\id 1JN
\h 1 Juan
\toc1 1 Juan
\mt2 LA PRIMERA EPISTOLA UNIVERSAL DE SAN JUAN APOSTOL
\mt YAꞌA KUU CARTA ƗƗN JA NI CHAA SAN JUAN APOSTOL NUU TAKA ÑAYƗVƗ KAKANDIJA
\c 1
\s Tu̱ꞌun máá‑yá ni̱ jini̱ Juan
\p
\v 1 Tu̱ꞌun kájani‑ri̱ kúu tu̱ꞌun máá Iꞌa̱ ni̱ i̱o onde̱ xnáñúú. Te ni̱ ka̱jini so̱ꞌo‑ri̱ ni̱ kaꞌa̱n‑ya̱. Te ni̱ kajini̱‑ri̱ nuu̱‑yá jíín ndúchi‑rí. Te ni̱ ka̱kéꞌé‑rí‑ya̱ jíín ndáꞌa‑rí. Te máá‑yá kúu tu̱ꞌun kuchaku̱‑yo̱.
\v 2 Te Iꞌa̱‑ún chakú‑yo̱ sáꞌa‑ya̱, ni̱ kenda ndiji̱n‑ya̱. Te ni̱ kajini̱‑ri̱ nuu̱‑yá. Te kájani ndaa̱‑ri̱ tu̱ꞌun‑ya̱. Te kákastu̱ꞌún‑rí nuu̱‑ro̱ ndasa kuchaku̱‑ro̱ nɨ́ɨ́ káni jínáꞌan‑ró sáꞌa‑ya̱. Chi ni̱ kanchaa̱‑ya̱ jíín máá Táa̱‑yo̱ Dios. Te ni̱ kenda ndiji̱n‑ya̱ núu̱‑yo̱.
\v 3 Ja̱ ní kajini̱‑ri̱ jíín já ní kajini so̱ꞌo‑ri̱‑ún, yu̱án kákastu̱ꞌún‑rí nuu̱‑ro̱, náva̱ꞌa suni máá‑ró, ɨɨn núú‑ni koo ini̱‑ro̱ jíín‑rí. Te máá‑rí, ɨɨn núú‑ni káꞌi̱o ini̱‑ri̱ jíín máá Táa̱‑yo̱ Dios jíín Séꞌe‑ya̱
Jesucristo.
\v 4 Te tu̱ꞌun yáꞌa káchaa‑ri̱ nuu̱‑ro̱ náva̱ꞌa kusɨɨ̱ xáa̱n iní‑ro̱ jínáꞌan‑ró.
\s Ja̱ ndíi ncháa̱ Dios jíín já jánchaa̱‑ya̱ kuáchi‑yó
\p
\v 5 Te ya̱ꞌá kúu tu̱ꞌun ni̱ ka̱jini so̱ꞌo‑ri̱ ni̱ kaꞌa̱n‑ya̱. Te tu̱ꞌun‑ún kájani‑ri̱ nuu̱‑ro̱: Máá Dios kúu luz. Te nuu̱ ncháá máá‑yá, tú kutɨ na̱ ñu̱ñáa íó.
\v 6 Nú kákaꞌa̱n‑yo̱ já ɨ́ɨn núú‑ni káꞌi̱o ini̱‑yo̱ jíín‑yá, te kájika kuu‑yó íchi ñúñáa. Yúan‑na te káxndáꞌú‑yo̱, te tú kákaꞌa̱n ndaa̱‑yo̱.
\v 7 Ko nú kájika‑yó íchi ñúndiji̱n nátu̱ꞌun máá‑yá kánchaa̱‑ya̱ ñúndiji̱n, yúan‑na te ɨɨn núú‑ni káꞌi̱o ini̱‑yo̱ jíín‑yá. Te nɨñi̱ máá Séꞌe‑ya̱ Jesucristo ndaꞌva̱ ta̱ká kua̱chi‑yó.
\v 8 Nú kákaꞌa̱n‑yo̱ já tú na̱ kua̱chi kándi̱so‑yó, te káxndáꞌú‑yo̱ máá‑yó já súan, te tú ñúꞌun tu̱ꞌun ndaa̱ ini̱‑yo̱.
\v 9 Te máá‑yá, Iꞌa̱ skíkuu, Iꞌa̱ va̱ꞌa kúu‑ya̱. Ja̱ yúán nú nakani ndaa̱‑yo̱ kuáchi‑yó, te sáꞌa‑ya̱ túkáꞌnu ini̱ nuu̱ kuáchi‑yó, te sándoo‑ya̱ yóó kuanchaa̱‑ya̱ táká ja̱ ñáá ñúꞌun ini̱‑yo̱.
\v 10 Te nú kaꞌa̱n‑yo̱ já tú na̱ kua̱chi ní kásáꞌa‑yó, te nátu̱ꞌun kánasáꞌa‑yó‑yá ɨɨn Iꞌa̱ káꞌa̱n tu̱ꞌun túꞌún, te tu̱ꞌun máá‑yá na̱ tú ñúꞌun ini̱‑yo̱.

