\id PHP
\h Filipenses
\toc1 Filipenses
\mt2 LA EPISTOLA DEL APOSTOL SAN PABLO A LOS FILIPENSES
\mt YAꞌA KUU CARTA JA NI CHAA SAN PABLO APOSTOL NUU ÑAYƗVƗ ÑUU FILIPOS
\c 1
\p
\v 1 Máá‑rí kákuu Pablo jíín Timoteo, mozo Jesucristo, te káchaa‑ri̱ tutu̱ yáꞌa nuu̱ táká ña̱yɨvɨ ndóo kákandíja nuu̱ Cristo Jesús, ja̱ káxiu̱kú‑i ini̱ ñuu̱ Filipos, jíín núu̱ cháa ja̱ kándi̱to‑de‑i, jíín núu̱ cháa kájatíñu nuu̱‑í.
\v 2 Tu̱ꞌun luu íó ini̱, jíín túꞌun kuakáꞌnu ini̱, ja̱ kíi nuu̱ máá Táa̱‑yo̱ Dios jíín núu̱ máá Jítoꞌo̱‑yo̱ Jesucristo, ná kóo jíín‑ró jínáꞌan‑ró.
\s Ja̱ ní nakuatáꞌú Pablo nuu̱ Dios
\p
\v 3 Nákuatáꞌú‑rí nuu̱ Dios máá‑rí ndɨtaꞌa̱n jínu ja̱ núku̱ꞌun ini̱‑ri̱ róó jínáꞌan‑ró.
\v 4 Nú jikán taꞌu̱‑rí, te nene̱ kúsɨɨ̱ iní‑ri̱ jikán taꞌu̱‑rí jaꞌa̱ róó jínáꞌan‑ró.
\v 5 Chi ni̱ chindéé táꞌan‑ró jíín‑rí skáka‑yó túꞌun va̱ꞌa onde̱ kɨvɨ̱ xnáñúú, te onde̱ vina.
\v 6 Te jáni ndija ini̱‑ri̱ ja̱ síjínu náꞌín‑yá tiñu va̱ꞌa ja̱ ní skéjáꞌá‑yá jíín‑ró, te súan kukuu‑ga̱‑ya̱ jíín ondé kɨvɨ̱ ndíi Jesucristo.
\v 7 Te suni íó va̱ꞌa ja̱ súan nákani ini̱‑ri̱ ja̱ kúu ta̱ká róó, chi̱ ñúꞌun ini̱ añú‑ri̱ ja̱ kúu róó, chi ni̱ kaniꞌi̱n táká‑ni yóó tu̱ꞌun luu íó ini̱‑ya̱, te káchindéé táꞌan‑ró jíín‑rí kɨvɨ̱ kándee‑ri̱ veka̱a jíín já
kákaꞌa̱n‑yo̱ jáꞌa̱ túꞌun va̱ꞌa jíín já káxndeá‑ga̱‑yo̱.
\v 8 Chi̱ Dios kúu testigo‑ri̱ ja̱ jiní‑ya̱ ná ku̱ꞌa kúu ini̱‑ri̱ ja̱ kúu ta̱ká róó, jíín já maní‑rí jíín‑ró, nátu̱ꞌun mani̱ Jesucristo jíín‑ró.
\v 9 Te jikán taꞌu̱‑rí ya̱ꞌá. Kuní‑ri̱ ja̱ ná kúndáꞌú‑ga̱ ini̱‑ro̱ táꞌan‑ró, te ná skuáꞌa‑ga̱‑ro̱ júku̱ꞌun‑ga̱ ini̱‑ro̱ túꞌun‑ya̱, te nde̱ꞌé‑ró ndéja̱ íó va̱ꞌa,
\v 10 náva̱ꞌa kuu kuatúꞌún‑ró máá já váꞌa, te suni náva̱ꞌa ná kóo kájí iní‑ro̱, te tú naku̱xndíi‑ya̱ sɨkɨ́‑ro̱ kɨvɨ́ ndíi Cristo,
\v 11 te suni náva̱ꞌa ná kúkútu‑ro jíín tíñu ndaa̱ sáꞌa Jesucristo. Jia̱n kúu ja̱ nákana jaa‑yó Dios, jíín já káꞌa̱n jíñúꞌún‑yó jíín‑yá.
\s Modo ni̱ jika máá túꞌun va̱ꞌa
\p
\v 12 Ñáni̱, kuní‑ri̱ ja̱ ná kuní‑ro̱ ná tu̱ndóꞌo ni̱ taꞌa̱n‑ri̱, chi ni̱ jicha̱‑ga̱ tu̱ꞌun va̱ꞌa ni̱ sáꞌa.
\v 13 Te ta̱ká ña̱yɨvɨ káꞌi̱o ini̱ palacio, jíín sáva‑ga̱‑i, ni̱ ka̱jini tu̱ꞌun‑i ruu̱ ndasa kándee‑ri̱ veka̱a ja̱ sɨkɨ́ Cristo.
