\id 2PE
\h 2 PEDRO
\toc1 2 PEDRO
\mt1 2 PEDRO
\mt2 Yɨ Mɨmetzpɨ Necy Huɨdibɨ San Pedro Yajniguejx Yɨ Mɨbɨjcpɨdɨjc
\c 1
\p
\v 1 Ɨɨch Simón Pedro, tumbɨch ma Jesucristo ytung. Yɨꞌ xyꞌapóstolꞌajtpɨch etz ngapxhuäcxpyɨch yɨꞌ yꞌayuc. Cham ɨɨch miich ajcxy jada necy nyajnijayɨɨygɨxy huɨdibɨ ajcxy tɨ mbaatcɨxy mɨbɨjcɨn janch oybɨ, tɨm jaduꞌn nej ɨɨch ajcxy tɨ nbáatcɨxyɨch mɨbɨjcɨn janch oybɨ. Ɨɨch ajt nDios je Jesucristo huɨdibɨ xyajnïdzoocɨm ajt nꞌalma tudägy jeꞌ, e tudägy ytuñ mɨɨd ɨɨch ajt nidügꞌócɨy.
\v 2 Huen Dios mɨjmayꞌajt tunɨpy mɨɨd miich ajcxy, etz jotcujcꞌajtɨn xymöhuɨpy mɨjcajee, mɨɨd co tɨyꞌajt tɨ mbaatcɨxy ma Dios etz ma je Jesús ɨɨch ajt nHuindzɨn.
\s Je mɨbɨjcpɨdɨjc chɨnaayɨn jugyꞌajtɨn
\p
\v 3 Dios mɨɨd jeꞌ ymɨjꞌajt tɨ xymooyɨm tügꞌócɨy huɨdibɨ nyajmayjajtɨm ma ajt njugyꞌajtɨn, nej huaad nguyduunɨm yɨꞌ ytɨyꞌajt etz nej yɨꞌ huaad nyajmɨjꞌajtɨm. Dios jaduꞌn mɨjmayꞌajt tuun mɨɨd ɨɨch ajt ycɨxpɨ co tɨ xyajnejhuɨɨyɨm Jesucristo yꞌayuc ytɨyꞌajt. Je Jesucristo tɨ xyhuinꞌijxɨm jɨgɨx jëbɨ nmɨɨdꞌajtɨm yɨꞌ ymɨjꞌajtɨn yꞌoyꞌajtɨn, etz jɨgɨx jëbɨ nduunɨm oyjäyꞌajtɨn nej Jesucristo tuuñ.
\v 4 Dios tɨ xymooyɨm huɨdibɨ janch oydiꞌcnɨ e janch copɨcyɨp jɨgɨx jëbɨ miich ajcxy mbaatcɨxy Dios yjɨhuɨꞌñ ymɨcꞌajt huɨdibɨ xyajtzɨnaaygɨxy mɨɨd huädz jot huinmaꞌñ, etz jɨgɨx jëbɨ mɨɨd jada ycɨxpɨ tɨɨbɨ xyajꞌahuanɨɨyɨm, miich ajcxy mjɨjpyöyduutcɨxy je jɨbɨcpɨ huɨdibɨ naaxhuiñyjäy ajcxy ñijotꞌajtcɨxyp.
\v 5-7 Com Dios mɨɨd ymɨcꞌajt tɨ xymooyɨm huɨdibɨ nyajmayjajtɨm, paady ycɨxp miich ajcxy naymɨcꞌíjxɨgɨxy co ajcxy mmɨbɨjcɨn mjacyajmɨjtɨgɨ́ɨygɨxɨpy tudägyꞌajtɨn; e mɨɨd mdudägyꞌajtɨn mjacyajmɨjtɨgɨ́ɨygɨxɨpy ajcxy Dios yꞌixpɨjcɨn; e mɨɨd je Dios yꞌixpɨjcɨn mjacyajmɨjtɨgɨ́ɨygɨxɨpy yɨ Dios yjɨhuɨꞌñ ymɨcꞌajt ma ajcxy mjot mhuinmaꞌñ huɨdibɨ mɨɨd mmɨmadägɨpy ajcxy yɨ jɨbɨcjot jɨbɨc-huinmaꞌñ; e mɨɨd je mɨcꞌajt ma ajcxy mjot mhuinmaꞌñ jacyajmɨjtɨgɨ̈huɨpy ajcxy mecxtujcɨn; e mɨɨd je mecxtujcɨn mnejhuɨ́ɨygɨxɨpy nej jëb huaad myajmɨjꞌajtcɨxy etz mdzɨgɨɨygɨxy Dios; e mɨɨd je mecxtujcɨn mjacyajmɨjtɨgɨ́ɨygɨxɨpy je tzojcɨn je jɨhuɨɨyɨn mɨɨd mɨgügtɨjc; e nañ mɨjtɨgɨ̈huɨpy nañ jaduꞌn je mɨbɨjcɨn nej jëb huaad Dios myajmɨjꞌajtcɨxy etz nej jëb huaad cɨxyjot huinɨjot mjacyajtungɨxy oyjäyꞌajtɨn.
