\id 1PE
\h 1 PEDRO
\toc1 1 PEDRO
\mt1 1 PEDRO
\mt2 Yɨ Necy Huɨdibɨ San Pedro Yajniguejx Je Judio Mɨbɨjcpɨdɨjc
\c 1
\p
\v 1 Ɨɨch Pedro, Jesucristo tɨ xyajnïbɨcyɨch ngapxhuäcxɨbɨch yɨꞌ yꞌayuc. Jada necy nyajniguejxyp miich Israel jäy huɨdibɨ adzɨnaayb xɨm yam jɨm Ponto naaxjot, jɨm Galacia naaxjot, jɨm Capadocia naaxjot, jɨm Asia naaxjot etz jɨm Bitinia naaxjot.
\v 2 Miich ajcxy mɨgügtɨjc Dios Teedy tɨ xyhuinꞌijxcɨxy, jayɨjp Dios tɨ nejhuɨ̈y co xyjäyꞌadaꞌñyii ajcxy. Dios tɨ yajtɨgɨyɨ̈y yɨꞌ yjɨhuɨꞌñ ymɨcꞌajt ma miich ajcxy mjot mhuinmaꞌñ, huen oyjot oyhuinmaꞌñ myajtunɨpy ajcxy jaduꞌn nej Dios huinmaꞌñ xymooygɨxy. Dios miich ajcxy tɨ xyhuinꞌixy jɨgɨx mgapxymɨdohuɨpy Jesucristo, je huɨdib ñɨꞌpy teem cuj mɨɨd miich ajcxy ycɨxpɨ. Pɨdaaccɨx mhuinmaꞌñ co mgapxymɨdohuaangɨxy Dios jaduꞌn nej jecyꞌajty je Israel jäy ytuñ, je taab anajty Moisés yajꞌögy ɨyujc etz yajnïxɨdicxy ajcxy nidüg nidüg je nɨꞌpy, jeꞌ anajty ajcxy ytɨyꞌajtꞌajtɨpy co capxymɨdohuaangɨxy Dios. Huen Dios mayꞌajt oyꞌajt mɨjcajee tunɨpy ma miich ajcxy, chi jotcujc mdzɨnáaygɨxɨpy.
\s Jɨjpꞌijxcɨx jugyꞌajtɨn huinɨxɨɨbɨ
\p
\v 3 Yɨ Dios, ɨɨch ajt nHuindzɨn Jesucristo yTeedy, huen capxpaady yꞌity, mɨɨd co mayꞌajt oyꞌajt tɨ tuñ mɨɨd ɨɨch ajt co tɨ oyduñ huinjemybɨ ɨɨch ajt njot nhuinmaꞌñ, jëbɨ nꞌijtɨm Dios yjäy. Jadachambɨ ooy njɨjpꞌijxɨm je jugyꞌajtɨn huinɨxɨɨbɨ, mɨɨd co Jesús yjugypɨjcy huinjemy ma anajty tɨ yꞌögy.
\v 4 Nañ ooy njɨjpꞌijxɨm tijaty Dios xymöhuaanɨm jiiby tzajpjoty, huɨdibɨ caꞌ yhuindɨgoy, huɨdibɨ caꞌ yjɨbɨcɨ̈y, etz huɨdibɨ caꞌ ycɨxy ytɨgoy.
\v 5 Dios xycuendꞌadɨp ajcxy mɨɨd yɨꞌ ymɨcꞌajt, ixtɨ jiinɨ co anajty ajcxy je mꞌalma nïdzoocɨn padaangɨxy, co anajty je naaxhuiñ ycɨxy ytɨgoy. Mbadaangɨxy mꞌalma nïdzoocɨn mɨɨd co tɨ mmɨjpɨdaaccɨxy Dios ytɨyꞌajt.
\p
\v 6 Paady miich ajcxy ooy jotcujcꞌajtcɨxp. Oy cham tzaachypɨ mꞌocmɨnajxcɨxy mꞌocyajnajxcɨxy mɨɨd co jäy tzachꞌijxmadzaꞌñ miich ajcxy mjot mhuinmaꞌñ. Nïgɨ ooy jotcujc nayjɨhuɨ́ɨyɨgɨxy co ajcxy yɨ mꞌalma nïdzoocɨn padaꞌñ.
\v 7 Dios yꞌixamyb ñejhuɨ̈huamyb pen janch miich ajcxy cɨxyjot huinɨjot mmɨjpɨdaaccɨxy yɨꞌ yꞌayuc. Paady miich ajcxy ayoꞌn tzaachypɨ mmɨnajxcɨxy myajnajxcɨxy jëbɨ nïgɨ myajhuaatzcɨxy mjot mhuinmaꞌñ, tɨm jaduꞌn nej jäy yajhuaatzcɨxy yɨ oorɨ mɨɨd jɨɨn. Dios nïgɨ tzocy miich ajcxy huɨdib yɨꞌ ytɨyꞌajt mɨjpɨdaaccɨp, caꞌydɨ oorɨ. Pen tudägy miich ajcxy mhuinmaꞌñ, pen caꞌ mhuinmaꞌñytɨgajtzcɨxy co tzaachypɨ mmɨnajxcɨxy myajnajxcɨxy, chi capxpaady ajcxy mꞌidɨpy etz mbaadɨpy ajcxy jotcujcꞌajtɨn co anajty Jesús ñayguëxɨ̈gyii jadügtecy ya naaxhuiñybɨ.
\p
\v 8 Oy miich ajcxy caꞌ tɨ mꞌijxcɨxy Jesucristo, per myajmɨjꞌajtpy ajcxy, e cham oy caꞌ mꞌijxcɨxy Jesucristo, myajmɨjꞌajtɨp ajcxy yɨꞌ ytɨyꞌajt. Co ajcxy mmɨjpɨdaacɨ Jesucristo ytɨyꞌajt, chi ajcxy ooy mnayjɨhuɨ̈yii nïgɨ jotcujc anaxy. Je jotcujcꞌajtɨn huɨdib mmɨɨd Dios jeꞌ yejcp.
\v 9 Paady ycɨxpɨ tɨ mmɨjpɨdaaccɨxy Jesucristo co ajcxy mꞌalma xyajnïdzögaanɨ.
\p
\v 10 Jaduꞌn nej Jesucristo xyajnïdzögaanɨ miich ajcxy mꞌalma je Dios yꞌayuc najtzcapxɨɨybɨ ooy anajty jecyꞌajty janejhuɨ̈huaangɨxy nej Dios yꞌayuc ñïguejy, e caꞌ ajcxy huinjɨhuɨɨy, je huinꞌit tiempo anajty ajcxy capxhuäcxp Dios yꞌayuc jaduꞌn nej Dios mayꞌajt tunaꞌñ mɨɨd miich ajcxy ycɨxpɨ.
