ ajcxy mɨjpɨdaaccɨp yɨ yꞌaneꞌmɨn huɨdibɨ jäy cɨꞌm tɨ nihuinmaꞌñꞌaty, huɨdibɨ ajcxy tɨ jɨjpyöyduutnɨ Dios yꞌayuc ytɨyꞌajt.
\p
\v 15 Pɨn jäy huädz yjot yhuinmaꞌñ mɨɨd, oy tɨ jacuyduñ costumbre, o oy caꞌ tɨ cuyduñ, Dios yjäygɨdacpy yɨꞌ co oyjot oyhuinmaꞌñ mɨɨdɨty. Pɨn jäy caꞌ huädz yjot yhuinmaꞌñ mɨɨdɨty, oy tɨ jacuyduñ costumbre, Dios caꞌ jäygɨdägy yɨꞌ com jɨbɨc ajcxy yjot yhuinmaꞌñ mɨɨdɨty, caꞌ ajcxy nej ñayjɨhuɨ́ɨyɨgɨxy.
\v 16 Yɨ jaduꞌmbɨ jäy hueꞌ ñaybɨdáacɨgɨxy jaduꞌn nej jɨhuɨ̈y nej ooy Dios ytɨyꞌajt ajcxy mɨjpɨdaacɨ, chi ma huɨdibɨ ajcxy ytumyb ji yajniguëxɨ̈ccɨxy co caꞌ ajcxy cuydungɨxy Dios ytɨyꞌajt. Dios caꞌ yɨꞌ oy ijx ajcxy yhuinmaꞌñ, caꞌ ajcxy capxymɨdoogɨxy Dios, caꞌ ajcxy Dios ytung mɨhuaadɨty.
\c 2
\s Nej jëb huaad chɨnaaygɨxy yjugyꞌajtcɨxy
\p
\v 1 Miich huädz myajꞌixpɨgɨpy yɨ mɨgügtɨjc nej jëb huaad cuydungɨxy Dios ytɨyꞌajt.
\v 2 Miich mꞌɨɨhuijɨp mgapxhuijɨp yɨ mɨjjäydɨjc huen caꞌ ajcxy yꞌamügyjäyꞌadɨpy; huen huijycujc jäyꞌajtcɨxy; huen mɨɨdꞌajtcɨxy oyjot oyhuinmaꞌñ; huen mɨjpɨdaaccɨxy Dios ytɨyꞌajt cɨxyjot huinɨjot; huen oyjäy ꞌajtɨn tungɨxy mɨɨd huentɨmypɨnjäyɨty; huen ajcxy mecxtujcɨn yajtungɨxy ma yɨ chɨnaayɨn.
\v 3 Nañytɨmyjaduꞌn mɨjjäydɨjc ajcxy töxyjäybɨ huen ajcxy jaduꞌn jäyꞌajtcɨxy nej huɨdibɨ ajcxy Dios yajmɨjꞌajtp; caꞌp ajcxy ymɨgügtɨjc nigapxɨp niꞌojɨ̈huɨpy, ni caꞌ ajcxy nïhuambedɨpy; nañ ni caꞌ ajcxy yꞌamügyjäyꞌadɨpy; huen ymɨgügtɨjc ɨɨhuijcɨxy capxhuijcɨxy mɨɨd ayuc oybɨ tudägypɨ.
\v 4-5 Yɨ mɨjjäydɨjc ajcxy töxyjäybɨ huen ɨɨhuijcɨxy capxhuijcɨxy yɨ mutzꞌanäg töxyjäydɨjc ajcxy nej jëb huaad chɨnaaygɨxy yjugyꞌajtcɨxy; nej jëb huaad ytɨjc ñäy yajmɨjꞌajtcɨxy; nej jëb huaad tzojccɨxy jɨhuɨɨygɨxy yꞌung yꞌanäg; nej jëb huaad oyjot oyhuinmaꞌñ yajtungɨxy. Ɨɨhuij capxhuij yɨ töxyjäy mutzꞌanäcpɨ co huen tɨydudägy chɨnaaygɨxy, caꞌ ti jɨbɨc-huinmaꞌñ ajcxy mɨbɨdzɨmɨpy. Huen ɨɨhuij capxyhuij ajcxy nej jëb huaad yjɨɨn ytɨjc cuendꞌajtcɨxy yajxon; nej jëbɨ yꞌamɨgügꞌajtcɨxy, nej jëb huaad capxymɨdoogɨxy ñäy. Pen jɨbɨc-huinmaꞌñ anajty ajcxy ytumyb, chi anajty Dios ytɨyꞌajt yajnigapxy yajniꞌojɨ̈y.