\p
\v 8 Pen ma miich ajcxy mdzɨnaayɨn mjugyꞌajtɨn yajpattäy e ymɨjɨ̈y ymayɨ̈y, yɨ mjugyꞌajt ajcxy caꞌ yɨꞌ ñaadɨgɨ̈ꞌaty; nañ caꞌ anajty ajcxy naadɨgɨꞌ tɨ mmɨbɨjccɨxy ɨɨch ajt nHuindzɨn Jesucristo, tɨ mnejhuɨɨygɨxy yɨꞌ yꞌayuc ytɨyꞌajt.
\v 9 Pɨn jada caꞌ capxymɨdooy tügꞌócɨy jadayaabɨ capxhuijɨn ma yjugyꞌajtɨn, jaduꞌn yɨꞌ nipaady nej tüg huiintzpɨ o huɨdibɨ yꞌijxɨn con, tɨ jäydɨgoy co Jesucristo tɨ yajpocyñïhuaatzp.
\v 10 Paady ycɨxp miich ajcxy mɨgügtɨjc, naymɨcꞌíjxɨgɨxy tungɨx tügꞌócɨy jada jɨgɨx mnejhuɨ̈huɨpy ajcxy tɨydudägy co Dios tɨ xyajmɨbɨjccɨxy e tɨ xyhuinꞌijxcɨxy. Pɨdaaccɨx mhuinmaꞌñ co jada tɨyꞌajt huen copɨcy, huen tictztɨgɨ̈y ma miich ajcxy mjugyꞌajtɨn. E pen mdumyb ajcxy jaduꞌn, nimɨna mgapocycägɨxɨpy.
\v 11 E jaduꞌn miich ajcxy myajmöhuɨpy tɨydudägy tɨgɨydac mɨjpɨ ma ɨɨch ajt nHuindzɨn Jesucristo yꞌaneꞌmy, je huɨdibɨ xyajnïdzoocɨm ajt nꞌalma. E yɨꞌ yꞌaneꞌmɨn caꞌ ycɨxɨpy ytɨgoyɨpy nimɨna.
\p
\v 12 Paady ycɨxp ɨɨch miich ajcxy jatyɨmy yajjäymejtzcoodaangɨxy jada tɨyꞌajt. Oy miich ajcxy jada tɨyꞌajt mjajajtcɨxy mjanejhuɨɨygɨxy, e tudägy ajcxy mmɨbɨjccɨxy etz mmɨꞌijtcɨxy je tɨyꞌajt huɨdibɨ miich ajcxy cham mɨɨd.
\v 13 Mɨnaambɨch co yjanchɨty namɨ njactzɨnaayñɨch co ɨɨch miich ajcxy nmöhuɨpy capxhuijɨn.
\v 14 Ɨɨch ajt nHuindzɨn Jesucristo tɨ xyajnejhuɨ̈yɨch co tzojc nꞌixmadzɨpyɨch jada njugyꞌajtɨn (nꞌögɨbɨch).
\v 15 Paady ycɨxp naymɨcꞌixyiijɨch mɨctägy ma miich ajcxy co ngapxhuijcɨxy jɨgɨx co anajty nꞌögyɨch mjäymetzɨɨyb ajcxy tügꞌócɨy jada tɨyꞌajt.