\v 14 Te kua̱chi ja̱ núꞌni̱‑ri̱ kándee‑ri̱ veka̱a, yu̱án ní ka̱yija ini̱ sava ñani̱‑yo̱ já káchiñúꞌún‑de máá Jítoꞌo̱‑yo̱. Te ni̱ ka̱chundéé téyíí‑gá ini̱‑de kájani‑de tu̱ꞌun va̱ꞌa, te tuká káyu̱ꞌú‑de.
\v 15 Ndaa̱, chi̱ sava ña̱yɨvɨ, kájani‑i tu̱ꞌun Cristo sɨkɨ̱ túꞌun kuásún iní, jíín já kástátáꞌan‑i. Ko sava‑i, suni kájani‑i tu̱ꞌun sɨkɨ̱ já káꞌi̱o va̱ꞌa ini̱‑i.
\v 16 Te sava‑i kájani‑i tu̱ꞌun Cristo ja̱ skuikín‑ni‑i tɨxɨ̱n, te tú ndija‑i, chi̱ kákuni̱‑i ja̱ xndeá‑ga̱‑i tu̱ndóꞌo veka̱a sɨkɨ̱‑rí.
\v 17 Ko sava‑i kájani‑i tu̱ꞌun va̱ꞌa chi̱ kúndáꞌú ini̱‑i ruu̱, te a kájini̱‑i ja̱ ndúkú íchi‑rí kaꞌa̱n‑ri̱ jaꞌa̱ túꞌun va̱ꞌa.
\v 18 Tú na̱ún sáꞌa núsáá, chi ta̱ká‑ni modo jichá tu̱ꞌun Cristo, va̱sa kákaꞌa̱n sɨ́kɨ́‑i, xí káꞌa̱n ndaa̱‑i. Te ya̱ꞌá kúu ja̱ kúsɨɨ̱ iní‑ri̱ sáꞌa, te ni̱ ma̱ ndɨ́ꞌɨ kutɨ já kúsɨɨ̱ iní‑ri̱.
\v 19 Chi̱ jiní‑ri̱ ja̱ yáꞌá kúu ja̱ náma ruu̱, jíín já kájika̱n taꞌu̱‑ro̱, jíín já chíndéé chítuu Espíritu Jesucristo ruu̱.
\v 20 Chi̱ ñúkuu ini̱‑ri̱, te kuní ndásɨ́ iní‑ri̱, ja̱ má kúka nuu̱ kútɨ iní‑ri̱, chi̱ sua ná chúndéé téyíí iní‑ri̱, náva̱ꞌa ná ndúñáꞌnu Cristo sáꞌa máá‑rí vina, nátu̱ꞌun nɨ́ɨ́ ní kii‑ri̱, te va̱sa ná kúu̱‑ri̱ xí kúchaku̱‑ri̱.
\v 21 Chi ja̱ chakú‑ri̱ kúu ja̱ jíka‑ri̱ jíín máá Cristo, te ja̱ kúu̱‑ri̱ kúu ja̱ níꞌi̱n‑gá‑ri̱.
\v 22 Ko nú kuchaku̱‑ga̱‑ri̱, te súan niꞌi̱n‑rí sɨkɨ̱ táká tiñu ni̱ sáꞌa‑ri̱ tú jiní‑ri̱ ndé ichi tɨ́ɨn‑ri̱ vii.
\v 23 Chi ma̱ꞌñú ndéndúú tu̱ꞌun yáꞌa kándee ni̱ꞌin‑ri̱. Te kúu ini̱‑ri̱ noꞌo̱n‑ri̱ kunchaa̱‑ri̱ jíín Cristo. Yu̱án kúu máá já váꞌa xaa̱n‑gá.
\v 24 Ko ja̱ ná kúchaku̱ núu‑ga̱‑ri̱ kúu ja̱ kánúú‑gá ja̱ sɨkɨ́ róó jínáꞌan‑ró.
\v 25 Súan jáni ndija ini̱‑ri̱. Yu̱án kúu ja̱ jiní‑ri̱ ja̱ kúkuu‑ga̱‑ri̱ jíín‑ró jínáꞌan‑ró, náva̱ꞌa ná kándíja va̱ꞌa‑ga̱‑ro̱, te kusɨɨ̱‑gá ini̱‑ro̱.
\v 26 Náva̱ꞌa kusɨɨ̱‑gá ini̱‑ro̱ jínáꞌan‑ró jíín Cristo Jesús ja̱ sɨkɨ́ rúu̱, chi̱ jaa̱ tuku‑ri̱ nuu̱‑ro̱.
\v 27 Máni ná káka kuu va̱ꞌa‑ró jínáꞌan‑ró, nátu̱ꞌun kánúú máá sɨkɨ́ túꞌun va̱ꞌa Cristo, náva̱ꞌa va̱sa ná jáa̱‑ri̱ te kuni̱‑ri̱ nuu̱‑ro̱, xí va̱sa ná kúnchaa̱ jíká‑rí, ko kuni tu̱ꞌun‑ri̱ róó ja̱ káꞌi̱in ni̱ꞌin‑ró jíín ɨ́ɨn‑ni xini̱, te jíín já ɨ́ɨn káꞌnu‑ni kásátiñu ni̱ꞌin‑ró sɨkɨ́ túꞌun va̱ꞌa ja̱ kákandíja‑yó.