\v 11 Je Dios yꞌayucnajtzcapxɨɨybɨ jecyꞌajty ooy ajcxy jahuinmay, ooy ajcxy jahuinjɨhuɨ̈huaañ nej yhuimbɨdzɨmy je ayuc huɨdibɨ ajcxy ymɨɨd jotjoty huinmaꞌñyjoty, je ayuc huɨdibɨ Jesucristo yajmɨguejx yɨꞌ yjɨhuɨꞌñ ymɨcꞌajt, je Espíritu Santo, jaduꞌn nej ajcxy najtzcapxɨɨy co je Cristo tzaachypɨ mɨnaxaꞌñ yajnaxaꞌñ, etz co ñɨcxaꞌñ jadügꞌoc tzajpjoty.
\v 12 Dios yajnejhuɨɨy yɨꞌ yꞌayucnajtzcapxɨɨybɨ co jeꞌ huɨdib ajcxy ycapxhuäcx jiinɨ jeꞌ ytunaꞌñyii yjadaꞌñyii, caꞌ ajcxy ixaꞌñ. Mɨgügtɨjc ajcxy, Dios tɨ yajtuunyii tɨ yajjadyii ma miich ajcxy je mxɨɨ mdiempo nej anajty jeꞌ yꞌayucnajtzcapxɨɨybɨ najtzcapxɨɨy jecyꞌajty je tɨyꞌajt. E jadachambɨ jaduꞌn nej Dios tɨ yajtuñyii tɨ yajjadyii tɨ jäy capxhuäcxtäy ma ɨɨch ajt nidügꞌócɨy. Je jäy huɨdibɨ capxhuäcx je tɨyꞌajt ymɨɨd anajty ajcxy je Dios yjɨhuɨꞌñ ymɨcꞌajt huɨdibɨ Dios anajty yajniguejxɨp, chooñ tzajpjoty. Ixtɨ je ángeles huɨdibɨ ajcxy tzajpjoty tzɨnaayb yjanejhuɨ̈huaꞌñ nañ jaduꞌn nej Dios tɨ yajtuñyii tɨ yajjadyii ma miich ajcxy, e ni caꞌ ajcxy nejhuɨ̈y.
\s Chojcpy Dios co tudägy ndzɨnaayɨm
\p
\v 13 Paady ycɨxp niꞌixɨ̈ pɨdaaccɨx mjot mhuinmaꞌñ. Huijy ycujc ajcxy mdzɨnähuɨp. Jɨjpꞌijxcɨx je mayꞌajtɨn oyꞌajtɨn huɨdibɨ Dios tunamyb mɨɨd miich ajcxy ycɨxpɨ co anajty Jesucristo yhuimbity ya naaxhuiñ.
\v 14 Capxymɨdoogɨx Dios jaduꞌn nej piꞌcꞌanäg capxymɨdoogɨxy ytaj yteedy. Caꞌ huaad mꞌoctundɨgóoygɨxnɨ jaduꞌn nej anajty mdundɨgooygɨxy co anajty caꞌnɨ mnejhuɨɨygɨxy Dios ytɨyꞌajt.
\v 15 Oyjot oyhuinmaꞌñ ajcxy myajtunɨpy jaduꞌn nej Dios oyjot oyhuinmaꞌñ yajtuñ, je huɨdibɨ tɨ xyhuinꞌixy ajcxy.
\v 16 Com jaduꞌn ymiiñ jaybety ma Dios ñecy, jaduꞌn Dios mɨgapxy jeꞌ yjäy: “Mɨꞌidɨp ajcxy oyjot oyhuinmaꞌñ jaduꞌn nej ɨɨch nmɨꞌityɨch oyjot oyhuinmaꞌñ.”
\p
\v 17 Miich ajcxy mꞌojadajtpy je Dios Teedy. Dios caꞌp tzaachytunaꞌñ yɨ jäy ajcxy huinꞌixpety. Hueꞌ jeꞌ chaachytunɨpy ajcxy nidüg nidüg jaduꞌn nej ajcxy yhuinmaꞌñymɨɨdɨty, pen jɨbɨc-huinmaꞌñ ymɨɨd, chi tzaachytunɨpy nïgɨ. Paady ycɨxp tɨydudägy ajcxy mdzɨnähuɨpy. Tzɨgɨɨygɨx Dios.
\v 18 Je Dios canan hueꞌ tɨ xyajpocyñïhuaatzɨm co tɨ cojuy ɨɨch ajt nbocy mɨɨd oorɨ o plata, jaduꞌn nej anajty nbocytuunɨm co nmɨjpɨdaacɨm nꞌap ndeedy yꞌayuc ytɨyꞌajt huɨdibɨ caꞌ ytɨyꞌajtɨty.
\v 19 Hueꞌ janchtɨy Dios tɨ xyajpocyñïhuaatzɨm mɨɨd Cristo co yꞌoꞌcy cruudzcɨ́xy, e chi ñɨꞌpy teemy yojcy mɨɨd ɨɨch ajt nbocy ycɨxpɨ. Jaduꞌn nej anajty Israel jäy ñayyajpocyñïhuáatzɨgɨxy co yajꞌögy tüg boregɨ ung, huɨdibɨ caꞌ anajty ti jɨbɨcpɨ mɨɨdɨty, e chi ñɨꞌpy teemɨ cujɨ.
\v 20 Jaduꞌn nej Cristo yꞌoꞌcy mɨɨd ɨɨch ajt nbocy ycɨxpɨ, Dios jayɨjpnɨ jaduꞌn yajnihuinmayɨɨy co jaduꞌn tunaꞌñ, caꞌnɨ anajty naaxhuiñybɨ chondägy. Jecyꞌajty caꞌnɨ anajty pɨn nejhuɨ̈y, e jadachambɨ Dios ajt tɨ xyajnejhuɨɨyɨm.
\v 21 Paady ycɨxp miich ajcxy mɨjpɨdägy Dios. Dios yajjugypɨjc huinjemy je Cristo co yꞌoꞌcy, e Cristo cömay ooy ypɨdzɨmy jiiby tzajpjoty. Yajmɨjꞌajtcɨx Dios etz jɨjpꞌijxcɨx co Dios xyajnïdzögaanɨp ajcxy mꞌalma.
\p
\v 22 Tɨ myajhuaatzcɨxy mjot mhuinmaꞌñ co tɨ mmɨjpɨdaaccɨxy Dios ytɨyꞌajt. Naychójcɨgɨx nayjɨhuɨ́ɨyɨgɨx nidüg nidüg cɨxyjot huinɨjot, caꞌ yꞌametz yjotmetzɨty.
\v 23 Com tɨ Dios oyduñ miich ajcxy mjot mhuinmaꞌñ huinjemybɨ mɨɨd yɨꞌ yꞌayuc ytɨyꞌajt, co tɨ mmɨjpɨdaaccɨxy je tɨyꞌajt huɨdibɨ tudägyɨp, je huɨdibɨ caꞌ ycɨxy ytɨgoy, huɨdibɨ huinɨxɨɨ ijtp, je tɨyꞌajt huɨdibɨ jugyꞌajt yejcpy.
\v 24 Jaduꞌn ymiiñ jaybety ma Dios yꞌayuc:
\q Je jäy ninïcx nidɨgooyb yɨꞌ etz je ninïcx yꞌoyꞌajtɨn nidɨgooyb yɨꞌ. Tɨm jaduꞌn nej tüg pɨjy co ñidecy ytɨɨtznɨ, chi je pɨjy jaduꞌñyɨ ycaꞌnɨ, e chi jaduꞌñyɨ je pɨjy yꞌoyꞌajtɨn ytɨgooy.