\c 2
\p
\v 1 Súchi̱, ta̱ká tu̱ꞌun yáꞌa cháa‑ri̱ nuu̱‑ro̱, náva̱ꞌa ma̱ sáꞌa‑ró kuáchi jínáꞌan‑ró. Ko nú ndé ɨɨn‑ró sáꞌa kua̱chi, te íó ɨɨn Iꞌa̱ káꞌa̱n jaꞌa̱‑yo̱ núu̱ máá Táa̱‑yo̱ Dios. Jesucristo, Iꞌa̱ ndaa̱ kúu‑ya̱.
\v 2 Te onde̱ jíín nɨñí máá‑yá jánchaa̱ ta̱ká kua̱chi‑yó jínáꞌan‑yó. Te nasu̱ máá ɨ́ɨn kua̱chi máá‑yó, chi̱ suni jánchaa̱ kua̱chi nɨ́ɨ́ ñúyɨ́vɨ.
\v 3 Nú skíkuu‑yó tíñu táꞌú‑yá nuu̱‑yo̱, yúan‑na te jiní ndaa̱‑yo̱ já kájini̱‑yo̱‑yá.
\v 4 Te nú ɨɨn cha̱a kaꞌa̱n‑de: Ruu̱, chi̱ jiní‑ri̱‑ya̱. Te nú tú skíkuu‑de tiñu táꞌú‑yá, cha̱a yúan, cha̱a xndáꞌú kúu‑de, te tú ñúꞌun tu̱ꞌun ndaa̱ ini̱‑de.
\v 5 Ko cha̱a skíkuu tu̱ꞌun‑ya̱, ja̱ndáa̱ ja̱ iní máá‑de ni̱ yija va̱ꞌa tu̱ꞌun kúndáꞌú ini̱ Dios. Ja̱ yúán kájini̱‑yo̱ nú kánchaa̱‑yo̱ jíín‑yá xí túu.
\v 6 Nú káꞌa̱n ɨɨn cha̱a ja̱ ncháá‑de jíín‑yá, kánúú káka‑de nátu̱ꞌun ni̱ jika máá‑yá.
\s Tu̱ꞌun jáá táꞌú tíñu nuu̱‑yo̱
\p
\v 7 Ñáni̱ máni̱, nasu̱ tíñu jáá táꞌú‑rí nuu̱‑ro̱, chi̱ tiñu ja̱ á káñava̱ꞌa‑ró ondé ni̱ kejáꞌá kúu. Te tiñu‑ún ja̱ táꞌú‑rí nuu̱‑ro̱ kúu tu̱ꞌun ni̱ ka̱jini so̱ꞌo‑ró ondé kɨvɨ̱ ní kejáꞌá.
\v 8 Ko suni táꞌú‑rí ɨɨn tiñu jáá núu̱‑ro̱, ja̱ kúu tu̱ꞌun ndaa̱ íó ini̱ máá‑yá jíín iní máá‑ró. Chi ñu̱ñáa, a jáꞌa kuaꞌa̱n. Te stúu̱n máá luz ndija nuu̱‑yo̱ vína.
\v 9 Nú ɨɨn cha̱a jíto uꞌu̱‑de ñani̱‑de, cha̱a‑ún kándee‑de ñu̱ñáa, va̱sa a káꞌa̱n‑de ja̱ kánchaa̱‑de ñu̱ndiji̱n.
\v 10 Cha̱a ja̱ kúndáꞌú ini̱‑de ñani̱‑de, kándee‑de ñu̱ndiji̱n. Te tú náyu̱ꞌú ni ɨɨn ña̱yɨvɨ sáꞌa‑de.
\v 11 Ko cha̱a jíto uꞌu̱‑de ñani̱‑de, kándee‑de ñu̱ñáa. Te ñu̱ñáa jíka‑de, te tú jiní‑de ndé nuu̱ kíꞌi̱n‑de. Chi ni̱ kukuáá‑de ni̱ sáꞌa ñu̱ñáa‑ún.
\v 12 Súchi̱ jínáꞌan‑ró, cháa‑ri̱ tutu̱ yáꞌa nuu̱‑ro̱ chi ja̱ sɨkɨ́ Jesucristo te ni̱ sáꞌa Dios tu̱káꞌnu ini̱‑ya̱ núu̱ táká kua̱chi‑ró.
\v 13 Róó táa̱ jínáꞌan‑ró, cháa‑ri̱ tutu̱ nuu̱‑ro̱, chi̱ kájini̱‑ro̱ Iꞌa̱ kúu onde̱ xnáñúú. Róó cha̱a súchí jínáꞌan‑ró, cháa‑ri̱ tutu̱ nuu̱‑ro̱, chi̱ a ni̱ kundéé‑ró jíín kuíꞌna̱. Súchi̱, cháa‑ri̱ tutu̱ nuu̱‑ro̱, chi̱
kájini̱‑ro̱ núu̱ máá Táa̱‑yo̱ Dios.
\v 14 Róó táa̱ jínáꞌan‑ró, cháa‑ri̱ tutu̱ nuu̱‑ro̱, chi̱ kájini̱‑ro̱ Iꞌa̱ kúu onde̱ xnáñúú. Róó cha̱a súchí jínáꞌan‑ró, cháa‑ri̱ tutu̱ nuu̱‑ro̱, chi̱ káꞌi̱o ni̱ꞌin‑ró, te tu̱ꞌun Dios ñúꞌun ini̱‑ro̱, te a ni̱ ka̱kundéé‑ró jíín kuíꞌna̱.
