\id 2TH

\h 2 TESALÓNIKɄ
\mt Myʉmajtskpʉ Neky Di'ibʉ Pa̱a̱blʉ Tyuknigajxtʉ Ja Tesalónikʉ Ja̱'a̱yʉty
\c 1
\p
\v 1 Ʉj Pa̱a̱blʉ, mʉt ja Silvanʉ esʉ Timotee. Nduknigajxtʉptsʉ tya̱dʉ neky ja mʉbʉjkpʉtʉjk di'ibʉ ijttʉp ti'igyʉ mʉt ja Nindsʉn'a̱jtʉm Dios Teety esʉ Nindsʉn'a̱jtʉm Jesukristʉ, es ñaymyúkʉdʉ ma̱ Tesalónikʉ ka̱jpn.
\v 2 Wa'anʉ nDios Teety'a̱jtʉm esʉ Nindsʉn'a̱jtʉm Jesukristʉ mgunu'xʉdʉ es mmo'oyʉdʉt ja agujk'a̱jt jotkujk'a̱jtʉn.
\s Yajpayo'oyʉp ja ja̱'a̱y ko Kristʉ myina̱'a̱ñ
\p
\v 3 Mʉgu'ugítʉty, oy ko dʉ'ʉñʉmts nja̱'a̱ygyʉda'aky ja Dios mʉt miidsʉty, éxtʉm pyaadyʉty, mʉt ko mʉj wiin kajaa yʉ mmʉbʉjkʉnʉty esʉ mdsojkʉnʉty di'ibʉ miits mmʉda̱jttʉp mʉt ja wiinkpʉty.
\v 4 Extʉm mba̱a̱t kots ʉʉdsʉty n'ity ma̱ Diosʉ myʉbʉjkpʉtʉjk ñaymyúkʉdʉ, nayjya̱'a̱dʉpts mʉj es jotkujk mʉt ja ma'xtujkʉn es ja mʉbʉjkʉn di'ibʉ miits mya'ijxʉdʉp, oy ja mmʉdsípʉty mja''awa̱'ktujkʉbʉdʉ es ja ayo'on jotmay xyajnáxtʉ.
\v 5 Tya̱a̱dʉ ya'ijxʉp ko Dios tmʉdaty ja tʉy'a̱jtʉn éxtʉm tpayo'oy es dʉ'ʉn mba̱a̱dyʉty es m'íttʉt ma̱ kyutujkʉn, di'ibʉ miidsʉty tyam mgu'ayo'odʉp.
\p
\v 6 Pes tʉy'a̱jtʉn di'ibʉ Dios tyiimpy; ya''ayówʉp di'ibʉ miits mya''ayoojʉdʉp,
\v 7 es mmo'oya̱'a̱nʉdʉ ja mbo'xtáknʉty miidsʉty di'ibʉ ayo'on jotmay yajna̱jxtʉp, nandʉ'ʉn éxtʉm ʉʉdsʉty. Tya̱a̱dʉ dʉ'ʉn ja xʉʉ ma̱ kyʉxʉ'ʉga̱'a̱ñ ja Nindsʉn'a̱jtʉm Jesukristʉ ko kyʉda̱'a̱gʉt tsa̱jpótm jʉnya'angóty mʉt ja mʉkpʉ 'yánklʉsʉty.
\v 8 Tyʉydyunaampy ja di'ibʉ kyaj t'ix'attʉ ja Dios es ni tkatundʉ kwentʉ ja oybyʉ ayuk di'ibʉ ñimadyakypy ja Nindsʉn'a̱jtʉm Jesukristʉ.
\v 9 Tya̱a̱dʉty yajtukkumʉdowándʉp winʉ xʉʉ winʉ tiempʉ es yajpʉjta̱'a̱gʉt jagam, kʉdiibʉ jam 'yíttʉt ma̱ Nindsʉn'a̱jtʉm es ma̱ ja myʉj'a̱jtʉn esʉ myʉk'a̱jtʉn.
