\id 2TI

\h 2 TIMOTEE
\mt Myʉmajtskpʉ Neky Di'ibʉ Pa̱a̱blʉ Tyuknigajx Ja Timotee
\c 1
\p
\v 1 Ʉj Pa̱a̱blʉ, Jesukristʉ 'yapóstʉlʉ, Diosʉ tsyojkʉngyʉjxm ʉj tʉ nyajkéxy es nga̱jxwa̱'xʉt ja jiky'a̱jtʉn di'ibʉ wya̱ndak es nmʉda̱jtʉm ko n'ijtʉm ti'igyʉ mʉdʉ Jesukristʉ.
\v 2 Nduknigejxypyʉdsʉ tya̱dʉ neky mij Timotee. Dʉ'ʉnʉts mij njawʉ éxtʉmdsʉ n'u'unk. Wa'anʉ nDios Teety'a̱jtʉm esʉ Nindsʉn'a̱jtʉm Jesukristʉ mguni'xyʉty es mmo'oyʉty ja pa''ayo'on es ja agujk'a̱jt jotkujk'a̱jtʉn.
\s Timotee oy yajnigajxy
\p
\v 3 Njamyejtsypyʉts mij kots nga̱jxta'aky xʉʉñ koots. Nja̱'a̱ygyʉdákypyʉts ja Dios di'ibʉts nmʉdiimpy mʉt ja wa̱'a̱tspʉ jot winma̱'a̱ñ, éxtʉm ttuundʉ nandʉ'ʉn ja n'aptʉjkʉts.
\v 4 Byeenʉts njamyetsy ja mwinnʉʉ, es njawin'ixaampy esʉts njotkujkʉdya'ayʉt.
\v 5 Pes njamyejtsypyʉts wi'ix mij amumdu'uk jot xymyʉbeky ja Dios, dʉ'ʉn éxtʉm yʉ mnanitʉ Loydʉ esʉ mda̱a̱gu'unk Eunisʉ, yʉ'ʉjʉty myʉda̱jttʉ jawyiinʉ tya̱dʉ mʉbʉjkʉn, es nmʉda̱jtypyʉts ja tʉy'a̱jtʉn ko mij tyam nandʉ'ʉn xymyʉdaty.
\p
\v 6 Pa̱a̱ty ndukjamyetsy es xyajmʉ́jʉt ja madakʉn di'ibʉ Dios mmooyʉ kots mij ngʉ'ʉnikooñ.
\v 7 Pesʉ Dios kyaj oj xymyo'oyʉm di'ibʉ mʉʉt njʉjptsʉ'kʉm njʉjpja̱'a̱m, ja'a ojts xymyo'oyʉm es njotmʉktákʉm mʉt ja tsojkʉn es mʉt ja jʉjwijtsʉmbijtʉn.
\v 8 Pa̱a̱ty katʉ mdsoydyúñ es xymyadya̱'a̱gʉt ja Nindsʉn'a̱jtʉm esʉ 'yʉxpʉjkʉn, es ni mʉt ʉj kots yam n'ity tsimy yʉ'ʉgyʉjxm ja Nindsʉn'a̱jtʉm, es nik mʉdanʉ mʉt ja Diosʉ myʉk'a̱jtʉn ja ayo'on jotmay di'ibʉ yajpátp ja'agyʉjxm ja oybyʉ ayuk.
\v 9 Dios oj xyajnitsókʉm es oj xytyukniwo'om es njiky'a̱jtʉm wa̱'a̱ts, kyaj ko naty ti tʉ ndu'unʉm oy, ja'a dʉ'ʉn mʉt ko dʉ'ʉn ttuknibʉjtákʉ, es mʉt yʉ'ʉgyʉjxmʉ Kristʉ oj xytsyojkʉm extʉ ma̱ natyʉ naxwíñʉdʉ kyakojyñʉm.