\s Yɨꞌ ajcxy huɨdibɨ yꞌijxy je Cristo ymɨjꞌajtɨn yꞌoyꞌajtɨn
\p
\v 16 Ɨɨch miich ajcxy tɨ nyajꞌixpɨcy je tɨyꞌajt maabɨ nHuindzɨn Jesucristo, jaduꞌn nej Dios ymɨjꞌajt mɨɨdɨty, e jaduꞌn nej jeꞌ yhuimbidaꞌñ jadügꞌoc ya naaxhuiñ. E caꞌ ɨɨch ajcxy nyajꞌixpɨcy nɨgooꞌayuc anɨɨꞌayuc huɨdibɨ cɨꞌm tɨ ngojyɨch tɨ nmacxyɨch. Mɨɨd ɨɨch ngɨꞌmhuiin tɨ nꞌíjxcɨxyɨch je Huindzɨn Jesús ymɨjꞌajtɨn.
\v 17 Nꞌijx ɨɨch ajcxy co je Dios Teedy mooy ajt nHuindzɨn Jesucristo oyꞌajt etz mɨjꞌajt. E nañ nmɨdooyɨch ajcxy ayuc choñ ma je oybɨ Dios yꞌit, xyñɨmaayɨ: “Jada jeꞌ ɨɨch nꞌung huɨdibɨ ooy ndzocyɨch njɨhuɨ̈yɨch, e ooy jotcujc nayjɨhuɨ̈yiijɨch mɨɨd yɨꞌ ycɨxpɨ.”
\v 18 Ɨɨch ajcxy nañ jaduꞌn cɨꞌm tɨ nmɨdóogɨxyɨch je ayuc huɨdibɨ anajty tzomb tzajpjoty. Jɨm ɨɨch ajcxy anajty quipxyɨ mɨɨd je Huindzɨn Jesús ma je amay gop.
\p
\v 19 Nañ jaduꞌn nmɨɨdꞌajtɨm je ayuc jacꞌoybɨ jactɨɨybɨ. Jeꞌ jeꞌ je tɨyꞌajt je ayuc huɨdibɨ ajcxy yjay je Dios yꞌayucnajtzcapxɨɨybɨ jecyꞌajty. Oy miich ajcxy oybɨ mduñ co mꞌamɨdooꞌijtcɨxy je oybɨ tɨyꞌajt maabɨ Jesucristo huɨdibɨ jaduꞌn nipaady nej tüg jɨɨn tɨɨcxp agootztuum etz jaduꞌn nipaady nej je xɨɨ co yxɨɨmɨydäy, etz jaduꞌn nipaady nej je mɨjmadzaꞌ jayhuɨxtujcpɨ co ypɨdzɨmy. Jada tɨyꞌajt xycodɨɨcxɨp ajcxy mjot mhuinmaꞌñ.
\v 20 Cuendtungɨx miich ajcxy jada: tügꞌócɨy je tɨyꞌajt, huɨdibɨ Dios ytɨyꞌajtmɨɨdpɨ yejc huɨdibɨ ijtp jaybety ma Dios ylibro, caꞌ huaad pɨn yajnïgejɨp mɨɨd ycɨꞌmhuinmaꞌñ.
\v 21 Com je Dios yꞌayucnajtzcapxɨɨybɨ camɨna jeꞌ ajcxy ayuccapxhuäcxy mɨɨd ycɨꞌmdzojcɨn ycɨꞌmhuinmaꞌñ. Dios anajty ajcxy huinꞌíxyɨp jëbɨ ayuccapxhuäcxy mɨɨd Dios ycɨxpɨ com je Espíritu Santo anajty ajcxy mooyɨp ayuc huɨdibɨ ajcxy ycapxhuäcxyp.
\c 2
\s Yɨꞌ ajcxy huɨdibɨ yajꞌixpɨjcp anɨɨ
\p
\v 1 Per nañ ji anajty nañ jaduꞌn ayucnajtzcapxɨɨybɨ huɨdibɨ anajty ajcxy anɨɨdaacp ma je Israel jäy. E nañ jaduꞌn yjiꞌadɨpy ayuccapxhuäcxpɨ huɨdibɨ anɨɨ yajꞌixpɨgɨpy ma miich ajcxy. Jeꞌ ajcxy ayüch ameech yajꞌixpɨgɨpy ycɨꞌmꞌayuc ycɨꞌmhuinmaꞌñ huɨdibɨ ajcxy yajhuinmaꞌñydɨgooyɨpy je mɨbɨjcpɨdɨjc. Ymɨnaꞌñ ajcxy co caꞌ yjanchɨty je Huindzɨn Jesús yꞌayuc, je huɨdibɨ yajnïdzooc ajt nꞌalma, e jaduꞌn cɨꞌm ñayꞌayoꞌnmóoyɨgɨxy mɨɨd Dios mɨcꞌamy.
