\id 1TI
\h 1 Timoteo
\toc1 1 Timoteo
\mt2 LA PRIMERA EPISTOLA DEL APOSTOL SAN PABLO A TIMOTEO
\mt YAꞌA KUU CARTA ƗƗN JA NI CHAA SAN PABLO APOSTOL NUU TIMOTEO
\c 1
\p
\v 1 Máá‑rí Pablo kúu apóstol Jesucristo, chi̱ súan ni̱ táꞌú tíñu Dios, Iꞌa̱ náma yóó, jíín Jítoꞌo̱‑yo̱ Jesucristo, ja̱ káñukuu ini̱‑yo̱‑yá.
\v 2 Cháa‑ri̱ tutu̱ yáꞌa nuu̱ Timoteo, se̱ꞌe ndija‑ri̱ ja̱ ní skándíja‑ri̱: Tu̱ꞌun luu íó ini̱‑ya̱, jíín túꞌun kúndáꞌú ini̱‑ya̱, jíín túꞌun kuakáꞌnu ini̱ ja̱ kíi nuu̱ máá Táa̱‑yo̱ Dios, jíín núu̱ máá Jítoꞌo̱‑yo̱ Cristo Jesús, ná kóo jíín‑ró.
\s Sɨkɨ̱ ñáyɨvɨ sɨ́ɨn sɨ́ɨn saꞌa̱n
\p
\v 3 Nátu̱ꞌun ni̱ kaꞌa̱n nda̱ꞌú‑ri̱ jíín‑ró já ná kéndo̱o‑ró ñúu̱ Éfeso ná ni̱ kiꞌin‑ri̱ ichi kuáꞌa̱n‑ri̱ ñuu̱ Macedonia, ja̱ ná káꞌa̱n ni̱ꞌin‑ró jíín sáva‑i, te suni káꞌa̱n tuku‑ri̱ ja̱ má stáꞌa̱n‑i sɨ́ɨn sɨ́ɨn nuu̱ sáꞌa̱n,
\v 4 ni ma̱ kuáꞌa‑i tu̱ꞌun ja̱ ná ndúkú kuáchí‑i sɨkɨ̱ cuento, jíín sɨkɨ́ jíchi tu̱ꞌun táꞌan. Chi̱ sua nákaa̱‑ga̱ kuaꞌa̱n, te skuikín tɨxɨ̱n, lugar ja̱ yíja‑ga̱ tu̱ꞌun kándíja‑yó núu̱ Dios sáꞌa. Achí‑ri̱.
\v 5 Ya̱ꞌá kúu ja̱ kuní‑ri̱ táꞌú‑rí tiñu nuu̱‑ro̱, ja̱ ná kúndáꞌú ini̱‑ro̱‑í jíín túꞌun koo ndoo ini̱‑ro̱, jíín túꞌun koo va̱ꞌa ini̱ añú‑ro̱, jíín túꞌun kándíja ja̱ tú yóso yúꞌu.
\v 6 Ja̱ sɨkɨ́ yúán kájika yátá sáva‑i, te kákusɨ́ɨn ini̱‑i kájukuiñi̱‑i sɨkɨ̱ túꞌun ja̱ tú níꞌi̱n tíñu.
\v 7 Kákuni̱‑i kuu‑i maestro ley, ko ni tú kájuku̱ꞌun ini̱‑i na̱ún tu̱ꞌun kákaꞌa̱n‑i, ni na̱ún tu̱ꞌun kájani ni̱ꞌin‑i.
\v 8 A kájini̱‑yo̱ já íó va̱ꞌa ley, ko nú koo kájí iní‑ro̱ jíín.
\v 9 Chi̱ a jiní‑yo̱ já ley, tú ní kúva̱ꞌa ja̱ ndónda sɨkɨ̱ ñáyɨvɨ váꞌa, chi̱ sua ndónda sɨkɨ̱ ñáyɨvɨ ñáá, sɨkɨ̱ ñáyɨvɨ tú kájandatu̱, sɨkɨ̱ ñáyɨvɨ tú káchiñúꞌún‑i‑ya̱, sɨkɨ̱ ñáyɨvɨ kásáꞌa kua̱chi,
sɨkɨ̱ ñáyɨvɨ kánda̱a ndɨva̱ꞌa jíín ñáyɨvɨ cháꞌán, sɨkɨ̱ ñáyɨvɨ kájaꞌni táa̱ náa̱, jíín sɨkɨ́ ñáyɨvɨ kájaꞌni ndɨ́yi,
\v 10 sɨkɨ̱ ñáyɨvɨ kájika téné, sɨkɨ̱ xíꞌncha, sɨkɨ̱ ñáyɨvɨ sákuíꞌná ñáyɨvɨ, sɨkɨ̱ ñáyɨvɨ káxndáꞌú, sɨkɨ̱ ñáyɨvɨ kásátúꞌún, jíín sɨkɨ̱ sáva‑ga̱ tu̱ꞌun ja̱ tú káni táꞌan jíín túꞌun máá‑yá ja̱ íó ndéé ndánu.
\v 11 Chi tu̱ꞌun‑ún kúu máá túꞌun va̱ꞌa luu xaa̱n já vái nuu̱ máá Dios, Iꞌa̱ ii̱. Te sɨkɨ̱ túꞌun‑ún ni̱ chaa tíñu‑ya̱ rúu̱.
\s Tiñu ni̱ chaa‑ya̱ sɨkɨ́ Pablo
\p
\v 12 Te nákuatáꞌú‑rí nuu̱ máá Iꞌa̱ ni̱ ja̱ꞌa fuerza ini̱‑ri̱, kúu Cristo Jesús Jitoꞌo̱‑yo̱, te ni̱ nakani ini̱‑ya̱ já cháa skíkuu va̱ꞌa kúu‑ri̱, te ni̱ chaa tíñu‑ya̱ rúu̱.