\v 10 Tʉ dya'íxyʉdyʉ tya̱dʉ tsojkʉn ko myiiñ jyajty ja nYajnitsokpʉ'a̱jtʉm Jesukristʉ, di'ibʉ myʉmadak ja o'kʉn, es yʉ'ʉgyʉjxm ja oybyʉ ayuk yajxón yajka̱jxwa'xy ko yʉ'ʉ xyajjikypyʉka̱'a̱nʉm es xymyo'oya̱'a̱nʉm ja jiky'a̱jtʉnʉ winʉ xʉʉ winʉ tiempʉ.
\p
\v 11 Diósʉts xywyin'ijx esʉts nga̱jxwa̱'xʉdʉ tya̱dʉ oybyʉ ayuk, es xykyejxyʉts éxtʉmʉ apóstʉlʉ esʉts nya'ʉxpʉ́kʉt di'ibʉ kyaj 'yisraelítʉty.
\v 12 Pa̱a̱tykyʉjxmʉts ngu'ayowʉ tʉgekyʉ tya̱a̱dʉ. Per kyajts ndsoydyúñ, mʉt ko nnija̱'a̱bʉts ma̱ts tʉ nbʉjta'aky amumdu'uk ja nwinma̱'a̱ñʉts, es nmʉda̱jtypyʉts ja tʉy'a̱jtʉn ko yʉ Kristʉ myʉda̱jtypy ja mʉk'a̱jtʉn es tkuwa̱'a̱nʉt ja tuunk di'ibʉts tʉ xytyuknipeky extʉ ko myínʉtnʉm yʉ'ʉ.
\p
\v 13 Padún ja ʉxpʉjkʉnʉ oybyʉ éxtʉm tʉ xymyʉdoy ma̱ ʉjtsʉn, es jiky'at ma̱ ja mʉbʉjkʉn es ja tsojkʉn di'ibʉ nmʉda̱jtʉm ti'igyʉ mʉdʉ Jesukristʉ.
\v 14 Mʉt ja Espíritʉ Santʉ pyudʉjkʉn di'ibʉ ijtp ma̱ ʉdsa̱jtʉm, kwentʉ'at di'ibʉ Dios tʉ mduk'amʉbʉjta̱a̱gʉty.
\p
\v 15 Mnija̱'a̱p ko nidʉgekyʉ di'ibáty tso'ondʉp ma̱ yʉ Asyʉ ñaxwíñʉdʉ xyñikáktʉts, es extʉ yʉ Fijelʉ esʉ Ermójʉnʉs.
\v 16 Wa'an ja Dios tmʉdaty ja pa''ayo'on ma̱ ja di'ibʉ tsʉna̱a̱ydyʉp ma̱ ja Onesífʉrʉ jyʉʉn tyʉjk, mʉt ko kana̱k ókʉts xyñimiiñ es oj dyajkujkʉ ja n'a̱a̱ njótʉts, es kyaj tsyoydyuuñ óyʉts nja'ijty tsimy.
\v 17 Nik ni'igʉ ko jyajty Romʉ, nétʉts oj xy'ʉxta̱'a̱y extʉ kots xypyaty.
\v 18 Wa'anʉ Nindsʉn'a̱jtʉm Jesús myo'oyʉty ja pya''ayo'on ko myínʉt jatʉgok. Mij mnija̱'a̱p yajxón nʉ'ʉn oj xyjantsypyudʉjkʉm jap Éfesʉ.
\c 2
\s Wi'ixʉ Timotee tmʉdánʉt ja ayo'on Jesukristʉkyʉjxm
\p
\v 1 Es mij Timotee, di'ibʉts n'u'unkniwaampy, mʉdat ja mʉja̱a̱ kunu'xʉngyʉjxm di'ibʉ nmʉda̱jtʉm ko n'ijtʉm ti'igyʉ mʉt ja Jesukristʉ.
\v 2 Ja a̱a̱ ayuk di'ibʉ tʉ xymyʉdoy ngajxyʉts mayjya'ay windum, tuknipʉk mij yʉ ja̱'a̱yʉty di'ibʉ jʉna̱a̱mp tʉy'a̱jtʉn es mba̱a̱t dya'ʉxpeky ja wiink ja̱'a̱yʉty óknʉm.