\v 15 Ma̱ kóo mani̱‑ro̱ jíín ñúyɨ́vɨ, ni ta̱ká ndatíñu ja̱ íó ini̱ ñu̱yɨ́vɨ. Chi̱ nú ndé ɨɨn cha̱a mani̱‑dé jíín ñúyɨ́vɨ, te tú kúu koo mani̱‑dé jíín máá Táa̱‑yo̱ Dios.
\v 16 Chi ta̱ká ja̱ íó ini̱ ñu̱yɨ́vɨ kúu modo yúkú já kaní ini̱ máá‑yó, jíín já kaní ini̱ nduchi‑yo, jíín já sávixi̱‑yo̱ máá‑yó. Yu̱án násu̱ ondé nuu̱ máá Táa̱‑yo̱ Dios va̱i, chi̱ cuenta ñu̱yɨ́vɨ kákuu.
\v 17 Te naa ñúyɨ́vɨ jíín táká ja̱ kákani̱ ini̱‑yo̱. Ko cha̱a sáꞌa ja̱ kúu ini̱ máá Dios, kundii̱‑de nɨ́ɨ́ káni.
\s Cha̱a jíto uꞌu̱ Cristo
\p
\v 18 Súchi̱, a kua̱ndɨꞌɨ kɨvɨ̱. Te a ni̱ ka̱jini tu̱ꞌun‑ró já kíi máá já xíin tíñu jíto uꞌu̱ Cristo. Te onde̱ vina, a ni̱ kenda tɨnɨ̱ ña̱yɨvɨ kájito uꞌu̱‑ya̱. Te ja̱ yúán kájini̱‑yo̱ já á kua̱ndɨꞌɨ kɨvɨ̱.
\v 19 Nuu̱ máá‑yó ní kenda‑i kájaꞌa̱n‑i. Ko nasu̱ táꞌan‑yó kákuu‑i. Chi̱ nú táꞌan‑yó kákuu‑i, kendo̱o ndija‑i jíín‑yó núú. Ko ni̱ kenda‑i kájaꞌa̱n‑i náva̱ꞌa kuni̱ ndiji̱n‑yo̱ núu̱‑í ja̱ násu̱ táꞌan‑yó kákuu‑i.
\v 20 Ko máá Iꞌa̱ ii̱, ni̱ jiꞌi‑yá róó jíín Espíritu Santo. Te kájini̱‑ro̱ táká tu̱ꞌun.
\v 21 Nasu̱ cháa‑ri̱ tutu̱ yáꞌa nuu̱‑ro̱ já nátu̱ꞌun tú kájuku̱ꞌun ini̱‑ro̱ jíín túꞌun ndaa̱, chi̱ sua kájuku̱ꞌun ini̱‑ro̱ jíín, jiní‑ri̱, chi̱ tú kutɨ ní ɨɨn tu̱ꞌun túꞌún íó nuu̱ túꞌun ndaa̱.
\v 22 Ndé ja̱ xíin túꞌun xndáꞌú, suu ja̱ tú játu̱ꞌun ja̱ Jesús kúu máá Cristo. Yu̱án kúu ja̱ jíto uꞌu̱ Cristo, chi̱ tú játu̱ꞌun ja̱ kúu máá Táa̱‑yo̱ Dios jíín Séꞌe‑ya̱.
\v 23 Ta̱ká cha̱a tú játu̱ꞌun‑de máá Séꞌe, suni tú káꞌi̱in‑de jíín máá Iꞌa̱ kúu Táa̱. Te cha̱a játu̱ꞌun‑de máá Séꞌe, suni káꞌi̱in‑de jíín máá Iꞌa̱ kúu Táa̱.
\v 24 Núsáá te tu̱ꞌun ni̱ ka̱jini so̱ꞌo‑ró ondé xnáñúú, ná kéndo̱o tu̱ꞌun‑ún ini̱‑ro̱ jínáꞌan‑ró. Te nú jíín‑ró kánchaa̱ tu̱ꞌun ni̱ ka̱jini so̱ꞌo‑ró ondé xnáñúú‑ún, yúan‑na te suni kuxiu̱kú máá‑ró jíín máá Táa̱‑yo̱ jíín Séꞌe‑ya̱.
\v 25 Te ya̱ꞌá kúu tu̱ꞌun ni̱ keyuꞌu‑yá nuu̱‑yo̱: Ja̱ kúchaku̱‑yo̱ nɨ́ɨ́ káni.
\v 26 Tu̱ꞌun yáꞌa cháa‑ri̱ tutu̱ nuu̱‑ro̱ já kástu̱ꞌún‑rí cuenta sɨkɨ̱ ñáyɨvɨ kándúkú xndáꞌú róó jínáꞌan‑ró.
