\id JUD
\h JUDAS
\toc1 JUDAS
\mt1 SAN JUDAS
\mt2 Yɨ Necy Huɨdibɨ Judas Nijayɨy Je Huɨdibɨ Dios Tɨ Huinꞌijxɨgɨxy
\c 1
\p
\v 1 Ɨɨch Judas, tumbɨch ma Jesucristo ytung, Jacobo xyꞌuchꞌajtpɨch. Nijayɨɨybɨch miich ajcxy nidügꞌócɨy huɨdibɨ Dios Teedy tɨ huinꞌijxcɨxy jëbɨ mɨbɨjccɨxy yɨꞌ yꞌayuc huɨdibɨ jëbɨ xyajpocyñïhuaatzcɨxy. Nijayɨɨybɨch miich ajcxy tügꞌócɨy huɨdibɨ Jesucristo ycuendꞌaty ymɨɨd.
\v 2 Huen Dios miich ajcxy mɨjcajee xypaꞌayoogɨxy etz xyajjotcugɨɨygɨxy etz chojccɨxy xyjɨhuɨɨygɨxy.
\s Yɨꞌ ajcxy huɨdibɨ yajꞌixpɨjcp anɨɨ
\p
\v 3 Miich ajcxy mɨgügtɨjc huɨdibɨ ooy ndzocyɨch njɨhuɨ̈yɨch, mɨɨd je nïdzoocɨn ycɨxpɨ mɨɨd ajt nꞌalma huɨdibɨ miich ajcxy etz ɨɨch cham nmɨɨdꞌajtɨm, ooy chachycopɨcɨty co nijayɨ̈huɨbɨch miich ajcxy mɨɨd yɨ mɨbɨjcɨn ajcxy ycɨxpɨ, e ngohuanɨɨyb ajcxy co jëbɨ mɨc mꞌijtcɨxy ma ajcxy yɨ mɨbɨjcɨn e caꞌ mꞌixtɨgɨ̈huaꞌccɨxy ma yɨ ayuc tɨyꞌajt huɨdibɨ Dios yejc ma tügꞌócɨy naaxhuiñyjäy.
\v 4 Naagɨty jäy ajcxy tɨ ytɨgɨɨygɨxy ma miich ajcxy ayüch ameech mɨɨd anɨɨ. Jecyꞌajty Dios tɨyꞌajt yejcy ma yɨꞌ yꞌayuc co yɨ jaduꞌmbɨ jäy tɨgoyam ajcxy yꞌalma mɨɨd ypocy ycɨxpɨ. Hueꞌ yɨꞌ ajcxy jɨbɨc jäy huɨdibɨ caꞌ huindzɨgɨɨygɨxy Dios. Anɨɨdaacp yɨꞌ ajcxy co ymɨnaangɨxy co Dios tɨ xypaꞌayoohuɨm etz tɨ xyhuinmeecxɨm ajt nbocy paady ycɨxpɨ jëbɨ nduunɨm huen tiijɨty huɨdibɨ nijotꞌajtɨm. Caꞌ cöbɨjccɨxy je Dios huɨdibɨ nHuindzɨnꞌajtɨm, etz caꞌ cöbɨjccɨxy ɨɨch ajt nHuindzɨn Jesucristo.
\p
\v 5 Oy miich ajcxy tɨ mjanejhuɨydaaygɨxy jada tɨyꞌajt, per nyajjäymetzcodamy ajcxy jaduꞌn nej Dios jayɨjp yajpɨdzɨmy jecyꞌajty jɨm Egipto je Israel jäy ajcxy, e jacꞌaxam tzaachytuuñ mɨɨd oꞌcɨn je huɨdibɨ anajty ajcxy nijëjɨty caꞌ ymɨbɨjccɨxy.
\v 6 Je ángeles huɨdibɨ ajcxy caꞌ yhuɨꞌmy ma Dios ytung huɨdibɨ ajcxy capxycömɨdodacy Dios, yꞌixmajtztay ajcxy yꞌit chɨnaydac. Dios jeꞌ cham mɨɨdꞌajtp ajcxy ahuing. Mach ajcxy yꞌity agoodztuuby huinɨxɨɨ huinɨtiempo ixtɨ coonɨ je mɨj xɨɨ anajty Dios tɨ yajhuaadꞌaty, mɨna anajty tɨydunaꞌñ naaxhuiñyjäy ajcxy mɨɨd ypocy ycɨxpɨ.
\v 7 Jaduꞌn nej Sodoma etz Gomorra etz jacjadyii mɨj cajp huinduy agonbɨ ytundɨgoyday ajcxy ma jejɨmbɨ cajp ycuydungɨxyp ñinïcx chojcɨn, naygɨ̈yejcɨ ajcxy ma je jɨbɨc-huinmaꞌñ. Yëydɨjctɨjc ytundɨgooygɨxy mɨɨd huingbɨ yëydɨjc. Jeꞌ jaduꞌn huɨꞌm ijxpejt ma tügꞌócɨy jäy co je tzaachypɨ ajcxy paatcɨxy.