\p
\v 3 Dʉ'ʉn éxtʉm tu'ugʉ solda̱a̱dʉ tmʉmada'aky ja ayo'on, nandʉ'ʉn mij mʉmada̱'a̱k ja ayo'on Jesukristʉkyʉjxm.
\v 4 Pes ni tu'uk di'ibʉ solda̱a̱dʉ'a̱jtp tkatuktʉkʉ wiink ja̱'a̱yʉdyʉ tyu'unʉn, tyim'awijxypy es tkuydyúnʉt ja wyindsʉnʉ 'yana'amʉn.
\v 5 Nandʉ'ʉn ja̱jtpʉ dʉ'ʉn yʉ pʉyʉ'kkijxyʉbʉ, kyaj t'axa̱jʉ ja myay'aty pʉn kyaj tkuydyúñ éxtʉm ya''ane'emy.
\v 6 Nandʉ'ʉn ja ja̱'a̱y di'ibʉ kamduump myʉda̱jtypy ja tʉy'a̱jtʉn es jayʉjp tpʉ́kʉt ja pʉjta'aky.
\v 7 Yaj'yo'oy ja mjot mwinma̱'a̱ñ di'ibʉts ngajxypy, esʉ Nindsʉn'a̱jtʉm yʉ'ʉ mduknijáwʉdʉp yajxón tʉgekyʉ.
\p
\v 8 Jamyats ja Jesukristʉ, di'ibʉ jikypyʉjk óknʉm ko 'ye'ky, es ko yʉ'ʉ tyʉʉmp'a̱jt 'ya̱a̱ts'a̱jtʉ ja rey Davit. Tya̱a̱dʉ dʉ'ʉn ja oybyʉ ayuk di'ibʉts ʉj nga̱jxwa'xypy.
\v 9 Mʉt yʉ'ʉgyʉjxmʉ tya̱a̱dʉ di'ibʉts nga̱jxwa'xypy, nyajkejxy nyajna̱jxypyʉts ja ayo'on, extʉ ijtpʉts kʉwʉʉñ mʉt ja kadenʉ éxtʉm tu'ugʉ axʉk ja̱'a̱y. Per ja Diosʉ 'yayuk di'ibʉts nga̱jxwa'xypy, kyaj 'yity kʉwʉʉñ mʉt ja kadenʉ.
\v 10 Pa̱a̱dyʉts nyajkéxy nyajnáxyʉts tʉgekyʉ es ttuk'oy'áttʉt di'ibáty ja Dios wyin'ijx, es yʉ'ʉjʉty tmʉdáttʉt ja nitsokʉn di'ibʉ ja̱'a̱y myʉda̱jttʉp ko ti'igyʉ 'yittʉ mʉdʉ Jesukristʉ, ja nitsokʉn di'ibʉ winʉ xʉʉ winʉ tiempʉ es mʉt ni'igʉ mʉj'a̱jtʉn.
\q
\v 11 Tya̱a̱dʉ dʉ'ʉn tʉy'a̱jtʉn:
\q Pʉn tʉ n'o'kʉm mʉt yʉ'ʉ, nandʉ'ʉn nʉjx njiky'a̱jtʉm mʉt yʉ'ʉ.
\q
\v 12 Pʉn nmʉdʉna̱'a̱yʉm ja ayo'on, nʉjx nyajkutujkʉm nandʉ'ʉn mʉt yʉ'ʉ.
\q Pʉn n'ʉxtíjʉm yʉ'ʉ, xy'ʉxtíjʉm nandʉ'ʉn yʉ'ʉ.
\q
\v 13 Pʉn kyaj nguydyu'unʉm ja n'ayuk'a̱jtʉm ma̱ yʉ Kristʉ, yʉ'ʉ sitʉy kyuydyiimpy ja 'yayuk ma̱ ʉdsa̱jtʉm,
\q ja'a ko kyaj mba̱a̱t yʉ'ʉ tkanitanʉ ja 'yayuk.
