\id JUD
\h Judas
\mt To̱ʼon yóʼo kía̱n ni̱ taa San Judas ni̱ saʼa̱n no̱ó na̱ kúú kuendá Jesús
\c 1
\s Káʼa̱n Judas ndisáʼán
\p
\v 1 Yuʼu̱ kúú Judas, ta kéchóoin noo̱ Jesucristo, ta ñanii̱ kúú Jacobo. Ta káʼa̱n yuʼu̱ ndisáʼán xíʼín ndoʼó, na̱ ni̱ kana tatá yo̱ Ndios, ta ni̱ ndu̱vii ná ndo̱ʼó, ta ñóʼo ndó noo̱ ndáʼa̱ Jesucristo.
\v 2 Ná kuʼu̱ cháá ka̱ ini Ndios saʼa̱ ndo̱, ta naki̱ʼo cháá ka̱ na̱ ña̱ koo va̱ʼa ini ndo̱, ta ná koni̱ cháá ka̱ na̱ ndo̱ʼó.
\s Diʼa kée ta̱a dánaʼa̱ ña̱ to̱ʼón
\p
\v 3 Na̱ mani̱ miíi̱, sa̱ io nduu va yuʼu̱ ña̱ kía̱n taai ndi ni̱ kee Ndios ni̱ da̱káki na yó no̱ó kua̱chi yo̱. Tído kándaa̱ inii̱ ña̱ miía̱n ndúsa̱ kánian kaʼa̱n niʼinii noo̱ ndo̱ ña̱ kía̱n ndi̱ʼi ini ndo̱ kandita ndaa̱ ndo̱ xíʼín ña̱ ndaa̱ kándísa yó, ña̱ kíán iin ndée̱ ni̱ xi̱ʼo Ndios no̱ó ña̱yuu na̱.
\v 4 Chi̱ ni̱ ku̱ʼu de̱ʼé dao ta̱a to̱ʼón tein ndó, ta nda̱ míí saʼa̱ káʼa̱n tuti ii̱ Ndios sa̱ʼá ta̱a yóʼo ña̱ ndoʼo nío̱ rá sa̱ʼá ña̱ kée ra. Kúú rá ta̱ kini, chi̱ kaá ra̱ ña̱ sa̱ʼá ña̱ mani̱ ni̱ kee Ndios saʼa̱ yo̱, sa̱ʼá ño̱ó kuu kee yó ndi ndáa mií vá ña̱ʼa kóni̱ ñíi̱ yo̱. Ta ko̱ nákoni ra̱ Ndios, na̱ kómí ndidaá táʼa̱n choon, ta ni ko̱ nákoni ra̱ Jesucristo, na̱ kúú satoʼo yo̱.
\p
\v 5 Ta sa̱ náʼá vá ndó, tído dándusaa̱ inii̱ ndo̱ʼó ña̱ tá ni̱ ndiʼi ni̱ taó satoʼo yo̱ Ndios na̱ ñoo na̱ ñóʼo ti̱xi ndáʼa̱ ta̱ Egipto, dá ni̱ da̱naá na̱ ña̱yuu ko̱ ní kándísa ñaá.
\v 6 Dión taʼani ni̱ ndoʼo dao ángel, chi̱ ko̱ ní sá ndaa va̱ʼa na choon sa̱ komí ná, diʼa ni̱ da̱nkoo na no̱ó sa̱ ni̱ ndei na. Sa̱ʼá ño̱ó ni̱ taán ñaá Ndios noo̱ íin naá yái̱, ini veʼe ka̱a, ña̱ kía̱n ni kuu̱ o̱ nóno̱, ta ñoó kañoʼo na nda̱ ná xi̱nko̱o kuu̱ keyíko̱ Ndios saʼa̱ ná.
\v 7 Dión taʼani ni̱ ndoʼo na̱ ñoo Sodoma xíʼín Gomorra, xíʼín ndidaá ka̱ ni na̱ ndéi ñoo ñóʼo yati xíʼán. Chi̱ ni̱ kee na táto̱ʼon ni̱ kee ángel ñoó, chi̱ ni̱ kee na kua̱chi xíʼín ñíi̱ ná, ta ni̱ kesátá ná ña̱ ni̱ saki Ndios, ña̱ kúú kua̱chi kaʼan noo̱. Sa̱ʼá ño̱ó ni̱ da̱ndóʼo Ndios nío̱ ná xíʼín ñoʼó kéi̱, ta ni iin kuu̱ o̱ ndíʼi ña̱ kéi̱ na̱, dá ná koni iin rá iin yó tá ndóʼo ña̱yuu kée dión.
