\id LUK

\h LUKɄS
\mt Oybyʉ Ayuk Di'ibʉ Lukʉs Jyaay
\c 1
\p
\v 1 Mʉgu'uk Tyófilʉ, may ja ja̱'a̱y tʉ tjatseky es tjaja̱'a̱ya'añ yajxónʉ tya̱dʉ madya'aky di'ibʉ ja̱jtʉ mʉt ʉʉdsʉty ya̱a̱. Yʉ'ʉjʉty yajtuundʉ tya̱dʉ madya'aky di'ibʉ tʉ tyuñ tʉ jyátyʉty mʉt ʉʉdsʉty.
\v 2 Xytyukmʉmadyáktʉts ja ʉxpʉjkpʉtʉjk di'ibʉ naty jap mʉt ja Jesús extʉ jawyíñʉp es tka̱jxwa̱'xtʉ ja Diosʉ 'yayuk. Yʉ'ʉjʉty 'yijxtʉ tʉgekyʉ di'ibʉ tuun ja̱jtʉ es tmadyaky óknʉm wi'ix tyuun jya̱jtʉ taadʉ tʉgekyʉ.
\v 3 Es ʉj nandʉ'ʉn, nbayo'oyʉts yajxón tʉgekyʉ extʉ ma̱ tsyondaky, es ʉj tyam mij nduknijayʉ yʉ tya̱dʉ madya'aky éxtʉm tyimja̱jtʉ nidu'uk nidu'uk,
\v 4 es dʉ'ʉn xyñijáwʉt es tʉy'a̱jtʉnʉ'ʉ di'ibʉ tʉ myajtuk'ʉxpéky.
\s Tu'ugʉ anklʉs t'awanʉ ko Fwank Yajnʉbajtpʉ myina̱'a̱ñ jya̱'ta̱'a̱ñ
\p
\v 5 Ko ja Eroodʉs 'yijty rey jap Judeeʉ, net tsyʉna̱a̱y tu'ugʉ teety di'ibʉ xyʉ'a̱jtypy Zakariiʉs es ja'a Abiiʉs ja̱'a̱y. Es ja Zakariiʉsʉ ñʉdo'oxy txʉ'a̱jty Elisabet, es yʉ'ʉ tyʉʉmp 'ya̱a̱ts ja Arón, teedywyindsʉngópk.
\v 6 Esʉ Zakariiʉs esʉ Elisabet tmʉmʉdoodʉ ja Diosʉ 'yana'amʉn. Es yʉ'ʉ jiky'a̱jttʉp tʉy'a̱jtʉn mʉʉt es ni pʉ́n mba̱a̱t kyapeky'íxʉdʉ.
\v 7 Es kyaj ijty ja 'yu'unk, ja'a ko yʉ Elisabet kyajpyʉm 'yu'unkpa̱a̱ty es yʉ'ʉjʉty nimajtsk tʉ jyantsymyʉjja̱'a̱yʉnʉ.
\p
\v 8 Tu'ugʉ xʉʉ ko Zakariiʉs es ja myʉʉdeedyʉty di'ibáty mʉʉt tmʉdundʉ ja Dios ma̱ mʉj tsa̱jptʉjk,
\v 9 net tyukka̱'a̱jʉ ja Zakariiʉs es tyʉ́kʉt mʉj tsa̱jptʉgóty yajpoomjojkpʉ, éxtʉm jaayʉm ja teetytyʉjk ttundʉ tʉ 'yity.
\v 10 Nidʉgekyʉ ja̱'a̱y wyʉ'ʉmdʉ tʉja̱'p es kya̱jxtáktʉ ko ja Zakariiʉs dyajjéky ja poom.
\v 11 Net kyʉxe'ky tu'ugʉ Diosʉ 'yanklʉs aga̱'a̱ñdsyoo ma̱ ja artal ma̱ dyajjéky ja poom.
\v 12 Ko ja Zakariiʉs t'ijxy ja anklʉs, jyantsytsyʉ'kʉ es kyaj tnija̱'a̱jʉ wi'ix jyʉna̱'a̱nʉt.
\v 13 Net 'yanma̱a̱yʉ ja anklʉs:
\p —Zakariiʉs, katʉ mdsʉ'ʉgʉ. Dios oj tmʉdoy ja mga̱jxtákʉn, es ja mnʉdo'oxy Elisabet yʉ'ʉ pya̱a̱daampy tu'ugʉ u'unk di'ibʉ mdukxʉ'áttʉp Fwank.
\v 14 Mmʉdáttʉp ja jotkujk'a̱jtʉn, es may ja ja̱'a̱y xyonda̱'a̱gʉt ko jya̱'tʉt naxwiiñ.
\v 15 Tadʉ m'u'unk yʉ'ʉ ita̱a̱mp mʉj ma̱ Diosʉn. Kyaj t'uuga̱'a̱ñ yʉ vinʉ es ni mʉk nʉʉ es tmʉdátʉt ja Espíritʉ Santʉ extʉ ma̱ kyajnʉm jya'ty naxwiiñ.
\v 16 Es yʉ'ʉ yajjodʉmbíttʉp mayʉ israelitʉ ja̱'a̱y ma̱ yʉ Nindsʉn'a̱jtʉm Dios.
\v 17 Es ja tya̱dʉ Fwank yʉ'ʉ nʉjxʉp jawyiin ma̱ ja Nindsʉn'a̱jtʉm es tmʉdátʉt ja winma̱'a̱ñ es ja mʉk'a̱jtʉn éxtʉm tmʉda̱jty yʉ Diosʉ kyuga̱jxpʉ Eliiʉs, es tpʉjta̱'a̱gʉt es amumdu'uk jot 'yíttʉt ja u'unkteetytyʉjk mʉt ja 'yu'unk 'yʉna̱'k es ttuk'ʉxpʉ́kʉt di'ibʉ kyaj Dios tmʉmʉdoy, es dʉ'ʉn t'ʉxkúkʉt ja ja̱'a̱y es t'axá̱jʉt ja Kristʉ.
\p
\v 18 Net ja Zakariiʉs dyajtʉʉy ja anklʉs:
\p —¿Wi'ixʉts nnijáwʉt pʉn tʉy'a̱jtʉn? Ʉj tʉts nmʉjja̱'a̱yʉnʉ es ja nnʉdo'oxyʉts nandʉ'ʉn.
\p
\v 19 Es ja anklʉs 'yadsoojʉmbijty:
\p —Ʉjtsʉ dʉ'ʉn Gabryel es nmʉdúñʉts ja Dios ma̱ 'yity. Yʉ'ʉts tʉ xykyexy ma̱ mijtsʉn es n'anʉʉmʉdʉ tya̱dʉ oybyʉ ayuk.
\v 20 Per ja'a ko kyaj xymyʉbeky, tyam mwʉ'ʉmʉt uum es nat extʉ ko ja m'u'unk jya̱'tʉt naxwiiñ. Es tʉy'a̱jtʉn ko tya̱dʉ n'ayúkʉts yajkuydyúnʉt ko ja tiempʉ tpa̱a̱dʉt.
\p
\v 21 Es ja ja̱'a̱y 'yawijxtʉ jap tʉja̱'p es ñayyajtʉʉjʉdʉ ti ko ja Zakariiʉs jyantsyjyeky jap tsa̱jptʉgóty.
\v 22 Es ko pyʉdsʉʉmnʉ ja Zakariiʉs, kyaj mba̱a̱t 'yokka̱jxnʉ, je'eyʉ 'ya̱a̱ kyʉ'ʉ dyaj'yi'xy. Net ja ja̱'a̱yʉty jyʉnandʉ ko Zakariiʉs tʉ 'yijxma̱'a̱ty jap mʉj tsa̱jptʉgóty.
\p
\v 23 Es ko oj kya'pxy ja di'ibʉ naty tyiimpy, ta ja Zakariiʉs ñʉjxnʉ ma̱ tyʉjk.
\v 24 Es net ja Elisabet oj wye'emy u'unkmʉʉt es kyaj ma̱ ñejxy, 'yijty mʉgoxk po'o tyʉgoty. Es ja'a jyʉnáñ:
\v 25 “Dios yʉ'ʉts xymyo'oya̱a̱mp yʉ u'unk es kʉdiibʉts ja ja̱'a̱y xyñak'ʉxtíjʉt.”
\s Tu'ugʉ anklʉs t'awanʉ ko Jesús myina̱'a̱ñ jya̱'ta̱'a̱ñ
\p
\v 26 Es ko 'yijty tʉdujk po'o ma̱ Gabryel tmʉgajxy ja Zakariiʉs, net ja Dios tkejxy ja Gabryel wiink tsoo ma̱ ja Nazaret ka̱jpn, Galileeʉ ña̱a̱xóty.
\v 27 Es ja Gabryel yajkejxy es tmʉga̱jxʉt ja kixyʉdo'oxy di'ibʉ xyʉ'a̱jtypy Mariiʉ. Es ja Mariiʉ, ja'a naty nijamyʉ't'a̱jtʉp tu'ugʉ yedyʉjk di'ibʉ xyʉ'a̱jtypy Josee, ja rey Davitʉ tyʉʉmp 'ya̱a̱ts, es tʉ naty ja Mariiʉ ya''amdoy es mʉʉt pyʉ́kʉt.
\v 28 Es ja Gabryel tyʉjkʉ ma̱ ja Mariiʉ tyʉjk, es tka̱jxpe'xy:
\p —Dios maygyépyʉty Mariiʉ. Ni'igʉ mij ja Nindsʉn'a̱jtʉm mdsékyʉty, Dios 'yity mʉt mijts.
\p
\v 29 Es ko Mariiʉ tmʉdooyʉ tya̱dʉ ayuk, ta oj jyotmay'eeky es jyʉna'añ jyodoty wyinma̱'a̱ñóty: “¿Ti 'yandijpyʉ tya̱dʉ ka̱jxpo'xʉn?”
\p
\v 30 Net ja Gabryel 'yanma̱a̱yʉ:
\p —Mariiʉ, katʉ mdsʉ'ʉgʉ. Dios mduna̱'a̱nxʉp tu'ugʉ mʉj may'a̱jtʉn.
\v 31 Mijts tu'ugʉ u'unk myajmín myajja̱'tʉp ya̱ naxwiiñ di'ibʉ mdukxʉ'átʉp Jesús.
\v 32 Yʉ'ʉ ítʉp jantsy mʉj es yajtíjʉt Dios Tsa̱jpótmʉdʉ 'yU'unk, es ja Dios myo'oyʉdʉt ja kutujkʉn éxtʉmʉ 'yapteety Davitʉ kyutujkʉn,
\v 33 es t'ana'amʉt ma̱ naxwíñʉdʉ Israel es 'yítʉt winʉ xʉʉ winʉ tiempʉ. Ni na̱'a̱ kyakʉ́xʉt yʉ 'yana'amʉn.
\p
\v 34 Net ja Mariiʉ dyajtʉʉy ja anklʉs:
\p —¿Wi'ixʉ taadʉ dʉ'ʉn jyátʉt? Kyajpʉts nmʉdaty ja n'u'unk nña'ayʉts.
\p
\v 35 Es ja anklʉs 'yadsoojʉmbijty:
\p —Mínʉp ja Espíritʉ Santʉ ma̱ mijts es ja Dios Tsa̱jpótmʉdʉ myajnitúkʉdʉp mʉt ja myʉk'a̱jtʉn éxtʉm tu'ugʉ yoots. Pa̱a̱dyʉ tadʉ u'unk di'ibʉ ja̱'ta̱a̱mp naxwiiñ, yʉ'ʉ Diosʉ 'yU'unk es kyaj tmʉdaty ja pojpʉ.
\v 36 Yʉ mmʉgu'uk Elisabet yʉ'ʉ nandʉ'ʉn pya̱a̱daampy tu'ugʉ u'unk, oyjya'ijty tʉ jyamʉjja̱'a̱yʉnʉ. Es oy ja ja̱'a̱y jyajʉna̱'a̱ndʉ ko kyaj mba̱a̱t ja Elisabet 'yu'unkpa̱a̱ty, tyam 'yity tʉdujk po'o u'unkmʉʉt.
\v 37 Mʉt ja Dios kyaj ñimʉja̱a̱ty es ti ttúnʉt.
\p
\v 38 Net ja Mariiʉ t'anma̱a̱y ja anklʉs:
\p —Ʉjtsʉ dʉ'ʉn Dios mʉduumbʉ. Wa'ants ja Dios xytyuktúñ éxtʉmts mij tʉ xy'anʉʉmʉ.
\p Mʉt ja tya̱a̱dʉ oj ja anklʉs ñʉjxnʉ.
\s Mariiʉ oj tku'ixy ja Elisabet
\p
\v 39 Es ma̱ tadʉ tiempʉ, net ja Mariiʉ oj ñejxy jottʉgoy ma̱ tu'ugʉ ka̱jpn di'ibʉ ijtp Judeeʉ tunoty kopkoty.
\v 40 Es net jyajty ma̱ ja Zakariiʉsʉ tyʉjk es tka̱jxpe'xy ja Elisabet.
\v 41 Es ko ja Elisabet tmʉdooy ja kya̱jxpo'xʉn, net ja 'yu'unk yi'xy jyodoty. Es ja Elisabet ja Espíritʉ Santʉ oj myo'oyʉty ja winma̱'a̱ñ esʉ mʉk'a̱jtʉn es ttúnʉt di'ibʉ Dios tsyejpy.
\v 42 Net jyantsyjyʉnáñ mʉk ja Elisabet:
\p —Dios tʉ mguni'xyʉty mijts es ni tu'uk dʉ'ʉn ja toxytyʉjk, es tʉ tkuni'xyʉ tadʉ m'U'unk.
\v 43 ¡Yʉ'ʉ tu'ugʉ may'a̱jtʉn jantsy mʉj di'ibʉ ja Nindsʉn'a̱jtʉmʉ tya̱a̱k myʉmiimpy es xykyu'ixa̱'a̱ñʉts!
\v 44 Mʉt kots tʉ nmʉdoyʉ tadʉ mga̱jxpo'xʉn, yʉ n'u'ungʉts tʉ yi'xy mʉt ja xondakʉn njodótyʉts.
\v 45 Tʉ ja Dios mguni'xyʉty ko mij tʉ xymyʉbeky, es yʉ'ʉ kyuydyúnʉp éxtʉm tʉ mya''anʉʉmʉ.
\p
\v 46 Net jyʉnáñ yʉ Mariiʉ:
\q N'awda̱jtypyʉts ja Nindsʉn'a̱jtʉm Dios
\q
\v 47 es njotkujk'átyʉts mʉdʉdsʉ nYajnitsókpʉ.
\q
\v 48 Tʉts ja Diósʉts xyñi'ijxe'eky,
\q yʉ'ʉjʉts xytyuumbʉ'a̱jtp,
\q pa̱a̱ty nidʉgekyʉ ja̱'a̱y winʉ xʉʉ winʉ tiempʉ jyʉna̱'a̱ndʉt kots ʉj nguni'xyʉty.
\q
\v 49 Dios di'ibʉ tʉgekyʉ mʉk'a̱jtʉn myʉda̱jtypy,
\q tʉ tu'uk tpʉjta'aky ja mʉj'a̱jtʉn ma̱ ʉjtsʉn.
\q
\v 50 Winʉ xʉʉ winʉ tiempʉ Dios tmʉdaty yʉ pa''ayo'on mʉt di'ibʉ yʉ'ʉ awda̱jtʉdʉp.
\q
\v 51 Dios tʉ ja myʉk'a̱jtʉn dya'íxyʉty,
\q es tʉ dyajtʉgooydya'ay yʉ wyinma̱'a̱ñ ja ja̱'a̱y di'ibʉ naymyʉjpʉjtákʉp.
\q
\v 52 Tʉ tpʉjkʉ ja 'yana'amʉn di'ibʉ ijttʉp yajkutujkpʉ,
\q es tʉ tmo'oy ja di'ibʉ tuda'agyʉty.
\q
\v 53 Tʉ tmo'oy ja oy'a̱jtʉn ja di'ibʉ tʉgoy'a̱jtxʉp es di'ibʉ yu'o'kʉdʉp,
\q es kyaj tmooy ni tii di'ibʉ mʉkja̱'a̱y.
\q
\v 54 Tʉ tpudʉkʉ ja israelitʉ ja̱'a̱yʉty,
\q es kyaj tja̱'a̱ydyʉgóy éxtʉm jyʉnáñ
\q es ttuk'ixa̱'a̱ñ ja pa''ayo'on,
\q
\v 55 dʉ'ʉn éxtʉm oj ttukwa̱ndaky ja n'aptʉjk'a̱jtʉm Abra̱a̱n, Isa̱a̱ esʉ Jakoob.
\p
\v 56 Mariiʉ oj wye'emy ma̱ Elisabet tʉgʉk po'o, es nétnʉm oj ñejxy ma̱ ja tyʉjk.
\s Fwank Yajnʉbajtpʉ myiñ jya'ty
\p
\v 57 Es ko tpaty ja xʉʉ ma̱ 'yu'unk tpa̱a̱da̱'a̱ñ ja Elisabet, net tu'ugʉ u'unk dyajja̱jty yedyʉjk.
\v 58 Es ja myʉdʉjkpa̱'a̱jʉty es ja myʉgu'uktʉjk tmʉdoodʉ ko Dios tʉ ttuñ ja mʉj may'a̱jtʉn ma̱ Elisabet, es myiindʉ kya̱jxpo'xʉdʉ es ttukxondaktʉ.
\v 59 Es ko tyuktujkxʉbejty, net yajtsuka̱'a̱ñ ja Elisabetʉ 'yu'unk waanʉ ma̱ ja yedyʉjk'a̱jtʉn\f 1:59 Ko Dios tu'ugʉ kajxy'átypyʉ ttuuñ mʉdʉ Abra̱a̱n, net t'ane'emy esʉ Abra̱a̱n mʉdʉ tyʉʉmp 'ya̱a̱ts di'ibʉ yedyʉjk miin ja̱jttʉp, yajjutsujktu'udʉdʉ ja yedyʉjk'a̱jtʉnʉ kyopk, dʉ'ʉnʉ ijxwʉ'ʉmʉn wyʉ'ʉmʉt ko tkupʉktʉ ja kajxy'átypyʉ di'ibʉ Dios tyuun mʉdʉ Abra̱a̱n. Ix Génesis 17:9-14. \f*. Net tjamo'oyándʉ ja u'unk xʉʉ éxtʉm ja tyeety Zakariiʉs xyʉʉ.
\v 60 Es ja Elisabet jyʉnáñ:
\p —Kyaj. Dʉ'ʉn txʉ'átʉt Fwank.
\p
\v 61 Es 'yanma̱a̱yʉdʉ:
\p —¿Per tii? Kyaj ni pʉ́nʉ mmʉgu'uk di'ibʉ dʉ'ʉn xyʉ'a̱jtypy.
\p
\v 62 Net dyajtʉʉdʉ ja Zakariiʉs mʉt ja ijxwʉ'ʉmʉn wi'ix txʉ'átʉt ja 'yu'unk.
\v 63 Es ja Zakariiʉs ttuk'ixy mʉt ja ijxwʉ'ʉmʉn es yajmo'oyʉt tii ma̱ kyʉxja̱'a̱yʉt. Es net tkʉxja̱a̱y: “Fwank txʉ'átʉt.” Es net jyotmay'o'ktʉ nidʉgekyʉ.
\v 64 Es net ja Zakariiʉs kya̱jxe'ky jatʉgok es t'awda̱jttsondáky ja Dios.
\v 65 Pa̱a̱ty nidʉgekyʉ ja myʉdʉjkpa̱'a̱jʉty dʉ'ʉñʉ wyʉ'ʉmʉdyaaydyʉ, es ma̱ tʉgekyʉ Judeeʉ ñax tmadyaktʉ ja̱'a̱y éxtʉm tʉ jyátyʉty.
\v 66 Es nidʉgekyʉ ja̱'a̱yʉty jyotmay'o'ktʉ ko tmʉdoodʉ es ñayyajtʉʉjʉdʉ nixim niyam: “¿Ti tyunaambyʉ tadʉ u'unk?”, mʉt ko tʉy'a̱jtʉn ko Dios tʉ tkuni'xy tadʉ u'unk.
\s Zakariiʉs tja̱'a̱ygyʉda'aky ja Dios
\p
\v 67 Es ja Espíritʉ Santʉ dyajkajxy ja Zakariiʉs dʉ'ʉn:
\q
\v 68 Awdattʉ ja Nindsʉn'a̱jtʉm, ja Israelʉ Dyios,
\q ja'a ko tʉ myiñ ma̱ ʉdsa̱jtʉm es xyajnitso'oga̱'a̱nʉm.
\q
\v 69 Tʉ xymyo'oyʉm tu'ugʉ yajpojpʉniwátspʉ ma̱ Davitʉ tyʉʉmp 'ya̱a̱ts,
\q
\v 70 éxtʉm ja Dios jyʉnáñ ko kyajxy ja kyuga̱jxpʉ jékyʉp.
\q
\v 71 Es jyʉnáñ es xyajtsókʉm mʉt ja mʉk'a̱jtʉn
\q mʉt ʉdsa̱jtʉmʉ nmʉdsip'a̱jtʉm es tʉgekyʉ di'ibʉ xy'axʉk'ijxʉm.
\q
\v 72 Es dʉ'ʉn xytyuk'ijxʉm ja pya''ayo'on mʉt ʉdsa̱jtʉmʉ n'aptʉjk'a̱jtʉm,
\q ko kyaj yajja̱'a̱ydyʉgóy ja wya̱'a̱ts kajxy'átypyʉ.
\q
\v 73 Dios tyukwa̱ndak ja n'aptʉjk'a̱jtʉm Abra̱a̱n
\q
\v 74 ko kyaj ndsʉ'k nja̱'a̱m
\q es kyaj wi'ix xytyu'unʉm nmʉdsip'a̱jtʉm,
\q es nmʉdu'unʉm
\q
\v 75 ja Dios myʉj'a̱jtʉngyʉjxm es mʉdʉ tʉy'a̱jtʉn,
\q njiky'a̱jtʉm ma̱ 'yity tʉgekyʉ njiky'a̱jtʉn'a̱jtʉm.
\p
\v 76 Es ja Zakariiʉs 'yakjʉnáñ:
\q Es mijts, u'unk, mijts Dios Tsa̱jpótmʉdʉ kyuga̱jxpʉ
\q es nʉjx xy'awánʉdʉ ja ja̱'a̱yʉty
\q ko myina̱'a̱ñ ja Nindsʉn'a̱jtʉm,
\q
\v 77 es dyajmina̱'a̱ñ ja nitsokʉn,
\q es tma'xa̱'a̱ñ ja ja̱'a̱yʉ pyojpʉ.
\q
\v 78 Yʉ'ʉ jatánʉbʉ taadʉ ko yʉ Dios tmʉdaty ja pa''ayo'on mʉt ʉdsa̱jtʉm
\q es dyajjʉga'agʉt ma̱ ʉdsa̱jtʉm ja njotmay'a̱jtʉn'a̱jtʉm,
\q es xymyo'oyʉm ja xondakʉn,
\q
\v 79 es wyij kyajtʉt pʉ́nʉty tsʉna̱a̱ydyʉp ma̱ koots'át,
\q éxtʉm mba̱a̱t njʉna̱'a̱nʉm 'yawaxʉ o'kʉn,
\q es xytyu'umo'oyʉm ma̱ ja jotkujk'a̱jtʉn.
\m Dʉ'ʉn tka̱jxta̱a̱y ja Zakariiʉs.
\p
\v 80 Es ja Fwank ye'ky pyejty esʉ Espíritʉ Santʉ myʉk'a̱jtʉnmooyʉ es ttúnʉt di'ibʉ Dios tsyejpy, es jyiky'ajty aamyóty pejyóty extʉ ko jyajty ja xʉʉ es dyajtsondáky es ijxy nide'xy tmʉga̱jxtʉ ja israelitʉ ja̱'a̱yʉty.
\c 2
\s Jesús myiñ jya'ty
\p
\v 1 Ma̱ tadʉ tiempʉ yʉ yajkutujkpʉ kopk, ja Sésʉr Augustʉ, dyajkutíkyʉ naty es ja ja̱'a̱yʉty tʉgekyʉ yajkuja̱'a̱yʉdya'ayʉt.
\v 2 Tya̱a̱dʉ tim jawyiin tsyondaky ja sensʉ ko 'yijty gobernadoor yʉ Kiriño ma̱ Siryʉ ñaxwíñʉdʉ,
\v 3 es ja ja̱'a̱y nidʉgekyʉ ñʉjxta̱'a̱yʉt es yajkujáyʉt ma̱jaty kyuga̱jpnʉty.
\v 4 Pa̱a̱ty tadʉ Josee tsyo'oñ ma̱ tadʉ Nazaret ka̱jpn ma̱ Galileeʉ ñax, es ñejxy ma̱ Judeeʉ ñax ma̱ Belén ka̱jpn, mʉt ko jap myiiñ jyajty naxwiiñ ja Davit. Es ja Josee yʉ'ʉ ijty 'yaptʉjk'a̱jtypy yʉ rey Davit.
\v 5 Net oj ñejxy Belén mʉt ja ñʉdo'oxy Mariiʉ, di'ibʉ u'unkmʉʉdʉ naty, es yajkujáyʉt.
\v 6 Es ko 'yijttʉ jap Belén, net tpaty ja xʉʉ ma̱ dyajmina̱'a̱ñ ja maxu'unk.
\v 7 Es jap tpaty ja 'yu'unk ka'axkópk, es t'abijty mʉt ja 'yʉxpit es oj tke'eky ma̱ jʉyujk tsa̱jka̱a̱ jye'xy, mʉt ko yʉ'ʉjʉty kyaj tpattʉ ja ja̱jttákn.
\s Anklʉs esʉ borreegʉ kywentʉ'a̱jtpʉty
\p
\v 8 Es Belén ka̱jpnbʉ'a̱a̱y jap ja ja̱'a̱y mya̱'a̱dʉ aamyóty di'ibʉ byorreegʉ kywentʉ'a̱jttʉp.
\v 9 Net ti'in t'ijxpáty tu'ugʉ Dios ja 'yanklʉs, es ja Diosʉ myʉj'a̱jtʉn tyʉ'xwa'xy ma̱ yʉ'ʉjʉty, es jyantsyñay'adsʉ'kʉdʉ.
\v 10 Es ja anklʉs 'yanma̱a̱yʉ:
\p —Katʉ mdsʉ'ʉgʉdʉ. Yʉ'ʉts ʉj nyajmiimpy ja oybyʉ ayuk es di'ibʉ yajjotkujk'áttʉp nidʉgekyʉ ja̱'a̱yʉty.
\v 11 Ko tyam tʉ myiñ jya'ty naxwiiñ ma̱ Davitʉ kyuga̱jpnʉty tu'ugʉ Yajnitsókpʉ mʉt miidsʉty, di'ibʉ dʉ'ʉn Nindsʉn'a̱jtʉm, ja Kristʉ.
\v 12 Dʉ'ʉn mduk'ʉxkáptʉbʉ tadʉ u'unk: Jap xypya̱a̱ttʉt 'yabítyʉty es kyo'knʉ ma̱ jʉyujk tsa̱jka̱ jʉ'xtákn.
\p
\v 13 Es ti'in t'ijxkojkpʉ jantsy mayʉ anklʉs ma̱ ja tu'ukpʉ anklʉs, esʉ Dios t'awdattʉ es jyʉna̱'a̱ndʉ:
\q
\v 14 Awdattʉ ja Dios di'ibʉ jam tsa̱jpótm,
\q es 'yíttʉt agujk jotkujk ja ja̱'a̱yʉty di'ibʉ Dios tsyejpy.
\p
\v 15 Net ko ja anklʉs ñʉjxta̱a̱yñʉ tsa̱jpótm, ja borreegʉ kwentʉ'a̱jtpʉ ñay'anma̱a̱yʉdʉ nidu'uk nidu'uk:
\p —Jo'om jap Belén es n'ijxʉmʉ tadʉ di'ibʉ tʉ jyátyʉty, éxtʉm ja Dios tʉ xy'awa̱'a̱nʉm.
\p
\v 16 Net ñʉjxtʉ jottʉgoy es tpattʉ Mariiʉ es ja Josee, es ja maxu'unk kyo'knʉ ma̱ jʉyujk tsa̱jka̱ jʉ'xtákn.
\v 17 Ko t'ijxtʉ, net tmadyakwa̱'xtʉ ja u'unk éxtʉm ja anklʉs 'yanma̱a̱yʉ.
\v 18 Es nidʉgékyʉty di'ibʉ myʉdoodʉ, dʉ'ʉñʉ wyʉ'ʉmʉdyaaydyʉ éxtʉm 'yanma̱a̱yʉdʉ.
\v 19 Per ja Mariiʉ tpʉjke'ky jap jyodoty tʉgekyʉ tya̱a̱dʉ es twinma̱a̱y mʉt yʉ'ʉ.
\v 20 Es ja borreegʉ kwentʉ'a̱jtpʉ ñʉjxnʉdʉ ma̱ ja byorreegʉty es tmʉjjáwʉdʉ es t'awdattʉ ja Dios ma̱ tʉgekyʉ di'ibʉ yʉ'ʉ tʉ tmʉdowdʉ es tʉ t'ixtʉ, éxtʉm 'yanma̱a̱yʉ ja anklʉs.
\s Jesús yajmʉmíñ ma̱ ja mʉj tsa̱jptʉjk
\p
\v 21 Es ko tyuktujkxʉbejty, net yajtsijky waanʉ ja u'unk ma̱ ja yedyʉjk'a̱jtʉn es tmooy ja xyʉʉ Jesús, éxtʉm ja anklʉs 'yanma̱a̱yʉ ja Mariiʉ ko kyajnʉmʉ naty 'yu'unkmʉʉdʉty.
\p
\v 22 Es ko Mariiʉ oj kya'pxy ja xʉʉ ma̱ ñayyajwa̱'a̱dsʉdʉt éxtʉm ja ana'amʉn di'ibʉ Dios myooy ja Moisés, net tmʉnʉjxtʉ ja Jesús Jerusalén ma̱ ja mʉj tsa̱jptʉjk es ja Dios yajtuk'ixa̱'a̱ñ.
\v 23 Tya̱a̱dʉ ttuundʉ dʉ'ʉn éxtʉm ja Diosʉ 'yana'amʉn jyʉna'añ: “Ja jawyiimbʉ yedyʉjk di'ibʉ tʉ myaxu'unk'áty, yʉ'ʉ tyukwinguwa̱'a̱gʉp ja Dios.”
\v 24 Pa̱a̱ty ñʉjxtʉ es tpʉjkta̱'a̱ga̱'a̱ndʉ windsʉ'kʉn éxtʉm ja Diosʉ 'yana'amʉn jyʉna'añ: majtsk ja tsaybyiibʉ o majtsk ja pak dyajnʉjxʉt.
\p
\v 25 Es jap Jerusalén tsyʉna̱a̱y tu'ugʉ yedyʉjk di'ibʉ xyʉ'a̱jtypy Simeonk, tu'ugʉ ja̱'a̱y di'ibʉ jiky'a̱jt tʉy'a̱jtʉn mʉʉt es t'awdaty ja Dios es t'awixy es ja Dios myo'oyʉdʉt ja jotkujk'a̱jtʉn ma̱ ja Israel ja̱'a̱yʉty. Myʉda̱jtypy ja Simeonk ja Espíritʉ Santʉ,
\v 26 es tyuknija̱'a̱jʉ ko kyaj ña'oogʉt extʉ ko t'íxʉt jawyiin ja Diosʉ Kyristʉ di'ibʉ kyaxaampy.
\v 27 Es ja Espíritʉ Santʉ yʉ'ʉ yajnʉjxʉ mʉj tsa̱jptʉjk ñabotsoty. Es japʉ naty yʉ'ʉ ko Mariiʉ es ja Josee dyajmiiñ ja Jesús es ttuna̱'a̱ndʉ wi'ixʉ Diosʉ 'yana'amʉn jyʉna'añ.
\v 28 Net ja Simeonk t'axa̱jʉ ja Jesús es ttsa'andsooy, es t'awda̱jty ja Dios, es jyʉnáñ:
\q
\v 29 Dios, tyam mba̱a̱dʉdsʉ net n'eeky jotkujk
\q ko tyam tʉ xykyuydyúñ di'ibʉts oj xywya̱nda'aky,
\q
\v 30 ja'a ko tʉts n'ixy ja Yajnitsókpʉ
\q
\v 31 di'ibʉ tʉ xykyexy ma̱ nidʉgekyʉ naxwíñʉdʉ ja̱'a̱y,
\q
\v 32 es yʉ'ʉ mayjya'ay tyuknijawʉyaampy yʉ tʉy'a̱jtʉn ma̱ tʉgekyʉ naxwíñʉdʉ,
\q es nandʉ'ʉn 'yítʉt ja myʉj'a̱jtʉn ja m'israelitʉ ja̱'a̱yʉty.
\p
\v 33 Josee es ja Mariiʉ dʉ'ʉñʉ wyʉ'ʉmdʉ éxtʉm jyʉnáñ ja Simeonk.
\v 34 Net ja Simeonk tkuni'xy yʉ'ʉjʉty, es t'anma̱a̱y ja Mariiʉ, ja Jesusʉ tya̱a̱k:
\p —Dios tʉ tpʉjta'agyʉ tya̱dʉ m'u'unk di'ibʉ yajtʉgóyʉp mayʉ israelitʉ ja̱'a̱yʉty di'ibʉ ñibi'tska̱jxʉp es kyaj 'yaxá̱jʉty éxtʉm ja Kristʉ. Es di'ibʉ 'yaxá̱jʉp éxtʉm ja Kristʉ, yʉ'ʉ yajjotkujk'ataampy es tkunu'xa̱'a̱ñ.
\v 35 Es dʉ'ʉn yajnijáwʉt ti ja̱'a̱y myʉda̱jttʉp wyinma̱'a̱ñóty. Es mʉt mij, dʉ'ʉnʉ tya̱a̱dʉ xyjáwʉt éxtʉmxyʉp ja mja̱'a̱jʉn ttuknaxy tu'ugʉ espa̱a̱dʉ.
\m Dʉ'ʉn jyʉna̱a̱nda̱a̱y ja Simeonk.
\p
\v 36 Es jap nandʉ'ʉn tu'ugʉ toxytyʉjk di'ibʉ xyʉ'a̱jtypy Anʉ. Yʉ'ʉ ijty Diosʉ kyuga̱jxpʉ, Fanwelʉ ñʉʉx es ja Aserʉ tyʉʉmp 'ya̱a̱ts. Tʉ jyantsymyʉjja̱'a̱yʉnʉ. Jʉxtujk jʉmʉjt tmʉttsʉna̱a̱y ja ña'ay,
\v 37 es tʉ 'yijnʉ ku'eeky ma̱jta̱'px ma̱jtáxk jʉmʉjt. Es 'yijty ma̱ ja mʉj tsa̱jptʉjk es tmʉduuñ ja Dios xʉʉñ koots, 'yayu'a̱jty es kya̱jxtáky.
\v 38 Es ko kya̱jxta̱a̱y ja Simeonk, net jyajty ja Anʉ es tja̱'a̱ygyʉdáky ja Dios es ñimadyak ja Jesús ja̱'a̱y wyinduuyʉty di'ibʉ naty 'yawijxtʉp ja tiempʉ ko ñitso'oktʉt ja Jerusalén ja̱'a̱y.
\s Ñʉjxtʉ jatʉgok Nazaret
\p
\v 39 Es ko tkuydyuuñ tʉgekyʉ éxtʉm ja Diosʉ 'yana'amʉn jyʉna'añ, net ja Josee es ja Mariiʉ jyʉmbijnʉdʉ mʉt ja Jesús jap Nazaret ma̱ Galileeʉ ñax.
\v 40 Es ja Jesús ye'ky pyejty mʉk es kyuwinma̱'a̱ñʉty, es ja Dios kyunu'xʉ oy.
\s Jesusu'unk yajpa̱a̱ty ma̱ mʉj tsa̱jptʉjk
\p
\v 41 Es jʉmʉjt jʉmʉjt ja Josee es ja Mariiʉ ñʉjxtʉ xʉ'a̱jtpʉ Jerusalén ma̱ ja paskʉ xʉʉ.
\v 42 Es ko ja Jesús dya''abejty ma̱jmajtsk jʉmʉjt, net ñʉjxtʉ nidʉgekyʉ Jerusalén es dyajnaxa̱'a̱ñ ja xʉʉ éxtʉm jʉmʉjt jʉmʉjt ttuundʉ.
\v 43 Es ko ja xʉʉ ña̱jxnʉ, net ja Josee es ja Mariiʉ jyʉmbijnʉdʉ ma̱ kya̱jpn. Kyaj wyinma̱'a̱ñbyáttʉ pʉn tʉ Jesús wye'emy Jerusalén.
\v 44 Yʉ'ʉ jyʉnandʉ ko Jesús myiñ mʉt ja myʉgu'uktʉjk o ma̱ ja mayjya'ay di'ibʉ oj tʉ xyʉ'attʉ. Es dʉ'ʉn oj yo'oydyʉ tuk xʉʉ. Es ko oj tsyu'ujʉnʉ, net t'ʉxta̱a̱ydyʉ ma̱ myʉgu'uktʉjk esʉ myʉtnaymyaayʉbʉty,
\v 45 es kyaj ma̱ tpattʉ. Net jyʉmbijttʉ Jerusalén es t'ʉxta̱'a̱ya̱'a̱ndʉ jap.
\p
\v 46 Es ko tyʉgʉkxʉbejty, net tpattʉ mʉj tsa̱jptʉjk ñabotsoty. Jap 'yu'uñʉ ma̱ ja tsa̱jptʉjk ya'ʉxpʉjkpʉ es tmʉdoo'íty es dyajtʉ́y.
\v 47 Es nidʉgekyʉ di'ibʉ myʉdoodʉ dʉ'ʉñʉ wyʉ'ʉmʉdyaaydyʉ mʉt ja wyijy'a̱jtʉn es ja 'yadsoojʉmbijtʉn di'ibʉ yajkypy.
\v 48 Es dʉ'ʉñʉ wyʉ'ʉmʉdyaaydyʉ ja tya̱a̱k tyeety ko 'yijxʉdʉ. Es ja tya̱a̱k 'yanma̱a̱yʉ:
\p —Nitʉ, ¿ti ko dʉ'ʉnʉts tʉ xytyuñ? Ʉjts es ja mdeety tʉts njotmay'ooktʉ es tʉ n'ʉxta̱'a̱ydyʉ.
\p
\v 49 Net ja Jesús 'yanma̱a̱yʉ:
\p —¿Ti kots xy'ʉxta̱'a̱ydyʉ? ¿Ti kyaj xyñijawʉ ko ʉj koonʉmts n'ita̱'a̱ñ ma̱ ja nDeedyʉts ja tyʉjk?
\p
\v 50 Per yʉ'ʉjʉty kyaj tjaygyujkʉdʉ éxtʉm 'yanma̱a̱yʉ.
\p
\v 51 Net ja Jesús ñʉjxnʉ mʉt yʉ'ʉjʉty jap Nazaret es tmʉmʉdooy ja tya̱a̱k tyeety. Es ja tya̱a̱k tpʉjke'ky tʉgekyʉ ma̱ jyot wyinma̱'a̱ñ.
\v 52 Es ja Jesús ye'ky pyejty es wyimbejty ja wyinma̱'a̱ñ, es ja Dios es nandʉ'ʉnʉ ja̱'a̱y jyotkujk'a̱jtʉ.
\c 3
\s Fwank Yajnʉbajtpʉ tka̱jxwa'xy ja Diosʉ 'yayuk ma̱ mʉj it
\p
\v 1 Es ko ja Sésʉr Tibeeryʉ naty tʉ 'yane'emy Romʉ ma̱jmókx jʉmʉjt, net ja Ponsyʉ Pilatʉ 'yijty gobernadoor jap Judeeʉ, Eroodʉs 'yijty gobernadoor Galileeʉ, Felipʉ myʉga'axʉ Eroodʉs 'yijty gobernadoor Ituuryʉ esʉ Trakonitʉ, Lisañʉs 'yijty gobernadoor Abiliñʉ,
\v 2 es ja Anás es ja Kaifás 'yijttʉ teedywyindsʉngópkʉty.
\p Ma̱ tadʉ tiempʉ ja Dios dyajky tu'ugʉ ayuk ma̱ Fwank, ja Zakariiʉsʉ 'yu'unk, jap ma̱ ja mʉj it.
\v 3 Es ja Fwank oj ñejxy ma̱ tʉgekyʉ ja nax myʉwingón ja Jordán mʉjnʉʉ, es tka̱jxwa'xy ma̱ ja ja̱'a̱yʉty es t'anma̱a̱ydyʉ es jyodʉmbíttʉt, tmastu'uttʉt ja pyeky es ñʉbátʉt. Dʉ'ʉn ttúndʉt ja'agyʉjxm esʉ Dios mya'xʉdʉt ja pyojpʉ.
\v 4 Tya̱a̱dʉ ja'a dʉ'ʉn tyuun jya̱jtʉ éxtʉm jyʉnáñ ja Diosʉ kyuga̱jxpʉ Isaiiʉ ko jékyʉp jyaay:
\q Mʉdowdʉ. Jap ma̱ mʉj it yajmʉdóy ko tu'ugʉ ja̱'a̱y kyajxy mʉk,
\q es jyʉna'añ:
\q “Ʉxkúkʉdʉ ja Nindsʉn'a̱jtʉmʉ tyu'u.
\q Ta̱jtʉ́wdʉ, yajkijxyʉdʉ ja tu'u ma̱ ñaxa̱'a̱ñ.
\q
\v 5 Yajtuktúktʉ yʉ agʉk tukkʉkpʉ,
\q es yajkijxyʉdya'aydyʉ ja tun kopk.
\q Es ma̱ ja tu'u wiity xʉgety, yajtʉ́wdʉ,
\q es ma̱ kyaj kyijxyʉty, yajkijxyʉdʉ.
\q
\v 6 Es tʉgekyʉ naxwíñʉdʉ t'íxʉt ja Yajnitsókpʉ di'ibʉ Dios kyaxaampy.”
\p
\v 7 Mayjya'ay tsyo'ondʉ ma̱ ja ka̱jpn es myiindʉ ma̱ ja Fwank jam mʉj ittum es yʉ'ʉ yajnʉbátʉdʉt. Es ja Fwank myʉga̱jxʉ dʉ'ʉn:
\p —Miidsʉty dʉ'ʉn éxtʉmʉ awa̱'a̱ndsa̱'a̱ñʉn. Es éxtʉmʉ tsa̱'a̱ñʉty tkuga'aktʉ ja jʉʉn kʉdiibʉ tyóyʉt, miits mjʉnándʉp xytyijy ko mnitso'oktʉt mʉt ja mnʉbajtʉn es ko dʉ'ʉn ja Dios kyaj mdʉydyúnʉdʉt éxtʉmʉ pojpʉ ja̱'a̱yʉty.
\v 8 ¡Kyaj tyʉy'a̱jtʉnʉty! Jawyiin xytyuk'íxʉt mʉt ja mjiky'a̱jtʉn ko tʉy'a̱jtʉn tʉ mjodʉmbity, es kyaj mnayjyʉna̱'a̱nʉdʉt: “Ʉdsa̱jtʉm ja Abra̱a̱nʉ tyʉʉmp 'ya̱a̱ts.” Tʉy'a̱jtʉn n'anʉʉmʉdʉ ko Dios mba̱a̱dʉ tya̱dʉ tsa̱a̱jʉty dyajjʉmbíty ja Abra̱a̱nʉ tyʉʉmp 'ya̱a̱dsʉty.
\v 9 Es ja Diosʉ tyʉydyu'unʉn tim wingoomp mʉt ja pojpʉ ja̱'a̱yʉty, éxtʉm ko mʉt ja jatsyʉ ndukpo'tʉ'kʉm yʉ kepy di'ibʉ kyaj 'yóyʉty. Pa̱a̱ty tʉgekyʉ kepy di'ibʉ kyaj tyʉʉmp'áty oy, yajpo'tʉ'ʉgʉp es yajpʉjta̱'a̱gʉt jʉʉnóty.
\p
\v 10 Net ja ja̱'a̱y dyajtʉʉdʉ ja Fwank:
\p —¿Tiits ndúndʉp?
\p
\v 11 Es ja Fwank 'yadsooy:
\p —Pʉn myʉda̱jtypy majtsk yʉ ñixuy, myo'oyʉp tu'uk di'ibʉ kyajʉ ñixuy. Es di'ibʉ jap ja tyojx, myo'oyʉp ja di'ibʉ kyaj tmʉdaty.
\p
\v 12 Es nandʉ'ʉn ñimiinʉdʉ Fwank ja yajkugʉbajtpʉty es dyajnʉbáttʉt. Es yʉ'ʉjʉty dyajtʉʉjʉmbijttʉ:
\p —Ya'ʉxpʉjkpʉ, es ʉʉdsʉty, ¿tiits ndúndʉp?
\p
\v 13 Es ja Fwank 'yadsooy:
\p —Katʉ myajkugʉbéty ni'igʉ pʉn kyajʉ dʉ'ʉn jyʉna'añ ja ana'amʉn.
\p
\v 14 Nandʉ'ʉnʉty ja solda̱a̱dʉty yajtʉʉjʉdʉ:
\p —Es ʉʉdsʉty, ¿tiits ndúndʉp?
\p Es ja Fwank 'yadsooy:
\p —Katʉ xypyʉjkʉdʉ adsip yʉ ja̱'a̱yʉ myeeñ. Katʉ xyñiwa̱a̱mbáttʉ ni pʉ́n nanatʉkʉkyʉjxm es tukjotkʉda̱'a̱ktʉ ja mmʉju'uñʉty.
\p
\v 15 Es nidʉgekyʉ ja̱'a̱yʉty tjantsyjyʉjp'ijxtʉ ja Kristʉ. Pa̱a̱ty jyʉnandʉ:
\p —¿Ti tadʉ Fwank, wa'anʉ da jya'adyʉ Kristʉ?
\p
\v 16 Es ja Fwank jyʉnáñ es tka̱jxte'xy mayjya'ayóty:
\p —Ʉj tyámʉts nyajnʉbéty mʉt ja nʉʉ. Per miimp jatu'uk di'ibʉ myʉda̱jtypy ni'igʉ ja mʉk'a̱jtʉn es kyajts ndʉ'ʉnʉty ʉj. Es kyajts ʉj xyñitʉkʉ, ni je'eyʉ yʉ kyʉ'ʉk nga''agájʉdʉt éxtʉmxyʉpts ʉj n'ítyʉts tyuumbʉn. Per yʉ'ʉ di'ibʉ miimp myajnʉbátʉdʉp mʉt ja Espíritʉ Santʉ esʉ jʉʉn.
\v 17 Es yʉ'ʉ kyʉ'ʉjóty tmʉdaty ja tyuumbajn es dyajwa̱'a̱dsa̱'a̱ñ ja triigʉ, es yajpʉjkʉ'ʉgʉt ja triigʉ ma̱ ja tsya'x es ja triigʉ pyosta̱'a̱k yajno'ogʉt mʉt ja jʉʉn di'ibʉ ni na̱'a̱ kya'eeky.
\p
\v 18 Es dʉ'ʉn ja Fwank tka̱jxwijy ja ja̱'a̱y kana̱k nax es ttukmʉdoodʉ ja oybyʉ ayuk.
\v 19 Es ja Fwank ttuk'ooy ja Eroodʉs ko ja Erodiiʉs dyajnejxy éxtʉm ja tyoxytyʉjkʉn, ja ñʉdo'oxy yʉ myʉga'axʉ Felipʉ, es mʉt kana̱k nax ja tyuundʉgo'oyʉn.
\v 20 Pa̱a̱ty ja Eroodʉs ttsiimy ja Fwank es dʉ'ʉn ni'igʉ ja pyojpʉ myayʉ.
\s Jesús ñʉbety
\p
\v 21 Kyajnʉmʉ naty yajtsímy ko Fwank dyajnʉbéty ja ja̱'a̱y, myiiñ nandʉ'ʉn ja Jesús es oj ñʉbety. Es ko naty kya̱jxta'aky, net ja tsa̱jp 'yawatsy,
\v 22 es ja Espíritʉ Santʉ kyʉdaky ma̱ yʉ'ʉn éxtʉm tu'ugʉ pak, es net ja Dios kyajxy ma̱ ja tsa̱jpʉn:
\p —Ʉjts mij n'U'unk'a̱jtypy di'ibʉts ndsejpy es jantsy jotkujkʉts mʉt mijts.