\v 27 Ko ni̱ jiꞌi‑yá róó jíín Espíritu Santo, te kánchaa̱ máá Espíritu ini̱‑ro̱ jínáꞌan‑ró. Te tú kájinu ñúꞌún‑ró já stáꞌa̱n ni ɨɨn ña̱yɨvɨ núu̱‑ro̱, chi̱ máá Espíritu kúu ja̱ stáꞌa̱n ta̱ká tu̱ꞌun nuu̱‑ro̱, te stáꞌa̱n tu̱ꞌun ndaa̱, tú xndáꞌú kutɨ. Núsáá te kuxiu̱kú‑ró jíín‑yá, nátu̱ꞌun ni̱ stáꞌa̱n máá Espíritu nuu̱‑ro̱.
\v 28 Te vina súchi̱, ná kúxiu̱kú níꞌin‑ró jíín‑yá, náva̱ꞌa nú ni̱ kenda ndiji̱n‑ya̱, te ma̱ yúꞌú‑yo̱, ni ma̱ kúka nuu̱‑yo̱ núu̱‑yá kɨvɨ̱ ncháa̱‑ya̱.
\v 29 Te nú kájini̱‑ro̱ já Iꞌa̱ ndaa̱ kúu‑ya̱, te suni ná kuní‑ro̱ já táká ña̱yɨvɨ kásátiñu ndaa̱, onde̱ nuu̱ máá‑yá ni̱ ka̱kaku‑i.
\c 3
\s Tu̱ꞌun se̱ꞌe Dios
\p
\v 1 Ná kúnáꞌán‑ró sɨkɨ́ máá Táa̱‑yo̱, ndasa ni̱ kundáꞌú xaa̱n iní‑ya̱ yóó, ja̱ ná kúnání‑yó séꞌe Dios. Te yu̱án kákuu ndija‑yó. Ja̱ yúán tú jiní ña̱yɨvɨ ñúyɨ́vɨ núu̱‑yo̱, chi̱ tú ní jiní‑i nuu̱ máá‑yá.
\v 2 Ñáni̱ máni̱, vina a kákuu‑yó séꞌe Dios, te té chaꞌa̱n‑ga̱ kuni̱‑yo̱ ndasa koo‑yó. Ko a kájini̱‑yo̱ já nú ni̱ kenda ndiji̱n‑ya̱, te nduu‑yó nátu̱ꞌun káa máá‑yá. Chi̱ kuni̱‑yo̱ núu̱‑yá ndasa káa‑ya̱.
\v 3 Te ta̱ká cha̱a ja̱ súan káñukuu ini̱‑de‑ya̱, sándoo‑de máá‑de nátu̱ꞌun íó ndoo máá‑yá.
\v 4 Cha̱a sáꞌa kua̱chi, suni stɨ́vɨ́‑de ley, chi kua̱chi‑ún kúu ja̱ síjíta ley.
\v 5 Te kájini̱‑ro̱ já ní kenda ndiji̱n‑ya̱ náva̱ꞌa ndaꞌva̱‑ya̱ kuáchi‑yó. Te tú na̱ kua̱chi ndíso‑ya̱.
\v 6 Ña̱yɨvɨ kánchaa̱ jíín‑yá, tú sáꞌa‑i kua̱chi. Te ña̱yɨvɨ sáꞌa kua̱chi, tú ní ndéꞌé‑i nuu̱‑yá, ni tú ní jiní‑i nuu̱‑yá.
\v 7 Súchi̱ jínáꞌan‑ró, ni ɨɨn‑de ma̱ xndáꞌú‑de róó. Cha̱a sáꞌa tiñu ndaa̱, cha̱a ndaa̱ kúu‑de, nátu̱ꞌun Iꞌa̱ ndaa̱ kúu máá‑yá.
\v 8 Te cha̱a sáꞌa kua̱chi, se̱ꞌe kuiꞌna̱ kúu‑de. Chi̱ kuiꞌna̱, sáꞌa kua̱chi va̱i onde̱ xnáñúú. Ja̱ yúán ní kii Se̱ꞌe Dios ja̱ xnáa‑yá ta̱ká tiñu sáꞌa kuiꞌna̱.
\v 9 Cha̱a kúu se̱ꞌe Dios, na̱ tú sáꞌa‑de kua̱chi, chi̱ tata̱‑ya̱ kánchaa̱ ini̱‑de. Te ma̱ kúu sáꞌa‑de kua̱chi, chi se̱ꞌe Dios kúu‑de.
\s Tu̱ꞌun se̱ꞌe kuiꞌna̱
\p
\v 10 Súan ná kuní‑yo̱ ndéja̱ kúu se̱ꞌe Dios jíín séꞌe kuiꞌna̱. Ta̱ká cha̱a ja̱ tú sáꞌa‑de tiñu ndaa̱, jíín já tú kúndáꞌú ini̱‑de ñani̱‑de, nasu̱ séꞌe Dios kúu‑de.
\v 11 Chi ya̱ꞌá kúu tu̱ꞌun ja̱ ní ka̱jini tu̱ꞌun‑ró ondé xnáñúú: Ja̱ ná kúndáꞌú ini̱‑yo̱ táꞌan‑yó.
