\id PHM
\h FILEMÓN
\toc1 FILEMÓN
\mt1 FILEMÓN
\mt2 Yɨ Necy Huɨdibɨ San Pablo Yajniguejx Filemón
\c 1
\p
\v 1 Ɨɨch Pablo etz Timoteo, ɨɨch ajt nmɨgüg, nijayɨɨybɨch miich Filemón huɨdibɨ ooy ndzocyɨch, huɨdibɨ quipxyɨ mɨɨd nduunɨm. Nmachꞌɨñäyɨch mɨɨd co nyajmɨjꞌatyɨch Cristo Jesús. 
\v 2 Nañ jaduꞌn nijayɨɨybɨch yɨ Apía, ɨɨch ajt nmɨgüg töxyjäybɨ, etz yɨ Arquipo, huɨdibɨ capxhuäcx Dios yꞌayuc túꞌcɨy mɨɨd ɨɨch ajcxy, etz tügꞌócɨy yɨ mɨgügtɨjc huɨdibɨ naymújcɨgɨxp ma miich mdɨjc Dios ojadajtcɨxy.
\v 3 Huen Dios Teedy etz yɨ Huindzɨn Jesucristo tuñ mayꞌajt oyꞌajt ma miich ajcxy etz xyajjotcugɨ́ɨygɨxɨpy.
\s Pablo capxpaady Filemón co mɨjpɨdägy Dios
\p
\v 4 Nyajnajxpyɨch Dioscojuyip ma Dios mɨɨd miich ajcxy ycɨxpɨ. Njatytɨmjäymejtzpɨch miich ajcxy jabom jabom co Dios nmɨbɨjctzooyɨch.
\v 5 Tɨ ɨɨch ayuc nmɨdoy jaduꞌn nej miich mdzocy mjɨhuɨ̈y yɨ Huindzɨn Jesús etz tügꞌócɨy pɨnjaty yajmɨjꞌajtp Jesús. 
\v 6 Nañ jaduꞌn nmɨbɨjctzooybɨch Dios mɨɨd miich ajcxy ycɨxpɨ, huen oyjäyꞌajtɨn mdunɨpy mɨɨd je mɨgügtɨjc, jaduꞌn nej Dios tɨ xyajnejhuɨ̈y yɨ tɨyꞌajt jɨgɨx ajcxy tɨyꞌajt paadɨpy ma miich nej jëb ajcxy cuyduñ Cristo yꞌayuc.
\v 7 Hermano, tɨ ɨɨch ooy njotcugɨ̈yɨch mɨɨd yɨ mꞌoyjäyꞌajtɨn huɨdibɨ miich mdumyb co tɨ mbubety yɨ Dios yjäy.
\s Pablo pɨjctzoy tüg mayꞌajt ma Filemón mɨɨd Onésimo ycɨxpɨ
\p
\v 8-9 Njapɨjctzoohuamybɨch tüg mayꞌajt ma miich. Oy njamɨ́ɨdɨdyɨch cötujcɨn huɨdibɨ Jesús xymooyɨch jëb njaꞌaneꞌmy co miich mgöbɨgɨpy Onésimo oyꞌamy. Per caꞌ jaduꞌn nꞌaneꞌmaꞌñ mɨɨd co ooy ndzocy ooy njɨhuɨ̈yɨch miich. Paady cham mayꞌajt nbɨjctzooyɨch ma miich co mgöbɨgɨpy yɨ Onésimo oyꞌamy. Ɨɨch Pablo, tɨ nmɨjjäyɨɨyñɨch. Cham jäy tɨ xypɨdägyɨch pujxtɨgoty mɨɨd co ngapxhuäcxɨch Jesús yꞌayuc ytɨyꞌajt. 
\v 10 Cham mayꞌajt nbɨjctzooyɨch ma miich co mbaꞌayoohuɨpy yɨ Onésimo. Jaduꞌn njɨhuɨ̈yɨch nej nꞌungꞌadyiijɨch mɨɨd co yɨꞌ tɨ mɨjpɨdägy Jesús ya ma ɨɨch nbujxtɨjcꞌɨñäyɨch co tɨ nyajnɨmäyɨch Dios yꞌayuc.
\p
\v 11 Tɨɨbɨ xɨɨ tiempo ñaxy co yɨ Onésimo caꞌ yɨꞌ tɨ xyꞌɨɨmɨdoy tɨ xycapxymɨdoy. Jadachambɨ janchtɨy capxymɨdoohuam jaduꞌn ma miich etz jaduꞌn ma ɨɨch.
\v 12 Cham nyajniguexy Onésimo. Ooy njajɨhuɨ̈yɨch co yam nguexyɨch.
