\id 1TI

\h 1 TIMOTEE
\mt Myʉtu'ukpʉ Neky Di'ibʉ Pa̱a̱blʉ Tyuknigajx Ja Timotee
\c 1
\p
\v 1 Ʉj Pa̱a̱blʉ, Jesukristʉ 'yapóstʉlʉ, es kéxyʉts nmiñ ma̱ Dios yʉ nYajnitsokpʉ'a̱jtʉm esʉ Nindsʉn'a̱jtʉm Jesukristʉ, di'ibʉ ndukjotkujk'a̱jtʉm,
\v 2 nduknigejxypyʉts mijʉ tya̱dʉ neky, Timotee. Dʉ'ʉnʉts mij njawʉ éxtʉmdsʉ n'u'unk, ja'a ko ʉjts mij tʉ ndukmʉbeky ja Kristʉ. Wa'an ja Dios Teety esʉ Nindsʉn'a̱jtʉm Jesukristʉ mguni'xyʉty es mmo'oyʉty ja pa''ayo'on esʉ agujk'a̱jt jotkujk'a̱jtʉn.
\s Kyaj yajkupʉ́kʉt ja ʉxpʉjkʉn di'ibʉ kyaj tyʉy'a̱jtʉnʉty
\p
\v 3 Kom tʉ nduknipeky kots oj nnejxy Masedoñʉ ña̱a̱xóty, wʉ'ʉm Éfesʉ ka̱jpnóty es xy'anʉʉmʉdʉ tadʉ ja̱'a̱yʉty es kʉdiibʉ ya'ʉxpʉ́kʉt di'ibʉ kyaj tyʉy'a̱jtʉnʉty,
\v 4 es anʉʉmʉdʉ ko kyaj tmʉjpʉjta̱'a̱gʉt ja 'yaptʉjkʉ madya'aky esʉ wiinkpʉ jekymyadya'aky, mʉt ko tʉgekyʉ tya̱a̱dʉ je'eyʉ dyajtʉgóy ja tiempʉ es kyaj xytyu'unxʉm ni madsoo, es ni xykyapudʉjkʉm es nguydyu'unʉm mʉt ja mʉbʉjkʉn di'ibʉ ja Dios tʉ xytyuknipʉjkʉm.
\p
\v 5 Ja'agyʉjxmʉ tya̱dʉ ana'amʉn es nixim niyam nnaydsyojkʉm mʉt ja wa̱'a̱ts a̱a̱ wa̱'a̱ts jot es mʉʉt ja tʉy'a̱jtʉnbʉ mʉbʉjkʉn.
\v 6 Na̱a̱gʉty tʉ tmʉdu'udʉgóydyʉ tya̱dʉ ʉxpʉjkʉn es tʉ ñaygyʉyákyʉty mʉt ja nanʉgoobʉ kajxy madya'aky.
\v 7 Byeen jyatuk'ʉxpʉka̱'a̱ndʉ ja Diosʉ 'yana'amʉn, per ni tkajaygyúkʉdʉ di'ibʉ myadyáktʉp es ni di'ibʉ tuk'ʉxpʉjktʉp éxtʉmxyʉp jyatʉy'a̱jtʉnmʉʉdʉty.
\p
\v 8 Nnija̱'a̱m ko oyʉ tadʉ ana'amʉn ko nyajtu'unʉm éxtʉm pyaadyʉty.
\v 9 Nnija̱'a̱m nandʉ'ʉn ko ni tu'ugʉ ana'amʉn kyayajpʉjta'aky mʉt ja di'ibʉ tyuundʉp ja oybyʉ. Tadʉ ana'amʉn ja'a dʉ'ʉn mʉt ja di'ibʉ niye'epy yujk'ye'epy, di'ibʉ kyaj 'yʉygyupeky kyajxykyupéky, di'ibʉ axʉk ja̱'a̱yʉty, di'ibʉ pojpʉ ja̱'a̱yʉty, di'ibʉ kyajpʉ Dios tmʉj'íxy, di'ibʉ kyaj ttuñʉ kwentʉ Diosʉ 'yʉxpʉjkʉn, di'ibʉ yajja̱'a̱y'o'ktʉp, es extʉ di'ibʉ ya'o'ktʉp ja tya̱a̱k tyeedyʉty,
\v 10 di'ibʉ mʉ'induundʉp, di'ibʉ yedyʉjkʉty tyuundʉp tsoydyu'un mʉʉtpʉ ak yʉ'ʉjʉty, di'ibʉ tyo'ktʉp ja ja̱'a̱y, di'ibʉ andáktʉp, di'ibʉ Dios tyukka̱jxpejtypy mʉt ja andakʉngyʉjxm, es di'ibʉ oytyiity wiink tyiimpy kʉdiinʉm éxtʉm ja tʉy'a̱jtʉnbʉ ʉxpʉjkʉn.
\v 11 Ja'a n'andijpyʉts ja oybyʉ ayuk di'ibʉ mʉj'a̱jtʉn mʉʉtpʉ esʉ Diosʉ kuni'xypyʉ xytyuknipʉjkʉts es nga̱jxwa̱'xʉdʉts.
\s Pa̱a̱blʉ Dios tja̱'a̱ygyʉda'aky ko pya''ayóyʉty
\p
\v 12 Nja̱'a̱ygyʉdákypyʉts ja Nindsʉn'a̱jtʉm Jesukristʉ mʉt kots tʉ xymyo'oy ja madakʉn mʉdʉdsʉ nduunk, es mʉt kots tʉ xywyin'ixy es tʉ xypyʉjta'agyʉts es ndúnʉdʉts ja tyuunk,
\v 13 es dʉ'ʉnʉts tʉ xytyuknipeky óyʉts ʉj jawyíñʉp ngamʉj'ijxy mʉdʉdsʉ n'ayuk, es óyʉts oj njajʉna̱'a̱ñ tsa̱a̱tsykyʉbéty mʉt yʉ'ʉ, es nbajʉdijtyʉts ja jya'ay. Perʉ Dios myʉda̱jt ja pa''ayo'on mʉt ʉj, ja'a ko kyajnʉmdsʉ naty nmʉbeky ja Jesukristʉ es kyajtsʉ naty nnijawʉ tiidsʉ dʉ'ʉn ndiimpy.
