\id COL
\h Colosenses
\toc1 Colosenses
\mt2 LA EPISTOLA DEL APOSTOL SAN PABLO A LOS COLOSENSES
\mt YAꞌA KUU CARTA JA NI CHAA SAN PABLO APOSTOL NUU ÑAYƗVƗ ÑUU COLOSAS
\c 1
\p
\v 1 Máá‑rí Pablo kúu apóstol Jesucristo, chi̱ súan ni̱ jataꞌa̱n ini̱ Dios. Te jíín ñaní‑yo̱ Timoteo,
\v 2 káchaa‑ri̱ tutu̱ yáꞌa nuu̱ ñáyɨvɨ ndóo, jíín núu̱ ñaní‑yo̱ kákandíja nuu̱ Cristo ja̱ káxiu̱kú‑i ini̱ ñuu̱ Colosas. Tu̱ꞌun luu jíín túꞌun kuakáꞌnu ini̱ íó ini̱ máá Táa̱‑yo̱ Dios, jíín iní máá Jítoꞌo̱‑yo̱ Jesucristo, ná kóo jíín‑ró jínáꞌan‑ró.
\s Tu̱ꞌun ni̱ jika̱n taꞌu̱ Pablo nuu̱ Dios jaꞌa̱ máá‑i
\p
\v 3 Nene̱ kájika̱n taꞌu̱‑rí jaꞌa̱ róó jínáꞌan‑ró. Te kánakuatáꞌú‑rí nuu̱ Dios Táa̱ Jitoꞌo̱‑yo̱ Jesucristo.
\v 4 Chi ni̱ ka̱jini tu̱ꞌun‑ri̱ róó ja̱ kákandíja va̱ꞌa‑ró núu̱ Cristo Jesús, jíín ndasa kájito ndáꞌú‑ro̱ núu̱ táká ña̱yɨvɨ ndóo,
\v 5 chi̱ káñukuu ini̱‑ro̱ níꞌi̱n‑ro̱ já yíva̱ꞌa onde̱ andɨ́vɨ́. Tu̱ꞌun yúan a ni̱ ka̱jini tu̱ꞌun‑ró, chi̱ súan káꞌa̱n ndaa̱ tu̱ꞌun va̱ꞌa.
\v 6 Chi tu̱ꞌun‑ún, a ni̱ jaa̱ nuu̱‑ro̱ jínáꞌan‑ró, nátu̱ꞌun nuu̱ nɨ́ɨ́ ñúyɨ́vɨ, chi̱ níꞌi̱n tíñu te ndeá kuaꞌa̱n, suni nátu̱ꞌun ni̱ sáꞌa jíín‑ró ondé kɨvɨ̱ ní ka̱jini so̱ꞌo‑ró. Te ni̱ ka̱juku̱ꞌun ndija ini̱‑ro̱ túꞌun luu íó ini̱ Dios,
\v 7 nátu̱ꞌun ni̱ kutu̱ꞌa‑ró ní sáꞌa Epafras. Mozo taꞌa̱n jíín‑yó kúu‑de. Te kúmani̱‑yo̱ jíín‑de. Te cha̱a‑ún játíñu va̱ꞌa‑de nuu̱ Cristo ja̱ sɨkɨ́ róó jínáꞌan‑ró.
\v 8 Cha̱a‑ún, ni̱ kastu̱ꞌún‑de tu̱ꞌun‑ró núu̱‑rí ndasa kákundáꞌú ini̱ táꞌan‑ró sáꞌa Espíritu.
\v 9 Ja̱ yúán rúu̱ jínáꞌan‑ri̱, suni tú kájukuiñi̱‑ri̱ ja̱ kájika̱n taꞌu̱‑rí jaꞌa̱‑ro̱ núu̱‑yá onde̱ kɨvɨ̱ ní ka̱jini tu̱ꞌun‑ri̱ tu̱ꞌun‑ún. Te kájika̱n‑ri̱ nuu̱‑yá já ná kuní ndɨꞌɨ‑ró ndasa játaꞌa̱n ini̱ máá‑yá, te ná
kuní‑ro̱ táká tu̱ꞌun ndíchí jíín túꞌun júku̱ꞌun va̱ꞌa ini̱‑ro̱ sáꞌa Espíritu,
\v 10 náva̱ꞌa ná káka kuu luu‑ró, nátu̱ꞌun kuní máá Jítoꞌo̱‑yo̱, te ná kúsɨɨ̱ váꞌa ini̱‑ya̱ sáꞌa‑ró jíín táká‑ni, te na̱ni tiñu va̱ꞌa jíku‑ró jíín, ná níꞌi̱n tíñu, te ná júku̱ꞌun‑ga̱ ini̱‑ro̱ sɨkɨ́ Dios.
