\id 1TH

\h 1 TESALÓNIKɄ
\mt Myʉtu'ukpʉ Neky Di'ibʉ Pa̱a̱blʉ Tyuknigajxtʉ Ja Tesalónikʉ Ja̱'a̱yʉty
\c 1
\s Tesalónikʉ ja̱'a̱y tnastúnʉdʉ wi'ixʉ Dios yajmʉbéky
\p
\v 1 Ʉj Pa̱a̱blʉ, mʉt ja Silvanʉ esʉ Timotee, nduknigajxtʉptsʉ tya̱dʉ neky ja mʉbʉjkpʉtʉjk di'ibʉ ijttʉp ti'igyʉ mʉt ja Dios Teety esʉ Nindsʉn'a̱jtʉm Jesukristʉ, es ñaymyúkʉdʉ ma̱ ja Tesalónikʉ ka̱jpn. Wa'an ja Dios mgunu'xʉdʉ es mmo'oyʉdʉ ja agujk'a̱jt jotkujk'a̱jtʉn.
\p
\v 2 Dʉ'ʉñʉmts nja̱'a̱ygyʉda'aky ja Dios mʉt miidsʉty, es njamyajtstʉp kots nga̱jxta̱'a̱ktʉ.
\v 3 Es ndukjamyejtsypyʉdsʉ nDios Teety'a̱jtʉm wyindum wi'ix miits xymyʉdattʉ ja mʉbʉjkʉn, éxtʉm miits mdundʉ mʉt ja tsojkʉn, es éxtʉm miits dʉ'ʉñʉm 'yawix xyjʉjp'íxtʉ Nindsʉn'a̱jtʉm Jesukristʉ ko jyʉmbita̱'a̱ñ.
\v 4 Mʉgu'ugítʉty, Dios mdsojkʉdʉp miits, es nnija̱'a̱bʉts ko yʉ'ʉ tʉ mwin'íxʉdʉ.
\v 5 Kots miidsʉty oj n'awánʉdʉ ja oybyʉ ayuk, kyaj jye'eyʉty ja ayuk ngajxyʉts, ja Espíritʉ Sántʉts xypyudʉjkʉ es nga̱jxʉdʉts mʉk'a̱jtʉn mʉʉt, es ja'agyʉjxm kots ʉj nnija̱wʉ ko tyʉy'a̱jtʉnʉdyʉ tya̱dʉ ayuk. Wa̱'a̱ts xyñijáwʉdʉ wi'ixʉts oj nja̱'a̱y'áty ma̱ miidsʉty, es xytyuk'oybyʉdsʉ́mʉt.
\p
\v 6 Mbaduundʉ miidsʉty di'ibʉ ʉʉdsʉty es ja Nindsʉn'a̱jtʉm tʉ nnastúnʉdʉts, es m'axá̱jʉdʉ ja ayuk mʉt tu'ugʉ xondakʉn di'ibʉ ja Espíritʉ Santʉ mmooyʉ, oy xyajna̱jxtʉ byeen ja ayo'on.
\v 7 Es mʉdʉ tya̱a̱dʉ xya̱jktʉ ja ijxwʉ'ʉmʉn ma̱ nidʉgekyʉ yʉ Diosʉ myʉbʉjkpʉty jam Masedoñʉ es Akayʉ.
\v 8 Mʉt ko ma̱ miidsʉty tsyo'oñ ja Nindsʉn'a̱jtʉm ja 'yayuk es tʉ yajka̱jxwa'xy kyaj jye'eyʉty Masedoñʉ es Akayʉ, per nandʉ'ʉn oytyim ma̱a̱ty yajnijáwʉ wi'ix miits xymyʉbʉktʉ ja Dios, es mʉdʉ tya̱a̱dʉ kyaj ñakypyaadyʉty nga̱jxtʉdʉts tii.
\v 9 Nik yʉ'ʉ kʉ'ʉmʉty tmadya̱'a̱ktʉ wi'ix ko oj ngu'ixtʉ, miits xy'axá̱jʉdʉts yajxón es wi'ix tʉ xymyastu'uttʉ ja agojwinnáx es xypyanʉjxtʉ es xymyʉduundsondáknʉdʉ ja jiikypyʉ Dios.