\v 14 Pa̱a̱ty ja Nindsʉn'a̱jtʉmʉ myay'a̱jtʉn oy jyantsymyʉ́jʉty mʉt ʉj, ti'igyʉ mʉt ja mʉbʉjkʉn es ja tsojkʉn di'ibʉ nandʉ'ʉn nmʉda̱jtʉm mʉt ko n'ijtʉm ti'igyʉ mʉdʉ Jesukristʉ.
\p
\v 15 Byeen tyʉy'a̱jtʉnʉty, es nidʉgekyʉ tmʉbʉ́ktʉt, ko Jesukristʉ myiiñ naxwiiñ es dyajnitso'oga̱'a̱ñ ja pojpʉ ja̱'a̱yʉty, es ma̱ dʉ'ʉmbʉ pyekyjya'ayʉty nik ni'igʉ axʉʉk ʉj.
\v 16 Per pa̱a̱dyʉ Dios tmʉda̱jty ja pa''ayo'on mʉt ʉj, esʉ Jesukristʉ dya'íxʉdʉt ja mya'xtujkʉn mʉj wiin ma̱ ʉj. Es dʉ'ʉnʉts xyajtúñʉts éxtʉmʉ di'ibʉ ni'igʉ tmʉdaty ja pyojpʉ, éxtʉmʉ ijxpajtʉn mʉt ja di'ibʉty óknʉmʉ naty myʉbʉkándʉp yʉ'ʉ, es tja'a'áttʉt ja jiky'a̱jtʉnʉ winʉ xʉʉ winʉ tiempʉ.
\v 17 N'awda̱jtʉm ja Dios, rey winʉ xʉʉ winʉ tiempʉ, di'ibʉ myʉda̱jtypy ja windsʉ'kʉn esʉ mʉj'a̱jtʉn, yʉ'ʉ tu'uk Dios'a̱jtp, di'ibʉ kyaj ya'ixy es di'ibʉ nina̱'a̱ kya'eeky. Wa'an dʉ'ʉnʉty.
\p
\v 18 U'unk Timotee, di'ibʉ tya̱a̱dʉ nduknipejkypy, ti'igyʉ yʉ'ʉ éxtʉm ja mʉgu'uk mnimaydyákʉdʉ ja Diosʉ jya'a jawyíñʉp. Pa̱a̱ty mʉt yʉ'ʉ mba̱a̱t amumdu'uk jot xy'aktimmʉdúñ ja Dios nʉ'ʉnʉ mmʉja̱a̱.
\v 19 Mʉdat dʉ'ʉñʉm ja mʉbʉjkʉn amumdu'uk jot es mʉdat ja mjot mwinma̱'a̱ñ wa̱'a̱ts. Na̱a̱gʉty kyaj tpʉjktʉjkʉdʉ ko ja Dios jyawinma̱'a̱ñmyo'oya̱'a̱nʉdʉ. Pa̱a̱ty ñayyajwinma̱'a̱ñdyʉgooyʉdʉ es tmastuttʉ ja mʉbʉjkʉn ma̱ Kristʉ.
\v 20 Dʉ'ʉn jya̱jttʉ ja Imeneeʉ esʉ Alejandrʉ. Pa̱a̱ty es tnijáwʉdʉt jatuk xʉʉ es kyaj tmʉ''ʉdʉgoy tmʉga̱jxtʉgóyʉt ja Dios, ndukkʉdʉjkʉts ja mʉjku'ugópk Satanás.
\c 2
\s Pa̱a̱blʉ ttuknipeky ja Timotee es kya̱jxta̱'a̱gʉt
\p
\v 1 Tim jʉjp'ám nmʉnu'xtáktʉp esʉ ja̱'a̱y tni'amdówʉdʉt, tniga̱jxta̱a̱gʉdʉt nidʉgekyʉ ja̱'a̱yʉty, es tja̱'a̱ygyʉda̱'a̱ktʉt ja Dios ja'agyʉjxmʉty,
\v 2 nidʉgekyʉ réyʉty es nidʉgekyʉ justísʉty, es dʉ'ʉn mba̱a̱t njiky'a̱jtʉm yajxón es ni pʉ́n mʉʉt ngatsiptu'unʉm, es ndu'unʉm ja oybyʉ es njiky'a̱jtʉm éxtʉm ja Dios ttseky.
\v 3 Tya̱a̱dʉ dʉ'ʉn oy, es yʉ'ʉ dʉ'ʉn 'yoyjya̱'a̱p ja Dios yʉ nYajnitsokpʉ'a̱jtʉm,
\v 4 pes yʉ'ʉ tsyejpy es nidʉgekyʉ yajnitso'ogʉdʉt es nandʉ'ʉn tjaygyúkʉdʉt di'ibʉ dʉn tʉy'a̱jtʉn.
\v 5 Ja'a ko ta ti'igyʉ je'eyʉ Dios, es nan ti'igyʉ je'eyʉ di'ibʉ ʉdsa̱jtʉm xykyudʉnaabyʉ'a̱jtʉm ma̱ Dios, yʉ ja̱'a̱y Jesukristʉ,
\v 6 nayya̱jkʉ ma̱ 'ye'ky, es dʉ'ʉn tkʉbejty tkumʉdooy ja ñitsokʉn nidʉgekyʉ naxwíñʉdʉ ja̱'a̱yʉty. Esʉ tya̱a̱dʉ jaya'ijx ma̱ ja tiempʉ yajtuknibʉjtákʉ.