\v 11 Te va̱ꞌa téyíí ná yíja ta̱ká fuerza‑ya̱ iní‑ro̱, nátu̱ꞌun káa fuerza luu máá‑yá, náva̱ꞌa ná kóo sɨɨ̱ iní‑ro̱, te káꞌnu koo ini̱‑ro̱, te kua̱ndéé iní‑ro̱.
\v 12 Ná nákuatáꞌú‑ró núu̱ máá Táa̱‑yo̱ Dios ja̱ ní chiꞌi‑ya̱ fuerza yóó náva̱ꞌa niꞌi̱n táꞌa̱n‑yo̱ táꞌu̱‑yo̱ jíín ñáyɨvɨ ndóo ja̱ káꞌi̱in‑i nuu̱ ndíi ncháa̱.
\v 13 Chi ni̱ ndiñiꞌin máá‑yá yóó ini̱ ndaꞌa fuerza ñu̱ñáa, te ni̱ xndɨ́vɨ‑ya̱ yóó ini̱ ñuu̱ nuu̱ táꞌú tíñu Se̱ꞌe‑ya̱, Iꞌa̱ maní‑yá jíín.
\v 14 Te Se̱ꞌe‑ya̱‑ún, chi ni̱ na̱kuaan‑ya̱ yóó jíín nɨñí‑yá. Te ni̱ sáꞌa‑ya̱ túkáꞌnu ini̱‑ya̱ núu̱‑yo̱ jíín kuáchi‑yó.
\s Muestra Dios kúu Jesús
\p
\v 15 Te Se̱ꞌe‑ya̱‑ún kúu muestra Dios, Iꞌa̱ tú jiní ndiji̱n‑yo̱ núu̱. Te xna̱ñúú‑gá Se̱ꞌe‑ún, vásá táká ndatíñu ja̱ ní sáꞌa‑ya̱.
\v 16 Chi̱ jíín máá Séꞌe‑ya̱‑ún kúu ja̱ ní kuva̱ꞌa ta̱ká ndatíñu ja̱ káꞌi̱o andɨ́vɨ́, jíín já káꞌi̱o ini̱ ñu̱yɨ́vɨ já jiní‑yo̱ núu̱ jíín já tú jiní‑yo̱ núu̱, kúu nuu̱ táꞌú tíñu, kúu nuu̱ kúñáꞌnu, kúu ja̱ kátɨ̱ɨn
xini̱, kúu ja̱ kándi̱so tíñu. Ndɨꞌɨ ni̱ kuva̱ꞌa ni̱ sáꞌa Dios jíín máá‑yá, te kúu cuenta máá‑yá.
\v 17 Máá‑yá íó xnaꞌa̱n‑ga̱ vásá ní kuva̱ꞌa ta̱ká ndatíñu, te ta̱ká ndatíñu tɨ́ɨn ni̱ꞌin máá‑yá.
\v 18 Te máá‑yá kúu xini̱ tɨ́kuꞌni̱, te nátu̱ꞌun yikɨ kúñu‑ya̱ kúu‑ún. Máá‑yá kúu nuu̱ kéjáꞌá, te máá‑yá ni̱ nachaku̱ xnaꞌa̱n‑ga̱ ma̱ꞌñú ndɨ́yi, náva̱ꞌa kuñáꞌnu‑ga̱‑ya̱ núu̱ táká‑ni.
\v 19 Chi ni̱ kusɨɨ̱ iní máá Dios ja̱ ñúꞌun táꞌan káꞌnu‑ni‑ya̱ jíín máá Séꞌe‑ya̱,
\v 20 náva̱ꞌa naketáꞌan ta̱ká‑ni jíín Dios sáꞌa‑ya̱ jíín máá Séꞌe‑ya̱. Te jíín nɨñí Séꞌe‑ya̱, Iꞌa̱ ni̱ ndoꞌo jika̱ cruz, te ná kóo paz sáꞌa‑ya̱ sɨkɨ́ máá já káꞌi̱o ini̱ ñu̱yɨ́vɨ jíín já káꞌi̱o andɨ́vɨ́.
\v 21 Te suni súan ni̱ sáꞌa Se̱ꞌe‑ya̱ jíín‑ró, chi̱ sɨ́ɨn sɨkɨ̱ ní kaꞌi̱in‑ró sáá, chi ni̱ ka̱jito uꞌu̱‑ro̱‑yá, te máni tiñu ñáá ni̱ ka̱sáꞌa‑ró núú. Ko vina a ni̱ naskétáꞌan‑ya̱ róó jíín Dios.
