\id 1TH
\h 1 Tesalonicenses
\toc1 1 Tesalonicenses
\mt2 LA PRIMERA EPISTOLA DEL APOSTOL SAN PABLO A LOS TESALONICENSES
\mt YAꞌA KUU CARTA ƗƗN JA NI CHAA PABLO APOSTOL NUU ÑAYƗVƗ ÑUU TESALONICA
\c 1
\p
\v 1 Máá‑rí kákuu Pablo jíín Silvano jíín Timoteo, te káchaa‑ri̱ tutu̱ yáꞌa nuu̱ tɨ́kuꞌni̱ kákandíja ñuu̱ Tesalónica, ja̱ káꞌi̱in‑i nuu̱ máá Táa̱‑yo̱ Dios, jíín núu̱ máá Jítoꞌo̱‑yo̱ Jesucristo: Tu̱ꞌun luu íó ini̱‑ya̱ jíín túꞌun kuakáꞌnu ini̱ ja̱ kíi nuu̱ máá Táa̱‑yo̱ Dios, jíín núu̱ máá Jítoꞌo̱‑yo̱ Jesucristo, ná kóo jíín‑ró jínáꞌan‑ró.
\s Ja̱ ní kandíja va̱ꞌa‑i
\p
\v 2 Nene̱ kánakuatáꞌú‑rí nuu̱ Dios sɨkɨ̱ táká róó. Te kánuku̱ꞌun ini̱‑ri̱ róó, hora kájika̱n taꞌu̱‑rí.
\v 3 Nene̱ káxndáku‑ri̱ róó nuu̱ máá Táa̱‑yo̱ Dios ndasa kásátiñu‑ró jíín túꞌun kándíja, jíín ndása kákundáꞌú ini̱‑ro̱‑í kásátiñu‑ró jáꞌa̱‑í, jíín ndása káñukuu ni̱ꞌin ini̱‑ro̱, sáꞌa máá Jítoꞌo̱‑yo̱ Jesucristo.
\v 4 A kájini̱‑ri̱, ñáni̱, ja̱ Dios kúndáꞌú ini̱‑ya̱ róó, te ni̱ ka̱ji‑ya̱ róó jínáꞌan‑ró.
\v 5 Ko nasu̱ jíín máá túꞌun ní jáa̱ tu̱ꞌun va̱ꞌa‑ri̱ nuu̱‑ro̱, chi̱ suni ni̱ jaa̱ jíín fuerza, jíín Espíritu Santo, te ni̱ ka̱yija ini̱‑ro̱ jíín. Te kájini̱‑ro̱ ndasa clase ña̱yɨvɨ ní ka̱kuu‑ri̱ jíín‑ró, chi ni̱ kundáꞌú ini̱‑ri̱ róó.
\v 6 Te ruu̱ jínáꞌan‑ri̱, jíín máá Jítoꞌo̱‑yo̱ ni̱ ka̱ndaku‑ró. Te jíín túndóꞌo xaa̱n ní ka̱jatáꞌú‑ró túꞌun, te ni̱ ka̱kusɨɨ̱ iní‑ro̱ ní sáꞌa Espíritu Santo.
\v 7 Te ni̱ ka̱nduu‑ró ñáyɨvɨ stáꞌa̱n ichi núu̱ táká ña̱yɨvɨ kákandíja íó ini̱ ñuu̱ Macedonia jíín ñúu̱ Acaya.
\v 8 Chi̱ máá‑ró, ni̱ ka̱skáka‑ró túꞌun máá Jítoꞌo̱‑yo̱. Ko nasu̱ máá ɨ́ɨn ñuu̱ Macedonia jíín ñúu̱ Acaya, chi̱ nɨ́ɨ́ káꞌnu‑ni ni̱ jicha̱ tu̱ꞌun kuaꞌa̱n ja̱ kákandíja‑ró núu̱ Dios, te tú nɨ́nɨ já káꞌa̱n kutɨ‑gá‑ni‑ri̱.
