\id 2JN
\h 2 Juan
\toc1 2 Juan
\mt2 LA SEGUNDA EPISTOLA DE SAN JUAN APOSTOL
\mt YAꞌA KUU CARTA UU JA NI CHAA SAN JUAN APOSTOL NUU TAKA ÑAYƗVƗ KAKANDIJA
\c 1
\s Sɨkɨ̱ íchi ndáa̱ jíín túꞌun kúndáꞌú ini̱ táꞌan
\p
\v 1 Máá‑ná kúu máá cháa ñáꞌnu‑ga̱. Te cháa‑ná tutu̱ yáꞌa nuu̱ níí, ñaꞌan ní ka̱ji‑ya̱. Te kúndáꞌú ndija ini̱‑ná níí. Te nasu̱ máá ɨ́ɨn‑ná, chi̱ suni ta̱ká ña̱yɨvɨ kájini̱ tu̱ꞌun ndaa̱.
\v 2 Chi̱ ñúꞌun tu̱ꞌun ndaa̱ ini̱‑yo̱. Te kunchaa̱ jíín‑yó táká kɨvɨ̱.
\v 3 Tu̱ꞌun luu íó ini̱, jíín túꞌun sáꞌa tu̱káꞌnu ini̱, jíín túꞌun kuakáꞌnu ini̱, ja̱ vái onde̱ nuu̱ máá Táa̱‑yo̱ Dios jíín núu̱ Séꞌe‑ya̱ Jesucristo, ná kóo ndija ini̱‑ní jíín túꞌun kúndáꞌú ini̱.
\v 4 Xaa̱n kúsɨɨ̱ iní‑ná, chi ni̱ niꞌi̱n‑ná tu̱ꞌun ja̱ kájika ndaa̱ se̱ꞌe‑ní jínáꞌan‑i, nátu̱ꞌun ni̱ táꞌú tíñu máá Táa̱‑yo̱ Dios nuu̱‑yo̱.
\v 5 Te vina nána̱, tú cháa‑ná tutu̱ yáꞌa ja̱ táꞌú‑ná ɨɨn tiñu jáá núu̱‑ní. Chi̱ sua káꞌa̱n nda̱ꞌú‑ná jíín‑ní sɨkɨ̱ túꞌun ni̱ niꞌi̱n‑yo̱ ondé xnáñúú, ja̱ ná kúndáꞌú ini̱‑yo̱ táꞌan‑yó.
\v 6 Te ya̱ꞌá kúu tu̱ꞌun kúndáꞌú ini̱, ja̱ ná káka‑yó nátu̱ꞌun ni̱ táꞌú‑yá tiñu nuu̱‑yo̱. Ya̱ꞌá kúu tiñu ni̱ taꞌu̱ núu̱‑ní: Ja̱ ná káka‑ní jíín túꞌun‑ún, nátu̱ꞌun ni̱ ka̱jini so̱ꞌo‑ní onde̱ xnáñúú.
\s Sɨkɨ̱ já xndáꞌú
\p
\v 7 Chi kuaꞌa̱ ñáyɨvɨ káxndáꞌú ñáꞌán, va̱i koyo‑i ini̱ ñu̱yɨ́vɨ. Te ña̱yɨvɨ‑ún, tú kája̱ꞌa‑i tu̱ꞌun ja̱ ní kii Jesucristo jíín yíkɨ kúñu‑ya̱. Ɨɨn ña̱yɨvɨ súan kúu ña̱yɨvɨ xndáꞌú ñáꞌán. Te ña̱yɨvɨ jíto uꞌu̱
Cristo kúu‑i.
\v 8 Koto va̱ꞌa‑ní máá‑ní jínáꞌan‑ní, náva̱ꞌa tú xnáa‑ní tiñu ni̱ ka̱sáꞌa‑ní. Chi̱ sua ná níꞌi̱n váꞌa‑ní ya̱ꞌu‑ní.
\v 9 Nú ndé ña̱yɨvɨ sáni̱ꞌin ini̱‑i, te tú jíku‑i jíín túꞌun Cristo, tú ncháá Dios jíín‑i. Te nú ndé ña̱yɨvɨ jíku jíín túꞌun Cristo, ncháá máá Táa̱‑yo̱ jíín Séꞌe‑ya̱ jíín‑i.
\v 10 Te nú ɨɨn ña̱yɨvɨ jáa̱‑i nuu̱‑ní, te tú ndíso‑i tu̱ꞌun yáꞌa, ma̱ kuátáꞌú‑ní‑i kunchaa̱‑i ini̱ ve̱ꞌe‑ní, ni ma̱ káꞌa̱n‑ní saꞌa̱n kútaꞌu̱ jíín‑i.
\v 11 Chi ña̱yɨvɨ káꞌa̱n jíín‑i, chíndéé táꞌan jíín‑i sɨkɨ̱ tíñu ñáá sáꞌa‑i‑ún.
\v 12 Va̱sa íó kuaꞌa̱ túꞌun chaa‑ná nuu̱‑ní, ko tú kuní‑ná kaꞌa̱n‑ná jíín‑ní jíín tutú jíín tinta, chi̱ ñúkuu ini̱‑ná jaa̱‑ná nuu̱‑ní jínáꞌan‑ní. Te ndatu̱ꞌún jíín yúꞌu‑yo, náva̱ꞌa ná kúsɨɨ̱ xáa̱n iní‑yo̱.
\v 13 Ta̱ká se̱ꞌe kuꞌu̱‑ní, ja̱ ní ka̱ji‑ya̱, kákaꞌa̱n‑i ja̱ ná sándéé iní‑ní. Súan ná kóo. Amén.