\v 22 Ya̱ꞌá ní sáꞌa‑ya̱ jíín yíkɨ kúñu‑ya̱ já ní jiꞌi̱, náva̱ꞌa nasándoo‑ya̱ róó, te ma̱ kúnchaa̱ chaꞌa̱n róó, ni ma̱ kána jíín Dios nuu̱‑ro̱ hora stáꞌa̱n‑ya̱ róó nuu̱ Dios.
\v 23 Súan sáꞌa‑ya̱ nú kuiñi ni̱ꞌin‑ró, te kandíja ndija‑ró, te ni ma̱ nása̱ma ini̱‑ro̱ jíín túꞌun va̱ꞌa káñukuu ini̱‑ro̱ já ní ka̱jini so̱ꞌo‑ró. Chi tu̱ꞌun‑ún a ni̱ jicha̱ nɨ́ɨ́ ñúyɨ́vɨ chíi andɨ́vɨ́. Te ruu̱ Pablo kúu cha̱a játíñu sɨkɨ̱ túꞌun‑ún.
\s Sátiñu Pablo jaꞌa̱ ñáyɨvɨ sɨ́ɨn nación
\p
\v 24 Te kúsɨɨ̱ iní‑ri̱ vina, chi̱ ndóꞌo‑ri̱ ja̱ sɨkɨ́ róó jínáꞌan‑ró. Te skíkuu yikɨ kúñu‑ri̱ ja̱ kúmani̱‑gá ndoꞌo Cristo ini̱ tɨkuꞌni̱ máá‑yá, ja̱ kúu yikɨ kúñu‑ya̱,
\v 25 te suni játíñu‑ri̱ nuu̱‑ún, chi̱ súan ni̱ chaa Dios tiñu sɨkɨ̱‑rí jaꞌa̱ róó, náva̱ꞌa ná káꞌa̱n ndɨꞌɨ‑ri̱ tu̱ꞌun Dios jíín‑ró.
\v 26 Yu̱án kúu máá túꞌun sa̱ꞌí ja̱ ní yisa̱ꞌí onde̱ ná ni̱ kejáꞌá kuiá anáꞌán jíín ñáyɨvɨ. Ko vina a ni̱ stáꞌa̱n ndiji̱n‑ya̱ túꞌun‑ún nuu̱ táká ña̱yɨvɨ ndóo máá‑yá.
\v 27 Chi̱ máá Dios súan ni̱ kuni̱‑ya̱ stáꞌa̱n‑ya̱ núu̱ ñáyɨvɨ‑ún, ndasa kúká káa tu̱ꞌun luu ja̱ ndíso tu̱ꞌun sa̱ꞌí yáꞌa, kuaꞌa̱n nuu̱ ñáyɨvɨ sɨ́ɨn nación. Te tu̱ꞌun‑ún kúu máá Cristo kándee ini̱‑ro̱, jíín já káñukuu ini̱‑ro̱ núu̱ lúu kánchaa̱‑ya̱.
\v 28 Te tu̱ꞌun Iꞌa̱‑ún kúu ja̱ kájani‑ri̱, te kákana jíín‑rí nuu̱ táká ña̱yɨvɨ. Te jíín túꞌun ndíchí kástáꞌa̱n ñúkúún‑rí nuu̱‑í náva̱ꞌa ná yíja va̱ꞌa ta̱ká‑i kuiñi‑i nuu̱ Cristo Jesús sáꞌa‑ri̱.
\v 29 Te ja̱ sɨkɨ́ yúán sátiñu‑ri̱. Te ni̱ꞌin sátiñu‑ri̱ jíín fuerza máá‑yá. Te máá fuerza‑ya̱‑ún kúu ja̱ sátiñu téyíí jíín‑rí.
\c 2
\p
\v 1 Chi̱ kuní‑ri̱ ja̱ ná kuní‑ro̱ ndasa ndɨ́ꞌɨ xaa̱n iní‑ri̱ ja̱ sɨkɨ́ róó jíín sɨkɨ́ táká ña̱yɨvɨ káꞌi̱o ini̱ ñuu̱ Laodicea, jíín sɨkɨ́ táká ña̱yɨvɨ tú kájini̱ kutɨ núu̱‑rí ndasa káa‑ri̱,
\v 2 náva̱ꞌa ná ndúndéé iní añú‑i, te ɨɨn nuu̱ kúnchaka mani̱ táꞌan‑i, te ná júku̱ꞌun ndɨꞌɨ ini̱‑i ta̱ká tu̱ꞌun luu‑ya̱, náva̱ꞌa kuni̱‑i tu̱ꞌun sa̱ꞌí máá Táa̱‑yo̱ Dios te yu̱án kúu cuenta Cristo.
