\id 2PE
\h 2 Pedro
\toc1 2 Pedro
\mt2 LA SEGUNDA EPISTOLA UNIVERSAL DE SAN PEDRO APOSTOL
\mt YAꞌA KUU CARTA UU JA NI CHAA SAN PEDRO APOSTOL NUU TAKA ÑAYƗVƗ KAKANDIJA
\c 1
\p
\v 1 Máá‑rí kúu Simón Pedro. Te mozo jíín apóstol Jesucristo kúu‑ri̱. Te cháa‑ri̱ tutu̱ yáꞌa nuu̱ róó ja̱ ɨ́ɨn káꞌnu kákandíja‑yó túꞌun luu‑ya̱, te káyi̱ꞌi‑yó chíi tiñu ndaa̱ Dios máá‑yó jíín Jesucristo, Iꞌa̱ nama yóó.
\v 2 Tu̱ꞌun luu íó ini̱ jíín túꞌun kuakáꞌnu ini̱ ná ndeá ini̱‑ro̱ jínáꞌan‑ró, chi̱ kájini̱‑ro̱ núu̱ Dios jíín núu̱ Jítoꞌo̱‑yo̱ Jesús.
\s Sɨkɨ̱ já kuítú iní kandíja va̱ꞌa
\p
\v 3 Chi̱ Iꞌa̱ ñáꞌnu Iꞌa̱ va̱ꞌa kúu‑ya̱, te ja̱ yúán ní kana‑ya̱ xiní‑yo̱. Te kájini̱‑yo̱ núu̱‑yá, te jíín fuerza ii̱‑yá, te ni̱ ja̱ꞌa‑ya̱ táká ndatíñu kánandɨꞌɨ‑yó já kúchaku̱‑yo̱ jíín já chíñúꞌún‑yó‑yá.
\v 4 Ja̱ yúán te tu̱ꞌun luu tu̱ꞌun kánúú xáa̱n ní keyuꞌu‑yá nuu̱‑yo̱, náva̱ꞌa jíín túꞌun‑ún te ka̱ku‑ró iní ñu̱yɨ́vɨ, te ma̱ stɨ́vɨ́‑ró máá‑ró jíín tíñu kákani̱ ini̱‑i sáꞌa‑i, chi̱ sua ná ndúndoo taꞌa̱n‑ro̱ jíín‑yá.
\v 5 Te róó, suni ná ndúkú ndéé‑ró jíín túꞌun yáꞌa. Nú kákandíja‑ró, te sɨkɨ̱‑ún ná chísó‑ró tíñu va̱ꞌa. Te nú kásáꞌa‑ró tíñu va̱ꞌa, te sɨkɨ̱‑ún ná chísó‑ró túꞌun ndíchí.
\v 6 Te nú ndíchí‑ró, te sɨkɨ̱‑ún ná káka ñúkúún‑ró. Te nú kájika ñúkúún‑ró, sɨkɨ̱‑ún ná kuíñi ni̱ꞌin‑ró. Te nú káꞌi̱in ni̱ꞌin‑ró, sɨkɨ̱‑ún te ná chíñúꞌún‑váꞌa‑ró Dios.
\v 7 Te nú káchiñúꞌún váꞌa‑ró Dios, sɨkɨ̱‑ún ná kóo mani̱‑ro̱ jíín táꞌan‑ró. Te nú mani̱‑ro̱ jíín táꞌan‑ró, te sɨkɨ̱‑ún ná kúndáꞌú ini̱‑ro̱ táꞌan‑ró.
\v 8 Chi̱ nú ndea̱ tu̱ꞌun yáꞌa ini̱‑ro̱, yúan‑na te ma̱ káka kuu kúxí‑ró, chi̱ sua kee va̱ꞌa tiñu sáꞌa‑ró, jíín túꞌun júku̱ꞌun ini̱‑ro̱ cuenta Jitoꞌo̱‑yo̱ Jesucristo.