\v 13 Ooy ɨɨch yam njayajꞌidaꞌñɨch ma ɨɨch jɨgɨx ixyipy yam xymɨɨdtuñɨch. Ytimyñipaatpy ixyipy jaduꞌn nej miich xymɨɨdtuñɨch ma yam nbujxtɨjcꞌɨñäyɨch mɨɨd co ngapxhuäcxyɨch je jemybɨ oybɨ ayuc nej Jesucristo yjaty ayooy.
\v 14 Per caꞌ ɨɨch nꞌaꞌɨxɨ̈yɨch nɨcxy nyajhuɨꞌmyɨch, pen caꞌ miich jaduꞌn mɨnaꞌñ. Caꞌp ndzocyɨch adzip ahuaꞌñ tijaty miich mdunɨpy. Jëyɨ ndzocyɨch co miich oyꞌamy xypubedɨpyɨch.
\v 15 Caꞌ yjecyɨty paady ycɨxpɨ tɨ xycöguëgy jëbɨ mɨjpɨdägy Jesús. Hueenɨ xɨɨ tiempo tɨ yꞌity ya, e cham co yhuimbidɨpy ma miich, mɨɨd yꞌidɨpy jɨm huinɨxɨɨ.
\v 16 Caꞌ jaduꞌn mꞌocmɨɨdꞌajtnɨp cham jaduꞌn nej jacꞌoyñipɨn cojuyɨ̈y codoogɨ̈y tumbɨ. Hueꞌ jeꞌ mmɨɨꞌadɨp jaduꞌn nej Jesús yjäy huɨdibɨ ooy mdzocy mjɨhuɨ̈y. Pues ooy ɨɨch yɨꞌ ndzocy njɨhuɨ̈yɨch. Jac nïgɨ cham miich mdzogɨpy mjɨhuɨ̈huɨpy mɨɨd co yɨꞌ cham yꞌoyjäyɨty, etz co cham mɨjpɨdägy yɨ Huindzɨn Jesús.
\p
\v 17 Pen janch miich xymɨgügꞌadyiijɨch cöbɨc yɨ Onésimo jaduꞌn nej ɨɨch miich ixyipy xycöbɨcyɨch.
\v 18 Pen tɨ yɨꞌ yinjaty huenjaty xymɨdundɨgoy o xymɨnucxꞌadyii ɨɨch miich nmɨgüedɨpy.
\v 19 Ɨɨch Pablo, ɨɨch miich njaaybɨch nfirmajɨ̈yɨch mɨɨdɨch ngɨꞌmgɨꞌ ngɨꞌmletra. Hermano, nmɨgüedɨpyɨch nej Onésimo xymɨnucxꞌadyii.  Oy ɨɨch yam caꞌ nꞌɨɨbaady ngapxpaady co miich xymɨnucxꞌadyiijɨch mɨɨd co Dios ytɨyꞌajt tɨ mbaady ma ɨɨch.
\v 20 Xypubedɨpɨch mɨɨd Onésimo. Yɨ nHuindzɨnꞌajtɨm Jesús yjäygɨdägɨpy pen jaduꞌn mduñ.  Mdunɨpy mayꞌajt mɨɨd Onésimo mɨɨd Jesús ycɨxpɨ, e jaduꞌn ɨɨch jëb huaad njotcujcꞌatyɨch.
\p
\v 21 Nnejhuɨɨybɨch co ooy mꞌɨɨmɨdoy mgapxmɨdoy, e jaduꞌn nej yam njacnijayɨ̈y, jacꞌanaxy mdunaꞌñ.
\v 22 Nañ jaduꞌn yam nɨmäy. Tun mayꞌajt niꞌixɨ̈ tüg jättac.  Njɨjpꞌijxypɨch co nbujxtɨjcpɨdzɨmɨpyɨch tzojc mɨɨd co miich ajcxy Dios mɨbɨjctzoogɨxy mɨɨd ɨɨch ycɨxpɨ, e jaduꞌn jëbɨ nɨ́cxɨbɨch ma miich.
\s Pablo ycapxycɨ́jxy mɨɨd Filemón
\p
\v 23 Nañ nbɨdacpyɨch necyjoty yam.  Xycapxpoocxp Epafras ɨɨch nmɨbujxtɨjc jäy mɨɨd Cristo Jesús ycɨxpɨ.
\v 24 Nañ xycapxpoocx Marcos, Aristarco, Demas etz Lucas. Ɨɨch yɨꞌ ajcxy xypubejtp ya.
\v 25 Huen yɨ nHuindzɨnꞌajtɨm Jesucristo mayꞌajt oyꞌajt tunɨpy ma miich ajcxy, jëb miich ajcxy oy mꞌity.  Amén.  Jaduꞌn ngapxcɨ́xyɨch.