\v 10 Tyukmʉmadyaktʉ nandʉ'ʉn ko miidsʉty m'awijx mjʉjp'ijxtʉp ko kyʉda̱'a̱gʉt tsa̱jpótm ja Diosʉ 'yU'unk, ja Nindsʉn'a̱jtʉm Jesús di'ibʉ Dios yajjikypyʉjk ma̱ 'ye'ky. Yʉ'ʉ dʉ'ʉn di'ibʉ xyajnitsókʉm ma̱ ja mʉj tʉydyu'unʉn di'ibʉ miimp.
\c 2
\s Pa̱a̱blʉ tyuunk jap Tesalónikʉ
\p
\v 1 Pes miidsʉty kʉ'ʉm mnija̱'a̱dʉp mʉgu'ugítʉty, ko éxtʉmts miits oj ngu'ixtʉ, kyajts nanʉgoobʉ ngu'ixtʉ.
\v 2 Oyʉts naty wi'ix tʉ nyajtúñ es tʉ nyajwinga̱jxpétyʉty jam Filipʉs, éxtʉm xyñijáwʉdʉ, perʉ Dios tʉts xypyudʉkʉ esʉts nga̱jxwa̱'xʉt amumdu'uk jot yʉ oybyʉ ayuk ma̱ miidsʉty, oy jyakʉxe'eky ja adsijpʉ.
\v 3 Mʉt ko ni wi'ix tsoots nga''anʉguga̱'a̱jʉ ma̱ di'ibʉdsʉ naty nga̱jxwa'xypy, ni ngamadya'agyʉdsʉ natyʉ axʉk kajxy es ni ngawin'ʉʉna̱'a̱ñʉts pʉ́n.
\v 4 Ni'igʉdsʉ Dios xywyinma̱'a̱ñ'ijxy es xytyuknipejkyʉts ja oybyʉ ayuk. Ʉj kyajts ngajxy wi'ixʉ ja̱'a̱yʉts xy'oyjyáwʉt, Diosʉ dʉ'ʉn sitʉy, di'ibʉ tyuk'ijxʉdyaapy ja njot'a̱jt nwinma̱'a̱ñ'a̱jtʉm.
\v 5 Extʉm miits xyñijáwʉdʉ, ni na̱'a̱ts pʉ́n ngawinwepy ngawinja̱a̱xy mʉt ja tsujti'knʉbʉ ayuk, es ni tits ngatuk'ʉbety ngatukka̱jxpéty mʉt kots nganarata̱'a̱ñ ja meeñ. Diosʉ tya̱a̱dʉ ñija̱'a̱p.
\v 6 Kyajts ni na̱'a̱ nga'ʉxta̱'a̱ydyʉ ja̱'a̱yʉty esʉts xymyʉjjáwʉt, oy tyimmiits'a̱jtpʉ es oytyim wiingaty'a̱jtpʉ.
\v 7 Oyʉts mba̱a̱t njanaybyʉjta'agyʉdyʉts éxtʉmʉ kutujkʉn mʉʉtpʉ, mʉt kots xy'apostʉlʉ'attʉ ja Kristʉ, kyajts ʉj dʉ'ʉn nduuñ. Naybyʉjtákʉts tuda'aky éxtʉm tu'ugʉ u'unkta̱a̱k t'ijx'íty tkwentʉ'aty ja 'yu'unk jantsy tsuj.
\v 8 Byeenʉts miits ndsoktʉ, ja'agyʉjxmʉts ʉj nnayjya̱'a̱jʉ es kyaj jye'eyʉty nduknijáwʉdʉt ja oybyʉ ayuk, es extʉ nandʉ'ʉn es miits ngu'oogʉdʉt.
\v 9 Mʉgu'ugítʉty, miits mjamyajtstʉp wi'ixʉts tʉ ndundʉ xʉʉñ koots es kʉdiibʉ miits n'adsíptʉt ma̱ naty jam nduknijáwʉdʉ ja oybyʉ ayuk di'ibʉ Dios kyajx.