\s Mʉduumbʉ di'ibʉ Dios 'yoyjya̱'a̱p
\p
\v 14 Tukjamyatstʉ tya̱a̱dʉ es tuknipʉktʉ Nindsʉn'a̱jtʉmgyʉjxm, es tmastu'uttʉt ja naygyajxytsyiigʉ mʉdʉ ayuk di'ibʉ ni madsoo kyatúñ. Yʉ'ʉ je'eyʉ yajma̱'ttʉp di'ibáty myʉdoodʉp.
\v 15 Tun extʉ mba̱a̱t xytyuk'oybyʉdsemy Dios windum, éxtʉm tu'ugʉ oybyʉ mʉduumbʉ di'ibʉ kyaj tii di'ibʉ tyuktsoydyúnʉp, di'ibʉ oy tuk'ʉxpʉjkp ja ayuk tʉy'a̱jtʉnbʉ.
\v 16 Katʉ xypyagajxy yʉ ayuk di'ibʉ kyaj tyuñ, mʉt ko di'ibʉ pyaga̱jxtʉp kya̱'a̱dʉ waanʉ ni'igʉ ma̱ ja peky ko tiempʉ ñaxy.
\v 17 Pes ja 'yʉxpʉjkʉnʉty kyajaajʉ éxtʉm ja pu'utsʉn kyajaajʉ. Yʉ'ʉ dʉ'ʉmbʉdyʉ dʉ'ʉn tadʉ nimajtskpʉty ja Imeneeʉ esʉ Filetʉ.
\v 18 Tʉ yʉ'ʉ tmastu'uttʉ ja tʉy'a̱jtʉn. Dʉ'ʉn jyʉna̱'a̱ndʉ ko ja jikypyʉjkʉn tʉ ñaxy, es dʉ'ʉn dyajjít dyajma̱'a̱ttʉ na̱a̱gʉty ja myʉbʉjkʉn.
\v 19 Per kyaj mba̱a̱t dyaj'yu'xtʉ ja Diosʉ tyʉy'a̱jtʉn, mʉt ko Dios tʉ tpʉjta'aky éxtʉmʉ potsy ʉjxʉ kʉkpʉ esʉ juumbʉ. Mba̱a̱t njʉna̱'a̱nʉm ko Dios kyejpy ja tyʉjk ma̱ tya̱dʉ potsy ʉjx, es ma̱ tya̱dʉ potsy ʉjx 'yity ja̱a̱ybyéty: “Yʉ Nindsʉn'a̱jtʉm 'yixy'ajtypy di'ibʉ yʉ'ʉ jya'a'a̱jtypy.” Es nan kʉxja̱'a̱y 'yity: “Di'ibʉ jʉnándʉp ko jya'a'átyʉdyʉ Nindsʉn'a̱jtʉm, tsojkʉp es tmastu'utʉt ja pojpʉ.”
\p
\v 20 Pes ma̱ tu'ugʉ mʉkja̱'a̱yʉ tyʉjk, kyaj jyatyim'yʉ'ʉyʉty tmʉdaty ja vasʉ esʉ texy di'ibʉ oorʉ es di'ibʉ platʉ, nan jap'a̱jtp ja naxtexy esʉ agujʉjtsʉnbyók; na̱a̱gʉty tyuñ windsʉ'kʉngyʉjxm es na̱a̱gʉty kyaj dʉ'ʉn tyuñ.
\v 21 Di'ibʉ nayya'ijtʉdʉp wa̱'a̱ts es ñayjyʉbékyʉty ma̱ ja axʉk'a̱jtʉn, dʉ'ʉn yʉ'ʉ éxtʉmʉ vasʉ esʉ texy di'ibʉ yʉ Nindsʉn'a̱jtʉm yajtiimpy ma̱ oytyim di'ibʉty ja tuungʉ oybyʉ.
