\id PHP

\h FILIPɄS
\mt Neky Di'ibʉ Pa̱a̱blʉ Tyuknigajxtʉ Ja Filipʉs Ja̱'a̱yʉty
\c 1
\p
\v 1 Ʉj Pa̱a̱blʉ, tukmukʉ mʉt ja nmʉgu'uk'a̱jtʉm Timotee, Jesukristʉ myʉduumbʉty. Nduknigajxtʉptsʉ tya̱dʉ neky nidʉgekyʉ ja Diosʉ jya'ayʉty di'ibʉ ijttʉp Filipʉs ka̱jpnóty es di'ibʉty kywentʉ'a̱jttʉp ja mʉbʉjkpʉtʉjk mʉdʉ pyudʉjkʉbʉty.
\v 2 Wa'an ja nDios Teety'a̱jtʉm es ja Nindsʉn'a̱jtʉm Jesukristʉ mgunu'xʉdʉ es mmo'oyʉdʉt ja agujk'a̱jt jotkujk'a̱jtʉn.
\s Pa̱a̱blʉ tnika̱jxta̱a̱gʉ ja Filipʉs mʉbʉjkpʉty
\p
\v 3 Tʉgok tʉgókʉts miits njamyatstʉ, nja̱'a̱ygyʉdákypyʉts ja Dios mʉt miidsʉty.
\v 4 Kots miits nniga̱jxta̱a̱gʉdʉ, dʉ'ʉñʉm xyonda'aky ja n'a̱a̱ njot
\v 5 mʉt ko tim jawyiin ko xy'amʉdoona̱jxtʉ ja oybyʉ ayuk es extʉ tyamba̱a̱t, ti'igyʉ ndu'unʉm es yajka̱jxwa̱'xʉt ja oybyʉ ayuk.
\v 6 Pa̱a̱ty ndukmʉ'awda̱jtʉpts ko Dios 'yaktunaambyʉm ma̱ miidsʉ tya̱dʉ oybyʉ tuunk di'ibʉ tʉ dyajtsonda'aky, es ya''abatʉdya'ayaampy extʉ ko yʉ Nindsʉn'a̱jtʉm Jesukristʉ jyʉmbítʉt.
\v 7 Mʉt ko xypyátpʉts esʉts dʉ'ʉn nnayjyáwʉty es njamyatstʉ mʉt ko njantsytsyoktʉ, mʉt ko miidsʉty dʉ'ʉñʉm xyajwa̱'xtʉ mʉt ʉj di'ibʉ Dios mmooyʉdʉp, dʉ'ʉn éxtʉm kots ndsimdsyʉʉnʉ o kots nga̱jxwa'xyʉts ja Kristʉ ñitsokʉn es nyajtʉydyʉ́kʉ ja oybyʉ ayuk.
\v 8 Pesʉ Dios ñija̱'a̱p yajxón nʉ'ʉnʉts miits njantsytsyoktʉ nidʉgekyʉ mʉt ja Jesukristʉ tsyojkʉn,
\v 9 es n'amdeepy nbʉjktseebyʉts ja Dios es dyajmʉjwindʉ́kʉt ni'igʉ yʉ mdsojkʉn nixim niyam, es mduknijáwʉdʉt wa̱'a̱tsti'knʉ wi'ixʉ dʉ'ʉn ja Dios ttseky es njiky'a̱jtʉm,
\v 10 es xywyin'íxtʉt miits di'ibʉ dʉ'ʉn oy, es dʉ'ʉn mjiky'áttʉt wa̱'a̱ts, es kyaj xymyʉdáttʉt ja pojpʉ extʉ ko Kristʉ myínʉt,
\v 11 es dʉ'ʉñʉmʉ mjiky'a̱jtʉnʉty dya'íxʉdʉt ko Kristʉ mdukmʉda̱jtʉdʉp ja oybyʉ mjot mwinma̱'a̱ñʉty, es ko xymyay'at xywyindsʉ'ʉgʉdʉ ja Dios, es dʉ'ʉnʉ ja'ayʉty tmay'at twindsʉ'ʉgʉdʉt es t'awdáttʉt ja Dios.
\s Xondakp ja Pa̱a̱blʉ ko Kristʉ 'yayuk yajka̱jxwa'xy
\p
\v 12 Mʉgu'ugítʉty, ndsejpyʉts es xyñijáwʉdʉt éxtʉmts ʉj tʉ njaty tʉ ngʉbety, tʉ myʉjwinda'aky ja oybyʉ ayukʉ kya̱jxwa̱'xʉn.
\v 13 Pes dʉ'ʉn nidʉgekyʉ ja solda̱a̱dʉty ma̱ ja Sésʉr pyalasyʉ esʉ wiingátypyʉ oytyim madsooty ñija̱'a̱dʉp kots ʉj n'ity tsimy mʉt kots nmʉdúñ ja Kristʉ.
\v 14 Es ko t'ijxtʉ ja nmʉgu'uk'a̱jtʉm ndsimdsyʉʉnʉts, may xyonda̱'a̱ktʉ es tka̱jxwa̱'xtʉ ja Diosʉ 'yayuk, es ni ti tkajáwʉdʉ, ni'igʉ tjotmo'oydyʉ ja Nindsʉn'a̱jtʉm.