\v 3 Chi̱ ini̱ ndaꞌa máá‑yá yísa̱ꞌí ta̱ká yaka̱ tu̱ꞌun ndíchí, jíín túꞌun ja̱ júku̱ꞌun ini̱‑yo̱ sáꞌa.
\v 4 Te tu̱ꞌun yáꞌa káꞌa̱n‑ri̱ jíín‑ró jínáꞌan‑ró, náva̱ꞌa tú ni ɨɨn cha̱a xndáꞌú‑de róó, ja̱ kándíja‑ró ɨngá tu̱ꞌun tɨ́ɨn yátá.
\v 5 Chi va̱sa kándee jíká máá‑rí, ko nátu̱ꞌun kándee‑ri̱ jíín‑ró, te kúsɨɨ̱ iní‑ri̱ te ndéꞌé‑rí tiñu va̱ꞌa kásáꞌa‑ró, chi̱ ni̱ꞌin kákandíja‑ró núu̱ Cristo.
\v 6 Chi̱ nátu̱ꞌun ni̱ ka̱jatáꞌú‑ró máá Jítoꞌo̱‑yo̱ Jesucristo, súan ná káka‑ró jíín‑yá núsáá.
\v 7 Ná nákuiki̱n yoꞌo‑ro iní‑ya̱. Te ná skuáꞌnu táꞌan‑ró sɨkɨ́‑yá. Te ná yíja va̱ꞌa‑ró jíín túꞌun kándíja, nátu̱ꞌun ni̱ kutu̱ꞌa‑ró. Te ná ndeá‑ga̱‑ro̱ jíín túꞌun‑ún, onde̱ jíín túꞌun nakuatáꞌú‑ró núu̱‑yá.
\s Ini̱ ndaꞌa Cristo ncháá ta̱ká‑ni
\p
\v 8 Koto va̱ꞌa‑ró máá‑ró, náva̱ꞌa tú xndáꞌú ni ɨɨn ña̱yɨvɨ róó, jíín sɨkɨ́ túꞌun ndíchí ñáá, jíín túꞌun vixi̱ sáni, nátu̱ꞌun íó tani̱nu cha̱a, modo kásáꞌa‑de ini̱ ñu̱yɨ́vɨ yáꞌa te tú kásáꞌa‑de ja̱ kuní Cristo.
\v 9 Chi̱ jíín máá‑yá, te ini̱ yikɨ kúñu máá‑yá, ncháá ndɨꞌɨ ta̱ká‑ni ndasa káa Dios.
\v 10 Te káꞌi̱o chítú‑ró jíín Cristo. Te máá‑yá tɨ́ɨn xini̱ táká ja̱ táꞌú tíñu, jíín táká ja̱ kándi̱so tíñu.
\v 11 Te suni jíín máá‑yá ni̱ kaxɨtɨ̱ ndúu̱‑ro̱, ko nasu̱ jíín ndáꞌa ní káxɨtɨ̱ ndúu̱‑ro̱. Te ni̱ chaxio‑ya̱ táká kua̱chi ndíso máá‑ró, chi̱ Cristo nátu̱ꞌun ni̱ xɨtɨ ndúu̱‑ya̱ róó.
\v 12 Chi̱ ɨɨn núú‑ni ni̱ kayu̱ji‑ró jíín‑yá nuu̱ ní ka̱janducha‑ro, te suni yúan ni̱ ka̱nachaku̱‑ro̱ jíín‑yá, chi ni̱ ka̱kandíja‑ró tíñu sáꞌa Dios ja̱ ní naschakú‑ya̱ Jesús ma̱ꞌñú ndɨ́yi.
\v 13 Ko róó, tú káxɨtɨ̱ ndúu̱‑ro̱ núú, te a ni̱ kajiꞌi̱‑ro̱ ní sáꞌa ta̱ká kua̱chi‑ró. Ko ɨɨn káꞌnu‑ni ni̱ ka̱nachaku̱‑ro̱ jíín Cristo ni̱ sáꞌa Dios. Te ni̱ sáꞌa‑ya̱ túkáꞌnu ini̱ nuu̱ táká ja̱ ní ka̱sáñaꞌmu‑ró.
\v 14 Te ni̱ ndaꞌva̱‑ya̱ acta ja̱ tɨ́ɨn suku̱n‑yo̱ te jíto uꞌu̱ yóó núú. Te ni̱ skána‑ya̱, chi̱ nátu̱ꞌun ni̱ stɨ́ɨn‑ya̱‑ún jíín ndúyu ka̱a jika̱ cruz.