\v 13 Ko onde̱ sáá núú, chi ni̱ kaꞌa̱n ndɨva̱ꞌa‑ri̱, te ni̱ chindiki̱n‑ri̱‑i, te ni̱ stují‑rí‑i. Ko ni̱ kundáꞌú ini̱‑ya̱ rúu̱, chi̱ tú jiní‑ri̱ te ni̱ sáꞌa‑ri̱, te ni tú ní kándíja‑ri̱ sáá.
\v 14 Ko tu̱ꞌun luu íó ini̱ máá Jítoꞌo̱‑yo̱, ni̱ ndea̱‑ga̱ ini̱‑ri̱ jíín túꞌun kándíja, jíín túꞌun kúndáꞌú ini̱ Cristo Jesús ruu̱.
\v 15 Chi̱ íó va̱ꞌa ja̱ ná kuátáꞌú táká‑i tu̱ꞌun ndaa̱ yáꞌa, ja̱ Cristo Jesús ni̱ kii‑ya̱ iní ñu̱yɨ́vɨ, náva̱ꞌa nama‑ya̱ ñáyɨvɨ kándi̱so kua̱chi, te ruu̱ kúu máá já ní kaa‑ga̱ ni̱ sáꞌa.
\v 16 Ko ni̱ kundáꞌú ini̱‑ya̱ rúu̱, náva̱ꞌa jíín rúu̱ ja̱ ní kaa‑ga̱ ni̱ sáꞌa‑ri̱, te kuni̱‑i ndasa íó xaa̱n paciencia ini̱ Jesucristo, náva̱ꞌa kuu‑ri̱ ɨɨn muestra nuu̱ ñáyɨvɨ kúkuéé‑ga̱ kandíja‑i nuu̱‑yá, te naniꞌi̱n táꞌu̱‑í kuchaku̱‑i nɨ́ɨ́ káni.
\v 17 Núsáá te nɨ́ɨ́ káni nɨ́ɨ́ kuiá ná káꞌa̱n jíñúꞌún‑yo te ná nákana jaa‑yó máá Rey, Iꞌa̱ ndíto chakú nɨ́ɨ́ káni, ja̱ tú jíꞌi̱‑ya̱, ja̱ tú kúu nde̱ꞌé ndijín‑yo̱ núu̱‑yá, ja̱ máá ɨ́ɨn‑ni‑ya̱ kúu Dios ndíchí. Amén.
\v 18 Hijo, súan táꞌú‑rí tiñu nuu̱ róó Timoteo. Chi̱ jíín kɨvɨ́ ní kakaꞌa̱n‑i ja̱ kúndii̱ máá‑ró. Te jíín túꞌun ni̱ kakaꞌa̱n‑i‑ún, te ná skíkuu va̱ꞌa‑ró jíín tíñu jíku‑ró.
\v 19 Te kandíja ni̱ꞌin‑ró, te ná káni va̱ꞌa ini̱ añú‑ro̱, chi tu̱ꞌun yáꞌa ni̱ ka̱skéꞌichi̱ sava‑i, te ni̱ ka̱síjíta‑i máá‑i nuu̱ túꞌun kándíja.
\v 20 Te cha̱a yúan, Himeneo jíín Alejandro kákuu‑de, ko ni̱ chiꞌi‑ri̱‑de ndaꞌa Satanás, náva̱ꞌa ná skuáꞌa‑de ɨnga̱ jínu ma̱ káꞌa̱n ndɨva̱ꞌa‑ga̱‑de.

\c 2
\s Ndé cuenta kaka̱n taꞌu̱‑yo̱
\p
\v 1 Te víꞌí‑gá káꞌa̱n nda̱ꞌú‑ri̱ jíín‑ró núsáá, ja̱ ná kakán taꞌu̱‑ro̱ jáꞌa̱ táká ña̱yɨvɨ. Kaꞌa̱n nda̱ꞌú‑ro̱ jíín‑yá ja̱ kúu máá‑i, te kaka̱n‑ro̱ nú na̱ún jínu ñúꞌún‑i, ko nene̱ ná nákuatáꞌú‑ró já kúu máá‑i.
\v 2 Suni ná káꞌa̱n‑ro̱ jáꞌa̱ táká rey jíín jáꞌa̱ táká cha̱a kákuñáꞌnu, náva̱ꞌa ná kúxiu̱kú náꞌín‑yó, te ná kóo paz nuu̱‑yo̱, te chiñúꞌún‑yó‑yá, te koo ja̱ jíñúꞌún‑yó núu̱ táká‑ni.
\v 3 Chi ya̱ꞌá kúu ja̱ íó va̱ꞌa te sáꞌa ja̱ játaꞌa̱n ini̱ Dios, Iꞌa̱ náma yóó.
\v 4 Te máá‑yá kuní‑ya̱ já táká ña̱yɨvɨ ná káku‑i, te ná kuní‑i ndasa káa máá túꞌun ndaa̱.
\v 5 Chi̱ íó ɨɨn‑ni Dios, suni súan íó ɨɨn‑ni Iꞌa̱ káꞌa̱n jaꞌa̱ táká ña̱yɨvɨ onde̱ nuu̱ Dios, te Iꞌa̱‑ún, máá cháa Jesucristo kúu‑ya̱.
\v 6 Te Iꞌa̱‑ún ni̱ soko̱‑yá máá‑yá ja̱ ní nakuaan‑ya̱ táká yóó, te onde̱ máá kɨvɨ́‑ún, ni̱ kenda testigo sɨkɨ̱ Iꞌa̱‑ún.
