\id 3JN
\h 3 JUAN
\toc1 3 JUAN
\mt1 3 SAN JUAN
\mt2 Yɨ Necy Huɨdibɨ San Juan Yajniguejx Gayo
\c 1
\p
\v 1 Señor Gayo:
\p
Nguejxypɨch capxpocxɨn ma miich.  Ɨɨch miich nyajniguejxyp jada necy.  Nnigohuajcꞌajtypɨch ma je mɨbɨjcpɨdɨjc.  Ooy ndzocy njɨhuɨ̈yɨch miich.
\p
\v 2 Miich mɨgüg, ooy nmɨgügꞌadyii.  Dios nmɨbɨjctzooybɨch mɨɨd miich ycɨxpɨ, huen agujc jotcujc mdzɨnähuɨpy etz mmɨcꞌidɨpy mꞌoyꞌidɨpy.  Nejhuɨɨybɨch co oy mꞌity ma Dios.
\v 3 Com oy tɨ njotcugɨ̈yɨch co je mɨbɨjcpɨdɨjc ajcxy ymiiñ ya huɨdibɨ jɨm tzoon ma miich ajcxy, e yɨꞌ ajcxy xytɨyꞌajtmooyɨch jaduꞌn nej tɨydudägy mdzɨnäy e nañ jaduꞌn nej yajxon mguydunɨ Dios ytɨyꞌajt.
\v 4 Ooy njotcújcɨdyɨch jac nïgɨ co tɨyꞌajt nbaadyɨch jaduꞌn nej nmɨgügtɨjcɨch cuydungɨxy Dios ytɨyꞌajt.
\p
\v 5 Miich mɨgüg huɨdibɨ ooy ndzocy njɨhuɨ̈yɨch, ooy njäygɨdägyɨch co oyjäyꞌajtɨn mduñ mɨɨd je mɨgügtɨjc.  Nïgɨ oy co oyjäyꞌajtɨn mduñ mɨɨd je mɨgügtɨjc huɨdibɨ caꞌ mꞌixyꞌadyii.
\v 6 Yɨ mɨbɨjcpɨdɨjc, huɨdibɨ tɨ chooñ ma miich ajcxy, tɨ tɨyꞌajt yejccɨxy ma je mɨbɨjcpɨdɨjc ya jaduꞌn nej miich oyjäyꞌajtɨn mdzachtuñ.  Ooy oy mduñ co mmöy yɨ mɨgügtɨjc yɨ ytüꞌamgɨxpɨ e mguejxnaxy yajxon jaduꞌn nej Dios jäygɨdägy.
\v 7 Yɨ jaduꞌmbɨ jäy huɨdibɨ mguejxnajxyp anajty hueꞌ Dios yꞌayuc ycɨxpɨ yhuɨdity, e caꞌ yɨꞌ ajcxy ti pɨjctzoy ma je jäy ajcxy huɨdibɨ caꞌ Dios ytɨyꞌajt nejhuɨɨyɨ.
\v 8 Copɨcy nbubejtɨm ajcxy je mɨbɨjcpɨdɨjc ajcxy huɨdibɨ Dios yꞌayuc ycɨxpɨ yhuɨdijtcɨxy.  Co jaduꞌn nbubejtɨm, chi jaduꞌn paady nej jɨhuɨ̈y túꞌcɨy nduunɨm mɨɨd yɨꞌ ajcxy ma Dios yꞌayuc capxhuäcxɨɨ.
\s Je Diótrefes yjɨbɨc-huinmaꞌñ
\p
\v 9 Tɨ  nnijayɨ̈yɨch jayhuin je mɨbɨjcpɨdɨjc huɨdibɨ nayyöymújcɨgɨxp jɨm.  Jɨm yajpaady tüg jäy huɨdi xɨɨ Diótrefes huɨdibɨ caꞌ cöbɨgaꞌñɨch nꞌayucɨch etz ngötújcɨnɨch.  Amɨj agɨx jada jäy chachñayjɨhuɨ̈yii, yɨꞌ cɨꞌm tzachꞌaneꞌmam ma miich ajcxy.
\v 10 Paady ycɨxp co nnɨ́cxɨbɨch jɨm ma miich ajcxy nyajnɨmähuamy ajcxy tügꞌócɨy yɨ jɨbɨc-huinmaꞌñ huɨdibɨ Diótrefes ytumyb, jaduꞌn nej jɨbɨc xyñigapxy xyñiꞌojɨ̈yɨch etz jaduꞌn nej anɨɨ yajꞌixpɨcy.  E nañ ni yɨꞌ caꞌ mmɨɨdɨty jotcujcꞌajtɨn jaduꞌn nej chachꞌɨdɨ̈ch.  Nïgɨ ytundɨgoy co caꞌ yajjättägaꞌñ ajt nmɨgügtɨjc huɨdibɨ Dios mɨɨd ycɨxpɨ yhuɨdity.  E co ɨɨch ajt nmɨgüg pɨnjaty yajjättägaꞌñ, chi yɨꞌ capxꞌaducy e yajpɨdzɨmy je mɨbɨjcp huɨdibɨ jäy yajjättäc, e caꞌ jeꞌ cöbɨgaꞌñ ma miich mnayyöymujctac.
\p
\v 11 Miich hermano, huɨdibɨ ooy ndzocy njɨhuɨ̈yɨch, caꞌ mguydunɨpy jada jɨbɨc-huinmaꞌñ.  Cuydun janchtɨy yɨ oybɨ huinmaꞌñ.  Yɨ jäy ajcxy huɨdibɨ oybɨ tungɨxp, yɨꞌ ajcxy ymɨɨd Dios ytɨyꞌajt ma yjot yhuinmaꞌñ.  Yɨ jäy ajcxy huɨdibɨ jɨbɨc tungɨxp, caꞌ yɨꞌ ajcxy Dios ytɨyꞌajt nejhuɨɨyɨ.
\s Je Demetrio tüg yꞌijxpejt oybɨ
\p
\v 12 Yɨ jäy, huɨdibɨ yxɨɨ Demetrio, tügꞌócɨy jäy ajcxy ymɨnaangɨxy co ooy yꞌoyjäyɨty, e janch yajpaady ma Dios ytɨyꞌajt.  Ɨɨch nañ jaduꞌn nmɨnaꞌñɨch co ooy yꞌoyjäyɨty yɨ Demetrio, e miich mnejhuɨɨyb co ɨɨch ajt ndɨyꞌajt janch janch yɨꞌ.
\s Capxycɨ́jxɨn
\p
\v 13 Ooy ɨɨch anajty miich mɨjcajee ayuc njayajmɨɨdmɨydägaꞌñ.  Per caꞌ nijayɨ̈huaꞌñ necyꞌam.
\v 14 Hueꞌ janchtɨy njɨjpꞌixyɨch co nnɨcxaꞌñɨch tzojc ma miich ajcxy, e nmɨɨdmɨydägaꞌñɨch miich ajcxy cɨꞌm.
\p
\v 15 Jotcujcꞌájtcɨx.  Yɨ mɨbɨjcpɨdɨjc ajcxy huɨdibɨ ya yajpatp yajnajxpy ajcxy capxpocxɨn ma miich ajcxy.  Tun mayꞌajt yajnájxɨgɨch ngapxpocxɨn ma nmɨgügtɨjcɨch jɨm nidüg nidüg etz xɨɨbety xɨɨbety.  Cham ngapxycɨ́xyɨch, Juan je Apóstol.