\v 9 Chi̱ máá‑i kájani‑i tu̱ꞌun‑ri̱ ndasa ni̱ kɨ̱vɨ koyo‑ri̱ nuu̱‑ro̱ jínáꞌan‑ró, jíín já ní ka̱xndóo‑ró ndosó, te ni̱ ndɨ̱vɨ‑ró núu̱ Dios ndija, náva̱ꞌa kuatíñu‑ró núu̱‑yá, chi̱ chakú‑ya̱,
\v 10 te náva̱ꞌa kundatu‑ró ncháa̱ Se̱ꞌe‑ya̱ íchi ándɨ́vɨ́, Iꞌa̱ ni̱ naschakú‑ya̱‑ún. Te máá Jesús kúu‑ya̱. Te a ni̱ nama‑ya̱ yóó nuu̱ túꞌun kiti̱ ini̱ ja̱ cháa̱ sáꞌa Dios núú.
\c 2
\s Ndasa ni̱ sáꞌa Pablo ini̱ ñuu̱ Tesalónica
\p
\v 1 Chi̱ a kájini̱ máá‑ró, ñáni̱, ja̱ tú ní jákoyo sáni‑ri̱ nuu̱‑ro̱.
\v 2 Chi̱ a kájini̱‑ro̱ já súa ni̱ ka̱ndoꞌo‑ri̱ xnaꞌa̱n‑ga̱ ini̱ ñuu̱ Filipos, te yúan ni̱ kaja̱ꞌa‑de tuka̱ nuu̱ rúu̱. Te Dios máá‑yó, ni̱ nasáꞌa téyíí‑yá ruu̱ náva̱ꞌa kani‑ri̱ tu̱ꞌun va̱ꞌa‑ya̱ núu̱‑ro̱, va̱sa ni̱ ka̱jito‑ri̱ tu̱ndóꞌo.
\v 3 Chi̱ tu̱ꞌun kákaꞌa̱n nda̱ꞌú‑ri̱ jíín‑ró, tú ndíso tu̱ꞌun túꞌún, ni tú kácháꞌán, ni tú xndáꞌú.
\v 4 Chi̱ nátu̱ꞌun ni̱ jatúꞌún Dios ruu̱ jínáꞌan‑ri̱, te ni̱ chaa tiñu‑ya̱ rúu̱ ja̱ káni‑ri̱ tu̱ꞌun va̱ꞌa, suni súan kákaꞌa̱n‑ri̱. Ko na̱ tú kásáꞌa‑ri̱ nátu̱ꞌun kásáꞌa ña̱yɨvɨ já kúsɨɨ̱ iní táꞌan‑i sáꞌa‑i, chi̱ sua kúsɨɨ̱ iní
Dios sáꞌa‑ri̱, chi̱ máá‑yá jíto nchaa̱‑ya̱ añú‑yo̱.
\v 5 Chi̱ a kájini̱‑ro̱ já tú ní kákaꞌa̱n nchaa̱ kutɨ‑rí róó, ni tú ní kákutóó iní‑ri̱ sɨkɨ̱‑ro̱. Te máá Dios kúu‑ya̱ testigo‑ri̱.
\v 6 Ni tú ní kándúkú‑rí ja̱ kuátúꞌún ñáyɨvɨ rúu̱, va̱sa róó xí sáva‑ga̱‑i, va̱sa kuu táꞌú níꞌin‑ri̱ tiñu nuu̱‑ro̱ núú, chi̱ kájí já apóstol Cristo kákuu‑ri̱.
\v 7 Chi̱ sua ni̱ kakaꞌa̱n vi̱tá‑ri̱ jíín‑ró nátu̱ꞌun ɨɨn ñaꞌan ncháka yɨ́kɨ́n, ja̱ ñúkúún iní‑ña jíín séꞌe‑ña.
\v 8 Te ni̱ ka̱kundáꞌú xaa̱n iní‑ri̱ róó, te yu̱án ní kakuni̱‑ri̱ ja̱ násu̱ máá ɨ́ɨn tu̱ꞌun va̱ꞌa Dios kua̱ꞌa‑ri̱ nuu̱‑ro̱, chi̱ suni onde̱ jíín añú‑ri̱ núú, chi̱ mani̱ xáa̱n‑rí jíín‑ró.