\v 7 Te ja̱ sɨkɨ́ yúán ní jani‑ya̱ rúu̱ ja̱ kúu‑ri̱ apóstol náva̱ꞌa kani‑ri̱ tu̱ꞌun. Cha̱a jiní stáꞌa̱n va̱ꞌa nuu̱ ñáyɨvɨ sɨ́ɨn nación kúu‑ri̱. Te ja̱ndáa̱ káꞌa̱n‑ri̱, te a jiní máá Cristo tú xndáꞌú‑ri̱.
\v 8 Te kuní‑ri̱ ja̱ ndéni ni̱ kuu, te ná kakán taꞌu̱ táká cha̱a jínáꞌan‑de. Te ná kóo ndoo ndaꞌa‑dé ndukani‑de. Te ma̱ kití ini̱‑de, te ni ma̱ kána̱á‑de.
\v 9 Suni súan ta̱ká ñasɨ́ꞌɨ́, ná kasú va̱ꞌa‑ña máá‑ña jíín sáꞌma jíñúꞌún, ja̱ tú kuka nuu̱ iní‑yo̱ sáꞌa. Te nasu̱ sáluu‑ña máá‑ña jíín lazo, xí oro, xí perla, xí sáꞌma ncháá yaꞌu,
\v 10 chi̱ sua ná sáluu‑ña máá‑ña jíín tíñu jíñúꞌún sáꞌa‑ña, nátu̱ꞌun kánúú sáꞌa ta̱ká ñaꞌan já kákaꞌa̱n‑ña já káchiñúꞌún‑ña máá‑yá.
\v 11 Te ñasɨ́ꞌɨ́, náskuáꞌa‑ña kasú‑ña yúꞌu‑ñá, te ma̱ ndúkú‑ña táꞌú‑ña tíñu.
\v 12 Chi̱ tú jáꞌa‑ri̱ tu̱ꞌun ja̱ kánduu̱ ñasɨ́ꞌɨ́ stáꞌa̱n‑ña, ni tú táꞌú‑ña tíñu nuu̱ cháa, chi̱ náꞌín‑ni ná kóo‑ña.
\v 13 Chi̱ Adán ni̱ sáva̱ꞌa‑ya̱ xnáꞌa̱n‑ga̱, te vásá ní sáva̱ꞌa‑ya̱ Eva.
\v 14 Chi̱ tú ní xndáꞌú ja̱ꞌú Adán, chi̱ sua ñasɨ́ꞌɨ́‑de ni̱ kandíja‑ña, te ni̱ sáñaꞌmu‑ña.
\v 15 Ko ka̱ku‑ña sáꞌa ja̱ júku̱ꞌun se̱ꞌe‑ña, te nú túu sía̱‑ña túꞌun kándíja‑ña jíín túꞌun kúndáꞌú ini̱‑ña, jíín túꞌun koo ndoo ini̱‑ña, jíín túꞌun ja̱ tú kuka nuu̱‑ñá sáꞌa.
\c 3
\s Ndasa koo cha̱a ndíto tɨkuꞌni̱
\p
\v 1 Tu̱ꞌun ndaa̱ kúu ya̱ꞌá: Nú ɨɨn cha̱a kuní‑de kuu‑de cha̱a kundito tɨkuꞌni̱, bueno tiñu ndúkú‑de.
\v 2 Núsáá te nɨ́nɨ ná kóo jíñúꞌún cháa kundito‑ún, náva̱ꞌa tú ndenda kua̱chi sɨkɨ̱‑dé. Te ɨɨn máá túꞌún‑ni ñasɨ́ꞌɨ́‑de ná kóo, te koo ndito ini̱‑de, koo kuándíꞌí‑de, koo kájí iní‑de, kundáꞌú ini̱‑de ña̱yɨvɨ jíká, te koo ñama̱ ini̱‑de stáꞌa̱n‑de.
\v 3 Ma̱ kóo káꞌvá‑de, ma̱ stují‑dé ña̱yɨvɨ. Ma̱ ndío xaa̱n iní‑de sɨkɨ̱ xúꞌún. Chi̱ sua ná kóo paciencia ini̱‑de. Ma̱ kútɨ́xɨ́n‑de. Ma̱ kútóó iní‑de.
\v 4 Te jíñúꞌún ná táꞌú‑de tiñu ini̱ ve̱ꞌe‑de, te ná kúñava̱ꞌa‑de se̱ꞌe ja̱ skíkuu‑i tiñu táꞌu̱ núu̱‑í jíín já kóo jíñúꞌún‑i.
\v 5 Chi cha̱a ja̱ tú jiní‑de táꞌú jíñúꞌún‑de tiñu ini̱ ve̱ꞌe‑de, ndasa koto‑de tɨkuꞌni̱ Dios núsáá.
\v 6 Ko ma̱ kúu kɨ̱vɨ ɨɨn cha̱a jáá. Te nú túu, chi̱ sanaa te sávixi̱‑de máá‑de te ndonda ja̱ꞌú sɨkɨ̱‑dé.
\v 7 Suni kánúú já kúu‑de ɨɨn cha̱a ja̱ kuátúꞌún ñáyɨvɨ‑dé, va̱sa káꞌi̱in‑i sɨ́ɨn ɨnga̱ sɨkɨ̱, náva̱ꞌa ma̱ kuakú nchaa̱‑i‑de, ni ma̱ tɨ́ɨn yátá jáꞌú‑de.
