\id REV
\h APOCALIPSIS
\toc1 APOCALIPSIS
\mt1 EL APOCALIPSIS
\mt2 O Je Huɨdibɨ Dios Yajhuinꞌijx San Juan
\c 1
\p
\v 1 Jayhuɨꞌmy ity ma jada necy je Jesucristo yꞌayuc ytɨyꞌajt huɨdibɨ caꞌ pɨn nejhuɨ̈y huinjɨhuɨ̈y jecyꞌajty. Dios moy Jesucristo jada tɨyꞌajt jɨgɨx yajniꞌixɨydähuɨpy je Dios ytumbɨ ajcxy ti anajty tunaanɨp jadaanɨp ya naaxhuiñ, e caꞌ ooy jecy yhuäcxɨbaꞌñ mɨna ytunaꞌñyii yjadaꞌñyii. Jesucristo yquejxy jada ayuc tɨyꞌajt mɨɨd tüg ángel ma Juan. E je ángel yajhuinꞌijxy Juan jada yꞌayuc etz ijxpejt.
\v 2 E Juan yejcy tɨyꞌajt janchypɨ tügꞌócɨy jaduꞌn nej anajty tɨ huinꞌixy tɨ huinmɨdoy. E Juan ñidɨyꞌajtꞌajtpy jada Dios yꞌayuc etz nañ jaduꞌn nidɨyꞌajtꞌaty je ayuc tɨyꞌajt huɨdibɨ Jesucristo yajnejhuɨɨyɨ.
\p
\v 3 Janch jotcujc jeꞌ pɨnjaty capxp jada necy etz pɨnjaty mɨdoꞌmbɨjc jada Dios yꞌayuc huɨdibɨ Juan nidɨyꞌajtpy etz ñajtzcapxɨɨyb. E jotcujc jeꞌ pɨnjaty cuydumb tügꞌócɨy huɨdibɨ jaybety ma jada necy, com je xɨɨ je tiempo huingoonɨñ jeꞌ mɨna ytunaꞌñyii yjadaꞌñyii.
\s Juan nijayɨɨy huixtujcꞌitpɨ mɨbɨjcpɨdɨjc
\p
\v 4 Ɨɨch Juan nijayɨɨybɨch yam je mɨbɨjcpɨdɨjc huixtujcpɨcypɨ huɨdibɨ yajpatp jɨm Asia naaxjot. Huen Dios etz je huixtujcpɨ espíritu huɨdibɨ yajpatp ma jeꞌ yꞌaneꞌmdac mayꞌajt oyꞌajt tunɨpy mɨɨd miich ajcxy etz xymóoygɨxɨpy jotcujcꞌajtɨn. Dios jeꞌ huɨdibɨ cham ijtp, je huɨdibɨ jecyꞌajty ijt, etz je huɨdibɨ miinaamb.
\v 5 Huen Jesucristo mayꞌajt oyꞌajt tunɨpy mɨɨd miich ajcxy etz xymóoygɨxɨpy jotcujcꞌajtɨn. Jesucristo je huɨdibɨ tɨydudägy Dios ytɨyꞌajt yejcɨ, je jayɨjpɨ jäy huɨdibɨ tɨ yjugypɨcy jadügꞌoc co yꞌoꞌcy, jeꞌ nigohuajcꞌajtp tügꞌócɨy pɨnjaty jugypɨgɨp jadügꞌoc co anajty tɨ yꞌöccɨxy. Jesucristo nigohuajcꞌajtp etz aneꞌmy tügꞌócɨy reydɨjc huɨdibɨ aneꞌmb ya naaxhuiñ. Je Cristo, huɨdibɨ xychojcɨm xyjɨhuɨɨyɨm, tɨ xyñihuaanɨm mɨɨd ñɨꞌpy ma je tzaachypɨ huɨdibɨ mɨhuaadꞌajtɨm mɨɨd ajt nbocy ycɨxpɨ.
\v 6 Jesucristo tɨ xycötujcmooyɨm etz tɨ xytungmooyɨm mɨɨd Dios Teedy, huɨdi yɨꞌ yteedyꞌajtpy. Jaduꞌn ɨɨch ajcxy ndung etz ngötujcɨn nipaady nej je tung etz cötujcɨn huɨdibɨ reydɨjc etz teedytɨjc ajcxy ymɨɨd. Huen Jesucristo yꞌidɨpy cömay huinɨxɨɨ huinɨtiempo etz huen yɨꞌ yꞌaneꞌmɨn cötujcɨn yꞌidɨpy huinɨxɨɨ huinɨtiempo. Jaduꞌn jada. Amén.
\p
\v 7 Cuendtungɨx ɨɨch nꞌayuc, ¡Cristo miinaamb jocjoty e tügꞌócɨy je mayjäy yꞌixaꞌñyii! E yꞌixamyb jeꞌ ajcxy huidɨjaty Cristo yajꞌayoo yajtzaachypɨjc. Tügꞌócɨy naaxhuiñyjäy yjɨhuɨ̈huaꞌñ yäxaꞌñ ytajaꞌñ ymayaꞌñ mɨɨd jeꞌycɨxpɨ. Jaduꞌn jada. Amén.
\p
\v 8 Jaduꞌn je mɨjpɨ Dios huɨdibɨ tügꞌócɨy mɨcꞌajt mɨɨd ymɨnaꞌñ:
\p ―Ɨɨch jeꞌ huɨdibɨ yajtzondacp je naaxhuiñybɨ, je tzajp etz je huɨdibɨ jaccogɨxɨɨyb. Jaduꞌn ɨɨch nej letra A huɨdibɨ yajzondacp je alfabeto etz je letra Z huɨdibɨ cogɨxɨɨyb ma je alfabeto. Ɨɨch jeꞌ huɨdibɨ chamꞌijtp, etz huɨdibɨ jecyꞌajtyp ijt etz huɨdibɨ miinaamb.
\s Juan ijxy yɨ Cristo oybɨ ymɨjɨty
\p
\v 9 Ɨɨch Juan, miich ajcxy mmɨgüg, quipxyɨ mɨɨd miich ajcxy nmɨnaxy nyajnaxyɨch ayoꞌn tzaachypɨ. Quipxyɨ mɨɨd miich ajcxy ndzɨnäyɨch ma Dios yꞌaneꞌmy. Etz quipxyɨ mɨɨd miich ajcxy nyajtuñɨch je mecxtujcɨn ma ndzɨnaayɨn huɨdibɨ Jesucristo tɨ xymooyɨm. Jɨm ɨɨch anajty mach nꞌityɨch ma je naax huɨdibɨ mejy agujc, huɨdibɨ xɨɨ Patmos, mɨɨd Dios yꞌayuc ytɨyꞌajt ycɨxpɨ, je ayuc tɨyꞌajt huɨdibɨ Jesucristo xyajnejhuɨɨyɨm.
\v 10 Jaduꞌn tügtecy tɨ njatyɨch, hueꞌ anajty tüg domingo xɨɨ co ɨɨch Dios nꞌojadajtyɨch, e Dios yjɨhuɨꞌñ ymɨcꞌajt tɨ anajty xymɨmadactayɨch njot nhuinmaꞌñɨch. Chi nmɨdooyɨch jɨɨxcɨꞌpyꞌamy tüg huɨdibɨ mɨc capx, jaduꞌn yɨꞌ ycapxɨn nmɨdooyɨch nej tüg trompeta yxüxy.
\v 11 Chi je huɨdibɨ xymɨgapxpɨch anajty ymɨnañ:
\p ―Ɨɨch jeꞌ huɨdibɨ yajtzondacp etz je huɨdibɨ yajcogɨxɨɨyb tügꞌócɨy tijaty ya naaxhuiñybɨ etz tzajpjoty. Jaduꞌn ɨɨch nej je letra A huɨdibɨ yajtzondacp je alfabeto etz je letra Z huɨdibɨ yajcogɨxɨɨyb je alfabeto. Cojaay miich ma tüg libro huɨdibɨ mhuinꞌijxyp, e quex je necy jɨm Asia naaxjot ma je huɨxtujc pɨcypɨ mɨbɨjcpɨdɨjc ma je huɨxtujcpɨ cajp: Efeso, Esmirna, Pérgamo, Teatira, Sardis, Filadelfia etz Laodicea.
\p
\v 12 Chi nꞌijxhuimbityɨch nꞌixaꞌñɨch pɨn ɨɨch anajty xymɨgapxpɨch. Co nnayjɨɨꞌijxɨch, huinꞌit nhuinꞌijxyɨch huɨxtujc candelero ac tɨm oorɨ.
\v 13 E cujcꞌamy ma je huɨxtujcp candelero nhuinꞌijxyɨch tɨm jaduꞌn nej je jäy huɨdibɨ tzoon tzajpjoty (je Cristo), yxoxyɨty mɨɨd tüg huit yjädy anajty mabaad ytecy, e yhuɨɨñɨty ma ycaach mɨɨd tüg oorɨhuɨɨn.
\v 14 Yɨꞌ ycohuajc etz ycöhuay janch poob, jaduꞌn nej lana huɨdibɨ janch poob, jaduꞌn nej nieve ypoobɨty, e je yhuɨɨn jaduꞌn nej jɨɨnyeꞌn.
\v 15 Jeꞌ ytecy tɨm jaduꞌn nej latón huɨdibɨ janch oy, nej jɨhuɨ̈y jɨɨnjoty ornojoty yam ypɨdzɨmy. E je ymɨydaacɨn janch mɨc, tɨm jaduꞌn nej canaag mɨjnɨɨ yꞌaꞌɨɨch yꞌagɨmɨmy.
\v 16 E ymɨɨd anajty ma aꞌoygɨꞌ huixtujc madzaꞌ. E ypɨdzɨmy ma yꞌahuac tüg espada mejtzꞌaduꞌmꞌamy yjɨjpɨty. E yhuiñyjɨjp jaduꞌn anajty nej xɨɨ janch mɨc yꞌañ.
\p
\v 17 Co jeꞌ nhuinꞌijxyɨch, chi janch ögy oy ngɨdägyɨch ma ytecy ymɨjc, chi xycɨ̈nïxajyɨch mɨɨd yꞌaꞌoygɨꞌ, chi xyñɨmaayɨch:
\p ―Caꞌ mdzɨgɨ̈y; ɨɨch jeꞌ huɨdibɨ jayɨjpꞌajtp ya naaxhuiñ etz tzajpjoty etz ɨɨch jeꞌ je huɨdibɨ cogɨxɨ̈huamb.
\v 18 Jugyꞌajtpɨch; tɨ nꞌögyɨch, e tɨ njugypɨcyɨch jadügꞌoc, e jugyꞌadɨpɨch huinɨxɨɨ huinɨtiempo. Nmɨɨdɨch mɨcꞌajt jɨgɨx aneꞌmɨbɨch yɨ oꞌcɨn etz je it ma je öcpɨ ajcxy yꞌalma ity. Jaduꞌn nipaady nej jɨhuɨ̈y nmɨɨdɨdyɨch je öcpɨ it ahuaaztɨ.
\v 19 Cojay cham tijaty mhuinꞌijxpy mhuinmɨdooyb, jaduꞌn nej huɨdibɨ tunaanɨp jadaanɨp jadachambɨ xɨɨ tiempo, etz huɨdibɨ tunaanɨp jadaanɨp jacjiinɨ.
\v 20 E jaduꞌn yhuimbɨdzɨmy je tɨyꞌajt janchypɨ huɨdibɨ caꞌ pɨn nejhuɨ̈y maabɨ je huɨxtujcpɨ madzaꞌ tɨɨbɨ mhuinꞌixy ma ɨɨch nꞌaꞌoygɨꞌ, etz je huɨxtujcpɨ orɨcandelero. Je huɨxtujcpɨ madzaꞌ, jeꞌ jeꞌ je ángeles ajcxy huɨdibɨ cogapxyꞌajtp mɨɨd Dios ycɨxpɨ ma je huɨxtujcpɨcypɨ mɨbɨjcpɨdɨjc. E je huɨxtujcpɨ candelero huɨdibɨ tɨ mꞌixy, jeꞌ yɨꞌ je huɨxtujcpɨcypɨ mɨbɨjcpɨdɨjc.
\c 2
\s Je ayuc huɨdi yajmoy yɨ mɨbɨjcpɨdɨjc jɨm Efeso
\p
\v 1 Nijayɨꞌ miich je ángel huɨdibɨ cogapxyꞌajtp jɨm ma je huɨdibɨ ajcxy mɨbɨjcp jɨm Efeso: “Nɨmaꞌ ajcxy co jaduꞌn ymɨnañ  je huɨdibɨ huɨxtujc madzaꞌ mɨɨd ma yꞌaꞌoygɨꞌ, je huɨdibɨ jɨm yajpatp agujcꞌamy ma je huɨxtujcpɨ candelero, jeꞌ jaduꞌn mɨnamb:
\v 2 Ɨɨch nejhuɨɨybɨch tügꞌócɨy ti miich ajcxy mdumyb, jaduꞌn nej mɨctägy mdungɨxy ma Dios ytung, etz jaduꞌn nej mmɨmecxtujccɨxy mɨgügtɨjc. Nejhuɨɨybɨch co caꞌ mꞌocmɨmecxtugaanɨ ajcxy jɨbɨcjäydɨjc, e tɨ mꞌijxmajtzcɨxy je ajcxy huɨdibɨ naydijɨp co Cristo tɨ huinꞌíjxɨgɨxy, per caꞌ jeꞌ ajcxy ytudägyɨty, e miich ajcxy tɨ mnejhuɨ̈y co ajcxy ooy yꞌanɨɨdaaccɨxy.
\v 3 Nejhuɨɨybɨch co ooy ayoꞌn mɨj miich ajcxy mmɨnajxcɨxy myajnajxcɨxy mɨɨd ɨɨch ycɨxp, etz ooy mɨj mecxtujcɨn ajcxy myajtungɨxy, etz ooy janch mɨc mdungɨxy mɨɨd ɨɨch ycɨxp, e caꞌ tɨ mmɨdzíjpɨgɨxy ɨɨch ndung.
\v 4 Per nejhuɨɨybɨch ma miich ajcxy mdundɨgoy. Caꞌ miich ajcxy xyajmɨjꞌatyɨch mɨjcajee, jaduꞌn nej anajty xyajmɨjꞌatyɨch ajcxy mɨjcajee co ogaꞌn ajcxy mɨbɨjcy. 
\v 5 Mɨɨd jada ycɨxpɨ jäymetz miich ajcxy ma oy mꞌagänajxcɨxy. Jothuimbijtcɨx, e tungɨx nej anajty mꞌoctungɨxp co ogaꞌñ ajcxy mmɨbɨjcy. Pen caꞌ ajcxy jaduꞌn mdungɨxy, chi tzojc nɨ́cxɨbɨch ma miich ajcxy, chi huingbɨ nbɨdägɨbyɨch ma miich ajcxy xyjapaady, tɨm jaduꞌn nipaady nej jɨhuɨ̈y nbɨcyɨch yɨ mgandelero. Jaduꞌn ndunɨpyɨch pen caꞌ anajty mjothuimbity ajcxy.
\v 6 Per njäygɨdaacypɨch jaduꞌn nej miich ajcxy mꞌijxtɨgoydaaygɨxy mjäydɨgoydaaygɨxy je jɨbɨcjäydɨjc ajcxy yhuinmaꞌñ. Nej je nicolaítas ajcxy ytungɨxy, miich ajcxy caꞌ mjäygɨdaaccɨxy e nañ jaduꞌn ɨɨch caꞌ njäygɨdägyɨch.
\v 7 Pɨnjaty ytädzac mɨɨd huen amɨdooꞌity nej je Espíritu Santo ymɨnaꞌñ ma je mɨbɨjcpɨdɨjc huɨdibɨ yajpatp xɨ ya. Pɨnjaty madacp ma ymɨbɨjcɨn, ɨɨch yɨꞌ nmöhuɨpy tzɨnaayɨn jugyꞌajtɨn ma Dios yꞌaneꞌmy, jaydëb jotcujc chɨnähuɨpy ma Dios yꞌit, jaduꞌn nipaady nej jɨhuɨ̈y ajcxy jɨɨcxy je quipytɨɨm ma Dios yꞌit huɨdibɨ jugyꞌajtɨn yejcp.”
\s Je ayuc huɨdi yajmoy yɨ mɨbɨjcpɨdɨjc ajcxy jɨm Esmirna
\p
\v 8 Nijayɨꞌ je ángel, je cogapxyꞌajtpɨ huɨdibɨ yajpatp ma je mɨbɨjcpɨdɨjc jɨm Esmirna:  “Jaduꞌn ymɨnaꞌñ je huɨdibɨ yajtzondac je naaxhuiñybɨ etz tzajp etz huɨdibɨ cogɨxɨ̈huɨp, je huɨdibɨ oꞌc e yjugyꞌaty jadügꞌoc:
\v 9 Ɨɨch nejhuɨɨybɨch tügꞌócɨy ti miich ajcxy mdumyb. Nꞌijxcajpyɨch nnejhuɨɨybɨch je mꞌayoꞌn mjotmay ajcxy, jaduꞌn nej tɨ myajꞌixhuɨdijtcɨxy tɨ myajpahuɨdijtcɨxy. Nejhuɨɨybɨch co ayoob jäy miich ajcxy, per mɨɨd miich ajcxy Dios yꞌoyꞌajtɨn, e jaduꞌn nipaady miich ajcxy nej comeeñydɨjc. Nejhuɨɨybɨch co nijëjɨty jäy miich ajcxy xyñigapxyp xyñiꞌojɨɨyb. Ñaydijyii ajcxy co yjudíojäyɨty, e caꞌ yjanchɨty. Hueꞌ ajcxy mɨɨd yꞌijtcɨxy je mujcuꞌ. 
\v 10 Caꞌ ni ti mdzɨgɨ̈y miich ajcxy nej mjadaangɨxy mꞌayoohuaangɨxy. Yɨ mujcuꞌ miich ajcxy nijëjɨty xyajpujxtɨjccähuamb, mꞌocyajꞌijxmadzangɨxy pen janch miich ajcxy nidügꞌócɨy myajpatcɨxy ma Dios. Jaduꞌñyɨ miich ajcxy mꞌayohuɨpy majc xɨɨ. Ijtcɨx tudägy mabaad ajcxy mꞌöccɨxy. E ɨɨch miich ajcxy je jugyꞌajtɨn huinɨxɨɨbɨ nmöhuɨpy jaduꞌn nej premio co tɨ mmadaaccɨxy ma mmɨbɨjcɨn.
\v 11 Pɨnjaty mɨɨd ytädzac, huen mɨdoꞌmbɨjccɨxy nej je Espíritu Santo nɨmäy je pɨnjaty mɨbɨjcp Dios. Pɨnjaty mɨmadacp cuyduñ Dios yꞌayuc ytɨyꞌajt, caꞌ jeꞌ yꞌalma ayoohuɨpy ayoodactuuyb, caꞌ yꞌögaꞌñ mɨmejtzꞌocpɨ.”
\s Je ayuc huɨdi yajmoy yɨ mɨbɨjcpɨdɨjc jɨm Pérgamo
\p
\v 12 Nijayɨꞌ je ángel huɨdibɨ cogapxyꞌajtp jɨm ma je mɨbɨjcpɨdɨjc ajcxy jɨm Pérgamo: “Nijayɨꞌ je ayuc co jaduꞌn ymɨnañ je huɨdibɨ yꞌespada mɨɨd mejtzꞌaduꞌmꞌamyb yjɨjpɨty:
\v 13 Ɨɨch nejhuɨydaaybɨch jaduꞌn nej miich ajcxy mdzɨnaaygɨx mjugyꞌajtcɨx. Nejhuɨɨybɨch co miich ajcxy mdzɨnaaygɨxy mjugyꞌajtcɨxy ma tüg cajp ma je mujcuꞌ yꞌaneꞌmy. Per mɨꞌijtyñɨ je nxɨɨjɨch, e caꞌ mꞌixmach je mmɨbɨjcɨn ma ɨɨch. Ni mgaꞌixmajch je mmɨbɨjcɨn je huinꞌit xɨɨ co Antipas yajꞌoꞌcɨ jɨm ma miich ajcxy, tüg ɨɨch nmɨgüg, je tudägypɨ testigo, jɨm jeꞌ yꞌoꞌcy ma mujcuꞌ chɨnäy.
\v 14 Nmɨɨdɨch tigati huɨdibɨ caꞌ nꞌoyꞌixyɨch ma miich ajcxy huɨdibɨ mdumyb ajcxy jɨm Pérgamo. Nijëjɨty miich ajcxy caꞌ mꞌixmadzaꞌñ je Balaam yꞌixpɨjcɨn, je huɨdibɨ yajꞌixpɨjc jecyꞌajty co huen jɨɨcxcɨxy je huɨdibɨ  anajty tzaadzech quipychech tɨ yajhuindzɨgɨɨygɨxy. E nañ jaduꞌn yajꞌixpɨc co huen tundɨgooygɨxy mɨɨd huingbɨ töxyjäy.
\v 15 Nañ jaduꞌn miich ajcxy mmɨɨdɨty nijeꞌ jäy huɨdibɨ ajcxy caꞌ ixmadzaangɨxy nicolaítas yꞌixpɨjcɨn, je ixpɨjcɨn huɨdibɨ ɨɨch caꞌ ndɨmꞌixaꞌñɨch.
\v 16 Paady jothuimbijtcɨxy miich ajcxy, yajtɨgajtznɨ ajcxy mjot mhuinmaꞌñ. Pen caꞌ jaduꞌn mdunɨpy, nɨ́cxɨbɨch jɨm tzojc ma miich ajcxy. Chi jadaꞌ ndziptunɨpyɨch mɨɨd yɨꞌ ajcxy huɨdibɨ mɨdundɨgooyb ɨɨch ngötujcɨn huɨdibɨ ngapxpɨch. Ɨɨch nꞌayuc jaduꞌn nipaady nej espada.
\v 17 Pɨn ytädzac mɨɨd, huen mɨdoꞌmbɨcy je ayuc huɨdibɨ je Espíritu Santo ñigapxyp ma je huɨdibɨ ajcxy Dios yꞌayuc ytɨyꞌajt mɨbɨjcɨp. Pɨn jada tɨydudägy mɨmadacp cuyduunnɨ Dios ytɨyꞌajt, ɨɨch yɨꞌ nmöhuɨpy oyꞌajtɨn huɨdibɨ Dios yjëꞌajtpy. Jada oyꞌajt jaduꞌn nipaady nej maná huɨdibɨ yüch ijtp ma Dios chɨnaydac. Nañ jaduꞌn ɨɨch yɨꞌ nmöhuɨbɨch tüg piꞌcpoobtzaa, e ma je poobtzaa jɨm yjaayɨty tüg xɨɨ jemybɨ huɨdibɨ caꞌ ni pɨn ijxcabɨpy, jëyɨ janchtɨy ijxcabɨp je xɨɨ pɨn anajty cöbɨjcp je tzaa.”  
\s Je ayuc huɨdi yajmoy yɨ mɨbɨjcpɨdɨjc jɨm Tiatira
\p
\v 18 Nijayɨꞌ je ángel huɨdibɨ cogapxyꞌajtp ma je mɨbɨjcpɨdɨjc jɨm Tiatira: “Nɨmaꞌ ajcxy, jaduꞌn je Dios yꞌung ymɨnaꞌñ, je huɨdibɨ yhuin mɨɨd jaduꞌn nej jɨhuɨ̈y jɨɨnyeꞌn, e ytecy jaduꞌn mɨɨdɨty nej bronce tɨɨbɨ ytoyhuäch ma jɨɨn:
\v 19 Jaduꞌn yɨꞌ ymɨnaꞌñ: Nejhuɨɨybɨch  tügꞌócɨy ti ajcxy mdumyb. Nejhuɨɨybɨch jaduꞌn nej miich ajcxy mɨjcajee myajmɨjꞌajtcɨxy Dios etz mdzojccɨxy mjɨhuɨɨygɨxy ymɨgügtɨjc; jaduꞌn nej mmɨbɨjccɨxy  mmɨjpɨdaaccɨxy  Dios yꞌayuc ytɨyꞌajt; jaduꞌn nej mɨctägy mdungɨxy ma Dios ytung; etz jaduꞌn nej myajtungɨxy mecxtujcɨn ma mdzɨnaayɨn; etz nejhuɨɨybɨch co cham nïgɨ mdungɨxy ma Dios ytung, caꞌydɨ jaduꞌn ajcxy nej myajtzondacy.
\v 20 Ji tüg huɨdibɨ miich ajcxy mdumyb huɨdibɨ ɨɨch caꞌ nꞌoyꞌixyɨch. Mdzachmɨmecxtujccɨxy yɨ töxyjäy Jezabel huɨdibɨ naydijɨp co ycapxyp Dios yꞌayuc e caꞌ yjanchɨty. Jeꞌ yajnɨɨdɨgooyb yajtüdɨgooyb ɨɨch ndumbɨ mɨɨd anɨɨ. Jaduꞌn jeꞌ ymɨnaꞌñ co jëbɨ huingbɨ töxyjäy mɨgapxtɨgooygɨxy e co jëbɨ caaygɨxy jɨɨcxcɨxy je huɨdibɨ ajcxy yajhuindzɨgɨɨyb quipychech tzaadzech.
\v 21 Tɨ ɨɨch je Jezabel nmöy tiempo co ixyipy yjothuimbity, per yɨꞌ caꞌ ixmadzaꞌñ yjɨbɨc-huinmaꞌñ.
\v 22 Jadachambɨ nyajcähuaꞌñɨch je Jezabel cɨjxꞌam mɨɨd paꞌm, e jaduꞌn ajcxy nmöhuaꞌñɨch ayoꞌn je yëydɨjc ajcxy huɨdibɨ mɨɨd chachtundɨgoy. Jaduꞌn ndunɨpyɨch pen caꞌ ajcxy yjothuimbijtcɨxy nej ajcxy chachpadungɨxy je jɨbɨc-huinmaꞌñ huɨdibɨ je Jezabel ymɨɨd.
\v 23 E nyajꞌöctähuɨbɨch tügꞌócɨy ajcxy pɨnjaty panɨcxp cɨxyjot huinɨjot je Jezabel yꞌixpɨjcɨn jɨgɨx nidügꞌócɨy je mɨbɨjcpɨdɨjc ajcxy nejhuɨydähuɨpy co ɨɨch jeꞌ nejhuɨydaayb tügꞌócɨy jäy ajcxy yjɨbɨc-huinmaꞌñ. Chi nmöhuɨbɨch oybɨ nidüg nidüg jäy pen tɨ anajty oybɨ tuñ, o nmöhuɨbɨch nidüg nidüg jɨbɨcpɨ pen tɨ anajty jɨbɨcpɨ tungɨxy.