\q
\v 25 Dios yꞌayuc ytɨyꞌajt huinɨxɨɨ yꞌity, caꞌ ycɨxy ytɨgooy nimɨna.
\m Jada je ayuc je tɨyꞌajt huɨdibɨ Dios yjäy ycapxhuäcxyp ma miich ajcxy.
\c 2
\p
\v 1 Paady ycɨxp copɨcy co mꞌixmájtzcɨxɨpy yɨ jɨbɨc-huinmaꞌñ nej mɨgüg ajcxy jɨbɨc mnigapxcɨxy. Caꞌ mꞌanɨɨdáaccɨxɨpy. Caꞌ ajcxy mnaybɨdägɨɨyb jaduꞌn nej jɨhuɨ̈y ooy mꞌoyjäyɨty, e caꞌ yjanchɨty. Caꞌ mmɨgüg ajcxy ti myajcaꞌoyꞌixɨpy. Caꞌ ajcxy mꞌɨɨdɨgoyɨpy mgapxtɨgoyɨpy. 
\v 2 Jaduꞌn nej yɨ maꞌxungdɨjc tzocy chïdz, nañ tɨm jaduꞌn miich ajcxy tzojccɨxy jotꞌajtcɨxy Dios yꞌayuc ytɨyꞌajt, jɨgɨx jëbɨ caꞌpxy yɨ mhuinmaꞌñ mɨꞌidɨpy ajcxy mɨɨd je ixpɨjcɨn huɨdibɨ Dios xymooygɨxp, e chi ajcxy mꞌalma paadɨpy nïdzoocɨn. 
\v 3 Nïdzögɨp miich ajcxy mꞌalma, penɨ janch tɨ mmɨjpɨdaaccɨxy je Huindzɨn Jesucristo yꞌayuc, etz tɨ mnejhuɨɨygɨxy nej Dios mayꞌajt oyꞌajt tɨ tuñ mɨɨd miich ajcxy ycɨxpɨ.
\s Cristo je tügpajcpɨ jaccopɨcyɨp
\p
\v 4-5 Yajmɨjꞌajtcɨx yɨ Huindzɨn Jesucristo. Dios tɨ yhuinꞌixyii jëbɨ yHuindzɨnꞌaty ma naaxhuiñyjäy etz ooy tzocy. Yɨ naaxhuiñyjäy caꞌ ajcxy tɨ tuñcuend, tɨm jaduꞌn  nipaady nej tüg tzaa huɨdibɨ pojtzpɨdɨjc ninɨgoob caꞌ yajtunaꞌñ ma yɨ tzaadɨjc ycojy. Yajmɨjꞌajtcɨx miich ajcxy je Huindzɨn Jesucristo. Dios yajꞌoyɨ̈ huamyb mɨɨd miich ajcxy tügpɨcy jäy huɨdibɨ yɨꞌ yjäyꞌadaanɨp, huɨdibɨ ojadadaangɨxp Dios, huɨdibɨ Dios ytung tunaangɨxp. 
\v 6 Jaduꞌn yjaybetyɨty ma Dios ylibro, Dios jaduꞌn ymɨnaꞌñ:
\q Jɨm ma Israel jäy nbɨdägɨbɨch tüg mɨjꞌaneꞌmbɨ huɨdibɨ tɨ nhuinꞌixyɨch, huɨdibɨ ooy ndzocyɨch, e pɨnjaty jeꞌ mɨjpɨdacp ooy njäygɨdägɨbɨch. Je mɨjꞌameꞌmbɨ jaduꞌn jeꞌ nipaady nej tüg tzaa oybɨ huɨdibɨ tɨgɨ̈huamb ma tɨjctaatz co tzaadɨjc ycojy.
\m 
\v 7 Miich ajcxy huɨdibɨ mɨjpɨdacp Jesús, mɨɨd miich ajcxy je mɨjꞌameꞌmbɨ ooy jeꞌ ymɨjɨty yjanchɨty. Per yɨꞌ ajcxy caꞌ mɨjpɨdägy Jesús, jeꞌ yɨꞌ ajcxy ycuydumyb nej ymɨnaꞌñ ma jaybetyɨty:
\q Pɨnjaty caꞌ capxymɨdohuaꞌñ Dios, caꞌ ajcxy ixaangɨxy je Cristo, e jaduꞌn ajcxy nipaady nej pojtzpɨdɨjc huɨdibɨ caꞌ yajtunaangɨxy tüg tzaa oybɨ co tzaadɨjc cojcɨxy. Yɨ Cristo yɨꞌ jeꞌ je mɨjꞌaneꞌmbɨ huɨdibɨ aneꞌmdähuamb tügꞌócɨy.
\m 
\v 8 Nañ jaduꞌn yɨꞌ ajcxy huɨdibɨ caꞌ mɨjpɨdägy Jesús cuydumyb nej ymɨnaꞌñ ma yjaybetyɨty:
\q Jaduꞌn je Cristo nipaady nej tüg tzaa ma jäy ajcxy ycönejpcɨxy etz ycɨdaagɨxy.
\m 
Je jäy ajcxy huɨdibɨ caꞌ mɨjpɨdägy Jesús, jaduꞌn nipaady nej jɨhuɨ̈y ycönejpcɨxy ma tüg tzaa co ajcxy caꞌ tungɨxy cuendɨ Jesús yꞌayuc, paady ycɨxpɨ padaangɨxy tzaachypɨ mɨɨd ypocy ycɨxpɨ, jaduꞌn nej Dios tɨ yajcöducy.
\s Je huɨdibɨ Dios yjäyꞌadyii
\p
\v 9 Miich ajcxy huɨdibɨ yajmɨjꞌajtp Jesucristo, caꞌ miich ajcxy mjaduꞌnɨty nej yɨꞌ ajcxy huɨdibɨ caꞌcapxymɨdoy Dios. Dios miich ajcxy tɨ xyhuinꞌijxcɨxy. Je rey Jesús jeꞌ miich ajcxy ytung mduunɨp. Oyjot oyhuinmaꞌñ miich ajcxy myajtumyb. Dios miich ajcxy xyjäyꞌajtɨp. Miich ajcxy jeꞌ xypaat mnidɨyꞌajtꞌadɨpy jaduꞌn nej Dios tɨ xyajpɨdzɨmgɨxy ma anajty mdundɨgooygɨxy, e tɨ xyajhuinjɨhuɨɨygɨxy jeꞌ ytɨyꞌajt nej jëb huaad mguydungɨxy. Jaduꞌn nipaady nej jɨhuɨ̈y Dios tɨ xyajtzoongɨxy agootztuuyb, e tɨ xyajtɨgɨɨygɨxy ma ytɨɨcxy yjajy. 
\v 10 Co anajty caꞌnɨ mmɨjpɨdaaccɨxy Jesucristo, caꞌ anajty Dios xytungɨxy cuendɨ.  Cham co tɨ mmɨjpɨdaaccɨxy Jesucristo, Dios tɨ xypaꞌayoogɨxy.  Dios miich ajcxy xyjäyꞌajtp cham.