\p
\v 15 Tʉy'a̱jtʉn ko na̱a̱gʉty tnimadya̱'a̱ktʉ Kristʉ tsipkyʉjxm es naywyinnaxʉjawʉgyʉjxm, es tamʉ wiingátypyʉ tnimadya̱'a̱ktʉ mʉt ja oyjyotkyʉjxm.
\v 16 Pʉ́nʉty ñimadyáktʉp ja Kristʉ mʉt ja oyjyotkyʉjxm, dʉ'ʉn ttundʉ mʉt ko xytsyóktʉts es tnijáwʉdʉ ko tya̱a̱ts ʉj esʉts nnitánʉt ja oybyʉ ayuk;
\v 17 es ta pʉ́nʉty ñimadyáktʉp ja Kristʉ mʉt ko ñayyajmʉjpʉdsʉma̱'a̱nʉdʉ kʉ'ʉm, es kyaj amumdu'uk jot, je'eyʉ dʉ'ʉn ttundʉ esʉts ndsipjáwʉt ya̱ pujxndʉgóty.
\v 18 Per oy mʉt oyjyotkyʉjxm o kyaj myʉt'oyjyotkʉjxmʉty, kya̱jxwa̱'xtʉbʉm ja Kristʉ 'yayuk; esʉ tya̱a̱dʉdsʉ dʉ'ʉn xyajjotkujkʉp es waanʉ ni'igʉts xy'aktim'yajxonda'aky,
\v 19 mʉt ko nnija̱'a̱bʉts ko pʉdsʉma̱a̱mbʉts ʉj pujxndʉgóty mʉt ko miits xyñiga̱jxta̱'a̱ktʉdʉts es kots xypyudʉkʉ ja Kristʉ Jya̱'a̱jʉn.
\v 20 Pes n'awijxypyʉts amumdu'uk jot es ni na̱'a̱ts ndsoytyúnʉt, per amʉk jotmʉ́kʉts ti ndun nga̱jxʉt es dʉ'ʉñʉm yaj'íxʉt ma̱ ʉj ja Kristʉ myʉj'a̱jtʉn, óyʉts njiky'aty o óyʉts n'eeky.
\v 21 Mʉt ʉj, pʉn akjiky'a̱jtpʉts, n'akmʉdúnʉpts ja Kristʉ; es pʉn o'kpʉts, mʉt ʉj waanʉ ni'igʉ 'yóyʉty.
\v 22 Es pʉn mʉt kots n'akjiky'aty, mba̱a̱dʉdsʉ dʉ'ʉn ni'igʉ nmʉdúñ ja Kristʉ. Kyajts nnijawʉ di'ibʉts njotmo'oyʉp.
\v 23 Dʉ'ʉnʉts ʉj éxtʉm tu'ugʉ ja̱'a̱y 'yity adijmíky ana̱jñ aga̱'a̱ñ: njatsejpyʉts esʉts ʉj n'oogʉt esxyʉpts n'ity mʉt ja Kristʉ. Waanʉ ni'igʉ 'yóyʉty mʉt ʉj,
\v 24 per mʉt miidsʉty, waanʉ ni'igʉ 'yóyʉty esʉts n'akjiky'átʉt ya̱ naxwiiñ.
\v 25 Kots dʉ'ʉn ndukmʉ'awdaty, nnija̱'a̱bʉts ʉj ko akjiky'ata̱a̱mbʉts ya̱ naxwiiñ es nbudʉ́kʉdʉt miidsʉty es ndukmʉdúndʉt ja Jesús, es myʉj myáyʉt ja it xo'onʉn di'ibʉ mmʉda̱jttʉp mʉbʉjkʉngyʉjxm,
\v 26 es dʉ'ʉn kots n'ítʉt jatʉgok mʉt miits, mmʉdáttʉp wi'ix tsoo waanʉ ni'igʉ m'it mxóndʉt mʉt yʉ'ʉgyʉjxmʉ Jesukristʉ.
\p
\v 27 Per wa'ants xyjaty tits xyja̱jtp: nayya'ítʉdʉ dʉ'ʉñʉm éxtʉm ja oybyʉ ayuk di'ibʉ Kristʉ ñimadyakypy, es dʉ'ʉn óyʉts xyjanasma̱jtsʉbʉ es nʉjx ngu'ixtʉ, o óyʉts n'aktim'ijtpʉ tsimy esʉts pʉ́n xyñimínʉt es xytyukmʉmadya̱'a̱gʉdʉts wi'ix miits mjattʉ, nnijawʉyaambyʉts ko miits ti'igyʉ mnayya'ítʉdʉ mʉk aa mʉk jot ja mʉbʉjkʉngyʉjxm di'ibʉ yajpátp ma̱ ja oybyʉ ayuk, m'aktundʉ ma̱ xytyuk'ʉxpʉktʉ ja oybyʉ ayuk,
\v 28 es ni na̱'a̱ mganayyákʉdʉt ma̱ yʉ mmʉdsípʉty es m'adsʉ'ʉgʉdʉt oynʉ'ʉnʉn. Tya̱a̱dʉ ya'ijxʉp wa̱'a̱tsti'knʉ ko tyʉgoya̱'a̱ndʉ yʉ'ʉjʉty es ko miits mnitso'oga̱'a̱ndʉ. Diosʉ dʉ'ʉn kʉ'ʉm di'ibʉ mmooyʉdʉbʉ tadʉ nitsokʉn.