\v 9 Ko ña̱yɨvɨ tú sáꞌa súan, kákuáá‑i, te kákuáá ndɨ́ɨ‑í, te a ni̱ naa iní‑i ja̱ ní nakacha‑ya̱‑í ta̱ká kua̱chi ni̱ sáꞌa‑i onde̱ sáá.
\v 10 Ñáni̱, ja̱ yúán ná kuítú xáa̱n iní‑ro̱ náva̱ꞌa koo seguro ja̱ ní kana‑ya̱ xiní‑ro̱ jíín já ní ka̱ji‑ya̱ róó. Chi̱ nú súan sáꞌa‑ró táká tiñu yáꞌa, te ma̱ júngava kutɨ‑ro.
\v 11 Yúan‑na te kundéé‑ró kɨ́vɨ‑ró iní ñuu̱ máá Jítoꞌo̱‑yo̱ Jesucristo, Iꞌa̱ náma yóó, te yúan táꞌú‑yá tiñu nɨ́ɨ́ káni.
\v 12 Ja̱ yúán tú júkuiñi̱‑ri̱ ja̱ xndáku‑ri̱ tu̱ꞌun yáꞌa nuu̱‑ro̱, va̱sa a kájini̱‑ro̱, te va̱sa a káꞌi̱in ni̱ꞌin‑ró jíín túꞌun ndaa̱ kákandíja‑ró vína.
\v 13 Chi̱ jáni ini̱‑ri̱ ja̱ íó va̱ꞌa ja̱ xndáku‑ri̱ nuu̱‑ro̱ nini chakú‑ga̱‑ri̱ vina, náva̱ꞌa ndukanda̱ ini̱‑ro̱,
\v 14 chi̱ jiní‑ri̱ ja̱ á yani sía̱‑ri̱ yikɨ kúñu‑ri̱ yáꞌa, nátu̱ꞌun ni̱ kastu̱ꞌún máá Jítoꞌo̱‑yo̱ Jesucristo nuu̱‑rí.
\v 15 Te jíku ni̱ꞌin‑rí xndáku‑ri̱ nuu̱‑ro̱, náva̱ꞌa nú a ni̱ jiꞌi̱‑ri̱, te niꞌi̱n‑ro̱ modo ja̱ nené ná núku̱ꞌun ini̱‑ro̱ táká tu̱ꞌun yáꞌa.
\s Tu̱ꞌun ña̱yɨvɨ ní ka̱jini jíín núu̱
\p
\v 16 Chi̱ tú ní kákaꞌa̱n‑ri̱ cuento ja̱ ní ka̱tava ñúkúún máá‑i, ná ni̱ kaka̱stu̱ꞌún‑rí tu̱ꞌun máá Jítoꞌo̱‑yo̱ Jesucristo nuu̱‑ro̱, ndasa ndii‑ya̱ jíín fuerza. Chi ni̱ kajini̱ jíín núu̱‑rí ndasa Iꞌa̱ ñáꞌnu kúu‑ya̱.
\v 17 Chi̱ máá Táa̱‑ya̱ Dios, ni̱ kaꞌa̱n jíñúꞌún‑yá jíín‑yá, te ni̱ sáñáꞌnu‑ya̱ Jesús. Chi̱ ichi ándɨ́vɨ́ ní kaꞌa̱n ɨɨn tu̱ꞌun jíín‑yá: Ya̱ꞌá kúu Se̱ꞌe‑ri̱ ja̱ kúndáꞌú ini̱‑ri̱, te kúsɨɨ̱ iní‑ri̱ jíín‑i. Achí.
\v 18 Te ruu̱, ná ni̱ kaꞌi̱in tútú‑rí jíín‑yá xini̱ máá yúku íi̱, te ni̱ ka̱jini so̱ꞌo‑ri̱ tu̱ꞌun yáꞌa ja̱ ní kii ichi ándɨ́vɨ́.