\v 24 Per jacjadyii miich ajcxy jɨm Tiatira caꞌ mbanɨcxcɨxy mbayöygɨxy Jezabel yꞌixpɨjcɨn, e ni caꞌ mmɨjpɨdaaccɨxy huɨdibɨ ajcxy ytijpy mujcuꞌ yꞌixpɨjcɨn huɨdibɨ tzip huinjɨhuɨɨyb. Ɨɨch miich ajcxy nɨmaayb co caꞌp ɨɨch miich ajcxy huingbɨ ixpɨjcɨn njacmóoygɨxɨpy.
\v 25 Mɨꞌijtcɨxy je Dios ytɨyꞌajt huɨdibɨ miich ajcxy mɨɨd, ixtɨ coonɨ anajty nhuimbityɨch.
\v 26 Pɨn madacp ma ymɨbɨjcɨn etz pɨn cuydumb ɨɨch ndɨyꞌajt mabaad anajty jeꞌ yꞌögy, ɨɨch jeꞌ nmöhuɨbɨch je cötujcɨn, jaydëb aneꞌmy naaxhuiñyjäy ajcxy.
\v 27 Ɨɨch jeꞌ nmöhuɨpy je aneꞌmɨn cötujcɨn ma naaxhuiñyjäy huɨdibɨ Dios Teedy, ɨɨch nDeedy, tɨ xymöyɨch. E jeꞌ aneꞌmɨpy mɨɨd Dios ymɨcꞌajt. E jeꞌ yajhuindɨgoydähuɨpy naaxhuiñyjäy yꞌaneꞌmɨn, tɨm jaduꞌn nej jäy püy pochtuꞌtz mɨɨd pujxtajc.
\v 28 Nañ jaduꞌn ɨɨch jeꞌ nmöhuɨpy ɨɨch nmɨcꞌajt huɨdibɨ nipaady nej je madzaꞌ jayhuɨxtujc.
\v 29 Pɨn ytädzac mɨɨd, pɨn mɨdoohuamb, huen mɨdoy nej je Espíritu Santo ymɨnaꞌñ ma yɨ mɨbɨjcpɨdɨjc nidügꞌócɨy.”
\c 3
\s Je ayuc huɨdi yajmoy yɨ mɨbɨjcpɨdɨjc jɨm Sardis
\p
\v 1 Nijayɨꞌ je ángel huɨdibɨ cogapxꞌajtpɨ ma yɨ mɨbɨjcpɨdɨjc ajcxy huɨdibɨ yajpatp jɨm Sardis: “Jaduꞌn ymɨnaꞌñ je pɨn mɨɨd je huɨxtujcpɨ Dios yꞌespíritu, huɨdibɨ mɨɨd je huɨxtujcpɨ madzaꞌ: Ɨɨch nejhuɨɨyb ti mdumyb. Nejhuɨɨybɨch co cömay ajcxy mꞌijtcɨxy co mmɨɨdɨty yjugyꞌajtɨn huinɨxɨɨbɨ e caꞌ yjanchɨty. Jaduꞌn miich ajcxy nipaady nej öcpɨ.
\v 2 Cuendɨtungɨx miich ajcxy yɨ mmɨbɨjcɨn, com jago jago ajcxy mgayajtɨgoydäy yɨ mmɨbɨjcɨn. Jayajmɨcpɨjccɨxy yɨ mmɨbɨjcɨn huɨdibɨ ajcxy mjacmɨɨdɨty. Tɨ ɨɨch nꞌixy co huɨdibɨ ajcxy mdumyb caꞌ yɨꞌ yhuädzɨty ytudägyɨty ma Dios yhuinduu.
\v 3 Jäymejtzcootcɨxy je Cristo ytɨyꞌajt je tɨɨbɨ mꞌixpɨjccɨxy, je tɨɨbɨ mmɨdoogɨxy. Panɨcxcɨx Cristo ytɨyꞌajt e jothuimbijtcɨxy ma yɨ oybɨ. Pen caꞌ mgüendtungɨxy yɨ mmɨbɨjcɨn, nɨcxɨbɨch ma miich ajcxy jaduꞌn nej tüg meetzpɨ, ni mganejhuɨ̈huɨ́ɨygɨxɨpy anajty nnɨcxyɨch.
\v 4 Miich jacmɨɨdnɨ mɨbɨjcpɨ ajcxy jɨm Sardis huɨdibɨ caꞌnɨ ajcxy ymɨbɨjcɨn yajtɨgooygɨxy, caꞌnɨ ajcxy ytundɨgooygɨxy, tɨm jaduꞌn nipaady nej jɨhuɨ̈y ajcxy mɨɨdɨty poob huit huɨdibɨ caꞌ yjɨbɨcɨ̈y. Yɨꞌ ajcxy xymɨɨdꞌidɨpɨch mɨɨd huädz jot huädz huinmaꞌñ, tɨm jaduꞌn nipaady nej ypoob huit ajcxy mɨɨdɨty, com ajcxy ypadyii jaduꞌn.
\v 5 Pɨn mɨmadacp cuyduñ etz mɨjpɨdägy Dios yꞌayuc ytɨyꞌajt, ymɨɨdꞌadɨpy ajcxy je huätzpɨ jot huinmaꞌñ, huɨdibɨ jaduꞌn nipatp nej poob huit ajcxy mɨɨdɨty. E ni caꞌ ajcxy yxɨɨ yajjödzɨp ma je libro ma ycojaayɨty je tudägypɨ jäy ajcxy yxɨɨ. E ɨɨch yɨꞌ ajcxy ngapxquëxɨ̈ccɨxy yxɨɨ ma nDeedyɨch yhuinduu, e nañ jaduꞌn ma nDeedyɨch yꞌángeles yhuinduu ajcxy.
\v 6 Pɨn mɨdoohuamb, pɨn ytädzac mɨɨd, huen mɨdoy nej je Espíritu Santo ymɨnaꞌñ majaty je huɨdibɨ ajcxy Dios yꞌayuc ytɨyꞌajt mɨbɨjcɨp.”
\s Je ayuc huɨdi yajmoy yɨ mɨbɨjcpɨdɨjc jɨm Filadelfia
\p
\v 7 Nijayɨꞌ je ángel huɨdibɨ capxyꞌajtp ma je mɨbɨjcpɨdɨjc jɨm Filadelfia: “Jada ayuc tɨyꞌajt ñigapxyp je tügpajcpɨ huätzpɨ, tügpajcpɨ janchypɨ, huɨdibɨ aneꞌmy Dios yjäy jaduꞌn nej David aneꞌmy Dios yjäy jecyꞌajty. Je huɨdibɨ yajꞌahuaatzp e co yajꞌahuäch ni pɨn caꞌ huaad yajꞌaducy. Je huɨdibɨ yajꞌadujcp e co yɨꞌ yajꞌaducy, ni pɨn caꞌ huaad yajꞌahuäch:
\v 8 Cuendɨtungɨx nej nmɨnaꞌñɨch: Ɨɨch nejhuɨɨybɨch nej mdungɨxy. Tɨ nyecyɨch mɨcꞌajt ma miich ajcxy huɨdibɨ nipaady nej tüg tɨgɨydac ahuätzpɨ ma miich mhuinduu, huɨdibɨ ni pɨn caꞌ huaad yajꞌaducy. Nejhuɨɨybɨch co hueenɨ Dios yjɨhuɨꞌñ ymɨcꞌajt miich ajcxy mɨɨdɨty. Per tɨ mguydungɨxy ɨɨch nꞌayuc, e caꞌ nxɨɨjɨch xycoyützɨ.
\v 9 Cuendɨtungɨx nej nmɨnaꞌñɨch. Yɨꞌ ajcxy huɨdibɨ mɨjpɨdacp Satanás yꞌayuc, je huɨdibɨ anɨɨdacp ajcxy co ñaydíjɨgɨxy judíojäy, e caꞌ yjanchɨty. Ɨɨch yɨꞌ ajcxy nmɨmadägɨbɨch jɨgɨx yɨꞌ ajcxy miich xyhuingojxtɨnähuɨpy xyajmɨjꞌadɨpy. E chi nejhuɨ̈huɨp ajcxy co ɨɨch miich ajcxy tɨ ndzocy.
\v 10 Mɨɨd co tɨ myajtungɨxy mecxtujcɨn ma mdzɨnaayɨn, tɨ mguydungɨxy ɨɨch nꞌayuc nꞌaneꞌmɨn. Paady ɨɨch nihuaꞌnɨp yajtzögɨp miich ajcxy ma anajty jäy ajcxy mɨctägy xyjotꞌijxcɨxy xyhuinmaꞌñꞌijxcɨxy ajcxy. Miinɨpy je xɨɨ je tiempo mɨna je mujcuꞌ jotꞌixɨpy huinmaꞌñꞌixɨpy tügꞌócɨy je mayjäy huɨdibɨ yajpatp ya naaxhuiñ.
\v 11 Ɨɨch tzojc nnɨcxaꞌñɨch jɨɨby naaxhuingɨ́xy. Mɨꞌijtcɨxy yɨ Dios yꞌayuc huɨdibɨ miich ajcxy mɨɨd jɨgɨx ni pɨn xycapɨjcɨp ajcxy mbremio, huɨdibɨ tɨ mganarꞌajtcɨxy ma Dios.
\v 12 Pɨn mɨmadacp cuyduñ Dios yꞌayuc ytɨyꞌajt etz cuyduñ yajxon, ɨɨch yɨꞌ nbɨdägɨbɨch mɨjꞌaneꞌmbɨ ma ɨɨch nDios yꞌit, jaduꞌn yɨꞌ nipaadɨp nej tüg pilar huɨdibɨ mɨdɨnaayb jemxypɨ ma Dios ytɨjc. E yɨꞌ ni camɨna ypɨdzɨmɨpy ma Dios yꞌit, e njayɨ́ɨyɨbɨch ma yɨꞌ ñinïcx ɨɨch nDios yxɨɨ, e nañ jaduꞌn njáayɨbɨch je ɨɨch nDios ycajp yxɨɨ, je Jerusalén jemybɨ huɨdibɨ tzoon tzajpjoty ma Dios yajpaady. E nañ jaduꞌn njáayɨbɨch nxɨɨ jemybɨ ma yɨꞌ ñinïcx.
\v 13 Pɨn ytädzac mɨɨd huen mɨdoy ti je Espíritu Santo ñigapxyp ma tügꞌócɨy je mɨbɨjcpɨdɨjc.”
\s Je ayuc huɨdi yajmoy yɨ mɨbɨjcpɨdɨjc jɨm Laodicea
\p
\v 14 Nijayɨꞌ je ángel huɨdibɨ cogapxyꞌajtpɨ ma je mɨbɨjcpɨdɨjc jɨm Laodicea: “Jaduꞌn ymɨnaꞌñ je huɨdibɨ janchɨp tudägyɨp, je huɨdibɨ tudägy yejcp Dios ytɨyꞌajt e caꞌ yajtɨgach yꞌayuc, je huɨdibɨ yajtzondac tügꞌócɨy tijaty huɨdibɨ Dios tɨ oyduñ:
\v 15 Nejhuɨɨybɨch nej mdungɨxy. Nejhuɨɨybɨch co miich ajcxy mɨbɨjccɨxy huenjaty, caꞌ myajtɨgoydaygɨxy yɨ mmɨbɨjcɨn, e ni caꞌ ooy mɨj mmɨbɨjccɨxy. Jaduꞌn miich ajcxy nipaady nej nɨɨ huɨdibɨ ni caꞌ ytɨchɨty, e ni caꞌ yꞌanɨty. Jacꞌoy ixyipy co ooy mɨj mmɨbɨjccɨxy, o co caꞌ ixyipy mdɨmmɨbɨjccɨxy.
\v 16 Mɨɨd co tɨm yinjaty tɨm huenjaty ajcxy mmɨbɨjccɨxy, caꞌ ooy mmɨbɨjcɨn ymɨjɨty ajcxy, e ni caꞌ ajcxy mmɨbɨjcɨn ytɨgoydaaygɨxy, mɨɨd jada ycɨxpɨ ɨɨch miich ajcxy njɨjpcogapxɨ̈huɨpy mɨɨd je ndzip nꞌéjcɨnɨch, tɨm jaduꞌn nej jäy ajcxy ixtzujy huɨdibɨ yꞌahuac ycaꞌtzojcpy.
\v 17 Miich ajcxy mɨnamb co ooy ajcxy mgomeeñɨty, ooy ajcxy mɨj mdzɨnaayɨn mjugyꞌajtɨn mmɨɨdɨty, e caꞌ ti ajcxy myajmayjajtcɨxy, e ni caꞌ miich ajcxy nejhuɨɨygɨxy co ayoꞌnduum myajpatcɨxy. Jaduꞌn miich ajcxy nipaady nej ayoobɨtɨjc, nej huiintzpɨ, nej huɨdibɨ nïhuädz ixhuädz huɨdijtp.
\v 18 Paady ɨɨch miich ajcxy nɨmaaygɨxy co copɨcy ajcxy mbaadɨp ma ɨɨch Dios ytɨyꞌajt janchypɨ, huɨdibɨ jaduꞌn nipaadɨpy nej jɨhuɨ̈y ajcxy mjuuygɨxy huädz oorɨ ma ɨɨch, huɨdibɨ tɨ yꞌoybɨdzɨmy mɨɨd jɨɨn jɨgɨx mgomeeñꞌájtcɨxɨp. Nañ jaduꞌn ɨɨch miich ajcxy nnɨmaaygɨx co copɨcy ajcxy mbáatcɨxɨp pocyhuinmeecxɨn ma ɨɨch, huɨdibɨ jaduꞌn nipaady nej jɨhuɨ̈y huit oyjatypɨ poopjatypɨ mjuuygɨxy ma ɨɨch, jɨgɨx mxójxcɨxɨpy mninïcx caꞌydɨ tzoꞌyduꞌn mbáatcɨxɨpy. Nañ jaduꞌn ɨɨch miich ajcxy nnɨmaaygɨx co mbaadɨp tɨyꞌajt ma ɨɨch nlibro, huɨdibɨ jaduꞌn nipaady nej jɨhuɨ̈y huindzooy mjuuygɨxy, jɨgɨx mdzoydúngɨxɨpy mhuin e huinꞌit ajcxy mꞌíjxcɨxɨpy huädz.
\v 19 Nꞌojypɨch etz ndzaachytumyb tügꞌócɨy pɨnjaty ndzojcpyɨch njɨhuɨɨybɨch, paady ycɨxpɨ miich ajcxy mhuindɨnaꞌmjɨjptɨnaꞌ mɨc ɨɨch ndɨyꞌajt etz jothuimbijtcɨx nej mbocytungɨxy.
\v 20 Cuendɨtungɨx nej cham nnɨmaaygɨx. Jaduꞌn nipaady nej jɨhuɨ̈y ndɨnäyɨch ma nidüg nidüg jäy ytɨjcꞌaguu e ngojxnojcɨch ajcxy ytɨjc agɨꞌ. Nbɨjctzooybɨch co xyajtɨgɨ̈huɨbɨch ajcxy ma ytɨjcɨn. Pɨnjaty xyyöcmɨdoobɨch, e yajꞌahuäch ytɨjc, tɨgɨ̈huɨbɨch ma yɨꞌ, e cayɨpɨch mɨɨd yɨꞌ, e yɨꞌ mɨɨd ɨɨch.
\v 21 Pɨnjaty cuydundaayb Dios yꞌayuc ytɨyꞌajt, ɨɨch jeꞌ nmöhuɨpy it lugar tzajpjoty quipxyɨ mɨɨd ɨɨch ma ɨɨch nꞌaneꞌmdac. Tɨ nguydundaayɨch Dios yꞌayuc, e nmɨɨdɨch it lugar ma ɨɨch nDeedy yꞌaneꞌmdac, paady ycɨxp jëbɨ nmöhuɨbɨch miich ajcxy it lugar ma nyajpaadyɨch.
\v 22 Pɨn ytädzac mɨɨd, pɨn mɨdoohuamb, huen mɨdoy huɨdibɨ je Espíritu Santo ycapxyp majaty mɨbɨjcpɨdɨjc huɨdibɨ canaagpɨcy yajpatp.”
\c 4
\s Ɨɨbaatcɨxy capxpaatcɨxy yɨ Dios huɨdibɨ tzajpjoty tzɨnaayb
\p
\v 1 Co jada jaduꞌn yjajtɨ, chi nhuindɨɨcxyɨch tzajpjoty, e nhuinꞌijxyɨch tüg tɨjc aguu ahuädz jiiby tzajpjoty. E nmɨdooyɨch tüg ayuc janch tɨm jaduꞌn nej tüg trompeta yxüxy huɨdibɨ ɨɨch anajty jayɨjp tɨ xyꞌocmɨgapxpɨ, xyñɨmäyɨch:
\p ―Pet ya ma ɨɨch, cham nyajniꞌixɨ̈huaꞌñ tijaty copɨcy tunaanɨp jadaanɨp co anajty jadayaabɨ xɨɨ tiempo ñaxy.
\p
\v 2 Chi Dios yjɨhuɨꞌñ ymɨcꞌajt xymɨmadactaayɨch njot nhuinmaꞌñɨch, e nhuinꞌijxyɨch tüg aneꞌmdac jiiby tzajpjoty. E ma je aneꞌmdac jɨm anajty tüg ɨñäy.
\v 3 E je huɨdibɨ anajty jɨm ɨñaayb ma je aneꞌmdac, jaduꞌn anajty yquëxɨ̈gy nej tüg tzaa janch oybɨ janch adɨɨcxp. E jühuɨdity ma je aneꞌmdac je Dios yhuätzꞌajt quëxɨ̈gy nej tüg iꞌñch janch oycolor huɨdibɨ janch adɨɨcxp nej tüg tzaa tzuxjatypɨ.
\v 4 Nañ jaduꞌn jühuɨdity ma je aneꞌmdac jiiby anajty iipx madaax silla, e ma je silla ɨñäy iipx madaax mɨjjäy, ac poob huit mɨɨd. E ymɨɨd anajty ajcxy ma ycohuajc coronɨ ac tɨm oorɨ.
\v 5 Ma je aneꞌmdac anajty ypɨdzɨmy huɨdzuc, e ooy anajty enee yjɨdijtɨn ñeꞌmy. E ma je aneꞌmdac huinduu jiiby anajty Dios yjɨhuɨꞌñ ymɨcꞌajt je huixtujcpɨ, huɨdibɨ quëxɨ̈g nej huixtujc tzinhuaty huɨdibɨ ooy mɨc ytɨɨcxy.
\v 6 E je tɨgot ma je aneꞌmdac huinduu jaduꞌn quëxɨ̈gy nej vidrio mejy, janch huädz janch adɨɨcxp.
\p E cujcꞌamy jühuɨdity ma je aneꞌmdac mɨdaax ɨyujc huɨdibɨ mɨɨd mayhuiin jahuinduuy jajɨxcɨ̈py.
\v 7 Je mɨdügpɨ ɨyujc tɨm jaduꞌn anajty nej tüg jamgaa. Je mɨmetzpɨ ɨyujc tɨm jaduꞌn nej tüg huajmang. Je mɨdugɨɨgpɨ tɨm jaduꞌn anajty yhuiñyjɨjp nej jäy. Je mɨmadaaxpɨ tɨm jaduꞌn nej meꞌty yqueec-huɨdityɨn.
\v 8 Je nimɨdaaxpɨ ɨyujc ymɨɨd anajty ajcxy nidüg nidüg tudujc yqueec, e ymɨɨd anajty ajcxy yhuiin queecnïgɨ́xy etz queecpaꞌtcɨꞌpy. E caꞌ anajty ajcxy ypocxy xɨɨm tzuum, chachmɨnaangɨxy:
\q Santo, Santo, Santo, je Huindzɨn Dios huɨdibɨ tügꞌócɨy nejhuɨydaayb, huɨdibɨ tügꞌócɨy mɨcꞌajt mɨɨd, je huɨdibɨ anajty jiꞌajtp, je huɨdibɨ cham jiꞌajtp, etz je huɨdibɨ miinaamb.
\p
\v 9 Je ɨyujc ajcxy huinꞌɨɨgɨxy etz huindzɨgɨɨygɨxy etz yajmɨjꞌajtcɨxy Dios, etz yajnajxcɨxy Dioscojuyipy ma Dios je huɨdibɨ anajty ɨñaayb ma je aneꞌmdac, je huɨdibɨ tzɨnaayb jugyꞌajtp huinɨxɨɨ huinɨtiempo, e ni camɨna yꞌögɨpy.
\v 10 Co je ɨyujc ajcxy jaduꞌn ytuñ, chi je iipx madaaxpɨ mɨjjäy ycojxtɨnaydaaccɨxy ma jeꞌ yhuinduu huɨdibɨ anajty ɨñaayb ma je aneꞌmdac. E ooy anajty huindzɨgɨɨygɨxy je huɨdibɨ tzɨnaayb huinɨxɨɨ huinɨtiempo. Pɨdaaccɨxy anajty ajcxy ycorona ma jeꞌ yhuinduu, cham chachmɨnaangɨxy:
\q
\v 11 Miich, ɨɨch ajt nHuindzɨn, ɨɨch ajt nDios, miich mɨhuaad co mmɨɨdɨty tügꞌócɨy oyꞌajtɨn mɨjꞌajtɨn etz mɨcꞌajtɨn, mɨhuaad co miich nyajcömayɨp, mɨhuaad co miich mɨɨdꞌity tügꞌócɨy mɨcꞌajt etz mɨjꞌajt. Jaduꞌn miich mɨhuaad, com miich tɨ myajcojy, tɨ myajꞌabadɨ̈y tügꞌócɨy huɨdibɨ jiꞌajtp. Com miich jaduꞌn tɨ mdzocy, paady ycɨxpɨ tügꞌócɨy tijaty jiꞌajttäy.
\c 5
\s Je libro etz je Dios yꞌung, je Cordero
\p
\v 1 Chi jadaꞌ nhuinꞌijxyɨch ma je huɨdibɨ anajty ɨñaayb ma je aneꞌmdac mɨɨdɨty anajty ma yꞌaꞌoygɨꞌ tüg libro abugucy, yjaayɨty jotjotyꞌamy etz nïgɨxyꞌamy, ycoꞌaducyɨty mɨɨd huixtujc sellɨ. 
\v 2 Chi nañ jaduꞌn nhuinꞌijxyɨch tüg ángel huɨdibɨ mɨj cötujcɨn mɨɨd, yajtɨy mɨɨd ycapxɨn janch mɨc:
\p ―¿Pɨn jadaꞌ janch tudägyɨp co yajꞌahuädzɨp jada libro etz mɨgɨɨdzɨydähuɨpy yɨ ysellɨ?
\p
\v 3 Ni tzajpjoty, ni naaxhuiñ, ni naaxpaꞌtcɨꞌpy ycacáꞌɨty pɨn tudägyɨp huɨdibɨ mɨhuaad je libro co yajꞌahuädzɨp, o oy nɨgoodɨꞌajty jaꞌixaanɨp.
\v 4 Ɨɨch janch yaaxpɨch mɨɨd tajɨn mayɨn anajty, com caꞌ anajty yajpaady pɨn je libro mɨhuaad co yajꞌahuädzɨp, o oy nɨgoodɨꞌajty huindɨɨcxɨp.
\v 5 Chi nidüg je mɨjjäy xyñɨmaayɨch:
\p
―Caꞌ myäxy. Chi jeꞌ je mɨcꞌajt mɨɨdpɨ ma yɨ judíojäy, je David yꞌap yꞌoc huɨdibɨ nipatp nej tüg amaꞌycaa, yɨꞌ tɨ mɨmadactäy tügꞌócɨy jɨbɨcpɨ. Yɨꞌ mɨhuaad yɨ libro yajꞌahuädzɨp, etz mɨguejɨydähuɨpy je huixtujcpɨ ysellɨ.
\p
\v 6 Chi nhuindɨcxpejtyɨch, e agujcꞌamy ma je aneꞌmdacɨn, etz agujcꞌamy ma je mɨdaaxpɨ ɨyujc, etz agujcꞌamy ma je mɨjjäydɨjc ajcxy, jɨm anajty ytɨnäy je Dios yꞌung, je Cordero. Ooy anajty ñiguëxɨ̈gy chaachɨ̈ꞌau nej anajty ayoꞌn tzaachypɨ tɨ yajnaxy. Ymɨɨd anajty huixtujc ymuꞌn, e huixtujc yhuiin, jeꞌ jeꞌ je huixtujcpɨ Dios yjɨhuɨꞌñ ymɨcꞌajt huɨdibɨ yquejx huinduꞌmy naaxhuiñ.
\v 7 Chi je Cordero, je Dios yꞌung, ninɨcxy je huɨdibɨ anajty ɨñaayb ma je mɨjꞌaneꞌmdac, e chi oy cɨychoy je libro huɨdibɨ je mɨjꞌaneꞌmbɨ anajty ymɨɨd ma je aꞌoyꞌamybɨ ycɨꞌ.
\v 8 Co jeꞌ anajty tɨ cɨychoy je libro, chi je mɨdaaxpɨ ɨyujc etz je iipxmɨdaaxpɨ mɨjjäy ycojxtɨnayꞌahuɨyday ajcxy ma je Dios yꞌung, je Cordero, yhuinduu. Ymɨɨd anajty ajcxy nidüg nidüg yꞌarpa etz oorɨ copɨ ujtzɨty mɨɨd poom, jeꞌ jeꞌ anajty nipaady nej ajcxy chajpcapxy capxy je huɨdibɨ ajcxy mɨbɨjcp Dios.
\v 9 Janch yꞌɨɨyb anajty ajcxy ɨy jemybɨ, ymɨnaangɨxy:
\q
Miich mɨhuaad co mgɨyɨ̈gy yɨ libro, e mmɨguejɨydaayɨ je huixtujcpɨ ysellɨ. Com miich tɨ myajꞌögyii, tɨ mgojuy jäy ajcxy ypocy ma Dios mɨɨd mgɨꞌmnɨꞌpy. Tɨ mgojuy ma Dios nidügꞌócɨy jäy ajcxy ypocy, huen huɨdibɨ razɨty, pɨnjaty capx huen
huɨdibɨ ayucɨty, pɨnjaty tzomb huen huɨdibɨ cajpɨty huen huɨdibɨ naciónɨty. 
