\id 2CO

\h 2 KORINTɄ
\mt Myʉmajtskpʉ Neky Di'ibʉ Pa̱a̱blʉ Tyuknigajxtʉ Ja Korintʉ Ja̱'a̱yʉty
\c 1
\p
\v 1 Ʉj Pa̱a̱blʉ. Dios tsyojkʉngyʉjxm xy'apostʉlʉ'átyʉts ja Jesukristʉ, ja'a njʉna̱'a̱nʉm ko tʉ xykyéxyʉts. Ti'igyʉ mʉt ja nmʉgu'uk'a̱jtʉm Timotee nduknigáxtʉdsʉ tya̱dʉ neky ja mʉbʉjkpʉtʉjk di'ibʉ naymyujkʉdʉp ma̱ ja Korintʉ ka̱jpn, es nidʉgekyʉ ja Diosʉ jya'ayʉty ma̱ ja Akayʉ ñax.
\p
\v 2 Wa'anʉ Dios Teety es ja Nindsʉn'a̱jtʉm Jesukristʉ mgunu'xʉdʉ es mmo'oyʉdʉ ja agujk'a̱jt jotkujk'a̱jtʉn.
\s Pa̱a̱blʉ 'yayo'on
\p
\v 3 N'ok'awda̱jtʉm ja Dios, yʉ Nindsʉn'a̱jtʉm Jesukristʉ Tyeety. Yʉ'ʉ dʉ'ʉn ja nDeety'a̱jtʉm di'ibʉ myʉda̱jtypy ja pa''ayo'on es xyajjotkujk'a̱jtʉm pʉn ti xyja̱jt xykyʉbajtʉm.
\v 4 Dios xyajjotkujk'a̱jtʉm ma̱ tʉgekyʉ n'ayo'on'a̱jtʉm, es dʉ'ʉn mba̱a̱t ʉdsa̱jtʉm nyajjotkujk'a̱jtʉm nandʉ'ʉn di'ibáty ayoodʉp, es nmo'oyʉm nandʉ'ʉn ja jotkujk'a̱jtʉn di'ibʉ Dios ʉdsa̱jtʉm tʉ xymyo'oyʉm.
\v 5 Mʉt ko dʉ'ʉn nbu'ayo'om mʉdʉ Jesukristʉ, nandʉ'ʉn mʉt yʉ'ʉgyʉjxmʉ Jesukristʉ n'axá̱jʉmʉ waanʉ mʉjpʉ jotkujk'a̱jtʉn.
\v 6 Pa̱a̱ty pʉn ʉʉdsʉty ayoodʉpts, ja'a dʉ'ʉn es miits xymyʉdátʉt ja jotkujk'a̱jtʉn esʉ nitsokʉn; es pʉn ja Dios xyajjotkujk'a̱jtpʉts, ja'a dʉ'ʉn es nandʉ'ʉn miits xyajjotkujk'a̱jtpʉdʉt es dʉ'ʉn xymyʉdánʉdʉt mʉt ja ma'xtujkʉn ja dʉ'ʉmbʉ ayo'on, éxtʉmts ʉʉdsʉty ngu'ix nguba̱a̱dʉdʉ.
\v 7 Nmʉda̱jtypyʉts ja tʉy'a̱jtʉn, ko éxtʉm m'ayowdʉ tyam ti'igyʉ éxtʉm ʉʉdsʉty, nandʉ'ʉn ja Dios nʉjx mmo'oyʉdʉ ja jotkujk'a̱jtʉn éxtʉmts ʉʉdsʉty xymyo'oydyʉ.
\p
\v 8 Mʉgu'ugítʉty, ndsejpyʉts es xyñijáwʉdʉt nʉ'ʉnʉts tʉ n'ayoy ma̱ yʉ Asyʉ ñax. Byeen jyantsymyʉjwiin jyantsykyajaajʉty tʉ n'ayóyʉts, ni nmʉja̱a̱ts kyanakykye'ty esʉts nmʉdánʉt, es extʉ jʉnánʉts ko kyajts nbʉdsʉ́mʉt mʉdʉdsʉ njiky'a̱jtʉn.
\v 9 Nayjya̱'a̱jʉts éxtʉm di'ibáty yajtʉydyuna̱a̱mp mʉt ja o'kʉn. Perʉ tya̱a̱dʉ dʉ'ʉn jyajty esʉts nnijáwʉt wi'ixʉts nbadúnʉt amumdu'uk jot ja Dios di'ibʉ yajjikypyejkypy ja o'kpʉty, es kyajts njʉna̱'a̱nʉt ko ʉj kʉ'ʉm nmʉmada̱'a̱gʉpts ja ayo'on.
\v 10 Diósʉdsʉ dʉ'ʉn xy'agʉ'ʉdujk xy'axa̱jtujkp ma̱ kudsʉ'ʉgʉbʉ o'kʉn jʉjp'ám, es ndukmʉ'awda̱jtypyʉts ko yʉ'ʉ dʉ'ʉnʉts xy'akkuwa̱'a̱na̱'a̱ñ
\v 11 ko miits xypyudʉ́kʉdʉt mʉt ja mga̱jxtákʉn. Pʉn mayjya'ayʉts xyñiga̱jxta̱a̱gʉ, nandʉ'ʉn mayjya'ay ja Dios tja̱'a̱ygyʉda̱'a̱ktʉt ja'agyʉjxm ko Diósʉts ja mʉj may'a̱jtʉn tʉ xytyuunʉ.
\s Ti ko Pa̱a̱blʉ kya'ojtsy Korintʉ
\p
\v 12 Taa dʉn tu'uk di'ibʉts xymyeepy ja jotkujk'a̱jtʉn, ja'a dʉ'ʉn kodsʉ nwinma̱'a̱ñ xymyi'inxʉ ko tʉts n'ity tuda'aky es wa̱'a̱ts ya̱ naxwiiñ, es waanʉ ni'igʉ ma̱ miidsʉty. Diósʉdsʉ dʉ'ʉn tʉ xypyudʉkʉ mʉt ja tsyojkʉn es njiky'átʉdʉts dʉ'ʉn. Kyajts tʉ njiky'aty mʉdʉ ja̱'a̱yʉ wyijy'a̱jtʉn.
\v 13 Tʉ nduknijáyʉdʉ jantsy yʉ'ʉyʉ di'ibʉ mba̱a̱t xykya̱jxtʉt es xyjaygyúkʉdʉt. Es ndsejpyʉts es xyjaygyúkʉdʉt yajxón,
\v 14 dʉ'ʉn éxtʉm waanʉnʉm kujkʉts miits xyjaygyúkʉdʉ. Ja'a tya̱a̱dʉ ko ma̱ ja xʉʉ ma̱ myina̱'a̱ñ ja Nindsʉn'a̱jtʉm Jesukristʉ, miits nandʉ'ʉn mxonda̱'a̱ktʉt mʉt ʉjtskyʉjxm, es ʉj nxonda̱'a̱gʉdʉts nandʉ'ʉn mʉt miitskyʉjxmʉty.
\p
\v 15 Mʉt kots ndukmʉ'awdatʉ tya̱a̱dʉ, tʉdsʉ naty n'oktuknibʉjtákʉbʉ es nnʉjxa̱'a̱ñʉts jawyiin ma̱ miidsʉty, es nmo'oya̱'a̱ndʉ ja xondakʉn ko ngu'ixtʉ majtsk ok.
\v 16 Dʉ'ʉnʉts nduknibʉjtákʉ ngu'ixa̱'a̱ndʉ kots nnʉjxa̱'a̱ñ Masedoñʉ, es óknʉm ngu'íxtʉt jatʉgok kots njʉmbítʉt Masedoñʉ, es dʉ'ʉnʉts miits mba̱a̱t xypyudʉ́kʉdʉ es n'aknʉjxʉdʉts Judeeʉ.
\v 17 ¿Tii kyajts nduknibʉjtákʉ yajxón kots njʉnáñ nduna̱'a̱ñʉdsʉ tya̱a̱dʉ? ¿O mjʉnándʉp xytyijy miidsʉty ko ʉj ndukniwa̱a̱bʉts éxtʉmʉ ja̱'a̱yʉty di'ibʉ ʉguya̱jt ka̱jxkuya̱jtp?
\v 18 Diosʉ dʉ'ʉn ñija̱'a̱p ko ʉj kyajts n'ʉguyaty nga̱jxkuyáty.
\v 19 Mʉt ko Jesukristʉ, Diosʉ 'yU'unk, ja'a jya'a di'ibʉ Silvanʉ, Timotee esʉts ʉj nga̱jxwa̱'xtʉp, ma̱ Jesukristʉ winʉ xʉʉ winʉ tiempʉ pyʉdsemy di'ibʉ oy es ni na̱'a̱ di'ibʉ kyaj 'yóyʉty.
\v 20 Pes ma̱ yʉ'ʉn yajkuydyúñ tʉgekyʉ di'ibʉ Dios wya̱ndak. Pa̱a̱ty ko n'awda̱jtʉm ja Dios njʉna̱'a̱nʉm “wa'an dʉ'ʉnʉty” mʉt yʉ'ʉgyʉjxmʉ Jesukristʉ.
\v 21 Diosʉ dʉ'ʉn di'ibʉ ʉdsa̱jtʉm tʉ xybyʉjtákʉm es tyam amumdu'uk jot n'ijtʉm ti'igyʉ mʉdʉ Kristʉ.
\v 22 Tʉ xy'ijxwʉ'ʉmʉm, mʉt ko tʉ tpʉjta'aky njodoty'a̱jtʉm ja Espíritʉ Santʉ éxtʉmʉ ijxwʉ'ʉmʉn ko tʉy'a̱jtʉn di'ibʉ n'axa̱jʉya̱'a̱nʉm.
\p
\v 23 Diosʉ dʉ'ʉn ñija̱'a̱p wi'ixʉdsʉ njot nwinma̱'a̱ñ, es wa'ants yʉ'ʉ xytyukkumʉdoy pʉn kyajts ngajxy tʉy'a̱jtʉn. Tyamba̱a̱tnʉmts nganejxy Korintʉ mʉt ko nga'ooja̱'a̱ndʉ es ngayajjotmaydyuktʉkʉya̱'a̱ndʉ.
\v 24 Pes kyajts ʉj nnʉjxa̱'a̱ñ es miits xywyindsʉn'áttʉdʉts ma̱ yʉ mmʉbʉjkʉnʉty; ja'a dʉ'ʉn sitʉy ndsejpyʉts nbudʉkʉya̱'a̱ndʉ es xymyʉdáttʉt ni'igʉ jotkujk'a̱jtʉn esʉ xondakʉn, mʉt ko amumdu'uk jot xymyʉbʉktʉ yʉ Nindsʉn'a̱jtʉm.
\c 2
\p
\v 1 Pa̱a̱dyʉts ʉj njʉnáñ es kyaj jatʉgok ngu'íxtʉt jotmaymyʉʉt.
\v 2 Mʉt ko pʉn ʉjts miits nbʉjtáktʉp jotmaymyʉʉt, ¿pʉ́nʉts ʉj nʉjx xyajxonda'aky?, pʉn kyaj miidsʉty, di'ibʉts tʉ nyajjotmay'ooktʉ.
\v 3 Pa̱a̱ty nduknigajxtʉ tadʉ neky mʉt ko kyajts nnʉjxáñ ma̱ miits es nyajjotmay'ooktʉt, miidsʉty di'ibʉts xymyooydyʉp ja jotkujk'a̱jtʉn; mʉt ko jʉnánʉts kots ʉj nxonda'aky, nidʉgékyʉty miidsʉty nandʉ'ʉn mxonda̱'a̱ktʉ.
\v 4 Kots miits nduknigajxtʉ tadʉ neky, byeenʉdsʉ naty nnayjyáwʉty amaymyʉʉt jotmaymyʉʉt, extʉ jʉʉyʉts. Kyaj nnija̱'a̱yʉdʉ es mjotmay'ooktʉt, ja'a dʉ'ʉn es xyjáwʉdʉt ko byeen jyantsymyʉjwiinʉty ja tsojkʉn di'ibʉts nmʉda̱jtypy mʉt miidsʉty.
\s Ma'xʉn di'ibʉ tʉ pyekytyúñ
\p
\v 5 Ko nduknija̱'a̱yʉdʉ tadʉ ja̱'a̱y di'ibʉts ʉj nʉgoo oj xyajmáy xyajta̱jy, es waanʉ ni'igʉ miidsʉty nidʉgekyʉ oj myajmáy myajtá̱jʉdʉ,
\v 6 kyajts ni'igʉ nnakytyʉydyuna̱'a̱ñ. Tʉ byeen yajtukkumʉdoonʉ mʉt ko nidʉgekyʉ miidsʉty tʉ xy'ʉxtijtʉ ma̱ mnaymyúkʉdʉ.
\v 7 Di'ibʉ mbátʉdʉp es xytyúndʉt, ja'a es xymya'xnʉt es xyajjotkujkʉdʉt, ja'a ko pʉn n'ak'yajjotmay'o'kʉm, tsojk nʉjx tkanakymyʉdúñ ja Dios.
\v 8 Pa̱a̱ty nmʉnu'xtáktʉ es xytyuk'íxtʉt jatʉgokʉ mdsojkʉn di'ibʉ mmʉda̱jttʉp mʉt yʉ'ʉ.
\v 9 Es di'ibʉ nduknija̱'a̱yʉdʉ ma̱ di'ibʉts ngajx ja neky, ja'a dʉ'ʉn nnijawʉyaambyʉts pʉn mbadúndʉp di'ibʉ oj n'anʉʉmʉdʉ.
\v 10 Pʉn mmʉma'xtujktʉp miidsʉdyʉ tya̱dʉ ja̱'a̱y, nme'xypyʉts ʉj nandʉ'ʉn. Es pʉn nme'xypyʉts tii, pʉn jam ti yajma'xa̱'a̱ñ, miits m'oy'a̱jtʉngyʉjxm ndúñʉts dʉ'ʉn Jesukristʉ wyinduuy.