\v 19 Te suni kájini̱‑yo̱ túꞌun ni̱ kakaꞌa̱n cha̱a ni̱ ka̱jani tu̱ꞌun Dios onde̱ sáá, te vina a ni̱ kukútu váꞌa‑ga̱ tu̱ꞌun. Te tu̱ꞌun‑ún kúu nátu̱ꞌun ɨɨn luz ja̱ stúu̱n ñu̱ñáa. Núsáá te ná chúꞌun ini̱‑ro̱ túꞌun‑ún onde̱ kundiji̱n te stúu̱n lucero ini̱ añú‑ro̱.
\v 20 Ko xnaꞌa̱n‑ga̱ ná kuní‑ro̱ já ɨ́ɨn ña̱yɨvɨ ma̱ kúu juku̱ꞌun ini̱‑i ni ɨɨn tu̱ꞌun káꞌa̱n tutu̱ ii̱ jíín fuerza máá‑i.
\v 21 Chi cha̱a ni̱ ka̱jani tu̱ꞌun Dios, tú ní kájani‑de tu̱ꞌun ja̱ kúu ini̱ máá‑de, chi̱ sua ni̱ ka̱jani‑de tu̱ꞌun Dios ni̱ sáꞌa Espíritu jíín‑de.
\c 2
\s Sɨkɨ̱ cháa stáꞌa̱n tu̱ꞌun xndáꞌú
\p
\v 1 Ko ma̱ꞌñú ñáyɨvɨ‑ún ni̱ kaꞌi̱o cha̱a ni̱ ka̱jani tu̱ꞌun xndáꞌú. Te suni súan jukuiñi̱ cha̱a stáꞌa̱n tu̱ꞌun xndáꞌú ma̱ꞌñú‑ró. Te skɨ́vɨ sa̱ꞌí‑de saꞌa̱n ja̱ náa‑ro sáꞌa. Te ma̱ kuátúꞌún‑de ja̱ ní nakuaan Jitoꞌo̱‑yo̱‑dé, chi̱ sua xnáa yachí‑de máá‑de.
\v 2 Te kuaꞌa̱ cháa kúndiki̱n‑de ichi kuáxán kájaꞌa̱n‑de. Te ja̱ sɨkɨ́ cháa‑ún te kuaku̱ nchaa̱‑i koto‑i ichi ndáa̱.
\v 3 Te ja̱ tóó iní‑de jínáꞌan‑de te xndáꞌú‑de róó, náva̱ꞌa sanaa te niꞌi̱n‑dé xu̱ꞌún sɨkɨ́‑ro̱. Ko ma̱ kúkuéé kɨvɨ̱ táꞌnu̱ ndatu̱‑de, ni tú kixí tu̱ndóꞌo naa‑dé.
\v 4 Chi̱ Dios, tú ní kúndáꞌú ini̱‑ya̱ ndájáꞌa̱‑yá ja̱ ní ka̱sáꞌa kua̱chi, chi̱ sua ni̱ juꞌni̱‑ya̱‑í jíín cadena ñu̱ñáa, te ni̱ súngoyo‑ya̱‑í onde̱ ini̱ infierno. Yúan ni̱ taan túꞌa‑ya̱‑í onde̱ chaa̱ juicio.
\v 5 Te ni tú ní kúndáꞌú ini̱‑ya̱ ñúyɨ́vɨ ánáꞌán, chi̱ sua ni̱ skúun‑ya̱ saú xáa̱n sɨkɨ́ ñáyɨvɨ káñáá. Ko Noé, cha̱a ni̱ jani tu̱ꞌun ndaa̱, ni̱ ndi̱to va̱ꞌa‑ya̱‑dé jíín usiá‑ga̱ ña̱yɨvɨ.