\v 9 Chi̱ a kánuku̱ꞌun ini̱‑ro̱, ñáni̱, ndasa ni̱ ka̱ndoꞌo‑ri̱ jíín tíñu. Te ni̱ ka̱sátiñu‑ri̱ ndúú ñúú‑ni, náva̱ꞌa tú stáa‑ri̱ sɨkɨ̱ ní ɨɨn‑ró, nini ni̱ ka̱jani‑ri̱ tu̱ꞌun va̱ꞌa Dios nuu̱‑ro̱.
\v 10 Máá‑ró, a kájini̱‑ro̱, te suni jiní Dios, ndasa ndoo, ndasa ndaa̱ ni̱ ka̱jika‑ri̱ jíín‑ró, te tú kua̱chi ní kásáꞌa‑ri̱ nuu̱ máá‑ró ña̱yɨvɨ kákandíja.
\v 11 Te suni a kájini̱‑ro̱ ndasa ni̱ kakaꞌa̱n nda̱ꞌú‑ri̱ jíín ná ɨɨn ná ɨɨn‑ró, te ndasa ni̱ kakaꞌa̱n‑ri̱ tu̱ꞌun ndéé iní jíín‑ró, nátu̱ꞌun ɨɨn cha̱a jíín séꞌe‑de,
\v 12 te ni̱ kakaꞌa̱n ni̱ꞌin‑ri̱ jíín‑ró já ná káka jíñúꞌún‑ró núu̱ Dios, chi ni̱ kana‑ya̱ xiní‑ro̱ kíꞌi̱n‑ro̱ núu̱ ñúu̱ luu táꞌú‑yá tiñu.
\v 13 Ja̱ yúán, suni tú kájukuiñi̱‑ri̱ ja̱ kánakuatáꞌú‑rí nuu̱ Dios ja̱ ní ka̱jatáꞌú‑ró túꞌun Dios ni̱ kakaꞌa̱n‑ri̱. Te ni̱ jini̱‑ro̱ já násu̱ túꞌun cha̱a kúu, chi ja̱ndáa̱ máá túꞌun Dios kúu, te máá túꞌun‑ún sátiñu ini̱ róó ña̱yɨvɨ kákandíja.
\v 14 Te máá‑ró jínáꞌan‑ró ñáni̱, ɨɨn‑ni kátaꞌa̱n‑ro̱ jíín tɨ́kuꞌni̱ ñuu̱ Judea ja̱ kákandíja‑i nuu̱ Dios jíín núu̱ Cristo Jesús, chi̱ nátu̱ꞌun ni̱ ka̱ndoꞌo máá‑i ni̱ ka̱sáꞌa cha̱a judío, te suni súan ni̱ ka̱ndoꞌo máá‑ró ní ka̱sáꞌa ña̱yɨvɨ ñúu̱‑ro̱.
\v 15 Chi̱ judío‑ún ni̱ ka̱jaꞌni‑dé máá Jítoꞌo̱‑yo̱ Jesús jíín cháa ni̱ ka̱jani tu̱ꞌun‑ya̱ ondé sáá. Te ni̱ ka̱chindiki̱n‑de ruu̱ ni̱ ka̱kenda‑ri̱, te tú kúsɨɨ̱ iní Dios kásáꞌa‑de, te kándonda‑de sɨkɨ̱ táká ña̱yɨvɨ.
\v 16 Te kájasu̱‑de ja̱ káꞌa̱n‑ri̱ jíín ñáyɨvɨ sɨ́ɨn nación náva̱ꞌa ka̱ku‑i. Te súan káskútú náꞌín‑de ku̱ꞌa kua̱chi kándi̱so‑de. Te sɨkɨ̱‑dé ni̱ chaa̱ ndɨꞌɨ‑ni tu̱ꞌun kití ini̱ Dios.
\s Ja̱ ní kuxio núu Pablo
\p
\v 17 Ko ruu̱ jínáꞌan‑ri̱, ñáni̱, a ni̱ ka̱kuxio núu‑ri̱ nuu̱‑ro̱, ko máá‑ni‑ri̱, nasu̱ jíín añú‑ri̱. Te víꞌí‑gá kándúkú ndéé‑rí kájítú iní‑ri̱ ja̱ kuní‑ri̱ nuu̱‑ro̱.