\v 28 Te ma̱ yúꞌú kutɨ‑ro sáꞌa ja̱ kájito uꞌu̱ róó, chi yu̱án kúu tu̱ꞌun ja̱ náa íi̱ máá jínáꞌan, ko róó, a ka̱ku‑ró jínáꞌan‑ró, chi ya̱ꞌá sáꞌa Dios.
\v 29 Chi ni̱ ja̱ꞌa Cristo uu̱ tu̱ꞌun nuu̱‑ro̱ jínáꞌan‑ró. Nasu̱ máá ɨ́ɨn ja̱ ná kándíja‑ró núu̱‑yá, chi̱ suni ja̱ ná ndóꞌo‑ró já sɨkɨ́ máá‑yá.
\v 30 Te suni kándoꞌo‑ró nátu̱ꞌun ni̱ kajini̱‑ro̱ já ndóꞌo‑ri̱, te vina a ni̱ ka̱jini tu̱ꞌun‑ró já jíku jíín‑rí.

\c 2
\s Ja̱ ní sásúchí‑yá máá‑yá
\p
\v 1 Núsáá te jíín túꞌun ndéé íó ini̱ Cristo, jíín túꞌun kúndáꞌú ini̱‑ya̱ yóó skandá‑ya̱ róó, jíín túꞌun ja̱ káꞌi̱o ɨɨn núú‑ró iní máá Espíritu, jíín túꞌun mani̱ iní‑ro̱ jíín‑i, jíín já jíto ndáꞌú‑ro̱
núu̱‑í.
\v 2 Jíín táká tu̱ꞌun yáꞌa ná kúkuu‑ró, náva̱ꞌa kusɨɨ̱ xáa̱n iní‑ri̱. Te ɨɨn‑ni ná káa xini̱‑ro̱. Te ɨɨn‑ni ná kúndáꞌú ini̱‑ro̱ táꞌan‑ró. Te ɨɨn‑ni ná kóo ini̱‑ro̱ jíín ɨ́ɨn‑ni ná káni ini̱‑ro̱.
\v 3 Tú ni ɨɨn ndatíñu sáꞌa‑ró já kuátáꞌan‑ró, xí já sávixi̱‑ro̱ máá‑ró, chi̱ sua ná kóo súchí iní‑ro̱ jínáꞌan‑ró, te ná táva‑ro cuenta ja̱ váꞌa‑ga̱ kúu táꞌan‑ró vásá máá‑ró.
\v 4 Te ma̱ kóto‑ró tíñu ja̱ kúu máá‑ró jínáꞌan‑ró, chi̱ suni ná kóto‑ró tíñu ja̱ kúu táꞌan‑ró.
\v 5 Ná káni ini̱‑ro̱ jínáꞌan‑ró nátu̱ꞌun ni̱ jani ini̱ Cristo Jesús.
\v 6 Te máá‑yá ni̱ ka̱a‑ya̱ nátu̱ꞌun Dios, ko tú ní ndío ini̱‑ya̱ já jíín fuerza nduu ɨɨn núú‑yá jíín Dios.
\v 7 Ko ni̱ sía̱‑ya̱ máá‑yá, te ni̱ nduu‑ya̱ nátu̱ꞌun kánda̱a mozo, ni̱ kaku‑ya̱ nátu̱ꞌun jíto cha̱a.
\v 8 Te nuu̱ ní kenda‑ya̱ nátu̱ꞌun jíka cha̱a, te ni̱ sásúchí‑yá máá‑yá. Te ni̱ jandatu̱‑ya̱ ondé ni̱ jiꞌi̱‑ya̱, va̱sa ni̱ jiꞌi̱‑ya̱ jiká cruz.
\v 9 Ja̱ yúán ní nduñáꞌnu luu xaa̱n‑yá ni̱ sáꞌa Dios, te nuu̱ Jesús ni̱ ja̱ꞌa Dios ɨɨn sɨ́ꞌvɨ́ kánúú núu̱ táká‑ga̱ sɨ́ꞌvɨ́.
\v 10 Náva̱ꞌa jíín sɨ́ꞌvɨ́ Jesús ná júkuiñi̱ jítɨ́ táká ja̱ káꞌi̱in ini̱ andɨ́vɨ́, jíín já káꞌi̱in nuu̱ ñúꞌun, jíín já káꞌi̱in chi̱i ñuꞌun,
\v 11 te ta̱ká yuꞌu kaꞌa̱n ndaa̱ ja̱ Jesucristo kúu máá Jítoꞌo̱. Yu̱án kánakana jaa‑ún máá Táa̱‑yo̱ Dios.