\v 7 Mʉdʉ tya̱a̱dʉts ʉj oj nyajpʉjta'aky ja Diosʉ 'yayuk ka̱jxwa̱'xpʉ esʉ apóstʉlʉ, es ndukni'íxʉdʉts ja tʉy'a̱jtʉn es ja mʉbʉjkʉn mʉt ja di'ibʉ kyaj 'yisraelítʉty. Tʉy'a̱jtʉnʉts njʉna̱'a̱ñ, kyajts n'anda'aky.
\p
\v 8 Ndsejpyʉts esʉ ja̱'a̱y oytyim ma̱a̱ty kya̱jxta̱'a̱ktʉt, dyajpʉdʉ'ʉktʉt ja kyʉ'ʉjʉty mʉt ja wa̱'a̱ts a̱a̱ wa̱'a̱ts jot, kyaj ñayyajjot'ambʉ́kʉdʉt es kyaj tsyiptúnʉt nixim niyam.
\v 9 Esʉ toxytyʉjk ñaywyítʉdʉt yajxón adʉyʉ, es kyaj ñayñiwook ñaygyʉxwoogʉdʉt es ñayyajmʉjpʉdsʉ́mʉdʉt, es ni je'eyʉ kyanayya'oydyʉ́kʉdʉt mʉt ja oorʉ o perlʉ, es ni mʉt ja wyitʉ tsooxʉtypyʉ.
\v 10 Wa'an ttundʉ ja oybyʉ tuunk di'ibʉ pátʉp ttúndʉt nidʉgekyʉ toxytyʉjkʉty di'ibʉ myʉduundʉp ja Dios.
\v 11 Wa'an yʉ toxytyʉjkʉty amoñʉ es yuunk naxypy tmʉdoo'íty ja ʉwij ka̱jxwíjʉn.
\v 12 Kyajts ʉj nyajkutíky es ja toxytyʉjk ya'ʉxpʉ́kʉt o ja yedyʉjk t'ana'amʉt. Wa'an amoñʉ t'amʉdoonáxy,
\v 13 mʉt ko Dios dyajkojy jawyiin ja Adán es óknʉmʉ Eevʉ.
\v 14 Yʉ Adán kyaj oj yajwin'ʉʉñ, ja'a dʉ'ʉn ja ñʉdo'oxy di'ibʉ yajwin'ʉ'ʉn, es ko oj yajwin'ʉʉñ, net oj pyekykya'ay.
\v 15 Per ja toxytyʉjk jyotkujk'áttʉt ko tpadundʉ ja u'unkta̱a̱k'a̱jtʉn, ko tmʉdattʉ ja mʉbʉjkʉn, es ko tpadundʉ yajxón mʉt ja tsojkʉn, ja wa̱'a̱ts'a̱jtʉn es ja tuda'aky'a̱jtʉn.
\c 3
\s Wi'ix tyúndʉt ja mʉbʉjkpʉtʉjkʉ kywentʉ'a̱jtpʉty
\p
\v 1 Tʉy'a̱jtʉnʉ'ʉ tya̱dʉ ayuk: Pʉn ja pʉ́n ttseky es tyúnʉt ja mʉbʉjkpʉtʉjk kwentʉ'a̱jtpʉ, oyʉ tadʉ tuunk di'ibʉ tsyejpy.
\v 2 Di'ibʉ kwentʉ'a̱jtp ma̱ mʉbʉjkpʉtʉjk ñaymyúkʉdʉ, jiky'átʉp wa̱'a̱ts es éxtʉm kyaj mba̱a̱t yajpekymyo'oy, di'ibʉ myʉda̱jtypy ti'igyʉ ñʉdo'oxy, di'ibʉ jiky'a̱jtp tuda'aky es ñay'aguwítsʉty, di'ibʉ naymyay'a̱jt naywyindsʉ'kʉp, di'ibʉ oyña̱'a̱jʉty 'yaxá̱jʉp ja ja̱'a̱y yajxón ma̱ ja tyʉjk, di'ibʉ mba̱a̱t ya'ʉxpeky,
\v 3 di'ibʉ kyaj myʉ'iiky, di'ibʉ kyaj tsyiptʉjkʉty, di'ibʉ oyjya'ay, di'ibʉ tuda'aky amumdu'uk jot, di'ibʉ kyaj myeeñ'oogʉty,
\v 4 di'ibʉ yajxón ana'amp ma̱ tyʉjk es dʉ'ʉn tmo'oyʉt ja ijxpajtʉnʉ 'yu'unk 'yʉna̱'k es myʉmʉdówʉdʉt es wyindsʉ'ʉgʉdʉt;
\v 5 pes pʉn tu'uk kyaj tjaty 'yana'amʉt ma̱ yʉ kyʉ'ʉmdʉjk, ¿wi'ix mba̱a̱t tkwentʉ'aty ja myʉmʉbʉjkpʉty ma̱ ñaymyúkʉdʉ?
\v 6 Kyaj tyúnʉt mʉbʉjkpʉtʉjk kwentʉ'a̱jtpʉ di'ibʉ na̱a̱mnʉm tmʉmʉbʉjktsooñ ja Dios, mʉt kooxyʉp dʉ'ʉmbʉ tsojk nʉjx ñapʉdsemy mʉj kʉjxm es tsojk nʉjx ñajaty éxtʉm ja mʉjku'ugópk oj yajka̱jxpéky.
\v 7 Nandʉ'ʉn koonʉm tsyékyʉty es ñaywyindsʉ'ʉgʉdʉt ma̱ yʉ di'ibʉ kyaj yʉ'ʉdyʉ Diosʉ myʉduumbʉ, kʉdiibʉ pʉ́n kyawindsʉ'ʉgʉdʉt es ja mʉjku'ugópk yajpekykya̱'a̱dʉt.