\v 12 Te ma̱ sáꞌa‑yó nátu̱ꞌun ni̱ sáꞌa Caín, ja̱ ní kuu‑de se̱ꞌe kuiꞌna̱, te ni̱ jaꞌni‑dé ñani̱‑de. Te naja̱ ní jaꞌni‑dé ñani̱‑de. Kua̱chi ja̱ máni tiñu ñáá ni̱ sáꞌa‑de, te ñani̱‑de ni̱ sáꞌa tiñu ndaa̱.
\v 13 Ma̱ nánaa iní‑ro̱ ñáni̱, te nú ña̱yɨvɨ ñúyɨ́vɨ jíto uꞌu̱‑i róó jínáꞌan‑ró.
\v 14 A kájini̱‑yo̱ já á ni̱ ka̱ku‑yó já kúu̱‑yo̱, te ni̱ naja̱ꞌa‑yó núu̱ kúchaku̱‑yo̱, chi̱ kákundáꞌú ini̱‑yo̱ ñaní‑yo̱. Te cha̱a ja̱ tú kundáꞌú ini̱‑de ñani̱‑de, cha̱a‑ún kándee‑de nuu̱ kúu̱‑de.
\v 15 Cha̱a jíto uꞌu̱ ñani̱, cha̱a jáꞌni ndɨ́yi kúu‑de. Te a kájini̱‑ro̱ já ní ɨɨn cha̱a jáꞌni ndɨ́yi, ma̱ nániꞌi̱n táꞌu̱ kútɨ‑dé kuchaku̱‑de nɨ́ɨ́ káni.
\v 16 Ja̱ yúán jiní‑yo̱ ndasa sáꞌa tu̱ꞌun kúndáꞌú ini̱. Chi̱ Cristo, ni̱ jiꞌi̱‑ya̱ já yóó. Te máá‑yó, suni súan jínu ñúꞌún kúu̱‑yo̱ já táꞌan‑yó.
\v 17 Ko cha̱a ja̱ kúká‑de jíín ndátíñu ja̱ íó ini̱ ñu̱yɨ́vɨ, nú jiní‑de táꞌa̱n ñani̱‑de tu̱ndóꞌo, te nú sáxi̱i‑de onde̱ jíín iní añú‑de, núsáá te á ncháá tu̱ꞌun kúndáꞌú ini̱ Dios ini̱‑de xí túu.
\v 18 Súchi̱, ma̱ kúndáꞌú ini̱‑yo̱ jíín túꞌun káꞌa̱n‑ni‑yó, ni jíín yúꞌu‑yo, chi̱ sua ná kúndáꞌú ndija ini̱‑yo̱ ondé jíín tíñu kásáꞌa‑yó.
\v 19 Ja̱ yúán te kuni̱‑yo̱ já kákuu‑yó séꞌe tu̱ꞌun ndaa̱, te kundaa̱ ini̱ añú‑yo̱ núu̱‑yá,
\v 20 nú añú‑yo̱ kána jíín núu̱‑yo̱. Chi̱ Dios, ñáꞌnu‑ga̱ kúu‑ya̱ vásá añú‑yo̱, te jiní ndɨꞌɨ‑ya̱ táká na̱ún kúu.
\v 21 Súchi̱ máni̱, nú añú‑yo̱ tú náku̱xndíi sɨkɨ̱‑yo̱, yúan‑na te tuká yúꞌú‑yo̱ núu̱ Dios,
\v 22 te ta̱ká na̱ún kájika̱n‑yo̱ núu̱‑yá, te kua̱ꞌa‑ya̱ núu̱‑yo̱, chi̱ kájandatu̱‑yo̱ táká tiñu táꞌú‑yá nuu̱‑yo̱. Te kásáꞌa‑yó táká tiñu ja̱ kúsɨɨ̱ iní‑ya̱ jíín.
\v 23 Te ya̱ꞌá kúu tiñu táꞌú‑yá: Ja̱ ná kándíja‑yó núu̱ Séꞌe‑ya̱ Jesucristo, te ná kúndáꞌú ini̱‑yo̱ táꞌan‑yó nátu̱ꞌun ni̱ táꞌú‑yá tiñu nuu̱‑yo̱.
\v 24 Te ta̱ká ña̱yɨvɨ skíkuu tiñu táꞌú‑yá, káxiu̱kú‑i jíín Dios, te Dios kánchaa̱‑ya̱ jíín‑i. Te jíín túꞌun yáꞌa kájini̱‑yo̱ já ncháá máá‑yá jíín‑yó jíín máá Espíritu ja̱ ní ja̱ꞌa‑ya̱ núu̱‑yo̱.
\c 4
\s Modo kuni̱‑yo̱ sɨ́ɨn sɨ́ɨn tu̱ꞌun
\p
\v 1 Ñáni̱ máni̱, ma̱ kándíja‑ró táká tu̱ꞌun. Chi̱ ná kóto nchaa̱‑ro̱ táká tu̱ꞌun te nú onde̱ nuu̱ Dios va̱i xí túu. Chi̱ kuaꞌa̱ ñáyɨvɨ kájani tu̱ꞌun túꞌún, ni̱ kenda koyo‑i ini̱ ñu̱yɨ́vɨ.