\s Jesukristʉ 'yaptʉjkʉty
\p
\v 23 Jesús i'px ma̱jk jʉmʉjtʉ naty tmʉdaty ko oga̱'a̱n tka̱jxwa'xy mayjya'ayóty. Es ja ja̱'a̱yʉty jyʉnandʉ ko Jesús u'unk'a̱jtʉ Josee. Ja Josee ja'a u'unk'a̱jtʉ ja Elii,
\v 24 Elii u'unk'a̱jtʉ Matat, Matat u'unk'a̱jtʉ Leví, Leví u'unk'a̱jtʉ Melki, Melki u'unk'a̱jtʉ Janay, Janay u'unk'a̱jtʉ Josee,
\v 25 Josee u'unk'a̱jtʉ Matatiiʉs, Matatiiʉs u'unk'a̱jtʉ Amós, Amós u'unk'a̱jtʉ Na'um, Na'um u'unk'a̱jtʉ Eslii, Eslii u'unk'a̱jtʉ Nagay,
\v 26 Nagay u'unk'a̱jtʉ Maat, Maat u'unk'a̱jtʉ Matatiiʉs, Matatiiʉs u'unk'a̱jtʉ Semey, Semey u'unk'a̱jtʉ Josee, Josee u'unk'a̱jtʉ Judaa,
\v 27 Judaa u'unk'a̱jtʉ Joanán, Joanán u'unk'a̱jtʉ Resʉ, Resʉ u'unk'a̱jtʉ Zorobabel, Zorobabel u'unk'a̱jtʉ Salatyel, Salatyel u'unk'a̱jtʉ Neeri,
\v 28 Neeri u'unk'a̱jtʉ Melki, Melki u'unk'a̱jtʉ Adii, Adii u'unk'a̱jtʉ Kosam, Kosam u'unk'a̱jtʉ Elmodam, Elmodam u'unk'a̱jtʉ Eer,
\v 29 Eer u'unk'a̱jtʉ Joswee, Joswee u'unk'a̱jtʉ Elyezeer, Elyezeer u'unk'a̱jtʉ Jorim, Jorim u'unk'a̱jtʉ Matat,
\v 30 Matat u'unk'a̱jtʉ Leví, Leví u'unk'a̱jtʉ Simeonk, Simeonk u'unk'a̱jtʉ Judaa, Judaa u'unk'a̱jtʉ Josee, Josee u'unk'a̱jtʉ Jonam, Jonam u'unk'a̱jtʉ Elyakim,
\v 31 Elyakim u'unk'a̱jtʉ Meleeʉ, Meleeʉ u'unk'a̱jtʉ Mayñán, Mayñán u'unk'a̱jtʉ Matatʉ, Matatʉ u'unk'a̱jtʉ Natán,
\v 32 Natán u'unk'a̱jtʉ ja rey Davit, ja rey Davit u'unk'a̱jtʉ Isa̱'ii, Isa̱'ii u'unk'a̱jtʉ Obeed, Obeed u'unk'a̱jtʉ Booz, Booz u'unk'a̱jtʉ Salmón, Salmón u'unk'a̱jtʉ Naasón,
\v 33 Naasón u'unk'a̱jtʉ Aminadap, Aminadap u'unk'a̱jtʉ Admín, Admín u'unk'a̱jtʉ Arnii, Arnii u'unk'a̱jtʉ Esrom, Esrom u'unk'a̱jtʉ Fares, Fares u'unk'a̱jtʉ Judaa,
\v 34 Judaa u'unk'a̱jtʉ Jakoob, Jakoob u'unk'a̱jtʉ Isa̱a̱, Isa̱a̱ u'unk'a̱jtʉ Abra̱a̱n, Abra̱a̱n u'unk'a̱jtʉ Taree, Taree u'unk'a̱jtʉ Nakoor,
\v 35 Nakoor u'unk'a̱jtʉ Seruk, Seruk u'unk'a̱jtʉ Ragau, Ragau u'unk'a̱jtʉ Falek, Falek u'unk'a̱jtʉ Eeber, Eeber u'unk'a̱jtʉ Salʉ,
\v 36 Salʉ u'unk'a̱jtʉ Kaynán, Kaynán u'unk'a̱jtʉ Arfaksat, Arfaksat u'unk'a̱jtʉ Sem, Sem u'unk'a̱jtʉ No'ee, No'ee u'unk'a̱jtʉ Lamek,
\v 37 Lamek u'unk'a̱jtʉ Matusalén, Matusalén u'unk'a̱jtʉ Enok, Enok u'unk'a̱jtʉ Jareed, Jareed u'unk'a̱jtʉ Malalel, Malalel u'unk'a̱jtʉ Kaynán,
\v 38 Kaynán u'unk'a̱jtʉ Enós, Enós u'unk'a̱jtʉ Set, Set u'unk'a̱jtʉ Adán, di'ibʉ Dios kʉ'ʉm yajkoj. Pa̱a̱ty mba̱a̱t njʉna̱'a̱nʉm ko Adán yʉ'ʉdyʉ Dios ja mya̱a̱nk.
\c 4
\s Mʉjku'ugópk tjatúñ wi'ixʉ Jesús pyekytyúnʉt
\p
\v 1 Es ja Espíritʉ Santʉ dyajky ja mʉk'a̱jtʉn ma̱ ja Jesús, es yajtso'onʉ ma̱ ja Jordán mʉjnʉʉ es yajnʉjxʉ ma̱ ja mʉj it.
\v 2 Es jap 'yijty justyikxyxyʉʉ. Es ja mʉjku'ugópk tjatuuñ es ja Jesús pyekytyúnʉt. Es ja Jesús 'yayu'a̱jty justyikxyxyʉʉ, net yu'o'kʉ.
\v 3 Net ja mʉjku'ugópk jyʉnáñ:
\p —Pʉn mijtsʉ dʉ'ʉn ja Dios m'U'unk'a̱jtʉp, yajjʉmbítʉ tya̱dʉ tsa̱a̱ tsa̱jkaaky.
\p
\v 4 Es ja Jesús 'yadsoojʉmbijtʉ:
\p —Yʉ Diosʉ jyaaybyajtʉn dʉ'ʉn jyʉna'añ: “Kyaj jyatyim'yʉ'ʉyʉdyʉ tsa̱jkaaky mʉʉt jyiky'aty ja ja̱'a̱y.”
\p
\v 5 Net ja mʉjku'ugópk dyajnejxy ja Jesús ma̱ tu'ugʉ kopk di'ibʉ kʉjxm es tyuk'ijxʉ tuk pojʉn tʉgekyʉ it naxwíñʉdʉ.
\v 6 Es ja mʉjku'ugópk jyʉnáñ:
\p —Ʉjts mij nmo'oyʉp ja kutujkʉn esʉ mʉj'a̱jtʉn ma̱ tʉgekyʉ naxwíñʉdʉ di'ibʉ nduk'ijxypy. Ʉjtsʉ tʉgekyʉ nyajmooy, es mba̱a̱dʉts nmo'oy di'ibʉts ʉj ndsejpy.
\v 7 Es pa̱a̱ty pʉn mnaygyoxtʉna̱a̱ydyákʉp nwinduuyʉts es xy'awdátʉdʉts, nmo'oyʉp tʉgekyʉ.
\p
\v 8 Es ja Jesús 'yadsooy:
\p —Yʉ Diosʉ jyaaybyajtʉn dʉ'ʉn jyʉna'añ: “Awdat ja mWindsʉ́n Dios, es mʉdún yʉ'ʉ naydyu'uk.”
\p
\v 9 Oknʉm ja mʉjku'ugópk oj dyajnejxy ja Jesús ma̱ ja Jerusalén ka̱jpn es dyajpejty ma̱ mʉj tsa̱jptʉjk kopk es 'yanma̱a̱yʉ:
\p —Pʉn mijtsʉ dʉ'ʉn ja Dios m'U'unk'a̱jtʉp, nayyajkunáxʉdʉ yap naxkʉjxy,
\v 10 ja'a ko ja Diosʉ jyaaybyajtʉn jyʉna'añ:
\q Dios t'ane'emy yʉ anklʉs es mgwentʉ'átʉdʉt,
\q
\v 11 es myajpʉdʉ'ʉgʉdʉt mʉt ja kyʉ'ʉ
\q kʉdiibʉ tsyayútʉt ja mdeky mʉt ja tsa̱a̱.
\p
\v 12 Net ja Jesús 'yadsooy:
\p —Nandʉ'ʉn jyʉna'añ ja Diosʉ jyaaybyajtʉn: “Katʉ xy'amdoy es ttúnʉt ja mWindsʉ́n Dios di'ibʉ kyaj 'yóyʉty.”
\p
\v 13 Es dʉ'ʉn ko ja mʉjku'ugópk kyaj tpaty ja wiinkpʉ winma̱'a̱ñ es ja Jesús ñaygyʉyákʉdʉt mʉt yʉ'ʉ, net oj ñʉjxnʉ tuk tiempʉ.
\s Jesús tka̱jxwa̱'xtso'oñ ja Diosʉ 'yayuk
\p
\v 14 Ta ja Jesús jyʉmbijty jatʉgok Galileeʉ es ja Espíritʉ Santʉ myooyʉ mʉk'a̱jtʉn. Es ma̱ tʉgekyʉ ja Galileeʉ ñax ja ja̱'a̱yʉty tmadyaktʉ di'ibʉ tyuun kya̱jx ja Jesús.
\v 15 Es ka̱jpnga̱jpn ja Jesusʉ ja̱'a̱y dya'ʉxpejky ma̱ ja tsa̱jptʉjk, es nidʉgekyʉ ja̱'a̱y di'ibʉ myʉdoodʉ jyʉnandʉ ko oy di'ibʉ kya̱jx.
\s Jesús jap Nazaret
\p
\v 16 Net ja Jesús oj ñejxy Nazaret, ma̱ naty tʉ yeeky tʉ pyety. Es ma̱ ja sa̱a̱bʉdʉ xʉʉ tyʉjkʉ ma̱ ja tsa̱jptʉjk, éxtʉm jaayʉm ttuunk'áty, es tyʉna̱a̱ye'ky es tka̱jxa̱'a̱ñ ja Diosʉ jyaaybyajtʉn.
\v 17 Es myooyʉdʉ Diosʉ kyuga̱jxpʉ Isaiiʉ ñeky. Ta Jesús tnaktʉʉy ja neky es tkajxy dʉ'ʉn:
\q
\v 18 Nmʉda̱jtypyʉts ʉj ja Diosʉ Jya̱'a̱jʉn,
\q es tʉts xymyo'oy ja tuunk
\q esʉts nga̱jxwa̱'xʉt ja oybyʉ ayuk ma̱ ja ayoobʉ ja̱'a̱y.
\q Es tʉts xykyexy esʉts n'awánʉt
\q es ja tsimyjya'ay es ja po'oduumbʉ yajnasmátsʉt,
\q esʉts nmo'oyʉt yʉ 'yijxʉn di'ibʉ wiints,
\q
\v 19 esʉts n'awánʉdʉts ko tʉ jya'ty ja xʉʉ
\q ko Dios ttúnʉt ja myay'a̱jtʉn ja ja̱'a̱y.
\p
\v 20 Net ja Jesús t'axa̱a̱tsy ja neky es tmooy ja ja̱'a̱y es ñaxwe'tsy. Es jamʉ naty ja ja̱'a̱y nidʉgekyʉ ma̱ ja tsa̱jptʉjk ni'igʉ 'yijxʉdʉ.
\v 21 Es ja Jesús jyʉnáñ:
\p —Tyam yajkuydyúñʉ tya̱dʉ Diosʉ jyaaybyajtʉn ma̱ miidsʉty.
\p
\v 22 Es nidʉgekyʉ ja̱'a̱yʉty jyotkujk'a̱jty mʉt yʉ'ʉ es wyʉ'ʉmda̱a̱ydyʉ ja 'yʉxpʉjkʉn es ñay'anma̱a̱yʉdʉ:
\p —Tya̱a̱dʉ, ¿kyaj yʉ'ʉdyʉ Josee ja 'yu'unk?
\p
\v 23 Es ja Jesús 'yanma̱a̱yʉ:
\p —Tʉy'a̱jtʉn miits mjʉna̱'a̱na̱'a̱ndʉ éxtʉm ja kajxy jyʉnáñ: “Kudsooy, nayyajtsoybyátʉdʉ mijts kʉ'ʉm.” Es net nandʉ'ʉn mjʉna̱'a̱nʉt: “Tun nandʉ'ʉn ja ya̱a̱ ma̱ mga̱jpnʉty tʉgekyʉ éxtʉmts tʉ nmʉdoy ko tʉ xytyuñ jap Kafarnaúm.”
\v 24 Es tʉy'a̱jtʉn n'anʉʉmʉts miidsʉty ko ni tu'ugʉ Diosʉ kyugajxy ya''axa̱jʉ yajxón ma̱ kya̱jpnʉty.
\v 25 Tʉy'a̱jtʉnʉts njʉna̱'a̱ñ, may 'yijty ja ku'ekytyo'oxy ma̱ ja Israelʉ ñaxwíñʉdʉ ko 'yijty ja Diosʉ kyuga̱jxpʉ Eliiʉs, ma̱ kyaj oj tyu'uy tʉgʉk jʉmʉjt jakujm. Es net ja ja̱'a̱y jyantsy'ayu'a̱jttʉ ma̱ tʉgekyʉ ñaxwíñʉdʉ Israel.
\v 26 Perʉ Dios kyaj tkejxy yʉ Eliiʉs ma̱ yʉ israelitʉ ku'ekytyo'oxyʉty, je'eyʉ tkejxy ma̱ tu'ugʉ ku'ekytyo'oxy ma̱ Sareptʉ ka̱jpn, ja'a di'ibʉ wingón ma̱ Sidón.
\v 27 Es nandʉ'ʉn 'yijty jap Israel may ja ja̱'a̱y di'ibʉ myʉda̱jtypy ja leprʉ pa̱'a̱m ma̱ 'yijty ja Diosʉ kyuga̱jxpʉ Eliseeʉ. Per ni tu'uk kya''agʉdaky, yʉ'ʉ je'eyʉ Na̱a̱mán di'ibʉ tso'omp jagam Siryʉ ña̱a̱xóty.
\p
\v 28 Es ko taadʉ tmʉdoodʉ di'ibʉ naty jap ma̱ tsa̱jptʉjk, net jyot'ambʉjkta̱a̱ydyʉ,
\v 29 es pyʉdʉ'ktʉ es dyajpʉdsʉʉmdʉ ja Jesús jap ka̱jpnóty es dyajnʉjxtʉ ma̱ kopk a̱a̱, ja kopk ma̱ ja ka̱jpn yajkojy, es tjakujʉbijpnaxándʉ jam.
\v 30 Es ja Jesús ñajxy jap mayjya'ayóty es tyu'uyo'oy.
\s Jesús dyajpʉdsémy ja ka'oybyʉ ma̱ tu'ugʉ ja̱'a̱y
\p
\v 31 Net ja Jesús jyʉjptáky Kafarnaúm ma̱ Galileeʉ ñax, es jap dya'ʉxpejky ja ja̱'a̱y sa̱a̱bʉdʉ xʉʉ.
\v 32 Net ja ja̱'a̱y dʉ'ʉñʉ wyʉ'ʉmʉdyaaydyʉ ko yʉ Jesús ya'ʉxpeky mʉt ja mʉk'a̱jtʉn es ja kutujkʉn.
\p
\v 33 Es ma̱ tu'ugʉ xʉʉ, net jyajty ma̱ ja tsa̱jptʉjk tu'ugʉ yedyʉjk di'ibʉ ka'oybyʉ myʉda̱jtypy. Es ja ka'oybyʉ yaj'yaxkák ja yedyʉjk:
\p
\v 34 —¿Ti ko ya̱a̱ mmiñ mij ma̱ ʉʉdsʉty, Jesús, Nazaret ja̱'a̱y? ¿Ti mijts min xyajkutʉgoya̱'a̱ndʉ? Ʉj n'ixy'ajtypyʉts mij ko mDios'u'ungʉty.
\p
\v 35 Ta Jesús oj t'ooy ja ka'oybyʉ:
\p —¡Amoñʉ! ¡Mastu'udʉ tadʉ ja̱'a̱y!
\p Net ja ka'oybyʉ yajkʉda̱a̱jʉ ja yedyʉjk es myastutʉ, ni wi'ix tkatuuñ.
\v 36 Nidʉgekyʉ ja̱'a̱y dʉ'ʉñʉ wyʉ'ʉmʉdyaaydyʉ, es ñayjyʉnánʉdʉ nidu'uk nidu'uk:
\p —¡Mʉt ja kutujkʉn esʉ mʉk'a̱jtʉnʉ tya̱a̱dʉ t'ane'emy yʉ ka'óybyʉty es myʉmʉdóyʉty, es tmastu'uty ja ja̱'a̱y!
\p
\v 37 Es ja ja̱'a̱y tmadyaktʉ ma̱ tʉgekyʉ ka̱jpn éxtʉm ja Jesús tʉ ttuñ.
\s Jesús dya''agʉda'aky ja Peedrʉ myʉ't toxytyʉjk
\p
\v 38 Netʉ Jesús tsyo'oñ ma̱ ja tsa̱jptʉjk es ñejxy ma̱ ja Simongʉ tyʉjk. Es ja Simongʉ myʉ't toxytyʉjk, ja'a naty jantsy jʉʉmba̱'a̱mbʉjkʉp, es tmʉnu'xtáktʉ ja Jesús es dya''agʉda̱'a̱gʉt yʉ'ʉ.
\v 39 Es ja Jesús myʉjwa'ky ma̱ ja ja̱'a̱y kyo'knʉ es t'anma̱a̱y ja jʉʉmba̱'a̱m:
\p —Ka'ak jam.
\p Ta ja jʉʉmba̱'a̱m jyʉgakta̱a̱y. Netyʉ pyʉdʉ'knʉ ja toxytyʉjk es yajka̱a̱y ya'úkʉdʉ.
\s Jesús dya''agʉda'aky may ja puma̱'a̱yʉty
\p
\v 40 Es ko ja xʉʉ kyʉdaknʉ, nidʉgekyʉ ja̱'a̱yʉty di'ibʉ myʉda̱jt ja puma̱'a̱y, di'ibʉ kana̱k nax myʉda̱jtypy ja pʉjkʉn, dyajmiindʉ ma̱ Jesús. Es ja Jesús tpʉjtáky ja kyʉ'ʉ ma̱ yʉ'ʉjʉty nidu'uk nidu'uk es dʉ'ʉn dya''agʉdakta̱a̱ydyʉ.
\v 41 Nandʉ'ʉn ja ka'oybyʉ tmastuttʉ ja ja̱'a̱y yax jojkp:
\p —Mijts Diosʉ 'yU'unk.
\p Net ja Jesús tmʉkmʉgajxy ja ka'oybyʉ es kyaj t'ok'yajka̱jxnʉt ko Jesús yʉ'ʉdyʉ Kristʉ, ja'a ko yʉ'ʉjʉty ñija̱'a̱dʉp yajxón ko tyʉy'a̱jtʉnʉty.
\s Jesús ja Diosʉ 'yayuk tka̱jxwa'xy Galileeʉ
\p
\v 42 Es ko oj xyʉʉñʉ jakumbom, ja Jesús tsyo'oñ jap ka̱jpnóty es oj ñejxy ma̱ tu'ugʉ it jagam. Es ja ja̱'a̱yʉty 'yʉxta̱a̱yʉdʉ, es jya̱jttʉ ma̱ naty ja Jesús, es ttsojktʉ es wyʉ'ʉmʉt, kʉdiibʉ ñʉjxʉt.
\v 43 Per ja Jesús jyʉnáñ:
\p —Tsojkʉp nandʉ'ʉn ʉj nnʉjxʉt ma̱ wiinkpʉ ka̱jpn es n'awánʉdʉts ja oybyʉ ayuk di'ibʉ ñigajxypy ja Diosʉ kyutujkʉn, ja'a ko pa̱a̱dyʉts ja Dios tʉ xykyexy.
\p
\v 44 Es dʉ'ʉn ja Jesús jyʉdijty ka̱jpnga̱jpn es tka̱jxwa'xy ma̱ ja Galileeʉ tsya̱jptʉjkʉty.
\c 5
\s Jesús twoy nima̱jtáxkʉ a̱jkxma̱jtspʉty
\p
\v 1 Tu'ugʉ xʉʉ ko Jesús 'yijty Jenesaret Myejyñbyʉ'ám\f 5:1 Jenesaret Myejyñ yʉ'ʉ nandʉ'ʉn xyʉ'a̱jtypy Galileeʉ Myejyñ. \f*  mʉʉt ja mayjya'ay di'ibʉ jantsytyukmujkʉdʉ ko tmʉdowa̱'a̱ndʉ ja Diosʉ 'yayuk,
\v 2 net t'ijxy ko jam 'yity wingón majtskʉ barkʉ. Ta naty ja a̱jkxma̱jtspʉ pyʉdsʉmdʉ barkoty es tpujtʉ ja 'ya̱jkxma̱jtsn.
\v 3 Net ja Jesús ttuktʉjkʉ tu'ugʉ barkʉ di'ibʉ Simonk jya'a'a̱jtypy, es t'anma̱a̱y es jawaanʉ t'ak'yajnʉjxʉt mejyñóty. Net ja Jesús ñaxwe'tsy barkoty, es dyajtsondáky ttuk'ixa̱'a̱ñ ja ja̱'a̱yʉty.
\v 4 Es ko ja Jesús kya̱jxta̱a̱y, net ja Simonk t'anma̱a̱y:
\p —Yajnʉjxʉ mbarkʉ mejyñgyijky, es kujʉbijpnáxʉ m'a̱jkxma̱jtsn es m'a̱jkxmátsʉt.
\p
\v 5 Esʉ Simonk 'yadsooy:
\p —Ya'ʉxpʉjkpʉ, tuk tsu'umʉts ʉʉdsʉty tʉ njatundʉ es ni tu'ugʉts tʉ ngamatstʉ. Per tyámʉts nbʉjta̱'a̱gʉt ja a̱jkxma̱jtsn yʉ'ʉgyʉjxm ko mij mjʉna̱'a̱ñ.
\p
\v 6 Es ko ja a̱jkxma̱jtsn tkujʉbijpna̱jxy, net tjantsymya̱jtstʉ may'a̱jkx, extʉ kʉ'tstsondák ja a̱jkxma̱jtsn.
\v 7 Net ttuk'ijxtʉ ja ijxwʉ'ʉmʉn ja myʉgu'ugʉty ma̱ ja wiinkpʉ barkʉ es min pyudʉ́kʉdʉ. Es myiindʉ yʉ'ʉjʉty, es dya'ujtstʉ may ja majtskpʉ barkʉ extʉ kyináñ ja byarkʉ.
\v 8 Es ko ja Simonk Peedrʉ t'ijxy ja may'a̱jkx, net ñaygyoxtʉna̱a̱ydyákʉ ma̱ ja Jesús es jyʉnáñ:
\p —Windsʉ́n, mastútkʉts, ¡ʉjts pojpʉ ja̱'a̱y!
\p
\v 9 Dʉ'ʉn jyʉnáñ ja Simonk, ja'a ko yʉ'ʉ ñay'adsʉ'kʉdʉ mʉt ko tma̱jtstʉ ja may'a̱jkx.
\v 10 Es nandʉ'ʉn ñay'adsʉ'kʉdʉ ja Simongʉ myʉgu'ugʉty Santya̱'a̱gʉ es ja Fwank, 'yu'ungʉty ja Zebedeeʉ. Esʉ Jesús t'anma̱a̱y ja Simonk:
\p —Katʉ mdsʉ'ʉgʉ. Tyam oga̱'a̱n ngaxa̱'a̱ñʉts mij es xy'ʉxta̱'a̱yʉt ja ja̱'a̱y di'ibʉts ʉjʉ n'ʉxpʉjkʉn pyadúndʉp.
\p
\v 11 Es ko dyajmiindʉ ja barkʉ jam pu'ujótm, net tnikaktʉ tʉgekyʉ es ñʉjxtʉ mʉt ja Jesús.
\s Jesús dya''agʉda'aky ja ja̱'a̱y di'ibʉ myʉda̱jtypy ja leprʉ pa̱'a̱m
\p
\v 12 Es ko Jesús 'yijty ma̱ tu'ugʉ ka̱jpn, net ñimiinʉ tu'ugʉ yedyʉjk di'ibʉ myʉda̱jtypy ja leprʉ pa̱'a̱m. Es ko tadʉ yedyʉjk t'ijxy ja Jesús, net ñaygyoxtʉna̱a̱ydyákʉ es ñaxku'ijxʉ es tmʉnu'xtáky dʉ'ʉn:
\p —Windsʉ́n, pʉn mdsejpy, mba̱a̱dʉts xya''agʉda'aky.
\p
\v 13 Net ja Jesús ja kyʉ'ʉ tpʉjtáky es ttooñ es t'anma̱a̱y:
\p —Ndsejpyʉts es nya''agʉda̱'a̱gʉt.
\p Es netyʉ myastutʉ ja leprʉ pa̱'a̱m es 'yagʉdaky.
\v 14 Net ja Jesús 'yana'amʉ:
\p —Katʉ xy'awanʉ ni pʉ́n. Nʉjx ma̱ yʉ teety es xytyuk'íxʉt ko tʉ mmastu'udyʉty ja leprʉ pa̱'a̱m. Es mʉnʉjx ja windsʉ'kʉn di'ibʉ kyajxypy ja Moisés es ñayyajwa̱'a̱dsʉdʉt di'ibʉ tʉ myastu'udyʉty ja leprʉ pa̱'a̱m. Es dʉ'ʉn ja ja̱'a̱y xytyuk'íxtʉt ko kyaj xyñakymyʉdatyʉ tadʉ leprʉ pa̱'a̱m.
\p
\v 15 Per ja ja̱'a̱yʉty tmadyaktʉ ma̱ tʉgekyʉ ka̱jpn wi'ix ja Jesús ttuuñ mʉt ja myʉj'a̱jtʉn, es mayʉ ja̱'a̱y myiindʉ ma̱ ja Jesús es tmʉdowa̱'a̱ndʉ es ya''agʉda̱'a̱gʉdʉt.
\v 16 Es ja Jesús oj ñejxy ka̱jxtákpʉ adʉkʉtuuy.
\s Jesús dya''agʉda'aky tu'ugʉ xux ja̱'a̱y
\p
\v 17 Tu'ugʉ xʉʉ ko Jesusʉ naty ya'ʉxpeky, jamʉ naty 'yu'uñʉdʉ ja fariseeʉty es ja di'ibʉty tsa̱jptʉgóty ya'ʉxpʉjktʉp. Es yʉ'ʉjʉty tsyo'ondʉ ma̱jatyʉ kya̱jpn'u'ungʉ Galileeʉ, Judeeʉ, es nandʉ'ʉnʉ ma̱ Jerusalén ka̱jpn, es tmʉdoo'íttʉ es t'ixtʉ éxtʉm ja Jesús jyʉna'añ es ttuñ. Esʉ Dios myʉk'a̱jtʉngyʉjxm ja Jesús dya''agʉdaky ja puma̱'a̱y.
\v 18 Net jyajty ja ja̱'a̱yʉty tkʉ'ʉydyʉ tu'ugʉ mabajnu'unk ma̱ kyo'knʉ tu'ugʉ yedyʉjk di'ibʉ xux. Es tjayajtʉkʉyándʉ tʉgoty es tpʉjta̱'a̱gándʉ ma̱ ja Jesús.
\v 19 Per kyaj mba̱a̱t oj dyajtʉ́kʉ, ja'a ko naty mayjya'ay. Net pyajttʉ ma̱ tʉjkni'x es tnikʉʉydyúttʉ es tkutʉʉyña̱jxtʉ ja xux ja̱'a̱y mʉt ja myabajnu'unk jap Jesús winduuy mayjya'ay agijky.
\p
\v 20 Ko Jesús t'ijxy ko taadʉty myʉbʉjkʉdʉ, net t'anma̱a̱y ja xux ja̱'a̱y:
\p —Mʉgu'uk, nme'xypyʉts yʉ mbojpʉ.
\p
\v 21 Net ja fariseeʉty es ja di'ibʉty tsa̱jptʉgóty ya'ʉxpʉjktʉp ñay'anma̱a̱yʉdʉ wyinma̱'a̱ñóty: “Tya̱dʉ yedyʉjk kyaj tmʉj'íxy ja Dios ko dʉ'ʉn kyajxy, ja'a ko yʉ'ʉ naydyu'ugʉ Dios kʉ'ʉm mba̱a̱t tme'xy yʉ pojpʉ.”
\p
\v 22 Esʉ Jesús ñija̱'a̱p éxtʉm ja ja̱'a̱y jyʉnáñ wyinma̱'a̱ñóty, es t'anma̱a̱y:
\p —¿Ti ko mwinma̱'a̱ñ xyajjʉna̱'a̱ndʉ ko ʉj kyajts nwindsʉ'ʉgʉ Dios?
\v 23 Miits mjʉnándʉp kots ʉj kyaj nmʉdaty ja kutujkʉn esʉts ʉj nma'xʉt yʉ pojpʉ. Es mjʉna̱a̱mp kots ʉj kyaj mba̱a̱t nya''agʉda'agyʉ tya̱dʉ yedyʉjk esʉts nyaj'yo'oyʉ'ʉgʉt. Pa̱a̱ty miits mjʉna̱'a̱ndʉ ko kyaj ñimʉja̱a̱ty esʉts ʉj dʉ'ʉn njʉna̱'a̱nʉt: “Ʉjts mij nbojpʉma'xʉp.” Es jantsy nimʉja̱a̱ es ʉj njʉna̱'a̱nʉdʉts: “Pʉdʉ'ʉk es myo'oyʉt”, ¿kʉdii?
\v 24 Es tyámʉts miidsʉty nduk'ixa̱'a̱ñ ja nmʉj'a̱jtʉn esʉts ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, nya''agʉda̱'a̱ga̱'a̱ñʉ tadʉ yedyʉjk es dʉ'ʉn miidsʉty nduk'íxʉt kots ʉj nmʉdaty ja kutujkʉn esʉts nma'xʉt ja pojpʉ.
\p Net ja Jesús t'anma̱a̱y ja xux ja̱'a̱y:
\p —Pʉdʉ'ʉk, yajmúk ja mmabajnu'unk es nʉjx ma̱ mdʉjk.
\p
\v 25 Netyʉ ja yedyʉjk pyʉde'ky es dyajmujknʉ ja mabajnu'unk es ñʉjxnʉ ma̱ tyʉjk es t'awda̱jty ja Dios.
\v 26 Es nidʉgekyʉ ja̱'a̱y dʉ'ʉñʉ wyʉ'ʉmʉdyaaydyʉ es t'awda̱jttʉ ja Dios, es ni'igʉ tsyʉ'kʉdʉ es ñay'anma̱a̱yʉdʉ nidu'uk nidu'uk:
\p —Tyam tʉ n'ijxʉm di'ibʉty jantsy mʉj.
\s Jesús twoy ja Matewʉ
\p
\v 27 Ko ja Jesús tsyo'onnʉ ma̱ ja ka̱jpn, net t'ijxy jap ka̱jpnbʉ'a̱jp tu'ugʉ yajkugʉbajtpʉ 'yu'uñʉ ma̱ yajkugʉbéty, es ja'a txʉ'aty Leví. Net ja Jesús 'yanma̱a̱yʉ:
\p —Pamiingʉts mij éxtʉmdsʉ n'ʉxpʉjkpʉ.
\p
\v 28 Net ja Leví pyʉde'ky, es tmastuty tʉgekyʉ ja tyuunk es tpanejxy ja Jesús.
\p
\v 29 Es óknʉm ja Leví ttuuñ tu'ugʉ mʉj xʉʉ ma̱ ja tyʉjk mʉt yʉ'ʉgyʉjxmʉ Jesús. Es jamʉ naty may ja yajkugʉbajtpʉ esʉ wiinkpʉ ja̱'a̱yʉty 'yu'uñʉdʉ ma̱ ja meesʉ es kyaydyʉ mʉt ja Jesús es ja di'ibʉ ya'ʉxpejkypy.
\v 30 Es ja fariseeʉty es ja di'ibʉty tsa̱jptʉgóty ya'ʉxpʉjktʉp tni'o'o tniyáxʉdʉ ja Jesusʉ 'yʉxpʉjkpʉty:
\p —¿Ti ko dʉ'ʉn mgay m'uuktʉ miidsʉty mʉt ja yajkugʉbajtpʉty es mʉt ja pekyjya'ayʉty?
\p
\v 31 Net ja Jesús 'yadsooy:
\p —Kyaj dyajtʉgoy'áty yʉ kudsooy di'ibʉ mʉk'a̱jt oy'a̱jtp, yʉ'ʉyʉ di'ibʉ pʉjkʉp.
\v 32 Tʉts nmiñ es nyáxʉts yʉ pekyjya'aydyʉjk es jyodʉmbíttʉt. Pʉ́n jʉna̱a̱mp: “Ʉj kyajts mbekyjya'ayʉty”, ¿yʉ tadʉ ja̱'a̱yʉty wi'ix mba̱a̱t jyodʉmbittʉ?
\s Jesús dyajtʉ́wdʉ ti ko kya''ayu'aty
\p
\v 33 Net t'anma̱a̱ydyʉ ja Jesús:
\p —Yʉ Fwangʉ 'yʉxpʉjkpʉ kana̱k ok 'yayu'attʉ es kya̱jxta̱'a̱ktʉ. Es ja fariseeʉdyʉ 'yʉxpʉjkpʉ nandʉ'ʉn ttundʉ. ¿Es ti ko mij m'ʉxpʉjkpʉ dʉ'ʉñʉm kyay 'yuuktʉ?
\p
\v 34 Es ja Jesús 'yadsoojʉdʉ:
\p —¿Ti mba̱a̱t miits xya''ayu'attʉ yʉ myʉtnaymyaayʉbʉ tadʉ pʉjkpʉ ko meerʉ ijt xondakʉn tyúñʉty es ko tadʉ pʉjkpʉ 'yak'ittʉ mʉt ja myʉtnaymyaayʉbʉtʉjk?
\v 35 Per pya̱a̱dʉp ja tiempʉ ko ja pʉjkpʉ yajpʉjkʉt, net 'yayu'áttʉt.
\p
\v 36 Es nandʉ'ʉn ja Jesús tpʉjtáky majtskʉ ijxpajtʉn es ttuk'ʉxpejky ko kyaj mba̱a̱t ñaydyuktʉ́kʉty yʉ tukpʉ winma̱'a̱ñ mʉt ja jembyʉ. Es jyʉnáñ:
\p —Kyaj pʉ́n tpukeepy tuk pedazʉ jembyʉ wit es yajtuk'abátsʉt tu'ugʉ vestiidʉ tukpʉ. Ja'a ko dʉ'ʉn yajtúnʉt, nʉʉmujkp ja jembyʉ wit es kyʉʉdsʉt ja vestiidʉ tukpʉ es kyaj ja jemywyit kyʉxʉ'ʉgʉt yajxón ma̱ ja tuk wit.
\p
\v 37 ’Es nan kyaj ya''adamʉ yʉ vinʉ jembyʉ ma̱ yʉ tukpʉ nʉʉ'abutsʉnbyo'o. Pes ko jap yajpʉjta̱'a̱gʉt, tʉ naty tyʉgoy ja jembyʉ vinʉ ko kyʉʉdsʉt ja tukpʉ nʉʉ'abutsʉnbyo'o.
\v 38 Pa̱a̱ty 'yóyʉty yajpʉjta̱'a̱gʉt yʉ vinʉ jembyʉ ma̱ yʉ po'ojʉ jembyʉ es dʉ'ʉn kyaj ti wyindʉgóyʉt.
\v 39 Es pʉ́n 'yikypy ja vinʉ di'ibʉ tʉ tsya̱a̱mnʉ, kyaj tnakytsyeky yʉ vinʉ jembyʉ, ja'a ko jyʉna'añ: “Di'ibʉ tʉ tsya̱a̱mnʉ ni'igʉ 'yóyʉty.”
\c 6
\s Jesusʉ 'yʉxpʉjkpʉty tkutʉjtʉ ja triigʉ sa̱a̱bʉdʉ xʉʉ
\p
\v 1 Ma̱ tu'ugʉ sa̱a̱bʉdʉ xʉʉ ja Jesús mʉt ja 'yʉxpʉjkpʉty ña̱jxtʉ triigʉ kamoty. Es ja 'yʉxpʉjkpʉtʉjk tkutʉjtʉ ja triigʉ es twinxatstʉ es tjʉ'xtʉ ja pya̱jk.
\v 2 Net nija'ajʉty ja fariseeʉty dyajtʉʉdʉ:
\p —¿Ti ko dʉ'ʉn xytyundʉ miidsʉty ma̱ sa̱a̱bʉdʉ xʉʉ di'ibʉ kyaj ñigutíkyʉty?
\p
\v 3 Es ja Jesús 'yadsooy:
\p —Es miidsʉty, ¿ti kyajnʉm xy'ʉxpʉktʉ di'ibʉ tyuun ja Davit ko yʉ'ʉ es ja jyamyʉʉdʉty tmʉda̱jttʉ ja yuu?
\v 4 Tyʉjkʉ ja Davit ma̱ Diosʉ tyʉjk es tju'ty ja tsa̱jkaaky di'ibʉ kuni'xy es tka̱a̱y yʉ'ʉ es nandʉ'ʉn tmooydyʉ ja jyamyʉʉdʉty. Es kyaj jyanigutíkyʉty es yʉ'ʉ tkáydyʉt, yʉ'ʉ je'eyʉ ja teedyʉty mba̱a̱t tkaydyʉ tadʉ tsa̱jkaaky.
\p
\v 5 Es nandʉ'ʉn jyʉnáñ ja Jesús:
\p —Es ʉj nmʉda̱jtypyʉts yʉ kutujkʉn nandʉ'ʉn ma̱ sa̱a̱bʉdʉ xʉʉ.
\s Yedyʉjk di'ibʉ myʉda̱jtypy ja kyʉ'ʉ tuk adu'um tʉ'ʉts
\p
\v 6 Es ma̱ jatu'ugʉ sa̱a̱bʉdʉ xʉʉ Jesús tyʉjkʉ ma̱ ja tsa̱jptʉjk es dya'ʉxpejky ja ja̱'a̱yʉty. Japʉ naty tu'ugʉ yedyʉjk di'ibʉ myʉda̱jtypy ja 'yaga̱'a̱ñgyʉ'ʉ tʉ'ʉts.
\v 7 Es ja di'ibʉty tsa̱jptʉgóty ya'ʉxpʉjktʉp es ja fariseeʉty tpajʉdijttʉ ja Jesús es t'ixa̱'a̱ñ pʉn ya''agʉdakypy ja ja̱'a̱y ma̱ ja sa̱a̱bʉdʉ xʉʉ, es dʉ'ʉn ttuundʉ ja anʉʉ es tpekymyo'oya̱'a̱ndʉ.
\v 8 Perʉ Jesús ñija̱'a̱p di'ibʉ wyinma̱a̱ydyʉp es t'anma̱a̱y ja yedyʉjk di'ibʉ kyʉ'ʉ myʉda̱jtypy tʉ'ʉts:
\p —Pʉdʉ'ʉk es mdánʉt ya̱a̱ kujk'a̱a̱y.
\p Es ja yedyʉjk pyʉde'ky es tyʉna̱a̱y jap kujk'a̱jp.
\v 9 Net ja Jesús t'anma̱a̱y ja wiinkpʉ ja̱'a̱yʉty:
\p —Tyámʉts ʉj miits nyajtʉwa̱'a̱ndʉ: ¿Ti mba̱a̱t ndu'unʉm ma̱ ja sa̱a̱bʉdʉ xʉʉ, ja oybyʉ o axʉʉkpʉ? ¿Nyajtsókʉm o nya'o'kʉmʉ?
\p
\v 10 Net ja Jesús t'ijxta̱a̱y nidʉgekyʉ di'ibʉ naty tʉ tyukwa̱'kmíkyʉty, es t'anma̱a̱y ja yedyʉjk:
\p —Xa̱jtʉ́w.
\p Es ko xya̱jtʉʉy, 'yagʉdakta̱a̱y.
\v 11 Es ja fariseeʉty es ja myʉgu'ugʉty 'yajkʉdʉ mʉk es ñay'anma̱a̱yʉdʉ ak yʉ'ʉjʉty pʉn wi'ix mba̱a̱t yajtúñ ja Jesús.
\s Jesús twin'ixy nima̱jmajtskʉ 'yapóstʉlʉty
\p
\v 12 Es ko waanʉ jyejky, ta ja Jesús oj ñejxy ka̱jxtákpʉ ma̱ tu'ugʉ kopk. Jam ja tsuu dyajna̱jxy kya̱jxta'aky.
\v 13 Es ko oj xyʉʉñʉ, net dyaxʉ di'ibʉty ya'ʉxpejkypy, es twin'ijxy nima̱jmajtsk di'ibʉ 'yapostʉlʉ'áttʉp.
\v 14 Yʉ'ʉ xyʉʉjʉty: Simonk di'ibʉ Jesús yajxʉbajt Peedrʉ, Andrés, ja Simongʉ myʉga'ax, Santya̱'a̱gʉ, Fwank, Felipʉ, Bartolomee,
\v 15 Matewʉ, Tomás, Santya̱'a̱gʉ, ja Alfeeʉ 'yu'unk, Simonk ja kananeeʉ ja̱'a̱y,
\v 16 Juudʉs yʉ Santya̱'a̱gʉ 'yu'unk, esʉ Juudʉs Iskaryotʉ di'ibʉ óknʉm kyʉya̱jk ja Jesús.
\s Jesusʉ mayjya'ay dya'ʉxpeky
\p
\v 17 Netʉ Jesús jyʉnajky ma̱ ja kopk mʉt yʉ'ʉjʉty es jyajty ma̱ tu'ugʉ joy it. Es japʉ mayjya'ay ñaymyujkʉdʉ di'ibʉ tso'ondʉp Judeeʉ, Jerusalén es ma̱ myejyñbya̱'a̱jʉ Tirʉ esʉ Sidón.
\v 18 Tya̱a̱dʉty tʉ naty jya̱'ttʉ es tmʉdowa̱'a̱ndʉ ja Jesusʉ 'yʉxpʉjkʉn es nandʉ'ʉn 'yagʉda̱'a̱ktʉt di'ibʉ pʉjkʉdʉp. Es di'ibʉ mʉjku'u ya''ayoojʉp, nandʉ'ʉn ja Jesús dya''agʉdaky.
\v 19 Es nidʉgekyʉ ja mayjya'ay ttonandʉ ja Jesús, ja'a ko mʉdʉ myʉk'a̱jtʉn ja Jesús dya''agʉdaky nidʉgekyʉ ja pa̱'a̱m ja̱'a̱y.
\s Pʉ́nʉty kuni'xyʉty
\p
\v 20 Net ja Jesús t'ijxtʉ ja di'ibʉ ya'ʉxpejkypy, es t'anma̱a̱y:
\p —Kuni'xy miidsʉty di'ibʉ ayoodʉp, pes m'íttʉp ma̱ Diosʉ kyutujkʉn.
\p
\v 21 ’Kuni'xy miidsʉty di'ibʉ tyam ayu'a̱jttʉp, pes mjotkʉda̱'a̱ktʉp.
\p ’Kuni'xy miidsʉty di'ibʉ tyam jʉʉy yáxtʉp, pes óknʉm mxi'ik mxóndʉt.
\p
\v 22 ’Kuni'xy miidsʉty ko ja̱'a̱yʉty mga'oy'íxʉdʉ, mga'oy'axá̱jʉdʉ, mya''axʉk'ixtʉ es jyʉna̱'a̱ndʉ wi'ixáty mʉt miidsʉty ja'a kots miits xypyanʉjxtʉp, ʉj, ja Naxwíñʉdʉ Ja̱'a̱yʉdyʉ Kyudʉnaabyʉ.
\v 23 Agujk'át jotkujk'áttʉ es xonda̱'a̱ktʉ ma̱ tadʉ xʉʉ, pes, tsa̱jpótmʉ Dios mʉj wiin mgumáyʉdʉt. Nandʉ'ʉn tadʉ ja̱'a̱yʉdyʉ 'yaptʉjkʉty t'axʉktundʉ ja Diosʉ kyuga̱jxpʉty.
\p
\v 24 ’¡Per pʉroobʉ miits mʉkja̱'a̱ydyʉjkʉty! Tyamyʉ mjotkujk'áttʉ, per óknʉm m'ayówdʉt.
\p
\v 25 ’¡Pʉroobʉ miidsʉty di'ibʉ tyam ka̱a̱y úktʉp, pes óknʉm m'ayu'áttʉt! ¡Pʉroobʉ miidsʉty di'ibʉ tyam xik xoondʉp, pes óknʉm mjotmay'oogʉt es mjʉ'ʉydyʉt!
\p
\v 26 ’¡Pʉroobʉ miidsʉty ko nidʉgekyʉ ja̱'a̱yʉty m'axá̱jʉty oy, ja'a ko dʉ'ʉn ja 'yaptʉjkʉty t'axá̱jʉdʉ di'ibʉ jékyʉp andakp jyʉna̱'a̱ndʉ ko yʉ'ʉ Diosʉ kyuga̱jxpʉ!
\s Tsoktʉ ja mmʉdsip
\p
\v 27 ’Per ʉj n'anma̱a̱ydyʉp miits di'ibʉ xymyʉdoo'ijttʉp, ko mdsóktʉp ja mmʉdsip es xytyúnʉt yajxón mʉt di'ibʉ mga'oy'ijxʉp,
\v 28 es mgunu'xtʉp di'ibʉ mga̱jxpojkʉdʉp es ni'amdow nibʉjktsówʉ ma̱ Dios di'ibʉ m'axʉktuunʉdʉp.
\v 29 Es pʉn mgojxʉp tuk adu'um ma̱ m'ama̱'a̱tsy, mo'oy jatuk adu'um. Es pʉn ja pʉ́n mbʉjkʉty yʉ mdsyamarrʉ, jan ja mnixuy es wa'an nandʉ'ʉn dyajnejxy.
\v 30 Es pʉ́n m'amdoojʉp di'ibʉ mmʉda̱jtypy, mo'oy, es pʉ́n tʉ ti mbʉjkʉty, katʉ xy'amdoy es dyajjʉmbítʉt.
\v 31 Es tundʉ miidsʉty mʉt nidʉgekyʉ ja̱'a̱y éxtʉm xytsyoktʉ es yʉ'ʉjʉty ttúndʉt nandʉ'ʉn mʉt miidsʉty.
\p
\v 32 ’Pʉn miits mdsojktʉp yʉ'ʉyʉ di'ibʉ miits mdsojkʉdʉp, ¿ti oy'a̱jtʉn mduundʉp di'ibʉ kyatuundʉp ja wiinkpʉty? Pes tyuundʉp yʉ'ʉ nandʉ'ʉn di'ibʉ 'yandijtʉp pekyjya'ay.
\v 33 Es pʉn miits mduundʉp oy yʉ'ʉyʉ di'ibʉ miits mdsojkʉdʉp, ¿ti oy'a̱jtʉn mduundʉp di'ibʉ kyatuundʉp ja wiinkpʉty? Pes tyuundʉp yʉ'ʉ nandʉ'ʉn di'ibʉ 'yandijtʉp pekyjya'ay.
\v 34 Es pʉn miidsʉty mduk'ani'xypy ja meeñ yʉ'ʉyʉ ja̱'a̱y di'ibʉ m'a'ijxʉp es mmʉgʉbátʉdʉt jatʉgok, ¿ti oy'a̱jtʉn mduundʉp di'ibʉ kyatuundʉp ja wiinkpʉty? Pes nandʉ'ʉn di'ibʉ 'yandijtʉp pekyjya'ay tmo'oydyʉ yʉ myeeñ ani'xy yʉ ja̱'a̱y di'ibʉ mʉgʉbátʉdʉp.
\v 35 Tsoktʉ es tundʉ ja oybyʉ mʉdʉ mmʉdsip, tuk'anu'x ja mmeeñ nandʉ'ʉn yʉ ja̱'a̱y es kyaj xyjʉjp'íxʉt es mmʉgʉbátʉdʉt, dʉ'ʉn xytyuk'íxʉt ko miidsʉty Dios Tsa̱jpótmʉdʉ 'yu'ungʉty. Ja'a ko Dios nandʉ'ʉn tyiimpy yʉ oybyʉ extʉ mʉt yʉ pekyjya'ay es pʉ́nʉty kyaj jya'aygyʉda'agyʉty. Es di'ibʉ dʉn tyiimpy, Dios mʉj myay'ata̱'a̱ñʉty.
\v 36 Pa''ayowdʉ ja ja̱'a̱y éxtʉm ja mDeedyʉ tsa̱jpótmʉdʉ mba''ayóyʉty.