\s Wi'ix tyúndʉt di'ibʉ pyudʉjkʉdʉp ja mʉbʉjkpʉtʉjkʉ kywentʉ'a̱jtpʉty
\p
\v 8 Es nandʉ'ʉn di'ibáty pyudʉjkʉdʉp ja mʉbʉjkpʉtʉjkʉ kywentʉ'a̱jtpʉty, yʉ'ʉ di'ibʉ naymyay'a̱jt naywyindsʉ'kʉp, di'ibʉ kyaj kyo'oy'ʉ́y kyo'oygyajxy, di'ibʉ kyaj myʉ'iiky myʉmi'igyʉty, di'ibʉ kyaj myeeñ'oogʉty.
\v 9 Nandʉ'ʉn koonʉm tsyékyʉty es tmʉ'o'ktʉ́wʉt ja tʉy'a̱jtʉn di'ibʉ Dios tʉ dya'íxyʉty di'ibʉ nmʉbʉjkʉm, es myʉdátʉt wa̱'a̱ts ja jyot wyinma̱'a̱ñ,
\v 10 es jawyiin ya'ijxmátsy; es pʉn kyaj tmʉdaty ja pyeky, wa'an ttuñ ma̱ ja mʉbʉjkpʉtʉjk ñaymyúkʉdʉ.
\v 11 Es nandʉ'ʉn koonʉm ja ñʉdo'oxyʉty ñaymyay'át ñaywyindsʉ'ʉgʉdʉ, kyaj 'yabi'ts'áttʉt, es ʉygyupʉk kyajxykyupʉ́ktʉt.
\v 12 Pes tu'uk di'ibʉ pyudʉjkʉp ja mʉbʉjkpʉtʉjkʉ kywentʉ'a̱jtpʉ, yʉ'ʉ túnʉp di'ibʉ myʉda̱jtypy tu'uk je'eyʉ ñʉdo'oxy es di'ibʉ jyajtypy t'ana'amʉt ja 'yu'unk 'yʉna̱'k ma̱ yʉ jyʉʉn tyʉjk.
\v 13 Mʉt ko yʉ pudʉjkʉbʉty di'ibʉ yajxón tuundʉp, pátʉdʉp tu'ugʉ windsʉ'kʉn es dʉ'ʉn amumdu'uk jot tmadya̱'a̱ktʉt ja mʉbʉjkʉn di'ibʉ myʉda̱jtypy ma̱ Jesukristʉ.
\s Wi'ixʉ Dios dya'íxyʉty ja tʉy'a̱jtʉn
\p
\v 14 Tim tsojk nʉjx ngu'ixa̱'a̱ndʉ, per tyam nduknigaxtʉ ma̱ tya̱dʉ neky ja̱a̱ybyéty,
\v 15 es pʉn akwʉ'ʉmʉpts, mnijáwʉp wi'ix mnayya'ítyʉty ma̱ Diosʉ jya'ayʉty, pʉ́nʉty myʉbʉjktʉp ja Diosʉ jiikypyʉ es dya'ittʉ ja tʉy'a̱jtʉn. Es ja tʉy'a̱jtʉn, dʉ'ʉn yʉ'ʉ éxtʉm tu'ugʉ pila̱a̱r di'ibʉ pyattʉnaapy ja tʉjkni'x, es nandʉ'ʉn éxtʉm ma̱ tsonda'aky ja tʉjk.
\v 16 Tʉy'a̱jtʉnʉ'ʉ ko ni'igʉ mʉj ja Diosʉ jya'a di'ibʉ ijty kyaj yajnijáwʉ:
\q Miin ja̱jt ja Kristʉ mʉdʉ ja̱'a̱yʉ ñini'x,
\q ya'ijxʉ ja Espíritʉ Santʉ ko wa̱'a̱ts yʉ'ʉ,
\q ijxʉdʉ ja ánklʉsʉty,
\q yajnimaydyák ma̱ naxwíñʉdʉ ja̱'a̱yʉty,
\q mʉbʉjkʉdʉ ja̱'a̱y ya̱ naxwiiñ,
\q ya''axa̱jʉ jam tsa̱jpótm.
\c 4
\s Di'ibʉ myatstúttup ja mʉbʉjkʉn
\p
\v 1 Per ja Espíritʉ Santʉ xytyuknija̱'a̱m wa̱'a̱tsti'knʉ ko ma̱ naty ja tiempʉ ttimpatnʉ ma̱ jyʉmbita̱'a̱ñ Nindsʉn'a̱jtʉm, na̱a̱gʉty ñika'agándʉp ja myʉbʉjkʉnʉty es tpanʉjxa̱'a̱ñ ja ʉxpʉjkʉn di'ibʉ miimp ma̱ ja ka'oybyʉ di'ibʉ win'ʉ'ʉndʉp.
\v 2 Ja'a myʉmʉdowándʉp ja ja̱'a̱y di'ibʉ nay'andíjʉdʉp jyiky'attʉ tʉy'a̱jtʉn mʉʉt, di'ibʉ kyaj tnakyjyáwʉdʉ es 'yaxʉʉgʉty ko pyekytyundʉ, éxtʉmxyʉp tʉ tyooydyʉgooyñʉ jyot wyinma̱'a̱ñ mʉt tu'ugʉ pujxnʉ jantsy ambʉ.
\v 3 Tya̱dʉ win'ʉ'ʉmbʉ kyaj tkupʉktʉ es pʉ́n pyʉk 'yuugʉt, es nandʉ'ʉn jyʉna̱'a̱ndʉ ko taa je'xy di'ibʉ kyaj yajjʉ'xʉt, oy ja Dios tjapʉjtákyʉ tya̱dʉ je'xy es tjʉ'xʉt ja myʉbʉjkpʉty es di'ibáty ñija̱'a̱dʉp ja tʉy'a̱jtʉn, es tja̱'a̱ygyʉda̱'a̱ktʉt ja Dios.
\v 4 Pes tʉgekyʉ di'ibʉ Dios pyʉjták, oy yʉ'ʉ es kyaj ʉdsa̱jtʉm n'ʉxtíjʉm ni tii pʉn n'axá̱jʉm es nja̱'a̱ygyʉdákʉm ja Dios,
\v 5 mʉt ko dʉ'ʉn ja Diosʉ 'yayuk es ja ka̱jxtákʉn pyʉjtákypy wa̱'a̱ts.