\v 6 Te ni̱ naku̱xndíi‑ya̱ sɨkɨ́ ñúu̱ Sodoma jíín ñúu̱ Gomorra ja̱ ní naa‑í. Te ni̱ nduu máá nían‑na̱ yaa̱ ní sáꞌa‑ya̱. Te súan ni̱ kuu‑i ɨɨn ejemplo nuu̱ táká‑ga̱ ña̱yɨvɨ já tú kákuni̱ chiñúꞌún Dios.
\v 7 Ko Lot, ni̱ kuu‑de cha̱a ndaa̱ te ni̱ ndukuíꞌa̱ ini̱‑de ja̱ ní jini̱‑de nuu̱ tíñu kuáxán ní ka̱sáꞌa ña̱yɨvɨ ñáá‑ún. Te ni̱ nama‑ya̱‑dé.
\v 8 Chi cha̱a ndaa̱ yúan, ni̱ ncha̱a‑de ma̱ꞌñú ñáyɨvɨ‑ún, te ni̱ jini̱‑de te ni̱ jini so̱ꞌo‑de tiñu ñáá ni̱ ka̱sáꞌa‑i. Te ndɨtaꞌa̱n kɨvɨ̱ ní ndukuíꞌa̱ ini̱‑de ja̱ súan ni̱ ka̱sáꞌa‑i, chi ni̱ i̱o ndaa̱ ini̱ añú‑de.
\v 9 Te nú súan ni̱ i̱o, núsáá te nú va̱i tu̱ndóꞌo sɨkɨ̱ ñáyɨvɨ káchiñúꞌún‑i máá Tatá Dios, te jiní‑ya̱ náma‑ya̱‑í, te chíndasu̱‑ya̱ ñáyɨvɨ ñáá, náva̱ꞌa ndoꞌo‑i kɨvɨ̱ cháa̱ juicio.
\v 10 Víꞌí‑gá ndoꞌo ña̱yɨvɨ kásáꞌa tiñu ja̱ kaní ini̱ máá‑i, chi̱ cháꞌán xáa̱n kájika kuáxán‑i, te káskéꞌichi̱‑i ña̱yɨvɨ kátáꞌú tíñu. Ña̱yɨvɨ níꞌin ini̱ kákuu‑i, te kásáꞌa‑i ja̱ kúu ini̱ máá‑i, te tú káyu̱ꞌú‑i káꞌa̱n ndɨva̱ꞌa‑i sɨkɨ̱ já kákuñáꞌnu.
\v 11 Ni máá ndájáꞌa̱‑yá, va̱sa ñáꞌnu‑ga̱‑ya̱ jíín fuerza jíín tíñu kándi̱so‑ya̱, ko tú kákaꞌa̱n ndɨva̱ꞌa‑ya̱ sɨkɨ́ yúán núu̱ máá Tatá Dios.
\v 12 Ko ña̱yɨvɨ yáꞌa, kákaꞌa̱n ndɨva̱ꞌa‑i sɨkɨ̱ já tú kájuku̱ꞌun ini̱‑i, te kákuu‑i nátu̱ꞌun kɨtɨ yúkú ja̱ ní ka̱kaku‑tɨ̱ náva̱ꞌa kunuꞌni̱‑tɨ̱ te kuu̱‑tɨ̱. Te súan naa ñáyɨvɨ‑ún sáꞌa ya̱ku‑i,
\v 13 chi kii tu̱ndóꞌo sɨkɨ̱‑í kua̱chi tiñu ñáá kásáꞌa‑i. Chi̱ máni sɨkɨ̱ túꞌun sɨɨ̱ iní kájataꞌa̱n ini̱‑i ndɨtaꞌa̱n kɨvɨ̱. Ña̱yɨvɨ kíni ña̱yɨvɨ cháꞌán kákuu‑i. Te nini káyee‑í jíín‑ró jínáꞌan‑ró, te kákusɨɨ̱
xáa̱n iní‑i káxndáꞌú‑i róó.