\v 15 Te ni̱ tevíchí‑yá ta̱ká ja̱ kátáꞌú tíñu jíín já kándi̱so tíñu, te ni̱ kiñiꞌin ndiji̱n‑ya̱, te ni̱ ka̱kuka nuu̱. Chi ni̱ kundéé‑yá jíín, ni̱ sáꞌa máá cruz.
\v 16 Ja̱ yúán ma̱ kuáꞌa‑ró túꞌun ja̱ náku̱xndíi ni ɨɨn‑i sɨkɨ̱‑ro̱, cuenta sɨkɨ̱ já yee, xí já jíꞌi, xí cuenta kɨvɨ̱ íó viko, xí já núkoso̱ yóo̱, xí sɨkɨ́ kɨvɨ́ ndéta̱tú.
\v 17 Chi yu̱án kúu nátu̱ꞌun ɨɨn kuandaꞌu̱ ta̱ká ndatíñu chaa̱ kuee̱‑ga̱, ko máá jándáa̱ kúu ja̱ cuenta máá Cristo.
\v 18 Ma̱ kuáꞌa‑ró túꞌun ja̱ ní ɨɨn ña̱yɨvɨ kasú‑i nuu̱ táꞌu̱‑ro̱. Chi̱ kásáꞌa‑i ja̱ súchí iní máá‑i, te káchiñúꞌún‑i ta̱ká ndajáꞌa̱‑yá. Te kákɨ̱vɨ nduu̱‑i jíín túꞌun ja̱ tú ní kájini̱ ndiji̱n‑i, te máni kásávixi̱
sáni‑i máá‑i. Chi̱ yúkú xiní máá‑i.
\v 19 Te tú káꞌi̱in ni̱ꞌin‑i jíín máá Iꞌa̱ kúu xini̱. Chi̱ máá‑yá kúu ja̱ skuáꞌnu yikɨ kúñu, chi̱ skée máá‑ún túchi, te ñútáꞌan sáꞌa máá túchi, te jáꞌnu máá sáꞌa Dios.
\v 20 Chi̱ nú ni̱ kajiꞌi̱‑ro̱ jíín Cristo sɨkɨ̱ táká tani̱nu ini̱ ñu̱yɨ́vɨ, te naja̱ kajika‑ga̱‑ro̱ nátu̱ꞌun kájika ña̱yɨvɨ ñúyɨ́vɨ. Te naja̱ kájandatu̱‑ro̱ núu̱ túꞌun yáꞌa:
\v 21 Ma̱ tɨ́ɨn‑ró, ni ma̱ kéꞌé‑ró, ni ma̱ kée‑ro, áchí.
\v 22 Chi ta̱ká tu̱ꞌun‑ún nini kájatíñu máá, te ndɨꞌɨ‑ni naa. Chi̱ máni tu̱ꞌun, máni tani̱nu ja̱ ní jani sáni ini̱ ña̱yɨvɨ kúu‑ún.
\v 23 Kájani ndija ini̱‑i ja̱ túꞌun ndíchí kúu‑ún, chi̱ stétuu‑ún‑i ja̱ níꞌin chiñúꞌún‑i, te sáꞌa ja̱ sásúchí iní, te ni̱ꞌin ndónda máá sɨkɨ́ yíkɨ kúñu, ko tú níꞌi̱n tíñu kutɨ já kasú nuu̱ já kuní máá‑i.
\c 3
\p
\v 1 Núsáá te nú ni̱ ka̱nachaku̱‑ro̱ jíín Cristo, te vaꞌa̱‑ga̱ ná ndúkú‑ró túꞌun andɨ́vɨ́, nuu̱ kánchaa̱ Cristo ichi ndáváꞌa Dios.
\v 2 Ná káni ini̱‑ro̱ sɨkɨ́ túꞌun káꞌi̱o ichi ándɨ́vɨ́, nasu̱ sɨkɨ́ túꞌun káꞌi̱o ini̱ ñu̱yɨ́vɨ.
\v 3 Chi̱ a ni̱ kajiꞌi̱‑ro̱, te vida‑ro̱, a yísa̱ꞌí, jíín Cristo ini̱ Dios.
\v 4 Te Cristo, Iꞌa̱ kúu vida‑ro̱‑ún, te nú kenda ndiji̱n‑ya̱, yúan‑na te suni luu kenda koyo ndiji̱n‑ro̱ jíín‑yá.
\s Cha̱a túꞌú jíín cháa jáá
\p
\v 5 Ná kasú‑ro̱ iní yikɨ kúñu‑ró já káa yúkú, náva̱ꞌa ma̱ sáꞌa téné, ma̱ kóo cháꞌán, ma̱ káni ñáá ini̱, ma̱ ndío ini̱, chi̱ ɨɨn‑ni kúu‑ún jíín já chíñúꞌún ndosó.