\v 2 Mayjäy ooy panɨcxaꞌñ je jɨbɨcpɨ huɨdibɨ ajcxy ytungɨxyp, e mɨɨd jeꞌ ajcxy ycɨxpɨ yajnigápxɨpy yajnimɨydägɨpy ajcxy jɨbɨc je huɨdibɨ ajcxy cuydumb je tɨɨybɨ ayuc, je Jesucristo yꞌayuc oybɨ.
\v 3 Mɨɨd co anajty tzachꞌadzojccɨxy meeñ, chi anajty xyhuimbɨjccɨxy xyhuimmeetzcɨxy mɨɨd ajcxy yꞌixpɨjcɨn caꞌp yjanchɨty. Per je pocycähuɨn ajcxy ahuijxɨp, caꞌ ma ñidzooy. Tɨ yjejcnɨ maabɨ ajcxy ypocycaꞌnɨ ma Dios. Dios tzaachytunɨɨb ajcxy mɨɨd ypocy ycɨxpɨ.
\p
\v 4 Dios caꞌ jeꞌ huinmeecxy je ángeles ajcxy huɨdibɨ tundɨgooygɨxp. Hueꞌ janchtɨy ycötijnajxtaayb ayoodactuuyb etz yajhuɨꞌmy agootztuuyb, cadenɨjɨ̈y yꞌijtcɨxy cuendꞌaty, ixtɨ coonɨ anajty paady xɨɨ tiempo co anajty yajtɨydunaꞌñ naaxhuiñyjäy mɨɨd ypocy ycɨxpɨ.
\v 5 Nañ ni caꞌ Dios huinmeecxy je naaxhuiñyjäy huɨdibɨ tundɨgooy jecyꞌajty. Chi quejxy ayoꞌnduu etz mɨjnɨɨgom ma je jɨbɨcjäydɨjc. Jëyɨ yajtzoocy je Noé huɨdibɨ capxhuäcx je tɨyꞌajt. Quipxy mɨɨd Noé yajtzoocy jahuixtujc yꞌamɨgügtɨjc.
\v 6 Dios nañ jaduꞌn tzaachytuñ mɨɨd ypocy ycɨxpɨ etz yajhuindɨgoy mɨɨd jɨɨn metz cajp, Sodoma etz Gomorra, ixtɨ coonɨ yajhuɨꞌmy accuyjam jɨgɨx yꞌidɨpy je ijxpejt ma je jɨbɨcjäydɨjc huɨdibɨ ajcxy jacꞌaxam jactzɨnähuam jacjugyꞌadam.
\v 7 Dios yajtzooc je Lot, hueꞌ jeꞌ anajty janch oyjäy, e janch ymɨɨd anajty jotmay co anajty je jɨbɨcjäydɨjc ajcxy ijxɨ chɨnaayɨn yjugyꞌajtɨn janch jɨbɨc.
\v 8 Jabom jabom anajty je Lot, je jäy oyjäybɨ huɨdibɨ anajty tzɨnaayb quipxyɨ mɨɨd je jɨbɨcjäydɨjc, ni caꞌ anajty yjotcujcꞌaty co anajty ixy mɨdoy nej anajty ytundɨgooygɨxy je jäy ajcxy caꞌpɨ ytudägyɨty.
\v 9 Dios mɨɨd mɨcꞌajt jëbɨ nihuaꞌñ yajtzögy pɨnjaty mɨbɨjccɨxp cɨxyjot huinɨjot co je mujcuꞌ yjotꞌíjxɨgɨxy huinmaꞌñꞌíjxɨgɨxy. Nañ jaduꞌn Dios mɨcꞌajt mɨɨdɨty jɨgɨx jëbɨ yajꞌijtcɨxy je jɨbɨcjäydɨjc mɨɨd tzaachypɨ ayoꞌn, huɨdibɨ ymöhuamy co anajty naaxhuiñyjäy tɨyduñ mɨɨd ypocy ycɨxpɨ.
\p
\v 10 Dios ymɨɨd mɨcꞌajt jëbɨ tzaachytunɨpy pɨnjaty tumb jɨbɨc-huinmaꞌñ nej ñinïcx nijotꞌajtcɨxy, e caꞌ ixaangɨxy je Huindzɨn Jesús yꞌoyꞌajtɨn ymɨjꞌajtɨn. Amɨj agɨx etz jotmɨc ajcxy nayjɨhuɨ̈yii. Ytumb ajcxy ycɨꞌmjot ycɨꞌmhuinmaꞌñ. Ni ycatzɨgɨɨygɨxy co oyñinej ajcxy niꞌojɨɨygɨxy pɨnjaty mɨcꞌajt mɨɨd ma Dios ytung.