\p
\v 8 Dión taʼani kée ta̱a to̱ʼón yóʼo, táʼa̱n ra̱ kaá ña̱ sa̱ní ra̱ kée Ndios, chi̱ dáyako̱ taʼani ra ñíi̱ rá xíʼín kua̱chi kaʼan noo̱, ta ko̱ nákoni ra̱ ta̱ néʼe choon, ta káʼa̱n ndava̱ʼa ra sa̱ʼá ña̱ kómí choon náʼano.
\v 9 Tído ni arcángel Miguel, na̱ ndáya̱ʼi cháá ka̱ noo̱ ángel, ko̱ ní chíndaa̱ noo̱ ná dátai̱ kua̱chi na ña̱ uʼu̱ nani ni̱ na̱á ndodó na̱ yikí ko̱ño Moisés xíʼán. Diʼa ni̱ kaa na̱ xíʼán: “Ná dána̱ni mií satoʼi̱ Ndios yo̱ʼó.”
\v 10 Tído ta̱ to̱ʼón yóʼo kúú ra̱ yáʼa káʼa̱n ndava̱ʼa sa̱ʼá ña̱ ko̱ kándaa̱ ini ra̱, ta sa̱va̱ʼa ña̱ náʼá rá kúú ña̱ ndáki ini ña̱xintóni̱ mií rá táto̱ʼon ndóʼo kíti̱ ko̱ó ña̱ nákani ini, ño̱ó kía̱n dáyako̱ ñaá noo̱ Ndios.
\v 11 ¡Ndaʼí kúu ví rá! Dá chi̱ ndíko̱ ra̱ ña̱ ni̱ kee Caín, táʼa̱n ra̱ ni̱ saʼání ñani ra̱. Ta ndíko̱ ra̱ di̱ʼón táto̱ʼon ni̱ kee Balaam, ta̱ sa̱ kuu profeta ma̱ñá. Ta ndáneʼe yúʼu̱ rá noo̱ Ndios táto̱ʼon ni̱ kee Coré, sa̱ʼá ño̱ó naá rá táto̱ʼon ni̱ ndoʼo Coré.
\p
\v 12 Ta kúú rá yáko̱ ñóʼo tein ndoʼó noo̱ ndítútí ndó sásáʼan ndó sa̱ʼá ña̱ kúú ndó kuendá Jesús, chi̱ tein víko̱ kée ndó ñóʼo ra kée ra ña̱ kaʼan noo̱, ta sa̱va̱ʼa saʼa̱ mií vá rá nákani ini ra̱. Ta kúú rá táto̱ʼon viko̱ kuaʼa̱n xoo diʼa xoo diʼa kée tachi̱, ta ko̱ xíʼo ña dai̱. Ta kúú rá táto̱ʼon iin yíto̱ kuíʼí ko̱ xíʼo kui̱ʼi tein yoo̱ dákée. Sa̱ʼá ño̱ó kúú rá iin yíto̱ ni̱ xiʼi̱ uu̱ taʼándá, chi̱ ko̱ xíʼo rá kui̱ʼi, ta taó ná ra̱ no̱ñóʼo̱ ná.
\v 13 Ta kúú rá táto̱ʼon no̱ó ta̱ñoʼo̱, ña̱ ndákuei ve̱i dánkoo chiʼi̱o̱n nda̱ yúʼu̱ ra̱, ta sa̱va̱ʼa ña̱ dánkoo rá kía̱n kaʼan noo̱ xíʼín ña̱ yakó. Ta kúú rá táto̱ʼon ti̱ñoo̱ náʼano xíonoo ndava̱ʼa nda̱ induú. Sa̱ʼá ño̱ó sa̱ ió nduu va noo̱ íin naá yái̱, ta ñoó kandadi niʼini ra ndidaá táʼa̱n kuu̱.
\p
\v 14 Ta Enoc, na̱ ni̱ sa̱ kuu tata kúú usa̱ ni̱ kixi ti̱xi Adán, no̱ón kúú na̱ ni̱ kaʼa̱n saʼa̱ ndí ki̱án ndoʼo ta̱ kée dión, ta diʼa kaá na̱: “Kanaʼá ndó ña̱ kasaa̱ Ndios, na̱ kúú satoʼo yo̱, ta kua̱ʼá nda̱ʼo mil ángel ná kandaka na kasaa̱ na̱,
\v 15 dá keyíko̱ na̱ saʼa̱ ndidaá ña̱yuu, dá dándóʼo na nío̱ ndidaá ña̱yuu kíni sa̱ʼá ña̱ kini ni̱ kee na xíʼín ña̱xintóni̱ kíni kómí ná, ta dándóʼo taʼani na nío̱ ndidaá na̱ ni̱ ya̱ʼa ni̱ kaʼa̱n ndava̱ʼa saʼa̱ ná.” Dión ni̱ kaa Enoc.