\s Yajtungɨx Dios yꞌayuc ma mdzɨnaayɨn
\p
\v 11 Mɨgügtɨjc ajcxy huɨdibɨ ooy ndzocy njɨhuɨ̈yɨch, jada nyajnɨmaaygɨxyp, jaduꞌn nej tüg adzɨnaaybɨ huɨdibɨ caꞌ chɨnäy ma ycajp, huɨdibɨ nihuɨdijtp, caꞌ tüg it mdzɨnaaygɨxy, copɨcy co caꞌ mnijotꞌadɨpy ajcxy yɨ jɨbɨc-huinmaꞌñ, jaduꞌn nej je jäy ajcxy ma mꞌadzɨnaaygɨxy nijotꞌajtcɨxy jɨbɨc-huinmaꞌñ. Je jɨbɨc-huinmaꞌñ caꞌ ñaygodɨgɨ́ɨyɨgɨxy mɨɨd oyhuinmaꞌñ.
\v 12 Tɨydudägy mdzɨnähuɨpy ajcxy, yajtúngɨx oyhuinmaꞌñ mɨɨd je jäy ajcxy ma miich ajcxy mꞌadzɨnaaygɨxy, je jäy ajcxy huɨdibɨ caꞌ nejhuɨɨygɨxy Dios ytɨyꞌajt.  Oy ajcxy caꞌ xyꞌixaangɨxy etz jɨbɨc xyñigapxcɨxy xyñiꞌojɨɨygɨxy, mɨɨd co oyjäyꞌajtɨn mdungɨxyp, chi ajcxy jäygɨdägɨpy, etz miich yɨꞌ ajcxy xycapxpátcɨxɨpy ma Dios, mɨna anajty Dios  ñinmiñyii ajcxy.
\p
\v 13 Mɨɨd je Huindzɨn Jesucristo ycɨxpɨ, capxymɨdoogɨxy tügꞌócɨy gobierno tungmɨɨdpɨ etz cajp tungmɨɨdpɨ yꞌaneꞌmɨn ycötujcɨn, nañ capxymɨdoogɨxy jaduꞌn nej je mɨjꞌaneꞌmbɨ yꞌaneꞌmy.
\v 14 Nañ capxymɨdoogɨx tungmɨɨdpɨ ajcxy huɨdibɨ je mɨjꞌaneꞌmbɨ yquejxyp jɨgɨx tzaachytunɨpy jeꞌ ajcxy huɨdibɨ tundɨgooyb etz capxpaadɨpy jeꞌ ajcxy huɨdi oyhuinmaꞌñ ytumyb.
\v 15 Dios chojcyp co tɨydudägy mdzɨnáaygɨxɨpy, jɨgɨx jëbɨ je jäy ajcxy huɨdibɨ caꞌ huinjɨhuɨɨygɨxy Dios ytɨyꞌajt, huɨdibɨ tzuu huinmaꞌñ mɨɨd, caꞌ ajcxy mɨhuinmaꞌñybaady nej jɨbɨc xyñigapxɨp.
\p
\v 16 Tzɨnaaygɨx jaduꞌn nej jäy chɨnäy huɨdibɨ cuydumb Dios ytɨyꞌajt, huɨdibɨ tɨ ixmach yɨ ayuc tɨyꞌajt huɨdibɨ caꞌ ytɨɨyɨty.  Pen mmɨdundɨgooyb ajcxy tunmɨɨdpɨ yꞌaneꞌmɨn ycötujcɨn, caꞌ huaad mnaybɨdáacɨgɨxy jaduꞌn nej jɨhuɨ̈y Dios xylugarmooygɨxy jɨgɨx jëbɨ mdundɨgooygɨxy. Copɨcy mdzɨnähuɨpy ajcxy jaduꞌn nej Dios ytumbɨ huɨdibɨ oy tumb.
\v 17 Mɨgügꞌadɨɨ ajcxy tügꞌócɨy jäy. Naychójcɨgɨx nayjɨhuɨ́ɨyɨgɨx nidüg nidüg huɨdijaty yajmɨjꞌajtp Dios. Yajmɨjꞌajtcɨx Dios. Capxymɨdoogɨx yɨ mɨjꞌaneꞌmbɨ.
\s Jaduꞌn nej Cristo tzaachypɨ yajnajx
\p
\v 18 Tumbɨdɨjc ajcxy, ɨɨmɨdoogɨx capxymɨdoogɨx mhuindzɨndɨjc. Pen oyjäy yɨ mhuindzɨn huɨdibɨ yung naxy yjot yhuinmaꞌñ mɨɨdɨty, o pen ahuaꞌnjäy jɨbɨcjäy, caꞌ yñejɨty, capxymɨdoogɨx.
\v 19 Yjäygɨdägɨpy Dios pen mmecxtujctaaygɨxyp nej jäy ajcxy xychaachytúngɨxy mɨɨd co oyhuinmaꞌñ miich ajcxy mmɨɨdɨty.
\v 20 Pen tɨ anajty mdundɨgooygɨxy, e paady anajty myajtzaachytungɨxy, caꞌ pɨn xycömáaygɨxɨpy xycapxpáadygɨxɨpy, oy tɨ mjamecxtujctaaygɨxy huɨdijaty tzaachypɨ. Pen ooy mdungɨxy etz tzaachypɨ mbaatcɨxy, chi janchtɨy Dios jäygɨdägɨpy nej mmɨmecxtujctaaygɨxy.
\v 21 Dios chojcpy co mmecxtujctáaygɨxɨpy je tzaachypɨ huɨdibɨ mmɨnajxyp myajnajxcɨxyp mɨɨd co oybɨ mdungɨxy. Paady ycɨxpɨ je Cristo tzaachypɨ ayoꞌn mɨnajxy yajnajxy mɨɨd ɨɨch ajt ycɨxpɨ, e yejc ijxpejt jaduꞌn nej jëbɨ huaad mmɨnajxcɨxy myajnajxcɨxy tzaachypɨ ayoꞌn, nañ nej jëbɨ huaad mbanɨcxcɨxy mbayöygɨxy yɨꞌ yꞌijxpejt.
\v 22 Je Cristo caꞌ jeꞌ ma ytundɨgooy, e nañ caꞌ pɨn huinꞌɨɨñ.
\v 23-24 Je Cristo co jäy ajcxy yꞌojɨ, caꞌ jeꞌ yꞌadzouhuimbijty; e co jäy ajcxy chaachytuunɨ, caꞌ mɨjotmäthuimbijty je jäy ajcxy, nïgɨ Dios yajpuhuanɨɨy. Com Dios jeꞌ paatɨp nej chaachytunaꞌñ huɨdi ajcxy tundɨgooyb. Je Cristo cɨꞌm yajnɨcx ɨɨch ajt ndzaachypɨ co yꞌoꞌcy cruudzcɨ́xy. E mɨɨd co jaduꞌn yꞌoꞌcy cruudzcɨ́xy mɨɨd ajt nbocy ycɨxpɨ, chi jëbɨ nꞌixmajtzɨm jɨbɨc-huinmaꞌñ etz tudägy jëbɨ ndzɨnaayɨm. Mɨɨd co Cristo je tzaachypɨ mɨnajxy yajnajxy mɨɨd ɨɨch ajt nbocy ycɨxpɨ, paady nïdzoocɨm ajt nꞌalma.