\p
\v 10 Miits mnija̱'a̱dʉp, es nandʉ'ʉn ja Dios, wi'ix ʉʉdsʉty dyajnʉjxtʉ tu'ugʉ jiky'a̱jtʉnʉ wa̱'a̱tspʉ, tuda'akypyʉ es ni pʉ́n mba̱a̱t xykyapeky'íxyʉty kots n'ijttʉ ma̱ miidsʉty di'ibʉ nandʉ'ʉn myʉbʉjktʉp ja Dios.
\v 11 Nandʉ'ʉn xyñijáwʉdʉ wi'ix tʉ nya'it nyajxóndʉ es wi'ix tʉ nbumay nbutá̱jʉdʉ nidu'uk nidu'uk miidsʉty, dʉ'ʉn éxtʉm ttuñ ja u'unkteety mʉt ja 'yu'unk 'yʉna̱'k.
\v 12 Pes tʉ nyajxonda̱'a̱ktʉ es tʉ nyajjotkujk'áttʉ, es extʉ tʉ nduknipʉktʉ es mjiky'áttʉt éxtʉm pyaadyʉty pʉ́nʉty ja'a'a̱jtʉdʉp ja Dios, di'ibʉ mwoojʉdʉp es nʉjx mʉʉt m'ittʉ ma̱ yajkutíky mʉt ja mʉj'a̱jtʉn.
\p
\v 13 Pa̱a̱ty nja̱'a̱ygyʉdaktiibyʉts ja Dios ko miits xymyʉdoodʉ ja Diosʉ 'yayuk di'ibʉts oj nga̱jxwa'xy, m'axá̱jʉdʉ éxtʉm ja Diosʉ 'yayuk, es kyaj xy'axá̱jʉdʉ éxtʉmʉ ja̱'a̱yʉ 'yayuk. Es tʉy'a̱jtʉnʉ'ʉ ko Dios t'ayúkʉty di'ibʉ mʉjwiinʉp ma̱ miidsʉty di'ibáty myʉbʉjktʉp.
\v 14 Mʉgu'ugítʉty, ko miits m'ayoodʉ ma̱ mbajʉdijtʉdʉ mmʉguga̱jpnʉty, nandʉ'ʉn mja̱jttʉ éxtʉm jya̱jttʉ jam Judeeʉ ja Diosʉ jya'ay di'ibʉ ijttʉp ti'igyʉ mʉdʉ Jesukristʉ. Pes yʉ'ʉjʉty nandʉ'ʉn pajʉdijtʉdʉ myʉguga̱jpnʉty, ja israelítʉty.
\v 15 Tya̱dʉ israelítʉty yʉ'ʉ ya'o'ktʉ nandʉ'ʉnʉ Nindsʉn'a̱jtʉm Jesús, éxtʉmʉ naty nandʉ'ʉn tʉ dya'ooktʉ ja myʉguga̱jpn di'ibʉ Dioskuga̱jxpʉ'a̱jttʉ, es nandʉ'ʉnʉts ʉʉdsʉty ojts xy'ʉxkaxtʉ. Kyaj jyiky'attʉ éxtʉm ja Dios ttseky, es aknaymyʉdsip'a̱jtʉdʉp mʉt nidʉgekyʉ ja̱'a̱yʉty,
\v 16 pes extʉ jyayajkubokándʉ kots nga̱jxwa'xy ja Diosʉ 'yayuk ma̱ di'ibʉ kyaj 'yisraelítʉty, es nandʉ'ʉn ñitso'oktʉt. Es mʉt yʉ'ʉ t'aktim'yaj'ya'k'adʉ'tsypy ni'igʉ ja pyojpʉty. Pa̱a̱ty óknʉm ja Dios myo'oya̱'a̱nʉdʉ ja mʉk tʉydyu'unʉn di'ibʉ miimp ma̱ yʉ'ʉjʉty.
\s Pa̱a̱blʉ jyanʉjxa̱'a̱ñ Tesalónikʉ
\p
\v 17 Mʉgu'ugítʉty, kots miits nmastuttʉ waanʉ, oy nganay'ijxʉm, dʉ'ʉñʉmts miits nmʉdattʉ njodoty nwinma̱'a̱ñótyʉts, es byeenʉts njajʉmbita̱'a̱ñ es nʉjx nwin'ixtʉ.
