\id 2TH
\h 2 Tesalonicenses
\toc1 2 Tesalonicenses
\mt2 LA SEGUNDA EPISTOLA DEL APOSTOL SAN PABLO A LOS TESALONICENSES
\mt YAꞌA KUU CARTA UU JA NI CHAA SAN PABLO APOSTOL NUU ÑAYƗVƗ ÑUU TESALONICA
\c 1
\p
\v 1 Máá‑rí kákuu Pablo jíín Silas jíín Timoteo, te káchaa‑ri̱ tutu̱ yáꞌa nuu̱ tɨ́kuꞌni̱ kákandíja ñuu̱ Tesalónica, ja̱ káꞌi̱in‑i nuu̱ máá Táa̱‑yo̱ Dios, jíín núu̱ máá Jítoꞌo̱‑yo̱ Jesucristo.
\v 2 Tu̱ꞌun luu íó ini̱‑ya̱ jíín túꞌun kuakáꞌnu ini̱ ja̱ kíi nuu̱ máá Táa̱‑yo̱ Dios jíín núu̱ máá Jítoꞌo̱‑yo̱ Jesucristo, ná kóo jíín‑ró jínáꞌan‑ró.
\s Dios kúu Iꞌa̱ sándaa̱ va̱ꞌa tiñu‑yó
\p
\v 3 Kánakuatáꞌú nɨ́nɨ‑rí nuu̱ Dios ja̱ sɨkɨ́ róó ñáni̱. Súan íó va̱ꞌa, chi kua̱kukútu‑gá‑ro̱ jíín túꞌun kákandíja‑ró, te bueno kákundáꞌú ini̱‑ro̱ táꞌan‑ró.
\v 4 Ja̱ yúán kákusɨɨ̱ iní‑ri̱ ja̱ sɨkɨ́ róó jínáꞌan‑ró, hora kánakani‑ri̱ tu̱ꞌun‑ró núu̱ tɨ́kuꞌni̱ máá Dios, ndasa kákandíja‑ró, jíín já káꞌi̱in ni̱ꞌin‑ró, va̱sa káchindiki̱n‑i róó, va̱sa kátaꞌa̱n‑ro̱ túndóꞌo.
\v 5 Yu̱án kúu ɨɨn tuni̱ ja̱ sándaa̱ ndaa̱‑ya̱‑í, náva̱ꞌa naniꞌi̱n táꞌu̱‑ro̱ nájaa̱‑ro̱ iní ñuu̱ nuu̱ táꞌú Dios tiñu, chi ja̱ sɨkɨ́ yúán kándoꞌo‑ró.
\v 6 Chi̱ íó va̱ꞌa ja̱ súni jíín túndóꞌo nachunáa Dios nuu̱ ñáyɨvɨ káxndóꞌo róó.
\v 7 Te róó, ña̱yɨvɨ kándoꞌo, ɨɨn káꞌnu‑ni ndeta̱tú‑ro̱ jíín‑rí jínáꞌan‑ri̱ sáꞌa‑ya̱ kɨvɨ já ndíi ndiji̱n Jitoꞌo̱‑yo̱ Jesús ichi ándɨ́vɨ́, jíín táká ndajáꞌa̱‑yá ja̱ káꞌi̱o ni̱ꞌin téyíí.
\v 8 Te jíín yáá ñúꞌu̱n kii‑ya̱, te xndóꞌo‑ya̱ ñáyɨvɨ tú kájito nuu̱ Dios, jíín ñáyɨvɨ tú kájandatu̱ nuu̱ túꞌun va̱ꞌa máá Jítoꞌo̱‑yo̱ Jesucristo.
\v 9 Te máá ñáyɨvɨ‑ún ndoꞌo‑i ja̱ náa‑í nɨ́ɨ́ káni sáꞌa‑ya̱, jíín já má kúu kɨ̱vɨ koyo‑i nuu̱ kánchaa̱ máá Jítoꞌo̱‑yo̱ jíín núu̱ lúu ndíi ncháa̱ fuerza‑ya̱.
\v 10 Súan sáꞌa‑ya̱ kɨvɨ́ ncháa̱‑ya̱ já ndúñáꞌnu luu‑ya̱ sáꞌa ta̱ká ña̱yɨvɨ ndóo‑ya̱, te náva̱ꞌa naa iní sava ña̱yɨvɨ ndéꞌé‑i nuu̱‑yá kɨvɨ̱‑ún sáꞌa ta̱ká ña̱yɨvɨ kákandíja nuu̱‑yá, chi ni̱ ka̱kandíja‑ró túꞌun ndaa̱ ni̱ ka̱kastu̱ꞌún‑rí nuu̱‑ro̱.