\p
\v 22 Mastu'ut ja ʉna̱'ktʉjkʉdyʉ wyinma̱'a̱ñ. Panʉjx tu'ugʉ jiky'a̱jtʉn éxtʉm di'ibʉ Dios tsyejpy, di'ibʉ mʉbʉjkʉn mʉʉtpʉ, tsojkʉn mʉʉtpʉ, ti'igyʉ'a̱jtʉn mʉʉtpʉ, mʉt tʉgekyʉ di'ibʉ wa̱'a̱dsʉ 'ya̱a̱ jyot twindsʉ'ʉgʉdʉ Nindsʉn'a̱jtʉm.
\v 23 Katʉ xytyuñʉ kwentʉ lokʉ madya'aky di'ibʉ ni madsoo kyatúñ. Mnija̱'a̱p ko yʉ'ʉ yajmiimpy ja tsiptuunk.
\v 24 Tu'ugʉ Nindsʉn'a̱jtʉmʉ myʉduumbʉ kyaj 'yítʉt tsipoty; ni'igʉ 'yoyjya'ay'átʉt oypyʉ́nʉty mʉʉt, di'ibʉ jyajtypy es ya'ʉxpʉ́kʉt, myʉdátʉp ja ma'xtujkʉn
\v 25 es tjʉjwijtsʉmbítʉt mʉt ja tuda'aky'a̱jtʉn ja di'ibʉ nʉgoo kʉxkoop, wa'anxyʉp ja Dios tnayyajjʉmbijtpʉt ja wyinma̱'a̱ñ es tjaygyúkʉt ja tʉy'a̱jtʉn,
\v 26 wyij kyajtʉt, es dʉ'ʉn kya'íttʉt éxtʉm mba̱a̱t njʉna̱'a̱nʉm ma̱ ja mʉjku'ugópk myʉdátyʉty tsimy es tyuktuna̱'a̱ñʉty oytyiity éxtʉm yʉ'ʉ ttseky.
\c 3
\s Wi'ix naty ja ja̱'a̱yʉty ko ja ayo'onxʉʉ tpátnʉt
\p
\v 1 Nijawʉ ko ma̱ naty ttimpatnʉ myina̱'a̱ñ ja Jesukristʉ, byeen ayo'on mʉʉt 'yaknaxa̱'a̱ñ ja xʉʉ tiempʉ.
\v 2 Ja ja̱'a̱yʉty jyʉmbijnʉdʉt adsojkpʉty, meeñ'oogʉty, mʉj kʉjxmʉty, nʉgoo ñaygyuya̱'a̱xʉdʉ kʉdiinʉm pʉ́n, kyaj tmʉmʉdowdʉ tya̱a̱k tyeedyʉty, ni ti tkamʉjjáwʉdʉ, kyaj tmʉj'íxtʉ Dios,
\v 3 kyaj tmʉdattʉ ja oyjyot es ni pa''ayo'on, abi'ts, kyaj ñayjyʉjwijtsʉmbítʉdʉ, myʉdsip tʉgekyʉ di'ibʉ oy,
\v 4 yajja̱'a̱y'o'kpʉty, oytyiity ttuktʉ́kʉdʉ, es mʉj pátʉp. Yʉ'ʉyʉ 'yʉxta̱'a̱yándʉp ja xik awʉ'kʉk ma̱ jyapa̱a̱dyʉty t'awdáttʉt ja Dios.
\v 5 Dʉ'ʉn ñay'andíjʉdʉt éxtʉmxyʉp myʉbʉktʉ, per kyaj tkupʉktʉ ja mʉk'a̱jtʉn ko jyiky'áttʉt éxtʉmʉ Dios ttseky.
\p Katʉ mda'anmúk mwa̱'kmúktʉ mʉdʉ dʉ'ʉmbʉ ja̱'a̱y.
\v 6 Mʉt ko yʉ'ʉjʉty tyʉ́kʉdʉ ma̱ yʉ wiink tʉjk es t'awindumbʉka̱'a̱ñ ja toxytyʉjkʉ pekymyʉʉtpʉ, di'ibʉ pawijts pawo'onʉp oytyim di'ibʉ axʉʉkpʉ winma̱'a̱ñʉty,
\v 7 es yʉ'ʉyʉm pyajʉdijttʉp ja ʉxpʉjkʉn, per ni na̱'a̱ nʉjx tkajaygyúkʉdʉ ja tʉy'a̱jtʉn.