\q
\v 10 Miich tɨ xymóoygɨxyɨch aneꞌmɨn etz je tung mɨjpɨ nej huaad ɨɨch ajcxy nꞌojadajtcɨxy nmɨbɨjctzoogɨxy Dios, jɨgɨx jëbɨ ɨɨch ajcxy nꞌaneꞌmgɨxy yɨ naaxhuiñyjäy etz nꞌojadajtcɨxy nmɨbɨjctzoogɨxy Dios mɨɨd jäy ajcxy ycɨxpɨ.
\p
\v 11 Chi ɨɨch oy nhuinꞌixyɨch e nhuinmɨdooyɨch may ángeles ajcxy ycapxɨn ymɨydaacɨn jühuɨdity ma je aneꞌmdac, ma je ɨyujc ajcxy yajpatcɨxy, etz ma je mɨjjäy ajcxy yajpatcɨxy. E janch canaag millon je ángeles anajty ajcxy.
\v 12 Janch mɨc jeꞌ anajty ajcxy chachmɨnaangɨxy:
\q
Je Dios yꞌung, je Cordero, je huɨdibɨ öc mɨɨd jäy ajcxy ypocy ycɨxpɨ, yɨꞌ mɨhuaad paadɨp aneꞌmꞌajtɨn, comeeñꞌajtɨn, ixpɨjcɨn, mɨcꞌajt, cömayɨn, oyꞌajt mɨjꞌajt, etz huinꞌɨɨhuɨn huinyaaxɨn. 
\p
\v 13 E tügꞌócɨy ɨyujc animal je huɨdijaty Dios tɨ yajcojy tɨ yajꞌabadɨ̈y huɨdibɨ jiiby tzajpjoty, etz huɨbɨ ya naaxhuiñ etz naaxpaꞌtcɨꞌpy, huɨdibɨ jiiby mejyjoty, nhuinmɨdooyɨch co tügꞌócɨy ajcxy chachmɨnaangɨxy:
\q
Tzoc huinꞌɨɨhuɨm tzoc cömayɨm, tzoc mooyɨm oyꞌajtɨn etz mɨjꞌajtɨn huinɨxɨɨ huinɨtiempo je Dios yꞌung, je Cordero, etz je huɨdibɨ ɨñaayb ma je aneꞌmdaacɨn.
\p
\v 14 Je mɨdaaxpɨ ɨyujc anajty chachmɨnaangɨxy:
\p
―Jaduꞌn huen tuñyii jadyii. Amén.
\p
Chi nañ jaduꞌn je iipxmɨdaaxpɨ je mɨjjäy ajcxy ycojxtɨnaygɨdactay, chi ajcxy ooy huindzɨgɨɨy patjɨhuɨɨy je huɨdibɨ huinɨxɨɨ huinɨtiempo tzɨnaayb.
\c 6
\s Je huixtujcpɨ sellɨ
\p
\v 1 Huinꞌit nhuinꞌijxyɨch je Dios yꞌung, je Cordero, quejtzcɨɨch tüg sellɨ ma je huixtujcpɨ chi nmɨdooyɨch, co nidüg je mɨdaaxpɨ ɨyujc ycapxy, jaduꞌn nmɨdooyɨch nej enee yjɨdity, chi ymɨnañ:
\p
―Min ya, e chi mꞌixɨpy.
\p
\v 2 Chi nhuindɨcxpejtyɨch, chi nhuinꞌijxyɨch tüg poob cohuay. E je huɨdibɨ yajꞌɨñaayb je poob cohuay ymajtzꞌijtpy anajty tüg tɨp ma ycɨꞌ. Chi jeꞌ yajmoy tüg coronɨ co yreyꞌadɨpy. Chi jadaꞌ choñ tziptunaangɨxy jɨgɨx jacmɨmadägɨpy ymɨdzip. 
\p
\v 3 Co je Dios yꞌung, je Cordero, yajꞌahuaach je mɨmetzpɨ sellɨ ma je necy, huinꞌit nmɨdooyɨch je mɨmetzpɨ ɨyujc ma je mɨdaaxpɨ ymɨnaꞌñ:
\p
―Min ya, e chi mꞌixɨpy.
\p
\v 4 Chi ypɨdzɨmy jadüg cohuay tzaptzpɨ ycolor. E huɨdibɨ yajꞌɨñaayb je cohuay chaptzpɨ, ycɨ̈dɨgɨɨyɨ cötujcɨn co je naaxhuiñyjäy canayyajjotcujcꞌadɨɨb ajcxy, e ñayyajꞌöcɨgɨxɨpy miñ xyɨpy. E yajmooy tüg espada mɨjpɨ.  
\p
\v 5 Co je Dios yꞌung, je Cordero, agɨɨtztuudy je mɨdugɨɨgpɨ sellɨ ma je necy, chi nhuinmɨdooyɨch je mɨdugɨɨgpɨ ɨyujc ma je mɨdaaxpɨ, ymɨnaꞌñ:
\p
―Min ya, e chi mꞌixɨpy.
\p
Chi nhuindɨcxpejtyɨch, chi nhuinꞌijxyɨch tüg cohuay tzixypɨ. E je huɨdibɨ anajty yajꞌɨñaayb je cohuaychixy, ymɨɨd tüg pujxtzɨm ma ycɨꞌ.
\v 6 Huinꞌit nhuinmɨdooyɨch tüg ayuc choñ ma je mɨdaaxpɨ je ɨyujc ajcxy yajpaatcɨxy, ymɨnaꞌñ:
\p
―Tüg denario meeñ chohuɨ̈y tüg libra trigo; nañ jaduꞌn tüg denario meeñ chohuɨ̈y tudujc libra cebada, caꞌ myajꞌayoohuɨpy aceite etz vino.
\p
\v 7 Co je Dios yꞌung, je Cordero, yajꞌahuaach je mɨmadaaxpɨ sellɨ ma je necy, chi nhuinmɨdooyɨch co je mɨmadaaxpɨ ɨyujc ma je madaaxpɨ ymɨnaꞌñ:
\p
―Min ya, chi mꞌixɨpy.
\p
\v 8 Huinꞌit nhuinꞌijxyɨch tüg cohuay nitzuxy puꞌtz, e je huɨdibɨ anajty yajꞌɨñaayb je cohuay, hueꞌ anajty yxɨɨ öcpɨ. Axam anajty ymiiñ je huɨdibɨ aneꞌmb je it ma je öcpɨ ñïmucy. Chi 
ajcxy yajmoy cötujcɨn je huɨdibɨ yajꞌɨñaayb je cohuay, jɨgɨx yajꞌóꞌccɨxɨpy je tügpɨcypɨ ma je madaaxpɨcypɨ naaxhuiñyjäy ajcxy. Chi yajꞌögɨp ajcxy mɨɨd tzip, mɨɨd yuubaꞌm, etz mɨɨd ɨyujc ahuaꞌnbɨ huɨdibɨ ya naaxhuiñ.
\p
\v 9 Co Dios yꞌung yajꞌahuaach je mɨmɨgooxpɨ sellɨ ma je necy, chi nhuinꞌijxyɨch paꞌtcɨꞌpyꞌamy ma yꞌaneꞌmdac yhuinduu, jeꞌ ajcxy yꞌalma huɨdibɨ ajcxy yajꞌöcpat mɨɨd Dios yꞌayuc ycɨxpɨ, huɨdibɨ anajty ajcxy capxhuäcxcɨxp etz nidɨyꞌajtꞌajtcɨxp Dios yꞌayuc.
\v 10 Jeꞌ anajty ajcxy huɨdibɨ yajꞌögy patp mɨɨd Dios yꞌayuc ycɨxpɨ chachmɨnaangɨxy janch mɨc:
\p
―Huindzɨn, janch mɨjpɨ janch huätzpɨ, huɨdibɨ cuydundaayb yɨ mꞌayuc huɨdibɨ myejc ma ɨɨch ajcxy. ¿Jaduꞌñyɨ jadaꞌ mjac-huäcxɨbaꞌñ mɨna anajty yɨ jäy ajcxy mdɨydunaangɨxy mdzaachytunaangɨxy mɨɨd ypocy ycɨxpɨ huɨdibɨ xyajꞌoꞌc ɨɨch ajcxy, yɨꞌ ajcxy huɨdibɨ tzɨnaayb naaxhuiñygɨ́xy?
\p
\v 11 Huinꞌit ajcxy yajmoy nidüg nidüg poobhuit, e yajnɨmay ajcxy co huen jacpoocxcɨxy jayinjaty jahuenjaty, ixtɨ coonɨ anajty yajcaꞌpxy je mɨbɨjcpɨdɨjc mɨchoꞌn, jeꞌ ajcxy huɨdibɨ quipxy mɨɨd miich ajcxy tumb ma Dios ytung, jeꞌ ajcxy huɨdibɨ yajꞌögy paadɨpy mɨɨd Dios yꞌayuc ytɨyꞌajt ycɨxpɨ, tɨm jaduꞌn nej miich ajcxy tɨ mbaatcɨxy yajꞌögy.
\p
\v 12 Chi nꞌijxyɨch co je Dios yꞌung, je Cordero, yajꞌahuaach je mɨdudujcpɨ sellɨ ma je necy, huinꞌit ooy naax yhuiñyxijty, chi je xɨɨ yjajty janch tzixy, jaduꞌn nej tzixyhuit huɨdibɨ coꞌögytɨjc ypɨdacpy, e je poꞌ yꞌahuimbijty nej nɨꞌpyɨn.
\v 13 Chi madzaꞌ ooy ycaꞌy naaxcɨ́xy tɨm jaduꞌn nej piidztɨɨm tzuxpɨ ycäy co mɨcpoj mɨxidɨ̈y.
\v 14 Chi je tzajp yjɨhuäcnɨ jaduꞌn nej tüg libroꞌabɨdity. Tügꞌócɨy tungop huɨdibɨ naaxhuiñgɨ́xy etz huɨdibɨ mejyꞌagujc, cɨjx chondägy ypɨdɨ̈ctäy ma anajty yꞌity.
\v 15 Huinꞌit ñayyütztaayɨ je reydɨjc, je mɨjtungmɨɨdpɨdɨjc, generaltɨjc, comeeñydɨjc, pɨnjaty ymɨcꞌajt mɨɨd, je tumbɨdɨjc etz  je mɨdumbɨdɨjc ñayyütztaayɨ ajcxy nidügꞌócɨy majaty tzaajut tzaaꞌang.
\v 16 Tzachnɨmaaygɨxy anajty tungop tzaajot:
\p
―Nïgägootcɨch nïgägootcɨch, caꞌydɨ ɨɨch ajcxy njacꞌijxɨ yhuiñyjɨjp je huɨdibɨ ɨñaayb ma Dios yꞌaneꞌmdac, e nañ caꞌydɨ nbáatcɨxyɨch je tzaachypɨ ayoꞌn huɨdibɨ yegamyb Dios yꞌung, je Cordero.
\p
\v 17 Com tɨ je xɨɨ je tiempo yhuaadꞌajtnɨ mɨna Dios etz Dios yꞌung yꞌahuaꞌndägaangɨxy etz tzaachytunaangɨxy naaxhuiñyjäy. ¿Pɨn jeꞌ ocmɨmadägɨp ajcxy chip yꞌejcɨn?
\c 7
\s Huɨdibɨ anajty ajcxy tɨyꞌajtmɨɨd ma je Israel jäy ajcxy
\p
\v 1 Chi co jaduꞌn yjajtɨ, chi nhuinꞌijxyɨch madaax ángeles ajcxy ytɨnaaygɨxy ma madaaxꞌitpɨ naaxhuiñybɨ ytatzcɨ̈y. Adujccɨxy anajty je mɨdaaxꞌit poj caꞌydɨ ypojy ya naaxhuiñ, ni ma mejy, ni ma quipy.
\v 2 Chi nhuinꞌijxyɨch jadüg ángel ymiinɨ̈y anajty xɨɨbɨdzɨmyꞌamy, mɨɨdɨty ma ycɨꞌ je Dios juugypɨ ysellɨ. Jadayaabɨ ángel ooy mɨc mɨyaaxy je jamɨdaaxpɨ ángeles ajcxy huɨdibɨ anajty ajcxy tɨ ycɨ̈dɨgɨ́ɨyɨgɨxy je mɨcꞌajt je cötujcɨn nej huaad yajhuindɨgooygɨxy tijaty ya naaxhuiñ etz ma nɨɨ mejy.
\p
\v 3 Chi je ángel ymɨnaꞌñ:
\p
―Caꞌ ti ayoꞌn mdungɨxy naaxhuiñ, ni ma mejy, ni ma quipy chaa, ixtɨ coonɨ anajty Dios ytɨyꞌajt yꞌijxpejt nbɨdaacɨm ma jeꞌ ajcxy yhuimbocɨn, je tɨɨbɨ ajcxy huinꞌixy huɨdibɨ tungɨxp ma Dios ytung.
\p
\v 4 Chi nmɨdooyɨch jaduꞌñyɨ jeꞌ tɨɨbɨ anajty ajcxy Dios ytɨyꞌajt yꞌijxpejt tɨ ymóoyɨgɨxy. Mɨgoꞌpx jahuixchiguïpx mɨdaax mil jeꞌ ñaybaatɨ huɨdibɨ anajty ajcxy tɨyꞌajt mɨɨd ma yhuimboc ma nidügꞌócɨy Israel jäy ajcxy.
\v 5-8 Majmetz mil anajty ajcxy tɨyꞌajt yꞌijxpejt mɨɨdɨty je Judá jäy, majmetz mil je Rubén jäy, majmetz mil je Gad jäy, majmetz mil je Aser jäy, majmetz mil je Neftalí jäy, majmetz mil je Manasés jäy, majmetz mil je Simeón jäy, majmetz mil je Leví jäy, majmetz mil je Isacar jäy, majmetz mil je Zabulón jäy, majmetz mil je José jäy, etz majmetz mil je Benjamín jäy.
\s Je mayjäy ajcxy huɨdibɨ yxoxɨp mɨɨd poob huit
\p
\v 9 Chi jadaꞌ nhuinꞌijxyɨch janch mayjäy chooñ ma canaag nación, hueꞌ ajcxy canaagnax razaꞌadyii, e capxy ajcxy canaagnax ayuc, etz chooñ ajcxy ma canaag cajp. Hueꞌ je mayjäy ytɨnayꞌahuɨyday ma je mɨjꞌaneꞌmdac huinduu, etz ma Dios yꞌung, je Cordero yhuinduu. Janch mayjäy ñïmujcy ma je Dios yꞌung yhuinduu, ni pɨn jeꞌ anajty huaad camɨchoudäy ajcxy. Ac poob huit anajty ajcxy mɨɨd yxoxyɨty, e ymɨɨd anajty ajcxy tɨɨxyꞌaay ma ycɨꞌ.
\v 10 E janch mɨc anajty ajcxy mɨyaaxcɨxy Dios, chachmɨnaangɨxy:
\q 
Ɨɨch ajt nDios yɨꞌ jeꞌ tügpajc huɨdibɨ xyajpocyhuaatzɨm. Ɨɨch ajt nDios yɨꞌ jeꞌ huɨdibɨ aneꞌmdaayb tügꞌócɨy, e nañ jaduꞌn yɨ yꞌung, je Cordero.
\p
\v 11 E nidügꞌócɨy je ángelestɨjc anajty ajcxy ytɨnaaygɨxy jühuɨdityɨ ma je Dios yꞌaneꞌmdac. E cham je mɨjjäy ajcxy etz je mɨdaaxpɨ ɨyujc huɨjojꞌɨhuɨɨy ajcxy ma je aneꞌmdac huinduu, huindzɨgɨɨygɨxy yajmɨjꞌajtcɨxy je Dios.
\v 12 Chachmɨnaangɨxy:
\q 
Jaduꞌn jada. Amén. Ɨɨch ajt nDios, jeꞌ mɨhuaad huinɨxɨɨ huinɨtiempo tügꞌócɨy je ɨɨhuɨn, je xondaacɨn, je oyꞌajtɨn, je ixpɨjcɨn, je jäygɨdaacɨn, je cömayɨn, je aneꞌmɨn, je mɨjꞌajtɨn. Amén. Jaduꞌn jada.
\p
\v 13 Huinꞌit nidügtɨ je mɨj jäy ycapxy, e xyꞌamɨdooyɨch:
\p
―¿Pɨn jada ajcxy jadaꞌ huɨdibɨ poob huit mɨɨd yxoxyɨty, e ma yɨꞌ jadaꞌ tɨ choongɨxy?
\p
\v 14 Chi ɨɨch jeꞌ nꞌadzooy:
\p
―Huindzɨnɨch, miich mnejhuɨɨyb.
\p
Huinꞌit jeꞌ xyꞌadzooyɨch:
\p
―Jada jeꞌ ajcxy tɨɨbɨ je mɨj ayoꞌn mɨnajxcɨxy yajnajxcɨxy, e tɨ ypocyhuaatzcɨxy mɨɨd je Dios yꞌung, je Cordero ñɨꞌpy, tɨm jaduꞌn nej jɨhuɨ̈y yhuit tɨ yajhuaatzcɨxy janch poob ma Dios yꞌung ñɨꞌpy.
\v 15 Paady yɨꞌ ajcxy yajpaady ma Dios chɨnaydac yjugyꞌajttac, e ytungɨxy xɨɨm tzuum ma Dios ytɨjc tzajpjoty. E yɨ Dios yꞌung huɨdibɨ ɨñaayb ma je mɨjꞌaneꞌmdac, yɨꞌ yɨꞌ mɨꞌijttaayb cuendꞌaty ma yɨꞌ yhuinduu.
\v 16 Caꞌp ajcxy jacjɨhuɨ́ɨygɨxɨpy yuu tɨdzɨ̈bɨ, ni xɨɨꞌan ycajacnögɨɨyb ajcxy, ni anbɨ ycajacyajtzibɨɨyb ajcxy.
\v 17 Com je Dios yꞌung, je Cordero, huɨdibɨ cujcꞌamy yajpatp ma je Dios yꞌaneꞌmdac, jeꞌ yɨꞌ cuendꞌajtp ajcxy, jaduꞌn nej jɨhuɨ̈y cöbixy cuendꞌaty, e yajnɨcxɨp ma je nɨɨ huätzpɨ ymuxy huɨdibɨ yejcp jugyꞌajtɨn. Dios yajquëgɨpy yɨꞌ ajcxy ytajɨn ymayɨn jɨgɨx caꞌ yjacjɨ́ɨygɨxɨpy yjacyáaxcɨxɨpy mɨɨd tajɨn mayɨn.
\c 8
\s Je mɨhuixtujcpɨ sellɨ etz je poomjogɨꞌñ ac oorɨ
\p
\v 1 Co Dios yꞌung, je Cordero, yajꞌahuaach je mɨhuixtujcpɨ sellɨ, huinꞌit yꞌijty oy jahuengɨ cup hora amoñɨ jiiby tzajpjoty.
\v 2 Chi nhuinꞌijxyɨch Dios yꞌángeles  huixtujc ajcxy ytɨnaaygɨxy anajty ma Dios yhuinduu, e yajmoy ajcxy huixtujc trompeta.
\v 3 Huinꞌit jadüg ángel miiñ, chi jeꞌ ytɨnaayꞌɨhuɨɨy ma mesɨ huinduu ma je Dios ojadajttac. Je ángel ymɨɨd anajty tüg poomjogɨꞌñ ac oorɨ. Chi ymooyɨ poom mayꞌamy huɨdibɨ jojcp. E je poomjoc tɨgɨɨyb ma Dios yhuinduu quipxɨ mɨɨd juydacɨn nuucxtacɨn huɨdibɨ je jäy ajcxy ytumyb huɨdibɨ Dios tɨ huinꞌixy ajcxy.
\v 4 Ma je ángel ycɨ̈ꞌam jɨm je poomjoc chooñ ñɨcxy ma Dios yhuinduu quipxyɨ mɨɨd je oración huɨdibɨ ajcxy ytumyb je tɨɨbɨ ypocyhuaatzcɨxy.
\v 5 Huinꞌit je ángel majch je poomjogɨꞌñ, chi yajꞌujch mɨɨd jɨɨnbajc huɨdibɨ anajty jɨm ma je Dios ojadajttaacɨn, chi najtzjɨbibɨɨy naaxcɨ́xy, huinꞌit ooy yajmɨdooy jɨdijtɨn mɨcpɨ etz huɨdzuc e je naax ooy yücxy.
\s Je maytrompetɨ
\p
\v 6 Je huixtujcpɨ ángeles ajcxy huɨdibɨ anajty mɨɨd je huixtujcpɨ trompetɨ, ñayniꞌixɨɨyɨ ajcxy co yajxüxaangɨxy.
\p
\v 7 Je mɨdügpɨ ángel yajxuuxy je ytrompetɨ, e huinꞌit ooy eneedɨɨtz ycaꞌy mɨhuɨdidɨɨ jɨɨn etz nɨꞌpy. Chi oy ycäy naaxcɨ́xy. E jahueengɨ 
cujc-huäcxy oy nögy je naax, je quipy etz je aay ujtz tzuxjatypɨ etz nöctay mɨɨy.
\p
\v 8 Je mɨmetzpɨ ángel yajxuxy ytrompetɨ, chi ooy ycäy mejyjoty jaduꞌn nej tüg mɨjcop janch tooyb anajty mɨɨd jɨɨn, e jahuengɨ cujc-huäcxy je mejy oy yꞌahuimbity nɨꞌpy.
\v 9 E jahuengɨ cujc-huäcxy oy yꞌögy huɨdijaty anajty tzɨnaayb ma je mejy. E je maybarco huɨdijaty anajty ma je mejy, nañ jaduꞌn jahuengɨ cujc-huäcxy oy ytɨmyhuindɨgoydäy.
\p
\v 10 Chi je mɨdugɨɨgpɨ ángel yajxuxy jeꞌ ytrompetɨ, e huinꞌit oy tüg madzaꞌ mɨjpɨ ycäy. Je madzaꞌ jaduꞌn nipaady nej tüg mɨjjɨɨn huɨdibɨ nayyajcodɨɨcxɨm. Je madzaꞌ oy ycäy ma jahuen cacujc-huäcxy mɨjnɨɨ, etz ma nɨɨ muxy.
\v 11 Je madzaꞌ hueꞌ jeꞌ anajty xɨɨꞌadyii taꞌmꞌujtz. E je nɨɨ jahuen cacujc-huäcxy oy yjajtnɨ taꞌm, jaduꞌn 
ytaꞌmɨty nej taꞌmꞌujtz, e ooy jäy may yꞌoꞌcy mɨɨd je nɨɨ ycɨxpɨ co anajty tɨ yꞌahuimbity taꞌm.
\p
\v 12 Je mɨmadaaxpɨ ángel yajxuxy jeꞌ ytrompetɨ, e huinꞌit jahuen cacujc-huäcxy je xɨɨ oy yhuindɨgooy, e nañ jaduꞌn je poꞌ etz je madzaꞌ jahueng cacujc-huäcxy oy yhuindɨgooy. E mɨɨd jaduꞌn ycɨxpɨ je poꞌ etz je madzaꞌ yhuɨꞌmgɨxy jahuen cacujc-huäcxy agootz, e jahuen cacujc-huäcxy ytɨɨcxɨn ocyejcnɨ ajcxy xɨɨm tzuum.
\p
\v 13 Chi nhuinꞌijxyɨch tüg meꞌty anajty yqueec-huɨdity cuptzajp, e nmɨdooyɨch co ymɨnaꞌñ janch mɨc:
\p
―¡Ay! ¡Naaxhuiñyjäy ajcxy ayoobɨdɨjc! co anajty trompetɨ yajxüxy je jatugɨɨgpɨ ángeles ajcxy, huinꞌit ayoꞌn ypadaꞌñ je naaxhuiñjäy ajcxy, ayoꞌn ypadamy ajcxy, ayoꞌn ypadamy ajcxy.
\c 9
\p
\v 1 Chi je mɨgooxpɨ ángel yajxuxy jeꞌ ytrompetɨ, chi nhuinꞌijxyɨch tüg madzaꞌ  anajty tɨ ycäy naaxcɨ́xy. E chi je madzaꞌ yajmoy je ahuaastɨ huɨdibɨ  mɨɨd yajꞌahuädzɨp je ayoodac ma Dios cuendꞌaty mɨɨdɨty je caꞌoybɨdɨjc. 
\v 2 Chi je ángel yajꞌahuaach je jut ma je ayoodac, e ma je jut jiiby ypɨdzɨmy jaduꞌn nej jɨɨnjoc huɨdibɨ pɨdzɨm ma tüg hornɨ.
\v 3 E ma je joc ypɨdzɨmy ooy maymuꞌ naaxhuiñygɨ́xy chachqueec-huɨdijtcɨxy ooy, e je muꞌ ajcxy ymooyɨ mɨcꞌajt, jaduꞌn nej caꞌty mɨɨdɨty ytɨjp.
\v 4 Chi jeꞌ ajcxy yajcötujcmoy co caꞌ ni ti aay ni ti ujtz yajhuindɨgóoygɨxɨpy huɨdibɨ yajpatp naaxhuiñ, ni ujtz ni quipy. Jëyɨ janchtɨy ycötujcɨn mooyɨ co huen yajtzaachɨ̈huɨpy je jäy ajcxy huɨdibɨ caꞌ mɨɨdɨty Dios ytɨyꞌajt yꞌijxpejt ma yhuimboc.
\v 5 Caꞌ ajcxy yajcötujcmoy co yjäyyajꞌóꞌccɨxɨpy, jëyɨ co janchtɨy ayoꞌn ajcxy yegɨpy mɨgoox poꞌ. E je ayoꞌn huɨdibɨ anajty ajcxy yejcpy jaduꞌn jeꞌ nej co caꞌty jäy yajtzaachɨ̈y mɨɨd ytɨjp. 
\v 6 Je huinꞌit xɨɨ je huinꞌit tiempo 
jäy ajcxy ooy anajty oꞌcɨn jaꞌixtaaygɨxy e ni caꞌ pátcɨxɨpy. Ooy anajty janijotꞌájtcɨxy oꞌcɨn, e cöguëgɨɨb ajcxy je oꞌcɨn.