\v 11 Dʉ'ʉn ndu'unʉm kʉdiibʉ xy'awindumbʉjkʉm ja mʉjku'ugópk Satanás, ja'a ko byeen nnija̱'a̱m ja 'yaxʉk winma̱'a̱ñ.
\s Pa̱a̱blʉ kyaj jyotkujk'áty jap Troʉs
\p
\v 12 N'awánʉdʉ nandʉ'ʉn kots nja̱jty ma̱ Troʉs ka̱jpn esʉts nga̱jxwa̱'xa̱'a̱ñ ja oybyʉ ayuk di'ibʉ Jesukristʉ ñimadyakypy, taa tu'uk kyʉxe'ky ja nduungʉts ma̱dsʉ Nindsʉn'a̱jtʉmʉ naty tʉ dya''awa̱'a̱tsy ja nnʉ'ʉ ndu'ujʉts.
\v 13 Perʉ n'a̱a̱ njótʉts kyaj tpaty ja pyo'xtákn mʉt ko kyajts nbaty ja nmʉgu'uk'a̱jtʉm Titʉ. Pa̱a̱dyʉts oj jap ndsooñ es oj nnejxy Masedoñʉ ña̱a̱xóty.
\s Kristʉkyʉjxm nmadákʉm
\p
\v 14 Per yajja̱'a̱ygyʉdákp ja Dios, di'ibʉts dʉ'ʉñʉm nduk'oybyʉdseempy ti'igyʉ mʉt ja Kristʉ, es ʉʉtskyʉjxmʉty ja Dios dyajnijáwʉty ja Kristʉ jya'a, di'ibʉ dʉ'ʉn éxtʉm tu'uk di'ibʉ mʉk pa̱'a̱kxu'kp es oymya̱a̱ty ñaspojʉ.
\v 15 Dʉ'ʉn ʉʉdsʉty éxtʉm ja pa̱'a̱k xu'kʉn di'ibʉ Jesukristʉ tyukwinjejkypy ja Dios es 'yabojwa'xy, dʉ'ʉn extʉ ma̱ di'ibáty nitsóktʉp es extʉ ma̱ nandʉ'ʉn di'ibáty tʉgooydyʉp.
\v 16 Mʉdʉ di'ibáty tʉgooydyʉp, dʉ'ʉn ʉʉdsʉty éxtʉm di'ibʉ tok xu'kp; per mʉdʉ di'ibáty nitsóktʉp, dʉ'ʉn ʉʉdsʉty éxtʉm tu'ugʉ pa̱'a̱k xu'kʉn. ¿Es pʉ́nʉ dʉ'ʉn mada̱'a̱gʉp es ttúnʉdʉ tya̱dʉ tuunk?
\v 17 Oytyim ma̱a̱dyʉts nnejxy, nga̱jxwa'xypyʉts ja Diosʉ 'yayuk. Per kyaj éxtʉm may 'yadʉ'ʉtstʉ ttukganarattʉ éxtʉmʉ ajuuy ado'kpʉty, amumdu'uk jot es ti'igyʉ mʉt ja Jesukristʉ nga̱jxwa'xyʉts ʉj Dios windum.
\c 3
\s Jembyʉ kajxy'átypyʉ
\p
\v 1 Ko dʉ'ʉnʉ tya̱a̱dʉ nduknijáyʉdʉ, ¿ti mjʉnándʉbʉ dʉ'ʉn xytyijy esʉts nnayyajmʉjpʉdsʉma̱'a̱ñʉty kʉ'ʉmʉ, o nigutikyʉ dʉ'ʉn nya'íxʉdʉts ja neky ma̱ts ja̱'a̱yʉty xya'ity kumay, o n'amdówdʉt miidsʉty ja neky ma̱ts ʉj xya'ittʉ kumay?, éxtʉm ttundʉ na̱'a̱gʉty.
\v 2 Pes miidsʉdyʉ dʉ'ʉn kʉ'ʉm éxtʉmʉ tadʉ nekyʉ ja̱a̱ybyéty ma̱ yʉ njot nwinma̱'a̱ñʉts, ja neky di'ibʉ mba̱a̱t tkajxy es dya''ayukwimbʉdsemy oytyim pʉ́nʉty.
\v 3 Miidsʉdyʉ dʉ'ʉn mya'ijxʉdʉp ko m'ijttʉp éxtʉm tu'ugʉ neky di'ibʉ Kristʉ jyaay ja'agyʉjxm di'ibʉts nduun ma̱ miidsʉty. Tya̱dʉ neky kyaj jya'ayʉty mʉt ja tintʉ, yʉ'ʉ jya'ayʉty ma̱ m'a̱a̱ mjótʉty mʉt ja jiikypyʉ Diosʉ Jya̱'a̱jʉn.
\p
\v 4 Ndukmʉ'awda̱jtʉpts ja Dios Kristʉkyʉjxm ko dʉ'ʉn m'ittʉ.
\v 5 Mʉt ko ʉj, kyajts ti madakʉn nmʉdaty esʉts oynʉ'ʉnʉn ti ndúnʉdʉts ja Diosʉ tyuunk, Diósʉdsʉ dʉ'ʉn xymyeepy ja madakʉn esʉts ndúnʉt.
\v 6 Pesʉ Diósʉdsʉ dʉ'ʉn tʉ xymyo'oy ja mʉk'a̱jtʉn es nga̱jxwa'xyʉts ma̱ nidʉgekyʉ ja̱'a̱yʉty yʉ jembyʉ kajxy'átypyʉ. Kyaj n'anʉʉmʉdʉ ko koonʉm tkuydyúndʉt ja ja̱'a̱yʉty yʉ ja̱a̱ybyétypyʉ ana'amʉn, net ñitso'oktʉt. Kom kyaj ni pʉ́n mba̱a̱t tkuydyúñ tya̱dʉ ana'amʉn, pa̱a̱ty xy'o'kʉnwinga̱jxʉm nidʉgekyʉ, per yʉ Diosʉ Jya̱'a̱jʉn xymyo'oyʉm ja jiky'a̱jtʉn.
\p
\v 7 Ja ana'amʉn di'ibʉ Moisés yajmooy es yajkʉxja̱a̱y tsa̱a̱gʉjxy, myiiñ mʉt tu'ugʉ ja̱jʉn, es kyaj ja israelitʉ ja̱'a̱yʉty mba̱a̱t t'ijxtʉ ja Moisesʉ wyiin jyʉjp mʉt ko mʉk tye'xy, oyʉ tadʉ ja̱jʉn tamʉ naty pyi'tstsondáknʉ waanáty.
\v 8 Mʉt ko myiiñ mʉt ja mʉj'a̱jtʉnʉ tadʉ ana'amʉn di'ibʉ 'yawa̱'a̱nʉp ja o'kʉn ko kyaj yajkuydyúñ, waanʉ ni'igʉ ja mʉj'a̱jtʉn tʉ myiñ ko ja Espíritʉ Santʉ ja jiky'a̱jtʉn dyaky.
\v 9 N'okjʉna̱'a̱nʉm ko mʉj'a̱jtʉn mʉʉt ja ana'amʉn oj tyuñ di'ibʉ ja o'kʉn 'yawa̱'a̱nʉp ko ngakuydyu'unʉm, ¡waanʉ ni'igʉ mʉj'a̱jtʉn mʉʉt ja jembyʉ kajxy'átypyʉ ko xy'axá̱jʉm ja Dios es oy nwʉ'ʉmdʉ ja'a mʉʉt!
\v 10 Ja mʉj'a̱jtʉn di'ibʉ tʉ'x ma̱ ja wyiin jyʉjp ja Moisés, ni ti tkatsooty ko ndukmʉ'ijxkijxyʉm mʉt ja myʉj'a̱jtʉnʉ tya̱dʉ jembyʉ kajxy'átypyʉ.
\v 11 Es ja'a ko awaanʉp di'ibʉ mʉj'a̱jtʉn mʉʉt ijty, ¿wi'ix waanʉ ni'igʉ mʉj'a̱jtʉn tkamʉdátʉt di'ibʉ wʉ'ʉmp winʉ xʉʉ winʉ tiempʉ?
\p
\v 12 Ja'agyʉjxm ko nnija̱'a̱mʉ tya̱a̱dʉ, pa̱a̱ty nga̱jxwa̱'xʉm yajxón mʉk a̱a̱ mʉk jot.
\v 13 Kyaj nnaywyitwinguwijtsʉm éxtʉmʉ Moisés ñaywyitwinguwijtsʉ kʉdiibʉ ja israelitʉ ja̱'a̱yʉty t'íxtʉt ja ja̱jʉn di'ibʉ yúngʉp es di'ibʉ kyaj jyeky.
\v 14 Per ja israelitʉ ja̱'a̱yʉty myʉda̱jttʉ yʉ jyot wyinma̱'a̱ñʉty kubi'its ku'ook, es tyamba̱a̱t kyaj tjaygyúkʉdʉ ko yʉ tadʉ jékyʉbʉ kajxy'átypyʉ tu'una̱jxpʉ naty, dʉ'ʉn éxtʉm ja Moisesʉ wyiin jyʉjpʉ jya̱jʉn, mʉt ko dʉ'ʉn yʉ'ʉjʉty 'yity éxtʉm ja ja̱'a̱yʉ winguwʉʉnʉbʉn, di'ibʉ ni ti tka'ixtʉ.
\v 15 Es dʉ'ʉñʉmʉ dʉ'ʉn tyamba̱a̱t kyajpyʉm tjaygyujkʉdʉ ko tka̱jxtʉ ja Moisesʉ 'yana'amʉn.
\v 16 Per yʉ wyinwʉʉn yajjʉga'aktʉp ko tyi'igyʉdʉt mʉt ja Jesukristʉ.
\v 17 Ja Nindsʉn'a̱jtʉm, Ja̱'a̱jʉn yʉ'ʉ, es ma̱ 'yity ja Nindsʉn'a̱jtʉmʉ Jya̱'a̱jʉn, awa̱'a̱tstúm ja ja̱'a̱y 'yittʉ.
\v 18 Pa̱a̱ty di'ibáty nmʉdu'unʉm ja Jesukristʉ, kyaj nwinguwʉʉn'a̱jtʉm, ni ngamʉda̱jtʉm ja jot winma̱'a̱ñ kubi'its ku'ook, dʉ'ʉn ʉdsa̱jtʉm éxtʉm ja ijxnʉ wa̱'a̱tspʉ di'ibʉ ñijajpy yajxón ja myʉj'a̱jtʉnʉ Nindsʉn'a̱jtʉm, es nan mʉt yʉ'ʉgyʉjxmʉ tadʉ myʉj'a̱jtʉn yʉ Nindsʉn'a̱jtʉmʉ Jya̱'a̱jʉn xyajtʉga̱jts'adʉ́tsʉm waanʉ ni'igʉ pʉn wi'ix ja tiempʉ ñaxy.
\c 4
\p
\v 1 Pa̱a̱ty ni na̱'a̱ts ngatsipke'exy, mʉt ko Diósʉts tʉ xytyuknipeky mʉt ja pya''ayo'onʉ tya̱dʉ tuunk.
\v 2 Tʉts n'ʉxtijy di'ibʉ yajtuump ayu'udsyʉ, éxtʉmxyʉpts ʉj ti nduñ tsoydyu'un mʉʉt. Kyajts ʉj n'ʉxta̱'a̱y wi'ixʉdsʉ ja̱'a̱y nwin'ʉʉndʉt, es kyajts ʉj nyajtʉgátsy ja Diosʉ 'yayuk; ja'a je'eyʉts ʉj ngajxypy esʉ ja̱'a̱y tnijáwʉdʉt ja tʉy'a̱jtʉn, es Dios wyinduuyʉts dʉ'ʉn nduñ.
\v 3 Es pʉn kyaj yajnijáwʉ ja oybyʉ ayuk di'ibʉ nga̱jxwa̱'xtʉpʉts, pʉn yu'utsy 'yity éxtʉmʉ ja̱'a̱y wyiin jyʉjp ko ñaywyingujuuxyʉty, yʉ'ʉ dʉ'ʉn jya'a'a̱jttʉbʉ taadʉ di'ibáty tʉgooydyʉp.
\v 4 Kyaj tmʉbʉktʉ ko yʉ Jesús yʉ'ʉ dʉ'ʉn ja Kristʉ, mʉt ko ja mʉjku'u di'ibʉ ya̱ naxwiiñ ana'amp, yʉ'ʉ yajkujuundákʉp. Yʉ'ʉ kyaj ña'íxyʉty es kyudʉ'x kyujá̱jʉdʉt ja oybyʉ ayukʉ jya̱jʉn di'ibʉ ñimadyakypy ja myʉj'a̱jtʉnʉ Jesukristʉ, di'ibʉ dʉn ti'igyʉ éxtʉmʉ Dios.
\v 5 Kots nga̱jxwa'xy ja Diosʉ 'yayuk, kyajtsʉ dʉ'ʉn ʉj kʉ'ʉm nnayyajmʉjpʉdsʉma̱'a̱ñʉty. Di'ibʉ dʉn sitʉy, nga̱jxwa'xypyʉts oytyim ma̱a̱ty ko yʉ Jesukristʉ yʉ'ʉ dʉ'ʉnʉ Nindsʉn'a̱jtʉm, es ʉj je'eyʉts nnayyajnide'xyʉty éxtʉm miidsʉdyʉ mbudʉjkʉbʉ esʉ Kristʉ mʉj 'yítʉt.
\v 6 Dʉ'ʉnʉts nga̱jxwa'xy mʉt ko Diosʉ dʉ'ʉn di'ibʉ jʉnán: “Wa'an tja̱jy tte'xy ma̱ ja koots'át”, yʉ'ʉ dʉ'ʉn yajjajpy yajte'xypy ma̱dsʉ njot nwinma̱'a̱ñ, es mʉdʉ tadʉ ja̱jʉn mba̱a̱t n'ixy'átyʉts tadʉ ja̱j tʉ'xʉn di'ibʉ ijtp ma̱ yʉ Jesukristʉ wyiin jyʉjpʉn.