\v 18 Ʉj Pa̱a̱blʉ, tʉts njanʉjxa̱'a̱ñ kana̱k ok, per ja mʉjku'ugópk Satanás yʉ'ʉts oj xya''adiky.
\v 19 Pes ¿tits ʉj n'awijx njʉjp'ijxtʉp?, ¿tits ʉj n'ijtʉn'a̱jt nxo'onʉn'a̱jttʉp?, ¿tits ʉj ndukjotkujk'a̱jttʉp?, es ¿tits ʉj ndukwingʉdak ndukjotkʉdáktʉp ko naty n'ijtʉm ma̱ ja Nindsʉn'a̱jtʉm Jesukristʉ ko myínʉt? Pes miidsʉdyʉ dʉ'ʉn.
\v 20 Miitskyʉjxmʉty nwingʉda'aky njotkʉda'aky es nxonda'agyʉts.
\c 3
\p
\v 1 Pes kom kyajtsʉ naty n'okmʉmada̱'a̱gánnʉ, nétʉts nnaygya̱jxʉdʉ esʉts nwʉ'ʉmdʉdʉts Atenʉs,
\v 2 es ngaxa̱'a̱ñʉts ja nmʉgu'uk'a̱jtʉm Timotee es mgu'íxʉdʉt, mʉt ko yʉ'ʉ dʉ'ʉn nandʉ'ʉn Dios mʉduumbʉ es tʉ tyuñ mʉt ʉj es wya̱'xʉt ja oybyʉ ayuk di'ibʉ Jesukristʉ ñimadyakypy. Es ngejxypyʉts yʉ'ʉ es dyajmʉjwiinʉt ja mmʉbʉjkʉnʉty es mjotmʉkmo'oyʉdʉt mmʉbʉjkʉngyʉjxm,
\v 3 kʉdiibʉ ni pʉ́n kyatsipka'axʉt mʉdʉ tya̱a̱dʉ. Pes miits mnija̱'a̱dʉp ko tʉ nyajtuknibʉjtákʉm es n'ayowa̱'a̱nʉm.
\v 4 Pes ma̱ts n'ijty mʉt miidsʉty, n'anma̱a̱ydyʉ ko nyajnaxa̱'a̱nʉm ja ayo'on jotmay, dʉ'ʉn éxtʉm tʉ jyaty. Mnija̱'a̱dʉbʉ'ʉ.
\v 5 Pa̱a̱ty kom kyajtsʉ naty ʉj n'okmʉdanʉyannʉ, tats ngejxy ja Timotee es tnijáwʉt wi'ixʉ naty xyajtu'uyo'oydyʉ ja mmʉbʉjkʉn, pes tsʉ'kʉbʉ naty ko wa'anxyʉp ja ka'oybyʉ tʉ myajpekykya̱'a̱dʉ es ni ti tkatsooty di'ibʉts nduun ma̱ miidsʉty.
\p
\v 6 Per tyam tʉ jya'ty ja Timotee ko tʉ tsyooñ ma̱ miidsʉty, es yajmiimpy ja oybyʉ ayuk mʉt ja mmʉbʉjkʉn es ja mdsojkʉn di'ibʉ miits mmʉda̱jttʉp. Dʉ'ʉn jyʉna'añ ko miits dʉ'ʉñʉm xyjamyátstʉts mʉt ja tsojkʉn, es byeenʉts xyjawin'ixa̱'a̱ndʉ, dʉ'ʉn éxtʉmts miits nwin'ixa̱'a̱ndʉ.
\v 7 Pa̱a̱ty mʉgu'ugítʉty, oy nja''ayo'ombát njajotmaybyátpʉts, tʉts nbeky ja jotkujk'a̱jtʉn mʉt yʉ'ʉgyʉjxmʉ mmʉbʉjkʉnʉty.
\v 8 Mʉt ʉʉdsʉty dʉ'ʉn éxtʉmʉ jembyʉ jiky'a̱jtʉn kots nnijáwʉdʉ ko miits amumdu'uk m'ittʉ ma̱ yʉ Nindsʉn'a̱jtʉm.
\v 9 Pes ¿wi'ix mba̱a̱t mʉj wiin kajaa nja̱'a̱ygyʉda'agyʉts ja Dios mʉt miidsʉty, es mʉt ja mʉj xondakʉn esʉ jotkujk'a̱jtʉn di'ibʉts tʉ xymyo'oy Dios windum?