\v 11 Oy je ángeles ajcxy mɨɨdɨty mɨjcötujcɨn etz aneꞌmɨn, caꞌp jeꞌ ajcxy yjot yhuinmaꞌñ mɨɨdɨty nɨcxy niꞌojɨɨygɨxy ma Dios yhuinduu pɨnjaty mɨcꞌajt mɨɨd ma Dios ytung.
\p
\v 12 Per jadayaab jɨbɨcjäydɨjc ajcxy jaduꞌn ajcxy yɨꞌ nej ɨyujc, caꞌ yhuinmaꞌñ; nɨgoob ytɨmyhuɨdity etz ymaꞌxunꞌajtcɨxy jɨgɨx jäy ymadzɨɨyb etz yajꞌögɨɨyb. Ñɨxiicpy yajxiicpy ajcxy yɨꞌ huɨdib caꞌ huinjɨhuɨꞌy. Per nañ tɨm jaduꞌn ajcxy yꞌögɨpy nej ɨyujc yꞌögy ytɨgoy.
\v 13 Cobadɨ̈huaangɨxy jaduꞌn nej tɨ ytundɨgooygɨxy. Hueꞌ nayjɨhuɨɨygɨxy capɨn yjaduꞌnɨty, yxondaaccɨxy tüg jaxɨ̈cyjaty. Jadayaab jäy ajcxy pocy ypaꞌtcɨ̈py ajcxy yɨꞌ chɨnaaygɨxy yjugyꞌajtcɨxy. Tüg tzoꞌyduꞌn co ajcxy nañ jaduꞌn xymɨjyöybejtcɨxy ma mꞌamugɨɨygɨxy.
\p
\v 14 Co ajcxy huindɨɨcxcɨxy töxyjäydɨjc, chi ajcxy ooy nijotꞌajtcɨxy co mɨɨd tundɨgoyaꞌñ. Caꞌp ajcxy chíjpɨgɨxy yꞌanucxɨɨygɨxy mɨɨd pocytunɨɨ. Yajtundɨgooygɨxy pɨnjaty amútzɨp ma mɨbɨjcɨn, ooy ajcxy yhuijɨty ycujcɨty ycohuinmaꞌñɨty ma meeñꞌadzoogɨɨ. Dios yajtɨgoyɨɨb ajcxy yꞌalma.
\v 15 Tɨgoyjäy yɨꞌ ajcxy, jeꞌ co tɨ ñɨɨdɨgajtzcɨxy tɨ ytüdɨgajtzcɨxy ma je tɨɨybɨ je janchypɨ tɨyꞌajt. Jeꞌ ajcxy ypanɨcxy ypayöyp je profeta Balaam yꞌijxpejt, je Beor yꞌung, co ooy ymeeñybadaꞌñ anajty mɨɨd yjɨbɨc-huinmaꞌñ.
\v 16 Chi Balaam oy yajꞌojyii ypocy tüg töxyburro, ycapxy jaduꞌn nej tüg jäy, e jaduꞌn jeꞌ yajhuäcxɨjpy je profeta Balaam mɨɨd jeꞌ ylocɨhuinmaꞌñ. 
\p
\v 17 Com jada jäy ajcxy caꞌ panɨcxcɨxy je janchypɨ tɨyꞌajt, paady ycɨxp jaduꞌn ajcxy nipaady nej tüg nɨɨpozojut caꞌpɨ ñɨɨ mɨɨdɨty, etz jaduꞌn ajcxy nipaady nej joc huɨdibɨ poj yajyöyɨp (caꞌ ytuꞌy). Dios möhuɨɨb ajcxy tzaachypɨ mɨɨd ypocy ycɨxpɨ, idam ajcxy agootztuuyb huinɨxɨɨ huinɨtiempo.
\v 18 Com ycapxyp ajcxy ayuc huɨdibɨ caꞌ choubaady. E mɨɨd je jɨbɨc-huinmaꞌñ ycɨxpɨ huɨdibɨ ajcxy chachnijotꞌajtpy yajtundɨgooygɨxy pɨnjaty tɨɨbɨ choongɨxy ma je huɨdibɨ ajcxy tzɨnaayb mɨɨd jɨbɨc-huinmaꞌñ.