\s Jiky'a̱jtʉm mʉbʉjkʉngyʉjxm
\p
\v 7 Mʉt ko Diósʉdsʉ dʉ'ʉn tʉ xytyukmay'átyʉts tadʉ oy'a̱jtʉn ma̱ nnini'x, oydyʉ'ʉnʉty éxtʉmʉ naxpotsytyu'tsʉn, dʉ'ʉn ya'íxʉt ko Dioskyʉjxm yʉ tadʉ mʉk'a̱jtʉn jyantsymyʉjwiin jyantsykyajaaty, es kyajts ʉj nja'ajʉty.
\v 8 Xyñimiimbʉts ja ayo'on oytyim di'ibʉty kana̱k peky, per kyajts ndsipke'exy; nmʉ'amaybyáty nmʉjotmaybyátypyʉts, per kyajts ndim'amutsk'aty;
\v 9 jayajpajʉdijtpʉts, per kyajts nyajna'íxy; xyjayajkʉda̱a̱bʉts, per kyajts xymyʉmada̱'a̱ktʉ.
\v 10 Pes oytyim ma̱a̱dyʉts ʉj nnejxy, o'kʉn jʉjp'ámʉts ʉj n'ity éxtʉmʉ Jesús o'kʉn jʉjp'ám 'yijty. Ja'agyʉjxm ʉʉdsʉty dʉ'ʉn xyjaty es kyʉxʉ'ʉgʉt oy ko 'yity ja Jesús ma̱ nnini'xʉts.
\v 11 O'kʉn jʉjp'ámʉts dʉ'ʉñʉm n'ittʉ mʉt yʉ'ʉgyʉjxm kots nmʉdundʉ ja Jesús es ñigʉxʉ'ʉgʉt oy ko jyiky'aty yʉ Jesús ma̱ nnini'xʉts di'ibʉ oogʉp.
\v 12 Es dʉ'ʉnʉ dʉ'ʉn ja o'kʉn tyuñ ma̱ ʉʉdsʉty, es ja jiky'a̱jtʉn tyuñ ma̱ miidsʉty.
\p
\v 13 Di'ibʉts nga̱jxwa'xypy, yʉ'ʉ dʉ'ʉn di'ibʉts ʉj kʉ'ʉm nmʉbejkypy, dʉ'ʉn éxtʉm jyʉna'añ ja Diosʉ jyaaybyajtʉn: “Nmʉbʉjkʉts, es pa̱a̱dyʉts oj nga̱jxwa'xy.”
\v 14 Nnija̱'a̱bʉts ko Dios di'ibʉ yajjikypyʉjk ja Nindsʉn'a̱jtʉm Jesukristʉ ko naty tʉ 'yeeky, xyajjikypyʉka̱'a̱nʉm ʉdsa̱jtʉm es xyajnʉjxa̱'a̱nʉm ni'amukʉ ma̱ yʉ'ʉ 'yity.
\v 15 Tʉgekyʉ di'ibʉts tʉ xyjaty tʉ xykyʉbétyʉts, ja'a dʉ'ʉn es xytyuk'oy'áttʉt miidsʉty, es dʉ'ʉn ko may di'ibʉ 'yaxá̱jʉdʉp ja Diosʉ kyunu'xʉn, nandʉ'ʉn myáyʉty di'ibʉ 'yawdatándʉp ja Dios es tja̱'a̱ygyʉda̱'a̱ga̱'a̱ndʉ.
\p
\v 16 Pa̱a̱ty kyajts ndsipke'exy. Oyʉdsʉ nnini'x ngʉba̱jk jya''anu'xʉnʉ, bom bómʉdsʉ n'anmʉja̱'a̱n myʉkta'aky.
\v 17 Ja'a ko di'ibʉ n'ayo'om ya̱ naxwiiñ, pojʉnʉ'ʉ ñaxy es waanʉ yʉ'ʉ; per xytyukpátʉm waanʉ mʉj ja mʉj'a̱jtʉn di'ibʉ miimp mʉj wiin kyajaa es ijtp winʉ xʉʉ winʉ tiempʉ.
\v 18 Mʉt ko kyaj nmʉj'ijxʉm di'ibʉ ya'ijxp, ja'a dʉ'ʉn di'ibʉ kyaj ya'ixy; ja'a ko di'ibʉ n'ijxʉm, na̱jxp yʉ'ʉ, per di'ibʉ kyaj ya'ixy, winʉ xʉʉ winʉ tiempʉ 'yity.
\c 5
\p
\v 1 Ja'a ko nnija̱'a̱m ko pyʉdʉ'ʉgʉt ja wit tʉjk ma̱ n'ijtʉm ya̱ naxwiiñ, ja'a njʉna̱'a̱nʉm ja nnini'x'a̱jtʉm, xy'awijxʉm tsa̱jpótm nidu'uk nidu'ugʉ wiinkpʉ nini'x di'ibʉ ítʉp winʉ xʉʉ winʉ tiempʉ. Diosʉ dʉ'ʉn xytyuknibʉjtákʉmʉ tya̱dʉ wit tʉjk, kyaj yʉ'ʉjʉty ja ja̱'a̱y.
\v 2 Ma̱ n'akjiky'a̱jtʉm ya̱ naxwiiñ, nmʉkxaj n'okxájʉm, ja'a ndsojkʉm es njiky'a̱jtʉm ma̱ ja nnini'x'a̱jtʉm di'ibʉ nmʉda̱jtʉm tsa̱jpótm,
\v 3 dʉ'ʉn nʉjx nmʉda̱jtʉm yʉ nini'x, es kyaj dyʉ'ʉnʉty éxtʉm tu'ugʉ ja̱'a̱y niwa̱'a̱ts ʉxwa̱'a̱tspʉ.
\v 4 Ko n'akjiky'a̱jtʉm ya̱a̱ mʉdʉ tya̱dʉ nini'x, nmʉkxaj n'okxájʉm mʉt ko kyaj n'ita̱'a̱nʉm éxtʉmʉ ja̱'a̱y di'ibʉ niwa̱'a̱ts ʉxwa̱'a̱ts, ja'a nmʉdata̱'a̱nʉm ja nnini'x'a̱jtʉmʉ tsa̱jpótmʉdʉ, es dʉ'ʉn di'ibʉ o'ktʉp tʉgátstʉp mʉt ja di'ibʉ ni na̱'a̱ kya'ooktʉt.
\v 5 Esʉ Diosʉ dʉ'ʉn tʉ ttuknibʉjta̱a̱gʉ es dʉ'ʉn tyun jyátʉdʉt mʉt ʉdsa̱jtʉm, es xymyo'oyʉm ja Espíritʉ Santʉ es yajnijáwʉt ko xypyátʉm ja oy'a̱jtʉn di'ibʉ miimp.
\p
\v 6 Pa̱a̱ty ko dʉ'ʉn, dʉ'ʉñʉm nmʉda̱jtʉm ja mʉk a̱a̱ mʉk jot. Nnija̱'a̱m ko ma̱a̱nʉm n'akjiky'a̱jtʉm ma̱ tya̱dʉ nnini'x'a̱jtʉm, kyaj n'ijtʉm ma̱ Dios.
\v 7 Mʉbʉjkʉngyʉjxm njiky'a̱jtʉm ya̱ naxwiiñ, es kyaj mʉt ko ti n'ijxʉm;
\v 8 pes n'oktukmʉ'awda̱jtʉm, per ja'a ndsojkʉm es ndukpʉdsʉ́mʉmʉ tya̱dʉ nini'x es jo'om n'ijtʉm ti'igyʉ mʉt ja Nindsʉn'a̱jtʉm.
\v 9 Pa̱a̱ty jaayʉm ndsojkʉm es njiky'a̱jtʉm yajxón éxtʉmʉ Nindsʉn'a̱jtʉm ttseky, oy nja'ijtʉmbʉ ma̱ tya̱dʉ nini'x, o ma̱ yʉ Nindsʉn'a̱jtʉm tsa̱jpótm.
\v 10 Mʉt ko koonʉm nidʉgekyʉ nwinguwa̱'a̱gʉya̱'a̱nʉm ja Jesukristʉ es tpayo'oyʉt ja nbojpʉ'a̱jtʉm, es nidu'uk nidu'uk n'axá̱jʉm éxtʉm xypyátʉm, éxtʉm ja oybyʉ o ja axʉʉkpʉ di'ibʉ tʉ ndu'unʉm ma̱ tʉ n'ijtʉm mʉdʉ tya̱dʉ nini'x.
\s Agujk'a̱jt jotkujk'a̱jtʉn yajnimadya'aky
\p
\v 11 Mʉt ko ʉʉdsʉty ndsʉ'ʉk njáwʉdʉts ja Nindsʉn'a̱jtʉm es nnijáwʉts ja myay'a̱jt wyindsʉ'kʉn, pa̱a̱ty n'oktukmʉdíjʉts ja ja̱'a̱yʉty nandʉ'ʉn. Dios ñija̱'a̱p wi'ixʉts ʉj nmʉdúñ amumdu'uk jot, es ndsejpyʉts es miidsʉty nandʉ'ʉn xyñijáwʉdʉt.
\v 12 Kyajts ʉj kʉ'ʉm nnayya'oybyʉdsémyʉty ma̱ miidsʉty, ja'a dʉ'ʉn es miidsʉty waanʉ mjotkujk'áttʉt mʉt ʉjtskyʉjxm, es dʉ'ʉn mba̱a̱t xy'adsowdʉ tadʉ ja̱'a̱yʉty di'ibʉ tyukmʉj tyukpátʉdʉp di'ibʉ kʉxʉ'kp nikʉjxm, es kyaj di'ibʉ ijtp ma̱ ja̱'a̱y jyot wyinma̱'a̱ñ.
\p
\v 13 Pʉn ja pʉ́n jyʉna'añ kots ʉj nlókʉty, ja'a dʉ'ʉn kots nmʉdúñ ja Dios; es pʉn kyaj tyʉy'a̱jtʉnʉty kots ʉj nlókʉty, ja'a dʉ'ʉn es xytyuk'oy'áttʉt miidsʉty.
\v 14 Ja'a kots ti nduñ, yʉ Jesukristʉ tsyojkʉn xytyukmʉdíjʉpts. Mʉt ko nmʉda̱jtypyʉts ja tʉy'a̱jtʉn ko yʉ'ʉ 'ye'ky mʉt yʉ'ʉgyʉjxm nidʉgekyʉ ja̱'a̱y, pa̱a̱ty nidʉgekyʉ ja̱'a̱y 'yittʉ o'kʉn patkʉ'ʉy.
\v 15 Jesukristʉ 'ye'ky mʉt yʉ'ʉgyʉjxm ja ja̱'a̱yʉty nidʉgekyʉ, es dʉ'ʉn kyaj nnakyjyiky'a̱jtʉm éxtʉmʉ ngʉ'ʉm winma̱'a̱ñ'a̱jtʉm, ja'a dʉ'ʉn éxtʉm ttseky ja Jesukristʉ di'ibʉ oj xykyu'o'kʉm es oj jyikypyeky mʉt ʉdsa̱jtʉmgyʉjxm.
\v 16 Kyajts nnaky'ixy nnakytyúñ ni pʉ́n éxtʉm pʉ́nʉdyʉ naxwíñʉdʉ winma̱'a̱ñ ja'a'a̱jtʉdʉp. Oy tʉʉyʉp nbayo'oyʉts ja Jesús éxtʉm pʉ́nʉdyʉ naxwíñʉdʉ winma̱'a̱ñ ja'a'a̱jtʉdʉp, kyajtsʉ dʉ'ʉn nnakytyúñ.
\v 17 Esʉ dʉ'ʉn ko ja̱'a̱y tyi'igyʉ mʉt yʉ Jesukristʉ, myʉda̱jtypy ja jembyʉ jyot wyinma̱'a̱ñ. Ta tyʉgooyñʉ ja tʉʉyʉbʉ jyot wyinma̱'a̱ñ. Kyaj 'yok'ijnʉ éxtʉmʉ naty ijty, tim jemy tʉgekyʉ tʉ wyʉ'ʉmnʉ.
\p
\v 18 Tya̱a̱dʉ tyiimpy tʉgekyʉ ja Dios, di'ibʉ ijty nmʉdsip'a̱jtʉm; per mʉt ja'agyʉjxmʉ Kristʉ Dios xyajtʉga̱jtsʉm, es tyam nnaymyaayʉbʉ'a̱jtʉm mʉdʉ Dios, es tʉ xymyo'oyʉm ja tuunk es nyajmʉtnaymyáyʉdʉt ja Dios ma̱jaty ja wiinkpʉdyʉ ja̱'a̱yʉty nandʉ'ʉn.
\v 19 Pa̱a̱dyʉts ʉj nga̱jxwa'xy ko yʉ'ʉgyʉjxmʉ Jesukristʉ ja Dios dyajti'igyʉya'añ ma̱ yʉ'ʉn ja naxwíñʉdʉ ja̱'a̱yʉty es tjo'tsnʉt dʉ'ʉn ja pyojpʉ. Tya̱a̱dʉ dʉ'ʉn ja oybyʉ ayuk di'ibʉts nga̱jxwa'xypy. Diósʉts xymyooy esʉdsʉ dʉ'ʉn ndúnʉt.
\v 20 Ʉʉdsʉdyʉ dʉ'ʉn ja Kristʉ kyudʉnaabyʉ, dʉ'ʉn éxtʉmxyʉbʉ Dios kʉ'ʉm mdukmʉnu'xta̱'a̱gʉdʉ miidsʉty mʉt ʉʉtskyʉjxm, nmʉnu'xtáktʉp mʉt yʉ'ʉgyʉjxmʉ Jesukristʉ, katʉ xymyʉdsip'attʉ Dios, nik ni'igʉ axá̱jʉdʉ ja ti'igyʉ'a̱jtʉn mʉt yʉ'ʉ di'ibʉ Jesukristʉ xymyo'oya̱'a̱nʉm.
\v 21 Oy ja Jesukristʉ ni na̱'a̱ kyapojpʉtuuñ, Dios tyukkʉbajt tyukkumʉdoojʉ kruuzkʉjxm tʉgekyʉ ʉdsa̱jtʉm ja nbojpʉ'a̱jtʉm, es dʉ'ʉn oy nwʉ'ʉmʉm mʉt ja Dios mʉt ko n'ijtʉm ti'igyʉ mʉt ja Kristʉ.
