\id EPH
\h Efesios
\toc1 Efesios
\mt2 LA EPISTOLA DEL APOSTOL SAN PABLO A LOS EFESIOS
\mt YAꞌA KUU CARTA JA NI CHAA SAN PABLO APOSTOL NUU ÑAYƗVƗ ÑUU EFESO
\c 1
\s Saꞌa̱n kútaꞌu̱
\p
\v 1 Máá‑rí kúu Pablo, apóstol Jesucristo, chi̱ súan ni̱ jataꞌa̱n ini̱ Dios. Te cháa‑ri̱ tutu̱ yáꞌa nuu̱ ñáyɨvɨ ndóo, ja̱ káskíkuu va̱ꞌa‑i nuu̱ Cristo Jesús, ja̱ káxiu̱kú‑i ini̱ ñuu̱ Éfeso.
\v 2 Tu̱ꞌun luu jíín túꞌun kuakáꞌnu íó ini̱ máá Táa̱‑yo̱ Dios jíín iní máá Jítoꞌo̱‑yo̱ Jesucristo, ná kóo jíín‑ró jínáꞌan‑ró.
\s Na̱ sɨkɨ̱ ní tetaꞌa̱n‑ya̱‑yó
\p
\v 3 Ná nákana jaa‑yó Dios, Iꞌa̱ kúu Táa̱ Jitoꞌo̱‑yo̱ Jesucristo. Luu ni̱ sáꞌa‑ya̱ jíín‑yó jíín táká tiñu sáꞌa Espíritu. Te ichi ándɨ́vɨ́ sáꞌa‑ya̱‑ún jíín Cristo.
\v 4 Nátu̱ꞌun ni̱ ka̱ji Dios yóó nuu̱ Jesús onde̱ ná té jukuiñi̱‑ga̱ ñu̱yɨ́vɨ, náva̱ꞌa koo ndoo‑yó, te tú koo cháꞌán‑yó núu̱‑yá, te kundáꞌú ini̱‑ya̱ yóó.
\v 5 Te ni̱ tetaꞌa̱n‑ya̱ yóó náva̱ꞌa nakiꞌin séꞌé máá‑yá‑yó sáꞌa Jesucristo, ndasa ni̱ jataꞌa̱n ya̱ꞌa ini̱‑ya̱ sáꞌa‑ya̱,
\v 6 náva̱ꞌa ná nákana jaa‑yó‑yá jíín túꞌun luu tu̱ꞌun va̱ꞌa íó ini̱ máá‑yá. Te jíín túꞌun‑ún ni̱ kiꞌin séꞌé‑yá‑yó ndúu jíín‑yó jíín Cristo, Iꞌa̱ kúndáꞌú ini̱‑ya̱.
\v 7 Te Iꞌa̱‑ún, ni̱ nakuaan‑ya̱ yóó jíín nɨñí‑yá. Te ni̱ chaxio‑ya̱ kuáchi‑yó jíín túꞌun luu xaa̱n íó ini̱‑ya̱.
\v 8 Te jíín túꞌun‑ún ni̱ chítú ndɨ́ɨ añú‑yo̱ onde jíín táká túꞌun ndíchí, tu̱ꞌun júku̱ꞌun ini̱.
\v 9 Te tiñu ja̱ ní chaa ini̱ máá‑yá sáá, ja̱ kúsɨɨ̱ iní máá‑yá sáꞌa‑ya̱ kuní‑ya̱, chi̱ tu̱ꞌun sa̱ꞌí‑ún ni̱ stáꞌa̱n‑ya̱ núu̱‑yo̱.
\v 10 Chi̱ onde̱ ná jínu va̱ꞌa kɨvɨ̱ te kuní Dios ja̱ ɨ́ɨn káꞌnu‑na̱ nduu ndɨꞌɨ‑ni ini̱ ndaꞌa Cristo, va̱sa ja̱ káꞌi̱o ini̱ andɨ́vɨ́ xí va̱sa ja̱ káꞌi̱o ini̱ ñu̱yɨ́vɨ.
\v 11 Te jíín Cristo ni̱ kaniꞌi̱n‑yo̱ táꞌu̱‑yo̱. Te ni̱ tetaꞌa̱n Dios yóó, nátu̱ꞌun ni̱ chaa ini̱ máá‑yá, Iꞌa̱ sáꞌa ta̱ká‑ni ndasa játaꞌa̱n ini̱ máá‑yá, ndasa kúsɨɨ̱ iní máá‑yá.
\v 12 Súan ni̱ sáꞌa‑ya̱, náva̱ꞌa máá‑yó, ja̱ xnáꞌa̱n‑ga̱ ni̱ kañukuu ini̱‑yo̱ Cristo, ná nákana jaa‑yó‑yá jíín túꞌun luu máá‑yá.
\v 13 Te suni róó, ni̱ ka̱jini so̱ꞌo‑ró túꞌun ndaa̱. Te jíín túꞌun va̱ꞌa‑ún ni̱ kaka̱ku‑ró. Te nuu̱ máá Cristo ni̱ ka̱kandíja‑ró. Te suni máá Espíritu Santo ja̱ ní chísó túꞌun‑ya̱, ni̱ chaa sello ini̱ añú‑ro̱.
\v 14 Yu̱án kúu seña ja̱ níꞌi̱n‑yo̱ táꞌu̱‑yo̱, onde̱ ná tɨ́ɨn‑yó máá. Yúan‑na te nakana jaa‑yó túꞌun luu‑ya̱ já sɨkɨ́‑ún.
\s Tu̱ꞌun ni̱ jika̱n taꞌu̱ Pablo jaꞌa̱ yóó
\p
\v 15 Te suni ruu̱, ni̱ jini tu̱ꞌun‑ri̱ ndasa kákandíja‑ró núu̱ máá Jítoꞌo̱‑yo̱ Jesús, jíín ndasa kúndáꞌú ini̱‑ro̱ táká ña̱yɨvɨ ndóo.
\v 16 Te ja̱ yúán tú júkuiñi̱‑ri̱ ja̱ nákuatáꞌú‑rí ja̱ róó jínáꞌan‑ró, te núku̱ꞌun ini̱‑ri̱ róó nú jikán taꞌu̱‑rí,
\v 17 náva̱ꞌa kuni̱‑ro̱ núu̱ máá Dios, Iꞌa̱ xíin máá Jítoꞌo̱‑yo̱ Jesucristo, máá Táa̱‑yo̱, Iꞌa̱ ndíso tu̱ꞌun luu, te náva̱ꞌa ná kuáꞌa‑ya̱ modo ndíchí, te stáꞌa̱n ndiji̱n‑ya̱ túꞌun nuu̱‑ro̱.