\v 11 Ja̱ sɨkɨ́ yáꞌá, te nene̱ kájika̱n taꞌu̱‑rí jaꞌa̱ róó, náva̱ꞌa Dios máá‑yó kuva̱ꞌa ini̱‑ya̱ jíín‑ró já ní kana‑ya̱ róó. Te ta̱ká tiñu va̱ꞌa kákuni̱‑ro̱ ná skíkuu‑ya̱ jíín‑ró, jíín fuerza‑ya̱, te suni jíín tíñu
kásáꞌa‑ró, jíín túꞌun kákandíja‑ró.
\v 12 Náva̱ꞌa ná nákana jaa‑i sɨ́ꞌvɨ́ máá Jítoꞌo̱‑yo̱ Jesucristo sáꞌa‑ró jínáꞌan‑ró, te suni kuatúꞌún‑i róó sáꞌa‑ya̱, chi̱ súan sáꞌa tu̱ꞌun luu íó ini̱ Dios máá‑yó jíín já íó ini̱ Jitoꞌo̱‑yo̱ Jesucristo.
\c 2
\s Sɨkɨ̱ ñáyɨvɨ ñáá kɨvɨ̱ ndíi Jesús
\p
\v 1 Te vina kákaꞌa̱n nda̱ꞌú‑ri̱ jíín‑ró, ñáni̱, sɨkɨ̱ já ndíi máá Jítoꞌo̱‑yo̱ Jesucristo jíín já ndútútú‑yó núu̱‑yá,
\v 2 ja̱ má nátuꞌu̱ yachi̱ ini̱‑ro̱, ni ma̱ kúkuíꞌa̱ ini̱‑ro̱ sáꞌa ɨɨn ja̱ jíka kuu, xí túꞌun, xí tutú ja̱ sáꞌa sɨ́kɨ́‑i ja̱ rúu̱ tájí, cuenta sɨkɨ̱ já á ni̱ kuyani ndaa̱ kɨvɨ̱ máá Jítoꞌo̱‑yo̱.
\v 3 Ma̱ kuáꞌa‑ró túꞌun ja̱ xndáꞌú kutɨ ní ɨɨn‑i róó. Chi ma̱ cháa̱ kɨvɨ̱‑ún onde̱ nú túu nduꞌichi̱ ini̱ kuaꞌa̱‑í‑ya̱, te suni onde̱ ná kénda ndiji̱n máá cháa ja̱ xíin kuáchi, chi̱ máá cháa taꞌnu̱ ndatu̱ kúu‑de.
\v 4 Te ndonda‑de kasu̱‑de nuu̱ táká ja̱ káskúnání‑i Dios, jíín núu̱ já káchiñúꞌún‑i. Ja̱ yúán te nungo̱o‑de ini̱ ve̱ꞌe ii̱ Dios, te kaꞌa̱n‑de ja̱ Dios kúu máá‑de.
\v 5 Á tú kánuku̱ꞌun ini̱‑ro̱ já ondé ná kánchaa̱‑ga̱‑ri̱ jíín‑ró, ni̱ kaꞌa̱n‑ri̱ tu̱ꞌun yáꞌa jíín‑ró jínáꞌan‑ró.
\v 6 Te vina a kájini̱‑ro̱ ndéja̱ kúu ja̱ jasú nuu̱‑dé, náva̱ꞌa onde̱ ná jáa̱ kɨvɨ̱ máá‑de te kenda ndiji̱n‑de.
\v 7 Chi̱ máá túꞌun sa̱ꞌí xíin kuáchi, a yáji níꞌni kuaꞌa̱n, ko íó ja̱ jasú nuu̱ vína, onde̱ ná kúxio‑ún.
\v 8 Yúan‑na te kenda ndiji̱n máá cháa xíin kuáchi‑ún. Te máá Jítoꞌo̱‑yo̱ káꞌni‑yá‑de nini jíín máá já tɨvɨ́ tachi̱‑ní‑ya̱, te nini ja̱ ndíi ncháa̱ kenda ndiji̱n‑ya̱, te xnáa‑yá‑de.
\v 9 Te cha̱a‑ún kii‑de sáꞌa Satanás, te jíín fuerza ni̱ꞌin xaa̱n, jíín tuní, jíín tíñu ñáꞌnu sáꞌa sɨ́kɨ́‑ni‑de.