\v 25 Miich ajcxy jecyꞌajt mnɨɨdɨgooyb mdüdɨgooyb anajty ajcxy ma Dios, mgɨꞌmhuinmaꞌñ anajty ajcxy myajtumyb nidüg nidüg, jaduꞌn nej jäy yborregɨ ñɨɨdɨgoy ytüdɨgoy ma yuugjot. Cham miich ajcxy tɨ mnijothuimbijtcɨxy Dios, tɨ ajcxy mhuinmaꞌñymech tɨ mmɨjpɨdaaccɨxy Jesucristo je huɨdibɨ xycuendꞌajtp ajcxy.
\c 3
\s Nej huaad chɨnaaygɨxy pɨnjaty tɨ pɨjccɨxy
\p
\v 1-2 Jaduꞌn nej tumbɨdɨjc capxymɨdoy yhuindzɨn, nañ tɨm jaduꞌn miich ajcxy töxyjäydɨjc capxymɨdoogɨxy mñäy. Pen mñäy caꞌ capxymɨdoy Dios, caꞌ mɨjpɨdägaꞌñ Jesucristo, mɨɨd co miich oyjot oyhuinmaꞌñ myajtunɨpy mɨɨd yɨꞌ, ycadɨmjetyɨty huinꞌit mñäy yhuinmaꞌñymedzɨp etz mɨjpɨdägɨpy Jesucristo, co yꞌixɨpy nej miich mmɨɨdɨty tudägyꞌajtɨn. 
\v 3 Töxyjäydɨjc ajcxy, caꞌ mnaygömayɨɨyb mɨɨd mhuit mxojx 
oyjatpyɨ tzoujatypɨ, mɨɨd oorɨ cɨ̈jiitz etz oorɨ taatztɨy, mɨɨd co mgöhuay mdzachcüdɨ̈gy mɨɨd cüd oyjatyp.
\v 4 Hueꞌ janchtɨy jäy miich ajcxy xycömayɨp mɨɨd co oyjot oyhuinmaꞌñ anajty myajtungɨxy, mɨɨd co yung naxy mjot mhuinmaꞌñ ajcxy mɨɨdɨty. Co jaduꞌn mdúngɨxɨpy jada jeꞌ oy jäygɨdaacnɨ ma Dios huinɨxɨɨ. Yɨ mhuit yɨ mxojx etz oorɨ taatztɨy cɨxɨp tɨgoyɨp yɨꞌ.
\v 5 Nañ tɨm jaduꞌn anajty jecyꞌajty je töxyjäydɨjc huɨdibɨ anajty ajcxy cömay ijtp, yajtuuñ anajty ajcxy oyjot oyhuinmaꞌñ, ymɨjpɨdacyp anajty ajcxy Dios, nañ ycapxymɨdooyb anajty ajcxy ñäy.
\v 6 Jaduꞌn nej Sara capxymɨdooy Abraham. Sara xɨɨgoyäxy Abraham: “Ɨɨch nhuindzɨn.” Pen myajtumyb  miich ajcxy oyjot oyhuinmaꞌñ jaduꞌn nej Sara, jaduꞌn miich ajcxy anajty nej jɨhuɨ̈y Sara ajcxy xyꞌungꞌadyii, pen ooybɨ mdunɨpy ajcxy, caꞌ ti ajcxy mdzɨgɨ̈huɨpy.
\p
\v 7 Nañ jaduꞌn miich ajcxy yëydɨjctɨjc, yajtungɨx paꞌayoꞌn mɨɨd mdöxyɨjc, yajmɨjꞌajtcɨx. Com jac mɨc miich ajcxy caꞌydɨ yɨ töxyjäydɨjc. Dios mayꞌajt tɨ tuñ túꞌcɨy mɨɨd miich ajcxy, paady ycɨxpɨ copɨcy yajxon naymɨɨddzɨnáayɨgɨx jɨgɨx Dios cuendɨpɨgɨpy etz xymöhuɨpy tijaty ajcxy myajmɨbɨjctzooyb.
\s Co pɨnjaty xymɨdundɨgooy, caꞌ myajꞌahuimbidɨpy
\p
\v 8 Jada ayuc cham njacyajnɨmaydaayb nidügꞌócɨy miich ajcxy. Túꞌcɨy mjot mhuinmaꞌñ mɨꞌijtcɨx, naymɨgügꞌájtɨgɨx yajxon, naychójcɨgɨx nayjɨhuɨ́ɨyɨgɨx nidüg nidüg, naybaꞌayouhuɨgɨx nidüg nidüg, pɨdaaccɨx yung naxy mjot mhuinmaꞌñ.
\v 9 Co ajcxy mɨgüg xymɨdundɨgoyɨpy, caꞌ myajꞌahuimbidɨpy jaduꞌn nej anajty tɨ xytuñ. Co ajcxy mɨgüg xyñiꞌojɨ̈huɨpy, caꞌ myajꞌahuimbidɨpy jaduꞌn nej anajty tɨ xyñiꞌojɨ̈y. Nïgɨ nibɨjctzohuɨꞌ ma Dios mɨɨd yɨꞌ ajcxy ycɨxpɨ, nïgɨ mɨꞌoyjäyꞌat mmɨgüg. Huinꞌit nïgɨ Dios xyconuucxɨp.
\v 10 Com jiiby ymiñ jaybety ma Dios ñecy:
\q Pɨnjaty jotcujc tzɨnähuamb e yajnaxaꞌñ xɨɨ tiempo agujc jotcujc, nayꞌahuijtzɨ̈gɨɨb caꞌydɨ yꞌɨɨdɨgooy ycapxtɨgooy, caꞌydɨ yꞌanɨɨdägy.
\q
\v 11 
Huen jɨhuägy ma je jɨbɨcpɨ e huen oyjäyꞌajtɨn tuñ. Huen ixmach tügꞌócɨy tzipcapxy, caꞌ tzipcapxy ixtähuɨpy.
\q
\v 12 
Je Huindzɨn Dios ycuendꞌajtpy yɨꞌ je jäy huɨdibɨ tɨydudägy tzɨnaayb etz ypubejtcɨxyp ypudɨgɨygɨxyp mɨgügtɨjc co tijaty mɨbɨjctzoy. Dios ymɨjotmaꞌtpy je jäy ajcxy huɨdibɨ jɨbɨc-huinmaꞌñ tumb.
\p
\v 13 Pen mdumyb oyjot oyhuinmaꞌñ ajcxy, huinꞌit caꞌ pɨn ajcxy xymɨjotmädɨpy. 
\v 14 Co oyjot oyhuinmaꞌñ myajtunɨpy ajcxy e huinꞌit jäy xychaachytungɨxy, huinꞌit Dios xyconuucxɨp ajcxy, e caꞌ mdzɨgɨ́ɨygɨxɨpy, ni caꞌ mhuinmaꞌñydɨgóoygɨxɨpy.