\s Kyaj wiinkpʉty nʉgoo nbayo'oyʉm
\p
\v 37 ’Katʉ xypyayo'oy ja wiinkpʉ, es ja Dios nan kyaj miits mbayo'oyʉdʉt. Katʉ xypyekymyo'oy ja wiinkpʉ, es ja Dios nan kyaj mbekymyo'oyʉdʉt miidsʉty. Pa''ayowdʉ, es ja Dios nandʉ'ʉn mba''ayówʉdʉt.
\v 38 Mo'oy ja wiinkpʉ, es ja Dios mmo'oyʉdʉt nandʉ'ʉn, oyʉ kijxn, ta̱'tspéky, winxity es ku'ujts. Es pʉn oy xykyijxʉ ja wiinkpʉ ja jya'a, nandʉ'ʉn myajkijxtʉt.
\p
\v 39 Jesús yʉ'ʉ pyʉjtákʉ tya̱dʉ ijxpajtʉn:
\p —¿Ti mba̱a̱t tu'ugʉ wiints twijts'yo'oy ja myʉwiints? ¿Ti kyaj kyʉdáwʉt nimajtsk ma̱ tu'ugʉ jut?
\v 40 Ni tu'ugʉ ʉxpʉjkpʉ di'ibʉ myʉba̱a̱dʉp ja wyindsʉ́n, per ko oy dyajkéxy ja 'yʉxpʉjkʉn, dʉ'ʉn jya̱'tʉt éxtʉm ja wyindsʉ́n.
\p
\v 41 ’¿Ti ko xy'ixy tu'uk ja kepywyayu'unk di'ibʉ jap mmʉgu'uk wyiinóty, es kyaj mij xytyuñʉ kwentʉ ja mʉj kepy di'ibʉ jap mwiinóty?
\v 42 ¿Es wi'ix mjʉna̱'a̱ñ: “Mʉgu'uk, n'okju'tʉmʉ tadʉ kepywyayu'unk di'ibʉ jap mmʉda̱jtypy mwiinóty”, es kyaj mnayjyáwʉty ko mij xymyʉdaty ja mʉj kepy jap mwiinóty? Mnaydyíjʉp ko mjiky'aty tʉy'a̱jtʉn mʉʉt. Yajpʉdsʉ́m jawyiinʉ tadʉ mʉj kepy di'ibʉ jap mwiinóty, es dʉ'ʉn mba̱a̱t xy'ixy yajxón es xyjuudʉt tadʉ kepywyayu'unk di'ibʉ jap mmʉgu'uk wyiinóty.
\s Jya'ay'a̱jtʉn ja ja̱'a̱y yajtuk'ʉxka̱jp
\p
\v 43 ’Ni tu'ugʉ kepyʉ oybyʉ di'ibʉ tʉʉmp'a̱jtp axʉʉk, es nan ni yʉ kepy di'ibʉ kyaj 'yóyʉty es tyʉʉmp'áty oy.
\v 44 Tu'uk tu'ugʉ kepy ya'ʉxka̱jp mʉt ja tyʉʉmp. Kyaj yajtíky yʉ iigʉ ma̱ poop apyñ. Es nan kyaj yajtíky yʉ uuvʉ ma̱ yʉ tume'eñky.
\v 45 Ja ja̱'a̱yʉ oyjya'aybyʉ tsuj kyajxy myadya'aky mʉt ko ijtp jyodoty ja oybyʉ, es ja axʉk ja̱'a̱ybyʉ myadyakypy ja tsa̱a̱tsykyʉbétypyʉ mʉt ko ijtp jyodoty ja axʉk'a̱jtʉn.
\p
\v 46 ’¿Ti ko miits xy'anʉʉmʉdʉts: “Windsʉ́n, Windsʉ́n”, es kyaj xytyundʉ éxtʉmts njʉna̱'a̱ñʉn?
\v 47 Ja ja̱'a̱y di'ibʉts xyñimiimp es tmʉdoy yʉ n'ʉxpʉjkʉnʉts es tkuydyúñ,
\v 48 yʉ'ʉ dʉ'ʉn éxtʉm ja yedyʉjk di'ibʉ kyoj ja tyʉjk. Es jawyiin tnida̱jʉ kʉk es tpʉjtáky yʉ pyotsy ʉjx tsa̱a̱de'ekykyʉjxy. Es ko ja nʉʉ kyeemy es txijty ja tʉjk amʉja̱a̱, kyaj wi'ix jyajty, ja'a ko ta̱'tspéky oy pyojtse'egyʉty ma̱ ja tsa̱a̱de'eky.
\v 49 Es pʉ́n myʉdeebyʉts ʉj ja n'ʉxpʉjkʉn es kyaj tkuydyúñ, yʉ'ʉ dʉ'ʉn éxtʉm tu'ugʉ yedyʉjk di'ibʉ kyoj ja tyʉjk nax wingʉjxy es kyaj tnida̱jʉ mʉt ja tsa̱a̱bótsy. Ko ja nʉʉ kyeemy, ja nʉgom txijty ja tʉjk amʉja̱a̱, net jyijty es tyʉgooy tʉgekyʉ tʉgekyʉ.
\c 7
\s Jesús dya''agʉda'aky tu'ugʉ solda̱a̱dʉ windsʉnʉ tyuumbʉ
\p
\v 1 Ko ja Jesús kyajxta̱a̱y ma̱ ja ja̱'a̱yʉty, net ñʉjxnʉ Kafarnaúm.
\v 2 Jap tu'ugʉ solda̱a̱dʉ windsʉ́n di'ibʉ myʉda̱jtypy tu'ugʉ tyuumbʉ di'ibʉ jyantsytsyejpy. Es yʉ'ʉ naty pʉjkʉp es tim oogánʉp.
\v 3 Ko ja solda̱a̱dʉ windsʉ́n tmʉdooy ko Jesús tʉ jyʉmbity, net tkejxy nija'ajʉty ja israelitʉ mʉjja̱'a̱ydyʉjk es ttúnʉt ja may'a̱jtʉn es myínʉt ja Jesús es dya''agʉda̱'a̱gʉt ja puma̱'a̱y.
\v 4 Yʉ'ʉjʉty tmʉwingoondʉ ja Jesús es tpʉjktsoodʉ may'a̱jtʉn:
\p —Tadʉ solda̱a̱dʉ windsʉ́n nitʉjkʉp es xypyudʉ́kʉt,
\v 5 ja'a ko yʉ'ʉ tsyejpy ja nnaxwiñʉdʉ'a̱jtʉm, es yʉ'ʉ oj dyajkojyʉty ja ndsa̱jptʉjk'a̱jtʉm.
\p
\v 6 Net ja Jesús ñejxy mʉt ja mʉjja̱'a̱ydyʉjk. Es ko wyingoonʉ ma̱ ja solda̱a̱dʉ windsʉnʉ tyʉjk, net tkejxy nija'adyʉ myʉtnaymyaayʉbʉ es t'anʉʉmʉt ja Jesús:
\p —Windsʉ́n, kyajts ʉj xyñitʉkʉ es mij mdʉ́kʉt ma̱dsʉ ndʉjkʉn.
\v 7 Pa̱a̱dyʉts kyaj ni je'eyʉ nganayjyáwʉty es nninʉjxʉt es n'amdówʉt ja may'a̱jtʉn. Je'eyʉ mjʉna̱'a̱nʉt es ja nduumbʉts 'yagʉda̱'a̱gʉt.
\v 8 Ʉj kʉ'ʉm nmʉda̱jtypyʉts ja nwindsʉ́n di'ibʉts xy'ana'amp, es nandʉ'ʉn nmʉdátyʉts ja solda̱a̱dʉty di'ibʉts n'ane'empy. Es kots n'anʉʉmʉ yʉ'ʉjʉty nidu'uk: “Nʉjx”, nʉjxp; es kots n'anʉʉmʉ jatu'uk: “Min”, miimp; es kots nduk'ane'emy yʉ nduumbʉts ti ttúnʉt, tyiimpy.
\p
\v 9 Es ko tmʉdooyʉ taadʉ Jesús, net dʉ'ʉñʉ wyʉ'ʉmʉ, es tni'ijxʉmbijty ja ja̱'a̱y di'ibʉ pamiinʉdʉp es t'anma̱a̱y:
\p —Tʉy'a̱jtʉn ko ni tu'ugʉ Israel ja̱'a̱y kyajts nba̱a̱ty di'ibʉts xymyʉbʉjkp éxtʉmʉ tya̱dʉ solda̱a̱dʉ windsʉ́n.
\p
\v 10 Es ko jya̱jttʉ jatʉgok ma̱ ja solda̱a̱dʉ windsʉnʉ tyʉjk, tʉ naty 'yagʉda'aky ja puma̱'a̱y.
\s Jesús dyajjikypyéky tu'ugʉ o'kpʉ jap Naín
\p
\v 11 Es óknʉm yʉ Jesús ñejxy ma̱ tu'ugʉ ka̱jpn di'ibʉ xyʉ'a̱jtypy Naín. Es jyamyʉdátʉdʉ ja 'yʉxpʉjkpʉ es ja mayjya'ay.
\v 12 Es ko jyajty ka̱jpnbʉ'a̱a̱y, net t'ijxy ko tmʉmíñ es dyajnaxtʉkʉya̱'a̱ndʉ tu'ugʉ o'kpʉ. Es ja o'kpʉ yʉ'ʉ ijty tukpajkyʉ ma̱a̱nk'a̱jtʉp yʉ tya̱a̱k di'ibʉ naty ku'eeky. Es mayjya'ay ja o'kpʉ tpanejxy.
\v 13 Ko t'ijxy ja Jesús, net tpa''ayooy ja ku'ekytyo'oxy es t'anma̱a̱y:
\p —Katʉ mjʉ'ʉy.
\p
\v 14 Net ja Jesús tmʉwingooñ es ttooñ ja o'kpʉ kʉ'ʉyʉn, es ja di'ibʉ naty kyiipy wya̱'k'a̱'a̱dʉ. Es ja Jesús t'anma̱a̱y ja o'kpʉ:
\p —Mexy, ʉjts mij n'anmaapy: ¡Pʉdʉ'ʉk!
\p
\v 15 Net di'ibʉ naty tʉ 'yeeky oj wya'tskujkʉ es kya̱jxe'ky, es ja Jesús ttukkʉdʉjkʉ ja tya̱a̱k.
\v 16 Es ko taadʉ t'ijxtʉ, nidʉgekyʉ tsyʉ'kʉdyaaydyʉ es t'awda̱jttʉ ja Dios es jyʉnandʉ:
\p —Tu'ugʉ Diosʉ myʉj kuga̱jxpʉ tʉ kyʉxe'eky ma̱ ʉdsa̱jtʉm.
\p Es nandʉ'ʉn ñayjyʉnánʉdʉ:
\p —Dios tʉ myiñ es tpudʉkʉya'añ ja kya̱jpn.
\p
\v 17 Net ja madya'aky jyʉdijty ma̱ Judeeʉ ñax es di'ibʉ myʉwingon'a̱jtypy.
\s Fwank Yajnʉbajtpʉ kyexyye'ebyʉty
\p
\v 18 Net ja Fwangʉ 'yʉxpʉjkpʉ tyukmʉmadyákʉdʉ tʉgekyʉ éxtʉm tʉ jyátyʉty. Net nimajtsk dyaxʉ yʉ'ʉjʉty,
\v 19 es tkejxy ma̱ ja Jesús es dyajtʉwa̱'a̱ñ:
\p —¿Ti mij mdʉy'a̱jtʉn ja Kristʉ di'ibʉ naty mina̱a̱mp, o n'awíxtʉpts ja wiinkpʉ?
\p
\v 20 Es di'ibʉ Fwank kyajx tmʉwingoondʉ ja Jesús es t'anma̱a̱ydyʉ:
\p —Ja Fwank Yajnʉbajtpʉts tʉ xykyexy esʉts mij nyajtʉ́wʉt pʉn mijtsʉ dʉ'ʉn ja Kristʉ di'ibʉ mina̱a̱mp, o pʉn n'awíxtʉpts ja wiinkpʉ.
\p
\v 21 Netyʉ ko jya̱jttʉ, ja Jesús dya''agʉdaky ja mayjya'ay di'ibʉ pʉjkʉdʉp es dyajpʉdsémy ja ka'oybyʉ di'ibʉ ja̱'a̱y myʉda̱jttʉp, es nandʉ'ʉn tmooy yʉ ijxʉn mayʉ wiindsʉty.
\v 22 Es ja Jesús t'anma̱a̱y ja Fwangʉ 'yʉxpʉjkpʉty:
\p —Di'ibʉ miits tʉ xy'ixtʉ es tʉ xymyʉdowdʉ, nʉjxtʉ es xytyukmʉmadya̱'a̱ktʉt ja Fwank ko yʉ wiints ijxp, yʉ ʉxneybyʉ ye'epy, di'ibʉ myʉda̱jtypy ja leprʉ pa̱'a̱m tʉ 'yagʉda'aky, yʉ natpʉ mʉdoop, di'ibʉ o'kp jikypyʉjkp es di'ibʉ ayoop ya''awánʉdʉp ja oybyʉ ayuk,
\v 23 es jotkujk yʉ'ʉ pʉ́n kyaj jyot dyajtʉgóy mʉt ʉjts.
\p
\v 24 Ko oj ñʉjxnʉ di'ibʉ Fwank kyajx, net ja Jesús tnimadyaky ja Fwank es t'anma̱a̱ydyʉ ja ja̱'a̱y:
\p —¿Ti dʉn miidsʉty oj xyñinʉjxtʉ es xy'ixa̱'a̱ndʉ ma̱ mʉj itʉn? ¿Tu'ugʉ tsa̱jkápyñ di'ibʉ wyinxijtypy ja poj?
\v 25 Es pʉn kyaj, ¿ti dʉn oj xyñinʉjxtʉ es xy'ixa̱'a̱ndʉ? ¿Tu'ugʉ yedyʉjk oy xyoxypyʉ? Miits mnija̱'a̱dʉp ko di'ibʉ dʉ'ʉn nayxyojxʉdʉp jam 'yittʉ ma̱ réyʉdyʉ tyʉjkʉty.
\v 26 ¿Per ti dʉn oj xyñinʉjxtʉ es xy'ixa̱'a̱ndʉ? ¿Tu'ugʉ Diosʉ kyuga̱jxpʉ? Yʉ'ʉ dʉ'ʉn. Yʉ'ʉ tu'uk di'ibʉ waanʉ ni'igʉ tmʉdaty ja mʉj'a̱jtʉn kʉdiinʉmʉ wiinkpʉty ja Diosʉ kyuga̱jxpʉ.
\v 27 Fwank yʉ'ʉ dʉ'ʉn di'ibʉ ja Diosʉ jyaaybyajtʉn myadyakypy ma̱ jyʉna'añ:
\q Ngejxypyʉts jawyiin ja n'ayuk ka̱jxwa̱'xpʉts
\q es mya''awátsxʉdʉt yʉ mnʉ'ʉ mdu'u.
\m
\v 28 Tʉy'a̱jtʉnʉts njʉna̱'a̱ñ: Kyaj pʉ́n nidu'ugʉ ja̱'a̱y di'ibʉ waanʉ ni'igʉ tmʉdaty ja mʉj'a̱jtʉn es kʉdiinʉm ja Fwank Yajnʉbajtpʉ. Per waanʉ tmʉdaty ja mʉj'a̱jtʉn oytyim di'ibʉty pʉ́nʉty ijttʉp ma̱ Diosʉ kyutujkʉn.
\p
\v 29 Ko ja yajkugʉbajtpʉty es ja nimayjya'ay tmʉdoodʉ ja Fwank, ta oj tkupʉktʉ di'ibʉ Dios tyiimpy, ja'agyʉjxm oj ñayyajnʉbajtʉdʉ mʉt ja Fwank.
\v 30 Per ja fariseeʉty es di'ibʉty tsa̱jptʉgóty ya'ʉxpʉjktʉp kyaj tkupʉjktʉ di'ibʉ Dios tyiimpy, ja'agyʉjxm kyaj tkupʉjktʉ es ja Fwank yajnʉbátʉdʉt.
\p
\v 31 Esʉ Jesús 'yakjʉnáñ:
\p —¿Tits mʉʉt mba̱a̱t n'ijxkijxyʉ ja ja̱'a̱yʉty di'ibáty tyam jyiky'a̱jttʉp, o wi'ix dya'íxyʉty ja wyinma̱'a̱ñ?
\v 32 Kʉxʉ'ktʉp éxtʉmʉ ʉna̱'ku'ungʉn di'ibʉ uñaaydyʉp es kyuyattʉ ma̱a̱yóty es ya̱'a̱x jyoktʉ mʉt ja myʉtkuya̱jtpʉty: “Tʉts njaxu'uxy di'ibʉ ya''ajtsp es kyaj tʉ m'atstʉ; es tʉ nja'ʉ́yʉts di'ibʉ mʉʉt ja o'kpʉ ñaxtʉkʉ, es kyaj tʉ mjʉ'ʉydyʉ.”
\p
\v 33 Es ja Jesús 'yakjʉnáñ:
\p —Dʉ'ʉnʉ tya̱a̱dʉ tyam di'ibʉ kyaj t'axá̱jʉdʉ ko 'yóyʉty di'ibʉ Dios tyiimpy. Mʉt ko kyaj ja Fwank Yajnʉbajtpʉ tkay ja tsa̱jkaaky es kyaj t'iiky ja vinʉ, es miits mjʉna̱'a̱ndʉ ko yʉ'ʉ myʉda̱jtypy ja ka'oybyʉ.
\v 34 Es ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, ngaabyʉts ja tsa̱jkaaky es n'i'kypyʉts ja vinʉ, es miits mjʉna̱'a̱ndʉ: “Kax es amʉ'uuk, es myʉtnaymyaayʉp ja pekyjya'ayʉty esʉ yajkugʉbajtpʉty.”
\v 35 Per di'ibʉ tʉ t'axá̱jʉdʉ yʉ oybyʉ ʉxpʉjkʉn di'ibʉ Dios jya'a'a̱jtypy, tadʉ ja̱'a̱y dya'íxʉdʉ ko 'yóyʉty di'ibʉ Dios tyiimpy.
\s Jesús ma̱ tu'ugʉ fariseeʉ tyʉjk
\p
\v 36 Es ko waanʉ 'yijty, net tu'ugʉ fariseeʉ wyoojʉ ja Jesús es nʉjx kyay. Es ja Jesús oj tpanejxy es ñaxwe'tsy ma̱ ja meesʉ.
\v 37 Tu'ugʉ pojpʉ toxytyʉjk di'ibʉ jiky'a̱jtp jap ka̱jpnóty, ko tnija̱'a̱jʉ ko tʉ Jesús ñejxy kaabyʉ ma̱ ja fariseeʉ Simongʉ tyʉjk, netʉ tadʉ toxytyʉjk dyajmiiñ tuk alabastrʉ limetʉ ujts mʉt ja pa̱'a̱k xu'kpʉ, es tyʉjkʉ es ñaygyoxtʉna̱a̱ydyákʉ Jesús tyeky'ʉjxy.
\v 38 Ta tyʉjkʉ jiibyʉ extʉ ko dyajxe'ky ja Jesusʉ tyeky, es dyajtʉ́tsy mʉt ja wyaay es ttsu'xʉ ja tyeky es tpʉjtáky ja pa̱'a̱k xu'kpʉ ma̱ Jesusʉ tyeky.
\v 39 Es ko t'ijxy tadʉ fariseeʉ pʉ́nʉ naty tʉ twoy yʉ Jesús, net jyʉnáñ wyinma̱'a̱ñóty: “Pʉn tʉy'a̱jtʉnʉ tya̱dʉ yedyʉjk yʉ'ʉ tu'ugʉ Diosʉ kyuga̱jxpʉ, myʉwinma̱'a̱ñbya̱a̱dʉp pʉ́n yʉ'ʉ toonʉp es wi'ixʉ tadʉ pojpʉ toxytyʉjk jyiky'aty.”
\p
\v 40 Net ja Jesús t'anma̱a̱yʉ tadʉ fariseeʉ:
\p —Simonk, tyámʉts mij nmʉga̱jxa̱'a̱ñ waanʉ.
\p Es ja fariseeʉ 'yadsooy:
\p —Ya'ʉxpʉjkpʉ, anmaagyʉts.
\p
\v 41 Esʉ Jesús jyʉnáñ:
\p —Majtskʉ yedyʉjk tmʉni'xy'áty mʉt ja meeñ. Tu'uk tmʉni'xyʉty mʉgoxk mʉgo'px denaryʉ meeñ, es jatu'uk justyikxymya̱jk.
\v 42 Ko kyaj mba̱a̱t myʉgʉbétyʉty, ja yajnu'xpʉ mya'x ja myʉni'xy nimajtsk. Es tyam anmaagyʉts, ¿pʉ́n ni'igʉ tsyejpy yʉ yajnu'xpʉ?
\p
\v 43 Es ja Simonk 'yadsooy:
\p —Pes ʉj njʉna̱'a̱ñʉts ko yʉ'ʉ di'ibʉ mya'x ja myʉni'xy kajaa.
\p Net ja Jesús 'yanma̱a̱yʉ:
\p —Mmʉda̱jtypy ja tʉy'a̱jtʉn.
\p
\v 44 Net ja Jesús twin'ijxpejty ja toxytyʉjk es t'anma̱a̱y ja Simonk:
\p —¿M'ijxypyʉ tya̱dʉ toxytyʉjk? Kots ʉj ndʉjkʉ ma̱ mdʉjk, kyajts mijʉ nʉʉ tʉ xymyo'oy es ʉjʉ ndékyʉts nbújʉt, esʉ tya̱dʉ toxytyʉjk tʉts yʉ ndeky tpujy mʉt yʉ wyinnʉʉ es dyajtʉ'ʉtsy mʉt ja wyaay.
\v 45 Mij kyajts tʉ xytsyi'xy, es yʉ'ʉ ko tʉ tyʉkʉ es tyamba̱a̱t ttsi'xy ja ndékyʉts.
\v 46 Mij kyajts tʉ xypyʉjtákʉ ma̱dsʉ ngʉba̱jk ja aseytʉ oliivʉ éxtʉm jaayʉ ja̱'a̱y ttundʉ, esʉ tadʉ toxytyʉjk tʉ tpʉjta'aky yʉ pa̱'a̱k xu'kpʉ ma̱dsʉ ndeky.
\v 47 Pa̱a̱ty tʉy'a̱jtʉn n'anʉʉmʉ, tya̱dʉ toxytyʉjk tʉts nma'xʉ yʉ myʉjpéky, ja'a ko yʉ'ʉ dya'íxyʉty kots xytsyeky mʉj. Ja'a ko yʉ ja̱'a̱y di'ibʉ jʉna̱a̱mp ko kyajʉ pyeky es ʉjts nma'xʉp, tadʉ ja̱'a̱y xytyuk'ijxpʉts ko je'eyʉ waanʉ xytsyékyʉts.
\p
\v 48 Net ja Jesús t'anma̱a̱y ja toxytyʉjk:
\p —Yʉ mbojpʉ tʉ yajma'xta̱'a̱y.
\p
\v 49 Net jyotjʉnandʉ di'ibáty tʉ yajwówdʉ ma̱ meesʉ mʉt ja Jesús:
\p —¿Pʉ́n ja̱'a̱yʉ tya̱a̱dʉ?, ko extʉ pojpʉ mye'xypy.
\p
\v 50 Es ja Jesús t'anma̱a̱y ja toxytyʉjk:
\p —Tʉts xymyʉbeky, es pa̱a̱dyʉts mij tʉ nyajnitse'eky. Nʉjx jotkujk.
\c 8
\s Toxytyʉjkʉty di'ibʉ pyudʉjkʉdʉp ja Jesús
\p
\v 1 Oknʉm ja Jesús jyʉdijty ka̱jpnga̱jpn es tka̱jxwa'xy ja oybyʉ ayuk di'ibʉ ñigajxypy ja Diosʉ kyutujkʉn. Es nima̱jmajtskʉ 'yʉxpʉjkpʉ jyamyʉdátyʉty.
\v 2 Es nandʉ'ʉn jyamyʉda̱jtʉdʉ nija'ajʉty ja toxytyʉjk di'ibʉ naty ja Jesús tʉ dya''agʉda'aky es nija'ajʉty di'ibʉ tʉ ttukmastu'uty ja ka'oybyʉ. Es nidu'uk yʉ'ʉjʉty txʉ'aty Mariiʉ Magdalenʉ, di'ibʉ Jesús tyukmastut jʉxtujk ja ka'óybyʉty,
\v 3 es jatu'uk txʉ'aty Fwanʉ, ñʉdo'oxy ja Kuzʉ, Eroodʉsʉ tyuumbʉ wyindsʉ́n, es jatu'uk txʉ'aty Susanʉ, es may ja wiinkpʉ toxytyʉjk di'ibʉ mʉʉt jyʉdijty ja Jesús es ja 'yʉxpʉjkpʉty es pyudʉ́kʉty.
\s Triigʉwʉjpʉ éxtʉmʉ ijxpajtʉn
\p
\v 4 Mayjya'ay tsyo'ondʉ ma̱ tʉgekyʉ ka̱jpn es tnimiiñ ja Jesús. Es ko myaymyijky ja ja̱'a̱y, net ja Jesús tpʉjtáky tu'ugʉ ijxpajtʉn es jyʉnáñ:
\p
\v 5 —Tu'ugʉ triigʉwʉjpʉ 'yojtsy wʉjpʉ. Es ma̱ oj twʉjy, oj nandʉ'ʉn kya'ay ja tyʉʉmt ma̱ padu'u, es ja ja̱'a̱y ttukta'andʉ, es ja joon tpiidʉ nandʉ'ʉn.
\v 6 Es nandʉ'ʉn kya'ay ja tyʉʉmt tsa̱a̱de'ekykyʉjxm ma̱ kyaj kyʉ́kʉty ja nax. Pa̱a̱ty ko tadʉ triigʉ myujxy, net tyʉtsy, ja'a ko tim waanʉ nik'a̱jtʉn.
\v 7 Es nandʉ'ʉn ja tʉʉmt kya'ay apyñoty. Ja triigʉ tʉʉmt myujxy ma̱ apyñ. Ta yajtʉ́tsʉ.
\v 8 Es di'ibʉ ja tʉʉmt ka̱'a̱ ma̱ oybyʉ nax, yooñ yajxón, es tyʉʉmp'a̱jty mʉgo'px ok di'ibʉ wyʉj.
\p Es ko dʉ'ʉn jyʉnáñ ja Jesús, net jantsy mʉk t'anma̱a̱y:
\p —Di'ibʉ mʉdoodʉp, wa'an tjaygyúkʉdʉ.
\s Ti ko ja Jesús ya'ʉxpeky mʉdʉ ijxpajtʉn
\p
\v 9 Net ja Jesusʉ 'yʉxpʉjkpʉty yajtʉʉjʉdʉ wi'ix dyajjʉna̱'a̱ñ mʉt ja 'yijxpajtʉn.
\v 10 Es ja Jesús jyʉnáñ:
\p —Dios yʉ'ʉ mduknijáwʉdʉp miidsʉty di'ibʉ kyaj yajnijáwʉ ijty wi'ix yʉ'ʉ yajkutíky. Per ʉjts n'awa̱'a̱nʉp ja wiingátypyʉ ja̱'a̱y mʉt ja ijxpajtʉn mʉt ko yʉ'ʉjʉty t'íxtʉt es kyaj tnijáwʉdʉt, es ko yʉ'ʉ tmʉdówdʉt es kyaj tjaygyúkʉdʉt.
\s Jesús tka̱jxte'xy ja triigʉwʉjpʉ éxtʉmʉ ijxpajtʉn
\p
\v 11 ’Tya̱a̱dʉ 'yandijpy yʉ ijxpajtʉn: Yʉ tʉʉmt yʉ'ʉ 'yandijpy ja Diosʉ 'yayuk.
\v 12 Es di'ibʉ ka̱'a̱ ja tʉʉmt ma̱ padu'ujʉn, yʉ'ʉ 'yandijpy yʉ ja̱'a̱yʉty di'ibʉ myʉdoodʉp ja Diosʉ 'yayuk, es net myiiñ yʉ mʉjku'ugópk es pyʉjkxʉ ja Diosʉ 'yayuk ma̱ jyot wyinma̱'a̱ñ es kʉdiibʉ tmʉbʉ́ktʉt es dʉ'ʉn kyaj yajnitso'ogʉdʉt.
\v 13 Esʉ tʉʉmt di'ibʉ ka̱'a̱ tsa̱a̱de'ekykyʉjxy, yʉ'ʉ 'yandijpy ja ja̱'a̱yʉty di'ibʉ myʉdoodʉp ja Diosʉ 'yayuk es tmʉbʉktʉ mʉt ja xondakʉn. Per ko dʉ'ʉn 'yittʉ éxtʉm ja triigʉ di'ibʉ 'ya̱a̱ts kyaj kyʉktʉkʉ, mʉbʉjktʉp tuk tiempʉ, per ko myiñ ja ayo'on, kyaj tnakymyʉbʉktʉ.
\v 14 Es di'ibʉ ka̱'a̱ ja tʉʉmt ma̱ ja apyñ, yʉ'ʉ 'yandijpy yʉ ja̱'a̱yʉty di'ibʉ myʉdoodʉ, per ja'a ko tpʉjta'aky ja wyinma̱'a̱ñ wi'ix myʉkja̱'a̱y'áttʉt es xyi'ik xyónʉt, pa̱a̱ty tmastu'uttʉ di'ibʉ myʉdoodʉ es kyaj ttundʉ di'ibʉ Dios tsyejpy. Pa̱a̱ty dʉ'ʉn yʉ'ʉjʉty éxtʉm di'ibʉ tʉʉmt tʉ jyi'xy es kyaj tʉ ñakywyindʉy.
\p
\v 15 ’Es di'ibʉ ka̱'a̱ ja tʉʉmt ma̱ oyñax, yʉ'ʉ 'yandijpy ja ja̱'a̱yʉty di'ibʉ 'yaxá̱jʉdʉ mʉt tʉgekyʉ jyot, tmʉdowdʉ es ttundʉ es tpanʉjxtʉ Diosʉ 'yayuk. Es dʉ'ʉn yajxón wyindʉ́wʉt ja pyʉjta'aky.
\s Lamprʉ éxtʉmʉ ijxpajtʉn
\p
\v 16 ’Ni pʉ́n yʉ lyamprʉ tkayajtoye'eky es netyʉ tkujiitsy mʉt ja tu'ts o tpʉjta'aky mabajnbatkʉ'p. Jam ja ja̱'a̱y tpʉjta'aky kʉjxm es yajxón jyá̱jʉt tʉgoty, es ko pʉ́n tyʉ́kʉt, wa̱'a̱ts 'yíxʉt.
\v 17 Es ni tii di'ibʉ ijtp ayu'udsyʉ es óknʉm kyawʉ'ʉmʉt ijxnide'xy, es kyaj jyaadyʉ ayu'udsyʉbʉ di'ibʉ kyaj yajnijáwʉt.
\v 18 Pa̱a̱ty mʉdowdʉ yajxón. Di'ibʉ 'yaxá̱jʉdʉp ja tʉy'a̱jtʉn, Dios yákʉp ni'igʉ winma̱'a̱ñ esʉ jaygyujkʉn, per ja ja̱'a̱yʉty di'ibʉ myʉdoodʉ ja Diosʉ 'yayuk es kyaj tkuydyundʉ, Dios pʉjkʉdʉp ja wyinma̱'a̱ñ es ja jyaygyujkʉn di'ibʉ yʉ'ʉjʉty myʉda̱jttʉp.
\s Jesusʉ tya̱a̱k esʉ myʉga'axʉty
\p
\v 19 Ja Jesusʉ tya̱a̱k es ja myʉga'axʉty jya̱jttʉ es kyaj mba̱a̱t twinguwa̱'a̱gʉdʉ yʉ'ʉ, ja'a ko mayjya'ayʉ naty.
\v 20 Es ja ja̱'a̱yʉty oj 'yawánʉdʉ:
\p —Tʉ mda̱a̱k jya'ty mʉt ja m'útsyʉty tap tʉja̱'p, es yʉ'ʉ m'ixánʉdʉp.
\p
\v 21 Es ja Jesús 'yadsooy:
\p —Nidʉgekyʉ di'ibʉ Dios ja 'yayuk myʉdeepy es pyadiimpy, yʉ'ʉ dʉ'ʉn n'axá̱jʉpts éxtʉmdsʉ nda̱a̱gʉn es éxtʉmdsʉ nmʉga'axʉn.
\s Jesús dyajmo'oty ja poj es dyajtʉmijtkʉ ja mejyñ
\p
\v 22 Tu'ugʉ xʉʉ ja Jesús tyʉjkʉdʉ mʉt ja 'yʉxpʉjkpʉ ma̱ ja barkʉ, es 'yanma̱a̱yʉdʉ:
\p —Jo'om jam mejyñ ñinaxy.
\p Es ñʉjxtʉ.
\v 23 Es ko naty ñʉjxtʉ kujk'ám, Jesús oj myana̱jxnʉ. Es net ti'in myiiñ ja mʉk poj es dya'ujtsta̱'a̱ya'añ ja barkʉ mʉt ja nʉʉ es kyínʉt.
\v 24 Net ja ʉxpʉjkpʉtʉjk dyujxtʉ ja Jesús es t'anma̱a̱ydyʉ:
\p —¡Windsʉ́n, Windsʉ́n! ¡Tyam ngupa'tsta̱'a̱yʉnʉ!
\p Net ja Jesús pyʉde'ky es ja poj es ja mejyñ tmʉgajxy. Ta oj wyʉ'ʉmʉdya'ay amoñʉ es tʉmijtkʉ.
\v 25 Net ja Jesús t'anma̱a̱y ja 'yʉxpʉjkpʉty:
\p —¿Ti tʉ jyátyʉty ja mmʉbʉjkʉn?
\p Es yʉ'ʉjʉty dʉ'ʉñʉ wyʉ'ʉmʉdyaaydyʉ es ñay'adsʉ'kʉdʉ es ñayyajtʉʉjʉdʉ nidu'uk nidu'uk:
\p —¿Pʉ́nʉ dʉ'ʉnʉ tya̱dʉ ja̱'a̱y?, ko yʉ'ʉ t'ane'emy ja poj es ja mejyñ, es myʉmʉdóyʉty.
\s Gadarʉ ja̱'a̱y di'ibʉ myʉda̱jtypy ja ka'óybyʉty
\p
\v 26 Net jya̱jttʉ mejyñbyʉ'a̱jp ma̱ Gadarʉ ñax, di'ibʉ ijtp Galileeʉ wyinduuy.
\v 27 Ko Jesús pyʉdseemy ma̱ ja barkʉ, net ñimiinʉ tu'ugʉ ja̱'a̱y di'ibʉ ka'oybyʉ myʉda̱jtypy es jékyʉp kya'oktsʉna̱a̱yñʉ tʉgoty. Jam tsʉna̱a̱y ma̱ o'kpʉ jutʉn es jyiky'aty niwa̱'a̱ts ʉxwa̱'a̱ts.
\v 28 Es ko t'ijxy ja Jesús, net ñaygyoxtʉna̱a̱ydyákʉ wyindum es yaxkeky:
\p —¿Ti mdunaampy mʉt ʉjts?, mij Jesús, Dios Tsa̱jpótmʉdʉ 'yU'unk. Tunʉ may'a̱jtʉn, kátʉts xy'adsipy.
\p
\v 29 Dʉ'ʉn jyʉnáñ ja'a ko Jesús tʉ kyéxyʉty es pyʉdsʉ́mʉt ja ka'oybyʉ ma̱ tadʉ yedyʉjk. Kana̱k ok yʉ ka'oybyʉ tʉ tyuktʉ́kʉty, es ja ja̱'a̱yʉty kyuwʉʉnʉdʉ ma̱ kyʉ'ʉ es ja tyeky mʉt ja kadenʉ. Es yʉ ka'oybyʉ yʉ'ʉ tukpojtʉp ja kadenʉ es myʉnejxyʉty ma̱ mʉj itʉn.
\v 30 Es ja Jesús dyajtʉʉy:
\p —¿Ti mxʉ'a̱jtypy?
\p Es yʉ'ʉ 'yadsoojʉ:
\p —Ʉjts nxʉ'a̱jtypy Lejyonk\f 8:30 Ix Markʉs 5:9. \f*.
\p Dʉ'ʉn 'yadsoojʉ, ja'a ko may ja ka'oybyʉ tʉ tyʉkʉ ma̱ yʉ'ʉ.
\v 31 Es yʉ tadʉ mʉjku'u ya''amdooy ja Jesús es kyaj dyajnʉjxʉt ma̱ ayoodákn.
\v 32 Es jap wingón 'yijty yʉ ʉdsʉm may es jye'xy ma̱ ja kopk wiin. Es ja ka'oybyʉ tpʉjktsooy ja may'a̱jtʉn ma̱ Jesús es dyaky ja kutujkʉn es tyʉ́kʉdʉt ma̱ ʉdsʉmʉn. Net ja Jesús tmooy ja kutujkʉn.
\v 33 Ja ka'oybyʉ pyʉdsʉʉmdʉ ma̱ ja ja̱'a̱yʉn es tyʉjkʉdʉ ma̱ ʉdsʉmʉn. Netʉ tadʉ ʉdsʉm ñʉjxtʉ jantsy pʉye'egyʉ nax jʉjp'ám. Ta kyupʉyʉ'kna̱jxtʉ mejyñóty, es jap jyi'xta̱a̱ydyʉ.
\p
\v 34 Es di'ibʉ kywentʉ'a̱jttʉp ja may ʉdsʉm, ko t'ijxtʉ ti tʉ jyátyʉty, net oj pyʉyʉ'ktsoondʉ mʉt ja tsʉ'ʉgʉ es oj tmadya̱'a̱ktʉ ma̱ ja ka̱jpn es ma̱ ja̱'a̱yʉty di'ibʉ kamoty.
\v 35 Es ja ja̱'a̱yʉty tsyo'ondʉ es t'ixa̱'a̱ndʉ di'ibʉ tʉ jyátyʉty. Es ko jya̱jttʉ ma̱ ja Jesús, net tpattʉ jam ja yedyʉjk di'ibʉ tʉ ñiwa̱'a̱dsyʉty ja ka'oybyʉ, es 'yu'uñʉ Jesús wyinduuy yajxón es wijy kejy es witxʉ. Es tsyʉ'kʉdyaaydyʉ ja ja̱'a̱yʉty.
\v 36 Es di'ibʉ naty tʉ t'ixtʉ, net tmadyaktʉ wi'ix tʉ ñiwa̱'a̱dsyʉdyʉ tadʉ yedyʉjk di'ibʉ naty myʉda̱jtypy ja ka'oybyʉ.
\v 37 Es mʉdʉ tya̱a̱dʉ nidʉgekyʉ ja̱'a̱y ma̱ Gadarʉ ka̱jpn tmʉnu'xtáktʉ ja Jesús es tsyo'onnʉt jap, ja'a ko yʉ'ʉjʉty tsyʉ'kʉdʉ mʉk. Net ja Jesús tyʉjkʉ ma̱ ja barkʉ es ñʉjxnʉ.
\v 38 Ja yedyʉjk di'ibʉ tʉ myastu'udyʉty ja ka'oybyʉ, net tmʉnu'xtáky ja Jesús es ñʉjxʉt mʉt yʉ'ʉ. Per ja Jesús tyuknipʉjkʉ es wyʉ'ʉmʉt, es 'yanma̱a̱yʉ:
\p
\v 39 —Jʉmbit. Nʉjx ma̱ mdʉjk es xymyadya̱'a̱gʉt tʉgekyʉ di'ibʉ Dios tʉ ttuñ mʉt mijts.
\p Es ja yedyʉjk ñʉjxnʉ es tmadyaky ma̱ tʉgekyʉ ka̱jpn éxtʉm ja Jesús ttuuñ mʉt yʉ'ʉ.
\s Jayrʉ ñʉʉx es ja toxytyʉjk di'ibʉ Jesusʉ wyit tyoon
\p
\v 40 Ko Jesús jyajty ma̱ jatu'ugʉ mejyñbya̱'a̱, net ja ja̱'a̱yʉty oj jyʉjp'yo'oyʉdʉ mʉt ja xondakʉn, ja'a ko nidʉgekyʉ ja̱'a̱yʉty 'yawixtʉ naty.
\v 41 Net myiiñ tu'ugʉ yedyʉjk di'ibʉ xyʉ'a̱jtypy Jayrʉ, di'ibʉ ijtp windsʉ́n ma̱ ja tsa̱jptʉjk. Tadʉ yedyʉjk ñaygyoxtʉna̱a̱ydyákʉ Jesús tyeky'ʉjxy es tmʉnu'xtáky es ñʉjxʉt ma̱ ja tyʉjk,
\v 42 ja'a ko tmʉdaty tu'uk je'eyʉ ñʉʉx di'ibʉ ma̱jmajtsk jʉmʉjt, es tamʉ naty tyim'oogánnʉ. Es ko Jesús oj ñejxy, net mʉʉt ñʉjxtʉ mayjya'ay es jantsy adijmíky.
\p
\v 43 Es ma̱ tadʉ mayjya'ay jap tu'ugʉ toxytyʉjk di'ibʉ myʉda̱jtypy ja windaxyʉ pa̱'a̱m es tʉ 'yayoyʉ naty ma̱jmajtsk jʉmʉjt, es tʉ yajmeeñdyúñ ma̱ kudsooyʉn tʉgekyʉ di'ibʉ naty myʉda̱jtypy, es ni pʉ́n kyaya''agʉdakʉ.
\v 44 Es yʉ'ʉ ñiwingoon ʉxkʉ'p tsoo ja Jesús es ñaydyukpatʉ ja wyit, es netyʉ 'yagʉdaky.
\p
\v 45 Net ja Jesús dyajtʉʉy:
\p —¿Pʉ́nʉts tʉ xytyoñ?
\p Es nidʉgekyʉ 'yanma̱a̱yʉdʉ:
\p —Kyaj 'yʉjtsʉty.
\p Net ja Peedrʉ jyʉnáñ:
\p —M'ijxypy ko mayjya'ay m'adijmíkyʉty, es xyajtʉ́y pʉ́n tʉ mdóñʉty.
\p
\v 46 Net ja Jesús jyʉnáñ:
\p —Tʉts xytyondʉ ja̱'a̱y nidu'uk. Nnija̱'a̱bʉts, ja'a ko yʉ nmʉk'a̱jtʉnʉts tʉ ya''agʉda'agyʉty.
\p
\v 47 Es ko ja toxytyʉjk tnija̱'a̱jʉ ko Jesús ñija̱'a̱p, net myiiñ tsʉyiipy es ñaygyoxtʉna̱a̱ydyákʉ Jesús wyinduuy es t'awa̱'a̱nʉ mayjya'ay wyinduuy ti ko oj ttoñ, es netyʉ 'yagʉdaky.
\v 48 Net ja Jesús 'yanma̱a̱yʉ:
\p —Tʉ m'agʉda'aky mʉt ko tʉ xymyʉbeky. Tyam nʉjxʉ net jotkujk.
\p
\v 49 Támnʉmʉ naty 'yakkajxy ja Jesús ko jyajty nidu'ugʉ ja̱'a̱y di'ibʉ tso'omp ma̱ tyʉjkʉ Jayrʉ di'ibʉ ijtp windsʉ́n ma̱ ja tsa̱jptʉjk, es ya''anma̱a̱y ja Jayrʉ:
\p —Tʉ m'u'unk 'yo'knʉ. Kʉdii xyñakyñe'emy yʉ Windsʉ́n.
\p
\v 50 Es ko ja Jesús tmʉdooy, net t'anma̱a̱y ja Jayrʉ:
\p —Katʉ mjotmay'eeky. Mʉbʉjkʉts je'eyʉ esʉ m'u'unk tsyo'ogʉt.
\p
\v 51 Es ko jya̱jttʉ ma̱ ja Jayrʉ tyʉjk, ni pʉ́n tkayajtʉjkʉ ja Jesús, yʉ'ʉyʉ Peedrʉ es ja Fwank es yʉ Santya̱'a̱gʉ es ja tya̱a̱k tyeety ja kixyu'unk o'kpʉ.
\v 52 Es nidʉgekyʉ ja̱'a̱yʉty jyantsyjyʉ'ʉy jyantsyya̱'a̱xtʉ mʉt ko ja kixyu'unk tʉ 'yeeky. Es ja Jesús jyʉnáñ:
\p —Katʉ mnakyjyʉ'ʉydyʉ. Yʉ kixyu'unk kyaj tʉ 'yeeky. Ma̱a̱p jap.
\p
\v 53 Es ja ja̱'a̱yʉty je'eyʉ ttukxiky ja Jesús, ja'a ko ñija̱'a̱dʉp ko tʉ 'yeeky.
\v 54 Net ja Jesús tkʉ'ʉmʉma̱jtsʉ ja o'kpʉ es t'anma̱a̱y mʉk:
\p —Kixyu'unk, pʉdʉ'ʉk.
\p
\v 55 Es ja kixyu'unk jyikypyejky jatʉgok es netyʉ pyʉde'ky. Es ja Jesús jyʉnáñ es yajmo'oyʉt ja kyaaky.
\v 56 Es ja tya̱a̱k tyeety dʉ'ʉñʉ wyʉ'ʉmʉdyaaydyʉ. Per ja Jesús tyuknipʉjkʉ es kʉdiibʉ pʉ́n t'awánʉt éxtʉm tʉ jyaty.
\c 9
\s Jesús tkexy ja 'yʉxpʉjkpʉtʉjk es tka̱jxwa̱'xtʉt ja Diosʉ 'yayuk
\p
\v 1 Ta ja Jesús dyajnaymyujkʉ nima̱jmajtskʉ 'yapóstʉlʉty, es tmooy ja mʉk'a̱jtʉn es yʉ kutujkʉn es dyajjʉga'agʉt nidʉgekyʉ ka'oybyʉ di'ibʉ ja̱'a̱y myʉda̱jtypy es dya''agʉda̱'a̱gʉt di'ibʉ pʉjkʉdʉp.
\v 2 Es tkejxy es tka̱jxwa̱'xʉt wi'ix ja Diosʉ kyutujkʉn. Es nandʉ'ʉn tkejxy es dya''agʉda̱'a̱gʉt yʉ puma̱'a̱yʉty.
\v 3 Es ja Jesús jyʉnáñ:
\p —Ni ti xykyayajnʉjxtʉt di'ibʉ mnidu'uyo'oydyʉp. Ni mda̱jk, ni mmorral, ni mga̱a̱yña̱jxʉk es kyajpʉ mmeeñ xymyʉnʉjxtʉt. Es yʉ'ʉyʉ mwit mmʉnʉjxtʉp di'ibʉ mnikʉjxy es kyaj wiinkpʉ ja tukni'x xymyʉnʉjxtʉt.
\v 4 Ko mja̱jtta̱'a̱gʉt ma̱ tu'ugʉ tʉjk, kyaj mdsoonʉt es mnʉjxʉt wiink tsoo, wʉ'ʉmdʉ extʉ ko mnʉjxʉt ma̱ wiinkpʉ ka̱jpn.
\v 5 Es ma̱ kyajpʉ ja̱'a̱y myajja̱jtta'agyʉty, net mdsoondʉt ma̱ tadʉ ka̱jpn es xywyinxíttʉt ja naxjok ma̱ ja mgʉ'ʉk éxtʉmʉ ijxwʉ'ʉmʉn ko dʉ'ʉn wyʉ'ʉmdʉ pojpʉ mʉʉt.
\p
\v 6 Ko Jesús kya̱jxta̱a̱y, net tsyo'ondʉ yʉ'ʉjʉty es ñʉjxtʉ ka̱jpnga̱jpn es tka̱jxwa'xy ja oybyʉ ayuk éxtʉm ja Jesús tʉ jyʉna'añ, es dya''agʉda̱'a̱ktʉ ja puma̱'a̱y nidʉgekyʉ ma̱jatyʉ ka̱jpn.
\s Fwank Yajnʉbajtpʉ 'yeeky
\p
\v 7 Es ja gobernadoor Eroodʉs tmʉdooy tijaty ja Jesús tyiimpy, es kyaj tnijawʉ wi'ix dya'ítʉt, ja'a ko jamʉ ja̱'a̱y jyʉna̱'a̱ndʉ ko yʉ'ʉ Fwank Yajnʉbajtpʉ ko tʉ jyikypyeky.
\v 8 Es nija'ajʉty jyʉna̱'a̱ndʉ ko yʉ'ʉ Eliiʉs ja Diosʉ kyuga̱jxpʉ, ko tʉ kyʉxe'eky jatʉgok. Esʉ wiinkpʉ jyʉna'añ:
\p —Ja'a tu'ugʉ Diosʉ kyuga̱jxpʉ di'ibʉ jékyʉp, ko tʉ jyikypyeky jatʉgok.