\v 18 Te stúu̱n‑ya̱ iní añú‑ro̱, náva̱ꞌa kuni̱‑ro̱ ndéja̱ kúu tu̱ꞌun ñúkuu ini̱‑ro̱ sɨkɨ́ já ní kana‑ya̱ xiní‑ro̱, te ndéja̱ kúu taꞌu̱ lúu xaa̱n níꞌi̱n‑yá sɨkɨ̱ ñáyɨvɨ ndóo.
\v 19 Te kuni̱‑ro̱ ndasa ni̱ꞌin xaa̱n sátiñu‑ya̱ jáꞌa̱ róó, ña̱yɨvɨ kákandíja, chi̱ fuerza téyíí ndíso‑ya̱.
\v 20 Te fuerza‑ún, ni̱ jatíñu Dios kɨvɨ̱ ní naschakú‑ya̱ Cristo ma̱ꞌñú ndɨ́yi, jíín já ní súngo̱o‑ya̱ Cristo ichi ndáváꞌa‑ya̱ ondé andɨ́vɨ́.
\v 21 Te ni̱ jani‑ya̱ Cristo sɨkɨ̱ táká ja̱ kátáꞌú tíñu, jíín já kándi̱so tíñu, jíín já kátɨ̱ɨn so̱ꞌo, jíín já kákuñáꞌnu, jíín sɨkɨ́ táká sɨ́ꞌvɨ́ já káskúnání‑i, nasu̱ níni kuia̱ yáꞌa, chi̱ suni ta̱ká kuia̱ chaa̱.
\v 22 Te ta̱ká‑ni ni̱ jañu̱ Cristo suku̱n ní sáꞌa Dios. Te ni̱ nduu Cristo xini̱ núu̱ máá tɨ́kuꞌni̱ kákandíja, ni̱ sáꞌa‑ya̱ sɨkɨ́ táká‑ni.
\v 23 Te tɨkuꞌni̱‑ún kúu nátu̱ꞌun yikɨ kúñu Cristo, te chítú máá‑i jíín máá‑yá, chi̱ Iꞌa̱ schítú nɨ́ɨ́ káꞌnu‑ni kúu‑ya̱.
\c 2
\s Ndasa ni̱ nama‑ya̱‑yó
\p
\v 1 Te máá‑yá, ni̱ naschakú‑ya̱ róó, ja̱ á ni̱ kajiꞌi̱‑ro̱ ní sáꞌa kua̱chi‑ró jíín já ní ka̱sáñaꞌmu‑ró.
\v 2 Chi ni̱ ka̱jika‑ró jíín máá yúán sáá, nátu̱ꞌun kásáꞌa‑i ini̱ ñu̱yɨ́vɨ yáꞌa, nátu̱ꞌun kuní máá já táꞌú tíñu nuu̱ tachí. Yu̱án kúu tachi̱ já sátiñu jíín ñáyɨvɨ níꞌin ini̱ íó vina.
\v 3 Te suni ta̱ká máá‑yó ní ka̱jika‑yó jíín ñáyɨvɨ‑ún sáá, ni̱ ka̱sáꞌa‑yó tíñu ni̱ kakani̱ ini̱‑yo̱, ni̱ ka̱skíkuu‑yó tíñu ni̱ kuni̱ yikɨ kúñu‑yó jíín tíñu ni̱ ka̱jani ini̱‑yo̱, te ni̱ ka̱kuu‑yó ñáyɨvɨ ní kiti̱
ini̱‑ya̱ núu̱, nátu̱ꞌun nuu̱ sáva‑ga̱‑i.
\v 4 Ko ini̱ Dios yíꞌi kuaꞌa̱ túꞌun kúndáꞌú ini̱, te ni̱ kundáꞌú xaa̱n iní‑ya̱ yóó.
\v 5 Te nini ni̱ ka̱kuu‑yó ndɨ́yi ni̱ sáꞌa kua̱chi‑ún, te ni̱ naschakú‑ya̱ yóó jíín Cristo. Te jíín túꞌun luu íó ini̱‑ya̱ te ni̱ kaka̱ku‑ró.
\v 6 Te ɨɨn núú‑ni ni̱ ndukani‑ya̱ yóó jíín Cristo. Te suni súan ni̱ súngo̱o‑ya̱ yóó onde̱ andɨ́vɨ́ jíín Cristo Jesús,
\v 7 náva̱ꞌa nɨ́ɨ́‑gá kuia̱ ja̱ cháa̱‑ga̱, stáꞌa̱n‑ya̱ ndasa kuaꞌa̱ xáa̱n já lúu íó ini̱‑ya̱ jíín túꞌun kúmani̱‑yá jíín‑yó jíín Cristo Jesús.
\v 8 Ni̱ ka̱kandíja‑ró, te ja̱ yúán ní kaka̱ku‑ró ní sáꞌa tu̱ꞌun luu íó ini̱‑ya̱. Te nasu̱ máá‑ró ní kíñiꞌin, chi̱ taꞌu̱ já ní ja̱ꞌa Dios nuu̱‑yo̱ kúu.
\v 9 Nasu̱ sɨkɨ́ tíñu sáꞌa‑yó ní kaka̱ku‑yó, te ja̱ yúán tú ni ɨɨn‑i kuu sátéyíí‑i máá‑i.
\v 10 Chi̱ máá‑yá ni̱ sáꞌa yóó. Te ni̱ sáva̱ꞌa‑ya̱ yóó nuu̱ Cristo Jesús, náva̱ꞌa sáꞌa‑yó táká tiñu va̱ꞌa. Chi̱ jíín kɨvɨ́, ni̱ sátu̱ꞌa Dios tiñu‑ún ja̱ káka kuu‑yó jíín.
\v 11 Núsáá te ná núku̱ꞌun ini̱‑ro̱ já chíi ña̱yɨvɨ sɨ́ɨn nación ni̱ ka̱kaku‑ró sáá. Onde̱ sáá, chi̱ nání‑de cha̱a ni̱ kaxɨtɨ̱ ndúu̱ ku̱ñu‑de ja̱ ní sáꞌa ndaꞌa. Te cha̱a‑ún, ni̱ ka̱skúnání‑de róó: Ña̱yɨvɨ tú ní
káxɨtɨ̱ ndúu̱.