\s Ndasa koo cha̱a játíñu nuu̱ tɨ́kuꞌni̱
\p
\v 8 Suni súan cha̱a kájatíñu nuu̱ tɨ́kuꞌni̱ kákandíja, ná kóo jíñúꞌún‑de, ma̱ kóo tɨ́lakuá‑de, ma̱ kóo káꞌvá‑de, ni ma̱ ndío xaa̱n iní‑de sɨkɨ̱ xúꞌún.
\v 9 Ko ná kóo ndoo ini̱ añú‑de, te ná kundii̱ ni̱ꞌin‑de jíín túꞌun sa̱ꞌí kákandíja‑yó.
\v 10 Te cha̱a yáꞌa, suni kuní ja̱ kóto nchaa̱‑yo̱‑dé xnaꞌa̱n‑ga̱, náva̱ꞌa kuni̱‑yo̱ nú túu kua̱chi yíꞌi sɨkɨ̱‑dé. Yúan‑na te kuu kuatíñu‑de.
\v 11 Suni súan ná kóo va̱ꞌa ini̱ ta̱ká ñasɨ́ꞌɨ́, ma̱ ndúkú túꞌun‑ña táꞌan‑ña, te ná kóo kuándíꞌí‑ña, te ná skíkuu‑ña táká na̱ún tiñu kúu.
\v 12 Cha̱a kájatíñu nuu̱ tɨ́kuꞌni̱, suni ɨɨn‑ni ñasɨ́ꞌɨ́‑de ná kóo, te ná táꞌú váꞌa‑de tiñu nuu̱ séꞌe‑de jíín núu̱ táká ini̱ ve̱ꞌe‑de.
\v 13 Chi cha̱a kájatíñu va̱ꞌa, sua skákunu‑ga̱‑de máá‑de kuaꞌa̱n‑de, te káchundéé‑gá ini̱‑de sáꞌa‑de sɨkɨ̱ túꞌun kákandíja‑yó núu̱ Cristo Jesús.
\v 14 Tu̱ꞌun yáꞌa cháa‑ri̱ kujaa̱ nuu̱‑ro̱. Te ñúkuu ini̱ máá‑rí jaa̱ yachi̱‑ri̱ nuu̱‑ro̱.
\v 15 Ko sanaa te kúkuéé‑ga̱ te jaa̱‑ri̱ nuu̱‑ro̱. Te ja̱ yúán cháa‑ri̱ ya̱ꞌá, náva̱ꞌa kuni̱‑ro̱ ndasa kánúú káka‑ró jíín ñáyɨvɨ káchiñúꞌún Dios. Chi yu̱án kúu tɨkuꞌni̱ Dios, Iꞌa̱ chakú. Te yu̱án kándi̱tuu te kásákútu‑gá máá túꞌun ndaa̱.
\v 16 Ndaa̱ káꞌa̱n‑ri̱, ja̱ yíí xáa̱n káa máá túꞌun sa̱ꞌí káchiñúꞌún‑yó: Ni̱ kenda ndiji̱n Dios jíín yíkɨ kúñu‑ya̱. Te ni̱ kendo̱o ndaa̱‑ya̱ ní sáꞌa máá Espíritu. Ni̱ kajini̱ ndajáꞌa̱‑yá nuu̱‑yá. Ni̱ jicha̱ nu̱u tu̱ꞌun‑ya̱ núu̱ ñáyɨvɨ sɨ́ɨn nación. Ña̱yɨvɨ ñúyɨ́vɨ ní ka̱kandíja‑i nuu̱‑yá. Ni̱ ndaa‑ya̱ kuáꞌa̱n‑ya̱ núu̱ lúu ndíi ncháa̱ ni̱ sáꞌa Dios.
\c 4
\s Sɨkɨ̱ túꞌun nduꞌichi̱ ini̱
\p
\v 1 Ko máá Espíritu, a kástu̱ꞌún kájí núu̱‑yo̱, nú ná kúyani ndɨꞌɨ kɨvɨ̱ te nduꞌichi̱ ini̱ sava‑i jíín túꞌun kákandíja‑i. Te kuatúꞌún‑i máá já káꞌa̱n tu̱ꞌun xndáꞌú jíín sáꞌa̱n tachi̱.
\v 2 Kundiso‑i uu̱ xini̱, te kaꞌa̱n‑i tu̱ꞌun túꞌún, chi̱ ndukava̱ iní añú‑i.
\v 3 Ma̱ kuáꞌa‑i tu̱ꞌun ta̱ndaꞌa‑yo, ni ma̱ kuáꞌa‑i tu̱ꞌun kee‑yo sáva ndeyu ní sáꞌa Dios ja̱ kuní máá‑yá ja̱ ná níꞌi̱n cháa kákandíja jíín cháa kájini̱ ichi ndáa̱, chi̱ kánakuatáꞌú‑de nuu̱‑yá te káyee‑dé.
\v 4 Chi ta̱ká ja̱ ní sáꞌa Dios íó va̱ꞌa, te ma̱ kúu skéꞌichi̱‑yo̱, te nú ná nákuatáꞌú‑yó núu̱‑yá te ná kée‑yo.
\v 5 Chi̱ jíín túꞌun Dios, te jíín túꞌun kaka̱n taꞌu̱‑yo̱ núu̱‑yá, te a ni̱ ndundoo‑ni ndeyu‑ún.
\s Cha̱a játíñu va̱ꞌa nuu̱ Jesucristo
\p
\v 6 Ko nú tu̱ꞌun yáꞌa kastu̱ꞌún‑ró núu̱ táká ñani̱‑yo̱, cha̱a játíñu va̱ꞌa nuu̱ Jesucristo kúu‑ró nú súan, chi̱ a ni̱ tɨ̱ɨn tu̱ꞌun kándíja‑ró‑ún ini̱‑ro̱, onde̱ jíín sáꞌa̱n va̱ꞌa ja̱ bueno skíkuu‑ró.