\v 10 Te jíín táká tiñu tú jíka ndaa̱, te tɨɨn yátá‑de ña̱yɨvɨ náa, kua̱chi ja̱ tú ní kájatúꞌún‑i kumani̱‑í jíín túꞌun ndaa̱, náva̱ꞌa ka̱ku‑i sáꞌa‑ya̱ núú.
\v 11 Ja̱ yúán te skíi Dios ini̱‑i, te kuñáá xini̱‑í, ja̱ kándíja‑i ɨɨn tu̱ꞌun xndáꞌú,
\v 12 náva̱ꞌa naku̱xndíi‑ya̱ sɨkɨ́ táká‑i ja̱ tú kákandíja‑i tu̱ꞌun ndaa̱, chi̱ sasua kákusɨɨ̱ iní‑i jíín tíñu tú jíka ndaa̱.
\s Máá‑yá kúu Iꞌa̱ skíkuu
\p
\v 13 Nene̱ kánakuatáꞌú nɨ́nɨ‑rí nuu̱ Dios jaꞌa̱ róó, ñáni̱, ja̱ kúndáꞌú ini̱ Jitoꞌo̱‑yo̱ róó. Chi̱ máá Dios ni̱ ka̱ji‑ya̱ róó onde̱ ná xnáñúú náva̱ꞌa ka̱ku‑ró, te suni jíín Espíritu‑ya̱ ndúndoo ini̱‑ro̱ te kandíja‑ró túꞌun ndaa̱.
\v 14 Ja̱ yúán ní kana‑ya̱ xiní‑ro̱ jínáꞌan‑ró ní sáꞌa tu̱ꞌun va̱ꞌa kákaꞌa̱n‑ri̱, náva̱ꞌa jaa̱‑ro̱ nú ndíi ncháa̱ kánchaa̱ Jitoꞌo̱‑yo̱ Jesucristo.
\v 15 Núsáá te kuiñi ni̱ꞌin‑ró ñáni̱, te kutɨɨn ni̱ꞌin‑ró túꞌun ni̱ ka̱kutu̱ꞌa‑ró, kúu jíín túꞌun xí jíín tutú‑ri̱.
\v 16 Máá Táa̱‑yo̱ Dios kúu Iꞌa̱ ni̱ kúndáꞌú ini̱ yóó, jíín já ní ja̱ꞌa‑ya̱ túꞌun koo ndéé iní‑yo̱ nɨ́ɨ́ káni, jíín já kúñukuu va̱ꞌa ini̱‑yo̱ sáꞌa tu̱ꞌun luu íó ini̱‑ya̱. Te máá‑yá, onde̱ jíín máá Jítoꞌo̱‑yo̱
Jesucristo,
\v 17 ná násándéé‑yá ini̱ añú‑ro̱ jínáꞌan‑ró, te ná síyíja‑ya̱ róó sɨkɨ̱ túꞌun jíín sɨkɨ́ tíñu va̱ꞌa.
\c 3
\p
\v 1 Ɨɨn‑na̱ tu̱ꞌun íó, ñáni̱. Ná kakán taꞌu̱‑ro̱ jínáꞌan‑ró jáꞌa̱‑rí jínáꞌan‑ri̱, náva̱ꞌa yachi̱ ná kuichá nu̱u tu̱ꞌun máá Jítoꞌo̱‑yo̱ kíꞌi̱n, te ná kuátúꞌún‑i, nátu̱ꞌun nuu̱ máá‑ró jínáꞌan‑ró,
\v 2 te suni náva̱ꞌa ná káku‑ri̱ ini̱ ndaꞌa cháa ñáá jíín cháa kástáꞌa̱n ruu̱ jínáꞌan‑ri̱, chi̱ nasu̱ ndɨ́ꞌɨ‑de kákandíja.
\v 3 Ko bueno skíkuu máá Jítoꞌo̱‑yo̱. Te ná síyíja‑ya̱ iní‑ro̱, te koto‑ya̱ róó nuu̱ kíni nuu̱ kuíꞌa̱.
\v 4 Te kájani ndija ini̱‑ri̱, sáꞌa máá Jítoꞌo̱‑yo̱, já kákuu‑ró jíín tíñu ni̱ ka̱táꞌú‑rí nuu̱‑ro̱ te kukuu‑ga̱‑ro̱ jíín.
\v 5 Te máá Jítoꞌo̱‑yo̱, ná stáꞌa̱n‑ya̱ núu̱ añú‑ro̱ ndasa koo mani̱‑ro̱ jíín Dios, te ndasa kundiso‑ró paciencia Cristo.