\p
\v 9 Per ja Eroodʉs jyʉnáñ:
\p —Ʉjts oj nni'ana'amʉ es yajnibúxʉdʉ tadʉ Fwangʉ kyʉba̱jk, ¿es pʉ́nʉ tadʉ di'ibʉ tyiimpy tʉgekyʉ di'ibʉts ʉj tyam nmʉdeepy?
\p Es ja Eroodʉs jyottʉgooy wi'ix t'íxʉt.
\s Jesús dyajkáy nimʉgoxk mil naxy ja ja̱'a̱y
\p
\v 10 Ko jyʉmbijttʉ ja apóstʉlʉty, net ttukmʉmadyaktʉ ja Jesús di'ibáty tʉ ttundʉ. Es net ja Jesús yajnʉjxʉdʉ ma̱ tu'ugʉ it di'ibʉ myʉwingon'a̱jtypy ja Betsaydʉ.
\v 11 Es ko ja mayjya'ay tnija̱'a̱dʉ, net tpanʉjxtʉ. Es ja Jesús 'yaxá̱jʉdʉ es tmʉga̱jxtʉ wi'ix ja Diosʉ kyutujkʉn es dya''agʉdaky ja puma̱'a̱ydyʉjk.
\p
\v 12 Es ko tsyu'ujʉnʉ, ta ñimiinʉ nima̱jmajtskʉ 'yʉxpʉjkpʉty es 'yanma̱a̱yʉdʉ Jesús:
\p —Nayjyʉga̱jxʉdʉ mʉʉt ja ja̱'a̱yʉty es ñʉjxnʉt po'xpʉ es t'ʉxta̱'a̱yʉt yʉ kyaaky ma̱jatyʉ tʉjk es jap ka̱jpnóty di'ibáty wingónʉty, ja'a ko ya̱a̱ ma̱ n'ijtʉm kyaj tii.
\p
\v 13 Es ja Jesús jyʉnáñ:
\p —Mo'oydyʉ miidsʉty ja kyaaky.
\p Es yʉ'ʉjʉty jyʉnandʉ:
\p —Kyajts ti nmʉdaty, je'eyʉ mʉgoxkʉ tsa̱jkaaky es majtskʉ a̱jkx. ¿O mdsejpy es ʉʉdsʉty nʉjx njúydyʉts di'ibʉ jyʉ'xtʉbʉ tya̱dʉ mayjya'ay?
\p
\v 14 Ja'a ja̱'a̱yʉty nimʉgoxk mil. Es ja Jesús t'anma̱a̱ydyʉ ja 'yʉxpʉjkpʉtʉjk:
\p —Yajnaxwaatstʉ ja̱'a̱yʉty nijustyikxymya̱jkátyʉty.
\p
\v 15 Es dʉ'ʉn ttuundʉ es ñaxwa'tsta̱a̱ydyʉ nidʉgekyʉ.
\v 16 Net ja Jesús t'axa̱jʉ tadʉ mʉgoxkʉ tsa̱jkaaky es majtskʉ a̱jkx, es pyat'ijxy tsa̱jwínm es tkuni'xy es ttujkwa'xy es tmooydyʉ ja 'yʉxpʉjkpʉtʉjk es dyajwa̱'xʉt ma̱ ja ja̱'a̱yʉty.
\v 17 Nidʉgekyʉ kyaaydyaaydyʉ jotkʉda'aky, es ñadʉjkʉ ma̱jmajtsk katsy ja ka̱ydyuk.
\s Peedrʉ tnigajxy ko Jesús ja'a ja Kristʉ
\p
\v 18 Es ma̱ tu'ugʉ xʉʉ ja Jesús kya̱jxtáky anaydyu'uk mʉt ak yʉ'ʉdyʉ 'yʉxpʉjkpʉ. Esʉ Jesús yajtʉʉjʉdʉ:
\p —¿Wi'ix ja ja̱'a̱yʉty jyʉna'añ ko pʉ́nʉts ʉj?
\p
\v 19 Es ja 'yʉxpʉjkpʉtʉjk 'yadsoodʉ:
\p —Nija'ajʉty jyʉna̱'a̱ndʉ ko mijts Fwank Yajnʉbajtpʉ, es wiinkpʉ jʉnándʉp ko mijts Eliiʉs, es wiinkpʉ 'yaktimjʉna̱'a̱ndʉ ko mijtsʉ dʉ'ʉn tu'ugʉ Diosʉ kyuga̱jxpʉ jékyʉbʉ di'ibʉ tʉ jyikypyeky.
\p
\v 20 Net ja Jesús dyajtʉʉy:
\p —Es miidsʉty, ¿wi'ix mjʉna̱'a̱ndʉ pʉ́nʉts ʉj?
\p Es ja Peedrʉ jyʉnáñ:
\p —Mijtsʉ dʉ'ʉn ja Kristʉ di'ibʉ Dios wyin'ijx es tkejxy.
\s Jesús tnigajxy ja 'yo'kʉn
\p
\v 21 Es ja Jesús tyuknipʉjk mʉkta'aky es kʉdiibʉ pʉ́n t'awánʉt.
\v 22 Es 'yak'anma̱a̱yʉ:
\p —Tʉy'a̱jtʉn ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, n'ayowa̱'a̱ñʉts mʉk es ʉj xy'ʉxtija̱'a̱ndʉts ja mʉjja̱'a̱ydyʉjkʉty esʉ teedywyindsʉ́nʉty es ja di'ibʉ tsa̱jptʉgóty ya'ʉxpʉjktʉp, esʉ ja̱'a̱yʉts xya'oogʉt es tʉgʉkxʉbajtp jatʉgok njikypyʉ́kʉdʉts.
\p
\v 23 Oknʉm t'anma̱a̱y nidʉgekyʉ ja̱'a̱yʉty:
\p —Pʉn jaats pʉ́n xypyanʉjxa̱'a̱ñ, tsojkʉp es tmastu'udʉt ja kyʉ'ʉm winma̱'a̱ñ es bom bom jyiky'átʉt éxtʉm tu'ugʉ ja̱'a̱y di'ibʉ kyruuz pyagiipy ko 'yo'kʉn tninejxy, esʉts xypyatsoonʉt.
\v 24 Ja'a ko di'ibʉ tsyejpy es jyiky'átʉt éxtʉmʉ kyʉ'ʉm winma̱'a̱ñ o ja kyʉ'ʉmdsojkʉn, dʉ'ʉmbʉ ja̱'a̱y nayyajtʉgóyʉdʉp mʉt ja jyiky'a̱jtʉn. Es pʉ́n tsyejpy es jyiky'átʉt éxtʉmts ʉj ndukni''ixʉ, dʉ'ʉmbʉ ja̱'a̱y kyaj ñayyajtʉgóyʉdʉt mʉt ja jyiky'a̱jtʉn.
\v 25 ¿Es ti tyimpatypy oytyim di'ibʉ ja̱'a̱yʉty oy tjaniwindsʉn'a̱jtpʉ tʉgekyʉ naxwíñʉdʉ, pʉn nayyajtʉgooyʉp kʉ'ʉm mʉt ja jyiky'a̱jtʉn ma̱ ja Dios?
\v 26 Pʉn pʉ́nʉts xytyuktsoydyuump es ttuktsoydyúñ ja n'ayúkʉts ya̱ naxwiiñ pojpʉ ja̱'a̱y wyinduuy, ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, nan nduktsoydyúnʉpts kots nmínʉt jatʉgok mʉdʉ myʉj'a̱jtʉnʉ nDeedyʉts esʉ nDeedyʉts ja 'yánklʉsʉdyʉ myʉj'a̱jtʉn.
\v 27 Es n'anʉʉmʉ tʉy'a̱jtʉn ko nija'ajʉty di'ibʉ ja ya̱a̱ kyaj 'yooktʉt pʉn kyajnʉm t'ixy ja Diosʉ kyutujkʉn.
\s Jesús tyʉgatsy
\p
\v 28 Es ko tyuktujkxʉbejty, net ja Jesús pyatʉjkʉ ma̱ tu'ugʉ kopk es kya̱jxta̱'a̱ga̱'a̱ñ. Es twooy ja Peedrʉ, Santya̱'a̱gʉ esʉ Fwank.
\v 29 Es ko ja Jesús jam kya̱jxta'aky, net ja wyiin jyʉjp tyʉga̱jtsy es ja wyit jyʉmbijty jantsy wa̱'a̱ts poop es jyantsytye'xy.
\v 30 Net kyʉxe'ky nimajtskʉ yedyʉjk myadya'aky mʉt ja Jesús. Yʉ'ʉdyʉ tadʉ Moisés esʉ Eliiʉs.
\v 31 Es jyantsyjyajy jyantsytye'xy juwʉdity ma̱ Jesús esʉ Moisés esʉ Eliiʉs, es tmadya̱'a̱ktʉ ja 'yo'kʉnʉ Jesús éxtʉm 'yayowa̱'a̱ñ jap Jerusalén.
\v 32 Es ni'igʉ ja Peedrʉ mʉt ja jyamyʉʉt jyantsyjyama̱'a̱ja̱'a̱ndʉ. Net t'ijxtʉ ja myʉj'a̱jtʉn ja Jesús es ja nimajtskpʉ ja̱'a̱yʉty di'ibʉ naty mʉt ja Jesús.
\v 33 Es ko ja nimajtskpʉ ja̱'a̱y jyagamgáknʉdʉ ma̱ ja Jesús, ta ja Peedrʉ jyʉnáñ:
\p —Windsʉ́n, oy ko tyam n'ijtʉm ja ya̱a̱. Es ngójʉdʉts tʉgʉʉgʉ ʉxkʉda̱'a̱k tʉjk: tu'uk mʉt mij es tu'uk mʉt ja Moisés es jatu'uk mʉt ja Eliiʉs.
\p Es ja Peedrʉ kyaj tnijawʉ di'ibʉ kyajxypy.
\p
\v 34 Es ko Peedrʉ naty kyajxy, net myiiñ ja yoots di'ibʉ abijtʉdʉ, es tsyʉ'kʉdʉ ko ñay'ijxʉdʉ yoodsóty.
\v 35 Net tmʉdoodʉ kyajxy jap yoodsóty di'ibʉ jʉnán:
\p —Tya̱a̱dʉ ʉjtsʉ n'U'unk di'ibʉts njantsytsyejpy. Mʉmʉdowdʉ yʉ'ʉ.
\p
\v 36 Es ko dʉ'ʉn kya̱jxta̱a̱y, net t'ijxy ko Jesús jam naydyu'uk. Es ni pʉ́n wi'ix tka''anma̱a̱ydyʉ éxtʉmʉ naty tʉ t'ixtʉ.
\s Jesús dya''agʉda'aky tu'ugʉ mixy di'ibʉ ka'oybyʉ myʉda̱jtypy
\p
\v 37 Es jakumbom ko jyʉna̱jktʉ jam kopkkʉjxm, mayjya'ay tsyo'ondʉ es oj jyʉjp'yo'oyʉdʉ.
\v 38 Ta tu'ugʉ yedyʉjk myiiñ es t'anma̱a̱y mʉk ja Jesús:
\p —Windsʉ́n, tunʉ may'a̱jtʉn. Ixʉdsʉ n'u'unk, ja'a ko yʉ'ʉyʉts tu'uk nmʉda̱jtypy.
\v 39 Ko yʉ ka'oybyʉ tyuktʉ́kʉty, ta yaj'ya'axyʉty, wyijtsxítyʉty, ya''a'eebyʉty, kyujy jyʉbípyʉty es kyaj ñiwa̱'a̱dsa̱'a̱ñʉty.
\v 40 Tʉts njamʉnu'xta'aky yʉ m'ʉxpʉjkpʉty es ttukniwa̱'a̱dsʉdʉ tadʉ ka'oybyʉ, per kyaj tʉ tmʉmada'aky.
\p
\v 41 Esʉ Jesús 'yadsooy:
\p —¡Ay miidsʉty, ja̱'a̱yʉty di'ibʉ kyaj jyiky'attʉ mʉdʉ tʉy'a̱jtʉn es kyaj Dios tmʉbʉktʉ! ¿Extʉ nʉ'ʉnʉdsʉ dʉ'ʉn n'aktim'ítʉt mʉt miidsʉty es nmʉdánʉdʉt? Yajmín ja m'u'unk.
\p
\v 42 Es ko ja mixy myʉjwa'ky, net ja ka'oybyʉ ñaxkujʉbijpʉ es wyijtsxijtʉ mʉk. Per ja Jesús t'ooy ja ka'oybyʉ es dya''agʉdaky tadʉ mixy es ttukkʉdʉjkʉ ja tyeety.
\v 43 Es nidʉgekyʉ ja̱'a̱yʉty dʉ'ʉñʉ wyʉ'ʉmʉdyaaydyʉ mʉt ja Dios ja myʉj'a̱jtʉn.
\s Jesús tnigajxy myʉmajtsk ok ja 'yo'kʉn
\p Es ko yʉ'ʉjʉty dʉ'ʉñʉ wyʉ'ʉmʉdyaaydyʉ mʉt di'ibʉ naty tyiimpy ja Jesús, ta yʉ'ʉ t'anma̱a̱ydyʉ ja 'yʉxpʉjkpʉty:
\p
\v 44 —Mʉdowdʉ yajxón es jaygyúkʉdʉ es katʉ xyja'aydyʉgóydyʉ tya̱dʉ ayuk. Ʉjts, ja Naxwíñʉdʉ Ja̱'a̱yʉdyʉ Kyudʉnaabyʉ, nyajkʉyaka̱'a̱ñʉts ma̱ ja mayjya'ay.
\p
\v 45 Es ja 'yʉxpʉjkpʉtʉjk kyaj tjaygyujkʉdʉ éxtʉm ya''anma̱a̱y es tjʉjptsʉ'kʉdʉ es dyajtʉ́wʉt éxtʉm tʉ jyʉna'añ.
\s Pʉ́n waanʉ mʉj
\p
\v 46 Net ja 'yʉxpʉjkpʉtʉjk ñayyajtʉʉjʉdʉ oga̱'a̱n pʉ́n ma̱ yʉ'ʉjʉty ni'igʉ mʉj.
\v 47 Perʉ Jesús ñija̱'a̱p di'ibʉ naty ja ja̱'a̱y wyinma̱a̱ydyʉp, es net ttsa'ane'ky tu'ugʉ ʉna̱'ku'unk es tpʉjtáky kujk'a̱a̱y ma̱ yʉ'ʉjʉty.
\v 48 Ta 'yanma̱a̱yʉdʉ:
\p —Pʉ́n 'yaxá̱jʉbʉ tya̱dʉ ʉna̱'ku'unk mʉt ʉjtskyʉjxm, nandʉ'ʉnʉts xy'axa̱jʉ. Es pʉ́nʉts ʉj xy'axá̱jʉp, nandʉ'ʉn xy'axá̱jʉdʉ pʉ́nʉts ʉj xykyajx. Yʉ'ʉ pʉ́n naybyʉjtákʉp ni'igʉ mutsk ma̱ miidsʉty, yʉ'ʉ ítʉp mʉj.
\s Di'ibʉ kyaj xyñi'o'o xyñiyáxʉm, yʉ'ʉ dʉ'ʉn ijtp mʉt ʉdsa̱jtʉm
\p
\v 49 Net ja Fwank jyʉnáñ:
\p —Windsʉ́n, tʉts n'ixtʉ tu'ugʉ yedyʉjk di'ibʉ mʉt mijtsʉ mxʉʉ dyajpʉdsémy yʉ ka'oybyʉ di'ibʉ ja̱'a̱y myʉda̱jtypy. Es nyajkubojktʉpts mʉt ko kyaj jyʉdity mʉt ʉdsa̱jtʉm.
\p
\v 50 Es ja Jesús jyʉnáñ:
\p —Katʉ xyajkubóktʉ, ja'a ko di'ibʉ kyaj xymyʉdsip'a̱jtʉm, yʉ'ʉ ijtp ti'igyʉ mʉt ʉdsa̱jtʉm.
\s Jesús tjʉjpkuga̱jxʉ ja Santya̱'a̱gʉ esʉ Fwank
\p
\v 51 Es ja tiempʉ wingoombʉ naty ma̱ ja Jesús ñʉjxánnʉ tsa̱jpótm. Net tpʉjtáky ja wyinma̱'a̱ñ mʉk es ñʉjxa̱'a̱ñ Jerusalén.
\v 52 Es tkejxy jayʉjp ja kugajxy es tjʉjp'íxʉt ma̱ tu'ugʉ samaritanʉ ka̱jpn, es t'ʉxta̱'a̱yʉt yʉ ja̱jttákn.
\v 53 Es ja samaritanʉ ja̱'a̱yʉty kyaj t'axa̱jʉyandʉ, ja'a ko t'ixtʉ ko ja Jesús ñejxy Jerusalén.
\p
\v 54 Es ko ja 'yʉxpʉjkpʉty, yʉ Santya̱'a̱gʉ es ja Fwank, tnija̱'a̱dʉ tya̱a̱dʉ, net t'anma̱a̱ydyʉ ja Jesús:
\p —Windsʉ́n, ¿mdsejpy es nyajnaxkʉdákʉm yʉ jʉnya'ank jam tsa̱jwínm es kyutʉgóyʉt tadʉ ja̱'a̱yʉty?
\p
\v 55 Net ja Jesús 'yijxʉmbijty es t'oodʉ es tmʉga̱jxtʉ:
\p —Miits kyaj xyñijáwʉdʉ ti ja̱'a̱jʉn mmʉda̱jttʉp.
\v 56 Ʉjts, ja Naxwíñʉdʉ Ja̱'a̱yʉdyʉ Kyudʉnaabyʉ, kyajts tʉ nmiñ es nyajtʉgóyʉdʉts ja ja̱'a̱yʉty, ja'ats tʉ nnimíñ esʉts nyajnitso'oga̱'a̱ñ.
\p Net oj ñʉjxtʉ wiink ka̱jpn.
\s Pʉ́nʉty pyatsoonándʉp ja Jesús
\p
\v 57 Es ko oj ñʉjxtʉ tu'am, ta tu'ugʉ yedyʉjk 'yanma̱a̱yʉ ja Jesús:
\p —Windsʉ́n, ʉj ndsejpyʉts mbanʉjxa̱'a̱ñ mij ma̱ mjantsytyimnejxy.
\p
\v 58 Esʉ Jesús 'yadsooy:
\p —Yʉ wax myʉda̱jtypy ja 'ya̱a̱nk, es yʉ jʉyujk di'ibʉ kaagʉdijtp myʉda̱jtypy ja pya'an, per ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, kyajts nmʉdaty ma̱ts je'eyʉ ngʉba̱jk nbʉjta̱'a̱gʉt.
\p
\v 59 Esʉ Jesús t'anma̱a̱y jatu'uk:
\p —Pamiingʉts.
\p Es ja ja̱'a̱y jyʉnáñ:
\p —Windsʉ́n, nasma̱jtsʉgʉts es nwʉ'ʉmdʉts mʉdʉ ndeedyʉts extʉ ko 'yoogʉt es nyajnaxtʉ́kʉdʉts, es net nbanʉjxʉt.
\p
\v 60 Es ja Jesús t'adsooy:
\p —Mij nʉjx ka̱jxwa̱'x wi'ix ja Diosʉ kyutujkʉn. Nika'ak yʉ o'kpʉty. Wa'anʉ wiink ja̱'a̱yʉty dyajnaxtʉ́kʉdʉ. Tya̱a̱dʉ yʉ'ʉ tyiimpy di'ibʉ kyaj jyotmaydyúñʉty yʉ Diosʉ 'yana'amʉn.
\p
\v 61 Net 'yanma̱a̱yʉ jatu'ugʉ ja̱'a̱y:
\p —Windsʉ́n, nbanʉjxʉpts mij, per nnejxyʉts jawyiin n'oknayjyʉgajxyʉty ma̱dsʉ ndʉjk.
\p
\v 62 Esʉ Jesús t'adsooy:
\p —Pʉ́n yajtsa̱jka̱yuup, tʉyʉ tpʉjta̱'a̱gʉt ja 'yijxʉn. Kyaj mba̱a̱t 'yijxʉmbíty pʉn tsyejpy ja syurkʉ tʉyʉ ñʉjxʉt. Es nandʉ'ʉn pʉ́nʉts xypyanʉjxa̱a̱mp, yʉ'ʉ myastutta̱'a̱yʉp tʉgekyʉ oytyim tiity. Es pʉ́n kyaj tmastu'uda̱'a̱ñ tʉgekyʉ yʉ jyiky'a̱jtʉn es xypyanʉjxʉdʉts, kyaj tyuñ ma̱ ja Diosʉ kyutujkʉn.
\c 10
\s Jesús tkexy nidʉgʉ'px ma̱jmajtskʉ 'yʉxpʉjkpʉty
\p
\v 1 Es óknʉm ja Windsʉ́n Jesús twin'ijxy nandʉ'ʉn nidʉgʉ'px ma̱jmajtsk ja ja̱'a̱y, es tkejxy nimajtskátyʉty es ñʉjxʉt jawyiin ma̱ tʉgekyʉ ka̱jpn ma̱ Jesús ñʉjxa̱'a̱ñ.
\v 2 Ta ja Jesús t'anma̱a̱ydyʉ:
\p —May ja ja̱'a̱y di'ibʉ kyajnʉm t'amʉdoonáxtʉ ja oybyʉ ayuk. Dʉ'ʉn ja'ajʉty éxtʉm ja triigʉ tʉʉmt di'ibʉ yajpʉjkmujkp, per waanʉ ja tuumbʉ. Pa̱a̱ty amdowdʉ ja Kugam es tkáxʉt ja tuumbʉ esʉ ja̱'a̱y ttuknijáwʉdʉt ja oybyʉ ayuk.
\p
\v 3 ’Tyámʉts miits ngaxa̱'a̱ñ es nʉjx xykya̱jxwa'xy. Es ixtʉ yajxón ko dʉ'ʉn éxtʉm ja borreegʉ 'yity tsipoty ma̱ ja waxka̱'ukʉn, miidsʉty nandʉ'ʉn xypya̱a̱da̱'a̱ndʉ ja ja̱'a̱yʉty di'ibʉ kyaj m'axa̱jʉya̱'a̱nʉdʉ oy.
\v 4 Katʉ xymyʉnʉjxtʉ mbijñ, ni mmeeñdyʉjk, ni mga̱a̱yña̱jxʉk es ni wiinkpʉ mgʉ'ʉk. Katʉ mwa̱'k'áwʉdʉ es xykya̱jxpe'xy ja ja̱'a̱yʉty di'ibʉ mbáttʉp tu'a̱a̱y.
\v 5 Es ko mdʉ́kʉt ma̱ mmo'oyʉty ja ja̱'a̱y yʉ ja̱jttákn ma̱ tu'ugʉ tʉjk, jawyiin xy'anʉʉmʉt: “Jotkujk ma̱ tya̱dʉ tʉjk.”
\v 6 Es pʉn ja kudʉjk m'axá̱jʉp yajxón, Dios kunu'xʉdʉp. Es pʉn kyaj, katʉ xy'amdoy ja Dios es kyunu'xʉdʉt.
\v 7 Ma̱ m'axá̱jʉty yajxón, wʉ'ʉmdʉ ma̱ tadʉ tʉjk es kay uuktʉ di'ibʉ mmooyʉdʉp, mʉt ko pʉ́nʉty kya̱jxwa'xypy yʉ n'ʉxpʉjkʉnʉts, nandʉ'ʉn pyaadyʉty ja ka̱'a̱y ukʉn éxtʉm jyʉna'añ ja ayuk: “Yʉ tuumbʉ pátʉp ja myʉju'uñ.” Katʉ mjʉdity tʉjkmdʉjkm.
\v 8 Es ko mja̱'tʉt ma̱ tu'ugʉ ka̱jpn ma̱ m'axá̱jʉdʉ, jʉ'xtʉ di'ibʉ myajmooydyʉp.
\v 9 Ya''agʉda̱'a̱ktʉ di'ibʉ pʉjkʉp jap, es anʉʉmʉ: “Tʉ wyingóñ ja Diosʉ kyutujkʉn ma̱ miidsʉty.”
\v 10 Es ko mja̱'tʉt ma̱ tu'ugʉ ka̱jpn ma̱ kyajpʉ ja̱'a̱y m'axá̱jʉdʉ, pʉdsʉmdʉ tu'a̱a̱y es anʉʉmʉdʉ:
\v 11 “Extʉ naxjok di'ibʉ ya̱a̱ ma̱ mga̱jpn tʉ pyety ma̱dsʉ ndekyʉn, nwinxítʉpts. Per nijáwʉdʉ ko wyingóñ ja Diosʉ kyutujkʉn.”
\p
\v 12 Es ja Jesús t'anma̱a̱ydyʉ ja 'yʉxpʉjkpʉty:
\p —N'anʉʉmʉdʉ miidsʉty ko ja tiempʉ tpa̱a̱dʉt ma̱ ja ja̱'a̱y yajpayo'oydyʉt, ja Dios yakaampy ni'igʉ ja tʉydyu'unʉn ma̱ tadʉ ka̱jpn kʉdiinʉm ma̱ Sodomʉ ja̱'a̱yʉty.
\s Ka̱jpn di'ibʉ kyaj jyodʉmbittʉ
\p
\v 13 ’Pʉroobʉ mijts Korazín ka̱jpn, es pʉroobʉ mijts Betsaydʉ ka̱jpn, ja'a ko pʉn ʉjtsxyʉp nbʉjtákypy ma̱ Tirʉ ka̱jpn esʉ Sidón ka̱jpn yʉ mʉj'a̱jtʉn éxtʉm ma̱ miidsʉty, tadʉ ka̱jpn jékyʉpxyʉp dya'íxyʉty ja jyotmay mʉt ja pyojpʉkyʉjxm es jyodʉmbijtxyʉp mʉt ja Dios.
\v 14 Pa̱a̱ty ko tpa̱a̱dʉt ja tiempʉ ma̱ ja ja̱'a̱y yajpayo'oydyʉt, miidsʉty m'axá̱jʉp tu'ugʉ tʉydyu'unʉn waanʉ mʉk es kʉdiinʉm dyʉ'ʉnʉty ma̱ Tirʉ es ma̱ Sidón.
\v 15 Es mij Kafarnaúm ka̱jpn, di'ibʉ naybyʉjta̱'a̱gánʉp mʉj kʉjxm extʉ ma̱ tsa̱jpʉn, Dios yʉ'ʉ mbʉjta̱'a̱gʉdʉp ma̱ ayoodákn.
\p
\v 16 Net ja Jesús t'anma̱a̱y ja 'yʉxpʉjkpʉtʉjk:
\p —Pʉn myʉbejkypy ja ja̱'a̱yʉty éxtʉm miits xykya̱jxwa̱'xtʉ, ʉj xymyʉbʉjkpʉts nandʉ'ʉn. Es pʉn kyaj m'axá̱jʉty miidsʉty, nan kyajts ʉj xy'axa̱jʉ es nan ni ja'a pʉ́nʉts xykyajx.
\s Jyʉmbittʉ ja nidʉgʉ'px ma̱jmajtskʉ ʉxpʉjkpʉty
\p
\v 17 Oknʉm ko ja nidʉgʉ'px ma̱jkpʉ ʉxpʉjkpʉ jyʉmbijnʉdʉ, jyantsyxyondaktʉ es t'awa̱'a̱nʉdʉ ja Jesús:
\p —Windsʉ́n, extʉ ja ka'óybyʉty tʉ xymyʉmʉdówdʉts mʉt mijtskyʉjxm.
\p
\v 18 Netʉ Jesús t'anma̱a̱ydyʉ:
\p —Ʉj tʉts n'ixy ja mʉjku'ugópk Satanás kya'ay tsa̱jwínm éxtʉmʉ jʉdsukʉn.
\v 19 Ʉj tʉts nyaky yʉ mʉk'a̱jtʉn mʉt miidsʉty es oy xytyuktaanʉt yʉ tsa̱'a̱ñ es yʉ jaybyu'uk es xymyʉmada̱'a̱gʉt ja mʉdsip Satanás mʉt tʉgekyʉ ja myʉja̱a̱, es kyaj mba̱a̱t wi'ix mdúñʉty.
\v 20 Per katʉ mxonda̱'a̱ktʉ je'eyʉ ko yʉ ka'oybyʉ tʉ mmʉmʉdówʉdʉ, ni'igʉ xonda̱'a̱ktʉ mʉt ko yajkuja̱'a̱yʉn ja mxʉʉjʉty jam tsa̱jpótm.
\s Jesús xyonda'aky
\p
\v 21 Es netyʉ ja Jesús jyantsyjyotkujkʉdyaay mʉt ja Espíritʉ Santʉ es kya̱jxtáky:
\p —Tatʉ, n'awda̱jtypyʉts mijts di'ibʉ Windsʉn'a̱jtp tsa̱jpótm es ya̱ naxwiiñ, ja'a ko ja ja̱'a̱y di'ibʉ ijttʉp éxtʉmʉ u'unk ʉna̱'kʉty tʉ xytyuk'ixy xytyuknijawʉ di'ibʉ mdukwinguyu'ts di'ibʉ jʉnándʉp ko yʉ'ʉjʉty wijy kejyʉty. Es jantsy oy, Tatʉ, ko dʉ'ʉn tʉ xytyuñ éxtʉm mij xytsyekyʉn.
\p
\v 22 Es ko dʉ'ʉn kya̱jxtakta̱a̱y, net t'anma̱a̱y ja 'yʉxpʉjkpʉtʉjk:
\p —Yʉ nDeedyʉts tʉ xymyooydya'ayʉts tʉgekyʉ. Ni pʉ́n tka'ixy'aty ja nDeedyʉts, ʉjts je'eyʉ, ja'a 'yU'unk. Es ni pʉ́nʉts ʉj xykya'ixy'aty, yʉ'ʉyʉdsʉ nDeety es ja ja̱'a̱yʉty di'ibʉts ʉj tʉ nnaydyuk'íxyʉty ma̱ yʉ'ʉjʉty.
\p
\v 23 Net ja Jesús twin'ijxpajttʉ ja 'yʉxpʉjkpʉtʉjk es t'anma̱a̱y ak yʉ'ʉjʉty:
\p —Kuni'xy miidsʉty di'ibʉ ijxtʉp tʉgekyʉ tya̱a̱dʉ.
\v 24 Ja'a ko may ja Diosʉ kyuga̱jxpʉ es ja réyʉty di'ibʉ jékyʉp, jya'ixandʉ di'ibʉ miits tyam m'ijxtʉp, es kyaj t'ijxtʉ, es nandʉ'ʉn tjamʉdowandʉ di'ibʉ miits tyam mmʉdoodʉp, es yʉ'ʉjʉty kyaj tmʉdoodʉ.
\s Samaritanʉ oyjya'ay
\p
\v 25 Tu'ugʉ di'ibʉ tsa̱jptʉgóty ya'ʉxpʉjkp pyʉde'ky es oj tmʉgajxy ja Jesús es dyajka̱'a̱ja̱'a̱ñ. Ta dyajtʉʉy:
\p —Ya'ʉxpʉjkpʉ, ¿tits ndúnʉp esʉts nba̱a̱dʉt ja njiky'a̱jtʉnʉts winʉ xʉʉ winʉ tiempʉ?
\p
\v 26 Net ja Jesús 'yadsooy:
\p —¿Ti jap ijtp kʉxja̱'a̱y ma̱ ja Moisesʉ 'yana'amʉn? ¿Wi'ix xykyajxy?
\p
\v 27 Es ja di'ibʉ tsa̱jptʉgóty ya'ʉxpʉjkp 'yadsooy:
\p —Mdsókʉp yʉ mWindsʉ́n Dios mʉt tʉgekyʉ mjot mja̱'a̱jʉn, mʉt tʉgekyʉ m'anmʉja̱'a̱n, mʉt tʉgekyʉ mmʉja̱a̱, mʉt tʉgekyʉ mwinma̱'a̱ñ, es nandʉ'ʉn mdsókʉp ja mmʉdʉjkpa̱'a̱ éxtʉm mij kʉ'ʉm mnaydsyékyʉty.
\p
\v 28 Net ja Jesús jyʉnáñ:
\p —Tʉ yajxón m'adsoy. Pʉn mdiimpy dʉ'ʉn, mmʉdátʉp ja jiky'a̱jtʉn winʉ xʉʉ winʉ tiempʉ.
\p
\v 29 Ta ja di'ibʉ tsa̱jptʉgóty ya'ʉxpʉjkp naypyʉjta̱'a̱gánʉp éxtʉm ja̱'a̱y di'ibʉ jiky'a̱jtp tʉy'a̱jtʉn mʉʉt, es dyajtʉʉy:
\p —¿Pʉ́nʉts ʉj nmʉdʉjkpa̱'a̱'a̱jtypy?
\p
\v 30 Net ja Jesús 'yadsoojʉ:
\p —Tu'ugʉ yedyʉjk winjʉna̱jkp ma̱ ja tu'ujʉn di'ibʉ nʉjxp Jerusalén extʉ kyʉda'aky Jerikoo. Es mya̱jtsʉdʉ ma'tspʉ es pyʉjkʉdyaayʉdʉ tʉgekyʉ di'ibʉ naty myʉda̱jtypy, es extʉ yʉ wyit, es yajkepywyejpy, es ñikákʉdʉ éxtʉmʉ o'kpʉ.
\v 31 Es net tu'ugʉ teety ñajxy ma̱ tadʉ tu'u. Es ko oj 'yíxyʉty, net ñayo'oyʉ.
\v 32 Oknʉm myiiñ tu'ugʉ levitʉ di'ibʉ myʉdiimpy ja teety es ñajxy ma̱ tadʉ tu'u, es ko oj t'ixy, net nandʉ'ʉn tnayo'oy.
\v 33 Per óknʉm myiiñ tu'ugʉ samaritanʉ ja̱'a̱y di'ibʉ jʉdijtp ma̱ nandʉ'ʉnʉ tadʉ tu'u. Es ko t'ijxy, net mʉk tja̱'a̱jʉ es tpa''ayooy.
\v 34 Net tmʉwingooñ ja yedyʉjk es dyajtsoybyejty ja tsyayut mʉt ja aseytʉ oliivʉ es ja vinʉ, es t'adsiimy. Net dyajpejty ma̱ kyʉ'ʉm jʉyujk di'ibʉ naty tyuk'uñaapy, es dyajja̱jty ma̱ tu'ugʉ ja̱jttákn es jap tkwentʉ'a̱jty yajxón.
\p
\v 35 ’Es jakumbom ko ja samaritanʉ ja̱'a̱y tsyo'onnʉ, ta tju'ty majtskʉ myeeñ es tmooy ja kudʉjk di'ibʉ ma̱ ja̱jttákn es t'anma̱a̱y: “Kwentʉ'atʉ tya̱dʉ yedyʉjk, es pʉn m'ak'yajmeeñdyuump, ʉjts mij nmʉgʉbátʉp kots njʉmbítʉt.”
\p
\v 36 Net ja Jesús dyajtʉʉy ja di'ibʉ tsa̱jptʉgóty ya'ʉxpʉjkp:
\p —¿Pʉ́nʉ tya̱dʉ nidʉgʉʉkpʉ mjʉna̱a̱mp ko yʉ'ʉ tmʉdʉjkpa̱'a̱jʉty di'ibʉ ma̱jtsʉ tadʉ ma'tspʉ?
\p
\v 37 Ta ja di'ibʉ tsa̱jptʉgóty ya'ʉxpʉjkp 'yadsooy:
\p —Ja di'ibʉ myʉda̱jt ja pa''ayo'on mʉt yʉ'ʉ.
\p Net ja Jesús jyʉnáñ:
\p —Nʉjx mij es xytyúnʉt nandʉ'ʉn.
\s Jesús ma̱ tyʉjkʉ Martʉ esʉ Mariiʉ
\p
\v 38 Es ja Jesús dyaj'yo'oy ja tyu'u es jyajty ma̱ tu'ugʉ ka̱jpn. Es jap tu'ugʉ toxytyʉjk di'ibʉ xyʉ'a̱jtypy Martʉ, es 'yaxa̱jʉ ma̱ tyʉjk.
\v 39 Martʉ tmʉdaty tu'ugʉ myʉga'ax di'ibʉ xyʉ'a̱jtypy Mariiʉ. Es yʉ Mariiʉ ñaxwe'tsy Jesús tyeky'ʉjxy es tmʉdoo'ijty éxtʉm jyʉna'añ.
\v 40 Es ja Martʉ kya''awa̱a̱dsʉty mʉt ja tyuunk tnimiiñ ja Jesús es t'anma̱a̱y:
\p —Windsʉ́n, ¿kyaj xy'ixy ko yʉ Mariiʉ xytyukmʉ'íxʉts naydyu'ugʉ tya̱dʉ tuunk tʉgekyʉ? Anʉʉmʉ esʉts xypyudʉ́kʉt.
\p
\v 41 Es ja Jesús 'yadsooy:
\p —Martʉ, Martʉ, nʉgoo m'oktuunnʉ jottʉgoy mʉt mayʉ mduunk.
\v 42 Je'eyʉ tu'uk mdʉgoy'a̱jtxʉty. Yʉ Mariiʉ tʉ twin'ixy yʉ oybyʉ, es kyaj pʉ́n pyʉjkxʉdʉt.
\c 11
\s Ka̱jxtákʉn
\p
\v 1 Tʉgok ja Jesús kya̱jxtáky ma̱ tu'ugʉ it. Es ko kya̱jxtakta̱a̱y, net tu'uk 'yanma̱a̱yʉ ja 'yʉxpʉjkpʉ:
\p —Windsʉ́n, tukni'ijxʉgʉts wi'ixʉts nga̱jxta̱'a̱gʉt, dʉ'ʉn éxtʉm ja Fwank ttukni'ijxʉ ja 'yʉxpʉjkpʉty.
\p
\v 2 Esʉ Jesús jyʉnáñ:
\p —Ko mga̱jxta̱'a̱ktʉt, dʉ'ʉn mjʉna̱'a̱ndʉt:
\q Tatitu'unk, wa'an nidʉgekyʉ ja̱'a̱y mwindsʉ'ʉgʉdʉ es m'awdátʉdʉ.
\q Min mijts es myajkutúkʉt ja ya̱ naxwiiñ.
\q
\v 3 Es dʉ'ʉñʉmts xymyo'oydyʉt di'ibʉts njʉ'xtʉp.
\q
\v 4 Es xymya'xʉdʉts ʉʉdsʉdyʉ nbojpʉty,
\q éxtʉmts ʉʉdsʉty nandʉ'ʉn nma'xtʉ di'ibʉts axʉʉk tʉ xytyundʉ.
\q Es kʉdii xyajkutíky es ja ka'oybyʉ t'íxʉt wi'ixʉts xyajpekytyúnʉt.
\p
\v 5 Jesús nandʉ'ʉn jyʉnáñ:
\p —Pʉn nidu'uk miidsʉty myʉda̱jtypy tu'ugʉ mʉtnaymyaayʉbʉ, es tsu'pʉn ñejxy ma̱ tyʉjk es t'anʉʉmʉ: “Mʉgu'uk, tuk'anu'xkʉts tʉgʉʉgʉ mgaaky.
\v 6 Yʉ'ʉ tʉ jya'ty tu'ugʉts ja nmʉtnaymyaayʉbʉ di'ibʉ vya̱jʉtuump, es kyajts nmʉdaty tits ndukjʉ'xʉp.”
\v 7 Es 'yadsoy di'ibʉ tʉgoty: “Kátʉts xyñe'emy. Tʉdsʉ ndʉjk nya''adujknʉ es n'u'ungʉts tyámʉts mʉʉt nma̱'a̱dʉ. Kyajts mba̱a̱t nbʉde'eky es nmo'oyʉt tii.”
\p
\v 8 Esʉ Jesús t'anʉʉmʉdʉ ja 'yʉxpʉjkpʉtʉjk:
\p —Njʉna̱'a̱ñʉts ko oy ja'ijty kyapʉdʉ'ʉga̱'a̱ñ mʉt ko tmʉtnaymyaayʉbʉty, extʉ ko pyʉdʉ'ʉgʉt es tmo'oyʉt tʉgekyʉ di'ibʉ tsyejpy kʉdiibʉ 'yak'yajna'amʉt.
\v 9 Es dʉ'ʉn éxtʉmts njʉna̱'a̱ñ: Amdowdʉ Dios, es mmo'oyʉdʉt; ʉxta̱'a̱ydyʉ, es xypya̱a̱ttʉt; kuga̱jxʉdʉ ma̱ tʉjk a̱a̱, es mya''awátsxʉdʉp.
\v 10 Ja'a ko di'ibʉ 'yamdeepy, 'yaxá̱jʉp; es pʉ́n 'yʉxtaapy, pyatypy; es pʉ́n kuga̱jxʉp, ya''awátsxʉp ja tʉjk a̱a̱.
\p
\v 11 ’Es miits u'unkteedyʉty, ¿tii mmo'oydyʉp ja tsa̱'a̱ñ ja m'u'unk ko m'amdówʉdʉt ja a̱jkx?,
\v 12 o ¿tii mmo'oydyʉp tu'ugʉ jaybyu'uk ko m'amdówʉdʉt ja tuttsa̱a̱? Kyaj, kʉdii.
\v 13 Miidsʉty oy mbojpʉ ja̱'a̱yʉty, mnija̱'a̱dʉp di'ibʉ oy es xymyo'oyʉt yʉ m'u'ungʉty. Es nik ni'igʉ ja mDeedyʉ tsa̱jpótmʉdʉ tuknigáxʉdʉp yʉ Espíritʉ Santʉ di'ibʉ amdoojʉdʉp.
\s Jesús yajnigajxy ko dyajtúñ ja mʉjku'ugópkʉ kyutujkʉn
\p
\v 14 Es óknʉm ja Jesús dyajpʉdseemy tu'ugʉ ka'oybyʉ di'ibʉ naty yʉ ja̱'a̱y ya'ijtypy uum. Es ko ja ka'oybyʉ tmastuty ja ja̱'a̱y, net oj kya̱jxe'eky. Es ja ja̱'a̱yʉty dʉ'ʉñʉ wyʉ'ʉmʉdyaaydyʉ mʉdʉ taadʉ.
\v 15 Es nija'ajʉty ja ja̱'a̱y jyʉnandʉ:
\p —Tya̱dʉ ja̱'a̱y yajpʉdseempy ja ka'óybyʉty mʉt ja myʉk'a̱jtʉn ja mʉjku'ugópk Belzebuu.
\p
\v 16 Es nija'ajʉty di'ibʉ 'yixándʉp t'amdoodʉ ja ijxwʉ'ʉmʉnʉ mʉjpʉ di'ibʉ tsa̱jpótm.
\v 17 Es ja Jesús ñija̱'a̱p di'ibʉ naty ja ja̱'a̱y wyinma̱a̱ydyʉp, net t'anma̱a̱y:
\p —Oytyim di'ibʉty yʉ kutujkʉn di'ibʉ naywya̱'xʉp es tsyiptundʉ tuk mʉgu'uk, dʉ'ʉn ñayyajkutʉgóyʉdʉ. Es pʉn tu'ugʉ jiiky mʉgu'uk ñaywya̱'xʉdʉ es tsyiptundʉ ak tukka'axʉty, nandʉ'ʉn ñayyajkutʉgóyʉdʉ.
\v 18 Es nandʉ'ʉn pʉn naywya̱'xʉp ja mʉjku'ugópk Satanás esʉ myʉmʉjku'ujʉty majtsk peky, ¿wi'ix mba̱a̱t jyeky yʉ kyutujkʉn? ¿Es wi'ix mba̱a̱t miits mjʉna̱'a̱ndʉ kots ʉj nyajpʉdsémy ja ka'oybyʉ mʉt ja Belzebuu kyutujkʉnʉ?
\v 19 Es pʉn tʉy'a̱jtʉn éxtʉm mjʉna̱'a̱ndʉ kots ʉj nyajpʉdsémy ja ka'óybyʉty mʉt ja Belzebuu kyutujkʉn, ¿ti kutujkʉn myʉda̱jttʉp miidsʉ m'ʉxpʉjkpʉty es dyajpʉdsʉ́mdʉ yʉ ka'oybyʉ? Pa̱a̱ty kʉ'ʉm yʉ m'ʉxpʉjkpʉty dya'íxyʉty ko miits mga̱jxtʉgóydyʉ.
\v 20 Per pʉn ʉjts mʉt ja Diosʉ myʉk'a̱jtʉn nyajpʉdsémyʉts ja ka'óybyʉty, tʉ naty ya'ixy ko tʉ jya'ty ja Diosʉ kyutujkʉn ma̱ miidsʉty.
\p
\v 21 ’Ko tu'ugʉ yedyʉjkʉ mʉkpʉ 'yity kudsʉ'ʉgʉ es tkwentʉ'aty ja tyʉjk, kyaj wi'ix jyátʉt ja pyʉjke'eky.
\v 22 Es pʉn miimp jatu'uk waanʉ mʉkpʉ di'ibʉ yʉ'ʉ mʉmada̱'a̱gʉdʉp, pʉjkʉdya'ayʉdʉp tʉgekyʉ di'ibʉ tyukkuwaampy es tyukjotkujk'a̱jtypy, es dyajwa̱'xʉt di'ibʉ tʉ pyʉjkʉty.
\p
\v 23 ’Di'ibʉ kyaj 'yity mʉt ʉj, yʉ'ʉdsʉ naty xymyʉdsip'a̱jtp, es di'ibʉ kyaj dyajmíky mʉt ʉjʉn, yʉ'ʉ naty 'yʉxka̱'tsypy.
\s Ka'oybyʉ di'ibʉ jatʉgok jʉmbijtp
\p
\v 24 ’Ko tu'ugʉ ka'oybyʉ pyʉdsemy ma̱ tu'ugʉ ja̱'a̱y, net jyʉdity ma̱ mʉj itʉn es t'ʉxta̱'a̱y ma̱ pyo'xʉt. Es ko kyaj tpa̱a̱ty, net jyʉna'añ: “N'okjʉmbítyʉts jatʉgok es nduktʉ́kʉdʉts ma̱ tadʉ ja̱'a̱y.”
\v 25 Es ko jyʉmbity, ta t'ixy ja ja̱'a̱y éxtʉm tu'ugʉ tʉjkʉn oydyúñ.
\v 26 Net dyajmíñ janijʉxtujkpʉ myʉga'óybyʉty waanʉ axʉʉkpʉ, es mʉt yʉ'ʉ tyʉkʉ es tsyʉʉnʉ ma̱ tadʉ ja̱'a̱y. Dʉ'ʉn tadʉ ja̱'a̱y oj wye'emy waanʉ axʉʉk es kyaj éxtʉmʉ naty.
\p
\v 27 Es ma̱ ja Jesús dʉ'ʉn jyʉnáñ, tu'ugʉ toxytyʉjk ma̱ ja ja̱'a̱yʉty yaxkeky:
\p —¡Kuni'xy di'ibʉ tʉ myajja̱'tyʉty es myajtsi'tsʉ!
\p
\v 28 Es ja Jesús jyʉnáñ:
\p —Ni'igʉ jyotkujkʉty di'ibʉ myʉdoodʉp éxtʉm ja Dios jyʉna'añ es myʉmʉdoodʉp.
\s Jesús ya''amdoy es dya'íxʉdʉt tu'ugʉ mʉj'a̱jtʉn
\p
\v 29 Es ko ja ja̱'a̱yʉty 'yaknaymyúkʉdʉ ma̱ Jesús, net ja Jesús jyʉnáñ:
\p —Yʉ ja̱'a̱yʉty di'ibʉ tyam jiky'a̱jttʉp, yʉ'ʉ axʉk ja̱'a̱yʉty es t'amdowdʉ yʉ ijxwʉ'ʉmʉn di'ibʉ myʉda̱jtypy ja mʉj'a̱jtʉn. Per kyaj yajmo'oyʉt ja wiinkpʉ ijxwʉ'ʉmʉn, je'eyʉ éxtʉm 'yijty ja Jonás, Diosʉ kyuga̱jxpʉ.
\v 30 Pa̱a̱ty dʉ'ʉn éxtʉm ja Jonás oj ya'ixy es yajnija̱'a̱jʉ mʉt ja ja̱'a̱yʉty di'ibʉ ijttʉ jap Nínive, nandʉ'ʉn ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, n'ita̱'a̱ñʉts éxtʉm tu'ugʉ ijxwʉ'ʉmʉn mʉt ja ja̱'a̱yʉty di'ibʉ tyam jiky'a̱jttʉp.
\v 31 Es ko ja̱'a̱y yajpayo'oydyʉt, yʉ toxytyʉjk di'ibʉ jékyʉp yajkutujk ma̱ jʉmboj myiñ, jikypyʉka̱a̱mp ti'igyʉ mʉt ja ja̱'a̱yʉty di'ibʉ tyam jiky'a̱jttʉp es yʉ'ʉ dyajnigʉxʉ'ʉgʉt ko pekymyʉʉt di'ibʉ tyam jiky'a̱jttʉp, ja'a ko yʉ'ʉ jagam tsyooñ es tmʉdowa̱'a̱ñ ja rey Salomonk ja kya̱jxwíjʉn. Es taa ja ya̱a̱ tu'uk di'ibʉ myʉda̱jtypy ni'igʉ ja mʉj'a̱jtʉn kʉdiinʉm ja rey Salomonk.