\v 6 Chi ja̱ sɨkɨ́ táká tiñu yúan kúu ja̱ kití ini̱ Dios, te ndonda‑ya̱ sɨkɨ́ ñáyɨvɨ níꞌin ini̱.
\v 7 Te suni jíín tíñu‑ún ni̱ ka̱jika‑ró núú, ná ni̱ ka̱sáꞌa‑ró súan.
\v 8 Ko vina ná sía̱‑ro̱ táká tu̱ꞌun yáꞌa núsáá: Tu̱ꞌun kití ini̱, tu̱ꞌun xaa̱n iní, tu̱ꞌun káñáá, túꞌun káꞌa̱n sɨkɨ̱ táꞌan, jíín túꞌun cháꞌán kénda yuꞌu‑ro.
\v 9 Ma̱ xndáꞌú táꞌan‑ró, chi̱ a ni̱ chaxio‑ró cháa túꞌú‑ún kuaꞌa̱n‑de jíín táká tiñu ni̱ sáꞌa‑de.
\v 10 Te ni̱ nuku̱ꞌun‑ró cháa jáá. Chi cha̱a‑ún kua̱juku̱ꞌun ini̱‑de, kua̱ndujáá‑de, nátu̱ꞌun káa máá‑yá ja̱ ní sáꞌa‑ya̱‑dé.
\v 11 Te yúan tú íó sɨ́ɨn ña̱yɨvɨ ñúu̱ Grecia jíín ñáyɨvɨ judío, ni ja̱ ní xɨtɨ́ ndúu̱, te ni ja̱ tú ní xɨtɨ́ ndúu̱, ni ja̱ sɨ́ɨn yuꞌu, te ni ja̱ kúu ña̱yɨvɨ escita, ni ja̱ sátiñu sáni, te ni ja̱ jíka kuu ndicha̱‑na̱, chi̱ Cristo kúu ndɨꞌɨ‑ni, te yíꞌi‑ya̱ iní ta̱ká‑yo̱.
\v 12 Chi ni̱ ka̱ji Dios róó. Te ña̱yɨvɨ ndóo ja̱ maní‑yá jíín kákuu‑ró. Núsáá te nɨ́nɨ kúndáꞌú ini̱‑ro̱ táꞌan‑ró, te kumani̱‑ro̱ jíín táꞌan‑ró, te koo súchí iní‑ro̱, koo paciencia‑ro̱.
\v 13 Kua̱ndéé iní‑ro̱ jíín táꞌan‑ró, te sáꞌa‑ró túkáꞌnu ini̱ nú jikín nuu̱‑ro̱ sɨkɨ́ táꞌan‑ró. Chi̱ nátu̱ꞌun ni̱ sáꞌa Cristo tu̱káꞌnu ini̱‑ya̱ núu̱‑ro̱, te suni súan sáꞌa‑ró jínáꞌan‑ró.
\v 14 Te ja̱ kánúú xáa̱n‑gá nuu̱ táká tu̱ꞌun yáꞌa kúu tu̱ꞌun kundáꞌú ini̱ táꞌan. Chi tu̱ꞌun yúan kúu ja̱ skétáꞌan ta̱ká‑ni jíín já síyíja va̱ꞌa.
\v 15 Te tu̱ꞌun vindáa̱ vinené ja̱ ndíso máá Dios, ná kútɨɨn añú‑ro̱. Chi ja̱ yúán ní kana‑ya̱ xiní‑ro̱ ndúu‑ró ɨ́ɨn‑na̱ ña̱yɨvɨ. Te suni ná nákuatáꞌú‑ró jínáꞌan‑ró.
\v 16 Te tu̱ꞌun Cristo ná kútú ndɨ́ꞌɨ ini̱‑ro̱, jíín ndɨ́ꞌɨ tu̱ꞌun ndíchí. Te stáꞌa̱n‑ro̱ núu̱ táꞌan‑ró. Te kaꞌa̱n nda̱ꞌú‑ro̱ jíín‑i jíín salmo, jíín yáa̱ máá‑yá, jíín yáa̱ Espíritu. Te ichi iní añú‑ro̱ ná káta luu‑ró
núu̱ máá Jítoꞌo̱‑yo̱.
\v 17 Te ta̱ká tiñu kásáꞌa‑ró, nú ja̱ káꞌa̱n‑ro̱, xí já sáꞌa‑ró kúu, ta̱ká ná sáꞌa‑ró jíín sɨ́ꞌvɨ́ máá Jítoꞌo̱‑yo̱ Jesús. Te ná nákuatáꞌú‑ró núu̱ máá Táa̱‑yo̱ Dios sáꞌa Jesús.