\v 12 Te suni ná núku̱ꞌun ini̱‑ro̱ já ondé kɨvɨ̱ sáá, tú ní káꞌi̱in‑ró jíín Cristo. Jíká ní kaꞌi̱in‑ró jíín ñáyɨvɨ ñúu̱ Israel. Te jíká xáa̱n ní kaꞌi̱o‑ró jíín túꞌun ni̱ keyuꞌu‑yá, ni tú ní káñukuu ini̱‑ro̱, ni
Dios, tú ní jíka‑ya̱ jíín‑ró iní ñu̱yɨ́vɨ yáꞌa.
\v 13 Ko vina jíín Cristo Jesús, te róó ja̱ ní kaꞌi̱in jíká‑ró ondé kɨvɨ̱ sáá, chi̱ a ni̱ ka̱kuyani‑ró ní sáꞌa nɨñi̱ Cristo.
\v 14 Chi̱ máá‑yá kúu paz nuu̱‑yo̱, te ja̱ ndéndúú ñuu̱‑ún ni̱ na̱sáꞌa‑ya̱ ɨ́ɨn‑na̱, chi ni̱ stúncháa̱‑ya̱ máá xéꞌñú já ní sásɨ́ɨn yóó ni̱ kandii̱ sava ma̱ꞌñú‑yó.
\v 15 Te xéꞌñú‑ún ja̱ ní skána̱á yóó kúu ta̱ká tu̱ꞌun táꞌú tíñu jíín táni̱nu ndíso máá. Te jíín yíkɨ kúñu‑ya̱ ní xnáa‑yá ta̱ká yu̱án, náva̱ꞌa naskétáꞌan‑ya̱ ndéndúú‑ún núu̱ máá‑yá, te nduu ɨɨn‑na̱ ña̱yɨvɨ jáá, te ja̱ yúán sáꞌa‑ya̱ paz,
\v 16 te suni náva̱ꞌa jíín máá cruz te naskétáꞌan‑ya̱ ndéndúú yu̱án jíín Dios, chi̱ ɨɨn‑na̱ ña̱yɨvɨ ní nduu‑ún, te jíín cruz ni̱ xnáa‑yá máá já ní ka̱jito uꞌu̱ táꞌan.
\v 17 Te ni̱ kii‑ya̱, te ni̱ jani‑ya̱ túꞌun paz nuu̱‑ro̱, já ní kaꞌi̱in jíká‑ró núu̱‑yá, jíín núu̱ ñáyɨvɨ já ní kaꞌi̱in yani.
\v 18 Chi ja̱ máá‑yá kúu ja̱ núña ichi kɨ́vɨ koyo ndendúú‑yo̱ núu̱ máá Táa̱‑yo̱, sáꞌa suni ɨɨn‑ni máá Espíritu.
\v 19 Núsáá te tuká kákuu‑ró ñáyɨvɨ jíká, ni ña̱yɨvɨ tatú, chi̱ ɨɨn‑na̱ ni̱ ka̱nduu‑ró jíín ñáyɨvɨ ndóo, te suni táꞌan se̱ꞌe Dios kákuu‑ró.
\v 20 Te ni̱ ka̱jaꞌnu máá‑ró sɨkɨ́ cimiento ja̱ kákuu apóstol jíín cháa ni̱ kájani tu̱ꞌun. Te máá Jesucristo kúu yuu̱ ndíso jiki̱.
\v 21 Te nɨ́ɨ́ véꞌe jáku̱táꞌan jíín máá‑yá, te jáꞌnu kuaꞌa̱n náva̱ꞌa nduu ɨɨn veꞌe ii̱ sáꞌa máá Jítoꞌo̱‑yo̱.
\v 22 Te suni ni̱ ka̱nduu‑ró ɨ́ɨn veꞌe ni̱ sáꞌa‑ya̱, náva̱ꞌa kunchaa̱ Dios ini̱ jíín máá Espíritu.
\c 3
\s Tu̱ꞌun yíí tu̱ꞌun sa̱ꞌí ndíso Pablo
\p
\v 1 Te ruu̱ Pablo, ja̱ yúán kándee‑ri̱ veka̱a ja̱ sɨkɨ́ Cristo Jesús jaꞌa̱ róó, ña̱yɨvɨ sɨ́ɨn nación jínáꞌan‑ró.
\v 2 Te ni̱ ka̱jini tu̱ꞌun‑ró ndasa ni̱ ja̱ꞌa Dios tu̱ꞌun luu íó ini̱‑ya̱ núu̱‑rí jaꞌa̱ róó, jáni ini̱‑ri̱.
\v 3 Chi ni̱ stáꞌa̱n ndiji̱n‑ya̱ túꞌun sa̱ꞌí‑ún nuu̱‑rí, nátu̱ꞌun ni̱ chaa‑ri̱ yaku̱ tu̱ꞌun nuu̱‑ro̱ káꞌa̱n ichi yatá.
\v 4 Te nú kaꞌu‑ró, te a kuu juku̱ꞌun ini̱‑ro̱ ndéja̱ kúu tu̱ꞌun sa̱ꞌí Cristo ja̱ jiní‑ri̱.
\v 5 Te tu̱ꞌun‑ún tú ní stáꞌa̱n‑ya̱ núu̱ ní ɨɨn se̱ꞌe cha̱a nɨ́ɨ́ kuiá ni̱ kii ichi yatá. Ko vina ni̱ stáꞌa̱n ndiji̱n Espíritu‑ya̱ núu̱ táká apóstol ndoo‑ya̱, jíín núu̱ cháa kájani tu̱ꞌun‑ya̱.
\v 6 Te tu̱ꞌun‑ún káꞌa̱n ja̱ ñáyɨvɨ sɨ́ɨn nación, suni ná níꞌi̱n táꞌa̱n‑i taꞌu̱‑í, te ɨɨn‑na̱ ña̱yɨvɨ ná ndúu‑i jíín‑yó, te ja̱ ní keyuꞌu‑yá ná níꞌi̱n táꞌa̱n‑i sáꞌa Cristo jíín máá túꞌun va̱ꞌa.
\v 7 Te sɨkɨ̱ túꞌun‑ún játiñu máá‑rí. Te taꞌu̱‑ún ni̱ ja̱ꞌa tu̱ꞌun luu íó ini̱ Dios nuu̱‑rí, te jíín fuerza‑ya̱ ní sáꞌa‑ya̱‑ún.
\v 8 Ruu̱ kúu cha̱a súchí‑ga̱ vásá ñáyɨvɨ ndóo súchí xáa̱n, te nuu̱ máá‑rí ni̱ ja̱ꞌa‑ya̱ táꞌu̱ lúu yáꞌa ja̱ jáni‑ri̱ tu̱ꞌun va̱ꞌa nuu̱ ñáyɨvɨ sɨ́ɨn nación, ndasa va̱ꞌa xaa̱n káa tu̱ꞌun Cristo,
\v 9 jíín já stáꞌa̱n ndiji̱n‑ri̱ nuu̱ táká‑i ndasa koo máá túꞌun sa̱ꞌí ja̱ ní yisa̱ꞌí onde̱ sáá iní máá Dios, Iꞌa̱ ni̱ sáꞌa ta̱ká‑ni.