\p
\v 6 Miich Tito, nañ jaduꞌn jaty ɨɨhuij jaty capxhuij yujcyeecpɨdɨjc etz anäctɨjc nej jëb huaad oyjot oyhuinmaꞌñ yajtungɨxy, caꞌ huaad ytundɨgooygɨxy ycapxtɨgooygɨxy. 
\v 7 Tito, tɨydudägy mdzɨnähuɨpy, oyjot oyhuinmaꞌñ myajtunɨpy. Jɨm yɨ mɨgügtɨjc ijxpejt pɨgɨpy ma miich, nej jëb huaad ytungɨxy. Huädz ajcxy myajꞌixpɨgɨpy yɨ tɨyꞌajt, huijycujc mꞌidɨpy.
\v 8 Tito, mꞌɨɨhuijɨp mgapxhuijɨp yɨ mɨgügtɨjc mɨɨd oyꞌayuc oyhuinmaꞌñ, jɨgɨx co pɨnjäy jɨjpcogapxɨ̈huaanɨp miich mꞌayuc, chi tzoꞌyduꞌñ jɨhuɨ̈huaꞌñ, e jaduꞌn caꞌ jadɨpy nej jɨbɨc xyñigápxcɨxɨpy xyñiꞌojɨ́ɨygɨxɨpy.
\p
\v 9-10 Je tumbɨdɨjc huɨdibɨ ijtp cojuyɨ̈y codoogɨ̈y, huen yhuindzɨn ɨɨmɨdoogɨxy capxymɨdoogɨxy nej ypadyii. Huen tungɨxy nej huaad yhuindzɨn jäygɨdägy, caꞌ adzoꞌnmay yjäyꞌadɨpy. Caꞌ meedzɨp tijaty yhuindzɨn yjëꞌajtpy, huen yajmɨjꞌadɨpy yajxon yhuindzɨn, huen yajxon ytung tundaayɨ. Pen jaduꞌn ajcxy yhuindzɨn mɨdungɨxy yajxon, huinꞌit cömay yꞌidɨpy yɨ Dios ytɨyꞌajt, je Dios huɨdibɨ xyajnïdzoocɨm ajt nꞌalma. 
\p
\v 11 Cham nꞌijxɨm nnejhuɨɨyɨm nej Dios mayꞌajt tɨ tuñ mɨɨd tügꞌócɨy jäy ajcxy ycɨxpɨ, co tɨ yajꞌoyɨ̈y nej jëb huaad hueñypɨnɨty pɨnjaty mɨjpɨdaacɨp yɨꞌ yꞌayuc, ypadamyb ajcxy yꞌalma ñïdzoocɨn co anajty yꞌoꞌccɨxy.
\v 12 Dios cham tɨ xyajnejhuɨɨyɨm pen tzögamb ɨɨch ajt nꞌalma, chojcpy co nꞌixmajtzɨm je jɨbɨc-huinmaꞌñ huɨdibɨ Dios caꞌ jäygɨdägy. Caꞌ huaad ooy nijotꞌajtɨm yɨ mayñaxpɨ tzɨnaayɨn ma jadachambɨ xɨɨ tiempo yjacyöy. Copɨcy ndzɨnaayɨm huijycujc etz tudägy, e nguydunɨm Dios yꞌayuc ytɨyꞌajt.
\v 13 Njɨjpꞌijxɨm mɨna Jesucristo, je huɨdibɨ xyꞌaneꞌmdaayɨm, ymiinaꞌñ ya naaxhuiñ jadügꞌoc mɨɨd ɨɨch ajt ycɨxpɨ. Njotcugɨɨyɨm ɨɨch ajt co nꞌijxɨm ymiiñ mɨɨd yꞌoyꞌajtɨn ymɨcꞌajtɨn, yɨ Dios huɨdibɨ yajnïdzögam ɨɨch ajt nꞌalma.
\v 14 Yɨ Cristo Jesús tɨ ñayyoxyii tɨ ñaydoogyii co yꞌoꞌcy ma yɨ cruudz mɨɨd ɨɨch ajt ycɨxpɨ. Yɨꞌ tɨ xyjuybɨdzɨmɨm ma anajty yɨ mujcuꞌ cɨ̈ꞌam xymɨɨdꞌajtɨm, co anajty tɨ nbocytuunɨm. Yɨꞌ tɨ xyajpocyñïhuätztaayɨm nidügꞌócɨy, jɨgɨx Dios xyjäyꞌájtɨmɨp mɨɨd huädz jot huädz huinmaꞌñ, jëb nduunɨm oyjäyꞌajtɨn cɨxyjot huinɨjot.