\v 29 Pes mʉt yʉ'ʉgyʉjxm ja Kristʉ Dios tʉ mmo'oyʉdʉ ja may'a̱jtʉn kyaj jye'eyʉty ko xymyʉbeky ja Kristʉ, nandʉ'ʉn m'ayoy mʉt yʉ'ʉgyʉjxm
\v 30 es xytyúnʉt nandʉ'ʉmbʉ ja tuunk di'ibʉ éxtʉm tʉʉyʉp xy'ixtʉ ndúñʉts kots ʉj ndsiptuuñ mʉt ja ka'oybyʉ, es xymyʉdowdʉ ko dʉ'ʉñʉmts n'aktúñ.
\c 2
\s Kristʉ yujy'a̱jtʉn esʉ myʉj'a̱jtʉn
\p
\v 1 Pʉn mjotmʉkmooyʉdʉp ja Kristʉ, pʉn myajjotkujk'a̱jtʉdʉp ja'agyʉjxm ko mdsókʉdʉ, pʉn ja Espíritʉ Santʉ mʉʉt m'ittʉ, es pʉn mba''ayoodʉp ja ja̱'a̱yʉty,
\v 2 mdúndʉp wi'ixʉts ʉj n'it nxónʉt jotkʉda'aky ja'agyʉjxm ko ti'igyʉ ja winma̱'a̱ñ xymyʉdattʉ, ti'igyʉ mnaydsyókʉdʉ nixim niyam, ti'igyʉ mnayjyáwʉdʉ es ti'igyʉ mjot mja̱'a̱jʉnʉty.
\v 3 Di'ibʉ mdúndʉp miidsʉty ma̱ mjiky'attʉ, ni ti xykyatúndʉt di'ibʉ je'eyʉ kʉ'ʉm xytyuk'oy'áttʉt o mnaymyʉjpʉjta̱'a̱gʉdʉt mʉt ja wiingátypyʉ, naybyʉjta̱'a̱gʉdʉ yuunk naxypy, es xyjáwʉt ko myʉ́jʉty ja wiingátypyʉ es kʉdiinʉm miidsʉty kʉ'ʉm.
\v 4 Wa'an nidu'uk nidu'uk miits t'ʉxta̱'a̱ydyʉ ja di'ibʉ tyuk'oy'áttʉp ja wiinkpʉty, kyaj je'eyʉ di'ibʉ kʉ'ʉm mduk'oy'áttʉp.
\p
\v 5 Wa'an nidu'uk nidu'uk miits xymyʉdáttʉt ja mjot mwinma̱'a̱ñ éxtʉm tmʉda̱jty ja Nindsʉn'a̱jtʉm Jesukristʉ.
\v 6 Oy yʉ'ʉ dʉ'ʉñʉm Dyiósʉty, kyaj jyʉnáñ agwanʉ es dyajtúnʉt ja kyutujkʉn di'ibʉ myʉda̱jt,
\v 7 es ñaydyukniwatsʉ di'ibʉ jya'a'a̱jtypy, es ñaybyʉjtákʉ éxtʉm tu'ugʉ mʉduumbʉ, es myiiñ jyajty naxwiiñ éxtʉmʉ ja̱'a̱y.
\v 8 Es ko jya'ay'ajty, waanʉ ni'igʉ ñaybyʉjtákʉ yuunk naxypyʉ, es tmʉmʉdooy ja Dios Teety, extʉ tkupejky ja o'kʉn kruuzkʉjxy.
\v 9 Pa̱a̱dyʉ Dios tʉ myo'oyʉty tʉgekyʉ mʉj'a̱jtʉn esʉ ana'amʉn, es pyʉjtákʉ éxtʉmʉ Wyindsʉ́n nidʉgekyʉ ánklʉsʉty es ja ja̱'a̱yʉty di'ibʉ jaa,
\v 10 dʉ'ʉn nidʉgekyʉ yʉ'ʉjʉty oytyim ma̱a̱ty, oytsya̱jpótmʉty, oyñaxwiiñʉty es oyñax patkʉ'pʉty, nidʉgekyʉ yʉ'ʉjʉty ñaygyoxtʉna̱a̱ydya̱'a̱gʉdʉt
\v 11 es t'ʉxkáptʉt ko Jesusʉ dʉ'ʉn Windsʉ́n ma̱ tʉgekyʉ. Dʉ'ʉnʉ tadʉ yajtúnʉt Dios Teety myʉj'a̱jtʉngyʉjxm.
