\id JAS Alaca Mixtec James [mim]
\ide Unicode (UTF-8)
\rem Oct 8, 2010 basic pub checks run and sent to Man Edit.
\h Santiago
\mt Tutu ña ni̱taa ta̱Santiago
\c 1
\s Ta̱Santiago tíꞌvi to̱ꞌon yóꞌo ña chíndee ra na kándixa Jesucristo
\p
\v 1 Yi̱ꞌi̱ kúu Santiago, ta̱a ta̱ kísa chiño no̱o̱ Ndios xíꞌin no̱o̱ Jesucristo, ta̱káꞌno no̱o̱ yó. Táa i̱ tutu yóꞌo ña tiꞌvi i̱ to̱ꞌon va̱ꞌa chindeé i̱ ndóꞌó nañoo yó naIsrael, na ni̱xita niꞌno ta táku ndó ndiꞌi saá xiña no̱o̱ ñoꞌo̱ ñoyívi yóꞌo.
\s Ña kóni Ndios kasa ndivi yó ki̱vi̱ kixaa̱ ña xóꞌvi no̱o̱ yó
\p
\v 2 Na ñani yó xíꞌin na ki̱ꞌva̱ yó na kándixa̱ Jesucristo, ná kunakaa̱ ña sii̱ ini ndó ki̱vi̱ kixaa̱ ndiꞌi saá no̱o̱ ña xóꞌvi no̱o̱ ndó.
\v 3 Saá chi kúndaa ini yó ndí ndiꞌi saá no̱o̱ ña xóꞌvi kúu ña xíto ndoso mi̱i yó án ndixa kándixa ka̱ yó Jesucristo. Ta xíꞌin ñayóꞌo sákuaꞌa yó nduu yó ni̱vi na kundee xíꞌin ña yoꞌvi, ta o̱n sandakoo yó yichi̱ va̱ꞌa.
\v 4 Tá o̱n vása sandakoo yó yichi̱ va̱ꞌa, vará kua̱ꞌa̱ ní ña xóꞌvi yó, ta saá nduu yó ni̱vi na va̱ꞌa ni̱xaa̱ xa̱ꞌno no̱o̱ Ndios, kuu yó ni̱vi na o̱n vása xíni ñóꞌó ka̱ inka̱ no̱o̱ ndee̱ ña kasa ndivi na ña káchí ini Ndios.
\p
\v 5 Ta yóo ñii ndóꞌó, ta kumani xíꞌin ndó ña̱ ndi̱chí va̱xi no̱o̱ Ndios, ta va̱ꞌa ndukú ndó ña no̱o̱ Ndios, ta ndixa taxi ra ña ndi̱chí ndaꞌa̱ ndó. Saá chi ta̱ va̱ꞌa ini kúu Ndios, o̱n vása kuchiton ra nda̱ ñii ni̱vi, ta taxi ra ña ndíchí ndaꞌa̱ ndiꞌi ni̱vi na ndukú ña no̱o̱ ra; ña ndíchí yóꞌo kúu ña xíni ñóꞌó ñii ñii ni̱vi ña va̱ꞌa kutaku na ndatán kóni Ndios.
\v 6 Ta ki̱vi̱ ndúkú yó ña ndíchí no̱o̱ Ndios, ta xíni ñóꞌó kandixa ndinoꞌo ini yó ndí ndixa taxi ra ña xíni ñóꞌó yó ndaꞌa̱ yó. Ta o̱n váꞌa kaka o̱vi̱ ini yó, chi ndatán yóo takui̱i tá kánda xíno no̱o̱ mi̱ni, ta kua̱ꞌa̱n rá yóꞌo ta kua̱ꞌa̱n rá kaa̱, kísa ta̱chi̱ xíꞌin rá, saá yóo ni̱vi na xíka o̱vi̱ ini.\fig boat in storm|CN01707B.TIF|col|||Santiago 1:6|Jas 1.6\fig*
\v 7 Ta ni̱vi na xíka o̱vi̱ ini nda̱ mani kundati na nakiꞌin na ña va̱ꞌa ndukú na no̱o̱ Ndios, chi Ndios o̱n taxi ra ña ndaꞌa̱ na.
\v 8 Chi ni̱vi na xíka o̱vi̱ ini, vitin xáni ini na: “Yichi̱ yóꞌo kúu ña va̱ꞌa ní”, ta inka̱ ki̱vi̱ tuku xáni ini na: “Va inka̱ yichi̱ yóꞌo kúu ña va̱ꞌa ka̱”, ta saá tuku tuku násama na yichi̱ no̱o̱ xíka na.
\s Ñayóꞌo káꞌa̱n xa̱ꞌa̱ yu kúu nakui̱ká no̱o̱ Ndios
\p
\v 9 Ta na ñani yó án na kiꞌva yó na kúu nanda̱ꞌví ta kándixa̱ ndó Jesucristo, ná kunakaa̱ ña sii̱ ini ndó, chi na náꞌno kúu ndó no̱o̱ yichi̱ Ndios.
\v 10 Ta na ñani yó án na kiꞌva yó na kúu nakui̱ká, ná kunakaa̱ ña sii̱ ini ndó chi nákoni ndó nanda̱ꞌví kúu ndó no̱o̱ Ndios. Ndatán yóo yita ña ndúta yuku̱, ta ya̱chi̱ ní ndíꞌi xa̱ꞌa̱ ña, saá yóo ni̱vi nakui̱ká, chi o̱n vása kundee ñakui̱ká ni̱vi koo ña ndiꞌi saá ki̱vi̱ va̱xi.
\v 11 Tá xitaan va̱xi kana ño̱ꞌo, ta kíxáꞌá ndeé ní chikaa̱ ña kaꞌni, ta yu̱ku̱ kuii kíxáꞌá ña yichi̱ ña, ta yita livi kóyo ña no̱o̱ ñoꞌo̱, ta ndíꞌi xa̱ꞌa̱ ña. Ñii kiꞌva saá kundoꞌo nakui̱ká, kísa chiño na ta livi ní táku na, ta ñii kuiti kixaa̱ ña kivi na.
\s Yóo ña yo̱ꞌvi̱ koto ndoso ña mi̱i yó
\p
\v 12 Nákaa̱ va̱ꞌa ña sii̱ níma ni̱vi na kúndee ini xíꞌin ndiꞌi ña yo̱ꞌvi̱ xíto ndoso ñaꞌá, ta vará nda̱ yo̱ꞌvi̱ ní xóꞌvi na, ta o̱n vása sándakoo na kandixa̱ na Jesucristo. Ta saá Ndios taxaꞌvi ra ni̱vi yóꞌo ña kutaku na xíꞌin ra ndiꞌi saá ki̱vi̱ ña va̱xi, chi saá yóo to̱ꞌon ña ni̱kaꞌa̱n ra chi̱nduꞌu ra kundivi xa̱ꞌa̱ ni̱vi na kíꞌvi ní ini xíni̱ ñaꞌá.
\v 13 Tá yóo ñii ndóꞌó xáni ini ndó keꞌé ndó ña o̱n váꞌa, ta o̱n kani ini ndó ndí Ndios kúu ta̱ chi̱ndaꞌa ndóꞌó keꞌé ndó saá. Chi Ndios nda̱ loꞌo o̱n vása xáni ini ra keꞌé ra ña o̱n váꞌa, ni o̱n vása chúꞌu ra ni̱vi keꞌé na ña o̱n váꞌa.
\v 14 Ta ña káchí ini mi̱i yó kúu ña chíndaꞌa mi̱i yó keꞌé yó ña o̱n váꞌa, ta sándaꞌví ña mi̱i yó kasa ndivi yó ña o̱n váꞌa.
\v 15 Táná kasa ndivi yó ña o̱n váꞌa ña kúsii̱ ini yó, ta saá nakava yó kua̱chi, ta kixáꞌá yó taxi xíꞌin mi̱i yó kutaku yó ña o̱n váꞌa. Ta xa̱ꞌa̱ ñayóꞌo kua̱ꞌa̱n yó yichi̱ no̱o̱ ndañoꞌo yó ta o̱n kuchiño kutaku yó xíꞌin Ndios.
