\id 1JN
\h 1 JUAN
\toc1 1 JUAN
\mt1 1 SAN JUAN
\mt2 Yɨ Jayɨjpɨ Necy Huɨdibɨ San Juan Yajniguejxy Je Mɨbɨjcpɨdɨjc Nidügꞌócɨy 
\c 1
\p
\v 1 Dios yꞌayuc jiiyɨm anajty co naaxhuiñybɨ chondacy. E tɨyꞌajt  nyejcypɨch jaduꞌn nej nmɨdooyɨch cɨꞌm yɨꞌ yꞌayuc, jaduꞌn nej nꞌijxyɨch mɨɨd ngɨꞌmhuiinɨch, jaduꞌn nej nhuindɨɨcxyɨch yɨꞌ cɨꞌm, e nañ jaduꞌn nej nnïdoñɨch mɨɨd ngɨꞌmgɨ̈jɨch. Nyajnijayɨɨybɨch miich ajcxy jada necy jaduꞌn nej je Cristo je Dios yꞌung yjugyꞌajtɨn yegaꞌñ huɨdibɨ caꞌ cɨxaꞌñ tɨgoyaꞌñ nimɨnaabɨ.
\v 2 Tɨ ñayguëxɨ̈gyii ya naaxhuiñ je Dios yꞌung huɨdibɨ ymɨɨd jugyꞌajtɨn huɨdibɨ caꞌ nimɨnaabɨ ycɨxɨpy ytɨgoyɨpy. Tɨ nꞌixyɨch ajcxy jɨgɨx jëbɨ tɨyꞌajt nyéjccɨxyɨch co tɨ ñayguëxɨ̈gyii ya naaxhuiñ, etz tɨ nꞌixyɨch jɨgɨx jëbɨ nyajnɨmaaygɨxy nej jëbɨ huaad huingbɨ jugyꞌajtɨn nbaatɨm co anajty tɨ nꞌoꞌcɨm. Je Dios yꞌung, je huɨdibɨ jiiby ijtp ma Dios Teedy, nayguëxɨ̈cɨ jeꞌ ma ɨɨch ajcxy.
\v 3 Je huɨdibɨ ɨɨch ajcxy nꞌijxɨch nmɨdohuɨch, cham miich ajcxy nyajnɨmaaygɨxy jɨgɨx jëbɨ ajt túꞌcɨy nꞌijtɨm ma Dios ytɨyꞌajt, etz nañ jɨgɨx jëbɨ túꞌcɨy ajt nꞌojadajtɨm Dios etz jeꞌ yꞌung.
\v 4 Paady ycɨxp jada tɨyꞌajt nyajnijäyɨ̈y ajcxy jɨgɨx ajcxy jotcujcꞌajtɨn mbattáaygɨxɨpy mɨɨd jada ayuc tɨyꞌajt.
\s Dios yɨꞌ jeꞌ je tɨɨcxɨn jájɨn
\p
\v 5 Jadayaabɨ Dios yꞌayuc ytɨyꞌajt Jesucristo tɨ xyajnɨmäyɨch e nañ cham ɨɨch miich ajcxy nyajnɨmaaygɨxy. Dios huädz ytɨyꞌajt mɨɨdɨty, caꞌ ma Dios anɨɨdägy. Jaduꞌn Dios nipaady nej tüg jɨɨn ytɨɨcxy ma tüg it e ni caꞌ ni mɨna ypïch.
\v 6 Co nmɨnaanɨm co Dios ajt mɨɨd nꞌijtɨm túꞌcɨy, e caꞌ yjanchɨty, caꞌ anajty ajt Dios ytɨyꞌajt nyajtuunɨm, jaduꞌn nipaady nej jɨhuɨ̈y ndzɨnaayɨm agootztuum. Nɨgoo nꞌɨɨndaacɨm, caꞌ anajty ajt nguyduunɨm Dios ytɨyꞌajt. 
\v 7 Co nguyduunɨm Dios ytɨyꞌajt jaduꞌn nej yɨꞌ ytɨyꞌajt mɨɨdɨty, jaduꞌn nipaty nej jɨhuɨ̈y ndzɨnaayɨm ma jɨɨn ytɨɨcxy. Huinꞌit jëbɨ ajt nꞌijtɨm túꞌcɨy miñ xyɨpy, e Dios xyajpocynïhuaatztaayɨm co Jesucristo  yꞌoꞌcy etz ñɨꞌpy teemy gujy mɨɨd ɨɨch ajt nbocy ycɨxpɨ. 
\p
\v 8 Co ixyipy nmɨnaanɨm co caꞌ nbocytuunɨm, nɨgoob nayhuinꞌɨɨnɨm cɨꞌm, e caꞌ jaduꞌn Dios ytɨyꞌajt yajpaady ma ɨɨch ajt njot nhuinmaꞌñ. 
\v 9 Pen ngapxypɨdzɨmɨm ajt nbocy ma Dios, yɨꞌ ñïdɨnaayb yɨꞌ yꞌayuc huɨdibɨ tɨ xyajnɨmaayɨm co ymecxamy ajt nbocy, e nañ tudägy ytuñ mɨɨd ɨɨch ajt ycɨxpɨ. Dios xyhuinmeecxɨm ajt nbocy etz xyajhuaatzɨm njot nhuinmaꞌñ jëbɨ nꞌixmajtzɨm jɨbɨc-huinmaꞌñ. 
\v 10 Co ajt nmɨnaanɨm co caꞌ nbocytuunɨm, hueꞌ anajty Dios nyajnajxɨm anɨɨ, e caꞌ anajty tɨ ngöbɨjcɨm cɨxyjot huinɨjot yɨꞌ ytɨyꞌajt.
\c 2
\s Cristo, ɨɨch ajt nhuingapxpɨ ma Dios
\p
\v 1 Miich ajcxy mɨgügtɨjc huɨdibɨ ooy ndzocy njɨhuɨ̈yɨch jaduꞌn nej ixyipy ngɨꞌmꞌungɨch ngɨꞌmꞌanäcɨch, cham jada tɨyꞌajt nyajnijayɨɨygɨxy, jɨgɨx caꞌ ajcxy mdundɨgóoygɨxɨpy. Pen ji nidügtɨ miich ajcxy huɨdibɨ tundɨgooyb, jada mɨgüg huɨdibɨ tundɨgooyb huen mɨbɨjctzoy Dios ma Jesucristo yxɨɨ mɨɨd  ypocy ycɨxpɨ. Jesucristo yɨꞌjeꞌ huingapxp ma Dios Teedy mɨɨd ajt nbocy ycɨxpɨ. Tudägy jeꞌ, e jëbɨ xyhuingapxɨm ma Dios  Teedy.
\v 2 Com Jesucristo tɨ yꞌögy mɨɨd ɨɨch ajt nbocy ycɨxpɨ, paady ycɨxp jëbɨ capxꞌoyɨ̈y ma Dios mɨɨd ɨɨch ajt ycɨxpɨ e xycapxꞌoyɨɨyɨm ɨɨch ajt nbocy etz nañ capxꞌoyɨɨyɨp tügꞌócɨy naaxhuiñy jäy ajcxy ypocy, yɨ jäy ajcxy pɨnjaty yɨꞌ yꞌayuc ytɨyꞌajt mɨjpɨdaacɨp.