\p
\v 7 Je maymuꞌ jaduꞌn jeꞌ anajty yquëxɨ̈gy nej maygohuay huɨdibɨ niꞌixɨ̈ꞌijtcɨxp co yajnɨcxáanɨgɨxy ma tzip ytunaꞌñyii. Ymɨɨd anajty je maymuꞌ ma ycohuajc jaduꞌn anajty quëxɨ̈gy nej oorɨ coronɨ. E je maymuꞌ yhuiñyjɨjp jaduꞌn yquëxɨ̈gy nej jäy yhuiñyjɨjp.
\v 8 Je maymuꞌ ymɨɨd anajty ycöhuay jaduꞌn nej töxyjäy ycöhuay, e ytɨɨtz jaduꞌn nej jamgaa ytɨɨtz.
\v 9 E je maymuꞌ ymɨɨd anajty ajcxy jaduꞌn nej pujx huɨdibɨ mɨɨd ñinïcx cohuangɨxy. E co ajcxy queec-huɨdity, ooy ajcxy yqueec yajꞌamüy jaduꞌn chachneꞌmɨ̈y nej je carro huɨdibɨ cohuay ajcxy yjugujcpy co ñɨcxcɨxy ma tzip ytuñyii.
\v 10 Je maymuꞌ ymɨɨd anajty ajcxy ypïxy tɨm jaduꞌn nej caꞌty ypïxy, e ma ajcxy ypïxy ymɨɨd anajty ytɨjp. E ma ajcxy ypïxy mɨɨdɨty anajty je mɨcꞌajt co jäy ajcxy yajtzaachɨ̈huɨpy mɨgoox poꞌ.
\v 11 E je maymuꞌ jeꞌ ajcxy yreyꞌajtpy je ángel huɨdibɨ nigohuajcꞌajtp je ayoodac, hueꞌ xɨɨꞌadyii hebreoꞌamy Abadón, e griegoꞌamy yxɨɨjɨty Apolión, hueꞌ je yxɨɨ yhuimbɨdzɨmy: je huɨdibɨ yajhuindɨgooyb.
\p
\v 12 Najx jeꞌ je ayoꞌn jayɨjpɨ, e ytɨgoyꞌity je jametzpɨ ayoꞌn co je jayɨjpɨ tɨ yꞌocjadyii. 
\p
\v 13 Je mɨdudujcpɨ ángel yajxuuxy je ytrompetɨ, chi nmɨdooyɨch tüg ayuc chooñ ma je mɨdaaxpɨ huaj muꞌn ity ma je altar ac óorɨbɨ, huɨdibɨ anajty ijtp ma Dios yhuinduu. 
\v 14 Je ayuc ymɨnaꞌñ:
\p
―Nɨmaꞌ je mɨdudujcpɨ ángel huɨdibɨ anajty trompetɨ mɨɨd: “Najtzmadzɨꞌ yɨ mɨdaaxpɨ ángeles huɨdibɨ ajcxy coxoch ijtp ma Eufrates mɨjnɨɨbaꞌ.” 
\p
\v 15 Huinꞌit oy yajcoguejttuutcɨxy je mɨdaaxpɨ ángeles, jɨgɨx yjäyyajꞌoꞌccɨxɨpy jahuen 
cacujc-huäcxy huɨdibɨ yajpatp ya naaxhuiñ. Je mɨdaaxpɨ ángeles niꞌixɨꞌ jeꞌ anajty yꞌijtcɨxy, je huinꞌit horɨ, je huinꞌit xɨɨ, je huinꞌit poꞌ, je huinꞌit jɨmɨjt co anajty yajꞌögaangɨxy jahuen cacujc-huäcxy je naaxhuiñybɨ jäy ajcxy.
\v 16 E nmɨdooyɨch co ajcxy mɨchoy je soldadtɨjc huɨdibɨ anajty ajcxy cohuaygɨ́x. E hueꞌ mejtz mɨgoꞌpx millón anajty ajcxy ñaybattáayɨgɨxy je soldados ajcxy.
\p
\v 17 Jaduꞌn nhuinꞌijxyɨch je cohuay ajcxy, e mɨɨd je ñijäy ajcxy huɨdibɨ anajty yajꞌɨñaayb. E je ñijäy ymɨɨd anajty ajcxy pujx ma ycaach, jeꞌ mɨɨd ñinïcx cohuaangɨxy. E je pujx hueꞌ anajty ycolor tzaptz, azul etz puꞌtz. Je cohuay ajcxy jaduꞌn anajty ycohuajc nej jamgaa ycohuajc, e ma ajcxy yꞌahuac ypɨdzɨmy nej jɨɨn, nej jɨɨnjoc, etz nej azufre. 
\v 18 E mɨɨd jada jahueng 
cacujc-huäcxy naaxhuiñyjäy chachꞌoꞌcy ajcxy mɨɨd je jɨɨn, je jɨɨnjoc etz je azufre ycɨxpɨ huɨdibɨ anajty pɨdzɨmb ma je cohuay ajcxy yꞌahuac.
\v 19 Je cohuay ajcxy ymɨɨd anajty mɨcꞌajt ma yꞌahuac etz ma pïxy. Com jeꞌ ajcxy ypïxy jaduꞌn jeꞌ anajty nej xoox mɨɨd ycohuajc, e je cohuay ajcxy chachꞌahuaꞌndaaccɨxy mɨɨd ypïxy.
\p
\v 20 E je jacjadyii jäy ajcxy huɨdibɨ caꞌ yꞌoꞌcy mɨɨd jadayaabɨ ayoꞌn, caꞌ ajcxy yjothuimbijty ma Dios, caꞌ ajcxy ixmajch je jɨbɨcpɨ huɨdibɨ ytungɨxp. E ni caꞌ ajcxy ixmajch nej ajcxy je caꞌoybɨ huindzɨgɨɨygɨxy. Nañ jaduꞌn caꞌ ajcxy ixmajch nej ajcxy huindzɨgɨɨygɨxy huɨdijaty ajcxy oyduñyɨp mɨɨd plata, mɨɨd bronce, etz tzaadzech etz quipychech. Je huidɨjaty ajcxy yꞌoydumyb etz ñïdzejtztuutcɨxy, ni ycaꞌijxcɨxy, ni ycamɨdoogɨxy, ni ycayöygɨxy.
\v 21 E ni caꞌ je jäy ajcxy yjothuimbijtcɨxy ma Dios, caꞌ ajcxy ixmajch jaduꞌn nej ajcxy chachjäyyajꞌoꞌccɨxy, jaduꞌn nej ajcxy tzachcaxpojccɨxy ymɨgügtɨjc, jaduꞌn nej ajcxy huingbɨ töxyjäy tzachmɨgapxtɨgooygɨxy, etz jaduꞌn nej ajcxy chachmeetzcɨxy.
\c 10
\s Je ángel mɨɨd je mutz libro
\p
\v 1 Nhuinꞌijxyɨch co chooñ tzajpjoty tüg ángel mɨcpɨ ñïducyɨty mɨɨd joc, e mɨɨdɨty iꞌñch ma ycohuajc. Je yhuiñyjɨjp yquëxɨ̈gy nej xɨɨ. Jeꞌ ytecy jaduꞌn yquëxɨ̈gy nej mɨjjɨɨnyeꞌn.
\v 2 E ma ycɨꞌ mɨɨdɨty tüg libro yëphuäcxy, e pɨdacy yꞌaꞌoydecy mejyhuingɨ́xy, e yꞌanajtytecy pɨdacy naaxhuiñgɨ́xy.
\v 3 Chi je ángel oy janch mɨc yaaxquecy jaduꞌn nej tüg jamgaa yäxy. E co anajty jaduꞌn tɨ yaaxquëgy, chi oy yajmɨdoy huixtujc jɨdijtɨn huɨdibɨ ycapx ycɨꞌmꞌayuc.
\v 4 Co je huixtujcpɨ jɨdijtɨn oy ycapxtaaygɨxy, chi ɨɨch anajty njaayaꞌñɨch huɨdibɨ tɨ capxy. Chi nmɨdooyɨch tüg ayuc chooñ tzajpjoty xyñɨmäyɨch:
\p ―Mɨꞌit jada ayuc yüch huɨdibɨ yɨ huixtujcpɨ jɨdijtɨn tɨ capxy, caꞌ mjaay.
\p
\v 5 Chi je ángel huɨdibɨ nhuinꞌijxɨch co mejyhuingɨ́xy etz naaxhuiñygɨ́xy ytɨnäy, yujcxajy ycɨꞌ aꞌoyꞌamybɨ tzajpcɨ́xy.
\v 6 Chi je ángel capxcödujcy co je Dios huɨdibɨ jugyꞌajtp huinɨxɨɨ huinɨtiempo, je huɨdibɨ yajcojy je tzajp, je naaxhuiñybɨ, je mejy etz tügꞌócɨy huɨdibɨ jiiby yajpattaayb; e je Dios jaduꞌn ymɨnaꞌñ:
\p ―Caꞌ jada yjac-huäcxɨbanɨ mɨna nguexaꞌñɨch tzaachypɨ ayoꞌn ya naaxhuiñ.
\v 7 Co yhuaadꞌajtnɨp je xɨɨ je tiempo ma anajty je mɨhuixtujcpɨ ángel yxuux yajxuxtzondägy, chi cuyduunɨp je Dios yꞌayuc ytɨyꞌajt huɨdibɨ caꞌpɨn anajty huinjɨhuɨ̈y, je ayuc huɨdibɨ je Dios ytumbɨdɨjc je profetas ajcxy ñajtzcapxɨ̈y jecyꞌajty.
\p
\v 8 Je ayuc huɨdibɨ nmɨdoohuɨch, je huɨdibɨ anajty tɨ chooñ tzajpjoty, ycapxy jeꞌ jadügꞌoc, e xyñɨmaayɨch:
\p ―Nɨcx miich etz cɨyɨ̈g yɨ libro huɨdibɨ yëphuäcxy yɨ ángel ymɨɨd ma ycɨꞌ. Jeꞌ jeꞌ je ángel huɨdibɨ anajty tɨnaayb mejyhuingɨ́xy etz naaxhuiñygɨ́xy.
\p
\v 9 Chi nꞌóyɨch ma je ángel nbɨjctzooyɨch co huen xymöyɨch je piꞌclibro, chi jeꞌ xyñɨmaayɨch:
\p ―Matz e cojɨɨcxnax, e xyajtaꞌmmɨɨyɨp mjot e ma miich mꞌahuac mjɨhuɨ̈huɨpy päg jaduꞌn nej cerɨpäg.
\p
\v 10 Huinꞌit ɨɨch je piꞌclibro ngɨyɨ̈gy huɨdibɨ je ángel anajty ymɨɨd ma ycɨꞌ, e chi ɨɨch jeꞌ ngöjɨcxnajxy. Ma ɨɨch nꞌahuac njɨhuɨɨyɨch janch päg jaduꞌn nej cerɨpäg. Co oy ngojɨɨcxnajxtäyɨch, chi oy yꞌahuimbijtnɨ janch taꞌm ma ɨɨch njot.
\v 11 Chi mɨcꞌamy nyajnɨmaayɨch:
\p ―Nɨcx miich capxhuäcx jadügꞌoc je ayuc huɨdibɨ Dios tɨ xymöy, je huɨdibɨ tɨ mgapxhuäcxy ma je mayñaax maygajp, ma je mayñaciones, huɨdibɨ canaag ayuc capxcɨxp, etz ma je reydɨjc ajcxy.
\c 11
\s Je metzpɨ testigo
\p
\v 1 Chi jadaꞌ nyajmooyɨch tüg paxy, jahuengɨ jaduꞌn anajty yquëxɨ̈gy jaduꞌn nej baarɨ huɨdibɨ quipx yajhuamb. Chi ajcxy xyñɨmaayɨch:
\p
―Pɨdɨ̈g e quipxtaꞌ yɨ Dios ytɨjc, nañ jaduꞌn quipx je mesɨ ma Dios yajhuindzɨgɨ̈y, etz nañ jaduꞌn mɨchou naag jäy ajcxy jiiby Dios huindzɨgɨɨygɨxy. 
\v 2 Je Dios ytɨbaꞌ ahuing miich jeꞌ pɨdäg, caꞌ mguipxɨpy. Com yɨꞌ yɨꞌ tɨ ycɨ̈dɨgɨ̈yii yɨ jäy ajcxy huɨdibɨ caꞌ yjudíojäyɨty. Yɨ jäy ajcxy huɨdibɨ caꞌ yjudíojäyɨty ymɨmadägamyb ajcxy je Jerusaléngajp ma Dios mɨɨdɨty tzɨnaydac etz aneꞌmamb ajcxy jiiby huixchiguïpx metz poꞌ.
\v 3 Ɨɨch metz testigo nguexɨpyɨch ma je cajp ma Dios mɨɨdɨty tzɨnaydac, e yɨꞌ ajcxy capxhuäcxamb ɨɨch nꞌayuc tüg mil jametzmɨgoꞌpx jatugɨꞌpx xɨɨ. Yxoxyɨty ajcxy mɨɨd huit nïcuyjaam ixcuyjaam.
\p
\v 4 Je metzpɨ testigo jaduꞌn nipaady nej je metzpɨ olivo cop etz je metzpɨ candelero huɨdibɨ tɨnaaygɨxp ma je Dios yhuinduu, je huɨdibɨ ñaaxhuiñybɨ aneꞌmb.
\v 5 Pen ji pɨn nej jaty mɨdundɨgoyaꞌñ je metzpɨ testigo, jeꞌ ajcxy yajpɨdzɨmɨp jeꞌ ajcxy jɨɨn ma yꞌahuac, yjɨcxtähuɨpy yjɨɨndähuɨpy jeꞌ ymɨdzip. E jaduꞌn jeꞌ yꞌögɨpy pɨnjaty anajty je metzpɨ testigo mɨdundɨgooyb.
\v 6 Je metzpɨ testigo ymɨɨd yɨꞌ ajcxy cötujc co ahuäctújccɨxɨty je tzajp, caꞌydɨ ytüy jaduꞌñyɨ tiempo anajty ɨɨhuäcxcɨxy capxhuäcxcɨxy Dios yꞌayuc ytɨyꞌajt. E nañ jaduꞌn ymɨɨd ajcxy cötujcɨn co nɨɨ yajꞌahuimbíjtcɨxɨpy nɨꞌpy. Yɨꞌ ajcxy yajtunɨɨb yajꞌjadɨɨb canaagnax ayoꞌn ya naaxhuiñ, naagꞌoc anajty ytɨmdzójccɨxy.
\v 7 E co anajty je metzpɨ testigo ajcxy yajmaaygɨxy ytung, chi je ɨyujc huɨdibɨ anajty pɨdzɨmb ma je ayoodac, je abismo, jeꞌ jeꞌ tziptuunɨp mɨɨd je metzpɨ testigos etz yajꞌöctähuɨp je metzpɨ testigo. 
\v 8 Chi je metzpɨ testigo ñinïcx ajcxy yhuɨꞌmɨpy mɨjnɨɨgujc mɨjtügujc jɨm ma je mɨj ciudad ma je Huindzɨn Jesucristo yajcruudzpejtɨ, je cajp huɨdibɨ tundɨgooy mɨɨd Dios tɨm jaduꞌn nej Sodoma etz Egipto ytundɨgooy jecyꞌajty.
\v 9 Nijëjɨty jäy ajcxy huɨdibɨ xɨ ya conaaxɨp cogajpɨp, oy ypɨnjäyɨty, oy ti ayuc capxcɨxy, yꞌixɨpy ajcxy tugɨɨg xɨɨjagup je metzpɨ testigo ñaaxnïcx mɨjtügujc, e ni caꞌaꞌɨxɨ̈huɨpy ajcxy co yajnaaxtɨgɨ̈huɨɨyb.
\v 10 Huɨdijaty ajcxy tzɨnaayb ya naaxhuiñ ooy yxondáaccɨxɨpy etz yjotcugɨ́ɨygɨxɨpy mɨɨd jeꞌ ycɨxpɨ co je metzpɨ Dios ytestigos ajcxy anajty tɨ yꞌoꞌccɨxy. Chi je mayjäy ajcxy miñ xyɨpy ñaymóoyɨgɨxɨpy tijaty, e 
ñayyajniguéjxɨgɨxɨpy tijaty. Com je metzpɨ yëydɨjc huɨdibɨ nidɨyꞌajtꞌajtp anajty Dios ytɨyꞌajt, tɨ anajty ooy ayoꞌn yejccɨxy ma naaxhuiñyjäy ajcxy.
\v 11 Codugɨɨgxɨɨ jacup naxy, chi Dios cɨjx yajjugypɨjctäy je metzpɨ öcpɨ, e chi ajcxy jadügꞌoc ypɨdɨ̈gy, e pɨnjaty jeꞌ ijx, ooy jeꞌ ajcxy chachchɨgɨɨy.
\v 12 Je metzpɨ testigo huɨdibɨ nidɨyꞌajt Dios, mɨdoy ajcxy tüg ayuc janch mɨc jiiby tzajpjoty anajty ñɨmáayɨgɨxy:
\p
―Pejtcɨx yeeby cɨx.
\p
Chi ajcxy ypaꞌttɨgɨɨy tzajpjoty ma tüg joc, e ijxɨ ajcxy ymɨdziptɨjc.
\v 13 E janch huinꞌítɨy ooy naax yücxy mɨɨd tüg mɨc ujx. E tüg pɨcypɨ je majc pɨcypɨ jäy jɨm Jerusalén oy ymɨjähuɨɨygɨxy. E mɨɨd je ujx ycɨxpɨ yꞌoꞌcy ooy mayjäy, ñaybaatɨ je öcpɨ huixtujc mil yëydɨjc. E jacjadyii jäy ooy chɨgɨɨygɨxy yjɨhuɨɨygɨxy, e ojadajtcɨxy mɨbɨjctzoogɨxy ooy je Dios tzajpjotypɨ.
\p
\v 14 Tɨ ñaxy je mɨmetzpɨ ayoꞌn, chi tzojc ymiiñ je mɨdugɨɨgpɨ.
\s Je mɨhuixtujcpɨ trompetɨ
\p
\v 15 Chi je mɨhuixtujcpɨ ángel yajxuxy jeꞌ ytrompetɨ, e huinꞌit oy yajmɨdooy mayꞌayuc tzajpjoty mɨc ymɨnañ: 
\q
Je aneꞌmɨn huɨdibɨ ya naaxhuiñ, yɨꞌ jeꞌ cham mɨɨd ajt nHuindzɨn Dios etz yɨꞌ yCristo, e yɨꞌ jeꞌ aneꞌmɨp huinɨxɨɨ huinɨtiempo. 
\m 
\v 16 Je iipxmɨdaaxpɨ mɨjjäy huɨdibɨ anajty ajcxy ɨñaayb ma yꞌaneꞌmdac ma Dios yhuinduu, cɨjx jeꞌ ajcxy yhuɨjojꞌɨhuɨydaaygɨxy, e chi ajcxy ooy Dios ɨɨbaty capxpaty, ymɨnaangɨxy:
\q
\v 17 Huindzɨn Dios, Dioscojuyip nyajnájxcɨxpɨch ma miich, huɨdibɨ jac mɨcꞌajt mɨɨd caꞌydɨ jac pɨn.
Miich tügꞌócɨy mdundaayb mjajtaayb mnejhuɨɨydaayb. Miich jeꞌ huɨdibɨ ijtnaayb, e tɨ mꞌijtnäy, e mꞌidaꞌñyɨ, com miich tɨ mꞌijxcugɨ̈y je mgötujcɨn, e tɨ mbɨdägy mꞌaneꞌmɨn. 
\q 
\v 18 Mayñaax maygajp mayñaaxhuiñyjäy ooy yjotmäty ajcxy, mɨɨd co tɨ xɨɨ horɨ paady co miich mdzaachytunaꞌñ je jäy ajcxy mɨɨd ypocy ycɨxpɨ. Tɨ je xɨɨ je hora paady co miich mdɨydunaꞌn je jäy ajcxy tɨɨbɨ yꞌoꞌccɨxy. Tɨ je xɨɨ je horɨ paady co miich mmöhuaꞌñ je mdumbɨdɨjc ypremio, je mdumbɨdɨjc huɨdijaty najtzcapxɨɨy ajcxy miich 
mꞌayuc,                                                            huɨdijaty tudägyꞌajtɨn tɨ patcɨxp ma miich, je huɨdijaty miich mxɨɨ xychɨgɨɨyɨp, huen ymɨjꞌanaꞌcɨty huen ymutzꞌanaꞌcɨty. Tɨ je xɨɨ je hora paady co miich myajtɨgoyaꞌñ je pɨnjaty yajhuindɨgooygɨxyp naaxhuiñyjäy ajcxy. 
\p
\v 19 Je huinꞌit tiempo oy Dios je ytɨjc yꞌahuäch jiiby tzajpjoty, e chi nhuinꞌijxyɨch je caax ma Dios ycötujcɨn yꞌity. Nañ jaduꞌn oy nhuinꞌijxyɨch huɨdzuc, etz nmɨdooyɨch co ooy ñeꞌmy, etz nmɨdooyɨch enee yjɨdijtɨn, etz njɨhuɨɨyɨch tüg ujx, etz ooy ycaꞌy eneedɨɨtz mɨjatypɨ.
\c 12
\s Tüg töxyjäy etz je amaꞌy tzaꞌñ
\p
\v 1 Je huinꞌit hora oy yquëxɨ̈gy tzajpcɨ́xy tüg ijxpejt mɨjpɨ. Tüg töxyjäy ñïdɨgooyɨty mɨɨd xɨɨ, jaduꞌn nej jɨhuɨ̈y mɨɨd tüg huit ñïmochɨty, e jaduꞌn yquëxɨ̈gy nej jɨhuɨy anajty poꞌ yajhuäcpety, e ymɨɨd ma ycohuajc tüg corona ac oorɨ huɨdibɨ majmetz madzaꞌ mɨɨd.
\v 2 Jadayaabɨ töxyjäy hueꞌ anajty ungmɨjäyꞌajtp, e janch yaax tɨnaayb jeꞌ anajty mɨɨd je tzaachypɨ, mɨɨd co yꞌung anajty yajmaꞌxungꞌadaꞌñ.
\v 3 Huinꞌit oy yquëxɨ̈gy jadüg tɨyꞌajt ijxpejt tzajpcɨ́xy. Tüg amaꞌy tzaꞌñ janch mɨj, tzaptz ycolor, e mɨɨdɨty huixtujc ycohuajc, majc ymuꞌn, e tüg corona majaty ycohuajc.
\v 4 Je mɨj tzaꞌñ mɨɨd jeꞌ ypïxy jugujcmujcy jahueng cacujc-huäcxy je madzaꞌ jɨm tzajpcɨ́xy. Chi jeꞌ najtzyemɨyday je maymadzaꞌ naaxhuiñygɨ́xy. Je mɨj tzaꞌñ oy yhuäcxɨpy ma je töxyjäy yhuinduu huɨdibɨ anajty ungbadamb tzojc, chi tzüdzaꞌñ je piꞌcꞌungmaꞌxung janch tɨm jëyɨ anajty ymaꞌxungꞌaty.
\v 5 Chi je töxyjäy yajmaꞌxungꞌajty tüg piꞌcyëydɨjc, huɨdibɨ aneꞌmɨp mɨɨd Dios ymɨcꞌajt, ymɨɨd yɨꞌ tüg pujxtajc huɨdibɨ ijxpejt ajt co mɨj aneꞌmɨn mɨɨdɨty ya naaxhuiñ. E yajpɨjcy je yꞌung, chi yajnɨcxɨ ma Dios etz ma jeꞌ yꞌaneꞌmdac.
\v 6 Chi je töxyjäy yqueecy ñɨcxy mɨjtɨgɨ̈duum, ma anajty Dios tɨ ñiꞌixɨ̈yii yꞌit ylugar co jɨm yꞌidɨpy, e jɨm ymöhuɨɨyb ycaayɨn yꞌuucɨn tüg mil jamejtzmɨgoꞌpx jatugɨꞌpx xɨɨ.
\p
\v 7 Je huinꞌit tiempo tüg tzip yjajtɨ tzajpjoty mɨɨd jeꞌ ycɨxpɨ. Chi Miguel huɨdi mɨj cötujcɨn mɨɨd, mɨɨd  jadyii yꞌángeles ajcxy, ooy chiptuñ mɨɨd je amaꞌy tzaꞌñ etz yɨꞌ yꞌángeles ajcxy.
\v 8 E caꞌp je amaꞌy tzaꞌñ ajcxy ymadacy ma je tzip, e caꞌp jeꞌ ajcxy mɨɨdꞌajty tɨgɨydac tzajpjoty.
\v 9 E jaduꞌn Dios yajqueecy je mujcuꞌ, je amaꞌy tzaꞌñ mɨjjäybɨ, jiiby tzajpjoty. Jeꞌ jeꞌ je amaꞌy tzaꞌñ huɨdibɨ xɨɨꞌajtp diablo etz Satanás, je huɨdibɨ huinꞌɨɨmb tügꞌócɨy naaxhuiñyjäy. Je mujcuꞌ, je amaꞌy tzaꞌñ, mɨɨd jeꞌ yꞌángeles ajcxy oy yajcötijnajxtäy ya naaxhuiñ.
\p
\v 10 Je huinꞌit hora nhuinmɨdooyɨch tüg ayuc janch mɨc tzajpjoty chooñ, ymɨnañ:
\p
―Tɨ je xɨɨ je tiempo nigoody mɨna Dios tɨ nihuaꞌñ tɨ yajnïdzögy jäy ajcxy ma je mujcuꞌ; mɨna Dios tɨ yajniguëxɨ̈gy yɨꞌ ymɨcꞌajt; mɨna Dios tɨ yajniguëxɨ̈gy yɨꞌ yꞌaneꞌmɨn; etz mɨna Cristo ytɨgɨɨy aneꞌmbɨ mɨɨd ymɨcꞌajt. Com tɨ Dios cötijnaxy je mujcuꞌ huɨdibɨ tzachxɨ̈p ɨɨch ajt nmɨgügtɨjc, je mɨbɨjcpɨdɨjc. Je mujcuꞌ anajty tzachxɨ̈p ajcxy xɨɨm tzuum ma Dios.