\p
\v 16 Ndóꞌó na ta̱a ñani yó xíꞌin ndóꞌó na ñaꞌa̱ ki̱ꞌva̱ yó, kíꞌvi ní ini i̱ xíni̱ i̱ ndóꞌó. Ndáto̱ꞌon i̱ xíꞌin ndó: o̱n sandáꞌvi xíꞌin mi̱i ndó.
\v 17 Chi ndiꞌi ña ndinoꞌo va̱ꞌa kómi yó ta nakiꞌin ka̱ yó, Yivá yó Ndios táxi sii̱ ra ña ndaꞌa̱ yó. Ta Ndios kúu ta̱ ki̱sa va̱ꞌa ndiꞌi ña kúu ñoꞌo̱ yéꞌe ña yóo ñoyívi ni̱no. Ta mi̱i Ndios o̱n vása yóo ra ndatán yóo ña yéꞌe ki̱sa va̱ꞌa ra, saá chi ndasava yóo ña nákasi no̱o̱ ña yéꞌe yóꞌo, ta o̱n vása tivi ka̱ no̱o̱ ña ta nakoo ku̱nda̱ti̱. Ta Ndios, o̱n ko̱ó ña kuchiño nasama ñaꞌá, ta ni o̱n vása nasama xíꞌin mi̱i ra.
\v 18 Xa̱ꞌa̱ ña kándixa yó to̱ꞌon ra ña kúu ñanda̱a̱, ta Ndios sa̱nduu ra mi̱i yó sa̱ꞌya ra, ta nda̱sa ra mi̱i yó ni̱vi xa̱á. Ta saá kúu yó nano̱ó no̱o̱ ndiꞌi inka̱ ña̱ꞌa ña ndasa xa̱á Ndios ki̱vi̱ ñava̱xi.
\s Ñayóꞌo káꞌa̱n xa̱ꞌa̱ yichi̱ nda̱a̱ no̱o̱ Ndios
\p
\v 19 Ndóꞌó na ñani yó xíꞌin na ki̱ꞌva̱ yó, chikaa̱ so̱ꞌo ndó ña kaꞌa̱n i̱ xíꞌin ndó vitin: ndiꞌi ndó xíni ñóꞌó sakuaꞌa ndó koni so̱ꞌo ndó ña káꞌa̱n inka̱ ni̱vi xíꞌin ndó; tá kóni ndó ndakuiin ndó yuꞌu̱ na, ta siꞌna kani va̱ꞌa si̱ni̱ ndó ndá to̱ꞌon kúu ña va̱ꞌa ndakuiin ndó yuꞌu̱ na. Ta o̱n kama ní saa̱ ini ndó xíꞌin ni̱vi.
\v 20 Chi táná saa̱ ini yó xíꞌin inka̱ ni̱vi, ta o̱n ki̱ví kasa ndivi yó ña kóni Ndios.
\v 21 Ñakán tava̱ ndó ndiꞌi ña o̱n váꞌa ñóꞌo ka̱ ini ndó xíꞌin ndiꞌi ña kini ñóꞌo ka̱ níma ndó, ta ndixa sandakoo ndó keꞌé ndó ndiꞌi ña o̱n váꞌa. Ta xíꞌin ña to̱ꞌó nakiꞌin ndó to̱ꞌon Ndios ña ni̱kaꞌa̱n ra xíꞌin yó. Chi to̱ꞌon Ndios yóꞌo kómi ña ndee̱ ña sakaku ña mi̱i yó.
\p
\v 22 O̱n sandaꞌvi xíꞌin mi̱i ndó. Tá ndasaá kuiti xíni so̱ꞌo ndó to̱ꞌon Ndios, o̱n vása ndáyaꞌvi ní ñayóꞌo. Saá chi ndixa xíni ñóꞌó kasa ndivi yó ña káꞌa̱n to̱ꞌon Ndios, ta ko̱ꞌo̱n yó yichi̱ no̱o̱ xáꞌnda chiño ra.
\v 23 Ni̱vi na kuiti xíni so̱ꞌo to̱ꞌon Ndios, ta o̱n vása kísa ndivi na ña káꞌa̱n to̱ꞌon ra, nayóꞌo yóo na ndatán yóo ñii ta̱a ta̱ ndasaá kuiti xíto ra no̱o̱ ra no̱o̱ yutáta̱.
\v 24 Chi ta̱yóꞌo kuiti xíto ra no̱o̱ ra, ta saá kée ra kua̱ꞌa̱n ra, ta o̱n vása ndíꞌi ini ra ndasa ndii ra no̱o̱ ra, ta kama nándoso ra ndasaá káa no̱o̱ ra.
\v 25 Ta ni̱vi na o̱n vása nándoso to̱ꞌon Ndios ña xi̱ni so̱ꞌo na, ta chíkaa̱ na ndee̱ nándukú na kasa ndivi na ña xáꞌnda chiño to̱ꞌon yóꞌo, ta xa̱ꞌa̱ ña kéꞌé na ñayóꞌo, kunakaa̱ ña sii̱ ini na. Chi to̱ꞌon Ndios ña va̱ꞌa ndinoꞌo kúu ña, ta kómi ña ndiꞌi ndee̱ ra ña chindee ña mi̱i yó ña o̱n vása kaꞌnda chiño ka̱ ña ndiva̱ꞌa no̱o̱ yó.
\p
\v 26 Tá yóo ñii ndó ta xáni si̱ni̱ ndó va̱ꞌa ndíkon ndó yichi̱ Ndios, ta o̱n vása násita xíꞌin mi̱i ndó no̱o̱ ndiꞌi ña o̱n váꞌa káꞌa̱n ndó, ta na sándáꞌvi xíꞌin mi̱i kúu ndó, chi no̱o̱ Ndios o̱n vása ndayaꞌvi yichi̱ kua̱ꞌa̱n ndó.
\v 27 Tá kua̱ꞌa̱n yó yichi̱ nda̱a̱ ña ndáyaꞌvi no̱o̱ Yivá yó Ndios, ta ndixa kasa ndivi yó ña va̱ꞌa ta chindee yó ndiꞌi na xóꞌvi, na kúu nava̱lí xi̱ndaꞌvi na o̱n ko̱ó yivá siꞌí, na kúu ná ñaꞌa̱ ná ni̱xiꞌi̱ yii̱, ta kundaa yó xíꞌin mi̱i yó ña o̱n keꞌé yó ña o̱n váꞌa ndatán kéꞌé na ñoyívi yóꞌo.
\c 2
\s Xíni ñóꞌó kukiꞌvi ini yó koni̱ yó ndiꞌi ni̱vi
\p
\v 1 Na ñani yó xíꞌin na ki̱ꞌva̱ yó, ndóꞌó kúu na kándixa̱ Jesucristo, ta̱káꞌno no̱o̱ yó, ta̱ kómi ndiꞌi ndee̱ va̱ꞌa. Ta xa̱ꞌa̱ ña kándixa ndó saá, o̱n váꞌa nakaxin ndó ni̱vi, saá chi ñii kiꞌva xíni ñóꞌó kukiꞌvi ini yó koni̱ yó nanda̱ꞌví xíꞌin nakui̱ká.
\v 2 Tá nákutáꞌan yó veꞌe no̱o̱ kísa káꞌno yó Ndios, tá xíto yó ñii ta̱kui̱ká ni̱kiꞌvi ra no̱o̱ ndóo yó, ta ndíxin ra tiko̱to̱ ñava̱ꞌa ña yáꞌvi ní, ta nákaa̱ seꞌe ña yéꞌe ndaꞌa̱ ra, ta tuku xíto yó va̱xi inka̱ ta̱a, ta̱yóꞌo kúu ñii ta̱nda̱ꞌví, ta ndíxin ra tiko̱to̱ laꞌla yatá, ta ndáꞌví ní káa ra,
\v 3 ta mi̱i yó kama ní ta va̱ꞌa ní to̱ꞌó kua̱ꞌa̱n yó nakiꞌin yó ta̱kui̱ká, ta káꞌa̱n yó xíꞌin ra saá: “Koo ún, tata, yóꞌo yóo tayi tón va̱ꞌa koo ún”, káchí yó xíꞌin ra. Ta xíꞌin ta̱nda̱ꞌví siin káꞌa̱n yó xíꞌin ra, káchí yó saá: “Kundichi̱ ún nda̱ kaa̱, án no̱o̱ ñoꞌo̱ yóꞌo va̱ꞌa koo ún”, káchí yó xíꞌin ra.