\s Tiñu kánúú skíkuu cha̱a jáá
\p
\v 18 Róó ñasɨ́ꞌɨ́, kuandatu̱‑ro̱ núu̱ yíi máá‑ró jínáꞌan‑ró, chi̱ súan játaꞌa̱n ini̱ máá Jítoꞌo̱‑yo̱.
\v 19 Róó yii jínáꞌan‑ró, ná kundáꞌú ini̱‑ro̱ ñásɨ́ꞌɨ́‑ro̱. Te ma̱ ndúu ua̱‑ro̱ jíín‑ña.
\v 20 Róó se̱ꞌe jínáꞌan‑ró, ta̱ká tiñu kuandatu̱‑ro̱ núu̱ táa̱‑ro̱, nuu̱ náa̱‑ro̱. Chi̱ súan kúsɨɨ̱ iní máá Jítoꞌo̱‑yo̱ sáꞌa.
\v 21 Róó táa̱ jínáꞌan‑ró, ma̱ skití ini̱‑ro̱ séꞌe‑ró jínáꞌan‑i, náva̱ꞌa tú kukuíꞌa̱ ini̱‑i.
\v 22 Róó mozo jínáꞌan‑ró, ta̱ká tiñu kuandatu̱‑ro̱ núu̱ patrón‑ro̱ ñúyɨ́vɨ yáꞌa. Ma̱ sáꞌa‑ró tíñu ja̱ kúsɨɨ̱ iní ña̱yɨvɨ ndéꞌé‑i nuu̱, chi̱ sua koo ndaa̱ añú‑ro̱ sáꞌa‑ró, te kuandatu̱‑ro̱ núu̱ Dios.
\v 23 Te ta̱ká tiñu kásáꞌa‑ró, koo ini̱ koo añú‑ro̱ sáꞌa‑ró. Kani ini̱‑ro̱ já núu̱ máá Jítoꞌo̱‑yo̱ kájatíñu‑ró, nasu̱ núu̱ ñáyɨvɨ.
\v 24 Chi̱ a jiní‑ro̱ já máá Jítoꞌo̱‑yo̱ kuáꞌa va̱ꞌa‑ya̱ táꞌu̱‑ro̱ já kúu ya̱ꞌu‑ró. Chi̱ nuu̱ máá Jítoꞌo̱‑yo̱ Jesucristo kájatíñu‑ró.
\v 25 Ko ña̱yɨvɨ sáꞌa tiñu ñáá ndutaꞌu̱ túku‑i ja̱ ní sáꞌa‑i‑ún, chi̱ tú ncháá nuu̱‑yá‑i.
\c 4
\p
\v 1 Róó patrón jínáꞌan‑ró, sáꞌa va̱ꞌa‑ró jíín mozo‑ro̱. Te ɨɨn nuu̱ kóto‑ró núu̱‑í. Chi̱ a kájini̱‑ro̱ já súni káñava̱ꞌa‑ró máá patrón‑ro̱ ándɨ́vɨ́.
\v 2 Ma̱ júkuiñi̱‑ro̱ já jikán taꞌu̱‑ro̱. Te ná nákuatáꞌú‑ró, te koo ndito ini̱‑ro̱ jíín túꞌun‑ún.
\v 3 Te suni hora‑ún kaka̱n taꞌu̱‑ro̱ jáꞌa̱‑rí jínáꞌan‑ri̱, náva̱ꞌa ná kúña Dios ichi káni‑ri̱ tu̱ꞌun, náva̱ꞌa kuu kaꞌa̱n‑ri̱ tu̱ꞌun sa̱ꞌí Cristo, chi ja̱ sɨkɨ́ túꞌun‑ún kúu ja̱ kándee‑ri̱ veka̱a,
\v 4 chi̱ kuní‑ri̱ káꞌa̱n ndiji̱n‑ri̱ nátu̱ꞌun kánúú káꞌa̱n‑ri̱.
\v 5 Kaka kuu ñúkúún‑ró jíín ñáyɨvɨ káꞌi̱in sɨ́ɨn sɨkɨ̱, te ma̱ stɨ́vɨ́‑ró tiempo.
\v 6 Te nene̱ kaꞌa̱n asu̱n‑ro̱, ná jáꞌa̱n ñii̱ túꞌun káꞌa̱n‑ro̱, náva̱ꞌa kuni̱‑ro̱ ndasa kánúú xndíó káni‑ró túꞌun nuu̱ ɨ́ɨn ɨɨn‑i.