\p
\v 3 Co Jesucristo ytɨyꞌajt nguyduunɨm yajxon, huinꞌit nejhuɨɨyɨm tɨydudägy jaduꞌn nej Dios mayꞌajt oyꞌajt tɨ tuñ mɨɨd ɨɨch ajt ycɨxpɨ.
\v 4 Co ixyipy pɨnjaty ymɨnaꞌñ co ñejhuɨɨyɨ Jesucristo ytɨyꞌajt e caꞌ cuychɨnaayɨ yɨꞌ ytɨyꞌajt hueꞌ yɨꞌ tzach anɨɨdaacpɨ, e caꞌ mɨɨdɨty Dios ytɨyꞌajt.
\v 5 Yɨ jäy ajcxy pɨnjaty cuychɨnaayb cuyjugyꞌajtp yajxon Jesucristo yꞌayuc ytɨyꞌajt, janch tɨydudägy anajty yajmɨjꞌaty Dios. Co nguychɨnaayɨm nguyjugyꞌajtɨm yajxon Jesucristo ytɨyꞌajt, huinꞌit jëbɨ nejhuɨɨyɨm co nyajmɨjꞌajtɨm Dios.
\v 6 Yɨ jäy ajcxy pɨnjaty mɨnamb co ymɨɨd Jesucristo yꞌayuc ytɨyꞌajt ma jeꞌ yꞌay yjot, copɨcy ajcxy chɨnáaygɨxyɨpy jugyꞌájtcɨxɨpy tɨm jaduꞌn nej Jesucristo chɨnay jugyꞌajty.
\s Je jemybɨ aneꞌmɨn
\p
\v 7 Miich ajcxy mɨgügtɨjc huɨdibɨ ooy ndzocy njɨhuɨ̈yɨch, caꞌ nmɨnaanɨm jemybɨ tɨyꞌajt ajcxy nyajnɨmähuamy ma jada necy. Jeꞌ jada je tɨyꞌajt huɨdibɨ jecyꞌajty tɨ mnejhuɨɨygɨxy co ogaꞌn ajcxy mmɨjpɨdacy Jesucristo. Jada tɨyꞌajt jecyɨp jada jeꞌ huɨdibɨ cham ajcxy mmɨdooyb jadügꞌoc.
\v 8 Nañ jemy jada tɨyꞌajt nañ jaduꞌn huɨdibɨ nyajnɨmaaygɨxyp ma jada necy. Jada jeꞌje tɨyꞌajt huɨdibɨ Jesucristo ymɨɨd ma yjot yhuinmaꞌñ etz nañ ɨɨch ajt nmɨɨd ma ajt njot nhuinmaꞌñ. Yɨ jecyɨp ayuc huɨdibɨ caꞌ ytɨyꞌajtɨty, tɨ yɨꞌ ñaxy e cham Dios ytɨyꞌajt tɨydudägy nyajtuunɨm, jaduꞌn nej jɨhuɨ̈y je coodzpɨ tɨ ñaxy e cham tɨ yxɨɨmɨ̈y.
\p
\v 9 Yɨ jäy ajcxy huɨdibɨ mɨnam co Dios yꞌayuc ytɨyꞌajt ajcxy cuyduunɨ e caꞌ ixáanɨgɨxy ymɨgügtɨjc, caꞌ yɨꞌ ajcxy tɨydudägy Dios yꞌayuc yajtuunɨ, jaduꞌn yhuimbɨdzɨmy jaduꞌn nej jɨhuɨ̈y agootztuuy ijtcɨxy. 
\v 10 Yɨ jäy ajcxy pɨnjaty tzojcp jɨhuɨɨyb ymɨgügtɨjc hueꞌ yɨꞌ yajpaatcɨxy mɨɨd Dios ytɨyꞌajt ma ajcxy yjot yhuinmaꞌñ, jaduꞌn nipaady nej jɨhuɨ̈y yꞌijtcɨxy ma xɨɨ ytɨɨcxy, caꞌ ajcxy ñɨɨdɨgoy ytüdɨgoy ma Dios ytɨyꞌajt.
\v 11 Yɨ jäy ajcxy pɨnjaty caꞌ ymɨgüg ixaangɨxy, caꞌ yɨꞌ ajcxy Dios ytɨyꞌajt ajcxy yajtuunɨ, jaduꞌn nipaady nej jɨhuɨ̈y agootztuuby yꞌijtcɨxy, caꞌ ajcxy chɨnaaygɨxy nej Dios ytɨyꞌajt yjaꞌanéꞌmɨgɨxy, caꞌ ajcxy nejhuɨɨygɨxy huɨdibɨ tɨyꞌajt jëbɨ yajtungɨxy, com jɨbɨc-huinmaꞌñ chachtuumyb ajcxy huɨdibɨ caꞌ Dios tɨyꞌajtꞌadyii. 
\p
\v 12 Miich ajcxy mɨgügtɨjc huɨdibɨ ooy ndzocy njɨhuɨ̈yɨch ajcxy jaduꞌn nej ixyipy ngɨꞌmꞌung ngɨꞌmꞌanäcɨch, com Dios tɨ miich ajcxy mbocy xyhuinmecxtayɨ co Jesucristo yꞌoꞌcy mɨɨd ajcxy mbocy ycɨxpɨ, paady ycɨxp cham nnijayɨɨygɨxy.
\v 13 Cham nnijayɨɨygɨxy miich ajcxy mɨjꞌanäctɨjc, com tɨ mmɨjpɨdaaccɨxy Jesucristo huɨdibɨ jiiꞌajt co naaxhuiñybɨ ogaꞌn choondacy etz chambaad yjiiꞌatyñɨ. Cham nnijayɨɨygɨxy miich ajcxy anäctɨjc, com  tɨ mmɨmadaaccɨxy je caꞌoybɨ. 
\p
Cham nnijayɨɨygɨxy miich ajcxy piꞌctɨjc mutztɨjc com tɨ mmɨjpɨdaaccɨxy Dios Teedy. 
\v 14 Cham nnijayɨɨygɨxy miich ajcxy mɨjꞌanäctɨjc, com tɨ mmɨjpɨdaaccɨxy ajcxy Jesucristo huɨdibɨ jiiꞌajt co naaxhuiñybɨ ogaꞌn chondacy etz yjiiꞌatyñɨ chambaad. Cham nnijayɨɨygɨxy miich ajcxy anäctɨjc, com mɨc mjot mhuinmaꞌñ mɨɨdɨty ajcxy etz Dios ytɨyꞌajt yajpatp ma ajcxy mjot mhuinmaꞌñ, paady ycɨxp ajcxy tɨ mmɨmadaaccɨxy yɨ caꞌoybɨ. 