\s Dʉ'ʉn ja mʉbʉjkpʉty éxtʉm ja mʉdsa̱'a̱
\p
\v 12 Mʉgu'ugítʉty, dʉ'ʉn éxtʉmts miits dʉ'ʉñʉm xymyʉdoodʉ, es kyaj jyaayʉty je'eyʉ kots n'ijty ma̱ miidsʉty, es tyam waanʉ ni'igʉ kots n'ity jagam ma̱ miidsʉty, tundʉ wi'ix oy mwʉ'ʉmdʉt mʉt ja Dios, es mmʉdáttʉp ja tsʉ'ʉgʉ ko dʉ'ʉn xykyatúndʉt,
\v 13 ja'a ko Dios dʉ'ʉn tyiimpy ma̱ miits m'a̱a̱ mjótʉty, ja'a mwinma̱'a̱ñmyooyʉdʉp es xytsyóktʉt ko xytyúndʉt di'ibʉ yʉ'ʉ tsyejpy.
\p
\v 14 Tundʉ tʉgekyʉ, ni mga'ákʉdʉt es ni mganaygyuga̱jxʉdʉt,
\v 15 es dʉ'ʉn xya'íxʉdʉt ko m'u'unk'átʉdʉ Dios es ko mjiky'attʉ wa̱'a̱ts, es kyajpʉ mbojpʉ. Dʉ'ʉn mjiky'áttʉt ma̱ tadʉ axʉk ja̱'a̱yʉty esʉ kujuundʉjkʉty ya̱ naxwiiñ, dʉ'ʉn m'íttʉt ma̱ yʉ'ʉjʉty éxtʉmʉ mʉdsa̱'a̱ ko jyajy tye'xy ma̱ koots itʉn.
\v 16 Pʉn mduundʉbʉ dʉ'ʉn miidsʉty, nmʉda̱jtypyʉts wi'ix tsoots n'it nxónʉt ko myínʉt ja Kristʉ, mʉt ko ya'íxʉt ja nduungʉts ko kyaj tʉ ñapa''aty.
\v 17 Oyʉts n'oogʉt éxtʉmʉ windsʉ'kʉn esʉdsʉ nne'pyñ tyam yókʉt éxtʉm di'ibʉ yajtuknitaambʉ windsʉ'kʉn, xondákpʉts ja'agyʉjxm ko miits oy xymyʉdundʉ ja Jesukristʉ mmʉbʉjkʉngyʉjxm. Xondákpʉts mʉt miidsʉty,
\v 18 es ndsejpyʉts es nandʉ'ʉn mxonda̱'a̱ktʉt mʉt ʉj.
\s Timotee esʉ Epafroditʉ
\p
\v 19 Ko Dios jyʉna̱'a̱nʉt, ngaxaambyʉts tsojkʉ Timotee es min xy'awánʉts wi'ix m'ittʉ miidsʉty, es dʉ'ʉn xyajjotkujkʉdʉts.
\v 20 Pes kyájʉts pʉ́n nmʉdaty ja wiinkpʉ di'ibʉts mʉʉt tyi'igyʉ ja n'a̱a̱ njótʉts, es mnimay mnidá̱jʉdʉ wi'ix m'íttʉt yajxón miidsʉty.
\v 21 Nidʉgekyʉ yʉ wiingátypyʉ, yʉ'ʉ je'eyʉ wyinma̱'a̱ñ'ajtypy di'ibʉ kʉ'ʉm tyuk'oy'átʉp es kyaj tka̱jxwa̱'xa̱'a̱ñ ja Jesukristʉ 'yʉxpʉjkʉn.
\v 22 Per miidsʉty byeen yajxón xyñijáwʉdʉ ko éxtʉm tu'ugʉ u'unk ʉna̱'k tpudʉkʉ ja tyeety, dʉ'ʉnʉts ja Timotee tʉ xypyudʉkʉ kots nga̱jxwa'xy ja oybyʉ ayuk.
\v 23 Pa̱a̱ty jantsy je'eyʉts ʉj nnijáwʉt wi'ix tyu'uwítsy yʉ njotmáyʉts, ndʉ'ʉnʉts njajʉna̱'a̱ñ es nduknigaxa̱'a̱ñ ja Timotee.
\v 24 Ndukmʉ'awda̱jtʉpts ja Dios ko tsojkʉts ʉj nandʉ'ʉn nnʉjxʉt.
\p
\v 25 Dʉ'ʉnʉts tʉ nwinmay ko ngajxʉmbítʉt yʉ Epafroditʉ, di'ibʉts ʉj mʉʉt ti'igyʉ nduñ esʉts mʉʉt nyajjʉjptʉgóy ja axʉk'a̱jtʉn, ja'a di'ibʉ miits xytyuknigajxtʉ esʉts xypyudʉ́kʉt ma̱ts ndsimdsyʉʉnʉ.
\v 26 Pes yʉ'ʉ byeen mjawin'ixa̱'a̱nʉdʉ jatʉgok nidʉgekyʉ miidsʉty es amaymyʉʉt jotmaymyʉʉt ko miidsʉty tʉ xymyʉdowdʉ ko tʉ pyékyʉty.