\v 18 Te ja̱ yúán ní kakuni̱‑ri̱ jaa̱‑ri̱ nuu̱‑ro̱ núú, chi̱ ruu̱ Pablo, ɨɨn uu̱ jínu ni̱ kuni̱ ndija‑ri̱, ko Satanás ni̱ jasu̱ nuu̱‑rí jínáꞌan‑ri̱.
\v 19 Chi na̱ún sɨkɨ̱ káñukuu ini̱‑ri̱, xí já kákusɨɨ̱ iní‑ri̱, xí já kúu premio ja̱ sáñáꞌnu‑ri̱ máá‑rí. Nasu̱ máá‑ró kákuu jia̱n náún, hora kuiñi‑yó núu̱ máá Jítoꞌo̱‑yo̱ Jesucristo kɨvɨ̱ ndíi‑ya̱.
\v 20 Suu ja̱ sɨkɨ́ róó te nduñáꞌnu‑ri̱ te kusɨɨ̱ iní‑ri̱ jínáꞌan‑ri̱.
\c 3
\s Sɨkɨ̱ tíñu ni̱ sáꞌa Timoteo
\p
\v 1 Ja̱ yúán tú ní kándá‑ri̱ kundatu‑ga̱‑ri̱, te ni̱ ka̱sándaa̱‑ri̱ ja̱ kéndo̱o máá‑na̱‑ri̱ ñuu̱ Atenas jínáꞌan‑ri̱,
\v 2 te ni̱ ka̱tájí‑rí ñani̱‑ri̱ Timoteo, cha̱a játíñu nuu̱ Dios sɨkɨ̱ túꞌun va̱ꞌa Cristo, chi̱ sátiñu taꞌa̱n‑de jíín‑rí, kujaa̱‑de nuu̱‑ro̱ náva̱ꞌa síyíja‑de ini̱‑ro̱ jínáꞌan‑ró, te kaꞌa̱n nda̱ꞌú‑de jíín‑ró sɨkɨ́ túꞌun kákandíja‑ró.
\v 3 Náva̱ꞌa ni ɨɨn‑ró ma̱ náyu̱ꞌú‑ro̱ sáꞌa tu̱ndóꞌo yáꞌa, chi̱ róó a kájini̱‑ro̱ já sɨkɨ́ túꞌun yáꞌa ni̱ jani‑ya̱ yóó.
\v 4 Chi̱ onde̱ ná káxiu̱kú‑rí jíín‑ró núú, ni̱ ka̱kastu̱ꞌún‑rí nuu̱‑ro̱ já kóto náꞌín‑yó túndóꞌo, nátu̱ꞌun ni̱ kataꞌa̱n‑ro̱ te a kájini̱‑ro̱.
\v 5 Ja̱ yúán súni máá‑rí tú ní kándá‑ri̱ kundatu‑ga̱‑ri̱, te ni̱ tájí‑rí‑de kujaa̱‑de ja̱ ná kuní‑ri̱ ndasa kákandíja‑ró, chi̱ sanaa te ni̱ jito nchaa̱ máá‑ún róó, te naa sáni tiñu ni̱ ka̱sáꞌa‑ri̱.
\v 6 Ko vina, a ni̱ nchaa̱ Timoteo nuu̱‑rí ja̱ ní jaa̱‑de nuu̱‑ro̱. Te ni̱ nakani‑de tu̱ꞌun‑ró núu̱‑rí jínáꞌan‑ri̱ ndasa kákandíja‑ró, te kákundáꞌú ini̱‑ro̱ táꞌan‑ró, te nene̱ kánuku̱ꞌun va̱ꞌa ini̱‑ro̱ rúu̱, te kákuu ini̱‑ro̱ kuní‑ro̱ núu̱‑rí, te suni súan kákuu ini̱‑ri̱ kuni̱‑ri̱ nuu̱‑ro̱.
\v 7 Ja̱ yúán, te ni̱ ka̱ndundéé iní‑ri̱, ñáni̱, ni̱ sáꞌa tu̱ꞌun ja̱ kákandíja‑ró, va̱sa kájito‑ri̱ tu̱ndóꞌo, te kánandɨꞌɨ‑ri̱.