\v 11 Ɨɨch ajcxy nhermanotɨjc tɨ yɨꞌ mɨmadaaccɨxy je mujcuꞌ mɨɨd je Dios yꞌung ñɨꞌpy, etz mɨɨd jeꞌ yꞌayuc ytɨyꞌajt tɨɨbɨ mɨbɨjccɨxy, je huɨdibɨ ajcxy nidɨyꞌajtcɨxp ma yɨ mayjäy. Caꞌ ajcxy tzɨgɨ̈y anajty co yjugyꞌajt ytɨgóoygɨxɨp. Nïgɨ  niꞌixɨ̈ yꞌijtcɨxy anajty mɨɨd ymɨbɨjcɨn oy ytɨmyꞌóꞌccɨxɨpy. 
\v 12 Jotcujcꞌajtcɨx etz jotcugɨɨygɨx huɨdibɨ jiiby tzɨnaaygɨxp tzajpjoty. Ayoꞌn ypadamyb ajcxy huɨdibɨ tzɨnaayb naaxhuiñygɨ́xy etz mejyjoty. Com je mujcuꞌ tɨ jeꞌ ycɨdägy ma miich ajcxy mɨɨd chip yꞌejcɨn. Com je mujcuꞌ ñejhuɨɨyb co tɨm jayinjaty jahuenjaty xɨɨ tiempo jacmɨɨdɨty.
\p
\v 13 Co je mujcuꞌ ijxy co tɨ yajcötijnaxy ya naaxhuiñygɨ́xy, chi ooy pahuɨdijttacy je töxyjäy huɨdibɨ anajty tɨ yajpiꞌcꞌaty piꞌcyëydɨjc.
\v 14 Chi je töxyjäy metz meꞌtyqueec mɨjpɨ yajmoy, jɨgɨx cöguëgɨpy je amaꞌy tzaꞌñ, ñɨcxɨp agueegɨ̈ccɨp mɨjtɨgɨ̈duum ma je amaꞌy tzaꞌñ caꞌ ñijädɨɨby. Jɨm mɨjtɨgɨ̈duum yajmoy ycaayɨn yꞌuucɨn tugɨɨg jɨmɨjt ja cup.\v 15 Chi je amaꞌy tzaꞌñ ooy nɨɨ yajpɨdzɨmy ma yꞌahuac, jɨgɨx yꞌahuimbidɨpy mɨj nɨɨ huɨdi je töxyjäy pagujɨp mɨj nɨɨjoty.
\v 16 E yɨ naax ooy je töxyjäy pubejty, chi je naax yꞌahuäcxy, e uuctɨɨtztay je nɨɨ huɨdibɨ anajty je amaꞌy tzaꞌñ tɨ yajpɨdzɨmy ma yꞌahuac.
\v 17 Mɨɨd jada ycɨxpɨ je amaꞌy tzaꞌñ ooy yꞌahuaꞌndacy mɨɨd je töxyjäy, chi ñɨcxy tziptumbɨ mɨɨd je töxyjäy yꞌap yꞌoc huɨdibɨ jacjɨmɨp, jeꞌ ajcxy huɨdibɨ cuydumb Dios yꞌaneꞌmɨn ycötujcɨn, jeꞌ ajcxy huɨdibɨ cuydumb je ayuc huɨdibɨ Jesucristo anajty capxhuäcxyp.
\c 13
\s Je metzpɨ caꞌoyꞌɨyujc
\p
\v 1 E jɨm ndɨnayꞌɨhuɨɨyɨch ma püjot mejypäbɨ. Chi nhuinꞌijxyɨch co tüg ɨyujc janch oy chɨgɨɨyñɨ ypɨdzɨmy mejyjoty ymɨɨd anajty huixtujc ycohuajc, e majc ymuꞌn. E ma ymuꞌn mɨɨdɨty majc corona. E ma ycohuajc mɨɨdɨty anajty cojaay yxɨɨ huɨdibɨ yajjotmaꞌtp Dios.
\v 2 Jadayaabɨ caꞌoyꞌɨyujc huɨdibɨ nhuinꞌijxɨch, jaduꞌn anajty yquëxɨ̈gy nej tüg cuuxyubɨjy. E ytecy jaduꞌn anajty yquëxɨ̈gy nej osɨ ytecy, e yꞌahuac jaduꞌn anajty yquëxɨ̈gy nej jamgaa yꞌahuac. Chi je amaꞌy tzaꞌñ oy cötujc möy, mɨcꞌajt möy, mɨjꞌaneꞌmɨn möy, je caꞌoyꞌɨyujc.
\v 3 E nꞌijxyɨch tüg ycohuajc ma je caꞌoyꞌɨyujc co mɨj chaachɨ̈jɨty, nej jɨhuɨ̈y jeꞌ yajꞌögɨɨb. Chi je chaachɨ̈ꞌau oy choogy, e tügꞌócɨy naaxhuiñyjäy ooy janch jɨhuɨɨygɨxy huinmaaygɨxy mɨɨd jada ycɨxpɨ co tɨ choocy. Chi je mayjäy ajcxy panɨcxy je caꞌoyꞌɨyujc.
\v 4 Je mayjäy ajcxy ooy huindzɨgɨɨygɨxy je amaꞌy tzaꞌñ, je mujcuꞌ, com jeꞌ co anajty tɨ möy cötujcɨn aneꞌmɨn je caꞌoyꞌɨyujc. Chi ajcxy nañ jaduꞌn ooy huindzɨgɨɨygɨxy je caꞌoyꞌɨyujc, chachmɨnaangɨxy:
\p
―¿Pɨn jadaꞌ ocjaduꞌnɨp nej jadayaabɨ caꞌoyꞌɨyujc, e pɨn jadaꞌ octziptuunɨp mɨɨd yɨꞌ? Caꞌ pɨn.
\p
\v 5 Chi je caꞌoyꞌɨyujc yajmooyɨ mɨcꞌajt, jaydëbɨ amɨj agɨx capxɨp etz nigapxɨp Dios oy jɨbɨc, nej huaad Dios yajjotmäty. E nañ jaduꞌn mɨcꞌajt moy, jaydëbɨ mɨɨdꞌadɨpy aneꞌmɨn cötujcɨn huixchɨguïpx metz poꞌ.
\v 6 E jaduꞌn jeꞌ tuuñ. Nigapxy niꞌojɨɨy ooy Dios. Nigapxɨ Dios yxɨɨ oy caꞌoy, etz nigapxɨ niꞌojɨɨyɨ Dios ytɨjc. Nañ jaduꞌn nigapxy niꞌojɨɨy huɨdibɨ ajcxy jiiby tzɨnaayb tzajpjoty.
\v 7 Chi mɨcꞌajt ymooyɨ, jɨgɨx chiptuunɨp mɨɨd je huɨdijaty mɨbɨjcp  Dios, huɨdijaty mɨɨd ity Dios, ixtɨ mɨbaad mɨmadaaccɨxy. Nañ jaduꞌn mooyɨ cötujcɨn mɨcꞌajt, jɨgɨx aneꞌmɨp naaxhuiñyjäy huen huɨdibɨ razaɨty huen huɨdibɨ cajpɨty, huɨdibɨ capxcɨxp huen huɨdibɨ ayucɨty.
\v 8 Tügꞌócɨy mayñaaxhuiñyjäy ajcxy huɨdijaty janch ni ycamiiñ yxɨɨ jaybety ma je jugyꞌajt libro huɨdibɨ je Dios yꞌung, je Cordero, ymɨɨd. Dios yhuinmaꞌñypɨdacy jayɨjp caꞌnɨ naaxhuiñybɨ anajty chondägy co yꞌung yꞌögaꞌñ mɨɨd jäy ajcxy ycɨxpɨ, jaydëbɨ cɨjxjaayɨ ajcxy yxɨɨ ma yɨ jugyꞌajt libro.
\p
\v 9 Pɨnjaty tädzꞌac mɨɨd, pɨnjaty mɨdoꞌmbɨgamb jada ayuc, huen mɨdoꞌmbɨjccɨxy.
\v 10 Pen Dios tɨ yhuinmaꞌñypɨdägy co pɨnjaty ymɨgüg yajnɨcx mach, nañ jaduꞌn jeꞌ ajcxy nɨcxɨp mach cɨꞌm.  Pɨnjaty ymɨgüg yajꞌöcp nañ jaduꞌn yꞌögɨp jaduꞌn nej ymɨgüg anajty yajꞌögy. Paady ycɨxp yɨꞌ ajcxy huɨdijaty mɨbɨjcp Dios, huen yajtungɨxy mɨɨd ymɨgügtɨjc mecxtujcɨn etz mɨbɨjcɨn.
\p
\v 11 Huinꞌit nhuinꞌijxyɨch jadüg caꞌoyꞌɨyujc chooñ naaxjoty, e ymɨɨd anajty metz ymuꞌn, tɨm jaduꞌn nej piꞌccöbixymang ymuꞌn. E jeꞌ jaduꞌn anajty ycapxy nej je amaꞌy tzaꞌñ ycapxy.
\v 12 Je mɨmetzpɨ caꞌoyꞌɨyujc ymɨɨd aneꞌmɨn huɨdibɨ je jayɨjpɨ caꞌoyꞌɨyujc tɨ ymöyii. Je mɨmetzpɨ caꞌoyꞌɨyujc jaduꞌn aneꞌmy co je poj naaxhuiñ etz je naaxhuiñyjäy huen ojadajtcɨxy huindzɨgɨɨygɨxy je jayɨjpꞌatypɨ caꞌoyꞌɨyujc huɨdibɨ anajty je chaachɨ̈ꞌau tɨ chögy.
\v 13 Nañ jaduꞌn ooy anajty tijaty mɨjhuinmaꞌñ tuñ, ixtɨ jɨɨn yajcödɨgɨɨyb tzajpcɨ́xy, yajcäy naaxcɨ́xy ma jäy ajcxy yhuinduu.
\v 14 E mɨɨd je mɨjhuinmaꞌñ huɨdibɨ je mɨmetzpɨ caꞌoyꞌɨyujc ytuñ ma je jayɨjpɨ caꞌoyꞌɨyujc yhuinduu, chi jeꞌ huinꞌɨɨñ huɨdijaty ajcxy tzɨnaayb naaxhuiñ. Nañ jaduꞌn jeꞌ pɨdacy yꞌaneꞌmɨn co yajnïgojtúutcɨxɨpy je caꞌoyꞌɨyujc huɨdibɨ anajty tzachɨ̈jɨp mɨɨd espada, e caꞌ yꞌögy, jaduꞌn anajty jactzɨnäy.
\v 15 Je mɨmetzpɨ caꞌoyꞌɨyujc yajmɨcꞌajtmoy co yajjugyꞌadɨp je tzaadzech tɨɨbɨ anajty yajnïgojtuutcɨxy, jɨgɨx jeꞌ ycapxɨpy etz nañ jaduꞌn jɨgɨx jeꞌ aneꞌmɨn pɨdägɨpy co yajꞌöctähuɨpy pɨnjaty caꞌ yꞌojadadyii.
\v 16 Chi je mɨmetzpɨ caꞌoyꞌɨyujc aneꞌmy yɨ piꞌctɨjc, mɨjꞌanäctɨjc, mɨjjäydɨjc, comeeñydɨjc, ayoobɨtɨjc, tumbɨdɨjc, mɨdumbɨdɨjc etz jac pɨnjaty co huen ajcxy tɨyꞌajt ijxpejt jaduꞌn pɨdaaccɨxy ma ajcxy yꞌaꞌoygɨꞌ, o pen caꞌ, ma yhuimboc.
\v 17 Jaduꞌn ytuñ jɨgɨx ni caꞌp anajty pɨn huaad ti juy toogy, pen caꞌ jeꞌ ajcxy ymɨɨd je caꞌoyꞌɨyujc tɨyꞌajt yꞌijxpejt, o yxɨɨ, o jeꞌ yxɨɨ ñinúmero.
\v 18 Jadayaabɨ ayuc chojcpy ixpɨjcɨn, pɨnjaty huinjɨhuɨɨyb jëbɨ mɨhuinmaꞌñybaady ti número je caꞌoyꞌɨyujc mɨɨd. Jeꞌ jeꞌ je número huɨdibɨ tüg jäy mɨɨdɨty. Je jäy ñinúmero hueꞌ jeꞌ tudujc mɨgoꞌpx jatugɨ̈px tudujc.
\c 14
\s Je nimɨgoꞌpx jahuixchɨguïpx milbɨ yëydɨjc ajcxy yꞌɨy
\p
\v 1 Chi jadaꞌ nhuinꞌixyɨch cumäyjoty je Dios yꞌung, je Cordero, anajty ytɨnäy ma je cögop huɨdi yxɨɨ Sión. Ymɨɨd anajty mɨgoꞌpx jahuixchɨguïpx madaax mil jäy huɨdibɨ anajty ajcxy mɨɨd cojay ma yhuimboc je Dios yꞌung yxɨɨ, etz yɨꞌ yTeedy yxɨɨ, je Dios Teedy.
\v 2 Nhuinmɨdooyɨch tüg ayuc chooñ tzajpjoty, jaduꞌn nmɨdooyɨch nej mɨjnɨɨ yꞌaꞌɨɨch, nej enee yjɨdity. Hueꞌ jeꞌ anajty nmɨdooyɨch nej mayjäy yꞌarpa yajcoogɨxy.
\v 3 Ooy anajty ajcxy ɨɨgɨxy tüg ɨy jemybɨ ma je mɨjꞌaneꞌmdac yhuinduu, ma je mɨdaaxpɨ ɨyujc jugyꞌajtmɨɨdpɨ yhuinduu, nañ jaduꞌn ma je mɨjjäy ajcxy yhuinduu. Jac ni pɨn jeꞌ anajty caꞌ huaad ixpɨcy je ɨy, jëyɨ ajcxy je huixchɨguïpx mɨdaax milbɨ jëbɨ ixpɨjccɨxy je ɨy, je huɨdibɨ ajcxy Dios ti yhuinꞌixyii etz tɨ yajnïdzögy ya naaxhuiñ.
\v 4 Jada jeꞌ ajcxy huɨdibɨ caꞌ ajcxy mɨgapxtɨgooygɨxy töxyjäydɨjc, huädz tudägy ajcxy yjot yhuinmaꞌñ mɨɨdɨty, caꞌ ajcxy pɨjccɨxy. E ypanɨcxyp ajcxy je Dios yꞌung, je Cordero, oy tɨm maꞌámy ñɨcxy. Yɨꞌ ajcxy je jayɨjpꞌatypɨ jäy ya naaxhuiñ huɨdibɨ Dios tɨ yjuybɨdzɨmy ma anajty ijtcɨxy codoogɨ̈y mɨɨd ypocy ycɨxpɨ. Jaduꞌn ajcxy nipaady ma Dios Teedy etz ma jeꞌ yꞌung, je Cordero, nej je tɨm jayɨjpɨ je almas ajcxy huɨdibɨ tɨ yajpɨdzɨmy ya naaxhuiñ.
\v 5 Ni ti anɨɨ tɨ ycayajpaady ma jeꞌ ajcxy. Com caꞌ ajcxy tibocy mɨɨdɨty, caꞌ ti xɨ̈huɨn ajcxy mɨɨdɨty ma Dios yꞌaneꞌmdac.
\s Je nidugɨɨgpɨ ángeles ajcxy yꞌayuc ytɨyꞌajt
\p
\v 6 Chi nhuinꞌijxyɨch jadüg ángel yqueec-huɨdity cuptzajp, e ymɨɨd anajty Dios ytɨyꞌajt jemybɨ oybɨ huɨdibɨ ijtp huinɨxɨɨ. Hueꞌ jeꞌ yajcapxhuäcxɨp ma huɨdibɨ anajty ajcxy tzɨnaaygɨxp naaxhuiñ, huinduꞌmy nación, huen huɨdibɨ jäyɨty, huɨdibɨ capxp huen huɨdibɨ ayucɨty, huɨdibɨ tzɨnaayb ma huen huɨdibɨ cajpɨty.
\v 7 E je ángel ymɨnaꞌñ anajty janch mɨc:
\p
―Tzɨgɨɨygɨx Dios, huinꞌɨɨgɨx huinyaaxcɨx cömaygɨx Dios. Tɨ paady je xɨɨ je horɨ mɨna Dios tɨydunaꞌñ yajtɨgoyaꞌñ yɨꞌ ajcxy huɨdibɨ jɨbɨc tumb. Ojadajtcɨx je huɨdibɨ yajꞌoyɨɨy je tzajp etz je naax, je mejy etz majaty nɨɨ ymuxy.
\p
\v 8 Co je mɨdügpɨ ángel ycapxtaay, chi je mɨmetzpɨ ángel ymɨnañ:
\p
―Tɨ ymɨcꞌajt ytɨgoydäy je Babilonia je mɨjpɨ cajp. Yɨ Babilonia jäy tɨ yajhuinmaꞌñydɨgoydäy je naaxhuiñyjäy mɨɨd yjɨbɨc-huinmaꞌñ, paady yɨ Babilonia jäy ayoꞌn mɨɨdɨty cham, com je Dios tɨ ymɨjotmättäyii ajcxy. Jaduꞌn Babilonia nipaady nej tüg töxyjäy huɨdibɨ huinꞌɨɨmb yëydɨjctɨjc mɨɨd anɨɨ etz jocnɨɨ.
\p
\v 9-10 Co je mɨmetzpɨ ángel ycapxtay, chi je mɨdugɨɨgpɨ ángel ymɨnañ janch mɨc:
\p
―Pen pɨnjaty huindzɨgɨɨyb yajmɨjꞌajtɨp je caꞌoyꞌɨyujc etz je ñïgojtuutɨn etz nañ jaduꞌn cöbɨjccɨxy je caꞌoyꞌɨyujc ytɨyꞌajt yꞌijxpejt ma yhuimboc o ma ycɨꞌ, hueꞌ Dios tzaachytunɨɨb yɨ jaduꞌmbɨ jäy ajcxy mɨctägy, ypaadɨp ajcxy Dios chip yꞌejcɨn. Tɨm jaduꞌn nipaady nej jɨhuɨ̈y Dios yajꞌügyii ajcxy je vino nɨɨ huɨdibɨ yɨꞌ tɨ niꞌixɨ̈y. Dios tɨ niꞌixɨ̈y je it ma ajcxy ayoꞌn padaꞌñ, tɨm jaduꞌn nipaady nej je tasɨ ma Dios yvinonɨɨ ijtp. Chi jeꞌ ajcxy ayoꞌn paadɨpy ma ytoy je mɨjjɨɨn mɨɨd azufre ma je Dios yꞌángeles yhuinduu etz je Dios yꞌung, je Cordero, yhuinduu. 
\v 11 Je jɨɨnjoc huɨdibɨ anajty pɨdzɨmb ma anajty je mayjäy ayoꞌn paatcɨxy, pɨdzɨmɨp jeꞌ huinɨxɨɨ huinɨtiempo. E  ni poocxɨn ycacaꞌty xɨɨm tzuum mɨɨd je pɨnjaty anajty huindzɨgɨɨyb paꞌtjɨhuɨɨyb je caꞌoyꞌɨyujc etz mɨɨd yꞌahuɨnax, o pen ycöbɨjcɨpy anajty je caꞌoyꞌɨyujc yxɨɨ ycojayɨty ma yhuimboc o ma ycɨꞌ.
\v 12 Com Dios chaachytunamyb je jäy ajcxy huɨdibɨ ijtp mɨɨd je caꞌoyꞌɨyujc, paady ycɨxp copɨcy co yɨ jäy ajcxy huɨdibɨ ijtp mɨɨd Dios huen cuydungɨxy yajxon Dios yꞌaneꞌmɨn ycötujcɨn etz huen mɨbɨjccɨxy mɨjpɨdaaccɨxy tudägy Jesús, etz nañ jaduꞌn yajtungɨxy mecxtujcɨn ma ajcxy chɨnaayɨn.
\p
\v 13 Nmɨdoohuɨch tüg ayuc tzajpjoty chooñ xyñɨmäyɨch anajty:
\p
―Cojay jada ayuc: “Jadachambɨ etz jacnɨcxpɨ xɨɨ tiempo, jotcujc ajcxy huɨdijaty öccɨxp co mɨbɨjccɨxy je Huindzɨn Jesús.” Je Espíritu Santo ymɨnaꞌñ co jaduꞌn tunamb jadamb, pocxnɨp ajcxy nej ytungɨxy, e co ajcxy yjädɨpy tzajpjoty, chi ajcxy nejhuɨ̈huɨp jeꞌ ajcxy tzajpjoty tzɨnaaybɨ jaduꞌn nej je mɨbɨjcpɨ ajcxy anajty oybɨ tɨ tungɨxy.
\s Co Jesús anajty miñ tɨyduñ tzaachytuñ jɨbɨcjäydɨjc 
\p
\v 14 Chi jadaꞌ nhuinꞌijxyɨch tüg joc janch poob. E ma je joc nïcx ɨñäy tüg yquëxɨ̈gy nej je jäy huɨdibɨ tzoon tzajpjoty (je Cristo). Jeꞌ ymɨɨd anajty ma ycohuajc tüg corona ac oorɨ, e ma ycɨꞌ mɨɨdɨty tüg hoz janch jɨjpɨ.
\v 15 E ypɨdzɨmy ma je Dios chɨnaydac jadüg ángel, jeꞌ tzachmɨyäxy anajty janch mɨc je huɨdibɨ anajty ɨñaayb jocnïgɨ́xy, ymɨnaꞌñ:
\p
―Pɨdäg yɨ mhoz, e yajpɨdɨ̈g yɨ cosecha, com tɨ paady je xɨɨ je horɨ etz je cosecha tɨ chamnɨ jiiby naaxhuiñ.
\p
\v 16 Huinꞌit jeꞌ pɨdacy jeꞌ yhoz ya naaxhuiñ, je huɨdibɨ anajty ɨñaayb jocnïgɨ́xy, chi ya naaxhuiñ yajpɨdɨ̈gy je ycosecha.
\p
\v 17 Nañ tɨm jaduꞌn huinꞌit jadüg ángel ypɨdzɨmy ma je Dios chɨnaydac jiiby tzajpjoty. Nañ jaduꞌn jeꞌ anajty mɨɨdɨty yhoz janch jɨjp.
\v 18 Chi jadüg ángel ypɨdzɨmy ma je Dios ojadajttac huɨdibɨ anajty cötujc mɨɨd ma je jɨɨn. Chi yaaxɨ janch mɨc je huɨdibɨ anajty jeꞌ yhoz janch jɨjpɨ mɨɨd, chi nɨmay:
\p
―Pɨdäg yɨ mhoz janch jɨjpɨ ma yɨ muuxychaꞌm cosecha huɨdibɨ yajpatp jiiby naaxhuiñ, com tɨ ooy chamnɨ.
\p
\v 19 Chi je ángel yajnajxy jeꞌ yhoz naaxhuiñ, chi yajpɨdɨ̈gy je camuuxychaꞌm cosecha, chi tügꞌítɨy yajnïgɨdacy ma huaad yajhuinmɨɨcxy. Hueꞌ jeꞌ yhuimbɨdzɨmy co jeꞌ jeꞌ je mɨj ayoꞌn je mɨjtzaachypɨ huɨdibɨ Dios yquexamyb mɨɨd jäy ajcxy ypocy ycɨxpɨ.
\v 20 Je camuuxychaꞌm hueꞌ jeꞌ oy yajhuinmɨɨcxy Jerusalén cajppaꞌ. Ma anajty tɨ yꞌocnïgɨdacpɨ ypɨdzɨmy ooy nɨꞌpy janch com, ycoody mabaad je cohuay ajcxy mɨɨdɨty yfreno, e ymɨjhuinꞌajtɨn hueꞌ anajty mɨɨdɨty tugɨɨg mɨgoꞌpx kilómetro.
\c 15
\s Yɨ ángeles ajcxy mɨɨd je huixtujcnajxpɨ ayoꞌn
\p
\v 1 Huinꞌit nhuinꞌijxyɨch jadüg tɨyꞌajt ijxpejt janch mɨjpɨ tzajpjoty, e janch oy huinmaayñɨ. Huixtujc ángeles anajty mɨɨdɨty cɨ̈ꞌam je huixtujcpɨ tzaachypɨ ayoꞌn huɨdi cogɨxɨɨyñɨp, e mɨɨd jaduꞌn ycɨxaꞌñ ytɨgoyaꞌñ Dios chip yꞌejcɨn.
\p
\v 2 E nhuinꞌijxyɨch jaduꞌn nej tüg mejy ac vidrio, e je vidrio mɨhuɨdidɨɨ jɨɨn. E jɨm anajty je jäy ajcxy huɨdijaty madac co caꞌ huindzɨgɨ̈y anajty je caꞌoyꞌɨyujc etz jeꞌ yꞌahuɨnax, je huɨdijaty caꞌ ajcxy cöbɨjcɨ je caꞌoyꞌɨyujc yxɨɨ ñinúmero. E jɨm anajty ajcxy ytɨnaaygɨxy nïgɨxy ma je mejy ac vidrio huɨdibɨ janch adɨɨcxp ajajp anajty, ymɨɨd ajcxy je arpas huɨdibɨ ajcxy Dios mooyɨ.
\v 3 Ooy anajty ɨɨgɨxy je Moisés yꞌɨy, je Dios ytumbɨ etz nañ jaduꞌn anajty ɨɨgɨxy je Dios yꞌung, je Cordero, yꞌɨy huɨdibɨ mɨnamb:
\q Mɨj ooy, etz janch mɨjhuinmaꞌñ huɨdibɨ miich tɨ mduñ. Huindzɨn, miich Dios huɨdibɨ jac mɨcꞌajt mɨɨdɨp caꞌydɨ jac pɨn. Janch tudägy miich mnɨɨꞌaa mduꞌaa. Miich reyꞌajtp huinduꞌmyñaaxhuiñ huinɨxɨɨ huinɨtiempo.
\q
\v 4 ¿Pɨn miich xycaꞌoctzɨgɨ̈huamb, Huindzɨn? ¿Pɨn miich xycaꞌoccömayaanɨp mxɨɨ? Tugꞌócɨy naaxhuiñyjäy xyajmɨjꞌadɨpy xyhuindzɨgɨ̈huɨpy, com miich naydügpajc je huätzpɨ Dios, com miich nyajꞌijxp mgötujcɨn co ytudägɨty.
\p
\v 5 Co jaduꞌn yjajtɨ, chi nꞌijxyɨch co yꞌahuaach je Dios yꞌit jiiby ma Dios ytɨjc huɨdibɨ yajpatp tzajpjoty, ma yꞌity je tzaa ma yjaybetyɨty Dios ycötujcɨn.