\p
\v 15 Mɨgügtɨjc, caꞌ anaxy mꞌadzójccɨxɨp yɨ huɨdibɨ mɨɨd ndzɨnaayɨm ya naaxhuiñ. Yɨ jäy ajcxy huɨdibɨ adzojctaayb anaxy yɨ huɨdi mɨɨd ndzɨnaayɨm, caꞌ ajcxy Dios Teedy yajmɨjꞌajtcɨxy.
\v 16 Caꞌ anaxy mꞌadzojctähuɨpy ajcxy tügꞌócɨy huɨdijaty ya naaxhuiñ yajpatp, jaduꞌn nej njot nhuinmaꞌñ tzojcɨm, jaduꞌn nej tijaty nꞌijxɨm, jaduꞌn nej huɨdibɨ amɨj agɨx mɨɨd ndzachnayjɨhuɨɨyɨm. Com yɨ jaduꞌmbɨ huinmaꞌñ caꞌ yajpaady ma Dios Teedy, hueꞌ yɨꞌ yajpaady ya naaxhuiñ.
\v 17 Huɨdijaty ya naaxhuiñ yajpatp cɨxɨpy tɨgoyɨpy yɨꞌ, nañ jaduꞌn ytɨgoyaꞌñ huɨdijaty yɨ huinmaꞌñ yꞌadzojcpy. Yɨ jäy ajcxy pɨnjaty Dios ytɨyꞌajt yajtuunɨp jaduꞌn nej Dios tzocy, jugyꞌadɨpy ajcxy e co yꞌóꞌccɨxɨpy, caꞌ ajcxy yꞌalma ytɨgóoygɨxɨpy.
\s Je tɨyꞌajt etz je anɨɨ
\p
\v 18 Miich ajcxy mɨgügtɨjc huɨdibɨ ooy ndzocy njɨhuɨ̈yɨch nej ixyipy ngɨꞌmꞌung ngɨꞌmꞌanäcɨch, tɨm cɨjxnɨp tiempo ya naaxhuiñ. Tɨ jada mnejhuɨɨygɨxy co miinaam jäy ajcxy huɨdibɨ nayyajnaxaanɨp nej Cristoꞌ e caꞌ yjanchɨty. Mɨɨd co cham ji mayjäy ajcxy huɨdibɨ nayyajnajxɨp jaduꞌn nej Cristo, paady nejhuɨɨyɨm co tɨm cɨjxnɨp yɨ tiempo mɨɨd ɨɨch naaxhuiñyjäy ajt ycɨxpɨ.
\v 19 Yɨ jäy ajcxy huɨdibɨ nayyajnaxaanɨp jaduꞌn ixyipy nej Cristo, naybɨjc-huäcxaanɨp yɨꞌ ajcxy mɨɨd ɨɨch ajt, caꞌ anajty ajcxy ytügɨ̈y yɨꞌ ajcxy yhuinmaꞌñ mɨɨd ɨɨch ajt nhuinmaꞌñ, tügmucy ixyipy ajt xymɨɨdꞌijtɨm. Ji jaduꞌn ñiguëxɨ̈gy co caꞌ ytügɨ̈y yhuinmaꞌñ mɨɨd ɨɨch ajt nhuinmaꞌñ co tɨ ajcxy xypuhuäctuutɨm.
\p
\v 20 Tɨ miich ajcxy xyꞌadɨgɨ̈y xyjottɨgɨ̈y Dios yjɨhuɨꞌñ ymɨcꞌajt, paady miich ajcxy mhuinjɨhuɨ̈y tügꞌócɨy Dios yꞌayuc ytɨyꞌajt. 
\v 21 Caꞌ nmɨnaanɨm paady miich ajcxy nijayɨɨygɨxy co caꞌ mhuinjɨhuɨɨygɨxy Dios ytɨyꞌajt. Paady nnijayɨɨygɨxy miich ajcxy jɨgɨx mnejhuɨ́ɨygɨxyɨp Dios ytɨyꞌajt etz mnejhuɨ́ɨygɨxyɨp co yɨ jäy ajcxy huɨdibɨ ɨndaacp, caꞌ yɨꞌ ajcxy Dios ytɨyꞌajt mɨɨdɨty.
\p
\v 22 Yɨꞌ jeꞌ ɨndacp huɨdibɨ mɨnamb co Jesús caꞌ yɨꞌ yjëjɨty je Cristo huɨdibɨ Dios yquejx. Yɨ ɨndacpɨ jeꞌmɨdzipꞌajtp Jesucristo etz caꞌ mɨbɨcy Dios Teedy etz nañ caꞌ mɨbɨjcɨ Dios yꞌung. 
\v 23 Je jäy ajcxy huɨdibɨ ɨndacp mɨnam co Jesús caꞌ yjëjɨty je Cristo, e nañ caꞌ ajcxy mɨɨdɨty Dios Teedy ytɨyꞌajt. Yɨ jäy ajcxy huɨdibɨ mɨnam co Jesús yjëjɨty je Cristo je Dios yꞌung, nañ ymɨɨd ajcxy Dios Teedy ytɨyꞌajt.
\p
\v 24 Je ayuc tɨyꞌajt huɨdibɨ miich ajcxy mmɨdou co ogaꞌn ajcxy mmɨjpɨdacy Jesucristo, jada ayuc tɨyꞌajt mguydúngɨxyɨpy e caꞌ mjäydɨgóoygɨxɨpy. Pen mmɨꞌijtcɨxp yɨ ayuc huɨdibɨ Dios yjäy ogaꞌn ajcxy xyajꞌixpɨjc, huinꞌit jëbɨ miich ajcxy myajpatcɨxy ma Dios yꞌung etz jeꞌ yajpaady ma Dios Teedy.
\v 25 Dios tɨ xyajhuinhuanɨɨyɨm co xyajtzɨnähuaanɨm ajt nꞌalma huinɨxɨɨ huinɨtiempo. 
\p
\v 26 Jada tɨyꞌajt ajcxy nyajnijayɨɨyb jɨgɨx caꞌ mmɨjpɨdáaccɨxɨpy yɨꞌ ajcxy yꞌayuc huɨdibɨ xyajhuinmaꞌñydɨgoyaam ajcxy. 
\v 27 Yɨ Dios yjɨhuɨꞌñ ymɨcꞌajt huɨdibɨ tɨ xyꞌadɨgɨɨygɨxy tɨ xyjottɨgɨɨygɨxy ijttɨɨb yɨꞌ ma miich ajcxy mjot mhuinmaꞌñ. Paady ycɨxp caꞌ myajmayjajtcɨxy pɨn xyajꞌixpɨgɨp ajcxy com je Espíritu Santo xyajꞌixpɨgɨp ajcxy. Je Espíritu Santo xyajniꞌixɨydaayb ajcxy tügꞌócɨy Dios ytɨyꞌajt, tɨydudägy yɨꞌ, caꞌ yɨꞌ yꞌanɨɨjɨty. E jaduꞌn nej jeꞌ xyajniꞌixɨɨygɨxy, jaduꞌn mguydunɨpy ajcxy. Mɨꞌijtcɨx Dios yjɨhuɨꞌñ ymɨcꞌajt ma mjot mhuinmaꞌñ ajcxy.