\v 7 Ko ta̱ká tu̱ꞌun yúkú, jíín táká tu̱ꞌun anáꞌán, ná skána‑ró kíꞌi̱n, te ná skuáꞌa‑ró máni tu̱ꞌun ja̱ chíñúꞌún‑yó máá‑yá.
\v 8 Tiñu ja̱ skuáꞌa‑yó ndúndéé yíkɨ kúñu, chi̱ yaku̱‑ni níꞌi̱n tíñu. Ko tu̱ꞌun chíñúꞌún‑yó máá‑yá, chi ta̱ká‑ni modo níꞌi̱n tíñu, chi̱ vida yáꞌa jíín vida chaa̱, bueno kee sáꞌa.
\v 9 Tu̱ꞌun ndaa̱ kúu tu̱ꞌun yáꞌa, te íó va̱ꞌa ja̱ ná kuátáꞌú táká‑i.
\v 10 Chi̱ sɨkɨ̱ yáꞌá kúu ja̱ kásátiñu ni̱ꞌin‑yó, te kándoꞌo‑yó, chi̱ káñukuu ini̱‑yo̱ já kúu máá Dios, Iꞌa̱ chakú, chi̱ máá‑yá kúu Iꞌa̱ náma ta̱ká ña̱yɨvɨ, ko víꞌí‑gá náma‑ya̱ ñáyɨvɨ kákandíja nuu̱‑yá.
\v 11 Tu̱ꞌun yáꞌa ná stáꞌa̱n‑ro̱, te táꞌú‑ró tíñu.
\v 12 Ma̱ kuáꞌa‑ró túꞌun ja̱ kújáꞌa̱ ini̱ ni ɨɨn‑i koto‑i róó va̱sa súchí‑ró. Te ná kóo va̱ꞌa‑ró, náva̱ꞌa ña̱yɨvɨ kákandíja kuu ndaku‑i róó jíín túꞌun káꞌa̱n‑ro̱, jíín modo jíka kuu‑ró, jíín túꞌun kúndáꞌú ini̱‑ro̱‑í, jíín túꞌun kándíja‑ró, jíín túꞌun ndoo ini̱‑ro̱.
\v 13 Nini kúkuéé‑ga̱‑ri̱ te jaa̱‑ri̱, te ná kuítú iní‑ro̱ káꞌu‑ró tutú nuu̱‑í, ná kána jíín‑ró núu̱‑í, ná stáꞌa̱n‑ro̱ túꞌun nuu̱‑í.
\v 14 Ma̱ kúkúxí‑ró jíín táꞌu̱ ní niꞌi̱n‑ro̱, chi cha̱a kákuu nuu̱, ni̱ chaa‑de ndaꞌa‑dé xini̱‑ro̱, te ni̱ kutaꞌu̱‑ro̱ yúán, nátu̱ꞌun ni̱ kakaꞌa̱n‑de onde̱ kɨvɨ̱ ní kuu‑ún.
\v 15 Ná kúndee tu̱ꞌun yáꞌa xini̱‑ro̱. Te kukuu ni̱ꞌin‑ró jíín, náva̱ꞌa ná kuní ta̱ká‑i ndasa bueno kua̱yija‑ró jíín.
\v 16 Te koto va̱ꞌa‑ró máá‑ró jíín túꞌun stáꞌa̱n‑ro̱. Ma̱ sía̱‑ro̱. Chi̱ nú súan ná sáꞌa‑ró, te bueno nama‑ró máá‑ró jíín táká ña̱yɨvɨ chúꞌun ini̱ tu̱ꞌun kaꞌa̱n‑ro̱.
\c 5
\p
\v 1 Ma̱ kána jíín‑ró núu̱ cháa ñáꞌnu, chi̱ sua kaꞌa̱n nda̱ꞌú‑ro̱ jíín‑de nátu̱ꞌun jíín táa̱‑ro̱. Te nuu̱ cháa súchí, kaꞌa̱n‑ro̱ jíín‑de nátu̱ꞌun jíín ñaní‑ro̱,
\v 2 te nuu̱ ñáꞌan ñáꞌnu, nátu̱ꞌun jíín náa̱‑ro̱, te nuu̱ ñáꞌan súchí, nátu̱ꞌun jíín kuáꞌa‑ró. Te tu̱ꞌun ndoo ndatu̱ꞌún‑ró.
\v 3 Te ná káꞌa̱n jíñúꞌún‑ró jíín ñáꞌan kákendo̱o ndáꞌú, te nú ni̱ ka̱kendo̱o ndáꞌú ndija‑ña.
\v 4 Ko nú ɨɨn ñaꞌan kéndo̱o ndáꞌú íó se̱ꞌe‑ña, xí séꞌe tɨ́jání‑ña, ná kútu̱ꞌa su̱chí yáꞌa xnaꞌa̱n‑ga̱ kundiso jíñúꞌún‑i responsable máá‑i ini̱ ve̱ꞌe‑i, te ná nákoto‑i táa̱‑i náa̱‑i, chi̱ súan játaꞌa̱n ini̱ Dios.
\v 5 Te nú ñaꞌan já ní kendo̱o ndáꞌú ndija kúu‑ña, te máá ɨ́ɨn‑ña, te ñúkuu ini̱‑ña Dios, te nene̱ káꞌa̱n nda̱ꞌú‑ña jíín‑yá te jikán taꞌu̱‑ñá ndúú ñúú‑ni nuu̱‑yá.