\v 10 Náva̱ꞌa ta̱ká ja̱ kátáꞌú tíñu jíín já kákuñáꞌnu ichi ándɨ́vɨ́, ná kuní jínáꞌan ndasa kuaꞌa̱ xáa̱n túꞌun ndíchí Dios íó, sáꞌa tɨkuꞌni̱.
\v 11 Nátu̱ꞌun ni̱ chaa ini̱‑ya̱ nɨ́ɨ́ káni, te ni̱ skíkuu‑ya̱ ní sáꞌa‑ya̱‑un jíín Jítoꞌo̱‑yo̱ Cristo Jesús.
\v 12 Te kákandíja‑yó‑yá. Te ja̱ yúán máá‑yá sáꞌa ja̱ káchundéé iní‑yo̱, tú yúꞌú‑yo̱, kɨ́vɨ koyo‑yó núu̱ Dios.
\v 13 Ja̱ yúán káꞌa̱n nda̱ꞌú‑ri̱ jíín‑ró, ja̱ má kúkuíꞌa̱ ini̱‑ro̱ sáꞌa tu̱ndóꞌo jíto‑ri̱ ja̱ sɨkɨ́ róó, chi̱ sua ndeá‑ga̱ tu̱ꞌun luu ini̱ máá‑ró sáꞌa.
\v 14 Ja̱ yúán kúu ja̱ júkuiñi̱ jítɨ́‑rí núu̱ máá Iꞌa̱ kúu Táa̱ Jitoꞌo̱‑yo̱ Jesucristo.
\v 15 Te nuu̱ máá‑yá kénda sɨ́ꞌvɨ́ táká tata̱ káꞌi̱o andɨ́vɨ́ jíín já káꞌi̱o ini̱ ñu̱yɨ́vɨ,
\v 16 chi tu̱ꞌun luu xaa̱n íó ini̱‑ya̱, te jikán taꞌu̱‑rí nuu̱‑yá ja̱ súan ná yíja va̱ꞌa ini̱ añú‑ro̱ sáꞌa‑ya̱ jíín fuerza ndíso máá Espíritu.
\v 17 Te suni jikán‑ri̱ ja̱ ná kúnchaa̱ Cristo ini̱ añú‑ro̱ jínáꞌan‑ró sáꞌa ja̱ kákandíja‑ró, náva̱ꞌa ná kuikín va̱ꞌa tu̱ꞌun kúndáꞌú ini̱ táꞌan ini̱‑ro̱,
\v 18 te suni náva̱ꞌa kuu juku̱ꞌun va̱ꞌa ini̱‑ro̱, jíín táká ña̱yɨvɨ ndóo, ndasa káa tu̱ꞌun jichá, tu̱ꞌun káni, tu̱ꞌun kúnú, tu̱ꞌun súkún, cuenta máá‑yá,
\v 19 te suni náva̱ꞌa ná kuní‑ro̱ ndasa kúndáꞌú ini̱ Cristo yóó, va̱sa tú kúu juku̱ꞌun ini̱‑yo̱ túꞌun‑ún, te náva̱ꞌa kuꞌun chítú ndɨ́ɨ‑ro jíín kúꞌa ñúꞌun chítú Dios. Achí‑ri̱.
\v 20 Máá‑yá, kúu Iꞌa̱ sáꞌa va̱ꞌa xaa̱n‑gá vásá já kájani ini̱‑yo̱ xí já kájika̱n‑yo̱, chi̱ jíku fuerza‑ya̱ iní‑yo̱.
\v 21 Te nuu̱ máá‑yá, ná nákana jaa tɨkuꞌni̱ kákandíja sáꞌa Cristo Jesús. Te súan ná kóo nɨ́ɨ́ káni nɨ́ɨ́ kuiá, onde̱ ta̱ká kuia̱ chaa̱. Súan ná kóo. Amén.
\c 4
\s Ɨɨn‑ni kákuu‑yó sáꞌa Espíritu
\p
\v 1 Ruu̱, chi̱ kándee‑ri̱ veka̱a sɨkɨ̱ máá Jítoꞌo̱‑yo̱. Te káꞌañ nda̱ꞌú‑ri̱ jíín‑ró ja̱ ná káka kuu‑ró nátu̱ꞌun íó jíñúꞌún sɨkɨ́ já ní kana‑ya̱ xiní‑ro̱.
\v 2 Te ná kóo súchí váꞌa ini̱‑ro̱. Te ná kóo vi̱tá ini̱‑ro̱. Te jíín túꞌun kúndáꞌú ini̱, te jíín paciencia, ná kuándéé iní‑ro̱ jíín táꞌan‑ró.
\v 3 Ná kuítú iní‑ro̱ já ɨ́ɨn‑na̱ naketáꞌan‑ró jínáꞌan‑ró iní máá Espíritu sáꞌa tu̱ꞌun kuakáꞌnu ini̱.
\v 4 Chi̱ ɨɨn‑na̱ ña̱yɨvɨ íó, te suni ɨɨn‑ni Espíritu, suni nátu̱ꞌun ni̱ kana‑ya̱ xiní‑ro̱ já ɨ́ɨn‑ni tu̱ꞌun kuñukuu ini̱‑ro̱, chi yu̱án kúu ja̱ ní kana‑ya̱ xiní‑ro̱,
\v 5 te suni ɨɨn‑ni máá Jítoꞌo̱‑yo̱ íó, jíín ɨ́ɨn‑ni tu̱ꞌun kándíja, jíín ɨ́ɨn‑ni tu̱ꞌun jánducha,
\v 6 jíín ɨ́ɨn‑ni máá Dios Táa̱ xini̱ táká‑yo̱, chi̱ máá‑yá ndíto ta̱ká‑ni, te máá‑yá ni̱ sáꞌa ta̱ká‑ni, te jíín ndɨ́ꞌɨ‑ni ncháá‑ya̱.
\v 7 Ko ná ɨɨn ná ɨɨn‑yó, kútaꞌu̱‑yo̱ túꞌun luu íó ini̱ máá‑yá ndasa ku̱ꞌa jáꞌa máá Cristo nuu̱‑yo̱.
