\id PHM
\h Filemón
\mt To̱ʼon yóʼo kía̱n ni̱ taa San Pablo ni̱ saʼa̱n noo̱ Filemón
\c 1
\s Káʼa̱n Pablo ndisáʼán xíʼín Filemón
\p
\v 1 Yuʼu̱ kúú Pablo, ta nákaa̱i̱ veʼe ka̱a sa̱ʼá ña̱ dánaʼi̱ to̱ʼon Jesucristo. Ta yuʼu̱ xíʼín ñani yo̱ Timoteo káʼa̱n ndu̱ ndisáʼán xíʼín míí ní, ñani mani̱ Filemón, chi̱ mií ní kúú na̱ kéchóon dáó xíʼín nduʼu̱,
\v 2 ta káʼa̱n taʼani ndu ndisáʼán xíʼín ki̱ʼo mani̱ yo̱ naní Apia, xíʼín ñani yo̱ Arquipo, na̱ chíndeé táʼan xíʼín yó sa̱ʼá to̱ʼon Jesús, ta káʼa̱n taʼani ndu ndisáʼán xíʼín na̱ kúú kuendá Jesús nátaka veʼe ní.
\v 3 Ta mií tatá yo̱ Ndios xíʼín satoʼo yo̱ Jesucristo ná kee ña̱ mani̱ xíʼín ndoʼó, ta ná ki̱ʼo na ña̱ koo va̱ʼa ini ndo̱.
\s Kándéé káʼano iní Filemón Jesús, ta kúʼu̱ ini na̱ saʼa̱ dao ka̱ ña̱yuu
\p
\v 4 Ta náki̱ʼoi ndivéʼe noo̱ Ndios, chi̱ daá kuití ndíko̱ʼon inii̱ mií ní noo̱ káʼi̱n xíʼín ná,
\v 5 dá chi̱ kándaa̱ inii̱ ña̱ kóni̱ ní satoʼo yo̱ Jesús, ta kándéé káʼano iní ñaá ní, ta kúʼu̱ taʼani ini ní saʼa̱ ndidaá ña̱yuu Ndios.
\v 6 Ta sa̱ʼá ña̱ iin ni̱ nduu ní xíʼín nduʼu̱ sa̱ʼá ña̱ kándéé iní ní Jesús, sa̱ʼá ño̱ó xíka̱ ndu̱ noo̱ Ndios ña̱ kandaa̱ ini ní saʼa̱ ndidaá ña̱ va̱ʼa ió noo̱ ní sa̱ʼá ña̱ kúú ní kuendá Cristo Jesús.
\v 7 Kádii̱ nda̱ʼo inii̱, ta ni̱ ndu̱ndeé cháá ka̱ inii̱ tá ni̱ ka̱ndaa̱ inii̱ ña̱ kúʼu̱ nda̱ʼo ini ní saʼa̱ dao ka̱ na̱ kúú kuendá Jesús. Dá chi̱ saʼa̱ mií ní, ñani miíi̱, ni̱ na̱níʼi̱ ini cháá ka̱ ña̱yuu Ndios ta̱ndeé iní.
\s Yóʼo xíka̱ Pablo iin ña̱ mani̱ noo̱ Filemón
\p
\v 8 Ta sa̱ʼá ña̱ dión kíán, sa̱ʼá ño̱ó va̱ʼará ió choon ni̱ xi̱ʼo mií Cristo no̱ói̱ ña̱ kaʼandai̱ choon noo̱ ní táto̱ʼon kánian kee ní,
\v 9 tído diʼa xíka̱i̱ ña̱ mani̱ noo̱ ní sa̱ʼá ña̱ kúʼu̱ ini saʼa̱ sátáʼan yó. Ta yuʼu̱ kúú Pablo, na̱ káʼa̱n xíʼín ní, ta kúúí iin na̱ sa̱va̱ʼa, ta nákaa̱ yuʼu̱ veʼe ka̱a sa̱ʼá ña̱ dánaʼi̱ sa̱ʼá to̱ʼon Jesucristo.
\v 10 Xíka̱i̱ ña̱ mani̱ noo̱ ní saʼa̱ Onésimo, chi̱ kúú rá táto̱ʼon iin de̱ʼe ni̱ ni̱ʼí noo̱ nákaa̱i̱ veʼe ka̱a yóʼo sa̱ʼá ña̱ kándéé iní ra̱ Jesús.
\v 11 Chi̱ diʼa iin ta̱ ko̱ chóon ni̱ sa̱ kuu ra noo̱ ní tá sata̱, tído viti kía̱n kúú rá iin ta̱ ió choon noo̱ mií ní xíʼín noo̱ yúʼu̱.
\p
\v 12 Ta koʼi̱n chindaʼí ra̱ nasaa̱ ra̱ noo̱ ní, tído kóni̱i̱ ña̱ natiin va̱ʼa ní ra̱, chi̱ táto̱ʼon ndóʼi xíʼín níma̱í, ki̱ʼo dión ndóʼi xíʼín rá.