\v 10 Dʉ'ʉn jyátʉt ko myínʉt ja Nindsʉn'a̱jtʉm ma̱ tadʉ xʉʉ, es wyindsʉ'ʉgʉdʉt ja jya'ayʉty es myʉj'íxʉdʉt nidʉgekyʉ ja myʉbʉjkpʉty. Jam miidsʉty nandʉ'ʉn m'íttʉt mʉt ko tʉ xymyʉbʉktʉ ja tʉy'a̱jtʉn di'ibʉ tʉ nduk'ʉxpʉktʉ.
\p
\v 11 Pa̱a̱dyʉts dʉ'ʉñʉm nga̱jxta'aky mʉt miitskyʉjxmʉty, n'amdeepy nbʉjktseebyʉts ja Dios es mduknitʉ́kʉdʉt es mja̱'a̱y'átʉdʉt. Nandʉ'ʉnʉts nga̱jxta'aky esʉ Dios myʉk'a̱jtʉngyʉjxm kyuydyúnʉp tʉgekyʉ di'ibʉ oybyʉ mdunándʉp ja'agyʉjxm ko xymyʉbʉktʉ,
\v 12 es dʉ'ʉn ja Nindsʉn'a̱jtʉm Jesukristʉ yajmʉjjáwʉp mʉt yʉ'ʉgyʉjxmʉ m'oyjyiky'a̱jtʉn, es yʉ'ʉ nandʉ'ʉn mmo'oyʉdʉp es miits myajmʉjjáwʉdʉt ma̱ wiink ja̱'a̱yʉty.
\c 2
\s Mʉj tʉgoybyekyjya'ay
\p
\v 1 Mʉgu'ugítʉty, es wi'ix jyata̱'a̱ñ kyʉbata̱'a̱ñ ma̱ ja tiempʉ ko myínʉt ja Nindsʉn'a̱jtʉm Jesukristʉ es xyajnaymyuka̱'a̱nʉm mʉt yʉ'ʉ, n'andeebyʉts
\v 2 es kyaj pojʉn mwinma̱a̱ydyʉgátstʉt es katʉ mya''adsʉ'ʉgʉdʉ ja'agyʉjxm ko jamʉ ja̱'a̱y di'ibʉ jʉnándʉp ko tʉ jya'ty ja Nindsʉn'a̱jtʉm. Kyaj dʉ'ʉn xymyʉbʉ́ktʉt pʉn jyʉna̱'a̱ndʉ ko Dios tyuknija̱'a̱jʉ, o jʉnándʉp ko dʉ'ʉnʉts ʉj tʉ ngajxy o dʉ'ʉn tu'ugʉ neky jyʉna'añ di'ibʉtsk ʉj tʉ nja̱'a̱y.
\v 3 Katʉ mnayyákʉdʉ es wi'ix tsoo mwin'ʉʉnʉdʉt. Pes jawyiin ja ja̱'a̱y tnibʉdʉ'ʉga̱'a̱ndʉ Dios es nandʉ'ʉn kyʉxʉ'ʉgʉt ja mʉj tʉgoybyekyjya'ay di'ibʉ tʉ yajka̱jxpéky es kyutʉgóyʉt.
\v 4 Tya̱dʉ axʉk ja̱'a̱y naybyʉjtákʉp myʉdsip di'ibʉ ja ja'ayʉty myʉda̱jttʉp éxtʉmʉ dyiósʉty, es myʉdsip'a̱jtypy tʉgekyʉ di'ibʉ ja ja̱'a̱yʉty 'yawda̱jttʉp. Pes extʉ naxwa'tsp ma̱ Diosʉ tyʉjk, es jyʉna'añ ko yʉ'ʉ dʉ'ʉn Dios'a̱jtp.