\v 6 E ma je Dios yajhuindzɨgɨ̈y yajpaꞌtjɨhuɨ̈y, jiiby ypɨdzɨɨmy huixtujc ángeles. Ymɨɨd anajty ajcxy ycɨ̈ꞌam huixtujc ayoꞌn tzaachypɨ. Hueꞌ anajty ajcxy yxoxɨty mɨɨd huit janch oybɨ janch huätzpɨ, e janch adɨɨcxp ajajp anajty. Ymɨɨd anajty ajcxy oorɨhuɨɨn mabaad ycaachyjɨjp.
\v 7 Nidüg je mɨdaaxpɨ ɨyujc jugyꞌajtmɨɨdpɨ moy je huixtujcpɨ yꞌángeles huixtujc tasɨ ac tɨm oorɨ, janch ujtz je tasɨ mɨɨd je Dios chip yꞌejcɨn.
\v 8 E je it ma Dios yajhuindzɨgɨ̈y yajpaꞌtjɨhuɨ̈y yajpaꞌtjɨhuɨ̈y ujtztay jeꞌ mɨɨd je jɨɨnjoc huɨdibɨ jaduꞌn ñipatpy nej je Dios yꞌoyꞌajtɨn etz Dios ymɨcꞌajtɨn. E ni pɨn anajty huaad caꞌ jiiby ytɨgɨ̈y ma je Dios ytɨjc jiiby tzajpjoty, ixtɨ coonɨ jeꞌ ycɨjxtähuɨpy je huixtujcpɨ ayoꞌn, je tzaachypɨ huɨdibɨ je huixtujcpɨ ángeles ajcxy ymɨɨd.
\c 16
\s Je tasɨ huɨdibɨ ujtz mɨɨd ayoꞌn tzaachypɨ
\p
\v 1 Chi nmɨdooyɨch tüg ayuc chooñ ma Dios ytɨjc jiiby tzajpjoty, nɨmay anajty janch mɨc je Dios yꞌángeles nihuixtujcpɨ:
\p
―Nɨcx ajcxy yajyojctuutcɨx jiiby naaxhuiñ yɨ huixtujcpɨ tasɨ huɨdibɨ ujtzɨty mɨɨd Dios chip yꞌejcɨn.
\p
\v 2 Chi ñɨcxy je mɨdügpɨ yꞌángel, chi jeꞌ ytasɨ yajtemduty jiiby naaxhuiñ ujtz mɨɨd mayꞌayoꞌn. E tügꞌócɨy je mayjäy huɨdibɨ anajty ajcxy mɨɨd ma yhuimboc je caꞌoyꞌɨyujc ytɨyꞌajt, pɨnjaty anajty je ñïgojtuutɨn huindzɨgɨɨyɨp paꞌtjɨhuɨɨyɨp, chi jeꞌ ajcxy ypaatɨ ñibɨdzɨm tüg nïbüdz janch jɨbɨcpɨ, e huɨdibɨ janch pɨjcp.
\p
\v 3 Je mɨmetzpɨ yꞌángel yajyojctuty jeꞌ ytasɨ huɨdi anajty ujtz mɨɨd ayoꞌn mejyhuingɨ́xy. Chi je mejy yꞌahuimbijty nɨꞌpy, jaduꞌn nej jɨhuɨ̈y öcpɨ ñɨꞌpy. E huɨdijaty ɨyujc jiiby tzɨnaayb mejyjoty, cɨjx jeꞌ yꞌöctäy.
\p
\v 4 Je mɨdugɨɨgpɨ yꞌángel yajyojctuty jeꞌ ytasɨ huɨdi anajty ujtz mɨɨd mayꞌayoꞌn maajaty je mɨjnɨɨ, etz maajaty nɨɨ ymuxy, nañ jaduꞌn ac ñɨꞌpy jeꞌ yꞌahuimbijttay. 
\v 5 Chi nmɨdooyɨch co je ángel ymɨnaꞌñ huɨdibɨ aneꞌmb je nɨɨ:
\p
―Huindzɨn Dios, tudägy mduñ co tɨ mdɨyduñ je naaxhuiñyjäy ajcxy mɨɨd ypocy ycɨxpɨ, e jaduꞌn tɨ mguexy mɨj ayoꞌn ya naaxhuiñ, Huindzɨn Dios, janchypɨ huätzpɨ miich, huɨdibɨ ijtnaayb etz tɨ mꞌijtnäy.
\v 6 Com je naaxhuiñyjäy ajcxy tundɨgooy co ajcxy teemɨ yojcɨ je mɨbɨjcpɨdɨjc ñɨꞌpy, je huɨdibɨ mhuinꞌijx, je huɨdibɨ ajcxy miich mꞌayuc najtzcapxɨɨyb anajty. Paady ycɨxp miich je nɨɨ huɨdibɨ yɨ naaxhuiñyjäy yꞌuuccɨxyp, tɨ myajꞌahuimbity nɨꞌpy, com jaduꞌn ajcxy mɨhuaadɨty je tzaachypɨ mɨɨd ajcxy ypocy ycɨxpɨ.
\p
\v 7 Nmɨdooyɨch co pɨnjaty ma je it ma yajhuindzɨgɨ̈y Dios, ymɨnaꞌñ:
\p
―Janch jaduꞌn, Huindzɨn Dios, huɨdibɨ tügꞌócɨy mɨcꞌajt mɨɨd, mɨɨd mdɨyꞌajt etz mɨɨd mdudägyꞌajtɨn, tɨ mdɨyduñ je naaxhuiñyjäy ajcxy mɨɨd ypocy ycɨxpɨ.
\p
\v 8 Je mɨmadaaxpɨ Dios yꞌángel yajyojctuty ma je xɨɨ jeꞌ ytasɨ huɨdi anajty ujtz mɨɨd Dios chip yꞌejcɨn. Chi je xɨɨ yajmoy ymɨcꞌajt co jäy nögɨɨb mɨɨd jeꞌ yjɨɨn.
\v 9 E tügꞌócɨy jäy ajcxy yxɨɨdzaydaayɨ janch mɨc. E ni caꞌ ajcxy yhuinmaꞌñ yajtɨgajch, ni caꞌojadajtcɨxy ni caꞌ cömaygɨxy Dios. Nïgɨ ajcxy ooy jɨbɨc Dios nigapxy niꞌojɨɨy, je Dios huɨdibɨ aneꞌmdaayb tügꞌócɨy ayoꞌn mɨɨd ymɨcꞌajt.
\p
\v 10 Je mɨmɨgooxpɨ yꞌángel yajtemduty je ytasɨ, huɨdi anajty ujtz mɨɨd Dios chip yꞌejcɨn, ma je caꞌoyꞌɨyujc yꞌaneꞌmy etz ma tügꞌócɨy it lugar ma je caꞌoyꞌɨyujc yꞌaneꞌmɨn, e huinꞌit oy ycoodzɨygɨdactäy. Yɨ jäy ajcxy ooy ytoodz ocꞌadzützmújccɨxnɨ mɨɨd je ayoꞌn tɨɨbɨ anajty ytuñyii yjadyii.
\v 11 Per ni jaduꞌn ajcxy caꞌixmajch je jɨbɨcpɨ huɨdibɨ anajty ajcxy ytumyb. Nïgɨ ajcxy ooy oyñinej ycapxcɨxy etz niꞌojɨɨygɨxy Dios tzajpjotypɨ mɨɨd je jübɨɨ paꞌmɨɨ etz je nïbüdz ycɨxpɨ.
\p
\v 12 Je mɨdudujcpɨ yꞌángel yajtemduty je ytasɨ huɨdi anajty ujtz mɨɨd Dios chip yꞌejcɨn ma je Eufrates mɨjnɨɨ. Chi je mɨjnɨɨ ytɨɨch jɨgɨx jëbɨ ajcxy je reydɨjc ñaxy huɨdibɨ ajcxy tzoomb xɨɨbɨdzɨmyꞌamy.
\p
\v 13 Chi nhuinꞌijxyɨch co ypɨdzɨmy ma je amaꞌy tzaꞌñ yꞌahuac, etz ma je caꞌoyꞌɨyujc yꞌahuac, etz ma je profeta falso yꞌahuac ypɨdzɨmy tugɨɨg caꞌoybɨ. E je tugɨɨgpɨ caꞌoybɨ jaduꞌn anajty yquëxɨ̈gy nej tugɨɨg tuc.
\v 14 E je tugɨɨgpɨ tuc hueꞌ ajcxy caꞌoybɨ ymɨɨd, e tungɨxy anajty mɨjhuinmaꞌñ mɨɨd je mujcuꞌ ymɨcꞌajt. E oy ajcxy huoomucy huɨdijaty anajty reyꞌajtp huinduꞌmy naaxhuiñ, jɨgɨx jeꞌ ajcxy chiptúngɨxɨpy mɨɨd je mɨjpɨ Dios huɨdibɨ tügꞌócɨy mɨcꞌajt mɨɨd, co anajty je xɨɨ je tiempo yhuaadꞌajtnɨ huɨdibɨ Dios tɨ yajnigödugɨ̈y.
\v 15 Jaduꞌn Dios ymɨnaꞌñ:
\p
―Cuendɨtungɨx ɨɨch nꞌayuc. Ameech nhuimbidaꞌñɨch naaxhuiñ jaduꞌn nej meetzpɨ ameech nɨcxy meech tijaty. Paady ycɨxp jotcujc pɨnjaty niꞌixɨ̈  xyꞌahuijxpɨch, je huɨdibɨ ypocy tɨ ymecxyii, e tudägyꞌajtɨn tɨ paady ma ɨɨch jɨgɨx caꞌ jaduꞌn paadɨp nej tüg jäy huɨdibɨ yhuit tɨ meechyii, e jaduꞌn jeꞌ yhuɨꞌmy nïhuädz, e tzoꞌyduꞌn jɨhuɨ̈y co jäy yhuindɨcxyii. 
\v 16 Chi je tugɨɨgpɨ caꞌoybɨ huoomujctay ajcxy je reydɨjc ma tüg it huɨdibɨ yxɨɨ Hebreoꞌamy Armegedón.
\p
\v 17 Je mɨhuixtujcpɨ angel yajyojctuty jeꞌ ytasɨ jɨm pojjoty, e ma je it ma ajcxy huindzɨgɨ̈y Dios etz ma jeꞌ yꞌaneꞌmdac tzajpjoty, jiiby tüg ayuc chooñ janch mɨcpɨ ymɨnaꞌñ anajty:
\p
―Tɨ ytuñyii yjadyii.
\p
\v 18 Huinꞌit ooy yjajtɨ huɨdzuc, neꞌmɨn mɨcpɨ etz jɨdijtɨn, ooy naax yücxy mɨɨd tüg ujx janch mɨcpɨ, nimɨnaabɨ jaduꞌn ycajadyii maabɨ jäy chɨnayꞌíjtɨgɨxy naaxhuiñ. 
\v 19 Chi je mɨj ciudad, je Jerusalén, oy yhuäcxy tugɨɨg pɨcy, nañ jaduꞌn je may ciudad huɨdibɨ huinduꞌmyñaaxhuiñ, cɨjx ymɨjähuɨydäy. Chi Dios jäymejtzcoty je Babilonia cajp nej je jäy ajcxy jɨm ytundɨgooygɨxy, e chi quejxy may ayoꞌn jɨm mɨɨd chip yꞌejcɨn ycɨxpɨ.
\v 20 Tügꞌócɨy je naax mejyꞌagujcpɨ ytɨgoyday. Etz tügꞌócɨy tungop naaxhuiñygɨ́xy cɨjx jeꞌ ytɨgoydäy.
\v 21 Nañ jaduꞌn ooy ycäy chooñ tzajpjoty eneedɨɨtz mɨjjatypɨ majaty  jäy ajcxy, janch jempxy anajty je eneedɨɨtz, tügjatypɨ huixchɨguïpxy kilo. Chi jäy ajcxy ooy oyñinej nigapxy niꞌojɨɨy je Dios mɨɨd je eneedɨtz ycɨxpɨ, com ooy jeꞌ mɨj chachjajtɨ je ayoꞌn je castigɨ.
\c 17
\s Je töxyjäy jɨbɨctzɨnaaybɨ chaachypɨ ycastigɨ
\p
\v 1 Nidüg je huixtujcpɨ ángeles huɨdibɨ anajty ajcxy mɨɨd je huixtujcpɨ ytasɨ ymiiñ. Chi ajcxy ymɨydacy mɨɨd ɨɨch, xyñɨmaaygɨxɨch:
\p
―Min yam, miiñ nyajniꞌixɨ̈y je tzaachypɨ huɨdibɨ ypadamyb je töxyjäy pocytumbɨ, huɨdibɨ ɨñaayb mejyhuingɨ́xy.
\v 2 Je reydɨjc ya naaxhuiñ tɨ ooy ytundɨgooygɨxy mɨɨd jada töxyjäy, e je naaxhuiñyjäy ajcxy tɨ ooy huinmaꞌñydɨgooygɨxy mɨɨd jada töxyjäy ypocytunɨɨ huinmaꞌñ, jaduꞌn nej jɨhuɨ̈y ajcxy ooy tɨ ymúucɨgɨxy.
\p
\v 3 E Dios yjɨhuɨꞌñ ymɨcꞌajt xyajcumäyɨch e cumäyjoty xyajnɨcxyɨch je ángel mɨjtɨgɨ̈duum. E jɨm nꞌijxyɨch tüg töxyjäy yajꞌɨñäy tüg caꞌoyꞌɨyujc huɨdibɨ ycolor tzaptz, e janch nïducy mɨɨd pɨnjaty yxɨɨ cojaayɨp huɨdibɨ yajjotmaꞌtp Dios, e ymɨɨd anajty huixtujc ycohuajc etz majc ymuꞌn.
\v 4 Je töxyjäy hueꞌ anajty yxojx mɨɨdɨty mɨɨd huit janch oyjatypɨ, ycolor ucy etz tzaptz, ooy anajty yajꞌoyguëxɨ̈gy mɨɨd oorɨ, mɨɨd piꞌctzaa janch oybɨ etz perla. Ymɨɨd anajty ma ycɨꞌ tüg tasɨ ac tɨm oorɨ janch ujtz jeꞌ anajty mɨɨd jɨbɨc-huinmaꞌñ huɨdibɨ caꞌ yꞌoyjäygɨdaacnɨty, huɨdibɨ pocytunɨɨ huinmaꞌñ mɨɨd.
\v 5 E ymɨɨd anajty cojaay tüg xɨɨ ma yhuimboc huɨdibɨ caꞌ  pɨn huinjɨhuɨ̈y. Je letra jaduꞌn ymɨnaꞌñ: “Je mɨjpɨ Babilonia, huɨdibɨ nigopꞌajtɨp pocytunɨɨ huinmaꞌñ etz tügꞌócɨy tijaty caꞌ yꞌoyjäygɨdaacnɨty ya naaxhuiñ.”
\v 6 Mɨcꞌamy ɨɨch oy nhuinmaꞌñ nyajmiñ nyajmech co je töxyjäy hueꞌ jeꞌ anajty tɨ yajꞌoꞌccɨxy je huɨdibɨ ajcxy mɨbɨjcp Dios etz huɨdibɨ ajcxy Jesús yjäyꞌajtɨp, e jaduꞌn nipaady nej jɨhuɨ̈y je töxyjäy tɨ ooy ymügyii mɨɨd je mɨbɨjcpɨdɨjc ñɨꞌpy. Co jaduꞌn nhuinꞌijxyɨch, chi ooy ngɨjxy ngüejtyɨch njɨhuɨy nhuinmaayɨch. 
\v 7 Chi je ángel xyñɨmaayɨch:
\p
―¿Nej co mgɨxy mgüety? Ɨɨch miich nyajnɨmähuɨpy nej yhuimbɨdzɨmy huɨdibɨ caꞌ pɨn huinjɨhuɨ̈y ma yɨ töxyjäy etz ma yɨ caꞌoyꞌɨyujc huɨdibɨ yajꞌɨñaayb, huɨdibɨ ycohuajc huixtujc mɨɨd etz majc ymuꞌn. 
\v 8 Yɨ caꞌoyꞌɨyujc huɨdibɨ tɨ mꞌixy, jeꞌ yɨꞌ tɨɨbɨ chɨnäy e cham caꞌp jeꞌ ma. Chi ypɨdzɨmɨpy ayoodactuuyb, jayɨjp ma anajty caꞌnɨ nɨcxy yꞌayoy ytɨgoy tüccɨꞌyɨ. E je jäy ajcxy huɨdijaty tzɨnaayb naaxhuiñ, e caꞌp yxɨɨ yꞌity cojaay ma je jugyꞌajt libro huɨdibɨ oyɨɨy caꞌnɨ anajty naaxhuiñybɨ chondägy. Ooy jeꞌ ajcxy huinmáaygɨxɨpy jɨhuɨ́ɨygɨxɨpy co íjxcɨxɨpy je caꞌoyꞌɨyujc huɨdibɨ jecyɨp tɨ yꞌoctzɨnaaybɨ, e cham caꞌ jeꞌ ma, e chi jadaꞌ jadügꞌoc yhuimbidaꞌñ. 
\p
\v 9 Ya ii tigati pɨn jëbɨ huinjɨhuɨ̈y je huixtujcpɨ cohuajc, jeꞌ jeꞌ je huixtujcpɨ copjot ma je cajp yꞌity. E je cajp jaduꞌn jeꞌ nipaady nej jada töxyjäy pocytumbɨ.
\v 10 Je huixtujcpɨ cop jaduꞌn ajcxy nej huixtujcpɨ rey. Ma je huixtujcpɨ rey mɨgoox jeꞌ ajcxy tɨɨbɨ ymɨcꞌajt ytɨgooygɨxy. Nidüg jeꞌ cham yꞌaneꞌmy. Je jadügpɨ caꞌnɨ jeꞌ ymiiñ. E co jeꞌ ymiinɨpy je huɨdibɨ cogɨxɨɨyb, caꞌp jeꞌ mɨjcajee yhuäcxɨbɨpy.
\v 11 Je caꞌoyꞌɨyujc huɨdibɨ jecyɨp tzɨnay, e cham caꞌ ma, jeꞌ jeꞌ je mɨductujcpɨ rey, oy jeꞌ yjajëjɨty nidüg ma je nihuixtujcpɨ rey. Huinꞌit jeꞌ ñɨcxnɨpy ayoobɨ jottɨgooybɨ tüccɨꞌyɨ ayoodactuuby.
\p
\v 12 Je majcpɨ muꞌn tɨɨbɨ mꞌixy, jeꞌ jeꞌ je majcpɨ rey huɨdibɨ caꞌnɨ ajcxy ytɨgɨɨygɨxy aneꞌmbɨ. E cɨ̈dɨgɨ̈huɨɨb ajcxy ycötujcɨn co yreyꞌájtcɨxɨpy tüg hora quipxyɨ mɨɨd je caꞌoyꞌɨyujc.
\v 13 Jada majcpɨ rey ajcxy túꞌcɨy ajcxy yꞌijtcɨxy, túꞌcɨy ajcxy yhuinmaꞌñ, e yegɨpy ajcxy yꞌaneꞌmɨn ycötujcɨn ma je caꞌoyꞌɨyujc.
\v 14 Tziptuunɨp ajcxy mɨɨd je Dios yꞌung, je Cordero. E je Cordero ymɨmadactähuɨpy jeꞌ je majcpɨ rey ajcxy. Com jeꞌ jeꞌ tügpajc Huindzɨnɨp ma pɨn janaydíjɨp huindzɨn. Jeꞌ jeꞌ tügpajc reyɨp jac mɨcꞌajt mɨɨdpɨ ma je reydɨjc ajcxy. E pɨnjaty Cristo mɨɨd yꞌity, Dios jeꞌ tɨ huinꞌixy, e tudägy jeꞌ panɨcxy Dios yꞌung.
\p
\v 15 Nañ jaduꞌn je ángel xyñɨmaayɨch:
\p
―Yɨ mejy tɨɨbɨ mꞌixy ma je töxyjäy pocytumbɨ ɨñäy, hueꞌ jeꞌ jaduꞌn nipaady nej maygajp, nej mayñación ma mayjäy chɨnaygɨxy huɨdibɨ capxcɨxp canaagnax ayuc.
\v 16 Je majcpɨ muꞌn tɨɨbɨ mꞌixy ma je caꞌoyꞌɨyujc, jeꞌ ajcxy caꞌixaꞌnɨp catzogaꞌnɨp je töxyjäy pocytumbɨ. Chi ajcxy ixꞌijxnɨp je töxyjäy pocytumbɨ, yajhuɨꞌmɨpy ajcxy nïhuädz. Chi ajcxy je töxyjäy pocytumbɨ ñinïcx tzuꞌtzɨpy, e nöccɨxɨpy mɨɨd jɨɨn. 
\v 17 Dios tɨ pɨdägy ma ajcxy yꞌaa yjot huen tungɨxy nej Dios tzocy, mɨɨd co anajty tɨ pɨdaaccɨxy túꞌcɨy yhuinmaꞌñ. E cötujc möhuaangɨxy aneꞌmɨn möhuaangɨxy co yreyꞌadɨpy je caꞌoyꞌɨyujc, ixtɨ coonɨ yajcuydundähuɨpy je ayuc huɨdibɨ Dios anajty tɨ capxy. 
\v 18 Je töxyjäy tɨɨbɨ mhuinꞌixy, jeꞌ jeꞌ je mɨj cajp huɨdibɨ aneꞌmdaayb je reydɨjc ajcxy huinduꞌmyñaaxhuiñ. 
\c 18
\s Babilonia cajp oy yhuindɨgooy
\p
\v 1 Co jada jaduꞌn yjajtɨ, chi nhuinꞌijxyɨch jadüg ángel ycɨdägy naaxhuiñgɨ́xy, chooñ tzajpjoty mɨɨd ymɨjꞌaneꞌmɨn ymɨjcötujcɨn, e ooy je naax yajꞌanɨɨy mɨɨd je ytɨɨcxɨn yjajɨn.
\v 2 Chi je ángel ooy mɨc yaaxqueecy ymɨnaꞌñ anajty:
\p ―Tɨ ymɨcꞌajt ytɨgooy, tɨ ymɨcꞌ ajt ytɨgooy je mɨjpɨ Babilonia cajp, e hueꞌ tɨ yꞌahuimbity mujcuꞌ chɨnaydac, etz canaagnaxpɨ caꞌoybɨ ymaadac chɨnaydac, etz tɨ yꞌahuimbity joonmaadac joondzɨnaaydac, je joon ajcxy huɨdibɨ caꞌ yhuädzɨty, huɨdibɨ caꞌ yꞌoyjäygɨdaacnɨty.
\v 3 Com tɨ je mayjäy huɨdibɨ tzɨnaayb ma tügꞌócɨy nación yhuinmaꞌñydɨgooygɨxy mɨɨd je Babilonia yjɨbɨc-huinmaꞌñ pocytunɨɨ huinmaꞌñ. Tɨ je reydɨjc huɨdibɨ aneꞌmb ya naaxhuiñ mɨɨd ytundɨgooygɨxy je Babilonia. Nañ jaduꞌn je ajuybɨ adoocpɨ ajcxy, huɨdibɨ ya naaxhuiñ yajpatcɨxy, tɨ oy ymeeñybatcɨxy mɨɨd je Babilonia pocytunɨɨ ñegocio. Je Babilonia jaduꞌn yɨꞌ nej tüg töxyjäy jɨbɨc-huinmaꞌñ mɨɨdpɨ.
\p
\v 4 Chi nmɨdooyɨch jadüg ayuc chooñ tzajpjoty, e ymɨnaꞌñ anajty:
\p ―Pɨdzɨmgɨx ma yɨjiibɨ cajp com ɨɨch miich ajcxy njëꞌajtpy, jɨgɨx miich ajcxy caꞌ mꞌaminmugɨpy ma yɨꞌ ajcxy ypocy, e ni xycapaadɨp miich ajcxy je ayoꞌn tzaachypɨ huɨdibɨ Dios yquexamyb ma je Babilonia cajpjäy.
\v 5 Yɨ jaduꞌmbɨ cajpjäy ypocy tɨ oy mayɨɨyñɨ e Dios yɨꞌ ajcxy tzachytunɨɨb mɨɨd ajcxy ypocy ycɨxpɨ. Dios yjäymejchp yɨꞌ yjɨbɨc-huinmaꞌñ ajcxy huɨdibɨ tɨ tungɨxy.
\v 6 Dios ymoyhuimbidɨpy je tzaachypɨ yɨ Babilonia cajpjäy, jaduꞌn nej ajcxy yɨꞌ jeꞌ tzaachytuñ Dios yjäy ajcxy, Dios ymoyhuimbidɨp je Babilonia cajp tzaachypɨ mejtz jaduꞌñɨ caꞌydɨ jaduꞌn nej yɨꞌ tɨ yecy.
\v 7 Moꞌ yɨ Babilonia cajp yɨ tzaachpyɨ ayoꞌn, tɨm jaduꞌn nej yɨꞌ tɨ ñaymöyii ma yɨ chɨnaayɨn etz ñayjɨhuɨɨyɨ amɨj agɨx. Yɨꞌ ymɨnaꞌñ jotjoty huinmaꞌñyjoty: “Ɨɨch mɨjꞌaneꞌmbɨ ɨɨch. Caꞌ nyajpaadyɨch nej tüg coꞌögytöxyjäy mɨɨdɨty tajɨn mayɨn. Ni ngaꞌixɨpyɨch jɨɨyɨn yaaxɨn.”
\v 8 Mɨɨd jeꞌ ycɨxpɨ tügxɨɨyɨ ymiinɨpy je mɨjꞌayoꞌn oꞌcɨn, tajɨn mayɨn, jɨɨyɨn yaaxɨn etz yuubaꞌm ma je Babilonia cajp. Chi ninögɨ̈huɨpy je Babilonia cajp mɨɨd jɨɨn. Com yɨ Huindzɨn Dios ooy yɨꞌ ymɨjɨty, e yɨꞌ tɨ yajpocycäy yɨ Babilonia cajp, huɨdibɨ nipatp nej tüg töxyjäy pocytumbɨ.
\p
\v 9 Je reydɨjc ya naaxhuiñ huɨdibɨ jɨbɨc-huinmaꞌñ pocytunɨɨ huinmaꞌñ tungɨxp quipxyɨ mɨɨd je Babilonia jäy, chi ajcxy ytájcɨxɨpy ymáygɨxɨpy yjɨ́ɨygɨxɨpy yáaxcɨxɨpy co anajty ijxcɨxyp je Babilonia cajp jɨɨnjoty co anajty ytooybɨcy.