\v 8 Ja̱ yúán káꞌa̱n tutu̱: Nuu̱ ní ndaa‑ya̱ kuáꞌa̱n‑ya̱ ándɨ́vɨ́, ni̱ stútú‑yá kuaꞌa̱ já ní yi̱ndasu̱ te kuaꞌa̱n‑ya̱ jíín. Te ni̱ jacha̱ nu̱u‑ya̱ táꞌu̱ núu̱ táká ña̱yɨvɨ, áchí.
\v 9 Te ja̱ súan káꞌa̱n: Ni̱ ndaa‑ya̱ kuáꞌa̱n‑ya̱, suni kuní kaꞌa̱n ja̱ ní kuun‑ya̱ ní jaꞌa̱n‑ya̱ ondé nuu̱ kúnú‑ga̱ chi̱i ñuꞌun.
\v 10 Iꞌa̱ ni̱ kuun, suni máá‑yá kúu Iꞌa̱ ni̱ ndaa kuaꞌa̱n onde̱ nuu̱ súkún‑ga̱ andɨ́vɨ́, náva̱ꞌa skíkuu‑ya̱ jíín táká tiñu.
\v 11 Te suni máá‑yá, ni̱ tetaꞌa̱n‑ya̱ sáva ña̱yɨvɨ kíꞌi̱n apóstol, te sava‑ga̱ kani tu̱ꞌun‑ya̱, te sava‑ga̱ skuikín tu̱ꞌun va̱ꞌa, te sava‑ga̱ kundito tɨkuꞌni̱, te sava‑ga̱ stáꞌa̱n.
\v 12 Súan ni̱ tetaꞌa̱n‑ya̱, náva̱ꞌa ná yíja va̱ꞌa ña̱yɨvɨ ndóo, jíín já kuátíñu nuu̱‑í, náva̱ꞌa ná kuáꞌnu tɨkuꞌni̱ Cristo sáꞌa.
\v 13 Súan te ná náketáꞌan ɨɨn núú‑yó jíín túꞌun kándíja, jíín túꞌun kuni̱‑yo̱ núu̱ Séꞌe Dios. Te suni ná yíja va̱ꞌa‑yó nátu̱ꞌun ɨɨn‑na̱‑yo̱, onde̱ chítú kúꞌa Cristo ini̱‑yo̱.
\v 14 Yu̱án‑na̱ te ma̱ nátuꞌu̱ ini̱‑yo̱ cuenta su̱chí lúlí, ni ma̱ kɨ́vɨ nduu̱‑yo̱ yáꞌa yúan jíín sɨ́ɨn sɨ́ɨn saꞌa̱n, ndasa kuní cha̱a xndáꞌú ja̱ kándúkú‑de tɨɨn yátá‑de yóó, sa̱na ini̱‑yo̱ sáꞌa‑de.
\v 15 Chi̱ sua ná kútɨɨn‑ró túꞌun ndaa̱ jíín túꞌun kúndáꞌú ini̱, te ná kuáꞌnu‑ró jíín táká tiñu kuní máá Iꞌa̱ kúu xini̱, te Iꞌa̱‑ún kúu Cristo.
\v 16 Te ini̱ máá‑yá, ɨɨn‑na̱ káñu̱táꞌan nɨ́ɨ́ tɨ́kuꞌni̱, te ndítɨ̱ɨn táꞌan ta̱ká nátu̱ꞌun ta̱ká va̱u, te ná ɨɨn ná ɨɨn játíñu ndasa xíin tíñu. Te xndeá táꞌan te skuáꞌnu táꞌan jíín túꞌun kúndáꞌú ini̱.
\s Ña̱yɨvɨ ñúndiji̱n
\p
\v 17 Tu̱ꞌun yáꞌa káꞌa̱n‑ri̱, chi̱ káꞌa̱n ni̱ꞌin‑ri̱ jíín‑ró cuenta máá Jítoꞌo̱‑yo̱, ja̱ má káka‑ga̱‑ro̱ nátu̱ꞌun kájika sava‑ga̱ ña̱yɨvɨ sɨ́ɨn nación, chi̱ kájika kuu‑i jíín túꞌun kájani sáni ini̱ máá‑i.
\v 18 Ni̱ ka̱kuñaa nú jiní tuní‑i. Te tú ñúꞌun kutɨ vida Dios ini̱‑i, chi̱ tú kájini̱‑i nuu̱ máá‑yá, chi̱ ni̱ꞌin ini̱ añú‑i.
\v 19 Te ña̱yɨvɨ‑ún, ni̱ ka̱yija‑i jíín máá túꞌun ni̱ꞌin ini̱. Te ni̱ kɨ̱vɨ koyo‑i jíín túꞌun kuáxán ja̱ ná kuítú iní‑i sáꞌa‑i ta̱ká tiñu cháꞌán.
\v 20 Ko róó jínáꞌan‑ró, nasu̱ súan ní káskuáꞌa‑ró íchi Cristo.
\v 21 Te súan ni̱ ka̱jini so̱ꞌo‑ró túꞌun‑ya̱, te ni̱ ka̱kutu̱ꞌa‑ró ní sáꞌa‑ya̱, nátu̱ꞌun íó ndaa̱ tu̱ꞌun jíín Jesús.
\v 22 Ná cháxio‑ró máá cháa túꞌú kíꞌi̱n‑de jíín táká tiñu ni̱ jika‑ró jíín‑de ichi yatá, chi̱ máni kucháꞌán‑de jíín táká tiñu ñáá sáꞌa‑de kuní‑de.
\v 23 Te ná ndújáá modo kájani ini̱‑ro̱.
\v 24 Te ná núku̱ꞌun‑ró cháa jáá, ja̱ ní kuva̱ꞌa‑de nátu̱ꞌun káa máá Dios jíín túꞌun ndaa̱, jíín túꞌun ndoo ndija.
\v 25 Núsáá te ná sía̱‑ro̱ túꞌun xndáꞌú, te ná káꞌa̱n ndaa̱‑ro̱ jíín táká táꞌan‑ró, chi̱ pedazo‑yo̱ kánakuni̱ táꞌan‑yó.
\v 26 Nú kiti̱ ini̱‑ro̱ te ma̱ sáꞌa‑ró kuáchi. Ni ma̱ kuáꞌa‑ró túꞌun ja̱ kití ini̱‑ro̱ ondé ke̱e ndika̱ndii.
\v 27 Ma̱ kuáꞌa‑ró túꞌun kukuu ja̱ꞌú jíín‑ró.