\c 6
\p
\v 1 Es dʉ'ʉn éxtʉm ʉdsa̱jtʉm nmʉdu'unʉm ja Dios, n'amdoo nbʉjktsoodʉp es kʉdiibʉ nanʉgoobʉ xykyupʉ́ktʉt ja Diosʉ myay'a̱jtʉn.
\v 2 Ja'a ko dʉ'ʉn jyʉna'añ ja Dios ma̱ ja jyaaybyajtʉn:
\q Kots ʉj ja̱'a̱y nduunʉ ja may'a̱jtʉn, nmʉdoots mij m'a̱a̱ myo'kn;
\q kots ʉj ja̱'a̱y nyajnitse'eky, nbudʉjkʉts mij.
\m Pes jaygyúkʉdʉ. Tyamʉ dʉ'ʉn txʉʉjʉty ma̱ Dios mduna̱'a̱nxyʉty ja may'a̱jtʉn, tyamʉ dʉ'ʉn txʉʉjʉty ma̱ mba̱a̱t mnitse'eky.
\p
\v 3 Jiky'a̱jtpts tʉy'a̱jtʉn mʉʉt, kʉdiibʉts pʉ́n nyajtu'udʉgóyʉt ja jyiky'a̱jtʉn es kʉdiibʉ pʉ́n tka̱jxʉdít tmadya̱a̱gʉdítʉt axʉʉk di'ibʉts ndiimpy.
\v 4 Nik ni'igʉts nya'ixa̱'a̱ñʉty ma̱ tʉgekyʉ oytyim tiity éxtʉmʉ Diosʉ myʉduumbʉ, pʉn tits ʉj xyja̱jt xykyʉbajtp, kots nmʉdanʉ ja ayo'on jotmay ma'xtujkʉn mʉʉt, kots ti xykya'ijtxʉ, kots mʉk tsa̱a̱tsy ja jiky'a̱jtʉn nyajnáxy,
\v 5 kots nyajwépy, kots nyajtsímy, kots nyajnibʉde'eky, kots nduñ mʉk, kots ngama̱'a̱y es kots nyajnáxy ja mʉk yuu.
\v 6 Nya'ijxʉpts nandʉ'ʉn mʉdʉdsʉ njiky'a̱jtʉnʉ wa̱'a̱tspʉ, mʉt ja jaygyujkʉn, mʉt ja tsojkʉn tuda'akypyʉ, mʉt ja ma'xtujkʉn, mʉt ja Espíritʉ Santʉ,
\v 7 mʉt ja ayuk di'ibʉ tʉy'a̱jtʉn es mʉt ja Diosʉ myʉk'a̱jtʉn. Dʉ'ʉn éxtʉm ja solda̱a̱dʉ di'ibʉ yajtiimpy ja 'yespa̱a̱dʉ es dyajkutʉgoya'añ ja myʉdsip, es dyajtúñ ja di'ibʉ naydyukkuwánʉp ko ja myʉdsip yajkutʉgoya'añʉty, nandʉ'ʉnʉts ʉj nyajtúñ ja tʉy'a̱jtʉn es nyajkutʉgoya'añʉts ja axʉk'a̱jtʉn, es nyajtiimbyʉts nandʉ'ʉn ja tʉy'a̱jtʉn esʉ ja̱'a̱y t'ixy'áttʉt ja Dios.
\v 8 Na̱'a̱ty nyajwindsʉ'ʉgʉts, es na̱'a̱ty nyajmʉga̱jxtʉgóyʉts; na̱'a̱ty xyñi'o'o xyñiyáxʉdʉpts, es na̱'a̱ty xyñimadyáktʉpts tsuj; na̱'a̱ty xyajna̱jxtʉpts éxtʉmʉ pi'tska̱jxpʉ, es na̱'a̱ty xy'ijxtʉpts éxtʉmʉ tʉy'a̱jtʉn mʉʉtpʉ;
\v 9 na̱'a̱ty xy'ijxtʉpts éxtʉmʉ di'ibʉ kyaj t'ixy'attʉ, es na̱'a̱ty xyajna̱jxtʉpts éxtʉmʉ wyin'ixyʉn; oyʉts xy'ixtʉ je'eyʉts nga'o'knʉ, per akjiky'a̱jtpnʉmts oy mʉk; yajtʉydyuumbʉts, per kyajts xytyim'ya'ooktʉ;
\v 10 óyʉts nmay nda̱jyʉts, per dʉ'ʉñʉmts njotkujk'áty; ayoo jottʉgeebyʉts, per nyajjotkujk'a̱jtypyʉts nimay; oyʉts xy'ixtʉ ko kyajts tii nmʉdaty, per nmʉda̱jtypyʉts tʉgekyʉ.
\p
\v 11 Korintʉ mʉgu'ugʉty, tʉ nmʉga̱jxtʉ mʉk a̱a̱ mʉk jot mʉt ko tʉts miits nduk'ixtʉ njot nwinma̱'a̱ñʉts.
\v 12 Ndsojktʉpts miidsʉty mʉt wínʉts njot; miidsʉty kyajtsʉ dʉ'ʉn xytsyoktʉ nandʉ'ʉn ʉj.
\v 13 Nmʉnu'xtáktʉp éxtʉm tu'ugʉ u'unkteety tmʉgajxy ja 'yu'ungʉty, éxtʉm nmo'oydyʉ ja n'a̱a̱ njótʉts, nandʉ'ʉn xymyo'oydyʉdʉts miidsʉty.
\s Ʉdsa̱jtʉmʉ dʉ'ʉn ja Diosʉ tsyʉna̱a̱ydyákn
\p
\v 14 Katʉ mnaymyúkʉdʉ mʉt ja ja̱'a̱yʉty di'ibʉ kyaj tmʉbʉktʉ Jesukristʉ, éxtʉmxyʉp mʉʉt m'ittʉ ja ja̱'a̱yʉty ma̱ tu'ugʉ kukapʉ. Ja'a ko dʉ'ʉn mgʉxʉ'ʉktʉt éxtʉm ja yuubʉ di'ibʉ kyaj tyuknáxʉty. ¿Tii mba̱a̱t ñaymyíkyʉty ja oy'a̱jtʉn mʉt ja axʉk'a̱jtʉnʉ? ¿Tii mba̱a̱t nandʉ'ʉn 'yity ja ja̱jʉn mʉt ja koots'átʉ?,
\v 15 o ¿wa'an mba̱a̱t ja Jesukristʉ tyi'igyʉ'áty mʉt ja ka'oybyʉ?, o ¿wi'ix mba̱a̱t ja di'ibʉ myʉdiimpy ja Jesukristʉ tyi'igyʉ'áty mʉt ja di'ibʉ kyaj tmʉdúñ ja Kristʉ?
\v 16 Kyaj ni nʉ'ʉn kyatuknáxyʉty ja Diosʉ tyʉjk mʉdʉ agojwinnáx. Pes ʉdsa̱jtʉmʉ dʉ'ʉn ja Diosʉ tyʉjk, éxtʉm ja Dios jyʉnáñ ma̱ yʉ jyaaybyajtʉn:
\q Jiky'átʉpts es jʉdítʉpts mʉt yʉ'ʉjʉty.
\q Ʉjtsʉ dʉ'ʉn xyDyios'áttʉp
\q es yʉ'ʉdyʉdsʉ dʉ'ʉn nja̱'a̱y'áttʉp.
\m
\v 17 Pa̱a̱ty nandʉ'ʉn ja Dios t'anʉʉmʉ jya'ayʉty:
\q Tukpʉdsʉʉmdu'uttʉ es katʉ mnaymyáyʉdʉ mʉt ja axʉk ja̱'a̱yʉty,
\q katʉ m'adʉ'ʉtstʉ éxtʉm ja 'yaxʉk winma̱'a̱ñ,
\q nétʉts miits n'axá̱jʉdʉt.
\q
\v 18 Ʉjts miits xytyeety'áttʉp,
\q es miidsʉty n'u'unk'át n'ʉna̱'k'áttʉp.
\q Dʉ'ʉn jyʉna'añ ja Dios di'ibʉ tʉgekyʉ mʉk'a̱jtʉn myʉda̱jtypy.
\c 7
\s Wi'ixʉ Korintʉ ja̱'a̱y jyodʉmbittʉ
\p
\v 1 Mʉgu'ugítʉty, ja'a ko Diosʉ dʉ'ʉn xymyʉwa̱ndákʉm, pa̱a̱ty nnayya'ijtʉm wa̱'a̱ts ma̱ yʉ di'ibʉ mba̱a̱t xya''axʉ'kʉm, dʉ'ʉn éxtʉm nnini'xkyʉjxm es éxtʉm nandʉ'ʉnʉ n'anmʉja̱'a̱n'a̱jtʉm. N'oktu'unʉm wi'ix n'ijtʉm wa̱'a̱ts wa̱'a̱ts ja'agyʉjxm ko Dios ndsʉ'kʉm.
\p
\v 2 A̱a̱'a̱jt jot'a̱jttʉgʉts. Kyajts pʉ́n wi'ix nduñ. Ni pʉ́nʉts ngawin'ʉʉñ es ni pʉ́nʉts ngayajnibaxʉtʉ́kʉts.
\v 3 Kyaj dʉ'ʉn n'anʉʉmʉdʉ es miits nga̱jxpa̱a̱ttʉt, éxtʉm tʉ n'ok'anmaabyʉdʉ, miits m'ijttʉp njodoty nwinma̱'a̱ñótyʉts, ti'igyʉ n'ijtʉm oy jiiky es oy eeky.
\v 4 Nʉgoots miits n'oktukmʉ'awda̱jtʉnʉ es ndukjotkʉdákypyʉts miidsʉty ma̱játyʉts n'ayoy, xondákypyʉts es byeenʉts n'okjotkujk'a̱jnʉ.
\p
\v 5 Na̱'a̱bʉts nja̱jty Masedoñʉ, kyajts ni nʉ'ʉn ngape'xy, nik ni'igʉts tʉ n'amaybyaaty njotmaybyaaty oytyim ma̱a̱ty. Ak tsip xidsoo ya̱dsoo es tsʉ'kʉbʉts jodoty winma̱'a̱ñóty,
\v 6 perʉ Dios, di'ibʉ yajjotkujkʉp ja ma̱a̱y ta̱jpʉty, yʉ'ʉts xyajjotkujkʉ ko jyajty ja Titʉ.
\v 7 Kyaj jya'ayʉty je'eyʉ mʉt ko jyajty, ja'a dʉ'ʉn mʉt ko byeenʉ naty xyonda'aky mʉt miitskyʉjxmʉty. Yʉ'ʉts xy'anma̱a̱y ko byeenʉts miits xywyin'ixa̱'a̱ndʉts, es xytyukmʉmadyákʉts wi'ix miits xyñimay xyñida̱jtʉts es mnayjyotmaydyúnʉdʉ mʉt ʉj. Mʉdʉ tya̱a̱dʉts oj ni'igʉ nxonda'agyʉts.
\p
\v 8 Oy ja jawyiimbʉ neky di'ibʉ nduknigajxtʉ oj myajmáy myajtá̱jʉdʉ, kyajts tyam nnakyjyawʉ. Es pʉn nja̱'a̱jʉts jawyíñʉp kots njaygyujkʉ ko tadʉ neky myajjotmay'o'kʉdʉ waanʉ,
\v 9 tyam xondáknʉpts, kyaj mʉt ko tʉ mjotmay'ooktʉ, ja'a dʉ'ʉn mʉt ko tʉ tadʉ ayo'on jotmay dyajtʉgátsy ja mwinma̱'a̱ñʉty. Miidsʉty myajna̱jx myajkʉjxtʉ ja ayo'on jotmay éxtʉm ja Dios t'oyjyawʉ esʉ dʉ'ʉn kyaj miidsʉty tii mja̱jtʉdʉ axʉʉk ʉjtskyʉjxm.
\v 10 Ja amay jotmay di'ibʉ miimp ma̱ Dios, yʉ'ʉ xyajjodʉmbijtʉm es xymyo'oyʉm ja po'xtákn, es mʉt yʉ'ʉ kyaj mba̱a̱t nʉgoo nja̱'a̱m. Perʉ tadʉ wiinkpʉ amay jotmay di'ibʉ naxwiiñʉdʉ jya'a'a̱jtypy, ja'a xytyukpátʉm ja o'kʉn.
\p
\v 11 Miidsʉty myajna̱jx myajkʉjxtʉ ja amay jotmay éxtʉm ja Dios t'oyjyawʉ. ¡Es ixtʉ tyamʉ net wi'ix tʉ 'yabʉdsemy! Mdukjaygyujkʉdʉ tuda'aky yʉ tya̱a̱dʉ es xykya̱jxtuda̱'a̱gʉt di'ibʉ naty tʉ xytyundʉ, myajjotma̱'tʉdʉ es nandʉ'ʉn myajtsʉ'kʉdʉ, nétʉts byeen xywyin'ixándʉts miidsʉty, es mdukkumʉdoodʉ di'ibʉ naty tʉ ttuñ ja axʉʉkpʉ. Es ma̱ tʉgekyʉ tya̱a̱dʉ, miits tʉ xya'íxʉdʉ ko kyaj xymyʉdattʉ ja pojpʉ ma̱ tya̱a̱dʉ. Pa̱a̱dyʉ dʉ'ʉn tʉ xytyukkumʉdowdʉ.
\v 12 Mnija̱'a̱dʉp miits ko nduknigajxtʉ ja neky, kyaj ja'agyʉjxmʉp nduknigajxtʉ di'ibʉ tuundʉgooy es ni di'ibʉ yajmʉdʉgooy, ja'a dʉ'ʉn es nduk'ixtʉ Dios windum ko byeenʉts nnayjyotmaydyúñʉty mʉt miidsʉty.
\v 13 Pa̱a̱ty mʉdʉ tya̱a̱dʉ tʉts miits xyajjotkujkʉdʉ.