\v 32 Es ko ja ja̱'a̱y yajpayo'oydyʉt, ja ja̱'a̱yʉty di'ibʉ jékyʉp ijttʉ jap Nínive ka̱jpn, nandʉ'ʉn jyikypyʉ́ktʉt ti'igyʉ mʉt di'ibʉ tyam jiky'a̱jttʉp, es yʉ'ʉjʉty nandʉ'ʉn dyajnigʉxʉ'ʉgʉdʉt ko pekymyʉʉt ja ja̱'a̱y di'ibʉ tyam jiky'a̱jttʉp, ja'a ko yʉ Nínive ja̱'a̱y tmʉdoo'íttʉ ja Jonás ja 'yayuk es jyodʉmbijttʉ. Es taa ja ya̱a̱ tu'uk di'ibʉ myʉda̱jtypy ni'igʉ ja mʉj'a̱jtʉn kʉdiinʉm ja Jonás.
\s Lamprʉ éxtʉmʉ ijxpajtʉn
\p
\v 33 ’Ni pʉ́n tkayajtoye'eky tu'ugʉ lamprʉ es tkujiidsʉt. Yʉ'ʉ yajpʉjtákp kʉjxm es jyá̱jʉt mʉk jap tʉgoty es di'ibʉ tʉjkʉp wa̱'a̱ts 'yíxʉt.
\v 34 Es pʉn ja ʉxpʉjkʉn di'ibʉ m'axá̱jʉp oy yʉ'ʉ, yajwa̱'a̱dsʉp tʉgekyʉ mjot mwinma̱'a̱ñ éxtʉm ja oybyʉ lamprʉ tkude'xy tʉgekyʉ ja tʉjk es wyʉ'ʉmʉt wa̱'a̱ts. Per pʉn ja ʉxpʉjkʉn di'ibʉ m'axá̱jʉp axʉʉk yʉ'ʉ, ya''axʉʉgʉp tʉgekyʉ mjot mwinma̱'a̱ñ éxtʉm tu'ugʉ lamprʉ axʉʉkpʉ di'ibʉ kyaj mba̱a̱t yajxón kyude'xy.
\v 35 Pa̱a̱ty éxkʉm es kʉdiibʉ tadʉ ʉxpʉjkʉn di'ibʉ m'axá̱jʉp jyátʉt éxtʉm ja lamprʉ axʉʉkpʉ es ma̱'a̱t.
\v 36 Wa'an twe'emy éxtʉm ja lamprʉ di'ibʉ wa̱'a̱ts es oy, mʉt ko dʉ'ʉn yʉ mwinma̱'a̱ñ wyʉ'ʉmda̱'a̱yʉt wa̱'a̱ts es oy, éxtʉm ko ja oybyʉ lamprʉ tkude'xy tʉgekyʉ ja tʉjk es kyaj wye'emy ni ti kugoots.
\s Jesús tnigajxy ja fariseeʉty es di'ibʉ tsa̱jptʉgóty ya'ʉxpʉjktʉp
\p
\v 37 Es ko ja Jesús tmʉga̱jxta̱a̱y, net tu'ugʉ fariseeʉ wyoojʉ kaabyʉ, esʉ Jesús tyʉjkʉ jap tʉgoty es ñaxwe'tsy meesʉ winduuy.
\v 38 Es ja fariseeʉ mʉk tja̱'a̱jʉ ko t'ijxy ko Jesús kyaj tkuydyuuñ ja fariseeʉ kyostumbrʉ ko kyaydyʉ koonʉm wa̱'a̱ts wa̱'a̱ts kyʉbujtʉ.
\v 39 Es ja Windsʉ́n Jesús jyʉnáñ:
\p —Miits fariseeʉty xyajwa̱'a̱tstʉ wingʉjxy yʉ mvasʉ es yʉ mdexy. Es nandʉ'ʉn miits mdsi'i mxʉtstʉ es mnaywyítʉdʉ yajxón es dʉ'ʉn mgʉxʉ'ʉktʉ mnikʉjxy tsuj. Per mjodoty mnaywyinnaxʉja̱'a̱p es mmaadsa̱a̱mp esʉ axʉʉkpʉ mwinma̱'a̱ñ xymyʉdattʉ.
\v 40 ¡Kujuunʉty miidsʉty! ¿Kyaj xyñijáwʉdʉ ko di'ibʉ tʉ dyajkoj wingʉjxy nandʉ'ʉn jodoty dyajkojy?
\v 41 Mʉdundʉ miidsʉty yʉ Dios mʉt winʉ mjot, es dʉ'ʉn tʉgekyʉ wyʉ'ʉmda̱'a̱yʉt wa̱'a̱ts.
\p
\v 42 ’Pʉroobʉ miits fariseeʉty, ja'a ko miits myojxtʉp yʉ xu'uk es yʉ ruudʉ es tʉgekyʉ a̱a̱y ujts, es kyaj xykyuydyundʉ éxtʉm tyʉy'a̱jtʉnʉty es nan kyaj xytsyoktʉ ja Dios. Jawyiin tsoktʉ Dios es xykyuydyúnʉt di'ibʉ yajnigutujkʉp es oy nandʉ'ʉn xytyukwinyóxtʉt.
\p
\v 43 ’Pʉroobʉ miits fariseeʉty, ja'a ko m'u'uñʉya̱'a̱ndʉ jap tsa̱jptʉgóty ma̱ oybyʉ uñaaybyajn, es myajka̱jxpo'xa̱'a̱ndʉ tu'a̱a̱y mʉt ja windsʉ'kʉn.
\v 44 Pʉroobʉ miidsʉty, ja'a ko dʉ'ʉn m'ittʉ éxtʉm ma̱ tu'ugʉ o'kpʉ tʉ ñaxtʉkʉ es kyaj ya'ijxwʉ'ʉmdʉ, es ja ja̱'a̱y ñaxtʉ nikʉjxy es ni tkanijáwʉdʉ ko jap ja o'kpʉ.
\p
\v 45 Net 'yadsooy tu'ugʉ ja̱'a̱y di'ibʉ tsa̱jptʉgóty ya'ʉxpʉjkp:
\p —Ya'ʉxpʉjkpʉ, ko dʉ'ʉn tʉ mjʉna̱'a̱ñ, xywyinga̱jxpajtpʉts nandʉ'ʉn ʉʉdsʉty.
\p
\v 46 Es ja Jesús jyʉnáñ:
\p —Pʉroobʉ nandʉ'ʉn miits di'ibʉty tsa̱jptʉgóty ya'ʉxpʉjktʉp, ja'a ko xytyuktsʉmʉ'ʉktʉ tsemy ja ja̱'a̱y di'ibʉ kyaj tmʉmada̱'a̱gʉt, es miidsʉty ni je'eyʉ mgʉwa'xypy xykyatukpudʉkʉ.
\v 47 Pʉroobʉ miidsʉty, ja'a ko myajkojtʉp ja o'kpʉ kyupotsy ma̱ yajnaxtʉ́kʉ ja Diosʉ kyuga̱jxpʉ di'ibʉ m'aptʉjk ya'o'ktʉ.
\v 48 Dʉ'ʉn yajjaygyúkʉ ko miidsʉty ti'igyʉ mʉt di'ibʉ tyuundʉ ja m'aptʉjkʉty. Yʉ'ʉjʉty dya'o'ktʉ ja Diosʉ kyuga̱jxpʉty es miits xya'óyʉdʉ yʉ kyupotsy.
\v 49 Pa̱a̱ty ja Dios tʉ jyʉna'añ mʉt ja wyijy'a̱jtʉn: “Ngáxʉpts ja ngugajxyʉts es yʉ n'apóstʉlʉty, es nija'ajʉty xypyajʉdíttʉt es nija'ajʉty xya'oogʉt.”
\v 50 Es ja ja̱'a̱y di'ibʉ tyam jiky'a̱jttʉp, ja Dios 'yamdeepy es xykyʉbáttʉt ja ñe'pyñ ja Diosʉ kyuga̱jxpʉ di'ibʉ ya'o'ktʉ extʉ ma̱ naxwíñʉdʉ tsyondaky,
\v 51 extʉ Abelʉ ñe'pyñ extʉ jaba̱a̱t ma̱ Zakariiʉs di'ibʉ ya'o'ktʉ mʉj tsa̱jptʉjk winduuy es artal ʉxkʉ'ʉy. Pa̱a̱ty nandʉ'ʉn n'anʉʉmʉ ko ja Dios ttukkumʉdowa̱'a̱nʉt yʉ ja̱'a̱y di'ibʉ tyam jiky'a̱jttʉp nidʉgekyʉ ja Diosʉ kyuga̱jxpʉ di'ibʉ ya'o'ktʉ.
\p
\v 52 ’Pʉroobʉ miits di'ibʉty tsa̱jptʉgóty ya'ʉxpʉjktʉp, ja'a ko tʉ xyja''abeky ja awatsn di'ibʉ ya''awatsypy ma̱ ja̱'a̱y tmʉmʉdowdʉ ja Diosʉ 'yayuk. Ni miits mgatʉ́kʉdʉ es xya''aduktʉ pʉ́nʉty jatʉkʉyándʉp.
\p
\v 53 Ko ja Jesús tsyo'onnʉ, net ja fariseeʉty es ja di'ibʉty tsa̱jptʉgóty ya'ʉxpʉjktʉp jyantsyjyot'ambʉjktʉ waanʉ ni'igʉ mʉt yʉ'ʉ, es oymya̱a̱ty dyajtʉʉy kana̱k nax,
\v 54 es t'ʉxta̱'a̱y ja winma̱'a̱ñ wi'ix dyajka̱'a̱jʉt es tni'ʉʉnʉt.
\c 12
\p
\v 1 Es waanʉ ni'igʉ ja̱'a̱y jyantsyñaymyujkʉdʉ kana̱k mil es jyantsyñay'adijmujkʉnʉdʉ es ñaydyukta'anʉnʉdʉ. Es ja Jesús t'anma̱a̱y jawyiin ja 'yʉxpʉjkpʉty:
\p —Naygywentʉ'átʉdʉ miidsʉty es kʉdiibʉ mnaydyuk'ya''axʉʉgʉdʉt mʉt ja fariseeʉdyʉ lyevaduurʉ, di'ibʉ 'yandijpy ja wyinma̱'a̱ñ éxtʉmʉ ja̱'a̱y di'ibʉ nay'andíjʉdʉp jyiky'attʉ tʉy'a̱jtʉn mʉʉt.
\v 2 Tʉgekyʉ di'ibʉ ijtp yu'utsy tyam, óknʉm yajpa̱a̱dʉt.
\v 3 Es di'ibʉ tʉ xykyajxy ayu'udsyʉ koots, yajnija̱'a̱dyaapy xʉʉñ ma̱ nidʉgekyʉ ja̱'a̱yʉty.
\s Pʉ́n yajtsʉ'ʉgʉp
\p
\v 4 ’Miits mʉgu'uktʉjkʉty, tyam n'anʉʉmʉdʉ ko kyaj xytsyʉ'ʉgʉdʉt di'ibʉ nini'x ya'e'kypy es óknʉm kyaj mba̱a̱t ti tnakytyúñ.
\v 5 N'anʉʉmʉdʉ di'ibʉ mdsʉ'ʉgʉdʉp: tsʉ'ʉgʉdʉ Dios di'ibʉ ko tʉ tpʉjkʉ ja ja̱'a̱yʉ jyiky'a̱jtʉn, myʉda̱jtp ja kutujkʉn es pyʉjta̱'a̱gʉt ma̱ ja ayoodákn. Tʉy'a̱jtʉn, tsʉ'ʉgʉdʉ yʉ'ʉ.
\p
\v 6 ’Tyo'ktʉp ja ja̱'a̱y mʉgoxk ja joonu'unk mʉt majtskʉ meeñu'unk, ¿kʉdii? Es ja Dios kyaj tja̱'a̱ydyʉgóy ni tu'uk yʉ taadʉty.
\v 7 Katʉ miits mdsʉ'ʉgʉdʉ. Dios ni'igʉ miits mdsókʉdʉ kʉdiinʉm mayʉ joonu'ungʉty. Pes extʉ mwa̱a̱y Dios ya'ijtypy madsyoy.
\s Pʉ́nʉty ja Jesús 'yʉxka̱jptʉp mayjya'ayóty
\p
\v 8 ’Es n'anʉʉmʉdʉ ko nidʉgekyʉ ja̱'a̱yʉty di'ibʉts xy'axá̱jʉp éxtʉmʉ wyindsʉnʉn ya̱ mayjya'ayóty, ʉjts, ja Naxwíñʉdʉ Ja̱'a̱yʉdyʉ Kyudʉnaabyʉ, nandʉ'ʉnʉts n'axa̱jʉ yʉ'ʉjʉty ma̱ ja Dios 'yity mʉt ja 'yanklʉs.
\v 9 Es di'ibʉts kyaj xy'axa̱jʉ mayjya'ayóty ya̱ naxwiiñ, ʉj kyajts n'axa̱jʉ nandʉ'ʉn ma̱ ja Dios 'yity mʉt ja 'yánklʉsʉty.
\v 10 Es oytyim pʉ́nʉty di'ibʉts ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, xykya̱jxpátp axʉʉk, mba̱a̱t yʉ'ʉ yajme'xy. Per di'ibʉ myʉ''ʉdʉgeepy myʉga̱jxtʉgeepy ja Espíritʉ Santʉ, yʉ'ʉ mʉt ñaybyekytyʉ́kʉdʉt es ni na̱'a̱ Dios kyapojpʉma'xʉdʉt.
\p
\v 11 ’Es ko ja ja̱'a̱yʉty myajnʉjxʉdʉt ma̱ ja teedyʉty, o ma̱ ja justísʉty, o ma̱ ja di'ibʉ ni'igʉ myʉ́jʉty ja kyutujkʉn, katʉ mnaydyukjotmaydyúñʉty wi'ix m'adsówʉt o wi'ix mjʉna̱'a̱nʉt,
\v 12 ja'a ko yʉ Espíritʉ Santʉ yʉ'ʉ mmo'oyʉdʉp ja ayuk wi'ix mjʉna̱'a̱nʉt.
\s Kudsʉ'ʉgʉ ja mʉkja̱'a̱y'át
\p
\v 13 Net tu'ugʉ ja̱'a̱y t'anma̱a̱y ja Jesús:
\p —Ya'ʉxpʉjkpʉ, anʉʉmʉts ja nmʉga'ax es dyajwa̱'xʉt ja kuma̱'a̱ñ esʉts xymyo'oyʉt di'ibʉts ʉj xypyatp.
\p
\v 14 Es ja Jesús 'yadsoojʉ:
\p —Mexy, ¿pʉ́nʉts ʉj tʉ xypyʉjta'aky éxtʉmʉ fwezʉn o di'ibʉ yajwa̱'xʉp ja kuma̱'a̱ñ?
\p
\v 15 Nandʉ'ʉn ja Jesús t'ak'anma̱a̱ydyʉ ja ja̱'a̱yʉty:
\p —Ixtʉ es naygywentʉ'átʉdʉ miidsʉty es katʉ xy'adsoktʉ ni tii, ja'a ko kyaj ja̱'a̱y yʉ'ʉyʉ ttimtukjiky'aty ko mayʉ pyʉjta'aky tmʉdaty.
\p
\v 16 Net ja Jesús tpʉjtáky tu'ugʉ ijxpajtʉn:
\p —Tu'ugʉ yedyʉjk mʉkja̱'a̱y 'yijty. Yʉ pyʉjta'aky jantsy wyindʉʉ.
\v 17 Ta ja mʉkja̱'a̱y ja wyinma̱'a̱ñ dyaj'yo'oy: “¿Tits ndúnʉp? Kyajts nmʉdaty ma̱ts nbʉjkʉ'ʉgʉdʉ tya̱dʉ pʉjta'aky.”
\v 18 Es dyaj'yo'oy ja wyinma̱'a̱ñ, ta jyʉnáñ: “Tʉts nnijawʉ tits ndúnʉp. N'ok'yajpʉde'egyʉdsʉ tya̱dʉ ndsa'xʉts es ngójʉdʉts waanʉ mʉj. Es jápʉts nbʉjkʉ'kta̱'a̱yʉt tʉgekyʉ di'ibʉts tyam tʉ nyajpʉde'eky es tʉgekyʉ di'ibʉts nmʉda̱jtypy.
\v 19 Nétʉts nnay'anʉʉmʉdʉt: Mmʉda̱jtypy may pʉjke'eky di'ibʉ myajtúnʉp kana̱k jʉmʉjt. Po'x. Kay uuk. Jotkujk'át.”
\v 20 Perʉ Dios 'yanma̱a̱yʉ: “¡Winma̱'a̱ñdyúk! Tya̱dʉ ux m'ooga̱'a̱ñ, es di'ibʉ mmʉda̱jtypy pʉjke'eky, ¿pʉ́n myʉwʉ'ʉmʉp?”
\p
\v 21 Es ja Jesús 'yakjʉnáñ:
\p —Es dʉ'ʉn jyátʉt ja ja̱'a̱yʉty nidʉgekyʉ di'ibʉ pyʉjta'aky ñipʉjkpajttʉp kyʉ'ʉm oy'a̱jtʉngyʉjxm, per kyaj tnipʉjkpáttʉ ja oy'a̱jtʉn ma̱ Dios.
\p
\v 22 Oknʉm ja Jesús t'anma̱a̱y ja 'yʉxpʉjkpʉty:
\p —Pa̱a̱ty n'anʉʉmʉdʉ miidsʉty, katʉ xywyinmaydyʉ di'ibʉ mjʉ'xtʉp es di'ibʉ mwit'áttʉp.
\v 23 Pes mʉt yʉ'ʉyʉ yʉ mjiky'a̱jtʉn es yʉ mnini'x di'ibʉ Dios tʉ mdukmay'átyʉty, yʉ'ʉ dʉ'ʉn ni'igʉ oy kʉdiinʉm ja mje'xy mbeky esʉ mwit mnijam.
\v 24 Ixtʉ jeeky. Kyaj ñi'iptʉ es kyaj tsyiktʉ es kyaj tmʉdattʉ tsya'x es wi'ix ja Dios myo'oyʉty ja jye'xy. ¡Es miidsʉty ni'igʉ mjantsyyajtsóktʉ kʉdiinʉmʉ jeegyʉty!
\v 25 Ni pʉ́n miidsʉty mba̱a̱t kyaj ñayyajjiky'átyʉty waanʉ jeky, oy mʉk mjanayjyotmaydyuunʉbʉ.
\v 26 Es pʉn kyaj mba̱a̱t xytyundʉ tadʉ di'ibʉ waanʉ, ¿ti ko mnayjyotmaydyúnʉdʉ mʉt ja wiinkpʉ?
\p
\v 27 ’Ixtʉ wi'ix yoñ ja pʉjy. Kyaj tyundʉ es kyaj tya̱'a̱ktʉ. Per n'anʉʉmʉ ko ni ja rey Salomonk mʉt tʉgekyʉ tsyuj'a̱jtʉn, kyaj dyʉ'ʉnʉty éxtʉm yʉ'ʉ.
\v 28 Es pʉnʉ Dios yajpijpy yʉ pʉjy di'ibʉ pi'tsp pojʉn es jakumbom yajno'knʉ, ¿ti ko kyaj xymyʉbʉktʉ es ʉdsa̱jtʉm yʉ'ʉ xywyítxʉm? ¿Ti ko miidsʉty je'eyʉ waanʉ xymyʉbʉktʉ?
\v 29 Katʉ mjotmay'ooktʉ es katʉ xy'ʉxta̱'a̱ydyʉ ti mjʉ'xtʉp es ti m'uuktʉp.
\v 30 Tʉy'a̱jtʉn ko yʉ ja̱'a̱yʉty di'ibʉ kyaj tmʉdúñ ja Dios, yʉ'ʉyʉ sitʉy naydyukjotmaydyuunʉp tʉgekyʉ tya̱a̱dʉ. Per miidsʉty katʉ dʉ'ʉn xytyundʉ, ja'a ko Dios Teety yʉ'ʉ mDeety'a̱jttʉp es yʉ'ʉ ñija̱'a̱p ko mdʉgoy'a̱jtxʉbʉ tya̱a̱dʉ.
\v 31 Naydyukjotmaydyúnʉdʉ miidsʉty es mjiky'áttʉt éxtʉm ja Dios dyajkutíky, es net yʉ'ʉ mmo'oyʉdʉt tʉgekyʉ di'ibʉ mdʉgoy'a̱jtxʉp.
\p
\v 32 ’Katʉ mdsʉ'ʉgʉdʉ. Ʉjts miits ngwentʉ'áttʉp éxtʉm ja borreegʉ kwentʉ'a̱jtpʉ tkwentʉ'aty ja byorreegʉ. Nandʉ'ʉn yʉ Dios Teety 'yoyjya̱'a̱p es myajnʉjxʉdʉt ma̱ yʉ'ʉ yajkutíky.
\s Pʉjkʉ'ʉktʉ ja m'oy'a̱jtʉn tsa̱jpótm
\p
\v 33 ’Tooktʉ di'ibʉ mmʉda̱jttʉp, es mo'oydyʉ di'ibʉ tʉgoy'a̱jtxʉp; tukjottʉgoydyʉ abʉjkʉn di'ibʉ ni wi'ix kyajátʉt, ja oy'a̱jtʉn jam tsa̱jpótm, ma̱ kyaj tyʉ́kʉt ja ma'tspʉ es ni tii di'ibʉ yajwindʉgóyʉp.
\v 34 Mʉt ko ma̱ xymyʉdaty pʉjke'eky yʉ m'oy'a̱jtʉn, nan japʉ mjot mwinma̱'a̱ñ 'yity.
\p
\v 35 ’Nayjyʉjp'íxʉdʉ mʉt ja mlamprʉ es xyajtóyʉt.
\v 36 Dʉ'ʉn éxtʉmʉ po'oduumbʉ di'ibʉ 'yawijxypy yʉ wyindsʉ́n ko jyʉmbítʉt ma̱ tʉ 'yotsy pʉjkpʉ nigaabyʉ, es netyʉ dya''awa̱'a̱dsʉt ja tʉjk a̱a̱ ko kyuga̱jxʉt.
\v 37 Jotkujk yʉ po'oduumbʉ di'ibʉ ja wyindsʉ́n pátʉp wijy ko jya̱'tʉt. Tʉy'a̱jtʉn n'anʉʉmʉdʉ ko ja wyindsʉ́n dyajnaxwaadsʉt ma̱ ja meesʉ es twingʉ'ʉyʉt es dyajkáyʉt.
\v 38 Es oy jya̱'tʉt tsu'pʉn, o kajamóñʉm es yajpa̱a̱dʉt wijy, jotkujkʉ tadʉ po'oduumbʉ.
\v 39 Es mnija̱'a̱dʉp miidsʉty kooxyʉp yʉ kudʉjk tnijawʉ ti oorʉ jya̱'tʉt yʉ ma'tspʉ, nétxyʉp 'yity wijy es kyajxyʉp ja toombʉ tyʉkʉ.
\v 40 Miidsʉty nandʉ'ʉn nayjyʉjp'íxʉdʉ, ja'a ko kyaj xyñijáwʉdʉ na̱'a̱ ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, nja̱'tʉdʉts.
\s Oydyuumbʉ es di'ibʉ kyaj
\p
\v 41 Net ja Peedrʉ dyajtʉʉy:
\p —Windsʉ́n, ¿ti tʉ xypyʉjta'agyʉ tya̱dʉ ijxpajtʉn je'eyʉ mʉt ʉʉdsʉty, o mʉt nidʉgekyʉ ja̱'a̱y?
\p
\v 42 Es ja Jesús jyʉnáñ:
\p —N'okpʉjtákʉm tu'ugʉ kudʉjk tmʉdaty tu'ugʉ tyuumbʉ di'ibʉ kuwijy es tyiimpy ti wyindsʉ́n tsyejpy. Ta ttukmʉnikaagʉ ja tyʉjk es dyajkáy dyaj'uugʉt ja po'oduumbʉty di'ibʉ jam.
\v 43 Jotkujk ja tuumbʉ ko ja wyindsʉ́n jya̱'tʉt es pya̱a̱dʉdʉt tkuydyúñ di'ibʉ tʉ yajtuknipéky.
\v 44 Tʉy'a̱jtʉn n'anʉʉmʉdʉ ko yʉ windsʉ́n ttuknipʉ́kʉdʉp tʉgekyʉ di'ibʉ myʉda̱jtypy.
\v 45 Per pʉnʉ tadʉ po'oduumbʉ jotjʉna̱a̱mp: “Yʉ nwindsʉ́nʉts kyaj tsyojkja̱'ta̱'a̱ñ”, es net axʉʉk ttuuñ ja wiinkpʉty ja po'oduumbʉ, es yʉ'ʉ je'eyʉ kyaay 'yuknʉ es myúkʉnʉ.
\v 46 Ko ja wyindsʉ́n jya̱'tʉt ja oorʉ ma̱ yʉ'ʉ kyaj tjʉjp'íxy, net tyukkumʉdówʉdʉt jantsy mʉk es yajpʉjta̱'a̱gʉt ma̱ ja ja̱'a̱y di'ibʉ kyaj tkuydyundʉ 'yayuk.
\p
\v 47 ’Ja'a ko yʉ po'oduumbʉ di'ibʉ ñija̱'a̱p wi'ix yʉ wyindsʉ́n tjatseky es kyaj dʉ'ʉn tkuydyúñ es kyaj tmʉmʉdoy, nandʉ'ʉn yajtukkumʉdówʉt mʉj.
\v 48 Per ja po'oduumbʉ di'ibʉ kyaj tnijawʉ wi'ix ttseky ja wyindsʉ́n es ttuñ di'ibʉ nitʉjkʉp ja tʉydyu'unʉn, je'eyʉ waanʉ yajtukkumʉdówʉt. Ja'a ko di'ibʉ wyindsʉ́n tʉ myo'oyʉty yʉ kyutujkʉn, yʉ'ʉ ana'amʉdʉp mʉk ja wyindsʉ́n, es di'ibʉ ni'igʉ yʉ kyutujkʉn tʉ myo'oyʉty yʉ wyindsʉ́n, nan ni'igʉ 'yana'amʉdʉt.
\s Jesuskyʉjxmʉ ja̱'a̱y yajtsiptʉ́kʉdʉ
\p
\v 49 ’Tʉts nmiñ naxwiiñ es nyajmíñʉts ja jʉʉn. Es njantsytsyékyʉts esxyʉp tyam tyoy.
\v 50 Koonʉmts n'ayówʉdʉts, es njotmay'oogʉdʉts extʉ ko yajkuydyúnʉt.
\v 51 ¿Tii mjʉnándʉp miidsʉty kots ʉj tʉ nmʉmíñ yʉ jotkujk'a̱jtʉn ya̱ naxwiiñ? ¡Kyaj dyʉ'ʉnʉty! Je'eyʉ jotmay nyajmiiñʉts.
\v 52 Tyam ñaywya̱'xa̱'a̱nʉdʉ ja̱'a̱y di'ibʉ nimʉgoxk ijttʉp ma̱ tu'ugʉ tʉjk. Nidʉgʉʉk tmʉdsip'aty ja nimajtskpʉ, es ja nimajtskpʉ tmʉdsip'aty nidʉgʉʉkpʉ.
\v 53 Ja teety ttuk'ak'aty ja mya̱a̱nk, es ja ma̱a̱nk ttuk'ak'aty ja tyeety; es ja ta̱a̱k ttuk'ak'aty ja ñʉʉx, es ja nʉʉx ttuk'ak'aty ja tya̱a̱k; es ja xekxy naydyuk'ak'a̱jtʉdʉp ak ja'ajʉty.
\p
\v 54 Jesús nandʉ'ʉn t'anma̱a̱y ja ja̱'a̱y:
\p —Ko miits xy'ixtʉ yʉ yaak pyʉde'eky ma̱ xʉʉ tsyi'ity, net mjʉna̱'a̱ndʉ: “Tu'uja̱a̱mp”, es net tyu'uy.
\v 55 Es ko jyʉmbojy, net mjʉna̱'a̱ndʉ ko 'yana̱'a̱ñ, es net 'yañ.
\v 56 Miidsʉty di'ibʉ nay'andíjʉdʉp es jyiky'attʉ tʉy'a̱jtʉn mʉʉt, mnija̱'a̱dʉp wi'ix jyata̱'a̱ñ ko pyojy es ko yaak pyʉde'eky, ¿ti ko xykyanijáwʉdʉ di'ibʉ Dios tyiimpy tyam ma̱ miidsʉty?
\v 57 ¿Es ti ko miidsʉty kʉ'ʉm xykyapayo'oydyʉ éxtʉm pyaadyʉty?
\p
\v 58 ’Ko pʉ́n mni'ʉʉnʉdʉt es mnʉjxtʉ nimajtsk ma̱ ja kuduunk, nik oy ko mʉt mnayya'óyʉdʉt tu'am, kʉdiibʉ mnaymyʉnʉjxʉdʉt ma̱ fwezʉn, ja'a ko yʉ fwez mgʉyákʉdʉp ma̱ polʉsiiʉ, es mbʉjta̱'a̱gʉdʉt pujxndʉgóty.
\v 59 N'anʉʉmʉts mij, ko jap mdʉ́kʉt, nétnʉm mbʉdsʉ́mʉt koonʉm xykyʉbajtta̱'a̱yʉt tʉgekyʉ.
\c 13
\s Tsojkʉp es njodʉmbijtʉm
\p
\v 1 Net ja ja̱'a̱y tnimiindʉ ja Jesús es ttukmʉmadyaktʉ éxtʉmʉ Pilatʉ 'yadʉ'ʉtsy ko dya'eeky Galileeʉ ja̱'a̱yʉty ma̱ ja artal ko Dios twindsʉ'ʉgʉdʉ.
\v 2 Es ja Jesús jyʉnáñ:
\p —¿Mjʉnándʉp xytyijy miidsʉty ko ni'igʉ pyekyjya'ayʉdyʉ tya̱dʉ Galileeʉ ja̱'a̱yʉty di'ibʉ o'ktʉ es kyaj dyʉ'ʉnʉty ja wiinkpʉ Galileeʉ ja̱'a̱yʉty?
\v 3 Kyaj tyʉy'a̱jtʉnʉty. Per pʉn kyaj miits mjodʉmbittʉ, nandʉ'ʉn mdʉgooydya'aydyʉt.
\v 4 Es ma̱a̱nʉm yʉ potsyʉ kʉjxmbʉ di'ibʉ xyʉ'a̱jtypy Silo'ee jyity es dya'e'ky nima̱jmókx tʉgʉʉk ja ja̱'a̱y, ¿mjʉnándʉp xytyijy miidsʉty ko ni'igʉ yʉ'ʉ pyekyjya'ayʉty es kyaj ja wiinkpʉ ja̱'a̱y di'ibʉ Jerusalén es kyaj 'yo'ktʉ? ¡Kyaj tyʉy'a̱jtʉnʉty!
\v 5 Per pʉn miidsʉty kyaj mjodʉmbittʉ, nandʉ'ʉn mdʉgooydya'aydyʉt.
\s Iigʉ kepy éxtʉmʉ ijxpajtʉn
\p
\v 6 Net ja Jesús tpʉjtáky tu'ugʉ ijxpajtʉn:
\p —Tu'ugʉ yedyʉjk tmʉdaty tu'ugʉ iigʉ kepy ma̱ ja kyam, es oj ñejxy es t'ixa̱'a̱ñ pʉn jamʉ iigʉ tsa̱'a̱m. Es ni ti tkapaty.
\v 7 Net t'anma̱a̱y ja ja̱'a̱y di'ibʉ kywentʉ'a̱jtypy ja iigʉ: “Ix. Tyámʉts tʉgʉk jʉmʉjt kujk nmiñ es n'ʉxta̱'a̱yʉdsʉ tyʉʉmbʉ tadʉ iigʉ es kyajts ti nba̱a̱ty. Tim po'tʉ'ʉk. Kʉdiibʉ je'eyʉ 'yadsípʉt.”
\v 8 Es ja ja̱'a̱y di'ibʉ kywentʉ'a̱jtypy ja kam 'yadsooy: “Windsʉ́n, wa'an t'ak'ity jatuk jʉmʉjt. Tyámʉts ja nax nda̱j'yúngʉt es mbʉjta̱'a̱gʉdʉts ja abu'udʉ.
\v 9 Es kots dʉ'ʉn ndúnʉt, net n'ijxʉm kooxyʉp nyajtʉʉmp'átʉt ma̱ tadʉ jʉmʉjt myiñ. Es pʉn kyaj, ta xypyo'tʉ'ʉgʉt.”
\s Jesús dya''agʉda'aky tu'ugʉ toxytyʉjk jʉdsʉguty
\p
\v 10 Es ma̱ tu'ugʉ sa̱a̱bʉdʉ xʉʉ ja Jesús ya'ʉxpeky ma̱ ja tsa̱jptʉjk,
\v 11 es ta tu'ugʉ toxytyʉjk di'ibʉ pʉjkʉp ma̱jmókx tʉgʉk jʉmʉjt. Yʉ ka'oybyʉ tʉ yajwʉ'ʉmʉnʉ jʉdsʉguty, es kyaj mba̱a̱t ñakytyʉy.
\v 12 Es ko ja Jesús 'yijxʉ, net oj dyaxʉ es 'yanma̱a̱yʉ:
\p —Ʉjts tyam mij nya''agʉda̱'a̱gʉp.
\p
\v 13 Es net ja kyʉ'ʉ ttuknikooñ ja toxytyʉjk, es net ja ñini'x tyʉʉda̱a̱y. Ta ja toxytyʉjk t'awda̱jty ja Dios.
\v 14 Es jyot'ambejky ja di'ibʉ ijtp windsʉ́n ma̱ ja tsa̱jptʉjk, ja'a ko Jesús tʉ dya''agʉda'aky ma̱ sa̱a̱bʉdʉ xʉʉ tadʉ toxytyʉjk. Es ja tsa̱jptʉjkʉ ñʉwindsʉ́n t'anma̱a̱y ja ja̱'a̱yʉty:
\p —Tu'uk tu'ugʉ sʉma̱a̱n tʉdujk xʉʉ mba̱a̱t mmindʉ es m'agʉda̱'a̱ktʉt, per sa̱a̱bʉdʉ xʉʉ kyaj mba̱a̱t.
\p
\v 15 Net ja Jesús 'yadsooy:
\p —Miidsʉty di'ibʉ nay'andíjʉdʉp es jyiky'attʉ tʉy'a̱jtʉn mʉʉt, ¿ti kyaj miidsʉty sa̱a̱bʉdʉ xʉʉ xymyʉgájʉdʉ mburrʉ es ja mdsa̱jka̱a̱ es xyajnʉjxtʉ nʉ'ukpʉ?
\v 16 Es tya̱dʉ toxytyʉjk yʉ'ʉ Abra̱a̱nʉ tyʉʉmp 'ya̱a̱ts, es ja mʉjku'ugópk Satanás tʉ ya'ítyʉty mʉdʉ tadʉ pa̱'a̱m ma̱jmókx tʉgʉk jʉmʉjt, ¿ti ko kyaj 'yagʉda̱'a̱gʉdʉ tya̱dʉ toxytyʉjk sa̱a̱bʉdʉ xʉʉ?
\p
\v 17 Es ko dʉ'ʉn ja Jesús jyʉnáñ, nidʉgekyʉ myʉdsip tsyoydyuunda̱a̱ydyʉ, es ja ja̱'a̱yʉty di'ibʉ tʉ tmʉdoy xyondakta̱a̱ydyʉ mʉt ja mʉj'a̱jtʉn di'ibʉ Jesús tʉ ttuñ.
\s Mortás tʉʉmt éxtʉmʉ ijxpajtʉn
\p
\v 18 Net ja Jesús jyʉnáñ:
\p —¿Wi'ix ya'ixy ja Diosʉ kyutujkʉn, es tits mba̱a̱t mʉʉt nyajkijxyʉ?
\v 19 Dʉ'ʉn éxtʉm tu'ugʉ mortás tʉʉmt di'ibʉ tu'ugʉ yedyʉjk tʉ twʉjy es yajnijeepy mʉdʉ nax, es yoñ éxtʉm tu'ugʉ kepyʉn es ja joonʉty tpʉjta̱'a̱ktʉ pya'an ma̱ tadʉ xye'entsy.
\s Levaduurʉ éxtʉmʉ ijxpajtʉn
\p
\v 20 Es 'yakjʉnáñ ja Jesús:
\p —¿Ti mba̱a̱t mʉt kyijxyʉ ja Diosʉ kyutujkʉn?
\v 21 Dʉ'ʉn yʉ'ʉ éxtʉm ja levaduurʉ di'ibʉ tu'ugʉ toxytyʉjk pyʉjtákypy ma̱ mayʉ arinʉ es ttuktij'yo'oy koonʉm ñaydyuktʉjkʉdya'ayʉty.
\s Tʉjk a̱a̱ xu'utspʉ
\p
\v 22 Es ja Jesús dyaj'yo'oy ja tyu'u, ñejxy Jerusalén es ñaxy ka̱jpnga̱jpn es ya'ʉxpeky.
\v 23 Es nidu'uk yajtʉʉjʉ:
\p —Windsʉ́n, ¿je'eyʉ niwaanʉ di'ibʉ nitsokp?
\p Es ja Jesús 'yadsooy:
\p
\v 24 —Jottʉgoydyʉ es mdʉ́kʉdʉt ma̱ tʉjk a̱a̱ xu'utspʉ, ja'a ko may ja ja̱'a̱y tyʉkʉya̱'a̱ndʉ, es kyaj mba̱a̱t tyʉ́kʉdʉ.
\v 25 Es ko ja kudʉjk pyʉdʉ'ʉgʉt es dya''adúkʉt ja tʉjk a̱a̱, net miidsʉty di'ibʉ jap tʉja̱'p kyóxtʉp ja tʉjk a̱a̱, es mjʉna̱'a̱ndʉt: “Windsʉ́n, ya''awa̱'a̱ts ja mdʉjk esʉts ndʉ́kʉdʉt.” Es ja kudʉjk 'yadsówʉt: “Kyajts nnijawʉ mbʉ́n miidsʉty es ma̱ mdsoondʉ.”
\v 26 Es miidsʉty xy'anʉʉmʉt: “Ʉdsa̱jtʉm oj n'okka̱'a̱yʉmbʉ ti'igyʉ, es mijts xya'ʉxpʉjk nga̱jpnótyʉts.”
\v 27 Es yʉ kudʉjk m'adsówʉdʉt: “Tʉ n'anʉʉmʉdʉ ko kyajts nnijawʉ ma̱ mdsoondʉ. ¡Jʉga'aktʉ ja ya̱a̱ nidʉgekyʉ miidsʉty pojpʉ tuumbʉty!”
\v 28 Jam ma̱ ja̱'a̱y jyʉ'ʉy ya̱'a̱xtʉt es ñaydyʉtska̱a̱dʉdʉt mʉt ja ayo'on, jam nandʉ'ʉn miits m'íttʉt ko xy'íxtʉt yʉ Abra̱a̱n, Isa̱a̱ esʉ Jakoob es nidʉgekyʉ Diosʉ kyuga̱jxpʉ ma̱ Diosʉ kyutujkʉn, es miits myaj'yojkpʉdsʉmándʉp tʉja̱'p.
\v 29 Es ja ja̱'a̱y myina̱'a̱ndʉ jagam ma̱ xʉʉ pyʉdsemy es ma̱ xʉʉ tsyi'ity es ma̱ jʉmboj es ma̱ yukpoj, es ñaxwaatstʉt es kyáydyʉt ma̱ Diosʉ kyutujkʉn.
\v 30 Es ta di'ibʉ tyam ʉx'ok, yʉ'ʉ nʉjxtʉp jawyiin; es di'ibʉ tyam jawyiin, yʉ'ʉ íttʉp ʉx'ok.
\s Jesús tniya'axy ja jerusaléngʉdʉ ja̱'a̱yʉty
\p
\v 31 Es net jya̱jttʉ nija'ajʉty ja fariseeʉty, es t'anma̱a̱ydyʉ ja Jesús:
\p —Tsoon ja ya̱a̱, ja'a ko ja Eroodʉs mya'oogánʉp.
\p
\v 32 Ta ja Jesús 'yadsooy:
\p —Nʉjx anʉʉmʉdʉ tadʉ wax kots ʉj njʉna̱'a̱ñ: “Ʉjts nyajpʉdsʉmaambyʉts yʉ ka'oybyʉ es nya''agʉda̱'a̱gʉdʉts yʉ puma̱'a̱y, es nyajkʉxa̱'a̱ñʉts yʉ nduungʉts extʉ ko Dios jyʉna̱'a̱nʉtnʉm.”
\v 33 Es mba̱a̱dʉts nyaj'yo'oyʉdʉts ja ndu'u extʉ koonʉmts nja̱'tʉdʉts Jerusalén. Mʉt ko kyaj mba̱a̱t tu'ugʉ Diosʉ kyuga̱jxpʉ 'yeeky pʉn kyaj jyápʉty Jerusalén.
\p
\v 34 Es ja Jesús 'yakjʉnáñ:
\p —Miits Jerusalén ja̱'a̱yʉty, miits mya'o'ktʉp yʉ Diosʉ kyuga̱jxpʉty es xykyuka̱'a̱tstʉ ja di'ibʉ Dios kyejxypy. Kana̱k ok miidsʉty njayajmuka̱'a̱ñ éxtʉmʉ tutta̱a̱k dyajmíky ja tyutku'ungʉty kyaknbatkʉ'p, per kyaj xykyupʉjktʉ.
\v 35 M'íxtʉp miidsʉty ko yʉ mdʉjk wyʉ'ʉma̱'a̱ñ kubak. Es n'anʉʉmʉdʉ ko kyajts xyñaky'íxtʉt extʉ ko tpa̱a̱dʉt ja xʉʉ es miits mjʉna̱'a̱ndʉt: “Dios kyunu'xʉp ja di'ibʉ miimp Nindsʉn'a̱jtʉmgyʉjxm.”
\c 14
\s Jesús dya''agʉda'aky ja puma̱'a̱y di'ibʉ myʉda̱jtypy ja ki'ix
\p
\v 1 Ma̱ tu'ugʉ sa̱a̱bʉdʉ xʉʉ ja Jesús ñejxy kaabyʉ ma̱ tu'ugʉ windsʉ́n fariseeʉ tyʉjk, es támdʉm pya'íxyʉty yʉ wiinkpʉ fariseeʉty.
\v 2 Es jam Jesús wyinduuy tu'ugʉ puma̱'a̱y di'ibʉ myʉda̱jtypy ja ki'ix.
\v 3 Net ja Jesús dyajtʉʉy ja fariseeʉty es di'ibʉty tsa̱jptʉgóty ya'ʉxpʉjktʉp:
\p —¿Ti ja ana'amʉn yajkutijkypy, es nya''agʉdákʉm ja puma̱'a̱y ma̱ sa̱a̱bʉdʉ xʉʉ, o kyajʉ?
\p
\v 4 Es yʉ'ʉjʉty wyʉ'ʉmda̱a̱ydyʉ amoñʉ. Net ja Jesús tkʉ'ʉnitooñ ja puma̱'a̱y es dya''agʉdaky, es t'anma̱a̱y es ñʉjxʉt.
\v 5 Net ja Jesús t'anma̱a̱y ja fariseeʉty:
\p —Pʉn miidsʉty yʉ m'u'unk o mdsa̱jka̱a̱ kuna̱jxp ma̱ tu'ugʉ nʉda̱jñ, ¿ti kyaj mij xyjuudʉt pójʉnʉ, oy jyatimsa̱a̱bʉxʉʉjʉty?
\p
\v 6 Es kyaj 'yadsoojʉmbijttʉ ni wi'ix.
\s Yajwóy ma̱ pʉjk ukʉn
\p
\v 7 Es ko t'ijxy ja Jesús yʉ ja̱'a̱yʉty di'ibʉ tʉ yajwóy ko twin'ixtʉ yʉ uñaaybyajn di'ibʉ windsʉ'kʉn mʉʉt ma̱ meesʉ, net myooyʉdʉ tadʉ ka̱jxwíjʉn:
\p
\v 8 —Ko pʉ́n mwówʉdʉt ma̱ tu'ugʉ xʉʉ ma̱ ja̱'a̱y pyʉka̱'a̱ñ, katʉ m'u'uñʉ ma̱ ja uñaaybyajn ja jʉjp'ámbʉ. Mba̱a̱t myiñʉ wiinkpʉ ja̱'a̱y di'ibʉ ni'igʉ mʉj ijtp es kʉdii mij,
\v 9 es ja kudʉjk m'anʉʉmʉdʉt: “Wa'tsʉ'ʉk jaa es yʉ ja̱'a̱y 'yu'uñʉt.” Es mij mnʉjxʉt mʉt ja tsoydyu'un extʉ jam ʉx'am, es m'u'uñʉt.
\v 10 Tyam nga̱jxwijy es ko myajwówʉt, u'uñʉ jam ʉx'am. Es ko myínʉt di'ibʉ tʉ mwóyʉty, net m'anʉʉmʉdʉt: “Mʉtnaymyaayʉbʉ, nax yamdsoo ma̱ uñaaybyajn di'ibʉ myʉda̱jtypy ja windsʉ'kʉn.” Es dʉ'ʉn xy'axá̱jʉt ja windsʉ'kʉn ma̱ ja ja̱'a̱y 'yu'uñʉdʉ mʉt mij ma̱ ja meesʉ.
\v 11 Di'ibʉ naymyʉjpʉjtákʉp, yʉ'ʉ Dios puwijtsʉp; es di'ibʉ naybyʉjtákʉp yuunk naxypyʉ, yʉ'ʉ Dios ya'ítʉp mʉj.
\p
\v 12 Es ja Jesús t'anma̱a̱y nandʉ'ʉn ja kudʉjk di'ibʉ tʉ twoy:
\p —Ko xywyówʉt ja ja̱'a̱y kaabyʉ, katʉ xywyowdʉ yʉ mmʉtnaymyaayʉbʉ es ja mmʉgu'uktʉjk, o mmʉdʉjkpa̱'a̱, o mʉkja̱'a̱ydyʉjk, di'ibʉ óknʉm mij mwówʉdʉp nandʉ'ʉn.
\v 13 Kyaj dyʉ'ʉnʉty. Ko ja̱'a̱y xywyówʉt ma̱ xʉʉ xytyuna̱'a̱ñʉty, mwówʉp yʉ ayoobʉ ja̱'a̱y, yʉ ʉxneybyʉ es yʉ wiintspʉ.
\v 14 Pʉn mdiimbyʉ dʉ'ʉn, mgunu'xʉdʉp ja Dios, ja'a ko yʉ'ʉjʉty kyaj mba̱a̱t dyajjʉmbíttʉ. Dios myajjʉmbijtxʉdʉp ma̱ naty jyikypyeky ja ja̱'a̱yʉty di'ibʉ jiky'a̱jttʉp tʉy'a̱jtʉn mʉʉt.
\s Di'ibʉ rey tyuun ko 'yu'unk pyejky
\p
\v 15 Es ko tmʉdooy yʉ tya̱a̱dʉ, tu'ugʉ di'ibʉ naty jam uñaapy ma̱ ja meesʉ t'anma̱a̱y ja Jesús:
\p —¡Jotkujk di'ibʉ kaapy ma̱ ja Diosʉ kyutujkʉn!
\p
\v 16 Net ja Jesús jyʉnáñ:
\p —Tu'ugʉ kudʉjk ttuna̱'a̱ñ tu'ugʉ mʉj xʉʉ. Net twooy may ja ja̱'a̱yʉty.
\v 17 Es óknʉm ma̱ ja oorʉ tpaty ma̱ 'ya'ux'ata̱'a̱ndʉ, tkejxy tu'ugʉ tyuumbʉ es t'anʉʉmʉt ja ja̱'a̱yʉty: “Mindʉ. Tʉ net yajpʉjtakta̱'a̱y tʉgekyʉ.”
\v 18 Es nidʉgekyʉ di'ibʉ tʉ twoy jyʉnandʉ: “Dʉ'ʉn xy'oknama'xʉt.” Tu'uk jyʉnáñ: “Ja'a ko tyámʉts tʉ njuy tu'ugʉ nax, es yʉ'ʉts nʉjx n'ixa̱'a̱ñ. Tunʉ may'a̱jtʉn, dʉ'ʉn xy'oknama'xʉt.”
\v 19 Es jatu'uk jyʉnáñ: “Yʉ'ʉts tʉ njuy mʉgoxk mankwernʉ yuubʉ, es yʉ'ʉts nʉjx n'ijxmatsa̱'a̱ñ pʉ́n yuup. Tun may'a̱jtʉn, dʉ'ʉn xy'oknama'xʉt.”
