\id 2JN
\h 2 JUAN
\toc1 2 JUAN
\mt1 2 SAN JUAN
\mt2 Yɨ Mɨmetzpɨ Necy Huɨdibɨ San Juan Yajniguejx Tüg Mɨbɨjcpɨ Töxyjäybɨ
\c 1
\p
\v 1 Ɨɨch Juan huɨdibɨ nigohuajcꞌajt Dios yjäy. Nyajniguejxpɨch miich töxyjäy jada necy, miich Dios xyjäyꞌajtp, e tɨ mmɨjpɨdägy Jesucristo.  Nañ nyajniguejxypɨch jada necy tügꞌócɨy miich mꞌung mꞌanäc ajcxy.  Ooy ndzocy njɨhuɨ̈yɨch miich ajcxy.  Caꞌ nmɨnaanɨm ɨɨch naydügpajc ndzojcyp njɨhuɨɨybɨch miich ajcxy, nañ jaduꞌn tügꞌócɨy jäy ajcxy, huɨdibɨ huinjɨhuɨɨygɨxp Dios ytɨyꞌajt, xychojccɨxp xyjɨhuɨɨygɨxp ajcxy.
\v 2 Ɨɨch miich ajcxy ndzojccɨxyp njɨhuɨɨygɨxyp com Dios ytɨyꞌajt yajpatp ma ɨɨch ajt njot nhuinmaꞌñ, etz yɨꞌ ijtp huinɨxɨɨ ma ɨɨch ajt.
\v 3 Huen Dios Teedy etz ɨɨch ajt nHuindzɨn Jesucristo, yɨ Dios yꞌung oyꞌajt mayꞌajt tuñ mɨɨd miich ajcxy, huen xypaꞌayoogɨxy huen xyajjotcugɨɨygɨxy mɨɨd co mguydungɨxy yɨꞌ ytɨyꞌajt etz mnaychójcɨgɨxy mnayjɨhuɨ́ɨyɨgɨxy miñ xyɨpy.
\p
\v 4 Tɨ nmɨnaybadyiijɨch nijëjɨty miich mꞌung mꞌanäc, e ooy njotcugɨɨyɨch mɨɨd co tɨydudägy ajcxy payöyɨ Dios ytɨyꞌajt, jaduꞌn nej Dios Teedy ajt tɨ xyñajtzꞌaneꞌmɨɨyɨm.
\v 5 Cham njacnɨmäyɨch miich ajcxy co jëbɨ ajcxy mnaychójcɨgɨxy mnayjɨhuɨ́ɨyɨgɨxy miñ xyɨpy.  Caꞌ nmɨnaanɨm huinjemy jada tɨyꞌajt huɨdibɨ cham nyajnijayɨ́ɨygɨxɨpy.  Jeꞌ jada je ayuc huɨdibɨ ogaꞌnꞌaty tɨ nbaatɨm co tɨ nmɨbɨjcɨm Jesucristo.
\v 6 Co ndzojcɨm njɨhuɨɨyɨm nmɨgügtɨjc, jada jeꞌ tɨyꞌajt co nguyduunɨm nej Dios ajt tɨ xyajnajtzꞌaneꞌmɨɨyɨm.  Jada huɨdibɨ Dios tɨ xyajnajtzꞌaneꞌmɨɨyɨm huɨdibɨ miich ajcxy tɨ mbaatcɨxy, co ogaꞌn tɨ mmɨbɨjccɨxy Jesucristo, copɨcy co ajcxy mnaychójcɨgɨxɨpy mnayjɨhuɨ́ɨyɨgɨxɨpy.
\s Yɨ jäy ajcxy huɨdibɨ anɨɨdaaccɨxp
\p
\v 7 Com ji mayjäy ya naaxhuiñ huɨdibɨ huinꞌɨɨmb yɨ jäy ajcxy.  Yɨꞌ ajcxy tɨ puhuäctüdy mɨbɨjcpɨdɨjc, yajꞌixpɨjcp ajcxy co Jesucristo caꞌ ñayguëxɨ̈cɨ ya naaxhuiñ mɨɨd ñinïcx.  Jadayaabɨ jäy ajcxy yhuinꞌɨɨmyb yhueñypɨnɨty etz Jesucristo ymɨdzipꞌajtyp ajcxy.
\v 8 Naygüendɨꞌájtɨgɨx cɨꞌm.  Ix mgamɨjpɨdaaccɨxy yɨꞌ ajcxy yꞌayuc.  Co ajcxy myajhuinꞌɨ́ɨngɨxɨpy, huinꞌit anajty myajtɨgooygɨxy je oyꞌajt huɨdibɨ mbadaangɨxyp ma Cristo.  Co mguydúngɨxɨpy Jesucristo ytɨyꞌajt, huinꞌit mbáatcɨxɨpy tüg oyꞌajt caꞌpxypɨ jiiby tzajpjoty.
\p
\v 9 Tügꞌócɨy jäy huɨdibɨ caꞌ cuydungɨxy je Jesucristo yꞌayuc ytɨyꞌajt, caꞌ ajcxy mɨɨdɨty Dios ytɨyꞌajt ma ajcxy yjot yhuinmaꞌñ.  Je jäy ajcxy huɨdibɨ cuydundɨɨb je Cristo yꞌayuc ytɨyꞌajt, ymɨɨd ajcxy Dios Teedy etz je yꞌung ytɨyꞌajt ma ajcxy yjot yhuinmaꞌñ.
\v 10 Penɨ ji pɨnjaty ñɨcxy ma miich ajcxy huɨdibɨ yajꞌixpɨjcp huɨdibɨ ca ytɨyꞌajtɨty, caꞌ ajcxy mgöbɨguɨpy ma mdɨjcɨn, e ni caꞌ ajcxy mjɨjpꞌixɨ̈huɨpy.
\v 11 Com Dios yjäy pɨnjaty anajty jɨjpꞌixɨɨyb je jäy ajcxy huɨdibɨ yajꞌixpɨjc huɨdibɨ caꞌ ytɨyꞌajtɨty, hueꞌ jeꞌ tundɨgooyb ma Dios ytɨyꞌajt.  Hueꞌ jeꞌ anajty paady jaduꞌn nej jɨhuɨ̈y tɨ jɨjptɨgɨɨyñɨ ajcxy je huingbɨ ixpɨjcɨn huɨdibɨ caꞌ ytɨyꞌajtɨty.
\s Capxycɨ́jxɨn
\p
\v 12 Oy ɨɨch ooy mɨj may miich ajcxy njamɨɨdmɨydägaangɨxy per caꞌ miich ajcxy jaduꞌn nijayɨ̈huaangɨxy necyꞌam.  Hueꞌ janchtɨy njɨjpꞌixyɨch co cɨꞌm nninɨcxaangɨxy jɨm, e nmɨɨd mɨydägaangɨxy auꞌam jɨgɨx ajcxy ooy jotcujc mnayjɨhuɨ́ɨyɨgɨxɨpy.
\p
\v 13 Je mdzɨꞌ yꞌung ajcxy huɨdibɨ ya yajpatcɨxp xyajniguejxp ycapxpocxɨn, je huɨdi ajcxy Dios nañ jaduꞌn tɨ yhuinꞌíjxɨgɨxy.  Jaduꞌn ngapxycɨ́xyɨch mɨɨd miich.  Amén.