\v 27 Es tʉy'a̱jtʉnʉ'ʉ ko tʉ pyékyʉty, pes jatim jawaanʉ tʉ jya'eeky; perʉ Dios tʉ pya''ayóyʉty, es nandʉ'ʉn ʉj, kʉdiibʉts njátʉt ni'igʉ o'ktʉ́y.
\v 28 Pa̱a̱ty byeen njantsytyuknigaxandʉ miidsʉty es mxonda̱'a̱ktʉt jatʉgok ko xy'íxtʉt, es xonda̱'a̱gʉpts mʉt miidsʉty mʉt ko Epafroditʉ jya̱'tʉt oy mʉk ma̱ miidsʉty.
\v 29 Axá̱jʉdʉ xonda'aky'a̱a̱ xonda'akyjyót éxtʉmʉ nmʉmʉduumbʉ'a̱jtʉm ma̱ yʉ Nindsʉn'a̱jtʉm, es tsoktʉ byeen nidʉgekyʉ di'ibʉ dʉ'ʉn éxtʉm yʉ'ʉn.
\v 30 Pesʉ Epafroditʉ jawaanʉ tʉ kya'eeky ko tmʉdúñ ja Kristʉ, es ñaybyʉjtákʉ ma̱ kyudsʉ'ʉgʉty kots xypyudʉjkʉ ma̱ miidsʉty kyaj mba̱a̱t xypyudʉjkʉdʉ.
\c 3
\s Tsobatp ko Kristʉ ya''axa̱jʉ éxtʉmʉ Yajnitsókpʉ
\p
\v 1 Mʉgu'ugítʉty, xonda̱'a̱ktʉ Nindsʉn'a̱jtʉmgyʉjxm. N'anma̱a̱yʉmbijttʉp di'ibʉ tʉ n'ok'anmaabyʉdʉ. Kyajts ni ti nay'adsijpʉn ngajawʉ es n'anʉʉmʉt jana̱a̱m jatsojk yʉ nga̱jxwíjʉnʉts, mʉt ko dʉ'ʉn miits kyaj xyja'aydyʉgóydyʉt.
\p
\v 2 Naygywentʉ'átʉdʉ es kyaj mwin'ʉʉnʉdʉt di'ibʉ mduk'ʉxpʉkánʉdʉp di'ibʉ kyaj tyʉy'a̱jtʉnʉty, es mdukmʉdijʉyánʉdʉp es myajtsúktʉt waanʉ ma̱ yʉ myedyʉjk'a̱jtʉn\f 3:2 Ix Lukʉs 1:59. \f* .
\v 3 Per ʉdsa̱jtʉmʉ dʉ'ʉn meerʉ ja ijxwʉ'ʉmʉn nmʉda̱jtʉm di'ibʉ myʉda̱jttʉp ja Diosʉ jya'ayʉty, n'awda̱jtʉm ja Diosʉ Jya̱'a̱jʉn mʉʉt es nxondákʉm mʉt ko xyja'a'a̱jtʉm ja Nindsʉn'a̱jtʉm Jesukristʉ, es kyaj n'ajot'a̱jtʉm ja nikʉjxyʉdʉ.
\v 4 Ta may ja ja̱'a̱yʉty di'ibʉ naymyʉjpʉjtákʉdʉp mʉt ko tʉ tkuydyuñʉ tadʉ kostumbrʉ. Mʉt kooxyʉp yʉ'ʉyʉ ko nguydyu'unʉm ja kostumbrʉ es tsyobátxyʉp oynʉ'ʉnʉn, ʉj nandʉ'ʉn mba̱a̱txyʉpts nnaymyʉjpʉjta'agyʉty waanʉ ni'igʉ kʉdiinʉmʉ wiinkpʉty.
\v 5 Nyajtsijkyʉts ʉj ko tyuktujkxʉbejty ma̱dsʉ naty tʉ nmiñ tʉ nja̱'ty naxwiiñ, israelitʉ ja̱'a̱yʉts ʉj, Benjamingʉ tyʉʉmp 'ya̱a̱ts, ebreeʉ ja̱'a̱yʉts ʉj, ebreeʉ ja̱'a̱y 'y'u'unk, es éxtʉmʉ Moisesʉ 'yana'amʉn yajpadúñ, fariseeʉts 'yijty;
\v 6 es di'ibʉts ni'igʉ nduun, njantsypyajʉdijttákʉts ja di'ibʉ myʉbʉjktʉ Jesús éxtʉm ja Kristʉ, es nguydyuuñʉts ja Moisesʉ 'yana'amʉn éxtʉmts ni pʉ́n mba̱a̱t xykyani'ʉʉnʉ mʉt ti peky.