\v 12 Ñáni̱ máni̱, nene̱ nátu̱ꞌun ni̱ ka̱jandatu̱‑ro̱ núu̱‑rí kɨvɨ̱ ní kandii̱‑ri̱ nuu̱‑ro̱, te suni súan vaꞌa̱‑ga̱ ni̱ ka̱sáꞌa‑ró vína va̱sa jíká ní kanchaa̱‑ri̱, núsáá te vina ná sátiñu va̱ꞌa‑ró náva̱ꞌa ná kée va̱ꞌa ja̱ náma‑ró máá‑ró. Te jíín túꞌun yúꞌú, tu̱ꞌun kɨ́sɨ‑i róó, ná sáꞌa‑ró.
\v 13 Chi̱ Dios kúu Iꞌa̱ sátiñu jíín‑ró náva̱ꞌa ná sáꞌa‑ró ndasa kuní maá‑yá, jíín ndása kúsɨɨ̱ iní máá‑yá.
\v 14 Ma̱ kútuku ini̱‑ro̱ jíín tíñu kásáꞌa‑ró, ni ma̱ kána̱á‑ro̱ jíín táꞌan‑ró.
\v 15 Náva̱ꞌa tú na̱ún náku̱xndíi‑ya̱ sɨkɨ́‑ro̱. Te ma̱ kɨ́vɨ nduu̱‑ro̱ jíín tíñu ñáá. Te kuu‑ró séꞌe Dios, ña̱yɨvɨ tú chaꞌa̱n, va̱sa kájika kuu‑ró máꞌñú ñáyɨvɨ yákua yoꞌo̱ ini̱, jíín máꞌñú ñáyɨvɨ níꞌin ini̱. Te ma̱ꞌñú ñáyɨvɨ‑ún kástúu̱n‑ro̱ nátu̱ꞌun lámpara ini̱ ñu̱yɨ́vɨ.
\v 16 Kutɨɨn ni̱ꞌin‑ró túꞌun ja̱ kúchaku̱‑ro̱ jíín, náva̱ꞌa kusɨɨ̱ iní‑ri̱ kɨvɨ̱ ndíi Cristo. Yúan‑na te kuni̱‑ri̱ ja̱ ná tú ní jíka kuu sáni‑ri̱, ni tú ní kána sáni tai̱n‑rí.
\v 17 Te nú ni̱ jatɨ nɨñi̱‑rí ja̱ ndúkú‑rí skándíja‑ga̱‑ri̱ róó, yu̱án kúu nátu̱ꞌun ni̱ soko̱‑rí máá‑rí nuu̱‑yá. Yu̱án kúsɨɨ̱ iní máá‑rí, te suni kúsɨɨ̱ iní‑ri̱ onde̱ jíín táká róó jínáꞌan‑ró.
\v 18 Te suni súan ná kúsɨɨ̱ iní máá‑ró jínáꞌan‑ró, te ná kúsɨɨ̱ iní‑ro̱ ondé jíín rúu̱.
\s Tu̱ꞌun Timoteo jíín Epafrodito
\p
\v 19 Ko ñúkuu ini̱‑ri̱ ja̱ ná kuáꞌa máá Jítoꞌo̱‑yo̱ Jesús tu̱ꞌun, te tájí yachí‑ri̱ Timoteo jaa̱‑de nuu̱‑ro̱, náva̱ꞌa ná ndúndéé iní‑ri̱ nú ni̱ jini̱‑ri̱ ndasa káꞌi̱o‑ró.
\v 20 Chi̱ tú kutɨ ɨngá cha̱a íó yáꞌa ja̱ ɨ́ɨn‑ni xini̱ kúñava̱ꞌa jíín‑rí nátu̱ꞌun máá‑de, ja̱ kuítú iní koto ñúkúún róó.
\v 21 Chi ta̱ká‑de kándúkú‑de ja̱ kúu máá‑de, ko nasu̱ já kúu Cristo Jesús.
\v 22 Ko a ni̱ kajini̱‑ro̱ já bueno sáꞌa Timoteo. Nátu̱ꞌun se̱ꞌe jíín táa̱‑i, suni súan ni̱ kuu játíñu‑de jíín‑rí jáni‑de tu̱ꞌun va̱ꞌa.
\v 23 Núsáá te ñúkuu ini̱‑ri̱ tájí‑rí cha̱a yáꞌa jaa̱‑de nuu̱‑ro̱, te nú ni̱ jini̱‑ri̱ ndasa kuaꞌa̱n tiñu jíku‑ri̱ jíín.
\v 24 Te jáni ndija ini̱‑ri̱ ja̱ kuáꞌa máá Jítoꞌo̱‑yo̱ túꞌun, ja̱ súni máá‑rí jaa̱ yachi̱‑ri̱ nuu̱‑ro̱.
\v 25 Ko ni̱ jani ini̱‑ri̱ ja̱ kánúú tájí‑rí ñani̱‑ri̱ Epafrodito jaa̱‑de, chi cha̱a sátiñu jíín‑rí kúu‑de, te chíndéé táꞌan‑de jíín‑rí. Te suni ndajáꞌa̱ máá‑ró ní kuu‑de sáá. Te suni játíñu‑de nuu̱‑rí ta̱ká nuu̱
nándɨꞌɨ‑ri̱‑de.