\p
\v 5 Pes jamyatstʉ kots n'ijty mʉt miidsʉty, n'awa̱'a̱nʉdʉ ko dʉ'ʉn jyata̱'a̱ñ.
\v 6 Mnija̱'a̱dʉp tyam ti ya''adujkʉp, es dʉ'ʉn ñigʉxʉ'ʉgʉt pʉ́n ja'a ma̱ ja tiempʉ di'ibʉ ja Dios tʉ ttuknibʉjta̱a̱gʉ.
\v 7 Taa ja'anʉ ja axʉk'a̱jtʉn di'ibʉ tadʉ mʉj tʉgoybyekyjya'ay tyunaampy ayu'udsyʉ. Per di'ibʉ ya''adujkʉp tyam, óknʉm nʉjx jyʉge'eky.
\v 8 Es ko jyʉga'agʉt, net yajnijawʉya'añ pʉ́nʉ dʉ'ʉn ja mʉj tʉgoybyekyjya'ay, di'ibʉ Nindsʉn'a̱jtʉm Jesukristʉ ya'oogaampy ko ñibiixʉdʉt es dyajtʉgoya'añ mʉdʉ jya̱j tyʉ'xʉn ko naty myiñ.
\p
\v 9 Ko tadʉ mʉj tʉgoybyekyjya'ay myina̱'a̱ñ, pudʉ́kʉdʉp ja mʉjku'ugópk Satanás. Ni'igʉ mʉk'a̱jtʉn mʉʉt myina̱'a̱ñ es ttuna̱'a̱ñ oytyim di'ibʉty ja mʉk'a̱jtʉn, es andakʉngyʉjxm ttúnʉt ja mʉj'a̱jtʉn, ijxwʉ'ʉmʉn es di'ibʉ ja̱'a̱y dʉ'ʉñʉ yajwʉ'ʉmʉdyaaydyʉp.
\v 10 Es myʉbʉdsʉmaampy oytyim di'ibʉty ja pojpʉ 'yandakʉn es twin'ʉʉna̱'a̱ñ twinxa̱ja̱'a̱ñ di'ibáty nʉjxtʉp ayoodaknóty. Tya̱a̱dʉ nʉjxtʉp ayoodaknóty mʉt ko kyaj tʉ ttsoktʉ es t'axá̱jʉdʉt ja tʉy'a̱jtʉn di'ibʉxyʉp tʉ yajnitse'egyʉty.
\v 11 Ja'agyʉjxm ko tkamʉbʉktʉ ja tʉy'a̱jtʉn, pa̱a̱ty ja Dios tpʉjtáky wi'ix yajwin'ʉʉndʉt, es dʉ'ʉn tmʉbʉ́ktʉt ja andakʉn,
\v 12 es yajpekymyo'oydyʉt nidʉgekyʉ pʉ́nʉty kyaj tmʉbʉktʉ ja tʉy'a̱jtʉn, ja'a tsyojktʉp ja axʉʉkpʉ.
\s Ti'igyʉ ya'ittʉ ja mʉbʉjkʉn
\p
\v 13 Per oy ko ʉʉdsʉty dʉ'ʉñʉmts nja̱'a̱ygyʉda̱'a̱ktʉts ja Dios mʉt miitskyʉjxmʉty, mʉgu'ugítʉty, ko mdsojkʉdʉp ja Nindsʉn'a̱jtʉm, mʉt ko Dios mwin'ijxʉdʉ jawyíñʉp es mnitso'oktʉt mʉt yʉ'ʉgyʉjxm ja Espíritʉ Santʉ di'ibʉ mya'ijtʉdʉp wa̱'a̱ts, es ja'agyʉjxm ko tʉ xymyʉbʉktʉ ja tʉy'a̱jtʉn.