\v 10 Xʉʉñ koots n'amdóyʉts ja Dios es nʉjx ngu'ixtʉ es n'aktuk'ʉxpʉ́ktʉt ni'igʉ di'ibʉ kyajnʉm oy xyjaygyúkʉdʉ.
\p
\v 11 Wa'an ja Dios Teety kʉ'ʉm, esʉ Nindsʉn'a̱jtʉm Jesukristʉ, dya''awa̱'a̱tsy ja nʉ'ʉ tu'u es nʉjx ngu'ixtʉ.
\v 12 Wa'anʉ Nindsʉn'a̱jtʉm dyajmʉj dyajmáyʉ yʉ mdsojkʉn waanʉ ni'igʉ es mnaydsyókʉdʉt nixim niyam es mʉt oytyim pʉ́nʉty, dʉ'ʉn éxtʉmts miits ndsoktʉ.
\v 13 Wa'anʉ mjot mwinma̱'a̱ñ yajmo'oy ja jotmʉk'a̱jtʉn es m'íttʉt wa̱'a̱ts, es ni ti mbojpʉ jam nDios Teety'a̱jtʉm wyindum ko myínʉt ja Nindsʉn'a̱jtʉm Jesukristʉ mʉt nidʉgekyʉ di'ibʉ Dios jya'a'a̱jttʉp. Wa'an dʉ'ʉnʉty.
\c 4
\s Jiky'a̱jtʉn di'ibʉ Dios tyukjotkʉdakypy
\p
\v 1 Mʉgu'ugítʉty, ma̱a̱nʉm kyakejxyñʉm n'ak'awanʉyándʉp nandʉ'ʉnʉ wiingátypyʉ. Ko oj ngu'ixtʉ, nga̱jxwijtʉ wi'ix miits mjiky'áttʉt éxtʉm ja Dios ttseky, es tyámʉts n'amdoy es waanʉ ni'igʉ dʉ'ʉn m'akjiky'áttʉt.
\v 2 Mʉt ko miits mnija̱'a̱dʉp yajxón ko yʉ'ʉyʉts ʉj tʉ nya'ʉxpeky di'ibʉdsʉ Nindsʉn'a̱jtʉm Jesukristʉ tʉ xytyuknipeky.
\v 3 Pes ja Dios tsyejpy es miits nidu'uk nidu'uk mnayya'ítʉdʉt wa̱'a̱ts; kyaj pʉ́n myʉ'indúnʉt.
\v 4 Nidu'uk nidu'ugʉty miits xyjáttʉt wi'ix xyjʉjwijtsʉmbíttʉt ja mgʉ'ʉm nini'x es mnayya'ítʉdʉt wa̱'a̱ts es windsʉ'kʉn mʉʉt,
\v 5 kyaj pʉ́n ñayyákʉdʉt ja ñini'x tsyojkʉngyʉjxm, éxtʉm ttundʉ yʉ ja̱'a̱yʉty di'ibʉ kyaj t'ix'attʉ ja Dios.
\v 6 Exkʉm miits nidu'uk mwin'ʉʉndʉ o mbekytyundʉ mʉt ja mmʉgu'ugʉ ñʉdo'oxy. Tʉts miits n'anʉʉmʉdʉ es tʉ n'awánʉdʉ ko Dios tyʉydyunaampy jantsy mʉk tsa̱a̱tsy tʉgekyʉ di'ibʉ dʉ'ʉn adʉ́tstʉp.
\v 7 Pes Dios tʉ xywyo'om es xyja'ay'ata̱'a̱nʉm es njiky'a̱jtʉm tu'ugʉ jiky'a̱jtʉnʉ wa̱'a̱tspʉ; kyaj tʉ xywyo'om es njiky'a̱jtʉm ja jiky'a̱jtʉnʉ axʉʉkpʉ.
\v 8 Pa̱a̱ty pʉn ja pʉ́n di'ibʉ kyaj tmʉj'íxyʉ tya̱dʉ ʉxpʉjkʉn, kyaj yʉ'ʉjʉty t'ʉxtijy ja naxwíñʉdʉ ja̱'a̱y, ja'a dʉ'ʉn ja Dios, di'ibʉ tʉ mmo'oyʉdʉ ja 'yEspíritʉ Santʉ.