\v 14 Te jíꞌvá‑i sɨkɨ̱ túꞌun ísɨ́kɨ ncháa̱ táꞌan. Te tɨ́ndɨ́‑i sɨkɨ̱ kuáchi. Te skaní‑i ini̱ ña̱yɨvɨ táꞌya ini̱. Te bueno tóó iní añú‑i, te se̱ꞌe tasɨ̱ kákuu‑i.
\v 15 Ni̱ ka̱sía̱‑i ichi ndóó. Te ni̱ kasa̱na‑i. Te ni̱ kandiki̱n‑i ichi Balaam, se̱ꞌe Beor. Chi cha̱a‑ún ni̱ kusɨɨ̱ iní‑de jíín yáꞌu tiñu ñáá ni̱ sáꞌa‑de.
\v 16 Ko ɨɨn burro, va̱sa kɨtɨ ndíso kɨtɨ ñíꞌín kúu‑tɨ̱, ko ni̱ kaꞌa̱n‑tɨ̱ nátu̱ꞌun ɨɨn ña̱yɨvɨ. Te ni̱ kana jíín‑tɨ́ nuu̱‑dé. Te súan ni̱ jasu̱‑tɨ̱ núu̱ tíñu kátachi̱ ndúkú sáꞌa cha̱a jáni tu̱ꞌun‑ún.
\v 17 Ña̱yɨvɨ‑ún kákuu‑i nátu̱ꞌun sókó íchí. Te suni kákuu‑i nátu̱ꞌun viko̱ já ndéché‑ni jíín tachí. Ko íó tu̱ꞌa ñu̱ñáa lúchi túún nuu̱ kúxiu̱kú‑i nɨ́ɨ́ káni.
\v 18 Chi̱ kásávixi̱‑i máá‑i jíín túꞌun sáni kákana‑i. Te jíín tíñu kaní ini̱ máá‑i te káñuꞌun‑i sava‑ga̱ cha̱a ja̱ ná káka kuáxán‑de, va̱sa a ni̱ ka̱jinu ndija cha̱a‑ún ni̱ ka̱jito‑de ña̱yɨvɨ kásáꞌa tiñu ñáá.
\v 19 Te máá‑i, va̱sa kákeyuꞌu‑í ja̱ ndúu libre cha̱a‑ún, ko kájatíñu máá‑i nuu̱ tíñu ñáá. Chi̱ nú ni̱ yuji̱ ɨ́ɨn cha̱a ni̱ sáꞌa ɨnga̱ cha̱a, yúan‑na te kuatíñu‑de nuu̱ cháa ni̱ kundéé jíín‑de‑ún.
\v 20 Chi ni̱ kajini̱‑de nuu̱ máá Jítoꞌo̱‑yo̱ Jesucristo, te ni̱ nama‑ya̱‑dé, te ni̱ ka̱kuxio‑de nuu̱ tíñu cháꞌán íó ini̱ ñu̱yɨ́vɨ. Te nú ndɨ̱vɨ tuku‑de ɨnga̱ jínu nuu̱ tíñu cháꞌán‑ún, te a ni̱ kayuji̱‑ní‑de nú súan. Te ñáá xaa̱n‑gá kendo̱o‑de ja̱ sándɨ̱ꞌɨ́‑na̱ vásá já xnáñúú.
\v 21 Chi̱ vaꞌa̱‑ga̱ kendo̱o‑de nú tú ní kájini̱‑de ichi ndáa̱, nasu̱ já á ni̱ kajini̱‑de, te káskéꞌichi̱‑de tiñu ii̱ já ní táꞌú‑yá nuu̱‑dé.
\v 22 Te ni̱ kataꞌa̱n‑de nátu̱ꞌun káꞌa̱n ndija ɨɨn tu̱ꞌun anáꞌán: Tiꞌina̱, ni̱ nakaji‑tɨ́ ja̱ ní nduxian‑tɨ̱. Te kuchí, va̱sa a ni̱ ndundoo‑tɨ̱, ko ni̱ nakɨɨn‑tɨ́ máá‑tɨ́ nuu̱ ndéꞌyu̱.