\p
\v 8 Jɨm yajpaady ma miich ajcxy jäy huɨdibɨ nejhuɨɨyb co Dios jecyꞌajty tzaachytuuñ ángeles ajcxy etz cajp jäy huɨdibɨ ajcxy tundɨgooy. Yɨꞌ ajcxy chɨnaayɨn jaduꞌn yɨꞌ nej tüg cumäy. Yajjɨbɨccɨɨygɨxy je ñinïcx mɨɨd pocytunɨɨ. Jɨjpcogapxɨɨygɨxy je Dios ycotujcɨn, nigapxcɨxy niꞌojɨɨygɨxy je huɨdibɨ ajcxy Dios mooyɨp mɨjꞌajtɨn.
\v 9 Je arcángel, Miguel, je ángel huɨdibɨ mɨjꞌaneꞌmɨn mɨɨd, co anajty ychiptuñ mɨɨd je mujcuꞌ, yajcapxyoongɨxy yajꞌayucyoongɨxy je Moisés ñinïcx, caꞌp jeꞌ mɨɨdꞌajty huinmaꞌñ nɨcxy yajpocycäy je mujcuꞌ mɨɨd nayꞌojɨɨ. Jëyɨ janch co nɨmay: “Yɨ Huindzɨn Dios miich xyꞌixꞌojɨp.”
\v 10 Per jada jäy ajcxy jɨbɨc ooy nigapxcɨxy huɨdibɨ caꞌ nejhuɨɨygɨxy. Tügɨɨyb ajcxy yhuinmaꞌñ mɨɨd ɨyujc animal yhuinmaꞌñ, etz ɨyujc animal caꞌ ajcxy mɨɨdɨty huinmaꞌñ tɨydudägyɨ. Cɨꞌm jada jäy ajcxy ñayyajhuinmaꞌñydɨgóoyɨgɨxy, e jaduꞌn ajcxy yꞌalma yajtɨgoyaangɨxy.
\p
\v 11 Ypadamyb ajcxy tzaachypɨ mɨjcajee mɨɨd pocy ycɨxpɨ com jeꞌ yɨꞌ ajcxy ypadumyb nej Caín yꞌɨdɨɨch. Mɨɨd co meeñ tzachꞌadzojccɨxy, paady ñɨɨdɨgooygɨxy ytüdɨgooygɨxy jaduꞌn nej Balaam ñɨɨdɨgoy ytüdɨgoy jecyꞌajty, e jaduꞌn ajcxy yꞌayoogɨxy jaduꞌn nej Coré, co yꞌoꞌcy co ycacapxymɨdohuañ anajty co Moisés oy yꞌayucjɨjpcogapxɨɨyɨ.
\v 12 Yɨ jaduꞌmbɨ jäy tzoꞌyduꞌn yejcp ma miich ajcxy co mgaaygɨxy mꞌuuccɨxy tügmucy mɨɨd yɨꞌ ajcxy, e jaduꞌn ijxpejt yejccɨxy co mnaychójcɨgɨxy. Caaygɨxp uuccɨxp tügmucy mɨɨd miich ajcxy agujc jotcujc per ni caꞌ ajcxy mɨɨdɨty huindzɨgɨꞌñ mɨɨd ymɨgügtɨjc. Jaduꞌn ajcxy nipaady nej cöbixycuendꞌajtpɨ huɨdibɨ cɨꞌm ñaygüendꞌájtɨgɨxyp, e caꞌ tungɨxy cuendɨ je cöbixy. Jaduꞌn ajcxy nej joc huɨdibɨ caꞌpɨ nɨɨ mɨɨdɨty, huɨdibɨ je poj yajhuɨdijtɨp. Jaduꞌn ajcxy nej quipy huɨdibɨ caꞌ ytɨɨmꞌaty mɨna yjapadyii, jayɨjp yꞌocniicxy, e chi jada ytɨɨch, e ytɨmypɨdɨ̈gy mɨɨd ñidictz.
\v 13 Yɨꞌ ajcxy ytundɨgoyɨɨ ooy choꞌyduꞌn yecy, tɨm jaduꞌn nipaady nej je mejy yꞌoobɨ̈gy co ypɨdɨ̈gy. Jaduꞌn ajcxy nipaady nej madzaꞌ huɨdibɨ ytuꞌ tɨ yajtɨgach. Hueꞌ yꞌijtcɨxy pocypaꞌtcɨꞌpy huinɨxɨɨ huinɨtiempo, mɨjꞌagootztuuyb yꞌidɨpy ajcxy.
\p
\v 14-15 Nañ jaduꞌn Enoc, je mɨhuixtujcpɨ co anajty Adán tɨ yjayɨjpꞌaty, ymɨnañ co Dios yhuinmaꞌñymooyɨ mɨɨd jada ycɨxpɨ, e ymɨnañ: “Nꞌijxɨch je Huindzɨn Dios co anajty ymiiñ mɨɨd janch canaag mil je huɨdibɨ ajcxy tudägyɨty etz huätzɨp. Co anajty tɨydunaꞌñ ajcxy tügꞌócɨy naaxhuiñyjäy mɨɨd ypocy ycɨxpɨ, chi yajpocycähuaꞌñ je jɨbɨc jäydɨjc ajcxy jaduꞌn nej ajcxy tɨ ytundɨgooygɨxy mɨɨd yjɨbɨcjäyꞌajt etz mɨɨd jɨbɨc ayuc tɨɨbɨ mɨɨd nigapxcɨxy niꞌojɨɨygɨxy Dios.”