\v 7 Per mʉt yʉ'ʉgyʉjxmʉ Jesukristʉ, tʉgekyʉ tya̱a̱dʉ di'ibʉts ʉj ijty nmʉjpʉjtákypy, tyam nbʉjtákypyʉts éxtʉm ni ti tkatsooty;
\v 8 kyajts ʉj ti nnekyjyawʉ ko yajtukmʉ'ijxkijxyʉ ja oy'a̱jtʉn di'ibʉ yajmʉda̱jtp ko Jesukristʉ ya'ix'áty, ʉj nYajnitsókpʉ. Kristʉkyʉjxm tʉgékyʉts tʉ nmastu'utta̱'a̱y. Posta̱'a̱gʉn njáwʉts tʉgekyʉ tya̱dʉ esʉts nganarátʉt ja Kristʉ,
\v 9 esʉdsʉ naty tʉ nwe'emy ti'igyʉ mʉt yʉ'ʉ. Kyajts ʉj n'ʉxta̱'a̱y esʉts nwʉ'ʉmʉt oy mʉt ja Dios ja'agyʉjxm kots njakuydyuna̱'a̱ñ ja ana'amʉn, ja'ats n'ʉxtaapy wi'ixʉts oy nwʉ'ʉmʉt mʉt ja Dios mʉt ko Dios oy tmʉtwe'emy ja ja̱'a̱y ja'agyʉjxm ko tmʉbʉktʉ Kristʉ.
\v 10 Ja'ats ndsejpy es ʉj n'ixy'átʉt yajxón yʉ Jesukristʉ, es yʉ'ʉ tyúnʉt ma̱ts ja njiky'a̱jtʉn mʉt ja myʉk'a̱jtʉn di'ibʉ myʉda̱jt ko jyikypyejky. Ndsejpyʉts es nmʉnax nyajnáxʉt ja ayo'on éxtʉm oj jyaty, es dʉ'ʉn n'ítʉdʉts éxtʉm yʉ'ʉ ko 'ye'ky,
\v 11 es oy tyimwi'ix tsooty ndúnʉpts esʉts njikypyʉ́kʉt kots n'oogʉt.
\p
\v 12 Kyajts ʉj n'andijy kots tʉ tʉgekyʉ yʉ'ʉ nbatta̱a̱yñʉ o kots ʉj kexy ka'pxy n'óyʉty éxtʉmʉ Dios ttseky, per nmʉja̱a̱ts ndiimpy maba̱a̱dʉts nmada'aky esʉts nguydyúnʉt ja winma̱'a̱ñ di'ibʉ Jesukristʉ myʉda̱jt ko dyajtsondáky esʉts xyja'a'áty.
\v 13 Mʉgu'ugítʉty, ʉj kyajts njʉna̱'a̱ñ ko tʉts nganaraty ja may'aty. Ta tu'uk di'ibʉts tʉy'a̱jtʉn ndiimpy. N'okja̱'a̱ydyʉgóyʉts di'ibʉ tʉ ña̱jxnʉ, esʉ nmʉja̱a̱ nyajtúñ maba̱a̱dʉts nmʉda'aky es nmʉmʉda̱'a̱gʉdʉt di'ibʉ miimpnʉm.
\v 14 Dʉ'ʉnʉts ʉj éxtʉmʉ ja̱'a̱y di'ibʉ mʉk pʉyʉ'kp es jawyiin jya̱'ta̱'a̱ñ ma̱ kyugʉxʉ ja pʉyʉ'kn, esʉ Dios xymyo'oyʉdʉts ja may'aty di'ibʉ Jesukristʉkyʉjxm xytyukniwowʉ esʉts njiky'átʉt jam tsa̱jpótm.
\p
\v 15 Nidʉgekyʉ ʉdsa̱jtʉm di'ibátyʉ Dios tʉ ttukjaygyukʉ yajxón di'ibʉ yʉ'ʉ tsyejpy, dʉ'ʉn njiky'a̱jtʉm. Es pʉn jaa ti oynʉ'ʉnʉn xywyinmaydyʉ miidsʉty mʉt ja wiink winma̱'a̱ñ, wa'an ja Dios mmo'oyʉdʉ jaygyujkʉn es xyjaygyúkʉdʉt di'ibʉ dʉ'ʉn tʉy'a̱jtʉn.
\v 16 N'okjiky'a̱jtʉm éxtʉmʉ Dios tʉ xytyuknija̱'a̱m.
\p
\v 17 Mʉgu'ugítʉty, jiky'attʉ éxtʉmts xy'ixy njiky'átyʉts ʉj. Nandʉ'ʉn xypya'íxtʉt di'ibáty nandʉ'ʉn jiky'a̱jttʉp éxtʉmts ʉj njiky'aty.
\v 18 Ja'a ko ta may di'ibʉ jiky'a̱jttʉp éxtʉm tʉ n'ok'anmaabyʉdʉ kana̱k ok nibʉdʉ'ʉk, es tyam extʉ jiibyʉts n'anma̱a̱yʉmbíttʉ ko myʉdsip'a̱jttʉp ja Kristʉ, kyaj ttsoktʉ es ya''anʉʉmʉdʉt ko Kristʉ 'ye'ky kruuzkʉjxm,
\v 19 pa̱a̱ty pátʉp ñʉjxʉt ma̱ ayoodákn. Jam ja wyinma̱'a̱ñ tpʉjta̱'a̱ktʉ ma̱ ja kaaky je'xy es tyukmʉj tyukpátʉdʉp di'ibʉ tsoydyu'un mʉʉt. Yʉ'ʉyʉ je'eyʉ wyinma̱a̱ydyʉp di'ibʉ ya̱ naxwiiñ.