\v 6 Ko nú ñaꞌan jíka sɨkɨ̱ túꞌun sɨɨ̱ iní kúu‑ña, va̱sa chakú‑ña, ko nátu̱ꞌun a ni̱ jiꞌi̱‑ña.
\v 7 Tu̱ꞌun yáꞌa ná táꞌú‑ró tíñu nuu̱‑í, náva̱ꞌa tú ndenda kua̱chi sɨkɨ̱‑í.
\v 8 Te nú ɨɨn cha̱a tú ndíto‑de táꞌan‑de, te víꞌí‑gá nú jíín táꞌan máá‑de ini̱ ve̱ꞌe‑de, te a ni̱ skéꞌichi̱‑de tu̱ꞌun kándíja‑de nú súan, te cha̱a ñáá‑ga̱ kúu‑de vásá ɨ́ɨn cha̱a tú kándíja.
\v 9 Ma̱ sáꞌa‑ró cuenta ja̱ ñáꞌan ní kendo̱o ndáꞌú kúu‑ña, te nú té ji̱nu‑ga̱‑ña uní xiko uxi̱ kuia̱‑ña, jíín já máá ɨ́ɨn‑ni yii‑ñá ni̱ ncha̱ka‑ña,
\v 10 jíín já kájatúꞌún váꞌa‑i ja̱ bueno tiñu ni̱ sáꞌa‑ña, jíín já ní skuáꞌnu‑ña séꞌe, jíín já ní kundáꞌú ini̱‑ña ñáyɨvɨ jíká, jíín já ní nakacha‑ña jáꞌa̱ ñáyɨvɨ kákandíja, jíín já ní chindéé‑ña ñáyɨvɨ
kátaꞌa̱n tu̱ndóꞌo, jíín já níꞌin ni̱ jika‑ña jíín táká tiñu va̱ꞌa.
\v 11 Ko ñaꞌan súchí ja̱ kéndo̱o ndáꞌú‑ña, ma̱ kuátáꞌú‑ró‑ña, chi̱ nú a ni̱ ka̱isɨ́kɨ ncháa̱‑ña sɨkɨ́ Cristo, yúan‑na te kákuni̱‑ña já náta̱ndaꞌa túku‑ña.
\v 12 Nú súan, te taꞌnu̱ ndatu̱‑ña sáꞌa máá‑ña, chi̱ tú ní skíkuu‑ña túꞌun ni̱ keyuꞌu‑ñá xnáñúú.
\v 13 Te suni káskuáꞌa‑ña kée kúxí‑ña, kájika‑ña ndɨ́taꞌa̱n veꞌe, te nasu̱ máá ɨ́ɨn ja̱ kée kúxí‑ña, chi̱ suni sɨkɨ̱ cuentú‑ni kájika kuu‑ña, te kɨ́vɨ nduu̱‑ña káꞌa̱n‑ña túꞌun ja̱ tú íó va̱ꞌa.
\v 14 Núsáá, te ta̱ká ñasɨ́ꞌɨ́ súchí kákendo̱o ndáꞌú, kuní‑ri̱ ja̱ ná náta̱ndaꞌa‑ñá, náskuáꞌnu‑ña séꞌe‑ña, ná kóto va̱ꞌa‑ña véꞌe‑ña, te ma̱ kuáꞌa‑ña lugar ja̱ káꞌa̱n ndɨva̱ꞌa ja̱ꞌú sɨkɨ̱‑yo̱.
\v 15 Chi̱ sava‑ña a ni̱ ka̱jika yátá‑ña, te ni̱ kandiki̱n‑ña yatá Satanás kájaꞌa̱n‑ña jíín.
\v 16 Ko nú ɨɨn cha̱a kándíja, xí ɨ́ɨn ñaꞌan kándíja, káñava̱ꞌa táꞌan ja̱ kákuu ñaꞌan ní kendo̱o ndáꞌú, ná kóto‑de‑ña, te ma̱ cháa‑de carga sɨkɨ̱ tɨ́kuꞌni̱ kákandíja, náva̱ꞌa niꞌi̱n tɨ́kuꞌni̱ na̱jíín kúu ñaꞌan
kákendo̱o ndáꞌú ndija.
\v 17 Ná kóo jíñúꞌún xáa̱n‑ro̱ núu̱ cháa kákuu nuu̱, te nú kátáꞌú váꞌa‑de tiñu, ko víꞌí‑gá jíñúꞌún ná kóo‑ró núu̱‑dé nú kájani ni̱ꞌin‑de tu̱ꞌun jíín já kástáꞌa̱n‑de.
\v 18 Chi̱ áchí máá tutú ii̱: Ma̱ chúꞌun‑ró ñúnu yúꞌu xndɨkɨ̱ jíkó, áchí. Te: Cha̱a sátiñu kɨvɨ̱, chi̱ íó derecho‑de ja̱ kíꞌin‑de ya̱ꞌu‑de, áchí.
\v 19 Ma̱ kuátúꞌún‑ró ní ɨɨn kua̱chi sɨkɨ̱ cháa kúu nuu̱, chi̱ onde̱ nú íó uu̱ xí uní testigo.
\v 20 Te ña̱yɨvɨ kúkuu jíín kuáchi, kana jíín‑ró núu̱‑í, ko ná kuní jíín núu̱ táká‑i, náva̱ꞌa suni ná yúꞌú sava‑ga̱‑i.