\v 4 Tá saá kísa ndivi yó xíꞌin ni̱vi, ñayóꞌo sánaꞌa ndí nákaxin yó ni̱vi chi va̱ꞌa ka̱ na̱kiꞌin yó nakui̱ká no̱o̱ nanda̱ꞌví. Ndatán yóo nachiño na o̱n vása va̱ꞌa kísa nani kua̱chi, saá yóo mi̱i yó, tá nákaxin yó ni̱vi.
\p
\v 5 Na ñani yó xíꞌin na ki̱ꞌva̱ yó, koni so̱ꞌo va̱ꞌa ndó ña káꞌa̱n i̱ xíꞌin ndó: Ndios ni̱kaꞌa̱n ra ndí nanda̱ꞌví ñoyívi yóꞌo kuu nakui̱ká no̱o̱ ra xa̱ꞌa̱ ña kándixa na Jesucristo. Ta ni̱vi na kándixa yóꞌo kúu na kutaku xíꞌin ra ta kaꞌnda chiño na xíꞌin ra no̱o̱ ndiꞌi ña̱ꞌa, chi saá yóo to̱ꞌon ña ni̱kaꞌa̱n Ndios chi̱nduꞌu ra kundivi xa̱ꞌa̱ ni̱vi na kíꞌvi ní ini xíni̱ ñaꞌá.
\v 6 Ta mi̱i ndó, o̱n váꞌa kéꞌé ndó chi kísa ni̱no̱ ndó nanda̱ꞌví. ¿Án o̱n si̱ví nakui̱ká kúu na sáxoꞌvi ní ndóꞌó, ta chíkaa̱ na kua̱chi xa̱ꞌa̱ ndó no̱o̱ nachiño ña sandoꞌo na ndóꞌó?
\v 7 ¿Án o̱n si̱ví mi̱i nakui̱ká yóꞌo kúu na káꞌa̱n to̱ꞌon o̱n váꞌa ta kúsiki na ki̱vi̱ Jesucristo, ta̱a ta̱káꞌno no̱o̱ yó?
\p
\v 8 No̱o̱ to̱ꞌon Ndios ña ni̱taa ta̱Moisés xina̱ꞌa, yóo nda̱yí ña kúu ña káꞌno va̱ꞌa ni̱kaꞌa̱n Ndios, káchí ña saá: “Ñii kiꞌva ndatán kíꞌvi ini ndó xíni̱ ndó xíꞌin mi̱i ndó, saá kukiꞌvi ini ndó koni̱ ndó natáꞌan ndó.” Tá ndinoꞌo ini ndó kísa ndivi ndó nda̱yí yóꞌo, ta saá va̱ꞌa kéꞌé ndó.
\v 9 Tá nákaxin ka̱ ndó ni̱vi ta nákiꞌin va̱ꞌa ka̱ ndó nakui̱ká no̱o̱ nanda̱ꞌví, ta nákuiso ndó kua̱chi, chi yáꞌa ndoso ndó nda̱yí Ndios.
\v 10 Ta saá, tá yóo ni̱vi na kísa ndivi ndiꞌi nda̱yí Ndios ña ni̱taa ta̱Moisés, ta yáꞌa ndoso na ñii la̱á kuiti nda̱yí yóꞌo, ta xa̱ꞌa̱ ñayóꞌo nákuiso na kua̱chi no̱o̱ Ndios. Ñii kiꞌva ndatán ni̱yaꞌa ndoso na ndiꞌi nda̱yí Ndios, saá yóo kua̱chi ndíso na no̱o̱ Ndios.
\v 11 Saá chi ñii la̱á Ndios kúu ta̱ xa̱ꞌnda chiño ndiꞌi nda̱yí. Xa̱ꞌnda chiño ra: “O̱n váꞌa kusu̱n ñii ta̱a xíꞌin ñii ñaꞌa̱ ñá o̱n si̱ví kúu ñásíꞌí ra, ta ni o̱n váꞌa kusu̱n ñii ñaꞌa̱ xíꞌin ñii ta̱a ta̱ o̱n si̱ví kúu yi̱i̱ ñá”. Ta tuku xa̱ꞌnda chiño Ndios: “O̱n váꞌa kaꞌni ñii ni̱vi inka̱ ni̱vi”. Ta saá káꞌa̱n i̱ xíꞌin ndó, tá ñii ta̱a xa̱ꞌni ra ñii ni̱vi vará o̱n vása ní-kisi̱n ra xíꞌin inka̱ ñaꞌa̱ ñá o̱n si̱ví kúu ñásíꞌí ra, ta ta̱yóꞌo nákuiso ra kua̱chi no̱o̱ Ndios, chi ndatán yóo ta̱a ta̱ ni̱yaꞌa ndoso ndiꞌi nda̱yí, saá yóo ra.
\v 12 Xíni ñóꞌó koto va̱ꞌa yó xa̱ꞌa̱ to̱ꞌon kaꞌa̱n yó ta xíꞌin ña keꞌé yó. Saá chi va̱xi ñii ki̱vi̱ Ndios kasa nani ra xa̱ꞌa̱ kua̱chi yó. Ta xíꞌin to̱ꞌon ña xa̱ꞌnda chiño Jesucristo, kasa nani ra ña, chi to̱ꞌon ña xáꞌnda chiño Jesucristo kómi ña ndee̱ ña chindee ña mi̱i yó ña o̱n kaꞌnda chiño ka̱ ña ndiva̱ꞌa no̱o̱ yó.
\v 13 Ta kixaa̱ ki̱vi̱ kasa nani Ndios xa̱ꞌa̱ kua̱chi yó, Ndios o̱n kundaꞌvi ini ra koni̱ ra ni̱vi na o̱n vása ku̱ndaꞌvi ini xíni̱ inka̱ ni̱vi. Ta ni̱vi na ku̱ndaꞌvi ini xíni̱ inka̱ ni̱vi, Ndios kundaꞌvi ini ra koni̱ ra na. Ña kundaꞌvi ini yó xíni̱ táꞌan yó kúu ña xíni ñóꞌó ní no̱o̱ Ndios, saá chi xíꞌin ña kúndaꞌvi ini ra xíni̱ ra ni̱vi kasa nani ra kua̱chi na.
\s Xíni ñóꞌó kasa ndivi yó to̱ꞌon Ndios, o̱n si̱ví koni so̱ꞌo kuiti yó to̱ꞌon ra
\p
\v 14 Na ñani yó xíꞌin na ki̱ꞌva̱ yó, tá kuiti káꞌa̱n yó: “Yi̱ꞌi̱ kándixa i̱ Jesucristo”, káchí yó, ta o̱n vása kísa ndivi yó chiño va̱ꞌa ña sanaꞌa ña ndixa kándixa̱ yó ra, ta to̱ꞌon káꞌa̱n yó ndí kándixa yó, o̱n vása ndáyaꞌvi ña no̱o̱ Ndios, ni o̱n kuchiño ña sakaku ña mi̱i yó.
\v 15 Saá chi tá xíto yó yóo ñii ñani yó án ñii ki̱ꞌva̱ yó, ta o̱n ko̱ó ña kundixin na, ni o̱n ko̱ó ña kuxu na,
\v 16 ta káchí yó xíꞌin na: “Nakutáꞌan yó inka̱ ki̱vi̱. Va̱ꞌa koo ún, ta va̱ꞌa ná koo tiko̱to̱ kundixin ún chi vixin ní, ta kua̱ꞌa̱ kuxu ún nda̱ xaa̱ ini ún,” káchí yó xíꞌin na, ta o̱n vása taxi yó ña xíni ñóꞌó na ndaꞌa̱ na, ta nda̱ mani káꞌa̱n yó to̱ꞌon yóꞌo xíꞌin na, chi o̱n vása ndáyaꞌvi ña.