\p
\v 15 Tito, jada tɨyꞌajt mɨgügtɨjc myajnɨmaydähuɨpy. Mꞌɨɨhuijɨp mgapxhuijɨp ajcxy yajxon. Dios tɨ xymöy cötujcɨn co mꞌojɨpy pɨnjaty xycacapxmɨdoob, jëb ajcxy yɨ mꞌaneꞌmɨn xyajmɨjꞌajtɨp.
\c 3
\s Huen mɨjnɨcxpejtcɨxy yɨ gobierno ytungmɨɨdpɨ
\p
\v 1 Mꞌɨɨhuijɨp mgapxhuijɨp yɨ mɨgügtɨjc huen capxymɨdoogɨxy yɨ gobierno ytungmɨɨdpɨ etz cajpjäy ytungmɨɨdpɨ. Huen capxymɨdoogɨxy jaduꞌn nej yꞌaneꞌmyii ajcxy. Huen tungɨxy huɨdibɨ tɨydudägyɨp huɨdibɨ ajcxy yajꞌaneꞌmɨp.
\v 2 Mꞌɨɨhuijɨp mgapxhuijɨp yɨ mɨgügtɨjc ajcxy caꞌp ajcxy ni pɨn nigapx niꞌojɨ̈huɨp, nañ ni caꞌ tzipcapxy ajcxy ixtähuɨp, huen ñaybɨdáacɨgɨxy amɨgüg, huen mɨmecxtujctaaygɨxy yɨ ymɨgügtɨjc ajcxy, huen nicy xyeemy jäyꞌajtcɨxy mɨɨd yɨ mayjäy ajcxy.
\p
\v 3 Jecyꞌajty ma caꞌnɨ anajty nmɨjpɨdaacɨm Cristo Jesús, hueꞌ anajty nyajpaatɨm mɨɨd jɨbɨc-huinmaꞌñ. Caꞌ anajty nꞌɨɨmɨdoohuɨm ngapxmɨdoohuɨm. Je mujcuꞌ anajty tɨ xyhuinꞌɨɨnɨm, paady anajty nnɨɨdɨgooyɨm ndüdɨgooyɨm. Ndzachnijotꞌajtɨm mayñaxpɨ tzɨnaayɨn, ni ngajajtɨm anajty nej nꞌixmajtzɨm yɨ jaduꞌmbɨ huinmaꞌñ. Jɨbɨc-huinmaꞌñ nduunɨm. Jaduꞌn njäyꞌajtɨm nijot anajty nꞌɨdɨɨtzɨm, ngaꞌoyꞌijxɨm anajty nmɨgügtɨjc. Paady jäy anajty xymɨɨddziptzoonɨm, chi naymɨjotmaꞌtcootɨm miñ xyɨpy.
\v 4 Jaduꞌn anajty nduunɨm ixtɨ coonɨ Cristo Jesús ñayguëxɨ̈gɨɨyb ya naaxhuiñ, etz nnejhuɨɨyɨm jaduꞌn nej Dios ɨɨch ajt nihuambɨ yajtzoocpɨ mayꞌajt oyꞌajt tɨ tuñ mɨɨd tügꞌócɨy jäy ajcxy ycɨxpɨ.
\v 5 Yɨꞌ xyajnïdzoocɨm ajt nꞌalma canan co ɨɨch ajt ndzachꞌoyjäyɨty. Hueꞌ jeꞌ jaduꞌn tɨ tuñ mɨɨd co paꞌayoꞌn tɨ yajtuñ mɨɨd ɨɨch ajt ycɨxpɨ. Ninɨgoob tɨ tuñ mayꞌajt oyꞌajt mɨɨd ɨɨch ajt ycɨxpɨ. Chi yajꞌoyɨɨyñɨ ajt njot nhuinmaꞌñ huinjemy mɨɨd je Espíritu Santo huɨdibɨ xyajtɨgɨɨyɨm njot nhuinmaꞌñ, e jaduꞌn ajt njugyꞌajtɨn ndzɨnaayɨn chondaacnɨ huinjemy.
\v 6 Dios tɨ yecy yɨ Espíritu Santo janch mɨjcajee ma ɨɨch ajt njot nhuinmaꞌñ. Jaduꞌn Jesucristo xytuunɨm, je huɨdi ɨɨch ajt nihuaanɨm yajtzoocɨm.
