\id JUD
\h Judas
\toc1 Judas
\mt2 LA EPISTOLA UNIVERSAL DE SAN JUDAS APOSTOL
\mt YAꞌA KUU CARTA JA NI CHAA SAN JUDAS APOSTOL NUU TAKA ÑAYƗVƗ KAKANDIJA
\c 1
\p
\v 1 Máá‑rí kúu Judas ñani̱ Jacobo, te mozo Jesucristo kúu‑ri̱. Te cháa‑ri̱ tutu̱ yáꞌa nuu̱ róó, ña̱yɨvɨ ní kana‑ya̱ xiní, ja̱ ní ndundoo‑ró ní sáꞌa Táa̱‑yo̱ Dios. Te Jesucristo, ndíto va̱ꞌa‑ya̱ róó.
\v 2 Tu̱ꞌun kuakáꞌnu ini̱, jíín túꞌun vindáa̱ vinené, jíín túꞌun kúndáꞌú ini̱ táꞌan ná ndeá‑ga̱ nuu̱‑ro̱ sáꞌa‑ya̱.
\s Ná kuíñi ni̱ꞌin‑yó jíín túꞌun kándíja
\p
\v 3 Ñáni̱ máni̱ jínáꞌan‑ró, xaa̱n jítú iní‑ri̱ chaa‑ri̱ tu̱ꞌun nuu̱‑ro̱ ndasa ni̱ nama‑ya̱ yóó jínáꞌan‑yó. Ko ni̱ jini̱‑ri̱ ja̱ jínu ñúꞌún já cháa‑ri̱ tutu̱ nuu̱‑ro̱ já má kuáꞌa‑ró túꞌun stɨ́vɨ́‑i tu̱ꞌun kákandíja‑yó, ja̱ ɨ́ɨn jínu‑ni ni̱ ja̱ꞌa‑ya̱ túꞌun‑ún nuu̱ ñáyɨvɨ ndóo.
\v 4 Chi̱ yaku̱ ña̱yɨvɨ, ni̱ kɨ̱vɨ koyo sa̱ꞌí‑i. Te tú káchiñúꞌún‑i Dios. Te ni̱ ka̱nasama‑i tu̱ꞌun luu íó ini̱ Dios máá‑yó, ni̱ ka̱nasáꞌa‑i tu̱ꞌun kuáxán. Te suni tú kájatáꞌú‑i máá Jítoꞌo̱‑yo̱ Jesucristo, ni Dios ja̱ máá ɨ́ɨn‑ni‑ya̱ táꞌú tíñu. Ko ña̱yɨvɨ yáꞌa, onde̱ anáꞌán a ni̱ kundaa̱ ja̱ táꞌnu̱ ndatu̱‑i.
\s Dios kúu Iꞌa̱ sándaa̱ tiñu sɨkɨ́ cháa ñáá ii̱
\p
\v 5 Te vina, va̱sa a ni̱ kajini̱ va̱ꞌa‑ró, ko ná náxndáku‑ri̱ nuu̱‑ro̱ ndasa ni̱ sáꞌa máá‑yá. Chi va̱sa a ni̱ nama‑ya̱ ñáyɨvɨ iní ñuu̱ Egipto, ko kúkuéé‑ga̱, te ni̱ xnáa‑yá sava‑i ja̱ tú ní kákandíja‑i.
\v 6 Te ndajáꞌa̱‑yá ja̱ ní ka̱skéndo̱o tiñu kándi̱so, te suni ni̱ ka̱skéndo̱o veꞌe káxiu̱kú, ni̱ juꞌni̱‑ya̱ ndájáꞌa̱‑ún jíín cadena nɨ́ɨ́ káni, káxiu̱kú chíi ñu̱ñáa onde̱ kɨvɨ̱ káꞌnu ja̱ cháa̱ juicio.