\v 15 Mɨjpɨdaaccɨx yɨ Jesucristo ɨɨch ajt nHuindzɨn Dios cɨxyjot huinɨjot. Pen ji jäy xyꞌamɨdoogɨxy: ¿Ti co mdzachmɨjpɨdaaccɨxy Jesucristo? Tɨydudägy mꞌadzouhuɨpy mɨɨd yungꞌajt naxꞌajt jaduꞌn nej mjɨjpꞌijxcɨxy co Jesucristo xyajnïdzögaanɨ ajcxy yɨ mꞌalma. 
\v 16 Caꞌ mgapxɨpy ajcxy je ayuc huɨdibɨ xyajtzoꞌyduunɨp. Pen jäy ajcxy xymɨꞌɨɨdɨgooygɨxp xymɨgapxtɨgooygɨxp, chi ajcxy jɨhuɨ̈huamyb tzoꞌyduꞌn mɨɨd co caꞌ yjanchɨty nej ajcxy ymɨnaꞌñ com oybɨ anajty tɨ mdungɨxy.
\v 17 Pen Dios miich ajcxy jaduꞌn xyajnijotꞌajt co tzaachypɨ mmɨnájxcɨxɨpy myajnájxcɨxɨpy, jacꞌoy co tzaachypɨ mmɨnájxcɨxɨpy myajnájxcɨxɨpy mɨɨd yɨ mꞌoyjäyꞌajtɨn ycɨxpɨ, e caꞌ anajty tzaachypɨ mmɨnajxcɨxy myajnajxcɨxy mɨɨd co anajty tɨ mdundɨgooygɨxy.
\p
\v 18 Je Cristo nañ jaduꞌn tzaachypɨ mɨnajxy yajnajxy co yꞌoꞌcy cruudzcɨ́xy mɨɨd jäy ajcxy ypocy ycɨxpɨ. Oy jeꞌ anajty caꞌ tibocy mɨɨdɨty, chi jeꞌ tɨ codɨnäy je jäy ajcxy ypocy, e jaduꞌn ɨɨch ajt tɨ naymɨꞌoyɨɨyɨm mɨɨdɨ  Dios. Oy je Cristo ñinïcx yꞌoꞌcy, per jeꞌ yꞌalma caꞌ jeꞌ yꞌoꞌcy, jugypɨjcy jeꞌ jadügtecy mɨɨd jemybɨ ninïcx.
\v 19 Huinꞌit co Cristo yꞌoꞌcy, chi jeꞌ yꞌalma ñɨcxy, e capxhuäcxy yɨꞌ yꞌayuc ma jäy yꞌalma ajcxy huɨdibɨ jɨbɨctuuyb ijtp.
\v 20 Je jäy ajcxy jeꞌ jiiby yꞌalma ijtp jɨbɨctuuby huɨdibɨ anajty caꞌ capxymɨdoy Dios. Je taab Noé yajcojy je mɨj barco, ooy Dios ajcxy jecy ymɨmecxtujcɨ, huen tijy cayjothuimbijty ajcxy. Jëyɨ niductujc je jäy choocy ma je mɨjtuu je mɨjnɨɨgom. Jeꞌ co je jacjadyii caꞌ ajcxy yjothuimbijty.
\v 21 Jaduꞌn nej je nidujctujcpɨ ajcxy mɨjpɨdacy Dios yꞌayuc, e chi ajcxy choocy, nañ tɨm jaduꞌn ɨɨch ajt co nnɨɨbejtɨm jeꞌ ɨɨch ajt ndɨyꞌajtꞌajtɨm co nmɨjpɨdaacɨm Jesucristo je huɨdibɨ co yꞌoꞌcy jugypɨjc mɨɨd jemybɨ ninïcx, etz tɨ xyajhuaatzɨm njot nhuinmaꞌñ jɨgɨx ooy oy nayjɨhuɨɨyɨm, etz nañ jadügtecy co anajty nꞌoꞌcɨm xyajjugypɨjcɨm mɨɨd jemybɨ ninïcx.  Co nnɨɨbejtɨm, jeꞌ jeꞌ je tɨyꞌajt co Dios tɨ xyajhuaatzɨm njot nhuinmaꞌñ.
\v 22 Je Cristo tɨ jeꞌ ñɨcxy tzajpjoty. Jiiby jeꞌ cham yꞌity mɨjꞌaneꞌmbɨ ma Dios, yɨꞌ jeꞌ aneꞌmb je ángeles ajcxy huɨdi tzajpjoty tungmɨɨd etz huɨdijaty mɨcꞌajt mɨɨd tzajpjoty.
\c 4
\s Yajtungɨx je mɨcꞌajt huɨdibɨ Dios tɨ xymooygɨxy
\p
\v 1 Je Cristo ayoꞌn tzaachypɨ mɨnajx yajnajx co yhuɨdijty ya naaxhuiñybɨ, e chi yajtuuñ oyjot oyhuinmaꞌñ mɨɨd jäy ajcxy ycɨxpɨ. Paady ycɨxpɨ copɨcy miich ajcxy myajtunɨpy oyjot oyhuinmaꞌñ mɨɨd mɨgügtɨjc jaduꞌn nej Cristo yajtuuñ. Pen miich ajcxy mmɨnajxyp myajnajxyp tzaachypɨ mɨɨd co oyjot oyhuinmaꞌñ myajtuñ, chi caꞌ mjacnijotꞌajtɨp ajcxy jɨbɨc-huinmaꞌñ. 
\v 2 Jaduꞌn nej ajcxy mjactzɨnähuaꞌñ mjacjugyꞌadaꞌñ, caꞌ huaad mjacnijotꞌajtcɨxy je jɨbɨc-huinmaꞌñ. Hueꞌ janchtɨy mdunɨpy ajcxy jaduꞌn nej Dios tzocy. 
\v 3 Jecyꞌajty co anajty caꞌnɨ mnejhuɨɨygɨxy Jesucristo ytɨyꞌajt, jɨbɨc-huinmaꞌñ anajty ajcxy myajtumyb ma mdzɨnaayɨn mjugyꞌajtɨn, jaduꞌn nej jäy ajcxy jacjadyii huɨdibɨ caꞌnɨ nejhuɨɨygɨxy Dios ytɨyꞌajt. Chi anajty myajtungɨxy canaagnax je jɨbɨc-huinmaꞌñ, ooy ajcxy mnijotꞌajtcɨxy maynax jɨbɨc-huinmaꞌñ. Ooy anajty anaxy mdzachꞌüccɨxy vino, huinꞌit anajty ooy ajcxy ymügyii. Ooy anajty mnixondaaccɨxy coodz huɨdidɨɨ, huinꞌit anajty ooy mꞌuuccɨxy anaxy.  Ooy mnijotꞌajtcɨxy xɨɨ, ooy anajty mꞌojadajtcɨxy tzaadzech quipychech huɨdibɨ Dios caꞌ jäygɨdägy.