\v 8 Te vina a ni̱ ka̱naniꞌi̱n iní‑ri̱ te nú káꞌi̱in ni̱ꞌin‑ró jíín máá Jítoꞌo̱‑yo̱.
\v 9 Te ndasa nákuatáꞌú‑rí nuu̱ Dios ja̱ sɨkɨ́ róó jínáꞌan‑ró, sɨkɨ̱ táká tu̱ꞌun kúsɨɨ̱ iní‑ri̱ nuu̱ Dios máá‑yó ní ka̱sáꞌa‑ró.
\v 10 Chi̱ ndúú ñúú‑ni kájika̱n taꞌu̱ téyíí‑rí ja̱ ná kuní‑ri̱ nuu̱‑ro̱, te stáꞌa̱n ndɨꞌɨ‑ga̱‑ri̱ ndéja̱ kúmani̱ kándíja‑ga̱‑ro̱.
\v 11 Ko máá Táa̱‑yo̱ Dios jíín máá Jítoꞌo̱‑yo̱ Jesucristo, ná chúꞌun íchí‑yá ruu̱ ja̱koyo‑ri̱ nuu̱‑ro̱, kuní‑ri̱.
\v 12 Te máá Jítoꞌo̱‑yo̱ ná skuáꞌnu‑ya̱ róó te ná xndeá‑ya̱ túꞌun ja̱ kúndáꞌú ini̱‑ro̱ táꞌan‑ró, jíín táká‑ga̱‑i, suni nátu̱ꞌun kákundáꞌú ini̱‑ri̱ róó.
\v 13 Náva̱ꞌa násíyíja‑ya̱ añú‑ro̱, te ná kóo ndoo ini̱, náva̱ꞌa tú kenda ni ɨɨn kua̱chi sɨkɨ̱‑ro̱ núu̱ máá Táa̱‑yo̱ Dios kɨvɨ̱ ncháa̱ Jitoꞌo̱‑yo̱ Jesucristo jíín táká ña̱yɨvɨ ndóo‑ya̱.
\c 4
\s Ndasa sáꞌa‑yó te kusɨɨ̱ iní Dios
\p
\v 1 Ɨɨn‑na̱ tu̱ꞌun íó, ñáni̱. Ná káꞌa̱n ni̱ꞌin‑ri̱ te ná káꞌa̱n nda̱ꞌú‑ri̱ jíín‑ró sɨkɨ̱ máá Jítoꞌo̱‑yo̱ Jesús, chi̱ nátu̱ꞌun ni̱ ka̱kutu̱ꞌa‑ró já ní ka̱stáꞌa̱n‑ri̱ nuu̱‑ro̱, ndasa kánúú káka‑ró, te kusɨɨ̱ iní Dios
sáꞌa‑ró, súan ná kúkuu‑ga̱‑ro̱ jíín.
\v 2 Chi̱ a kájini̱‑ro̱ na̱ún tiñu ni̱ ka̱táꞌú‑rí nuu̱‑ro̱ sɨkɨ́ máá Jítoꞌo̱‑yo̱ Jesús.
\v 3 Chi̱ kuní Dios ja̱ ná kóo ndoo‑ró, te ma̱ káka téné‑ró.
\v 4 Te ná ɨɨn ná ɨɨn‑ró ná kuní‑ro̱ ndasa koo jíñúꞌún‑ró jíín ñásɨ́ꞌɨ́‑ro̱, te koo ndoo‑ña.
\v 5 Te ma̱ kaní xaa̱n iní‑ro̱ jásɨ̱ꞌɨ́, nátu̱ꞌun kásáꞌa ña̱yɨvɨ sɨ́ɨn nación ja̱ tú kájini̱‑i nuu̱ Dios,
\v 6 náva̱ꞌa tú ni ɨɨn‑ró sáñaꞌmu‑ró, ni tú xndáꞌú‑ro̱ ñaní‑ro̱ sɨkɨ́ túꞌun yáꞌa, chi̱ máá Jítoꞌo̱‑yo̱ kúu Iꞌa̱ naniꞌi̱n táꞌan‑ya̱ jíín táká yu̱án, nátu̱ꞌun ni̱ kakachi̱ ka̱jí‑rí nuu̱‑ro̱.
