\id 3JN
\h 3 Juan
\mt To̱ʼon yóʼo kía̱n kúú oni̱ ni̱ taa San Juan
\c 1
\s Káʼa̱n Juan ndisáʼán
\p
\v 1 Yuʼu̱ kúú na̱ sáʼano, ta káʼa̱n yuʼu̱ ndisáʼán xíʼín yoʼó, Gayo, ñani mani̱. Miía̱n ndaa̱ ndisa kúʼu̱ nda̱ʼo inii̱ sa̱ʼo̱n.
\v 2 Ñani mani̱, xíka̱i̱ noo̱ Ndios ña̱ daá keva̱ʼón tein ndidaá kúú ña̱ʼa kéeón, ta daá kuití ná koo va̱ʼa ino̱n táto̱ʼon ki̱ʼo va̱ʼa nímo̱n noo̱ Ndios.
\v 3 Ni̱ kadii̱ nda̱ʼo inii̱ tá ni̱ kixi dao ñani yo̱ kuendá Jesús, chi̱ ni̱ na̱kani na xíʼíín ña̱ íin ndaa̱o̱n xíʼín ña̱ ndaa̱ kándísa yó.
\v 4 Ta ko̱ó iin ka̱ ña̱ʼa xíʼo ña̱ kádii̱ cháá ka̱ inii̱ táto̱ʼon ki̱ʼo kádii̱ inii̱ tá níʼi̱ to̱ʼin ña̱ ndíta ndaa̱ de̱ʼi kuendá Jesús xíʼín ña̱ ndaa̱ kándísa yó.
\s Va̱ʼa va kée Gayo, chi̱ nátiin va̱ʼa ra na̱ kúú kuendá Jesús veʼe ra
\p
\v 5 Ñani mani̱, va̱ʼa va kéeón tá chíndeéón ndidaá ñani yo̱, ta va̱ʼa cháá ka̱ kéeón tá kéeón dión xíʼín na̱ ko̱ náʼón.
\v 6 Ta na̱ yóʼo kúú na̱ xíʼo kuendá noo̱ na̱ kúú kuendá Jesús ndéi yóʼo ña̱ kúʼu̱ nda̱ʼo ino̱n saʼa̱ ná. Ta va̱ʼa keeón tá chindeéón na̱ xíʼín ndá ña̱ʼa xínñóʼó ná noo̱ koʼo̱n na̱, chi̱ ki̱ʼo dión kánian kee yó xíʼín ná saʼa̱ ña̱ kéchóon na noo̱ Ndios, dá kuu koʼo̱n na̱ dao ka̱ xíán.
\v 7 Chi̱ sa̱ʼá ña̱ kóni̱ na̱ Jesús, sa̱ʼá ño̱ó ni̱ ka̱nkuei na xíonoo na dánaʼa̱ na̱, ta ko̱ kíʼin ya̱ʼi taʼon na no̱ó ña̱yuu ko̱ náʼá Ndios.
\v 8 Sa̱ʼá ño̱ó kánian ki̱ʼo yó ña̱ʼa xínñóʼó ná, ta ki̱ʼo dión chíndeé yó na̱ noo̱ dánaʼa̱ na̱ to̱ʼon ndaa̱ saʼa̱ Jesús.
\s Naá iin ra̱ naní Diótrefes xíʼín Juan
\p
\v 9 Sa̱ ni̱ taa yuʼu̱ iin tuti ko̱saa̱ no̱ó na̱ kúú kuendá Jesús ndéi xaa̱n, tído ko̱ xi̱ín taʼon Diótrefes kueídóʼo ra choon saʼándá ndu̱, chi̱ kóni̱ mií rá kaʼanda ra̱ choon.
\v 10 Ta sa̱ʼá ña̱ kée ra dión, sa̱ʼá ño̱ó tá ná saa̱i̱, dá kaʼi̱n xíʼín rá, dá chi̱ xíonoo ra káʼa̱n ndava̱ʼa ra saʼa̱ ndúʼu̱. Ta ko̱ ndínoo ini ra̱ xíʼín ña̱ yóʼo oon ni, chi̱ dión taʼani ko̱ kóni̱ ra̱ natiin va̱ʼa ra ñani yo̱, na̱ xíonoo dánaʼa̱ to̱ʼon Ndios. Ta ko̱ sónó rá ña̱ natiin va̱ʼa ñaá dao ka̱ ñani yo̱. Ta kúú táxí rá na̱ káʼán natiin va̱ʼa ñaá.
\s Va̱ʼa káʼa̱n Juan saʼa̱ iin ra̱ naní Demetrio
\p
\v 11 Ñani mani̱, o̱ sa̱ kóo ino̱n keeón ña̱ kini kée dao ka̱ ña̱yuu. Diʼa koo ino̱n keeón ña̱ kúú ña̱ va̱ʼa. Chi̱ na̱ kée ña̱ va̱ʼa kúú kuendá Ndios, ta na̱ ko̱ kée ña̱ va̱ʼa, no̱ón kúú na̱ ko̱ náʼá Ndios.
\v 12 Ta ndidaá kúú na̱ kúú kuendá Jesús xíʼo na kuendá saʼa̱ iin ka̱ ta̱a naní Demetrio ña̱ kúú rá ta̱a va̱ʼa, ta miía̱n ndaa̱ ndisa dión kíán. Nda̱ nduʼu̱ xíʼo kuendá ña̱ ta̱ va̱ʼa kúú rá, ta sa̱ náʼá vá miíón ña̱ kuendá xíʼo nduʼu̱ kúú ña̱ ndaa̱.
\s Káʼa̱n Juan ndisáʼán noo̱ ndíʼi xíʼín Gayo
\p
\v 13 Kua̱ʼá nda̱ʼo ña̱ʼa ió kaʼi̱n xíʼón, tído ko̱ kóni̱ taai ña̱ noo̱ iin tuti,
\v 14 chi̱ ndáti kíi̱i̱ konii̱ yo̱ʼó, ta kantóʼón yúʼí xíʼón.
\p
\v 15 Ta ná koo va̱ʼa ino̱n kee Ndios. Ta káʼa̱n na̱ néʼe táʼan va̱ʼa xíʼón ndéi yóʼo ndisáʼán xíʼón. Ta keeón ña̱ mani̱ kaʼo̱n ndisáʼán xíʼín iin rá iin na̱ néʼe táʼan va̱ʼa xíʼín nduʼu̱ ndéi xaa̱n.