\c 3
\s Tu̱ꞌun ni̱ keyuꞌu‑yá ncháa̱‑ya̱
\p
\v 1 Ñáni̱ máni̱, ya̱ꞌá kúu carta uu̱ cháa‑ri̱ nuu̱‑ro̱ vína, te jíín ndéndúú xndáku‑ri̱ nuu̱‑ro̱ náva̱ꞌa ná ndúkanda̱ ini̱‑ro̱, chi̱ íó kájí xiní‑ro̱.
\v 2 Náva̱ꞌa ná núku̱ꞌun ini̱‑ro̱ táká tu̱ꞌun ni̱ kakaꞌa̱n cha̱a ni̱ ka̱jani tu̱ꞌun Dios onde̱ sáá, jíín tíñu ni̱ táꞌú Jítoꞌo̱‑yo̱, Iꞌa̱ náma yóó, ja̱ ní kaꞌa̱n‑ya̱ jíín yúꞌu cháa kákuu apóstol nuu̱‑ro̱.
\v 3 Tu̱ꞌun yáꞌa ná kuní‑ro̱ xnáꞌa̱n‑ga̱, ja̱ ondé sandɨ̱ꞌɨ́‑na̱ te chaa̱ cha̱a sákátá jíín túꞌun kátá‑de. Te sáꞌa‑de ta̱ká ja̱ kákani̱ ini̱ máá‑de.
\v 4 Te kachi̱‑de: Naja̱ tú ncháa̱‑ya̱ nátu̱ꞌun ni̱ keyuꞌu‑yá. Chi̱ onde̱ kɨvɨ̱ ní kajiꞌi̱ ndɨ̱yi táa̱‑yo̱, te ta̱ká ndatíñu yáꞌa tú ní sáma kutɨ onde̱ kɨvɨ̱ ní kejáꞌá‑yá ni̱ sáꞌa‑ya̱ ñúyɨ́vɨ, achi̱‑de.
\v 5 Chi̱ kájasu̱‑de nuu̱ jiní tuní‑de, náva̱ꞌa tú kuni̱‑de ja̱ íó andɨ́vɨ́ ondé anáꞌán, te jíín túꞌun Dios ni̱ kuva̱ꞌa ñu̱yɨ́vɨ jíín ndúcha máꞌñú máá ndúcha‑ún.
\v 6 Te suni jíín ndúcha‑ún ni̱ naa ñúyɨ́vɨ ánáꞌán, chi ni̱ sa̱ꞌu chi̱i nducha‑ún.
\v 7 Ko andɨ́vɨ́ jíín ñúyɨ́vɨ íó vina, suni súan jíín túꞌun máá‑yá te yíndasu̱ tu̱ꞌa náva̱ꞌa kayu̱ jíín ñúꞌu̱n kɨvɨ̱ cháa̱ juicio. Te suni kɨvɨ̱‑ún naa táká ña̱yɨvɨ tú káchiñúꞌún Dios.
\v 8 Ko róó ñáni̱ máni̱, ma̱ náa iní‑ro̱ túꞌun yáꞌa jínáꞌan‑ró. Chi̱ ɨɨn kɨvɨ̱ jíín máá Jítoꞌo̱‑yo̱, nátu̱ꞌun mil‑ni kuia̱ kúu. Te mil kuia̱ nátu̱ꞌun ɨɨn kɨvɨ̱‑ní kúu.
\v 9 Tú kúꞌuun ini̱ máá Jítoꞌo̱‑yo̱ sɨkɨ́ túꞌun ni̱ keyuꞌu‑yá‑ún, nátu̱ꞌun kájani ini̱ sava ña̱yɨvɨ. Chi̱ sua íó paciencia ini̱‑ya̱ núu̱‑yo̱, tú kuní‑ya̱ já náa ní ɨɨn‑yó, chi̱ sua ndɨꞌɨ‑yó ná nákani ini̱‑yo̱ kuní‑ya̱.