\v 7 Suni ni̱ ndoꞌo ñuu̱ Sodoma jíín ñúu̱ Gomorra jíín sáva‑ga̱ ñuu̱ ni̱ kaꞌi̱in yani. Chi ña̱yɨvɨ ñúu̱‑ún, suni súan ni̱ ka̱jika téné‑i, te sɨ́ɨn ku̱ñu kuáxán ní ka̱ndúkú‑i. Te ñuu̱‑ún kúu ɨɨn ja̱ ná kóto nchaa̱‑yo̱, chi ni̱ ka̱ndoꞌo‑i juicio nuu̱ ñúꞌu̱n nɨ́ɨ́ káni.
\v 8 Te suni modo súan kásáꞌa ña̱yɨvɨ yáꞌa, chi̱ jíín túꞌun káꞌa̱n ja̱ni jíín‑i, te kásácháꞌán‑i yikɨ kúñu‑i, kásákátá‑i nuu̱ cháa ndíso tíñu, te kákaꞌa̱n ndɨva̱ꞌa‑i sɨkɨ̱ já kákuñáꞌnu.
\v 9 Te Miguel, ndajáꞌa̱ ñáꞌnu‑ga̱, hora ja̱ ní státáꞌan‑ya̱ jíín kuíꞌna̱ sɨkɨ́ yíkɨ kúñu Moisés, tú ní chúndéé iní‑ya̱ náku̱xndíi‑ya̱ sɨkɨ́ kuíꞌna̱‑ún, ja̱ káꞌa̱n ndɨva̱ꞌa‑ya̱, chi̱ sua ni̱ kaꞌa̱n‑ya̱: Máá Tatá Dios, ná kána jíín‑yá nuu̱‑ro̱, áchí‑ya̱.
\v 10 Ko ña̱yɨvɨ yáꞌa kákaꞌa̱n ndɨva̱ꞌa‑i sɨkɨ̱ táká ja̱ tú kájuku̱ꞌun ini̱‑i. Te tu̱ꞌun kájini̱ máá‑i ja̱ máá‑i, nátu̱ꞌun kɨtɨ yúkú‑ni, jíín túꞌun yúan te naa‑í.
\v 11 Naka̱ ndáꞌú koo máá‑i, chi̱ a kájaꞌa̱n‑i ichi ní kandii̱ Caín. Te ni̱ katau̱‑i kájaꞌa̱n‑i yata̱ sáꞌa̱n ñáá Balaam náva̱ꞌa niꞌi̱n‑í na̱jíín sɨkɨ́‑ún. Te suni kánaa‑í jíín túꞌun jáꞌa̱ ini̱ Coré.
\v 12 Ña̱yɨvɨ yáꞌa, nuu̱ káyee‑í jíín‑ró, te kákuu‑i ɨɨn chaꞌa̱n núu̱ káyee maní‑ro̱. Te tú káyu̱ꞌú‑i koto va̱ꞌa‑i máá‑i ja̱ skée‑í máá‑i. Viko̱ já tú ndíso sau̱ kákuu‑i, ja̱ ndéché‑ni sáꞌa tachi̱. Yunu já tú kúun ndeꞌe̱ víko saú kákuu‑i, uu̱ jínu ni̱ kajiꞌi̱ ja̱ ní tuꞌun onde̱ yoꞌo.
\v 13 Suꞌma̱ mar ja̱ ndónda kákuu‑i. Te tiꞌiñu̱ mar kúu tu̱ꞌun kuka nuu̱ iní‑i. Nátu̱ꞌun tiñu̱ú xíní já kájika kuu sáni kákuu‑i, te ni̱ sátu̱ꞌa‑ya̱ lugar ñu̱ñáa lúchi túún nuu̱ kúxiu̱kú‑i nɨ́ɨ́ káni.
\v 14 Te Enoc, chi̱i tata̱ usia̱ Adán, ni̱ jani‑de tu̱ꞌun sɨkɨ̱ ñáyɨvɨ yáꞌa: A ni̱ chaa̱ máá Tatá Dios jíín kuáꞌa̱ xáa̱n ñáyɨvɨ ndóo‑ya̱,
\v 15 náva̱ꞌa sándaa̱‑ya̱ tíñu ta̱ká ña̱yɨvɨ, te naku̱xndíi‑ya̱ sɨkɨ́ táká ña̱yɨvɨ já tú káchiñúꞌún‑i‑ya̱, chi ni̱ ka̱sáꞌa‑i tiñu ñáá, kua̱chi ja̱ tú ní káchiñúꞌún‑i‑ya̱. Te suni kuaꞌa̱ túꞌun ndɨva̱ꞌa ni̱ kakaꞌa̱n‑i
sɨkɨ̱‑yá, áchí‑de.