\v 10 Jɨguem ajcxy yjacmɨjꞌíjxcɨxɨpy mɨɨd co anajty chɨgɨɨygɨxy co páatcɨxɨpy ayoꞌn quipxy mɨɨd Babilonia, e ymɨnáangɨxɨpy:
\p ―¡Ay, miich Babilonia mɨj cajp, huɨdibɨ ooy mgapxpaadyɨty, ooy mmɨjɨty, ooy mmɨcꞌajt mɨɨdɨty! Per janch tɨm tüg jaxɨ̈gy tɨ xyñimiiñ jeꞌ ayoꞌn huɨdibɨ Dios tɨ quexy mɨɨd mbocy ycɨxpɨ.
\p
\v 11 Je ajuybɨdɨjc adoocpɨdɨjc huɨdibɨ ajcxy naaxhuiñ jɨ́ɨygɨxɨpy yáaxcɨxɨpy ajcxy mɨɨd je Babilonia cajp ycɨxpɨ, com caꞌp anajty pɨn juuyɨp ajcxy yjuy ytoocy.
\v 12-13 Je ajuybɨdɨjc adoocpɨdɨjc ajcxy ymɨɨd oorɨ, plata, tzaa oyjatypɨ, perla oyjatypɨ, lino huit oyjatypɨ, sedɨ huit oyjatypɨ, rey yhuit, huit color tzaptzpɨ, nañ jaduꞌn ymɨɨd ajcxy canaagnaxpɨ quipy huɨdibɨ oyjaty xuucp, pajc vaso, quipy vaso oyjatypɨ, cobre vaso, pujx vaso, marmol vaso. Ymɨɨd ajcxy canela, etz tijaty ooy oy xuucɨn mɨɨdɨty, poom, mirra, perfume, vino aceite, trigo tɨɨm, ɨyujc animal huɨdibɨ tzɨmy yajyöyb, cöbixy, cohuay, carretɨ, tumbɨ huɨdibɨ codoogɨ̈yɨp, etz jacjadyii jäy juugypɨ.
\v 14 Je ajuybɨdɨjc adoocpɨdɨjc ajcxy ñɨmähuɨpy je Babilonia jäy ajcxy:
\p ―¡Caꞌ ajcxy mꞌocmɨɨdɨñ je tɨɨm tzaꞌm huɨdibɨ ajcxy mjot yjatzojcpy, caꞌ ma anajty yꞌocyajpatnɨ. Tɨ tɨgoydäy miich ajcxy mjugyꞌajt, je mgomeeñꞌajt, etz mꞌijxɨn huɨdibɨ anajty miich ajcxy mmɨɨd, caꞌ ma ocyajpatnɨp jadügꞌoc!
\p
\v 15 Je huidɨjaty anajty huit ixtaayb meeñ ixtaayb, e tɨ ycomeeñygojcɨxy ma yɨjɨmbɨ cajpɨn, jɨguem ajcxy yhuɨꞌmdähuɨpy mɨɨd tzɨgɨꞌñ jɨhuɨꞌñ, co nañ jaduꞌn je tzaachypɨ castigɨ padaangɨxy. Yäxɨp ajcxy etz nidájcɨxɨpy nimáaygɨxɨpy je Babilonia cajp.
\v 16 Chi ajcxy ymɨnaanɨpy:
\p ―¡Ay! ¡Miich mɨj cajp huɨdibɨ ayoꞌn patp! Jaduꞌn miich anajty nej tüg töxyjäy huɨdibɨ xoxyɨp mɨɨd huit oyjatypɨ, huɨdi ycolor ucy etz tzaptz, yajꞌoyguëxɨ̈gy mɨɨd oorɨ, mɨɨd piꞌctzaa oyjatypɨ, mɨɨd perla.
\v 17 ¡Janch tɨm tüg jaxɨ̈gy, janch tɨm tüg horɨ, tɨ ycɨxy miich mmɨjjugyꞌajtɨn mmɨjcomeeñꞌájtɨn!
\p Tügꞌócɨy pɨnjaty nihuindzɨnꞌajtp barco etz pɨnjaty barcojoty viajetumb, marinerotɨjc ajcxy etz huɨdibɨ ajcxy tumb ma je mejy, tɨ jeꞌ ajcxy yhuɨꞌmdaaygɨxy jɨguëgy.
\v 18 Co ajcxy ijxy nej anajty ytoy yjocy je mɨj ciudad, chi ajcxy ymɨnañ:
\p 
―¿Huɨdibɨ cajp jadaꞌ ji jaduꞌnɨp nej jada anajty jadayaabɨ mɨj cajp?
\p
\v 19 Chi ajcxy ooy naax ñayyajcöhuoogɨɨyɨ mɨɨd jotmay, cham ooy yaaxcɨxy, ytajcɨxy ymaygɨxy, e mɨc chachmɨnaangɨxy:
\p ―¡Ay! ¡Je mɨjpɨ oybɨ cajp huɨdibɨ ayoꞌn patp, ma je tügꞌócɨy pɨnjaty anajty ymɨɨd barco ma mejy, tɨ ycomeeñygójcɨxy anajty mɨɨd jeꞌ! ¡Janch tɨm tüg mɨj jaxɨ̈gyɨ, tɨm tüg horɨ, tɨ yhuindɨgoydäy miich mmɨjjugyꞌajtɨn mgomeeñꞌajtɨn!
\p
\v 20 Jotcugɨɨygɨx mɨɨd je Babilonia cajp ycɨxpɨ, miich tzajpjoty tzɨnaayb ajcxy, etz miich ajcxy huɨdibɨ Dios xyhuinꞌijx co jëbɨ mꞌapóstolꞌajtcɨxy, etz nañ jaduꞌn miich ajcxy huɨdibɨ najtzcapxɨɨy Dios yꞌayuc ytɨyꞌajt, etz nañ jaduꞌn pɨnjaty ijtp ma Dios. Com co Dios tɨ yajpocycäy Babilonia cajp, jeꞌ yɨꞌ tɨ yajꞌadɨgach jaduꞌn nej ajcxy xymɨɨddundɨgoy.
\p
\v 21 Huinꞌit tüg ángel janch mɨcꞌajtmɨɨdpɨ conɨ̈gy tüg tzaa, jaduꞌn nej tüg molino paandzaa mɨjpɨ, chi jeꞌ cogädzɨɨy mejyjoty, e ymɨnañ:
\p ―Nej jada tzaa tɨ ytɨgooyɨn, nañ tɨm jaduꞌn je mɨjpɨ oybɨ Babilonia cajp ytɨgoydähuɨpy. E janch ni mɨna pɨn cajacꞌixɨpy.
\v 22 E ni camɨna ajcxy mgajacꞌmɨdohuɨpy jɨm Babilonia co pɨn arpɨ coob etz flauta yajxuuxp trompetɨ yajxuuxp mɨjnɨɨ mɨjtuꞌ. E caꞌ jacyajpaadɨp pɨnjaty ti dung ii jajtp, ti oficio jajtp, ni mgamɨdohuɨpy je molino paandzaa ñeꞌmɨn.
\v 23 Ni mɨna ti ycatɨɨcxɨpy jadügꞌoc ma je Babilonia cajp. Ni mɨna ycayajmɨdohuɨpy jadügꞌoc je xɨɨ je xondaacɨn huɨdibɨ jajtɨp co jäy ypɨcy. Oy je Babilonia ajuuybɨ yꞌadoocpɨ ajcxy anajty ooy yjamɨcjäyɨty ya naaxhuiñ, e tɨ ajcxy huinꞌɨɨñ mayñaaxhuiñyjäy mɨɨd ajcxy brujerías.
\p
\v 24 Jɨm ma je Babilonia cajp jɨm yajpaady jeꞌ ajcxy ñɨꞌpy je tɨɨbɨ ajcxy Dios yꞌayuc najtzcapxɨɨyɨ, je huɨdibɨ ajcxy huinꞌixyɨp ma Dios etz tügꞌócɨy mɨbɨjcpɨdɨjc tɨɨbɨ yajꞌögypaatcɨxy naaxhuiñygɨ́xy.
\c 19
\p
\v 1 Co jaduꞌn yjajtɨ, chi nmɨdooyɨch mayꞌayuc mɨcpɨ co mayjäy ajcxy ooy ycapxcɨxy ymɨydaaccɨxy tzajpjoty, ymɨnaꞌñ ajcxy:
\q
 ¡Aleluya! Ɨɨch ajt nDios yɨꞌ tügpajc tɨ xyajnïdzoocɨm ajt nꞌalma. Yɨꞌ jeꞌ tügpajc mɨjꞌoyꞌajt mɨɨd.
\q
\v 2 Com janch etz tudägy Dios yꞌaneꞌmɨn ycötujcɨn. Tɨ jeꞌ möy ycastigo je Babilonia cajp huɨdibɨ tɨ yajhuinmaꞌñydɨgoy je naaxhuiñyjäy mɨɨd je ycatudägyꞌajtɨn ycɨxpɨ. Yɨꞌ jeꞌ tɨ yajꞌadɨgach ma je Babilonia cajp je Dios ytumbɨ, huɨdibɨ yajꞌögy ajcxy, pat jɨm.
\m
\v 3 Chi ajcxy jadügꞌoc ymɨnaanɨp:
\p ―¡Aleluya! Je jɨɨnjoc huɨdibɨ jɨm Babilonia co ytoy je cajp, paꞌttɨgɨ̈huɨp tzajpcɨ́xy huinɨxɨɨ huinɨtiempo, caꞌ yjɨɨn ypïdzɨp ni mɨna.
\p
\v 4 E je iipx madaaxpɨ mɨjjäy etz je madaaxpɨ ɨyujc, huɨdibɨ jugyꞌajt mɨɨd ñaygojxtɨnaygɨdaacɨ naaxcɨ́xy, chi ajcxy ooy Dios ojadajty huɨdibɨ anajty aneꞌmb ma je mɨjꞌaneꞌmdac, e ymɨnaangɨxy: 
\p
―¡Jaduꞌn jada! ¡Aleluya!
\p
\v 5 Huinꞌit yajmɨdooy jiiby ma je Dios yꞌɨñaydac ycötujctac tüg ayuc ymɨnaꞌñ:
\q
Huindzɨgɨɨygɨx ɨɨbatcɨx capxpatcɨx ɨɨch ajt nDios nidügꞌócɨy pɨnjaty tumb mɨɨd yɨꞌ, pɨnjaty yɨꞌ tzɨgɨɨyb, huen mutztɨjcɨty huen ymɨjꞌanäctɨjcɨty.
\s Je jotcujcꞌajtɨn huɨdibɨ nbadaanɨm co anajty Cristo yjäy nimiñ
\p
\v 6 Nmɨdoohuɨch nañ jaduꞌn nej jɨhuɨ̈y ooy mayjäy ycapxy ymɨydägy, nej canaag mɨjnɨɨ yꞌaꞌɨɨch, nej enee mɨcpɨ yjɨdity, ymɨnaangɨxy:
\q  
¡Aleluya! Tɨ yꞌaneꞌmdɨgɨ̈y jiiby naaxhuiñ je Huindzɨn Dios huɨdibɨ tügpajc mɨ́jɨp. 
\q
\v 7 Agujcꞌajtɨm jotcujcꞌajtɨm, tzoc cömaayɨm Dios, tzoc mooyɨm mɨjꞌajt. Com tɨ paady je xɨɨ je tiempo mɨna Dios yꞌung naybadáanɨgɨxp tümugáanɨgɨxp mɨɨd yɨꞌ yjäy, tɨm jaduꞌn nej jɨhuɨ̈y ypɨgaꞌñ mɨɨd yɨꞌ ajcxy. Tɨ Cristo yjäy ñayñiꞌixɨ́ɨyɨgɨxy, jaydëbɨ ñaybáatɨgɨxɨp ytügmújccɨxɨp mɨɨd yɨꞌ, tɨm jaduꞌn nej tüg jäy ñayxoxyii co ypɨgaꞌñ.
\q
\v 8 Dios tɨ aꞌɨxɨ̈y co Cristo yjäy ajcxy ñayxoxɨɨyb mɨɨd yhuit oyjatypɨ, huɨdibɨ adɨɨcxp ajajp.
\m
Je huit xojx oyjatypɨ jaduꞌn nipaady nej je tudägyꞌajtɨn huɨdibɨ je mɨbɨjcpɨdɨjc tɨ paatcɨxy ma Dios.
\p
\v 9 Chi je ángel xyñɨmaayɨch:
\p
―Jaay jada ayuc. “Jotcujc ajcxy pɨnjaty huooyɨp ma yajhuinxɨɨdunaꞌñ Dios yꞌung, je Cordero, co naydügmugáanɨgɨxy mɨɨd yɨꞌ yjäy ajcxy.”
\p
Chi je ángel xyñɨmaayɨch:
\p
―Jada jeꞌ Dios yꞌayuc janchypɨ.
\p
\v 10  Chi ngojxtɨnayꞌɨhuɨɨyɨch ma je ángel yhuinduu co njahuindzɨgɨ̈huaañɨch. Chi jeꞌ xyñɨmaayɨch:
\p
―Caꞌ jaduꞌn mꞌɨdɨ̈ch. Dios ɨɨch xytumbɨꞌajtp jaduꞌn nej miich etz nej jacjadyii mɨgügtɨjc huɨdibɨ mɨjpɨdaaccɨxp cɨxyjot huinɨjot je ayuc tɨyꞌajt janchypɨ huɨdibɨ Jesús ycapxhuäcx. Huindzɨgɨꞌ Dios.
\p Jadayaabɨ ayuc tɨyꞌajt janchypɨ huɨdibɨ Jesús ñidɨyꞌajtꞌajt, yɨꞌ jeꞌ je Dios yꞌayuc huɨdibɨ je profetas ajcxy ñajtzcapxɨɨy.
\s Je mɨjꞌaneꞌmbɨ huɨdibɨ poobcohuay yajꞌɨñaayb
\p
\v 11 Chi nhuinꞌijxyɨch tzajpꞌahuädz, chi yquëxɨ̈gy tüg poobcohuay, e je pɨn anajty yajꞌɨñaayb hueꞌ anajty naydijyii je tudägypɨ je janchypɨ. Je huɨdibɨ tɨydumb naaxhuiñyjäy mɨɨd tudägyꞌajtɨn etz huɨdibɨ tziptumb mɨɨd tudägyꞌajtɨn.
\v 12 E jeꞌ huɨdibɨ yajꞌɨñaayb je poobcohuay, jeꞌ yhuiin jaduꞌn jeꞌ nej jɨɨnyeꞌn, e ymɨɨd anajty ma ycohuajc maycoronɨ huɨdibɨ nidɨyꞌajtꞌajtp co yreyꞌaty ma tügꞌócɨy jäy. E jeꞌ ymɨɨd anajty tüg xɨɨ cojaay, e jeꞌ anajty naydügpajc nejhuɨɨyb yxɨɨ caꞌ jac pɨn.
\v 13 Hueꞌ anajty yxoxyɨty mɨɨd huit yꞌuucyɨty mɨɨd nɨꞌpy, e jeꞌ yxɨɨ hueꞌ anajty xɨɨꞌadyii Dios yꞌayuc.
\v 14 Je ángeles ajcxy huɨdibɨ soldadꞌajtp tzajpjoty ypayöyii anajty ajcxy ac poobcohuaygɨxpɨ, yxoxyɨty ajcxy mɨɨd sedɨ huit janch oybɨ, poobɨ etz huätzpɨ.
\v 15 Je huɨdibɨ yajꞌɨñaayb je poobcohuay, ma yɨꞌ yꞌahuac ypɨdzɨmy anajty tüg espada janch jɨjpɨ, e jeꞌ mɨɨd yajtzaachɨ̈huaꞌñ je maynaaxhuiñyjäy. E jeꞌ aneꞌmaꞌñ mɨɨd Dios ymɨcꞌajt. E mɨɨd yɨꞌ yꞌayuc castigɨ möhuaꞌñ je mayjäy mɨɨd ypocy ycɨxpɨ huɨdibɨ tzɨnaayb ma je may it lugar ya naaxhuiñ. Yɨꞌ yꞌayuc jaduꞌn yɨꞌ nej tüg espada janch jɨjpɨ. E yɨꞌ mɨɨdꞌadaanɨp je mɨjpɨ Dios chip yꞌejcɨn, je Dios huɨdibɨ tügꞌócɨy mɨcꞌajt mɨɨd. E mɨctägy tzaachypɨ castigɨ yegaꞌñ ma je mayñaaxhuiñyjäy mɨɨd ypocy ycɨxpɨ, jaduꞌn je maynaaxhuiñyjäy nipaady nej jɨhuɨ̈y Dios yꞌung tenmɨcx uvas mɨɨd ytecy.
\v 16 E ymɨɨd anajty cojaay ma yhuit etz ma ypuy jadayaabɨ ayuc: “Reydɨjc ajcxy yrey. Huindzɨndɨjc ajcxy yHuindzɨn.”
\p
\v 17 Huinꞌit nhuinꞌijxyɨch tüg ángel ytɨnäy xɨɨꞌagujc, chi ooy janch mɨc mɨyaaxy tügꞌócɨy je joon huɨdijaty queec-huɨdijtp tzajpcujc ymɨnañ:
\p
―Miingɨx naymujctáayɨgɨx ma Dios adzuuꞌɨ̈bɨ yecy.
\v 18 Miingɨx, jɨgɨx mdzüdzcɨxɨpy reydɨjc ajcxy ñinïcx, capitán ajcxy etz mɨcjäydɨjc ajcxy ñinïcx, cohuay chüch etz nañ jaduꞌn jeꞌ ajcxy ñinïcx huɨdibɨ yajꞌɨñaayb. Mdzüdzɨp tügꞌócɨy jäy ñinïcx: tumbɨdɨjc mɨdumbɨdɨjc, je huindzɨndɨjc, comeeñydɨjc etz je ayoobɨdɨjc. 
\p
\v 19 Chi nhuinꞌijxyɨch je caꞌoyꞌɨyujc etz je rey ajcxy huɨdibɨ yajpatp ya naaxhuiñ mɨɨd tügꞌócɨy ypubejtpɨdɨjc ysoldadotɨjc ajcxy. Nhuinꞌijxyɨch co tɨ ñayyöymújcɨgɨxy co chiptunaangɨxy mɨdziptzonaangɨxy je huɨdibɨ poobcohuay yajꞌɨñaayb quipxyɨ mɨɨd jeꞌ ypubejtpɨdɨjc ysoldadtɨjc ajcxy.
\v 20 Chi je caꞌoyꞌɨyujc ymachycäy quipxyɨ mɨɨd je profeta caꞌpɨ yjanchɨty, je tɨɨbɨ anajty tuñ mɨjhuinmaꞌñ ma je caꞌoyꞌɨyujc yhuinduu. Mɨɨd je mɨjhuinmaꞌñ ycɨxpɨ je profeta, caꞌpɨy yjanchɨty, tɨ anajty ooy huinꞌɨɨñ tügꞌócɨy je huɨdijaty ajcxy nayyejcɨ co je caꞌoyꞌɨyujc ytɨyꞌajt ijxpejt cöbɨjcɨ ma yhuimboc etz co huindzɨgɨɨyɨ je ñïdzejtztuutɨn. Jaduꞌn je caꞌoyꞌɨyujc etz je profeta, caꞌpɨy yjanchɨty, yajcötijnajxy ajcxy ma jɨɨn ytoy mɨɨd azufre, jaduꞌn je jɨɨn nej tüg mejy huädz jɨɨn.
\v 21 Jacjadyii jäy hueꞌ ajcxy oꞌcɨn patcɨxy mɨɨd espada huɨdibɨ anajty pɨdzɨmb ma jeꞌ yꞌahuac je huɨdibɨ anajty poobcohuay yajꞌɨñaayb. E tügꞌócɨy je joon etz luud huɨdibɨ ajcxy queec-huɨdijtp cɨjx jeꞌ ajcxy ytɨmycuuxtáayɨgɨxy ytɨmypejttáayɨgɨxy mɨɨd may öcpɨ chüch.
\c 20
\s Je mil jɨmɨjtpɨ 
\p
\v 1 Huinꞌit nhuinꞌijxyɨch tüg ángel ycɨdägy chooñ tzajpjoty mɨɨdɨty je ahuastɨ huɨdibɨ mɨɨd yajꞌahuäch je mɨj jut huɨdibɨ oy ycɨɨcyɨty, ymɨɨd anajty nañ jaduꞌn tüg mɨjcadena ma ycɨꞌ. 
\v 2 Jadayaabɨ ángel majch je amaꞌy tzaꞌñ huɨdibɨ yajtijp mujcuꞌ etz Satanás, chi yajcadenɨtɨgɨɨy, e yajhuɨꞌmy mach tüg mil jɨmɨjt. 
\v 3 Chi je ángel cötijnajxy je mujcuꞌ ma je mɨj jut, chi cöꞌagɨɨy. Chi tüg sellɨ pɨdacy ma je mɨj jut aguu. Pɨdacy je mujcuꞌ ma je mɨj jut, caꞌydɨ jac-huinꞌɨɨñ je mayñaaxhuiñyjäy, ixtɨ coonɨ tüg mil jɨmɨjt ycaꞌpxɨpy. E co jaduꞌn anajty mil jɨmɨjt tɨ ñaxy, ooy ycopɨcyɨty co yajnajtzmadzɨ̈huɨpy je mujcuꞌ tzojccɨ́xy. 
\p
\v 4 Chi canaag aneꞌmdac nhuinꞌijxyɨch ma anajty ajcxy ɨñäy tɨɨbɨ ajcxy patcɨxy cötujcɨn co tɨydúngɨxɨpy naaxhuiñyjäy. Nañ jaduꞌn nhuinꞌijxyɨch ajcxy yꞌalma huɨdibɨ anajty ajcxy tɨ yajyöctzujctuutcɨxy mɨɨd co ajcxy capxhuäcxy je Dios yꞌayuc ytɨyꞌajt huɨdibɨ Jesús ñidɨyꞌajtꞌajt. Caꞌp jeꞌ ajcxy anajty huindzɨgɨɨygɨxy je caꞌoyꞌɨyujc, ni jeꞌ ñïdzejtztuutɨn. E nañ jaduꞌn ni caꞌ ajcxy cöbɨjcɨ je caꞌoyꞌɨyujc ytɨyꞌajt ma yhuimboc ni ma ycɨꞌ. Co ajcxy yꞌoꞌcy, chi yjugypɨgɨpy ajcxy jadügꞌoc etz aneꞌmɨp ajcxy quipxyɨ mɨɨd Cristo tüg mil jɨmɨjt.
\v 5 Je jacjadyii je öcpɨ, huɨdibɨ caꞌp mɨjpɨdacy Cristo, caꞌ jeꞌ ajcxy yjugypɨgɨpy, ixtɨ coonɨ anajty tɨ ñaxy tüg mil jɨmɨjt huinꞌítnɨ. Co tügꞌócɨy je mɨbɨjcpɨdɨjc yjugypɨgɨpy jadügꞌoc, jada jeꞌ je ogáꞌnɨbɨ tiempo mɨna öcpɨ ajcxy yjugypɨjccɨxy, e caꞌ yꞌocꞌóꞌccɨxnɨp jadügtecy. 
\v 6 Jotcujc etz huädz, caꞌ tibocy mɨɨdɨty, jeꞌ ajcxy öcpɨdɨjc huɨdibɨ jugypɨgɨpy co Jesús yajjugypɨgɨpy yɨ tügpɨcy öcpɨ huɨdibɨ jayɨjpꞌadamb. Je mɨmetzpɨ oꞌcɨn caꞌ ni ti mɨcꞌajt mɨɨdɨty ma jeꞌ ajcxy. Hueꞌ janch ajcxy ytungꞌadɨɨyb huingapxɨɨ ma Dios etz Cristo. E jeꞌ ajcxy Cristo quipxy mɨɨd yꞌaneꞌmɨp tüg mil jɨmɨjt.
\p
\v 7 Co anajty tɨ ñaxy je mil jɨmɨjt, huinꞌit je Satanás yajcoguejttüdɨpy ma ymachꞌity.
\v 8 Chi Satanás nɨcxy huinꞌɨɨñ je 
mayñaaxhuiñyjäy huinduꞌmybɨ ñaaxhuiñ. Jeꞌ nɨcxy huinꞌɨɨñ Gog jäy etz Magog jäy. E yɨꞌ ajcxy yꞌaneꞌmbɨdɨjc yajmujctähuaꞌñ soldado ajcxy, jɨgɨx chiptúngɨxɨpy mɨɨd je Dios yꞌung. Jaduꞌn jeꞌ ajcxy soldados ymayɨty jaduꞌn nej puꞌ ymayɨty huɨdibɨ mejypäꞌám.
\v 9 E jaduꞌn ajcxy ypedɨɨy ma ymɨjhuiinɨty naax, chi ajcxy yajnaadujcy je it ma chɨnaaygɨxy huɨdibɨ Dios tɨ huinꞌíjxɨgɨxy etz yajnaadujccɨxy je ciudad huɨdibɨ Dios chojcpy. Chi Dios quejxy jɨɨn huɨdibɨ tzoomb tzajpjoty, huɨdibɨ oy ñöcɨgɨxy huädz huädz je may soldados  ajcxy.
\v 10 Je mujcuꞌ, huɨdibɨ anajty tɨ huinꞌɨɨñ je mayjäy, oy yajcötijnaxy ma je mɨj jɨɨn ytoy mɨɨd azufre. Ma anajty tɨ yajcötijnaxy je caꞌoyꞌɨyujc etz je profeta, caꞌpɨy yjanchɨty. Jiiby jeꞌ ajcxy ayoꞌn tzaachypɨ paadɨpy xɨɨm tzuum huinɨxɨɨ huinɨtiempo.
\s Je tɨyduunɨn ma je mɨjꞌaneꞌmbɨ yhuinduu
\p
\v 11 Nhuinꞌijxyɨch tüg mɨjꞌaneꞌmdac janch poob, mɨɨd je huɨdibɨ anajty ɨñaayb ma jeꞌ. Ma jeꞌ yhuinduu naax etz tzajp queectɨgoyday yajxon, ni caꞌ yꞌocyajpatnɨ it lugar ma je naax etz tzajp yꞌíjtcɨxɨpy.