\v 28 Ña̱yɨvɨ ní sákuíꞌná, ma̱ sákuíꞌná‑ga̱‑i, chi̱ sua ná sátiñu‑i. Ná tɨ́ɨn‑i ta̱ká tiñu va̱ꞌa jíín ndáꞌa‑i, náva̱ꞌa ná níꞌi̱n‑í na̱jíín kuáꞌa‑i nuu̱ ñáyɨvɨ kánandɨꞌɨ.
\v 29 Ni ɨɨn tu̱ꞌun cháꞌán ma̱ kénda yuꞌu‑ro, chi̱ sua ná káꞌa̱n‑ro̱ túꞌun va̱ꞌa ja̱ skuáꞌnu táꞌan, náva̱ꞌa ña̱yɨvɨ jíni so̱ꞌo‑ún ná kéndo̱o luu ini̱‑i sáꞌa.
\v 30 Nde̱ꞌé‑ró náva̱ꞌa ma̱ kúkuíꞌa̱ ini̱ Espíritu Santo Dios sáꞌa‑ró, chi̱ jíín Espíritu ni̱ ja̱xin‑ya̱ sello róó, onde̱ ji̱nu kɨvɨ̱ nákuaan‑ya̱ yóó.
\v 31 Ta̱ká tu̱ꞌun ua̱, jíín túꞌun xaa̱n iní, jíín túꞌun kití ini̱, jíín túꞌun kákana̱á, jíín túꞌun káꞌa̱n ndɨva̱ꞌa, ná cháxio‑ró jíín táká tiñu jíto uꞌu̱ táꞌan.
\v 32 Chi̱ sua ná kúmani̱‑ro̱ jíín táꞌan‑ró. Ná kúndáꞌú ini̱‑ro̱ táꞌan‑ró. Ná sáꞌa‑ró túkáꞌnu ini̱‑ro̱ núu̱ táꞌan‑ró, nátu̱ꞌun ni̱ sáꞌa Dios tu̱káꞌnu ini̱‑ya̱ núu̱‑ro̱ sɨkɨ́ Cristo.
\c 5
\p
\v 1 Te róó, ná ndáku‑ró Dios nátu̱ꞌun se̱ꞌe máá‑yá ja̱ maní jíín‑yá.
\v 2 Te kaka kuu‑ró jíín túꞌun kúndáꞌú ini̱, nátu̱ꞌun ni̱ kundáꞌú ini̱ Cristo róó, te ni̱ soko̱‑yá máá‑yá ja̱ sɨkɨ́ róó, te ni̱ jaꞌa̱n asu̱n‑yá ni̱ soko̱‑yá máá‑yá ja̱ ní ja̱ꞌa‑ya̱ máá‑yá nuu̱ Dios.
\v 3 Ko tu̱ꞌun téné, jíín táká tu̱ꞌun cháꞌán, xí túꞌun tóó iní, ni ma̱ ndátu̱ꞌún‑ró súan jínáꞌan‑ró, chi̱ tú súan kásáꞌa ña̱yɨvɨ ndóo.
\v 4 Ni ma̱ kóo tu̱ꞌun cháꞌán, ni tu̱ꞌun ñáá, ni tu̱ꞌun ndɨyi̱, chi̱ túu sáꞌa luu. Chi̱ sua ná nákuatáꞌú‑ró.
\v 5 Chi̱ a kájini̱‑ro̱ já íó ndaa̱ tu̱ꞌun yáꞌa, ja̱ ní ɨɨn ña̱yɨvɨ kájika téné, xí já kásáꞌa cháꞌán, xí já tóó iní (chi̱ ɨɨn‑ni kúu‑ún jíín já kájatíñu nuu̱ ndosó), tú naniꞌi̱n táꞌu̱ kútɨ‑í ndɨ̱vɨ‑i ini̱ ñuu̱
nuu̱ táꞌú Cristo tiñu jíín Dios.
\v 6 Koto‑ró, ma̱ xndáꞌú ni ɨɨn‑i róó jíín túꞌun sáni, chi ja̱ sɨkɨ́ táká tu̱ꞌun yáꞌa te cháa̱ tu̱ꞌun kití ini̱ Dios sɨkɨ̱ táká‑i ja̱ tú kájandatu̱‑i.
\v 7 Ma̱ kɨ́vɨ nduu̱‑ro̱ jíín‑i núsáá.
\v 8 Chi̱ kɨvɨ̱ sáá, ni̱ ka̱ichaku̱‑ro̱ sɨkɨ́ ñúñáa, ko vina, a káichaku̱‑ro̱ sɨkɨ́ ñúndiji̱n nuu̱ máá Jítoꞌo̱‑yo̱. Ná káka kuu‑ró nátu̱ꞌun kájika kuu ña̱yɨvɨ ñúndiji̱n núsáá.
\v 9 Chi̱ tiñu sáꞌa Espíritu kúu ta̱ká ja̱ váꞌa, ta̱ká ja̱ íó ndaa̱, ta̱ká ja̱ íó ndija.
\v 10 Ná ndúkú víi‑ro táká ja̱ kúsɨɨ̱ iní máá Jítoꞌo̱‑yo̱ sáꞌa‑ró.
\v 11 Te ma̱ kɨ́vɨ nduu̱‑ro̱ jíín tíñu ñu̱ñáa ja̱ tú níꞌi̱n tíñu, chi̱ sua ná kána jíín‑ró núu̱.
\v 12 Chi̱ kúka nuu̱‑yo̱ káꞌa̱n‑yo̱ tíñu kásáꞌa sa̱ꞌí‑i.
\v 13 Ko ta̱ká tu̱ꞌun ja̱ á ni̱ tuu̱n nuu̱, jiní ndiji̱n‑yo̱ núu̱ sáꞌa luz, chi̱ luz kúu ja̱ kíñiꞌin ndiji̱n ta̱ká‑ni.
\v 14 Ja̱ yúán káꞌa̱n: Róó ja̱ kákixi̱, natáꞌú núu̱‑ro̱, ná ndúko̱o‑ró máꞌñú ndɨ́yi, te Cristo ná stúu̱n‑ya̱ núu̱‑ro̱, áchí.
\v 15 Núsáá te nde̱ꞌé váꞌa‑ró ndasa kájika ñúkúún‑ró, nasu̱ nátu̱ꞌun cha̱a káñáá, chi̱ nátu̱ꞌun cha̱a ndíchí.
\v 16 Ma̱ stɨ́vɨ́‑ró tiempo, chi̱ kánda̱ñáá kɨvɨ̱ yáꞌa.
\v 17 Núsáá te ma̱ ndúñáá xini̱‑ro̱, chi̱ sua ná júku̱ꞌun va̱ꞌa ini̱‑ro̱ na̱ún tiñu játaꞌa̱n ini̱ máá Jítoꞌo̱‑yo̱.