\v 17 Tá ndasaá kuiti káꞌa̱n yó kándixa yó Jesucristo, ta o̱n vása kísa ndivi yó chiño va̱ꞌa ña kóni Ndios, nda̱ mani káꞌa̱n yó kándixa̱ yó Jesucristo, chi to̱ꞌon vichí kuiti kúu ña.
\p
\v 18 Tá ñii ndó káꞌa̱n, káchí ndó: “Yóo ni̱vi na kándixa Jesucristo, ta o̱n ko̱ó chiño va̱ꞌa kéꞌé na. Ta yóo inka̱ ni̱vi na kándixa Jesucristo, ta kísa ndivi na chiño va̱ꞌa ña kóni Ndios,” káchí ndó. Ta yi̱ꞌi̱ káꞌa̱n i̱, tá o̱n ko̱ó chiño va̱ꞌa kéꞌé ni̱vi, ta saá o̱n ko̱ó ña̱ꞌa kómi na sanaꞌa na ndí ndixa kándixa na Jesucristo. Ta ni̱vi na kéꞌé chiño va̱ꞌa, nayóꞌo kómi na ñava̱ꞌa sanaꞌa na ndí ndixa kándixa na Jesucristo.
\v 19 Tá yóo inka̱ ndó káꞌa̱n, káchí ndó: “Kándixa i̱ yóo ñii la̱á Ndios”. Ta ndóꞌó káꞌa̱n saá, vará va̱ꞌa kándixa ndó, ta xíni ñóꞌó kundaa ini ndó ndí ñii kiꞌva saá ndiꞌi ña níma ndiva̱ꞌa kándixa ña yóo ñii la̱á Ndios, ta̱nda̱ kísín ña chi yíꞌví ña xa̱ꞌa̱ ñayóꞌo.
\v 20 Na ñani yó xíꞌin na kiꞌva yó, o̱n kíꞌví ní kani si̱ni̱ ndó. Xíni ñóꞌó kundaa ini ndó ndí nda̱ mani kúu ña kándixa ndó Jesucristo tá o̱n vása kísa ndivi ndó chiño va̱ꞌa ña kóni Ndios kasa ndivi yó.
\v 21 ¿Án o̱n vása nákáꞌán ndó ndasaá ke̱ꞌé ta̱Abraham, xi̱i síkuá yó kui̱ya̱ xina̱ꞌa? Chi ta̱yóꞌo chi̱kaa̱ so̱ꞌo ra, ta ka̱ndixa ra to̱ꞌon ña ni̱kaꞌa̱n Ndios xíꞌin ra, ta ki̱sa ndivi ra ña soko ra sa̱ꞌya ra ta̱Isaac no̱o̱ Ndios. Ta xa̱ꞌa̱ ñayóꞌo, Ndios ni̱kaꞌa̱n ra ndí ta̱Abraham kúu ra ta̱ va̱ꞌa ndinoꞌo no̱o̱ Ndios.
\v 22 Ta vitin kúndaa ini ndó ndí xíni ñóꞌó nakutáꞌan ña ka̱ndixa ra xíꞌin ña ki̱sa ndivi ra ndatán kóni Ndios, ta xa̱ꞌa̱ ña chiño va̱ꞌa ki̱sa ndivi ra, ni̱tondaa ra ña ka̱ndixa ndinoꞌo ra Ndios.
\v 23 Ta saá ku̱ndivi ña ni̱kaꞌa̱n to̱ꞌon Ndios ña káchí: “Ta̱Abraham ka̱ndixa̱ ra Ndios, ta xa̱ꞌa̱ ñayóꞌo, Ndios ni̱kaꞌa̱n ra ndí ta̱Abraham kúu ta̱ va̱ꞌa ndinoꞌo no̱o̱ ra”, káchí to̱ꞌon Ndios. Ta xa̱ꞌa̱ ña ki̱sa ndivi ra ñayóꞌo, ni̱kaꞌa̱n ni̱vi saá: “Ta̱Abraham kúu ta̱ nátaꞌan va̱ꞌa xíꞌin Ndios.”\fig Abraham about to sacrifice Isaac|LB00291B.TIF|col|||Santiago 2:21-23|JAS 2.23\fig*
\p
\v 24 Ñakán kúndaa ini yó Ndios káꞌa̱n ra ndí ni̱vi na va̱ꞌa ndinoꞌo kúu yó no̱o̱ ra, chi kándixa yó ra ta kísa ndivi yó to̱ꞌon ra.
\v 25 Ta yóo inka̱ to̱ꞌon ña ndátoꞌon xa̱ꞌa̱ ñii ñaꞌa̱ ñá nání Rahab, kui̱ya̱ xina̱ꞌa ni̱xi̱yo̱ ñá ta xa̱ꞌa̱ si̱ꞌún ni̱kisi̱n ñá xíꞌin kua̱ꞌa̱ ní ta̱a. Ta Ndios ni̱kaꞌa̱n ra ndí ndu̱u ñá ñaꞌa̱ va̱ꞌa ndinoꞌo no̱o̱ ra xa̱ꞌa̱ ña chi̱ndee ñá naIsrael; chi na̱kiꞌin va̱ꞌa ñá o̱vi̱ ta̱a ta̱ ni̱xa̱ꞌa̱n xíto na̱ní ñoo Jericó. Saá chi ñáRahab ta̱an séꞌe ñá na ta̱a yóꞌo ini veꞌe ñá, ta chi̱ndee ñá na ni̱kaku na no̱o̱ nañoo Jericó, ta saá ku̱chiño ndi̱kó na kuanoꞌo̱ na no̱o̱ ndáti inka̱ na ta̱a táꞌan na.
\v 26 To̱ꞌon yóꞌo sánaꞌa ña mi̱i yó ndí ña xíni ñóꞌó ní kúu ña kasa ndivi yó chiño va̱ꞌa ña kóni Ndios. Ta vitin va̱ꞌa ná kani si̱ni̱ ndó xa̱ꞌa̱ inka̱ ña sánaꞌa, ndí yikí ko̱ñu yó xíꞌin níma táku kómi yó, o̱n kuchiño taꞌvi táꞌan ña, saá chi tá o̱n ko̱ó níma táku kómi yó, ta ni̱vi ni̱xiꞌi̱ kúu yó. Ta saá kúndaa ini yó tá ndixa kándixa yó Ndios, ta o̱n kuchiño taꞌvi táꞌan ña kándixa yó ra xíꞌin ña kísa ndivi yó chiño ña kóni ra.
\c 3
\s Xíni ñóꞌó koto va̱ꞌa yó xa̱ꞌa̱ to̱ꞌon kaꞌa̱n yó
\p
\v 1 Na ñani yó xíꞌin na ki̱ꞌva̱ yó, va̱ꞌa ndasaá kuiti loꞌo ndó ndukú ndó kuu ndó ni̱vi na sánaꞌa to̱ꞌon Ndios. Saá chi Ndios kasa nani ra xa̱ꞌa̱ to̱ꞌon ña sánaꞌa ni̱vi, ta yo̱ꞌvi̱ ní ka̱ saxoꞌvi ra ni̱vi na sánaꞌa ña o̱n si̱ví ña ndixa kúu, ta ndixa yo̱ꞌvi̱ ka̱ xoꞌvi nayóꞌo no̱o̱ inka̱ ni̱vi na kándixa to̱ꞌon Ndios.