\v 2 Jíín túꞌun yáꞌa ná kuní‑ro̱ ndéja̱ kúu máá Espíritu Dios: Ta̱ká tu̱ꞌun ja̱ káꞌa̱n ndaa̱ ja̱ ní kii Jesucristo jíín yíkɨ kúñu‑ya̱, te suu onde̱ nuu̱ Dios va̱i.
\v 3 Te ta̱ká tu̱ꞌun ja̱ tú káꞌa̱n ndaa̱ ja̱ ní kii Jesucristo jíín yíkɨ kúñu‑ya̱, nasu̱ núu̱ Dios va̱i. Te yu̱án kúu tu̱ꞌun jíto uꞌu̱ Cristo, ja̱ ní ka̱jini tu̱ꞌun‑ró já kíi, te vina a kándee ini̱ ñu̱yɨ́vɨ.
\v 4 Súchi̱ jínáꞌan‑ró, se̱ꞌe Dios kákuu‑ró. Te ni̱ kundéé‑ró jíín yúán. Chi̱ ñáꞌnu‑ga̱ kúu Iꞌa̱ kánchaa̱ ini̱ máá‑ró nasu̱ yúán já kánchaa̱ ini̱ ña̱yɨvɨ ñúyɨ́vɨ.
\v 5 Máá‑i kákuu se̱ꞌe ñu̱yɨ́vɨ. Ja̱ yúán kákaꞌa̱n‑i tu̱ꞌun ñu̱yɨ́vɨ. Te ña̱yɨvɨ ñúyɨ́vɨ jíni so̱ꞌo tu̱ꞌun kákaꞌa̱n‑i.
\v 6 Máá‑yó kákuu se̱ꞌe Dios. Te cha̱a jiní nuu̱ Dios, jíni náꞌín‑de tu̱ꞌun káꞌa̱n‑yo̱. Ko ña̱yɨvɨ já násu̱ séꞌe Dios kúu‑i, tú jíni náꞌín‑i tu̱ꞌun káꞌa̱n‑yo̱. Ja̱ yúán kájini̱‑yo̱ ndasa káa tu̱ꞌun ndaa̱ jíín túꞌun ñáá.
\s Dios kúu máá túꞌun kúndáꞌú ini̱
\p
\v 7 Ñáni̱ máni̱, ná kúndáꞌú ini̱‑yo̱ táꞌan‑yó, chi tu̱ꞌun kúndáꞌú ini̱, onde̱ nuu̱ Dios va̱i. Te ta̱ká ña̱yɨvɨ kúndáꞌú ini̱ táꞌan, se̱ꞌe Dios kúu‑i, te jiní‑i nuu̱ Dios.
\v 8 Te cha̱a ja̱ tú kúndáꞌú ini̱‑de táꞌan‑de, tú jiní‑de nuu̱ Dios, chi̱ Dios kúu máá túꞌun kúndáꞌú ini̱.
\v 9 Súan ni̱ kenda ndiji̱n ndasa kúndáꞌú ini̱ Dios yóó. Chi ni̱ tájí‑yá Se̱ꞌe‑ya̱, va̱sa máá túꞌún‑ni‑i íó. Te ni̱ kii Se̱ꞌe‑ya̱‑ún ini̱ ñu̱yɨ́vɨ yáꞌa, náva̱ꞌa jíín máá‑yá te kuchaku̱‑yo̱.
\v 10 Súan íó tu̱ꞌun kúndáꞌú ini̱, chi va̱sa tú ní kákumani̱‑yo̱ jíín Dios, ko ni̱ kundáꞌú ini̱‑ya̱ yóó. Te ni̱ tájí‑yá Se̱ꞌe‑ya̱ ní kii, náva̱ꞌa kuanchaa̱‑ya̱ táká kua̱chi‑yó jíín nɨñí‑yá.
\v 11 Ñáni̱ máni̱, nú súan kúndáꞌú ini̱ Dios yóó, te suni súan nɨ́nɨ ná kúndáꞌú ini̱‑yo̱ táꞌan‑yó núsáá.
\v 12 Ni ɨɨn cha̱a, tú ní jiní kutɨ‑dé nuu̱ Dios. Ko nú kúndáꞌú ini̱‑yo̱ táꞌan‑yó, te Dios ncháá‑ya̱ jíín‑yó, te tu̱ꞌun kúndáꞌú ini̱‑ya̱, a ni̱ yija va̱ꞌa ini̱‑yo̱.
\v 13 Ja̱ yúán kájini̱‑yo̱ já ncháá‑yo̱ jíín‑yá. Te ncháá‑ya̱ jíín‑yó. Chi ni̱ ja̱ꞌa‑ya̱ Espíritu‑ya̱ núu̱‑yo̱.
\v 14 Te a ni̱ kajini̱‑yo̱, te kákaꞌa̱n ndaa̱‑yo̱, já máá Táa̱‑yo̱ Dios ni̱ tájí‑yá Se̱ꞌe‑ya̱ ní kii ja̱ náma‑ya̱ ñáyɨvɨ ñúyɨ́vɨ.
\v 15 Nú ndé ña̱yɨvɨ káꞌa̱n ndaa̱ ja̱ Séꞌe Dios kúu Jesús, yúan‑na te ncháá Dios jíín máá‑i, te máá‑i jíín Dios.
