\id PHM
\h Filemón
\toc1 Filemón
\mt2 LA EPISTOLA DEL APOSTOL SAN PABLO A FILEMON
\mt YAꞌA KUU CARTA JA NI CHAA SAN PABLO APOSTOL NUU FILEMON
\c 1
\p
\v 1 Máá‑rí kúu Pablo, te kándee‑ri̱ veka̱a ja̱ sɨkɨ́ Jesucristo te jíín ñaní‑yo̱ Timoteo katájí‑rí tutu̱ yáꞌa nuu̱‑ro̱ Filemón, chaa mani jíín‑rí kúu‑ró, te chíndéé táꞌan‑ró jíín‑rí.
\v 2 Suni káchaa‑ri̱ tutu̱ yáꞌa nuu̱ Apia, ñaꞌan maní jíín‑ró, jíín núu̱ Arquipo, cha̱a chíndéé táꞌan jíín‑rí sɨkɨ̱ tíñu kándúkú ndéé‑rí yáꞌa, jíín núu̱ tɨ́kuꞌni̱ kákandíja íó ini̱ ve̱ꞌe‑ró jián.
\v 3 Tu̱ꞌun luu íó ini̱‑ya̱ jíín túꞌun kuakáꞌnu ini̱ ja̱ kíi nuu̱ máá Táa̱‑yo̱ Dios jíín já kíi nuu̱ máá Jítoꞌo̱‑yo̱ Jesucristo ná kóo jíín‑ró jínáꞌan‑ró.
\v 4 Nákuatáꞌú‑rí nuu̱ Dios máá‑rí, te nene̱ núku̱ꞌun ini̱‑ri̱ róó, nú jikán taꞌu̱‑rí nuu̱‑yá.
\v 5 Chi̱ a jíni so̱ꞌo‑ri̱ ja̱ bueno kákundáꞌú ini̱‑ro̱ táká ña̱yɨvɨ ndóo, te kándíja va̱ꞌa‑ró núu̱ máá Jítoꞌo̱‑yo̱ Jesús.
\v 6 Te jikán‑ri̱ nuu̱‑yá náva̱ꞌa nú kájani‑ró túꞌun te ná skándíja va̱ꞌa‑ró‑i, te kuni̱ kájí‑i ta̱ká tiñu va̱ꞌa káñava̱ꞌa‑yó jíín Cristo Jesús.
\v 7 Chi̱ kákusɨɨ̱ xáa̱n iní‑ri̱, te káꞌi̱o ndéé iní‑ri̱, ja̱ súan kákundáꞌú ini̱‑ro̱‑í, chi ja̱ róó ñáni̱, te ni̱ naniꞌi̱n‑gá ini̱ añú ña̱yɨvɨ ndóo.
\s Ja̱ ní kaꞌa̱n Pablo jaꞌa̱ Onésimo
\p
\v 8 Núsáá te va̱sa kuu chundéé iní‑ri̱, sáꞌa Cristo, ja̱ táꞌú‑rí tiñu nuu̱‑ro̱ núú, ja̱ ná skíkuu‑ró tíñu va̱ꞌa,
\v 9 chi̱ sua vaꞌa̱‑ga̱ ná káꞌa̱n nda̱ꞌú‑ri̱ jíín‑ró já jíín sɨkɨ́ já maní‑ro̱ jíín‑rí, jíín sɨkɨ́ já rúu̱ kúu Pablo, cha̱a ni̱ yii jíín já kándee‑ri̱ veka̱a ja̱ sɨkɨ́ Jesucristo.
\v 10 Núsáá te káꞌa̱n nda̱ꞌú‑ri̱ jíín‑ró já ná sáꞌa‑ró túkáꞌnu ini̱‑ro̱ núu̱ séꞌe‑ri̱ Onésimo, chi̱ a ni̱ skándíja‑ri̱‑i nini kándee‑ri̱ veka̱a.
\v 11 Te su̱chí yáꞌa, tú ní níꞌi̱n tíñu‑i nuu̱‑ro̱ sáá, ko vina, chi̱ bueno níꞌi̱n tíñu‑i nuu̱‑ro̱ jíín núu̱‑rí.
\v 12 Te ná nátájí‑rí‑i najaa̱‑i nuu̱‑ro̱. Te kuatáꞌú‑ró‑i, nátu̱ꞌun ruu̱, chi̱ ɨɨn‑ni kákuu‑ri̱ jíín‑i.