\s Tu̱ꞌun ndéé ni̱ chaa Pablo nuu̱‑í
\p
\v 7 Ta̱ká tiñu sáꞌa‑ri̱ ná kástu̱ꞌún Tíquico nuu̱‑ro̱ jínáꞌan‑ró, chi̱ ɨɨn ñani̱ sátiñu jíín‑rí nuu̱ máá Jítoꞌo̱‑yo̱ kúu‑de, te bueno játíñu‑de nuu̱‑yá, te mani̱‑yo̱ jíín‑de.
\v 8 Te ja̱ yúán tájí‑rí cha̱a yáꞌa jaa̱‑de nuu̱‑ro̱, náva̱ꞌa ná kuní‑ro̱ ndasa kuaꞌa̱n tiñu kákuu‑ri̱ jíín, te ndundéé iní añú‑ro̱ sáꞌa‑de.
\v 9 Suni tájí‑rí Onésimo, te mani̱‑rí jíín‑de, chi̱ ñani̱ kándíja va̱ꞌa kúu‑de, te táꞌan máá‑ró kúu‑de. Te ta̱ká ja̱ kúu ichi yáꞌa, ná kástu̱ꞌún‑de nuu̱‑ro̱ jínáꞌan‑ró, ndasa íó.
\v 10 Aristarco, cha̱a kándee taꞌa̱n jíín‑rí veka̱a yáꞌa, sándéé iní‑ro̱ áchí‑de. Te suni súan káꞌa̱n Marcos, saji̱n Bernabé, te sɨkɨ̱ cháa‑ún, a ni̱ táꞌú‑rí tiñu nuu̱‑ro̱. Te nú kujaa̱‑de nuu̱‑ro̱, te kuatáꞌú‑ró‑de.
\v 11 Te suni súan káꞌa̱n Jesús, cha̱a nání Justo. Cha̱a ni̱ kaxɨtɨ̱ ndúu̱ kákuu cha̱a‑ún. Máni cha̱a yáꞌa kákuu cha̱a káchindéé táꞌan‑de jíín‑rí sɨkɨ̱ ñúu̱ nuu̱ táꞌú Dios tiñu, te íó ndéé iní‑ri̱ kásáꞌa‑de.
\v 12 Suni sándéé iní‑ro̱ áchí Epafras, cha̱a kúu táꞌan máá‑ró, te mozo Cristo kúu‑de, te nene̱ jítú iní‑de jikán taꞌu̱‑dé jaꞌa̱‑ro̱ jínáꞌan‑ró, náva̱ꞌa ná yíja‑ró kuíñi‑ró, te náva̱ꞌa ná skíkuu ndɨꞌɨ‑ró tíñu kuní máá Dios.
\v 13 Chi̱ ná káꞌa̱n ndaa̱‑ri̱ tu̱ꞌun‑de nuu̱‑ro̱, ja̱ xáa̱n jítú iní‑de ja̱ kúu róó jínáꞌan‑ró, jíín já kúu ña̱yɨvɨ ñúu̱ Laodicea, jíín já kúu ña̱yɨvɨ ñúu̱ Hierápolis.
\v 14 Lucas, cha̱a táná, ja̱ maní‑yo̱ jíín‑de, jíín Demas, kákaꞌa̱n‑de ja̱ ná sándéé iní‑ro̱.
\v 15 Ná sándéé iní ñani̱‑yo̱, cha̱a káxiu̱kú iní ñuu̱ Laodicea, kachi̱‑ro̱ kúni‑de. Suni súan kaꞌa̱n‑ro̱ jíín Ninfas, jíín tɨ́kuꞌni̱ íó veꞌe‑de.
\v 16 Te nú ni̱ kuu ni̱ ka̱kaꞌu‑ró carta yáꞌa, te suni ná káꞌu tɨkuꞌni̱ ñuu̱ Laodicea sáꞌa‑ró. Te róó, suni ná káꞌu‑ró ɨngá ja̱ ndíi ichi ñúu̱ Laodicea.
\v 17 Te kastu̱ꞌún‑ró núu̱ Arquipo: Ná ndúkú ndéé‑de skíkuu‑de tiñu ni̱ chaa máá Jítoꞌo̱‑yo̱ sɨkɨ́‑dé, achi̱‑ro̱ kúni‑de.
\v 18 Ndaꞌa máá rúu̱ Pablo, ni̱ chaa‑ri̱ tu̱ꞌun yáꞌa ja̱ ná sándéé iní‑ro̱. Te nuku̱ꞌun ini̱‑ro̱ jínáꞌan‑ró já kándee‑ri̱ veka̱a. Te tu̱ꞌun luu íó ini̱ máá‑yá, ná kóo jíín‑ró jínáꞌan‑ró. Súan ná kóo. Amén.