\v 20 Per ʉdsa̱jtʉm, tsa̱jpótmʉdʉ ja̱'a̱y'a̱jtʉm, es n'awijx njʉjp'ijxʉm es jam kyʉda̱'a̱gʉt yʉ nYajnitsokpʉ'a̱jtʉm, yʉ Nindsʉn'a̱jtʉm Jesukristʉ.
\v 21 Yʉ'ʉ yajtʉgátsʉp ja nnini'x'a̱jtʉm di'ibʉ ayoop, es dʉ'ʉn kyʉxʉ'ʉgʉt éxtʉmʉ kyʉ'ʉm nini'x di'ibʉ jyantsymyʉda̱jtypy ja mʉj'a̱jtʉn; dʉ'ʉn ttúnʉt mʉt ja myʉk'a̱jtʉn esʉ kyutujkʉn di'ibʉ mʉʉt 'yane'emy ma̱ tʉgekyʉ di'ibʉ jaa ijtp.
\c 4
\s Ijtp nxondákʉm ma̱ Kristʉ
\p
\v 1 Pa̱a̱ty mʉgu'ugítʉty, di'ibʉty njantsytsyojktʉp es njantsy'ixa̱'a̱ndʉ, xytyukxondáktʉpts ʉj miidsʉty. Akpanʉjxtʉ Nindsʉn'a̱jtʉm amumdu'uk jot.
\p
\v 2 Nmʉnu'xtákypy mij Evoodʉ, es nandʉ'ʉn mij Síntikʉ, es xymyastu'uttʉt yʉ mdsip tuunk winma̱'a̱ñʉty, es yajkʉ́x yajnáxtʉ oytyim tii tyimwi'ixʉty, éxtʉm tukka'axpʉn ma̱ yʉ Nindsʉn'a̱jtʉm.
\v 3 Es mij Sísigʉ, di'ibʉts oy xypyudʉjkʉ ko nmʉdu'unʉm ja Nindsʉn'a̱jtʉm, n'amdeepy nbʉjktseepy es xypyudʉ́kʉt waanʉ tya̱dʉ nimajtskpʉ toxytyʉjk. Yʉ'ʉts xypyudʉjkʉdʉ es nga̱jxwa'xyʉts ja oybyʉ ayuk, ti'igyʉ mʉt ja Klementʉ es yʉ wiinkpʉdyʉ nmʉmʉduumbʉty di'ibʉdyʉ xyʉʉ ja̱a̱ybyéty ijtp nekykyʉjxy, ja xyʉʉjʉty pʉ́nʉty myʉda̱jttʉp ja jiky'a̱jtʉn winʉ xʉʉ winʉ tiempʉ.
\p
\v 4 Dʉ'ʉñʉm mxonda̱'a̱ktʉt ma̱ yʉ Nindsʉn'a̱jtʉm. N'ak'anma̱a̱yʉmbijttʉp es m'it mxóndʉt.
\v 5 Wa'an nidʉgekyʉ tnijáwʉdʉ ko miits xyñasjáwʉdʉ mʉt ja ja̱'a̱yʉty. Wingoomp ja Nindsʉn'a̱jtʉm Jesukristʉ.
\p
\v 6 Katʉ mmay mda̱jtʉ, nik oy, pʉn ti tuun ja̱jtʉp, ka̱jxta̱'a̱ktʉ es amdow pʉjktsówdʉ Dios, es xyja'aygyʉda̱'a̱ktʉt nandʉ'ʉn.
\v 7 Netʉ Dios mmo'oyʉdʉt yʉ 'yagujk'a̱jt jyotkujk'a̱jtʉn, di'ibʉ waanʉ ni'igʉ myʉ́jʉty kʉdiinʉm di'ibʉ ja̱'a̱y mba̱a̱t tjaygyukʉ. Esʉ tya̱dʉ agujk'a̱jt jotkujk'a̱jtʉn kyuwa̱'a̱nʉp ja mjot mwinma̱'a̱ñ ti'igyʉ mʉt ja Jesukristʉ.
\s May witstʉ ma̱ tʉgekyʉ di'ibʉ oy
\p
\v 8 Es tim ok, mʉgu'ugítʉty, may witstʉ ma̱ tʉgekyʉ yʉ'ʉ: tʉgekyʉ di'ibʉ dʉn tʉy'a̱jtʉn, tʉgekyʉ di'ibʉ nitʉjkʉp ja may'a̱jt windsʉ'kʉn, tʉgekyʉ di'ibʉ tʉy'a̱jtʉn mʉʉt, tʉgekyʉ wa̱'a̱ts'a̱jtʉn, tʉgekyʉ di'ibʉ oybyʉdsʉʉmp, es tʉgekyʉ di'ibʉ ya'oyñiga̱jxp. May witstʉ ma̱ tʉgekyʉ di'ibʉ dʉn oy es di'ibʉ nitʉjkʉp ja may'a̱jt windsʉ'kʉn.