\v 2 Ndiꞌi mi̱i yó kua̱ꞌa̱ ní yichi̱ nakava yó kua̱ꞌa̱ ní kua̱chi. Tá kuchiño naniꞌi yó ni̱vi na nda̱ ñii yichi̱ o̱n vása káꞌa̱n nda̱ ñii to̱ꞌon o̱n váꞌa, ta ni̱vi yóꞌo ndixa kúu na va̱ꞌa ndinoꞌo. Tá ndixa va̱ꞌa kúchiño ni̱vi xáꞌnda chiño na no̱o̱ to̱ꞌon káꞌa̱n na, ta ñii kiꞌva saá kuchiño ni̱vi yóꞌo kaꞌnda chiño na no̱o̱ ndiꞌi ña o̱n váꞌa kóni keꞌé yikí ko̱ñu na.
\v 3 Ta vitin kani si̱ni̱ ndó xa̱ꞌa̱ ña sánaꞌa ñii ka̱a ña chíkaa̱ yó yuꞌu̱ tí kuáyí ña nasita yó rí. Ñii ka̱a loꞌo ní kúu ña, ta xíꞌin ña ka̱a yóꞌo kúchiño kaꞌnda chiño yó no̱o̱ kiti̱ káꞌno yóꞌo ña ko̱ꞌo̱n rí xíꞌin yó no̱o̱ kóni mi̱i yó.\fig rider on horse|LB00035B.TIF|col|||Santiago 3:3|JAS 3.3\fig*
\v 4 Ta inka̱ ña ndátoꞌon i̱ xíꞌin ndó, kani si̱ni̱ ndó xa̱ꞌa̱ tón barco. Ta tón káꞌno ní kúu nó, vará nda̱ xíni ñóꞌó nó ta̱chi̱ ndeé ní ña sakanda ña nó ko̱ꞌo̱n nó, ta xíꞌin ñii yito̱n loꞌo tón nání timón káva na tón barco yóꞌo ña ko̱ꞌo̱n nó no̱o̱ kóni mi̱i ta̱a ta̱ káva tón barco.
\v 5 Ta ñii kiꞌva saá ndóꞌo yó xíꞌin to̱ꞌon ña kaꞌa̱n yó. Saá chi loꞌo ní yáa̱ yó ña táxi kama ní kaꞌa̱n yó to̱ꞌon, ta vará nda̱ loꞌo ní yáa̱ yó, ta ña ndeé ní kúu ña no̱o̱ ndiꞌi yikí ko̱ñu yó. Ndatán yóo ñii ñoꞌo̱ loꞌo chíín ña xíxi, ta kúchiño ña kaꞌmi ña ñii yuku̱ káꞌno no̱o̱ yóo kua̱ꞌa̱ ní yito̱n, saá yóo yáa̱ yó, chi kúchiño ña sandiꞌi ña xa̱ꞌa̱ kua̱ꞌa̱ ní ni̱vi.
\v 6 Ndatán yóo ñoꞌo̱ xíxi, saá yóo to̱ꞌon káꞌa̱n yó. Chi yáa̱ yó táxi ña kaꞌa̱n yó ndiꞌi saá no̱o̱ to̱ꞌon ña o̱n váꞌa, ta ndiꞌi ndee̱ to̱ꞌon o̱n váꞌa yóꞌo va̱xi ña no̱o̱ mi̱i ña níma ndiva̱ꞌa káꞌno, ta kúchiño ña kasa kini ña ta sativi ña mi̱i yó ndiꞌi saá ki̱vi̱ taku yó ñoyívi yóꞌo.
\v 7 Ndixa mi̱i yó na ni̱vi xíni̱ va̱ꞌa yó ndasaá kaꞌnda chiño yó no̱o̱ ndiꞌi saá no̱o̱ kiti̱ yóo ñoyívi yóꞌo, tí kúu tíyukú, kiti̱ tí yóo ndixin, kiti̱ tí ñóo tixi̱n no̱o̱ ñoꞌo̱ xíꞌin ndiꞌi tí ñóꞌo ini takui̱i.
\v 8 Ta nda̱ ñii ni̱vi o̱n ki̱ví kaꞌnda̱ chiño na no̱o̱ to̱ꞌon ña va̱xi no̱o̱ yáa̱ mi̱i na. Chi yáa̱ yó ña táxi kaꞌa̱n yó to̱ꞌon o̱n váꞌa, kómi ña ndee̱ ndiva̱ꞌa ña kaꞌa̱n ña to̱ꞌon xati ña satakueꞌe ni̱vi.
\v 9 No̱o̱ yáa̱ yó va̱xi to̱ꞌon ña kísa káꞌno yó Yivá yó Ndios. Ta tuku mi̱i no̱o̱ yáa̱ yó va̱xi to̱ꞌon ña káꞌa̱n yó satavi chiꞌña yó inka̱ ni̱vi. Ta o̱n váꞌa kaꞌa̱n yó saá, chi Ndios kúu ta̱ ki̱sa va̱ꞌa ndiꞌi ni̱vi ndatán yóo mi̱i ra.
\v 10 Na ñani yó xíꞌin na ki̱ꞌva̱ yó, o̱n váꞌa kasa ndivi yó saá ña kée o̱vi̱ no̱o̱ to̱ꞌon yuꞌu̱ yó. Chi o̱n váꞌa kaꞌa̱n yó to̱ꞌon ña satavi chiꞌña ni̱vi, ta tuku kée to̱ꞌon yuꞌu̱ yó ña kaꞌa̱n yó ná keꞌé Ndios ña va̱ꞌa xíꞌin ni̱vi.
\v 11 Ta va̱ꞌa kani si̱ni̱ ndó ña sánaꞌa ñii pozo no̱o̱ va̱xi takui̱i. Ndatán yóo pozo yóꞌo, saá yóo yuꞌu̱ yó xíꞌin to̱ꞌon káꞌa̱n yó. Saá chi ñii pozo no̱o̱ káku takui̱i vi̱si̱, o̱n ki̱ví kaku takui̱i yo̱ꞌva̱ ini ña.
\v 12 Ña ndixa kúu ña, o̱n vása ki̱ví koon tí aceituna ndaꞌa̱ tón higo, ta ni o̱n vása ki̱ví koon kui̱ꞌi higo ndaꞌa̱ tón uva. Ñakán tá yóo ñii pozo, o̱n ki̱ví ñii káchí kaku takui̱i vi̱si̱ xíꞌin takui̱i yo̱ꞌva̱ ini ña.
\s Ñayóꞌo káꞌa̱n xa̱ꞌa̱ ña̱ndi̱chí ña va̱xi no̱o̱ Ndios
\p
\v 13 Tá yóo ñii ndóꞌó, ta xáni si̱ni̱ ndó ni̱vi ndíchí ní kúu ndó ta kúndaa ini ndó yichi̱ Ndios, ta saá xíni ñóꞌó keꞌé ndó ña va̱ꞌa, ta to̱ꞌó ní kutaku ndó, ta xíꞌin ñayóꞌo sanaꞌa ndó ndí ndixa ña̱ndi̱chí Ndios kómi ndó.
\v 14 Tá yóo ñii ndóꞌó, ta kuini ini ndó xíni̱ ndó inka̱ ni̱vi, ta káchí ini ndó kúu ndó na kúchiño ka̱ no̱o̱ inka̱ ni̱vi, ta saá o̱n váꞌa kasa káꞌno xíꞌin mi̱i ndó ña kani si̱ni̱ ndó ndí na ndíchí ní kúu ndó, chi o̱n si̱ví ñandaa kúu ña xáni si̱ni̱ ndó.
\v 15 Saá chi tá xáni si̱ni̱ mi̱i ndó ndí ni̱vi ndíchí ní kúu ndó, ta ña xáni si̱ni̱ ndó saá o̱n si̱ví ña va̱xi no̱o̱ Ndios kúu ñayóꞌo, ña̱ndi̱chí mi̱i ndó yóꞌo kuiti ña ndíchí ni̱vi ñoyívi yóꞌo kúu ña, saá chi ña ndiva̱ꞌa káꞌno táxi ña kani si̱ni̱ ndó ndí ni̱vi ndíchí ní kúu ndó.