\v 7 Yɨꞌ tɨ xyajꞌahuimbijtɨm tudägy mɨɨd je mayꞌajtɨn oyꞌajtɨn huɨdibɨ tɨ tuñ co yɨꞌ tɨ yꞌögy mɨɨd ɨɨch ajt ycɨxpɨ. Jëyɨ cham yꞌoyꞌahuijxnɨty mɨna anajty nbadaanɨm je jugyꞌajtɨn huɨdibɨ Dios mɨɨd huɨdibɨ caꞌ ycɨxɨpy ni mɨnaa xɨɨ.
\p
\v 8 Jada ayuc jada tɨyꞌajt ndzojcpyɨch co miich mnïgapxpedɨpy. Ooy ycopɨcyɨty co yɨꞌ ajcxy huɨdibɨ mɨjpɨdacp Dios huen oyjäyꞌajtɨn tungɨxyp. Ooy yꞌoyɨty co oyjäyꞌajtɨn tungɨxyp ajcxy. Yjäygɨdägɨpy yɨ jäy ajcxy mɨɨd je oyjäyꞌajtɨn huɨdibɨ anajty ajcxy ytumyb etz ypaadɨpy ajcxy oyꞌajt.
\v 9 Ixmatz yɨ jäy ajcxy huɨdibɨ nigapxy nimɨydägy yɨ nɨgoobɨꞌayucɨty, yɨ huɨdibɨ caꞌ choobaady. Nañ jaduꞌn yɨꞌ ajcxy huɨdibɨ nigapxp nimɨydacp huɨdibɨ ñiꞌapꞌajtpy ñideedyꞌajtpy. Caꞌ mjɨjptɨgɨyɨ̈huɨpy yɨ tzip capxy ma yɨ judiojäy ycötujcɨn huɨdibɨ ajcxy ypanɨcxyp. Yɨ jaduꞌmbɨ tzip capxy ninɨgoob yɨꞌ, caꞌ yɨꞌ ni ma choobaady, caꞌ jugyꞌajt mɨɨdɨty.
\p
\v 10 Yɨ jaduꞌmbɨ jäy huɨdibɨ tzip capxy ixtaayb, mɨɨd tügꞌoc mejtzꞌoc myajꞌojɨpy pen caꞌ ycapxcöbɨcy, tɨm ixꞌoj, huen nɨcxy.
\v 11 Mnejhuɨɨyb co yɨ jaduꞌmbɨ jäy ajcxy tɨ ixmajtzcɨxy je tɨyꞌajt, tundɨgooyb yɨꞌ ajcxy, cɨꞌm jaduꞌn nayyajpocycähuɨɨygɨxy.
\s Pablo nɨmay Tito co mɨɨd naybadaanɨp
\p
\v 12 Nyajniguexɨpɨch nidüg, aver huɨdibɨ ɨɨch anajty nꞌocquejxyp yɨ Artemas o yɨ Tíquico. Co yɨꞌ jɨm yjädɨpy, chi miich xyjatyñiminɨpyɨch mɨcꞌamy jɨm Nicópolis com jɨm nyajnaxaꞌñɨch yɨ tɨch poj tiempo.
\v 13 Co yɨ Zenas, yɨ huingapxpɨ, etz Apolo ajcxy jɨm yjädɨpy, quejxnajxcɨx miich yɨꞌ, e mooygɨxy ytuꞌamgɨxpɨ caꞌydɨ ti yajmayjajtcɨxy tüꞌam.
\v 14 Huen yɨ nmɨgügtɨjcꞌajt ixpɨjccɨxy nej jäy yꞌoyjäyꞌaty, huen pubejtcɨxy pɨn tijaty yajmayjajtp. Pen caꞌ jaduꞌn tungɨxy, Dios caꞌ yɨꞌ jäygɨdaacɨp yɨꞌ ajcxy yhuinmaꞌñ.
\s Pablo ycapxycɨ́xy mɨɨd Tito
\p
\v 15 Yɨ mɨgügtɨjc ajcxy huɨdibɨ ya yquejxyp ajcxy capxpoocxɨn ma miich. Nquejxpɨch ngapxpocxɨn ma tügꞌócɨy yɨ nmɨgügtɨjc ajt huɨdijaty jɨm yajmɨjꞌajtp Cristo Jesús. Huen Dios mɨj mayꞌajt tunɨp mɨɨd miich ajcxy ycɨxpɨ. Amén. Jaduꞌñyɨ ngapxcɨ́xyɨch.