\v 13 Kóni̱i̱ ña̱ koo ra̱ yóʼo xíʼíín, dá chindeé rá yuʼu̱ kuiin ra to̱ʼon noo̱ mií ní, chi̱ nákaa̱i̱ veʼe ka̱a yóʼo sa̱ʼá ña̱ dánaʼi̱ to̱ʼon va̱ʼa Jesús.
\v 14 Tído o̱ kée taʼon yuʼu̱ dión, chi̱ ko̱ ñáʼa̱ taʼon nachinaʼí mií ní. Ko̱ kóni̱i̱ kendúsa̱i̱ xíʼín ní kee ní ña̱ mani̱ yóʼo, chi̱ kóni̱i̱ ña̱ ná kakuuan táto̱ʼon ki̱ʼo kóni̱ mií ní.
\p
\v 15 Dá chi̱ ndá ndi kuu ni̱ sonó Ndios ña̱ ni̱ ku̱xoo ra cháá tiempo noo̱ ní, dá viti kía̱n nandió ko̱o ra ko̱saa̱ ra̱ koo chíchí rá xíʼín ní.
\v 16 Ta viti natiin va̱ʼa ní ra̱, chi̱ kúú rá iin ta̱ ndáya̱ʼi cháá ka̱ o̱ du̱ú iin ra̱ nákaa̱ ti̱xi ndáʼa̱ ní, chi̱ viti kúú rá iin ñani mani̱ yo̱. Kúú rá iin ta̱ ndáya̱ʼi noo̱ yúʼu̱, tído ndáya̱ʼi cháá ka̱ ra̱ noo̱ mií ní sa̱ʼá ña̱ koni kuáchí tuku ra noo̱ ní, xíʼín sa̱ʼá ña̱ ni̱ nduu ra iin ñani ní sa̱ʼá ña̱ kúú rá kuendá satoʼo yo̱ Jesús.
\p
\v 17 Sa̱ʼá ño̱ó, tá miía̱n ndaa̱ nákoni ní ña̱ néʼe táʼan va̱ʼa ní xíʼín yuʼu̱, dá kía̱n natiin va̱ʼa ní ra̱, ta kee ní kuendá ña̱ mií yuʼu̱ kúú rá.
\v 18 Tá ndá ña̱ʼa ni̱ ya̱ʼa ra ni̱ kee ra xíʼín ní, o tá tái̱ ra̱ noo̱ ní, dá kía̱n nachiʼi nía̱n kuendá yuʼu̱.
\v 19 Yuʼu̱ kúú Pablo, ta xíʼín ndáʼa̱ miíi̱ táai to̱ʼon yóʼo ko̱saa̱a̱n noo̱ ní. Yuʼu̱ chiya̱ʼi noo̱ ní, va̱ʼará diʼa kuu kaai̱ xíʼín ní ña̱ tái̱ ní saʼa̱ mií ní noo̱í.
\v 20 Sa̱ʼá ño̱ó, ñani miíi̱, ió ta̱ndeé iníi̱ xíʼín ní ña̱ kee ní ña̱ mani̱ yóʼo sa̱ʼá ña̱ kúú yó kuendá satoʼo yo̱ Jesús, ta ki̱ʼo taʼani ní ta̱ndeé iníi̱ sa̱ʼá ña̱ kúúó ñani kuendá Jesús.
\p
\v 21 Ta ni̱ taai tuti yóʼo ko̱saa̱ noo̱ ní, chi̱ kándéé káʼano inii̱ ña̱ kueídóʼo ní yuʼu̱. Ta sa̱ náʼá váí ña̱ va̱ʼa cháá ka̱ kee ní no̱ó ña̱ káʼi̱n xíʼín ní.
\v 22 Ta kóni̱ taʼanii ña̱ kenduu ndo̱ noo̱ kooi, dá chi̱ kándéé inii̱ ña̱ xi̱nko̱o ña̱ xíka̱ ndo̱ noo̱ Ndios, dá ki̱ʼo na ña̱ saa̱i̱ noo̱ ndéi ndó xaa̱n.
\s Káʼa̱n taʼani dao ka̱ na̱ kúú kuendá Jesús ndisáʼán xíʼín Filemón
\p
\v 23 Ta káʼa̱n ñani yo̱ Epafras ndisáʼán xíʼín ní. Na̱ yóʼo kúú na̱ nákaa̱ nduú xíʼín yuʼu̱ veʼe ka̱a sa̱ʼá ña̱ dánaʼa̱ na̱ saʼa̱ Cristo Jesús.
\v 24 Ta káʼa̱n taʼani Marcos, xíʼín Aristarco, xíʼín Demas, xíʼín Lucas ndisáʼán xíʼín ní. Na̱ yóʼo taʼani kúú na̱ chíndeé táʼan xíʼín yuʼu̱ noo̱ choon Ndios.
\v 25 Ná koo ña̱ mani̱ xíʼo satoʼo yo̱ Jesucristo xíʼín iin rá iin ndó. Dión ná koo.