\v 16 Saá chi tá yóo ni̱vi na kuini ini xíni̱ táꞌan, ta káchí ini na kúu na na kúchiño ka̱ no̱o̱ inka̱ ni̱vi, ta no̱o̱ táku nayóꞌo o̱n ko̱ó ña to̱ꞌó na xíꞌin inka̱ natáꞌan na, chi yóo ndiꞌi saá no̱o̱ ña o̱n váꞌa kéꞌé na.
\v 17 Ta ni̱vi na kómi ña̱ndi̱chí ña va̱xi no̱o̱ Ndios, nayóꞌo kúu ni̱vi na kéꞌé ñava̱ꞌa no̱o̱ Ndios, to̱ꞌó táku na, o̱n vása kani táꞌan na xíꞌin inka̱ ni̱vi, na va̱ꞌa ini kúu na xíꞌin inka̱ ni̱vi, ta kúndaꞌvi ini na xíni̱ na inka̱ ni̱vi, ta sánaꞌa na no̱o̱ ni̱vi ña va̱ꞌa ña xíni̱ na keꞌé na, ta o̱n vása nakaxin na ni̱vi, ni o̱n vása kúu na ni̱vi na vatá án na o̱vi̱ yuꞌu̱.
\v 18 Ta ni̱vi na vivií táku xíꞌin táꞌan, ta ñii kiꞌva saá ndúkú na ta chíndee na ña vivií kutaku inka̱ ni̱vi xíꞌin táꞌan na, nayóꞌo kúu na kísa ndivi ña kóni Ndios, ta Ndios káchí ra ndí nayóꞌo kúu ni̱vi nava̱ꞌa ndinoꞌo.
\c 4
\s O̱n kúchiño kundikon yó yichi̱ Ndios, ta ñii káchí kundikon yó yichi̱ ñoyívi yóꞌo
\p
\v 1 ¿Míkía̱ va̱xi ña táxi kani táꞌan ndó xíꞌin táꞌan ndó? Ndiꞌi ña o̱n váꞌa ña kúsii̱ ini ndó keꞌé ndó, ñayóꞌo káku ña níma mi̱i ndó. Ña o̱n váꞌa ña yóo níma ndó, ndiꞌi saá ki̱vi̱ káni táꞌan ña xíꞌin ndó, chi kóni ña kaꞌnda chiño ña no̱o̱ ndó.
\v 2 Ndóꞌó kísa kuini ndó xíꞌin inka̱ ni̱vi xa̱ꞌa̱ ña kómi na, chi kóni ndó kukomi ndó kua̱ꞌa̱ ní ña̱ꞌa. Ta o̱n ki̱ví kukomi ndó ña, ta xa̱ꞌa̱ ñayóꞌo sakaku ndó kua̱chi xíꞌin táꞌan ndó, ta kani táꞌan ndó xíꞌin na, ta xáꞌni ndó ni̱vi, chi kísa yichi ini ndó xa̱ꞌa̱ ña kómi na. O̱n vása kómi ndó ña kóni ndó chi o̱n vása ndukú ndó ña no̱o̱ Ndios.
\v 3 Chi tá ndúkú ndó ña̱ꞌa no̱o̱ Ndios, ta o̱n vása nákiꞌin ndó ña, saá chi ndasaá kuiti ndúkú ndó ñakui̱ká kóni mi̱i ndó ña koni ñóꞌó ndó no̱o̱ káchí ini mi̱i ndó, ta o̱n vása ndúkú ndó ña kóni Ndios.
\v 4 ¡Ndóꞌó kúu ni̱vi na o̱n vása ndinoꞌo kíꞌvi ini xíni ndó Ndios! ¿Án o̱n vása kúndaa ini ndó, ndiꞌi ni̱vi na nátaꞌan va̱ꞌa xíꞌin ñoyívi yóꞌo o̱n kúchiño kuu na ni̱vi na nataꞌan va̱ꞌa xíꞌin Ndios? Saá chi ni̱vi na kúsii̱ ini kísa ndivi ndiꞌi ña o̱n váꞌa ña kísa ndivi ni̱vi ñoyívi yóꞌo, ni̱vi yóꞌo kúu na o̱n xi̱in chikaa̱ so̱ꞌo to̱ꞌon Ndios, ni o̱n xi̱in na koni̱ na ra.
\v 5 Xíni va̱ꞌa yó to̱ꞌon Ndios ña ni̱taa na xina̱ꞌa kúu ñandaa ña káchí ndí Níma Ndios ña chi̱kaa̱ ra ini ndiꞌi mi̱i yó na kándixa ñaꞌá, kíꞌvi ní ini ña xíni̱ ña mi̱i yó, ta nda̱ loꞌo o̱n xi̱in ña kuxíká yó no̱o̱ Ndios.
\v 6 Ta Ndios káꞌno ní ka̱ ñava̱ꞌa taxi ra ndaꞌa̱ yó ña chindeé ra yó kundee yó no̱o̱ ña o̱n váꞌa, chi kíꞌvi ní ka̱ ini ra xíni̱ ra mi̱i yó. Káchí to̱ꞌon ra saá:
\q “Ndios o̱n xi̱in ra koni̱ ra ni̱vi na kísa káꞌno xíꞌin mi̱i;
\q ta va̱ꞌa ní ka̱ chíndee ra ni̱vi na to̱ꞌó ní ini no̱o̱ ra”,
\m káchí to̱ꞌon Ndios.
\v 7 Ñakán xíni ñóꞌó kandixa̱ ndó Ndios ta kasa ndivi ndó ña kóni ra. Ta no̱o̱ ña níma ndiva̱ꞌa káꞌno xíni ñóꞌó kasa ndee xíꞌin mi̱i ndó, ta kasa tee ndó níma ndó ña o̱n chikaa̱ so̱ꞌo ndó ña káꞌa̱n ña, ni o̱n kasa ndivi ndó ña kóni ña, ta saá ña níma ndiva̱ꞌa káꞌno yóꞌo kono ña ko̱ꞌo̱n ña no̱o̱ ndó.
\v 8 Kuyatin ndó no̱o̱ Ndios, ta saá Ndios kuyatin ra no̱o̱ ndó. Ndóꞌó na kéꞌé ña o̱n váꞌa, sandakoo ndó ndiꞌi ña o̱n váꞌa kéꞌé ndó. Ta ndóꞌó ni̱vi na o̱vi̱ yuꞌu̱, vitin xíni ñóꞌó ndinoꞌo ini ndó ko̱ꞌo̱n ndó ndasaá kuiti yichi̱ Ndios, ta sandakoo ndó yichi̱ ñoyívi yóꞌo.
\v 9 Ná kuchuchú ini ndó ta ná kuaku ndó xa̱ꞌa̱ ña o̱n váꞌa ke̱ꞌé ndó. Ná sandakoo ndó ña kúsii ní ini ndó xíni̱ ndó ñoyívi yóꞌo, ta nduu ndó na kuchuchú ini, ta ndikó ini ndó xa̱ꞌa̱ ña o̱n váꞌa ke̱ꞌé ndó.
\v 10 Kuxiti ndó ta kuaku ndaꞌvi ndó no̱o̱ Ndios ña kasa káꞌno ini ra xa̱ꞌa̱ ndó, ta nduu ndó ni̱vi na va̱ꞌa no̱o̱ ra, ta Ndios ndasa ra ña kúu ndó na náꞌno yichi̱ no̱o̱ xáꞌnda chiño ra.
\s O̱n váꞌa kaꞌa̱n yó to̱ꞌon ndiva̱ꞌa xa̱ꞌa̱ natáꞌan yó
\p
\v 11 Na ñani yó xíꞌin na ki̱ꞌva̱ yó, o̱n káꞌa̱n ndó to̱ꞌon ndiva̱ꞌa xa̱ꞌa̱ natáꞌan ndó. Táná kaꞌa̱n ndó to̱ꞌon ndiva̱ꞌa xa̱ꞌa̱ ñani ndó án xa̱ꞌa̱ kiꞌva ndó, ta saá níma mi̱i ndó káku ña kísa ndaa ndó xa̱ꞌa̱ kua̱chi natáꞌan ndó. Tá saá káꞌa̱n ndó, ta o̱n vása kísa to̱ꞌó ndó ña xáꞌnda chiño Ndios, ña káchí ndí xíni ñóꞌó kukiꞌvi ini yó koni̱ yó natáꞌan yó. Ta xíni ñóꞌó kasa ndivi ndó ña káꞌa̱n nda̱yí Ndios, ta o̱n váꞌa kani si̱ni̱ ndó ndí mi̱i ndó kúu na náꞌno ka̱ no̱o̱ Ndios.