\v 26 Chi ni̱ kuu xaa̱n iní‑de ja̱ kuní‑de nuu̱‑ro̱ jínáꞌan‑ró núú. Te ni̱ kukuíꞌa̱ ini̱‑de, chi̱ a ni̱ ka̱jini tu̱ꞌun‑ró já ní kuꞌu̱‑de.
\v 27 Chi ja̱ndáa̱ ni̱ kuꞌu̱‑de ja̱ á yani kuu̱‑de núú, ko Dios, ni̱ kundáꞌú ini̱‑ya̱‑dé, ko nasu̱ máá ɨ́ɨn‑de, chi̱ onde̱ ruu̱, náva̱ꞌa tú kaa‑ga̱ kukuíꞌa̱ ini̱‑ri̱ núú.
\v 28 Núsáá te jítú iní‑ri̱ ni̱ tájí‑rí‑de kujaa̱‑de nuu̱‑ro̱, náva̱ꞌa ná kuní‑ro̱ núu̱‑dé jínáꞌan‑ró. Te ndusɨɨ̱ túku ini̱‑ro̱, te ruu̱ tuká ndukuíꞌa̱ ndásɨ́ iní‑ri̱.
\v 29 Núsáá te kuatáꞌú‑ró‑de, chi̱ kándíja‑de nuu̱ máá Jítoꞌo̱‑yo̱, te ná kóo sɨɨ̱ iní‑ro̱, te kaꞌa̱n jíñúꞌún‑ró jíín cháa ja̱ kánda̱a nátu̱ꞌun káa‑de.
\v 30 Chi̱ a yani kuu̱‑de núú, ja̱ sɨkɨ́ tíñu máá Cristo. Te va̱sa ní jíꞌi̱‑de ko a ni̱ skíkuu‑de tiñu ja̱ tú ní síjínu máá‑ró já kúu ruu̱.
\c 3
\s Na̱ sɨkɨ̱ ndúkú ndéé‑yó
\p
\v 1 Te ɨɨn‑na̱ tu̱ꞌun íó ñáni̱. Ná kúsɨɨ̱ iní‑ro̱ jíín máá Jítoꞌo̱‑yo̱. Chi̱ ruu̱, ja̱ndáa̱, tú kúnɨ́nɨ iní‑ri̱ chaa‑ri̱ suni suni‑ni tu̱ꞌun‑ún nuu̱‑ro̱, ko súan íó seguro‑ga̱ ja̱ kúu róó.
\v 2 Ma̱ kóto‑ró núu̱ tíꞌina̱. Ma̱ kóto‑ró núu̱ ñáyɨvɨ kásáꞌa tiñu ñáá. Ma̱ kóto‑ró núu̱ cháa ni̱ kaxɨtɨ̱ ndúu̱.
\v 3 Chi̱ yóó kákuu cha̱a ni̱ kaxɨtɨ̱ ndúu̱ ndija. Te jíín iní jíín añú‑yo̱ káchiñúꞌún‑yó Dios. Te kákusɨɨ̱ iní‑yo̱ jíín Cristo Jesús. Chi̱ tú káchiñúꞌún‑yó máá‑yó.
\v 4 Te nú ndé cha̱a jáni ini̱‑de ja̱ kúu chiñúꞌún‑de máá‑de, te suni ruu̱ víꞌí‑gá sáꞌa‑ri̱ núú, chi̱ suni ruu̱ chiñúꞌún‑rí máá‑rí nú súan íó núú.
\v 5 Chi ni̱ xɨtɨ̱ ndúu̱ ruu̱ nuu̱ uná kɨvɨ̱. Te suni tata̱ Israel kúu‑ri̱. Te suni táꞌan tata̱ Benjamín kúu‑ri̱. Te suni hebreo se̱ꞌe hebreo kúu‑ri̱. Te suni ni̱ chiñúꞌún‑rí ley ja̱ káchiñúꞌún fariseo.
\v 6 Te ni̱ jítú iní‑ri̱ ni̱ chindiki̱n‑ri̱ tɨkuꞌni̱ ni̱ sáꞌa ndɨva̱ꞌa‑ri̱ jíín‑i. Te tú ní náku̱xndíi ni ɨɨn ley sɨkɨ̱‑rí, chi ni̱ skíkuu ndaa̱‑ri̱.
\v 7 Ko ta̱ká tiñu ja̱ kúndéé‑rí jíín núú, tú sáꞌa‑ri̱ cuenta jíín‑ún vína, chi̱ vaꞌa̱‑ga̱ ná náa‑ún, te ná chíñúꞌún‑rí Cristo jáni ini̱‑ri̱.