\v 16 Te yóó, a ni̱ kajini̱‑yo̱, te ni̱ ka̱kandíja‑yó já Dios kúndáꞌú ini̱‑ya̱ yóó. Chi̱ Dios kúu tu̱ꞌun kúndáꞌú ini̱. Te cha̱a kúndáꞌú ini̱ táꞌan, ncháá‑de jíín Dios. Te Dios ncháá‑ya̱ jíín‑de.
\v 17 Súan yíja va̱ꞌa tu̱ꞌun kúndáꞌú ini̱‑yo̱, náva̱ꞌa ma̱ yúꞌú‑yo̱ kɨvɨ́ kíi juicio, chi̱ nátu̱ꞌun káa máá‑yá, suni súan kánda̱a máá‑yó iní ñu̱yɨ́vɨ yáꞌa.
\v 18 Tu̱ꞌun kúndáꞌú ini̱, tú ndíso tu̱ꞌun yúꞌú. Chi̱ nú kúndáꞌú ndija ini̱‑yo̱, te a ni̱ jinu tu̱ꞌun yúꞌú kuaꞌa̱n. Chi tu̱ꞌun yúꞌú ndíso tu̱ndóꞌo. Chi̱ nú yúꞌú ɨɨn ña̱yɨvɨ, cháꞌa̱n‑ga̱ yija va̱ꞌa‑i jíín túꞌun kúndáꞌú ini̱.
\v 19 Te yóó, mani̱‑yo̱ jíín‑yá, chi ni̱ kundáꞌú ini̱‑ya̱ yóó xnaꞌa̱n‑ga̱.
\v 20 Nú ɨɨn cha̱a káꞌa̱n‑de: Ruu̱, chi̱ mani̱‑rí jíín Dios. Te nú jíto uꞌu̱‑de ñani̱‑de, chaa̱ xndáꞌú kúu‑de nú súan. Chi cha̱a ja̱ tú kúndáꞌú ini̱‑de ñani̱‑de ja̱ á ni̱ jini̱‑de nuu̱, ndasa kuu kumani̱‑dé jíín Dios ja̱ tú jiní‑de nuu̱‑yá núsáá.
\v 21 Te ni̱ táꞌú‑yá tiñu yáꞌa nuu̱‑yo̱: Cha̱a mani̱ jíín Dios, suni ná kúndáꞌú ini̱‑de ñani̱‑de.
\c 5
\s Jíín túꞌun kándíja te kundéé‑yó
\p
\v 1 Nú ndé ña̱yɨvɨ kándíja‑i ja̱ Jesús kúu Cristo, Se̱ꞌe Dios kúu‑i, núsáá te ña̱yɨvɨ kúmani̱ jíín máá Iꞌa̱ kúu Táa̱, suni kúmani̱‑í jíín Séꞌe‑ya̱.
\v 2 Nú mani̱‑yo̱ jíín Dios te jándatu̱‑yo̱ táká tiñu táꞌú‑yá, yu̱án kájini̱‑yo̱ já maní‑yo̱ jíín táká se̱ꞌe Dios.
\v 3 Chi ja̱ maní‑yo̱ jíín Dios kúu ja̱ ná kuándatu̱‑yo̱ tíñu táꞌú‑yá, chi̱ tiñu táꞌú‑yá tú ve̱e.
\v 4 Chi ta̱ká ña̱yɨvɨ kákuu se̱ꞌe Dios, kundéé‑i jíín ñúyɨ́vɨ, chi tu̱ꞌun kándíja‑yó kúu fuerza ja̱ kúndéé‑yó jíín ñúyɨ́vɨ.
\v 5 Ndéja̱ kúu ja̱ kúndéé jíín ñúyɨ́vɨ, suu ña̱yɨvɨ kándíja ja̱ Jesús kúu Se̱ꞌe Dios, ña̱yɨvɨ‑ún kúu‑i.
\v 6 Iꞌa̱ yáꞌa kúu Jesucristo, ni̱ kii‑ya̱ jíín ndúcha jíín nɨñí. Nasu̱ máá ɨ́ɨn jíín ndúcha, chi̱ jíín ndúcha jíín nɨñí. Te máá Espíritu káꞌa̱n ndaa̱ ya̱ꞌá, chi̱ Espíritu kúu tu̱ꞌun ndaa̱.
\v 7 Chi̱ íó uni̱ ja̱ káꞌa̱n ndaa̱ ini̱ andɨ́vɨ́. Máá Iꞌa̱ kúu Táa̱, máá Séꞌe, jíín máá Espíritu Santo kákuu‑ya̱. Te ndenúní Iꞌa̱ yáꞌa, ɨɨn‑ni‑ya̱ kúu.
\v 8 Te íó uni̱ ja̱ káꞌa̱n ndaa̱ ini̱ ñu̱yɨ́vɨ. Espíritu, jíín ndúcha, jíín nɨñí kákuu, te ndenúní ya̱ꞌá, ɨɨn‑ni kákaꞌa̱n.