\p Per mʉdʉ tya̱a̱dʉ di'ibʉts tʉ n'axa̱jʉ yʉ jotkujk'a̱jtʉn, waanʉ ni'igʉts tʉ nxonda'aky kots tʉ n'ixy ja Titʉ jyantsyjyotkujkʉty; pes nidʉgékyʉty miidsʉty tʉ xypyudʉ́kʉdʉ xyajkujkʉdʉ 'ya̱a̱ jyot.
\v 14 Kyajts n'anʉguga̱'a̱jʉ ma̱ts n'anma̱a̱y ja Titʉ kots nnayjyáwʉty jotkujk mʉt miidsʉty. Es kom tʉgekyʉ di'ibʉ tʉ n'anʉʉmʉdʉ miidsʉty, tʉy'a̱jtʉnʉ'ʉ, nandʉ'ʉn pyʉdseemy tʉy'a̱jtʉn di'ibʉts tʉ n'anʉʉmʉ ja Titʉ kots njotkujk'áty mʉt miitskyʉjxmʉty.
\v 15 Es yʉ'ʉ waanʉ ni'igʉ mdsókʉdʉ ko tjamyetsy wi'ix miits xymyʉmʉdoodʉ di'ibʉ yʉ'ʉ mduknipʉjkʉdʉ es wi'ix xyajja̱jttáktʉ mʉt ja tuda'aky'át esʉ may'a̱jt windsʉ'kʉn.
\v 16 Ijt xoombʉts ja'agyʉjxm kots kexy ka'pxy ndukmʉ'awdatʉ es xytyúndʉt di'ibʉ Dios tsyejpy.
\c 8
\s Oyjya'ay'a̱jtʉn
\p
\v 1 Tyam, mʉgu'ugítʉty, nduknijawʉya̱'a̱ndʉ wi'ix ja Dios tʉ dya'íxyʉty ja 'yoy'a̱jtʉn ma̱jaty ja mʉbʉjkpʉtʉjk di'ibʉ naymyujkʉdʉp Masedoñʉ.
\v 2 Oy tʉ dyajnáx dyajkʉ́xtʉ ja ayo'on jantsy mʉj wiin kajaabʉ, byeen jyantsyjyotkujk'aty'áttʉ. Oy jya''ayoop jyajottʉgeebyʉdʉ, tʉ dyaktʉ ja naybyudʉkʉ éxtʉmxyʉp myʉkja̱'a̱y'áttʉ.
\v 3 Nduknija̱'a̱dʉpts miidsʉty ko yʉ'ʉjʉty tʉ dyaktʉ naybyudʉkʉ xonda'aky'a̱a̱ xonda'akyjyót tʉgekyʉ éxtʉm tʉ tpa̱a̱ttʉ, o waanʉ ni'igʉ.
\v 4 Pes extʉ xymyʉnu'xtáktʉts es dyáktʉt ma̱ myiky ja naybyudʉkʉ di'ibʉ yajtukpudʉ́kʉdʉt ja Diosʉ jya'ayʉty.
\v 5 Waanʉ ni'igʉ dya̱jktʉ ja naybyudʉkʉ kʉdiinʉm éxtʉmts njawinma̱a̱y es dyáktʉt. Pes ñaygyʉya̱jkʉdʉ yʉ'ʉjʉty kʉ'ʉm jawyiin ma̱ yʉ Nindsʉn'a̱jtʉm, es net ma̱ ʉdsa̱jtʉm, dʉ'ʉn éxtʉmʉ Dios ttseky.
\v 6 Pa̱a̱ty tʉts n'anʉʉmʉ ja Titʉ es t'ak'yajmujkta̱'a̱yʉt ma̱ miidsʉdyʉ tya̱a̱dʉ tsojkʉngyʉjxmbʉ naybyudʉkʉ di'ibʉ yʉ'ʉ yajmujktsondák tʉʉyʉp.
\v 7 Pes miidsʉdyʉ dʉ'ʉn mwa̱'kpʉdsʉʉmdʉp ma̱ tʉgekyʉ oytyim tiity: ma̱ yʉ mmʉbʉjkʉn, ma̱ xytyuk'ʉxpʉktʉ Dioskajxy, ma̱ oyjyot xymyʉdattʉ esʉ tsojkʉn mʉt ʉj. Es tyam, niwa̱'kpʉdsʉ́mdʉ nandʉ'ʉn ma̱ tya̱dʉ naybyudʉkʉ tsojkʉngyʉjxmbʉ.
\p
\v 8 Mʉdʉ tya̱a̱dʉ, kyajts jayam miits n'ana'amdʉ, yʉ'ʉyʉ dʉ'ʉn es xyñijáwʉdʉt wi'ix ja wiinkpʉty nandʉ'ʉn pyudʉ́kʉdʉ, net miits nandʉ'ʉn xya'íxʉdʉt ja mʉj wiimbʉ mdsojkʉnʉty ma̱ yʉ nmʉmʉbʉjkpʉ'a̱jtʉm.
\v 9 Mʉt ko miits mnija̱'a̱dʉp ja Nindsʉn'a̱jtʉm Jesukristʉ tsyojkʉn, myʉda̱jt mʉj wiin kyajaa ja mʉj'a̱jtʉn, per ñaybyʉjtákʉ éxtʉm tu'ugʉ ayoobʉ ja̱'a̱y mʉt ja'agyʉjxm ko xytsyojkʉm es nbátʉm ja jotkujk'a̱jtʉn.
\p
\v 10 Ngajxypyʉts dʉ'ʉn éxtʉmʉ ka̱jxwíjʉn di'ibʉ mdukjotkʉdáktʉp. Junktʉ'ʉy mʉt ja mdsojkʉngyʉjxm xyajtsondáktʉ jawyiin ja naybyudʉkʉ xyajmúktʉ.
\v 11 Pes tyam, aktundʉ di'ibʉ myajtsondáktʉ junktʉ'ʉy extʉ xyajkugʉ́xʉt. Mʉt ja dʉ'ʉñʉmbʉ tsojkʉn di'ibʉ mmʉda̱jttʉ, yaktʉ éxtʉm ja Dios mmo'oyʉdʉ.
\v 12 Mʉt ko pʉn tu'ugʉ ja̱'a̱y yakaampy ja windsʉ'kʉn ma̱ Dios, Dios kyupejkypy nʉ'ʉn je'eyʉ dyaka̱'a̱ñ, es kyaj t'amdoy di'ibʉ kyaj nmʉda̱jtʉm.
\p
\v 13 Kyaj ʉʉdsʉty ndseky es miits mdʉgoy'a̱jtxʉdʉt ko tʉ xy'okpudʉkʉ ja wiinkpʉty, ja'a dʉ'ʉn es jyaa'átʉt ja ti'igyʉ'át.
\v 14 Tyam miits mmʉda̱jttʉp mʉt di'ibʉ mba̱a̱t xypyudʉ́kʉdʉ di'ibáty tʉgoy'a̱jtxʉdʉp. Ko na̱'a̱ yʉ'ʉjʉty tmʉdáttʉt di'ibʉ mba̱a̱t mdukpudʉ́kʉdʉ, mmo'oyʉdʉp miidsʉty ko naty nandʉ'ʉn mdʉgoy'a̱jtxʉdʉ, es dʉ'ʉn jyaaty ja ti'igyʉ'át.
\v 15 Extʉm jyʉna'añ ja Diosʉ jyaaybyajtʉn: “Di'ibʉ pyʉjták yajpʉdʉ'k may, kyaj oj ni'igʉ tmʉdattʉ; es di'ibʉ yajpʉdʉ'k waanʉ, kyaj oj tyʉgoy'a̱jtxʉty.”
\s Titʉ esʉ jyamyʉʉdʉty
\p
\v 16 Nja̱'a̱ygyʉdákypyʉdsʉ Dios ko tpʉjtáky yʉ amay jotmay Titʉ jyodoty wyinma̱'a̱ñóty, éxtʉmts ʉj nmʉjotmaybyaty miidsʉty.
\v 17 Mʉt ko yʉ Titʉ kyupʉjk di'ibʉts n'anma̱a̱y, es kom yʉ'ʉ kʉ'ʉm byeen mnijotmay'oogʉdʉ, tyam nʉjx mgu'ixa̱'a̱nʉdʉ mʉt ja kyʉ'ʉmdsojkʉn.
\p
\v 18 Ti'igyʉ mʉt ja Titʉ ngéxyʉts jatu'ugʉ nmʉgu'uk'a̱jtʉm di'ibʉ byeen yajmadya'aky'áty ma̱jaty ja mʉbʉjkpʉtʉjk ñaymyúkʉdʉ, mʉt yʉ'ʉgyʉjxm ko jyantsy'óyʉty ja tyuunk ma̱ ja oybyʉ ayuk yajpadúñ.
\v 19 Es kyaj yʉ'ʉdyʉ tya̱a̱dʉ, nandʉ'ʉn mʉt ko ma̱jaty ja mʉbʉjkpʉtʉjk ñaymyúkʉdʉ yajwin'ijxyʉ tya̱dʉ nmʉgu'uk'a̱jtʉm di'ibʉ jʉdijtp mʉt ʉʉdsʉty, es nbudʉ́kʉdʉt ma̱ nyajmujkʉmʉ tya̱dʉ naybyudʉkʉ di'ibʉ yam nduundʉpts, es dʉ'ʉn yajwindsʉ'ʉgʉt ja Nindsʉn'a̱jtʉm es ya'íxʉt ko nbudʉkʉya̱'a̱nʉm nixim niyam.
\v 20 Ndsojktʉpts es kʉdiibʉts ni pʉ́n xyñi'oo xyñiya̱a̱xʉdʉt mʉt yʉ'ʉgyʉjxmʉ tya̱dʉ naybyudʉkʉ di'ibʉts nyajmijkypy,
\v 21 ndunaambyʉts éxtʉm pyaadyʉty, kyaj jye'eyʉty Nindsʉn'a̱jtʉm windum, nandʉ'ʉnʉ dʉ'ʉn mayjya'ayóty.
\p
\v 22 Pa̱a̱dyʉts jatu'ugʉ nmʉgu'uk'a̱jtʉm ngexy nandʉ'ʉn mʉt yʉ'ʉ, di'ibʉts tʉ xytyuk'ixy ja tsyojkʉn kana̱k nax, es tyam waanʉ ni'igʉ mʉt ko mdukmʉ'awdátʉdʉ miidsʉty.
\v 23 Pʉn ja pʉ́n dyajtʉ́y ja Titʉ ti tyuunk'a̱jtypy, anʉʉmʉdʉ ko ʉjtsʉ nmʉDios mʉduumbʉ es xykyudánʉts, es tyuñ mʉt ʉj es dʉ'ʉn xytyuk'oy'áttʉt miidsʉty. O pʉn yajtʉʉdʉpts ja wiinkpʉ nmʉgu'uk'a̱jtʉm ko ti tyuunk'a̱jttʉp, anʉʉmʉdʉ ko yʉ'ʉjʉty kyugajxy'áttʉ ma̱jaty ja mʉbʉjkpʉtʉjk ñaymyúkʉdʉ es twindsʉ'ʉgʉdʉ Jesukristʉ.
\v 24 Ya'íxʉdʉ ko xyjantsytsyoktʉ yʉ tya̱dʉ kugajxyʉty, es dʉ'ʉn xytyuknijáwʉdʉt tʉgekyʉ yʉ nmʉmʉbʉjkpʉ'a̱jtʉm ma̱jaty ja mʉbʉjkpʉtʉjk ñaymyúkʉdʉ, wi'ix miidsʉty ja tsojkʉn xymyʉdattʉ es nandʉ'ʉn miits xya'íxʉdʉt ko tyʉy'a̱jtʉnʉty tʉgekyʉ tya̱dʉ oybyʉ di'ibʉts ʉj tʉ nmadya̱'a̱ktʉ mʉt miitskyʉjxmʉty.
\c 9
\s Naybyudʉkʉ myiky
\p
\v 1 Ja naybyudʉkʉ di'ibʉ miits mmo'oyándʉp tsojkʉngyʉjxm ja nmʉmʉbʉjkpʉ'a̱jtʉm jam Jerusalén, kyaj tyimtsékyʉty es nduknijáyʉdʉt,
\v 2 mʉt ko nnija̱'a̱bʉts yʉ m'oyjyótʉty. Byeenʉmts ngumaydyʉ di'ibáty ijttʉp Masedoñʉ ña̱a̱xóty, ko miidsʉty, Akayʉ ja̱'a̱yʉty, m'awijx mjʉjp'ijxtʉp xypyudʉkʉya̱'a̱ndʉ extʉ junktʉ'ʉyʉp, es mayʉ Masedoñʉ ja̱'a̱yʉty byeen ttukxonda̱'a̱ktʉ miidsʉdyʉ m'oyjyótʉty.
\v 3 Pa̱a̱dyʉts ngexyʉ tya̱dʉ nmʉgu'uk'a̱jtʉm kʉdiibʉts n'anʉguga̱'a̱dʉts mʉt ja di'ibʉ tʉ miitskyʉjxmʉty nnimadya'agyʉts oy. Ja'a njʉna̱'a̱nʉm es mjantsyñayjyʉjp'íxʉdʉt éxtʉmts tʉ njʉna̱'a̱ñ.
\v 4 Es pʉn xymyʉtnʉjxtʉpts nidu'ugʉty ja Masedoñʉ ja̱'a̱y es nba̱a̱dʉdʉts miits ma̱ kyaj xy'awix xyjʉjp'íxtʉ, taadʉ xymyo'oyʉpts ja tsoydyu'un ma̱dsʉ naty miits byeen tʉ ndukmʉ'awdatʉ; ja'a dʉ'ʉn kʉdiibʉts ndimjʉna̱'a̱nʉt ko miidsʉdyʉ dʉ'ʉn mdsoydyu'un'a̱jttʉp.