\p
\v 9 Es éxtʉm ja tsojkʉn tukka'axpʉn, kyaj jyatyimtsékyʉty nnijáyʉdʉt, mʉt ko ja Dios tʉ mduknijáwʉdʉ miidsʉty kʉ'ʉm es mnaydsyókʉdʉt nixim niyam.
\v 10 Pes dʉ'ʉñʉm miits mnaydsyókʉdʉ nixim niyam mʉt nidʉgekyʉ nmʉgu'uk'a̱jtʉm di'ibʉ jiky'a̱jttʉp ma̱ tʉgekyʉ Masedoñʉ ñax. Per nmʉnu'xtáktʉp, mʉgu'ugítʉty, esʉ mdsojkʉn xyajmʉjwindak'adʉ'ʉdsʉt waanʉ ni'igʉ.
\v 11 Jiky'attʉ yajxón es xywyits xymyáydyʉt ja mgʉ'ʉmduunk mʉt ja m'a̱a̱ mgʉ'ʉ, éxtʉm tʉ nduk'ana'amdʉ,
\v 12 es dʉ'ʉn mwindsʉ'ʉgʉdʉt di'ibʉ kyaj Dios tmʉbʉktʉ, es kʉdiibʉ nandʉ'ʉn ti mdʉgoy'a̱jtxʉdʉt.
\s Wi'ixʉ Nindsʉn'a̱jtʉm jatʉgok myina̱'a̱ñ
\p
\v 13 Mʉgu'ugítʉty, kyajts ndseky es kyaj xyñijáwʉdʉt wi'ix jyaty mʉt ja di'ibʉ myʉbʉjktʉbʉ naty ja Jesukristʉ ko 'yo'ktʉ, kʉdiibʉ miits mjotmay'ooktʉt éxtʉmʉ wiingátypyʉ di'ibʉ kyaj tjʉjp'íxtʉ ko Jesukristʉ yajjikypyʉkaampy di'ibáty jya'a'a̱jttʉp.
\v 14 Nmʉbʉjkʉm yajxón ko dʉ'ʉn éxtʉmʉ Jesukristʉ jyikypyejky ma̱ 'ye'ky, nandʉ'ʉn nmʉbʉjkʉm ko Dios yajjikypyʉkaampy ja o'kpʉty di'ibáty tʉ tmʉbʉktʉ ja Jesús.
\p
\v 15 Dʉ'ʉnʉts miits n'awánʉdʉ éxtʉmʉ Nindsʉn'a̱jtʉm kʉ'ʉm jyʉnáñ, ko di'ibáty ʉdsa̱jtʉm akjiky'a̱jtʉm ko jya̱'tʉt jatʉgokʉ Nindsʉn'a̱jtʉm, kyaj ʉdsa̱jtʉm njo'omʉm jawyiin es óknʉm ja o'kpʉty.
\v 16 Mʉt ko yʉ Nindsʉn'a̱jtʉm Jesukristʉ kʉ'ʉm kʉda̱'a̱ga̱a̱mp tsa̱jpótm, yajmʉdówʉp ko tu'uk mʉk kya̱jxa̱'a̱ñ mʉt ja kutujkʉn, ka̱jxʉp ja arkanklʉs es xu'uxʉp ja Diosʉ tyrompetʉ, net ja di'ibáty myʉbʉjktʉ ja Kristʉ ko 'yo'ktʉ, jikypyʉ́ktʉp jawyiin;
\v 17 óknʉm di'ibáty tʉ nwʉ'ʉmʉm jiky'a̱jtpʉ nyajmʉjo'omʉm ti'igyʉ mʉt yʉ'ʉjʉty yoodsóty, es nbátʉm ja Nindsʉn'a̱jtʉm pojoty, es dʉ'ʉn n'ijtʉm mʉt ja Nindsʉn'a̱jtʉm winʉ xʉʉ winʉ tiempʉ.
\v 18 Pa̱a̱ty mʉdʉ tya̱dʉ ayuk nayyajjotkujkʉdʉ nixim niyam.