\v 7 Chi̱ tú ní kána Dios xini̱‑yo̱ já kóo cháꞌán‑yó, chi ja̱ ná kóo ndoo‑yó.
\v 8 Núsáá te cha̱a skéꞌichi̱ tu̱ꞌun yáꞌa, tú skéꞌichi̱‑de nuu̱ cháa, chi̱ sua nuu̱ Dios, Iꞌa̱ ni̱ ja̱ꞌa‑ya̱ Espíritu Santo‑ya̱ núu̱‑yo̱.
\v 9 Ko tú nɨ́nɨ já cháa‑ri̱ tutu̱ nuu̱‑ro̱ sɨkɨ́ já kúnchaka mani̱ táꞌan‑ró, chi̱ a ni̱ stáꞌa̱n Dios nuu̱‑ro̱ já kóo mani̱‑ro̱ jínáꞌan‑ró.
\v 10 Te suni súan kásáꞌa‑ró jíín táká ñani̱‑yo̱ já káxiu̱kú‑de nɨ́ɨ́ ñúu̱ Macedonia. Ko kákaꞌa̱n nda̱ꞌú‑ri̱ jíín‑ró, ñáni̱, ja̱ víꞌí‑gá nándeá‑ga̱ tu̱ꞌun mani̱‑ún ini̱‑ro̱.
\v 11 Te ná cháa ini̱‑ro̱ kúxiu̱kú náꞌín‑ró. Te ma̱ kɨ́vɨ nduu̱‑ro̱ ɨngá tiñu. Te tɨɨn‑ró tíñu jíín ndáꞌa‑ro nátu̱ꞌun ni̱ ka̱táꞌú‑rí tiñu nuu̱‑ro̱.
\v 12 Súan sáꞌa‑ró náva̱ꞌa ná káka jíñúꞌún‑ró jíín ñáyɨvɨ káꞌi̱in sɨ́ɨn sɨkɨ̱, náva̱ꞌa suni tú nandɨꞌɨ‑ró.
\s Kɨvɨ̱ ncháa̱‑ya̱ jíín já náchaku̱‑i
\p
\v 13 Suni kákuni̱‑ri̱, ñáni̱, ja̱ ná júku̱ꞌun ini̱‑ro̱ sɨkɨ́ ñáyɨvɨ kákixi̱, náva̱ꞌa ma̱ ndúkuíꞌa̱ ini̱‑ro̱ nátu̱ꞌun kásáꞌa sava ña̱yɨvɨ tú káñukuu ini̱‑i.
\v 14 Chi̱ nú kákandíja‑yó já ní jiꞌi̱ Jesús te ni̱ nachaku̱‑ya̱, suni súan kinakiꞌin Dios ña̱yɨvɨ kákixi̱ nuu̱ ndáꞌa Jesús.
\v 15 Chi ya̱ꞌá kákastu̱ꞌún‑rí nuu̱‑ro̱ jíín túꞌun máá Jítoꞌo̱‑yo̱, ja̱ yóó ja̱ káichaku̱‑yo̱, ja̱ ní ka̱kendo̱o‑yó ondé kɨvɨ̱ ncháa̱ máá Jítoꞌo̱‑yo̱, ma̱ kúxnúú‑yó xnáꞌa̱n‑ga̱ nuu̱ ñáyɨvɨ kákixi̱‑ún.
\v 16 Chi̱ máá Jítoꞌo̱‑yo̱, nuu‑ya̱ kíi‑ya̱ íchi ándɨ́vɨ́, te kana jaa‑ya̱, te kaꞌa̱n jaa ndajáꞌa̱ ñáꞌnu andɨ́vɨ́, te ndeꞌe̱ clarín máá Dios. Te nachaku̱ xnaꞌa̱n‑ga̱ ta̱ká ndɨ̱yi nuu̱ ndáꞌa Cristo.