\v 5 Pa̱a̱tykyʉjxmʉts ʉj nwinma̱a̱y ko tya̱dʉ nmʉgu'uk'a̱jtʉm nʉjx mgu'íxʉdʉ jawyiin es mbudʉ́kʉdʉt xyajka̱'pxtʉt ja naybyudʉkʉ di'ibʉ miits mwa̱ndaktʉ junktʉ'ʉyʉp es xyáktʉt; es dʉ'ʉn ja naybyudʉkʉ di'ibʉ miits mya''awijxtʉp, dʉ'ʉn ya'ixy ko tsojkʉngyʉjxm yaj'yáky es kyaj éxtʉmts ʉj pʉ́n ndukkuwanʉ.
\p
\v 6 Mjamyátstʉp ko di'ibʉ nip waanʉ, nan waanʉ dyajpʉde'eky ja pyʉjta'aky; es ja di'ibʉ nip kajaa, nan may dyajpʉde'eky ja pyʉjta'aky.
\v 7 Nidu'uk nidu'ugʉty miits xyáktʉt ja mbudʉjkʉn éxtʉmʉ naty tʉ xytyukniwinmáyʉdʉ, kyaj majtsk a̱a̱ majtsk jot es kyaj agwánʉbʉ, mʉt ko Dios tsyejpy ko ti yaj'yáky xonda'aky'a̱a̱ xonda'akyjyót.
\v 8 Dios mba̱a̱t miidsʉty mduk'amʉgunu'xʉty tʉgekyʉ oytyim tiity es dʉ'ʉn kyaj ti mdʉgoy'a̱jtxʉdʉt, extʉ mba̱a̱t miits waanʉ ni'igʉ xypyudʉ́kʉdʉ ja di'ibáty tʉgoy'a̱jtxʉdʉp.
\v 9 Dʉ'ʉn éxtʉm jyʉna'añ ja Diosʉ jyaaybyajtʉn:
\q Ja oyjya'aybyʉ majtsk adu'umgʉ'ʉ tmo'oy ja ayoobʉ ja̱'a̱yʉty;
\q es ni na̱'a̱ Dios kyaja̱'a̱ydyʉgo'oyxyʉdʉt ja 'yoyjya'ay'a̱jtʉn.
\m
\v 10 Dios, di'ibʉ yajkypy ja tʉʉmt di'ibʉ yajníp yajkojp es di'ibʉ yajkypy ja je'xy peky, mgunu'xa̱'a̱nxʉdʉp ja mbʉjta'agyʉty di'ibʉ naty mnip mgojtʉp, es miits ja pʉjta'aky may xypya̱a̱ttʉt, es myʉj myáyʉt ja oy'a̱jtʉn di'ibʉ mduundʉp.
\v 11 Dʉ'ʉn miits xymyʉdáttʉt tʉgekyʉ ja namyʉdunʉ es xymyo'oydyʉt mʉj may pʉ́nʉty tii tʉgoy'a̱jtxʉdʉp. Es di'ibʉ miits mya̱jktʉp mʉt ʉjtskyʉjxm oybyʉdsʉma̱a̱mp, mʉt ko ja nmʉgu'uktʉjk'a̱jtʉm tja̱'a̱ygyʉda̱'a̱ktʉt ja Dios ko miits xykyaxtʉ ja pudʉjkʉn.
\v 12 Mʉt ko yajpudʉ́kʉ ja nmʉgu'uk'a̱jtʉm, kyaj jye'eyʉty ti oynʉ'ʉnʉn nmo'oyʉm di'ibʉ tʉgoy'a̱jtxʉp, ja'a dʉ'ʉn es nandʉ'ʉnʉ ja̱'a̱y mʉj wiin kajaabʉ tja̱'a̱ygyʉda̱'a̱ktʉt ja Dios.
\v 13 Yʉ'ʉjʉty 'yawdáttʉp ja Dios, pes mʉdʉ tya̱dʉ naybyudʉkʉ mduk'ijxtʉp ko miits xykyuydyundʉ ja oybyʉ ayuk di'ibʉ Jesukristʉ ñimadyakypy, nandʉ'ʉn yʉ'ʉjʉty myay'at wyindsʉ'ʉgʉdʉp ja Dios mʉt ja oyjyotkyʉjxmbʉ ja naybyudʉkʉ di'ibʉ miits mduknigajxtʉp yʉ'ʉjʉty,
\v 14 es 'yamdow pyʉjtsówdʉp ja Dios mʉt miitskyʉjxmʉty mʉt winʉ jyot, mʉt ko Dios mʉj wiin kajaa tʉ kyuni'xyʉty mʉt miitskyʉjxmʉty.
\v 15 Yajja̱'a̱ygyʉda'aky ja Dios mʉt ko tʉ xyjantsykyunu'xʉm mʉj wiin kajaa, di'ibʉ kyaj mba̱a̱t nnasja̱'a̱m.
\c 10
\s Pa̱a̱blʉ kyutujkʉn ko 'yapostʉlʉ'aty
\p
\v 1 Ma̱ tya̱dʉ neky, ʉj Pa̱a̱blʉ, n'amdoo nbʉjktsoodʉp mʉt ja yuunk'a̱jt naxypy'a̱jtʉn es ja Jesukristʉ tsyojkʉn, oy jam na̱a̱gʉty miidsʉty di'ibʉ jʉnándʉp ko mʉk ayuk nduknigajxtʉ neky'am, per yuunk náxypyʉts n'ity ko miits nmʉgajxy wiin jʉjp.
\v 2 N'amdeepy nbʉjtseebyʉts ja may'a̱jtʉn, ko miits nʉjkx ngu'ixtʉ, kʉdiibʉ miits xytyuk'agwánʉdʉ es awa̱'a̱n nmʉga̱jxʉt pʉ́nʉty xyñi'ʉ'ʉnʉdʉbʉts es jyʉna̱'a̱ndʉ esʉts ti nduñ mʉt ko ʉj n'ity éxtʉm pʉ́nʉty myʉda̱jttʉp ja naxwíñʉdʉ winma̱'a̱ñ, pes nnayjya̱'a̱bʉts es mʉk a̱a̱ mʉk jot nmʉga̱jxʉdʉts yʉ'ʉjʉty.
\v 3 Tʉy'a̱jtʉn ko ja̱'a̱y ʉʉdsʉty, per kyajyʉm ʉʉdsʉty ndsiptúñ éxtʉm ja ja̱'a̱y pʉ́nʉty ja naxwíñʉdʉ winma̱'a̱ñ ja'a'a̱jtʉdʉp.
\v 4 Yʉ solda̱a̱dʉ di'ibʉ ya̱ naxwiiñ, yʉ'ʉ yajtuundʉp ja espa̱a̱dʉ ma̱ tsyiptundʉ; per ʉʉdsʉty, kyaj ʉʉdsʉdyʉ tya̱a̱dʉ nyajtúndʉ, nyajkutʉgeebyʉts ja axʉk'a̱jtʉn. Diósʉts xymyooydyʉp di'ibʉts mʉʉt nyajtu'adíkyʉ tya̱dʉ axʉk'a̱jtʉn es nyajkutʉgóydyʉts di'ibʉ mʉjku'u tyiimpy.
\v 5 Nyajtʉgeebyʉts oydyi'ibʉ winma̱'a̱ñ di'ibʉ ya''adijkypy es ya'ixy'átʉt ja Dios. Tʉgekyʉ winma̱'a̱ñʉty ndukmʉdíjʉpts es tmʉdówdʉt ja Kristʉ.
\v 6 Ko miits xykyuydyuunda̱'a̱ydyʉt, net sitʉy n'awíxyʉts es ndukkumʉdówdʉt di'ibáty kyaj tkuydyundʉ.
\p
\v 7 Katʉ miidsʉty yʉ'ʉyʉ xy'ixtʉ wingʉjxypyʉ. Pʉn ja pʉ́n nidu'ugʉty ñayjyáwʉdʉ ko yʉ'ʉ Jesukristʉ jya'ay'átyʉty, pʉktʉ kwentʉ ko ʉjtsʉ dʉ'ʉn nandʉ'ʉnʉ Jesukristʉ jya'ayʉty.
\v 8 Oyʉts ʉj njatukmʉj njatukpa̱a̱dʉ ja kutujkʉn di'ibʉts nmʉda̱jtypy, kyajts nduktsoydyúñ; pes ja'agyʉjxm ja Nindsʉn'a̱jtʉmts tʉ xymyo'oy yʉ kutujkʉn es myʉj wiin kyajaat ja mmʉbʉjkʉnʉty es kyaj esʉts miits nyajkutʉgóydyʉt.
\v 9 Kyajtsʉ dʉ'ʉn ʉj miits n'adsʉ'ʉgʉya̱'a̱ndʉ mʉdʉdsʉ nneky,
\v 10 éxtʉm na̱a̱k jyʉna̱'a̱ndʉ: “Tya̱dʉ Pa̱a̱blʉ nekykyʉjxyʉ dʉ'ʉn je'eyʉ xymyʉga̱jxʉm mʉk, per ko mʉt nnaywyinguwa̱'kʉm, yuunk náxypyʉp es ni ti tkatsooty ja 'yayuk.”
\v 11 Per di'ibʉ dʉn jʉnándʉp pyʉ́ktʉbʉ kwentʉ ko nandʉ'ʉn éxtʉmts winmʉk jotmʉk nmʉgajxy ma̱ts nnijayʉ kots jagam n'ity, nandʉ'ʉndsʉ dʉ'ʉn winmʉk jotmʉk nga̱jxʉt kots mʉʉt kʉ'ʉm awingujk nnaybya̱a̱dʉdʉt.
\p
\v 12 Kyajts nnaydyukmʉ'ijxkijxyʉya'añʉdyʉ tadʉ di'ibʉ kʉ'ʉm naygyuma̱a̱yʉp. Nʉgoo yʉ'ʉjʉty lyokʉ'attʉ ko kʉ'ʉm ñayyajkijxyʉbʉdʉ o ko ñay'ijxkijxyʉbʉdʉ nixim niyam.
\v 13 Ʉj, kyajts nmʉjʉya'añ nba̱a̱dʉya'añ mʉt ja di'ibʉts kyaj xypyaaty. Diosʉ dʉ'ʉn di'ibʉ pyʉjtákypy yʉ ndsiba̱'a̱nʉts ma̱ts nduñ, es jamba̱a̱dʉts xymyooy esʉts ndúnʉt ma̱ miidsʉty.
\v 14 Pa̱a̱ty kyajts ndukpʉdsemy yʉ ndsiba̱'a̱nʉts, éxtʉmxyʉpts kyaj n'ítyñʉm tʉʉyʉp mʉt miidsʉty. Ʉjtsʉ dʉ'ʉn jayʉjp'a̱jtp ndukninʉjxtʉ miidsʉty ja oybyʉ ayuk di'ibʉ ñimadyakypy ja Jesukristʉ.
\v 15 Kyajts ndukmʉj ndukpa̱a̱dʉ ja tuunk di'ibʉ wiinkpʉty tʉ ttundʉ, éxtʉmxyʉpts ʉj nja'ajʉty. Nik ni'igʉts n'awixy ko myʉj wiin kyajaat ja mmʉbʉjkʉnʉty, es mba̱a̱t n'aktúñʉts ni'igʉ ma̱ miidsʉty,
\v 16 es nandʉ'ʉn n'awánʉt ja oybyʉ ayuk waanʉ jagam ma̱ Korintʉ, ma̱ kyajnʉm ja oybyʉ ayuk yajka̱jxwa'xy, es dʉ'ʉn kʉdiibʉ pʉ́n jyʉna̱'a̱nʉt ko ʉj yʉ'ʉts ndukmʉjpʉdsʉmaampy di'ibʉ wiink ja̱'a̱y tʉ ttundʉ.
\p
\v 17 Extʉm jyʉna'añ ja Diosʉ jyaaybyajtʉn: “Pʉn ja pʉ́n ti ttukxonda'aky, wa'an ttukxonda'aky di'ibʉ Dios tʉ ttuñ.”
\v 18 Tya̱a̱dʉ xytyuk'ijxʉm ko kyaj ti ttsooty ja di'ibʉ naymyʉjpʉjtákʉp kʉ'ʉm; di'ibʉ sitʉy tuump ko yʉ Dios jyʉna̱'a̱nʉt ko oy di'ibʉ ndu'unʉm.
\c 11
\s Pa̱a̱blʉ es di'ibʉ nʉgoobʉ ñaydyíjʉdʉ apóstʉlʉty
\p
\v 1 Tundʉ may'a̱jtʉn, mʉma'xtujktʉgʉts ma̱ts nʉgoo ngu'ʉw nguga̱jxʉ.
\p
\v 2 N'amʉ'a̱jtsy'a̱jttʉpts ʉj miidsʉty Dioskyʉjxm. Miidsʉty, Korintʉ ja̱'a̱yʉty di'ibáty tʉ xy'axá̱jʉdʉ Kristʉ, dʉ'ʉn miidsʉty éxtʉm tu'ugʉ kixyʉdo'oxy di'ibʉ tʉ yajni'adsóy, es ʉjtsʉ dʉ'ʉn éxtʉm ja u'unkteety di'ibʉ pátʉp es n'ijx'ít ngwentʉ'áttʉt extʉ ngʉyákʉt wa̱'a̱ts ja̱'a̱yʉn ma̱ Jesukristʉ, éxtʉm jyawʉ xyña'ay'áttʉ.
\v 3 Per dʉ'ʉn éxtʉm ja ka'oybyʉ mʉt ja axʉk winma̱'a̱ñ twin'ʉ'ʉñ ja Eevʉ, tsʉ'kʉpts ʉj ko miits nʉjx nandʉ'ʉn mnayyákʉdʉ es myajwin'ʉʉndʉt es xyajtʉgátstʉt ja oybyʉ mwinma̱'a̱ñ di'ibʉ naty mmʉda̱jttʉp ma̱ Jesukristʉ.
\v 4 Pes kyaj mdsipka'axtʉ miidsʉty ko mnimínʉdʉ na̱a̱k es tka̱jxwa̱'xtʉ es miits x'axá̱jʉdʉt jatu'ugʉ yajnitsókpʉ, es kyaj yʉ'ʉdyʉ Jesús di'ibʉts ʉj nga̱jxwa'xypy; o ko ttsóktʉt es miits xy'axá̱jʉdʉt ja wiinkpʉ ja̱'a̱jʉn di'ibʉ kyaj yʉ'ʉdyʉ Espíritʉ Santʉ di'ibʉ tʉ xy'axá̱jʉdʉ; o miits xy'axá̱jʉdʉt ja wiinkpʉ ʉxpʉjkʉn, es kyaj jya'adyʉ oybyʉ ayuk di'ibʉ ñimadyakypy ja Jesukristʉ di'ibʉts ʉj miits tʉ n'awánʉdʉ.