\v 21 Ko onde̱ jíín Dios, jíín máá Jítoꞌo̱‑yo̱ Jesucristo, jíín táká ndajáꞌa̱‑yá ja̱ ní ka̱ji‑ya̱, káꞌa̱n ni̱ꞌin‑ri̱ tu̱ꞌun yáꞌa jíín‑ró, ja̱ ná skíkuu va̱ꞌa‑ró, te ma̱ kúnchaa̱ nuu̱‑ro̱‑í, ma̱ ɨ́ɨn‑i kaa ɨɨn‑i kuun koto‑ró núu̱‑í.
\v 22 Ma̱ xndée yachi̱‑ro̱ ndáꞌa‑ro xiní ní ɨɨn‑i, te ma̱ kɨ́vɨ nduu̱‑ro̱ kuáchi jíín ɨngá ña̱yɨvɨ. Koto va̱ꞌa‑ró máá‑ró náva̱ꞌa ná kéndo̱o ndoo‑ró.
\v 23 Vina te nɨ́ɨ́‑gá kuaꞌa̱n‑yo̱, ma̱ kóꞌo‑ga̱‑ro̱ máni máá ndúcha, ná kóꞌo‑ró ɨ́ɨn tíꞌli̱ vino sɨkɨ̱ já sáꞌa kueꞌe̱ chi̱i‑ró, jíín já núu‑ni núu‑ni kúꞌu̱‑ro̱.
\v 24 Ta̱ká kua̱chi kásáꞌa sava‑i, a ni̱ natu̱u, te jiní‑yo̱ já náku̱xndíi‑ya̱ sɨkɨ́ yúán, ko kua̱chi kásáꞌa sava‑ga̱‑i, chi̱ kuéé‑ga̱ te natu̱u.
\v 25 Suni súan kúu ta̱ká tiñu va̱ꞌa, chi̱ a ni̱ natu̱u, te ja̱ ná té tuká‑ún, ma̱ kúu kundee sa̱ꞌí.
\c 6
\p
\v 1 Ta̱ká ña̱yɨvɨ kákuu mozo kásátiñu sáni‑i, ná kóo jíñúꞌún váꞌa‑i nuu̱ patrón‑i, náva̱ꞌa tú koo ndɨva̱ꞌa tu̱ꞌun sɨkɨ̱ sɨ́ꞌvɨ́ máá Jítoꞌo̱‑yo̱ jíín sɨkɨ́ sáꞌa̱n‑ya̱.
\v 2 Te ña̱yɨvɨ káñava̱ꞌa‑i patrón kákandíja, ma̱ sájáꞌa̱ ini̱‑i nuu̱‑dé sɨkɨ̱ já ñaní‑i kákuu cha̱a‑ún, chi̱ sua ná kuátíñu va̱ꞌa‑ga̱‑i nuu̱‑dé, chi̱ kákandíja cha̱a‑ún ja̱ kájatíñu‑i nuu̱‑dé, te mani̱‑dé jíín‑i. Súan káꞌa̱n ni̱ꞌin tu̱ꞌun yáꞌa, te suni stáꞌa̱n.
\s Sɨkɨ̱ túꞌun xndáꞌú
\p
\v 3 Te nú ndé ɨɨn cha̱a stáꞌa̱n‑de ɨnga̱ tu̱ꞌun, te nú tú játúꞌún‑de ja̱ íó ndaa̱ tu̱ꞌun máá Jítoꞌo̱‑yo̱ Jesucristo, te nú tú játúꞌún‑de saꞌa̱n ja̱ káchiñúꞌún‑yó máá‑yá,
\v 4 máni sávixi̱‑de máá‑de. Te ni ɨɨn tu̱ꞌun tú júku̱ꞌun ini̱‑de, chi̱ tɨ́xɨ́n jáni ini̱‑de, te kána̱á‑de jíín túꞌun káꞌa̱n sáni. Te yúan kákuu tu̱ꞌun kuásún iní, tu̱ꞌun tɨ́xɨ́n, tu̱ꞌun káꞌa̱n ndɨva̱ꞌa, tu̱ꞌun jáni ñáá ini̱ xini̱,
\v 5 jíín já kákana̱á cha̱a kánda̱kúꞌu̱ xini̱, cha̱a tú káñu̱ꞌun tu̱ꞌun ndaa̱ ini̱‑de, te kájani ini̱‑de ja̱ ná chíñúꞌún‑de máá‑yá náva̱ꞌa niꞌi̱n‑dé xu̱ꞌún. Ná kúxio‑ró ma̱ kétáꞌan‑ró jíín cháa kánda̱a súan.
\v 6 Ko ja̱ á ni̱ ka̱an‑yó jíín‑yá, te káchiñúꞌún‑yó máá‑yá, jíín yúán, chi̱ nátu̱ꞌun a kuaꞌa̱ ní kaniꞌi̱n‑yo̱.
\v 7 Tú na̱ún ní cháa̱ jíín‑yó iní ñu̱yɨ́vɨ yáꞌa, suni ma̱ kúu kiñiꞌin‑yó ní ɨɨn kiꞌi̱n‑yo̱ jíín.
\v 8 Nú íó ja̱ kée‑yo, íó ja̱ kúꞌun‑yó, te sɨɨ̱‑ní ná kóo ini̱‑yo̱ jíín.
\v 9 Te ña̱yɨvɨ já kákuni̱‑i kuu kúká‑i, chi̱ jíto nchaa̱ ja̱ꞌú‑i, te tɨ́ɨn yátá‑ún‑i. Te yachi̱ kɨ́vɨ‑i jíín túꞌun ndío ñáá ini̱‑i te sáꞌa ndɨva̱ꞌa ndɨtuní‑i, te náa ñáyɨvɨ‑ún, te síjíta‑i máá‑i sáꞌa tu̱ꞌun‑ún.