\v 18 Ma̱ kóo káꞌvá‑ró sɨkɨ́ vino, chi̱ jíín yúán te ji̱ta sáni‑ró. Chi̱ sua ná kútú Espíritu ini̱‑ro̱.
\v 19 Te kaꞌa̱n jíín táꞌan‑ró jíín salmo, jíín yáa̱ máá‑yá, jíín yáa̱ Espíritu. Te ichi iní añú‑ro̱ ná káta‑ró te ná chíñúꞌún‑ró máá Jítoꞌo̱‑yo̱.
\v 20 Te nene̱ nakuatáꞌú‑ró núu̱ máá Táa̱‑yo̱ Dios sɨkɨ̱ táká‑ni, jíín sɨ́ꞌvɨ́ máá Jítoꞌo̱‑yo̱ Jesucristo.
\s Tu̱ꞌun kuandatu̱‑yo̱ núu̱ táꞌan‑yó
\p
\v 21 Te kuandatu̱‑ro̱ núu̱ táꞌan‑ró, chi̱ káchiñúꞌún‑ró Dios.
\v 22 Te ñasɨ́ꞌɨ́, ná kuándatu̱‑ña núu̱ yíi máá‑ña, nátu̱ꞌun nuu̱ máá Jítoꞌo̱‑yo̱.
\v 23 Chi̱ yii kúu xini̱ ñásɨ́ꞌɨ́, nátu̱ꞌun Cristo kúu‑ya̱ xiní tɨ́kuꞌni̱. Te máá‑yá kúu Iꞌa̱ náma‑ún.
\v 24 Chi̱ nátu̱ꞌun tɨkuꞌni̱ kájandatu̱‑i nuu̱ Cristo, suni súan ñasɨ́ꞌɨ́ ná kuándatu̱ ndɨꞌɨ‑ña núu̱ yíi máá‑ña.
\v 25 Te róó yii jínáꞌan‑ró, ná kúndáꞌú ini̱‑ro̱ ñásɨ́ꞌɨ́‑ro̱, nátu̱ꞌun ni̱ kundáꞌú ini̱ Cristo tɨkuꞌni̱‑ya̱. Te ni̱ ja̱ꞌa‑ya̱ máá‑yá ja̱ tɨ́kuꞌni̱‑ún,
\v 26 náva̱ꞌa nasándoo‑ya̱, te nakacha‑ya̱‑ún jíín máá túꞌun, nátu̱ꞌun ini̱ nuu̱ ndúndoo jíín ndúcha,
\v 27 náva̱ꞌa koo ɨɨn tɨkuꞌni̱ luu kundii̱ nuu̱ máá‑yá, ja̱ tú kundiso chaꞌa̱n, ni tú tɨꞌyi̱, ni ɨɨn ja̱ súan, chi̱ sua ná kóo ndoo, ma̱ kúnchaa̱ chaꞌa̱n.
\v 28 Suni súan ta̱ká yii, nɨ́nɨ ná kúndáꞌú ini̱‑de ñasɨ́ꞌɨ́ máá‑de, nátu̱ꞌun jíín máá‑de. Chi cha̱a kúndáꞌú ini̱‑de ñasɨ́ꞌɨ́‑de, máá‑de kúndáꞌú ini̱‑de.
\v 29 Chi̱ tú ni ɨɨn cha̱a jíto uꞌu̱‑de máá‑de, chi̱ sua skée‑dé te jíto ñúkúún‑de máá‑de. Suni súan sáꞌa Cristo jíín tɨ́kuꞌni̱‑ya̱.
\v 30 Chi̱ nátu̱ꞌun pedazo máá‑yá kákuu‑yó, yikɨ‑yá, ku̱ñu‑ya̱.
\v 31 Ja̱ yúán skéndo̱o cha̱a táa̱‑de náa̱‑de, te kétáꞌan‑de jíín ñásɨ́ꞌɨ́‑de, te ɨɨn‑na̱ kákuu ndendúú‑de.
\v 32 Yíí xáa̱n káa tu̱ꞌun sa̱ꞌí yáꞌa. Ko ruu̱, chi̱ cuenta sɨkɨ̱ Cristo jíín sɨkɨ́ tɨ́kuꞌni̱ káꞌa̱n‑ri̱.
\v 33 Ko ná ɨɨn ná ɨɨn róó, ná kúndáꞌú ini̱‑ro̱ ñásɨ́ꞌɨ́ máá‑ró, nátu̱ꞌun kúndáꞌú ini̱‑ro̱ máá‑ró. Te suni ñasɨ́ꞌɨ́, ná kóo ja̱ jíñúꞌún‑ña núu̱ yíi‑ñá.
\c 6
\p
\v 1 Hijo, kuandatu̱‑ro̱ núu̱ táa̱‑ro̱, nuu̱ náa̱‑ro̱ sɨkɨ́ máá Jítoꞌo̱‑yo̱, chi yu̱án kúu ja̱ váꞌa sáꞌa‑ró.
\v 2 Chi ya̱ꞌá kúu xnaꞌa̱n‑ga̱ tu̱ꞌun ja̱ ndíso taꞌu̱, ni̱ táꞌú‑yá tiñu: Koo ja̱ jíñúꞌún‑ró núu̱ táa̱‑ro̱ núu̱ náa̱‑ro̱,
\v 3 náva̱ꞌa ná kéndo̱o va̱ꞌa‑ró, te náꞌán kúchaku̱‑ro̱ iní ñu̱yɨ́vɨ yáꞌa. Achí.
\v 4 Te róó, táa̱ jínáꞌan‑ró, ma̱ skití‑ro̱ iní se̱ꞌe‑ró jínáꞌan‑i, chi̱ sua kaꞌnu̱‑ro̱‑í, te stáꞌa̱n‑ro̱ núu̱‑í sɨkɨ̱ máá Jítoꞌo̱‑yo̱.
\v 5 Róó mozo jínáꞌan‑ró, kuandatu̱‑ro̱ núu̱ patrón‑ro̱ ñúyɨ́vɨ yáꞌa, jíín túꞌun jíñúꞌún, jíín túꞌun yúꞌú, jíín túꞌun koo kájí iní añú‑ro̱, nátu̱ꞌun nuu̱ Cristo.
\v 6 Ma̱ sáꞌa‑ró tíñu ja̱ kúsɨɨ̱ iní ña̱yɨvɨ ndéꞌé‑i nuu̱, chi̱ sua sáꞌa‑ró nátu̱ꞌun mozo Cristo. Te kuu ini̱‑ro̱ sáꞌa‑ró já játaꞌa̱n ini̱ Dios.