\p
\v 28 Miich ajcxy mɨgügtɨjc, mɨꞌidɨpy ajcxy Jesucristo ytɨyꞌajt ma mjot mhuinmaꞌñ jɨgɨx co ñayyajniguëxɨ̈gɨɨyb Jesucristo ya naaxhuiñ jadügꞌoc, huinꞌit jotcujc ajt nnayjɨhuɨɨyɨm etz ni caꞌ jɨbɨc nayjɨhuɨɨyɨm co anajty xyñimiinɨm.
\v 29 Tɨ mnejhuɨɨygɨxy co yɨ Jesucristo tɨydudägy ytuñ, e tɨ mnejhuɨɨygɨxy nañ jaduꞌn co tügꞌócɨy yɨ jäy huɨdibɨ tɨydudägy tumb, yɨꞌ jeꞌ ajcxy Dios yꞌungꞌajtɨp.
\c 3
\s Dios ɨɨch ajt xyꞌungꞌajtɨm
\p
\v 1 Jɨhuɨꞌñybɨjccɨx tügꞌócɨy je mɨjpɨ mayꞌajt Dios Teedy tɨ tuñ mɨɨd ɨɨchꞌajt ycɨxpɨ jɨgɨx jëbɨ naydijɨm Dios yꞌung. Yɨ naaxhuiñyjäy ajcxy huɨdibɨ caꞌ mɨjpɨdaaccɨxy Jesucristo caꞌ ajcxy nejhuɨɨygɨxy huinjɨhuɨɨygɨxy Jesucristo ytɨyꞌajt, paady ycɨxp caꞌ ajcxy nejhuɨ̈y huinjɨhuɨ̈y co Dios xyꞌungꞌajtɨm.
\v 2 Miich ajcxy mɨgügtɨjc huɨdibɨ ooy ndzocy njɨhuɨ̈yɨch, jadachambɨ Dios ɨɨch ajt xyꞌungꞌajtɨm. Jadachambɨ caꞌp yꞌocniguëxɨ̈gyñɨ nej ɨɨch ajt jiinɨ nꞌidaanɨm. Co anajty Jesucristo ymiiñ jadügꞌoc ya naaxhuiñ, huinꞌit nguipxyjatytɨɨyɨm mɨɨd jeꞌ, com nꞌixaanɨm ajt Jesucristo jaduꞌn nej jeꞌ yajpaady.
\v 3 Tügꞌócɨy jäy ajcxy huɨdibɨ jɨjpꞌijxp co Jesucristo ymiinaꞌñ jadügꞌoc ya naaxhuiñ, copɨcy yajhuädzɨpy ajcxy yjot yhuinmaꞌñ. Huen mɨꞌijtcɨxy oyjot oyhuinmaꞌñ jaduꞌn nej Jesucristo mɨꞌity oyjot oyhuinmaꞌñ.
\p
\v 4 Tügꞌócɨy jäy ajcxy huɨdibɨ pocytumb, hueꞌ ajcxy ymɨdundɨgooyb Dios ycötujcɨn. Co ajcxy ytundɨgoy, caꞌ ajcxy ymadägy nej cuydunɨpy Dios ycötujcɨn.
\v 5 E mnejhuɨɨyb miich ajcxy co yɨ Jesucristo tɨ ñayguëxɨ̈gyii ya naaxhuiñ jɨgɨx jëbɨ xyajpocyñïhuaatzɨm. Jesucristo caꞌ anajty ti pocy mɨɨdɨty, caꞌ anajty ma tɨ ytundɨgoy.
\v 6 Tügꞌócɨy jäy ajcxy huɨdibɨ cuydundähuam Jesucristo ytɨyꞌajt, caꞌ huaad pocytuñ. Yɨ jäy ajcxy huɨdijaty pocytundɨɨb, caꞌnɨ ixy ajcxy yɨ Jesucristo, nañ caꞌnɨ ajcxy huinjɨhuɨɨyɨ yɨꞌ ytɨyꞌajt.
\v 7 Miich ajcxy mɨgügtɨjc huɨdibɨ ooy ndzocy njɨhuɨ̈yɨch jaduꞌn nej ngɨꞌmꞌung ngɨꞌmꞌanäcɨch, ix ni pɨn xycahuinꞌɨɨngɨx. Yɨ jäy ajcxy huɨdibɨ oyjot oyhuinmaꞌñ yajtumb, tɨydudägy yɨꞌ ajcxy chɨnäy yjugyꞌajty, tɨm jaduꞌn nej Jesucristo tɨydudägy chɨnay yjugyꞌajty.
\v 8 Yɨ jäy ajcxy huɨdibɨ tzachpocytundɨɨbnɨ, yɨꞌ ajcxy mujcuꞌ yjäyꞌajtɨp. Com jaduꞌn nej chondacy je naaxhuiñybɨ ogaꞌn yɨ mujcuꞌ jënɨ anajty jaduꞌn chachpocytuñ. Paady ycɨxp Dios quejxy yꞌung ya naaxhuiñ co je mujcuꞌ yhuinmaꞌñ yajcödɨgoyaanɨ.
\p
\v 9 Yɨ jäy huɨdibɨ Dios ajcxy tɨ ymöyii jemybɨ jot jemybɨ huinmaꞌñ, caꞌ ajcxy ypocytundɨɨy com jeꞌco túꞌcɨy ajcxy yjot yhuinmaꞌñ mɨɨdɨty, jaduꞌn nej anajty Jesucristo yjot yhuinmaꞌñ mɨɨdɨty, caꞌ huaad ajcxy ypocytundɨɨy com Dios tɨ ymöyii ajcxy jemybɨ jot jemybɨ huinmaꞌñ.
\v 10 Paady ycɨxp yñiguëxɨ̈gy yɨ jäy ajcxy pɨnjaty Dios yꞌungꞌajtɨp etz pɨnjaty mujcuꞌ ungꞌajtɨp. Yɨ huɨdibɨ ajcxy caꞌ tɨydudägy cuydungɨxy Dios ytɨyꞌajt etz caꞌ ajcxy ixaꞌñ ymɨgügtɨjc, etz caꞌ ajcxy tzocy jɨhuɨ̈y ymɨgügtɨjc, hueꞌ caꞌ ajcxy Dios ymöyii jemybɨ jot jemybɨ huinmaꞌñ, mujcuꞌ ajcxy yꞌungꞌajtɨp.
\s Naychojcɨm nayjɨhuɨɨyɨm miñ xyɨpy
\p
\v 11 Jada jeꞌ je ayuc tɨyꞌajt huɨdibɨ miich ajcxy tɨ mmɨdoogɨxy co ogaꞌn ajcxy mmɨjpɨdacy Jesucristo co copɨcy naychojcɨm nayjɨhuɨɨyɨm nidüg nidüg.