\s Jesukristʉ 'yoymyʉduumbʉ
\p
\v 6 Pʉn mduk'ʉxpejkypyʉ tya̱a̱dʉ ja nmʉgu'uk'a̱jtʉm, mijtsʉ dʉ'ʉn tu'ugʉ oybyʉ myʉduumbʉ Jesukristʉ, es m'uts mjotkʉda̱'a̱gʉp mʉt ja mʉbʉjkʉn es mʉt ja oybyʉ ʉxpʉjkʉn di'ibʉ mbadiimpy.
\v 7 Per katʉ xytyuñʉ kwentʉ lyokʉ winma̱'a̱ñʉty es di'ibʉ jeky myadyáktʉp nan nʉgoobʉ. Nik naybyʉjta̱'a̱gʉdʉ amumdu'uk jot xymyʉdúnʉt ja Dios.
\v 8 Pes je'eyʉ waanʉ ttuk'oy'aty ja nini'x kʉba̱jk ko nyaj'yúngʉm, per di'ibʉ sitʉy waanʉ ni'igʉ nduk'oy'a̱jtʉm ko n'awda̱jtʉm ja Dios es nmʉdu'unʉm. Taadʉ dʉ'ʉn tsobatp ma̱ tya̱dʉ jiky'a̱jtʉn di'ibʉ tyam es nandʉ'ʉn ma̱ tadʉ jiky'a̱jtʉn di'ibʉ miimp.
\v 9 Tya̱a̱dʉ dʉ'ʉn jantsy tʉy'a̱jtʉnʉ'ʉ, es nidʉgekyʉ tmʉbʉ́ktʉt.
\v 10 Tya̱a̱dʉkyʉjxmʉ dʉ'ʉn ndu'unʉm ja delijensʉ es nmʉmadákʉm, mʉt ko tʉ nnaygyʉya̱jkʉm ma̱ Diosʉ jiikypyʉ, di'ibʉ tʉ ttuknibʉjta̱a̱gʉ ja nitsokʉn mʉt nidʉgekyʉ ja̱'a̱yʉty, es waanʉ ni'igʉ di'ibʉ myʉbʉjktʉp.
\p
\v 11 Ka̱jxwa̱'x es ya'ʉxpʉk tʉgekyʉ tya̱a̱dʉ.
\v 12 Exkʉm pʉ́n mdukxi'igʉdʉ mʉt ko mwimbu'udsʉtyñʉm; ja'a dʉ'ʉn myákʉp ja ijxpajtʉn mʉt ja di'ibáty myʉbʉjktʉp ja Jesukristʉ, éxtʉm mij ja m'ayuk, éxtʉm mnayya'ítyʉty mʉt ja tsojkʉn, éxtʉm mnayya'ítyʉty ma̱ ja mʉbʉjkʉn, es extʉm ja mjiky'aty wa̱'a̱ts.
\v 13 Ma̱a̱nʉmts ʉj ngaja̱'ty, tukwinguga̱jxʉdʉ es ka̱jxwa̱'x ja Diosʉ jyaaybyajtʉn, es xya'ʉxpʉktʉ.
\v 14 Yajtún ja madakʉn di'ibʉ Dios mmooyʉ ko ja mʉjja̱'a̱ydyʉjkʉty dyajnáxtʉ ja Diosʉ 'yayuk, tpʉjtáktʉ ja kyʉ'ʉ ma̱ mij es mgunu'xʉ.
\p
\v 15 Tyam yajtún tʉgekyʉ di'ibʉ Dios mmooyʉ, es dʉ'ʉn tʉgekyʉ mba̱a̱t t'ixtʉ ko mij xyajmʉj xyajmáyʉ ko xytyuñ éxtʉm ja Dios ttseky.
\v 16 Kwentʉ'at ja mjiky'a̱jtʉn es ja m'ʉxpʉjkʉn. Dʉ'ʉñʉmʉ dʉ'ʉn xytyúnʉt, es dʉ'ʉn nʉjx mnitse'eky es nandʉ'ʉn di'ibáty mmʉmʉdoojʉdʉp.
\c 5
\s Wi'ixʉ Timotee jya'ay'átʉt ma̱ ja mʉbʉjkpʉtʉjk
\p
\v 1 Katʉ xy'ooy xya'axy ja mʉjja̱'a̱y yedyʉjkʉty; ni'igʉ xykya̱jxwíjʉt éxtʉmxyʉp yʉ'ʉ xytyeety'áty. Mʉdat yajxón yʉ ʉna̱'ktʉjkʉty éxtʉmxyʉp xymyʉga'ax'áty.
\v 2 Mʉdat yajxón yʉ mʉjja̱'a̱ydyoxytyʉjkʉty éxtʉmʉ mda̱a̱gu'unk, esʉ ʉna̱'ktoxytyʉjkʉty éxtʉmʉ mmʉga'axʉn, mʉt winʉ oyjyot.
\p
\v 3 Pudʉkʉ ja ku'ekytyo'oxyʉty di'ibʉ dʉn sitʉy tʉgoy'a̱jtxʉdʉp.
\v 4 Pʉn jaa ku'ekytyo'oxy di'ibʉ myʉdajtypy ja 'yu'unk o 'yok, tadʉ u'unk ok yʉ'ʉ dʉn jawyiin pyudʉ́kʉp ja tya̱a̱k o ja ñanitʉ, es dʉ'ʉn tkuydyúnʉt éxtʉm pyaadyʉty mʉt nandʉ'ʉn ja fyamilyʉ, dya'íxʉt ko tmay'a̱jnjáwʉ tʉgekyʉ di'ibʉ tya̱a̱k tyeety tyuundʉ mʉt yʉ'ʉgyʉjxmʉty, mʉt ko dʉ'ʉnʉ dʉn ttseky ja Dios.