\p
\v 9 Tuunda̱'a̱ktʉ di'ibʉ tʉ nduk'ʉxpeky, di'ibʉ tʉ ndukni'íxʉdʉ, di'ibʉ tʉ xymyʉdowdʉ njʉna̱'a̱ñʉts, es di'ibʉ tʉ xy'ixtʉ ndúñʉts. Tundʉ dʉ'ʉn, es yʉ Dios di'ibʉ xymyo'oyʉm ja agujk'a̱jt jotkujk'a̱jtʉn, ítʉp mʉt miidsʉty.
\s Filipʉs ja̱'a̱y tmo'oydyʉ pudʉjkʉn ja Pa̱a̱blʉ
\p
\v 10 Xondákpʉts byeen ma̱ yʉ Nindsʉn'a̱jtʉm ko miits xyjamyátstʉts jatʉgok. Kyajts njʉna̱'a̱ñ ko tʉdsʉ naty xy'okja̱'a̱ydyʉgeebyʉdʉts, ja'a dʉ'ʉn mʉt ko kyaj tʉ m'awa̱a̱dsʉ'áttʉ esʉts xypyudʉ́kʉdʉt.
\v 11 Kyajts njʉna̱'a̱ñ mʉt ko tʉ n'ítyʉts mʉt ja n'amay njotmáyʉts, pes mʉyaak mʉbatʉ yʉ'ʉ es ngonformarátyʉts mʉt di'ibʉts nmʉda̱jtypy.
\v 12 Nnija̱'a̱bʉts wi'ix njiky'átʉt ko ti kye'ty es ko ti kyake'ty. Tʉts nmʉyujy esʉts njotkujk'átʉt pʉn tits xyja̱jtp xykyʉbajtp, kots njotkʉda'aky o kots nyu'eegyʉ, ko ti yajmʉdáty yajjaygyépy may o ni tii.
\v 13 Mba̱a̱dʉts oytyim tiity nwinguwa̱'a̱gʉ, mʉt ko ja Kristʉ yʉ'ʉts xymyʉja̱a̱meepy.
\v 14 Per miits mduundʉ oy kots xypyudʉjkʉdʉ ma̱ts n'amay njotmay.
\p
\v 15 Miits Filipʉs ja̱'a̱yʉty, byeen tsuj xyñijáwʉdʉ kots ndso'oñ Masedoñʉ es nʉjx nga̱jxwa̱'xa̱'a̱ñʉts ja oybyʉ ayuk, kyajpʉ wiinkpʉ mʉbʉjkpʉtʉjk di'ibʉts xypyudʉjkʉdʉts.
\v 16 Kana̱k ok nibʉdʉ'ʉgʉts miits xytyuknigajxtʉ naybyudʉkʉ kodsʉ naty ʉj n'ity Tesalónikʉ.
\v 17 Kyajts jayam n'anʉʉmʉdʉ dʉ'ʉn esʉts xy'aktuknigáxtʉdʉts ni'igʉ may'aty, ja'ats ndsejpy esʉ Dios mgunu'xʉdʉt ja'agyʉjxm ko dʉ'ʉn xytyuundʉ.
\v 18 Tʉts n'axá̱jʉdya'ay tʉgekyʉ, es tyam nmʉda̱jtypyʉts extʉ nan ni'igʉ, mʉt ko Epafroditʉ tʉts xytyukkʉdʉkʉ ja mmay'aty. Dʉ'ʉn yʉ'ʉ éxtʉmʉ pa̱'a̱k xu'kpʉ di'ibʉ yajtukwindsʉ'kʉp ja Dios, di'ibʉ kyupejkypy es t'oyjyawʉ.
\v 19 Pa̱a̱dyʉ Dios mmo'oyʉdʉp miidsʉty tʉgekyʉ di'ibʉ myajtʉgoy'a̱jttʉp, dʉ'ʉn éxtʉm ni'igʉ oy'a̱jtʉn tmʉdaty tjaygyepy ma̱ Jesukristʉ.
\v 20 N'ok'awda̱jtʉm ja nDios Teety'a̱jtʉm winʉ xʉʉ winʉ tiempʉ. Wa'an dʉ'ʉnʉty.
\s Ka̱jxpo'xʉn
\p
\v 21 Yajnáxts ja nDioskajxy nidu'uk nidu'uk di'ibáty Dios ja'a'a̱jtʉdʉp. Yʉ nmʉgu'uk'a̱jtʉm di'ibʉts jayam mʉʉt n'ity, nandʉ'ʉn mduknigáxʉdʉ Dioskajxy.
\v 22 Nidʉgekyʉ Diosʉ jya'ayʉty mduknigáxʉdʉ Dioskajxy, es waanʉ ni'igʉ di'ibáty ijttʉp ma̱ yʉ yajkutujkpʉ kopk ja tyʉjk, mduknigáxʉdʉ Dioskajxy.
\p
\v 23 Wa'anʉ Nindsʉn'a̱jtʉm Jesukristʉ mgunu'xʉdʉ nidʉgekyʉ miidsʉty.