\v 5 Pes ni wi'ix tsoots ngawe'emy ʉx'am mʉdʉ tadʉ andákpʉty di'ibáty nay'andíjʉdʉp apostʉlʉkópkʉty.
\v 6 Oyʉts ʉj nyajtijy ko kyajts njaty ja ʉw ka̱jx, kyajts ja'ijty xyjatʉgoy'a̱jtxʉty ja wijy'a̱jtʉn, dʉ'ʉn éxtʉm tʉ nduk'ixtʉ kana̱k nax di'ibʉts tʉ nduñ.
\p
\v 7 ¿Tii wa'an nduundʉ axʉʉk ko n'awa̱'a̱nʉdʉ ja Diosʉ 'yayuk ko ni nʉ'ʉn oj mgatsobátxʉdʉ? ¿Es tii, pa̱a̱dyʉdsʉ dʉ'ʉn xy'ʉxtijtʉ es dʉ'ʉn miidsʉty mʉj mba̱a̱dʉdʉt?
\v 8 Ngupʉjkʉts ja pudʉjkʉn di'ibʉts xymyooydyʉ ja mʉbʉjkpʉty di'ibʉ naymyujkʉdʉp ma̱ wiink ka̱jpnʉty, esʉts miits nmʉdúndʉt. Tya̱a̱dʉ dʉ'ʉn tpaty éxtʉmxyʉpts yʉ'ʉjʉty nme'tsyʉts.
\v 9 Es óyʉts oj ti xytyʉgoy'a̱jtxʉ, ni tu'ugʉts miits nga''adsijpy. Ja nmʉgu'uk'a̱jtʉm di'ibʉ ijttʉp Masedoñʉ, yʉ'ʉts xymyooydyʉ di'ibʉdsʉ naty xytyʉgoy'a̱jtxʉp. Kyajnʉmts ʉj miidsʉty ti n'amdoy esʉts xypyudʉ́kʉdʉt, es ni na̱'a̱ts miits nga''amdówdʉt di'ibʉts ʉj nyajtʉgoy'ajtypy.
\v 10 N'anʉʉmʉdʉ dʉ'ʉn mʉt ja tyʉy'a̱jtʉnʉ Kristʉ, es ni pʉ́n ma̱jatyʉ ñaxwíñʉdʉ Akayʉ xykyapʉjkʉt yʉ nxondákʉnʉts.
\v 11 ¿Es tii, mʉt kots dʉ'ʉn njʉna̱'a̱ñ, mjʉnándʉp xytyijy ko kyaj ndsoktʉ miidsʉty? ¡Diosʉ dʉ'ʉn ñija̱'a̱p kots miits njantsytsyoktʉ byeen!
\p
\v 12 Per n'akka̱jxwa̱'xʉpts ja Diosʉ 'yayuk nan nadʉ'ʉñʉ, es dʉ'ʉnʉ tadʉ di'ibʉ nay'andíjʉdʉp apóstʉlʉty ni wi'ix tsoo tkapa̱a̱ttʉt wi'ix jyʉna̱'a̱ndʉt ko yʉ'ʉ tmʉdundʉ Dios éxtʉm ʉjʉn.
\v 13 Tim tʉy'a̱jtʉn ko tadʉ ja̱'a̱yʉty kyaj yʉ'ʉjʉty ja Jesukristʉ 'yapóstʉlʉ. Andakp yʉ'ʉ es je'eyʉ t'anʉʉmʉdʉ ja ja̱'a̱yʉty ko yʉ'ʉ 'yapostʉlʉ'átʉdʉ Jesukristʉ.
\v 14 Kyaj mʉk yajjáwʉt ko dʉ'ʉn 'yadʉ'ʉtstʉ, pes kʉ'ʉm ja mʉjku'ugópk Satanás ñayyajtʉgátsyʉty es ñayyajkʉxe'egyʉty éxtʉm tu'ugʉ Dios ja 'yanklʉs.
\v 15 Pa̱a̱ty kyaj mʉk yajjáwʉ ko yʉ Satanasʉ myʉduumbʉty nandʉ'ʉn ñayyajtʉgátsʉdʉ es ñayyajkʉxʉ'ʉgʉdʉ éxtʉmʉ Dios mʉduumbʉty. Per óknʉm ja Dios tyukkumʉdowa̱'a̱ñʉty éxtʉm ñitʉ́kʉty.
\s Wi'ixʉ Pa̱a̱blʉ 'yayo'omba̱a̱ty
\p
\v 16 Jatʉgok n'ak'anʉʉmʉdʉ ko kyaj mjʉna̱'a̱ndʉt kots ʉj nlókʉty; per pʉn dʉ'ʉnʉts xy'ixtʉ, na'ijxtʉgʉts es mínʉts n'okkajxy éxtʉm tu'ugʉ lokʉ, esʉts ʉj nandʉ'ʉn waanʉ nmʉj nba̱a̱dʉt.
\v 17 Kyajts ja yamʉ dʉ'ʉn njʉna̱'a̱ñʉ tya̱a̱dʉ mʉt ja Nindsʉn'a̱jtʉmʉ kyutujkʉn, ja'a dʉ'ʉn xya''adʉ́tspʉts ja nlokʉ'átʉts ma̱ts nmʉj nba̱a̱dʉ.
\v 18 Ja'a ko ta may di'ibʉ nayjya̱'a̱dʉp mʉj kʉjxm, mínʉts ʉj nandʉ'ʉn n'oknayjyáwʉty mʉj kʉjxm.
\v 19 Mʉt ko miidsʉty nʉgoo m'okkuwijyaty'a̱jnʉdʉ, mmʉma'xtujktʉp ja lokʉtʉjkʉty.
\v 20 Pes miidsʉty myajna̱jx myajkʉjxtʉp ko yʉ taadʉty m'ana'amʉdʉ es xymyʉdúndʉt, o ko mwin'ʉʉnʉdʉ, o ko mmaadsʉdʉ o extʉ ko mwimbojtsʉ'ʉgʉdʉ.
\v 21 Oyʉts ja'ijty njatsoydyúñ kots dʉ'ʉn njʉna̱'a̱ñ, ¡byeenʉts ʉj ndim'ya''ayow ndim'ya''ama̱'a̱dʉty esʉts dʉ'ʉn n'adʉ'ʉdsʉt!
\p Per pʉn wi'ix ja wiink mʉk a̱a̱ mʉk jot ñayjyáwʉty es ñaymyʉjpʉjta'agyʉty, mínʉts ʉj nandʉ'ʉn n'oknayjyáwʉty, óyʉts ʉj dʉ'ʉn n'ʉy ngajxy éxtʉm tu'ugʉ lokʉ.
\p
\v 22 ¿Tii dʉ'ʉn jyʉna̱'a̱ndʉ ko 'yebreeʉja̱'a̱yʉty yʉ'ʉdyʉ? Nandʉ'ʉnʉts ʉj n'ebreeʉja̱'a̱yʉty. ¿Tii dʉ'ʉn jyʉna̱'a̱ndʉ ko yʉ'ʉjʉty 'yisraelitʉja̱'a̱yʉdyʉ di'ibʉ Dios wyin'ijxʉ? Nandʉ'ʉnʉts ʉj n'israelitʉja̱'a̱yʉty. ¿Tii dʉ'ʉn ñayñiga̱jxʉdʉ ko yʉ'ʉ Abra̱a̱n tyʉʉmp'át 'ya̱a̱ts'átʉdʉ? Pes ʉjtsʉ dʉ'ʉn nandʉ'ʉn xytyʉʉmp'a̱jt xy'a̱a̱ts'a̱jtp ja Abra̱a̱n.
\v 23 ¿Jʉnándʉp ko tmʉdundʉ ja Jesukristʉ? Ʉjtsʉ dʉ'ʉn sitʉy ni'igʉ nmʉdúñʉts ja Jesukristʉ. Oyʉts dʉ'ʉn n'ʉy ngajxy lokʉn, tʉts nduñ waanʉ ni'igʉ kʉdiinʉm yʉ'ʉjʉty. Tʉts xypyʉjta̱'a̱ktʉ pujxndʉgóty kana̱k ok kʉdiinʉm yʉ'ʉjʉty, es tʉts n'ity o'kʉn jʉjp'ám kana̱k ok.
\v 24 Mʉgoxk ókʉts ja israelítʉty tʉ xymyo'oydyʉ ja i'px ma̱jmókx ma̱jtáxk kʉ'ʉ ja naywyopʉ.
\v 25 Tʉgʉk ókʉts tʉ nyajkepywyépy, tʉgókʉts nyajtsa̱ga̱'tsy, tʉgʉk ókʉts tʉ njakíñ mʉt ja barkʉ ma̱dsʉ naty njʉdity, tuk xʉʉ tuk úxʉts ngʉnaanʉdijty mejyññikʉjxy.
\v 26 Tʉts kana̱k ok nnʉ'ʉyo'oy ndu'uyo'oy. Tʉts n'ity o'kʉn jʉjp'ám, mʉjnʉjóty, ma̱ yʉ ma'tspʉty, ma̱ts xyñʉ'ʉdán xytyu'udánʉdʉ, ma̱ nmʉ'israelitʉ ja̱'a̱yʉty, ma̱ di'ibʉ kyaj 'yisraelítʉty, nʉ'a̱a̱y tu'a̱a̱y, ka̱jpnóty, jikymyejyñóty, es ma̱ yʉ ja̱'a̱yʉty di'ibʉ nay'andíjʉdʉp mʉbʉjkpʉtʉjkʉty.
\v 27 Tʉts njantsytyúñ mʉt ja amay jotmay. Kana̱k ókʉts tʉ nyajnáxy ja tsuu ni ngama̱'a̱yʉts. Tʉts n'ayu'aty es tʉts nyajnáxy ja tʉʉdsʉ, es tʉts nyajnáxy ja xux, es waanʉts ja nwit nnijam.
\p
\v 28 Taanʉmʉ wiingátypyʉ waanʉ may di'ibʉts xytyuunkmeepy, ja'a ko bom bómʉts nmʉjotmaybyaaty nidʉgekyʉ pʉ́nʉty 'yaxá̱jʉdʉp ja Jesús éxtʉmʉ Kristʉ.
\v 29 Ko pʉ́n 'yity ya''ayow ya''ama̱'a̱t, nandʉ'ʉnʉts n'ity ya''ayow ya''ama̱'a̱t; es pʉn ja pʉ́n ñayyajpekykya'ayʉty, ʉjts ma̱a̱y ta̱jp es njot'ambékyʉts mʉt ja di'ibʉ myʉgu'uk yajpekykya'apy.
\v 30 Pʉn dʉ'ʉñʉmts n'akmʉj n'akpa̱a̱dʉ, akmʉj akpa̱a̱dʉpts mʉdʉ tya̱a̱dʉty es nya'íxʉdʉts ja nya''ama̱'a̱t'a̱jtʉnʉts.
\v 31 Yʉ Nindsʉn'a̱jtʉm Jesukristʉ Tyeety, yʉ nDios Teety'a̱jtʉm di'ibʉ pátʉp ja may'a̱jt windsʉ'kʉn winʉ xʉʉ winʉ tiempʉ, yʉ'ʉ ñija̱'a̱p kots ngajxy ja tʉy'a̱jtʉn.
\v 32 Kots n'ijty Damaskʉ, ja gobernadoor di'ibʉ naty myʉdiimpy ja rey Aretʉs, yʉ'ʉ pyʉjták ja tʉjk a̱a̱ kwentʉ'a̱jtpʉty ma̱ tadʉ ka̱jpn, esʉts xymyatsándʉts es xyajnʉjxándʉts tsimy;
\v 33 per xykyutʉʉyña̱jxtʉts ja mʉbʉjkpʉtʉjk katsyoty ma̱ ja ka̱jpn nabotsʉ vyentanʉ, es dʉ'ʉnʉts xykyama̱jtstʉ.
\c 12
\s Yajmʉnʉjx ja Pa̱a̱blʉ tsa̱jpótm
\p
\v 1 Oy ni tits ngaganaraty kots nnaymyʉjkumáyʉty, koonʉmts tyam ndukmʉmadya'aky ja ijxma̱'tʉn es di'ibʉts ʉj Nindsʉn'a̱jtʉm tʉ xytyuk'ixy.
\v 2 Ma̱jma̱jkts jʉmʉjtʉp nyajmʉnejxyʉts jam tsa̱jpótm. Kyajts nnijawʉ pʉn ojtsʉdsʉ dʉ'ʉn mʉdʉts nnini'x ngʉba̱jk, o yʉ'ʉyʉdsʉ n'anmʉja̱'a̱n. Dios ñija̱'a̱p.
\v 3 Per di'ibʉts ʉj sitʉy tʉy'a̱jtʉn nnijawʉ (pʉn ojtsʉdsʉ dʉ'ʉn mʉdʉts nnini'x ngʉba̱jkʉts o kyaj, ñija̱'a̱bʉ Dios)
\v 4 ko jam tsa̱jpótmts nmʉdooy di'ibʉ kyaj pʉ́n tmʉwinma̱'a̱ñbyaaty o ñigutíkyʉty yajniga̱jxʉt.
\v 5 Mba̱a̱dʉts ʉj njamʉj njapa̱a̱dʉ mʉdʉ tya̱a̱dʉ, per kyajtsʉ dʉ'ʉn nduna̱'a̱ñ; mʉjpa̱a̱dʉpts mʉt éxtʉmts nya''ayow nya''ama̱'a̱dʉty.
\v 6 Kooxyʉpts ʉj nmʉjʉya'añ nba̱a̱dʉya'añ, kyajxyʉbʉ taadʉ lyokʉwinma̱'a̱ñʉty; óyxyʉbʉ dʉ'ʉn kots nmʉj nba̱a̱dʉ, yʉ'ʉts nmadyakypy di'ibʉ tʉy'a̱jtʉn.