\v 17 Yúan‑na te yóó ja̱ káichaku̱‑yo̱, ja̱ ní ka̱kendo̱o‑yó, ɨɨn káꞌnu‑ni kañaa‑ya̱ yóó kiꞌi̱n‑yo̱ jíín‑yá ma̱ꞌñú vikó nu̱ꞌún. Te kitaꞌa̱n‑yo̱ máá Jítoꞌo̱‑yo̱ sáva andɨ́vɨ́. Te súan kunchaa̱‑yo̱ nɨ́ɨ́ káni jíín máá Jítoꞌo̱‑yo̱.
\v 18 Te jíín túꞌun yáꞌa ná káꞌa̱n káꞌnu‑ró jíín táꞌan‑ró núsáá.
\c 5
\p
\v 1 Ko sɨkɨ̱ kuiá jíín kɨvɨ́, tú nɨ́nɨ cháa‑ri̱ tutu̱ nuu̱‑ro̱, ñáni̱.
\v 2 Chi̱ a kájini̱ va̱ꞌa‑ró já kɨvɨ́ ncháa̱ máá Jítoꞌo̱‑yo̱, koo nátu̱ꞌun cháa̱ ñakui̱ꞌná ákuáa.
\v 3 Te nú kákaꞌa̱n‑i: Vina te náꞌín‑ni íó, te ma̱ kíi tu̱ndóꞌo. Yúan‑na te ɨɨn sanaa‑ní te chaa̱ tu̱ndóꞌo sɨkɨ̱‑í ja̱ náa‑í, nátu̱ꞌun sɨkɨ̱ ñáꞌan já jáꞌncha̱ skáku‑ña, te súan ma̱ kúu ka̱ku kutɨ‑í jínáꞌan‑i.
\v 4 Ko máá‑ró ñáni̱, nasu̱ káꞌi̱in‑ró ñúñáa. Te ja̱ yúán ma̱ jinú‑ya̱ nátu̱ꞌun ñakui̱ꞌná sɨkɨ́‑ro̱ kɨvɨ́‑ún.
\v 5 Chi ta̱ká róó kákuu‑ró séꞌe ñu̱ndiji̱n jíín séꞌe ndúú, nasu̱ séꞌe akuáa ni nasu̱ séꞌe ñu̱ñáa kákuu‑yó.
\v 6 Núsáá te ma̱ kusú‑yo̱ nátu̱ꞌun sava‑ga̱‑i. Chi̱ sua ná kúndito‑yó, te ná kóo kuándíꞌí‑yo̱.
\v 7 Te ña̱yɨvɨ kákixi̱, chi̱ akuáa kákixi̱‑i, te ña̱yɨvɨ kánaji̱ni, chi̱ akuáa kánaji̱ni‑i.
\v 8 Te máá‑yó, chi se̱ꞌe ndúú kákuu‑yó, te ná kóo kuándíꞌí‑yo̱. Te ná kúꞌun‑yó túꞌun kándíja jíín túꞌun kúndáꞌú ini̱ táꞌan, nátu̱ꞌun ɨɨn suꞌnu̱ káa. Te ná kúꞌun‑yó túꞌun kuñukuu ini̱‑yo̱ káku‑yó, nátu̱ꞌun kachíní káa.
\v 9 Chi̱ Dios, tú ní tétaꞌa̱n‑ya̱ yóó ja̱ kóto uꞌu̱‑ya̱ yóó, chi̱ sua ja̱ ná káku‑yó sáꞌa máá Jítoꞌo̱‑yo̱ Jesucristo.
\v 10 Te Iꞌa̱‑ún ni̱ jiꞌi̱‑ya̱ já yóó, náva̱ꞌa kunchaa̱ káꞌnu‑yó jíín‑yá, va̱sa kusu̱‑yo̱ xí kúndito‑yó.
\v 11 Ja̱ yúán ná káꞌa̱n ndéé‑ró jíín táꞌan‑ró. Te ná síyíja‑ró táꞌan‑ró, nátu̱ꞌun kákuu‑ró jíín.