\v 9 Nú játáꞌú‑yó túꞌun kákaꞌa̱n ndaa̱ cha̱a, naga̱ ni̱ kuu jíín túꞌun káꞌa̱n ndaa̱ Dios, ja̱ ñáꞌnu‑ga̱ kúu, chi tu̱ꞌun káꞌa̱n ndaa̱ Dios kúu tu̱ꞌun Se̱ꞌe‑ya̱.
\v 10 Cha̱a kándíja nuu̱ Séꞌe Dios, a jiní ndaa̱ máá‑de. Te cha̱a tú kándíja nuu̱ Dios, nátu̱ꞌun násáꞌa‑de‑ya̱ ɨ́ɨn Iꞌa̱ xndáꞌú, chi̱ tú kándíja‑de tu̱ꞌun ni̱ kaꞌa̱n ndaa̱ Dios ja̱ ní jani‑ya̱ túꞌun Se̱ꞌe‑ya̱.
\v 11 Te ya̱ꞌá kúu tu̱ꞌun ndaa̱‑ún: Ni̱ ja̱ꞌa Dios tu̱ꞌun ja̱ kúchaku̱‑yo̱ nɨ́ɨ́ káni, te Se̱ꞌe‑ya̱ kúu Iꞌa̱ ndíso tu̱ꞌun kuchaku̱‑yo̱.
\v 12 Cha̱a kándíja nuu̱ Séꞌe‑ya̱, a ni̱ niꞌi̱n táꞌu̱‑dé kuchaku̱‑de. Ko cha̱a tú kándíja nuu̱ Séꞌe‑ya̱, tú ní níꞌi̱n táꞌu̱‑dé kuchaku̱‑de.
\v 13 Tu̱ꞌun yáꞌa cháa‑ri̱ nuu̱ róó, ña̱yɨvɨ kákandíja nuu̱ Séꞌe Dios, náva̱ꞌa ná kuní‑ro̱ já á ni̱ kaniꞌi̱n táꞌu̱‑ro̱ kúchaku̱‑ro̱ nɨ́ɨ́ káni, náva̱ꞌa kandíja va̱ꞌa‑ró núu̱ Séꞌe Dios.
\v 14 Ja̱ yáꞌá chúndéé iní‑yo̱ káꞌa̱n‑yo̱ jíín‑yá, chi̱ nú jikán‑yo̱ ɨ́ɨn ndatíñu nuu̱‑yá nátu̱ꞌun kuní máá‑yá, te jíni náꞌín‑yá tu̱ꞌun káꞌa̱n‑yo̱.
\v 15 Te nú kájini̱‑yo̱ já jíni náꞌín‑yá tu̱ꞌun káꞌa̱n‑yo̱ na̱ún ndatíñu kájika̱n‑yo̱. Núsáá te a kájini̱‑yo̱ já níꞌi̱n‑yo̱ já ní kajika̱n‑yo̱‑ún.
\v 16 Nú ɨɨn ña̱yɨvɨ jiní‑i sáꞌa ñani̱‑i kua̱chi ja̱ násu̱ kuáchi kuu̱‑de kúu, te ná káꞌa̱n nda̱ꞌú‑i jíín‑yá, te kua̱ꞌa‑ya̱ túꞌun kuchaku̱‑de. Ko máni nuu̱ cháa ja̱ násu̱ kuáchi kuu̱‑de kásáꞌa‑de, áchí‑ri̱. Ió kua̱chi ja̱ kúu̱‑de, ko nasu̱ jáꞌa̱ yúán káꞌa̱n‑ri̱ ja̱ káꞌa̱n nda̱ꞌú‑yo̱ jíín‑yá.
\v 17 Ta̱ká tiñu káñáá kúu kua̱chi. Ko íó kua̱chi ja̱ násu̱ kuáchi kuu̱‑i kúu.
\v 18 Kájini̱‑yo̱ já ñáyɨvɨ kákuu se̱ꞌe Dios, tú sáꞌa‑i kua̱chi. Chi̱ ɨɨn se̱ꞌe Dios ndíto va̱ꞌa‑i máá‑i. Te kuiꞌna̱, ma̱ kúu kéꞌé‑ún‑i.
\v 19 Te kájini̱‑yo̱ já séꞌe Dios kákuu‑yó. Te kuiꞌna̱ kúu ja̱ tɨ́ɨn so̱ꞌo nɨ́ɨ́ ñúyɨ́vɨ.
\v 20 Ko a kájini̱‑yo̱ já ní kii Se̱ꞌe Dios. Te kájuku̱ꞌun ini̱‑yo̱ ní sáꞌa‑ya̱, náva̱ꞌa kuni̱‑yo̱ núu̱ máá Iꞌa̱ ndaa̱. Te a káxiu̱kú‑yó jíín máá Iꞌa̱ ndaa̱, máá Séꞌe‑ya̱ Jesucristo kúu‑ya̱. Máá‑yá kúu ndija Dios ndaa̱, te máá‑yá kúu Iꞌa̱ kuchaku̱‑yo̱ nɨ́ɨ́ káni sáꞌa‑ya̱.
\v 21 Súchi̱, ná kúxio‑ró núu̱ ndosó. Súan ná kóo. Amén.