\v 7 Te jíín iní jíín añú‑ro̱ kuátíñu‑ró. Te kani ini̱‑ro̱ já núu̱ máá Jítoꞌo̱‑yo̱ játíñu‑ró, nasu̱ núu̱ ñáyɨvɨ.
\v 8 Chi̱ a kájini̱‑ro̱ já nú tiñu va̱ꞌa sáꞌa ɨɨn ɨɨn‑ró, jíín yáꞌá te naniꞌi̱n‑ro̱ yáꞌu‑ró núu̱ máá Jítoꞌo̱‑yo̱, va̱sa mozo xí cháa jíka kuu ndicha̱‑na̱.
\v 9 Te róó patrón jínáꞌan‑ró, suni súan sáꞌa‑ró jíín‑i, te ma̱ síyúꞌú‑ro̱‑í, chi̱ a kájini̱‑ro̱ já íó Jitoꞌo̱ máá‑i jíín máá‑ró ondé andɨ́vɨ́, te ɨɨn núú‑ni ndíto‑ya̱ táká ña̱yɨvɨ.
\s Ná kúkútu‑yo jíín táká tu̱ꞌun Dios
\p
\v 10 Te ɨɨn‑na̱ tu̱ꞌun íó, ñáni̱ máni̱: Ná kuíñi ni̱ꞌin‑ró jínáꞌan‑ró sáꞌa máá Jítoꞌo̱‑yo̱ jíín fuerza sátiñu máá‑yá.
\v 11 Ná kúkútu‑ro jíín táká tu̱ꞌun Dios náva̱ꞌa ma̱ káka yátá‑ró sáꞌa ja̱ꞌú ja̱ ndúkú tɨ́ɨn yátá róó.
\v 12 Chi̱ nasu̱ kája̱táꞌan‑yó jíín cháa yíꞌi nɨñi̱ jíín kúñu, chi̱ sua jíín já kákuñáꞌnu, jíín já kátɨ̱ɨn so̱ꞌo, jíín táká jitoꞌo̱ ñu̱yɨ́vɨ yáꞌa, ja̱ kátáꞌú tíñu ñu̱ñáa yáꞌa, jíín táká tachi̱ ñáá kájika nuu̱ tachí.
\v 13 Núsáá te ná kúkútu ndɨ́ꞌɨ‑ró jíín táká tu̱ꞌun Dios, náva̱ꞌa ma̱ káka yátá‑ró kɨvɨ́ íó tu̱ndóꞌo. Te kundii̱ ni̱ꞌin‑ró ondé nú ni̱ ndɨꞌɨ ni̱ ji̱nu ni̱ sáꞌa‑ró.
\v 14 Núsáá te kuiñi ni̱ꞌin‑ró jínáꞌan‑ró. Te chiva̱ꞌa‑ró túꞌun ndaa̱, nátu̱ꞌun ná kúnuꞌni̱ sánchi̱i‑ró. Te ná kúꞌun‑ró túꞌun skéndo̱o ndaa̱‑ya̱ róó, nátu̱ꞌun ɨɨn suꞌnu̱ káa.
\v 15 Te ná kɨ́ꞌvɨ‑ró túꞌun va̱ꞌa tu̱ꞌun vindáa̱ vinené, nátu̱ꞌun ndija̱n iní jaꞌa̱‑ro̱.
\v 16 Te íó ɨɨn‑na̱ tu̱ꞌun kánúú: Jíín túꞌun kándíja te kasu̱‑ro̱ máá‑ró, nátu̱ꞌun ɨɨn nuu̱ túꞌma‑ró, chi̱ jíín yúán te kuu ndaꞌva̱ ndɨꞌɨ‑ró yáá ñúꞌu̱n ja̱ skée ja̱ꞌú nátu̱ꞌun ndua.
\v 17 Te ná kúꞌun‑ró túꞌun nama róó, nátu̱ꞌun kachíní káa. Te nátu̱ꞌun machete, kuatíñu‑ró túꞌun Espíritu, chi yu̱án kúu tu̱ꞌun Dios.
\v 18 Te nene̱ kaka̱n taꞌu̱‑ro̱ te kaꞌa̱n nda̱ꞌú‑ro̱ jíín‑yá, te ná kakán taꞌu̱‑ro̱ sáꞌa máá Espíritu. Te ja̱ yúán ná kóo ndito ini̱‑ro̱, te jaꞌa̱ táká ña̱yɨvɨ ndóo ná kakán taꞌu̱‑ro̱, te ná káꞌa̱n nda̱ꞌú‑ro̱.
\v 19 Te suni kaꞌa̱n‑ro̱ jáꞌa̱‑rí, náva̱ꞌa ná chúndéé iní‑ri̱ ndɨka̱‑ri̱ yuꞌu‑rí kani‑ri̱ tu̱ꞌun va̱ꞌa tu̱ꞌun sa̱ꞌí‑ya̱,
\v 20 te kaꞌa̱n vatu̱ máá‑rí ndasa kánúú káꞌa̱n‑ri̱, chi ja̱ sɨkɨ́ túꞌun‑ún jíka kuu‑ri̱, te núꞌni̱‑ri̱.
\v 21 Tíquico kúu cha̱a játíñu te skíkuu va̱ꞌa‑de tiñu máá Jítoꞌo̱‑yo̱, te mani̱‑yo̱ jíín‑de. Te suni kastu̱ꞌún‑de nuu̱‑ro̱ ndasa kuaꞌa̱n tiñu jíku‑ri̱ jíín, náva̱ꞌa kuni̱ ndɨꞌɨ‑ni‑ró.
\v 22 Máá já yúán‑ni tájí‑rí‑de kujaa̱‑de nuu̱‑ro̱, náva̱ꞌa kuni̱‑ro̱ ndasa kákuu‑ri̱, te ndundéé iní añú‑ro̱ sáꞌa‑de.
\v 23 Tu̱ꞌun kuakáꞌnu ini̱, jíín túꞌun kúndáꞌú ini̱, jíín túꞌun kándíja, ja̱ kíi nuu̱ máá Táa̱‑yo̱ Dios jíín núu̱ máá Jítoꞌo̱‑yo̱ Jesucristo, ná kóo jíín táká ñani̱‑yo̱.
\v 24 Tu̱ꞌun luu íó ini̱‑ya̱ ná kóo jíín táká ña̱yɨvɨ maní ndíja‑i jíín Jítoꞌo̱‑yo̱ Jesucristo. Súan ná kóo. Amén.