\v 20 Es jatu'uk jyʉnáñ: “Tyámʉts ndimpʉjkta̱'a̱y. Kyajts mba̱a̱t nnejxy.”
\v 21 Es ko ja tuumbʉ jyʉmbijty, net ja wyindsʉ́n t'anma̱a̱y tʉgekyʉ. Net ja wyindsʉ́n 'yajkʉ, es t'anma̱a̱y ja tyuumbʉ: “Nʉjx tyamyʉ woomúk yʉ ja̱'a̱yʉty di'ibáty mʉj tu'a̱a̱y mutsk tu'a̱a̱y, es xyajmínʉt ja ya̱a̱ nidʉgekyʉ ayoobʉ ja̱'a̱yʉty esʉ ʉxneybyʉ esʉ wiintspʉ.”
\v 22 Es óknʉm ja tuumbʉ t'anma̱a̱y ja wyindsʉ́n: “Tʉts nduñ éxtʉm tʉ mjʉna̱'a̱ñ, es tápnʉm 'yak'awa̱'a̱dsʉty yʉ luga̱a̱r.”
\v 23 Es ja wyindsʉ́n t'anma̱a̱y ja tyuumbʉ: “Nʉjx, ak'ix ma̱ ka̱jpnba̱'a̱ es ma̱ padu'u, es myíndʉt yʉ ja̱'a̱y esʉts yʉ ndʉjk 'yútsʉt.
\v 24 Ja'a ko di'ibʉts tʉ njawoy jawyiin es kyaj myindʉ, tyam kyajts nnakymyo'oyʉt es kyáyʉt.”
\p
\v 25 Es ma̱ tyimnejxy ja Jesús, pyanejxyʉty ja mayjya'ay. Ta ja Jesús 'yijxʉmbijty es jyʉnáñ:
\p
\v 26 —Pʉn xyñimina̱a̱mbʉts éxtʉmts yʉ n'ʉxpʉjkpʉ, jawyiinʉts xytsyókʉt ʉj es óknʉm yʉ mdeety mda̱a̱k esʉ mnʉdo'oxy es yʉ m'u'unk es yʉ mmʉga'axʉty, es mij kʉ'ʉm. Es pʉn kyajʉ dʉ'ʉn xytsyeky, kyaj mba̱a̱t m'ity éxtʉmdsʉ n'ʉxpʉjkpʉ.
\v 27 Es kyaj mba̱a̱t n'ʉxpʉjkpʉ'áty pʉn kyajts xypyadsooñ es mjiky'átʉt éxtʉm tu'ugʉ ja̱'a̱y di'ibʉ pyagiipy ja kyruuz ko 'yo'kʉn tninejxy.
\p
\v 28 ’Pʉn miits nidu'uk mgojaampy tu'ugʉ potsy kʉjxm, ¿kyaj jawyiin xy'oktúnʉt ja mgwentʉ es xy'íxʉt wi'ix xya''aba̱a̱dʉt?
\v 29 Es pʉn je'eyʉ tʉ xyñida̱jʉ ja mbotsy es kyaj mba̱a̱t xyñakyya''abety, nidʉgekyʉ ja̱'a̱yʉty mij mdukxi'igʉdʉt
\v 30 es jyʉna̱'a̱ndʉt: “Tadʉ ja̱'a̱y je'eyʉ tʉ tpojtse'egyʉ es kyaj t'ok'ya''abajnʉ.”
\p
\v 31 ’O pʉn tu'ugʉ rey mʉt ma̱jk mil yʉ syolda̱a̱dʉ tsyiptuna̱'a̱ñ mʉt jatu'ugʉ rey di'ibʉ myʉda̱jtypy i'px mil yʉ syolda̱a̱dʉ, ¿kyaj jawyiin tniwinmayʉ pʉn mada̱'a̱gʉp o kyaj?
\v 32 Es pʉn kyaj, netyʉ tkexy tu'ugʉ kyugajxy ko naty jagámnʉm myiñ ja myʉdsip es t'anʉʉmʉt ko wa'an tme'xy es dʉ'ʉñʉ 'yítʉt.
\p
\v 33 ’Nan nidu'ugʉty miidsʉty, pʉn kyaj xymyastu'uty tʉgekyʉ di'ibʉ mmʉda̱jtypy, kyaj mba̱a̱t m'ity éxtʉmts ʉj ja n'ʉxpʉjkpʉ.
\s Ka̱a̱n tyʉgooyñʉ ja tya̱'a̱mts'át
\p
\v 34 ’Yʉ ka̱a̱n oy. Per pʉn tʉgooyñʉp ja tya̱'a̱mts'át, ¿wi'ix mba̱a̱t ñakytyúñ?
\v 35 Kyaj ñaky'óyʉty, ni ma̱ nax es ni ma̱ ja abu'udʉ 'yity niko'obéty. Je'eyʉ dʉ'ʉñʉ ñatʉgooyñʉ. Di'ibʉ mʉdoodʉp, wa'an tjaygyúkʉdʉ.
\c 15
\s Borreegʉ di'ibʉ tʉgoy éxtʉmʉ ijxpajtʉn
\p
\v 1 Es ja yajkugʉbajtpʉtʉjk es pʉ́nʉty 'yandijtʉp pekyjya'ayʉty tnimʉjwa̱'ktʉ ja Jesús es tmʉdowa̱'a̱ndʉ ja 'yʉxpʉjkʉn.
\v 2 Pa̱a̱ty yʉ fariseeʉty es ja di'ibʉty tsa̱jptʉgóty ya'ʉxpʉjktʉp ñay'anma̱a̱yʉdʉ:
\p —Tya̱dʉ ja̱'a̱y 'yaxá̱jʉp ja pekyjya'ayʉty es kyaydyʉ mʉʉt.
\p
\v 3 Net ja Jesús tpʉjtáky tu'ugʉ ijxpajtʉn:
\p
\v 4 —Pʉn miidsʉty nidu'uk mmʉda̱jtypy tuk mʉgo'pxʉ mborreegʉ es tu'uk tyʉgoy, ¿ti kyaj xyajwʉ'ʉmʉdʉ tadʉ ma̱jta̱'px ma̱jmókx ma̱jtáxkpʉ jam aamyóty es nʉjx xy'ʉxta̱'a̱y di'ibʉ tʉ tyʉgoy extʉ ko xypya̱a̱dʉt?
\v 5 Es ko xypya̱a̱dʉt, xypyʉjta̱'a̱gʉt mgejkykyʉjxy es mxonda̱'a̱gʉt.
\v 6 Es ko mja̱'tʉt ma̱ mdʉjk, xy'anʉʉmʉdʉ mmʉtnaymyaayʉbʉ es ja mmʉdʉjkpa̱'a̱: “Xonda̱'a̱ktʉ mʉt ʉj, ko tʉts nba̱a̱ty ja nborreegʉts di'ibʉ naty tʉ tyʉgoy.”
\v 7 Tʉy'a̱jtʉn n'anʉʉmʉdʉ ko nandʉ'ʉn tam ni'igʉ ijt xondakʉn tsa̱jpótm mʉt tu'ugʉ pekyjya'ay jyodʉmbity es kyaj mʉt ja nima̱jta̱'px ma̱jmókx ma̱jtáxkpʉ ja̱'a̱y di'ibʉ nayjya̱'a̱dʉp ko jyiky'attʉ tʉy'a̱jtʉn mʉʉt es kyaj jyodʉmbittʉ.
\s Toxytyʉjk tpa̱a̱ty ja myeeñ éxtʉmʉ ijxpajtʉn
\p
\v 8 ’O pʉn tu'ugʉ toxytyʉjk myʉda̱jtypy ma̱jk ja meeñ es dyajtʉgóy tu'uk, ¿ti kyaj dyajtoye'eky ja jyʉʉn es tyʉ́kʉt padʉ'kpʉ jap tʉgoty es t'ʉxta̱'a̱yʉt odya'agyʉ extʉ ko tpa̱a̱dʉt?
\v 9 Es ko tpa̱a̱dʉt, net dyajnaymyúkʉdʉt ja myʉgu'uktʉjk es ja myʉdʉjkpa̱'a̱, es t'anʉʉmʉt: “Xonda̱'a̱ktʉ mʉt ʉj, ja'a ko tʉts nba̱a̱ty ja nmeeñ di'ibʉdsʉ naty tʉ nyajtʉgóy.”
\p
\v 10 Es ja Jesús jyʉna'añ nandʉ'ʉn:
\p —N'anʉʉmʉ miidsʉty, ta yʉ ijt xondakʉn ma̱ Dios ja 'yánklʉsʉty mʉt tu'ugʉ pekyjya'ay ko jyodʉmbity.
\s Mixy di'ibʉ axʉʉk jiky'a̱jt
\p
\v 11 Net ja Jesús tpʉjtáky jatu'ugʉ ijxpajtʉn:
\p —Tu'ugʉ yedyʉjk tmʉda̱jty majtskʉ mya̱a̱nk.
\v 12 Es ja mutskpʉ t'anma̱a̱y ja tyeety: “Tatʉ, xymyo'oyʉpts ja nguma̱'a̱ñʉts di'ibʉts ʉj xypyatp.” Net ja tyeety dyajwa'xy ja kuma̱'a̱ñ es tmooy.
\v 13 Es ko waanʉ 'yijty, net ja 'yu'unk ja mutskpʉ dyajmujkta̱a̱y ja kyuma̱'a̱ñ, es oj ñʉjxnʉ jagam ma̱ wiink naxwíñʉdʉ. Es jam dyajkʉjxta̱a̱y ja myeeñ mʉt ja axʉʉkpʉ jyiky'a̱jtʉn.
\v 14 Es ko ja myeeñ oj dyajkʉjxta̱a̱yñʉ tʉgekyʉ, net myiiñ ja mʉk yuu ma̱ tadʉ naxwíñʉdʉ, es 'yayu'a̱jnʉ.
\v 15 Net t'ʉxta̱a̱y ja tyuunk ma̱ tu'ugʉ yedyʉjk di'ibʉ jap kuga̱jpn. Net kyajxʉ kyamoty es tkwentʉ'átʉt ja ʉdsʉm.
\v 16 Esʉ tadʉ mixy jantsy yu'o'kʉp. Kyaj ti mʉʉt ja jyot dya'útsʉt, extʉ jyajʉ'xánnʉ di'ibʉ dʉ'ʉn kʉxʉ'kp éxtʉmʉ tsejtsyʉn, di'ibʉ ʉdsʉm jyʉ'xtʉp, es ni ti pʉ́n kyamo'oyʉty.
\p
\v 17 ’Net jyotmay'e'ky es jyʉnáñ: “¡Nʉ'ʉndsʉ ndeety tmʉdaty yʉ tuumbʉ ma̱ tyʉjk es tmo'oy ja kya'ay 'yukʉn nanadʉkʉ es ʉj ja ya̱a̱ n'ayóyʉts mʉt ja yuu!
\v 18 N'oknʉjxnʉts ma̱dsʉ ndeety, es n'anʉʉmʉdʉts: Tatʉ, tʉts nduundʉgóy mʉt ja Dios es mʉt mij.
\v 19 Kyajts xyñakyñitʉkʉ es mjʉna̱'a̱nʉt kots mij xy'u'ungʉty. Axá̱jʉgʉts éxtʉm tu'ugʉ mduumbʉ.”
\v 20 Net tyu'udʉjkʉ es ñejxy ma̱ ja tyeedyʉ tyʉjk. Es ko naty myíñʉm jagam, yʉ tyeety 'yijxʉ es pya''ayoojʉ, es ñejxy oj jyʉjp'yo'oyʉty, es 'yaxa̱jʉ es myʉnaanʉ es tsyu'xʉ.
\p
\v 21 ’Net ja 'yu'unk 'yanma̱a̱yʉ: “Tatitu'unk, tʉts nduundʉgóy ma̱ Dios es mʉt mij. Kyajts xyñakyñitʉkʉ es mjʉna̱'a̱nʉt kots mij xy'u'ungʉty.”
\v 22 Ta ja tyeety t'anma̱a̱y ja pyo'oduumbʉty: “Juuttʉ pojʉn yʉ wit ja oybyʉ es tukpʉjta̱'a̱ktʉ. Es mo'oydyʉ nandʉ'ʉn tu'ugʉ kyʉjiits es yʉ kyʉ'ʉk,
\v 23 es yajmíndʉ ja tsa̱jka̱a̱ ja ni'xpʉ es xya'oogʉt es nga̱'a̱y n'úkʉm es ja xʉʉ ndu'unʉm.
\v 24 Ja'a ko tya̱dʉ n'u'ungʉts dʉ'ʉn éxtʉm tʉ 'yo'knʉ, es tʉ jya'ty jatʉgok. Es tʉ naty tyʉgooyñʉ, es tyam tʉ nba̱a̱dyʉts jatʉgok.” Net ja xʉʉ ttuundʉ.
\p
\v 25 ’Es ja 'yu'unk ja ka'axkópk japʉ naty kamoty tyuñ. Es ko jyajty tʉjk wingón, net tmʉdooy ko ja̱'a̱y xyu'uxy es 'yatstʉ.
\v 26 Net dyaxʉ tu'ugʉ tuumbʉ es dyajtʉʉy: “¿Ti tuun ja̱jtʉp?”
\v 27 Es ja tuumbʉ 'yadsooy: “Yʉ m'utsy tʉ jya'ty esʉ mdeety tʉ tni'ana'amʉ es 'yoogʉt ja tsa̱jka̱ ni'x mʉt ko tʉ jya'ty oy mʉk.”
\v 28 Es ja ka'axkópk jyot'ambejky. Kyaj jap tyʉkʉyáñ. Net ja tyeety pyʉdseemy es 'yanma̱a̱yʉ: “Tʉkʉ.”
\v 29 Es yʉ'ʉ t'anma̱a̱y ja tyeety: “Mnija̱'a̱p na̱a̱k jʉmʉjtʉts mij tʉ nmʉdúñ, es kyajts mij nmʉdʉgoy ni na̱'a̱, es ni je'eyʉts xykyamo'oy tu'ugʉ tsyibu'unk es ndúnʉdʉts yʉ nxʉʉ mʉdʉdsʉ nmʉtnaymyaayʉbʉ.
\v 30 Es tyam tʉ jya'tyʉ tadʉ m'u'unk di'ibʉ mmeeñ axʉʉk tʉ ttuñ mʉt ja kujeñdyo'oxyʉty, es tʉ xya'eeky yʉ tsa̱jka̱ ni'x mʉt ko tʉ jyʉmbity.”
\p
\v 31 ’Net ja tyeety jyʉnáñ: “Nitʉ, mij dʉ'ʉñʉm m'ity mʉt ʉjts, es tʉgekyʉ di'ibʉts ʉj nmʉda̱jtypy, mijtsʉ mja'a.
\v 32 Es tyam oy ndu'unʉm tya̱dʉ xʉʉ es nxondákʉm, mʉt ko tya̱dʉ m'utsy dʉ'ʉn éxtʉm ko tʉ 'yo'knʉ naty, es tyam tʉ jyʉmbity jiiky. Tʉ naty tyʉgooyñʉ, es tyam tʉ nbátʉm jatʉgok.”
\c 16
\s Tuumbʉ di'ibʉ axʉʉk myʉdiimpy ja wyindsʉ́n éxtʉmʉ ijxpajtʉn
\p
\v 1 Nandʉ'ʉn ja Jesús t'anma̱a̱y ja 'yʉxpʉjkpʉtʉjk:
\p —Jaa tu'uk ijtyʉ windsʉ́n mʉkja̱'a̱y es myʉda̱jtypy tu'ugʉ tyuumbʉ di'ibʉ kywentʉ'a̱jtypy ja jyiky'a̱jtʉn. Es ja mʉkja̱'a̱y ya''awa̱'a̱nʉ ko yʉ tyuumbʉ ttuñ axʉʉk ja jyiky'a̱jtʉn.
\p
\v 2 ’Net ja wyindsʉ́n myʉjwoojʉ es yajtʉʉjʉ: “¿Tii dʉnʉ tya̱a̱dʉ éxtʉm jyʉna̱'a̱ndʉ mʉt mijts? N'okwijtsʉm yʉ kwentʉ éxtʉm tʉ mduñ, ja'a ko kyaj nnakyyajtuna̱'a̱ñ.”
\v 3 Net ja tuumbʉ ñayjyʉnanʉ kʉ'ʉm: “¿Titsʉ net ndúnʉp tyam? Yʉ nwindsʉ́nʉts xypyʉjkʉya̱a̱mbʉts yʉ nduungʉts. Kyajts nmʉdaty yʉ mʉja̱a̱ esʉts nnaxtúnʉt, es tsoydyuumbʉts nandʉ'ʉn esʉts n'amdówʉt yʉ limosnʉ.”
\v 4 Net ñayjyʉnanʉ wyinma̱'a̱ñóty: “Tʉts nnijawʉ wi'ixʉts ndúnʉt es nmʉdátʉdʉts pʉ́nʉts xy'axá̱jʉp ma̱ tyʉjk kots ʉj kyaj nduunk nba̱a̱dʉt.”
\v 5 Net tmʉgajxy nidu'uk nidu'uk di'ibʉ myʉni'xy'ajtypy ja wyindsʉ́n. Ja jawyiinʉ dʉ'ʉn dyajtʉʉy: “¿Nʉ'ʉn xymyʉni'xy'áty ja nwindsʉ́nʉts?”
\v 6 Es ja'a 'yadsooy: “Ja'ats nmʉni'xyʉty tʉgʉk mil litrʉ yʉ aseytʉ oliivʉ.” Net ja di'ibʉ kywentʉ'a̱jtypy 'yanma̱a̱yʉ: “Tya̱a̱ mneky. U'uñʉ pojʉn es yajkoj jatu'uk es xypyʉjta̱'a̱gʉt mil jakujm je'eyʉ.”
\v 7 Es óknʉm dyajtʉʉy jatu'uk: “¿Nʉ'ʉn mij xymyʉni'xyʉty yʉ nwindsʉ́nʉts?” Es ja'a 'yanma̱a̱yʉ: “I'px tuktujk mil kilʉ yʉ triigʉ.” Es ja di'ibʉ kywentʉ'a̱jtypy 'yanma̱a̱yʉ: “Tya̱a̱ mneky. Yajkoj ja wiinkpʉ es xyákʉt je'eyʉ i'px majtsk mil.”
\v 8 Es ko ja wyindsʉ́n tnija̱'a̱jʉ, net ñiga̱jxʉ oyʉ tadʉ tuumbʉ, ja'a ko kuwijy mʉt tadʉ wyinma̱'a̱ñ.
\p Es ja Jesús jyʉnáñ:
\p —Ya̱ naxwiiñ, ta mayjya'ay di'ibʉ jiky'a̱jtp je'eyʉ meeñ ttsoktʉ es dyajnipata̱'a̱ndʉ es myʉkja̱'a̱y'ata̱'a̱ñ mʉt ja jyiky'a̱jtʉn. Es tadʉ adsojkpʉ kyuwijyʉty wi'ix tyónʉt ma̱ ja wyindsʉ́n es tsyókʉdʉt ja myʉgu'uktʉjk. Per ja ja̱'a̱yʉty di'ibʉ tyunándʉp éxtʉm ja Dios ttsekyʉn, kyaj dʉ'ʉn 'yadʉ'ʉtstʉ.
\p
\v 9 ’Dʉ'ʉnʉts miits n'anʉʉmʉdʉ ko ja pʉjta'aky ya̱ naxwiiñ ma̱ ja ja̱'a̱y di'ibáty tyuundʉp ja axʉk'a̱jtʉn, yajtúndʉ yʉ pʉjta'aky pʉn wi'ix ja ja̱'a̱y mʉʉt mnaymyáyʉdʉt es ko naty kyexy, net myajkupʉ́ktʉt ma̱ ja winʉ xʉʉ winʉ tiempʉ tsʉna̱a̱ydyákn.
\p
\v 10 ’Es pʉ́n kyuydyiimpy mʉt ja waanʉbʉ di'ibʉ ja wyindsʉ́n tukmʉ'ijxʉp, nandʉ'ʉn tkuydyúñ mʉt ja maybyʉ. Es pʉ́n toomp waanʉ, nandʉ'ʉn tyoñ mʉt ja kajaabʉ.
\v 11 Pa̱a̱ty pʉ́n kyaj tkuydyúñ di'ibʉ wyindsʉ́n tukmʉ'ijxʉp ya̱ naxwiiñ, Dios nan kyaj myo'oyʉdʉt ja jotkujk'a̱jtʉn jam tsa̱jpótm.
\v 12 Es pʉn miidsʉty kyaj yajxón xykyuydyundʉ di'ibʉ yʉ mwindsʉ́n jya'a'a̱jtypy, ¿wi'ix xytsyeky es myajmo'oyʉt di'ibʉ mij mja'a'átʉp?
\p
\v 13 ’Ni pʉ́n po'oduumbʉ mba̱a̱t tkamʉdúñ majtskʉ wyindsʉ́n. Ja'a ko pʉn tuump yajxón ma̱ ja wyindsʉ́n ja jawyiimbʉ, kyaj mba̱a̱t ñakytyúñ yajxón ma̱ ja myʉmajtskpʉ. Es pʉn ja myʉmajtskpʉ wyindsʉ́n tsyejpy ni'igʉ es tyuñ yajxón mʉt yʉ'ʉ, kyaj mba̱a̱t ja jawyiimbʉ tnakymyʉdúñ. Pa̱a̱ty n'anʉʉmʉ miidsʉty ko kyaj mba̱a̱t xymyʉdúñ yʉ Dios pʉn mbʉjtákypy ja mwinma̱'a̱ñ ma̱ ja meeñ.
\p
\v 14 Es ja fariseeʉty di'ibʉ 'yadsojktʉp ja meeñ tmʉdoo'íttʉ tʉgekyʉ es ja Jesús ttukxi'iktʉ.
\v 15 Net ja Jesús t'anma̱a̱ydyʉ ja fariseeʉty:
\p —Miits mnayyajnáxʉdʉ éxtʉm di'ibʉ jiky'a̱jtp tʉy'a̱jtʉn mʉʉt ma̱ ja mayjya'ayʉty. Per ja Dios kyaj mba̱a̱t xywyin'ʉʉndʉ, ja'a ko yʉ'ʉ ñija̱'a̱p ja mjot mwinma̱'a̱ñ. Es pʉ́n naybyʉjtákʉp mʉj, Dios 'yʉxtijpy.
\s Moisesʉ 'yana'amʉn esʉ Diosʉ kyutujkʉn
\p
\v 16 ’Extʉ ma̱ jyiky'ajty ja Fwank Yajnʉbajtpʉ 'yijty ja Moisesʉ 'yana'amʉn es ja Diosʉ kyuga̱jxpʉty ja 'yʉxpʉjkʉn. Per óknʉm ma̱ yʉ Fwank es tyamba̱a̱t yajka̱jxwa'xy ja oybyʉ ayuk di'ibʉ ñigajxypy ja Diosʉ kyutujkʉn, es mayjya'ay 'yʉxta̱a̱ydyʉp wi'ix agwanʉ tyʉ́kʉdʉt ma̱ Diosʉ kyutujkʉn.
\p
\v 17 ’Pʉn kyaj 'yoktuunnʉ ni tuk peky ja letrʉ di'ibʉ jyaa'a̱jtypy ja Moisesʉ 'yana'amʉn, jawyiin kyutʉgóyʉt ja tsa̱jp esʉ nax.
\s Kasa̱a̱dʉ ja̱'a̱yʉty ñaymyastu'udʉdʉ
\p
\v 18 ’Pʉn tu'ugʉ yedyʉjk myastutypy ja ñʉdo'oxy es pyeky mʉt ja wiinkpʉ, yajtʉgeepy ja pʉjk úkʉnʉ wyindsʉ'kʉn. Es di'ibʉ pʉjkp mʉt tu'ugʉ toxytyʉjk di'ibʉ tʉ ñaymyastu'udyʉty, nandʉ'ʉn yajtʉgeepy ja pʉjk úkʉnʉ wyindsʉ'kʉn.
\s Mʉkja̱'a̱y esʉ Lázarʉ
\p
\v 19 Es nandʉ'ʉn jatu'uk tmadya'aky ja Jesús:
\p —Jaa tu'uk ijty ja mʉkja̱'a̱y es ja wyit tpʉjta'aky ak oybyʉ. Es bom bom jyantsykyay jyantsy'iiky éxtʉm ja ja̱'a̱y xyʉdúñ.
\v 20 Es jam tu'uk ijty nandʉ'ʉn ja yedyʉjk jantsy ayoop es txʉ'aty Lázarʉ, di'ibʉ naty ja nini'x tʉgekyʉ ak pu'uts. Es jam yajmastúty ma̱ mʉkja̱'a̱yʉ tyʉjk a̱a̱.
\v 21 Tya̱dʉ ayoobʉ ja̱'a̱y, yʉ'ʉ jyanayya'utsanʉ mʉt ja di'ibʉ ka̱'a̱p ma̱ ja mʉkja̱'a̱yʉ myeesʉ. Es ja uk ñiwéyʉty ma̱jaty ja pyu'uts.
\p
\v 22 ’Es net 'yo'knʉ ja Lázarʉ, es ja anklʉs yajnʉjxʉ ma̱ ja Abra̱a̱n 'yity. Net ja mʉkja̱'a̱y 'ye'ky nandʉ'ʉn, es dyajnaxtʉjkʉdʉ,
\v 23 es ñejxy ayoodaknóty. Net 'yijxe'ky es t'ijxy ja Abra̱a̱n esʉ Lázarʉ.
\v 24 Ta yaxkeky: “¡Apteety Abra̱a̱n, pa''ayoogʉts! Kax yʉ Lázarʉ es dyajxoogʉt yʉ kyʉ'ʉ jʉjp mʉt yʉ nʉʉ es min dyajxeemy yʉ nya'anʉts, ja'a ko nʉgoots n'ok'ayoonʉ mʉk ma̱ tya̱dʉ jʉʉn.”
\p
\v 25 ’Es ja Abra̱a̱n 'yanma̱a̱yʉ: “Nitʉ, jamyats ko mij tʉ m'ity oy ko tʉ mjiky'aty, es yʉ Lázarʉ tʉ 'yayoy. Yʉ'ʉ tyam jotkujk'a̱jtp, es mij m'ayoy.
\v 26 Nandʉ'ʉn ja Dios tʉ tpʉjta'aky tu'ugʉ mʉj wok di'ibʉ abeky xya'ijtʉm, es kyaj pʉ́n mba̱a̱t ñejxy jamdsoo es ni pʉ́n ya̱dsoo mba̱a̱t kyamíñ.”
\p
\v 27 ’Net ja mʉkja̱'a̱y jyʉnáñ: “Tunʉ may'a̱jtʉn, apteety Abra̱a̱n, kax yʉ Lázarʉ ma̱dsʉ ndeety yʉ tyʉjk
\v 28 ma̱ts nmʉdaty nimʉgoxktsʉ n'utsy, es t'anʉʉmʉt kʉdiibʉ ya̱a̱ myínʉt nandʉ'ʉn ma̱ tya̱dʉ ayoodákn.”
\p
\v 29 ’Es ja Abra̱a̱n jyʉnáñ: “Yʉ'ʉjʉty myʉda̱jttʉp di'ibʉ Moisés es ja Diosʉ kyuga̱jxpʉ kyʉxja̱a̱ydyʉ. ¡Wa'an tpadundʉ!”
\p
\v 30 ’Es ja mʉkja̱'a̱y 'yadsooy: “Tʉy'a̱jtʉn, apteety Abra̱a̱n. Per pʉn nidu'uk yʉ o'kpʉ jyikypyʉ́kʉt es ñʉjxʉt ma̱ yʉ'ʉjʉty, yʉ'ʉ yajtʉga̱jtsxʉp yʉ wyinma̱'a̱ñ.”
\p
\v 31 ’Es ja Abra̱a̱n 'yanma̱a̱yʉ: “Pʉn kyaj tpadúñ ja Moisesʉ 'yana'amʉn es di'ibʉ jyaaydyʉ ja Diosʉ kyuga̱jxpʉ, nan kyájʉm tmʉbʉ́kʉt oy jyajikypyʉjkpʉ tu'ugʉ o'kpʉ.”
\c 17
\s Pʉroobʉty ko pekyoty nyajka̱'a̱m ja wiink ja̱'a̱y
\p
\v 1 Jesús t'anʉʉmʉ ja 'yʉxpʉjkpʉty:
\p —Taa di'ibʉ ja ja̱'a̱y yajpekytyiimpy. ¡Per pʉroobʉ tadʉ ja̱'a̱y di'ibʉ yʉ myʉgu'uk yajtʉgeepy!
\v 2 Nik oy es yajpʉjta̱'a̱gʉt mejyñóty mʉt tu'ugʉ pa̱a̱n yajtuk'yo'ktʉ́yʉt es kyaj ko yʉ myʉgu'uk dyajtuundʉgóy.
\p
\v 3 ’Mnaygywentʉ'átʉdʉp mijts. Es pʉn yʉ m'utsy mmʉdʉgooyʉp, ka̱jxwij. Es pʉn jodʉmbijtp, pojpʉma'x.
\v 4 Oy mmʉdʉgóyʉdʉt mij jʉxtujk ok tu'ukpʉ xʉʉ es jʉxtujk ok myínʉt es jyʉna̱'a̱nʉt: “Ma'xkʉts”, pes mma'xʉp.
\s Mʉbʉjkʉn mʉk'a̱jtʉn mʉʉt
\p
\v 5 Es ja apóstʉlʉty t'anma̱a̱ydyʉ ja Jesús:
\p —Windsʉ́n, tukmʉbʉjkʉts waanʉ ni'igʉ.
\p
\v 6 Es ja Jesús 'yadsoojʉ:
\p —Oyxyʉp je'eyʉ waanʉ xymyʉdaty ja mʉbʉjkʉn éxtʉm tu'ugʉ mutsk mortás pa̱jk, mba̱a̱txyʉp xy'anʉʉmʉ yʉ mʉj kepy: “Nʉjx m'ity jap mejyñóty”, es mmʉmʉdówʉdʉp.
\s Mʉduumbʉ tyu'unʉn
\p
\v 7 ’Pʉn mmʉda̱jtypy miidsʉty tu'ugʉ mduumbʉ es tsu'pʉn ja tuumbʉ jyʉmbijnʉ ma̱ mdʉjk, tʉ oj yu'uy kamoty o tʉ tkwentʉ'aty ja mborreegʉ, m'anʉʉmʉp: “Nax tʉgoty. U'uñʉ es mgáyʉt.”
\v 8 Kyaj, ¿kʉdii? Ni'igʉ t'anʉʉmʉ: “Ya''aba̱a̱dʉts ja n'a'ux esʉts ʉj n'a'ux'átʉt. Oknʉm mba̱a̱t mij mja'a xya''aba̱a̱dʉ es m'a'ux'átʉt.”
\v 9 Es ko tkuydyúñ éxtʉm tyuk'ane'emyʉty ja wyindsʉ́n, ¿ti mba̱a̱t ja wyindsʉ́n jyʉna'añ: “Dios kujúyʉbʉ?” Kyaj, ¿kʉdii?
\v 10 Nandʉ'ʉn miidsʉty ko xykyuydyuunda̱'a̱y tʉgekyʉ di'ibʉ Dios tʉ mduk'ane'emyʉty, mjʉna̱'a̱ndʉp: “Tʉ ndu'unʉm je'eyʉ di'ibʉ tʉ nyajtuk'ana'amʉm.”
\s Jesús dya''agʉda'aky nima̱jkpʉ ja̱'a̱y di'ibʉ myʉda̱jttʉp ja leprʉ pa̱'a̱m
\p
\v 11 Es ja Jesús tyu'uyo'oy es ñejxy Jerusalén. Jam ñajxy ma̱ ñaybyaadyʉty yʉ Samaaryʉ mʉt ja Galileeʉ.
\v 12 Es ko jyajty ma̱ tu'ugʉ ka̱jpn, net tpattʉ ma̱jk ja yedyʉjk di'ibʉ myʉda̱jttʉp ja leprʉ pa̱'a̱m. Jagam ja tyánʉdʉ éxtʉm jyʉna'añ ja Diosʉ 'yana'amʉn,
\v 13 es yaxkaktʉ:
\p —Jesús, Windsʉ́n, pa''ayoogʉts ʉʉdsʉty.
\p
\v 14 Es ko Jesús 'yijxʉ, net 'yanma̱a̱yʉ:
\p —Nʉjxtʉ ma̱ ja teety es m'íxʉdʉt.
\p Es ko oj ñʉjxtʉ, net 'yagʉdakta̱a̱ydyʉ.
\v 15 Net tu'uk ko t'ijxy es tʉ 'yagʉda'aky, jyʉmbijty es ya'axy jyeky t'awda̱jty ja Dios.
\v 16 Es net tnimiiñ ja Jesús es ñaygyoxtʉna̱a̱ydyákʉ es ñayjyujpʉ naxkʉjxy es tja̱'a̱ygyʉdáky. Esʉ tadʉ yedyʉjk yʉ'ʉ samaritanʉ ja̱'a̱y.
\v 17 Net ja Jesús jyʉnáñ:
\p —¿Tii kyaj tʉ 'yagʉda̱'a̱ktʉ nima̱jk? ¿Ma̱ net ja nidaxtujkpʉ?
\v 18 ¿Tii yʉ'ʉyʉ naydyi'igyʉ tya̱dʉ samaritanʉ ja̱'a̱y tʉ jyʉmbity es t'awdaty ja Dios?
\p
\v 19 Net ja Jesús t'anma̱a̱y ja ja̱'a̱y:
\p —Pʉdʉ'ʉk es nʉjx. Tʉ m'agʉda'aky mʉt ko tʉ xymyʉbeky.
\s Wi'ix myínʉt ja Diosʉ kyutujkʉn
\p
\v 20 Es ja fariseeʉty dyajtʉʉdʉ ja Jesús:
\p —¿Na̱'a̱ dʉ'ʉn ja Dios yajkutuka̱'a̱ñ?
\p Es ja Jesús 'yadsooy:
\p —Ko yʉ Dios myínʉt es yajkutuka̱'a̱ñ, kyaj ya'íxʉt ko jya'ty éxtʉm yʉ naxwíñʉdʉ ja̱'a̱y ja ryeyʉn.
\v 21 Pa̱a̱ty kyaj mba̱a̱t njʉna̱'a̱nʉm: “Ya̱a̱ net”, o “Tam xim”, mʉt ko yʉ Dios yajkutujkp ma̱ miidsʉty.
\p
\v 22 Net ja Jesús t'anma̱a̱y ja 'yʉxpʉjkpʉty:
\p —Ja̱'tʉp ja tiempʉ ko miits xyjatsóktʉt es oy tu'ugʉn ja xʉʉ m'ítʉt ma̱ ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, es kyajts ʉj xy'íxtʉt.
\v 23 Es ko miits m'anʉ'ʉmxʉdʉt ja ja̱'a̱yʉty: “Tyamʉ net”, o “Tʉxim ja'a”, kyaj mnʉjxtʉt es xy'ʉxta̱'a̱yʉdʉts.
\v 24 Ja'a ko ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, dʉ'ʉnʉts ngʉxʉ'ʉga̱'a̱ñ éxtʉm ko jyʉdsikyʉn tyukja̱jʉdya'ayʉt tʉgekyʉ tsa̱jp.
\v 25 Per jayʉjp n'ayówʉdʉts mʉk es ja ja̱'a̱yʉty di'ibʉ tyam jiky'a̱jttʉp kyajts xy'axá̱jʉdʉts.
\s Wi'ix jyʉmbítʉt ja Naxwíñʉdʉ Ja̱'a̱yʉdyʉ Kyudʉnaabyʉ
\p
\v 26 ’Extʉm jya̱jtʉ jékyʉp ko ja No'ee jyiky'ajty, nandʉ'ʉn jyata̱'a̱ñ kots ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, nmínʉt jatʉgok.
\v 27 Ko No'ee jyiky'ajty, ja ja̱'a̱yʉty kyay 'yuuktʉ es dyajpʉ́ktʉ ja 'yu'unk extʉ ko tyʉjkʉ ja No'ee ma̱ ja arkʉ, es netyʉ myiinnʉ ja ayo'onduu es ja ja̱'a̱y jyi'xta̱a̱ydyʉ.
\v 28 Es nandʉ'ʉn jya̱jtʉ ko jyiky'ajty ja Lot. Ja ja̱'a̱yʉty kyay 'yuuktʉ, tyook yaktʉ, ñi'ip kyojtʉ es ja tyʉjk tkojtʉ.
\v 29 Es ko ja Lot tsyo'oñ ma̱ ja Sodomʉ ka̱jpn, netyʉ myiiñ ja jʉʉnduu es yʉ azufrʉ jʉʉn di'ibʉ ka̱'a̱ tsa̱jwínm, es ja ja̱'a̱y 'yo'kta̱a̱ydyʉ.
\v 30 Es dʉ'ʉn ya'íxʉt kots ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, ngʉxʉ'ʉgʉt jatʉgok.
\p
\v 31 ’Es ma̱ tadʉ xʉʉ, pʉ́n jam pajtp tʉjk nikʉjxy, kyaj jyʉnákʉt es tyʉ́kʉt tʉgoty es tjuudʉt di'ibʉ jap tyʉgoty. Es pʉ́nʉdyʉ naty jap kamoty, kyaj jya̱'ttʉt ma̱ ja tyʉjk.
\v 32 Jamyatstʉ wi'ix jya̱jtʉ mʉt ja Lotʉ ñʉdo'oxy.
\v 33 Mʉt ko di'ibʉ jiky'ata̱a̱mp mʉt ja kyʉ'ʉm winma̱'a̱ñ, dʉ'ʉmbʉ ja̱'a̱y yajtʉgeepy ja jyiky'a̱jtʉn, es di'ibʉ jiky'ata̱a̱mp éxtʉmts ʉj ndukni''ixʉ, dʉ'ʉmbʉ ja̱'a̱y kyaj dyajtʉgóy ja jyiky'a̱jtʉn.
\p
\v 34 ’Es n'anʉʉmʉ nandʉ'ʉn ko netʉ naty ja ja̱'a̱y mya̱'a̱dʉ nimajtsk ti'igyʉ mabajn, tu'uk yajmʉnʉjxʉt es tu'uk wyʉ'ʉmʉt.
\v 35 Es nimajtskʉ toxytyʉjk jyʉtstʉ ti'igyʉ, tu'uk yajmʉnʉjxʉt es tu'uk wyʉ'ʉmʉt.
\v 36 Es nandʉ'ʉn nimajtskʉ yedyʉjk di'ibʉ naty jap kamoty, tu'uk yajmʉnʉjxʉt es tu'uk wyʉ'ʉmʉt.
\p
\v 37 Es ja Jesusʉ 'yʉxpʉjkpʉty yajtʉʉjʉ:
\p —Windsʉ́n, ¿ma̱ tya̱a̱dʉ dʉ'ʉn jyata̱'a̱ñʉty?
\p Es ja Jesús 'yadsooy:
\p —Ma̱ ja o'kpʉ 'yity, jamʉ naty ja kus ñaymyíkyʉty.
\c 18
\s Toxytyʉjk di'ibʉ myʉ'i'impy tu'ugʉ fwez
\p
\v 1 Jesús tpʉjtáky tu'ugʉ ijxpajtʉn es ttuk'íxʉt ko ja̱'a̱y dʉ'ʉñʉm kya̱jxta̱'a̱ktʉt es kyaj jyotmay'ooktʉt.
\v 2 Dʉ'ʉn jyʉnáñ:
\p —Ma̱ tu'ugʉ ka̱jpn jaa ijty tu'ugʉ fwez di'ibʉ kyaj twindsʉ'ʉgʉ Dios es ni pʉ́n tkatuñʉ kwentʉ.
\v 3 Es ma̱ tadʉ ka̱jpn nan jam tu'ugʉ ku'ekytyo'oxy di'ibʉ tyimmʉye'ebyʉ tadʉ fwez es t'amdooy es ja myʉdsip yajpayo'oyʉt mʉt ja tʉy'a̱jtʉn.
\v 4 Es jeky dya'ijtyʉ tadʉ fwez, kyaj tkuydyúñ. Per óknʉm ja wyinma̱'a̱ñ dyaj'yo'oy: “Oyʉts ngawindsʉ'ʉgʉ ja Dios es ni pʉ́nʉts ngamʉj'íxy,
\v 5 perʉ tya̱dʉ ku'ekytyo'oxy nʉgoots xy'okna'amnʉ, pa̱a̱ty tyámʉdsʉ tʉy'a̱jtʉn nduunʉt es kʉdiibʉ ñakymyínʉt es xyñakyña'amʉdʉts.”
\p
\v 6 Es ja Jesús jyʉnáñ:
\p —Jaygyukʉ di'ibʉ kya̱jx ja fwez axʉk ja̱'a̱y.
\v 7 ¿Ti kyaj ttuunʉt ja Diosʉ tʉy'a̱jtʉn pʉ́nʉty wyin'ijxʉdʉ es tmʉnu'xta̱'a̱gʉdʉ xʉʉñ koots es yajpudʉ́kʉdʉt?
\v 8 Dʉ'ʉnʉts miits n'anʉʉmʉdʉ es kyaj jyákʉt esʉ Dios pyudʉ́kʉdʉ. Per kots ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, nmínʉt jatʉgok ya̱ naxwiiñ, ¿tii nba̱a̱dʉpts ja ja̱'a̱y pʉ́n myʉbʉjktʉp ja Dios?
\s Fariseeʉ esʉ yajkugʉbajtpʉ
\p
\v 9 Es ja Jesús tpʉjtáky jatu'ugʉ ijxpajtʉn mʉt ja ja̱'a̱yʉty di'ibʉ nayjya̱'a̱dʉp jyiky'aty tʉy'a̱jtʉn mʉʉt es t'axʉk'ixy oytyim pʉ́nʉty. Dʉ'ʉn jyʉnáñ:
\p
\v 10 —Majtsk ja yedyʉjk tʉ 'yotsy ma̱ ja mʉj tsa̱jptʉjk ka̱jxtákpʉ. Tu'uk yʉ'ʉ fariseeʉ, es jatu'uk yajkugʉbajtpʉ.
\v 11 Es ja fariseeʉ tanʉ, dʉ'ʉn kya̱jxta'aky: “Dios, nja̱'a̱ygyʉdákypyʉts mij, ja'a ko ʉj kyajts ndʉ'ʉnʉty éxtʉm ja wiinkpʉ ja̱'a̱y di'ibʉ ma'tsp, di'ibʉ pekytyuump, di'ibʉ yajtʉgeepy ja pʉjk úkʉnʉ wyindsʉ'kʉn es ni ngadʉ'ʉnʉdyʉts éxtʉmʉ tya̱dʉ yajkugʉbajtpʉ.
\v 12 Ʉj n'ayu'átyʉts majtsk ok ja sʉma̱a̱n es nyákyʉts tuk peky ko wya'xy ma̱jk peky tʉgekyʉ di'ibʉts ʉj nbatypy.”
\p
\v 13 ’Per ja yajkugʉbajtpʉ wye'emy jagam, es ni je'eyʉ kyakooje'eky es pyat'íxʉt tsa̱jwínm, je'eyʉ kyaatsy tkoxy es dʉ'ʉn ñu'xta'aky: “¡Dios, pa''ayoogʉts ʉj, kots ʉj nbekyjya'ayʉty!”
\p
\v 14 Net ja Jesús jyʉnáñ:
\p —N'anʉʉmʉ ko yʉ tya̱dʉ yajkugʉbajtpʉ ñʉjxnʉ ma̱ tyʉjk es oj wye'emy oy mʉdʉ Dios, es ja fariseeʉ kyaj. Ja'a ko pʉ́n naymyʉjpʉjtákʉp, Dios puwijtsʉp, es di'ibʉ naybyʉjtákʉp ayoobʉ es mutsk, Dios yʉ'ʉ ya'ijtʉp mʉj.
\s Jesús tkuni'xy ja ʉna̱'ku'ungʉty
\p
\v 15 Ta ja ja̱'a̱yʉty dyajmiindʉ 'yʉna̱'ku'ungʉty ma̱ ja Jesús es yajkunu'xʉt. Es ko ja Jesusʉ 'yʉxpʉjkpʉty t'ijxtʉ taadʉ, net t'oodʉ ja di'ibʉ yajmiindʉp ja 'yʉna̱'ku'unk.
\v 16 Es ja Jesús dyaxʉ es t'anma̱a̱y:
\p —Mastu'uttʉ, wa'andsʉ ʉna̱'ku'ungʉty xyñimíndʉts, es katʉ xyajjʉmbíty, mʉt ko ja Diosʉ kyutujkʉn yʉ'ʉ jya'a'a̱jtypy di'ibʉ dʉ'ʉn éxtʉm yʉ'ʉjʉty.
\v 17 Es tʉy'a̱jtʉn n'anʉʉmʉ, pʉ́n kyaj t'axa̱jʉ ja Diosʉ kyutujkʉn éxtʉm tu'ugʉ ʉna̱'ku'unk, ni na̱'a̱ kyatʉ́kʉt jam.
\s Mʉkja̱'a̱y tmʉmadya'aky ja Jesús
\p
\v 18 Es tu'ugʉ ana'ambʉ dyajtʉʉy ja Jesús:
\p —Oy windsʉ́n, ¿tits mba̱a̱t nduñ esʉts nba̱a̱dʉt yʉ njiky'a̱jtʉnʉts winʉ xʉʉ winʉ tiempʉ?
\p
\v 19 Ta ja Jesús 'yanma̱a̱yʉ:
\p —¿Ti ko mjʉna̱'a̱ñ kots ʉj n'óyʉty? ¿Ti mjʉna̱a̱mp xytyijy kots ʉj nDiósʉty? Yʉ'ʉyʉ Dios naydyi'igyʉ oy.
\v 20 Mij mnija̱'a̱p di'ibʉ Dios 'yana'amʉn'a̱jtypy: “Katʉ xyajtʉgóy ja pʉjk úkʉnʉ wyindsʉ'kʉn; katʉ myajja̱'a̱y'eeky; katʉ mdoñ mmeetsy; katʉ pʉ́n xywyinga̱jxpéty; mwindsʉ'ʉgʉp ja mda̱a̱k mdeety.”
\p
\v 21 Ja ana'ambʉ jyʉnáñ:
\p —Tʉgekyʉ tya̱a̱dʉ tʉts nguydyuunda̱'a̱y extʉ kots nmutsk'a̱jty.
\p
\v 22 Es ko taadʉ tmʉdooy ja Jesús, net t'anma̱a̱y:
\p —Mdʉgoy'a̱jtxʉp tu'uk. To'kta̱'a̱y tʉgekyʉ mjiky'a̱jtʉn es xymyo'oyʉt yʉ ayoobʉ ja̱'a̱ydyʉjk es dʉ'ʉn xypya̱a̱dʉt ja oy'a̱jtʉn tsa̱jpótm. Es óknʉm mmínʉt es xypyanʉjxʉdʉts.
\p
\v 23 Es ko tya̱a̱dʉ tmʉdooy ja ana'ambʉ, net mʉk jyotmay'e'ky, ja'a ko jyantsymyʉkja̱'a̱yʉty.
\v 24 Ko ja Jesús t'ijxy ko tadʉ mʉkja̱'a̱y jyotmay'e'ky, net jyʉnáñ:
\p —¡Tsip nimʉja̱a̱ esʉ mʉkja̱'a̱y tyʉ́kʉdʉt ma̱ Diosʉ kyutujkʉn!
\v 25 Tʉy'a̱jtʉn n'anʉʉmʉ ko waanʉ pojʉn es tu'ugʉ kameyʉ ñáxʉt xu'uñjyutóty es ñimʉja̱a̱ty es tu'ugʉ mʉkja̱'a̱y tyʉ́kʉt ma̱ Diosʉ kyutujkʉn.
\p
\v 26 Es ja tya̱dʉ ja̱'a̱yʉty di'ibʉ myʉdoodʉ jyʉnandʉ:
\p —¿Es pʉnʉ dʉ'ʉn, pʉ́n mba̱a̱t ñitse'eky?
\p
\v 27 Es ja Jesús jyʉnáñ:
\p —Di'ibʉ ja̱'a̱yʉty kyaj mba̱a̱t ttundʉ, yʉ Dios mba̱a̱t ttuñ.
\p
\v 28 Es ja Peedrʉ 'yanma̱a̱yʉ:
\p —Windsʉ́n, ʉʉdsʉty tʉts nmastu'uttʉ di'ibʉts nmʉda̱jttʉp es mij mbanejxy.