\v 14 Tya̱a̱dʉ dʉ'ʉn mdukniwoojʉdʉ Dios mʉt yʉ'ʉgyʉjxmʉ oybyʉ ayuk di'ibʉts ʉʉdsʉty nga̱jxwa̱'xtʉp, es xymyʉdáttʉt ja Nindsʉn'a̱jtʉm Jesukristʉ myʉj'a̱jtʉn.
\p
\v 15 Pes dʉ'ʉn mʉgu'ugítʉty, dʉ'ʉñʉm amumdu'uk jot xymyʉbʉ́ktʉt ja Kristʉ es katʉ xyja'aydyʉgóydyʉ ja ʉxpʉjkʉn di'ibʉ tʉ n'anʉʉmʉdʉ es tʉ nduknigaxtʉ nekykyʉjxy.
\v 16 Ja Nindsʉn'a̱jtʉm Jesukristʉ kʉ'ʉm, es ja nDios Teety'a̱jtʉm, di'ibʉ xytsyojkʉm es myay'a̱jtʉngyʉjxm tʉ xymyo'oyʉm ja jotkujk'a̱jtʉn winʉ xʉʉ winʉ tiempʉ es ja oybyʉ di'ibʉ n'awijxʉm,
\v 17 wa'an yʉ'ʉjʉty mjotmʉkmo'oyʉdʉ es mya'ítʉdʉt dʉ'ʉñʉm es xytyun xykya̱jxtʉt tʉgekyʉ di'ibʉ oy.
\c 3
\s Xyñiga̱jxta̱'a̱gʉdʉts ʉʉdsʉty
\p
\v 1 Mʉgu'ugítʉty, ma̱ kyajnʉmts nyajkugʉ́xʉ tya̱dʉ neky, n'ak'anʉʉmʉyándʉp es xyñiga̱jxta̱'a̱ktʉdʉts es dʉ'ʉn ja Nindsʉn'a̱jtʉm Jesukristʉ 'yʉxpʉjkʉn wya̱'xʉt pojʉn es ja ja̱'a̱yʉty t'axá̱jʉdʉt mʉt ja may'a̱jt windsʉ'kʉn, éxtʉm miits tʉ xy'axá̱jʉdʉ.
\v 2 Amdow pʉjktsówdʉ nandʉ'ʉn ja Dios es xyajtso'ogʉdʉts ma̱ ja axʉk ja̱'a̱yʉty, mʉt ko kyaj tyʉgékyʉty yʉ ja̱'a̱yʉty tmʉbʉktʉ Diosʉ 'yayuk.
\v 3 Per kyuydyiimpy ja Dios ja 'yayuk, yʉ'ʉ myajmʉjwiin myajkajaaxʉdʉp ja mmʉbʉjkʉn es m'agʉ'ʉdúk m'axa̱jtúkʉdʉp es myajtso'ogʉdʉp ma̱ ja ka'oybyʉ.
\v 4 Ndukmʉ'awda̱jtʉpts ja Nindsʉn'a̱jtʉm ko miits xytyúndʉt di'ibʉ nduk'ana'amdʉp, es dʉ'ʉñʉm xy'aktúndʉt.
\v 5 Wa'anʉ Nindsʉn'a̱jtʉm mbudʉ́kʉdʉ es xyjáwʉdʉt ja Diosʉ tsyojkʉn es xymyʉdátʉt ja Jesukristʉ mya'xtujkʉn.
\s Xypyátʉm es ndu'unʉm
\p
\v 6 Mʉgu'ugítʉty, nduk'ana'amdʉp ja Nindsʉn'a̱jtʉm Jesukristʉ xyʉʉgyʉjxm, es mnayjyʉbʉ́kʉdʉt ma̱ oytyim di'ibʉty ja nmʉgu'uk'a̱jtʉm di'ibʉ kyaj tyuna̱'a̱ñ es di'ibʉ kyaj jyiky'aty ti'igyʉ éxtʉm ja ʉxpʉjkʉn di'ibʉts tʉ nja''awánʉdʉ.