\v 8 Te ja̱ndáa̱, chi̱ jáni ini̱‑ri̱ ja̱ váꞌa‑ga̱ ná náa táká tiñu‑ún, náva̱ꞌa ná kuní va̱ꞌa‑ri̱ ja̱ kúu tu̱ꞌun Jitoꞌo̱‑ri̱ Cristo Jesús, chi̱ jia̱n kúu ja̱ kánúú‑gá. Te ja̱ sɨkɨ́ máá‑yá ni̱ xnáa‑rí ta̱ká tiñu, te jáni
ini̱‑ri̱ ja̱ máni kuayo kúu. Súan sáꞌa‑ri̱ náva̱ꞌa kundéé‑rí najaa̱‑ri̱ nuu̱ Cristo,
\v 9 te náva̱ꞌa ɨɨn kɨvɨ̱ te a jiní‑ri̱ ja̱ kándee‑ri̱ chi̱i Cristo. Ko nasu̱ já sándaa̱‑ri̱ máá‑rí jíín ley, chi̱ sua ja̱ kéndo̱o ndaa̱‑ri̱ sáꞌa Dios jíín túꞌun kándíja‑ri̱, chi̱ kándíja‑ri̱ nuu̱ Cristo,
\v 10 náva̱ꞌa kuni̱ va̱ꞌa‑ri̱ nuu̱‑yá, te kuni̱‑ri̱ ndasa káa fuerza naschakú‑ya̱ yóó, te suni ndoꞌo taꞌa̱n‑ri̱ jíín‑yá, te suni nduu‑ri̱ nátu̱ꞌun káa máá‑yá jíín túꞌun ja̱ ní jiꞌi̱‑ya̱.
\v 11 Chi̱ sanaa te súan kundéé‑rí nachaku̱‑ri̱ ma̱ꞌñú ndɨ́yi.
\v 12 Te cháꞌa̱n‑ga̱ kundéé‑rí, ni té cháꞌa̱n‑ga̱ yija‑ri̱. Ko ndúkú ndéé‑rí kuaꞌa̱n‑ri̱ náva̱ꞌa ná níꞌi̱n‑rí tu̱ꞌun‑ún, chi ja̱ yúán kúu ja̱ ní niꞌi̱n Cristo Jesús ruu̱.
\v 13 Ñáni̱ jínáꞌan‑ró, ruu̱ na̱ tú sáꞌa‑ri̱ cuenta ja̱ á ni̱ kundéé‑rí jíín. Ko máni xnáa‑rí ini̱‑ri̱ ta̱ká ja̱ ní kuu ichi yatá, te skáa̱‑ga̱‑ri̱ ichi núu̱‑rí kuaꞌa̱n‑ri̱ jíín.
\v 14 Te ndúkú ndéé‑rí kuaꞌa̱n‑ri̱ ná jáa̱‑ri̱ onde̱ nuu̱ íó ku̱ꞌa, náva̱ꞌa kundéé‑rí niꞌi̱n‑rí premio ja̱ kuáꞌa Dios, chi̱ kana‑ya̱ xiní‑rí kiꞌi̱n‑ri̱ ichi nínu onde̱ jíín Cristo Jesús.
\v 15 Te ndé yóó ni̱ yija‑yó, te súan ná kóo xini̱‑yo̱ núsáá. Te nú ndé róó sɨ́ɨn xini̱ káñava̱ꞌa‑ró, suni ya̱ꞌá ná stáꞌa̱n Dios nuu̱‑ro̱.
\v 16 Ko nú ndasa ni̱ kundéé‑yó ní skuáꞌa‑yó, súan ná káka‑yó, te suni ɨɨn‑ni ná kóo xini̱‑yo̱.
\v 17 Ñáni̱, ná ndáku‑ró rúu̱ jínáꞌan‑ró, te kunchaa̱ nuu̱‑ro̱ ñáyɨvɨ kájika súan nátu̱ꞌun ichi ní stáꞌa̱n‑ri̱ nuu̱‑ro̱.
\v 18 Chi̱ kuaꞌa̱ ñáyɨvɨ kájika kuu‑i ichi ñáá, te tɨnɨ̱ jínu ni̱ jani‑ri̱ tu̱ꞌun ña̱yɨvɨ yúan nuu̱‑ro̱. Te suni káꞌa̱n ndéꞌe̱‑ri̱ jíín‑ró vína, ja̱ máá‑i kákuu ña̱yɨvɨ kájito uꞌu̱‑i tu̱ꞌun ja̱ ní jiꞌi̱ Cristo jika̱ cruz.
\v 19 Te ɨɨn kɨvɨ̱ te naa íi̱ ñáyɨvɨ‑ún, te ndɨꞌɨ‑i. Chi̱ máni chíñúꞌún‑i toko‑í. Te kúsɨɨ̱ iní‑i jíín túꞌun ja̱ kúka nuu̱ iní‑i sáꞌa núú. Te kaní ini̱‑i ndéꞌé‑i nuu̱ ndátíñu íó ini̱ ñu̱yɨ́vɨ.
\v 20 Ko ñuu̱ máá‑yó kúu onde̱ andɨ́vɨ́. Te suni onde̱ yúan káinda̱tu‑yó ndíi máá Jítoꞌo̱‑yo̱ Jesucristo, Iꞌa̱ nama yóó.