\s Sɨkɨ̱ cháa kúxí
\p
\v 6 Ko kátáꞌú‑rí tiñu nuu̱‑ro̱, ñáni̱, jíín sɨ́ꞌvɨ́ máá Jítoꞌo̱‑yo̱ Jesucristo, ja̱ kúxio‑ró núu̱ táká ñani̱‑yo̱ já kájika kuu kátá‑ni‑de, chi̱ nasu̱ súan ní kástáꞌa̱n‑ri̱ nuu̱‑ro̱.
\v 7 Chi̱ a kájini̱ máá‑ró ndasa kánúú ndáku‑ró rúu̱, chi̱ tú súan ní kájika kuu kátá‑ni‑ri̱ nuu̱‑ro̱ jínáꞌan‑ró.
\v 8 Ni tú ní káyee sáni‑ri̱ staa̱ sɨkɨ́ ní ɨɨn‑ró, chi̱ sua ni̱ ka̱jaꞌni‑rí máá‑rí jíín tíñu, te ndúú ñúú‑ni ni̱ ka̱sátiñu‑ri̱, te tú ní kúnɨ́nɨ iní ni ɨɨn‑ró ní ka̱sáꞌa‑ri̱.
\v 9 Nasu̱ já túu derecho‑ri̱ kaka̱n‑ri̱ núú. Chi̱ sua kuní‑ri̱ kuu‑ri̱ ɨɨn ejemplo nuu̱‑ro̱ ndasa ndaku‑ró rúu̱.
\v 10 Chi̱ onde̱ ná káxiu̱kú‑ga̱‑ri̱ jíín‑ró, te ni̱ ka̱táꞌú‑rí tiñu yáꞌa nuu̱‑ro̱, ja̱ nú ndé ɨɨn ña̱yɨvɨ tú kuní‑i sátiñu‑i, te ma̱ kée‑í núsáá.
\v 11 Chi ni̱ ka̱jini tu̱ꞌun‑ri̱ ja̱ kájika kuu kátá‑ni sava‑i jíín‑ró, tú kásátiñu kutɨ‑í, chi̱ sasua kájika kuu‑i kándúkú túꞌun‑ni‑i táꞌan‑i.
\v 12 Te nuu̱ ñáyɨvɨ‑ún kátáꞌú‑rí tiñu, te kákaꞌa̱n nda̱ꞌú‑ri̱ jíín‑i sɨkɨ̱ máá Jítoꞌo̱‑yo̱ Jesucristo, ja̱ náꞌín‑ni ná kóo‑i, te ná sátiñu‑i, te niꞌi̱n‑í kee‑í sɨkɨ̱ máá‑i.
\v 13 Te róó jínáꞌan‑ró ñáni̱, ma̱ kuítá‑ro̱ já kásáꞌa‑ró tíñu va̱ꞌa.
\v 14 Te nú ndé ɨɨn‑i tú kuní‑i kuandatu̱‑i nuu̱ túꞌun‑ri̱ ja̱ káꞌa̱n carta yáꞌa, kunchaa̱ nuu̱‑ro̱‑í te ma̱ kétáꞌan‑ró jíín‑i jínáꞌan‑ró, náva̱ꞌa ná kúka nuu̱‑í.
\v 15 Ko ma̱ kóto uꞌu̱‑ro̱‑í, chi̱ sua kana jíín‑ró núu̱‑í nátu̱ꞌun nuu̱ ɨ́ɨn ñani̱‑ro̱.
\v 16 Te máá Jítoꞌo̱‑yo̱, Iꞌa̱ ndíso tu̱ꞌun kuakáꞌnu ini̱, nene̱ ná kuáꞌa‑ya̱ túꞌun vindáa̱ vinené ini̱‑ro̱ jínáꞌan‑ró jíín táká‑ni modo. Te máá Jítoꞌo̱‑yo̱ ná kúnchaa̱‑ya̱ jíín táká‑ro̱ jínáꞌan‑ró.
\v 17 Ruu̱, Pablo, áchí‑ri̱ ja̱ ná sándéé iní‑ro̱ te cháa ndaꞌa máá‑rí, chi ya̱ꞌá‑ni kúu ɨɨn tuni̱ ja̱ chísó‑rí nuu̱ táká‑ni carta‑ri̱. Chi̱ súan cháa‑ri̱.
\v 18 Tu̱ꞌun luu íó ini̱ máá Jítoꞌo̱‑yo̱ Jesucristo ná kóo jíín táká róó jínáꞌan‑ró. Súan ná kóo. Amén.