\v 19 Yɨꞌ ajcxy yajꞌixpɨjcp je mayjäy co jëbɨ tungɨxy huentɨm ti huɨdibɨ ajcxy ñijotꞌajtpy. Per yɨꞌ ajcxy huɨdib jɨbɨc-huinmaꞌñ yajꞌixpɨjcp, cɨꞌm ajcxy ñayꞌíjtɨgɨxy pocypaꞌtcɨ̈py, je pocy tzachꞌaneꞌmb ajcxy yjot yhuinmaꞌñ, ixtɨ jaduꞌn nipaady nej jɨhuɨ̈y ajcxy aneꞌmy yꞌity.
\v 20 Pɨnjaty tɨ ymɨbɨjccɨxy tɨ ñejhuɨɨygɨxy je Huindzɨn Jesucristo ytɨyꞌajt huɨdibɨ yajnïdzoocp ajcxy yꞌalma, e jaduꞌn tɨ yjɨhuäccɨxy ma je naaxhuiñyjäy yjɨbɨctzɨnaayɨn yjɨbɨcjugyꞌajtɨn, pen jadügꞌoc anajty yꞌayöyɨɨyñɨp ma je jɨbɨcpɨ, e je jɨbɨcpɨ ymɨmadägyii ajcxy, oꞌctɨy anajty nïgɨ yhuɨꞌmgɨxy caꞌydɨ nej je jayɨjpꞌatypɨ.
\v 21 Nïgɨ oy co ixyipy jeꞌ ajcxy caꞌ ytɨmnejhuɨɨygɨxy je janchypɨ tɨyꞌajt. Com tɨ ocnejhuɨɨygɨxyp, e chi jadaꞌ yꞌixtɨgɨ̈huäccɨxy ma je huätzpɨ Dios ycötujcɨn huätzpɨ Dios ytɨyꞌajt tɨɨbɨ anajty yꞌocjamóoyɨgɨxy.
\v 22 Per jeꞌ yɨꞌ ajcxy ytɨmycuydumy nej je ayuc yꞌity: “Je uc ycɨꞌmꞌɨɨch ñihuimbijtpy, e je ɨdzɨm huɨdibɨ namdziidaayb, nɨcxy jeꞌ yajtznɨp yquitnɨp moꞌntzjoty jadügꞌoc.”
\c 3
\s Je Huindzɨn Jesús huimbidaamb ya naaxhuiñ
\p
\v 1 Miich ajcxy mɨgügtɨjc huɨdibɨ ɨɨch ooy ndzocyɨch ooy njɨhuɨ̈yɨch, jada jeꞌ je mɨmetzpɨ necy huɨdibɨ ajcxy nyajnijayɨɨyb. Ma jada metzpɨ necy hueꞌ ɨɨch ndzogaꞌñɨch co nyajhuinmaꞌñymedzip ajcxy ma Dios ytɨyꞌajt mɨɨd jada capxhuijɨn huɨdibɨ tɨ njaayɨch.
\v 2 Tɨ nnijayɨɨygɨxy jɨgɨx mꞌajɨhuɨ̈huɨɨyb ajcxy je ayuc huɨdibɨ ajcxy paꞌtcɨ̈pyꞌaty ñajtzcapxɨɨy je Dios yꞌayucnajtzcapxɨɨybɨ ajcxy huɨdibɨ huädz yhuinmaꞌñ anajty ymɨɨd. Nañ ajɨhuɨ́ɨyɨgɨx je Huindzɨn Jesucristo jeꞌ yꞌaneꞌmɨn huɨdibɨ yajnïdzoocp ajt nꞌalma, je aneꞌmɨn huɨdibɨ apóstoltɨjc miich ajcxy xyajnɨmaayb.
\p
\v 3 Nejhuɨɨygɨxy miich ajcxy jada jayɨjp ma yam caꞌnɨ yhuaadꞌajtnɨ mɨna naaxhuiñ ycɨxɨpy, miinɨp jäy ajcxy huɨdibɨ nixïgɨp yajxïgɨp huɨdibɨ Dios yjëꞌajtpy. Chɨnaaygɨxy yjugyꞌajtcɨxy anajty mɨɨd jɨbɨc-huinmaꞌñ huɨdibɨ cɨꞌm ñijotꞌajtcɨxyp.