\v 16 Jada jɨbɨc jäydɨjc caꞌ ajcxy ni ti mɨjotcujcꞌajtcɨxy, ooy nigapxcɨxy niꞌojɨɨygɨxy ymɨgügtɨjc. Jëyɨ ajcxy ycɨꞌm jotcujcꞌajt ixtaaygɨxy. Ycapxcɨxy amɨj agɨx. Ooy oy nigapxcɨxy nijëjɨty jäy mɨɨd co ti oybɨ padaangɨxy ma jeꞌ ajcxy.
\s Judas capxhuijp jeꞌ ymɨgügtɨjc ajcxy
\p
\v 17 Per miich ajcxy mɨgügtɨjc huɨdibɨ ɨɨch ooy ndzocy, jäymejtzcɨx je ayuc huɨdibɨ jécyɨp tɨ najtzcapxɨɨygɨxy je Huindzɨn Jesucristo yꞌapóstoles ajcxy.
\v 18 Je apóstoles miich ajcxy xyñɨmay: “Ma anajty xɨɨ tiempo ycɨxaanɨ, jiꞌadɨp jäy ajcxy huɨdibɨ nɨxïgɨpy yajxïgɨpy huɨdibɨ Dios yjeꞌajtpy, e chɨnáaygɨxɨpy jaduꞌn nej yɨꞌ ajcxy cɨꞌm tzachnijotꞌajtcɨxy jɨbɨc-huinmaꞌñ.”
\v 19 Jeꞌ ajcxy yajnaybɨjc-huäcxɨɨb mɨbɨjcpɨdɨjc co caꞌ ajcxy mɨɨdɨty je Dios yjɨhuɨꞌñ ymɨcꞌajt.
\p
\v 20 Per miich ajcxy mɨgügtɨjc huɨdibɨ ooy ndzocyɨch njɨhuɨ̈yɨch, ijtcɨx miich ajcxy tudägy ma yɨ mmɨbɨjcɨn. Jäymejtzcɨx mɨbɨjctzoogɨx Dios mɨɨd je Espíritu Santo ypubejtɨn.
\v 21 Naygüendꞌájtɨgɨx jɨgɨx jëbɨ Dios xychojccɨxy xyjɨhuɨɨygɨxy ajcxy, e ahuijxcɨx je xɨɨ mɨna anajty ɨɨch ajt nHuindzɨn Jesucristo xymöhuaanɨm je jugyꞌajtɨn huɨdibɨ caꞌ ycɨxɨpy ytɨgoyɨpy ni mɨna mɨɨd co tɨ xypaꞌayoohuɨm.
\p
\v 22 Capxjotcɨdaaccɨx pɨnjaty caꞌ ti mɨjpɨdägy janchypɨdägy.
\v 23 Yajmɨɨdmɨydaaccɨx jacjadyii mɨgügtɨjc jɨgɨx ajcxy jëb paatcɨxy nañ jaduꞌn nïdzoocɨn mɨɨd ajcxy yꞌalma. Jaduꞌn anajty paady nej jɨhuɨ̈y myajpɨdzɨmgɨxy jɨɨnjoty. Yajtungɨx paꞌayoꞌn mɨɨd jacpɨnjaty pocytumbɨ. Naygüendꞌájtɨgɨx ma yɨꞌ ajcxy ypocytunɨɨ, caꞌ mbocytungɨxy nañ jaduꞌn. Jaduꞌn yɨꞌ ajcxy ypocytunɨɨ nipaady nej huit huɨdibɨ tɨ yjɨbɨccɨꞌy.
\s Judas capxycɨ́xy mɨɨd jeꞌ ymɨgügtɨjc
\p
\v 24-25 Je Dios tügpajcpɨ, je Dios huɨdibɨ xyajnïdzoocɨm ajt nꞌalma, je huɨdibɨ yjajtaayb ñejhuɨydaayb, ymɨɨd jeꞌ mɨcꞌajt etz cötujcɨn jëbɨ miich ajcxy xycuendꞌadɨpy jɨgɨx caꞌ mbocycägɨxɨpy, etz jeꞌ ymɨɨd mɨcꞌajt jɨgɨx jëbɨ xyajjaꞌtcɨxy agujc jotcujc ma Dios yhuinduu, ma yɨꞌ yajpaady mɨɨd yꞌoyꞌajtɨn ymɨjꞌajtɨn caꞌ ti mbocymɨɨdɨty ajcxy. Yɨꞌ paatɨp je oyꞌajtɨn etz mɨjꞌajtɨn etz mɨcꞌajt etz cötujcɨn mɨɨd nHuindzɨn Jesucristo ycɨxpɨ, tɨɨyɨp etz cham etz huinɨxɨɨ. Amén. Jaduꞌn ngapxycɨ́xyɨch.