\v 8 Tya̱dʉ yedyʉjkʉty yʉ'ʉ pyanʉjxtʉp ja ñʉ'ʉ tyu'u ja ejiptʉ brújʉty Janʉs esʉ Jambrʉs, di'ibʉ myʉdsijp'a̱jtʉ ja Moisés, es yʉ'ʉjʉty nandʉ'ʉn tmʉdsip'attʉ ja tʉy'a̱jtʉn. Tʉ wyinma̱'a̱ñdyʉgóydyʉ ma̱ mʉbʉjkʉn.
\v 9 Per kyaj dyajkajaajʉt, mʉt ko nidʉgekyʉ ja̱'a̱yʉty tnijáwʉdʉt ko yʉ'ʉ kyulókʉty, dʉ'ʉn éxtʉm jyajtyʉ tadʉ nimajtskpʉ ejiptʉ brújʉty ko tmʉdsijptʉ ja Moisés.
\s Di'ibʉ Pa̱a̱blʉ 'yaktuknipʉjk ja Timotee
\p
\v 10 Per mij mbadiimpy yajxón ja n'ʉxpʉjkʉnʉts, éxtʉmts njiky'aty, éxtʉmts tʉ nduknibʉjta̱a̱gʉ, éxtʉmdsʉ nmʉbʉjkʉn, éxtʉmts nma'xtíky, éxtʉmdsʉ ndsojkʉn, éxtʉmts tii nyajkéxy nyajnáxy,
\v 11 kots nyajpajʉdíty es kots n'ayoy. Mnija̱'a̱p yajxón tʉgekyʉ éxtʉmts ʉj nja̱jty ngʉbejty ma̱ yʉ kya̱jpnʉ Antyokiiʉ, Ikoñʉ es Listrʉ, kots ngu'ayo'ojʉ axʉʉk ma̱ts nyajpajʉdijty. Per ja Nindsʉn'a̱jtʉm xyajtsókʉts ma̱ tʉgekyʉ tadʉ ayo'on.
\v 12 Pes tʉy'a̱jtʉnʉ'ʉ ko nidʉgekyʉ di'ibáty jiky'atándʉp wa̱'a̱ts ma̱ Jesukristʉ, yajpajʉditándʉp yʉ'ʉ.
\v 13 Perʉ axʉk ja̱'a̱yʉty esʉ win'ʉ'ʉmbʉty dʉ'ʉñʉm ñʉjxtʉt waanʉ ni'igʉ o'ktʉ́y, jya'aywyin'ʉʉndʉt es ñaywyin'ʉʉnʉdʉt kʉ'ʉm.
\p
\v 14 Per mij, it yajxón mʉt ja di'ibʉ tʉ xyjaty es mʉt di'ibʉ tʉ xymyʉbeky. Mij mnija̱'a̱p pʉ́n tʉ mdukni'íxʉty.
\v 15 Pes extʉ tʉ mdimmutsku'unk'áty tʉ xyñijawʉ ja Diosʉ jyaaybyajtʉn. Yʉ'ʉ mduknijáwʉdʉp es myajnʉjxʉdʉt ma̱ ja nitsokʉn mʉt yʉ'ʉgyʉjxmʉ mmʉbʉjkʉn ma̱ Jesukristʉ.
\v 16 Dios wyinma̱'a̱ñmyooy ja jya'ayʉty es tkʉxja̱'a̱yʉt tʉgekyʉ ja Diosʉ jyaaybyajtʉn, es tʉgekyʉ tadʉ Diosʉ jyaaybyajtʉn tuump oy es nya'ʉxpʉjkʉm, nduk'ana'amʉm, nya'o'oyʉm, es njʉjwijtsʉmbijtʉm pʉ́n éxtʉm jyiky'átʉt tʉy'a̱jtʉn mʉʉt,
\v 17 dʉ'ʉn ja Diosʉ jya'ay kexy ka'pxy 'yʉxpʉ́ktʉt, tnijáwʉdʉt es ttúndʉt tʉgekyʉ ja oybyʉ tsujpʉ tuunk.