\v 4 Paady ycɨxpɨ je jäy ajcxy huɨdibɨ caꞌ nejhuɨɨygɨxy Dios ytɨyꞌajt, caꞌ ajcxy jäygɨdägy co caꞌ miich ajcxy cham jaduꞌn mꞌɨdɨ̈ch jaduꞌn nej yɨꞌ ajcxy yꞌɨdɨ̈ch, chi ajcxy jɨbɨc xyñigapxcɨxy xyñiꞌojɨɨygɨxy. 
\v 5 Caꞌ mdungɨxy cuendɨ yɨꞌ ajcxy, com Dios paatɨp nej ytɨydunaꞌñ ajcxy. Je Dios jeꞌ tɨydunamb nidügꞌócɨy jäy ajcxy huɨdibɨ cham jugyꞌajtp, etz tɨɨbɨ yꞌöccɨxy.
\v 6 Paady ycɨxpɨ tɨ yajnɨmäy Jesucristo ytɨyꞌajt je jäy tɨɨbɨ yꞌöccɨxy jɨgɨx yajtɨydunɨpy ajcxy mɨɨd Dios ytɨyꞌajt jaduꞌn nej yajtɨydunaꞌñ yɨꞌ ajcxy huɨdibɨ jacjugyꞌajtp cham. Jëbɨ huaad ajcxy yjugypɨjccɨxy jadügtecy etz yꞌidɨpy ajcxy jaduꞌn nej Dios yꞌity. 
\p
\v 7 Tɨ ytɨmyhuingonɨ je xɨɨ je tiempo mɨna ycɨxaanɨ ytɨgoyaanɨ tügꞌócɨy tijaty ya naaxhuiñybɨ. Paady ycɨxp tzocy co tɨydudägy etz huijycujc mdzɨnaygɨxɨpy, etz tzocy co mjacꞌojadadɨpy mjacmɨbɨjctzoohuɨpy ajcxy Dios. 
\v 8 Ooy ycopɨcyɨty co jacnaychójcɨgɨx jacnayjɨhuɨ́ɨyɨgɨx nidüg nidüg. Mɨɨd co mnaychójcɨgɨxy, paady ycɨxpɨ jëbɨ mnayméecxɨgɨxy.
\v 9 Naymɨꞌoyjäyꞌájtɨgɨx nidüg nidüg agujc jotcujc, caꞌ yꞌametz yjotmetzɨty.
\v 10 Yajtungɨx mɨɨd je mɨgügtɨjc jaduꞌn nej Dios xymooygɨxy ixpɨjcɨn nidüg nidüg. Naybubéjtɨgɨx naybudɨgɨ́ɨyɨgɨx miñ xyipy jaduꞌn nej jäy ajcxy huɨdibɨ yajxon Dios ytɨyꞌajt padungɨxp.
\v 11 Pen Dios tɨ xymooygɨxy ixpɨjcɨn jɨgɨx jëbɨ capxhuäcxy yɨꞌ yꞌayuc, yajxon Dios yꞌayuc mgapxhuäcxɨp. Pen miich xypaat pujɨ̈gɨɨ jëdzɨ̈gɨɨ,  yajxon mdunɨpy ajcxy jaduꞌn nej Dios huinmaꞌñ tɨ xymooygɨxy. Co yajxon Dios ytɨyꞌajt mguyduunɨpy, huinꞌit Dios cömayaꞌñ miich ajcxy, mɨɨd co tɨ mmɨjpɨdaaccɨxy Jesucristo. Je Jesucristo jeꞌ cömayꞌidɨp etz aneꞌmɨp huinɨxɨɨ huinɨtiempo.
\s Mɨmecxtujccɨxy tzaachypɨ ayoꞌn
\p
\v 12 Mɨgügtɨjc ajcxy huɨdibɨ ooy ndzocy njɨhuɨ̈yɨch, caꞌ ooy mhuinmayꞌahuɨdijtcɨxy co jäy xyꞌixhuɨdijtcɨxy xypahuɨdijtcɨxy, co jäy xychaachytunaangɨxy jɨgɨx jëbɨ ñiguëxɨ̈gɨpy pen janch mmɨbɨjccɨxy Jesucristo.
\v 13 Caꞌ ajcxy mdajɨpy mmayɨpy, jotcujc ajcxy mnayjɨhuɨ̈huɨɨyb jɨgɨx jëbɨ nañ jaduꞌn tzaachypɨ mmɨnajxcɨxy myajnajxcɨxy nej Cristo mɨnajxy yajnajxy tzaachypɨ. Co anajty jadügtecy Jesucristo ñayguëxɨ̈gyii ya naaxhuiñ mɨɨd ymɨcꞌajt yꞌoyꞌajt, jëbɨ ajcxy jotcujc mnayjɨhuɨ̈huɨɨb.
\v 14 Pen xymɨꞌɨɨdɨgooyb xymɨgapxtɨgooyb jäy ajcxy, mɨɨd co miich ajcxy tɨ mmɨjpɨdaaccɨxy Jesucristo, jotcujc mnayjɨhuɨ̈huɨpy, mɨɨd co miich ajcxy mɨɨd je Dios yjɨhuɨꞌñ etz Dios ymɨcꞌajt ma mjot mhuinmaꞌñ.
\v 15 Pen nidüg miich ajcxy ayoꞌn tzaachypɨ mbaatcɨxy, oy caꞌ anajty tɨ mjäyyajꞌöccɨxy, oy anajty caꞌ tɨ mmeetzcɨxy, oy anajty caꞌ tɨ mdundɨgooygɨxy, oy anajty caꞌ tɨ mnaybɨdáacɨgɨxy ma huingjäy tɨ ytundɨgooy,
\v 16 pen miich ajcxy tzaachypɨ mmɨnajxyp myajnajxp mɨɨd co tɨ mmɨjpɨdaaccɨxy Jesucristo, caꞌ ti tzoꞌyduꞌn mjɨhuɨ̈huɨpy, nïgɨ Jesucristo cömayꞌidɨpy.
\p
\v 17 Tɨ xɨɨ tiempo tɨm paatnɨ mɨna Dios tɨydunaꞌñ je jäy ajcxy huɨdibɨ cuydumb jeꞌ ytɨyꞌajt. Pen Dios ɨɨch ajt huɨdi nmɨbɨjcɨm xytɨyduunɨm e nbaatɨm hueenɨ tzaachypɨ, nïgɨ tzaachypɨ padaangɨxy ajcxy huɨdibɨ caꞌ mɨjpɨdaaccɨxy Dios.
\v 18 Pen je jäy huɨdibɨ oyjot oyhuinmaꞌñ mɨɨd mɨc tzaach padaangɨxy jeꞌ yꞌalma nïdzoocɨn, ¿ti jada ytunaangɨxy pɨnjaty jɨbɨc-huinmaꞌñ mɨɨd, pɨnjaty pocytungɨx?
\v 19 Pen tzaachypɨ mmɨnajxyp myajnajxyp ajcxy mɨɨd co Dios jaduꞌn chojcyp, caꞌ ajcxy mjotmetzcɨ̈huɨpy, nïgɨ ajcxy panɨcxcɨx payöygɨx oyhuinmaꞌñ, nïgɨ cɨxyjot huinɨjot mɨjpɨdägɨpy ajcxy Dios; com yɨꞌ miich ajcxy xyajcoj, e yɨꞌ xycuendꞌajtcɨxp; com Dios yɨꞌ jeꞌ tudägy etz ñïdɨnaayb jeꞌ yꞌayuc.