\v 13 Te kúsɨɨ̱ iní‑ri̱ ja̱ kúnchaa̱‑i jíín‑rí te kuu‑i yuꞌu núu̱‑ro̱ kuátíñu‑i nuu̱‑rí núú, nini kándee‑ri̱ veka̱a ja̱ sɨkɨ́ máá túꞌun va̱ꞌa.
\v 14 Ko tú ní kuní‑ri̱ sáꞌa‑ri̱ súan, onde̱ nú tú kuatu̱ꞌun máá‑ró, chi̱ nasu̱ stétuu‑ri̱ róó sáꞌa va̱ꞌa‑ró, chi̱ sua sɨkɨ̱ já játaꞌa̱n ini̱‑ro̱.
\v 15 Chi̱ sanaa te ja̱ sɨkɨ́ yúán kúu ja̱ ní jinu‑i ni̱ jito‑i róó yaku̱ tiempo ni̱ sáꞌa‑ya̱, náva̱ꞌa kuu nakiꞌin‑ró‑i te ma̱ sía̱ táꞌan‑ró jíín‑i nɨ́ɨ́ káni.
\v 16 Te ma̱ káni‑ga̱ ini̱‑ro̱ já mozo kúu‑i, chi̱ va̱ꞌa‑ga̱ koo‑ró jíín‑i vásá jíín mozo nátu̱ꞌun mani̱‑ro̱ jíín ɨ́ɨn ñani̱‑ro̱, chi̱ súan jáni ini̱‑ri̱ jíto‑ri̱‑i. Ko víꞌí‑gá kúu máá‑i nuu̱ máá‑ró ja̱ sɨkɨ́ táꞌan‑ró kúu‑i jíín já sɨkɨ́ máá Jítoꞌo̱‑yo̱.
\v 17 Núsáá te nú jiní máá‑ró já cháa chíndéé táꞌan jíín‑ró kúu‑ri̱, te ná kuatáꞌú‑ró‑i, nátu̱ꞌun ruu̱ núsáá.
\v 18 Te nú na̱ún falta ni̱ sáꞌa‑i jíín‑ró, xí taú‑i nuu̱‑ro̱, te sɨkɨ̱ máá‑rí ná chíꞌi‑ró cuenta.
\v 19 Máá‑rí kúu Pablo, cháa‑ri̱ tutu̱ yáꞌa jíín ndáꞌa máá‑rí, te máá‑rí chunáa. Súan káꞌa̱n‑ri̱ lugar ja̱ káꞌa̱n‑ri̱ ja̱ súni onde̱ jíín máá‑ró jíín añú‑ro̱ taú‑ro̱ núu̱‑rí.
\v 20 Jándáa̱ ñáni̱, kuní‑ri̱ ja̱ ná kúsɨɨ̱ iní‑ri̱ sáꞌa‑ró sɨkɨ́ tíñu máá Jítoꞌo̱‑yo̱. Te ná nániꞌi̱n‑gá ini̱‑ri̱ sáꞌa‑ró jíín máá Jítoꞌo̱‑yo̱.
\v 21 Cháa‑ri̱ tutu̱ yáꞌa nuu̱‑ro̱, chi̱ kúva̱ꞌa ini̱‑ri̱ ja̱ kuándatu̱ va̱ꞌa‑ró, te jiní‑ri̱ ja̱ skíkuu‑ga̱‑ro̱ vásá já ní kaꞌa̱n‑ri̱ jíín‑ró.
\v 22 Te suni kuní‑ri̱ ja̱ sátu̱ꞌa‑ró nú kúnchaa̱‑ri̱, chi̱ ñúkuu ini̱‑ri̱ kenda‑ri̱ yáꞌa te jaa̱‑ri̱ nuu̱‑ro̱, sáꞌa‑ya̱ jíín túꞌun jikán taꞌu̱‑ro̱ jáꞌa̱‑rí.
\v 23 Te Epafras, cha̱a kándee taꞌa̱n jíín‑rí veka̱a yáꞌa ja̱ sɨkɨ́ Cristo Jesús, káꞌa̱n‑de ja̱ násándéé iní‑ro̱.
\v 24 Te Marcos, Aristarco, Demas, jíín Lucas, cha̱a kásátiñu taꞌa̱n jíín‑rí, suni súan kákaꞌa̱n‑de.
\v 25 Tu̱ꞌun luu íó ini̱ máá Jítoꞌo̱‑yo̱ Jesucristo ná kóo ini̱‑ro̱. Súan ná kóo. Amén.