\v 12 Caꞌ huaad jaduꞌn nꞌɨdɨɨtzɨm nej Caín yꞌɨdɨɨch co anajty mujcuꞌ huinmaꞌñ mɨɨdɨty, chi yꞌuch yajꞌoꞌcy. ¿Nej co yꞌuch yajꞌoꞌcy? Jeꞌ co anajty jeꞌ jɨbɨc-huinmaꞌñ yajtuñ, e jeꞌ yꞌuch oyhuinmaꞌñ anajty yajtumyb paady ycɨxp je yꞌuch yajꞌoꞌcy.
\p
\v 13 Miich ajcxy mɨgügtɨjc, caꞌ ooy mdzachhuinmaay ajcxy co caꞌ yɨ naaxhuiñyjäy ajcxy xyꞌixaꞌñ, huɨdibɨ ajcxy caꞌ Dios yꞌayuc mɨjpɨdaacɨ.
\v 14 Com ɨɨch ajt nnejhuɨɨyɨm co je nmɨgügtɨjc ajcxy ndzojcɨm njɨhuɨɨyɨm co nꞌoꞌcɨm, huinꞌit njugypɨgaanɨm e ndzɨnähaanɨm jiiby tzajpjoty huinɨxɨɨ huinɨtiempo. Yɨ jäy ajcxy pɨnjaty caꞌ ymɨgügtɨjc ixaꞌñ ajcxy co ajcxy yꞌögɨpy, huinꞌit caꞌ ajcxy chɨnähuaꞌñ jiiby tzajpjoty.
\v 15 Huenpɨnjäyɨty huɨdibɨ caꞌ ymɨgüg ixaꞌñ, nipatpy nej ytundɨgoy jaduꞌn nej jäyyajꞌoꞌcpɨ ytundɨgoy e nañ jaduꞌn nejhuɨɨyɨm, co jeꞌ yꞌögɨpy, caꞌ chɨnähuaꞌñ jiiby tzajpjoty.
\v 16 Ya ixyipy jëbɨ ɨɨch ajt ijxpejt nbɨjcɨm nej huaad mɨgügtɨjc ndzojcɨm njɨhuɨɨyɨm, jaduꞌn nej Jesucristo ijxpejt yejcy co ñayyojxɨ ñaydoocɨ co yꞌoꞌcy mɨɨd ɨɨch ajt nbocy ycɨxpɨ. Paady ycɨxp ɨɨch ajt jëbɨ huaad ndzojcɨm njɨhuɨɨyɨm nmɨgügtɨjc, oy jada ndɨmcoꞌögɨɨyɨm.
\v 17 Janch pɨnjaty yjamɨɨd ymadaacɨn, e yjaꞌijxpy co ymɨgüg tigati yajmayjaty, e amɨj agɨx ñayjɨhuɨ̈yii, caꞌ paꞌayoꞌn mɨɨdɨty, caꞌ pubedaꞌñ ymɨgüg, caꞌ jeꞌ anajty tzocy jɨhuɨ̈y ymɨgüg jaduꞌn nej Dios chogyii yjɨhuɨ̈yii.
\v 18 Miich ajcxy mɨgügtɨjc huɨdibɨ ooy ndzocy njɨhuɨ̈yɨch jaduꞌn nej ixyipy ngɨꞌmꞌungɨch, mɨɨd oyjäyꞌajtɨn etz mɨɨd Dios ytɨyꞌajt tzoc yajxon naychojcɨm nayjɨhuɨɨyɨm miñ xyɨpy. Caꞌ nmɨnaanɨm nɨgoo ngapxɨm nmɨydaacɨm ahuac aguuy.
\s Cɨxyjot huinɨjot naybɨdaacɨm ma Dios
\p
\v 19 Co nyajtuunɨm oyjäyꞌajtɨn mɨɨd ɨɨch ajt nmɨgügtɨjc, huinꞌit nejhuɨɨyɨm co Dios ytɨyꞌajt nguyduunɨm e jotcujc nayjɨhuɨɨyɨm co Dios nꞌojadajtɨm.
\v 20 Co jɨbɨc njot nhuinmaꞌñ ajt njɨhuɨɨyɨm, mɨɨd co caꞌ oyjäyꞌajtɨn nduunɨm, jac nïgɨ Dios jɨbɨc ñayjɨhuɨ̈yii com yɨꞌ jacmɨjhuinmaꞌñ mɨɨd, caꞌydɨ ɨɨch ajt, e yɨꞌ nejhuɨydaayb tügꞌócɨy tijaty ajt nduunɨm.
\v 21 Miich ajcxy mɨgügtɨjc huɨdibɨ ooy ndzocy njɨhuɨ̈yɨch, co caꞌ ti jɨbɨcpɨ njɨhuɨɨyɨm ma ajt njot nhuinmaꞌñ mɨɨd co oybɨ nduunɨm, huinꞌit jotcujc ajt nꞌijtɨm mɨɨd Dios.
\v 22 E huentɨmtiijɨty huɨdibɨ ɨɨch ajt Dios nyajmɨbɨjctzoohuɨm, yɨꞌ xymooyɨm mɨɨd co yɨꞌ yꞌayuc nguyduunɨm, e nduunɨm je huɨdibɨ yɨꞌ yjäygɨdacpy.
\v 23 Dios jada tɨ xyajnajtzꞌaneꞌmɨɨyɨm co tzoc mɨbɨjcɨm mɨjpɨdaacɨm yɨꞌ yꞌung Jesús etz tzoc naychojcɨm nayjɨhuɨɨyɨm miñ xyɨpy, jaduꞌn yɨꞌ tɨ xyajnajtzꞌaneꞌmɨɨyɨm.
\v 24 Yɨ jäy ajcxy pɨnjaty cuydumb Dios ytɨyꞌajt, yajpatp ajcxy ma Jesucristo e nañ Jesucristo yajpatp ma jeꞌajcxy. Nejhuɨɨyɨm co Jesucristo ytɨyꞌajt yajpaady ma ɨɨch ajt mɨɨd co je Dios yjɨhuɨꞌñ ymɨcꞌajt tɨ xyꞌadɨgɨɨyɨm xyjottɨgɨɨyɨm.
\c 4
\s Dios yjɨhuɨꞌñ ymɨcꞌajt etz je caꞌoybɨ yjɨhuɨꞌñ
\p
\v 1 Miich ajcxy mɨgügtɨjc huɨdibɨ ooy ndzocy njɨhuɨ̈yɨch, caꞌ ajcxy mmɨbɨjctähuɨpy tügꞌócɨy jäy huɨdibɨ Dios yꞌayuc capxhuäcxɨp. Mɨdoꞌmbɨjccɨxy jayɨjp penɨ janch ajcxy mɨɨdɨty Dios yjɨhuɨꞌñ ymɨcꞌajt. Com ji mayjäy ya naaxhuiñ huɨdibɨ mɨnam co Dios yꞌayuccapxhuäcxɨ yɨꞌ ajcxy e caꞌ yjanchɨty.