\c 5
\s Pedro capxhuijp je mɨbɨjpɨdɨjc
\p
\v 1  Jada ɨɨch miich ajcxy yajnɨmaayb huɨdibɨ nigohuajcꞌajtp je mɨbɨjcpɨdɨjc, ɨɨch nañ jaduꞌn nigohuajcꞌajtpyɨch mɨbɨjcpɨdɨjc. Ɨɨch nꞌijxyɨch co je Cristo ayoꞌn tzaachypɨ mɨnajxy yajnajxy. Nañ jaduꞌn ɨɨch yɨꞌ nmɨɨdꞌidaamybɨch jadügꞌoc co anajty ymiñ ya naaxhuiñ mɨɨd yꞌoyꞌajtɨn ymɨjꞌajtɨn. 
\v 2 Jada ɨɨch miich ajcxy nyajnɨmaayb: yajꞌixpɨjccɨx etz cuendꞌajtcɨx Dios yjäy agujc jotcujc. Caꞌ myajꞌixpɨgɨpy ajcxy ametz jotmetz, cuendꞌajtcɨx Dios yjäy, tɨm jaduꞌn nej jäy ycöbixy cuendꞌaty. Caꞌ meeñgɨ́xy myajꞌixpɨgɨpy ajcxy. Mɨɨd oyjot oyhuinmaꞌñ myajꞌixpɨjccɨxy.
\v 3 Caꞌ adzip ahuaꞌn mꞌaneꞌmɨpy Dios yjäy. Hueꞌ janchtɨy ijxpejt oybɨ yejccɨx. Cuydungɨx Dios ytɨyꞌajt. 
\v 4 Co anajty Jesucristo, je huɨdibɨ nihuindzɨnꞌajttaayb tügꞌócɨy, ñayguëxɨ̈gyii ya naaxhuiñ jadügꞌoc, chi cömay miich ajcxy mbɨdzɨmɨpy. Tɨm jaduꞌn nej jäy ajcxy co yꞌɨyɨɨygɨxy e co ymadaaccɨxy, chi cömay ypɨdzɨm ajcxy. Miich ajcxy cömay nañ jaduꞌn mꞌidɨpy huinɨxɨɨ. 
\p
\v 5 Myajmɨjꞌadɨpy anäctɨjc ajcxy, jeꞌ ajcxy huɨdibɨ nigohuajcꞌajtp je mɨbɨjcpɨdɨjc.  Ooy ycopɨcyɨty co nidügꞌócɨy miich ajcxy mnayyajmɨjꞌájtɨgɨxɨpy miñ xyɨpy mɨɨd oyjot oyhuinmaꞌñ. “Dios caꞌ jeꞌ jäygɨdägy pɨnjaty amɨj agɨx jäyꞌájtɨgɨxy. Dios ypubejtyp mɨɨd yꞌoyjot pɨnjaty yung naxy yjot yhuinmaꞌñ mɨɨd.”
\v 6 Mgapxcöbɨgɨpy ajcxy tɨydudägy Dios, je mɨjꞌaneꞌmbɨ, chi Dios xycömayɨpy mɨna anajty.
\v 7 Mɨbɨjctzougɨx Dios mɨɨd tügꞌócɨy tijaty jotmay ajcxy mɨɨdꞌajtyp, chi jëbɨ Dios xypubedɨpy xypudɨgɨ̈huɨpy ajcxy.
\p
\v 8 Huijycujc mꞌidɨpy ajcxy. Nïxɨꞌ mꞌidɨpy ajcxy. Com je mujcuꞌ huɨdibɨ xymɨɨdzipꞌajtɨm, ooy jeꞌ xyꞌixꞌijxɨm xypaꞌijxɨm. Hueꞌ xyajhuinmaꞌñydɨgoyaanɨm, tɨm jaduꞌn nej je caa co ixtay ti chüdzaamyb.
\v 9 Huindɨnaꞌ jɨjptɨnaꞌ ajcxy je mujcuꞌ. Yɨ jacjadyii jäy huɨdibɨ mɨjpɨdaaccɨxy Jesucristo, nañ ymɨnajxcɨxyp yajnajxcɨxyp tzaachypɨ nañ jaduꞌn.
\v 10 Co anajty ajcxy hueenɨ tzaachypɨ tɨ mꞌocyajnaxy, huinꞌit Dios xyajꞌoyɨɨyɨpy ajcxy yɨ mjot yɨ mhuinmaꞌñ, xyajmɨbɨgɨp ajcxy yɨꞌ ytɨyꞌajt, xyajjotmɨcpɨgɨp ajcxy. Com Dios yɨꞌ jeꞌ huɨdibɨ mayꞌajt tɨ tuñ mɨjcajee mɨɨd nidügꞌócɨy jäy ajcxy. Yɨꞌ jeꞌ huɨdibɨ tɨ yajꞌoyɨ̈y nej jëbɨ cömay huinɨxɨɨ nꞌijtɨm mɨɨd Jesucristo jiiby tzajpjoty.
\v 11 Huen Dios yꞌoyꞌajtɨn etz ymɨjꞌajtɨn idɨpy huinɨxɨɨ.
\s Capxpoocxɨn yajnajxp
\p
\v 12 Jada necy nyajniguejxy ajcxy mɨɨd Silvano ɨɨch ajt nmɨgüg huɨdibɨ ndijpyɨch co ooy yajmɨjꞌaty Jesucristo. Hueenɨ jada ayuc huɨdibɨ nyajnijayɨɨyb, nañ tɨ nbɨdägyɨch necyjoty capxhuijɨn etz tɨ nbɨdägyɨch necyjoty yɨ Dios ytɨyꞌajt tudägyp, nej Dios mayꞌajt oyꞌajt tuuñ mɨɨd miich ajcxy ycɨxpɨ. Mɨjpɨdaaccɨx nïgɨ Dios ytɨyꞌajt, caꞌydɨ mhuinmaꞌñydɨgooygɨxy.
\p
\v 13 Je jäy huɨdibɨ ya Babilonia huɨdibɨ ajcxy yajmɨj ꞌajtcɨxp Jesucristo, je jäy ajcxy huɨdibɨ Dios tɨ huinꞌixy, xyajniguejxp ajcxy capxpoocxɨn. Nañ jaduꞌn Marcos ɨɨch nmɨgüg, je huɨdibɨ njɨhuɨɨybɨch nej jɨhuɨ̈y ngɨꞌmꞌungꞌadyiijɨch xyajniguejxp capxpoocxɨn nañ jaduꞌn.
\v 14 Naygapxpóocxɨgɨx xïc xon nidüg nidüg miñ xyɨpy. Jeꞌ jeꞌ je tɨyꞌajt co mnaychójcɨgɨxy mnayjɨhuɨ́ɨyɨgɨxy miñ xyɨpy.
\p 
Jotcujc mnayjɨhuɨ̈huɨɨyb ajcxy nidügꞌócɨy huɨdib yajmɨjꞌajtp Jesucristo. Amén.