\v 12 Ñii la̱á Ndios kúu ta̱a ta̱ chi̱nduꞌu nda̱yí, ta ndasaá mi̱i Ndios kúu ta̱ kúchiño kasa nani xa̱ꞌa̱ kua̱chi ni̱vi, chi kómi ra ndee̱ ña kúchiño sakaku ra ni̱vi án taxi ra ña ndiꞌi xa̱ꞌa̱ na. Ta mi̱i ndó, o̱n ko̱ó nda̱yí kómi ndó ña kaꞌa̱n ndó natáꞌan ndó ndíso na kua̱chi no̱o̱ Ndios.
\s O̱n vása xíni̱ yó tá kutaku yó ki̱vi̱ taa̱n
\p
\v 13 Sava ndóꞌó káꞌa̱n ndó saá: “Vitin án taa̱n ko̱ꞌo̱n yó inka̱ ñoo káꞌno, ta kasa chiño yó ñii kui̱ya̱, ta kua̱ꞌa̱ ní si̱ꞌún kukomi yó”, káchí ndó. Ta vitin koni so̱ꞌo va̱ꞌa ndó ña kaꞌa̱n i̱ xíꞌin ndó.\fig street scene people and shops|HK00240B.TIF|col|||Santiago 4:13-14|JAS 4.13\fig*
\v 14 O̱n vása xíni̱ yó yukía̱ va̱xi kundoꞌo yó ki̱vi̱ taa̱n. Saá chi o̱n xíni̱ yó ndasaá yóo ña táku yó. Ndatán yóo ñii vi̱ko̱ noꞌo no̱o̱ yuku̱, kánoo ña ñii kani loꞌo ta saá ndáñoꞌo ña, saá yóo ña táku yó.
\v 15 Ta xa̱ꞌa̱ ña o̱n vása xíni yó yukía̱ kundoꞌo yó ki̱vi̱ ña va̱xi, va̱ꞌa ka̱ kaꞌa̱n yó saá: “Tá Ndios kóni ra, ta kutaku yó ta kasa ndivi yó chiño yóꞌo án chiño kaa̱”, saá xíni ñóꞌó kaꞌa̱n yó.
\v 16 Ta ndóꞌó, ndatán káꞌa̱n ni̱vi na ñaꞌa ní ini, saá káꞌa̱n ndó, chi xáni si̱ni̱ ndó kómi ndó ndee̱ kaꞌnda chiño ndó no̱o̱ ndiꞌi ña̱ꞌa. Ta ña xáni si̱ni̱ ndó saá, ña o̱n váꞌa kúu ña.
\v 17 Koto va̱ꞌa ndó; tá xíni ndó keꞌé ndó ñava̱ꞌa, ta o̱n vása kísa ndivi ndó ñava̱ꞌa yóꞌo, ta saá kómi ndó kua̱chi no̱o̱ Ndios.
\c 5
\s Ndáꞌví ní nakui̱ká na ndiva̱ꞌa ini
\p
\v 1 Koni so̱ꞌo va̱ꞌa ndó, nakui̱ká. Kuaku ndó ta kuchuchú ini ndó chi va̱xi ki̱vi̱ ña xoꞌvi ní ndó.
\v 2 Xa kíxáꞌá táꞌyi ndiꞌi ñakui̱ká kómi ndó, ta ndiꞌi tiko̱to̱ ndó ñava̱ꞌa xa xáxi̱ tí tikisin ña.
\v 3 Ndiꞌi ñaoro xíꞌin ndiꞌi ñaplata ña kómi ndó xa ni̱kusu ndiꞌi ña. Ta xa va̱xi yatin ki̱vi̱ ña kasa nani Ndios xa̱ꞌa̱ kua̱chi ndiꞌi ni̱vi, ta ña̱ꞌa ña ni̱kusu yóꞌo kúu ña ndakuiin xa̱ꞌa̱ ña o̱n váꞌa ke̱ꞌé ndó. Ta xa̱ꞌa̱ ña ndakuiin ña saá, Ndios tiꞌvi ra ndóꞌó ko̱ꞌo̱n ndó no̱o̱ xíxi ñoꞌo̱ ndiꞌi saá ki̱vi̱. Saá chi ndóꞌó ndasaá kuiti ndíꞌi ní ini ndó nakaya ndó ndiꞌi ñakui̱ká ta taa̱n va̱ꞌa ndó ña, ta o̱n vása ní-xini ñóꞌó ndó ña ndatán kóni Ndios.\fig treasures|HK00144B.TIF|col|||Santiago 5:3|JAS 5.3\fig*
\v 4 Tuku koni so̱ꞌo ndó. Ndóꞌó o̱n vása ní-cha̱ꞌvi ndó ni̱vi na kísa chiño xíꞌin ndó no̱o̱ ñoꞌo̱ ndó, ta ni̱vi na kísa chiño yóꞌo ndeé ní káꞌa̱n kua̱chi na xa̱ꞌa̱ ndó. Ta Ndios, ta̱a ta̱ kómi ndiꞌi ndee̱, xíni so̱ꞌo ra ña káꞌa̱n na xa̱ꞌa̱ ndó. Si̱ꞌún ña o̱n vása ní-chaꞌvi ndó nayóꞌo ndákuiin ña ndí ndíso ndó kua̱chi no̱o̱ Ndios.
\v 5 Ñoyívi yóꞌo xa va̱ꞌa ní táku ndó xíꞌin ñakui̱ká ndó, ta xíꞌin si̱ꞌún ndó xa kéꞌé ndó ndiꞌi ña kúsii̱ ini ndó. Xa xi̱xi ní ndó, ta xi̱ꞌi ní ndó ta sa̱naño ní ndó mi̱i ndó ndatán náño kiti̱ tí kaꞌni na kuxu na, ta xa yatin va̱xi ki̱vi̱ ña kasa nani Ndios xa̱ꞌa̱ kua̱chi ndó.
\v 6 Ndóꞌó nakui̱ká sa̱kuiso ndó kua̱chi ni̱vi na o̱n ko̱ó kua̱chi kómi, ta nda̱ xa̱ꞌni ndó sava na, ta na o̱n ko̱ó kua̱chi kómi yóꞌo o̱n vása ní-kuchiño na xíꞌin ndó.
\s Xíni ñóꞌó kasa ndee yó ini yó no̱o̱ ña xóꞌvi yó
\p
\v 7 Ta saá, na ñani yó xíꞌin na ki̱ꞌva̱ yó, chikaa̱ ndó ndee̱ xíꞌin mi̱i ndó ña kundati ndó a̱nda̱ ki̱vi̱ kixi tuku Jesucristo, ta̱a ta̱ kúu ta̱káꞌno no̱o̱ yó. Ndixa xíni̱ ndó ñii ta̱a ta̱ kísa chiño no̱o̱ ñoꞌo̱ siꞌna xíni ñóꞌó kasa ndee ra ini ra kundati ra a̱nda̱ ki̱vi̱ kixáꞌá sa̱vi̱ koon rá, ta kuaꞌno ña chi̱ꞌi ra, ta saá a̱nda̱ kixaa̱ ki̱vi̱ ña nakaya ra ña xa̱ꞌno yóꞌo ta koni ñóꞌó ra ña.
\v 8 Ta mi̱i ndó, ñii kiꞌva saá xíni ñóꞌó kasa ndee ndó ini ndó, ta o̱n sandakoo ndó kundati ndó, chi ya̱chi̱ ní kixaa̱ ki̱vi̱ ndikó tuku Jesucristo.