\v 16 Ta káʼa̱n kua̱chi ta̱ to̱ʼón yóʼo, ta kána̱ʼá ra̱ sa̱ʼá ña̱yuu, ta xíonoo ra kée ra sa̱va̱ʼa ña̱ kóni̱ mií vá rá, ta chíndaya̱ʼi ra mií rá, ta kée ra ña̱ káʼa̱n va̱ʼa ra xíʼín ña̱yuu, dá niʼi̱ rá ña̱ kóni̱ ra̱, chi̱ kúú rá ta̱ ma̱ñá.
\s Káʼa̱n niʼini Judas no̱ó ña̱yuu ña̱ kuita ndaa̱ na̱ xíʼín to̱ʼon Ndios
\p
\v 17 Tído ndoʼó, na̱ mani̱ miíi̱, ndiko̱ʼon ini ndo̱ to̱ʼon ni̱ kaʼa̱n apóstol, na̱ ni̱ ka̱xi satoʼo yo̱ Jesucristo kaneʼe to̱ʼon na,
\v 18 chi̱ diʼa ni̱ kaa na̱: “Tein kuu̱ noo̱ ndíʼi kandei ta̱a kedi̱ki ndaa ra̱ ña̱ ndaa̱, ta kanoo ra kee ra ña̱ kóni̱ mií rá.”
\v 19 Ta ta̱a yóʼo kúú ra̱ ndúkú kaʼanda dao táʼan ndó, ta kée ra ña̱ kóni̱ ñíi̱ rá, ta ko̱ i̱ó taʼon Espíritu ii̱ Ndios ini ra̱.
\v 20 Tído ndoʼó, ñani mani̱, ndundéé ndó dákuáʼano ndó mií ndó xíʼín ña̱ ndaa̱ kándísa yó, chi̱ ña̱ ii̱ kíán. Ta kaʼa̱n ndo̱ xíʼín Ndios xíʼín ndée̱ xíʼo Espíritu ii̱ noo̱ ndo̱.
\v 21 Ta koo ini ndo̱ taxi va̱ʼa ndó mií ndó ti̱xi ndáʼa̱ ña̱ kúʼu̱ ini Ndios saʼa̱ ndo̱, xía̱n nani ndáti ndó kemáni̱ Jesucristo ndo̱ʼó xíʼín ña̱ kataki chíchí ndó.
\p
\v 22 Ta koo ini ndo̱ kaʼa̱n niʼini ndó no̱ó na̱ nákani kuáchi̱ ini, na̱ ko̱ kúú ndúsáʼano.
\v 23 Koo ini ndo̱ di̱tá ndó dao ka̱ na̱ no̱ó ta̱ndóʼó ndóʼo na, ña̱ kúú táto̱ʼon ñoʼó kéi̱ ita̱. Ta kuʼu̱ ini ndo̱ saʼa̱ dao ka̱ na̱, tído kandaa ndo̱ mií ndó no̱ó ña̱ kini kée na, ta nda̱ dáʼo̱n ndíxi na kañóʼó ndó, chi̱ yakóán xíʼín ña̱ kini kée na.
\s Kánian natiin Ndios ndidaá ña̱ñóʼó
\p
\v 24 Ta kándéé vá Ndios kandaa na̱ ndo̱ʼó, dá kía̱n ná dáʼa ni dánkoo ndó ña̱ ndaa̱ kándísa yó, ta kándéé ná ná chikata vii ná ndo̱ʼó noo̱ ió na̱ dándáki na xíʼa̱n kádii̱ iní ndo̱.
\v 25 Ta iin tóʼón dini̱ míí ná kúú Ndios, ta iin tóʼón míí ná kúú na̱ ndi̱chí, ta mií ná kúú na̱ dáka̱ki ñaá. Ta iin tóʼón míí ná kúú na̱ kánian natiin ndidaá ña̱ñóʼó, xíʼín ndidaá kúú choon, ta ná dándáki na ndidaá ña̱ʼa, ta ná kakomí ná ndidaá ndée̱ kuu̱ víti, ta ki̱ʼo dión kuií vá ná koo. Dión ná koo.