\v 2 Jada jeꞌ je tɨyꞌajt ma huaad mjɨhuɨꞌñybɨjccɨxy pen janch mɨɨdɨty ajcxy Dios yjɨhuɨꞌñ ymɨcꞌajt, yɨꞌ ajcxy huɨdibɨ Dios yꞌayuccapxhuäcxɨp: tügꞌócɨy jäy huɨdibɨ capxhuäcxp co Jesucristo ymaꞌxungꞌajty ya naaxhuiñ mɨɨd ñinïcx, Dios yɨꞌ ytɨyꞌajt ymɨɨd.
\v 3 E tügꞌócɨy jäy ajcxy huɨdibɨ caꞌ ñïgapxpety ajcxy co Jesucristo chɨnäy ya naaxhuiñ mɨɨd ñinïcx, caꞌ yɨꞌ Dios ytɨyꞌajt mɨɨdɨty. Tɨ miich ajcxy ayuc mɨdoogɨxy ogaꞌn co miinaam yɨ naaxhuiñyjäy ajcxy mɨɨd je mujcuꞌ yjɨhuɨꞌñ ymɨcꞌajt, huɨdibɨ mɨdzipꞌajtp Jesucristo. E tɨ jeꞌduꞌn ajcxy ymiingɨxy. Jada jeꞌduꞌn ajcxy huɨdibɨ caꞌ nïgapxpejtcɨxy co Jesucristo ymaꞌxungꞌajty ya naaxhuiñ mɨɨd ñinïcx.
\p
\v 4 Mɨgügtɨjc huɨdibɨ Dios yjɨhuɨꞌñ ymɨcꞌajt tɨ xyꞌadɨgɨɨygɨxy tɨ xyjottɨgɨɨygɨxy, e tɨ miich ajcxy mmɨmadaaccɨxy yɨ huɨdibɨ ajcxy nïgapxpejtp co Jesucristo caꞌ maꞌxungꞌajty ya naaxhuiñ mɨɨd ñinïcx. Com Dios huɨdibɨ miich ajcxy xyꞌaneꞌmb, jac mɨj yɨꞌ caꞌydɨ je mujcuꞌ, paady miich ajcxy tɨ mmɨmadaaccɨxy je mujcuꞌ.
\v 5 Je huɨdi ajcxy jaduꞌn jamɨnaamb co Dios yꞌayuc capxhuäcxɨ e caꞌ yjanchɨty ya naaxhuiñ ajcxy tɨyꞌajt tɨ patcɨxy ma je mujcuꞌ, paady ycɨxp yɨ naaxhuiñ yhuijyꞌajtɨn ajcxy tzachcapxhuäcx, e yɨ naaxhuiñyjäy tzachmɨjpɨdaaccɨxy etz amɨdooꞌijtɨ ajcxy yꞌayuc.
\v 6 Ɨɨch ajt tɨyꞌajt tɨ nbaatɨm ma Dios. Tügꞌócɨy jäy ajcxy huɨdibɨ Dios ytɨyꞌajt huinjɨhuɨɨyɨp, yꞌamɨdooꞌijtyp ajcxy ɨɨch ajt nꞌayuc. Yɨ jäy ajcxy huɨdibɨ caꞌ Dios ytɨyꞌajt mɨɨdɨty, caꞌ ajcxy amɨdooꞌijtcɨxy ɨɨch ajt nꞌayuc, paady ycɨxp nꞌijxcajpɨm je jäy ajcxy huɨdibɨ tudägyɨp, etz je jäy ajcxy huɨdibɨ nɨgoo tzachꞌanɨɨdaacp.
\s Dios ooy xychojcɨm xyjɨhuɨɨyɨm
\p
\v 7 Miich ajcxy mɨgügtɨjc huɨdibɨ ooy ndzocy njɨhuɨ̈yɨch, tzoc oy yajxon naychojcɨm nayjɨhuɨɨyɨm miñ xyɨpy. Dios tɨ yecy ymɨcꞌajt ma ajt njot nhuinmaꞌñ jɨgɨx jëbɨ ajt naychojcɨm nayjɨhuɨɨyɨm miñ xyɨpy. Tügꞌócɨy jäy huɨdibɨ ymɨgügtɨjc chojccɨxyp yjɨhuɨɨygɨxyp, tɨ Dios yjɨhuɨꞌñ yꞌadɨgɨ́ɨyɨgɨxy yjottɨgɨ́ɨyɨgɨxy etz ñejhuɨɨyɨp yhuinjɨhuɨɨyɨp ajcxy Dios yꞌayuc ytɨyꞌajt.
\v 8 Pɨnjaty caꞌ ymɨgüg tzocy jɨhuɨ̈y, caꞌ yɨꞌ nejhuɨɨyɨ huinjɨhuɨɨyɨ Dios ytɨyꞌajt, com Dios tügꞌócɨy yɨꞌ tzojctäy.
\v 9 Jada jeꞌje tɨyꞌajt co Dios ajt xychojctaayɨm co je yꞌung huɨdibɨ tügpajcpɨ ymɨɨd, quejxy ya naaxhuiñ jɨgɨx ɨɨch ajt nbaatɨm Dios yjɨhuɨꞌñ ymɨcꞌajt mɨɨd yɨꞌ ycɨxpɨ. E Dios yjɨhuɨꞌñ ymɨcꞌajt  caꞌ ycɨxaꞌñ ytɨgoyaꞌñ nimɨna, paady ɨɨch ajt njugyꞌajtɨn caꞌ ycɨxaꞌñ ytɨgoyaꞌñ.
\v 10 Dios tɨ xychojcɨm tɨ xyjɨhuɨɨyɨm, paady quejxy yꞌung ya naaxhuiñ jɨgɨx jëbɨ xycodɨnaayɨm ma yɨ Dios ycötujctac mɨɨd ɨɨch ajt nbocy ycɨxpɨ. Caꞌ nmɨnaanɨm mɨɨd co Dios tɨ ndzachmɨjpɨdaacɨm ooy mɨjcajee, hueꞌ janchtɨy yɨꞌ ninɨgoob mayꞌajt tuñ mɨɨd ɨɨch ajt ycɨxpɨ.  
\p
\v 11 Miich ajcxy mɨgügtɨjc huɨdibɨ ooy ndzocy njɨhuɨ̈yɨch, mɨɨd co Dios jaduꞌn ajt tɨ xychojcɨm tɨ xyjɨhuɨɨyɨm mɨjcajee ogaꞌn, paady ycɨxp tzoc ɨɨch ajt naychojcɨm nayjɨhuɨɨyɨm miñ xyɨpy.
\v 12 Ni mɨnaabɨ pɨn caꞌ ixyñɨ Dios. Co naychojcɨm nayjɨhuɨɨyɨm miñ xyɨpy, huinꞌit Dios yjɨhuɨꞌñ ymɨcꞌajt ijttɨy ma ɨɨch ajt njot nhuinmaꞌñ. Jaduꞌn Dios yjɨhuɨꞌñ ymɨcꞌajt xypubejtɨm xypudɨgɨɨyɨm, jëbɨ nïgɨ naychojcɨm nayjɨhuɨɨyɨm nidüg nidüg jaduꞌn nej Dios jäygɨdägy.  