\p
\v 29 Es ja Jesús 'yadsooy:
\p —Tʉy'a̱jtʉn, oytyim pʉ́nʉty di'ibʉ myastutypy ja tyʉjk, ja tya̱a̱k tyeety, o ja myʉgu'ugʉty, o ja ñʉdo'oxy, o ja 'yu'unk, es xypyanʉjxʉdʉts ʉj,
\v 30 Dios mo'oyʉdʉp waanʉ ni'igʉ ma̱ tya̱dʉ naxwíñʉdʉ, es ma̱ ja naxwíñʉdʉ di'ibʉ miimp, 'yaxá̱jʉp ja jiky'a̱jtʉn winʉ xʉʉ winʉ tiempʉ.
\s Jesús tnigajxy myʉdʉgʉk ok ja 'yo'kʉn
\p
\v 31 Net ja Jesús dyajnejxy wiink tsoo ja nima̱jmajtskpʉ 'yʉxpʉjkpʉ, es t'anma̱a̱y:
\p —Tyam njo'omʉm Jerusalén ma̱ yajkuydyuna̱'a̱ñ tʉgekyʉ di'ibʉ ja Diosʉ kyuga̱jxpʉ kyʉxja̱a̱ydyʉ, wi'ix ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, njata̱'a̱ñʉts.
\v 32 Pes xykyʉyaka̱'a̱ndʉts ma̱ ja romanʉ ja̱'a̱y, es xytyukxi'iga̱'a̱ndʉts, axʉʉk xytyuna̱'a̱ndʉts es xywyindsujʉ'ʉga̱'a̱ndʉts.
\v 33 Xywyopa̱'a̱ñʉts es óknʉm xya'ooga̱'a̱ñʉts; per kyumdʉgʉk xʉʉ njikypyʉka̱'a̱ñʉts.
\p
\v 34 Es ja 'yʉxpʉjkpʉtʉjk kyaj tjaygyujkʉdʉ éxtʉm jyʉnáñ ja Jesús es kyaj tnijáwʉdʉ ti kyajxypy.
\s Jesús dya'ijxpéky tu'ugʉ wiints
\p
\v 35 Ko ja Jesús jya̱'táñ ma̱ ja Jerikoo ka̱jpn, tu'ugʉ wiints 'yu'uñʉ tu'a̱a̱y t'amdoy ja limosnʉ.
\v 36 Es ko tmʉdooy ko ñaxy ja mayjya'ay, net ja wiints dyajtʉʉy ti tʉ jyátyʉty.
\v 37 Es jyʉnandʉ ja mayjya'ay:
\p —Yʉ Jesús nazarenʉ na̱jxp ya̱dsoo.
\p
\v 38 Net ja wiints yaxkeky:
\p —Jesús, Davitʉ tyʉʉmp 'ya̱a̱ts, ¡pa''ayoogʉts ʉj!
\p
\v 39 Es ja di'ibʉ nʉjxtʉp jawyiin 'yoojʉ es 'yamónʉt. Per ja wiints ni'igʉ jyantsyya'axy:
\p —Davitʉ tyʉʉmp 'ya̱a̱ts, ¡pa''ayoogʉts!
\p
\v 40 Net ja Jesús wya̱'k'a̱'a̱jʉ es tnigajxʉ es myínʉt. Es ko ja wiints myiñ wingón, net ja Jesús dyajtʉʉy:
\p
\v 41 —¿Ti mdsejpy es mij ndukmʉdúnʉt?
\p Es ja wiints 'yadsooy:
\p —Windsʉ́n, yʉ'ʉts ndsejpy esʉts n'ijxpʉ́kʉt.
\p
\v 42 Jesús jyʉnáñ:
\p —Axa̱jʉ ja m'ijxʉn, tʉ m'agʉdaky ja'a ko tʉ xymyʉbeky.
\p
\v 43 Es netyʉ ja wiints oj 'yijxwa'xy, es tpanejxy ja Jesús es t'awdaty ja Dios. Es nidʉgekyʉ ja̱'a̱yʉty di'ibʉ 'yijxtʉ tya̱a̱dʉ, nandʉ'ʉn t'awda̱jty ja Dios.
\c 19
\s Jesús esʉ Zakeeʉ
\p
\v 1 Net ja Jesús jyajty ma̱ Jerikoo ka̱jpn es ñajxy jap ka̱jpnóty.
\v 2 Es jap tsyʉʉnʉ tu'ugʉ mʉkja̱'a̱y di'ibʉ xyʉ'a̱jtypy Zakeeʉ. Yʉ'ʉ ijty yajkugʉbajtpʉ windsʉ́n.
\v 3 Tadʉ Zakeeʉ t'ixa̱'a̱ñ ja Jesús. Per kyaj mba̱a̱t, ja'a ko yʉ'ʉ ʉxnaku'unk es jantsy mayjya'ay jap.
\v 4 Net ja Zakeeʉ ñejxy pʉye'egyʉ jawyiin es kyʉxpejty ma̱ tu'ugʉ iigʉ kepy es t'ixa̱'a̱ñ ja Jesús.
\p
\v 5 Es ko ja Jesús jyajty ma̱ yʉ'ʉ jam, net pyat'ijxy es 'yanma̱a̱yʉ:
\p —Zakeeʉ, jʉnak pojʉn, ja'a ko koonʉmts tyam nwʉ'ʉma̱'a̱ñ ma̱ mdʉjk.
\p
\v 6 Net ja Zakeeʉ jyʉnajky pojʉn, es t'axa̱jʉ ja Jesús mʉt ja oyjyot.
\p
\v 7 Es ko ja ja̱'a̱yʉty t'ijxtʉ, net ñay'anma̱a̱yʉdʉ:
\p —Tʉ ñejxy ja̱jttákpʉ ma̱ tu'ugʉ pekyjya'ay ja tyʉjk.
\p
\v 8 Net ja Zakeeʉ tyʉna̱a̱ye'ky es t'anma̱a̱y ja Jesús:
\p —Windsʉ́n, tyámʉts nmo'oya'añ ja ayoobʉ ja̱'a̱ydyʉjk ja njiky'a̱jtʉnʉts kujkwa'xy. Es pʉn tʉts ndoñ pʉ́n mʉt ja anʉʉ, tyámʉts nyajjʉmbítʉt taxk dʉ'ʉnʉn.
\p
\v 9 Es ja Jesús 'yanma̱a̱yʉ:
\p —Tyam tʉ jya'ty ja nitsokʉn ma̱ tya̱dʉ tʉjk, ko yʉ tya̱dʉ yedyʉjk yʉ'ʉ nandʉ'ʉnʉ Abra̱a̱nʉ tyʉʉmp 'ya̱a̱ts.
\v 10 Es ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, tʉ nmíñʉts es n'ʉxta̱'a̱yʉts es nyajnitso'oga̱'a̱ñʉts pʉ́n tʉ tyuundʉgóy.
\s Meeñ éxtʉmʉ ijxpajtʉn
\p
\v 11 Tyamʉ naty ja ja̱'a̱y tmʉdowdʉ, net ja Jesús tpʉjta'agyʉ tadʉ ijxpajtʉn ja'agyʉjxm ko wyingoomp Jerusalén es ko yʉ'ʉjʉty wyinmaydyʉ ko netyʉ ja Kristʉ t'axa̱jʉya'añ ja kyutujkʉn éxtʉm ja reyʉn.
\v 12 Es jyʉnáñ:
\p —Jaa ijty tu'ugʉ mʉkja̱'a̱y di'ibʉ oj ñejxy jagam wiink naxwíñʉdʉ es t'axa̱jʉya'añ ja kyutujkʉn éxtʉm ja rey es óknʉm jyʉmbítʉt.
\v 13 Es ko tsyoonáñ, net twoodsooy nima̱jk ja tyuumbʉ es tmooydyʉ nidu'uk nidu'uk kʉjktu'ugʉ meeñ di'ibʉ jantsy tsooxʉ, es t'anma̱a̱ydyʉ: “Yajtúndʉ tadʉ meeñ extʉ kots ʉj njʉmbítʉt.”
\v 14 Es ja ja̱'a̱yʉty di'ibʉ yʉ'ʉ myʉguga̱jpn'a̱jtypy kyaj tsyékyʉty, es tyukpagajxʉ ja wiinkpʉ kugajxy es ya''anʉʉmʉt: “Kyajts ndsoktʉ esʉ tadʉ yedyʉjk ryey'átʉt ya̱a̱.”
\p
\v 15 ’Per oj tyʉkʉ rey, es jyʉmbijty ma̱ ja ñaxwíñʉdʉ. Es ko jyajty, ta tnigajxʉdyaay ja tyuumbʉ di'ibʉ tʉ tmo'oy ja meeñ. Es dyajtʉʉy nʉ'ʉn tʉ gyanaraty nidu'uk nidu'uk.
\v 16 Ja jawyiimbʉ myʉjwa'ky es jyʉnáñ: “Windsʉ́n, ma̱jkʉ dʉ'ʉnʉn tʉ gyanaraty ja mmeeñ.”
\v 17 Es ja rey 'yadsooy: “Oy. Mij yajxón tʉ mduñ. Es ko tʉts xymyʉdúñ yajxón mʉt waanʉ, tyam nbʉjta'aky es xyajkutúkʉt ma̱jkʉ ka̱jpn.”
\v 18 Es jatu'uk myiiñ es jyʉnáñ: “Windsʉ́n, ja mmeeñ tʉ gyanaraty mʉgoxk dʉ'ʉnʉn.”
\v 19 Es nandʉ'ʉn ja rey 'yadsooy: “Mij myajkutúkʉp mʉgoxkʉ ka̱jpn.”
\v 20 Net jatu'uk myiiñ es jyʉnáñ: “Windsʉ́n, tya̱a̱ ja mmeeñ. Tʉts nbʉjke'eky ma̱ tu'ugʉ payʉ.
\v 21 Ndsʉ'kʉpts mij, ja'a ko mij mbaye'epy di'ibʉ kyaj tʉ xyaky es mdsijkypy di'ibʉ kyaj tʉ xyñi'ipy.”
\v 22 Net ja rey jyʉnáñ: “Mij, kyaj oy tʉ mduñ. Mʉt ja mgʉ'ʉm ayuk ngʉyákʉt. Pʉn mnija̱'a̱p kots ʉj nyajmíky di'ibʉts kyaj nbʉjta'aky es ndsíkyʉts di'ibʉts kyaj tʉ nni'ipy,
\v 23 ¿ti ko tʉ xykyapʉjta'aky yʉ nmeeñʉts ma̱ yʉ bankʉ?, es kots ʉj nja̱'tʉt n'axá̱jʉdʉts nandʉ'ʉn yʉ 'yajuydyuk.”
\v 24 Es t'anma̱a̱y di'ibʉ naty jámʉty: “Pʉjkʉ tadʉ meeñ es xymyo'oyʉt di'ibʉ myʉda̱jtypy ma̱jk.”
\v 25 Es yʉ'ʉjʉty jyʉnandʉ: “Windsʉ́n, ¡tam tmʉdaty ma̱jk ja meeñ!”
\v 26 Es ja rey 'yadsooy: “Tʉy'a̱jtʉn n'anʉʉmʉ miidsʉty, di'ibʉ myʉda̱jtypy, ni'igʉ 'yak'yajmo'oy, es pʉ́n waanʉ tmʉdaty, yajpʉjkʉ di'ibʉ myʉda̱jtypy waanʉ.
\v 27 Es pʉ́nʉty xymyʉdsip'a̱jtpʉts es kyaj ttseky esʉts ʉj n'ítʉt rey, yajmín ja ya̱a̱ es ya'ooktʉ ya̱ nwinduuyʉts.”
\s Jesús tyʉkʉ Jerusalén éxtʉm tu'ugʉ rey
\p
\v 28 Es ko oj jyʉna̱a̱nda̱'a̱y dʉ'ʉn, ja Jesús 'yaknejxy Jerusalén.
\v 29 Es ko wyingoonʉ ma̱ ja ka̱jpnʉty Betfajee es Betañʉ, ma̱ ja Oliivʉs Kopk, jam ja Jesús tkejxy nimajtskʉ 'yʉxpʉjkpʉ,
\v 30 es t'anma̱a̱y:
\p —Nʉjxtʉ jap ka̱jpnóty tʉ nwingo'onʉm. Ko jap mja̱'ttʉt, jap xypya̱a̱dʉt tu'ugʉ burrʉ kuwʉʉñ di'ibʉ ni pʉ́nnʉm tkatuk'u'uñʉ. Xymyʉgájʉt es xyajmínʉt.
\v 31 Es ko pʉ́n myajtʉ́wʉdʉt ti ko xymyʉgajʉ, xy'anʉʉmʉt: “Ja Windsʉ́n tsyejpy.”
\p
\v 32 Es ja 'yʉxpʉjkpʉty oj ñʉjxtʉ es tpattʉ dʉ'ʉn éxtʉm ja Jesús 'yanma̱a̱yʉ.
\v 33 Es ko naty tmʉgajʉ ja burrʉ, net ja ñiwindsʉ́n yajtʉʉjʉ:
\p —¿Ti ko xymyʉgájʉdʉ tadʉ burrʉ?
\p
\v 34 Es yʉ'ʉjʉty 'yadsoodʉ:
\p —Ja'a ko yʉ'ʉ Windsʉ́n tsyejpy.
\p
\v 35 Es dyajnʉjxtʉ ma̱ ja Jesús es tpʉjtáktʉ ja wyit jam burrʉ ñikʉjxy es ja Jesús ttukpejty.
\v 36 Es ko ja Jesús tyu'uyo'oy, ja ja̱'a̱yʉty dya'aptʉ wyit tu'a̱a̱y ma̱ ñaxa̱'a̱ñ.
\v 37 Es ko wyingooñ ma̱ wyinjʉnaky ja tu'u ma̱ ja Oliivʉs Kopk, nidʉgekyʉ ja mayjya'ayʉty xyondaktʉ es t'awda̱jttʉ ja Dios mʉt ja'agyʉjxm di'ibʉ tʉ t'ixtʉ,
\v 38 es jyʉnandʉ mʉk:
\p —¡Dios kyunu'xʉbʉ tadʉ rey di'ibʉ miimp ja Nindsʉn'a̱jtʉmgyʉjxm! ¡Wa'an t'ity ja xondakʉn jam tsa̱jpótm! ¡Mʉj kʉjxm 'yítʉt ja Dios!
\p
\v 39 Net nija'ajʉty ja fariseeʉty di'ibʉ naty jap mayjya'ayóty t'anma̱a̱ydyʉ ja Jesús:
\p —Ya'ʉxpʉjkpʉ, oo yʉ m'ʉxpʉjkpʉtʉjk es 'yamóndʉt.
\p
\v 40 Es ja Jesús 'yadsooy:
\p —N'anʉʉmʉdʉ pʉn yʉ'ʉjʉty amoondʉp, extʉ yʉ tsa̱a̱ yaxka'aktʉp.
\p
\v 41 Es ko jyajty wingón ma̱ t'ijxy ja Jerusalén ka̱jpn, ta ja Jesús tnijʉʉy ja ka̱jpn,
\v 42 es jyʉnáñ:
\p —Jerusalén ja̱'a̱yʉty, pʉn m'oknija̱'a̱dʉpxyʉp ma̱ tyamʉ mxʉʉ wi'ix xypya̱a̱ttʉt ja jotkujk'a̱jtʉn. Per tyam ayu'udsyʉ 'yity ma̱ miidsʉty.
\v 43 Es ja̱'tʉp ja xʉʉ ma̱ mmʉdsípʉty jya̱'ttʉt es dyajkojtʉp mʉdʉ tsa̱a̱, nax, o tijátyʉty ma̱ ñaygyuwa̱'a̱nʉdʉt, es tʉgekyʉ myajnadujkta̱'a̱yʉdʉt oytyim madsooty
\v 44 es dyajtʉgóyʉt ja mga̱jpn es dya'oogʉt ja mja̱'a̱yʉty, es kyaj dyajwʉ'ʉmʉt ni tu'ugʉ tsa̱a̱ nikʉʉybyéty ma̱ ja mbotsy. Tʉgekyʉ tya̱a̱dʉ tyun jyátʉt ja'a ko kyaj tʉ xyñijáwʉdʉ ko yʉ Dios tʉ mnimínʉdʉ.
\s Jesús dyajpʉdsémy di'ibʉ juuy to'ktʉp ma̱ ja mʉj tsa̱jptʉjk
\p
\v 45 Net ja Jesús jyajty ma̱ ja mʉj tsa̱jptʉjk es dyajpʉdseemy di'ibʉ naty to'ktʉp es juuydyʉp jap,
\v 46 es t'anma̱a̱ydyʉ:
\p —Yʉ Diosʉ jyaaybyajtʉn jyʉna'añ: “Yʉ ndʉjkʉts yʉ'ʉ dʉ'ʉn ma̱ ja̱'a̱y kya̱jxta'aky”, es miits xyajwa̱'a̱ndʉ ma'tspʉ a̱a̱nk.
\p
\v 47 Es bom bom ja Jesús ya'ʉxpeky ma̱ ja mʉj tsa̱jptʉjk. Es ja teedywyindsʉ́nʉty es ja di'ibʉty tsa̱jptʉgóty ya'ʉxpʉjktʉp es nandʉ'ʉn ja mʉjja̱'a̱ydyʉjk t'ʉxta̱'a̱ydyʉ ja winma̱'a̱ñ wi'ix ja Jesús 'yoogʉt.
\v 48 Per kyaj tpattʉ wi'ix ttúnʉt, ja'a ko nidʉgekyʉ ja ja̱'a̱y tam yajxón tmʉdoo'íttʉ.
\c 20
\s Jesusʉ kyutujkʉn
\p
\v 1 Tu'ugʉ xʉʉ Jesús dya'ʉxpeky ja ja̱'a̱yʉty es tka̱jxwa'xy ja oybyʉ ayuk mʉj tsa̱jptʉjk ñabotsoty, net jya̱jttʉ ja teedywyindsʉ́nʉty es ja di'ibʉty tsa̱jptʉgóty ya'ʉxpʉjktʉp es ja mʉjja̱'a̱ydyʉjk,
\v 2 es jyʉnandʉ:
\p —Anmaagyʉts, ¿ti kutujkʉn mʉʉt xytyuñʉ tya̱a̱dʉ es pʉ́n tʉ mmo'oyʉdyʉ tadʉ kutujkʉn?
\p
\v 3 Net ja Jesús jyʉnáñ:
\p —Ʉj nandʉ'ʉn nyajtʉwaambyʉts tu'ugʉ ayuk miidsʉty, es xy'adsoojʉmbíttʉt.
\v 4 ¿Pʉ́n mooyʉ yʉ kutujkʉn ja Fwank es yajnʉbátʉt, yʉ'ʉ Diosʉ, o ja̱'a̱yʉ?
\p
\v 5 Es yʉ'ʉjʉty ñayjyʉnánʉdʉ:
\p —Ko n'anma̱'a̱yʉm: “Yʉ'ʉ Dios mooyʉ yʉ kutujkʉn, yʉ'ʉ xy'anma̱'a̱yʉm: ¿Es ti ko xykyamʉbʉktʉ?
\v 6 Es pʉn n'anma̱'a̱yʉm: Yʉ'ʉ wyinma̱'a̱ñʉdyʉ ja̱'a̱y, pojʉn nidʉgekyʉ yʉ ja̱'a̱y xykyuka̱'tsta̱'a̱yʉm, ja'a ko yʉ ja̱'a̱yʉty myʉbʉjktʉp ko ja Fwank yʉ'ʉ Diosʉ kyuga̱jxpʉ.”
\p
\v 7 Pa̱a̱ty t'anma̱a̱ydyʉ ko kyaj tnijawʉ.
\p
\v 8 Net ja Jesús jyʉnáñ:
\p —Ʉj nan kyajts miits n'anʉʉmʉdʉ ti kutujkʉnʉts ʉj nmʉda̱jtypy.
\s Axʉk kamgwentʉ'a̱jtpʉty ijxpajtʉn
\p
\v 9 Net ja Jesús tyʉjkʉ madyakpʉ mʉt ja ja̱'a̱yʉty, es tpʉjtákyʉ tadʉ ijxpajtʉn:
\p —Jaa ijty tu'ugʉ yedyʉjk di'ibʉ kyoj yʉ uuvʉ kam ma̱ ja ñax. Es óknʉm ttukmijky ja uuvʉ kam mʉdʉ wiink ja̱'a̱yʉty es tsyo'onnʉ ja kugam, ñʉjxnʉ jeky.
\p
\v 10 ’Es ko tpaty yʉ tiempʉ ma̱ ja uuvʉ yajtúkʉt, net ja kugam tkejxy tu'ugʉ tyuumbʉ es t'amdówʉt ja ja̱'a̱yʉty di'ibʉ ja kugam pátʉp. Es ja ja̱'a̱yʉty kyaj ti dyajky, je'eyʉ tkepywyojptʉ es dyajjʉmbijttʉ.
\v 11 Net ja kugam tkejxy ja wiinkpʉ tyuumbʉ. Es nandʉ'ʉn axʉʉk ttuundʉ, tkepywyojptʉ es dyajjʉmbijttʉ. Ni ti tkamooydyʉ.
\v 12 Net ja kugam tkejxy jawiinkpʉ tyuumbʉ, es ja ja̱'a̱yʉty dyajtsayujttʉ es dyajkáktʉ.
\p
\v 13 ’Es tim óknʉm ja kugam jyʉnáñ: “¿Tits ndúnʉp? N'okkéxyʉdsʉ n'u'unk di'ibʉts njantsytsyejpy. Ko yʉ'ʉ t'íxtʉt, wa'an twindsʉ'ʉgʉdʉt.”
\v 14 Es ja ja̱'a̱yʉty di'ibʉ jam kywentʉ'a̱jttʉp ja uuvʉ kam, ko t'ijxtʉ, net ñay'anma̱a̱yʉdʉ: “Tya̱a̱dʉ yʉ'ʉ myʉwʉ'ʉmʉyaambyʉ tadʉ kam éxtʉmʉ kuma̱'a̱ñ. N'ok'ya'o'kʉm es ʉdsa̱jtʉm nja'a'a̱jtʉm yʉ tya̱a̱dʉ.”
\v 15 Net dyajpʉdsʉʉmdʉ jap kamoty es dya'o'ktʉ.
\p Net ja Jesús dyajtʉʉy:
\p —¿Ti tyúnʉp mʉt yʉ'ʉjʉty ja kugam?
\v 16 Mínʉp es dya'o'kta̱'a̱yʉdʉ tadʉ axʉk ja̱'a̱ydyʉjk, es tmo'oyʉt ja wiinkpʉ 'yuuvʉ kam.
\p Es ko ja ja̱'a̱y tmʉdoodʉ taadʉ, ta jyʉnandʉ:
\p —¡Ni tkatsókʉt ja Dios!
\p
\v 17 Per ja Jesús wyin'ijxʉdʉ, es jyʉnáñ:
\p —¿Es ti myaydya̱'a̱gaampy di'ibʉ jap ma̱ ja Diosʉ jyaaybyajtʉn ma̱ kʉxja̱'a̱y 'yity?:
\q Yʉ tsa̱a̱ di'ibʉ ja pojtspʉtʉjk myastutʉ,
\q tʉ tpa̱a̱ty ja lyuga̱a̱r ma̱ ja tʉjk t'ʉjx'áty.
\m
\v 18 Es pʉ́n jam kʉxjʉbijp ma̱ tadʉ tsa̱a̱, kana̱k pedazʉ jam wya̱'xʉt. Es pʉn tadʉ tsa̱a̱ nitimpajtʉp pʉ́nʉty, tukwa̱'a̱yʉdya'ayʉdʉp.
\p
\v 19 Es ja teedywyindsʉ́nʉty es ja di'ibʉty tsa̱jptʉgóty ya'ʉxpʉjktʉp netyʉ tjamatsandʉ ja Jesús, ja'a ko yʉ'ʉ ñija̱'a̱dʉp ko ja Jesús tʉ tpʉjta'agyʉ tadʉ ijxpajtʉn mʉt yʉ'ʉjʉty. Per kyaj tma̱jtstʉ, ja'a ko ja ja̱'a̱y ttsʉ'ʉgʉdʉ.
\s Jesús tmadya'aky ja kugʉbajtʉn
\p
\v 20 Net tkajxtʉ ja kugajxyʉty di'ibʉ nay'andíjʉdʉp jyiky'attʉ tʉy'a̱jtʉn mʉʉt, es t'ʉxta̱a̱ydyʉ ja winma̱'a̱ñ wi'ix dyajka̱'a̱dʉt es tkʉyaka̱'a̱ndʉ ma̱ ja gobernadoor.
\v 21 Es t'anma̱a̱ydyʉ ja Jesús:
\p —Ya'ʉxpʉjkpʉ, nnija̱'a̱dʉpts ko mduk'ʉxpeky di'ibʉ tʉy'a̱jtʉn es kyaj xyajtʉgátsy ja m'ʉxpʉjkʉn, ti'igyʉ mgajpxy oypyʉ́nʉty mʉʉt, es mya'ʉxpeky mʉt ja tʉy'a̱jtʉn ma̱ ja Diosʉ tyu'u.
\v 22 Anmaagyʉts, ¿tii mba̱a̱dʉts ʉj ngugʉbattʉ ma̱ ja yajkutujkpʉ kopk Sésʉr, o kyajʉ?
\p
\v 23 Es ja Jesús ñija̱'a̱p ja ja̱'a̱yʉty 'yaxʉk winma̱'a̱ñ es t'anma̱a̱y:
\p
\v 24 —Tuk'ijxkʉts tu'ugʉ meeñ. ¿Pʉ́n jam kʉxkojy ja wyiin jyʉjp es pʉ́n ja xyʉʉ kʉxja̱'a̱y?
\p Es ja ja̱'a̱yʉty 'yadsooy:
\p —Yʉ'ʉ yajkutujkpʉ kopk.
\p
\v 25 Net ja Jesús jyʉnáñ:
\p —Pes mo'oy ja yajkutujkpʉ kopk di'ibʉ yʉ'ʉ jya'a'a̱jtypy, es mo'oy ja Dios nandʉ'ʉn di'ibʉ yʉ'ʉ jya'a'a̱jtypy.
\p
\v 26 Es ja ja̱'a̱yʉty ñija̱'a̱dʉp ko Jesús wyijyʉty mʉt ja 'yayuk éxtʉm tʉ 'yadsoy. Es kyaj mba̱a̱t dyajka̱'a̱dʉ wi'ix ko yʉ'ʉ ya'ʉxpeky mʉt ja mayjya'ay, es net yʉ'ʉjʉty 'yamoonda̱a̱ydyʉ.
\s Ja̱'a̱y dyajtʉ́wdʉ pʉn jikypyʉ́ktʉp ja o'kpʉty
\p
\v 27 Es óknʉm nija'ajʉty ja saduseeʉty myiindʉ ma̱ ja Jesús. Ja saduseeʉty jyʉna̱'a̱ndʉ ko kyajp jyikypyʉka̱'a̱ñ ja o'kpʉty. Pa̱a̱ty t'anma̱a̱ydyʉ ja Jesús:
\p
\v 28 —Ya'ʉxpʉjkpʉ, ja Moisés tkʉxja̱a̱y pʉn tu'ugʉ yedyʉjk o'kp es tku'oogʉt ja ñʉdo'oxy es kyaj tʉ 'yu'unkpa̱a̱ty ni tu'uk, ja o'kpʉ 'yutsy pyʉ́kʉp ja ku'ekytyo'oxy. Es ko tpa̱a̱dʉt ja 'yu'unk yedyʉjk, yʉ'ʉ tyuknikʉjxm'átʉp ja jamyii.
\v 29 N'ixy'a̱jtʉts ja ja̱'a̱yʉty di'ibʉ nijʉxtujk tukka'ax. Es ja ka'axkópk pyejky, es 'ye'ky, es kyaj dya'u'unkpáty ja ñʉdo'oxy.
\v 30 Ta ja myʉmajtskpʉ tpejky ja ku'ekytyo'oxy es nandʉ'ʉn jyajty.
\v 31 Es ja myʉdʉgʉʉkpʉ nandʉ'ʉn jyajty. Extʉ ko 'yabʉdseemy nijʉxtujk, es ni pʉ́n tkatukpattʉ 'yu'unk.
\v 32 Es ko tya̱a̱dʉ dʉ'ʉn tʉgekyʉ ñajxy, ta nandʉ'ʉn ja toxytyʉjk 'yo'knʉ.
\v 33 Es yʉ'ʉts nyajtʉwaampy. Ko jyikypyʉ́kʉt, ¿pʉ́nʉk yʉ'ʉ nidu'uk ñʉdo'oxy'ajtypy?, ja'a ko yʉ'ʉ tpʉjk'abʉdsʉʉmda̱a̱ydyʉ tadʉ toxytyʉjk nijʉxtujkʉty.
\p
\v 34 Net ja Jesús 'yadsooy:
\p —Ma̱ tya̱dʉ naxwíñʉdʉ, pʉjktʉp ja ja̱'a̱yʉty,
\v 35 per di'ibáty nitʉjkʉp es jya̱'ttʉt ma̱ tadʉ jiky'a̱jtʉn es jyikypyʉ́ktʉt, kyaj ñakypyʉ́ktʉt,
\v 36 ja'a ko kyaj mba̱a̱t ñaky'ooktʉ. Pes dʉ'ʉn 'yíttʉt éxtʉm ja ánklʉsʉty, Dios 'yu'unk'átʉdʉt, mʉt ko tʉ jyikypyʉktʉ.
\v 37 Ma̱ yajmadya'aky ja kepy tyoy, kʉ'ʉm ja Moisés xytyuknija̱'a̱m ko yʉ o'kpʉ jyikypyʉktʉ. Es jap tkʉxja̱a̱y ko Dios 'yanma̱a̱yʉ: “Ʉjts Dios di'ibʉ ja m'aptʉjkʉty xyDyios'a̱jtʉpts. Ʉjtsʉ dʉ'ʉn ja Abra̱a̱nʉ Dyios, Isa̱a̱ esʉ Jakoob.”
\v 38 Dios, kyaj yʉ'ʉ Dyios'aty mʉt ja eekypyʉ. Yʉ'ʉ 'yity Dios mʉt ja jiikypyʉ. Es mʉt yʉ'ʉ tʉgekyʉ jyiky'a̱jtta̱'a̱ydyʉ.
\p
\v 39 Net na̱a̱gʉty ja di'ibʉ tsa̱jptʉgóty ya'ʉxpʉjktʉp jyʉnandʉ:
\p —Oy tʉ xy'adsoy.
\p
\v 40 Es kyaj pʉ́n 'yoknaydyuk'a'ijxʉnʉ es tii tnakyyajtʉ́wdʉt.
\s Pʉ́nʉ tyʉʉmp 'ya̱a̱ts ja Kristʉ
\p
\v 41 Net ja Jesús dyajtʉʉdʉ ja'ajʉty:
\p —¿Es wi'ix mjʉna̱'a̱ndʉ ko ja Kristʉ yʉ'ʉ Davit ja tyʉʉmp 'ya̱a̱ts?
\v 42 Davit kʉ'ʉm jyʉna'añ ma̱ ja Salmʉ neky:
\q Yʉ Nindsʉn'a̱jtʉm Dios t'anʉʉmʉ ʉjtsʉ nWindsʉ́n:
\q “U'uñʉ ya̱a̱ aga̱'a̱ñdsyoo ma̱ ʉjʉn
\q
\v 43 extʉ kots ʉj nyajtʉgóyʉt tʉgekyʉ mij ja mmʉdsip.”
\m
\v 44 ¿Es wi'ix mba̱a̱t yʉ Kristʉ tyʉʉmp'áty 'ya̱a̱ts'átyʉty yʉ Davit?, ja'a ko Davit kʉ'ʉm jyʉnáñ: “NWindsʉ́nʉts.”
\s Jesús tnigajxy ja di'ibʉ tsa̱jptʉgóty ya'ʉxpʉjktʉp
\p
\v 45 Es ja ja̱'a̱yʉty nidʉgekyʉ tmʉdoo'íty ko Jesús t'anʉʉmʉ ja 'yʉxpʉjkpʉty:
\p
\v 46 —Naygywentʉ'átʉdʉ miidsʉty mʉʉt ja di'ibʉty ya'ʉxpʉjktʉp tsa̱jptʉgóty. Yʉ'ʉ pyʉjtáktʉp ja witʉ yembyʉ, es ttsoktʉ es ja ja̱'a̱yʉty 'yʉbo'x kya̱jxpo'xʉdʉt tu'a̱a̱y mʉdʉ windsʉ'kʉn es t'ʉxta̱'a̱ydyʉ uñaaybyajn ja oybyʉ ma̱ ja tsa̱jptʉjk es ma̱ ja xʉʉ tyúñʉty,
\v 47 es tpʉjkʉdʉ ja tyʉjkʉty yʉ ku'ekytyo'oxyʉty, es kya̱jxta̱'a̱ktʉ jeky es dʉ'ʉn twin'ʉʉna̱'a̱ndʉ ja ja̱'a̱yʉty, es ñay'andíjʉdʉ jyiky'attʉ tʉy'a̱jtʉn mʉʉt. Pa̱a̱ty pátʉdʉp ni'igʉ ja tʉydyu'unʉn.
\c 21
\s Ku'ekytyo'oxy ja myeeñ dyoxy
\p
\v 1 Es ma̱ ja mʉj tsa̱jptʉjkʉ 'yalkansiiʉ ja Jesús t'ijxy ko ja mʉkja̱'a̱ydyʉjk tpʉjta̱'a̱ktʉ ja meeñ.
\v 2 Es nandʉ'ʉn t'ijxy ko tu'ugʉ ku'ekytyo'oxy ayoobʉ tpʉjta'aky nandʉ'ʉn majtskʉ mutsk meeñu'unk.
\v 3 Es ja Jesús t'anma̱a̱y ja 'yʉxpʉjkpʉtʉjk:
\p —Tʉy'a̱jtʉn n'anʉʉmʉ ko tya̱dʉ ku'ekytyo'oxy di'ibʉ ayoop tʉ dyaky ni'igʉ es kʉdiinʉm ja mʉkja̱'a̱yʉty,
\v 4 ja'a ko yʉ'ʉjʉty tʉ dyaktʉ di'ibʉ yajnadʉjkʉp, perʉ tya̱dʉ ku'ekytyo'oxy tʉ dyaky tʉgekyʉ ja myeeñ di'ibʉ tukjiky'a̱jtʉn.
\s Jesús tnigajxy ko ja mʉj tsa̱jptʉjk tyʉgoya'añ
\p
\v 5 Es nija'ajʉty jyʉna̱'a̱ndʉ ko ja mʉj tsa̱jptʉjk 'yóyʉty tsyújʉty ya'ixy mʉt ja tsa̱a̱ ja oyatypyʉ es mʉt di'ibʉ ja ja̱'a̱y tʉ tnayaktʉ éxtʉm ja windsʉ'kʉn. Net ja Jesús jyʉnáñ:
\p
\v 6 —Ja̱'tʉp ja xʉʉ ko tʉgekyʉ tya̱a̱dʉ di'ibʉ miits m'ijxtʉp jyijtta̱'a̱yʉt es ni kyawʉ'ʉmʉt ni tu'ugʉ tsa̱a̱ nikʉʉybyéty.
\s Ijxwʉ'ʉmʉn ko ja naxwíñʉdʉ tyʉgoya'añ
\p
\v 7 Es ja 'yʉxpʉjkpʉtʉjk dyajtʉʉdʉ ja Jesús:
\p —Windsʉ́n, ¿na̱'a̱ tya̱a̱dʉ jyata̱'a̱ñ dʉ'ʉn es wi'ix ja ijxwʉ'ʉmʉn ko tya̱a̱dʉ dʉ'ʉn jyata̱'a̱ñ?
\p
\v 8 Es ja Jesús jyʉnáñ:
\p —Naygywentʉ'átʉdʉ, kʉdiibʉ myajwin'ʉʉndʉt, ja'a ko may myina̱'a̱ñ di'ibʉ jʉna̱'a̱na̱a̱mp: “Ʉjtsʉ dʉ'ʉn ja Kristʉ.” Es jʉna̱'a̱na̱a̱mp: “Tʉ jya'ty ja tiempʉ.” Katʉ xypyanʉjxtʉ.
\v 9 Ko xymyʉdówdʉt es jyʉna̱'a̱ndʉ ja̱'a̱y ko myina̱'a̱ndʉ solda̱a̱dʉ es tsyiptuna̱'a̱ndʉ, kyaj mnay'adsʉ'ʉgʉdʉt. Dios tyuknibʉjtákʉ es yʉ'ʉ tyun jyátʉt jawyiin, per kyajnʉm tpa̱a̱ty ma̱ ja naxwíñʉdʉ tyʉgóyʉt.
\p
\v 10 ’Tu'ugʉ naxwíñʉdʉ tsyiptúnʉt mʉt ja wiinkpʉ naxwíñʉdʉ esʉ ana'ambʉ mʉt ja wiink ana'ambʉ.
\v 11 Es myínʉt ja mʉk ujx, es ma̱jatyʉ nax ka̱jpn myínʉt ja yuu es ja mʉk pa̱'a̱m, es jam tsa̱jwínm ya'íxʉt ja ijxwʉ'ʉmʉn di'ibʉ naxwíñʉdʉ ja̱'a̱y tsyʉ'ʉgʉdʉp.
\p
\v 12 ’Es kyajnʉmʉ naty tyuñ jya'tyʉty tʉgekyʉ taadʉ, miits myajmátstʉt, myajtsúmʉt es myajtsa̱a̱tsytyúnʉt, myajmʉnʉjxʉp ma̱ ja kumda̱ttʉjk es ma̱ gobernadoor es ma̱ réyʉty, ja'a ko miits xypyanʉjxtʉpts.
\v 13 Es dʉ'ʉn miidsʉty xykya̱jxʉt ʉjtsʉ nja'a ma̱ ja ja̱'a̱yʉty.
\v 14 Katʉ mjotmay'ooktʉ miidsʉty wi'ix mnayñika̱jxtu'udʉdʉt,
\v 15 ja'a ko ʉjts nyákʉp ja ayuk es ja winma̱'a̱ñ di'ibʉ ni pʉ́n ja mmʉdsip kyamada̱'a̱gʉt es mjʉjpkuga̱jxʉdʉt.
\v 16 Es n'awanʉ miidsʉty ko extʉ mda̱a̱k mdeedyʉty es ja mmʉga'axʉty es yʉ mmʉtnaymyaayʉbʉty mgʉyákʉdʉp, es mya'oogʉdʉt nidu'ugʉty miidsʉty.
\v 17 Es nidʉgekyʉ ja̱'a̱yʉty m'axʉk'íxʉdʉt ja'a ko miits xypyanʉjxtʉpts.
\v 18 Per ko dʉ'ʉn ja ayo'on jya̱'tʉt, kyaj mjʉna̱'a̱nʉt ko Dios tʉ mja̱'a̱ydyʉgooyʉnʉ. Dios mgwentʉ'a̱jtʉdʉp oy, extʉ mwa̱a̱y di'ibʉ mgʉba̱jkkʉjxm myʉda̱jtypy madsyoy.
\v 19 Amʉk jotmʉk mnaybyʉjta̱'a̱gʉdʉt es xypya̱a̱dʉt ja nitsokʉn.
\p
\v 20 ’Ko xy'íxtʉt ja Jerusalén ka̱jpn ñadujkta̱'a̱yʉt mʉt ja solda̱a̱dʉty, tʉ naty tpa̱a̱ty ma̱ kyutʉgoya'añ.
\v 21 Es miidsʉty di'ibʉ ijttʉp Judeeʉ, nʉjxtʉ jagam yugoty; es pʉ́nʉty ijttʉp Jerusalén, pʉdsʉmdʉ nandʉ'ʉn netyʉ, es pʉ́nʉty ijttʉp kamoty, kyaj jyʉmbíttʉt ka̱jpnóty,
\v 22 ja'a ko ayo'on jatánʉp es yajkuydyuna̱'a̱ñ éxtʉm ja Diosʉ jyaaybyajtʉn jyʉna'añ.
\v 23 Pʉroobʉ yʉ toxytyʉjkʉty di'ibʉ u'unkmʉʉdʉty es di'ibʉ ya'u'unktsi'tsp ko dʉ'ʉn jyátʉt, ja'a ko mʉk ayo'on ñáxʉt ma̱ ja nax, y ni'igʉ jyáttʉt tsa̱a̱tsy kyʉbety ma̱ tya̱dʉ ja̱'a̱yʉty.
\v 24 Nija'adyʉ ja̱'a̱y ya'oogʉdʉt ja solda̱a̱dʉty. Es nija'ajʉty yajmʉnʉjxʉt tsimy ma̱jatyʉ wiink naxwíñʉdʉ. Es ja wiink ja̱'a̱yʉty di'ibʉ kyaj 'yisraelítʉty 'yana'amʉ ma̱ ja Jerusalén ka̱jpn extʉ ko kya̱'pxʉt ja tiempʉ di'ibʉ Dios tʉ tpʉjta'aky.
\s Wi'ix jyʉmbítʉt ja Naxwíñʉdʉ Ja̱'a̱yʉdyʉ Kyudʉnaabyʉ
\p
\v 25 ’Es ya'ixa̱'a̱ñ ja ijxwʉ'ʉmʉn di'ibʉ Dios tyunaampy ma̱ xʉʉ es ma̱ po'o es ma̱ mʉdsa̱'a̱. Es ja naxwíñʉdʉ ja̱'a̱y kyaj tnijáwʉdʉ ti tunánʉp es nay'adsʉ'ʉgʉdʉp mʉk ko tmʉdówʉt pyʉmimy yʉ jikymyejyñ es jyantsypyʉdʉ'ʉgʉt.
\v 26 Es ja ja̱'a̱yʉty extʉ o'ktso'ogʉp mʉt ja tsʉ'ʉgʉ ko t'íxʉt di'ibʉ jatánʉp ya̱ naxwiiñ, ja'a ko extʉ yʉ mʉdsa̱'a̱ yu'xa̱'a̱ñ.
\v 27 Net t'íxtʉt ko ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, nmínʉdʉts ya̱ naxwiiñ yoodsóty mʉt ja mʉk'a̱jtʉn es ni'igʉ mʉj'a̱jtʉn.
\v 28 Es ko oga̱'a̱n tsyonda̱'a̱gʉt tya̱dʉ ayo'on, jotkujkʉdʉ es koojʉ'ʉktʉ, ja'a ko pojʉn myínʉt ja mnitsokʉn.
\p
\v 29 Es ja Jesús nandʉ'ʉn tpʉjtáky ja ijxpajtʉn:
\p —Ixtʉ yʉ iigʉ kepy es oytyim di'ibʉ képyʉty.
\v 30 Ko xy'íxtʉt xyʉmimy yʉ 'yaay, miits mnija̱'a̱dʉp ko tʉ wyingóñ ja ambʉ.
\v 31 Es nandʉ'ʉn ko xy'íxtʉt jyátʉdʉ tadʉ di'ibʉ tʉ n'anʉʉmʉ, mnijáwʉdʉp ko tʉ wyingóñ ja Diosʉ kyutujkʉn.
\p
\v 32 ’Tʉy'a̱jtʉn n'anʉʉmʉdʉ ko tʉgekyʉ tya̱a̱dʉ jyata̱'a̱ñʉty ma̱a̱nʉmʉ naty ja ja̱'a̱yʉty di'ibʉ tyam kyaj 'yo'kta̱'a̱ydyʉnʉm.
\v 33 Ja tsa̱jp es ja naxwíñʉdʉ náxʉp, per ja n'ayúkʉts ni na̱'a̱ kyakexy kyanaxy.
\p
\v 34 ’Mnaygywentʉ'átʉdʉp miidsʉty. Katʉ mnaymastu'udʉdʉ es nʉgoo mgay mmʉ'uuktʉt es xymyʉmay xymyʉda̱jtʉt di'ibʉ ya̱ naxwiiñ, esʉ tadʉ xʉʉ ajotkumiigyʉ ti'in myajtukja̱'ttʉt éxtʉm ko ja jʉyujkʉty yajnáky.
\v 35 Es dʉ'ʉn jyáttʉt nidʉgekyʉ naxwíñʉdʉ ja̱'a̱y kots ʉj nʉjx nmiñ.
\v 36 Awix jʉjp'íxtʉ es dʉ'ʉñʉm mga̱jxta̱'a̱ktʉt es dʉ'ʉn mnitso'oktʉt ko jyátʉt tadʉ ayo'on es mʉk a̱a̱ mʉk jot xywyinguwa̱'a̱gʉdʉts, ʉj, ja Naxwíñʉdʉ Ja̱'a̱yʉdyʉ Kyudʉnaabyʉ.
\p
\v 37 Xʉʉñ ja Jesús ya'ʉxpeky ma̱ ja mʉj tsa̱jptʉjk, esʉ tsu'um jam dyajnáxy ma̱ Oliivʉs Kopk.
\v 38 Es nidʉgekyʉ ja̱'a̱yʉty jya̱jttʉ jépyʉp jap ma̱ ja mʉj tsa̱jptʉjk es tmʉdoo'ita̱'a̱ñ ja Jesús.
\c 22
\s Tkajxy'áttʉ pʉn wi'ixʉ Jesús yajmátsʉt
\p
\v 1 Es ja paskʉ wyingoñʉ naty ma̱ yajkáy ja tsa̱jkaaky di'ibʉ kyaj tmʉdaty ja levaduurʉ.
\v 2 Es ja teedywyindsʉ́nʉty es ja di'ibʉty tsa̱jptʉgóty ya'ʉxpʉjktʉp t'ʉxta̱'a̱ydyʉ ja winma̱'a̱ñ wi'ix 'yoogʉt ja Jesús, per ttsʉ'ʉgʉdʉ ja ja̱'a̱yʉty.
\s Juudʉs tkʉyaka̱'a̱ñ ja Jesús
\p
\v 3 Net ja mʉjku'ugópk Satanás tmooy ja winma̱'a̱ñ yʉ Juudʉs Iskaryotʉ di'ibʉ ijtp nidu'uk ma̱ ja nima̱jmajtskpʉ Jesusʉ 'yʉxpʉjkpʉ,
\v 4 es oj ñejxy ma̱ ja teedywyindsʉ́nʉty es di'ibʉty yʉ mʉj tsa̱jptʉjk kywentʉ'a̱jttʉp, es myadyaky mʉt yʉ'ʉjʉty wi'ix tkʉyaka̱'a̱ñ ja Jesús.
\v 5 Es ja ja̱'a̱yʉty xyondaktʉ es t'anma̱a̱ydyʉ ja Juudʉs ko tmo'oya̱'a̱ndʉ ja meeñ.
\v 6 Es ja Juudʉs tkupejky es t'ʉxta̱a̱y ja winma̱'a̱ñ wi'ix tkʉyákʉt ja Jesús ko kyajʉ naty nʉ'ʉnʉ ja̱'a̱y.
\s Nindsʉn'a̱jtʉmʉ 'ya'ux
\p
\v 7 Es ma̱ ja paskʉ ko ja ja̱'a̱yʉty dya'ooktʉ ja byorreegʉ,
\v 8 net ja Jesús tkejxy yʉ Peedrʉ mʉt ja Fwank es t'anma̱a̱y:
\p —Nʉjx ya''aba̱a̱dʉdʉ ja paskʉ a'ux.
\p
\v 9 Es yʉ'ʉjʉty dyajtʉʉdʉ:
\p —¿Ma̱ xytsyeky es nya''aba̱a̱dʉdʉts?
\p
\v 10 Es ja Jesús 'yadsooy:
\p —Ko miits mga̱jpndʉ́kʉdʉt, net xypya̱a̱dʉt tu'ugʉ yedyʉjk di'ibʉ myʉnejxypy tuk tsiyʉ nʉʉ, es xypyanʉjxʉt extʉ ma̱ tyʉjktʉ́kʉ.
\v 11 Es xy'anʉʉmʉt ja kudʉjk: “Ja Windsʉ́n yʉ'ʉ myajtʉʉjʉp: ¿Ma̱ ja kwartʉ ma̱ mba̱a̱t n'a'ux'áttʉdʉts mʉdʉdsʉ n'ʉxpʉjkpʉtʉjk tyam ja paskʉ?”
\v 12 Net mduk'íxʉdʉt tu'ugʉ mʉj kwartʉ es oydyúñ ma̱ ja tuknikʉ'ʉybyʉ tʉjk. Es xy'ʉxkúkʉt ja a'ux jam.
\p
\v 13 Es yʉ'ʉjʉty ñʉjxtʉ es tpattʉ tʉgekyʉ éxtʉm 'yanma̱a̱yʉ ja Jesús, es dya''abátʉdʉ ja paskʉ a'ux.
\p
\v 14 Es ko oorʉ oj tpatnʉ esʉ ja̱'a̱y 'y'a'ux'áttʉt, ta ja Jesús es ja 'yʉxpʉjkpʉtʉjk ñaxwa'tsta̱a̱ydyʉ meesʉ winduuy.