\c 4
\p
\v 1 Yʉ Dios esʉ Nindsʉn'a̱jtʉm Jesukristʉ 'yijx ñija̱'a̱dʉp éxtʉm n'anʉʉmʉ. Pes mina̱a̱mp ja Jesukristʉ éxtʉmʉ yajkutujkpʉ es ttukkumʉdowa̱'a̱ñ ja jiky'a̱jtpʉty es ja o'kpʉty éxtʉm pyaadyʉty nidu'uk nidu'uk.
\v 2 Ka̱jxwa̱'x ja Diosʉ 'yayuk es xytyuknipʉ́ktʉt ja ja̱'a̱yʉty es tmʉbʉ́ktʉt, jʉjwijtsʉmbít, jotmʉkwinga̱jxʉ es ya'ʉxpʉk ma'xtujkʉn myʉʉt.
\v 3 Mʉt ko pya̱a̱dʉp ja tiempʉ ma̱ ja ja̱'a̱yʉty kyaj tnakymyʉdanʉya̱'a̱ndʉt ja ʉxpʉjkʉnʉ oybyʉ; ja'ayʉ tyúndʉp éxtʉm ja kyujuun winma̱'a̱ñʉty, 'yʉxta̱'a̱ydyʉp may'aampy ja ya'ʉxpʉjkpʉty, per yʉ'ʉyʉ di'ibʉ yʉ'ʉjʉty tsyojktʉp tmʉdoo'ita̱'a̱ndʉ,
\v 4 es kyaj tmʉdoo'ita̱'a̱ndʉt ja tʉy'a̱jtʉn, ja'ayʉ myʉdoo'ita̱'a̱ndʉp oytyim di'ibʉ jekymyadya'agyʉty.
\v 5 Per mij, naywyijts'yo'oyʉdʉ, wa'an ttimti ttimwi'ixʉty. Mʉdanʉ ja m'ayo'on. Ijtp xykya̱jxwa̱'xʉt ja oybyʉ ayuk. Tuk'ix ja ja̱'a̱yʉ Kristʉ ñʉ'ʉ tyu'u. Kuydyún yajxón mʉt ja mduunk éxtʉm ja Diosʉ myʉduumbʉ.
\p
\v 6 Es ʉj, windsʉ'kʉnts nnʉjxánnʉ, tyimpátypyʉts ja n'o'kʉn.
\v 7 Tʉts nmʉmada'aky ja tsip. Dʉ'ʉnʉts ʉj éxtʉmʉ ja̱'a̱y di'ibʉ tʉ pyʉyʉ'kja̱'ty ko pyʉyʉ'kkijxyʉdʉ. Kyajts ʉj nmastu'uty ja mʉbʉjkʉn.
\v 8 Es tyam xy'awijxpʉts ja may'aty ja'agyʉjxm kots tʉ njiky'aty tʉy'a̱jtʉn mʉʉt. Ja Nindsʉn'a̱jtʉm di'ibʉ pyaye'epy éxtʉm pyaadyʉty, ja'ats xymyo'oya̱a̱mp ja may'aty ja xʉʉ ko myínʉt. Es kyaj 'yʉjtsʉty je'eyʉ, nandʉ'ʉn di'ibáty ijt xoondʉp ko myina̱'a̱ñ.
\s Pa̱a̱blʉ ttuk'ane'emy ja Timotee wi'ix tyúnʉt
\p
\v 9 Tunʉ may'a̱jtʉn nimiingʉts tsojk.
\v 10 Pesʉ Demʉs, ja'a 'yadsejpy di'ibʉ yajpátp naxwiiñ, tʉts xyñike'eky es tʉ ñʉjxnʉ Tesalónikʉ. Kresentʉ tʉ ñʉjxnʉ ma̱ Galasyʉ ñax, esʉ Titʉ tʉ ñʉjxnʉ ma̱ yʉ ñaxwíñʉdʉ Dalmasyʉ.