\v 10 Chi̱ nú xu̱ꞌún kúmani̱‑yo̱ jíín, te sɨkɨ̱ yúán káku ta̱ká tiñu ñáá. Yu̱án ní ka̱ndio ini̱ sava‑i, te ni̱ ka̱sía̱‑i ichi kákandíja‑i. Te ni̱ kɨ̱vɨ tu̱ndóꞌo xaa̱n iní añú‑i.
\s Tu̱ꞌun ndúkú ndéé kándíja va̱ꞌa
\p
\v 11 Ko róó, cha̱a játíñu nuu̱ Dios kúu‑ró, te ná kúnu‑ró kóto‑ró táká tiñu yáꞌa. Te ná ndúkú‑ró já skíkuu‑ró tíñu ndaa̱, tu̱ꞌun káchiñúꞌún‑yó máá‑yá, tu̱ꞌun kándíja, tu̱ꞌun kúndáꞌú ini̱ táꞌan, tu̱ꞌun paciencia, tu̱ꞌun súchí iní.
\v 12 Ná ndúkú ndéé‑ró kándíja va̱ꞌa‑ró, te suni ná sáꞌa‑ró fuerza niꞌi̱n táꞌu̱‑ro̱ kúchaku̱‑ro̱ nɨ́ɨ́ káni, chi ja̱ yúán kúu ja̱ ní kana‑ya̱ xiní‑ro̱, te ni̱ kaꞌa̱n ndaa̱‑ro̱ túꞌun‑ya̱ ní kajini̱ kuaꞌa̱ ñáyɨvɨ.
\v 13 Te onde̱ jíín Dios táꞌú‑rí tiñu yáꞌa nuu̱‑ro̱, chi ja̱ máá‑yá, te chakú ta̱ká ndatíñu, te suni jíín Jesucristo, Iꞌa̱ ni̱ kaꞌa̱n ndaa̱ ta̱ká tu̱ꞌun nuu̱ Poncio Pilato, káꞌa̱n‑ri̱.
\v 14 Ná skíkuu va̱ꞌa‑ró jíín tíñu táꞌu̱ núu̱‑ro̱, náva̱ꞌa ma̱ kúcháꞌán, ni ma̱ kuakú nchaa̱‑i, onde̱ kɨvɨ̱ ndíi máá Jítoꞌo̱‑yo̱ Jesucristo.
\v 15 Chi̱ ɨɨn kɨvɨ̱ te kuni̱ ndiji̱n‑yo̱ kíi‑ya̱, sáꞌa máá Iꞌa̱ kúsɨɨ̱ iní‑yo̱ jíín. Te Iꞌa̱‑ún, máá ɨ́ɨn‑ya̱ kúñáꞌnu, te kúu‑ya̱ Rey nuu̱ táká rey, te Jitoꞌo̱ nuu̱ táká jitoꞌo̱.
\v 16 Te máá ɨ́ɨn‑ya̱ kúu Iꞌa̱ ndíto chakú nɨ́ɨ́ káni. Te ncháá‑ya̱ ɨ́ɨn lugar nuu̱ ndíi ncháa̱, te ma̱ kúu jaa̱ ni ɨɨn‑i yúan. Te ña̱yɨvɨ tú ní jiní ndiji̱n nuu̱‑yá, ni ma̱ kúu kutɨ. Nuu̱ máá‑yá ná kóo tu̱ꞌun jíñúꞌún, te ná táꞌú máá‑yá tiñu nɨ́ɨ́ káni. Amén.
\s Sɨkɨ̱ túꞌun kúká
\p
\v 17 Nuu̱ táká ña̱yɨvɨ kúká káꞌi̱o ini̱ ñu̱yɨ́vɨ yáꞌa, ná táꞌú‑ró tíñu ja̱ má sávixi̱‑i máá‑i. Ni ma̱ kúñukuu ini̱‑i ka̱ku‑i jíín xúꞌún, chi̱ yachi̱ náa‑ún. Chi̱ sua ná kúñukuu ini̱‑i ka̱ku‑i sáꞌa Dios, Iꞌa̱ chakú, chi̱ máá‑yá jáꞌa kuaꞌa̱‑yá ta̱ká‑ni ndatíñu nuu̱‑yo̱ já kúsɨɨ̱ iní‑yo̱ sáꞌa.
\v 18 Ná sáꞌa va̱ꞌa‑i jínáꞌan‑i. Ná kúu kúká‑i jíín táká tiñu va̱ꞌa sáꞌa‑i. Yachi̱ ná kóto táꞌan‑i, te yachi̱ ná chíndéé táꞌan‑i.
\v 19 Súan te kaya̱‑i ta̱ká tiñu va̱ꞌa sɨkɨ̱ máá‑i ja̱ kúu‑i kuia̱ chaa̱, chi̱ súan te kutɨɨn‑i ichi kúchaku̱ ndija‑i.
\v 20 Ko róó Timoteo, ma̱ sía̱‑ro̱ táká tu̱ꞌun ni̱ chiꞌi‑ri̱ ndaꞌa‑ro. Te ma̱ kɨ́vɨ nduu̱‑ro̱ jíín táká tu̱ꞌun yúkú tu̱ꞌun sáni, jíín táká tu̱ꞌun ndíchí ñáá, ja̱ jasú nuu̱ máá túꞌun júku̱ꞌun ndaa̱ ini̱.
\v 21 Chi̱ súan ni̱ ka̱jatúꞌún sáva‑i tu̱ꞌun yúkú‑ún. Te ni̱ ka̱xnáa‑í ichi ndíso tu̱ꞌun kákandíja‑yó. Tu̱ꞌun luu íó ini̱ máá‑yá ná kóo jíín‑ró. Súan ná kóo. Amén.