\v 5 Ja ku'ekytyo'oxy di'ibʉ sitʉy tʉ wye'emy kujm adu'uk, yʉ'ʉyʉ 'ya̱a̱'a̱jty jyot'a̱jtypy ja Dios, kyaj tmʉbe'xy es kya̱jxta̱'a̱gʉt es t'amdow tpʉjktsówʉt ja Dios xʉʉñ koots.
\v 6 Per ja ku'ekytyo'oxy di'ibʉ winma̱'a̱ñdyʉgeepy es je'eyʉ tyʉkʉ xik xoombʉ, dʉ'ʉnʉ'ʉ éxtʉmʉ o'kpʉ oy jyajiky'átyñʉm.
\v 7 Tuk'ana'am tʉgekyʉ tya̱a̱dʉ nandʉ'ʉn, kʉdiibʉ tii yajtukpeky'íxtʉt.
\v 8 Pes pʉn ja pʉ́n kyaj ñaydyukjotmaydyúñʉty ja myʉgu'uktʉjkʉty, o waanʉ ni'igʉ yʉ kyʉ'ʉm familyʉ, tʉʉ dʉn t'ʉxtijy ja mʉbʉjkʉn es waanʉ axʉʉk yʉ'ʉ wye'emy kʉdiinʉm ja di'ibʉ kyaj tmʉbeky, ja'a ko yʉ'ʉ jotmaydyuunʉp ja myʉgu'ugʉty.
\p
\v 9 Yʉ'ʉyʉ mgujáyʉp ja ku'ekytyo'oxy di'ibʉ tʉ tyʉgʉ'pxna̱jxnʉ jyʉmʉjt es di'ibʉ tʉ pyeky tʉgok je'eyʉ,
\v 10 di'ibʉ oy yajnija̱'a̱p ko tʉ 'yoyjya'ay'áty, ko tʉ yajxón tnʉ'ʉmo'oy ttu'umo'oy ja 'yu'unk 'yʉna̱'k, ko tsuj tʉ tmʉdaty ja jyabya̱a̱t jyabye'xy ma̱ ja tyʉjk, ko tʉ ttekypyujy ja Diosʉ jya'ayʉty, ko tʉ tpudʉkʉ di'ibʉ ayoo jottʉgooydyʉp, ja'a ko oydyi'ibʉty ti tʉ ttuñ ja oybyʉ.
\p
\v 11 Per katʉ xykyupeky yajkujáyʉt ja ku'ekytyo'oxyʉ kujk ʉna̱'kpʉ es dyákʉt ja naybyudʉkʉ. Mʉt ko wyinma̱'a̱ñ myínʉt es pyʉka̱'a̱ndʉt jatʉgok, ta nʉjx tmastu'uttʉ wi'ix tmʉdúnʉt ja Kristʉ,
\v 12 es dʉ'ʉn ñayyajpekykya̱'a̱dʉ mʉt ko kyaj Kristʉ t'okmʉdunánʉdʉ éxtʉm tʉ ñaywya̱nda̱'a̱gʉdʉ.
\v 13 Waanʉ ni'igʉ jyʉdittʉ wyinjʉʉn wyindʉjk, oytyiity ttuktʉk ttukka̱jxʉdʉ es nʉgoo ñakumadya̱a̱gʉdʉ. Ta jyʉmbijnʉdʉ nuux; es kyaj ñuuxʉty je'eyʉ, nandʉ'ʉn 'yabi'ts'áttʉ, nʉgoo oytyiity tnamadya̱'a̱ktʉ di'ibʉ kyaj pyaadyʉty es tmadya̱'a̱ktʉt.
\v 14 Pa̱a̱ty ndsejpyʉts esʉ ku'ekytyo'oxy di'ibʉ kujk ʉna̱'kpʉ pyʉ́kʉt, es tmʉdátʉt ja 'yu'unk 'yʉna̱'kʉty, es t'a'u'uñ t'adsʉʉnʉt ja jyʉʉn tyʉjk, kʉdiibʉ tluga̱a̱rmo'oyʉt ja nmʉdsip'a̱jtʉm es ñibi'ts'ʉ́w ñibi'tska̱jxʉdʉt.
\v 15 Pes na̱a̱gʉty ja ku'ekytyo'oxyʉ dʉ'ʉmbʉ éxtʉmʉ taadʉ tʉ wyinma̱'a̱ñdyʉgóydyʉ. Pa̱a̱ty ñaydyukpawitsy ñaydyukpabo'odyʉty ja ka'oybyʉ.
\p
\v 16 Pʉn jaa toxytyʉjk di'ibʉ myʉbejkypy ja Jesús es tmʉdaty ma̱ tyʉjk ku'ekytyo'oxy, wa'an kʉ'ʉm tpudʉkʉ, es kyaj tna'íxʉt es jyatyim'yajpudʉ́kʉt ma̱ ja mʉbʉjkpʉtʉjk; pes dʉ'ʉn mba̱a̱t ja mʉbʉjkpʉtʉjk tpudʉ́kʉdʉ ja ku'ekytyo'oxy di'ibʉ sitʉy ni tii tkamʉdaty tkajaygyepy.
\p
\v 17 Yʉ mʉjja̱'a̱yʉty di'ibʉ tuundʉp ma̱jatyʉ mʉbʉjkpʉtʉjk ñaymyúkʉdʉ, pátʉp ja windsʉ'kʉn esʉ pudʉjkʉn, es waanʉ ni'igʉ pʉ́nʉty kya̱jxwa̱'xtʉp esʉ ja̱'a̱y ttuk'ixtʉ ja Diosʉ 'yayuk.
\v 18 Pes ja Diosʉ jyaaybyajtʉn jyʉna'añ: “Katʉ xypyʉjta'aky ja 'yajiidsʉ noviiʉ ma̱ twindeeñ ja triigʉ.” Es nandʉ'ʉn jatuk peky jyʉna'añ: “Yʉ mʉduumbʉ pátʉp yʉ myʉju'uñ.”