\v 13 Nejhuɨɨyɨm ɨɨch ajt co nyajpatɨm ma Dios, e nañ jaduꞌn Dios yajpaady ma ɨɨch ajt, mɨɨd co yɨꞌ yjɨhuɨꞌñ ymɨcꞌajt tɨ xyꞌadɨgɨɨyɨm tɨ xyjottɨgɨɨyɨm.
\v 14 E ɨɨch ajcxy, tɨ ɨɨch ajcxy yɨ Jesucristo nꞌixyɨch, paady ɨɨch ajcxy nidɨyꞌajtꞌajtyɨch co je Dios Teedy quejxy yꞌung ya naaxhuiñ co yajnïdzögaꞌñ tügꞌócɨy naaxhuiñyjäy co anajty Dios nbocy ajt xyajcomɨdoohuaanɨm.
\v 15 Tügꞌócɨy jäy huɨdibɨ nigapxp co Jesús jeꞌ yɨꞌ Dios yꞌung, Dios yajpatp ma yɨꞌ e nañ yɨꞌ yajpatp ma Dios.
\p
\v 16 Ɨɨch ajt nnejhuɨɨyɨm etz nmɨjpɨdaacɨm jaduꞌn nej Dios ajt xychojcɨm xyjɨhuɨɨyɨm nidügꞌócɨy. Dios chojctaayb yɨꞌ nidügꞌócɨyɨ yɨ jäy. Pɨnjaty tzojccɨxp jɨhuɨɨygɨxp ymɨgügtɨjc, hueꞌ yajpatp yɨꞌ ajcxy ma Dios e nañ Dios yajpatp ma yɨꞌ ajcxy.
\v 17 Mɨɨd co yajxon nmɨjpɨdaacɨm Dios paady jotcujc nnaxaanɨm ma Dios ycötujctac, mɨna anajty xyajcomɨdouhuɨm ajt nbocy.  Com túꞌcɨy ɨɨch ajt nyajpaatɨm ya naaxhuiñ, tɨm jaduꞌn nej yɨ Jesucristo.
\v 18 Co nmɨjpɨdaacɨm Dios, huinꞌit caꞌ ajt nmɨdzɨgɨɨyɨm nmɨdzoꞌyduunɨm.  Penɨ yajxon nmɨjpɨdaacɨm Dios, huinꞌit jëbɨ tzɨgɨꞌñ nyajqueecɨm.  Yɨ jäy ajcxy huɨdibɨ tzɨgɨɨyb etz tzoꞌydum, caꞌ ajcxy Dios mɨjpɨdägy yajxon.
\p
\v 19 Com Dios jayɨjp tɨ xychojcɨm tɨ xyjɨhuɨɨyɨm, paady ycɨxp tzoc ajt naychojcɨm nayjɨhuɨɨyɨm nidüg nidüg etz nañ nmɨjpɨdaacɨm Dios.
\v 20 Yɨ jäy ajcxy pɨnjaty jaduꞌn mɨnamb co mɨjpɨdaaccɨxy Dios, e caꞌ ymɨgüg tzogaangɨxy ixaangɨxy, hueꞌ jeꞌ ajcxy anɨɨdaacp.  Com penɨ caꞌ jajtcɨxy nej tzójccɨxɨpy jɨhuɨ̈huɨ́ɨygɨxɨpy yɨ ymɨgügtɨjc huɨdibɨ ajcxy ixyꞌajtpy, caꞌ ajcxy jadɨp nej mɨjpɨdáaccɨxɨpy Dios huɨdibɨ caꞌ ixyꞌájtɨgɨxy.
\v 21 E Dios ɨɨch ajt xyñajtzꞌaneꞌmɨɨyɨm co pɨn Dios mɨbɨjcp mɨjpɨdacp, huen nañ jaduꞌn ymɨgügtɨjc tzocy jɨhuɨ̈y.
\c 5
\s Yɨ pɨn huɨdibɨ caꞌ ixaꞌñ mɨdohuaꞌñ Cristo yꞌayuc
\p
\v 1 Tügꞌócɨy jäy huɨdibɨ mɨbɨjccɨxp co Jesús jeꞌ jeꞌ je Cristo huɨdibɨ Dios yquejx ya naaxhuiñ, Dios ajcxy yꞌungꞌajtɨp.  Tügꞌócɨy jäy huɨdibɨ mɨbɨjccɨxp mɨjpɨdaaccɨxp Dios Teedy, nañ jaduꞌn huen tzojccɨxy yjɨhuɨɨygɨxy jeꞌ ajcxy huɨdibɨ Dios yꞌungꞌajtɨp.
\v 2 Co ndzojcɨm njɨhuɨɨyɨm huɨdibɨ Dios yꞌungꞌajtɨp, jeꞌ jada jeꞌ je ijxpejt co nañ jaduꞌn jëbɨ nmɨjpɨdaacɨm Dios etz jëbɨ nguyduunɨm nej xyñajtzꞌaneꞌmɨɨyɨm.
\v 3 Co nmɨjpɨdaacɨm Dios, huinꞌit nguyduunɨm jaduꞌn nej Dios xyñajtzꞌaneꞌmɨɨyɨm e yɨꞌ yꞌayuc caꞌ ooy chipɨty co nguyduunɨm.
\v 4 Com tügꞌócɨy yɨ jäy ajcxy huɨdibɨ Dios tɨ yꞌadɨgɨ̈yii tɨ yjottɨgɨ̈yii yjɨhuɨꞌñ ymɨcꞌajt, ymɨhuindɨnaayb ajcxy yɨ jɨbɨc-huinmaꞌñ ya naaxhuiñ.  Co nmɨbɨjcɨm Dios, huinꞌit jëbɨ nmɨhuindɨnaayɨm yɨ jɨbɨc-huinmaꞌñ ya naaxhuiñ.  
\v 5 Yɨ jäy ajcxy pɨnjaty mɨbɨjcp co Jesús Dios jeꞌ yꞌung, yɨꞌ ajcxy mɨhuindɨnaayb yɨ jɨbɨc huinmaꞌñ ya naaxhuiñ.
\s Je ayuc huɨdibɨ nidɨyꞌajt yɨ Dios yꞌung
\p
\v 6 Yɨ Jesucristo jeꞌ jeꞌ huɨdibɨ miin ya naaxhuiñ, jeꞌ jeꞌ huɨdibɨ nɨɨbejt etz ñɨꞌpy teemy gujy co yꞌoꞌcy mɨɨd jäy ajcxy ypocy ycɨxpɨ.  Caꞌ nmɨnaanɨm jëyɨ anajty tɨ ñɨɨbety, hueꞌ nañ jaduꞌn tɨ yꞌögy mɨɨd ajt nbocy ycɨxpɨ.
\v 7 E yɨ Espíritu Santo yɨꞌ tɨyꞌajt yejcp co Dios Jesús yꞌungꞌadyii, com je Espíritu Santo yɨꞌ Dios ytɨyꞌajt ymɨɨd.