\p
\v 7 Nʉgoo 'yokmʉj'a̱jnʉ di'ibʉts n'ijx. Pa̱a̱dyʉ Dios dyajkutíky es ja mʉjku'ugópk, ja Satanás, xya''ayówʉt mʉt tu'ugʉ pʉjkʉnʉ mʉkpʉ kʉdiibʉts ʉj nnaybyʉjta̱'a̱gʉdʉt mʉj kʉjxm.
\v 8 Tʉgʉk ókʉts nja''amdooy njabʉjktsooy ja Nindsʉn'a̱jtʉm esxyʉpts xytyukniwa̱'a̱dsyʉ tya̱dʉ pʉjkʉn.
\v 9 Per yʉ'ʉ xy'adsooyʉts: “Yʉ nmay'a̱jtʉnʉts yʉ'ʉ mdukmʉmada̱'a̱gʉdʉbʉ tadʉ pʉjkʉn. Ko mij mya''ayow mya''ama̱'a̱dʉty, ya'ijxp ko ʉjtsʉ dʉ'ʉn di'ibʉ mmooyʉp ja mʉja̱a̱.” Es mʉt kots dʉ'ʉn xy'anma̱a̱y ja Nindsʉn'a̱jtʉm, mba̱a̱dʉts ndukmʉj ndukpa̱a̱dʉ kots nya''ayow nya''ama̱'a̱dʉty, mʉt ko dʉ'ʉn ya'ixy ja Jesukristʉ myʉk'a̱jtʉn.
\v 10 Pa̱a̱ty jotkujkʉts nnayjyáwʉty óyʉts nya''ayow nya''ama̱'a̱dʉty, óyʉts xyjani'o'o xyjaniyáxʉbʉdʉts, óyʉts xyjapajʉdijtpʉdʉ, es óyʉts xya''ayówdʉts mʉt ja ayo'on jotmay mʉt yʉ'ʉgyʉjxmʉ Jesukristʉ. Mʉt ko óyʉts njaya''ayow'a̱jt njaya''ama̱'a̱t'a̱jtpʉ, Jesukrístʉts xymyʉja̱a̱meepy.
\s Pa̱a̱blʉ tmʉmay tmʉda̱jy ja mʉbʉjkpʉtʉjk di'ibʉ Korintʉ
\p
\v 11 Nʉgoots tʉ nlokʉ'aty kodsʉ dʉ'ʉn tʉ nnaymyʉjpʉjta'agyʉty, per miidsʉdyʉ dʉ'ʉn tʉ xytyuktundʉ agwanʉ. Mʉt ko miidsʉdyʉ dʉ'ʉn tʉ mjapa̱a̱dʉdʉ xyajmʉjpʉdsʉ́mʉdʉts, pes pʉn miits m'ijxkijxyʉdʉbʉ tadʉ di'ibʉ 'yandijtʉp apóstʉlʉ kópkʉty mʉt ʉj, m'íxtʉp ko ni wi'ix tsoo yʉ'ʉjʉty waanʉ oy tmʉdundʉ ja Dios es kʉdiinʉm ʉj.
\v 12 Pes kots n'ijty mʉt miidsʉty, nya'ijxʉts kots njantsy'apóstʉlʉty, ja'a ko mʉt ja ma'xtujkʉnʉts nduuñ kana̱k naxʉ ijxwʉ'ʉmʉn, mʉj'a̱jtʉn es di'ibʉ ja̱'a̱y dʉ'ʉñʉ mʉʉt wyʉ'ʉmʉdya'aydyʉ.
\v 13 Dʉ'ʉñʉmts ʉj miits nbudʉjkʉdʉ éxtʉmts nbudʉjkʉdʉ ja mʉbʉjkpʉtʉjk di'ibʉ wiink tsoo naymyujkʉdʉp; di'ibʉ dʉ'ʉn tu'uk mʉʉt tyʉgatsy, ja'a dʉ'ʉn mʉt ko miits kyaj ti pudʉjkʉn xymyooydyʉ. Dʉ'ʉn xy'oknama'xtʉt pʉn tʉ nmʉdʉgoydyʉ mʉt ko kyaj tʉ n'amdowdʉ.
\p
\v 14 Tyámʉts njʉjp'íxy es nʉjx ngu'ixa̱'a̱ndʉ myʉdʉgʉk okpʉ, es kyaj n'adsipa̱'a̱ndʉ. Kyajts nbajʉdity di'ibʉ miits mmʉda̱jt mjaygyajptʉp, miidsʉdyʉ dʉn kʉ'ʉm n'ʉxta̱a̱ydyʉp; pes yʉ u'unkteedyʉty yʉ'ʉ dʉn pátʉdʉp t'ʉxta̱'a̱ydyʉt es t'íxtʉdʉ 'yu'unk 'yʉna̱'kʉty, es kyaj yʉ'ʉjʉty ja u'unk ʉna̱'k di'ibʉ 'yíxtʉp ja tya̱a̱k tyeedyʉty.
\v 15 Mʉt tu'ugʉ oyjyot nyajtúnʉdʉts tʉgekyʉ di'ibʉts nmʉda̱jtypy, es mʉt tʉgékyʉts ja nmʉja̱a̱ nbudʉ́kʉdʉt miidsʉty. ¿Tii xytsyojktʉpts miidsʉty waanʉ pʉn nduk'ijxtʉp miidsʉty ko njantsytsyoktʉ byeen?
\p
\v 16 Ni na̱'a̱ ti tʉ nga''amdowdʉ mʉdʉdsʉ ngʉ'ʉm gastʉ, oy jyadʉ'ʉnʉty, taa di'ibʉ jʉnándʉp: “Tya̱dʉ Pa̱a̱blʉ byeen pye'typyʉty es tʉ xylyokʉ'ijxʉm, es oytyim wi'ixʉty tʉʉ yʉ'ʉ dyajpʉdsémy ja meeñ es tgastʉ'aty.”
\v 17 ¿Per wi'ix tsoots tʉ nyajpʉdsémy ja mmeeñ? ¿Tii mʉt ja di'ibʉts ngajx éxtʉmdsʉ ngudʉnaabyʉ?
\v 18 Kots nduknipejky ja Titʉ es nʉjx mgu'íxʉdʉ, ngejxyʉts yʉ'ʉ mʉt jatu'ugʉ nmʉgu'uk'a̱jtʉm. ¿Tii yajpʉdsʉʉmdʉ ma̱ miidsʉty oynʉ'ʉnʉnʉ gyanaratyʉ? Kyaj, ¿kʉdii? Nmʉda̱jttʉpts ti'igyʉ jot winma̱'a̱ñ. Ti'igyʉts oytyiity ndundʉ.
\p
\v 19 ¿Tii mjʉnándʉp miidsʉty ko mʉdʉ tya̱dʉ neky, ja'ats ndiimpy es nnayyajwʉ'ʉma̱'a̱ñʉdyʉts yajxón mʉt miidsʉ? ¡Kyaj dyʉ'ʉnʉty! Di'ibʉts tʉ nmadya'aky, dʉ'ʉnʉts njʉna̱'a̱ñ éxtʉmʉ Jesukristʉ kyudʉnaabyʉ es Dios testiigʉ. Mʉgu'ugítʉty, tʉgekyʉ di'ibʉts ndiimpy, ja'a dʉ'ʉn es xyajmʉjwiin xyajkajaajʉdʉt ja mmʉbʉjkʉnʉty.
\v 20 Mʉt ko nja̱'a̱bʉts ko nʉjx ngu'ixtʉ, wa'anʉ da nga'okpátnʉt éxtʉmts ʉj ndseky, es nandʉ'ʉn miidsʉty kyajts xypya̱a̱ttʉt éxtʉmts miits xyjapa̱a̱da̱'a̱ndʉ. Njʉjpja̱'a̱bʉts ko kyʉxʉ'ʉgʉt ja tsip, nayñi'o'o nayñiyáxʉk, akʉ, joramayʉ, pi'ts ʉy pi'ts kajxy, naybyat'ijx nayjyʉnak'ijxʉn, mʉj patʉn.
\v 21 Jʉjpja̱'a̱pts kots nʉjx ngu'ixtʉ, yʉ nDiósʉts xytyukjáwʉpts di'ibʉts ʉj ndsoydyu'un'átʉp, es kots miits nimay nnijʉ'ʉy nniya̱'a̱xtʉt ko miits tʉ mbekytyundʉ es kyajnʉm xymyastu'uttʉ ja axʉk'a̱jtʉn, ja mʉ'induunk es ja ka'oybyʉ winma̱'a̱ñ di'ibʉ mbaduundʉp.
\c 13
\s Ka̱jxwíjʉn esʉ ka̱jxpo'xʉn
\p
\v 1 Tya̱a̱dʉ dʉ'ʉn ja myʉdʉgʉk okpʉ ngu'ixa̱'a̱ndʉ. Pʉn jaa di'ibʉ ʉ'ʉnʉn tyuda̱'a̱ga̱'a̱ñ, koonʉm tsyékyʉty majtsk o tʉgʉʉk di'ibʉ ñika̱jxpáttʉp, éxtʉm jyʉna'añ ja Diosʉ jyaaybyajtʉn.
\v 2 Ko ja myʉmajtsk okpʉ ngu'ixtʉ, ndukjaygyujkʉdʉts di'ibʉ naty pekytyuundʉp, es tyam n'aktukjaygyúkʉdʉts yʉ'ʉjʉty esʉ wiinkpʉty. Kots n'akninʉjxtʉt jatʉgok, kyajts nnakyñima'xtʉt,
\v 3 es dʉ'ʉn nduk'íxtʉt ko ʉjts ngudʉnaapy ja Jesukristʉ. Pes jaygyúkʉdʉ ko yʉ Jesukristʉ, kyaj yʉ'ʉ ya''ayow ya''ama̱'a̱dʉty, mʉk'a̱jtʉnʉ dʉ'ʉn sitʉy myʉda̱jtypy di'ibʉ yajtiimpy ma̱ miidsʉty.
\v 4 Tʉy'a̱jtʉnʉ'ʉ ko 'ye'ky kruuzkʉjxm éxtʉmʉ ya''ayow ya''ama̱'a̱tpʉn, per tyam jiky'a̱jtp mʉt ja Diosʉ myʉk'a̱jtʉn. Es nandʉ'ʉnʉts ʉj n'ity ya''ayow ya''ama̱'a̱t es ti'igyʉ mʉt ja Kristʉ njiky'áttʉdʉts, es Dios myʉk'a̱jtʉngyʉjxmʉts miits nbudʉ́kʉdʉt.
\p
\v 5 Naywyinma̱'a̱ñ'íxʉdʉ miidsʉty kʉ'ʉm, es xy'íxtʉt pʉn mmʉbʉjktʉp ja Jesukristʉ. ¿Tii kyaj xypyʉktʉ kwentʉ ko Jesukristʉ 'yity ma̱ miidsʉty pʉn mjantsymyʉbʉjktʉp?
\v 6 Ndukmʉ'awda̱jtʉpts es miits xyñijáwʉdʉt kots ʉj nmʉdúñ ja Nindsʉn'a̱jtʉm.
\v 7 Ka̱jxtákpʉts es mjiky'áttʉt yajxón. Kyaj yʉ'ʉjʉty esʉts ʉj miits xyajwʉ'ʉmdʉt oy, ja'a dʉ'ʉn es oy m'íttʉt mʉdʉ Dios, oy jyakʉxe'eky kyaj 'yóyʉty di'ibʉts nduun nga̱jx ma̱ miidsʉty.
\v 8 Kyajts mba̱a̱t ndsiptúñ mʉt ja tʉy'a̱jtʉn, yʉ'ʉdsʉ dʉ'ʉn je'eyʉ mba̱a̱t nduñ ja tʉy'a̱jtʉn.
\v 9 Xondákpʉts ko miits m'oy'at mmʉk'attʉ, óyʉts ʉj nya''ayow nya''ama̱'a̱dʉty; es akka̱jxtákpʉts es m'íttʉt éxtʉmʉ Dios ttseky.
\v 10 Pa̱a̱ty ma̱a̱nʉm ngaku'ixtʉ, nja̱'a̱yʉts ma̱ tya̱dʉ neky es miits mnayjyʉjwijtsʉmbítʉdʉt kʉ'ʉmʉty, es kyaj jyatyimtsékyʉty es ʉj miits ndukkumʉdówdʉt kots ʉj nnʉjxʉt; mʉt ko ja Nindsʉn'a̱jtʉmts tʉ xymyo'oy yʉ kutujkʉn es myʉj wiin kyajaat ja mmʉbʉjkʉnʉty, es kyaj esʉts miits nyajkutʉgóydyʉt.
\p
\v 11 Mʉgu'ugítʉty, ma̱ts nga̱jxta̱a̱yñʉ, ndukmʉdsojktʉp es mjiky'áttʉt agujk jotkujk. Ʉxta̱'a̱ydyʉ di'ibʉ myajwʉ'ʉmʉdʉp wa̱'a̱ts ma̱ ja mjiky'a̱jtʉn. Nayyajjotkujkʉdʉ es jyiky'attʉ ti'igyʉ agujk jotkujk. Pʉn mduundʉbʉ dʉ'ʉn, netʉ Dios, di'ibʉ yajkypy ja tsojkʉn esʉ agujk'a̱jt jotkujk'a̱jtʉn, 'yítʉt ma̱ miidsʉty.
\v 12 Naymyats naymyʉnánʉdʉ nixim niyam Jesukristʉkyʉjxm.
\v 13 MayDiósʉk dʉ'ʉn jyʉna̱'a̱ndʉ nidʉgekyʉ nmʉmʉbʉjkpʉ'a̱jtʉm.
\p
\v 14 Wa'anʉ Nindsʉn'a̱jtʉm Jesukristʉ mgunu'xʉdʉ es ja Dios mmo'oyʉdʉ tsyojkʉn esʉ Espíritʉ Santʉ mmʉt'ítʉdʉ nidʉgekyʉ miidsʉty.