\v 21 Te máá Iꞌa̱‑ún, nasama‑ya̱ yíkɨ kúñu ndáꞌú‑yo̱, náva̱ꞌa nduu nátu̱ꞌun káa yikɨ kúñu ndíi ncháa̱ máá‑yá. Chi̱ Dios kúu kaꞌnu̱‑ya̱ táká ja̱ íó, te suni jíín fuerza‑ya̱ sáꞌa‑ya̱‑ún.
\c 4
\s Nene̱ ná kúsɨɨ̱ iní‑yo̱
\p
\v 1 Ñáni̱ máni̱ jínáꞌan‑ró, súan ná kuíñi ni̱ꞌin‑ró jíín máá Jítoꞌo̱‑yo̱, chi̱ kúu ini̱‑ri̱ róó, te kúsɨɨ̱ iní‑ri̱ jíín‑ró, te róó kúu nátu̱ꞌun premio‑ri̱.
\v 2 Te káꞌa̱n nda̱ꞌú‑ri̱ jíín Evodia, te káꞌa̱n nda̱ꞌú‑ri̱ jíín Síntique ja̱ ná kóo ɨɨn‑ni xini̱‑ñá jínáꞌan‑ña, nátu̱ꞌun kuní máá Jítoꞌo̱‑yo̱.
\v 3 Te nuu̱ róó Timoteo, suni káꞌa̱n nda̱ꞌú‑ri̱ jíín‑ró, chi cha̱a ni̱ chindéé táꞌan va̱ꞌa jíín‑rí kúu‑ró, te ná kuáꞌa núu‑ró ndáꞌa núu̱ ñáꞌan yáꞌa, chi ni̱ ka̱sátiñu ni̱ꞌin‑ña jíín‑rí ni̱ jani‑ri̱ tu̱ꞌun va̱ꞌa sáá, te suni onde̱ jíín Clemente jíín sáva‑ga̱ ña̱yɨvɨ kásátiñu jíín‑rí, chi̱ sɨ́ꞌvɨ́ ñáyɨvɨ yúan a káyo̱so núu̱ lista ña̱yɨvɨ kúchaku̱ nɨ́ɨ́ káni.
\v 4 Nene̱ ná kúsɨɨ̱ iní‑ro̱ jínáꞌan‑ró núu̱ máá Jítoꞌo̱‑yo̱. Ɨnga̱ jínu káꞌa̱n‑ri̱ jíín‑ró: Ná kúsɨɨ̱ iní‑ro̱.
\v 5 Kaꞌa̱n mani̱‑ro̱ jínáꞌan‑ró náva̱ꞌa ná kuichá tu̱ꞌun kiꞌi̱n nuu̱ táká ña̱yɨvɨ já súan káa máá‑ró. Máá Jítoꞌo̱‑yo̱ a ni̱ kuyani‑ya̱.
\v 6 Ma̱ nándɨꞌɨ ini̱‑ro̱ sɨkɨ́ ní ɨɨn. Ko ná káꞌa̱n‑ro̱ jíín Dios onde̱ jíín túꞌun kánakuatáꞌú‑ró, jíín túꞌun kájika̱n taꞌu̱‑ro̱, jíín túꞌun kákaꞌa̱n nda̱ꞌú‑ro̱, náva̱ꞌa ná kuní‑ya̱ ndéja̱ kuní máá‑ró.
\v 7 Yúan‑na te Dios kua̱ꞌa‑ya̱ túꞌun vindáa̱ vinené ini̱ añú‑ro̱ jíín xiní‑ro̱. Va̱sa tú kájuku̱ꞌun ini̱‑ro̱ ndasa sáꞌa‑ya̱‑ún, te koto‑ya̱ róó onde̱ jíín Cristo Jesús.
\v 8 Ñáni̱, máá ɨ́ɨn‑na̱ tu̱ꞌun íó. Tu̱ꞌun yáꞌa ná kúndee xini̱‑ro̱: Ta̱ká tu̱ꞌun ndija, ta̱ká tu̱ꞌun jíñúꞌún, ta̱ká tu̱ꞌun ndaa̱, ta̱ká tu̱ꞌun ndoo, ta̱ká tu̱ꞌun mani̱ iní, ta̱ká tu̱ꞌun ja̱ játúꞌún‑i, ta̱ká nuu̱ íó ja̱ váꞌa, jíín táká ja̱ kúu nakana jaa‑yó‑yá sáꞌa, yu̱án ná núku̱ꞌun ini̱‑ro̱.
\v 9 Ta̱ká tu̱ꞌun ja̱ ní ka̱kutu̱ꞌa‑ró, jíín túꞌun ni̱ kaniꞌi̱n‑ro̱, jíín túꞌun ni̱ ka̱jini so̱ꞌo‑ró, jíín tíñu ni̱ kajini̱‑ro̱ sáꞌa máá‑rí, ta̱ká yu̱án ná sáꞌa máá‑ró. Yúan‑na te máá Dios, Iꞌa̱ jáꞌa tu̱ꞌun vindáa̱ vinené, koo‑ya̱ jíín‑ró.