\c 5
\p
\v 1 Mʉgu'ugítʉty, mʉt ja xʉʉ tiempʉ, kyaj jyatyimtsékyʉty es nduknijáyʉt.
\v 2 Miidsʉty yajxón xyñijáwʉdʉ ko ja xʉʉ tiempʉ ma̱ myina̱'a̱ñ ja Nindsʉn'a̱jtʉm, jaa ma̱ naty nga'a̱a̱'a̱jt ngajot'a̱jtʉm, éxtʉm ko ja ma'tspʉ koots jya'ty.
\v 3 Pes ko ja̱'a̱y ñayjyʉnánʉbʉdʉ: “Tyam sitʉy agujk jotkujk ndsʉna̱'a̱yʉm, kyaj ti amay jotmay”, net ti'in myiñ ma̱ yʉ'ʉjʉty ja kutʉgo'oyʉn, éxtʉm dyajnáxtʉ ja pʉjk ado'onʉnʉ toxytyʉjkʉty ko ja 'yu'ungu'unk ttimpa̱a̱dánnʉ, ma̱ ni wi'ix tsoo mba̱a̱t kyanitse'eky.
\v 4 Per miits mʉgu'ugítʉty, kyaj m'ittʉ kubi'its ku'ook, kyaj ja Nindsʉn'a̱jtʉm mdukja̱jtpátʉdʉt ti'in éxtʉm ja ma'tspʉn, ja'a ko mnija̱'a̱dʉp wi'ixʉ dʉ'ʉn myina̱'a̱ñ jya̱'ta̱'a̱ñ.
\v 5 Nidʉgékyʉty miits mja'a'átʉdʉ Dios esʉ Jesukristʉ, kyaj mja'a'átyʉty ja ka'oybyʉ.
\v 6 Pa̱a̱ty kyaj n'ijtʉm éxtʉm pʉ́nʉty ma̱a̱dʉgooydyʉp, n'ok'ijtʉm wijy kejy es nnayjyʉjkuwijtsʉm.
\v 7 Pʉ́nʉty ma̱a̱dʉp, koodsʉ mya̱'a̱dʉ; es pʉ́nʉty uk múkʉdʉp, koodsʉ y'uuk myu'ugʉdʉ,
\v 8 per ʉdsa̱jtʉm pʉ́nʉty xʉʉñ'át ja'a'a̱jttʉp, wijy kejy nnayya'ijtʉm. Dʉ'ʉn n'ijtʉm éxtʉmʉ solda̱a̱dʉ di'ibʉ nayxyojxʉp mʉt ja pujxnga̱a̱tsy, naygywentʉ'a̱jtʉm mʉt ja mʉbʉjkʉn es ja naydsyokʉ naymyay'at; es extʉmʉ solda̱a̱dʉ ñaygyípyʉty mʉdʉ pujxngúp, nandʉ'ʉn nnayya'ijtʉm ja'agyʉjxm ko n'awijxʉm ja nnitsokʉn'a̱jtʉm.
\v 9 Dios kyaj oj xywyin'ijxʉm es n'axá̱jʉm ja tʉydyu'unʉn, ja'a dʉ'ʉn es n'axá̱jʉm ja nitsokʉn mʉt yʉ'ʉgyʉjxmʉ Nindsʉn'a̱jtʉm Jesukristʉ.
\v 10 Yʉ'ʉ 'ye'ky mʉt ʉdsa̱jtʉmgyʉjxm es njiky'ata̱'a̱nʉm mʉt yʉ'ʉ, oy nja'o'kʉmbʉ es oy njiky'a̱jtʉmbʉ.
\v 11 Pa̱a̱ty nayyajkujkʉdʉ, es naybyudʉ́kʉdʉ nixim niyam es yajmʉjwiin yajkajaajʉdʉ ja mmʉbʉjkʉnʉty, dʉ'ʉn éxtʉm jaayʉm xytyundʉ.
\s Ka̱jxwíjʉn
\p
\v 12 Mʉgu'ugítʉty, nduknipʉjktʉp es xymyay'at xywyindsʉ'ʉgʉdʉt ja di'ibáty tuundʉp mʉt miidsʉty, es m'ʉwij mga̱jxwíjʉdʉ ma̱ yʉ Nindsʉn'a̱jtʉmʉ tyuunk.