\v 12 Chi nhuinꞌijxyɨch je öcpɨ ajcxy, mɨjꞌanäcpɨ mutzꞌanäcpɨ, ytɨnaaygɨxy ma Dios yhuinduu. Chi yajcɨyhuäcxtay maylibro. E nañ jaduꞌn yajcɨyhuäcxy jadüg libro huɨdibɨ mɨɨd je jäy yxɨɨ cojay huɨdijaty ajcxy jugyꞌajtɨn huinɨxɨɨ mɨɨd. Chi jeꞌ ajcxy yajtɨyduñ je öcpɨ ajcxy nej anajty ajcxy tɨ chɨnaaygɨxy ya naaxhuiñ, jaduꞌn nej yjaybetyɨty ma je maylibro.
\v 13 Je mejy ycɨ̈yejctay jeꞌ je öcpɨ ajcxy huɨdibɨ anajty jiiby yajpatp. E je oꞌcɨn etz je öcpɨjut ycɨ̈yejctay jeꞌ je öcpɨ huɨdibɨ jiiby yajpatp, e tügꞌócɨy jeꞌ yajtɨydunday nidüg nidüg nej anajty tɨ chɨnaaygɨxy.
\v 14 Je oꞌcɨn etz je it ma je öcpɨ yꞌity yajnajtztijɨyday jɨɨnjoty ma je mɨjjɨɨn ytoy. Jeꞌ jeꞌ je mɨmetzpɨ oꞌcɨn ma je mɨjjɨɨn ytoy.
\v 15 E huɨdijaty anajty ajcxy caꞌ yxɨɨ ymiiñ ma je libro huɨdibɨ jugyꞌajtɨn huinɨxɨɨbɨ mɨɨd, hueꞌ jeꞌ ajcxy yajnajtztijɨy jɨɨnjoty ma je mɨjjɨɨn ytoy.
\c 21
\p
\v 1 Huinꞌit nhuinꞌijxyɨch tüg tzajp jemybɨ etz tüg naax jemybɨ, com je jayɨjpɨ tzajp etz je jayɨjpɨ naax tɨ jeꞌ anajty ytɨgoydäy, e ni ma anajty mejy ycacädy. 
\v 2 Ɨɨch, Juan, nhuinꞌijxyɨch je ciudad huätzpɨ jemybɨ, je Jerusalén, ycɨdägy anajty chooñ tzajpjoty ma Dios yajpaady, janch oyduñ anajty, jaduꞌn nej tüg töxyjäy ñayꞌoyduñyii ñayxoxyii co ypɨgaꞌñ mɨɨd yëydɨjc.
\v 3 Nmɨdoohuɨch tüg ayuc mɨcpɨ chooñ anajty tzajpjoty, e ymɨnañ:
\p
―Cuendɨtun ɨɨch nꞌayuc. Dios tzɨnaydac pɨgamb ma naaxhuiñyjäy ajcxy. Yɨꞌ tzɨnähuɨpy mɨɨd yɨꞌ ajcxy, e yɨꞌ ajcxy Dios yjäyꞌadɨɨyb. E Dios cɨꞌm idaamb mɨɨd yɨꞌ ajcxy jɨgɨx yɨꞌ ajcxy Diosꞌadɨɨyb.
\v 4 Dios yajquëgɨɨb ajcxy ytajɨn ymayɨn etz yajtɨ̈dzɨɨb ajcxy yhuinnɨɨ, e caꞌp yjadɨɨb oꞌcɨn ni jɨyɨn ni yaaxɨn, ni jotmay, ni pɨn ycajɨhuɨ̈huɨp je juꞌpɨn je paꞌmɨn. Com je huɨdibɨ anajty ijtnaayb, tɨ jeꞌ ñaxy.
\p
\v 5 Huinꞌit jeꞌ ymɨnañ huɨdibɨ anajty ɨñaayb ma je mɨjꞌaneꞌmdacɨn:
\p
―Cuendɨtungɨx ɨɨch nꞌayuc. Huinjemy ngojtɨgadzaꞌñɨch tügꞌócɨy huɨdibɨ jiiꞌijtp.
\p
Nañ jaduꞌn ymɨnañ:
\p
―Jaay jada ayuc. Com jadayaabɨ ayuc ooy jada yjanchɨty, e ooy yɨꞌ jotꞌamɨjꞌajt mɨɨdɨty.
\p
\v 6 
Huinꞌit je mɨjꞌaneꞌmbɨ xyñɨmaayɨch:
\p
―Tɨ tügꞌócɨy ytunyii yjadyii. Ɨɨch jeꞌ nyajtzondacp tügꞌócɨy tijaty, etz ɨɨch nyajcogɨxɨɨyb tügꞌócɨy tijaty, tɨm jaduꞌn nej je letra A huɨdibɨ yajtzondacp je alfabeto etz je letra Z huɨdibɨ yajcogɨxɨɨyb je alfabeto. Pɨnjaty tzojcp jemybɨ jugyꞌajtɨn ɨɨch yɨꞌ nmöhuɨp. Jaduꞌn nipaady nej jɨhuɨ̈y ajcxy ytɨdzɨ́ɨyɨgɨxy, e nyajꞌügɨch ma ymuxy je nɨɨ huɨdibɨ yejcp jugyꞌajtɨn, ni caꞌ ajcxy mɨmeeñyduunɨp ni jaduꞌñɨ.
\v 7 Pɨnjaty mɨmadactaayb jɨbɨc-huinmaꞌñ etz pocytunɨɨ, yɨꞌ jeꞌ cɨ̈dɨgɨ̈huɨɨb huɨdibɨ njëꞌajtpy, e ɨɨch yɨꞌ xyDiosꞌadɨɨb, e yɨꞌ ɨɨch nꞌungꞌadɨɨyb. 
\v 8 Je huindzɨ̈cytɨjc ajcxy, pɨnjaty caꞌ ymɨbɨcy ɨɨch ndɨyꞌajt, pɨnjaty tumb huɨdibɨ caꞌ yꞌoyjäygɨdaacnɨty, pɨnjaty jäy yajꞌöcp, pɨnjaty mɨgapxtɨgooyb töxyjäydɨjc, pɨnjaty tumb capxpogɨɨ, pɨnjaty mɨjpɨdacp huijyjäy yhuinmaꞌñ, pɨnjaty huindzɨgɨɨyb quipychech tzaadzech, etz pɨnjaty anɨɨdacp, jeꞌ ajcxy nidügꞌócɨy nibɨdzɨmɨɨb ñɨcxɨpy ma mɨjjɨɨn ytoy mɨɨd azufre, huɨdibɨ quëxɨ̈cp nej jɨɨnmejy. Jeꞌ jeꞌ je mɨmetzpɨ oꞌcɨn. 
\s Yɨ jemybɨ Jerusalén
\p
\v 9 Huinꞌit nidüg ángel je nihuixtujcpɨ huɨdibɨ anajty mɨɨd huixtujc tasɨ ujtzjatypɨ mɨɨd je huixtujcpɨ ayoꞌn tzaachypɨ huɨdibɨ jacꞌaxam tunaanɨp jadaanɨp, jeꞌ xyñɨmaayɨch:
\p
―Min, e cham nyajniꞌixɨ̈huaꞌñ je mɨbɨjcpɨdɨjc huɨdibɨ tügmugamb mɨɨd Dios yꞌung, je Cordero, jaduꞌn nej tüg yëydɨjc ytügmucy mɨɨd ytöxyɨjc co ajcxy ypɨcy.
\p
\v 10 Je huɨdibɨ Dios yjɨhuɨꞌñ ymɨcꞌajt xyajꞌijxɨch cumäyjoty, chi je ángel cümäyjoty xyajnɨcxyɨch ma tüg cop mɨjpɨ etz cɨxpɨ, chi xyajꞌijxyɨch je mɨjpɨ ciudad santa. Je ciudad santa hueꞌ jeꞌ yxɨɨ Jerusalén, e ycɨdägy anajty chooñ tzajpjoty jiiby ma Dios yajpaady.
\v 11 Je mɨj ciudad santa janch adɨɨcxp jeꞌ anajty mɨɨd Dios yꞌoyꞌajtɨn. Jɨm jaduꞌn anajty yꞌadɨɨcxy nej tüg tzaa janch oybɨ nej mármol, janch yajꞌijxnajxp nej ijxɨn.
\v 12 Jühuɨdityɨ anajty mɨɨdɨty je ciudad santo ac poch janch mɨj etz cɨxy. Je poch ymɨɨd anajty majmetz yꞌaguu. E ma je majmetzpɨ yꞌaguu majmetz ángel ajcxy yꞌijtcɨxy, tügpɨ ángel ma tügjaty ciudad aguu. Etz yjaybetyɨty jeꞌ ajcxy yxɨɨ je majmetzpɨ Israel tribu, tügpɨ tribu yxɨɨ yjaybetyɨty ma tüg tüg poch yꞌaguu.
\v 13 Tugɨɨg anajty yꞌaguu mɨɨdɨty xɨɨbɨdzɨmꞌamy, tugɨɨg yꞌaguu ma tɨchypoj ymiinɨɨy, tugɨɨg yꞌaguu ma jɨɨnboj ymiinɨɨyɨn, etz jatugɨɨg yꞌaguu ma xɨɨgɨdägyꞌamy. 
\v 14 Je poch huɨdibɨ anajty ymɨɨd je cajp, ymɨɨd anajty majmetz tzaa huɨdibɨ yꞌɨjxꞌajtɨp, e majmetzpɨ tzaa ymɨɨd anajty cojaay je nimajmetzpɨ apóstoles ajcxy yxɨɨ huɨdibɨ Jesús, je Cordero, yhuinꞌijx, tügpɨ apóstol yxɨɨ ma tüg tüg tzaa.
\p
\v 15 Je ángel huɨdibɨ anajty mɨydacp mɨɨd ɨɨch, ymɨɨd anajty tüg quipx ac tɨm oorɨ jeꞌ anajty. Jeꞌ anajty mɨɨd quipxaꞌñ je cajp, je poch yꞌaguu, etz je poch.
\v 16 Je cajp, je ciudad, hueꞌ jeꞌ anajty cuadradɨ; nej anajty yoñꞌajt, nañ jaduꞌn anajty yꞌagonꞌajt, etz nañ jaduꞌn ycɨxꞌajt. Chi je ángel quipxy je ciudad santa mɨɨd jeꞌ yquipx. E hueꞌ quipxy mejtz mil jamejtz mɨgoꞌpx kilómetros, yꞌayoñꞌajtɨn ycɨxꞌajtɨn etz yꞌagonꞌajtɨn quipxyjaty jeꞌ anajty.
\v 17 Huinꞌit je ángel quipxy je poch, hueꞌ quipxy mɨgoꞌpx jahuixchɨguïpx mɨdaax cɨ̈nuux, jaduꞌn nej naaxhuiñyjäy ajcxy ycɨ̈nuux, huɨdi je ángel yajtumyb.
\p
\v 18 Je poch hueꞌ jeꞌ anajty ypochɨty mɨɨd tzaa oyjatypɨ, e je cajp hueꞌ jeꞌ anajty ac tɨm oorɨ, yguëxɨ̈gy nej ijx huätzpɨ. 
\v 19-20 Je tzaa huɨdibɨ je poch yꞌɨjxꞌajtɨp hueꞌ jeꞌ anajty yꞌoyduñɨty huɨdi mɨɨd yꞌoyguëxɨ̈gy, tzaa janch oyjatypɨ canaagnax color. Je jayɨjpɨ poch yꞌɨjx hueꞌ anajty yꞌoyduñɨty mɨɨd jaspe tzaa, je mɨmetzpɨ poch yꞌoyduñɨty mɨɨd safiro tzaa, je mɨdugɨɨgpɨ poch yꞌoyduñɨty mɨɨd ágate tzaa, je mɨmadaaxpɨ yꞌoyduñɨty mɨɨd esmeralda tzaa, je mɨmɨgooxpɨ poch yꞌoyduñɨty mɨɨd ónice tzaa, je mɨdudujcpɨ poch yꞌoyduñɨty mɨɨd coralina tzaa, je mɨhuixtujcpɨ poch yꞌoyduñɨty mɨɨd crisólito tzaa, je mɨtuctujcpɨ poch yꞌoyduñɨty mɨɨd berilo tzaa, je mɨdaxtujcpɨ poch yꞌoyduñɨty mɨɨd jacinto tzaa, je mɨmajmetzpɨ poch yꞌoyduñɨty mɨɨd amatista tzaa.
\v 21 Je majmetzpɨ pochꞌaguu hueꞌ
 anajty yꞌoyduñɨty mɨɨd tügpɨ perla. E je mɨjtuꞌ huɨdibɨ najxp cajpcujc hueꞌ yꞌoyɨɨy mɨɨd oorɨ huätzpɨ, e yquëxɨ̈gy nej vidrio huätzpɨ yajꞌijxnajxp.
\p
\v 22 Ma je Jerusalén cajp jemybɨ caꞌp nhuinꞌijxyɨch ni tüg templo, ni tüg tɨjc ma jäy ajcxy Dios ojadajtcɨxy. Com je Huindzɨn Dios, yɨ huɨdibɨ tügpajc mɨjɨp, etz jeꞌ yꞌung, je Cordero, jaduꞌn yɨꞌ ajcxy nipaady nej tüg templo nej tüg it ma mayjäy ajcxy yꞌojadájtɨgɨxy Dios etz jeꞌ yꞌung.
\v 23 Je jemybɨ Jerusalén caꞌp jeꞌ anajty yajmayjaty xɨɨ poꞌ huɨdibɨ yajꞌanɨ̈huɨp yajtɨɨcxɨ̈huɨp je ciudad, com je Dios yꞌoyꞌajtɨn etz jeꞌ yꞌung yꞌoyꞌajtɨn yɨꞌ jeꞌ ajcxy nej je tɨɨcxɨn jajɨn huɨdibɨ amb tɨɨcxp ma je Jerusalén jemybɨ.
\v 24 Je mayñaaxhuiñyjäy huɨdibɨ tɨ patcɨxy yꞌalma nïdzoocɨn naxɨ́py tɨgɨ̈huɨpy ajcxy mɨɨd je jemybɨ Jerusalén ytɨɨcxɨn yjajɨn huɨdi anajty tɨ ymöyii. Je aneꞌmbɨdɨjc ajcxy ya naaxhuiñ ymɨmiinɨpy ajcxy mɨjꞌajt, oyꞌajt, etz cömayꞌajt ma je jemybɨ Jerusalén.
\v 25 E je cajp aguu ni camɨna jeꞌ agɨ̈y ycaꞌidɨpy xɨɨm, com jɨm caꞌ jɨm ycoodzꞌidɨpy, paady ni mɨna ycaꞌagɨꞌ yꞌidɨpy.
\v 26 Jɨm je naaxhuiñyjäy, canaag agajp, mɨnɨcxɨp ajcxy ymɨjꞌajt yꞌoyꞌajt ycömayꞌajt ma je Jerusaléngajp, je jemybɨ.
\v 27 Caꞌp jɨm ytɨgɨ̈huɨpy ni pɨn huɨdibɨ caꞌ ypocyñïhuächñɨ, ni pɨn huɨdibɨ  tumb caꞌpɨ yꞌoyjäygɨdaacnɨty, etz huɨdijaty jäy huinꞌɨɨmb. Jëyɨ jɨm tɨgɨ̈huɨp pɨnjaty ijtp yxɨɨ cojay ma je libro huɨdibɨ Dios yꞌung, je Cordero, ymɨɨd, ma cojay yꞌity je jäy ajcxy yxɨɨ huɨdibɨ ymɨɨd jugyꞌajtɨn huinɨxɨɨbɨ.
\c 22
\p
\v 1 Huinꞌit je ángel xyajniꞌixɨɨyɨch tüg mɨjnɨɨ huätzpɨ, je nɨɨ huɨdibɨ yejcp jugyꞌajt huɨdibɨ caꞌ ycɨxɨp ytɨgoyɨp. Janch huädz janch tɨɨcx jeꞌ anajty je nɨɨ nej tüg ijxɨn. E je nɨɨ jɨm anajty ymuxy ma Dios etz je Cordero yꞌaneꞌmdac.
\v 2 Jada mɨj nɨɨ hueꞌ jeꞌ anajty ñaxy cuidad mɨjtügujc, etz ma je mejtzꞌaduꞌmꞌamybɨ mɨjnɨɨbaꞌ, jɨm anajty je quipy huɨdibɨ jugyꞌajt mɨɨd, huɨdibɨ tɨɨmꞌajt majmetzꞌoc tügpɨ jɨmɨjt, poꞌ poꞌ ytɨɨmꞌaty, e je quipy yꞌaay hueꞌ anajty ytuñ jɨgɨx huaad naaxhuiñyjäy chooccɨxy.
\v 3 Caꞌp jɨm yꞌadɨpy ni ti ayoꞌn ni ti jotmay mɨɨd pocytunɨɨ ycɨxpɨ. Je Dios etz jeꞌ yꞌung jeꞌ jɨm yꞌaneꞌmdac ycötujctac yajpaadɨpy. E jeꞌ ytumbɨdɨjc jeꞌ ajcxy jɨm yajmɨjꞌadɨɨb ojadadɨɨb.
\v 4 Yꞌijxɨpy ajcxy je Dios yꞌung yhuiñyjɨjp etz ymɨnɨcxɨp ajcxy jeꞌ yxɨɨ ycojay ma ajcxy yhuimboc.
\v 5 Caꞌp jɨm ycootzɨ̈huɨty. E pɨnjaty jɨm tzɨnaayb caꞌp ajcxy yajmayjadɨpy linterna jɨɨn, lamparajɨɨn, ni xɨɨdɨɨcxpɨ, com Dios ɨɨch ajt nHuindzɨn yɨꞌ yɨꞌ ajcxy codɨɨcxɨɨb. Je Huindzɨn Dios etz jeꞌ yꞌung jeꞌ ajcxy jɨm aneꞌmɨp huinɨxɨɨ huinɨtiempo.
\s Huingoonɨñ yɨ Jesucristo yminꞌaa
\p
\v 6 Huinꞌit je ángel xyñɨmaayɨch:
\p
―Jadayaabɨ ayuc tɨyꞌajt ma jada necy, ooy jada yjanchɨty, e jëbɨ miich myajmɨjꞌadɨpy. Je Huindzɨn, je Dios huɨdibɨ ayuc moy je profetas ajcxy jecyꞌajty, quejxy yꞌángel jɨgɨx  yajniꞌixɨ̈huɨpy jeꞌ ytumbɨdɨjc tijaty tzojc tunaanɨp jadaanɨp.
\p
\v 7 Jesucristo jaduꞌn ymɨnañ: 
\p
―¡Miimbɨch tzojc! Jotcujc pɨnjaty tumb cuendɨ etz cuydumb Dios yꞌayuc ytɨyꞌajt huɨdibɨ jaybetyɨp ma jada libro.
\p
\v 8 Ɨɨch Juan, nmɨdoohuɨch etz nhuinꞌijxɨch jadayaabɨ huɨdibɨ jaybety ma jada necy. E co oy jaduꞌn nhuinꞌixyɨch, chi nhuɨjojꞌɨhuɨɨyɨch ma je ángel ytecymɨjc huɨdibɨ anajty yam xyajniꞌixɨɨybɨch.
\v 9 Chi jeꞌ xyñɨmaayɨch:
\p
―Caꞌ jaduꞌn mꞌɨdɨ̈ch. Ɨɨch, Dios xytumbɨꞌajtp jaduꞌn nej miich etz jacjadyii mɨgügtɨjc huɨdibɨ Dios yꞌayuc najtzcapxɨɨyɨp, e tügꞌócɨy pɨnjaty tumb cuendɨ huɨdibɨ jaybetyɨp ma jada necy. Huindzɨgɨꞌ etz ojadat Dios.
\p
\v 10 Chi jeꞌ xyñɨmaayɨch:
\p
―Capxhuäcxɨ je Dios yꞌayuc huɨdibɨ tɨ mjay ma jada necy, caꞌ myüdzɨp. Com tɨ yhuingoñ je tiempo mɨna Dios cuydunaꞌñ yɨ yꞌayuc huɨdibɨ yjayhuɨꞌm ma jada necy.
\v 11 Pɨnjaty caꞌ ytudägyɨty, huen jaduꞌn jacyajpaady mɨɨd ycatudägyꞌajt. Pɨnjaty jɨbɨcjot 
jɨbɨc-huinmaꞌñ tumb, huen nïgɨ jɨbɨcjot jɨbɨc-huinmaꞌñ tuñ. E pɨnjaty tudägyɨ tumb, huen jactuñ tudägyꞌajtɨn. Pɨnjaty huädz yjot huädz yhuinmaꞌñ mɨɨd, huen huädz yjot huädz yhuinmaꞌñ jacmɨꞌity ma Dios.
\p
\v 12 Chi je Cristo ymɨnañ:
\p
―Tɨmetiinɨ nhuimbidɨpyɨch jadügꞌoc naaxhuiñ. Co anajty tɨ nmiiñɨch, huinꞌit nyajjotcugɨ̈huɨbɨch pɨnjaty oybɨ tɨ tuñ, e ndzaachytunɨpyɨch pɨnjaty jɨbɨcpɨ tɨ tuñ. 
\v 13 Ɨɨch jeꞌ tɨ njayɨjpꞌatyɨch ya naaxhuiñ, etz ɨɨch jeꞌ cogɨxɨ̈huamb, tɨm jaduꞌn nej je letra A chondägy ma je alfabeto etz je letra Z ycogɨxɨ̈y ma je alfabeto. Ɨɨch tɨ nyajtzondacyɨch je naaxhuiñ etz nyajcɨxɨpyɨch.
\p
\v 14 Jotcujc ajcxy pɨnjaty tɨ ypocyñïhuäch, jaduꞌn nipaady nej ajcxy yhuit tɨ pujcɨxy e mɨɨd ajcxy yhuit huätzpɨ. Com tɨ ajcxy ypocyñïhuaatzcɨxy, paady jëbɨ jɨ́ɨcxcɨxɨp je ujtz tzaꞌm huɨdibɨ jugyꞌajt yejcpy huɨdibɨ caꞌ ycɨxɨpy ytɨgoyɨpy ni mɨna, e jaduꞌn jëbɨ ytɨgɨ̈y ma je jemybɨ Jerusaléngajp.
\v 15 Dios caꞌ yɨꞌ ajcxy cöbɨgaꞌñ ma je jemybɨ Jerusalén etz huɨꞌmɨp ajcxy cajppaꞌ tügꞌócɨy pɨnjaty huɨdibɨ 
jɨbɨc-huinmaꞌñ mɨɨd, pɨnjaty caꞌ mɨbɨcy Dios, pɨnjaty mɨjpɨdacp huijyjäy yhuinmaꞌñ brujo yhuinmaꞌñ, pɨnjaty ajcxy mɨgapxtɨgooyb mɨdundɨgooyb töxyjäydɨjc, pɨnjaty ajcxy jäy yajꞌöcp, pɨnjaty ajcxy huindzɨgɨɨyb quipychech tzaachech, etz tügꞌócɨy pɨnjaty tzachnixondacp anɨɨ ayuc. 
\p
\v 16 Ɨɨch Jesús huɨdibɨ capxp. Tɨ nguexyɨch nꞌángel ma miich jɨgɨx jada tɨyꞌajt capxtɨ̈cxɨpy majaty mɨbɨjcpɨdɨjc ma tüg tüg cajp. Ɨɨch jeꞌ ijxꞌajtp copꞌajtp ma je rey David miiñ. Etz ɨɨch jeꞌ nmɨjꞌapꞌajtpyɨch nmɨjteedyꞌajtpyɨch je rey David. Jaduꞌn ɨɨch nipaady nej je mɨjmadzaꞌ huɨdibɨ yajtijp jayxɨɨm.
\p
\v 17 Je Espíritu Santo etz je mɨbɨjcpɨdɨjc huɨdibɨ jaduꞌn nipatp nej Cristo ytöxyɨjc ymɨnaangɨxy:
\p
―Min ma Jesucristo.
\p
E pɨn amɨdooꞌijtp ɨɨch nꞌayuc ymɨnáangɨxɨpy:
\p
―Min ma Jesucristo.
\p
E pɨn tzojcp jugyꞌajtɨn huɨdibɨ caꞌ ycɨxɨpy ytɨgoyɨpy nimɨna, jaduꞌn nej jɨhuɨ̈y ytɨdzɨ̈yii e tzocy jada nɨɨ, huen miiñ, e nmöhuɨbyɨch jugyꞌajtɨn, jaduꞌn nej jɨhuɨ̈y nyajnɨɨꞌügɨch je nɨɨ huɨdibɨ jugyꞌajtɨn mɨɨd e ni caꞌ mɨmeeñydunɨpy ni jaduꞌñyɨ.
\p
\v 18 Tügꞌócɨy pɨnjaty amɨdooꞌijtp Dios yꞌayuc ytɨyꞌajt huɨdibɨ jaybetyɨp ma jada libro, ɨɨch miich ajcxy nɨmaaybɨch co pɨnjaty jacyajꞌanajxp jada ayuc ma jada necy, Dios jacꞌanaxy möhuɨɨb tzaachypɨ ayoꞌn, caꞌydɨ huɨdi jaybetyɨp ma jada libro. 
\v 19 E pɨn puuhuijtzp hueenɨ jada Dios yꞌayuc huɨdibɨ jaybetyɨp ma jada Dios ylibro, Dios yɨꞌ jötzɨɨb yxɨɨ huɨdi cojaayɨp ma je jugyꞌajt libro. Nañ jaduꞌn ypuhuidzɨɨyb huɨdi anajty japaatɨp ma je jemybɨ Jerusaléngajp, huɨdi jada libro ñimɨydacpy.
\p
\v 20 Yɨ Jesucristo huɨdibɨ jada ayuc capxp, yɨꞌ mɨnamb:
\p
―Caꞌ ooy jecy njac-huäcxɨbaꞌñɨch co nhuimbidɨpyɨch naaxhuiñ jadügꞌoc.
\p
Jaduꞌn jada. Amén. ¡Min, Huindzɨn Jesús!
\p
\v 21 Huen je nHuindzɨn Jesucristo mayꞌajt oyꞌajt tunɨpy mɨɨd miich ajcxy huɨdibɨ mɨbɨjcp. Jaduꞌn ngapxycɨ́xyɨch. Amén.