\s Consejo Pablo
\p
\v 12 Te kákaꞌa̱n nda̱ꞌú‑ri̱ jíín‑ró ñáni̱, ja̱ kuándatu̱‑ro̱ núu̱ cháa kásátiñu jíín‑ró, te kátáꞌú‑de tiñu nuu̱‑ro̱ já cuenta máá Jítoꞌo̱‑yo̱ te kákana jíín‑de nuu̱‑ro̱.
\v 13 Te ná kóo ja̱ jíñúꞌún xáa̱n‑ro̱ núu̱‑dé, te koo mani̱‑ro̱ jíín‑de sɨkɨ̱ tíñu kásáꞌa‑de. Te vindáa̱ vinené ná kúxiu̱ku‑ró jíín táꞌan‑ró.
\v 14 Te kákaꞌa̱n nda̱ꞌú‑ri̱ jíín‑ró ñáni̱, ja̱ kána jíín‑ró núu̱ cháa kájika ñáá, te kaꞌa̱n káꞌnu‑ró jíín cháa tú kuaꞌa̱ iní, te kutuu‑ró cháa vi̱tá ini̱, te koo paciencia ini̱‑ro̱ jíín táká‑i.
\v 15 Te nde̱ꞌé‑ró, ma̱ násáꞌa ndɨva̱ꞌa‑ró jíín ní ɨɨn ña̱yɨvɨ, nú ni̱ sáꞌa ndɨva̱ꞌa‑i jíín‑ró, chi̱ sua nene̱ ná ndúkú‑ró tíñu ja̱ kée va̱ꞌa jíín táꞌan‑ró, jíín táká‑i.
\v 16 Te nene̱ ná kóo sɨɨ̱ iní‑ro̱ jínáꞌan‑ró.
\v 17 Ma̱ júkuiñi̱‑ro̱ já jikán taꞌu̱‑ro̱.
\v 18 Ná nákuatáꞌú‑ró nú na̱ún ndɨꞌɨ kúu, chi̱ súan kuní Dios ja̱ sáꞌa‑ró núu̱ Cristo Jesús.
\v 19 Ma̱ kasú‑ro̱ núu̱ máá Espíritu.
\v 20 Ma̱ sájáꞌa̱ ini̱‑ro̱ núu̱ túꞌun kájani‑i tu̱ꞌun‑ya̱.
\v 21 Ná kóto nchaa̱ vii‑ro táká‑ni, te nú ja̱ váꞌa kúu, te kutɨɨn ni̱ꞌin‑ró,
\v 22 te nú ja̱ úꞌu̱ kúu, ma̱ kɨ́vɨ nduu̱‑ro̱ jíín.
\v 23 Te máá Dios, Iꞌa̱ ndíso tu̱ꞌun kuakáꞌnu ini̱, nasándoo ndɨꞌɨ‑ya̱ iní‑ro̱ jínáꞌan‑ró. Te kundito kútu‑yá ini̱‑ro̱, añú‑ro̱, jíín yíkɨ kúñu‑ró, náva̱ꞌa tú naku̱xndíi‑ya̱ sɨkɨ́‑ro̱ kɨvɨ́ ncháa̱ máá Jítoꞌo̱‑yo̱ Jesucristo.
\v 24 Te bueno skíkuu máá‑yá, Iꞌa̱ ni̱ kana xini̱‑ro̱, te súan sáꞌa‑ya̱.
\v 25 Ñáni̱ jínáꞌan‑ró, kaka̱n taꞌu̱‑ro̱ jáꞌa̱‑rí jínáꞌan‑ri̱.
\v 26 Nú kákaꞌa̱n‑ro̱ jíín ñaní‑yo̱, te ndoo titú‑ro̱‑í.
\v 27 Kákaꞌa̱n ni̱ꞌin‑ri̱ jíín‑ró jínáꞌan‑ró sɨkɨ́ máá Jítoꞌo̱‑yo̱, ja̱ káꞌu‑ró tutú yáꞌa nuu̱ táká ñani̱‑yo̱, cha̱a káꞌi̱o ndoo.
\v 28 Tu̱ꞌun luu íó ini̱ máá Jítoꞌo̱‑yo̱ Jesucristo ná kóo jíín‑ró jínáꞌan‑ró. Súan ná kóo. Amén.