\v 9 Na ñani yó xíꞌin na ki̱ꞌva̱ yó, o̱n váꞌa káꞌa̱n ndó to̱ꞌon kua̱chi xa̱ꞌa̱ natáꞌan ndó, chi tá saá kaꞌa̱n ndó, ta Ndios kasa nani ra xa̱ꞌa̱ kua̱chi mi̱i ndó ta saxoꞌvi ra ndóꞌó. Xa yatin ní va̱xi ta̱a ta̱ kasa nani xa̱ꞌa̱ ndiꞌi kua̱chi ni̱vi.
\v 10 Na ñani yó xíꞌin na ki̱ꞌva̱ yó, nakáꞌán ndó xa̱ꞌa̱ naprofeta na ni̱kaꞌa̱n ndoso to̱ꞌon Ndios xina̱ꞌa. Nayóꞌo ni̱xoꞌvi ní na ta ku̱ndee na kuchiño na xíꞌin ndiꞌi ña ni̱xoꞌvi na. Ta ki̱sa ndee na ini na ña xi̱ndati na ña sakaku Ndios na. Ta ndóꞌó, ñii kiꞌva saá xíni ñóꞌó kasa ndee ndó ini ndó ña kundati ndó.
\v 11 Tá yóo ni̱vi na va̱ꞌa kúndee xíꞌin ndiꞌi ña yo̱ꞌvi̱ ní xóꞌvi na, ta nákaa̱ ña sii̱ ini na, ta saá kúndaa ini yó ndí Ndios chíndeé ra nayóꞌo. Ta ndóꞌó xa xi̱ni so̱ꞌo ndó xa̱ꞌa̱ ta̱Job. Vará ndeé ní ni̱xoꞌvi ra ta ku̱ndee ra xíꞌin ndiꞌi ña ni̱ndoꞌo ra, ta o̱n vása ní-sandakoo ra yichi̱ Ndios, ta Ndios ta̱xi ra ñava̱ꞌa ndaꞌa̱ ta̱yóꞌo sondiꞌi. Xíꞌin ñayóꞌo Ndios sa̱naꞌa ra ta̱káꞌno ini kúu ra ta kíꞌvi ní ini ra xíni̱ ra ni̱vi.
\p
\v 12 Na ñani yó xíꞌin na ki̱ꞌva̱ yó, koni so̱ꞌo va̱ꞌa ndó ña káꞌa̱n i̱ xíꞌin ndó vitin, chi inka̱ to̱ꞌon káꞌno kúu ña. O̱n chinaꞌa ndó xa̱ꞌa̱ ñoyívi ni̱no, ni xa̱ꞌa̱ ñoyívi yóꞌo, ni xa̱ꞌa̱ nda̱ ñii inka̱ ña̱ꞌa. Tá kaꞌa̱n ndó saá: “Keꞌé i̱ chiño yóꞌo”, án kaꞌa̱n ndó: “O̱n keꞌé i̱ chiño yóꞌo”, ta saá xíni ñóꞌó kasa ndivi ndó ndatán yóo ña káꞌa̱n ndó. Chi tá o̱n vása kísa ndivi ndó to̱ꞌon káꞌa̱n ndó, ta Ndios saxoꞌvi ra ndóꞌó.
\s Ña káꞌa̱n yó xíꞌin Ndios kúu ña xíni ñóꞌó ní kasa ndivi yó
\p
\v 13 Tá ñii ndóꞌó yóo ní ña xóꞌvi ndó, ta xíni ñóꞌó kaꞌa̱n ndó ndukú ndó no̱o̱ Ndios ña chindeé ra ndóꞌó. Tá ñii ndóꞌó kúsii̱ ní ini ndó, ta xíni ñóꞌó kata ndó yaa yi̱i̱ ña kasa káꞌno ndó Ndios.
\v 14 Tá ñii ndóꞌó ndeé ní ndóꞌo ndó, ta xíni ñóꞌó kaꞌa̱n ndó kana ndó naxikuaꞌa veꞌe ño̱ꞌo ña kixi na kaꞌa̱n na ndukú na no̱o̱ Ndios xa̱ꞌa̱ ña sandaꞌa ra ndóꞌó, ta xíꞌin nda̱yí Jesucristo chikaa̱ na aceite si̱ni̱ ndó án no̱o̱ kíꞌvi yikí ko̱ñu ndó.\fig sick man in bed and two men|CN02102B.TIF|col|||Santiago 5:14|JAS 5.14\fig*
\v 15 Tá naxikuaꞌa yóꞌo ndáa ini na Ndios xíꞌin ndinoꞌo ini na, ta kándixa na ndí Ndios kasa ndivi ra ña ndúkú na no̱o̱ ra, ta saá Ndios sandaꞌa ra na ndeé ndóꞌo. Chi tá na ndeé ndóꞌo yóꞌo kómi na kua̱chi no̱o̱ Ndios, ta Ndios kasa káꞌno ini ra xa̱ꞌa̱ kua̱chi na.
\v 16 Ñakán xíni ñóꞌó naꞌma ndó kua̱chi ndó xíꞌin táꞌan ndó, ta ndukú ndó no̱o̱ Ndios xa̱ꞌa̱ táꞌan ndó ña sanduva̱ꞌa Ndios ndóꞌó. Chi Ndios xíni so̱ꞌo ra ta táxi ra ña xíni ñóꞌó ni̱vi na xíꞌin ndixa ndinoꞌo ini ndukú ña̱ꞌa no̱o̱ ra.
\v 17 ¿Án o̱n vása nakáꞌán ndó xa̱ꞌa̱ ta̱profeta Elías?, ta̱a ta̱ ni̱kaꞌa̱n ndoso to̱ꞌon Ndios xina̱ꞌa. Xi̱kuu ra ñii ni̱vi ndatán yóo mi̱i yó. Ta xíꞌin ndinoꞌo ini ra ni̱kaꞌa̱n ra ndu̱kú ra no̱o̱ Ndios ña o̱n koon sa̱vi̱, ta saá o̱n ko̱ó sa̱vi̱ ni̱-kóon no̱o̱ ñoꞌo̱ u̱ni̱ kui̱ya̱ sava.
\v 18 Ta ni̱yaꞌa u̱ni̱ kui̱ya̱ sava, ta tuku ni̱kaꞌa̱n ra ndu̱kú ra no̱o̱ Ndios ña koon sa̱vi̱, ta saá ki̱xáꞌá koon sa̱vi̱ ndatán xíni ñóꞌó koon rá, ta no̱o̱ ñoꞌo̱ tuku na̱koo kui̱ꞌi ndaꞌa̱ ndiꞌi tón kui̱ꞌi, ta ni̱nduta ña chi̱ꞌi ni̱vi ta na̱koo ndiꞌi no̱o̱ ña xíxi.
\p
\v 19 Na ñani yó xíꞌin na ki̱ꞌva̱ yó, tá ñii ndóꞌó sa̱ndakoo ndó yichi̱ ñandaa, ta inka̱ ndóꞌó káꞌa̱n ndó xíꞌin ni̱vi yóꞌo ña nandikó tuku na ko̱ꞌo̱n na yichi̱ ña ndaa,
\v 20 ta yi̱ꞌi̱ kóni i̱ ña kundaa va̱ꞌa ini ndó ndí ñava̱ꞌa ní kúu ña keꞌé ndó saá. Chi tá chindeé ndó ni̱vi ña nandikó ini na ta sandakoo na kua̱chi ña na̱kava tuku na, ta tuku nakiꞌin na kua̱ꞌa̱n na yichi̱ Ndios, ta xíꞌin ñayóꞌo chindee ndó na ña kaku na ña o̱n ndañoꞌo na no̱o̱ Ndios. Ta Ndios kasa káꞌno ini ra xa̱ꞌa̱ ndiꞌi kua̱chi ni̱vi yóꞌo, vará yóo kua̱ꞌa̱ ní kua̱chi ndíso na.