\v 15 Net ja Jesús jyʉnáñ:
\p —Njantsytsyékyʉts es nduna̱'a̱ñʉts mʉt miits yʉ tya̱dʉ paskʉ a'ux ma̱ kyajnʉmts n'eeky.
\v 16 Ja'a ko n'anʉʉmʉdʉ ko kyajts nnakykyáyʉt ja paskʉ a'ux extʉ ko yajkuydyúnʉt ma̱ ja Diosʉ kyutujkʉn.
\p
\v 17 Net tkone'ky tuk vasʉ vinʉ es tja̱'a̱ygyʉdáky ja Dios es t'anma̱a̱y ja 'yʉxpʉjkpʉty:
\p —Matstʉ es xyajwa̱'xtʉt miidsʉty.
\v 18 N'anʉʉmʉdʉ ko kyajts nnaky'uugʉdʉts ja vinʉ extʉ ko myínʉt ja Diosʉ kyutujkʉn.
\p
\v 19 Es óknʉm tkone'ky ja tsa̱jkaaky es tja̱'a̱ygyʉdáky ja Dios, net ttujkwa'xy es tmooydyʉ ja 'yʉxpʉjkpʉty es t'anma̱a̱y:
\p —Yʉ'ʉ tya̱a̱dʉ ʉjtsʉ nnini'x di'ibʉ yajkʉyaka̱a̱mp mʉt miidsʉty. Tundʉ dʉ'ʉn esʉts xyjamyátstʉt.
\p
\v 20 Es nandʉ'ʉn ttuuñ mʉt ja vasʉ vinʉ ko kyaaydyaay ma̱ ja a'ux es jyʉnáñ:
\p —Tya̱dʉ vinʉ, yʉ'ʉts ja nne'pyñ di'ibʉ yajtama̱a̱mp yaj'yoka̱a̱mp kots n'oogʉt miidsʉty m'oy'a̱jtʉngyʉjxmʉty es yʉ'ʉgyʉjxm ja Dios mmo'oyʉdʉt ja jembyʉ kajxy'átypyʉ.
\p
\v 21 ’Es ja yedyʉjk di'ibʉts xykyʉyaka̱a̱mp, ta tyam 'yity mʉt ʉʉdsʉty ma̱ tya̱dʉ meesʉ.
\v 22 Es tʉy'a̱jtʉn ko ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, nyo'oyʉts ma̱ ja o'kʉn ja tyu'u, éxtʉm ja Dios tʉ tpʉjta'aky. Per pʉroobʉ ja yedyʉjk di'ibʉts xykyʉyaka̱a̱mp.
\p
\v 23 Net ja 'yʉxpʉjkpʉty ñayyajtʉʉjʉdʉ ak yʉ'ʉjʉty pʉ́nʉ da kʉyakánʉp.
\s Pʉ́n waanʉ mʉj
\p
\v 24 Net ak yʉ'ʉjʉty ñayjyʉnánʉdʉ pʉ́nʉ da ni'igʉ mʉj ijtp.
\v 25 Es ja Jesús 'yanma̱a̱yʉdʉ:
\p —Ja naxwíñʉdʉ ja̱'a̱yʉ ryéyʉty esʉ gyobernadoorʉty ñaymyʉjpʉjta̱'a̱gʉdʉ, es ttsoktʉ es ja ja̱'a̱yʉty jyʉna̱'a̱ndʉt ko yʉ'ʉ jyiky'attʉ tʉy'a̱jtʉn mʉʉt.
\v 26 Per miidsʉty kyaj dʉ'ʉn xytyúndʉt. Ko mʉj m'ita̱'a̱nʉt ma̱ Dios, kyaj mnaymyʉjpʉjta̱'a̱gʉdʉt. Naybyʉjta̱'a̱gʉdʉ éxtʉm di'ibʉ waanʉ mutskpʉ, es di'ibʉ ana'amp, yʉ'ʉ naybyʉjtákʉp éxtʉm tu'ugʉ tuumbʉ.
\v 27 ¿Es pʉ́n ni'igʉ mʉj? ¿Di'ibʉ uñaapy ma̱ ja meesʉ es kyay, o ja tuumbʉ di'ibʉ wingiipy? Ja'a pʉ́n uñaapy es kyay, ¿kʉdii? Per ʉj tyámʉts ma̱ miidsʉty éxtʉm di'ibʉ wingiipy.
\p
\v 28 ’Es miidsʉty tʉ xyjamyʉdáttʉts es tʉ nandʉ'ʉn m'ayowdʉ mʉt ʉj.
\v 29 Pa̱a̱ty éxtʉm yʉ nDeedyʉts tʉ xymyo'oyʉts ja kutujkʉn, ʉj nmo'oya'añʉts miidsʉty nandʉ'ʉn ja kutujkʉn
\v 30 es mgay m'uuktʉt mʉt ʉjts ma̱ts ja nmeesʉ kots ʉj nmínʉt yajkutujkpʉ, es nbʉjta̱'a̱ktʉt miidsʉty éxtʉmʉ gobernadoorʉty es m'ana'amʉt ma̱ ja ma̱jmajtskpʉ Israelʉ mya̱a̱ngʉdyʉ tyʉʉmp 'ya̱a̱ts.
\s Jesús tnigajxy ko Peedrʉ 'yʉxtija̱'a̱ñʉty
\p
\v 31 Es ja Jesús t'anma̱a̱y ja Peedrʉ:
\p —Simonk, ja mʉjku'ugópk Satanás tʉ t'amdoy yʉ kutujkʉn ma̱ Dios es miits myajwijtsxita̱'a̱ndʉ éxtʉm ja triigʉ yajwinxíty. Ja'adsʉ tya̱a̱dʉ n'andijpy, íxʉp wi'ix myajpekytyúnʉdʉ.
\v 32 Per ʉj tʉts nmʉnu'xta'aky ja Dios kʉdiibʉ mmʉbʉjkʉn tyʉgoy'átʉt. Es ko mij mjodʉmbítʉt, xypyudʉ́kʉt ja mmʉgu'ugʉty es kyajts ʉj xymyastu'uttʉt.
\p
\v 33 Es ja Peedrʉ t'anma̱a̱y ja Jesús:
\p —Windsʉ́n, ʉj nbanʉjxaambyʉts mij oy mdimnʉjxʉt pujxndʉgóty, es extʉ óyʉts ndim'oogʉt mʉt mij.
\p
\v 34 Ta ja Jesús 'yadsooy:
\p —Peedrʉ, n'anʉʉmʉ ko tyamyʉ, ko kyajnʉmʉ naty ja tʉgaak 'yʉy, mjʉna̱'a̱nʉt tʉgʉk ok ko kyajts mij xy'ixy'aty.
\p
\v 35 Net ja Jesús dyajtʉʉdʉ ja 'yʉxpʉjkpʉty:
\p —Kots mij ngajxtʉ n'ayuk ka̱jxwa̱'xpʉ es kyaj xymyʉnʉjxtʉ ja mmorral mʉt ja mdu'uga̱a̱yʉk es ni mmeeñdyʉjk es ni mgʉ'ʉgʉ ni'igʉbʉ, ¿tii mdʉgoy'a̱jtxʉ oynʉ'ʉnʉn?
\p Es yʉ'ʉjʉty jyʉnandʉ:
\p —Ni tii.
\p
\v 36 Net ja Jesús jyʉnáñ:
\p —Pes tyam n'anʉʉmʉ, pʉ́n myʉda̱jtypy ja myorral es ja myeeñdyʉjk, wa'an dyajnejxy. Es pʉ́n kyaj tmʉdaty yʉ espa̱a̱dʉ, wa'an tteeky ja wyit es tjúyʉt.
\v 37 Es n'anʉʉmʉ koonʉm yajkuydyúnʉt mʉt ʉj éxtʉm ja Diosʉ jyaaybyajtʉn jyʉna'añ: “Yajtúnʉp éxtʉmʉ axʉk ja̱'a̱yʉn.” Pes, tʉgekyʉ di'ibʉ ja̱a̱ybyéty ijtp mʉt ʉj, koonʉmʉ dʉ'ʉn tyuñ jyátʉdʉt.
\p
\v 38 Es ja 'yʉxpʉjkpʉty 'yanma̱a̱yʉdʉ:
\p —Windsʉ́n, tyam majtskʉ espa̱a̱dʉ.
\p Es ja Jesús 'yadsooy:
\p —Mʉt yʉ'ʉyʉ.
\s Jesús kya̱jxta'aky Jetsemanii
\p
\v 39 Net ja Jesús tsyo'oñ es ñejxy ma̱ ja Oliivʉs Kopk, éxtʉm jaayʉm ñejxy. Es ja 'yʉxpʉjkpʉtʉjk pyanʉjxʉdʉ.
\v 40 Es ko jya̱jttʉ jam, net ja Jesús jyʉnáñ:
\p —Ka̱jxta̱'a̱ktʉ es kʉdiibʉ mbekytyúndʉt.
\p
\v 41 Net ja Jesús ñejxy abeky tuk ka̱'tske'egyʉn, es ñaygyoxtʉna̱a̱ydyákʉ es kya̱jxtáky,
\v 42 es jyʉnáñ:
\p —Tatʉ, pʉn mdsejpy, yajjʉga'agʉ tya̱dʉ vasʉ. Per kyaj tyúnʉt éxtʉmts ʉj ndseky, tun éxtʉm mij xytsyeky.
\p
\v 43 Es net ñimiinʉ tu'ugʉ anklʉs di'ibʉ tsa̱jpótm es jyotmʉkmooyʉ.
\v 44 Es ko jam jyantsy'ayooy mʉk, net kya̱jxtáky mʉt tʉgekyʉ myʉja̱a̱, es pyʉxyíkyʉty es xye'xy éxtʉmʉ ne'pyñ di'ibʉ ka̱'a̱p naxkʉjxy.
\p
\v 45 Es ko pyʉde'ky ma̱ naty kya̱jxta'aky, ta ñejxy ma̱ ja 'yʉxpʉjkpʉtʉjk, es tpattʉ ak ma̱a̱dʉp, mʉt ko jyotmay'ooktʉ.
\v 46 Net ja Jesús jyʉnáñ:
\p —¿Ti ko mma̱'a̱dʉ? Pʉdʉ'ʉktʉ es mga̱jxta̱'a̱ktʉt, kʉdiibʉ mbekytyúndʉt.
\s Jesús yajmátsy
\p
\v 47 Támnʉmʉ naty ja Jesús 'yakkajxy ko myiindʉ mayjya'ay es ja Juudʉs twinyo'oyʉdʉ, ja di'ibʉ ijtp ma̱ nima̱jmajtskpʉ ʉxpʉjkpʉ. Es ja Juudʉs tnimiiñ ja Jesús es ttsu'xa̱'a̱ñ.
\v 48 Net ja Jesús t'anma̱a̱y ja Juudʉs:
\p —Juudʉs, ¿dʉ'ʉnʉts xykyʉyaka̱'a̱ñ mʉt tu'ugʉ tsi'xyʉ?, ʉj, ja Naxwíñʉdʉ Ja̱'a̱yʉdyʉ Kyudʉnaabyʉ.
\p
\v 49 Es ko ja 'yʉxpʉjkpʉtʉjk t'ixtʉ di'ibʉ ja̱jtʉp, net dyajtʉʉdʉ ja Jesús:
\p —Windsʉ́n, ¿n'ok'yajtu'unʉm yʉ espa̱a̱dʉ?
\p
\v 50 Es nidu'uk yʉ'ʉjʉty dyajtsayujtʉ tu'ugʉ teedywyindsʉngópkʉ tyuumbʉ es tnibo'tʉ ja 'ya'oydyatsk.
\p
\v 51 Net ja Jesús jyʉnáñ:
\p —¡Mastu'ut! ¡Tʉ net!
\p Es net ja tyatsk ttoonʉ, es dya''agʉdakʉ.
\v 52 Es netʉ Jesús t'anma̱a̱y ja teedywyindsʉ́nʉty es di'ibʉ mʉj tsa̱jptʉjk kywentʉ'a̱jttʉp es ja mʉjja̱'a̱ydyʉjkʉty di'ibʉ naty yajnʉjxándʉp:
\p —¿Ti ko mmindʉ mʉt ja espa̱a̱dʉ es ja kepy, éxtʉmxyʉpts ʉj nma'tspʉty?
\v 53 Es kots ʉj n'ijty bom bom mʉj tsa̱jptʉjk ñabotsoty, ni je'eyʉts miits xykyatoondʉ. Per tyamʉ net tʉ tpa̱a̱ty ja oorʉ ma̱ miidsʉty mmada̱'a̱gʉt es ja ka'óybyʉty.
\s Peedrʉ t'ʉxtijy ja Jesús
\p
\v 54 Net tma̱jtstʉ ja Jesús es dyajnʉjxtʉ ma̱ ja teedywyindsʉngópkʉ tyʉjk, es ja Peedrʉ tpanejxy jagam jawʉ.
\v 55 Es ja ja̱'a̱yʉty dyajmʉ́jʉdʉ jʉʉn ma̱ ja tʉja̱'a̱, es 'yu'uñʉdʉ xyamdʉ; es ja Peedrʉ ñaxwe'tsy nandʉ'ʉn ma̱ ja ja̱'a̱yʉty.
\v 56 Net tu'ugʉ kiixy po'oduumbʉ t'ijxy ja Peedrʉ 'yu'uñʉ jam jʉʉmbʉ'ám. Es tʉyʉ 'yijxʉ es jyʉnáñ:
\p —Tya̱dʉ yedyʉjk, yʉ'ʉ naty mʉt ja Jesús jyʉdity.
\p
\v 57 Net ja Peedrʉ jyʉnáñ:
\p —Nitʉ, kyajts n'ixy'aty.
\p
\v 58 Es ko waanʉ 'yijty, jatu'ugʉ ja̱'a̱y 'yijxʉ ja Peedrʉ es 'yanma̱a̱yʉ:
\p —Mij mʉt yʉ'ʉ mjʉdity nandʉ'ʉn.
\p Net ja Peedrʉ jyʉnáñ:
\p —Kyaj 'yʉjtsʉty.
\p
\v 59 Es ko 'yijty éxtʉm tuk oorʉn, net jatu'uk 'yanma̱a̱yʉ:
\p —Tʉy'a̱jtʉn ko tya̱dʉ yedyʉjk mʉt ja Jesús, ko Galileeʉ ja̱'a̱y yʉ'ʉ.
\p
\v 60 Net ja Peedrʉ jyʉnáñ:
\p —Kyajts nnijawʉ ti mij mgajxypy.
\p Es ko ja Peedrʉ dʉ'ʉn jyʉnáñ, netyʉ ja tʉgaak oj 'yʉy.
\v 61 Es ja Jesús kyoo'awdijty es twin'ijxy ja Peedrʉ. Net ja Peedrʉ tjamyejtsy éxtʉm 'yanma̱a̱yʉ ja Jesús: “Kyajnʉmʉ naty ja tʉgaak 'yʉy ko mij mjʉna̱'a̱nʉt tʉgʉk ok ko kyajts xy'ixy'aty.”
\v 62 Es net ja Peedrʉ pyʉdseemy es kuwepy kuka̱'a̱tsy jyʉʉy.
\p
\v 63 Es ja ja̱'a̱yʉty di'ibʉ kywentʉ'a̱jttʉp ja Jesús ttukxiktʉ, twojptʉ,
\v 64 twingudsu'umʉdʉ, es t'anʉʉmʉdʉ:
\p —May pʉ́n tʉ mgóxyʉty.
\s Jesús, wyinduuyʉty di'ibʉ ana'amdʉp mʉj tsa̱jptʉgóty
\p
\v 65 Es t'anma̱a̱ydyʉ wi'ixátyʉty es kyaj tmʉj'ijxtʉ.
\p
\v 66 Es ko oj xyʉʉñʉ, net ñaymyujkʉdʉ ja mʉjja̱'a̱ydyʉjk es ja teedywyindsʉ́nʉty es ja di'ibʉty tsa̱jptʉgóty ya'ʉxpʉjktʉp, es dyajnʉjxtʉ ja Jesús ma̱ di'ibʉ ana'amdʉp mʉj tsa̱jptʉgóty. Es jap dyajtʉʉdʉ:
\p
\v 67 —Anmaagyʉts, ¿mijtsʉ dʉ'ʉn mGristʉ?
\p Esʉ Jesús 'yadsooy:
\p —Pʉn n'anmaapy ko dʉ'ʉn, kyaj xymyʉbʉ́ktʉt,
\v 68 es pʉn nyajtiibyʉts oytyiity, kyajts xy'adsówdʉt.
\v 69 Es tyam es extʉ winʉ xʉʉ winʉ tiempʉ, ʉj ja Naxwíñʉdʉ Ja̱'a̱yʉdyʉ Kyudʉnaabyʉ, n'u'uñʉdʉts ma̱ 'yaga̱'a̱ñgyʉ'ʉ Dios di'ibʉ tʉgekyʉ mʉk'a̱jtʉn myʉda̱jtypy.
\p
\v 70 Net nidʉgekyʉ ja'ajʉty dyajtʉʉdʉ ja Jesús:
\p —¿Tii mjʉna̱'a̱na̱a̱mp ko mij Dios m'U'unk'átyʉty?
\p Esʉ Jesús 'yadsooy:
\p —Tʉy'a̱jtʉn, ʉjtsʉ dʉ'ʉn.
\p
\v 71 Net ja ja̱'a̱yʉty ñay'anma̱a̱yʉdʉ:
\p —¿Ti nyajwa̱'a̱nʉm ja testiigʉ? Tʉ nmʉdo'om tʉgekyʉ ʉdsa̱jtʉm di'ibʉ yʉ'ʉ kʉ'ʉm kyajxypy ko yʉ'ʉ Dios 'yU'unk'átyʉty.
\c 23
\s Jesús, Pilatʉ wyinduuy
\p
\v 1 Ta nidʉgekyʉ ja ja̱'a̱yʉty jam juntoty pyʉdʉ'kta̱a̱ydyʉ, es dyajnʉjxtʉ ja Jesús ma̱ Pilatʉ.
\v 2 Es jap tni'ʉ'ʉnʉdʉ es jyʉnandʉ:
\p —Tʉts nba̱a̱ttʉ ko tya̱dʉ yedyʉjk ni'igʉ dyajnaymyúk dyajnaydya̱'a̱dsʉdʉ ja nja̱'a̱y'a̱jtʉm es jyʉna'añ ko kyaj ngugʉbajtʉm ma̱ yʉ yajkutujkpʉ kopk, es nandʉ'ʉn jyʉna'añ ko yʉ'ʉ Kyrístʉty, tu'ugʉ rey.
\p
\v 3 Net ja Pilatʉ dyajtʉʉy ja Jesús:
\p —¿Mijtsʉ dʉ'ʉn ja israelítʉdyʉ ryey?
\p Ta ja Jesús 'yadsooy:
\p —Tʉy'a̱jtʉn, ʉjtsʉ dʉ'ʉn.
\p
\v 4 Net ja Pilatʉ t'anma̱a̱y ja teedywyindsʉ́nʉty es ja mayjya'ayʉty:
\p —Kyajts nbatʉ ti pyojpʉ tya̱dʉ yedyʉjk.
\p
\v 5 Es ja ja̱'a̱yʉty ni'igʉ jyʉnandʉ waanʉ mʉk:
\p —Yʉ'ʉ ni'igʉ dyajnaymyúk dyajnaydya̱'a̱dsʉdʉ ja ja̱'a̱yʉty, dyajtsondáky jap Galileeʉ, es extʉ ya̱a̱ Judeeʉ.
\s Jesús, Eroodʉs wyinduuy
\p
\v 6 Es ko ja Pilatʉ tmʉdooyʉ taadʉ, net dyajtʉʉy pʉn Galileeʉ ja̱'a̱y yʉ'ʉ.
\v 7 Es ko t'anma̱a̱ydyʉ ko dʉ'ʉn, net tkejxy ja Jesús ma̱ Eroodʉs di'ibʉ ijtp gobernadoor Galileeʉ es tʉ naty myiñ Jerusalén paskʉxʉ'a̱jtpʉ.
\p
\v 8 Es ko Eroodʉs t'ijxy ja Jesús, net jyantsyxyondaky, ja'a ko tʉʉyʉp tja'ixy'atáñ ko tmʉdoy'ajty di'ibʉ Jesús tyiimpy. Es yʉ'ʉ t'ixa̱'a̱ñ ko Jesús ttúnʉt ja mʉj'a̱jtʉn.
\v 9 Es dyajtʉʉy may ja ayuk. Perʉ Jesús kyaj t'adsooy ni di'ibʉ.
\p
\v 10 Es nandʉ'ʉn jap myiindʉ ja teedywyindsʉ́nʉty es ja di'ibʉty tsa̱jptʉgóty ya'ʉxpʉjktʉp, es ñi'ʉʉnʉdʉ mʉkta'aky.
\v 11 Net ja Eroodʉs es ja syolda̱a̱dʉtʉjk kyaj t'agupʉjktʉ. Ta ttukxiktʉ. Net ttukpʉjtáktʉ ja wyit éxtʉmʉ reydyʉjk es net tkejxy ja Jesús jatʉgok ma̱ ja Pilatʉ.
\v 12 Ja Pilatʉ mʉt ja Eroodʉs naymyʉdsip'a̱jtʉdʉbʉ naty es ko tadʉ xʉʉ ñaymyaabyʉjkʉdʉ jatʉgok.
\s Jesús ñidukʉ es 'yoogʉt
\p
\v 13 Es net ja Pilatʉ dyajnaymyujkʉ ja teedywyindsʉ́nʉty es ja justisʉtʉjk es ja ja̱'a̱yʉty,
\v 14 es t'anma̱a̱y:
\p —Miidsʉty tʉ xyajmíndʉ tya̱dʉ yedyʉjk es mjʉna̱'a̱ndʉ ko dyajpʉdʉ'ʉktʉ ja̱'a̱yʉty, es ʉj tʉts nyajtʉ́y es nbayo'oyʉts, es kyajts nbatʉ ni ti pyeky éxtʉm miits xyñi'ʉʉnʉdʉ.
\v 15 Es nandʉ'ʉn ja Eroodʉs kyaj ti tpatʉ ja pyojpʉ. Pa̱a̱ty tʉ tkajxʉmbíty jatʉgok ma̱ ʉjtsʉn. Es mʉt yʉ'ʉ, ni ti tkatúñ di'ibʉ tukpa̱a̱dʉdʉp ja o'kʉn.
\v 16 Pa̱a̱ty ndsa̱a̱tsytyúnʉpts es óknʉmts nnasmátsʉt.
\p
\v 17 Paskʉ paskʉ ja Pilatʉ koonʉm tnasmatsʉ tu'ugʉ tsimyjya'ay di'ibʉ ja̱'a̱y tsyojktʉp.
\v 18 Net ja mayjya'ayʉty yaxkakta̱a̱ydyʉ mʉk:
\p —¡Kyaj! ¡Kyajts yʉ'ʉ ndsoktʉ! ¡Nasmatsʉ Barrabás!
\p
\v 19 Es yʉ Barrabás yʉ'ʉ naty tsimy ijtp mʉt ko tʉ naty tnibʉde'eky ja yajkutujkpʉ jap ka̱jpnóty es yajja̱'a̱y'eeky.
\p
\v 20 Es ja Pilatʉ ja'a jyatsojk es tjanasmátsʉt ja Jesús, pa̱a̱ty jatʉgokʉ Pilatʉ tjatukjaygyukʉyáñ.
\v 21 Per ja ja̱'a̱yʉty 'yak'ya̱'a̱x 'yakjoktʉ mʉk:
\p —¡Yajkruuzpát, yajkruuzpát!
\p
\v 22 Es myʉdʉgʉk ok ja Pilatʉ t'anʉʉmʉdʉ:
\p —¿Per ti dʉn tʉ ttuundʉgóy? Ʉj kyajts nba̱a̱ty ni ti pyojpʉ di'ibʉ kyu'oogʉp, wi'ix mba̱a̱t 'yeeky. N'oktsa̱a̱tsytyúñʉts es nnasmátsʉdʉts.
\p
\v 23 Es ja ja̱'a̱yʉty ni'igʉ jyʉnandʉ jantsy mʉk:
\p —¡Wa'an tkruuzpéty! ¡Wa'an tkruuzpéty!
\p Es ja'a ko mʉk yax jyojktʉ, net yajtuuñ ti tsyojktʉp.
\v 24 Net ja Pilatʉ tkuydyuuñ éxtʉm yʉ'ʉjʉty ttsojktʉ.
\v 25 Es ko twin'ijxtʉ Barrabás, ta dyajpʉdsʉʉmdʉ jap pujxndʉgóty mʉt ko tʉ naty tnibʉde'eky ja yajkutujkpʉ es yajja̱'a̱y'eeky. Net tnasma̱jtsʉdʉ. Es ja Pilatʉ tkʉyajky ja Jesús éxtʉm ja ja̱'a̱yʉty ttsojktʉ.
\s Jesús kyruuzpéty
\p
\v 26 Es ko ja Jesús yajmʉnʉjxnʉ kruuzpajtpʉ, net tu'ugʉ yedyʉjk tma̱jtstʉ tu'a̱a̱y di'ibʉ xyʉ'a̱jtypy Simonk es kyuga̱jpnʉty Sirene. Kyamotyʉ naty tʉ 'yotsy. Es ja solda̱a̱dʉtʉjk 'yanma̱a̱yʉ es tka̱jpʉt agwanʉ yʉ Jesusʉ kyruuz.
\p
\v 27 Es jyantsypyanʉjxʉdʉ mayjya'ay, es ja'a mʉʉt mayʉ toxytyʉjk di'ibʉ jantsyjyʉʉy jantsyyáxtʉp mʉt ja jotmay ko ja Jesús dyajkruuzpata̱'a̱ndʉ.
\v 28 Es ja Jesús tni'ijxʉmbijty es t'anma̱a̱y:
\p —Miits toxytyʉjkʉty di'ibʉ tsʉna̱a̱ydyʉp Jerusalén, kátʉts mij xyñijʉ'ʉydyʉ. Nayñijʉ'ʉyʉdʉ miidsʉty kʉ'ʉm es yʉ m'u'unk m'ʉna̱'kʉty,
\v 29 ja'a ko mínʉp ja tiempʉ ko mnayjyʉna̱'a̱nʉdʉt: “Jotkujk di'ibʉ kyaj mba̱a̱t 'yu'unkpa̱a̱ttʉ, di'ibʉ kyaj tyim'u'unkpáttʉ es di'ibʉ kyaj ya'u'unktsi'itstʉ.”
\v 30 Net ja ja̱'a̱yʉty jyʉna̱'a̱ndʉt: “Kopk, nijijtpajtkʉts ʉʉdsʉty”, es ja tun t'anʉʉmʉt: “Yajnitʉgeegyʉts.”
\p
\v 31 Es t'ak'anʉʉmʉdʉ Jesús:
\p —Ʉj kyajts ni ti axʉʉkpʉ ndúñʉm es xyajkruuzpatándʉpts. ¿Ti mjʉna̱a̱mp xytyijy es jyáttʉt ja Jerusalén ja̱'a̱yʉty di'ibʉ ni'igʉ pyojpʉ ja̱'a̱yʉty?, es yʉ'ʉjʉty pátʉp ja mʉk tʉydyu'unʉn.
\p
\v 32 Es ja solda̱a̱dʉtʉjk dyajnʉjxtʉ nandʉ'ʉn majtskʉ axʉk ja̱'a̱y es dyajkruuzpata̱'a̱ndʉ mʉt ja Jesús ti'igyʉ.
\v 33 Es ko tmʉja̱jttʉ ma̱ ja luga̱a̱r txʉ'aty Kalaveerʉ, net dyajkruuzpajttʉ ja Jesús. Es pʉ'a̱a̱ybʉ'a̱a̱y ja majtskpʉ axʉk ja̱'a̱y.
\v 34 Es ko jam dyajkruuzpajttʉ, ja Jesús jyʉnáñ:
\p —Tatʉ, pojpʉma'xtʉ, ja'a ko kyaj tnijáwʉdʉ di'ibʉ tyuundʉp.
\p Es ja solda̱a̱dʉtʉjk ttuundʉ ja rifʉ es dyajwa̱'xʉt ja Jesusʉ wyit.
\v 35 Es ja mayjya'ayʉty t'ijxtʉ jam, es extʉ ja justisʉtʉjk ttukxiktʉ ja Jesús es jyʉnandʉ:
\p —Wiink ja̱'a̱y tʉ dyajtse'eky. Wa'an kʉ'ʉm tnayyajtse'egyʉty pʉn tʉy'a̱jtʉn ko yʉ'ʉ Kyrístʉty, ja di'ibʉ Dios tʉ twin'ixy.
\p
\v 36 Net ja solda̱a̱dʉtʉjk nandʉ'ʉn tnixik ttukxiktʉ ja Jesús es t'awa̱'a̱nʉdʉ ja vinʉ ta̱'a̱m,
\v 37 es jyʉnandʉ:
\p —Pʉn tʉy'a̱jtʉn mij ja israelitʉ ryey, nayyajnitso'ogʉdʉ mij kʉ'ʉm.
\p
\v 38 Es 'yity jam kyʉba̱jm kʉxja̱'a̱y grieegʉ es latín es ebreeʉ di'ibʉ jʉna̱a̱mp: “Tya̱a̱dʉ yʉ israelítʉty ja ryey.”
\p
\v 39 Es tu'ugʉ axʉk ja̱'a̱y di'ibʉ jam kudʉy ijtp kruuzkʉjxy nandʉ'ʉn jyʉnáñ axʉʉk:
\p —Pʉn mij mGristʉ, nayyajnitso'ogʉdʉ kʉ'ʉm es ʉʉdsʉty xyajtso'oktʉdʉts nandʉ'ʉn.
\p
\v 40 Es jatu'uk t'ooy ja myʉgu'uk es t'anʉʉmʉ:
\p —¿Kyaj xytsyʉ'ʉgʉ ja Dios ko mij nandʉ'ʉn myajtʉydyúñ?
\v 41 Ʉdsa̱jtʉm mʉt ja tʉy'a̱jtʉn tyam n'ayo'om, ja'a ko ʉdsa̱jtʉm ngumʉdo'om di'ibʉ tʉ ndu'unʉm. Perʉ tya̱dʉ yedyʉjk ni tii tʉ tkatuundʉgóy.
\p
\v 42 Net jyʉnáñ:
\p —Jesús, xyjamyátsʉpts ko mja̱'tʉt ma̱ myajkutuka̱'a̱ñ.
\p
\v 43 Net ja Jesús 'yadsooy:
\p —Tʉy'a̱jtʉn n'anʉʉmʉ ko tyamyʉ nmʉnʉjxʉt tsa̱jpótm es m'ítʉt mʉt ʉj.
\s Jesús 'yeeky
\p
\v 44 Jaa naty kijkyxyʉʉ, net tʉgekyʉ naxwíñʉdʉ kyoodsʉdyaay es 'yijty tʉgʉk oorʉ wingoots,
\v 45 ja'a ko ja xʉʉ wyindujkta̱a̱y. Es net ja adʉy di'ibʉ mʉj tsa̱jptʉgóty kyʉ'tswa'xy kʉjkkujm.
\v 46 Net ja Jesús yaxkeky:
\p —Tatitu'unk, axá̱jʉgʉts ja n'anmʉja̱'a̱n.
\p Es ko dʉ'ʉn jyʉnáñ, ta 'yo'knʉ.
\v 47 Es ko ja solda̱a̱dʉ windsʉ́n t'ijxy éxtʉm jya̱jtʉ, net ja Dios t'awda̱jty es jyʉnáñ:
\p —Tʉy'a̱jtʉnʉ tya̱dʉ yedyʉjk kyaj ti ttuundʉgóy.
\p
\v 48 Es nidʉgekyʉ ja mayjya'ayʉty di'ibʉ 'yijxtʉ jap éxtʉm jya̱jtʉ, net tsyo'onnʉdʉ jap es tkojxtʉ ja kyaatsy mʉt ja jotmay.
\v 49 Es nidʉgekyʉ ja ja̱'a̱y di'ibʉ 'yixy'a̱jttʉp ja Jesús, mʉt ja toxytyʉjkʉty di'ibʉ padso'onʉ Galileeʉ, wyʉ'ʉmdʉ jagam es t'ijxtʉ éxtʉm jya̱jtʉ.
\s Jesús ñaxtʉkʉ
\p
\v 50 Es tu'ugʉ yedyʉjk di'ibʉ xyʉ'a̱jtypy Josee es jyiky'aty tʉy'a̱jtʉn mʉʉt es kyuga̱jpnʉty Arimateeʉ, Judeeʉ ña̱a̱xóty. Es ja Josee nandʉ'ʉn yʉ'ʉ nidu'uk di'ibʉ ana'amp mʉj tsa̱jptʉgóty.
\v 51 Tadʉ Josee t'awixy nandʉ'ʉn ko myínʉt ja Diosʉ kyutujkʉn es kyaj ti'igyʉ mʉt 'yity ja ja̱'a̱yʉty di'ibʉ jʉnandʉ esʉ Jesús 'yoogʉt.
\v 52 Net tninejxy ja Pilatʉ es t'amdooy ja Jesusʉ ñini'x.
\v 53 Es ko dyajjʉna̱jktʉ kyruuzkʉjxy, net t'abijttʉ mʉt tu'ugʉ mʉj wit es tpʉjtáktʉ ma̱ tu'ugʉ o'kpʉ jut di'ibʉ naty yʉ'ʉ tʉ dyajtsajtsjúty dyajpa̱'a̱jútyʉty tsa̱wiiñ es ma̱ kyajnʉm ja o'kpʉ ñaxtʉkʉ.
\v 54 Esʉ naty ñayjyʉjp'íxʉdʉ ko ja sa̱a̱bʉdʉ xʉʉ dyajtsonda̱'a̱ga̱'a̱ndʉ.
\p
\v 55 Es ja toxytyʉjkʉty di'ibʉ naty tʉ tsyoondʉ mʉt ja Jesús jap Galileeʉ, tpanʉjxtʉ ja Josee es t'ijxtʉ ja o'kpʉ jut es wi'ix yajpʉjtáky ja Jesusʉ ñini'x.
\v 56 Es ñʉjxnʉdʉ ma̱ tyʉjk es dya'ʉyʉʉydyʉ ja pa̱'a̱k xu'kpʉ es ja ingwéntʉty. Es net pyo'xtʉ ma̱ ja sa̱a̱bʉdʉ xʉʉ éxtʉm ja ana'amʉn jyʉna'añ.
\c 24
\s Jesús jyikypyeky
\p
\v 1 Es domingʉ xʉʉ tsejkyʉ ja toxytyʉjkʉty tmʉnʉjxtʉ ja pa̱'a̱k xu'kpʉ di'ibʉ naty tʉ dya'óyʉdʉ. Jam dyajnʉjxtʉ ma̱ ja Jesús tʉ ñaxtʉkʉ.
\v 2 Ko jya̱jttʉ jam, net tpattʉ wiink tsoo ja tsa̱a̱ di'ibʉ naty 'yagʉ'ʉy'ajtypy ja jut.
\v 3 Es ko tyʉjkʉdʉ jap, kyaj tpattʉ ja Jesusʉ ñini'x.
\v 4 Es kyaj tmʉwinma̱'a̱ñbyáttʉ ti tʉ jyátyʉty. Netyʉ kyʉxe'ky majtskʉ yedyʉjk di'ibʉ wyit jantsy tʉ'xp.
\v 5 Net ja toxytyʉjkʉty tsyʉ'kʉdʉ es ñaxku'ijxʉdʉ, es ja yedyʉjk 'yanma̱a̱yʉdʉ:
\p —¿Ti ko miits xy'ʉxta̱'a̱ydyʉ ya̱a̱ ma̱ o'kpʉty di'ibʉ jiky'a̱jtp?
\v 6 Kyaj ja ya̱a̱. Tʉ jyikypyeky. Jamyatstʉ wi'ix m'anma̱a̱yʉ ko nátyñʉm 'yity jap Galileeʉ:
\v 7 “Ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, nyajkʉyaka̱'a̱ñʉts ma̱ ja pekyjya'aydyʉjk es xyajkruuzpátʉdʉts. Es ko 'yítʉt tʉgʉk xʉʉ, njikypyʉ́kʉdʉts jatʉgok.”
\p
\v 8 Net ja toxytyʉjkʉty tjamyajtstʉ éxtʉm ja Jesús jyʉnáñ.
\v 9 Es ko jya̱jnʉdʉ jatʉgok jap ka̱jpnóty, net ttukmʉmadyaktʉ nidʉgekyʉ ja nima̱jk tu'ukpʉ ʉxpʉjkpʉ es nidʉgekyʉ di'ibʉ jap ak'ijttʉp.
\v 10 Esʉ tadʉ toxytyʉjkʉty 'yijttʉ Mariiʉ Magdalenʉ, Fwanʉ, Mariiʉ di'ibʉ Santya̱'a̱gʉ tya̱a̱k'a̱jtypy, es ja wiinkpʉ toxytyʉjkʉty.
\v 11 Per ja ʉxpʉjkpʉtʉjk kyaj tmʉbʉjktʉ, es jyʉnandʉ ko lokʉ di'ibʉ kya̱jxtʉp.
\p
\v 12 Net ja Peedrʉ tsyo'oñ es ñejxy pʉye'egyʉ ma̱ ja o'kpʉ jut es kyu'ijxʉ jap oga̱jp. Je'eyʉ jap ja wit 'yity di'ibʉ mʉʉt ja Jesús ya''abijty. Es net ja Peedrʉ jyʉmbijnʉ jotmaymyʉʉt.
\s Jesús kyʉxe'eky Emaús tu'a̱a̱y
\p
\v 13 Es net nimajtskʉ ʉxpʉjkpʉ tsyoondʉ Jerusalén es ñʉjxtʉ ma̱ ja Emaús ka̱jpn, di'ibʉ jagam ma̱jk tuk mil metrʉn,
\v 14 es kya̱jx myadya̱'a̱ktʉ tʉgekyʉ di'ibʉ naty tʉ jyátyʉty.
\v 15 Es ko yʉ'ʉjʉty dʉ'ʉn kya̱jx myadya̱'a̱ktʉ esʉ Jesús kʉ'ʉm ñiwingoonʉ es tyu'uyo'oydyʉ mʉʉt.
\v 16 Per ja Dios kyaj tyuk'ʉxka̱jpʉ ko yʉ'ʉjʉty ja Jesús.
\v 17 Net ja Jesús dyajtʉʉy:
\p —¿Ti mmadyáktʉp tu'a̱a̱y?
\p Es net yʉ'ʉjʉty wya̱'k'a̱'a̱dʉ jotmaymyʉʉt.
\v 18 Net yʉ'ʉ nidu'uk di'ibʉ xyʉ'a̱jtypy Kleofʉs 'yadsooy:
\p —Tʉgekyʉ ja̱'a̱yʉty tnijáwʉdʉ di'ibʉ tʉ jyátyʉty Jerusalén ma̱ paskʉ xʉʉ. ¿Tii mij naydyu'uk mjabye'xy'a̱jtp Jerusalén es kyaj xyñijawʉ ti jam tʉ tyuñ tʉ jyátyʉty?
\p
\v 19 Net ja Jesús dyajtʉʉy:
\p —¿Ti jap tʉ jyátyʉty?
\p Es yʉ'ʉjʉty jyʉnandʉ:
\p —Extʉm tʉ ttundʉ ja Jesús nazarenʉ. Yʉ'ʉ tʉ 'yity Diosʉ kyuga̱jxpʉ di'ibʉ tyiimpy ja mʉj'a̱jtʉn es ya'ʉxpeky mʉt ja Diosʉ kyutujkʉn, es nidʉgekyʉ ja̱'a̱yʉty myʉj'íxʉdʉ.
\v 20 Per ja teedywyindsʉ́nʉty es ja njustisʉ'a̱jtʉm tʉ tkʉyaktʉ ma̱ ja Pilatʉ es dyajkruuzpátʉt.
\v 21 Es ʉʉdsʉty njʉna̱'a̱ndʉ ko yʉ'ʉ yajnitso'ogʉp ja israelítʉty. Es tyam tyʉgʉkxʉʉp ma̱ dya'ooktʉ es dyajnaxtʉ́kʉdʉ.
\v 22 Nandʉ'ʉn ʉʉdsʉdyʉ nmʉgu'ugʉty toxytyʉjk tʉts dʉ'ʉñʉ xyajwʉ'ʉmʉdʉ. Aambyʉ jepy tʉ 'yotstʉ ma̱ ja o'kpʉ jut,
\v 23 per kyaj ja Jesusʉ ñini'x tʉ tpa̱a̱ttʉ. Net tʉ jyʉmbijnʉdʉ es xytyukmʉmadya̱'a̱ktʉts ko tʉ t'ixtʉ nimajtskʉ anklʉs di'ibʉ tʉ 'yanʉʉmʉdʉ ko Jesús taa jyiky'aty.
\v 24 Es net tʉ 'yotstʉ nija'ajʉty ʉʉdsʉdyʉ nmʉgu'uk es tʉ tpa̱a̱ttʉ éxtʉmʉ toxytyʉjk jyʉna̱'a̱ndʉ, per ja Jesús kyaj tʉ t'ixtʉ.
\p
\v 25 Net ja Jesús jyʉnáñ:
\p —¿Ti ko mgujuunʉty miidsʉty? ¿Ti ko kyaj xymyʉbʉktʉ tʉgekyʉ di'ibʉ Diosʉ kyuga̱jxpʉ kyʉxja̱a̱y?
\v 26 Yʉ'ʉjʉty oj tkʉxja̱'a̱ydyʉ wa̱'a̱ts ko yʉ Kristʉ 'yayowa̱'a̱ñ es 'yooga̱'a̱ñ es óknʉm yajkutúkʉt mʉt ja mʉj'a̱jtʉn.
\p
\v 27 Ta ja Jesús oj 'yawa̱'a̱nxʉdʉ ja Diosʉ 'yayuk ma̱ kʉ'ʉm yajnimadya'aky, tyimtsonda'aky di'ibʉ Moisés jyaay es tʉgekyʉ nʉ'ʉn ja Diosʉ kyuga̱jxpʉ tkʉxja̱a̱ydyʉ.
\p
\v 28 Es ko jya̱jttʉ ma̱ Emaús ka̱jpn, ja Jesús éxtʉm jyawʉ tyu'unaxáñ.
\v 29 Per yʉ'ʉjʉty dyajwʉ'ʉmándʉ es t'anma̱a̱ydyʉ:
\p —Wʉ'ʉm mʉt ʉʉdsʉty ja ya̱a̱. Tʉ tsyu'ujʉnʉ.
\p Net ja Jesús wye'emy es tyʉjkʉ mʉt yʉ'ʉjʉty.
\v 30 Es ko jam 'yu'uñʉ nidʉgʉʉk ma̱ ja meesʉ es 'ya'ux'ata̱'a̱ndʉ, net ja Jesús tkone'ky ja tsa̱jkaaky, es tkuni'xy. Net ttujkwa'xy es tmooydyʉ ja nimajtskpʉ.
\v 31 Es netyʉ t'ʉxka̱jptʉ ko yʉ'ʉdyʉ Jesús. Netʉ Jesús pojʉn tyʉgooy.
\v 32 Es yʉ'ʉjʉty ñayjyʉnánʉdʉ:
\p —Pa̱a̱dyʉmʉ dʉ'ʉn xyjatukja̱'a̱m ja oy'a̱jtʉn ko mʉt tʉ ndu'uyo'oyʉm es nmadyákʉm es xytyuk'awa̱'a̱nʉm ti ja Diosʉ jyaaybyajtʉn 'yandijpy.
\p
\v 33 Es netyʉ tsyo'ondʉ es ñʉjxtʉ jap Jerusalén. Es jap tʉ naty ñaymyúkʉdʉ ja nima̱jk tu'ukpʉ ʉxpʉjkpʉty mʉt ja jyamyʉʉdʉty.
\v 34 Es yʉ'ʉjʉty t'awa̱'a̱nʉdʉ ja nimajtskpʉ:
\p —Tʉy'a̱jtʉn ko ja Jesús tʉ jyikypyeky. Simonk tʉ t'ixy.
\p
\v 35 Net ja Kleofʉs mʉt ja myʉgu'uk tmadyaktʉ éxtʉm tʉ jyátyʉty tu'a̱a̱y es wi'ix tʉ t'ʉxkaptʉ ja Jesús ko ja tsa̱jkaaky tʉ ttujkwa'xy.
\s Di'ibʉ Jesús tyuknipejkypy ja 'yʉxpʉjkpʉty
\p
\v 36 Es yʉ'ʉjʉty t'akmadya̱'a̱ktʉ tadʉ ayuk ko ti'in kyʉxe'ky ja Jesús ma̱ yʉ'ʉjʉty es kya̱jxpo'xʉdʉ, 'yanma̱a̱yʉ:
\p —Agujk'át jotkujk'áttʉ miidsʉty.
\p
\v 37 Ta jyantsytsyʉ'kʉdʉ. Dʉ'ʉn jyʉnandʉ ko ijxma̱'ttʉp.
\v 38 Es ja Jesús 'yanma̱a̱yʉdʉ:
\p —¿Ti ko mjotmay'ooktʉ? ¿Ti ko kyaj xymyʉbʉktʉ ko ʉjtsʉ dʉ'ʉn?
\v 39 Ixtʉts ja ngʉ'ʉ es ja ndékyʉts ko ʉjtsʉ dʉ'ʉn kʉ'ʉm. Toongʉts es ixtʉ ko tʉy'a̱jtʉn. Yʉ ijxma̱'tʉn kyaj tmʉdaty yʉ xyixy es ja pya̱jk éxtʉm miits xy'íxtʉts ʉj nmʉdaty.
\p
\v 40 Es ko dʉ'ʉn 'yanma̱a̱yʉ, tyuk'ijxʉ ja kyʉ'ʉ es ja tyeky.
\v 41 Es yʉ'ʉjʉty kyajpyʉm tmʉbeky mʉt ja xondakʉn es dʉ'ʉñʉ wyʉ'ʉmʉdyaaydyʉ. Net ja Jesús 'yanma̱a̱yʉ:
\p —¿Kyaj ti xymyʉdattʉ di'ibʉ njʉ'xʉm?
\p
\v 42 Net myooyʉdʉ tuk pedazʉ a̱jkx tsa̱'a̱yu'unk.
\v 43 Es ja Jesús tje'xy yʉ'ʉjʉty wyinduuy.
\v 44 Es net 'yanma̱a̱yʉ:
\p —Kots miidsʉty mʉʉt n'ijty, n'anma̱a̱ydyʉ ko yajkuydyuna̱'a̱ñ di'ibʉ Moisés es ja Diosʉ kyuga̱jxpʉ kyʉxja̱a̱ydyʉ es di'ibʉ ma̱ Salmʉ neky di'ibʉts ʉj xyñiga̱jxp.
\p
\v 45 Net ja Jesús tyukjaygyujkʉdʉ ja Diosʉ jyaaybyajtʉn, es jyʉnáñ:
\p
\v 46 —Dʉ'ʉn 'yity kʉxja̱'a̱y ko koonʉm yʉ Kristʉ 'yoogʉt, es kumdʉgʉk xʉʉ jyikypyʉ́kʉt.
\v 47 Es mʉt yʉ'ʉgyʉjxm yajka̱jxwa̱'xʉt ma̱ tʉgekyʉ naxwíñʉdʉ, tsyonda̱'a̱gʉt Jerusalén, ko yʉ ja̱'a̱yʉty dyajtʉgátstʉt yʉ wyinma̱'a̱ñʉty, net ja Dios pyojpʉma'xʉdʉt.
\v 48 Es miits m'ijttʉp testiigʉ ma̱ tya̱a̱dʉ tʉgekyʉ.
\v 49 Mʉdowdʉ. Ʉjts ngáxʉp ma̱ miidsʉty di'ibʉts ja nDeety tʉ twa̱nda'aky. Per miits wʉ'ʉmdʉ ya̱a̱ Jerusalén extʉ ko xy'axá̱jʉt ja mʉk'a̱jtʉn di'ibʉ Dios kyaxaampy.
\s Jesús tsya̱jpéty
\p
\v 50 Net ja Jesús yajtso'onʉdʉ jap Jerusalén es yajnʉjxʉdʉ Betañʉ, es dyajpʉde'ky ja kyʉ'ʉ es kyunu'xʉdʉ.
\v 51 Es ko kyunu'xta̱a̱yʉ, net tsya̱jpajnʉ es ñʉjxnʉ tsa̱jpótm.
\v 52 Net yʉ'ʉjʉty t'awda̱ttʉ Dios es jyʉmbijtta̱a̱yñʉ, jantsy jotkujk jya̱jnʉdʉ Jerusalén.
\v 53 Es tim jap'a̱jttʉp ma̱ ja mʉj tsa̱jptʉjk es t'awdattʉ ja Dios.