\v 10 Ko kɨvɨ̱ máá Iꞌa̱ kúu Tatá Dios chaa̱ nátu̱ꞌun ñakui̱ꞌná ákuáa. Te kɨvɨ̱‑ún nɨ̱ꞌɨn xaa̱n, te naa ándɨ́vɨ́, te ta̱ká ndatíñu andɨ́vɨ́ ndɨ́ꞌɨ kayu̱ te nducha. Te ñu̱yɨ́vɨ jíín táká ndatíñu íó, ndɨꞌɨ kayu̱.
\v 11 Te nú súan nduxia̱ ta̱ká ndatíñu yáꞌa, núsáá te jínu ñúꞌún já káka ndoo‑ró te chiñúꞌún‑ró‑yá.
\v 12 Nini káinda̱tu‑ró, te kásátiñu‑ró náva̱ꞌa yachi̱ chaa̱ máá kɨvɨ́ Dios. Te kɨvɨ̱‑ún kayu̱ andɨ́vɨ́ te nducha‑ni. Te ta̱ká ndatíñu andɨ́vɨ́ nducha̱ jíín ñúꞌu̱n.
\v 13 Ko máá‑yó, káinda̱tu‑yó ándɨ́vɨ́ jáá jíín ñúyɨ́vɨ jáá, nátu̱ꞌun ni̱ keyuꞌu‑yá. Te yúan koo máni tiñu ndaa̱.
\v 14 Ñáni̱ máni̱, a káinda̱tu‑ró cháa̱ tu̱ꞌun yáꞌa. Ja̱ yúán ná ndúkú ndéé váꞌa‑ró já níꞌi̱n‑yá róó, ja̱ tú kácháꞌán iní‑ro̱, ni ja̱ tú na̱ kua̱chi‑ró kóo. Ni ja̱ tú kána̱á‑ro̱.
\v 15 Te ná kuní‑ro̱ já núu̱‑yo̱ íó paciencia ini̱ máá Jítoꞌo̱‑yo̱, te ja̱ yúán káku‑yó. Chi̱ ñani̱‑yo̱ Pablo ja̱ maní‑yo̱ jíín‑de, suni súan ni̱ chaa‑de tutu̱ nuu̱‑ro̱. Chi ni̱ stáꞌa̱n‑ya̱ túꞌun ndíchí núu̱‑dé.
\v 16 Suni súan yóso túꞌun yáꞌa nuu̱ táká carta ni̱ chaa‑de. Te nuu̱ carta‑de‑ún íó yaku̱ tu̱ꞌun yíí ja̱ tú kájuku̱ꞌun yachi̱ ini̱‑yo̱ jíín. Te ña̱yɨvɨ tú tu̱ꞌa jíín ñáyɨvɨ táꞌya ini̱, kásama‑i tu̱ꞌun yíí yúan. Nátu̱ꞌun kásama‑i sava‑ga̱ tutu̱ ii̱. Te ja̱ yúán káxnáa‑í máá‑i.
\v 17 Ko róó ñáni̱ máni̱, onde̱ jíín tiempo te a kájini̱‑ro̱ túꞌun yáꞌa. Núsáá te koto‑ró máá‑ró, náva̱ꞌa tú kukuu‑ró jíín kuáchi kásáꞌa ña̱yɨvɨ ñáá, chi̱ sanaa te jungava‑ró já tuká káꞌi̱in ni̱ꞌin‑ró.
\v 18 Chi̱ sua ná ndeá tu̱ꞌun luu‑ya̱ iní‑ro̱. Te ná júku̱ꞌun‑ga̱ ini̱‑ro̱ túꞌun máá Jítoꞌo̱‑yo̱ Jesucristo, Iꞌa̱ náma yóó. Te ná nákana jaa‑yó‑yá vina, te suni súan nɨ́ɨ́ káni nɨ́ɨ́ kuiá. Súan ná kóo. Amén.