\v 10 Ko kúsɨɨ̱ xáa̱n iní‑ri̱ jíín máá Jítoꞌo̱‑yo̱, chi̱ vina, va̱sa kuéé, ko ni̱ kanu̱ku̱ꞌun ini̱‑ro̱, te ni̱ ka̱chindéé‑ró rúu̱. Chi̱ súan sáꞌa‑ró kuní‑ro̱ núú, ko tú ní íó modo.
\v 11 Nasu̱ já ndáꞌú táꞌa̱n‑ri̱ káꞌa̱n‑ri̱, chi̱ ruu̱, a ni̱ skuáꞌa‑ri̱ ka̱an‑ri̱ jíín nú ndasa‑ni táꞌa̱n‑ri̱.
\v 12 Jiní‑ri̱ kuchaku̱ ndáꞌú‑ri̱, te jiní‑ri̱ kuchaku̱ kúká‑rí. Ndɨꞌɨ ni̱ skuáꞌa‑ri̱, te a ni̱ ka̱an‑ri̱ jíín táká, nú ja̱ ndáꞌa̱ chi̱i‑ri̱, nú ja̱ yítaꞌa̱n nuu̱‑rí, nú ja̱ kúñava̱ꞌa kuaꞌa̱‑rí, xí já táꞌa̱n ndáꞌú‑ri̱.
\v 13 Ndɨꞌɨ‑ni kúu sáꞌa‑ri̱, chi̱ máá Cristo jáꞌa‑ya̱ fuerza ini̱‑ri̱.
\v 14 Ko bueno ni̱ sáꞌa‑ró já ní jito taꞌa̱n‑ro̱ túndóꞌo jíín‑rí.
\v 15 Te róó, ña̱yɨvɨ ñúu̱ Filipos, suni a kájini̱‑ro̱ já ní ɨɨn tɨkuꞌni̱ tú ní kájito táꞌan jíín‑rí ja̱ kuáꞌa yaku̱ na̱jíín kútaꞌu̱‑rí, chi̱ máni róó jínáꞌan‑ró onde̱ kɨvɨ̱ ní kejáꞌá‑rí jáni‑ri̱ tu̱ꞌun va̱ꞌa ná ni̱ kenda‑ri̱ va̱i‑ri̱ ñuu̱ Macedonia.
\v 16 Chi̱ onde̱ ná kándee‑ga̱‑ri̱ ñuu̱ Tesalónica ni̱ ka̱tájí‑ró yakú ja̱ jínu ñúꞌún‑rí, ni̱ jaa̱ ɨɨn uu̱ jínu.
\v 17 Nasu̱ ndúkú‑rí ja̱ kuáꞌa‑ró núu̱‑rí núú, chi̱ ndúkú‑rí ja̱ ná ndeá‑ga̱ taꞌu̱‑ro̱ núu̱‑yá.
\v 18 Te a ñáva̱ꞌa‑ri̱ ta̱ká ja̱ jínu ñúꞌún‑rí, te sobra‑ga̱ íó. Te a ñúꞌun chítú iní ndaꞌa‑rí, chi ni̱ niꞌi̱n‑rí ja̱ ní ka̱tájí‑ró vái jíín Epafrodito. Te kúsɨɨ̱ iní Dios sáꞌa, chi̱ nátu̱ꞌun ni̱ kasoko̱ váꞌa‑ró núu̱‑yá, te asu̱n jáꞌa̱n.
\v 19 Te Dios máá‑rí, ná nákua̱ꞌa‑ya̱ núu̱‑ro̱ táká ja̱ nándɨꞌɨ‑ró, chi̱ kúká máá‑yá jíín túꞌun ja̱ váꞌa ja̱ lúu íó ini̱ Cristo Jesús.
\v 20 Te nuu̱ máá Táa̱‑yo̱ Dios ná nákana jaa‑yó‑yá nɨ́ɨ́ káni nɨ́ɨ́ kuiá. Súan ná kóo. Amén.
\v 21 Ná sándéé iní ta̱ká ña̱yɨvɨ káꞌi̱o ndoo ni̱ sáꞌa Cristo Jesús, achi̱‑ro̱ kúni‑i. Te ñani̱‑yo̱ já káxiu̱kú jíín‑rí yáꞌa kákaꞌa̱n ja̱ ná sándéé iní‑ro̱ jínáꞌan‑ró.
\v 22 Te ta̱ká ña̱yɨvɨ ndóo kákaꞌa̱n‑i ja̱ ná sándéé iní‑ro̱ jínáꞌan‑ró. Te ni̱ kaa‑ga̱ kákaꞌa̱n ña̱yɨvɨ káxiu̱kú véꞌe César.
\v 23 Tu̱ꞌun luu íó ini̱ máá Jítoꞌo̱‑yo̱ Jesucristo, ná kóo jíín táká róó jínáꞌan‑ró. Amén.