\v 16 Ña̱yɨvɨ yáꞌa, kákutuku ini̱‑i, te kákaꞌa̱n ndɨva̱ꞌa‑i na̱ni ja̱ kátaꞌa̱n‑i, te kásáꞌa‑i ndéni kaní ini̱ máá‑i. Kákaꞌa̱n ni̱ꞌin‑i ja̱ kánda̱a téyíí‑i, te vixi̱ kákaꞌa̱n‑i náva̱ꞌa niꞌi̱n‑í na̱jíín.
\v 17 Ko máá‑ró, ñáni̱ máni̱, ná nándaku ini̱‑ro̱ túꞌun ni̱ kakaꞌa̱n cha̱a ni̱ ka̱kuu apóstol máá Jítoꞌo̱‑yo̱ Jesucristo.
\v 18 Chi ni̱ kakaꞌa̱n‑de: Onde̱ kɨvɨ̱ ndɨ́ꞌɨ‑na̱ te koo ña̱yɨvɨ sákátá núu̱‑ro̱. Te ña̱yɨvɨ‑ún, kaka kuu‑i ja̱ ndúkú‑i sáꞌa‑i tiñu ñáá ja̱ kákani̱ ini̱ máá‑i, áchí‑de.
\v 19 Ña̱yɨvɨ yáꞌa kákuu ja̱ sásɨ́ɨn ña̱yɨvɨ. Ña̱yɨvɨ yúkú kákuu‑i, chi̱ tú ncháá máá Espíritu‑ya̱ iní‑i.
\v 20 Ko máá‑ró, ñáni̱ máni̱, ná skuáꞌnu‑ró máá‑ró jíín túꞌun ii̱ kákandíja‑ró. Te kaka̱n taꞌu̱‑ro̱ jíín Espíritu Santo.
\v 21 Ma̱ kúxio‑ró núu̱ túꞌun kúndáꞌú ini̱ Dios róó, te ná ndúkú‑ró já máá Jítoꞌo̱‑yo̱ Jesucristo, ná kúndáꞌú ini̱‑ya̱ róó ja̱ kúchaku̱‑ro̱ nɨ́ɨ́ káni sáꞌa‑ya̱.
\v 22 Te kundáꞌú ini̱‑ro̱ sáva‑i, va̱sa kájani sɨ̱kɨ́ ini̱‑i.
\v 23 Te nama‑ró yakú‑ga̱‑i va̱sa yúꞌú‑ro̱, te nátu̱ꞌun stáa‑ró‑i nuu̱ ñúꞌu̱n. Te sava‑ga̱‑i kundáꞌú ini̱‑ro̱‑í, va̱sa jíto uꞌu̱‑ro̱ sáꞌma cháꞌán já ní kukini ni̱ sáꞌa ku̱ñu‑i.
\v 24 Te vina íó ɨɨn‑ni Iꞌa̱ ja̱ kúu koto róó, náva̱ꞌa tú kanangava‑ró kuáchi, te kuu sáꞌa‑ya̱ já kuíñi‑ró núu̱ ndíi ncháa̱ máá‑yá, jíín já má kóo cháꞌán‑ró, jíín já kúsɨɨ̱ xáa̱n iní‑ro̱.
\v 25 Te nuu̱ máá ɨ́ɨn‑ni Dios, Iꞌa̱ náma yóó, ná nákana jaa‑yó‑yá, te ná kóo ja̱ jíñúꞌún‑yó núu̱‑yá. Te ná táꞌú máá‑yá tiñu jíín fuerza ndíso‑ya̱, vina te onde̱ nɨ́ɨ́ káni nɨ́ɨ́ kuiá. Súan ná kóo. Amén.