\v 13 Oy tsuj xytyukxonda̱'a̱ktʉt es xytsyóktʉt ja'agyʉjxm di'ibʉ tyuundʉp. Jiky'attʉ ti'igyʉ jotkujk mʉt oytyim pʉ́nʉty.
\p
\v 14 Nandʉ'ʉn nduknipʉktʉ, mʉgu'ugítʉty, es tukmʉdíjʉdʉ ja di'ibáty kyaj ti ttuna̱'a̱ñ. Jotmʉk winga̱jxʉdʉ di'ibáty ma̱a̱y ta̱jtʉp, pudʉ́kʉdʉ di'ibáty kyaj oy tnijáwʉdʉ ja Diosʉ 'yayuk, es mʉdattʉ ma'xtujkʉn mʉt nidʉgekyʉ ja̱'a̱y.
\p
\v 15 Exkʉm miidsʉty nidu'uk myajjʉmbít axʉʉk mʉt ja di'ibáty axʉʉk mduunʉdʉp. Ni'igʉ dʉ'ʉñʉm xyjáttʉt xytyúndʉt ja oybyʉ nixim niyam ma̱ miidsʉty, es oytyim pʉ́nʉty mʉʉt.
\p
\v 16 Dʉ'ʉñʉm m'íttʉt agujk jotkujk.
\v 17 Ka̱jxtaktʉ́wdʉ.
\v 18 Ja̱'a̱ygyʉda̱'a̱ktʉ ja Dios oywyi'ix mjat mgʉbáttʉt, mʉt ko tya̱a̱dʉ dʉ'ʉn ja Dios tsyejpy es mdúndʉt éxtʉmʉ Jesukristʉ myʉduumbʉty.
\p
\v 19 Kyaj miits xyjʉjpkuwa̱'a̱gʉdʉt di'ibʉ Espíritʉ Santʉ mduknija̱'a̱dʉp, es dʉ'ʉn kyaj juun jyʉmbíttʉt ja mwinma̱'a̱ñʉty.
\v 20 Kyaj xy'axʉkjáwʉdʉt ko ja̱'a̱y m'awa̱'a̱nxʉdʉ ja ayuk di'ibʉ Dios winma̱'a̱ñmyooyʉdʉ.
\v 21 Ijxkijxyʉdʉ tʉgekyʉ ja ʉxpʉjkʉn mʉt ja Diosʉ jyaaybyajtʉn. Axá̱jʉdʉ je'eyʉ di'ibʉ dʉn oy.
\v 22 Ʉxtijtʉ tʉgekyʉ di'ibʉ kyaj 'yóyʉty.
\p
\v 23 Wa'an ja Dios, di'ibʉ xymyo'oyʉm ja agujk'a̱jt jotkujk'a̱jtʉn, myajwatsta̱'a̱yʉty tʉgekyʉ tʉgekyʉ, es dya'ítʉt ja mjot, m'anmʉja̱'a̱n esʉ mnini'x mgʉba̱jk, ni ti pyojpʉ, extʉ ko myínʉt ja Nindsʉn'a̱jtʉm Jesukristʉ.
\v 24 Yʉ Dios di'ibʉ mwoojʉdʉp, kyuydyiimpy di'ibʉ kyajxypy, ja'a kyuydyunaampy tʉgekyʉ tya̱a̱dʉ.
\s Ka̱jxpo'xʉn
\p
\v 25 Mʉgu'ugítʉty, xyñiga̱jxta̱'a̱gʉdʉts ʉʉdsʉty.
\p
\v 26 Mʉnandʉ nidʉgekyʉ nmʉgu'uk'a̱jtʉm éxtʉmxyʉp xymyo'oydyʉ ja mayDios.
\p
\v 27 Nduk'ana'amdʉp mʉt ja Nindsʉn'a̱jtʉmʉ kyutujkʉn, es yajtukwinguga̱jxʉdʉt tya̱dʉ neky nidʉgekyʉ ja nmʉgu'uk'a̱jtʉm.
\p
\v 28 Wa'anʉ Nindsʉn'a̱jtʉm Jesukristʉ mmay'at mgunu'xʉdʉ.