\p
\v 19 Es ja mʉjja̱'a̱yʉty di'ibʉ tuundʉp ma̱ ja mʉbʉjkpʉtʉjk ñaymyúkʉdʉ, katʉ xykyupeky es yajni'ʉʉnʉt pʉn kyaj kyʉxe'eky majtsk o tʉgʉʉk di'ibʉ ñika̱jxpáttʉp.
\v 20 Per pʉn tʉy'a̱jtʉn ko tmʉdaty ja peky oypyʉ́nʉty, win'oo mayjya'ayóty ma̱ mʉbʉjkpʉtʉjk ñaymyúkʉdʉ, es dʉ'ʉn ja wiingátypyʉ tpʉ́ktʉdʉ kwentʉ kʉdiibʉ dʉ'ʉn nandʉ'ʉn 'yadʉ'ʉtstʉt.
\p
\v 21 'Yijxypy myʉdeepy ja Dios esʉ Nindsʉn'a̱jtʉm Jesukristʉ mʉt ja 'yánklʉsʉdyʉ wyinwitsypyʉ, ko nduknipekyʉ tya̱dʉ ʉxpʉjkʉn es xypyadúnʉt dʉ'ʉñʉm mʉt ja oyjyotkyʉjxm, es kyaj win'ixy wingexy.
\v 22 Ko xywyin'ixa̱'a̱nʉt na̱a̱k di'ibʉ ana'amʉp ma̱ mʉbʉjkpʉtʉjk ñaymyúkʉdʉ, jawyiin xy'íxʉt wi'ix jyiky'aty, dʉ'ʉn éxtʉm nga̱jxwijy, mʉt ko pʉn mbʉjtákypy tu'uk di'ibʉ axʉʉk jiky'a̱jtp, nan mmʉda̱jtypyʉ dʉ'ʉn ja peky. Exkʉm mbekykya̱'a̱.
\p
\v 23 Es mʉt ko jana̱a̱m jatsojk mjotpékyʉty, kʉdii xyñaky'uugʉt yʉ'ʉyʉ wa̱'a̱ts nʉʉ, uuk nandʉ'ʉn oynʉ'ʉnʉnʉ vinʉ éxtʉmʉ jottsooy.
\p
\v 24 Pes yʉ ja̱'a̱yʉdyʉ pyojpʉ na̱a̱gʉty byeen tyimnigʉxe'egyʉty es ñija̱'a̱dʉp ja ja̱'a̱y ko yajtukkumʉdowándʉp, per na̱a̱gʉty ja ja̱'a̱yʉdyʉ pyojpʉty jaanʉm ya'ixy óknʉm.
\v 25 Nandʉ'ʉn oy kyʉxe'eky ko ja oybyʉ yajtúñ; es di'ibáty kyaj 'yóyʉty, kyaj mba̱a̱t wye'emy ayu'udsyʉ.
\c 6
\p
\v 1 Nidʉgekyʉ di'ibʉ po'oduumbʉ'a̱jttʉp, yajxón tmay'at twindsʉ'ʉgʉdʉt ja wyindsʉ́nʉty, kʉdiibʉ yajmʉgoy'ʉ́w yajmʉgoygya̱jxʉt ja Dios es ja n'ʉxpʉjkʉn'a̱jtʉm.
\v 2 Es pʉn yʉ po'oduumbʉ yʉ'ʉ wyindsʉn'a̱jttʉp ja Dios mʉduumbʉty, ni'igʉ waanʉ oy tmʉdúnʉt mʉt ko tmʉmʉbʉjkpʉ'áttʉ. Tuk'ʉxpʉk es ka̱jxwa̱'xʉ dʉ'ʉn.
\s Tʉy'a̱jtʉnbʉ namyʉdunʉ
\p
\v 3 Pʉn ja pʉ́n dya'ʉxpeky di'ibʉ kyaj 'yóyʉty es kyaj ñejxy ti'igyʉ mʉt ja Nindsʉn'a̱jtʉm Jesukristʉ 'yʉxpʉjkʉnʉ oybyʉ di'ibʉ nga̱jxwa̱'xʉm,
\v 4 taadʉ naymyʉjpʉjtákʉp es ni ti tjaygyukʉ. Yʉ'ʉyʉ dʉ'ʉn wyinma̱'a̱ñ'ajtypy tmadya̱'a̱ga̱'a̱ñ yʉ axʉk winma̱'a̱ñ. Es ma̱ yʉ tya̱a̱dʉ myiñ ja naywyinnaxʉja̱'a̱k, naymyʉdsip'a̱jtʉk, kanaydyukmʉ'ijxʉk tii, naydyukwin'ijx naydyukjʉjp'ijxʉk tii,
\v 5 esʉ yajnaydsyi'k yajnaygyojxʉk, kyaj jyotxaamdʉ. Tadʉ ja̱'a̱yʉty kyaj 'yóyʉty ja jyot wyinma̱'a̱ñ es kyaj tnijawʉ ja tʉy'a̱jtʉn, jyʉna̱'a̱ndʉ ko yʉ n'ʉxpʉjkʉn'a̱jtʉm yʉ'ʉ dʉ'ʉn ma̱ yajganaraty ja oy'a̱jtʉn. Mastu'udʉ tadʉ di'ibʉ dʉ'ʉnʉ wyinma̱'a̱ñ.
\v 6 Tʉy'a̱jtʉnʉ'ʉ ko di'ibʉ nmʉbʉjkʉm, yʉ'ʉ dʉ'ʉn yajkypy ja oy'a̱jtʉn ko ja̱'a̱y ttukjotkʉda'aky di'ibʉ myʉda̱jtypy.
\v 7 Pes ni ti oj ngamʉmi'inʉm naxwiiñ, es nan ni ti ngamʉnʉjxa̱'a̱nʉm ko n'o'kʉm.