\v 11 Yʉ'ʉyʉ dʉ'ʉnʉ Lukʉs ak'ijtp ja yam mʉt ʉj. Ʉxta̱'a̱y yʉ Markʉs es mmínʉt mʉʉt, mʉt ko mba̱a̱dʉts xypyudʉkʉ ma̱ ja tuunk.
\v 12 Yʉ Tíkikʉ tʉts ngexy ma̱ yʉ Éfesʉ ka̱jpn.
\v 13 Ko mmínʉt, myajmínʉpts ja nnimótsʉts di'ibʉts nyajwʉ'ʉm Troʉs ma̱ yʉ Karpʉ tyʉjk; myajmínʉp nandʉ'ʉn ja nnékyʉts abity'ambʉ, es katʉ xyjaydyʉgoy ja nja̱a̱ybyajtʉnbo'o'ák.
\p
\v 14 Pujxnga̱'tspʉ Alejandrʉ byeenʉts tʉ xytyuñ axʉʉk. Yʉ Nindsʉn'a̱jtʉm tukkumʉdówʉdʉp éxtʉm tʉ 'yadʉ'ʉtsy.
\v 15 Mnaygywentʉ'átʉdʉp mʉdʉ tadʉ Alejandrʉ, mʉt ko mʉk tʉ tmʉdsip'aty di'ibʉ nga̱jxwa̱'xʉm.
\p
\v 16 Kots ʉj tim jawyiin njanayñika̱jxtu'udánʉ ma̱ ja justisʉtʉjk, ni pʉ́nʉts xykyapu'ʉ'ʉ xykyapuka̱jxʉ. Nidʉgékyʉts xymyastutta̱a̱ydyʉ. Perʉ Dios tyúnʉp ja may'a̱jtʉn es kʉdiibʉ tpʉjktʉ́kʉdʉ tya̱a̱dʉ.
\v 17 Per ja Nindsʉn'a̱jtʉm xypyudʉjkʉts es xymyʉja̱a̱mooyʉts, éxtʉmts mba̱a̱t nga̱jxwa̱'xta̱'a̱y tʉgekyʉ ja nitsokʉn es t'ix tmʉdówdʉt nidʉgekyʉ ja̱'a̱yʉty di'ibʉ kyaj 'yisraelítʉty. Es dʉ'ʉnʉ Nindsʉn'a̱jtʉm xyajtsékyʉts es kyajts ja ka̱a̱ ʉj xytsyu'tsy,
\v 18 es yʉ'ʉts xy'akkuwa̱'a̱nʉp mʉt oytyim di'ibʉ axʉk'a̱jtʉnʉty, es xypyʉjkʉ'ʉgʉdʉts es xyajnʉjxʉdʉts ma̱ yʉ tsa̱jpótmʉdʉ kyutujkʉn. Mʉj'a̱jtʉn mʉʉt yʉ'ʉ 'yítʉt winʉ xʉʉ winʉ tiempʉ. Wa'an dʉ'ʉnʉty.
\s Ka̱jxpo'xʉn
\p
\v 19 MayDios xy'anʉʉmʉdʉ Prisilʉ esʉ Akilʉ, es ja di'ibʉ tsʉna̱a̱ydyʉp ma̱ ja Onesífʉrʉ jyʉʉn tyʉjk.
\v 20 Erastʉ tʉ wye'emy Korintʉ; esʉ Trófimʉ, mʉt ko pa̱'a̱mbajt, nnikékyʉts Miletʉ ka̱jpnóty.
\v 21 Tunʉ may'a̱jtʉn es mmínʉt na̱a̱m kyajnʉm myiñ ja xux tuboj.
\p MayDiósʉkʉ dʉ'ʉn jyʉna̱'a̱ndʉ Eubulʉ, Pudentʉ, Linʉ, Klaudyʉ es nidʉgekyʉ nmʉgu'uk'a̱jtʉm.
\p
\v 22 Wa'anʉ Nindsʉn'a̱jtʉm Jesukristʉ t'ity mʉt mij, es wa'an ja Dios mgunu'xʉdʉ nidʉgékyʉty miidsʉty.