\v 7 Pes miits mnija̱'a̱dʉp wi'ix mjiky'áttʉt es xypyanʉjxtʉt di'ibʉts tʉ nnastúnʉdʉ; tuunʉts ʉj kots mʉʉt miits n'ittʉ,
\v 8 es ni ngaka̱a̱y nga'úktʉts nadʉ'ʉñʉ. Ni'igʉts nduuñ n'ayooy xʉʉñ koots kʉdiibʉ nidu'uk mdimpa̱a̱dʉdʉt ja ka̱'a̱y ukʉn miidsʉty.
\v 9 Oyʉts ʉj mba̱a̱t nja''amdowdʉ esxyʉpts miits xypyudʉ́kʉdʉ, nik ni'igʉts nduundʉ es nmo'oydyʉt tu'ugʉ nʉ'ʉ tu'u ja oybyʉ di'ibʉ mbadúndʉp.
\v 10 Kots n'ijty mʉt miidsʉty, nmooydyʉ tya̱dʉ ka̱jxwíjʉn: “Di'ibʉ kyaj tyuna̱'a̱ñ, kyaj kyay 'yuugʉt.”
\v 11 Pes dʉ'ʉn n'anʉʉmʉdʉ mʉt ko tʉts nnijawʉ ko nidu'ugʉty miidsʉty nʉgoo m'oknuux'a̱jnʉdʉ, kyaj mnaydyukjotmaydyúnʉdʉ mgʉ'ʉmduunk, je'eyʉ mwinjʉʉn mwindʉjkʉ xymyadya'aky di'ibʉ mgadimpátʉp.
\v 12 Tadʉ dʉ'ʉmbʉ ja̱'a̱y nduknipejkypyʉts mʉt ja Nindsʉn'a̱jtʉm Jesukristʉ kyutujkʉn, es tmastu'udʉdʉ tadʉ dʉ'ʉmbʉ winma̱'a̱ñ. Wa'an ttuñ t'ayoy yajxón es ñayyajkáy ñayya'uugʉdʉt kʉ'ʉm.
\p
\v 13 Mʉgu'ugítʉty, kyaj m'anu'xʉt es xytyun xykya̱jxtʉt di'ibʉ oy.
\v 14 Pʉn ja pʉ́n kyaj tmʉdoogukʉya'añ di'ibʉts nmadyakypy ma̱ tya̱dʉ neky, m'íxtʉp pʉ́nʉdyʉ dʉ'ʉn es katʉ ti mʉʉt xy'ʉmuk xykya̱jxmúktʉ, es dʉ'ʉn tsyoydyu'unga̱'a̱t.
\v 15 Per katʉ xypyʉjta̱'a̱ktʉ éxtʉmʉ mmʉdsipʉn, ni'igʉ xyñʉ'ʉmo'oy xytyu'umo'oydyʉt éxtʉmʉ mmʉgu'ugʉn.
\s Ka̱jxpo'xʉn
\p
\v 16 Yʉ Nindsʉn'a̱jtʉm di'ibʉ yajkypy ja agujk'a̱jt jotkujk'a̱jtʉn, wa'an yʉ'ʉ miits mmo'oyʉdʉ wi'ix tsoo ja jotkujk'a̱jtʉn winʉ xʉʉ winʉ tiempʉ, es wa'anʉ Nindsʉn'a̱jtʉm t'ity mʉt nidʉgekyʉ miidsʉty.
\p
\v 17 Ʉj Pa̱a̱blʉ, nduknijáyʉdʉts miidsʉty yʉ ka̱jxpo'xʉn mʉdʉdsʉ ngʉ'ʉm letrʉ. Dʉ'ʉnʉts nja̱'a̱y ma̱ tʉgékyʉdsʉ nneky.
\v 18 Wa'anʉ Nindsʉn'a̱jtʉm Jesukristʉ mgunu'xʉdʉ nidʉgékyʉty miidsʉty.