\v 8 Per pʉn ya̱a̱ nmʉda̱jtʉm ja ka̱'a̱y ukʉn es ja wit nijam, mʉt yʉ'ʉyʉ tya̱dʉ njotkujk'a̱jtʉm.
\v 9 Perʉ di'ibʉ wyinma̱'a̱ñ'ajtypy ñayyajmʉkja̱'a̱ydya̱'a̱ga̱'a̱ñʉty, kyaj tsyípʉty kya̱'a̱t pekyoty. Ja'a myʉda̱jtypy maylyokʉ winma̱'a̱ñ es di'ibʉ ja̱'a̱y yajpekytyuunʉp, es dʉ'ʉn dyajnʉjxʉt es dyajtʉgóyʉt.
\v 10 Ja'a ko ja̱'a̱y t'adsoktʉ meeñ, yʉ'ʉ dʉ'ʉn yajmiimpy oytyim di'ibʉ axʉk'a̱jtʉnʉty; es ta na̱a̱k, mʉt ko 'yadsoktʉ, tʉ tmastu'uttʉ ja Nindsʉn'a̱jtʉm Jesukristʉ es nʉgoo ñayya''ayówʉdʉ ma̱ jyiky'attʉ.
\s Timotee ya''anma̱a̱y es amumdu'uk jot tpanʉjxʉt ja mʉbʉjkʉn
\p
\v 11 Per mij Timotee, Dios m'u'unk'a̱jtʉp, kuka'ak tʉgekyʉ tya̱dʉ axʉk'a̱jtʉn. Jiky'at mʉt ja tʉy'a̱jtʉn es éxtʉmʉ Dios ttseky, mʉdʉ mʉbʉjkʉn, mʉdʉ tsojkʉn, mʉdʉ ma'xtujkʉn, mʉdʉ yuunk'a̱jt naxypyʉ'a̱jtʉn.
\v 12 Panʉjx tʉgekyʉ amumdu'uk jot ja mʉbʉjkʉn, es windumbʉk ja jiky'a̱jtʉnʉ winʉ xʉʉ winʉ tiempʉ, pesʉ tya̱a̱dʉ dʉ'ʉn ja Dios mdukniwoojʉdʉ es tʉ mnayyajnide'xyʉty mʉt ja mmʉbʉjkʉn mayjya'aywyindúm.
\v 13 Dios, di'ibʉ myeepy ja jiky'a̱jtʉn tʉgekyʉ di'ibʉ jaa ijtp, esʉ Jesukristʉ, di'ibʉ kya̱jxtudák oy Ponsyʉ Pilatʉ wyindum, ja'a ñija̱'a̱dʉp ko tyam nduknipeky
\v 14 es xykyuydyúnʉt di'ibʉ nduknipejkypy. Katʉ xywyijtstʉgátsy es kʉdiibʉ myajpeky'íxʉt, es tun dʉ'ʉn extʉ ko myínʉt ja Nindsʉn'a̱jtʉm Jesukristʉ,
\v 15 ko dʉ'ʉn jyat kyʉbátʉt éxtʉm ttuknibʉjtákʉ ja Dios, di'ibʉ ti'igyʉ kuni'xy Dios'a̱jtp, Rey'a̱jtp ma̱ réyʉty es Windsʉn'a̱jtp ma̱ windsʉ́nʉty,
\v 16 di'ibʉ tu'uk kyaj 'yeeky, di'ibʉ jiky'a̱jtp ma̱ ja ja̱jʉn ma̱ ni pʉ́n mba̱a̱t kyamʉwingóñʉty, ni tu'ugʉ ja̱'a̱y kya'íxyʉty, es ni mba̱a̱t tka'ixy. ¡May'a̱jt windsʉ'kʉn es mʉk'a̱jtʉn mʉʉt ja Dios winʉ xʉʉ winʉ tiempʉ 'yítʉt! Wa'an dʉ'ʉnʉty.
\p
\v 17 Ʉwij ka̱jxwij ja mʉkja̱'a̱ydyʉjkʉty ko katʉ nʉgoo myʉj pya̱a̱dʉdʉ es kyaj je'eyʉ tjotmo'oyʉt ja mʉkja̱'a̱y'át, mʉt ko kʉjx na̱jxpʉ'ʉ. Wa'an ni'igʉ tpʉjta'aky ja wyinma̱'a̱ñ ma̱ Dios, di'ibʉ jiky'a̱jtp es xymyo'oyʉm tʉgekyʉ mʉjwiin kyajaa es njotkujk'a̱jtʉm.
\v 18 Tuk'ana'amdʉ es ttúndʉt di'ibʉ dʉ'ʉn oy. Wa'an nayyajmʉkja̱'a̱ydya̱'a̱gʉdʉ mʉt ja oybyʉ tuunk, es dyajwa̱'xa̱'a̱nʉt di'ibʉ myʉda̱jt jyaygyajptʉp.
\v 19 Es ko dʉ'ʉn ttúnʉt, ñapatypy éxtʉm ttukjʉjp'íxy ja jyiky'a̱jtʉn di'ibʉ miimp óknʉm, es dʉ'ʉn 'yaxá̱jʉp ja jiky'a̱jtʉn di'ibʉ tʉy'a̱jtʉnbʉ.
\p
\v 20 Timotee, padún ja ʉxpʉjkʉn di'ibʉ tʉ xy'axa̱jʉ. Katʉ xymyʉdoogúkʉ yʉ naxwíñʉdʉ ja̱'a̱yʉ lyokʉ winma̱'a̱ñ, ni di'ibʉ myadyakmujktʉp di'ibʉ nʉgoobʉ tyijtʉp wijy'a̱jtʉn.
\v 21 Pes na̱a̱gʉty di'ibʉ pyanʉjxtʉbʉ tya̱dʉ winma̱'a̱ñ, tʉ tmastu'uttʉ ja mʉbʉjkʉn.
\p Wa'an Dios mgunu'xʉdʉ nidʉgékyʉty.