\v 4 Chi ajcxy ymɨnaꞌnɨp: “¿Ti co mdzachmɨbɨjccɨxy co Cristo yhuimbidaꞌñ jadügꞌoc ya naaxhuiñ? Nej ajcxy jeꞌ yꞌoꞌctay je mɨjꞌap je mɨjteedy, jeꞌnɨ yꞌijttäy tügꞌócɨy jaduꞌn nej naaxhuiñybɨ chondacy. Paady caꞌ yjanchɨty co je Cristo yhuimbidaꞌñ jadügꞌoc ya naaxhuiñ,” jaduꞌn ymɨnaangɨxy.
\v 5 Yɨꞌ ajcxy caꞌ huinjɨhuɨ̈huaangɨxy cuendtunaangɨxy co mɨɨd Dios yꞌayuc yɨ tzajp jiꞌajtp anajty yɨꞌ tzachjecyɨp, e mɨɨd Dios yꞌaneꞌmɨn huinꞌit je naax oy yguëxɨ̈gy huɨdibɨ ijtp anajty nɨɨjoty.
\v 6 Nañ jaduꞌn mɨɨd Dios yꞌayuc je jecyꞌajtpy naaxhuiñyjäy yꞌayoꞌnbaty, ñɨɨjïcxtay nidügꞌócɨy e ytɨgoyday nɨɨjoty.
\v 7 Per Dios mɨɨd yɨꞌ yꞌayuc yajꞌijtpy jada naaxhuiñybɨ etz tzajp huɨdibɨ cham jiꞌajtp ixtɨ coon yajtɨgoydähuɨpy mɨɨd jɨɨn. Je jɨɨn huinꞌit jeꞌ nöctähuaꞌñ co anajty yhuaadꞌajtnɨ ma Dios tɨydunaꞌñ je camadacpɨdɨjc je jɨbɨcjäydɨjc, etz yajtɨgoyaꞌñ ajcxy yꞌalma.
\p
\v 8 Jadügnax miich ajcxy mɨgügtɨjc huɨdibɨ ooy ndzocy njɨhuɨ̈yɨch, caꞌ mjäydɨgooygɨxy co ma yɨ Huindzɨn Dios, tüg xɨɨ jaduꞌn yɨꞌ nej tüg mil jɨmɨjt, e tüg mil jɨmɨjt jaduꞌn yɨꞌ nej tüg xɨɨ.
\v 9 Caꞌ nmɨnaanɨm co yɨ Dios yajhuäcxɨbaamyñɨ yɨꞌ mɨna cuydunaꞌñ huɨdibɨ yɨꞌ tɨ ahuanɨ̈y, jaduꞌn nej nijëjɨty jäy aꞌɨxɨɨygɨxy. Dios yajtumyb mecxtujcɨn mɨɨd miich ajcxy, com hueꞌ yɨꞌ tzocy co ni tüg jäy ayoꞌn paadɨpy. Yɨꞌ chojcpy co nidügꞌócɨy jäy huen jothuimbijtcɨxy etz ixmajtzcɨxy pocytunɨɨ.
\p
\v 10 Co anajty je Huindzɨn Jesús ymiiñ jadügꞌoc ya naaxhuiñybɨ chaachytunɨpy jeꞌ tügꞌócɨy jɨbɨcjäydɨjc, hueꞌ jeꞌ ytunɨɨyb yjadɨɨyb ma anajty caꞌ pɨn jɨjpꞌixy, jaduꞌn nej tüg meetzpɨ ymiiñ coodz co meedzaꞌñ tijaty. Huinꞌit je tzajp yhuindɨgoydähuɨpy mɨɨd tüg neꞌmɨn jɨdijtɨn oychɨgɨɨyñɨp. E tügꞌócɨy huɨdibɨ mɨɨd ndzɨnaayɨm njugyꞌajtɨm toydähuɨp yɨꞌ mɨɨd jɨɨn, yɨ naax toydähuɨp yɨꞌ, etz tijaty yajpatp ya naaxhuiñ toydähuɨp nañ jaduꞌn.
\p
\v 11 Com tügꞌócɨy tijaty huɨdibɨ jiꞌajtp yhuindɨgoydähuaꞌñ mɨɨd jɨɨn, paady ycɨxpɨ nïgɨ copɨcy miich ajcxy co mdzɨnaaygɨxp tudägy e myajmɨjꞌajtcɨxyp Dios.