\v 8 Ji tugɨɨgnax huɨdibɨ tɨyꞌajt yejcp co Dios Jesús yꞌungꞌadyii:  je Espíritu Santo, je nɨɨbejtɨn, etz Jesús ñɨꞌpy co teemy cujy mɨɨd ɨɨch ajt nbocy ycɨxpɨ.  E jaduꞌn nidugɨɨg ñaybáatɨgɨxy tügnax, e tügnax ytɨyꞌajt yejccɨxy.
\v 9 Mɨjpɨdaacɨm ɨɨch ajt jäy yꞌayuc co Dios Jesús yꞌungꞌadyii, nïgɨ copɨcy co nmɨjpɨdaacɨm Dios ytɨyꞌajt huɨdibɨ tɨ yecy mɨɨd yꞌung ycɨxpɨ, com jac mɨcꞌajt mɨɨd yɨꞌ caꞌydɨ jäy ajcxy.
\v 10 Yɨ jäy huɨdibɨ mɨjpɨdaaccɨxp Dios yꞌung, ymɨꞌijtpy ajcxy je tɨyꞌajt ma yjot yhuinmaꞌñ.  Yɨ jäy ajcxy huɨdibɨ caꞌ mɨbɨjccɨxy mɨjpɨdaaccɨxy je Dios yꞌayuc ytɨyꞌajt, hueꞌ ajcxy yajnajxcɨxy Dios nej anɨɨdägyɨn co caꞌ mɨbɨjccɨxy yɨ Dios ytɨyꞌajt co yꞌung nigapxy.
\v 11 Jada jeꞌ tɨyꞌajt co Dios tɨ xymooyɨm ajt nꞌalma yjugyꞌajtɨn huɨdibɨ caꞌ ycɨxɨpy ytɨgoyɨpy nimɨna.  Dios yꞌung caꞌ yꞌalma ycɨxɨpy ytɨgoyɨpy nimɨna, paady yɨꞌ tɨ yajꞌoyɨ̈y nej jëbɨ ajt nꞌalma yꞌijtɨm huinɨxɨɨ huinɨtiempo.
\v 12 Pɨnjaty tɨ mɨjpɨdaaccɨxy Dios yꞌung, yɨꞌ ajcxy yꞌalma caꞌ ycɨxɨpy ytɨgoyɨpy nimɨna.  Pɨnjaty caꞌ mɨjpɨdägy Dios yꞌung, yɨꞌ ajcxy yꞌalma cɨxɨpy tɨgoyɨpy co yꞌögɨpy.
\s Capxycɨjxɨn etz capxhuijɨn
\p
\v 13 Jadayaabɨ ayuc ajcxy nyajnijayɨɨygɨxp ma jada necy jɨgɨx jëbɨ mɨjpɨdáaccɨxɨpy Dios yꞌung, etz jëbɨ mnejhuɨɨygɨxy tɨydudägy co mjugypɨ́jccɨxɨpy jadügtecy co anajty tɨ mꞌoꞌccɨxy e caꞌ ajcxy mꞌalma ycɨxɨpy ytɨgoyɨpy.
\p
\v 14 Jada jotcujcꞌajtɨn ɨɨch ajt nmɨɨdꞌajtɨm co nmɨbɨjctzoohuɨm Dios jaduꞌn nej Jesucristo xyñajtzꞌaneꞌmɨɨyɨm, yɨꞌ ɨɨch ajt jëbɨ xymɨdouhuɨm.
\v 15 Mɨɨd co nnejhuɨɨyɨm co yɨꞌ ajt xymɨdouhuɨm ma tijaty Dios nyajmɨbɨjctzouhuɨm, paady ycɨxp nejhuɨɨyɨm co nmɨɨdꞌajtɨm tijaty anajty tɨ nyajmɨbɨjctzou.
\p
\v 16 Co pɨnjaty ixy co ymɨgüg ypocytuñ huɨdibɨ huaad jëbɨ Dios meecxy, huen mɨbɨjctzooyɨ Dios mɨɨd yɨꞌ ycɨxpɨ, e Dios yajtzɨnähuɨɨyb pen caꞌ anajty ooy ymɨjpocyɨty je tɨɨbɨ anajty tuñ.  Com ji tüg mɨjpocy huɨdibɨ Dios caꞌ huinmecxy.  Pen tɨ mɨjpocytuñ caꞌ huaad Dios ocjacmɨbɨjctzoonɨ com caꞌ yɨꞌ yꞌoc-huinmecxaanɨ. 
\v 17 Tügꞌócɨy jɨbɨc-huinmaꞌñ huɨdibɨ jäy ytumyb, pocy yɨꞌ, per ji jɨbɨc-huinmaꞌñ huɨdibɨ jäy ytumyb, huɨdi jëbɨ Dios huinmecxy e caꞌ yꞌalma ytɨgoyɨp.
\p
\v 18 Nejhuɨɨyɨm co tügꞌócɨy pɨnjaty Dios tɨ ymöyii jemybɨ jot huinmaꞌñ, caꞌ yɨꞌ yꞌocpocytunɨ.  Yɨ Dios yꞌung, huɨdibɨ tɨ ymóoyɨgɨxy jemybɨ jot huinmaꞌñ, cuendꞌajtɨp yɨꞌ ajcxy, caꞌydɨ je mujcuꞌ xyajhuinmaꞌñydɨgóoyɨgɨxy.
\p
\v 19 Nejhuɨɨyɨm ɨɨch ajt co Dios jaduꞌn xyꞌaneꞌmɨm njot nhuinmaꞌñ etz nejhuɨɨyɨm co tügꞌócɨy jacjadyii naaxhuiñyjäy huɨdibɨ caꞌ mɨjpɨdaaccɨxy Dios, je mujcuꞌ jaduꞌn yjot yhuinmaꞌñ yꞌaneꞌmɨp ajcxy.
\p
\v 20 E nejhuɨɨyɨm co yɨ Dios yꞌung ya yꞌoy naaxhuiñ e tɨ xyajnejhuɨɨyɨm yɨꞌ yꞌayuc ytɨyꞌajt, jɨgɨx jëbɨ nejhuɨɨyɨm huinjɨhuɨɨyɨm yajxon je Dios janchypɨ tudägypɨ. Nmɨꞌijtɨm ma ɨɨch ajt ndzɨnaayɨn je janchypɨ je tudägypɨ je Dios yꞌung je Jesucristo. Jada jëduꞌn je tɨydudägypɨ Dios, etz je Dios yjugyꞌajtɨn camɨnaabɨ ycacɨxy ycatɨgoy.
\v 21 Miich ajcxy mɨgügtɨjc huɨdibɨ ooy ndzocy njɨhuɨ̈yɨch jaduꞌn nej ixyipy ngɨꞌmꞌung ngɨꞌmꞌanäcɨch, caꞌ nɨgoo mdzachDiosꞌájtɨgɨxy tijaty huɨdibɨ caꞌ ni ti mɨcꞌajt mɨɨdɨty, jaduꞌn nej Dios Teedy tzajpjotypɨ ymɨcꞌajt mɨɨdɨty.