\v 12 Ahuijxcɨx ajcxy je xɨɨ tzuu mɨna Dios anajty yajhuaadꞌaty co yajhuindɨgoyaꞌñ je naaxhuiñybɨ. Naymɨcꞌíjxɨgɨx co tzojc yminɨpy yɨ jaduꞌmbɨ xɨɨ tzuu. Co yhuaadꞌajtnɨp huinꞌit xɨɨ, je tzajp yhuindɨgoydähuɨp mɨɨd jɨɨn; je xɨɨ poꞌ, je pojp xemembɨ, je tuu enee jaduꞌñyɨ ytɨcxtähuɨpy yjɨydähuɨpy jɨɨnjoty.
\v 13 Per ɨɨch ajt nꞌahuijxɨm je jemybɨ tzajp jemybɨ naax huɨdibɨ Dios tɨ xyajꞌahuanɨɨyɨm, tüg tzɨnaaydac janchꞌoybɨ ma caꞌ ti jɨbɨcpɨ.
\p
\v 14 Paady ycɨxp miich ajcxy mɨgügtɨjc huɨdibɨ ɨɨch ooy ndzocyɨch njɨhuɨ̈yɨch, namɨ mꞌahuijxyp miich ajcxy co Dios yajhuindɨgoyaanɨp jada naaxhuiñ, naymɨcꞌíjxɨgɨx ma tügꞌócɨy ajcxy yɨ mdzɨnaayɨn co mguydunɨpy ajcxy Dios ytɨyꞌajt jɨgɨx ajcxy Dios xypaadɨpy, caꞌ ajcxy ti tzip ti gapxy, ni ti jɨbɨcpɨ, e ni ti pocy, ac huädz jot huädz huinmaꞌñ anajty mɨɨdꞌajtcɨxy.
\v 15 Cuendɨtungɨx je mecxtujcɨn huɨdibɨ ɨɨch ajt nHuindzɨn Jesucristo yajtumyb mɨɨd ɨɨch ajt jɨgɨx jëbɨ xyajnïdzoocɨm ajt nꞌalma. Nañ jaduꞌn yɨꞌ, ɨɨch ajt nmɨgüg Pablo huɨdibɨ ooy ndzojcɨm, tɨ miich ajcxy xyñijayɨɨygɨxy, jaduꞌn nej ixpɨjcɨn Dios tɨ ymöyii ma yɨꞌ yꞌayuc.
\v 16 Ma tügꞌócɨy Pablo ñecy tɨɨbɨ xyajniguejxcɨxy, jada tɨyꞌajt tɨ xyajmɨɨdmɨydaaccɨxy. Nijëjɨty Pablo ñecy ooy chachchiphuinjɨhuɨɨyñɨty, e nijëjɨty jäy ajcxy tɨgach ajcxy huinjɨhuɨ̈y Pablo yꞌayuc, caꞌ ajcxy huinjɨhuɨ̈y nej Pablo yjamɨnaꞌnaꞌñ.  Huingjaty ajcxy nïguej Pablo yꞌayuc, e cɨꞌm ñayyajhuinmaꞌñydɨgóoyɨgɨxy.
\p
\v 17 Paady ycɨxp miich ajcxy mɨgügtɨjc huɨdibɨ ooy ndzocy njɨhuɨ̈yɨch, miich mnejhuɨydaaygɨx jada tɨyꞌajt. Nayguendꞌájtɨgɨx caꞌydɨ jɨbɨcjäydɨjc mɨɨd yꞌanɨɨ xyajnɨɨdɨgajtzcɨxy xyajtüdɨgajtzcɨxy, e caꞌydɨ mꞌixtɨgɨ̈huäccɨxy ma ajcxy mmɨbɨjcɨn jaduꞌn nej tɨydudägy tɨ mmɨbɨjccɨxy.
\v 18 Huen ɨɨch ajt nHuindzɨn Jesucristo huɨdibɨ yajnïdzoocp ajt nꞌalma nïgɨ mayꞌajt oyꞌajt tunɨpy mɨɨd miich ajcxy, e nañ nïgɨ yujcpedɨpy ajcxy yɨ mꞌixpɨjcɨn ma yɨꞌ ytɨyꞌajt. Huen Jesucristo cömay yꞌidɨpy etz mɨꞌidɨpy oyꞌajtɨn mɨjꞌajtɨn jadachambɨ xɨɨ tiempo etz jaduꞌn nej xɨɨ tiempo miimb cɨdacp. Jaduꞌn ngapxycɨ́xyɨch. Amén.